Abayobozi b’ibihugu byombi bagiranye ibiganiro byibanze ku ngingo zitandukanye ariko by’umwihariko bibanda ku gushimangira umubano, amahoro n’umutekano w’ibihugu byombi n’Akarere muri rusange, nk’uko byatangajwe n’ibiro by’Umukuru w’Igihugu cya Uganda.

Perezida Kagame yageze muri Uganda ku gicamunsi cyo kuri iki cyumweru aho biteganyijwe ko yitabira ibirori by’isabukuru y’imyaka 48 ya Lt Gen Muhoozi Kainerugaba, umuhungu wa Perezida Museveni akaba n’umugaba mukuru w’Ingabo za Uganda zirwanira ku butaka.

Umukuru w’Igihugu cy’u Rwanda akigera ku kibuga cy’indege cya Entebbe, yakiriwe na Lt Gen Muhoozi nyirizina aherekejwe na Minisitiri w’Umutekano Jim K. Muhwezi, hamwe n’uhagarariye inyungu za Uganda mu Rwanda Anne Katusiime ndetse na Ambasaderi w’u Rwanda muri Uganda Col Joseph Rutabana.

Perezida Kagame agiriye uruzinduko muri Uganda mu gihe hari icyizere cy’uko umubano w’ibihugu byombi uri kugenda usubira mu buryo, ahanini biturutse mu biganiro yagiye agirana na Gen Muhoozi mu bihe bitandukanye. Amakuru agaragaza ko Perezida Kagame yaherukaga muri iki gihugu mu myaka ine ishize.

Gen Muhoozi ubwe yatangaje ko yahisemo gutegura ibirori rusange mu kwizihiza isabukuru ye, mu rwego rwo kwishimira aho umubano wa Uganda n’u Rwanda ugeze uzahuka.

Biteganyijwe ko kandi muri uru ruzinduko rwe, Perezida Kagame agirana ibiganiro na mugenzi we wa Uganda, Yoweri Kaguta Museveni.

Ibihugu byombi u Rwanda na Uganda bimaze iminsi bigaragaza ubushake bwo kuzahura umubano wari umaze imyaka ibarirwa muri itatu urimo agatotsi.

Perezida Kagame agiriye uruzinduko muri Uganda, nyuma y’uko Gen Muhoozi Kainerugaba na we yari aherutse kugirira ingendo mu Rwanda inshuro ebyiri, nyuma yaho hakaba haragiye habaho koroshya zimwe mu ngamba zari zarafashwe harimo nko gufungura umupaka uhuza ibihugu byombi.

Ni ibirori byizihirijwe i Kampala ahitwa Rugogo Cricket ground, ndetse no mu bindi bice bitandukanye by’igihugu. Abaturage batangiye kwitabira ibi birori guhera saa munani z’amanywa, ariko Gen Muhoozi wari wizihije Isabukuru ye ahagera saa kumi n’ebyiri.

Bamwe mu bagiye bafata ijambo bagaragaje amarangamutima yabo aho bose bamusengeraga bamuraga intebe ya se bifuza ko yazayicaramo bamusabira kurama ngo azabayobore.

Ubwo abitabiriye ibi birori babwirwaga ko Perezida w’u Rwanda akurikiye ibyo birori kuri Televiziyo ya NBS, abanya-Uganda bishimye cyane, kuko bavugaga ko umubano w’ibihugu byombi urimo kurushaho kuzahuka nyuma y’imyaka igera kuri itatu ishize ibihugu bitagenderana kubera ko imipaka yo ku butaka yari ifunze.

Abitabiriye ibyo birori basusurukijwe n’abahanzi batandukanye barimo na Massamba Intore waririmbye indirimbo zirimo Ikizungerezi maze abari mu birori barizihirwa.

Massamba Intore yashimiye Gen Muhoozi wamutumiye mu birori by’isabukuru ye y’amavuko

Muyoboke Alex uzwi mu gufasha abahanzi (Manager) na we yari ahari

Gen. Muhoozi ari mu ruzinduko rw’iminsi itatu, rukaba ari urwa kabiri agiriye mu Rwanda, aho yageze i Kigali ku wa Mbere tariki 14 Werurwe 2022, mu masaha ya mu gitondo akakirwa n’abayobozi batandukanye barimo abo muri Ambasade ya Uganda mu Rwanda hamwe n’abo mu nzego z’umutekano z’u Rwanda.

Mu bikorwa by’ingenzi akomeje kugirira mu ruzinduko rwe, kuri uyu wa Kabiri yasuye urwibutso rwa Jenoside yakorewe Abatutsi rwa Kigali aho yunamiye ndetse ashyira indabo ku mva aharuhukiye imibiri y’abasaga ibihumbi 250.

Gen Muhoozi yasuye kandi Ingoro y’amateka yo guhagarika Jenoside, iherereye ku Kimihurura ku Ngoro y’Inteko Ishinga Amategeko aho yavuze ko ubutwari bwaranze Ingabo za RPA ari ikintu ingabo zose za Afurika zifuza.

Gen Muhoozi yagize ati: “Ubutwari n’imikorere byaranze Intwari za RPA mu 1990-1994 ni ikintu ingabo zose zo muri Afurika zifuza. Ndashimira abantu bose bagize uruhare mu ntsinzi y’urwo rugamba.”

Nyuma ya saa sita yaboneyeho gusura inyubako y’imikino y’intoki ariko ishobora no kwakira ibitaramo, Kigali Arena. Ndetse mu mafoto yashyizwe ahagaragara yerekana uyu mugabo w’imyaka 47 anaga umupira wa Basketball aho batsinda ibitego.

Earlier today, President Kagame received General Muhoozi Kainerugaba at his farm where he gifted him with Inyambo cows. pic.twitter.com/BmXHadPZap

— Presidency | Rwanda (@UrugwiroVillage) March 15, 2022

Gen. Muhoozi yasuye urwibutso rwa Jenoside rwa Kigali

Gen. Muhoozi usanzwe ari n’umujyanama wa Perezida Museveni ushinzwe ibikorwa bidasanzwe, ku rwibutso rwa Jenoside yakorewe Abatutsi MU 1994, yatambagijwe ibice birugize, yunamira ndetse ashyira indabo ku mva iruhukiyemo imibiri y’inzirakarengane zisaga 250,000.

Gen. Muhoozi yageze i Kigali ku wa Mbere tariki 14 Werurwe 2022, mu masaha ya mu gitondo, mu ruzinduko rwe rwa kabiri agiriye mu Rwanda, aho yakiriwe n’abayobozi bo muri Ambasade ya Uganda mu Rwanda hamwe n’abo mu nzego z’umutekano z’u Rwanda.

Gen Muhoozi uri mu ruzinduko rw’iminsi itatu, ku munsi wambere w’uruzinduko rwe, akaba yarakiriwe na Perezida Paul Kagame, aho bagiranye ibiganiro byibanze ku mubano w’ibihugu byombi, nk’uko ibiro by’Umukuru w’Igihugu cy’u Rwanda byabitangaje. Bikaba biteganyijwe ko azitabira ibikorwa bitandukanye.

Gen. Muhoozi usanzwe ari n’umujyanama wa Perezida Museveni, yageze i Kigali mu masaha ya mu gitondo kuri uyu wa Mbere, ibiganiro bye na Perezida Kagame bikaba byibanze ku mubano w’ibihugu byombi, nk’uko ibiro by’Umukuru w’Igihugu cy’u Rwanda byabitangaje.

Ubwo yari ageze mu Rwanda, Lt Gen Muhoozi yakiriwe n’abayobozi bo muri Ambasade ya Uganda mu Rwanda hamwe n’abo mu nzego z’umutekano z’u Rwanda.

Ni uruzinduko rwa kabiri agiriye mu Rwanda muri uyu mwaka wa 2022, dore ko yahaherukaga tariki 22 Mutarama 2022, icyo gihe agirana ibiganiro na Perezida Kagame, byibanze ku kunoza umubano w’ibihugu byombi.

Ni ibiganiro yakunze kugaragaza ko byatanze umusaruro abinyujije ku mbuga nkoranyambaga, kuko nyuma y’ibyo biganiro hagiye hatangazwa gahunda zijyanye no koroshya ubuhahirane bw’ibihugu byombi no gufungura imipaka.

President Kagame is now meeting with General @mkainerugaba, Senior Presidential Advisor on Special Operations and Commander of UPDF Land Forces to discuss Rwanda-Uganda relations. pic.twitter.com/5X8MgcO64d

— Presidency | Rwanda (@UrugwiroVillage) March 14, 2022

Kuri uyu wa Mbere ubwo yari ageze mu Rwanda, Lt Gen Muhoozi yakiriwe n’abayobozi bo muri Ambasade ya Uganda mu Rwanda hamwe n’abo mu nzego z’umutekano z’u Rwanda.

Ni uruzinduko rwa kabiri agiriye mu Rwanda muri uyu mwaka wa 2022, dore ko yahaherukaga tariki 22 Mutarama 2022, icyo gihe agirana ibiganiro na Perezida Kagame, byibanze ku kunoza umubano w’ibihugu byombi.

Ni ibiganiro yakunze kugaragaza ko byatanze umusaruro abinyujije ku mbuga nkoranyambaga, kuko nyuma y’ibyo biganiro hagiye hatangazwa gahunda zijyanye no koroshya ubuhahirane bw’ibihugu byombi no gufungura imipaka.

Bizimana Abel, umuyobozi (Chairman) w’Akarere ka Kisoro

Agaragaza izo mbamutima, Bizimana Abel uyobora Akarere ka Kisoro muri Uganda, yifuje kuganira n’itangazamakuru ry’u Rwanda ririmo na Kigali Today, mu rurimi rw’Igifumbira rumeze nk’Ikinyarwanda.

Yatangiye agira ati “Ye baba weee!!, twari twarahombye, vuga uti guhomba kuko abantu bacuruzaga cyane cyane abagore urubyiruko, ba rwiyemezamirimo bato, hano buri wa mbere na buri wa kane kwabaga gucuruza ibintu byinshi, ibiribwa, za Soda, hano Cyanika ibicuruzwa byabaga biharunze, buri wese agura icyo ashaka”.

Arongera ati “Ariko igihe imipaka yakinzwe, abantu barahombye bamwe bari barafashe inguzanyo, mbese twari dufite igihombo cyo kuba barakinze umupaka kongeraho igihombo cyatewe na COVID-19, rero abantu nyobora ba Kisoro bangana n’ibihumbi 500 barakinguriwe”.

Uwo mugabo yemeje ko abatuye Kisoro 99,9% bafitanye isano n’u Rwanda. Avuga ko kuba bavuga urufumbira rumeze nk’ikinyarwanda, batandukanye n’abo mu tundi turere two muri Uganda, aho gufunga umupaka byari nk’irembo rifunze hagati ya bene wabo b’Abanyarwanda, none imigenderanire ikaba yasubukuwe.

Ati “Ubu turafunguriwe, ba Mama bagiye kujya baza mu bukwe natwe dutahe ubukwe mu Rwanda, abantu bajyaga i Kibeho bari barapfuye amagara, batagifite uburyo kuko hari abantu benshi bizerera muri Kibeho cyane bo muri Gatolika, ubwo amabisi agiye kujya ajya i Kibeho n’umugisha wiyongere”.

Uwo muyobozi wakomeje kugaragaza imvugo ye ashimira Perezida Paul Kagame, amwifuriza imigisha myinshi, ku ruhare yagize mu ifungurwa ry’uwo mupaka.

Agira ati “Ndashimira Nyakubahwa Perezida Paul Kagame, kuko ibyo adukoreye twebwe nk’abanya Kisoro, abafumbira, wenda agikoreye abanya Uganda bose ariko twe ni umwihariko, uru rurimi mvuga ntimugire ngo ni Ikinyarwanda ni urufumbira, uko tuvuga ni nako namwe muvuga”.

N’imbamutima nyinshi ati “Nyakubahwa Paul Kagame urakabyara ubyaje inyana, urakagira amata, urakagira ibyansi, uragahinga aho weza, yewe igihugu cy’u Rwanda kizahore kikwibuka iteka ryose”.

Ati “Kariya gafi ko ku mazi mu Kivu ntabwo nari ngaherutse, ndashaka uburyo njyayo ngashinge iryinyo numve uko Imana igira neza”.

Uwo muyobozi yashimiye na Parezida Museveni wa Uganda, washimye ibiganiro byahuje Perezida Kagame na Lt Gen Muhoozi Kainerugaba wakoze ibyananiye benshi mu bayobozi, mu bijyanye n’imishyikirano yo gusubukura umubano hagati y’u Rwanda na Uganda.

Ibyishimo byari byose ku bambuka

Uwo mugabo yavuze ko muri Kisoro bakomeje gufata ingamba zo kwirinda COVID-19, bagera ikirenge mu cy’u Rwanda yemeza ko rwamaze gufata ingamba zihamye zo kurwanya icyo cyorezo.

Yagize ati “COVID-19 turayirinda, dufite gahunda yose ya Leta yo kwirinda. Abanya Uganda twababwiye uko bakwiriye kwirinda COVID-19 kugira ngo batanduza Abanyarwanda, kandi Abanyarwanda byo musa nk’ababirangije kera, ubu turiteguye kuko abaturage banyotewe kwambuka, aho mvugira aha bamwe bamaze kugera muri Musanze bagiye”.

Uwo muyobozi (Chairman) Bizimana, yongeyeho ati “Abaturage bari bakumbuye i Kigali aho bakomeje kuvuga bati, nubwo twagera i Kigali tukahareba tukagaruka, Kigali hari harabaye hafi y’iwacu nk’umujyi utwegereye aho kujya Kampala, ariko kubera ifungwa ry’umupaka nta muntu wari ukigerayo”.

Mu gihe umupaka wa Cyanika wamaze gufungurwa, abemererwa kwambuka bakoresheje igipimo cya COVID-19 kidahenze (Rapid test) ni abatuye Musanze na Burera na Kisoro muri Uganda, naho udatuye muri utwo turere abanza gusabwa ibisubizo bya COVID-19 hakoreshejwe igipimo cya PCR.

Abo baturiye umupaka kandi, icyangombwa basabwa ni indangamuntu no kwerekana ko bikingije COVID-19, mu gihe abaturutse kure y’umupaka basabwa ibindi byangombwa birimo Pasiporo.

Inkuru bijyanye:

Umupaka wa Cyanika wafunguwe: Dore ibisabwa ushaka kwambuka

Babazwaga ibyangombwa

Byari ibyishimo byinshi ubwo mu ma saa tanu n’igice z’amanywa ku wa Mbere tariki 06 Werurwe 2022, umuturage w’u Rwanda wa mbere yanyuraga ku mupaka ajya muri Uganda abisikana n’undi wa Uganda wari uje mu Rwanda.

Muri uko guhura kwifata byanze barahoberana, barahagarara babazanya amakuru bishimye cyane, abandi bari bamaze kwerekana ko bujuje ibyangombwa bisabwa, na bo kwihangana biranga bambukana umuvuduko n’akanyamuneza kenshi, bamwe basuhuzanya, ari nako abandi baterurana bagaragaza urukumbuzi bari bafitanye.

Ugomba kwambuka umupaka hari ibyo asabwa, birimo kwipimisha COVID-19, mu rwego rwo kwirinda kuyanduzanya, dore ko itararangira nk’uko Umuyobozi w’akarere ka Burera, Uwanyirigira Marie Chantal, yabanje kubibasobanurira.

Yagize ati “Kuba umupaka wafunguwe, ni andi mahirwe ku baturage bacu kuko birongera imihahiranire, ni andi amahirwe ku baturage bafite abavandimwe hariya hakurya kongera gusurana, bakabonana n’imiryango, hakaba hari ibyo basabwa kuzuza kugira ngo babashe kwambuka cyane ndavuga ku ruhande rwacu”.

Ati “Hari gahunda zijyanye n’ubuzima, kugira ngo dukomeze duhangane n’icyorezo, hari ikijyanye no kuba umuturage yarikingije COVID-19, ariko kandi hari ikijyanye no kuba yarafatishije ibipimo ngo turebe uko ubuzima bwe bumeze”.

Ibisabwa umuturage utuye mu Karere ka Musanze na Burera, kugira ngo yambuke umupaka, bitandukanye n’ibisabwa undi muturage uturutse mu tundi turere. Ni nk’uko uturutse Kisoro muri Uganda ibyo asabwa bitandukanye n’ibisabwa undi muturage utuye mu tundi duce.

Ni amahirwe yahawe abaturiye umupaka, nk’uko Meya Uwanyirigira yakomeje abitangaza, ati “Abaturiye hafi aha, ni ukuvuga abo muri Burera na Musanze, icyo basabwa ni ukwipimisha Rapid Test y’amafaranga ibihumbi bitanu (5000), mu gihe abaturutse ahandi bo basabwa kwipimisha mu buryo buhenze bwitwa PCR Test”.

Arongera ati “No muri gahunda z’umupaka, hari ibindi bakwiye kuba buzuza, hari abasabwa Pasiporo, hari abasabwa indangamuntu nk’abaturage b’Akarere ka Burera n’abandi, ibyo barakomeza kubimenyeshwa n’inzego zisanzwe zibishinzwe. Umuntu niba afite ibyo asabwa akwiye kuba aca ku mupaka, icyo kikanadufasha kugira ngo dukumire ba bandi baca mu nzira zinyuranyije n’amategeko”.

Umuyobozi w’Akarere ka Burera, Uwanyirigira Marie Chantal, yageze ku mupaka wa Cyanika kureba uko ibikorwa byo kwambuka bihagaze

Gufungura umupaka byashimishije abaturage benshi, bavuze ko bizinesi zabo zari zaradindiye bagiye kuzisubukura, kandi biyemeza gukorana neza n’abaturage bo mu gihugu cya Uganda, nk’uko byari bisanzwe mbere.

Nzitabakuze Claver ati “Nengaga imisururu, nari mfite isoko rikomeye mu gihugu cya Uganda umupaka ufunze ngwa mu bihombo, none kuba umupaka wongeye gufungurwa, ni ibyishimo byinshi kongera gukorana n’abaturanyi bacu, ubu bizinesi yanjye yongeye gukora, n’ikimenyimenyi urabona ni njye muturage wambutse mbere y’abandi, byose biraturuka ku kuba nujuje ibisabwa, narikingije, namaze kwipimisha, ndishimye cyane”.

Nyirambonigaba Frolide ati “Naraye nicaye ntegereje ko bucya, ndashimira ubuyobozi bwacu bwatekereje ku mupaka wa Cyanika ukaba wongeye gufungurwa, nari narahombye pe, ubucuruzi bwanjye nakoreraga muri Uganda bwari bwarafunze, ubu maze kuvugana n’Abagande kuri telefoni, bambwiye ko bantegereje ngo mfungure ubucuruzi”.

Abaturage bari benshi ku mupaka

Ni n’ibyishimo kandi ku baturage bo muri Uganda, aho abaganiriye na Kigali Today ubwo bambukaga binjira mu Rwanda, bavuze ko umupaka ukimara gufunga, bagerageje gukorera mu bindi bihugu birabananira kubera ko batahuzaga ururimi, bishimira kuba bagarutse mu Rwanda.

Murera Geoffrey ati “Nahoze nshururiza hano mu Rwanda ku mupaka wa Cyanika, umupaka ukimara gufunga gucuruza birahagarara ndahomba, nagerageje kujya gucururiza muri Congo ntibyagenda neza nk’uko byagendaga hano mu Rwanda, kuko ari bene wacu tuvuga ururimi rumwe, twumvise ko umupaka wafunguwe biratunezeza cyane urabona ninjye winjiye mu Rwanda mbere, ngarutse kureba abaturanyi bacu ngo dusubukure ubucuruzi”.

N’ubwo uwo mupaka wafunguwe, hari abaturage by’umwihariko abatishoboye bagaragaje imbogamizi ku mafaranga yo kwipimisha COVID-19, mu gihe baba bagiye guca inshuro.

Mudasobanya Emmanuel ati “Ni byiza cyane twishimiye ko umupaka wafunguwe, ibiciro byari byazamutse biramanuka, isukari yari yageze ku 1700, gusa ikibazo ni ikijyanye no kwipimisha COVID-19, izo ni imbogamizi kuri twe nk’abantu bakennye ariko bikingije. Ikibazo ni ibyo bitanu uzatanga kandi ugiye guca inshuro y’amafaranga 1000”.

Babanje kumenyeshwa ibisabwa kugira ngo banyure ku mupaka wa Cyanika

Nyirabahire Anastasie ati “Twumvise ko mwamaze kudukingurira umupaka turishimye cyane, gusa nk’abadafite amafaranga yo kwipimisha COVID-19 ni ikibazo, abayobozi badufashe baturwaneho abakene, twarakingiwe ariko amafaranga yo kwipimisha ntayo pe!”

Iryo fungurwa ry’umupaka wa Cyanika ryashimishije cyane n’Umuyobozi (Chairman) w’Akarere ka Kisoro, Bizimana Abel, washimiye ubuyobozi ku mpande zombi, avuga ko iterambere ry’abaturage baturiye umupaka haba ku ruhande rwa Kisoro haba no ku ruhande rwa Burera na Musanze rigiye kurushaho kwiyongera.

Umuyobozi w’Akarere ka Burera, yasabye Abanyarwanda bakomeje kugana mu gihugu cya Uganda, kurangwa n’indangagaciro z’umunyarwanda birinda amakosa yatuma bagwa mu bibazo.

Ati “Icyo tubasaba ni uko igihe mugeze hakurya mukwiye kurangwa n’indangagaciro z’Umunyarwanda, bakora icyabajyanye kandi kibateza imbere kinabahuza n’abavandimwe bo muri Uganda. Mukwiye kugerayo mukirinda gukora amakosa, kwirinda gukora ibyaha byambukiranya umupaka, ni yo mpamvu ugiye tumusaba kuzuza gahunda zose haba izijyanye n’umupaka, haba no ku nzego z’ubuzima, byose biratuma urushaho kugenda mu buryo bwuzuye, ugende wemye”.

Hari abashinzwe kurwanya ikwirakwira rya COVID-19

Ibyishimo byari byose ku bambuka

Umupaka wa Cyanika

Inkuru bijyanye:

Umuyobozi wa Kisoro muri Uganda na we ngo yari akumbuye gutemberera mu Rwanda

Perezida Kagame yavuze ko hari icyatumye umupaka ufungwa, avuga ko hari ibibazo ibihugu byombi byari bifitanye.

Ati “Ntabwo umupaka wapfuye gufungwa gusa, ngo abantu babyuke mu gitondo basange umupaka ufunze. Hari impamvu, hari aho byaturutse. Ikibazo cyari ukuvuga ngo uyu mupaka ntushobora gufungurwa, ibyatumye ufungwa bitabanje ngo bikemurwe, bive mu nzira.”

Asobanura iby’intumwa Uganda yatumye ku Rwanda mu bihe bitandukanye, yavuze ko izo ntumwa zakunze kuza mu Rwanda hakaba impaka gusa ariko zidatanga igisubizo ku bibazo byariho.

Mu minsi ishize nibwo haje indi ntumwa isa n’iyihariye n’ubwo atayivuze mu mazina ariko byumvikanye ko ari General Muhoozi Kainerugaba, Umugaba w’Ingabo za Uganda zirwanira ku butaka, akaba umuhungu wa Perezida Museveni.

Perezida Kagame ati “Iyo ntumwa mu biganiro twagiranye, twumvikanye ko hari ibyo twese twakora. Ariko jye nkomeza kuvuga ko gufungura umupaka ni byiza, ariko kuwufungura udakemuye ikibazo cyatumye umupaka ufungwa, ntabwo ari byo, nta n’ubwo byakunda.”

Perezida Kagame avuga ko impande zombi zemeranyijweho ko ibyo byateye umupaka gufungwa na byo bigiye kwitabwaho. Yibukije ko kimwe muri ibyo byatumye Abanyarwanda batemererwa gukomeza kwerekera muri Uganda uko bishakiye byari mu rwego rwo kubarindira umutekano kuko bageragayo bagafatwa bagafungwa bagakorerwa iyicarubozo, bamwe bakagarurwa bakajugunywa ku mupaka ndetse bakamburwa n’ibyabo.

Babaga ngo bashinjwa ko ari intasi z’u Rwanda, nyamara ibi bikaba byari ukubabeshyera kugira ngo babone impamvu ituma bahohoterwa.

Perezida Kagame yagaragaje ko iyi mpamvu nta shingiro ifite kuko abahohotewe bose barimo abakecuru n’abana badashobora koherezwa muri ibyo bikorwa by’ubutasi. Yagize ati “Gutata ukohereza abantu amagana, igihumbi, kujya gutata, ukohereza n’abana n’abakecuru, ikiguzi cyabyo ntabwo nzi ko cyangana n’ibyo waba ushaka muri uko gutata. Waba uri umuswa muri uko gutata.”

Perezida Kagame anenga abahohoteraga Abanyarwanda muri Uganda ko bibandaga ku munyarwanda wese uvuga ko nta kibazo afitanye n’u Rwanda, nyamara abaruvuga nabi bo ntibagire icyo babatwara. Yanasobanuye ko aramutse ari n’ukoresha intasi yakohereza abo bavuga nabi u Rwanda mu gihe nyamara ari bo Uganda yafataga neza ntigire icyo ibatwara.

Ati “Urumva umuntu uvuga ko nta kibazo afitanye n’u Rwanda ari we waba waroherejwe gutata? Ahubwo ndi ubohereza nakohereza abo baza bavuga nabi u Rwanda.”

Perezida Kagame kandi yanenze Uganda ko yacumbikiraga abaza guhungabanya umutekano w’u Rwanda, ababashije guhunga bagahunga berekeza muri Uganda.

Yatanze urugero rw’abagabye igitero mu Kinigi mu Majyaruguru y’u Rwanda, bamwe barahagwa, ababashije guhunga bake bajya muri Uganda barafatwa barafungwa, ariko mu minsi mike amakuru aza kumenyekana ko barekuwe bagasubira muri bene ibyo bikorwa byo guhungabanya umutekano.

Perezida Kagame yagaragaje ko ibyo byose byagiye bimenyekana ndetse u Rwanda rukabiganiraho na Uganda rukerekana ko ibyo rukeneye ari umutekano, kuko abo bose Uganda ishyigikira ntacyo bashobora kugeraho.

Naho ku byo gufungura umupaka wa Gatuna byatangajwe mu minsi ishize mu mpera z’ukwezi kwa Mutarama 2022, Umukuru w’Igihugu cy’u Rwanda yasobanuye ko umupaka ugomba gufungurwa nk’uko biri mu nyandiko zatangajwe n’ibihugu byombi, ariko kandi hakabaho ingamba zo kwirinda ikwirakwira ry’icyorezo cya CPVID-19.

Ati “Ni ukuwufungura ariko ku buryo twirinda na COVID-19. Twashyizeho uburyo abayobozi ba Uganda n’u Rwanda barebana n’iby’ubuzima bahura bagashyiraho uburyo icyo kibazo kijyanye na COVID-19 cyakwitabwaho ku buryo kidatera ikibazo Uganda cyangwa u Rwanda.”

Perezida Kagame yemeje ko umupaka wafunguwe, kandi avuga ko bigaragara ko na Uganda irimo kuvana mu nzira inzitizi zagiye zigaragazwa ko zibangamiye umubano w’ibihugu byombi.

Nyuma y’uruzinduko rwa General Muhoozi mu Rwanda, Igihugu cya Uganda cyahise gikora impinduka muri zimwe mu nzego zacyo z’umutekano, bamwe mu basesenguzi bakavuga ko ibi byakozwe mu nyungu zo kongera guteza imbere umubano w’ibihugu byombi, dore ko bamwe mu bakuwe mu myanya bari bayoboye bavugwagaho gushyigikira abahungabanyaga umutekano w’u Rwanda.

Kureba amafoto menshi y’abitabiriye umuhango wo kurahira kw’abayobozi bashyizwe mu myanya muri Guverinoma, kanda HANO

Benshi mu bafite imirimo igize aho ihuriye n’ubwikorezi bw’abantu n’ibintu by’umwihariko abakoresha umuhanda wa Kigali-Gatuna-Kampala baravuga ko bishimiye isubukurwa ry’ingendo.

Katabuza Jean Claude, umushoferi wa Trinity Express, ni umwe mu baganiriye na Kigali Today. Katabuza yakoraga ingendo zijya n’iziva i Kampala akaba yari amaze imyaka itatu akazi ke karahagaze. Yagize ati “Nari mfite akazi, ariko aho imipaka ifungiwe akazi karahagaze ntangira gutera ibiraka, rimwe na rimwe bikabura ubushobozi buragabanuka bigira ingaruka no ku buzima bw’abana banjye mbahindurira ibigo bigaho. Ariko ubwo imipaka yafungutse ubu ubuzima bugiye gusubira mu buryo nk’uko byahoze.”

Ibi kandi abihuriyeho na benshi mu bateraga ibiraka muri Gare ya Nyabugogo byo kuyobora abagenzi ku modoka zikora ingendo Kigali - Kampala. Uwitwa Hassani yagize ati “Ubu amafaranga tugiye kongera kuyabona. Ku munsi najyaga ninjiza hagati y’ibihumbi 15 na 20 ariko ubu no kubona igihumbi na magana atanu (1500 Rwf) byari ikibazo hakaba n’igihe n’igihumbi utagicyura.”

Bongeye kubona akazi

Biturutse ku ngamba zo gukumira icyorezo cya Covid-19, ingendo kuri uyu mupaka zisa n’aho zitasubiye gukorwa nk’uko byahoze mbere, gusa icyizere kikaba ari cyose ko ibintu biza gusubira mu buryo, dore ko inzego z’ubuzima z’ibihugu byombi ziri kurebera hamwe amabwiriza azafasha urujya n’uruza rw’abaturage b’ibi bihugu.

Kurikira ibindi muri iyi video:

Waswa amaze guparika imodoka, agiye kwerekana i byangombwa bisabwa abinjira n’abasohoka

Ni nyuma gato y’ibiganiro Umugaba mukuru w’Ingabo za Uganda zirwanira ku butaka akaba n’umuhungu wa Perezida w’icyo gihugu, Yoweri Kaguta Museveni, Lt Gen Muhoozi Kainerugaba aheruka kugirana na Perezida wa Repubulika y’u Rwanda, Paul Kagame, ku itariki 22 Mutarama 2022.

Nyuma y’ibiganiro Lt Gen Mohoozi yagiranye na Perezida Kagame, Guverinoma y’u Rwanda yahise isohora itangazo rimenyesha ko uyu mupaka uzongera gufungura tariki 31 Mutarama 2022.

Mbere gato y’uko saa sita z’ijoro ryo ku wa 31 Mutarama 2022 zigera, abakozi bo mu rwego rw’abinjira n’abasohoka bari bamaze kwitegura gutangira akazi kabo, ari na ko abo mu nzego z’ubuzima na bo bari bamaze kuhagera kugira ngo uwaza gukenera gufashwa bimworohere.

Aha Waswa yerekanaga ibisabwa abinjira n’abasohoka

Saa Sita zimaze kugera na nyuma yaho gato nta kidasanzwe cyabaye kuko n’ubwo umupaka wari ufunguye ariko ari imodoka cyangwa abantu nta watambukaga, kugeza nka saa cyenda ubwo hazaga ikamyo yari itwawe n’umugande witwa Fredison Waswa Ndugwa, wavuze ko yari aturutse ahitwa Kamanyora muri Repubulika iharanira Demokarasi ya Kongo.

Ahagana saa cyenda n’igice nibwo yemerewe kwinjira, ubundi yakirwa n’urwego rw’abinjira n’abasohoka ku ruhande rw’u Rwanda hamwe n’inzego z’ubuzima aho yabajijwe ibisabwa byose byemerera umuntu kwambuka, ahangana saa kumi n’imwe n’iminota nk’icumi nibwo yemererewe kwambuka yerekeza muri Uganda.

Aganira n’itangazamakuru mbere y’uko yambuka, Ndugwa yavuze ko amaze imyaka hafi itatu akoresha umupaka wa Kagitumba ariko ngo ubwo yavaga Kamanyora, yumvishe amakuru avuga ko bafunguye umupaka wa Gatuna ashobora kuhanyura nta kibazo, ibintu yishimiye cyane.

Umupaka urafunguye

Ati “Ni iby’agaciro cyane kuko buri gihe byambabazaga iyo nageraga hariya mu Mujyi wa Kigali, nkareba inzira iza hano i Gatuna nkabona ari hafi cyane ugereranyije n’aho ngiye kujya Kayonza kugera Kagitumba mbona ari kure cyane. Ubu ndishimye cyane badufunguriye ukatira hariya gusa ukagerayo hakiri kare”.

Kubwe kandi, Ndugwe asaga gufungura umupaka wa Gatuna byerekana urukundo ibihugu byombi bisanzwe bifitanye.

Ati “Birerekana urukundo n’ubushuti hagati yacu, kubera ko Abanyarwanda n’Abagande turi abantu bamwe, kandi n’abayobozi bacu nta kibazo bafite barafatanyiriza hamwe kandi nshimishijwe n’uko nsanze ku mupaka hameze kubera ko nari maze imyaka itatu ntahanyura”.

Bamwe mu baturage baturiye umupaka wa Gatuna ku ruhande rw’u Rwanda Kigali Today yashoboye kuganira nabo, bayitangarije ko ku bwabo bumva ifungura ry’umupaka wa Gatuna ari nk’inzozi kuri bo.

Yousuf Ntahoruja wo mu Murenge wa Cyumba mu Karere ka Gicumbi, ubusanzwe akora ibijyanye n’ubucuruzi bwa Mobile Money, avuga ko bishimiye cyane ifungura ry’umupaka wa Gatuna, kuko ifungwa ryawo ryahungabanyije ibikorwa byabo by’ubucuruzi.

Ati “Igihombo nahuye nacyo ni uko serivisi natangaga yagabanutse kuko nko ku munsi nabonaga nk’ibihumbi 10, ariko umupaka bawufunze ntiyongera kuboneka. Ubu kuba bafunguye sinzi ukuntu nanabivuga, ni ibyishimo mfite na bagenzi banjye twese twishimye, kuko habaye impinduka, ni nk’izozi simfite n’uko nabivuga”.

Abanyamakuru bitabiriye icyo gikorwa

Usibye ubucuruzi bavuga ko bwakomwe mu nkokora n’ifunga ry’umupaka, ariko ngo nta kindi bigeze babura kuko ibyo bajyaga gushaka muri Uganda mbere, birimo kawunga na Jus batangiye kubibonera mu Rwanda.

Ubwo twandikaga iyi nkuru mu gitondo cyo kuri uyu wa mbere tariki 31 Mutarama 2022, kuva uyu mupaka ufungura ku mugaragaro hari hamaze kwambuka umuturage umwe, wari uturutse mu gihugu cya Uganda yinjira mu Rwanda, mu gihe ntawe ku ruhande rw’ u Rwanda wari wakambutse.

Muri ayo masaha nyirizina yo gufungura umupaka, nta bikorwa bidasanzwe byahagaragaye, dore ko nta n’ibirori cyangwa indi mihango yakozwe. Nta rujya n’uruza rwahagaragaye kuko hari no mu masaha y’igicuku, abantu benshi bakaba bari bakiri mu ngo zabo, ndetse imvura nyinshi ikaba yari irimo kugwa.

Icyakora mu masaha ashyira ayo mu rukerera haje ikamyo yari iturutse muri Repubulika Iharanira Demokarasi ya Congo, iragenzurwa, yemererwa gukomeza ijya muri Uganda.

Umuturage wa Uganda wari utwaye iyo modoka yavuze ko ashimishijwe n’uko umupaka wafunguwe akaba awunyuzeho mu ba mbere, ukaba umworohereje mu rugendo.

Abaturiye uwo mupaka na bo bari bamaze igihe batagenderana n’abaturanyi babo bishimiye ko ubu bigiye kongera kuborohera kuko bari bamaze igihe kirekire badasurana, ndetse ntibabashe gutabarana mu gihe cy’ibyago, cyangwa ngo bashyigikirane mu gihe cy’ibirori.

Icyakora n’ubwo umupaka wafunguwe, Umuvugizi wa Guverinoma y’u Rwanda wungirije, Alain Mukuralinda, yavuze ko Abanyarwanda bifuza kujya muri Uganda bagomba gushishoza no kwigengesera kuko kuba umupaka wa Gatuna wafunguwe bitavuze ko ibibazo byari bisanzwe hagati y’ibihugu byombi byarangiye.

I thank our great leaders, President @KagutaMuseveni and @PaulKagame for fully opening our borders! This is a wonderful achievement. Now our people can freely move, trade and interact as Almighty God always intended! God bless East Africa! pic.twitter.com/Tbm9YqIzU3

— Muhoozi Kainerugaba (@mkainerugaba) January 31, 2022

Abitangaje mu gihe umupaka wa Gatuna uhuza u Rwanda na Uganda wari ufunze guhera 2019 wongeye gufungurwa guhera tariki 31 Mutarama 2022.

Mu kiganiro yagiranye na RBA ku Cyumweru tariki ya 30 Mutarama 2022, Alain Mukuralinda yatangaje ko gufungura umupaka ari intambwe itewe ariko ko ibibazo u Rwanda rwagaragaje bitazaba bikemutse kubera ko umupaka wafunguwe, ahubwo abazagenda ngo bakwiye gushishoza.

Yagize ati “Iriya rero ni intambwe itewe ni ukuvuga ngo ntabwo ibibazo u Rwanda rwagaragaje bizaba bikemutse kubera ko umupaka wafunguwe, bivuze ngo abantu bazagenda kuko umupaka urafunguye ariko bagomba gukomeza gushishoza.”

Ati “Ni no kuvuga tuti ese ko u Rwanda rugaragaje ugushaka mu kujya muri ya nzira yo gukemura ibibazo, ese koko niko bihise bigenda? Ejo ntabazakubitwa? Ntabazahohoterwa? Ntabazamburwa ibintu? Ese hari umuntu wo mu mutwe runaka mu bashaka guhungabanya umutekano w’u Rwanda wirukanywe cyangwa wafashwe? Ntekereza ko ibyo ari byo dukomeza kureba ko bitungana.”

Ibicuruzwa biva hanze bigiye kongera kunyuzwa ku mupaka wa Gatuna

Bafite impungenge ko inganda z’u Rwanda zahomba nyamara ngo zari zimaze kwiyubaka no gukora byinshi bisimbura ibyavanwaga muri Uganda mbere y’uko umubano w’ibihugu byombi uzamo agatotsi.

Umucuruzi witwa Twizeyimana avuga ko u Rwanda rwari rumaze gufata igihe gihagije cyo kubaka inganda guhera ku zikora ibikoresho by’isuku(impapuro, amasabune, amavuta yo kwisiga) izitunganya ibiribwa nk’isukari, amavuta, inzoga, amata,...

Avuga ko abahinzi-borozi na bo bari bamaze kugira ubushobozi bwo gutanga umusaruro uhagije w’ibiribwa nk’ibitoki, inyanya, inyama, ibirayi, ibishyimbo, ibigori n’ifu yabyo(kawunga).

Twizeyimana yagize ati "Ndabyibuka ko ikilo cy’ibishyimbo cyari amafaranga 350 mbere y’uko umupaka ufungwa, umaze gufungwa biratumbagira bigurwa amafaranga 600, ariko nyuma yaho ibishyimbo mu Rwanda byarabonetse byongera gusubira hasi."

Twizeyimana yumva hagombye gushyirwaho imisoro ku bituruka hanze kugira ngo bitaza bibuza ibyakorewe mu Rwanda kugurwa.

Aba bacuruzi barimo uwitwa Mudive n’umubyeyi bari kumwe, ntabwo babasha kwiyumvisha ko ibiciro by’ibicuruzwa byazasubira uko byahoze mbere y’ifungwa ry’imipaka.

Umugishwanama mu bijyanye n’ubukungu n’imari, Straton Habyarimana, avuga ko kugira ngo ibicuruzwa by’u Rwanda bishobore guhanganira ku isoko rimwe n’ibivuye muri Uganda, bisaba gufata ingamba nshya hakiri kare.

Habyarimana yagize ati "Impungenge zagombye kubaho mu gihe inganda zacu zidafite uburyo zigomba guhindukana n’igihe tugezemo. Umunyenganda arebe niba azagabanya ibiciro, niba azongera ubwiza, niba azongera uburyo abigeza ku bacuruzi, niba azafata irindi soko ahandi mu kindi gihugu,...hagire ikintu gihinduka mu mitekerereze n’imyifatire".

Habyarimana ashimangira ko bidashoboka gusubiza ibiciro byahozeho mbere y’ifungwa ry’imipaka y’ibihugu byombi, bitewe n’uko hari impamvu nyinshi zatumye bizamuka, harimo n’ingaruka z’icyorezo cya Covid-19.

Avuga ko kuba hari ibicuruzwa by’ubwoko butandukanye bizava muri Uganda bigahurira ku isoko rimwe n’iby’u Rwanda, ari impamvu ikomeye ituma abanyenganda b’u Rwanda bagomba kunoza imikorere.

Iri tangazo rya Guverinoma y’u Rwanda ni ryo ryaje rigaragaza ibimenyetso bikomeye byerekana ko umubano hagati y’u Rwanda na Uganda ugenda usubira mu nzira nziza, nyuma y’uruzinduko rwa Lt Gen Muhoozi Kainerugaba mu cyumweru gishize. Abayobozi benshi haba ku mugabane no mu karere bagaragaje ko gufungura uyu mupaka ari intambwe ikomeye.

Perezida wa komisiyo y’umuryango wa Afurika yunze Ubumwe (AUC), Moussa Faki Mahmat yishimiye iri tangazo ryashyizwe ahagaragara na Minisiteri y’Ububanyi n’Amahanga y’u Rwanda, akomoza ku mbaraga za Uganda mu gukemura bimwe mu bibazo u Rwanda rwagiye rugaragaza, bituma umubano uba mubi.

Yagize ati: "Nishimiye itangazo rya Guverinoma y’u Rwanda ryo kongera gufungura umupaka wa Gatuna guhera tariki 31 Mutarama 2022; ni intambwe ishimishije mu bikorwa bikomeje gukorwa n’ibihugu byombi bituranye kugira ngo umubano wabyo ushoboke.”

Ni itangazo kandi ryazamuye ibyishimo by’abaturage ku mpande zombi mu gihe ibihugu byombi bisa nk’aho bigamije gukemura amakimbirane.

Ni nyuma y’uruzinduko umujyanama wa Perezida Yoweri Museveni mu bya gisirikare akaba n’umugaba w’Ingabo zirwanira ku butaka, Lt Gen Muhoozi Kainerugaba, yagiriye mu Rwanda ku wa 22 Mutarama 2022. Aho yahuye na Perezida Paul Kagame i Kigali baganira ku mibanire y’ibihugu byombi, ndetse ibiganiro bagiranye bemeye gutera intambwe ifatika mu gukemura ibibazo byateje amakimbirane hagati y’u Rwanda na Uganda mu myaka ishize.

Guverinoma ya Uganda na yo yagaragaje ko yishimiye itangazwa ry’uko umupaka wongeye gufungurwa, bikaba byari bimwe mu bibazo by’ingenzi byaganiriweho.

Iryo tangazo rigira riti: “Guverinoma ya Uganda yishimiye itangazo ryashyizwe ahagaragara na Minisiteri y’Ububanyi n’Amahanga n’Ubutwererane mpuzamahanga y’u Rwanda binyuze ku rubuga rwabo rwa Twitter, ku bijyanye no gufungura umupaka wa Katuna / Gatuna.”

Rikomeza rigira riti: “Twishimiye imbaraga abakuru b’ibihugu byombi Yoweri Kaguta Museveni na Paul Kagame bashyize mu kugarura umubano ukomeye w’amateka y’ibihugu byombi. Ni ngombwa mu mibereho myiza y’ibihugu byombi. Dutegereje gukomeza ubufatanye mu gukemura izindi nzitizi zose zitubuza umubano mwiza.

Umuryango wa Afurika y’Iburasirazuba (EAC), na wo wagaragaje ko icyemezo Leta y’u Rwanda yafashe cyo gufungura umupaka wa Gatuna, umwe mu mipaka iruhuza na Uganda, ari inkuru yo kwishimira.

Umunyamabanga Mukuru w’Umuryango wa Afurika y’Iburasirazuba Dr Peter Mathuki yavuze ko gufungurwa k’uriya mupaka byerekana umusaruro w’ibiganiro bimaze iminsi hagati y’ubuyobozi bukuru bw’ibi bihugu.

Dr Mathuki yagize ati: “Gufungura umuhanda munini kandi ukoreshwa n’ibinyabiziga byinshi mu guhahirana ni intambwe nziza yagezweho mu gutuma amasezerano y’ubuhahirane hagati y’ibihugu bigize aka karere ashyirwa mu bikorwa. Bizafasha ishyirwa mu bikorwa ry’amasezerano ibihugu by’aka Karere byasinyanye mu koroshya ubuhahirane ndetse byoroshye n’urujya n’uruza rw’abantu n’ibintu.”

Dr Mathuki yavuze ko icyemezo cya Guverinoma y’u Rwanda ari ikimenyetso cy’uko umubano mwiza uri kugaruka hagati y’abaturage b’ibihugu byombi ndetse ko bizagirira akamaro abatuye ibindi bihugu by’Umuryango wa Afurika y’Iburasirazuba (EAC).

Saa kumi n’ebyiri n’iminota 20 nibwo bagejejwe ku biro by’abinjira n’abasohoka ku ruhande rw’u Rwanda, harimo abagabo 47, abagore batandatu (06) n’abana batanu (5) ndetse n’Umurundi umwe.

Bafashwe mu bihe bitandukanye bakaba barafungiwe ahantu hatandukanye bashinjwa kwinjira muri Uganda no kuhaba mu buryo bunyuranyije n’amategeko ndetse no kuba bamaneko b’u Rwanda.

Uyu murundi akaba yaragiye Uganda avuye mu nkambi ya Mahama.

Mu itangazo Minisiteri y’Ububanyi n’Amahanga yashyize ahagaragara, yavuze ko iyi ntambwe igezweho nyuma y’uko igihugu cya Uganda kigaragaje ubushake bwo gukemura ibibazo u Rwanda rwakunze kugaragaza nk’ibibangamiye ubusugire n’abaturage barwo, ari na byo byari byarabaye intandaro y’ifungwa ry’imipaka ihuza ibihugu byombi.

Iryo tangazo rigira riti: "Nyuma y’uruzinduko rwa Lt Gen Muhoozi Kainerugaba, Umugaba Mukuru w’Ingabo za Uganda zirwanira ku butaka(UPDF), uheruka gusura u Rwanda tariki 22 Mutarama 2022; Guverinoma y’u Rwanda yabonye ko hari ubushake bwo gukemura ibibazo u Rwanda rwagaragaje ndetse n’ubushake bwa Leta ya Uganda bwo gushaka umuti w’ibitarakemuka".

Iri tangazo rikomeza rishimangira ko tariki 31 Mutarama 2022, aribwo umupaka wa Gatuna uzafungurwa. Urujya n’uruza mu bihugu byombi, rukazajya rukorwa mu buryo bwubahirije ingamba zo kwirinda ikwirakwizwa ry’icyorezo cya Covid-19 nk’uko no ku yindi mipaka bigenda.

Minisiteri y’Ububanyi n’Amahanga ibinyujije muri iri tangazo, yashimangiye ko Guverinoma y’u Rwanda ishyize imbere gukemura ibibazo biri hagati y’ibihugu byombi. Gufungura umupaka, bikaba bikozwe mu rwego rwo koroshya, kwihutisha no kwerekana ubushake bwarwo mu kuzahura umubano, hagamijwe gukemura ibibazo biri hagati y’ibihugu byombi.

Umupaka wa Gatuna uhuza u Rwanda na Uganda wafunzwe mu mwaka wa 2019, biturutse ku kuba Abanyarwanda barafungirwaga muri Uganda mu buryo bunyuranyije n’amategeko, bagakorerwa ihohoterwa n’iyicarubozo ndetse u Rwanda rukaba rwaranagaragaje igihugu cya Uganda ko cyashyigikiraga ibikorwa by’abahungabanya umutekano w’u Rwanda.

Major General Abel Kandiho

Maj Gen Kandiho muri Uganda ufatwa nk’umusirikare ukomeye mu butasi, akuweho nyuma y’iminsi mike umuhungu wa Perezida Museveni, Lt Gen Muhoozi Kanierugaba, avuye mu Rwanda mu ruzinduko rugamije kuzahura umubano w’ibihugu byombi, aho yanagiranye ibiganiro na Perezida Paul Kagame.

Kuva mu myaka mike ishize, CMI yavuzwe mu bikorwa byo gushyigikira imitwe y’iterabwoba igamije guhungabanya umutekano w’u Rwanda, ikabafasha gushaka abarwanashyaka n’abarwanyi bashya. Bamwe mu babyangaga bakorerwaga iyicarubozo, ndetse benshi mu Banyarwanda batandukanye bafatirwaga muri Uganda bafungwaga n’urwo rwego rwa CMI nyuma bakarekurwa batanagejejwe imbere y’inkiko. Ibi ni bimwe mu byo u Rwanda rwakomeje gusaba iyi Leta guhagarika.

Ibinyamakuru byinshi muri Uganda byatangaje ko impamvu nyamukuru y’izi mpinduka ishingiye ku bihano Ishami rya Minisiteri y’Imari ya Amerika rishinzwe kugenzura imitungo y’abanyamahanga (OFAC), ryafatiye abantu 15 n’ibigo bine byo muri Syria, Iran na Uganda mu Kuboza 2021.

Bashinjwa uruhare rukomeye mu guhungabanya uburenganzira bwa muntu no kwibasira inzirakarengane z’abasivili, abatavuga rumwe n’ubutegetsi n’abigaragambya mu ituze.

Icyo gihe Minisiteri y’Imari ya Amerika yavuze ko Major General Abel Kandiho n’abandi ba Ofisiye ba CMI bafashe, bagafunga ndetse bagahohotera mu buryo bubabaza umubiri abantu batandukanye muri Uganda. Gusa iyi Raporo ntiyigeze ivugamo cyangwa ngo igaragazemo u Rwanda.

Amerika yatangaje ko yafatiye ibihano Kandiho nk’umuyobozi w’urwego ubwarwo cyangwa abarukorera bagize uruhare mu byaha bikomeye byo kubangamira uburenganzira bwa muntu kandi ari we urukuriye.

Kugeza ubu Kandiho akaba yahawe inshingano nshya zo guhagararira Uganda mu bya gisirikare muri Sudani y’Epfo. Gen Muhoozi Kainerugaba, Umugaba Mukuru w’ingabo zirwanira ku butaka muri Uganda, akaba n’umujyanama wa Perezida Museveni mu by’umutekano, yashimiye Kandiho na Birungi ku nshingano nshya bahawe.

Nyuma y’ibyo biganiro abayobozi bombi bagiranye muri Village Urugwiro, Perezida Kagame yanakiriye ku meza Gen. Muhoozi Kainerugaba.

Gen Muhoozi Kainerugaba usanzwe ari n’Umujyanama Mukuru wa Perezida Museveni ushinzwe ibikorwa bya Gisirikare, yageze i Kigali mu gitondo cyo kuri uyu wa Gatandatu tariki 22 Mutarama 2022, mu ruzinduko rw’umunsi umwe.

Ubwo yageraga i Kigali, yakiriwe n’ushinzwe Ububanyi n’amahanga wa Ambasade ya Uganda mu Rwanda, Anne Katusiime hamwe n’abandi bayobozi mu Ngabo z’u Rwanda. Barimo Brigadier General Willy Rwagasana uri mu bashinzwe umutekano w’abayobozi bakuru b’igihugu na Col Ronald Rwivanga, Umuvugizi w’Ingabo z’u Rwanda.

Lt Gen Muhoozi Kainerugaba, yageze i Kigali mu gitondo cyo kuri uyu wa Gatandatu mu ruzinduko rw’umunsi umwe, aho yazaniye Perezida Kagame ubutumwa bwihariye bwa mugenzi we wa Uganda, Yoweri Kaguta Museveni.

Ambasade ya Uganda mu Rwanda yatangaje ko Gen. Muhoozi Kainerugaba, yasuye u Rwanda mu ruzinduko rwihariye rugamije guhura no kuganira na Perezida Kagame.

Ubwo yageraga i Kigali, Gen. Kainerugaba yakiriwe n’umuyobozi ushinzwe Ububanyi n’amahanga muri Ambasade ya Uganda mu Rwanda, Anne Katusiime, hamwe n’abandi bayobozi mu Ngabo z’u Rwanda, barimo Brigadier General Willy Rwagasana uri mu bashinzwe umutekano w’abayobozi bakuru b’igihugu, na Col Ronald Rwivanga, Umuvugizi w’Ingabo z’u Rwanda.

Uru ruzinduko ruje nyuma yaho ku wa mbere w’iki cyumweru, Perezida Kagame, yari yakiriye mu biro bye, Adonia Ayebare, intumwa yihariye ya Perezida Museveni.

Lt Gen Muhoozi akaba n’Umugaba mukuru w’Ingabo za Uganda zirwanira ku butaka, aje mu Rwanda mu gihe kuva mu ntangiriro z’iki cyumweru ku mbuga nkoranyambaga zitandukanye by’umwihariko Twitter, hakomeje gukwirakwira amakuru avuga ko rushobora kuba.

Ni nyuma yaho ku Cyumweru tariki 16 Mutarama 2022, Lt Gen Muhoozi yari yanditse ku rubuga rwa Twitter, avuga ko Perezida Kagame ari nyirarume/sewabo, ko abamurwanya baba barwanya umuryango we, ati bagombye kwitonda.

Ingendo z’abayobozi bakuru ba Uganda mu Rwanda zije mu gihe umubano hagati y’ibihugu byombi umaze igihe utifashe neza, aho u Rwanda rwakomeje gushinja Uganda kuba itera inkunga imitwe igamije guhungabanya umutekano warwo nka FDLR, P5, FLN n’indi, ndetse no kuba Uganda ifunga Abanyarwanda binyuranyije n’amategeko, bakanakorerwa iyicarubozo.

Uganda na yo ikunze kuvuga ko abo Banyarwanda bafatirwa muri icyo gihugu baba ari intasi z’u Rwanda, mu gihe rwo rubihakana.

Mu rwego rwo gukemura ibibazo biri mu mibanire y’ibihugu byombi, mu minsi ishize hagiye habaho ibiganiro mu bihe bitandukanye, ndetse hashyirwaho na Komisiyo ishinzwe gukurikirana ishyirwa mu bikorwa ry’amasezerano ya Luanda ibihugu byombi byashyizeho umukono, ariko imbaraga zashyizwe mu gushaka gukemura ikibazo, ntacyo ziratanga kugeza ubu.

Bakigera ku mupaka wa Kagitumba, bakiriwe n’Urwego rw’Abinjira n’Abasohoka ku ruhande rw’u Rwanda.

Bafashwe bashinjwa gutura, kuba muri Uganda mu buryo bunyuranyije n’amategeko n’ubwo bamwe banyuze ku mupaka wemewe. Hari n’abandi bashinjwa kuba ba maneko b’u Rwanda.

Nizeyimana Hassan ukomoka mu Karere ka Rubavu yagiye mu gihugu cya Uganda mu Karere ka Cyankwanzi muri Gicurasi 2016 anyuze ku mupaka wa Cyanika.

Avuga ko yaje kuhava ajya ahitwa Wakiso ari na ho yafatiwe ku wa 23 Ugushyingo 2021, ajyanwa gufungirwa ahakorera urwego rushinzwe iperereza mu gisirikare cya Uganda (CMI) i Mbuya ahafungirwa ukwezi n’ibyumweru bibiri akorerwa iyicarubozo.

Nizeyimana ngo yakubitwaga ijoro n’amanywa ahatirwa kwemera ko ari maneko w’u Rwanda.

Yavuye muri CMI ajya gufungirwa mu kigo cya gisirikare cya Makenke aho yamaze iminsi ine nabwo akubitwa nyuma ajyanwa kuri Polisi ya Mbarara ari na ho yavuye agarurwa mu Rwanda.

Mu rukiko ngo yashinjwe gutunga ibyangombwa bya Uganda kandi atari umuturage wayo.

Twizerimana Edison wo mu Karere ka Nyabihu yagiye mu gihugu cya Uganda muri 2018 anyuze ku mupaka wa Cyanika. Yakoreraga imirimo isanzwe ahitwa Wakiso ari na ho yafatiwe ku wa 23 Ugushyingo 2021 ajya gufungirwa muri CMI i Mbuya ahamara ukwezi n’ibyumweru bibiri akubitwa amanywa n’ijoro.

Nyuma yoherejwe mu kigo cya gisirikare cya Makenke ahamara iminsi ine nyuma afungirwa muri kasho ya Polisi ya Mbarara ari na ho yavuye agarurwa mu Rwanda.

Twizerimana yashinjwaga kuba maneko w’u Rwanda no kwinjira muri Uganda mu buryo bunyuranyije n’amategeko.

Uwitwa Rwabizi ukomoka mu Karere ka Gicumbi yagiye muri Uganda mu 2008 ahitwa Nakasongola aho yakoreraga imirimo y’ubuhinzi afatwa tariki 03 Kanama 2021 n’igisirikare cya Uganda ajya gufungirwa muri CMI i Mbuya mu gihe cy’amezi atanu akubitwa amanywa n’ijoro.

Avuga ko yakubitwaga kugira ngo yemere ko ari maneko w’u Rwanda no gutura muri icyo gihugu mu buryo bunyuranyije n’amategeko.

Nyuma yajyanywe mu kigo cya gisirikare cya Makenke ahamara iminsi ine, nyuma ajyanwa muri kasho ya Polisi ya Mbarara ari na ho yavuye azanwa mu Rwanda.

Muri aba Banyarwanda bagejejwe ku mupaka wa Kagitumba bari bafunzwe bashinjwa kuba no kwinjira muri Uganda mu buryo bunyuranyije n’amategeko no kuba ba maneko b’u Rwanda, harimo abasore babiri ari bo Dukuze Gervais na Hakizimana Thadée bakoreraga akazi muri Kenya bakaba baragiyeyo banyuze muri Tanzaniya ku mupaka wa Rusumo mu mwaka wa 2019.

Mu kugaruka mu Rwanda bifashishije inzira ya Uganda bafatirwa i Mbarara n’igisirikare cya Uganda ku wa 03 Mutarama 2022, bajya gufungirwa muri kasho ya Polisi ya Mbarara.

Aba bombi ngo bambuwe n’igisirikare cya Uganda amashilingi ya Kenya ibihumbi 24, ni ukuvuga abarirwa mu bihumbi 214 mu mafaranga y’u Rwanda.

Aba Banyarwanda uko ari 31 bagejejwe ku mupaka wa Kagitumba benshi bagiye bamburwa amafaranga, abandi bateshwa imitungo yabo bari bamaze kubonera muri icyo gihugu.

Umwe muri bo byagaragaye ko afite ubwandu bwa COVID-19 akaba agomba kubanza kwitabwaho n’abaganga, naho abanda 30 bacumbikiwe mu kigo cya IPRC-Nyagatare mu kato bakazahava berekeza mu miryango yabo.

Uko ari 48 bagizwe n’abagabo 29, abagore 9 n’abana 10 bakaba bari bafungiye muri gereza zitandukanye harimo iya gisirikare ya CMI i Mbuya iherereye mu mujyi wa Kampala.

Bavuga ko imitungo basizeyo n’amafaranga bari bafite mu ntoki bambuwe n’abasirikare babafashe ndetse n’aho bari bafungiwe muri kasho za Polisi arenga miliyoni 136 z’amashilingi ya Uganda.

Muri aba Banyarwanda bagejejwe ku mupaka wa Kagitumba i Nyagatare harimo abafite umwihariko w’uko bakuriye mu gihugu cya Uganda ndetse hakabamo n’abariyo kubera gukora umurimo w’Imana (Ivugabutumwa).

Kamana Emmanuel, umushumba mu itorero Life Church riherereye mu Murenge wa Rwempasha, yagiye muri Uganda ahitwa Rwentobo mu Karere ka Ntungamo ku butumire bw’igiterane cy’ivugabutumwa.

Gisoje ngo cyakomereje mu Karere ka Masaka, ku itariki ya 12 Kanama 2021, afatwa n’igisirikare cya Uganda afungirwa mu kigo cya gisirikare cya Masaka iminsi ine ahavanwa ajya gufungirwa muri CMI i Mbuya mu mujyi wa Kampala.

Uyu muvugabutumwa yashinjwe kuba maneko w’u Rwanda, yavanywe i Mbuya yoherezwa mu kigo cya gisirikare cya Mbarara ahitwa Makenke aha hombi akaba yarahabaye akubitwa uko bukeye n’uko bwije ndetse akaba yaranakorewe iyicarubozo.

Avuga ko batamugiriye n’impuhwe kuko yambuwe miliyoni enye z’amashilingi ya Uganda ari yo yakabaye aheraho yivuza inkoni yakubiswe.

Niyonkuru Obed w’imyaka 31 y’amavuko avuga ko atazi iwabo gusa akemeza ko bishoboka ko ari mu Karere ka Kayonza. Yemeza ko mu 1994 yisanze mu nkambi y’impunzi ya Nakivale mu Karere ka Isingiro arahakurira ahava mu mwaka wa 2008 nyuma y’uko uwamureraga yitabye Imana 2006.

Yakomereje ubuzima mu mujyi wa Kampala aho yacurangaga Piano muri korari ya Baraka and Blessings.

Ku itariki 23 Gicurasi 2021, yafatiwe ahitwa Mengo ajya gufungirwa mu kigo cya gisirikare cya CMI Mbuya ashinjwa gutura muri Uganda mu buryo bunyuranyije n’amategeko.

Avuga ko yavuye i Mbuya yoherezwa i Mbarara muri kasho ya Polisi aho yavuye yoherezwa mu Rwanda.

Avuga ko imitungo asize mu gihugu cya Uganda ifite agaciro karenga Miliyoni 63 z’amashilingi ya Uganda.

Abanyarwanda bari bafungiye mu gihugu cya Uganda harimo abasizeyo imiryango yabo aho bari batuye ndetse n’abasize bamwe mu bayigize muri gereza.

Ndahayo Samuel avuga ko yari atuye Gomba akaba ari na ho yasize urugo rwe harimo umugore n’abana batatu.

Ndahayo yafungiwe muri CMI Mbuya mu gihe cy’amezi ane ashinjwa gutura muri Uganda mu buryo bunyuranyije n’amategeko aha akaba yarahavuye yoherezwa kuri sitasiyo ya Polisi ya Mbarara ari na ho yavuye yoherezwa mu Rwanda.

Undi uvuga akababaro yahuye na ko ni Butera Eliphaz wagiye muri Uganda mu mwaka wa 2014 atura ahitwa Gomba akaba yari atunzwe no guhinga no korora.

Yafashwe muri Nyakanga 2021, ajya gufungirwa i Mbuya muri gereza ya gisirikare ahamara amezi abiri ashinjwa gutura muri Uganda mu buryo bunyuranyije n’amategeko n’ubwo ngo nta rukiko rwigeze rumuburanisha.

Muri gereza ya CMI Mbuya ahasize umugore we Nyirahabimana Epiphanie w’imyaka 51 y’amavuko n’umuhungu we Hakizimana Samuel w’imyaka 18 ushinjwa kuba maneko w’u Rwanda.

Butera Eliphaz asaba abandi Banyarwanda kudahirahira kujya muri Uganda kuko nta mutekano Abanyarwanda bahafite ahubwo n’ibyo bahakorera ayo bakuyemo bayamburwa bakagaruka amara masa.

Avuga ko mu gihugu cya Uganda mu Karere ka Gomba yari atuyemo asizeyo umutungo ubarirwa mu mashilingi ya Uganda arenga miliyoni 50.

Abanyarwanda bamaze igihe bakorerwa iyicarubozo muri Uganda bamwe bakajugunywa ku mupaka batabasha kugenda

Dr Biruta yagize ati "Uko ibintu byari bimeze, ntacyahindutse cyane, ariko twe nka Leta y’u Rwanda twiteguye kugarura umubano mwiza n’ibihugu duturanye harimo na Uganda.Ariko kugira ngo tubishobore, ni uko habaho ubushake bwa politiki bw’icyo gihugu.Tugomba gukemura ibibazo twaganiriyeho guhera mu myaka ishize, harimo ikibazo cy’Abanyarwanda bahohoterwa mu gihe bambutse umupaka bajya muri Uganda ndetse n’abatuyeyo".

"Mu bindi twaganiriyeho harimo kuba icyo gihugu gitera inkunga imitwe yitwaje intwaro ishaka guhungabanya umutekano w’igihugu cyacu. Twiteguye kubaka umubano mwiza, ariko hagomba kubaho ubushake bwa politiki".

U Rwanda rushinja Uganda kuba itera inkunga imitwe igamije guhungabanya umutekano warwo harimo ’FDLR’, ’P5’, na ’FLN’, iyo mitwe ikaba ikorera muri Repubulika iharanira Demokarasi ya Congo.

Mu rwego rwo gukemura ibibazo biri mu mibanire y’ibihugu byombi, habayeho ibiganiro byakubiwe mu masezerano hagati y’impande zombi yiswe ’Luanda MoU’, ariko Dr Biruta yavuze ko izo mbaraga zose zashyizwe mu gushaka gukemura ikibazo, ntacyo ziratanga kugeza ubu.

Hashyizweho Komisiyo ishinzwe gukurikirana ishyirwa mu bikorwa ry’ayo masezerano ya Luanda nyuma y’uko Perezida Paul Kagame w’u Rwanda ahuye na Perezida Yoweri Museveni wa Uganda muri Nzeri 2019.

Perezida wa Angola Joao Lourenco na mugenzi we wa ’RDC’ Felix Tshisekedi bari abahuza muri ibyo biganiro, bagiriye inama ibihugu byombi yo kuganira ku bibazo byahungabanyije umubano wabyo guhera mu myaka mike ishize, bakabiganiraho ntacyo bahishanya.

Umubano w’u Rwanda n’u Burundi uragenda umera neza

Dr Biruta avuga ko ibiganiro bimaze igihe bikorwa hagati y’u Rwanda n’ u Burundi bigenda bigira icyo bitanga nubwo hakiri ibikeneye gukorwa.

Minisitiri Biruta yagaragaje uko u Rwanda rubanye n’u Burundi na Uganda

Yagize ati, "Abayobozi bakuru bashinzwe iperereza mu ngabo mu bihugu byombi, bamaze guhura inshuro ebyiri, tuzakomeza gukorana na Guverinoma y’u Burundi, ariko aho bigeze ubu, ibintu biragenda neza. Hari n’ibindi bikorwa bizakurikira uruzinduko rwa Minisitiri w’intebe w’u Rwanda mu Burundi".

Minisitiri w’intebe w’u Rwanda Dr Edouard Ngirente yasuye u Burundi mu ntangiriro z’uku kwezi kwa Nyakanga 2021, mu gihe bizihizaga ibirori by’isabukuru y’imyaka 59 u Burundi bumaze bubonye ubwigenge.

Mu ijambo Perezida w’u Burundi Ndayishimiye Evariste yavuze kuri uwo munsi, yavuze ko kubona itsinda ryaturutse mu Rwanda rije kwifatanya nabo muri ibyo birori, ari ikimenyetso gikomeye cy’uko hafungutse ipaji nshya mu mubano w’ibihugu byombi.

Umubano w’u Rwanda n’u Burundi wajemo ikibazo mu 2015, u Burundi bushinja u Rwanda gucumbikira abashaka guhungabanya umutekano wabwo.Ariko u Rwanda rwarabihakanye.

Ku rundi ruhande u Rwanda rwashinjaga u Burundi gufasha imitwe yitwaje intwaro gucengera mu Rwanda ije kwica abaturage b’inzirakarengane no kunyaga ibyabo.

U Rwanda n’u Burundi ni ibihugu bifite ibyo bihuriyeho nk’umuco, ururimi ndetse byabonye ubwigenge ku munsi umwe, tariki 1 Nyakanga 1962.

Hashize iminsi u Rwanda n’u Burundi bitangiye inzira yo kugarura umubano mwiza, kuko mu kwezi k’Ukwakira 2020 Minisitiri w’ububanyi n’amahanga w’u Rwanda Dr Biruta, yahuye na mugenzi we w’u Burundi, bahuriye ku mupaka wa Nemba, baganira uko bagarura umubano w’ibihugu byombi.

Umwe muri abo Banyarwanda 11 bari bafungiye mu gihugu cya Uganda witwa Ngamije Amri w’imyaka 58 y’amavuko, yabwiye Kigali Today ko ashimishijwe no kongera gukandagira ku butaka bw’u Rwanda nyuma y’imyaka 15 dore ko aho yari afungiye ngo yifuje kwiyahura ariko ntibyamukundira.

Ngamije Amri yagiye muri Uganda mu mwaka wa 2006 agiye gushakisha ubuzima. Yari asanzwe atuye mu Mujyi wa Kigali.

Avuga ko agezeyo yakoze akazi ko gutwara abagenzi mu modoka (Taxi Voiture) mu Mujyi wa Kampala cyane cyane ku kibuga cy’indege n’aho bisi za ONATRACOM zavaga mu Rwanda zaparikaga.

Tariki 04 Mata 2021, saa mbili z’ijoro ngo haje abantu iwe bambaye imyambaro ya gisivili bamubwira ko ari abasirikare kandi bamushaka.

Ati "Baraje bashuka umukozi wanjye arabakingurira, bambwira ko banshaka, ndababaza nti ko nta makosa ngira habaye iki? Bati ahubwo ufite menshi, banyambika amapingu jye n’umukozi batujugunya mu modoka, batwambika ibigofero mu maso badutwara i Mbuya."

Bukeye mu gitondo, Ngamije avuga ko bamutwaye iwe baramusaka ariko atarabwirwa igituma bamusaka, bahava basubira muri CMI, i Mbuya.

Undi munsi ngo batangiye kumubaza, mu byo yabajijwe ngo harimo ibyo akorana n’Abanyarwanda asubiza ko akorana na bo ubucuruzi.

Ikindi ngo yabajijwe icyo akorana n’abasirikare b’u Rwanda asubiza ko ntacyo.

Ngamije Amri avuga ko yakorewe iyicarubozo muri Uganda kugeza ubwo yashatse kwiyahura

Ati "Bambajije icyo nkorana n’Abanyarwanda ndetse n’abasirikare b’Abanyarwanda, ubwo umwe akaba yarakubitaga mu birenge undi akubita mu mugongo ku buryo inkoni ikoze mu nsinga yacitse."

Ngamije avuga ko yamaze iminsi ine muri gereza i Mbuya arya nabi kandi asanganywe ibibazo by’uburwayi bw’igifu, umuvuduko w’amaraso na asima.

Ngo yasabwe kutazongera gukandagira kuri Ambasade y’u Rwanda mu gihe yarekurwa.

Agira ati "Umusirikare umwe yarambwiye ngo Amri, nari ngiye kukohereza mu Rwanda ariko ndebye abana bawe nkugiriye impuhwe ariko ntuzongere gusubira kuri Ambasade y’u Rwanda, ndashoberwa ndabyemera nzi ko n’ubundi bitashoboka ariko n’ubundi yarambeshyaga."

Ngamije avuga ko bahise bamwimurira i Kireka, aho na ho yaje kubazwa ku bantu bamwicaye iruhande avuga ko atabazi ndetse na bo bavuga ko batamuzi.

I Kireka ngo yafungiwe ahantu hatari urumuri mu gihe aribwo yari akimara kwibagisha amaso ye yombi.

Avuga ko yakorewe iyicarubozo aho yakubitwaga inkoni zikoze mu nsinga. Ati "Nakubiswe inkoni nyinshi, yarakubitaga akamenaho umuti usukura intoki kugira ngo hahore. Barankubise inkoni iracika, ubu ndababara umugongo wose.”

Ngamije asanga Abanyarwanda badakwiye gukomeza kwirukira muri Uganda kuko bashobora kuhatakariza ubuzima.

Ngamije Amri avuga ko asize mu gihugu cya Uganda imodoka enye, amazu abiri ndetse n’inzu z’ubucuruzi ebyiri. Asizeyo kandi abana batatu n’umugore.

Avuga ko yashimishijwe no kubona yongeye kugera mu Rwanda kuko ngo ubuzima yari arimo bwarutwaga no gupfa.

Ati “Ndishimye, jye ndishimye cyane rwose. Gusa nakishimanye n’abana banjye none barabantesheje.”

Aba bana baribaza uko bazongera guhura n’ababyeyi babo

Ku wa Gatanu tariki ya 12 Werurwe 2021 nibwo Abanyarwanda batanu harimo abana babiri bavukana, bari bafungiye mu gihugu cya Uganda bagejejwe ku mupaka wa Kagitumba.

Aba bana umwe w’umuhungu afite imyaka 19 akaba yigaga mu mwaka wa kane w’amashuri yisumbuye mu gihe mushiki we w’imyaka 16 yigaga mu mwaka wa kabiri w’amashuri yisumbuye.

Uyu w’umuhungu avuga ko ababyeyi be baba i Kampala muri Uganda, bakaba baravuye mu Rwanda mu mwaka wa 2015 bagenda mu buryo bwemewe n’amategeko ndetse ngo banyuze ku mupaka wa Gatuna.

Icyakora avuga ko icyajyanye ababyeyi muri Uganda atakizi neza kuko yari umwana gusa ngo yisanze muri icyo gihugu ari ku ishuri yiga.

Ku gicamunsi cyo ku wa kane tariki ya 10 Ukuboza 2020 ngo abapolisi baje iwabo mu rugo aho bari batuye, baramufata we na mushiki we umukurikira bajya gufungirwa kuri sitasiyo ya Polisi ya Bukasa bashinjwa icyaha cyo kuba ba maneko b’u Rwanda.

Ati “Baje mu rugo nka saa cyenda baramfata jye na mushiki wanjye ariko babanje kutubaza aho ababyeyi bari tubabwira ko bari ku kazi. Batubajije ibyangombwa tubabwira ko Laisser-Passe zahiriye ku ishuri, icyo gihe nigaga Kinawa High School. Icyo gihe badushinjaga ko turi ba maneko ba Kagame.”

Avuga ko kuri sitasiyo ya Polisi ya Bukasa bahamaze ukwezi n’igice nyuma batwarwa gufungirwa kuri Minisiteri y’Umutekano mu gihugu.

Avuga ko ku wa 17 Ukuboza 2020 aribwo yagejejwe mu rukiko ku cyaha cyo kwinjira mu gihugu cya Uganda mu buryo bunyuranyije n’amategeko.

Avuga ko ariko bataburanye kuko ibyabaye byari nk’ikinamico kuko ibyo yabajije bitigeze bihabwa agaciro.

Agira ati “Ibintu bya Uganda ni nk’ikinamico, jye sinavuga ko naburanye, umushinjacyaha yaranshinje ariko umucamanza yararyaga ku buryo nanamubajije iwacu anyohereza nkibaza iwacu anyohereza hantandukanya n’ababyeyi banjye ariko yari ahugiye ku biryo ntacyo yashoboraga gusubiza.”

Yibaza ukuntu ari we ubazwa uburyo yageze muri Uganda mu gihe byakabaye bibazwa ababyeyi be bamutwaye.

Avuga ko impamvu bajuririye icyemezo cy’urukiko ari uko yari yizeye ko ababyeyi be ari bo bagomba kubikora byongeye ngo yari anabizi ko bitashoboka kuko kenshi bigomba ruswa.

Uwo muhungu yishimira ko avuye muri gereza akaba ageze mu gihugu cy’amavuko ariko nanone atazi amerekezo ye na mushiki we.

Ati “Nishimiye ko mvuye muri gereza kandi nishimiye ko aho nsubijwe yego ni mu Rwanda kandi ndi Umunyarwanda ariko sinzi amerekezo, gupfa kujugunya umuntu nk’aho nta burenganzira afite?”

Akomeza agira ati “Ababyeyi banjye bari i Kampala, aho nari mfungiye bansuraga, ese kuki atari bo babanje gufunga cyangwa gucyura mu Rwanda?”

Yibaza icyo umuryango wa Afurika y’Iburasirazuba umaze mu gihe Umunyarwanda ajya muri Uganda agafatwa nk’aho atari ikiremwamuntu.

Avuga ko icyakora bagiye gushakisha aho nyirakuru ubyara se atuye mu Karere ka Nyanza bakaba ari ho baba bari mu gihe bategereje ko bakoroherezwa kongera kubona ababyeyi babo.

Uyu musore avuga ko mu byamubabaje harimo kumara ukwezi atabona amazi yo gukaraba, inda zidasanzwe muri gereza cyane ko ari ubwa mbere yari afunzwe, kugaburirwa kawunga yirabura yuzuyemo ibiheri na yo idahagije n’ibindi.

Mugisha avuga ko mu mitungo yari afite muri Uganda atahanye urufunguzo rw’imodoka gusa

Mugisha w’imyaka 29 y’amavuko, avuga ko yakuriye mu Mujyi wa Kigali akarere atibuka, yiga amashuri yose ndetse asoza kaminuza.

Avuga ko mu mpera z’umwaka wa 2013 yavuye mu Rwanda yerekeza mu gihugu cya Kenya anyuze ku mupaka wa Gatuna afite Pasiporo nyarwanda, muri Kenya akaba yarakoraga ubucuruzi bw’imyambaro.

Mu mwaka wa 2015 ngo yavuye muri Kenya aza gukorera muri Uganda, aho yakoraga ibijyanye n’akabari na hoteli yari afatanyije na mugenzi we w’Umunyarwanda bahuriyeyo.

Ibihe bya COVID-19 bimaze gukomera ngo yavuye ahitwa Cororo yimukira i Kansanga mu kabari ka Pyramid ari naho CMI yamukuye ku wa 04 Gashyantare 2021.

Avuga ko Abanyarwanda bafashwe inshuro nyinshi kandi icyo bashinjwa bose nta kindi uretse kuba ba maneko b’u Rwanda.

Yongeraho ko uburyo bafatwamo n’uko bafungwa bibangamiye uburenganzira bwa muntu kuko biba bimeze nko kumushimuta.

Agira ati “Umuntu bamufata mu buryo bwo ku mwiba nta muyobozi ubimenya, ndetse bagahita bamwambika ikigofero mu maso ku buryo atamenya n’aho bamutwaye, akenshi bamutwara mu masaha y’ijoro”.

Avuga ko n’ubwo atakorewe iyicarubozo yabonye aho ryakorerwaga abandi Banyarwanda, gusa ngo nubwo yari afite inshuti zamukurikiranaga, ntiyabuze kwicazwa ku makaro iminsi itanu yose adahaguruka.

Mugisha avuga ko igitutu CMI yashyizweho n’abasirikare bari inshuti zabo, ngo bakuwe muri gereza ya CMI bajya gufungirwa i Makindye mu yindi gereza ya gisirikare.

Avuga ko aho Makindye ho ubuzima bwari butandukanye n’ubwa Mbuya muri CMI dore ko ari naho yamenyeye amakuru ko bari bafungiye i Mbuya.

Mu bagejejwe ku mupaka wa Kagitumba bari bafungiye muri Uganda harimo abana babiri bava inda imwe

Mu bimubabaza cyane ngo ni Abanyarwanda barimo abasore n’abagabo bafungiye muri CMI, kandi imiryango yabo ndetse na Ambasade ikaba itazi aho bari, cyane ko batwarwa bashimuswe kandi bakaba bakorerwa iyicarubozo.

Ati “Mbabazwa cyane n’abasore n’abagabo bari muri CMI kuko uretse imiryango yabo na Ambasade y’u Rwanda ntizi aho bari ngo ibakurikirane. Benshi barwaye inkoni usanga bikanda mu buvumo bafungiyemo”.

Mugisha avuga ko kubera igihe yari amaze muri Uganda yari afitiyo imitungo ndetse n’umuryango, ariko atahanye urufunguzo rw’imodoka gusa.

Ati “Nari mazeyo igihe kinini, nsizeyo umugore n’abana babiri, nari mfiteyo ubucuruzi (Business) byose narabitaye, ubu mfite urufunguzo rw’imodoka nasize ni rwo mbashije gutahana, naho yo nasize nyiparitse aho nakoreraga bansanze ubwo bantwaraga”.

Umva uko abisobanura muri iyi Video:

Yakuwe mu modoka ateruwe na bagenzi be mu maboko, icyo ashobora ari ukwicara hasi no kuharyama gusa.

Usibye iyicarubozo avuga ko yakorewe, icyamushavuje cyane ngo ni umwana we yabuze kuko yatandukanye na we agifatwa akaba atazi aho uwo mwana aherereye.

Byinshi ku byamubayeho yabisobanuye muri iki kiganiro yahaye abanyamakuru:

Babitangaje ku wa Gatatu tariki ya 03 Gashyantare 2021, ubwo batandatu barimo uhetse umwana (bose hamwe bakaba barindwi) bagezwaga ku mupaka wa Kagitumba ku ruhande rw’Akarere ka Nyagatare.

Umwe mu bari bafungiwe muri Uganda yageze mu Rwanda atabasha kugenda

Ndagijimana Augustin ukomoka mu Karere ka Burera mu Murenge wa Kagogo, Akagari ka Kayenzi avuga ko mu mwaka wa 2020 yafatiwe muri Uganda yagiye kwahira ubwatsi bw’amatungo mu isambu yabo ibayo.

Avuga ko n’ubusanzwe bajyaga bajya kuyihingamo bagasarura nta kibazo bahura na cyo cyane ko hari n’Abagande ngo bazaga guhinga mu gace k’iwabo.

Akimara gufatwa ngo yagiye gufungirwa i Kisoro ahamara iminsi ibiri ahavanwa ajya gufungirwa i Mbarara na ho ahamara iminsi nk’iyo akomereza i Kampala muri gereza ya Mbuya.

Ati “Abantu bamfashe ni abo twari dusanganywe kandi twakoranaga. Nayobewe ukuntu ako kanya niswe maneko kandi twakoranaga. Ngeze i Mbarara nasanzemo abasirikare barankubita umutwe barawumena ndetse n’inzara z’intoki bazikuramo.”

Avuga ko agejejwe i Mbuya nta kintu kindi yabajijwe uretse gufungwa gusa nta rukiko rumufunze.

Avuga ko yahababarijwe cyane kuko buri joro yagombaga gukubitwa inkoni zikoze mu nsinga bwacya agasubizwa mu cyumba cya kasho.

Agira ati “Muri CMI, ijoro ryaho riragatsindwa, twirirwaga muri kasho babona umugoroba ugeze, bakenera gukubita bakaduhamagara. Inkoni zaho rero si ibiti ahubwo ni insinga baboshye barenzaho ibintu bimeze nk’ibikoba tukarara dukubitwa bwacya tugasubira muri kasho.”

Ndagijimana Augustin agira inama abandi Banyarwanda kutazahirahira bajya muri Uganda kuko ubuzima bwaho ari bubi cyane.

Avuga ko abo bita inshuti zabo bahindutse basigaye ari abanzi babo bikabije.

Muri abo Banyarwanda bahagejejwe harimo uwamenyekanye ku mazina ya Ngoga Nzamukosha Diane utabashije kuvugisha itangazamakuru kuko atamerewe neza.

Akigera ku mupaka wa Kagitumba akicaye mu modoka yaziyemo kuko atabashaga kugenda, yagaragaje ko yishimiye kugaruka mu gihugu cye kandi ko abonye ubuzima.

Yakuwe mu modoka ateruwe na bagenzi be mu maboko, ikindi yashoboraga ni ukwicara hasi no kuharyama gusa.

Amakuru twabashije kumenya ni uko icyamushavuje cyane ari umwana we yabuze kuko yatandukanye na we agifatwa akaba aje atazi aho aherereye.

Ikindi ngo ni iyicarubozo yakorewe kuko yakubitwaga inkoni zo mu birenge n’ibindi bice by’umubiri kugira ngo yemere ko ari maneko w’u Rwanda.

Muri gereza ya CMI ya Mbuya ngo yari amazemo amezi 3 n’igice akorerwa iyicarubozo.

Ikindi ngo ni ibicuruzwa bye asize ndetse ngo anafatwa akaba yarambuwe Amadolari ya Amerika ibihumbi bitatu, ni ukuvuga abarirwa muri miliyoni ebyiri n’ibihumbi 900.

Ngoga Nzamukosha Diane akaba yari afungiye muri gereza ya Mbuya na Kireka.

Minisitiri Biruta ubwo yari mu kiganiro n’abanyamakuru

Minisitiri Biruta yavuze ko hari abasirikare bo mu ngabo za Uganda (UPDF) bamaze iminsi binjira rwihishwa ku butaka bw’u Rwanda bakagerageza gushimuta abantu.

Bamubajije ku rwandiko rwageze mu itangazamakuru Perezida wa Uganda Yoweri Museveni yandikiye abakomiseri b’uturere (Resident District Commissioners) bo mu turere dukora ku mipaka, abasaba kuburira abaturage ngo barekere aho kujya mu Rwanda kubera ko ubuyobozi bw’u Rwanda ngo bufite gahunda yo kurasa abacuruzi ba magendu baba badafite intwaro, Dr Biruta yasubije ko ibyo bazabireba.

Ibivugwa mu rwandiko rwa Perezida Museveni bije bikurikira ikibazo cy’abacuruzi ba magendu binjiye mu Rwanda rwihishwa bakaraswa n’abasirikare b’u Rwanda bacunga umupaka, kubera ko bajya bagerageza kurwanya abashinzwe umutekano iyo bahagaritswe, kandi na Perezida Museveni akaba na we abyivugira mu rwandiko rwe ko ari abacuruzi ba magendu binjira rwihishwa ku butaka bw’u Rwanda, ndetse akanababwira ko uzajya abigerageza azajya yirengera ingaruka.

Avuga kuri urwo rwandiko, Dr. Biruta yasubije ko Guverinoma y’u Rwanda yarubonye mu itangazamakuru nubwo atigeze arwandikira ubuyobozi bw’u Rwanda bityo bikaba bitoroshye kumenya niba ari urw’ukuri, gusa Dr Biruta yongeraho ko ibivugwa muri urwo rwandiko bifitanye isano n’ibimaze iminsi biba.

Dr Biruta ati: “Icyo twakongeraho ni uko hashize iminsi hari ibibazo ku mupaka, aho abashinzwe umutekano ku ruhande rw’u Rwanda byabaye ngombwa ko barasa abacuruzi ba magendu b’Abaganda bageragezaga kurwanya ababahagaritse bamaze kwinjira mu Rwanda.”

Dr. Biruta yongeyeho ati: “Ibyo si ibintu bishya, ni inkuru ishaje kandi twabimenyesheje ababishinzwe, ndetse mwabonye ko mu byumweru bishize hari abasirikare benshi ba UPDF binjiye mu Rwanda bagashimuta abaturage bakabajyana muri Uganda bagerayo bagasaba kwishyurwa ngo babone kubarekura.”

Dr. Biruta yasobanuye ko icyo kibazo cyagejejwe ku buyobozi bwa Uganda binyuze mu nzego zishinzwe umubano, ndetse yongeraho ko ibirego Kampala ikomeza gushinja u Rwanda bigaragaza neza ibyo Uganda irimo gukora.

Dr. Biruta ati: “Abasirikare ba UPDF binjiye mu Rwanda inshuro nyinshi bagerageza gushimuta abantu ndetse hamwe banabigeraho, ibi bikaba byarasubije inyuma intambwe twari tumaze gutera tugerageza kuzahura umubano na Uganda.”

Minisitiri Biruta w’Ububanyi n’Amahanga yavuze ko inama idasanzwe ya 4 iheruka kuba ku itariki 4 Kamena yatangaga icyizere ko hazabaho ibiganiro byiza hagati y’ibihugu byombi, ariko ngo haracyari byinshi byo gukora birimo kurekeraho ibikorwa byo kubuza epfo na ruguru Abanyarwanda bari muri Uganda, no guhagarika udutsiko tw’abakora iterabwoba bafite indiri muri Uganda, bafite intego yo kubangamira umutekano w’u Rwanda.

Minisitiri Biruta yasobanuye ko ibi bibazo byavuzweho kenshi mu nama zidasanzwe zagiye ziba mu bihe bitandukanye ariko ntibyigeze bishakirwa umuti uko bikwiye.

Hagati aho ariko Dr Biruta yavuze ko ibihugu byombi bizakomeza kuganira kandi ko hari icyizere ko umuti uzashyira ukaboneka, ndetse asaba ko Uganda irekera aho gukomeza kwikoma u Rwanda kandi na yo ahubwo ifite ibyo igomba gukemura birimo kubuza abasirikare babo gukomeza kuvogera ubutaka bw’u Rwanda.

Dr. Biruta ati: “Tugomba kwirinda ko ibi bibazo bikomeza gufata intera, ubuyobozi bw’u Rwanda buracyafite ubushake bwo gukomeza ibiganiro bishyigikiwe na Angola na Repubulika ya Demukarasi ya Congo kandi twizeye ko tuzabasha kubona umuti w’ibi bibazo.”

Yanavuze ko u Rwanda ruzakorana na Uganda bagategura indi nama idasanzwe yo gucoceramo ibyo bibazo.

Minisitiri Biruta yibukije ko kuva muri Gicurasi 2020, hari Abanyarwanda bari bafungiwe muri Uganda bakaza kugarurwa mu Rwanda ariko ibyo ngo ni nk’igitonyanga mu nyanja kuko ibibazo Uganda isabwa gukemura ku ruhande rwayo ari byinshi, kandi ikarekera aho gutera intambwe imwe imbere, yarangiza igatera ebyiri isubira inyuma.

Minisitiri Biruta yavuze ko u Rwanda na rwo rwiteguye gukora ibyo rusabwa na Uganda.

Umubano hagati y’ibihugu byombi watangiye kuzamo igitotsi kuva muri 2017, aribwo u Rwanda rwatangiye kugaragaza ikibazo cy’Abanyarwanda bafatirwa muri Uganda ku maherere no kugirirwa nabi, baba abatuyeho n’abagendayo.

Reba muri iyi video bimwe mu byari mu kiganiro Minisitiri Biruta yagiranye n’abanyamakuru

Yabitangaje kuri uyu wa kabiri tariki 07 Nyakanga 2020 ubwo Abanyarwanda 12 bari bafungiwe muri Uganda bagezwaga ku mupaka wa Kagitumba, bavuye muri gereza zitandukanye ziri mu mujyi wa Kampala.

Muhire (izina twamuhaye) avuga ko yavuye mu Rwanda mu mwaka wa 2011 ajya i Kampala aho yakoreraga ubucuruzi.

Ku wa 20 Ukuboza 2018 avuye ku kibuga cy’indege cya Entebbe nibwo yafashwe n’abasirikare ba Uganda bamwambika ikigofero mu maso ku buryo atamenye aho yafungiwe ariko nyuma ngo yaje kumenya ko hitwa Kasenyi.

Avuga ko ngo agejejwe Kasenyi yambuwe ibintu byose yari afite ndetse akurwamo n’imyambaro yose kugera ku mwambaro w’imbere, ashyirwa ku mapingu ndetse akajya akubitwa inkoni zo munsi y’ibirenge.

Ati “Bahise banyambura buri kimwe cyose n’imyenda na Boxer (ikariso) mbese nasigaye uko navutse, bamfungiyemo (mu musarane) banshyira ku mapingu abiri bayafungira inyuma bandega agatuza nkumva kagiye kumeneka nkayararaho.”

Akomeza agira ati “Ikindi sinzi natekereje ko imibu yazaga hari aho bayifungurira kuko byageraga saa mbili z’ijoro ikaza kandi myinshi ikandya mera nabi ku buryo banzaniye muganga kumvurira aho.”

Muhire avuga ko ku mugoroba na mugitondo yakubitwaga inkoni zo munsi y’ibirenge bimuviramo kurwara bikomeye ku buryo yarukaga amaraso.

Nyuma y’amezi atandatu ngo hari umusirikare wamwikundiye amugira inama yo gushaka icyo abeshya kimutandukanya n’ubuyobozi bw’u Rwanda kuko aribwo yari bugirirwe impuhwe.

Agira ati “Uwo musirikare yambwiye ko yankunze arambwira ngo nsenge cyane kuko nibanyana muri Go down (inzu yo hasi) nzababara kurushaho. Yaje kujya kuhanyereka bagenzi be bose badahari ariko narungurutseyo mbona bafungiwe mu mazi, ambwira ko bakubitishwa amashanyarazi urebye bari nka 25 ndavuga nti uko ndi ahubwo ari jye nabonye bababazwa cyane kundusha.”

Ikinyoma yahimbye agiye kubazwa muri CMI i Mbuya ngo yabeshye ko ise yishwe na Leta y’u Rwanda na we agira ubwoba arahunga.

Akimara kubeshya icyo kinyoma ngo yatunguwe no kongera kubona mu maso ye umuntu witwa Saidi wahoraga amusaba kumushakira abantu yajyana mu gisirikare cya Kayumba.

Ati “Ndimo mbazwa natunguwe n’umugabo wahoze ngo ari umusirikare mu Rwanda witwa Saidi ngo yari maneko aza gutoroka atuye Kampala ahitwa Usafi. Nahise mubona imbere yanjye. Uyu yahoraga ambwira ngo mushakire abantu yashyira mu gisirikare cya Kayumba.”

Muhire icyo yibuka kuri Saidi uwo bahuriye kuri CMI ngo ni imigani ibiri yamuciriye.
Ngo yamubwiye ko Mohamed yahunze Makka ajya Madina agaruka atsinze, ngo Abanyaisilayeri bahungiye muri Egiputa ariko baza kugaruka mu gihugu cyabo.

Muhire ngo yamusubije ko we uretse kuba yajya mu gisirikare cya Kayumba atajya no mu cy’igihugu cyamubyaye kuko atari impano ye.

Mugabo Bernard we avuga ko atahanye ubumuga

Undi wafunguwe witwa Mugabo Bernard yari amaze amezi 3 n’ibyumweru 2 afunzwe.

Avuga ko yavuye mu Rwanda mu mwaka wa 2017 ajya ahitwa Kaseese mu gihugu cya Uganda ahari umuryango we. Ngo agezeyo bashiki be bamushakiye akazi k’izamu ahitwa Two Thousand Mbarara.

Ngo ataha avuye mu kazi mu masaha ya mugitondo abasirikare 2 ngo baramufashe bamusaba kumujyana aho acumbitse bagezeyo ngo baramusaka birangira bagiye kumufungira mu kigo cya gisirikare cya Mbarara.

Aha ngo yahakuwe ajyanwa i Mbuya kuri CMI. Ahageze ngo yakubitwaga bikomeye ku buryo atahanye ubumuga.

Agira ati “Hariya hantu bazira icyitwa Umunyarwanda, bamwe barara ku byuma, abarara bataka, wowe uba wibereye iyo mu ndake nyine, mugitondo bakaza bakakuvanamo nko mu gitondo, ukajya ruguru bagahondagura, ubu amaguru yanjye yose arabyimbye, ndababara mu mbavu, umubiri wose, ikiri hariya bapfa kukubona uri umwana w’umunyarwanda bakujyana bavuga ko uri maneko.”

Aba bombi bagira inama abashaka kujya gushakira ubuzima muri Uganda kubicikaho bakarokora ubuzima bwabo kuko hari abarara bamanitse abandi bakarara bataka bishoboka ko hari n’abashobora kuba bapfa ntibimenyekane.

Abo Banyarwanda bose uko ari 12 bapimwe indwara ya COVID-19, nyuma bajyanwa mu kigo kiri i Rukara muri kayonza aho bagomba kumara iminsi irindwi, nyuma yaho bakabona gusubira mu miryango yabo byizewe ko nta COVID-19 bafite.

Saa yine n’iminota 15 nibwo bagejejwe ku mupaka wa Kagitumba ku ruhande rw’u Rwanda.

Uko ari 12 bose ni abagabo nta mugore ubarimo.

Baje mu modoka yo mu bwoko bwa Coster bicaye bahanye intera.

Bagejejwe mu Rwanda na Polisi ya Uganda, bakirwa n’Urwego rw’Abinjira n’Abasohoka.

Bakigera mu Rwanda babanje gupimwa umuriro ngo barebe ko badafite indwara ya COVID-19.

Biteganyijwe ko bava ku mupaka wa Kagitumba berekeza i Rukara mu Karere ka Kayonza aho bacumbikirwa mu nyubako za Kaminuza bakamaramo iminsi irindwi kugira ngo harebwe niba ntawe urwaye COVID-19.

Abari barashyizwe mu kato muri izo nyubako bakarimo bavuye muri Uganda mu buryo bumwe n’aba barasezerewe ku wa mbere tariki 06 Nyakanga 2020 kandi nta n’umwe wagaragayeho COVID-19.

Binjiriye ku mupaka wa Cyanika uherereye mu Majyaruguru y’u Rwanda, bakaba barimo abagore 14 n’abagabo 39. Bageze kuri uwo mupaka saa kumi n’imwe n’iminota 57 z’umugoroba.

Iki cyiciro gikurikiye ikindi cyageze mu Rwanda ku wa mbere tariki 08 Kamena 2020 kigizwe n’Abanyarwanda 79.

Aba Banyarwanda babarirwa mu 130 Minisitiri w’Ububanyi n’amahanga wa Uganda Sam Kutesa yari aherutse gutangaza ko bagomba kurekurwa mu ntangiriro z’iki cyumweru, mu biganiro biherutse guhuza intumwa z’u Rwanda n’iza Uganda.

Aba banyarwanda bakigera ku mupaka habanje kubaho igikorwa cyo gusuzuma ibyangombwa n’imyirondoro yabo.

Mu Rwanda kandi basuzumwe mu rwego rwo kureba niba ntawe ufite ibimenyetso by’icyorezo cya COVID-19, hanyuma bajyanwa mu kato mu kigo kiri i Nkumba mu Karere ka Burera.

Ku ruhande rw’ u Rwanda, aba Banyarwanda bakiriwe n’umuyobozi ushinzwe abinjira n’abasohoka Kalisa Innocent. Ni mu gihe ku ruhande rwa Uganda uwari uhagarariye iki gihugu muri iki gikorwa yavuze ko aba Banyarwanda uko ari 53 biyongera ku bandi 79 bageze mu Rwanda banyuze ku mupaka wa Kagitumba, bityo ngo bizeye ko iki gikorwa bagisohoje nk’uko Leta y’igihugu cye yari yabyemeje mu nama iheruka.

Nyiramahirwe Josiane wo mu Murenge wa Busogo yari afungiwe muri iki gihugu cya Uganda muri gereza ya Kisolo nyuma yo gufatirwa ahitwa Mubende avuye i Nyakabande. Icyo gihe yahise akatirwa amezi 12 ubu akaba yari asigaje amezi atandatu.

Kajenyeri Janvier wo mu Murenge wa Nyange yafatiwe i Kisolo akaba yari afungiwe ahitwa Kanungu. Yakatiwe umwaka n’amezi 10 akaba yari yaranarangije igihano ariko agifungiwe muri Uganda.

Ngo yari yajyanywe no gukorayo imirimo y’amaboko, akaba akuyeyo isomo ryo gukorera mu gihugu cye kuko Abanyarwanda benshi bafungirwa muri Uganda bafatwa nabi, bagahohoterwa.

Niyitegeka wo mu Karere ka Nyabihu yari amaze umwaka urenga muri Uganda afungiwe ahitwa Gihihi.

Avuga ko aho bari bafungiwe bafatwaga nabi, gukoreshwa imirimo ivunanye kandi bababwira amagambo asesereza.

Aba bose bishimiye uko Leta y’u Rwanda yakoze ibishoboka byose kugeza ubwo babashije kongera kugaruka mu rwababyaye, bakaba bishimiye kuba bagiye gufatanya n’abandi Banyarwanda kubaka igihugu.

Nyuma yaho haje n’abandi bari mu byiciro bitandukanye bose hamwe babarirwa muri 80 binjiriye ku mupaka wa Kagitumba, bakaba ari bamwe mu Banyarwanda 130 Minisitiri w’Ububanyi n’amahanga wa Uganda Sam Kutesa yatangaje ko bazarekurwa mu ntangiriro z’iki cyumweru, akaba yarabivugiye mu biganiro biherutse guhuza intumwa z’u Rwanda na Uganda.

Ibiganiro byari byahuje impande zombi ndetse n’abahuza bo mu bihugu bya Angola na Repubulika iharanira Demokarasi ya Congo, bikaba byarabaye hifashishijwe ikoranabuhanga rya Video Conference tariki 4 Kamena 2020.

Muri ibyo biganiro byabaye mu cyumweru gishize, Minisitiri w’ububanyi n’amahanga n’ubutwererane Dr. Vincent Biruta wari uyoboye intumwa z’u Rwanda yavuze ko hari intambwe yatewe mu gushyira mu bikorwa amasezerano ya Luanda, ariko anavuga ko Uganda ikomeje gufunga no guhohotera Abanyarwanda.

Minisitiri Sam Kutesa wari uyoboye intumwa za Uganda muri ibyo biganiro yavuze ko Uganda ko mu kwezi kwa Gicurasi hari Abanyarwanda basaga 130 bari bafungiwe muri Uganda barekuwe, hakaba hari hagikurikizwa ibiteganywa kugira ngo bashyikirizwe u Rwanda, dore ko byagaragaye ko bari bafunzwe barengana.

Icyo gihe yavuze ko bazashyikirizwa u Rwanda hagati yo ku wa mbere no ku wa kabiri anasaba abayobozi bireba mu Rwanda kuzaba bahari kugira ngo bakire abo Banyarwanda.

Gusa icyo gihe Kutesa yavuze ko hari abandi Banyarwanda 310 yavugaga ko bakoze ibyaha bikomeye bazakomeza gufungwa, amakuru arebana na bo Uganda ikazayasangiza u Rwanda.

Abanyarwanda barekurwa kuri uyu wa mbere tariki 08 Kamena 2020 baraba babaye icyiciro cya gatatu cy’Abanyarwanda barekuwe na Uganda, icya mbere kikaba cyarimo Umunyarwanda Réné Rutagungira uvugwaho kuba umwe mu Banyarwanda bafashwe mbere bagafungirwa muri gereza zikorerwamo ibikorwa by’iyicarubozo ku Banyarwanda.

Biteganyijwe ko aba Banyarwanda barekuwe na Uganda kuri iyi nshuro bashyirwa mu kato i Kayonza ku cyicaro cya kaminuza y’u Rwanda, ishami rya Rukara.

Bagera ku mupaka bagahabwa udupfukamunwa bakabona kwinjira mu Rwanda

Icyiciro cya nyuma cy’abaje kuri uyu wa mbere cyahageze ahagana saa mbili z’umugoroba. Cyari kigizwe n’abantu 13 abaje bose hamwe bakaba ari 80

Babiri muri bo ubwo bavuganaga n’itangazamakuru, bavuze ko batababariwe nk’uko abayobozi ba Uganda babivuga ahubwo ko bashoje ibihano bakatiwe n’urukiko.

Hakizimana Innocent yari yarakatiwe imyaka ibiri. Yafunzwe mu 2018 akaba aje arangije igihano. Iyi myenda yambaye ngo ni iyo babambitse babasohoye muri gereza

Mbarushimana Jean Bosco

Mbarushimana Jean Bosco w’imyaka 26 y’amavuko akomoka i Musanze akaba yarafatiwe muri Uganda mu 2019 yagiye gusura inshuti ye.

Mbarushimana yakatiwe amezi 26 y’igifungo akaba aje ayarangije. Avuga ko ubuyobozi bwa Uganda bubeshya ko bababariwe ariko mu by’ukuri ngo bari barangije ibihano.

Aho bari bafungiye naho ngo bari babayeho mu buzima bubi, batotezwa, bagakubitwa, bagahingishwa ndetse bagakoreshwa n’indi mirimo itandukanye y’agahato.

Biteganyijwe ko abakiriwe ku wa mbere ku mupaka wa Kagitumba bakurikirwa n’ikindi cyiciro cy’abakirwa kuri uyu wa kabiri, ariko bo bakakirirwa ku mupaka wa Cyanika uherereye mu Majyaruguru y’u Rwanda.

Amafoto&Video: Roger Marc Rutindukanamurego

Inama yabaye hifashishijwe ikoranabuhanga

Yabivuze muri gahunda y’ibiganiro byahuje intumwa z’ibihugu by’u Rwanda na Uganda ndetse n’iz’ibihugu bihuza ari byo Angola na Repubulika Iharanira Demokarasi ya Congo (DRC) ziga ku kibazo cy’umwuka utameze neza hagati y’u Rwanda na Uganda, ibiganiro byabaye kuri uyu wa Kane tariki 04 Kamena 2020.

Muri ibyo biganiro byabaye hifashishijwe ikoranabuhanga, intumwa z’u Rwanda ziyobowe na Minisitiri w’Ububanyi n’Amahanga n’Ubutwererane Dr. Vincent Biruta mu gihe iza Uganda ziyobowe na Minisitiri w’Ububanyi n’Amahanga w’icyo gihugu Sam Kutesa.

Minisitiri Biruta yavuze ko u Rwanda rutewe impungenge n’uko Uganda ikomeje kurenga ku bikubiye mu masezerano ya Luanda, anavuga ko hari ingero zibigaragaza.

Mu ngero yatanze harimo kuba tariki 18 Gicurasi 2020 abagore babiri b’Abanyarwandakazi barajugunywe ku mupaka w’u Rwanda na Uganda babaye intere bitewe n’uko bari bahohotewe n’inzego z’umutekano muri Uganda.

Yanagaragaje ko Uganda ikomeje kwanga kurekura Abanyarwanda bafungiye muri icyo gihugu mu buryo bunyuranyije n’amategeko, ndetse n’imitwe ihungabanya umutekano w’u Rwanda ikaba ikomeje gukorera ku butaka bwa Uganda nta nkomyi.

Gusa ngo nyuma y’iperereza ryakozwe ku Banyarwanda bafungiwe mu magereza atandukanye muri Uganda, ngo basanze hari abagera ku 130 bazashyikirizwa u Rwanda mu cyumweru gitaha banyujijwe ku mipaka ya Kagitumba na Mirama, nk’uko Minisitiri Kutesa yabivuze.

Gusa yongeyeho ko hari abandi Banyarwanda 310 bafungiye muri Uganda, avuga ko bakurikiranywe n’ubutabera bwa Uganda.

Ibiganiro byabaye kuri uyu wa kane ni byo bya mbere bibaye nyuma y’ibyari byahuje abakuru b’ibihugu byombi byabereye ku mupaka wa Gatuna-Katuma tariki 21 Gashyantare 2020, ibyo biganiro bikaba byaranitabiriwe n’abakuru b’ibihugu bya Angola na Repubulika iharanira Demokarasi ya Congo.

Amafoto: Muzogeye Plaisir

Bukuru yiyemeje kutazongera kuva mu gihugu cye ngo agiye gushakira akazi muri Uganda

Uwo musore w’imyaka 22, yagiye muri Uganda muri Kanama 2018 yambukiye ku ndangamuntu, abona akazi mu rugo rw’umuntu ariko nyuma aza kwikorera aho yacuruzaga amagi mu mujyi wa Kabale, afatwa muri Kanama 2019 ashinjwa kuba muri icyo gihugu nta byangombwa afite, ni ko gufungwa.

Bukuru avuga ko amaze gufatwa yahise afungirwa kuri sitasiyo ya Polisi ya Kabale amarayo ibyumweru bibiri hanyuma agezwa imbere y’urukiko, ahamwa n’icyaha cyo kuba mu gihugu kitari icye nta byangombwa, akatirwa igifungo cy’amezi atandatu, afungirwa muri gereza ya Ndorwa.

Uwo musore wafunguwe ku ya 26 Gashyantare 2020, avuga ko ubuzima bwo muri iyo gereza bwari bugoye kuko batotezwaga ndetse bagakoreshwa imirimo ivunanye.

Ati “Ubuzima bwo muri iyo gereza bwari bubi kuko buri kanya baradukubitaga, tukanakoreshwa imirimo y’agahato kandi ivunanye. Twarahingaga, tugacukura amabuye yo kubaka, tugatema ibiti, kubumba amatafari, tugacukura ibishyitsi ari na ko tubyikorera ndetse tukanabipakira imodoka”.

Ati “Ibyo twabikoranaga inzara kuko twajyaga mu mirimo saa kumi n’ebyiri za mu gitondo, bakatugaburira saa cyenda, hanyuma saa kumi tugasubira muri gereza. Uko ni ko byari bimeze buri munsi, wavuga ko unaniwe bati ni akazi waje gushaka kandi wakabonye gakore”.

Avuga kandi ko muri iyo gereza yari afunganywe n’abandi Banyarwanda 32, akaba yarabasizeyo kuko ngo bakatiwe igifungo kirekire.

Bukuru ashima Imana kuba arekuwe atamugaye, akavuga ko agiye kwegera umuryango kugira ngo umufashe kubona imirimo mu gihugu cye gifite amahoro.

Ati “Ugira utya ukava ahantu hari amahoro wirukankiye aho utekereza ko wabonera byinshi ariko hatagira amahoro bikarangira ugarutse kandi warataye igihe. Ubu ngiye kwegera umuryango wanjye umfashe mbone icyo gukora kandi nta kabuza nzakibona nkore niteze imbere, cyane ko Leta yacu ibidufashamo”.

Yongeraho ko yasohotse muri gereza ntiyanemererwa gusubira aho yari atuye ngo afate ibintu bye ndetse ngo yari anejeje ibigori n’ibishyimbo akaba atabisaruye, ngo ni igihombo gikomeye.

Bukuru wacikirije amashuri mu wa gatanu w’abanza, agira inama Abanyarwanda, cyane cyane urubyiruko kuko ngo ari rwo rukunze kujya muri Uganda gushaka akazi, yo kubyihorera kuko bagerayo bagakoreshwa uburetwa ntihagire icyo bacyura.

Abanyarwanda bakomeje gutotezwa aho bafungiye muri icyo gihugu, mu gihe u Rwanda na Uganda bikomeje ibiganiro byo kugarura umubano mwiza hagati y’ibihugu byombi umaze igihe warajemo igitotsi.

Perezida Kagame na Yoweri Museveni ubwo bari bakimara guhurira ku mupaka wa Gatuna/Katuna mu nama yabahuje kuri uyu wa Gatanu

Ni inama ya kane ihuje Perezida w’u Rwanda Paul Kagame, Perezida wa Uganda Yoweri Museveni, Perezida wa Angola João Lourenço, na Perezida Félix Antoine Tshisekedi wa Repubulika Iharanira Demokarasi ya Congo.

Abakuru b’ibyo bihugu bishimiye ko nyuma y’inama baherukaga guhuriramo hari intambwe yatewe ku mpande zombi mu rwego rwo kubahiriza imyanzuro yafashwe, no gukuraho inzitizi z’umubano mwiza hagati y’ibihugu byombi, u Rwanda na Uganda.

Bishimiye ko hari imfungwa zarekuwe ku mpande zombi, kandi hakaba hakomeje kugaragara ubushake mu kubahiriza amategeko by’umwihariko yerekeranye n’uburenganzira bwa muntu.

Abakuru b’ibihugu bya Angola na Repubulika Iharanira Demokarasi ya Congo bashimye amasezerano yashyizweho umukono hagati y’u Rwanda na Uganda yo guhererekanya imfungwa. Ayo masezerano yiswe ’Extradition Treaty’ yashyizweho umukono kuri uyu wa gatanu mu nama yabereye ku mupaka w’u Rwanda na Uganda.

Abari muri iyo nama basabye ko igihugu cya Uganda gisuzuma mu gihe cy’ukwezi ibyo gishinjwa n’u Rwanda byo gucumbikira ku butaka bwacyo abashaka guhungabanya umutekano w’u Rwanda. Mu gihe ibyo Uganda ishinjwa bizagaragara ko ari ukuri, igihugu cya Uganda kizakora ibishoboka byose kugira ngo gihagarike ibyo bikorwa, giharanire kandi ko bitazongera kubaho.

Isuzuma rizakorwa n’Itsinda ryashyizweho rihuriweho n’u Rwanda na Uganda (Ad-Hoc Ministerial Commission) rigamije kureba iyubahirizwa ry’amasezerano ya Luanda.

Mu gihe iyo Komisiyo izabona ko uyu mwanzuro wubahirijwe, izatanga raporo ku bakuru b’ibihugu, nyuma mu minsi 15 abahuza b’impande zombi bazatumizeho inama y’abakuru b’ibihugu uko ari bine, bahurire ku mupaka wa Gatuna/Katuna kugira ngo bafungure ku mugaragaro uwo mupaka, ingendo hagati y’abaturage b’ibihugu byombi zongere gukorwa nta nkomyi.

Abakuru b’ibihugu by’u Rwanda na Uganda, Paul Kagame na Yoweri Museveni, bongeye gushimira bagenzi babo Perezida wa Angola, João Lourenço, na Perezida Félix Antoine Tshisekedi wa Repubulika Iharanira Demokarasi ya Congo, kubera ubwitange bwabo mu gushakira hamwe uburyo umubano mwiza wagaruka hagati y’u Rwanda na Uganda.

Kureba andi mafoto menshi y’iyi nama, kanda HANO

Amafoto: Plaisir Muzogeye

Perezida Kagame na João Lourenço bakigera i Gatuna

Ni ibiganiro kandi byitabiriwe na ba Perezida Felix Tshisekedi wa Repubulika ya Demukarasi ya Kongo ndetse na João Lourenço wa Angola, babyitabiriye nk’abahuza.

Hari kandi abayobozi batandukanye baturutse ku ruhande rw’u Rwanda na Uganda.

Amafoto:

Perezida Felix Tshisekedi na we yageze i Gatuna

Minisitiri w’Umutekano Gen. Patrick Nyamvumba (ibumoso) na Maj. Gen Nzabamwita Joseph

Inzego z’ubuzima ziteguye gupima abitabiriye ibi biganiro

Nyuma y’ibiganiro Abakuru b’Ibihugu bahanye ibiganza

Hasinywe amasezerano yo guhanahana imfungwa

Abo bayobozi banyuze mu Rwanda muri gahunda bajemo y’ibiganiro bigamije gukemura ibibazo by’ubwumvikane buke bumaze iminsi buri hagati y’ibihugu by’u Rwanda na Uganda.

Aba baperezida bombi Lourenço na Tshisekedi ni bo bahuza b’u Rwanda na Uganda muri ibi biganiro.

Perezida wa Angola, João Lourenço, yageze mu Rwanda ku gicamunsi cyo ku wa Kane tariki ya 20 Gashyantare 2020.

Iyi nama igamije kugarura umubano mwiza hagati y’u Rwanda na Uganda ibera ku mupaka wa Gatuna kuri uyu wa gatanu tariki 21 Gashyantare 2020.ije ikurikira iya Komisiyo yashyizweho ihuriweho n’u Rwanda na Uganda, yabereye i Kigali ku wa gatanu tariki 14 Gashyantare 2020, igamije kugenzura iyubahirizwa ry’imyanzuro yashyizweho umukono n’impande zombi, no gutegura iyi nama y’abakuru b’ibihugu.

Amafoto: Village Urugwiro

Perezida wa Angola João Lourenço aje kwitabira inama igamije kugarura umubano mwiza hagati y’u Rwanda na Uganda. Iyo nama irabera ku mupaka wa Gatuna kuri uyu wa gatanu tariki 21 Gashyantare 2020.

Biteganyijwe ko iyo nama ihuza abakuru b’ibihugu by’u Rwanda na Uganda ndetse n’abakuru b’ibihugu bya Angola na Repubulika Iharanira Demokarasi ya Congo, nk’abahuza b’impande zombi.

Iyi nama ije ikurikira iya Komisiyo yashyizweho ihuriweho n’u Rwanda na Uganda, yabereye i Kigali ku wa gatanu tariki 14 Gashyantare 2020, igamije kugenzura iyubahirizwa ry’imyanzuro yashyizweho umukono n’impande zombi, no gutegura inama y’abakuru b’ibihugu iba kuri uyu wa gatanu.

Ibyo biganiro byari byitabiriwe n’itsinda ry’abayobozi baturutse muri Uganda barangajwe imbere na Minisitiri w’Ububanyi n’amahanga wa Uganda, Sam Kutesa.

Itsinda ry’abayobozi mu Rwanda ryo ryari riyobowe n’Umunyamabanga wa Leta muri Minisiteri y’Ububanyi n’Amahanga, Ambasaderi Olivier Nduhungirehe, ibyo biganiro bikaba byarimo kandi n’abahuza baturutse mu bihugu bya Angola na Repubulika Iharanira Demokarasi ya Congo.

Amafoto: Guverinoma y’u Rwanda

Itangazo ryashyizwe ahagaragara na Minisiteri y’Ububanyi n’Amahanga n’Ubutwererane kuri uyu wa gatatu 19 Gashyantare 2020, riravuga ko Leta y’u Rwanda yibutsa ko yahagaritse gukurikirana mu butabera Abagande 17, ikanarekura abandi batatu barangije igihano cyabo, bose uko ari 20 bakaba baroherejwe muri Uganda.

Leta y’u Rwanda kandi yasobanuye ko hari ibintu by’ingenzi byari byaganiriweho mu biganiro byahuje intumwa z’u Rwanda n’iza Uganda (Ad Hoc), biheruka kubera i Kigali kuwa 15 Gashyantare 2020, bikubiye mu nyandiko mvugo no 0692, byagombaga kuba byabonewe ibisubizo tariki ya 20 Gashyantare 2020.

U Rwanda rwakiriye Abanyarwanda bari bafungiye muri Uganda, hamwe n’abandi bakekwaho kugaba igitero mu Kinigi

Muri ibyo, harimo kugenzura ibikorwa by’imikwabu no gukusanya ubushobozi bikorwa n’abitwa Prossy Bonabaana, Sula Nuwamanya, Dr. Rukundo Rugali, Emerithe Gahongayire na Emmanuel Mutarambirwa, bose bari mu buyobozi bw’ishyaka rya RNC, binyuze mu muryango utari uwa Leta witwa ‘Self-Worth Initiative’.

Harimo kandi gukurikirana ingendo z’uwitwa Charlotte Mukankusi zijya muri Uganda, cyane cyane izakozwe mu kwezi kwa Mutarama 2020, no gukuraho urupapuro rwe rw’inzira rwa Uganda (Passport), rufite nomero A000199979.

Harimo no gukurikirana bamwe mu bagize umutwe wa RUD-Urunana bagize uruhare mu gitero cyagabwe mu Kinigi ho mu Karere ka Musanze mu kwezi k’Ukwakira 2019.

Muri izi ngingo eshatu, Leta y’u Rwanda yavuze ko iyi yo gukurikirana abarwanyi ba RUD-Urunana, ari yo yubahirijwe igice, kuko babiri gusa ari bo boherejwe mu Rwanda.

Mugwaneza Eric na Capt. Nshimiye bakunda kwita Gavana, ari na we wari uyoboye icyo gitero ku bufasha n’umwe mu bayobozi bakuru muri Uganda, bo ntibafashwe ngo boherezwe mu Rwanda.

Guverinoma y’u Rwanda ivuga ko ibi Uganda yakoze, bigira uruhare mu guhagarika ubufasha ubwo ari bwo bwose iha abarwanya Leta y’u Rwanda n’imitwe y’iterabwoba, kandi igakomeza gukurikirana imitwe ikorera muri Uganda n’abayobozi bo muri iki gihugu bayitera inkunga.

Guverinoma y’u Rwanda kandi yatangaje ko yiteguye gushyira mu bikorwa ibikubiye mu masezerano ya Luanda.

Irekurwa ry’aba Banyarwanda barimo abagabo 10 n’abagore 3, ryatangajwe ku wa kabiri tariki 18 Gashyantare 2020, aho Leta ya Uganda yabarekuye ikabashyikiriza Ambasade y’u Rwanda muri Uganda, na yo igahita ibohereza mu Rwanda.

Muri aba 13 hiyongereyeho abandi babiri batari batangajwe, ku mupaka wa Kagitumba hakaba hagejejwe abanyarwanda 15.

Nyuma yo gushyikiriza aba Banyarwanda Ambasade y’u Rwanda, Minisitiri w’Ububanyi n’Amahanga wa Uganda, Sam Kutesa, yabwiye itangazamakuru ko kurekura abo Banyarwanda byakozwe mu rwego rwo kubahiriza amasezerano yashyizweho umukono n’abakuru b’ibihugu by’u Rwanda na Uganda agamije kugarura umubano mwiza hagati y’ibihugu byombi.

Abo Banyarwanda barekuwe biyongereye ku bandi icyenda bari barekuwe tariki 08 Mutarama 2020.

Urutonde rw’Abanyarwanda bari bafungiye muri Uganda bagejejwe mu Rwanda

Umwihariko uri muri aba 13 boherejwe muri iri joro, ni uko babiri muri bo, Kabayija Seleman na Nzabonimpa Fidel, bari mu baheruka kugaba igitero mu Kinigi mu Karere ka Musanze, igitero cyabaye mu Kwakira 2019 kigahitana abantu 14.

Aba ngo nyuma yo guteshwa n’ingabo z’u Rwanda bahungiye muri Uganda bakirwa n’inzego z’umutekano zaho.

Ubwo Abanyarwanda 9 barekurwaga, u Rwanda rwari rwavuze ko ari intambwe nziza Uganda iteye, ariko ruvuga ko batari bahagije kuko ari umubare muto ugereranyije n’Abanyarwanda benshi bafungiye muri Uganda, aho bakorerwa itotezwa n’iyicarubozo.

Abo Banyarwanda 13 barekuwe mu gihe habura iminsi itatu ngo indi nama ihuza abakuru b’ibihugu by’u Rwanda na Uganda hamwe n’abahuza b’impande zombi, ari bo Angola na Repubulika Iharanira Demokarasi ya Congo, iteranire ku mupaka wa Gatuna. Ni inama biteganyijwe ko izaba kuri uyu wa gatanu tariki 21 Gashyantare 2020.

Aba ni bo bivugwa ko bari mu baherutse kugaba igitero mu Kinigi

Kabayija Seleman Wari Sous Lieutenant mu Ngabo za RUD Urunana

Nzabonimpa Fidele umwe mu bagabye igitero mu Kinigi

Uganda yarekuye abagabo 10 n’abagore batatu (Ifoto: Daily Monitor)

Minisitiri w’Ububanyi n’Amahanga wa Uganda, Sam Kutesa, yabwiye itangazamakuru ko kurekura abo Banyarwanda byakozwe mu rwego rwo kubahiriza amasezerano yashyizweho umukono n’abakuru b’ibihugu by’u Rwanda na Uganda agamije kugarura umubano mwiza hagati y’ibihugu byombi.

Abo Banyarwanda barekuwe biyongereye ku bandi icyenda bari barekuwe tariki 08 Mutarama 2020.

Icyo gihe u Rwanda rwari rwavuze ko abo barekuwe batari bahagije kuko ari umubare muto ugereranyije n’Abanyarwanda benshi bafungiye muri Uganda, aho bakorerwa itotezwa n’iyicarubozo.

Ikigo cy’Itangazamakuru cya RBA cyatangaje ko abo Banyarwanda bamaze gushyikirizwa Ambasade y’u Rwanda muri Uganda.

Abo Banyarwanda 13 barekuwe mu gihe habura iminsi itatu ngo indi nama ihuza abakuru b’ibihugu by’u Rwanda na Uganda hamwe n’abahuza b’impande zombi, ari bo Angola na Repubulika Iharanira Demokarasi ya Congo, iteranire ku mupaka wa Gatuna. Ni inama biteganyijwe ko izaba kuri uyu wa gatanu tariki 21 Gashyantare 2020.

Perezida Kagame yagize ati “Bahora ngo bashaka ko tuba uko babishaka, bashaka gutegeka Uganda bagategeka n’u Rwanda. Iyaba bumvaga, bari bakwiye kuba bazi ko ibyo bidashoboka.”

Perezida Kagame yongeye gushinja Uganda gufasha abaza gutera u Rwanda, bamwe bakaba baratawe muri yombi ndetse bashyikirizwa inkiko, abandi batakariza ubuzima muri ibyo bikorwa bibi.

Perezida Kagame avuga ko ibyo bibazo by’umutekano byagize ingaruka ku mipaka y’u Rwanda na Uganda, imipaka irafungwa.

Yagize ati “Nubwo Abanya-Uganda badusaba ngo dufungure imipaka, ni bo bayifunze. Igihe buri munyarwanda wese wambuka umupaka azafatwa agakubitwa, akicwa,….twagezeho tubwira Abanyarwanda tuti uko mufatwa muri Uganda twebwe ntabwo tubifiteho uburenganzira. Twe ntabwo twabwira Abanya-Uganda uko bafata Abanyarwanda muri Uganda.”

Ati “Icyo mfitiye uburenganzira ni ukubwira Abanyarwanda bakareka kujya muri Uganda kuko ikibabaho ntako mfite nabigenza.”

Perezida Kagame yavuze ko Abanya-Uganda aho kumva aho ikibazo kiri no kugikemura, ngo biyemeje guha Abanyarwanda igihe gito nk’amezi abiri, hanyuma Abanyarwanda bakazajya gupfukamira Uganda barira basaba n’imbabazi kuko ngo ari bo bihaye gufunga umupaka.

Nyamara ibyo ntibyashobotse kuko u Rwanda rwiyemeje kwishakamo ibisubizo, abikorera n’abo mu nzego za Leta mu Rwanda barakanguka barafatanya biyemeza gushakira abaturage mu gihugu ibyo bajyaga gushaka muri Uganda nk’amashuri n’ubuvuzi.

Umubano w’ibihugu byombi wajemo ibibazo kuva mu 2017 ubwo Abanyarwanda muri Uganda batangiraga gufatwa bagafungwa, abandi bagakorerwa iyicarubozo, hakaba abo Uganda izana banegekaye ikabajugunya ku mupaka w’u Rwanda na Uganda.

Uganda ishinja abo Banyarwanda kuba intasi zigamije guhungabanya umutekano, mu gihe u Rwanda rushinja Uganda gukorana n’abahungabanya umutekano w’u Rwanda.

Icyakora muri iyi minsi ibihugu byombi bimaze iminsi biri mu biganiro bigamije gushakira hamwe uko umubano mwiza wagaruka.

Amafoto: Village Urugwiro

Intumwa z’u Rwanda na Uganda zongeye guhurira mu biganiro i Kigali

Uwo ni umwe mu myanzuro itandatu yafashwe, nyuma y’ibiganiro hagati y’impande zombi byafashe amasaha menshi, ibyahavugiwe byose bikaba biganisha ku kugarura umubano mwiza hagati y’u Rwanda na Uganda.

Iyo myanzuro uko ari itandatu iteye itya:

Uwa mbere ni uko buri gihugu kigiye kongera kureba umubare w’abenegihugu b’ikindi cyaba gifunze, kigahita kibarekura bitarenze ibyumweru bitatu bagasubira iwabo.

Umwanzuro wa kabiri ni uko impande zombi ziyemeje kurengera no kubaha uburenganzira bw’umuntu wo muri buri gihugu hagendewe ku mabwiriza n’amategeko mpuzamahanga arebana n’ubuzima bw’abantu.

Uwa gatatu, ibihugu byombi byiyemeje kurangiza amasezerano yo guhanahana ababifungiyemo, akazashyirwaho umukono imbere y’abakuru b’ibihugu byombi, mu nama ya kane izabahuriza i Gatuna ku mupaka uhuza u Rwanda na Uganda ku wa 21 Gashyantare 2020.

Ambasaderi Olivier Nduhungirehe (ibumoso) na Sam Kutesa (iburyo) bagaragaza akanyamuneza nyuma y’imyanzuro yagezweho

Uwa kane ni uko Leta y’u Rwanda izaba yandikiye Leta ya Uganda bitarenze itariki 15 Gashyantare 2020, urwandiko rugaragaza ibikorwa bihungabanya umutekano warwo bikorwa n’imitwe irwanya u Rwanda ikorera ku butaka bwa Uganda. Leta ya Uganda igomba kuzahita isuzuma urwo rwandiko bitarenze tariki 20 Gashyantare 2020, ku buryo bimwe muri ibyo bibazo bizahita bibonerwa ibisubizo, hagakorwa n’iperereza ku buryo n’ibindi bibazo birangizwa.

Uwa gatanu ni uko kugira ngo ibyo impande zombi ziyemeje byubahirizwe, inama ya kane izahuza abakuru b’ibihugu yasabwe kuzita cyane ku kongera gufungura urujya n’uruza rw’abantu n’ibintu ku mipaka ihuza u Rwanda na Uganda.
Umwanzuro wa gatandatu ni uko ibihugu byombi byumvikanye ko bigiye kongera gufatanya mu by’ingabo no mu nzego z’umutekano mu rwego rwo kuzamura uburyo bw’imikoranire mu by’ubutasi, ku nyungu z’umutekano w’impande zombi.

Ibyo biganiro byari byitabiriwe n’itsinda ry’abayobozi baturutse muri Uganda barangajwe imbere na Minisitiri w’Ububanyi n’amahanga Sam Kutesa. Itsinda ry’abayobozi mu Rwanda ryo ryari riyobowe n’Umunyamabanga wa Leta muri Minisiteri y’Ububanyi n’Amahanga, Ambasaderi Olivier Nduhungirehe ndetse n’abahuza baturutse mu bihugu bya Angola na Repubulika Iharanira Demokarasi ya Congo.

Ibyo u Rwanda rwabisabiye mu nama yahuje intumwa z’ibihugu byombi ndetse n’abahuza babyo, yabereye i Kigali kuri uyu wa gatanu tariki 14 Gashyantare 2020, iyo nama ikaba igamije gutegura izahuza abakuru b’ibihugu izabera i Gatuna ku wa gatanu w’icyumweru gitaha.

Ibiganiro by’uno munsi byitabiriwe n’itsinda ry’abayobozi baturutse muri Uganda barangajwe imbere na Minisitiri w’Ububanyi n’amahanga Sam Kutesa. Itsinda ry’abayobozi mu Rwanda ryo ryari riyobowe n’Umunyamabanga wa Leta muri Minisiteri y’Ububanyi n’Amahanga, Ambasaderi Olivier Nduhungirehe ndetse n’abahuza baturutse mu bihugu bya Angola na Repubulika Iharanira Demokarasi ya Congo.

Amb. Olivier Nduhungirehe

Ambasaderi Nduhungirehe yavuze ko nyuma y’ibiganiro byahuje impande zombi mu minsi ishize, Uganda yateye intambwe irekura Abanyarwanda icyenda yari ifunze mu buryo butemewe, ariko ngo ntibihagije, akaba hari ibyo yasabye Uganda gushyira mu bikorwa.

Yagize ati “Icya mbere ni uguhagarika imikoranire hagati y’icyo gihugu n’imitwe irwanya u Rwanda ya RNC na RUD-Urunana, gufata abayigize no kubohereza mu Rwanda ngo baburanishwe. Guhagarika ibikorwa byose biteza umutekano muke u Rwanda, kugaruza Pasiporo ya Uganda yahawe Mukankusi Charlotte ushinzwe dipolomasi muri RNC. Kubuza bamwe mu bayobozi ba Uganda gukomeza gukorana n’iyo mitwe, barimo Umunyamabanga wa Leta Filemon Mateke. Kuzana umurambo wa Emmanuel Mageza kugira ngo ushyingurwe mu Rwanda ndetse hanamenyekane amakuru ku Banyarwanda babiri, Sendegeya Theogene na R. Umucyo batwawe na CMI hanyuma baza kuburirwa irengero”.

Ambasaderi Nduhungirehe kandi yasabye Uganda korohereza Julienne Kayirere kongera kubonana n’umwana we Johannah Imanirakiza, warerewe muri Uganda nyuma yo gutandukanywa na nyina ubwo yafatirwaga muri icyo gihugu ku ya 29 Ugushyingo 2019. Icya nyuma yasabye ni uko Uganda irekura nta yandi mananiza Abanyarwanda bose bafungiye muri icyo gihugu.

Icyakora Sam Kutesa na we yavuze ko hari urutonde rw’abaturage ba Uganda baba bafungiye mu Rwanda, agasaba ko barekurwa.

Sam Kutesa

Ati “Abanyarwanda icyenda bari bafungiye muri Uganda bararekuwe biciye mu nzira z’ubutabera basubira mu gihugu cyabo. Turasaba u Rwanda ko na rwo rwabikora uko, rukarekura Abanya-Uganda basaga 50 rufunze. Urutonde rwabo ruzwi rwoherejwe mu Rwanda”.

Ibi ariko Minisitiri Nduhungirehe ntiyemeranya na byo, kuko yavuze ko Abagande 15 gusa bari barafatiwe mu Rwanda barekuwe binyuze mu nzira zemewe basubizwa iwabo.

Icyakora impande zombi ndetse n’abahuza, bafite icyizere ko ibibazo biri hagati y’ibihugu byombi bizakemuka bidatinze, kuko ubushake bwo kubirangiza buhari.

Amafoto: Roger Marc & Nyirishema Fiston

Abagize iryo tsinda bazahura mu rwego rwo gutegura inama ya kane izahuza abakuru b’ibihugu by’u Rwanda, Uganda, Angola na Repubulika ya Demokarasi ya Congo, iteganyijwe kubera ku mupaka wa Gatuna ku itariki ya 21 Gashyantare 2020.

Iyo nama igiye kuba mu gihe ishyirwa mu bikorwa ry’imyanzuro y’inama ya gatatu iheruka guhuza abo bakuru b’ibihugu i Luanda muri Angola ku itariki 02 Gashyantare 2020 rigenda gahoro cyane.

Umunyamabanga wa Leta muri Minisiteri y’Ububanyi n’Amahanga ushinzwe umuryango wa Afurika y’Iburasirazuba, Ambasaderi Olivier Nduhungirehe, yabwiye Kigali Today ko iyo nama izaterana ku wa gatanu i Kigali izasuzuma aho ishyirwa mu bikorwa ry’imyanzuro yafatiwe i Luanda ku itariki ya 02 Gashyantare rigeze.

Yagize ati, “Ni byo, ku wa gatanu tuzaganira ku bijyanye n’aho ishyirwa mu bikorwa ry’iyo myanzuro rigeze.”

Urupfu rw’Umunyarwanda witwa Magezi Emmanuel wari ufungiye muri Uganda mu buryo bunyuranyije n’amategeko, akaba yari yarafashwe n’inzego z’iperereza zo muri Uganda, rusa n’urwasubije inyuma intambwe yari imaze guterwa.

Ku itariki 08 Gashyantare 2020, Ikinyamakuru Daily Monitor cyo muri Uganda cyatangaje ko muri Werurwe 2019, Magezi yafashwe, inzego z’iperereza za Uganda zijya kumufungira mu kigo cya gisirikare cya Makenke mu Karere ka Mbarara mbere yo koherezwa mu kigo cya gisirikare cya Mbuya i Kampala.

Ku itariki 31 Mutarama 2020, Umunyamategeko we witwa Eron Kiiza yandikiye urukiko rukuru rwa Kampala, arusaba kugeza umukiriya we(Magezi) imbere y’urukiko.

Uwo munyamategeko yanasabye inzego z’umutekano na Guverinoma gusobanura impamvu yatumye bafunga umukiriya we amezi icumi(10) yose, bakamufunga binyuranyije n’amategeko kandi nta cyaha kigaragara bamushinja.

Hari amakuru avuga ko ubwo busabe bw’umunyamategeko wa Magezi, bwari kuzasuzumwa ku wa mbere w’icyumweru gitaha, ariko Kiiza yakiriye amakuru yizewe amumenyesha ko umukiriya we Magezi yapfuye kubera ihohoterwa yakorewe.

Ku itariki 08 Gashyantare 2020, Ambasaderi Nduhungirehe yavuze ko urupfu rwa Magezi, rusubije inyuma intambwe yari imaze guterwa mu gukemura ikibazo hagati y’ibihugu byombi.

Yagize ati, “Nubwo hari imyanzuro yafatiwe i Luanda mu rwego rwo gukemura ikibazo, ariko ifatwa ry’Abanyarwanda ritubahirije amategeko muri Uganda rigeze ku rundi rwego.Ubu barapfa bazira gukubitwa no gukorerwa iyicarubozo,bikorwa n’abo mu nzego z’iperereza ba Uganda.”

Amb.Nduhungirehe kuri Twitter yongeyeho ko Guverinoma ya Uganda igomba kurekura Abanyarwanda bose ifunze.

Mu byumweru bibiri bishize, Perezida Paul Kagame na Perezida Yoweri Museveni bahuriye ahantu habiri hatandukanye, i Addis Ababa muri Ethiopia mu nama ya 33 ya Afurika yunze Ubumwe, ndetse no ku wa kabiri tariki 11 Gashyantare 2020 bahurira muri Kenya mu muhango wo gushyingura Daniel Arap Moi wahoze ari Perezida wa Kenya. Gusa ntibyamenyekanye niba abo bakuru b’ibihugu baragize umwanya wo kuganira.

Uburyo Magezi yishwemo ntibusobanutse, ariko ibaruwa yasinywe n’umuyobozi w’ishami rishinzwe kugenza icyaha muri sitasiyo ya police ya Butabika, igatangazwa na Daily Monitor yemeza ko Magezi yapfiriye ahitwa Kirinya, akaba yaraguye mu bitaro bya Butabika ku itariki 21 Mutarama 2020, saa tatu za mu gitondo (9am).

Umuryango wa Magezi uba mu Rwanda, uvuga ko nta makuru yemeza urupfu rwa Magezi avuye ku bayobozi bo muri Uganda bigeze babona. Abo muri uwo muryango basaba Leta y’u Rwanda ko yabafasha umurambo wa nyakwigendera ukazanwa mu gihugu.

Amb. Nduhungirehe yavuze ko abahagarariye u Rwanda muri Uganda barimo gukurikirana icyo kibazo.

U Rwanda rukomeza kuvuga ko Uganda ikwiye kurekura Abanyarwanda ifunze, ndetse ikareka no gushyigikira imitwe yitwaje intwaro irwanya Leta y’u Rwanda, ubundi ibintu bigasubira mu buryo.

Umurambo winjizwa mu modoka y’u Rwanda

Ni umurambo w’umugabo w’imyaka 36 witwa Semukanya Gasore wo mu Murenge wa Kinyababa mu Karere ka Burera. Apfuye nyuma y’iminsi mike batamubona muri ako gace aho byavugwaga ko yabaga kwa Nyirasenge utuye mu gihugu cya Uganda.

Mu muhango wo guhererekanya umurambo, uwaje ahagarariye urwego rwa Polisi Sitasiyo ya Kisoro muri Uganda utashatse gutangaza amazina ye, yavuze ko ku wa gatatu tariki 05 Gashyantare 2020 aribwo bahurujwe n’abaturage babwirwa ko babonye umurambo unagana mu giti cyo mu ishyamba ryitwa Cyuya.

Ati “Twakiriye amakuru ko mu ishyamba rya Cyuya hari umurambo w’umusore unagana mu giti ari mu mugozi, Polisi yahise ijya kureba, ibona uwo murambo nk’uko yari yabibwiwe, irawururutsa iwujyana mu bitaro bya Kisoro kugira ngo ukorerwe ibizamini. Nyuma yo gukorerwa ibizamini nibwo twawuzanye kuwuhererekanya na Leta y’u Rwanda”.

Abajijwe icyaba cyateye urwo rupfu, yavuze ko icyo ari ikibazo cyasubizwa na muganga wasuzumye uwo murambo.

Abazanye uwo murambo basabwe n’abahagarariye u Rwanda kubanza gufungura isanduku ngo imiryango ye imenye ko ari we koko bashaka kubyanga.
Gusa bageze aho barumvikana bemera gufungura iyo sanduku yajemo umurambo, kuyifungura bibanza kugorana, dore ko bari bayiteyemo imisumari mu mpande zose ku buryo bitari byoroshye kuyifungura.
Mu rwego rwo kumenya neza amakuru y’urupfu rwa Semukanya Gasore, Kigali Today yegereye murumuna wa nyakwigendera witwa Iyamuremye Vincent, avuga ko ku mugoroba wo ku wa kabiri tariki 04 Gashyantare 2020, aribwo ngo bumvise amakuru ko babonye umurambo umanitse mu giti mu ishyamba ryo muri Uganda, ngo bagira amakenga kuko bari bamaze iminsi batabona Semukanya.

Avuga ko bahise baterefona babyara babo baba muri Uganda mu gace k’u Bufumbira, biba ngombwa ko bajya kureba ahavugwa uwo murambo basanga ni mubyara wabo, aho yari ari mu mugozi anagana mu giti.

Agira ati “Tukimara kubwirwa ayo makuru twagize impungenge, duterefona babyara bacu bari mu Bufumbira hafi y’aho babonye uwo murambo, mu kugerayo basanga ni umurambo wa nyakwigendera umanitse mu giti”.

Nyuma yo kubwirwa ayo makuru n’abari mu Rwanda, Kigali Today yegereye umwe muri babyara b’uwapfuye witwa Nyirandagijimana Justine utuye muri Uganda wari waje mu bakiriye uwo murambo, avuga ko urupfu rwa mubyara we rwamubereye urujijo.

Avuga ko aho yari avuye mu murima yanyuze ku gasantere aturiye kitwa ku Disi, yumva abantu barasakuza bavuga ko mu ishyamba babonye umuntu unagana mu giti yapfuye.

Akomeza agira ati “Kubera ko bari batubwiye ko mubyara wacu atari mu Rwanda ko batazi aho aherereye, numvise ngize amakenga njya guhamagara Mama aho yaranduraga ibishyimbo, mubwira inkuru ko hari kuvugwa umurambo w’umugabo babonye umanitse mu giti mu ishyamba”.

Arongera agira ati “Nkibwira umucecuru iyo nkuru yaguye mu kantu, duhita tujya kureba aho babonye uwo murambo, tukigera aho mu Rugano dusanga ni we umanitse mu giti aho amaguru ye yendaga gukora hasi. Ubwo Mama yahise agaruka gutabaza twe dusigara ku murambo, byatubereye urujijo”.

Munyantwari Kenesi Umugande w’umuturanyi wa Nyirandagijimana mubyara wa Nyakwigendera, na we ni umwe mu bo urwo rupfu rwabereye urujijo.

Ati “Twasanze umurambo mu giti, abantu bajya kubibwira Polisi. Ikihagera yahise ikata umugozi wari umuziritse bamanura umurambo bawushyira mu modoka yabo, baravuga bati ntabwo dushobora kugenda ngo dusige bene wabo, nibwo bahamagaye mubyara we, nanjye tujyana mu bitaro bya Kisoro aho bapimiye uwo murambo”.

Avuga ko kumenya icyamwishe bitoroshye, kuko ngo na bo ubwabo biboneye uwo murambo uri mu giti.

Ati “Na Polisi yaje iwumanura twirebera, n’akagozi kari kamuziritse bakimara kugakata, ninjye bagahereje n’ubu murebye mu isanduku irimo umurambo mwakabona”.

Mu rwego rwo kumenya icyo Leta y’u Rwanda ibivugaho, Guverineri Gatabazi avuga ko amakuru ava muri Uganda yemeza ko basanze yimanitse mu giti nubwo ayo makuru ngo atizewe.

Avuga ko kuba umuntu yaraguye muri Uganda, bivugwa ko yari yagiye gusura babyara be na Nyirasenge bitumvikana.

Ati “Umuntu wapfiriye ku rundi ruhande, bavuga ko yari kwa Nyirasenge, nta bindi bimenyetso dufite by’ukuntu byagenze, gusa bazanye umurambo turawakira nk’Abanyarwanda tugomba kubaha umuturage wacu, tuwujyana ku bitaro kugira ngo bawusuzume. Hanyuma bazarebe, bamenye niba hari icyamwishe, na RIB ikore akazi kayo ko gufungura dosiye ijyanye n’urupfu rwe. Ibyo nibirangira bazashyingura umuturage wabo muri Kinyababa”.

Ikindi Guverineri Gatabazi yongeraho, ni uko ababishinzwe barimo kubikurikirana kugira ngo hamenyekane icyihishe inyuma y’urwo rupfu kuko bimaze iminsi bigaragara ko Abanyarwanda bari gukorerwa iyicarubozo muri icyo gihugu.

Ati “Birajyana n’igihe baherutse kwica umuturage, baherutse no gukubita umuturage baramutemagura. Hari n’abandi bafungiweyo birazwi. Turacyakurikira ngo turebe ko hari ikibyihishe inyuma, kuko hari igihe abantu bica umuntu bakamumanika mu giti kugira ngo bavuge ko yiyahuye. Byagiye bigaragara kenshi ariko turategereje kugira ngo tumenye andi makuru”.

Mu byifuzo by’umuryango wa Nyakwigendera ngo ni uko uwo murambo wakorerwa isuzuma, hakamenyekana neza icyishe umuvandimwe wabo.

Nyakwigendera Semukanya Gasore asize umugore n’abana batanu.

Abitabiriye iyo nama igamije gushakira hamwe umuti w’ikibazo cy’umubano umaze iminsi utifashe neza hagati y’u Rwanda na Uganda, batumiwe na Perezida wa Angola, João Lourenço.

Mu bandi bayitabiriye harimo Perezida w’u Rwanda, Paul Kagame, Perezida wa Uganda Yoweri Kaguta Museveni, na Perezida wa Repubulika Iharanira Demokarasi ya Congo, Félix Antoine Tshisekedi.

Perezida wa Angola João Lourenço, na Perezida Félix Antoine Tshisekedi wa Repubulika Iharanira Demokarasi ya Congo ni bo bahuza b’impande zombi, u Rwanda na Uganda.

Abakuru b’ibihugu bari muri iyo nama baganiriye ku byerekeranye no kunoza umubano w’ibihugu byabo mu bya politiki, ubukungu, dipolomasi n’umuco.

Abakuru b’ibihugu by’u Rwanda na Uganda bashimye ingufu ibihugu bya Angola na Repubulika Iharanira Demokarasi ya Congo bishyira mu kubanisha neza u Rwanda na Uganda no guharanira amahoro n’umutekano mu karere biherereyemo.

Ibihugu by’u Rwanda na Uganda byiyemeje gukomeza ibiganiro bigamije iterambere n’imibereho myiza y’abaturage babyo.

Abakuru b’ibihugu by’u Rwanda na Uganda biyemeje gukomeza inzira iganisha ku mahoro, umutekano n’umubano mwiza nk’ibihugu bituranye kandi bigaharanira kwizerana.

Inama y’i Luanda muri Angola yahuje abakuru b’ibihugu bine yabaye mu mwuka wa kivandimwe n’ubwumvikane, abari bayirimo biyemeza ibi bikurikira:

a) Buri gihugu cyiyemeje kurekura imfungwa z’ikindi gihugu nk’uko zigaragara ku rutonde buri gihugu cyahaye ikindi.

b) Impande zombi zasabwe guhagarika ibikorwa bishobora gufatwa nk’ibishyigikira imitwe igamije guhungabanya umutekano wa kimwe muri ibyo bihugu.

c) Ibihugu byombi byasabwe kurinda no kubahiriza uburenganzira bwa muntu bw’abaturage ba buri gihugu.

d) Komisiyo ihuriweho n’u Rwanda na Uganda yasabwe gukomeza imirimo yayo yo kugenzura iyubahirizwa ry’amasezerano impande zombi zashyizeho umukono.

e) Abari muri iyo nama y’i Luanda muri Angola biyemeje ko inama itaha izabahuza izabera ku mupaka wa Gatuna (abandi bita Katuna) uhuza u Rwanda na Uganda, iyo nama ikazaba ku itariki ya 21 Gashyantare 2020.

Abakuru b’ibihugu bari muri iyo nama bashimiye Perezida wa Angola João Lourenço kubera urugwiro yabakiranye, ndetse n’ubwitange agaragaza muri ibyo biganiro bigamije kubanisha neza ibihugu bituranyi by’u Rwanda na Uganda.

Uwo musore Imbangukiragutabara (ambukance) yagejeje mu bitaro bya Ruhengeri ku itariki 01 Gashyantare 2020, umunyamakuru wa Kigali Today yamusanze mu bitaro arimo serumu, agaragara nk’urembye cyane aho yagorwaga no kuvuga, asobanura ko kwikura mu maboko y’abo bagabo bitari byoroshye.

Avuga ko aho bamutemeye mu masambu y’umuryango we ari hafi y’u Rwanda, aho yemeza ko kuva mu Rwanda ukagera muri ayo masambu bitarenza igihe cy’iminota irindwi.

Ndayambaje avuga ko n’ubwo abo mu muryango we batuye mu Rwanda, bafite amasambu muri Uganda. Ngo ubwo abo basore bamusangaga mu murima, baje bamurwanya bavuga bati Abanyarwanda musubire iwanyu mutuvire mu masambu. Ngo ako kanya batatu bahise bamufata, abasigaye batangira kumutemagura agerageza kwirwanaho, arabacika yiruka agana mu Rwanda.

Ngo n’ubwo yari afite imbaraga nke ari nako avirirana umubiri wose, yagerageje kwiruka ariko imbaraga zikomeza kumubana nke, nibwo akimara kwinjira ku butaka bw’u Rwanda yahise yitura hasi amera nkaho atakaje ubwenge.

Ati “Nyuma yo kuntemagura, nagerageje kubacika niruka ntazi iyo ngana kuko nari meze nk’uwapfuye, ariko niruka nerekeza aho abasirikare bacu bakunze kuba bari, nkihagera nasanze bahavuye.

Akomeza agira ati “Nari ndembye cyane, nitura hasi kuva ubwo nahise nanirwa kuhava ntakaza ubwenge dore ko n’imvura yari yaguye. Abasirikare bacu nibwo baje mu gitondo bansangaho bagira ngo napfuye, ariko basanga ngihumeka baranterura bandyamisha ahantu, nibwo natangiye kumva ngaruye ubuzima”.

Mukakibibi Donatile, nyina wa Ndayambaje yavuze ko ayo masambu bafite mu gihugu cya Uganda ari wo mutungo basigaranye wari ubatunze kuko mu Rwanda nta masambu bagira dore ko ngo n’ababyeyi ba Mukakibibi bakomoka muri Uganda ari naho bahoze batuye mbere y’uko bitaba Imana.

Ngo aho umutekano wo kujya mu gihugu cya Uganda ubereye muke, ngo birinze gusubirayo bumvikana n’abantu bo mu miryango yabo iba muri Uganda kujya bahinga ayo masambu byakwera bakagabana.

Ngo imvano yo kuba Ndayambaje yaranyarukiye muri Uganda nuko bumvise ko amasambu yabo n’ibigori bihinzemo Abagande batangiye kubyigabiza, nibwo yanyarukiyeyo ngo amenye uko icyo kibazo gihagaze bamwakiriza imihoro baramwahuka baramutemagura.

Nk’uko Mukakibibi nyina wa Ndayambaje akomeza abivuga, ngo uwo muhungu we yagiye muri Uganda ku itariki 31 Mutarama anyura mu kayira bari basanzwe banyuramo bajya kuri ayo masambu.

Muri uko kugirirwa nabi, Umuryango wa Ndayambaje ntiwamenye ko yaraye atagarutse kubera ko yararaga mu nzu ye, batungurwa no kubwirwa ko umwana wabo yaje ari indembe, ko yaraye atemewe mu gihugu cya Uganda.

Ati “Kubera ko uwo musore yabaga mu nzu iwe ntitwatekereje ko yaraye atagarutse, nari nzi ko yatashye akajya iwe. Uyu munsi mu gitondo niho ngiye kumva numva barampamagaye bati umuhungu wawe bamutemaguye, nti bamutemeye he, bati muri Uganda umusirikare w’u Rwanda ni we uri kumwe na we. Ubwo twahise tujya kureba dusanga ari kumwe n’abasirikare bacu ari intere”.

Uwo mukecuru afite impungenge z’uburyo umwana we azavuzwa kubera uburyo yakomerekejwe cyane umuryango wabo ukaba udafite ubushobozi bwo kumuvuza. Avuga kandi ko ahangayikishijwe n’ubutaka bwe ashobora kwamburwa kandi ari bwo yari atezeho amaramuko.

Abakuru b’ibihugu by’u Rwanda, Uganda, Angola na DR Congo baherukaga guhurira i Luanda muri Angola tariki 12 Nyakanga 2019 (Ifoto:Urugwiro)

Umunyamabanga wa Leta y’u Rwanda muri Minisiteri y’Ububanyi n’Amahanga, Ambasaderi Olivier Nduhungirehe, abinyujije kuri Twitter, yatangaje ko iyo nama ya gatatu yiga kuri icyo kibazo izaba irimo abahagarariye ibihugu by’u Rwanda na Uganda ndetse n’abahuza b’impande zombi ari bo Perezida wa Angola João Lourenço, na Perezida Félix Antoine Tshisekedi wa Repubulika Iharanira Demokarasi ya Congo.

Third Quadripartite Summit on relations between #Uganda🇺🇬 & #Rwanda🇷🇼, to be held in #Luanda this Sunday 2nd February 2020, under the facilitation of Presidents João Lourenço of #Angola🇦🇴 & Félix Antoine Tshisekedi of #DRC🇨🇩.

With good faith and resolve, we can end this crisis. https://t.co/uVhxpyx6ym

— Amb. Olivier J.P. Nduhungirehe (@onduhungirehe) January 31, 2020

Minisiteri y’Ububanyi n’Amahanga muri Angola na yo yemeje amakuru y’iyi nama, ivuga ko Perezida wa Angola, João Lourenço, ari we watumiye bagenzi be b’u Rwanda, Uganda na Repubulika Iharanira Demokarasi ya Congo, kugira ngo bongere baganire ku kibazo cy’umutekano n’imibanire hagati y’ibihugu byo mu Karere.

President João Lourenço has invited is counterparts Félix Tshisekedi (DRC), Paul Kagame (Rwanda) and Yoweri Museveni (Uganda), for another Quadripartite Summit in Luanda this Sunday. Security matters and regional cooperation will be at the heart of the discussion.🇦🇴🇨🇩🇷🇼🇺🇬 pic.twitter.com/7GTgnNokEt

— MOFA / MRE Angola (@angola_Mirex) January 31, 2020

Abahagarariye ibihugu by’u Rwanda, Uganda, Angola na Repubulika Iharanira Demokarasi ya Congo bagiye kongera guhurira mu biganiro (Ifoto: Urugwiro)

Minisitiri Vincent Biruta yagiranye ikiganiro n’abanyamakuru

Ni mu kiganiro yagiranye n’itangazamakuru rikorera mu Rwanda no hanze y’u Rwanda kuri uyu wa gatatu tariki 08 Mutarama 2020, ikibazo cyakunze kugarukwaho ni ikijyanye n’umubano w’u Rwanda na Uganda umaze iminsi ujemo agatotsi.

Mu gusubiza ibyo bibazo, Minisitiri Vincent Biruta yavuze ko Abanyarwanda bakomeje kugirwa inama yo kugabanya ingendo zabo muri Uganda kubera umutekano muke wabo, ushingiye mu kubafata, kubafunga no kubakorera iyicarubozo.

Kuri ibyo bibazo Abanyarwanda bahuriye na byo muri icyo gihugu, Minisitiri Vincent Biruta avuga ko hatangiye kugaragara ibimenyetso ko bishobora guhagarara, Abanyarwanda bakongera kwishyira bakizana mu gihugu cya Uganda.

Mu bimenyetso byagarutsweho na Minisitiri Biruta, ni uko hari Abanyarwanda icyenda bamaze gufungurwa bari bafungiye mu gihugu cya Uganda, bashyikirizwa u Rwanda. Minisitiri Biruta avuga ko afite icyizere ko icyemezo cyo kurekura Abanyarwanda kigiye gukomeza n’abandi Banyarwanda bafungiyeyo bakarekurwa.

Yagize ati “Uyu munsi twatangiye kubona ibimenyetso ko Uganda yiteguye kuba yahagarika ibyo bikorwa byo gufunga Abanyarwanda no kubakorera iyicarubozo, ndetse n’abari bafunze yatangiye kubarekura, hafunguwe icyenda. Turizera ko bikomeza.”

Uyu ni umwe mu Banyarwanda benshi bakorewe iyicarubozo ubwo bari muri Uganda

Minisitiri Biruta yavuze ko mu gihe iyo ntambwe Uganda yateye ikomeje, impamvu zatumye Abanyarwanda bagirwa inama yo kwirinda kujya mu gihugu cya Uganda zavaho, imigenderanire y’abaturage muri Uganda ikaba yakomeza.

Agira ati “Ni ryari tuzamenyesha Abanyarwanda ko bashobora gusubira muri Uganda? Bizaturuka ku bikorwa bigiye gukurikira, na biriya byakozwe uyu munsi kuko hari abandi benshi bagifunze. Nibafungurwa bose tuzakomeza kuganira uko natwe tuzaba tubibona.”

“Nibwo tuzabwira Abanyarwanda ko noneho umutekano wabo nta kibazo uteye, ko bashobora kujya muri Uganda mu mudendezo, ko ubucuruzi bushobora gukorwa, ibicuruzwa bikagenda bikanaza. Twizeye ko nta ngorane ziri buzemo”.

Perezida Kagame aherutse kwakira intumwa ya Uganda yari imuzaniye ubutumwa bwa Museveni butanga icyizere ko umubano w’ibihugu byombi ugana mu nzira nziza

Minisitiri Biruta yagarutse no ku butumwa Ambasaderi Adonia Ayebare, Intumwa yihariye ya Perezida Museveni, aherutse kugeza kuri Perezida Paul Kagame ku itariki 29 Ukuboza 2019.

Biruta yavuze ko ubwo butumwa bwari bwerekeranye n’umubano w’ibihugu byombi aho yagize ati “Ubutumwa bwari ukuvuga ko Uganda yiteguye kurangiza ibibazo, umubano hagati ya Uganda n’u Rwanda ugasubira mu buryo. Ni byo rero ngira ngo byatangiye gushyirwa mu bikorwa, harekurwa abantu icyenda, hari n’abandi bafunzwe turizera ko na bo baza kurekurwa, hanyuma n’amasezerano ya Luanda na yo agashyirwa mu bikorwa”.

Reba Video ya Minisitiri Biruta asobanura uko u Rwanda rubanye n’ibihugu byo mu Karere

Minisitiri wa Uganda w’Ububanyi n’Amahanga Sam Kutesa (ibumoso) na Ambasaderi w’u Rwanda muri Uganda Maj. Gen. Frank Mugambage (iburyo) bagiranye ikiganiro n’itangazamakuru ubwo u Rwanda rwashyikirizwaga abari bafungiye muri Uganda

Guverinoma y’u Rwanda yabisabye kuri uyu wa gatatu tariki 08 Mutarama 2020 nyuma y’uko Uganda ishyikirije u Rwanda Abanyarwanda icyenda bari bafungiye muri Uganda, barimo barindwi barekuwe ku wa kabiri tariki 7 Mutarama 2020 n’urukiko rwa gisirikare.

Ni igikorwa Leta y’u Rwanda yashimye ariko ishimangira ko abarekuwe ari bake cyane ugereranyije n’Abanyarwanda bafungiye muri Uganda bazira ubusa.

Umunyamabanga wa Leta muri Ministeri y’Ububanyi n’Amahanga ushinzwe ibikorwa by’Umuryango wa Afurika y’Iburasirazuba, Ambasaderi Olivier Nduhungirehe, yavuze ko ari ikimenyetso cy’ubushake bwo kubahiriza amasezerano ya Luanda muri Angola.

Hari hateguwe n’ikiganiro n’abanyamakuru cyitabiriwe na Maj. Gen Frank Mugambage uhagarariye u Rwanda muri Uganda, n’intumwa yihariye ya President Yoweri Museveni Ambassador Adonia Ayebare, abanyamakuru berekwa abo Banyarwanda icyenda barekuwe na Uganda.

Minisitiri w’Ububanyi n’Amahanga wa Uganda Sam Kutesa wari muri icyo kiganiro, yavuze ko ibyo Uganda ikoze u Rwanda rwagombye gufatiraho urugero kuko ngo ari igikorwa kigaragaza ubushake bwo gukemura ibibazo biri hagati y’ibihugu byombi.

Ku ruhande rw’u Rwanda, Ambasaderi Olivier Nduhungirehe yabwiye KT Press ko ntacyo u Rwanda rugomba gufatiraho urugero kuko nta munya-Uganda n’umwe ufungiye mu gihugu cy’u Rwanda mu buryo butemewe n’amategeko, ndetse yongeraho ko atumva icyo Minisitiri Kutesa yashakaga gusobanura.

Abanyarwanda icyenda barekuwe barimo uwitwa René Rutagungira, umucuruzi uri mu Banyarwanda ba mbere batawe muri yombi muri Uganda ashinjwa ibinyoma byo kuba intasi ya Leta y’u Rwanda.

Aba Banyarwanda bari bafungiwe muri Uganda barekuwe bashyikirizwa u Rwanda

Ambassador Mugambage wari mu kiganiro n’itangazamakuru, yavuze ko bariya icyenda barekuwe bashyikirijwe abahagarariye u Rwanda i Kampala n’abashinzwe abinjira n’abasohoka kugira ngo boherezwe mu Rwanda.

Mugambage yavuze ko ari intambwe nziza itewe ariko asaba ko Uganda ihagarika ibikorwa byo gufata Abanyarwanda ku maherere.

Abanyarwanda barindwi barekuwe n’urukiko rwa gisirikare ku wa kabiri tariki 07 Mutarama 2019, ni René Rutagungira, Emmanuel Rwamucyo, Augustin Rutayisire, Etienne Nsanzabahizi, Bahati Mugenga, Charles Byaruhanga na Claude Iyakaremye. Imyirondoro y’abandi babiri ntiyigeze ishyirwa ahagaragara.

Bose bashinjwaga ibyaha birimo ubutasi, ubushimusi, gutunga imbunda mu buryo butemewe, n’ibindi byaha u Rwanda rutahwemye kugaragaza ko ari ibinyoma mu myaka itatu ishize.

Leta y’ u Rwanda ikomeje gusaba Uganda guhagarika gutera inkunga imitwe yitwaje intwaro irwanya Guverinoma y’u Rwanda, ndetse ikarekura abandi Banyarwanda benshi bakirimo kugirirwa nabi mu buroko bwa gisirikare muri Uganda.

Irekurwa rya bariya icyenda ryakiriwe neza n’u Rwanda cyane cyane ko ari igikorwa kije gikurikira ubutumwa Perezida Museveni aherutse koherereza Perezida Kagame, ubutumwa bwakiriwe nk’ikimenyetso cy’ubushake bwo kunoza umubano.

Abanyarwanda basaga 1400 ni bo birukanywe mu buryo bw’ubugizi bwa nabi muri Uganda, inzego zishinzwe umutekano zikabazana ku mupaka nk’amatungo, benshi bamerewe nabi nyuma yo kwamburwa ibyabo byose n’amafaranga.

Ambasaderi Olivier Nduhungirehe yasabye Uganda kurekura n’abandi Banyarwanda benshi bafunzwe barengana

Umunyamabanga wa Leta muri Minisiteri y’Ububanyi n’amahanga ushinzwe ibikorwa by’umuryango wa Afurika y’Iburasirazuba, Ambasaderi Olivier Nduhungirehe yabivuze mu kiganiro cyihariye yagiranye na Kigali Today ku wa kabiri tariki 07 Mutarama 2020.

Yabivuze nyuma gato y’irekurwa ry’Abanyarwanda barindwi, bamwe mu bamaze igihe bafungiwe muri Uganda bashinjwa ibyaha birimo kuba intasi z’u Rwanda.

Ni mu gihe nyamara Leta y’u Rwanda yo idahwema kugaragaza ko Abanyarwanda batabwa muri yombi, bagakorerwa iyicarubozo, bazira kwanga kujya mu mitwe igamije guhungabanya umutekano w’u Rwanda, ishyigikiwe na Leta ya Uganda.

Ambasaderi Nduhungirehe yavuze ko kurekura abo Banyarwanda “ari ibintu byiza ariko bidahagije” Yanavuze ko hakiri kare kwemeza ko irekurwa ry’abo Banyarwanda ari intambwe nziza Uganda yateye mu gushyira mu bikorwa amasezerano y’amahoro Perezida w’u Rwanda n’uwa Uganda basinyiye i Luanda muri Angola.

Ati “Haracyari kare ngo tubivuge, tuzareba niba iki gikorwa kizakurikirwa n’ibindi kuko abantu tuvuga [barekuwe] ni abantu barindwi harimo na Réné Rutagungira uri mu ba mbere bafashwe mu 2017, ngira ngo ni ibintu byiza ariko bidahagije kuko Abanyarwanda bari muri Uganda bafashwe amaherere bakorerwa iyicarubozo bagera mu ijana barenga.”

“Icyo twifuza ni uko bose barekurwa bagasubira mu miryango yabo kuko imaze imyaka ibasaba, tukaba twifuza kandi ko na Uganda yahagarika ubufasha itanga kuri iyo mitwe yitwaje intwaro ibangamira umutekano w’u Rwanda” Ambasaderi Nduhungirehe.

Uretse umutwe wa RNC wakunze kuvugwaho kuba uhabwa inkunga na Uganda mu bikorwa byawo bihungabanya umutekano w’u Rwanda, Ambasaderi Nduhungirehe yavuze ko hari n’indi mitwe Uganda itera inkunga, ahereye ku rugero rw’abaherutse kugaba igitero mu Kinigi ho mu Karere ka Musanze cyahitanye abasivili 14 kigakomerekeramo 16.

Agira ati “Icyo gitero cyagabwe n’umutwe w’iterabwoba witwa RUD URUNANA ukorera mu Burasirazuba bwa Repubulika Iharanira Demokarasi ya Congo. Benshi mu bakigabye barishwe ariko hari abandi bahunze, ntibahungira muri Congo aho bari bavuye, ahubwo bahungira muri Uganda.”

Yungamo ati “Harimo Lieutenant Kabayiza Seleman wahungiye mu Karere ka Kisoro ari kumwe n’abandi babiri, bavanwa Kisoro bahungishirizwa Mbarara mu nyubako z’igisirikari cya Uganda muri Makindye, aho bavuye bajyanwa ku biro bikuru bya CMI i Mbuya muri Kampala. Twanditse ibaruwa tariki 14 Ukwakira, iminsi 10 nyuma y’igitero dusaba Leta ya Uganda gukora iperereza ngo inatwohereze abo bantu batatu, ariko kugeza n’ubu nta gisubizo turabona.”

Ambasaderi Nduhungirehe yavuze ko Uganda yakomeje kwirengagiza nkana ikibazo kiri hagati y’ibihugu byombi, kandi hari ibimenyetso bifatika bigaragaza ko bamwe mu bayobozi mu nzego zo hejuru muri Uganda bagira uruhare rutaziguye mu bitero bigabwa ku Rwanda.

Ati “Iperereza ryakorewe ahabereye ubwo bwicanyi [mu gitero cyo mu Kinigi], ryagaragaje neza ko icyo gitero cyari kiyobowe na Minisitiri Philemon Mateke wa Uganda ushinzwe ubutwererane mu karere, hari telefone z’abagabye igitero zafashwe zibigaragaza, hari n’ubuhamya bw’abafashwe batanze amakuru.”

Ambasaderi Nduhungirehe avuga ko “Ibyo ari ubushotoranyi bukabije ku Rwanda, kuko bitakiri mu rwego rw’imitwe mito irwanya Leta, ahubwo bigeze ku rwego rw’umuminisitiri muri Guverinoma ya Uganda uyobora igitero cy’iterabwoba cyahitanye Abanyarwanda 14 kigakomeretsa abandi 16.”

Ifungurwa ry’Abanyarwanda barindwi barekuwe rije nyuma y’iminsi mike Perezida Yoweri K. Museveni wa Uganda yohereje intumwa mu Rwanda, yagiranye ibiganiro na Perezida Kagame.

Ambasaderi Nduhungirehe yavuze ko bishoboka ko kurekurwa kwabo bifite aho bihuriye n’iyo ntumwa, ariko ashimangira ko icyo u Rwanda rwifuza ari ukubona Abanyarwanda bose bafungiwe muri Uganda barekurwa, ndetse n’inkunga zose iki gihugu kigenera imitwe irwanya u Rwanda zigahagarara.

Inkuru bijyanye:

Abanyarwanda barindwi bari bafungiye muri Uganda barekuwe

Ni mu gihe nyamara Leta y’u Rwanda yo idahwema kugaragaza ko Abanyarwanda batabwa muri yombi, bagakorerwa iyicarubozo, bazira kwanga kujya mu mitwe igamije guhungabanya umutekano w’u Rwanda, ishyigikiwe na Leta ya Uganda.

Ikinyamakuru The New Vision cyo muri Uganda, cyanditse kuri Twitter ko uru rukiko rwarekuye Abanyarwanda barindwi, ariko ko amakuru arambuye kikiyakurikirana.

Iki kinyamakuru cyavuze ko aba Banyarwanda bari bafunzwe guhera muri 2018, bashinjwa ibyaha birimo gutunga imbunda mu buryo bunyuranyije n’amategeko.

Lt Gen. Andrew Gutti, wari ukuriye urukiko rwafashe icyo cyemezo, yatangaje ko aba Banyarwanda barekurwa nyuma y’uko ubushinjacyaha bwari bumaze gutangaza ko buhagaritse ibirego bwabaregaga.

Ifungurwa ry’aba Banyarwanda ribaye nyuma y’iminsi mike Perezida Yoweri K. Museveni wa Uganda yohereje intumwa mu Rwanda, yagiranye ibiganiro na Perezida Kagame.

Mbere gato y’uko umwaka wa 2019 urangira, Perezida Museveni yari yanditse kuri Twitter avuga ko yakiriye Ambasaderi Adonia Ayebare, uherutse mu Rwanda afite ubutumwa bugenewe Perezida Kagame ku mubano w’ibihugu byombi.

Icyo gihe Museveni yavuze ko Ambasaderi Ayebare na Perezida Kagame bagiranye ibiganiro byiza, kandi ko mu gihe cya vuba hazaboneka imyanzuro ishyira iherezo ku bwumvikane buke bumaze igihe kinini mu mubano w’ibihugu byombi.

Mu kiganiro yagiranye na radio na televiziyo y’u Rwanda, mu mpera z’umwaka wa 2019, Perezida Kagame yavuze ko guhura n’intumwa ya Perediza Museveni nta cyizere yibwira byahita bitanga, mu gihe hakiri intambwe ikenewe guterwa ngo ibibazo birusheho gukemuka.

Inkuru bijyanye:

Kuba Uganda yarekuye Abanyarwanda barindwi ntibihagije – Nduhungirehe

Mukamazera Béatrice yababajwe cyane no kubura umugabo we wabahahiraga

Mu makuru Nsabimana Emmanuel babanaga mu gihugu cya Uganda yatangarije Kigali Today, yavuze ko uwo mugabo Mbonabakeka yishwe urupfu rw’agashinyaguro aho yatemaguwe kugeza apfuye.

Nk’uko Nsabimana abivuga, ngo Mbonabakeka yishwe ubwo yageragezaga gutabara undi Munyarwanda witwa Bayavuge Dionise, ngo wari watewe na bamwe mu basore bakomeje guhiga Abanyarwanda baba mu gihugu cya Uganda.

Agira ati “Mbonabakeka yazize gutabara aho bari bateye umunyarwanda baturanye witwa Bayavuge Dionise. Yumvise bakubita urugi ku muturanyi we urugi rwabananiye kurwica, avuza induru. Nyuma yo kumva Mbonabakeka avuza induru bavuye kwa Bayavuge, basiga bamufungiraniye inyuma batera Mbonabakeka wavuzaga induru atabaza bakubita urugi rugwa munzu baramutemagura umutwe,amaguru n’urutirigongo, barangije bikorera umurambo barawujyana”.

Nsabimana avuga ko akimara kumenya amakuru y’uko mugenzi we yishwe, ngo yagerageje gutabara akurikirana aho umurambo bawujyanye, bakimubona na we bashaka kumutema arabahunga yirinda ko na we bamwica.

Ati “Naratabaye nshakisha aho bajyanye umurambo, nakomeje kubakurukira bambonye bansubiza inyuma, baravuga ngo ninjyayo na bagenzi banjye ngo baramuduhambiriraho dutange za Miliyoni.”

Ati “Tubonye ko ayo mafaranga tutayabona, nshakisha uburyo nabimenyesha imiryango ye mu Rwanda ngo bamfashe. Nyiri inzu Mbonabakeka yabagamo ni we wavuze ati yari nk’umwana wanjye, atanga amafaranga ayoherereza Polisi bashaka irimbi baramushyingura”.

Nsabimana ngo akimara kubona urupfu rw’agashinyaguro rwakorewe mugenzi we, ngo yakutse umutima ashaka uburyo yataha mu Rwanda.

Nsabimana Emmanuel wabanaga na Nyakwigendera mu gihugu cya Uganda ngo yagerageje kujya kureba aho bagiye gushyingura Mbonabakeka bashaka na we kumwica

Ariko ngo ntiyahise afata umwanzuro wo guhita ataha, kuko yabanje gushakisha umwana wa Mbonabakeka wari umaze kwicwa, ajya gushakira uwo mwana aho yakoraga akazi ko kuragira inka, akimara kubona uwo mwana aramucikana batahana mu Rwanda.

Ubwo Kigali Today yageraga mu Murenge wa Kinoni,aho Nyakwigendera afite imiryango, byari agahinda gakomeye ku mugore we, ababyeyi be n’abaturanyi aho bababajwe n’urupfu rw’umwana wabo bavuga ko bashegeshwe no kutabona umurambo we ngo bawushyingure.

Mukamazera Béatrice umugore we, mu gahinda kenshi yavuze ko urupfu rw’umugabo we rumusigiye ibibazo bikomeye byo kubura umugabo we wari usanzwe ahahira umuryango we akibaza uburyo abana bane amusiganye azabasha kubatunga bagakura.

Agira ati “Kubyakira byaranze, na n’iyi saha ntabwo agahinda kazashira. Nyakwigendera ansigiye abana bane nta kintu bafite cyo kubagaburira, nta n’uzabahahira n’abo bana bane kubabyara ni uko bari bafite se ubahahira. Turi mu cyiciro cya mbere cy’ubudehe, n’uwo mwana babanaga yamujyanye ari ukugira ngo atazabura icyo arya akaba yaca ikigori cy’abandi bakaba baturihisha ntacyo kuriha dufite”.

Uwo mugore avuga ko kuba umugabo we yishwe ntabone n’umurambo we ngo amushyingure, ngo ni kimwe mu byamushegeshe.

Yasabye Leta ubufasha bwo kurera abana nyakwigendera asize, bakabona n’uko biga kuko basigaranye ubukene bukomeye bwo kubura uwahahiraga umuryango.

Ati “Iyo nza kumubona wenda nkamushyingura nkamugerekaho itaka, wenda nanjye nari gushaka n’ikirago kikamugendaho. Nta mitungo yari afite ngo barayimuziza, bamujijije ko yatabaye ndetse ko ari umunyarwanda. Ndasaba Leta kumfasha abana bakiga”.

Agahinda Mukamazera afite, agafatanyije na Hitimana Simon Umubyeyi wa Mbonabakeka, aho avuga ko yahamagawe ubwo bari mu minsi mikuru y’Ubunani ku itariki 01 Mutarama 2020, bamubwira ko umuhungu we yapfuye akagwa mu kantu.

Avuga ko ikimubabaza ari ukumva ko umwana we yiciwe muri Uganda, ariko ntamenye uburyo yashyinguwe.

Ati “Baramwishe ariko bagombye kumumpa nkamwishyingurira. Namenye ko yiciwe muri Uganda ariko sinzi uko yashyinguwe, icyo ni cyo kimbabaza kuba umuntu yariciwe mu Buganda simenye ukuntu yahambishijwe. Ubu sinzi uburyo bamuhambye, ni agahinda gakomeye sinzi uko ihambwa rye ryakozwe.”

Mukanganizi Catherine, nyina wa nyakwigendera na we yunze mu rya Hitimana agira ati “Twamaze guhamagarwa na Nsabimana atubwira ko umuhungu wacu yishwe, atubwira ko avuye kuraruza umwana we babanaga muri Uganda tugwa mu kantu.”

Akomeza agira ati “None se murambaza ngo icyifuzo ko nta bubasha mfite bwo kujya muri Uganda ngo ngiye kurwana na bo, icyangombwa ni uko akana ke tukabonye ko byibura kakaba karokotse. Yari yakajyaniye umukeno ngo kabone uko kabaho mu rwego rwo kukarinda kuba kakwiba. Birababaje kuko ntamushyinguye”.

Abaturage bo muri ako gace mu Murenge wa Kinoni bababajwe cyane n’urupfu rwa Mbonabakeka, aho bemeza ko urupfu rw’umwana wabo rwabashegeshe ndetse bakaba bababajwe no kuba batarabonye umurambo ngo bamushyingure.

Abaturage bagiriwe inama yo kwirinda kwambuka umupaka

Bavuga ko urwo rupfu rubasigiye isomo ryo kubona ko mu gihugu cya Uganda umunyarwanda adakunzwe, biyemeza gufata ingamba zo kudasubira mu gihugu cya Uganda.

Muri iyi minsi ku mipaka y’u Rwanda na Uganda hakomeje kugezwa Abanyarwanda, aho abenshi bahajugunywa bafite ibikomere bakemeza ko bamaze iminsi bakorerwa iyicarubozo muri icyo gihugu.

Mu nama iherutse kumuhuza n’abanyamakuru bakorera mu ntara y’Amajyaruguru, Umuyobozi w’Intara y’Amajyaruguru Gatabazi JMV yagaragaje ko Abanyarwanda 73 bafungiye mu gihugu cya Uganda aho bakomeje gukorerwa iyicarubozo bakubitwa, banakora imirimo y’uburetwa irimo guhingishwa ubutaruhuka.

Muri abo bafungiye mu gihugu cya Uganda, Akarere ka Burera ni ko gafiteyo benshi bangana na 44.

Nyiramwiza avuga ko yageze mu gihugu cya Uganda ahitwa Kasese mu mwaka wa 2016 ashakana n’umugande witwa Musinguzi Moses babyarana umwana umwe ubu ufite umwaka umwe.

Mu ijoro ryo ku itariki ya 24 Ukuboza 2019 uyu mugabo we yaje gutaha yarakaye cyane atema uyu mugore we (Nyiramwiza Pascaline) amuca akaboko ndetse anamutema mu mutwe no mu gatuza. Nyiramwiza avuga ko umugabo we yamutemye amubwira ko ashatse yamwica nk’uko abandi Banyarwanda bari muri iki gihugu cya Uganda barimo kwicwa n’abanya-Uganda.

Yagize ati: “Hari mu ijoro rya tariki ya 24 Ukuboza rishyira tariki ya 25 nari niriranywe n’umugabo wanjye aho twari twatembereye ariko njye kuko nari mfite umwana muto nabonye bwije ndataha. Umugabo yaje gutaha ari nijoro yarakaye atongana cyane antemesha umuhoro anca akaboko akandi aragakomeretsa ndetse anantema mu mutwe no mu gatuza.”

Nyiramwiza akomeza avuga ko amaze gukorerwa iryo yicarubozo yatabaje abaturanyi ndetse n’abayobozi baramwihorera, akomeza avuga ko atari we munyarwanda wenyine ukorerwa iyicarubozo muri iki gihugu cya Uganda kuko buri munyarwanda washakanye n’umunya-Uganda akorerwa iyicarubozo Leta ya Uganda ntigire icyo ikora.

Ati: “Umugabo wanjye akimara kuntema natabaje inzego z’ubuyobozi muri Leta ya Uganda ndetse n’abaturanyi baranyihorera ntibagira icyo bamfasha yaba ubutabera cyangwa ubuvuzi. Sinjye jyenyine kuko umunyarwanda wese uri muri kiriya gihugu washakanye n’umunya-Uganda ahohoterwa n’uwo bashakanye (w’umunya-Uganda) Leta ntigire icyo ikora.”

Nyiramwiza avuga ko amaze kubona ko nta kivurira afite muri kiriya gihugu (nta muntu umwitayeho) kandi akomeza kuremba kubera ibikomere, yashatse ukuntu yava muri kiriya gihugu agaruka mu Rwanda.

Kuri uyu wa gatatu tariki ya 01 Mutarama 2020 nibwo yageze mu Rwanda ahingukira mu Murenge wa Cyumba mu Karere ka Gicumbi. Arashimira Leta y’u Rwanda uburyo yamwakiriye akimara kugera mu Rwanda, akitabwaho ubu akaba arimo guhabwa ubuvuzi mu bitaro bya Byumba.

Yagize ati: “Ndashimira Leta y’u Rwanda uko yanyakiriye, nkimara kugera mu Rwanda abayobozi batandukanye baje kundeba basanga meze nabi babanza kunjyana mu kigo nderabuzima cya Rubaya, mpageze bahita batumiza ingobyi y’abarwayi (Ambulance) iza kuntwara ku bitaro bikuru bya Byumba aho ndimo kwitabwaho n’abaganga.”

Ni kenshi Abanyarwanda bava mu gihugu cya Uganda bavuga ko bakorerwa iyicarubozo nyamara Leta y’iki gihugu ntigire icyo ibikoraho. Nyiramwiza yaboneyeho gukangurira Abanyarwanda kwirinda kujya mu gihugu cya Uganda kuko umunyarwanda wese uriyo atishimiwe.

Yavuze ko n’ubwo ibihugu byombi byashyize umukono ku masezerano yo kubana mu mahoro, Abanyarwanda bakomeje gutabwa muri yombi no gufungwa mu buryo budakurikije amategeko, bakaba bafungiye mu nzu zikoreramo inzego z’iperereza za Uganda ari na ho habera ibikorwa by’ihohoterwa n’iyicarubozo.

Yatanze urugero rw’aho mu byumweru bibiri bishize, ku wa mbere tariki 25 Ugushyingo 2019, Abanyarwanda basaga 150 babaga muri Uganda bakusanyirijwe i Kisoro, 33 muri bo bajugunywa ku mupaka w’u Rwanda na Uganda, abandi baguma mu maboko y’inzego za Uganda bazira gusa kuba ari Abanyarwanda.

Mu zindi ngingo yagarutseho mu ijambo rye, Ambasaderi Nduhungirehe yanenze bimwe mu bitangazamakuru byo muri Uganda harimo n’ibya Leta bikwirakwiza impuha, bigasebya abayobozi b’u Rwanda, ahubwo rigasingiza abanzi b’u Rwanda. Yavuze ko kuba itangazamakuru ryanenga ibitagenda nta kibazo kirimo, ariko rikabikora rifite ibimenyetso.

Nduhungirehe yavuze ko ibibazo by’u Rwanda na Uganda birenze icyo bamwe batekereza cyonyine cyo gufunga umupaka.

Ati “Ikibazo gishingiye ku busugire n’umutekano by’Igihugu, ndetse no kubana neza n’abaturanyi. Ikibazo ni uburenganzira bw’ibanze bwa muntu butubahirizwa, uburenganzira bwo kubaho, kandi akabana n’abandi.”

Umuntu agomba kubaho nta kimuhungabanya, ariko ntibyashoboka mu gihe igihugu cya Uganda kitabyubahiriza.

Nduhungirehe yagaragaje ko uko kutabanira neza Abanyarwanda byagize ingaruka cyane cyane ku bucuruzi.

Ati “Guhahirana byashoboka bite mu gihe abacuruzi bo mu Rwanda bambuka umupaka mu buryo bwemewe n’amategeko, nyamara bagera muri Uganda bagatabwa muri yombi, bagakorerwa iyicarubozo, ndetse n’ibicuruzwa byabo bigafatirwa?"

Nduhungirehe yasabye ko Abanyarwanda bafungiye muri Uganda barekurwa, asaba ko Abanyarwanda bakwizezwa umutekano usesuye ku buryo bakwambuka umupaka bagataha ubukwe bw’abavandimwe, bagasura n’inshuti zabo batikandagira, badafite impungenge z’uko batabwa muri yombi bagakorerwa iyicarubozo.

Ambasaderi Nduhungirehe yanasabye ko umubyeyi w’Umunyarwandakazi wafatiwe muri Uganda n’inzego z’umutekano bakamwiba umwana azira kuba ari Umunyarwanda, yasubizwa umwana we.

Nubwo nta myanzuro yafatiwe muri iyo nama yigeze itangazwa, Igihugu cya Uganda nticyahakanye mu buryo bweruye ibyo gishinjwa n’u Rwanda.

Intumwa zari zihagarariye Uganda zavuze ko zigiye kongera gusuzuma ibyo bivugwa n’u Rwanda.

Yabigarutseho mu ijambo yavugiye i Kampala muri Uganda kuri uyu wa gatanu tariki 13 Ukuboza 2019 ubwo intumwa z’ibihugu byombi zarimo zirebera hamwe uko ibihugu byombi byarushaho kubana mu mahoro n’umutekano.

Ambasaderi Nduhungirehe yashimiye Guverinoma ya Uganda yatumiye impande zitandukanye muri iyo nama, ije ikurikira iyabereye i Kigali muri Nzeri 2019.

Izo nama zombi zigamije gusuzuma iyubahirizwa ry’amasezerano ya Luanda yashyizweho umukono n’abayobozi b’ibihugu byombi, ayo masezerano akaba yarashyizweho umukono kuu wa 21 Kanama 2019.

Ambasaderi Nduhungirehe yashimiye n’abakuru b’ibihugu bya Angola na Repubulika iharanira Demokarasi ya Congo bafashije u Rwanda na Uganda gushyira umukono kuri ayo masezerano, ibyo bihugu bikaba bikomeje no gushyigikira u Rwanda na Uganda mu nzira yo kureba uko ayo masezerano yubahirizwa, dore ko intumwa zabyo na zo kuri iyi nshuro zari zitabiriye inama yabereye muri Uganda.

Ambasaderi Nduhungirehe yavuze ko mu byumweru bibiri bishize i Arusha muri Tanzania habereye ibirori byo kwizihiza isabukuru y’imyaka 20 Umuryango wa Afurika y’Iburasirazuba (EAC) umaze ubayeho. Yongeyeho ko u Rwanda na Uganda ari bimwe mu bihugu bigize uwo muryango, ibihugu bituranye ndetse ko mu minsi ishize byombi byagaragaje ko bishishikajwe n’iterambere ry’uwo muryango.

Yibukije ko kandi mu nama iheruka kubera i Kigali igahuza intumwa z’ibyo bihugu, abari muri iyo nama bagaragaje ko Abanya-Uganda n’Abanyarwanda barenze kuba ari abaturanyi no kuba bahurioye muri uwo muryango wa Afurika y’Iburasirazuba.

Yagize ati “Abaturage b’ibihugu byacu byombi bafitanye amateka akomeye ashingiye ku kuba hari isano y’abagize imwe mu miryango ituye muri Uganda n’abo mu miryango iba mu Rwanda. Bafite byinshi bahuriyeho mu muco, barahahirana, ndetse bakaba barafatanyije mu rugamba rwo kubohora ibihugu byombi. Ibi rero byagakwiye kuba umusingi ukomeye wo guhamya umubano ukomeye mu Muryango wa Afurika y’Iburasirazuba.”

Icyakora uwo mubano mwiza ntiwakomeje hagati y’ibyo bihugu, bigira n’ingaruka mu kudindiza iterambere ry’Umuryango wa Afurika y’Iburasirazuba, ikaba ari na yo mpamvu intumwa z’ibihugu byombi zahuye kugira ngo zirebere hamwe uko uwo mubano mwiza wagaruka.

Ambasaderi Nduhungirehe yibukije abari muri ibyo biganiro ko hashize amezi ane amasezerano ya Luanda ashyizweho umukono, hakaba hashize amezi atatu inama yahurije intumwa z’ibihugu byombi i Kigali ibaye. Ibyavuye muri izo nama zombi byagaruye icyizere mu bantu ko umubano mwiza ugiye kugaruka hagati y’u Rwanda na Uganda.

Nduhungirehe yavuze ko iyo nama y’i Kampala ari umwanya mwiza wo kureba niba ibihugu byombi byubahiriza ibyo byumvikanyeho.

U Rwanda rushinja Uganda kutagaragaza ubushake mu kubahiriza amasezerano

Nyuma y’amezi atari make ashize ibihugu by’u Rwanda na Uganda byiyemeje kuvugurura umubano ukarushaho kuba mwiza, u Rwanda ruvuga ko igihugu cya Uganda nta bushake cyigeze kigaragaza mu kubahiriza amasezerano y’i Luanda n’ay’i Kigali.

Nduhungirehe ati “Aho kugira ngo ibintu bijye mu buryo, ahubwo byarushijeho kuba bibi kuko ibyo u Rwanda rwasabaga ko bikwiye guhagarara, byarushijeho kwiyongera.”

Nduhungirehe yongeyeho ati “ibikorwa byo gushyigikira imitwe yitwaje intwaro ishaka guhungabanya umutekano w’u Rwanda, no gufunga mu buryo budakurikije amategeko Abanyarwanda bari muri Uganda byarakomeje.”

Nduhungirehe kandi yavuze ko igihugu cya Uganda cyakomeje gushyigikira ibikorwa by’iyo mitwe y’abarwanyi, abayobozi bayo na bo bakomeza guhabwa ubufasha n’inzira mu gihugu cya Uganda, bigizwemo uruhare na bamwe mu bayobozi bakuru mu gihugu cya Uganda.

Bimwe mu bitero byibasiye u Rwanda byagizwemo uruhare na Uganda

Mu ijambo rye, Ambasaderi Nduhungirehe yasobanuye ko mu ijoro ryo ku itariki 03 rishyira tariki 04 Ukwakira 2019, abarwanyi bo mu mutwe w’inyeshyamba witwa RUD-Urunana bagabye igitero gikomeye mu Murenge wa Kinigi mu Karere ka Musanze mu Ntara y’Amajyaruguru y’u Rwanda.

Abagabye icyo gitero baturutse mu Burasirazuba bwa Repubulika iharanira Demokarasi ya Congo, hafi n’umupaka wa Uganda n’igice giherereyemo ibirunga. Yavuze ko benshi mu bagabye icyo gitero bahasize ubuzima, abandi bafatwa mpiri (ari bazima).

Babafatanye ibikoresho bitandukanye birimo telefoni ngendanwa, abandi batanga ubuhamya bugaragaza uruhare rwa Uganda muri ibyo bitero.

Hari nimero ya telefoni yo muri Uganda byagaragaye ko nyirayo yavuganye n’abagabye ibyo bitero mbere na nyuma y’ibyo bitero. Iyo nimero byagaragaye ko ari iya Mateke Philemon, Umunyamabanga wa Leta ya Uganda ushinzwe ubuhahirane n’ibihugu byo mu karere.

Nyuma y’icyo gitero, batatu mu bakigabye bahungiye i Kisoro muri Uganda bahamara igihe gito, nyuma boherezwa mu kigo cya gisirikari cya Makenke i Mbarara, bahava berekeza i Mbuya muri Kampala ku cyicaro cy’Urwego rw’Igisirikari cya Uganda rushinzwe iperereza.

Olivier Nduhungirehe yavuze ko Ambasaderi w’u Rwanda muri Uganda yagaragarije Uganda iby’icyo kibazo tariki ya 14 Ukwakira 2019, ariko kugeza ubu akaba nta gisubizo yigeze ahabwa.

Nduhungirehe yasabye abitabiriye ibyo biganiro kugira icyo bikora kuri ubwo bushotoranyi, yongera gusobanura ko u Rwanda ruzakomeza guharanira icyazana umutekano hagati y’ibihugu byombi.

Umunyamabanga wa Leta muri Minisiteri y’Ububanyi n’amahanga ushinzwe umuryango wa Afurika y’Iburasirazuba Ambasaderi Olivier Nduhungirehe, aherekejwe na Minisitiri w’Ubutabera Johnston Busingye, Minisitiri w’Ubutegetsi bw’Igihugu Shyaka Anastase, Minisitiri w’Umutekano mu gihugu Gen. Patrick Nyamvumba na Gen. Maj Joseph Nzabamwita , Umunyamabanga Mukuru w’Urwego rushinzwe iperereza n’Umutekano (NISS).

Intumwa zihagarariye u Rwanda zerekeje muri Uganda mu biganiro birebera hamwe aho imyanzuro y’amasezerano ya Luanda ndetse n’imyanzuro y’inama ya mbere yabereye i Kigali igeze yubahirizwa.

Iyi nama ni iya kabiri igiye kuba nyuma y’amasezerano yashyiriweho umukono i Luanda muri Angola muri Kanama uyu mwaka. Ni amasezerano yari agamije kugarura umubano mwiza hagati y’u Rwanda na Uganda no mu karere ibyo bihugu biherereyemo.

Iyi nama ya kabiri ibaye nyuma y’igihe kinini yari imaze itegerejwe kuko yagombaga kuba mu Kwakira 2019, nyuma y’iminsi 30 ikurikira inama ya mbere yabereye i Kigali muri Nzeri 2019.

Kugeza ubu umubano w’ibihugu byombi uracyarimo agatotsi n’ubwo ibihugu byombi mu nama yabereye i Kigali byari byemeranyijwe kurangiza ibibazo biri hagati yabyo no kubahiriza ibikubiye mu myanzuro y’i Luanda.

U Rwanda rushinja Uganda gukomeza gukorana n’abashaka guhungabanya umutekano w’u Rwanda, by’umwihariko umutwe wa RNC. Hari kandi Abanyarwanda benshi bakomeje gukorerwa iyicarubozo muri Uganda, aho bafatwa bagafungwa mu buryo budakurikije amategeko.

Igihugu cya Uganda gishinjwa kuba abo Banyarwanda kitabarekura cyangwa se ngo kibajyane mu nkiko kibaburanishe ku byaha kibashinja, ahubwo kikabambura ibyabo nyuma yo kubahohotera.

Usibye intumwa z’u Rwanda na Uganda, biteganyijwe ko iyi nama yitabirwa n’intumwa zo mu bihugu bya Angola na Repubulika ya Demokarasi ya Congo, ibyo bihugu bikaba byaragize uruhare mu guhuza u Rwanda na Uganda mu gihe cyo gusinya ayo masezerano.

Amafoto: Richard Kwizera

Abari bahagarariye ibihugu byombi bahaye ikiganiro abanyamakuru nyuma y’inama bagiranye i Kigali muri Nzeri 2019

Umunyamabanga wa Leta muri Minisiteri y’Ububanyi n’amahanga ushinzwe umuryango wa Afurika y’Iburasirazuba, Olivier Nduhungirehe, yabwiye KT Press ko ibyo biganiro bibera ahitwa Speke Resort Munyonyo.

Nduhungirehe yavuze ko u Rwanda rwiteguye kohereza intumwa ziruhagarariye muri Uganda muri ibyo biganiro bizarebera hamwe aho imyanzuro y’amasezerano ya Luanda ndetse n’imyanzuro y’inama ya mbere yabereye i Kigali igeze yubahirizwa.

Iyi nama ni iya kabiri igiye kuba nyuma y’amasezerano yashyiriweho umukono i Luanda muri Angola muri Kanama uyu mwaka. Ni amasezerano yari agamije kugarura umubano mwiza hagati y’u Rwanda na Uganda no mu karere ibyo bihugu biherereyemo.

Iyi nama ya kabiri ibaye nyuma y’igihe kinini yari imaze itegerejwe kuko yagombaga kuba mu Kwakira 2019, nyuma y’iminsi 30 ikurikira inama ya mbere yabereye i Kigali muri Nzeri 2019.

Kugeza ubu umubano w’ibihugu byombi uracyarimo agatotsi n’ubwo ibihugu byombi mu nama yabereye i Kigali byari byemeranyijwe kurangiza ibibazo biri hagati yabyo no kubahiriza ibikubiye mu myanzuro y’i Luanda.

U Rwanda rushinja Uganda gukomeza gukorana n’abashaka guhungabanya umutekano w’u Rwanda, by’umwihariko umutwe wa RNC. Hari kandi Abanyarwanda benshi bakomeje gukorerwa iyicarubozo muri Uganda, aho bafatwa bagafungwa mu buryo budakurikije amategeko.

Igihugu cya Uganda gishinjwa kuba abo Banyarwanda kitabarekura cyangwa se ngo kibajyane mu nkiko kibaburanishe ku byaha kibashinja.

Umuvugizi wa Guverinoma ya Uganda, Ofwono Opondo, abinyujije kuri Twitter na we yemeje gahunda y’iyi nama ibera muri Uganda kuri uyu wa gatanu ikurikira iyabereye i Kigali, avuga ko ari inama igamije kwiga ishyirwa mu bikorwa ry’amasezerano y’i Luanda muri Angola.

Usibye intumwa z’u Rwanda na Uganda, biteganyijwe ko iyi nama yitabirwa n’intumwa zo mu bihugu bya Angola na Repubulika ya Demokarasi ya Congo, ibyo bihugu bikaba byaragize uruhare mu guhuza u Rwanda na Uganda mu gihe cyo gusinya ayo masezerano.

Uyu musaza ni umuganda uri kuvurirwa mu Rwanda nyuma yo gukubitwa n’ingabo za Uganda zikeka ko ari umunyarwanda

Uwo musaza w’imyaka 60 ukomoka mu gihugu cya Uganda mu gace ka Kisoro hafi y’umupaka wa Cyanika, Polisi y’u Rwanda ni yo yamugejeje mu Kigo Nderabuzima cya Cyanika mu ijoro ryo ku itariki 11 Ukuboza 2019 atabasha kuvuga, ubu akaba ari kwitabwaho n’abaganga.

Aganira na Kigali Today ubwo yamusangaga aho arwariye, ntiyabashaga kweguka ku gitanda, yari afite ibipfuko mu isura yose, avuga ko yatewe n’ingabo zo mu gihugu cye zamufatiye mu nzira ziramukubita zimwita Umunyarwanda.

Ngo yari mu nzira ataha mu masaha y’ijoro, nyuma y’uko yari yagiye gusura inshuti ze imvura ikagwa ari nyinshi ikamuhezayo ategereza ko ihita agataha.

Ngo imvura ikimara guhita yafashe urugendo mu masaha y’ijoro, atashye agwa mu itsinda ry’abasirikare batanu niko kumufata baramukubita bavuga ko ari Umunyarwanda.

Yagize ati “Ubwo nari nagiye gusura umugabo witwa Garasiyani w’inshuti yanjye, imvura yaguye ituma nkerererwayo. Navuyeyo nkererewe, manutse njya iwanjye nibwo nahuye n’abasirikare batanu b’iwacu batangira kunkubita, bari batekereje ko ndi Umunyarwanda kuko bankubitaga bambwira ko ndi Umunyarwanda”.

Avuga ko yabacitse nyuma y’uko haje umusore w’Umunyarwanda mu gihe bariho babakubita bombi abaca mu rihumye yirukira mu ishyamba abacika atyo.

Agira ati “Bakomeje kunkubitana n’uwo musore kubera ubwoba bwinshi nari mfite, nirukira mu ishyamba nza inzira yose ntazi aho ngana mbona mpingutse ku mupaka wa Cyanika, mpahurira na wa musore nabasiganye.

Uwo musaza ufite umugore n’abana batandatu, avuga ko muri uko kwiruka akiza amagara ye byamubereye amahirwe kuko bakigera ku mupaka wa cyanika, Polisi y’u Rwanda yabatabaye ibageza kwa muganga aho batangiye kugarura ubuzima.

Ati “Iyo ntagira abapolisi b’u Rwanda mba napfuye kuko mu maso hose navaga amaraso. Ariko aho bangereje kwa muganga ndumva ndi gukira. Ndumva narenganyijwe n’ingabo z’iwacu kuko bankubise ntacyo nzira, bagize ngo ndi Umunyarwanda”.

Maniragaba we yakubiswe agerageza gutaha mu Rwanda

Maniragaba Emmanuel uvuka mu Karere ka Musanze mu Murenge wa Muhoza urwariye hamwe n’uwo musaza mu kigo nderabuzima cya Cyanika, avuga ko yakubiswe ubwo yageragezaga gutaha mu Rwanda.

Uwo mugabo w’imyaka 31, avuga ko na we yakijijwe n’amaguru nyuma y’uko yasanze bakubita uwo musaza na we bakamwahuka bamujombagura ibyuma. Ngo yabonye ko ashobora kuhasiga ubuzima, yiruka asa nk’uwiyahura ku bw’amahirwe abona arabacitse.

Maniragaba na we yagejejwe mu kigo nderabuzima cya Cyanika nyuma yo gukubitwa n’ingabo za Uganda

Maniragaba Emmanuel wagiye mu gihugu cya Uganda gupagasa muri Mutarama 2018, avuga ko akigerayo yabanje gufungwa mu gihe kingana n’amezi icyenda, aho yakoreshwaga imirimo y’agahato ari na ko akubitwa nyuma aza gufungurwa.

Agira ati “Tariki 4 /01/2018, nagiye gupagasa muri Uganda nyura ku mupaka nta n’ibyangombwa bambajije. Nkigerayo mu gihe cy’iminsi ibiri bahise bamfata baramfunga mu gihe cy’amezi icyenda. Nafunzwe nkubitwa nkoreshwa imirimo y’agahato na bagenzi banjye kugeza mfunguwe, banzana ahitwa Kisoro”.

Avuga ko akimara gufungurwa atigeze ataha, ngo yigiriye inama yo kubanza gukorera amafaranga kugira ngo abone icyo azanira umugore we n’umwana yari amaze igihe atabonana na bo, atangira akazi muri Resitora mu gace ka Kisoro.

Yavuze ko yakubiswe n’abasirikare ba Uganda ubwo bahuriraga mu nzira mu ijoro ryo ku wa 11 Ukuboza 2019 atashye mu Rwanda. Ngo yasanze bakubita uwo musaza, na we ngo nibwo bamufashe bamukubitisha ibyuma bamukomeretsa ku jisho, ku munwa, akomereka cyane no ku ntoki.

Ngo muri uko kumukubita yagize ububabare bwinshi, akizwa no kwiruka aho yishoye mu ishyamba abona arabacitse we n’uwo musaza, aho bageze ku mupaka bafite ibikomere byinshi ku mubiri, Polisi ihita ibatabara ibageza ku ivuriro.

Ati “Nasanze bakubita uwo musaza nanjye bahita banyahuka, icyandengeye ni amaguru. Nabashije kwirukanka ndabasiga njye na wa musaza tukigera ku mupaka wa Cyanika, nibwo Polisi yatugejeje ku ivuriro”.

Maniragaba avuga ko amashilingi ya Uganda ibihumbi bitanu n’ibyangombwa bye yari yitwaje yabyambuwe n’abo basirikare. Ngo ibindi birimo amafaranga yakoreye n’imyambaro ye yari yabanje kubyohereza.

Yasabye Abanyarwanda bagitekereza kujya muri Uganda kubicikaho, kuko ngo umutekano w’Umunyarwanda muri icyo gihugu ugerwa ku mashyi.

Ati “N’uwampa iki, sinasubira muri Uganda, kuko kuva mbayeyo nta mahoro nigeze mbonayo. Umuntu wese ugitekereza kujya mu gihugu cya Uganda, namugira inama yo kubyibagirwa akarengera ubuzima bwe”.

Nkurunziza Emmanuel avuga ko yafatiwe muri Uganda arafungwa ubwo yari mu nzira aza mu Rwanda gushyingura nyirakuru

Nkurunziza avuga ko yaciye ku mupaka wa Kagitumba, yereka abashinzwe abinjira n’abasohoka ibyangombwa, bamuha akajeto (Jeton) akaba ngo yari agiye gukorera i Kampala kuko hari umuntu wari wamurangiyeyo akazi ko kubumba amatafari.

Ku itariki 20 Kanama 2019, iwabo mu rugo ngo baramuhamagaye, bamubwira ko Nyirakuru wari utuye mu Ruhengeri yitabye Imana.

Nkurunziza yabwiye uwo yakoreraga ngo amufashe abone uko ajya gushyingura uwo mukecuru. Umukoresha we yamuhaye ibihumbi 800 by’Amashilingi ya Uganda (ni ukuvuga angana n’ibihumbi 202 by’Amafaranga y’u Rwanda).

Nkurunziza yahashye ibyo azanira umugore we, afata imodoka itwara abagenzi yerekezaga mu Rwanda. Ageze i Kisoro muri Uganda, ngo yasanze habaye umukwabu wo gufata Abanyarwanda n’Abanyekongo.

Babakuye muri iyo modoka, babasaba ko Abanyarwanda bajya ku ruhande rwabo, Abanyekongo na bo bakajya ku ruhande rwabo. Avuga ko Abanyarwanda bari batatu, n’Abakongomani babiri. Ngo babasabye kubereka ibyangombwa, berekana indangamuntu, bababaza Pasiporo, bavuga ko ntazo bafite.

Bati “Niba nta Pasiporo mufite, mugomba gufungwa.”

Ngo abapolisi bo muri Uganda bahise babajyana kuri Polisi y’ahitwa i Bunagana ku mupaka wa Uganda na Congo, babategeka gukuramo inkweto n’ibindi byose bari bafite mu mifuka y’imyenda. Nkurunziza avuga ko yakuyemo telefoni n’amafaranga make yari inyuma mu mifuka y’imyenda, andi mafaranga akaba yari yayabitse mu ikabutura yari yambaye imbere.

Abo bapolisi ngo babashyikirije abasirikari ba Uganda, abasirikari bafata abo Banyarwanda babashyira mu kizu kimeze nabi batangira kubakubita. Ngo babakubitaga bababwira ngo bazane amafaranga bakuye i Kampala, bakababwira ko iyo Abanyarwanda bavuye gupagasa i Kampala baba bafite amafaranga.

Ngo bamukubise inkoni ku mirundi arataka cyane kubera ububabare, bamukuramo imyenda yose bamusangana amafaranga yose yari afite yo muri bya bihumbi 800 barayamwambura, bamwambura n’igikapu cy’imyenda, na telefoni n’inkweto yari yambaye, bamuha kamambili ngo abe ari zo yambara.

Abo Banyarwanda ngo babakubitiraga ukwabo, bakumva hirya aho batwaye ba Banyekongo na bo barimo gutaka.

Babakuye aho ku gisirikari bakubitirwaga, babajyana kuri sitasiyo ya Polisi ya Kisoro, bahageze babakorera inyandiko, ariko ngo ikintu bababajije ni igihe bavukiye n’imyaka yabo gusa.

Uwo munsi babafatiyeho ngo bahise babajyana mu rukiko, Nkurunziza Emmanuel bamushinja ko yaje muri Uganda mu buryo butemewe n’amategeko.

Nkurunziza yisobanuye ko yaje mu buryo bwemewe ndetse ko afite n’ibyangombwa usibye ko umusirikare yabimwambuye, ariko ibisobanuro bye ntibyahabwa agaciro. Umucamanza ngo yababwiye ko badakwiye kuza gukinira ku butaka bwa Uganda kuko atari ubwabo. Yanababwiye ko bahereye kera babirukana ariko bakaba baranze kureka kuza kuri ubwo butaka.

Umucamanza yahise ategeka ko Nkurunziza afungwa amezi atatu, nyuma bakazamusubiza iwabo. Undi munyarwanda bari kumwe we ngo bamukatiye gufungwa amezi umunani kuko bamusatse bagasanga nta mafaranga yari afite, naho ba Banyekongo bo babafunga amezi 18.

Nkurunziza avuga ko bahise bajya kubafungira muri gereza ya Kisoro asangamo abandi Banyarwanda 21 bose hamwe baba 23.

Aho muri gereza ngo bahabaga bakubitwa, bagakora n’imirimo y’ingufu, by’umwihariko Abanyarwanda bakabajyana cyane cyane mu mirima guhinga bakavuga ko Abanyarwanda ari bo bafite ingufu kandi badashobora no gutoroka ngo bagere mu Rwanda.

Ku itariki 27 Ugushyingo 2019 ubwo Nkurunziza yari arangije igifungo yakatiwe cy’amezi atatu, uwari ukuriye gereza yaje kubabaza niba bemera akajya kubandikisha mu mpunzi zo muri Congo cyangwa akabajyana mu gisirikari muri Congo, ariko barabyanga kuko bo bashakaga kujya iwabo mu Rwanda.

Ngo bakomeje kubahatira kujya mu gisirikari muri Congo cyangwa bakabajyana mu mpunzi zo muri Congo, kuko ngo mu Rwanda nta mahoro ahari ndetse ko ugezeyo aturutse muri Uganda bahita bamwica, ariko baranangira bakomeza gusaba ko babarekura bakajya mu Rwanda, niba ari ukubica bakazicirwa mu gihugu cyabo.

Abo banyarwanda ngo bamaze kwanga ibyo babasabaga, babahimisha kubagaburira kawunga yaboze ndetse idahiye irimo n’inyo ariko bakihangana bakayirya.

Ku itariki 02 Ukuboza 2019 nibwo Nkurunziza bamurekuye kuko yari yararangije igifungo cy’amezi atatu. Icyakora yabajije uwari ukuriye gereza niba bamusubiza ibintu bye bamwambuye, ariko barabimwima, ahubwo uwo wari ukuriye gereza ategeka ko bamuha igihumbi cy’Amashilingi ya Uganda.

Ngo bamunyujije no kuri sitasiyo ya polisi ya Kisoro ari na ho yamburiwe ibyo yari afite, nabwo abajije niba bamusubiza ibintu bye bamwambuye, umupolisi amukubita inkoni aramubwira ngo aceceke.

Ngo bahise bamwuriza imodoka ya Polisi ya Uganda, imugeza ku mupaka wa Cyanika bamuhereza Abapolisi b’u Rwanda.

Abo bapolisi bo muri Uganda babwiye abo mu Rwanda ko umuntu wabo bamubahaye, babahereza n’igipapuro kigaragaza ko yari afungiwe muri Uganda akaba arekuwe.

Nkurunziza agira inama Abanyarwanda bashaka kujya muri Uganda kwigengesera byaba na ngombwa bakabireka kuko hariyo n’abandi benshi bari i Kampala bamaze igihe barabuze uko bagaruka mu Rwanda.

Reba Video y’uburyo Nkurunziza asobanura ibyamubayeho

Abo banyeshuri bane bigaga muri kaminuza ya Kampala (Kampala International University) bakaba barimo uwitwa Joram Rwamojo uhagarariye ishyirahamwe ry’abanyeshuri b’Abanyarwanda biga muri iyo kaminuza.

Abandi banyeshuri batawe muri yombi ni abitwa Mugisha, Emmanuel na Kagara, akaba ari yo mazina yabo yabashije kumenyekana nk’uko ikinyamakuru The New Times dukesha iyi nkuru cyabyanditse.

Abo banyeshuri bafungiwe mu kigo cya gisirikari, bafunganwa n’abandi Banyarwanda batatu bari basanzwe bafite ibikorwa by’ubucuruzi muri Uganda.

Hari amakuru avuga ko abo banyeshuri bafashwe mu ijoro ryo ku wa gatatu tariki 27 Ugushyingo 2019 bakuwe mu macumbi yabo, bajyanwa gufungirwa mu kigo cya gisirikari cya Makindye giherereye i Kampala.

Itabwa muri yombi ry’abo banyeshuri rikurikiye ibindi bikorwa bigayitse bimaze iminsi bikorerwa Abanyarwanda birimo iyicarubozo, n’irindi hohoterwa ry’uburyo butandukanye ndetse no gufungwa mu buryo budakurikije amategeko.

Leta ya Uganda ivuga ko abo Banyarwanda batabwa muri yombi bazira kuba intasi z’u Rwanda, nyamara ntawe urashyikirizwa inkiko kugira ngo aburanishwe kuri ibyo byaha bashinjwa.

Ni mu gihe nyuma yo kumara igihe kirekire bafunzwe ndetse bakorerwa n’iyicarubozo, bamwe bashyirwa mu modoka bakabazana bakabajugunya ku mupaka w’u Rwanda na Uganda.

Urwego rw’igisirikari cya Uganda rushinzwe iperereza (CMI) ruvugwaho gukorana n’abarwanya Leta y’u Rwanda barimo by’umwihariko abo mu mutwe wa RNC uyobowe na Kayumba Nyamwasa.

Bamwe mu barekurwa batanga ubuhamya bw’uko nyuma yo gutabwa muri yombi bashishikarizwa kujya muri iyo mitwe irwanya Leta y’u Rwanda, ababyanze bagakorerwa iyicarubozo.

Kuva mu kwezi kwa gatatu muri uyu mwaka, u Rwanda rwaburiye abashaka kujya muri Uganda rubagira inama yo guhagarika ingendo zerekezayo zitari ngombwa kugira ngo badashyira ubuzima bwabo mu kaga.

U Rwanda ruravuga ko ibyo bikorwa bibangamiye amasezerano yashyiriweho umukono i Luanda muri Angola hagati y’u Rwanda na Uganda muri Kanama uyu mwaka.

Abanyarwanda 33 barimo abagore 17 bagejejwe ku mupaka wa Cyanika ku mugoroba wo ku wa 27 Ugushyingo 2019, nyuma y’ubuzima bubi bwo gutotezwa, gukubitwa no gufungwa babagamo mu gihugu cya Uganda.

Mu ntangiriro z’iki cyumweru kandi, ku wa mbere tariki 25 Ugushyingo 2019, inzego z’umutekano muri Uganda zataye muri yombi Abanyarwanda babarirwa hagati ya 150 na 200, bakaba barafatiwe i Kisoro mu Majyepfo y’Uburengerazuba bwa Uganda.

Umunyamabanga wa Leta muri Minisiteri y’Ububanyi n’amahanga ushinzwe umuryango wa Afurika y’Iburasirazuba, Ambasaderi Olivier Nduhungirehe, ahereye ku Banyarwanda 33 birukanywe muri Uganda mu ijoro ryo ku wa 27 Ugushyingo 2019, yavuze ko ibyo Uganda irimo gukora bihabanye n’ibikubiye mu masezerano ya Luanda ibihugu byombi byashyizeho umukono.

Yanavuze ko ibyo bikorwa bitubahirije imyanzuro y’inama iheruka kubera i Kigali, inama yari igamije gushaka umuti w’ibibazo bimaze iminsi hagati y’u Rwanda na Uganda.

Ambasaderi Olivier Nduhungirehe

Ambasaderi Nduhungirehe yabwiye KT Press ko ibyo Uganda ikora byo gufunga no kwirukana Abanyarwanda muri Uganda birushaho kuremereza ibibazo, bikaba ari no kurenga ku masezerano ya Luanda.

Ambasaderi Nduhungirehe yavuze ibi nyuma y’uko Uganda yari imaze kwirukana Abanyarwanda 33 biganjemo abagore.

Mu masezerano y’i Luanda yo ku itariki 21 Kanama 2019 harimo ingingo ivuga ko ibihugu by’u Rwanda na Uganda byemeranyijwe koroshya ubucuruzi, koroshya urujya n’uruza, n’ibindi bikorwa bitandukanye byambukiranya imipaka mu rwego rwo gushakira imibereho myiza abaturage b’ibihugu byombi.

U Rwanda kandi rwamaganye amakuru yatangajwe na bimwe mu bitangazamakuru bishamikiye kuri Leta ya Uganda, amakuru avuga ko abirukanywe cyangwa abafunzwe ari abahunze u Rwanda bashakaga ubuhungiro muri Uganda.

Nduhungirehe yavuze ko ayo makuru ari ibinyoma bigamije gushyigikira ibikorwa bibi bya Leta ya Uganda, kuko abirukanywe muri Uganda ari abaturage bari bamaze igihe kirekire batuye muri Uganda, abandi bakaba bari bahafite akazi kazwi kandi bakoraga mu buryo bwemewe n’amategeko.

Abirukanywe muri Uganda barifuza gusubizwa ibyabo basizeyo bagasubizwa n’amafaranga bambuwe n’abapolisi ndetse n’abasirikari ba Uganda.

Inkuru bijyanye:

Uganda: Abanyarwanda bagera kuri 200 batawe muri yombi

Abanyarwanda 33 birukanywe muri Uganda

Birukanywe muri Uganda basiga imitungo bari bafiteyo

Abo bakoreragayo imirimo inyuranye y’iterambere, barimo abacuruzaga resitora, utubari, abakoraga ubuhinzi n’ibindi.

Bavuga ko imitungo myinshi bari bamaze kugira bayambuwe baza imbokoboko aho barekuwe bavuye muri gereza, bakemeza ko icyo bazizwa ari uko ari Abanyarwanda.

Abo banyarwanda bageze ku mupaka wa Cyanika ku mugoroba wo ku wa gatatu tariki 27 Ugushyingo 2019. Abenshi ni abafashwe mu mukwabu wo ku wa mbere ngo wakozwe na Polisi n’igisirikare cya Uganda aho bagiye gufungwa ariko bakabwirwa ko utanga amashilingi miliyoni eshatu z’Amagande arekurwa, uyabuze agafungwa imyaka itatu akoreshwa imirimo y’uburetwa.

Muri abo bafunguwe harimo abagiye batanga ayo mashilingi asabwa ndetse bagerekaho no gutakamba basaba imbabazi kandi bemera n’icyaha batakoze, aho Polisi ya Uganda ngo yabapakiye imodoka ibageza ku mupaka.

Serushago Samuel wo mu Karere ka Rutsiro mu Ntara y’Iburasirazuba, yari amaze imyaka umunani aba muri Uganda mu gace ka Bufumbira, aho yakoreraga umwuga w’ubudozi, umwuga yemeza ko wari waramuteje imbere none akaba atashye imbokoboko nyuma y’uko afunzwe umutungo we wose ugasahurwa.

Yagize ati “Nageze muri Uganda muri 2011 nkorayo imirimo y’ubudozi. Kuva icyo gihe narakoraga nta kibazo nigeze ngirana n’abaturage, ariko byageze ejobundi ku wa mbere nibwo nabonye baza kumfata. Igihombo ni kinini, uko nambaye gutya ni yo myenda mfite, nta gikapu nta kindi kintu.

Akomeza agira ati “Uko bamfashe ngiye ku isoko ni na ko bamfunze, mperuka gukaraba mbere yo ku wa mbere. Bajya kumpakira banzana mu Rwanda narababwiye nti mumbabarire ni hafi wenda mpindure n’agapantaro, nambare byibura n’udukweto. Bati ntibishoboka, ubu ntashye imbokoboko”.

Uwo mugabo umaze iminsi itatu muri gereza, avuga ko ataye imitungo myinshi ijyanye n’ibikoresho yajyaga yifashisha mu mwuga we w’ubudozi.

Ati “Nari mfiteyo imashini eshatu zikoreshwa n’amashanyarazi, imwe nagiye nyigura amashilingi miliyoni imwe n’imitwaro 50 ya Uganda, bikabakaba ibihumbi 400 by’Amanyarwanda. Ni inda idukoresha naho ubundi muri Uganda nta byiza bihari. Akabazo kose kabaye mu gace utuyemo, Umunyarwanda ni we ufatwa, niba hari abarwanye, niba hari umuntu wishe undi baravuga ngo ni ba Banyarwanda, ugasanga baragufashe baragufunze”.

Serushago wageze mu Rwanda, afite impungenge z’abana be babiri basigaye muri Uganda aho biga bacumbika ku ishuri.

Musanabera Clementine wo mu Murenge wa Muko mu Karere ka Musanze umaze imyaka 19 abana n’umugabo bashakanye uvuka mu gihugu cya Uganda, avuga ko Polisi ya Uganda yazindutse iza kubakomangira bamutandukanya n’umugabo we bajya kumufunga bamuziza ko ari Umunyarwanda.

Avuga ko ubwo bamufungaga yasanze umubare munini w’Abanyarwanda muri gereza baba mu nzu yuzuye amazi hasi ku isima ari nako batotezwa bagaburirwa ubugari budahiye bukoze mu ifu y’ibigori yaboze.

Uwo mugore avuga ko yafunguwe nyuma y’uko yari amaze gutanga amashilingi yasabwaga, ngo bakimara ku murekura ntiyongeye kubona ububasha bwo kugera mu rugo, ataha uko yagafunzwe mu gihe yari afite akabari ngo gakomeye muri Uganda.

Ati “Bakimara kutubwira ko tuzakatirwa imyaka itatu mu gihe tudatanze miliyoni eshatu, umugabo wanjye yazanye amafaranga nakoreshaga mu bucuruzi barandekura bampakira banzana mu Rwanda. Nari mfiteyo bizinesi y’akabare, nta kintu natahanye n’abana banjye babiri barabantesheje basigarana n’umugabo wanjye, uko baje kuntwara bajya kumfunga ni ko ntashye, nta n’igiceri cy’icumi mfite ku mufuka”.

Musanabera avuga ko n’ubwo inzego zishinzwe umutekano za Uganda zamwirukanye zikamutandukanya n’umugabo we n’abana, ngo ntacyo ashinja umugabo we ufite inkomoko mu gihugu cya Uganda kuko mu kaga kose yanyuzemo umugabo atigeze amutererana, ngo yamurwaniye ishyaka uko bishoboka kose.

Niyonzima Delphine wo mu Karere ka Rubavu, umaze imyaka itatu muri Uganda n’umuryango we, avuga ko yakoraga akazi k’ubuhinzi aho yari umuturage utuye wamaze kwiteza imbere, agura amasambu aranubaka, ariko ngo kwitwa Umunyarwanda bimuviramo kwangirizwa imyaka yari agiye kweza hifashishijwe imodoka zihinga.

Uwo mugore avuga ko nyuma y’uko umugabo we aburiwe irengero nyuma y’ibyago bari bagize byo kwangirizwa imyaka no gusenyerwa, ngo ubuzima bwaramugoye yigira inama yo gutaha aho yageze Gisoro abashoferi b’Abagande ngo bamwuriza Bisi bamujyana ahantu atazi, nyuma y’uko yari yababwiye ko ashaka kugera ku mupaka wa Cyanika.

Ngo aho abashoferi bamujugunye nyuma yo kumuyobya, ngo ntibyamworoheye kugera ku mupaka aho yakoze urugendo rw’amasaha asaga abiri ari kumwe n’abana be bato.

Uwo mubyeyi yagaragaje agahinda Abanyarwanda babayemo muri Uganda aho ngo Umunyarwanda apfusha umuntu akabura umushyingura.

Ati “Iyo upfushije umuntu baguca amafaranga akayabo kugira ngo ubone ubutaka umushyinguramo, iyo utishoboye ngo ugure ubwo butaka bagukorera umurambo bakakubwira ngo wujyane ujye kuwushyingura iwanyu mu Rwanda”.

Mutemberezi Fulgence wo mu Karere ka Rubavu wakoraga ubucuruzi bwa Resitora muri Uganda mu gihe cy’amezi 10 yari amazeyo, avuga ko ku cyumweru bwije abona ko hari umutekano. Abyutse mu gitondo ku itariki 25 Ugushyingo, yasanze abasirikari n’abapolisi bagose inzu bamwaka ibyangombwa, mu kubibereka ntibabyemera babapakira imodoka.

Avuga ko babajyanye ahantu mu kibuga cy’umupira bahamara amasaha atatu, barongera barabapakira babajyana kuri Polisi, aho ngo bongeye gutinda babazwa ibyangombwa, nyuma na none ngo bongeye kubapakira bajya kubafunga, aho ngo bafungwaga bagerekeranye nk’amatafari.

Ati “Kuri Polisi baradufotoye baratuzungurukana bageze aho batujyana mu rukiko aho byageze ku mugoroba batujyana muri gereza. Twasanze ibyo kurya byabo ari bibi cyane, birimo ubugari bukozwe mu ifu yaboze bakabuduha budahiye. Twafungwaga tugerekeranye nk’amatafari, twabasobanurira ko twinjiye byemewe n’amategeko bakanga kubyumva”.

Mutemberezi avuga ko Resitora ye yari imwe mu zikomeye muri Uganda, aho yapakiwe imodoka azanwa ku mupaka uko bakamufashe. Avuga ko muri Uganda atayeyo umutungo mwinshi.

Avuga kandi ko Umunyarwanda wese uri muri Uganda ari guhigwa, akaba asaba Leta gufasha Abanyarwanda bari muri Uganda kuvayo, kuko ngo bari mu kaga gakomeye aho yemeza ko muri gereza avuyemo yasizemo umubare minini w’Abanyarwanda.

Abo baturage bavuye mu gihugu cya Uganda bose barishimira kuba bageze mu gihugu cyabo nyuma y’ubuzima bubi banyuzemo mu gihugu cya Uganda, ariko bagasaba Leta y’u Rwanda kubakurikiranira imitungo yabo basize muri icyo gihugu nyuma yo kumeneshwa bakamburwa ibyabo abandi bagafungwa.

Mu mpanuro batanga, barasaba Umunyarwanda wese ufite igitekerezo cyo kujya mu gihugu cya Uganda kubireka mu rwego rwo kurengera ubuzima, aho bemeza ko Umunyarwanda uri muri Uganda ari mu kaga gakomeye.

Ni nyuma y’uko agize amahirwe yo kugaruka mu Rwanda kuri uyu wa gatatu tariki 27 Ugushyingo 2019, avuye muri Uganda aho yari afungiye igihe kirenga umwaka.

Ruzigamanzi yatangarije Kigali Today ko nubwo atabashije kumenyana na bagenzi be b’Abanyarwanda ariko ngo na bo yababonye aho yari afungiye, bityo akaba agira inama Abanyarwanda yo kutajya muri icyo gihugu.

Yagize ati “Ubutumwa bwo naha abanyarwanda ni uko bareka ubugande, bakaguma mu gihugu cyabo, kubera ko gifite amahoro.”

Ruzigamanzi yakomeje avuga ko yagiye muri Uganda muri Nyakanga 2018 gushaka akazi nyuma yo kwibwa igare yakoreshaga mu kazi k’ubunyonzi.

Yagize ati “Icyatumye njya gukora mu Bugande ni uko nari ngiye gushaka amafaranga, njyewe banyibye igare ntinya gusubira mu rugo ndavuga nti reka nkorere igare ry’abandi, ninyabona ngaruke, nibwo buryo nagiyemo.”

Uyu musore w’imyaka 23 kandi yasobanuye ubuzima yari abayeho muri gereza.

Yagize ati “Ubuzima bwari bumeze nabi, kuko barankubise, barampingisha bankoresha ibindushije imbaraga, sinarya. Twaryaga rimwe gusa, ibiryo ushyira mu kanwa rimwe ukaba urangije kurya.”

Ruzigamanzi afite inkovu mu mugongo no ku maguru zigaragaza iyicarubozo yakorewe

Hashize iminsi Abanyarwanda batuye muri Uganda n’abasanzwe bagendayo bahohoterwa, bagakorerwa iyicarubozo, abandi bagatabwa muri yombi bashinjwa kuba intasi z’u Rwanda.

Bamwe muri abo bafatwa bamaze iminsi bazanwa n’inzego zo muri Uganda zikabajugunya ku mupaka w’u Rwanda na Uganda barembye kubera iyicarubozo baba barakorewe.

Icyakora u Rwanda rwo rwakomeje kugaragaza ko ibivugwa na Uganda nta shingiro bifite, ko ibikorerwa Abanyarwanda muri Uganda ari ihohoterwa n’akarengane, dore ko abo bantu bafatwa badashyikirizwa inkiko ngo baburanishwe ku byo baregwa.

Frank Mugambage uhagarariye u Rwanda muri Uganda yavuze ko u Rwanda rutamenyeshejwe iby’itabwa muri yombi ry’abo Banyarwanda. Ambasade y’u Rwanda na yo ngo yarimenyeye mu itangazamakuru, ariko ngo barimo kugerageza kubikurikirana.

Ubusanzwe amasezerano mpuzamahanga avuga mu gihe habayeho igikorwa nk’iki, abahagarariye igihugu bagomba kubimenyeshwa.

Ikinyamakuru The New Times cyanditse ko impamvu y’itabwa muri yombi ry’abo bantu itazwi, gusa mu myaka mike ishize hari amagana y’Abanyarwanda bafungiwe muri Uganda bashinjwa kuba intasi z’u Rwanda.

Icyakora u Rwanda rwo rwakomeje kugaragaza ko ibivugwa na Uganda nta shingiro bifite, ko ibikorerwa Abanyarwanda muri Uganda ari ihohoterwa n’akarengane, dore ko abo bantu bafatwa badashyikirizwa inkiko ngo baburanishwe ku byo baregwa.

Bamwe muri abo bafatwa bamaze iminsi bazanwa n’inzego zo muri Uganda zikabajugunya ku mupaka w’u Rwanda na Uganda barembye kubera iyicarubozo baba barakorewe.

Iyi nkuru ikomeza ivuga ko aba bantu bafashwe ku wa mbere bahurijwe hamwe bakajyanwa ku biro bya polisi bya Kisoro. Nyuma bamwe muri bo ngo baje kurekurwa, basanze ari Abanyekongo n’Abanyatanzaniya.

Karemera Damascene yakorewe urugomo ubwo yari muri Uganda

Karemera Damascene yagiye muri Uganda mu ntangiriro z’uyu mwaka ajya gukora mu murima w’urutoki rw’umunya-Uganda witwa Friday, utuye mu Mudugudu wa Mirama, Akagari ka Gafunzo, Umurenge wa Gafunzo, Akarere ka Ntungamo.

Ku wa 23 Ugushyingo 2019 nibwo Karemera yishyuje Sebuja ibihumbi 32,000 by’amashilingi ya Uganda, ni ukuvuga asaga gato ibihumbi umunani by’Amafaranga y’u Rwanda.

Umuvugizi wa Polisi mu Ntara y’Iburasirazuba, CIP Hamdoun Twizeyimana, avuga ko mu gihe yamwishyuzaga, haje abandi bagabo babiri bo muri Uganda bakamubuza kumwishyura.

Ati “Abo bagabo baraje baramubwira ngo amafaranga uramuha ay’iki ko aba bantu ari abanzi bacu, Friday yabwiye Karemera ngo bagende amuhe amafaranga ye, amaze kuyavunjisha kuko ngo abizi ko Abanyarwanda batemera amashilingi.”

CIP Hamdoun avuga ko ngo bagenda abo bagande bagiye babwira Keremera ko ari maneko w’u Rwanda ndetse ko Abanyarwanda ari abanzi ba Uganda.

Agira ati “Bageze mu rutoki Friday yahise amutema undi akinga akaboko, arongera aratema umuhoro umufata mu mutwe, ubwo Karemera yabonye ko bikomeye ariruka bamwirukaho arabasiga anyura mu mugezi w’umuvumba yambuka mu Rwanda.”
Akigera mu Rwanda ngo yahise ajya ku buyobozi bwa Polisi ku mupaka ababwira ibimubayeho bamujyana ku kigo nderabuzima cya Kagitumba.

Karemera yaraye mu bitaro bucya asezererwa ataha mu Mudugudu wa Kagitumba akazakomeza kwipfukisha ibikomere.

Karemera Damascene ubundi avuka mu Karere ka Nyanza, mu Murenge wa Busoro akaba yaraje ashakisha akazi mu Karere ka Nyagatare.

Kayirere Julienne yamburiwe umwana we muri Uganda, akeka ko yagurishijwe

Kayirere avuga ko yahagurutse i Kigali ku itariki 05 Kanama 2017 agiye gucuruza imyenda, ahetse umwana witwa Imaniranzi Joanna, agezeyo baramufata bamujishura uwo mwana bamufunga wenyine, kuva icyo gihe ngo ntarongera kumuca iryera.

Kayirere wafungiwe muri gereza y’ahitwa Kawele, avuga ko yaziraga kuba yarinjiye muri Uganda nta byangombwa afite, nyamara ngo yari yitwaje indangamuntu n’agapapuro bita ’jeto’.

Uyu mubyeyi w’imyaka 30 avuga ko amaze gufungurwa muri iyo gereza, yasabye umwana we baramumwima, bamutegeka kuva muri icyo gihugu cya Uganda mu kwezi kwa kabiri k’uyu mwaka.

Avuga ko yagarutse bakamujyana iwabo mu karere ka Ruhango ariko yanga kureka umwana, kugeza ubwo yasabye ibyangombwa yongera gusubira muri Uganda ku itariki 25 z’uko kwezi kwa kabiri muri 2019.

Kayirere agira ati “Nagezeyo mbona umupolisi mukuru wungirije yongorera umugore ngo aze ambwire ko umwana yapfuye, ariko abandi bapolisi bateye hejuru bavuga bati ’ntabwo bishoboka umwana we aracyariho’.

“Baragenda bakora ibipapuro by’ibihangikano, umwana wanjye yitwaga Imaniranzi Joanna, bandikaho undi bamwita Birungi Rebecca bashyiraho n’amafoto yo kubeshya ko yapfuye, kandi mbwirwa ko umwana ariho.

“Babonye nkomeje kubatesha umutwe banyohereza aho i Kawele ku wari ushinzwe kurera umwana, mbabaza impamvu batabimenyesheje cyangwa ngo babimenyeshe Leta y’u Rwanda, bansubiza ko iyo Leta niza bazayiha amagufa.

Nagiye kuri ambasade y’u Rwanda iramfasha yandika impapuro, ikora ibishoboka byose, irangije inyohereza hano (mu Rwanda).

Icyo nabwira abantu ni uko muri Uganda ari habi, umuntu yica undi bakamufunga ariko hagira ubaha amafaranga bakamurekura, uwo mwana wanjye numva ko bamugurishije ahantu bita Iguru mu Badokoro, ngo ni umugore wamuguze”.

Undi Munyarwanda witwa Uwitonze Desiré, na we yagiye muri Uganda agamije kwishyuza amafaranga uwo yari yarashushanyirije ibihangano by’ubugeni.

Uwitonze wafatiwe muri Uganda ku itariki 16 z’ukwezi kwa kabiri 2019, avuga ko yafungiwe i Kisoro akahamara amezi atanu yitwa intasi y’u Rwanda.

Avuga ko mu kwezi kwa karindwi ari bwo yimuriwe muri gereza ya Ndorwa, akaba ngo yarahasanze bakubita abantu ku buryo bukabije.

Uwitonze Desiré na we yafungiwe muri Uganda

Ati “Banyitaga ’hard core’, ngo ndi imbega (intasi), nagize amahirwe banyambika umutuku wa ruharwa, ni yo mpamvu ntagiye gukoreshwa imirimo y’agahato yo guhinga”.

Uwitonze avuga ko yasabye guhamagara iwabo mu Rwanda arabyemererwa, umubyeyi we akaba yarahise amwoherereza amafaranga yo kwishyura igihano kugira ngo arekurwe.

Uyu Munyarwanda avuga ko abakozi b’umuryango w’abibumbye ushinzwe impunzi HCR, ngo baza muri gereza zo muri Uganda gusaba Abanyarwanda bafungiweyo kwemera kuba impunzi.

Uwitonze avuga ko aho mu nkambi z’impunzi ngo ari ho umutwe witwa RNC uza gushakira abo wakoresha mu guhungabanya umutekano w’u Rwanda.

Uwitonze Desiré wafungiwe muri Uganda ashinjwa kuba maneko w’u Rwanda

Uwo musore usanzwe akora akazi ko gucuranga imiziki mu bitaramo binyuranye (DJ), avuga ko ku itariki 3 Gashyantare 2019 yagiye mu gihugu cya Uganda muri ako kazi, ariko ntibyamuhira kuko yafashwe akorerwa ibya mpfura mbi ashinjwa kuba intasi y’u Rwanda.

Avuga ko yambuka umupaka wa Cyanika ajya muri Uganda, yari yahawe icyemezo cy’umunsi umwe na Leta ya Uganda, akigerayo bamwiba telefoni ye, nyuma aza kumva amakuru ko Polisi yamaze kubona uwamwibye, bituma muri uko gukurikirana telefoni ye arenza umunsi yahawe wo gutaha.

Ibyo gukurikirana uwamwibye byari amacenga ya Polisi kugira ngo ibone urwitwazo rwo kumufata ashinjwa ko aba muri Uganda mu buryo bunyuranyije n’amategeko aho Polisi yahise imufata ijya ku mufunga.

Agira ati “Nkimara kumva ko Polisi yafashe abanyibye, narengeje umunsi nagombaga gutahaho ndavuga ngo reka mbanze nkurikirane iby’iyo telefoni. Ubwo hahise haza abapolisi babiri bari kuri moto, baramfata barambwira ngo barakudutumye”.

Akomeza agira ati “Baranjyanye kuri sitasiyo ya Polisi ahantu bita Kanaba, aho naraye ku mapingu ijoro ryose andya cyane, ariko sinari nzi icyo bagambiriye”.

Uwo musore avuga ko yaraye muri Gereza kuri sitasiyo ya Polisi ya Gisoro, bukeye mu gitondo ajyanwa mu rukiko rwa Gisoro aho bamushinjaga kuba intasi y’u Rwanda.

Ati “Mu gitondo ni bwo bamvanye kuri Polisi ya Kanaba, banjyana kuri Polisi ya Gisoro, aho nasanze abantu bafashe ba M23 barimo n’Abanyarwanda. Banshinjaga kuba maneko w’u Rwanda. Banjyana mu rukiko rwa Gisoro bandega kandi ko ndi mu gihugu mu buryo butemewe ko natumwe n’igihugu cy’u Rwanda”.

Avuga ko kuba yaragiye ahakana ibyo bamushinja nyuma yo kwitaba urukiko inshuro zirindwi, byamugizeho ingaruka, aho bamukatiye igifungo cy’umwaka n’amande ya miliyoni imwe y’amashilingi.

Yafungiwe muri Gereza mbi, aho yakorewe iyicarubozo

Uwitonze uvuga ko yategetswe gufungirwa muri gereza mbi ya Ndorwa nk’igihano gihanitse cy’umuntu wanze kwemera ibyo ashinjwa mu gihe abemeraga ibyaha bajyanwaga mu zindi gereza.

Ati “Bahise bamfungira muri gereza mbi ya mbere muri Uganda yitwa Ndorwa. Ni mu birometero 90 uvuye hano ku mupaka. Ni za gereza zubatswe mu 1942, inzu imeze nk’iyo bafungiramo ingurube aho hasi ku isima hahora amazi”.

Akomeza agita ati “Nta kuryama, ni uguhagarara bugacya kandi tukagaburirwa bya biryo bita ‘cacu’ by’ibishishwa by’ibigori basya bakagaburira inkoko n’ingurube. Ni byo baduhaga tukabirisha bya bishyimbo biba byaraboreye muri depo byuzuye imungu, wajya mu musarani ukituma amaraso”.

Uwitonze avuga ko yagiraga agahenge mu gihe abonanye n’umwe mu basirikare ba Uganda bavugaga ikinyarwanda, akamufasha kuvugana n’umuryango we.

Ibi ni na byo byatumye arekurwa, nyuma y’uko bamwe mu muryango we bohereje miliyoni y’amashingi y’amande yaciwe.

Avuga ko akigera muri gereza yatunguwe no gusangamo Abanyarwanda bagera muri 200, badafite uburyo bwo kurekurwa kuko badafite imiryango ibakurikirana.

Ati “Muri gereza nasanzemo Abanyarwanda basaga 200 bahafungiye. Ni inzu zirimo Abanyarwanda gusa, kandi nta buryo bafite bwo gusohoka kuko badafite ubarengera.

Ni ukubamo gusa bategereje batazi igihe bazatahira. N’abajya mu mafamu guhinga abenshi bagwayo kubera imibereho mibi n’uburwayi kuko ntabwo bafite imiryango ibirukaho. Hari n’abatazi nomero z’iwabo wabareba ugasanga ni Imana gusa ibarinze.

Abo bagwa mu mirima, mu kubahamba ntabwo babagaragaza, bigirwa ibanga, ibintu bya Uganda birimo ubugome bukabije”.

Uwo musore umaze amezi umunani muri gereza yo mu gihugu cya Uganda, avuga ko yari asigaje amezi 3 ngo arangize igihano yakatiwe, arishimira ko aruhutse inkoni z’imikwege yakubitwaga buri munsi, aho ngo umubiri we wose wari umaze guhinduka ibisebe.

Ku bijyanye n’imitwe irwanya Leta y’u Rwanda, Uwitonze avuga ko babikoraga mu buryo bw’amayeri, aho babanza kubandika muri Loni, bakabarurwa bajyanwa mu nkambi, bagerayo bagasanga iyo mitwe niho ibarizwa.

Avuga ko Umunyarwanda wese uri mu gihugu cya Uganda yamaze kubarurwa aho bakomeje kubatwara rwihishwa babafunga babambura n’imitungo yabo.

Agira ati “Umunyarwanda uri muri Uganda n’ufite ibyangombwa abaho yihishe, isaha n’isaha arafatwa agafungwa kuko ahantu bari, abitwa ngo ni ba chairman (abayobozi) bashyizeho ngo bababarure. Barafatwa bagafungwa n’imitungo yabo barayamburwa”.

Uwitonze wageze ku mupaka wa Cyanika saa kumi n’imwe z’umugoroba wo kuwa 27 Nzeri 2019, yavuze ko yageze mu Rwanda azanywe n’umusirikare amugeza Gisoro, aho yaraye muri gereza, Polisi iramurekura imugeza ku mupaka nyuma yo kubona ko amafaranga yaciwe yamaze kuyatanga.

Uwitonze arasaba Abanyarwanda kwirinda kwambuka umupaka bajya muri Uganda kubera ingorane yahagiriye.

Ati “Abanyarwanda bareke kujya gushaka ibintu muri Uganda, baharanire gukunda igihugu cyabo, bitoze kugendera ku byo abayobozi bababwira. Kujya muri Uganda ni nko kujya gushaka urupfu ni igihugu kitadukunda”.

Abari bahagarariye ibihugu byombi bahaye ikiganiro abanyamakuru nyuma y’inama bagiranye

Ibyo biganiro byabereye i Kigali kuri uyu wa 16 Nzeri 2019, byari bigamije kureba uko amasezerano ya Luanda muri Angola yashyizweho umukono n’abakuru b’ibihugu byombi ku ya 21 Kanama 2019 ashyirwa mu bikorwa, gusa byagaragaye ko hari byinshi bitarubahirizwa.

Icyakora Ambasaderi Nduhungirehe wari ukuriye itsinda ry’Abanyarwanda muri ibyo biganiro, yavuze ko ibihugu byombi bifite ubushake bwo kumvikana.

Yagize ati “Iyi ni inama ya mbere dukoze nka komisiyo ishinzwe ishyirwa mu bikorwa ry’ariya masezerano ya Luanda. Kuyasinya byarakozwe ariko kuyashyira mu bikorwa ni ikindi, tuzahurira i Kampala muri Uganda mu minsi 30 ngo turebe aho bigeze bishyirwa mu bikorwa, gusa impande zombi zifite ubushake bwo kumvikana kugira ngo ikibazo kibonerwe umuti urambye”.

Ku kijyanye n’Abanyarwanda bafungiye mu gihugu cya Uganda, Minisitiri Nduhungirehe yavuze ko u Rwanda rwatanze urutonde rwabo.

Ati “Hari urutonde rw’Abanyarwanda bafungiye muri Uganda twahaye itsinda ry’icyo gihugu kugira ngo kibakoreho iperereza. Niba hari abafite ibyo babazwa bagezwe mu nkiko, abadafite ibyo bashinjwa barekurwe ku buryo mu nama itaha bazatubwira icyo babikozeho nk’uko biri mu masezerano ya Luanda”.

Minisitiri w’Ububanyi n’amahanga w’igihugu cya Uganda, Sam Kutesa, wari ukuriye itsinda ryaturutse muri icyo gihugu, yabajijwe ku bijyanye n’uko Uganda ishyigikiye abarwanya u Rwanda maze arabihakana.

Ati “Uganda nticumbikira, ntizacumbikira, ntizanashyigikira uwo ari we wese ugamije guteza umutekano muke u Rwanda, ndetse nuzabikora muri kano karere azabihanirwa n’amategeko. Navuga rero ko nta nyungu n’imwe dufite mu gihe u Rwanda rugize ibibazo by’umutekano muke”.

Yongeyeho ko icyabazanye ari ukureba uko ibibazo byose byakemuka kugira ngo abaturage b’impande zombi bongere bagenderane, kandi ko ngo afite icyizere ko mu gihe kiri imbere bizashoboka.

Ibyo biganiro by’umunsi umwe byaberaga i Kigali hagati y’u Rwanda na Uganda, byahuje abayobozi batandukanye ku mpande zombi, barimo ba minisitiri b’ububanyi n’amahanga, abo mu butabera, aba gisirikare abo mu nzego z’ubutasi n’abandi.

Byasojwe hasomwa imyanzuro impande zombi zumvikanyeho, harimo ko u Rwanda rwahaye Uganda urutonde rw’Abanyarwanda bose bafungiye muri Uganda, Uganda na yo yiyemeza gutangira kugenzura amakuru yatanzwe n’u Rwanda kugira ngo batangire inzira zinyuze mu butabera, abarengana batangire barekurwe.

Icya kabiri, impande zombi ziyemeje ko ibyo bizakorwa ku baturage b’ibihugu byombi.

U Rwanda na Uganda kandi byiyemeje ko nta bikorwa by’ubushotoranyi bizongera kubaho.

Ikindi ni uko bagiye kunononsora amasezerano yo guhererekanya abaturage babyo baba bashinjwa ibyaha runaka mu gihugu bahunze.

Ibihugu byombi byiyemeje ko ntakizongera gusakaza amakuru asebanya ku mbuga nkoranyambaga no mu bitangazamakuru.

Ikindi bemeranyijweho ni uko mu nama itaha, impande zombi zizaganira ku bibazo bitandukanye cyane cyane ibirebana n’urujya n’uruza rw’abantu n’ibintu.

Impande zombi zemeranyijwe ko inama itaha izabera i Kampala muri Uganda nyuma y’iminsi 30 kugira ngo barebe aho bageze bashyira mu bikorwa ibyo biyemeje.

Iyi myanzuro ikubiye mu itangazo ryashyizweho umukono na Ambasaderi Olivier Nduhungirehe, umunyamabanga wa Leta y’u Rwanda ushinzwe ububanyi n’amahanga muri EAC, na Sam Kutesa Minisitiri w’ububanyi n’amahanga wa Uganda.

Reba ikiganiro abari bayoboye intumwa z’u Rwanda n’iza Uganda bagiranye n’abanyamakuru nyuma y’inama yahuje impande zombi

Mu byo Benimana yaboneye muri gereza zo muri Uganda ngo hari mugenzi we bishe bakoresheje sitiruwaya zogeshwa amasafuriya

Uyu musore avuga ko yagiye muri Uganda gukorera amafaranga tariki 4 Nzeri 2018, akaba yaragarutse tariki 14 Nzeri 2019, nyuma yo kurangiza igifungo kingana n’umwaka aho ngo yakora imirimo y’uburetwa.

Avuga ko abajya muri Uganda badafite amashilingi miliyoni imwe n’igice (abarirwa mu bihumbi 376 by’Amafaranga y’u Rwanda) ari bo bafatwa bagahezwa muri gereza, bagatangira gukoreshwa imirimo nsimburagifungo y’ubuhinzi cyangwa kwikorezwa ibiti n’amatafari.

Abarangiza icyo gifungo baza bavuga ko bazira kugenda mu gihugu cy’amahanga badafite ibyangombwa, n’ubwo ibihugu byombi byari bisanzwe byaremeranyijwe ko abaturage bazagenderana hakoreshejwe indangamuntu gusa.

Benimana ati "Nabanje gufungirwa muri Kisoro mvayo nsizeyo Abanyarwanda nka 30, nyuma najyanywe i Kabare na ho nasizeyo bagenzi banjye nka 40, ubu nari mfungiwe i Kiburara na ho nsizeyo nk’abarenga 20".

"Muri iyo gereza hari Umunyarwanda numvaga bamwita Sam, yakoreraga umukuru w’abagororwa, nyuma y’igihe gito Sam yarapfuye azize situruwaya bogesha amasafuriya uwo mukuru w’abagororwa yari yavunguriye mu byo kurya".

"Numvise ko yamuzizaga umujinya w’uko ngo ibyo amuha(ibiribwa n’aho kuryama) abifashisha abandi Banyarwanda. Ivangura ryo rirahari(muri iyo gereza) kubera ko iyo mwabaga muri mu kazi hari igihe Abagande bagukubita bakwiyenzaho bavuga ngo na bo nibaza iwanyu uzabakubite".

Icyangombwa kigaragaza ko Benimana yari afungiwe muri gereza zo muri Uganda

Benimana akomeza asobanura ko imirimo y’ubucakara bayikora bakubitwa, birukanswa, batotezwa mu buryo butandukanye ku buryo ngo ’na mugenzi wawe afite umuhoro cyangwa isuka agutema atabishaka".

Benimana wasobanuraga ibi mu gihe Minisitiri w’Ububanyi n’Amahanga wa Uganda, Sam Kutesa n’itsinda ayoboye bari baje i Kigali, avuga ko(Benimana) na we hari ibyo yabwira Museveni (Perezida wa Uganda).

Ati "Hariya batugirira nabi cyane, ibyo nabwira Museveni byo ni byinshi, namusaba kurekura Abanyarwanda bafungiwe muri gereza zo muri Uganda".

Minisitiri Sam Kutesa yaje mu Rwanda kuganira na mugenzi we, Olivier Nduhungirehe ku ishyirwa mu bikorwa ry’amasezerano yo kunoza umubano aherutse gushyirwaho umukono n’Abakuru b’ibihugu byombi i Luanda muri Angola ku itariki 21 Kanama 2019.

Minisitiri w’Ububanyi n’amahanga wa Uganda, Sam Kutesa asuhuzanya na Amb. Olivier Nduhungirehe

Ibyo biganiro bije nyuma y’amasezerano yo guhagarika ubwo bwumvikane buke, yashyizweho umukono ku wa 21 Kanama 2019, umuhango wabereye i Luanda muri Angola, agashyirwaho umukono na Perezida Paul Kagame ku ruhande rw’u Rwanda ndetse na Yoweri Kaguta Museveni ku ruhande rwa Uganda.

Abahuza muri ayo masezerano bari Perezida Etienne Tshisekedi wa Repuburika iharanira Demokarasi ya Congo (DRC) ndetse na Perezida João Lourenço wa Angola.

Ibiganiro by’uno munsi byitabiriwe n’itsinda ry’abayobozi baturutse muri Uganda bakuriwe na Minisitiri w’Ububanyi n’amahanga wa Uganda Sam Kutesa, itsinda ry’abayobozi mu Rwanda riyobowe n’Umunyamabanga wa Leta muri Minisiteri y’Ububanyi n’Amahanga, Ambasaderi Olivier Nduhungirehe ndetse n’abahuza baturutse mu bihugu bya Angola na DRC.

Minisitiri Nduhungirehe yavuze ko amasezerano ya Luanda yagombaga guhagarika amakimbirane hagati ya Uganda n’u Rwanda ariko ngo ntibyakunze kuko hakiri ibikorwa bibangamira inyungu z’u Rwanda.

Yagize ati “Nk’ibihugu bituranyi kandi bihuriye mu Muryango wa Afurika y’Iburasirazuba (EAC), duhuriye ku gushakira amahoro hamwe, umutekano n’ubukungu nk’uko biri mu masezerano. Twavuga nk’amasezerano ku mahoro n’umutekano bituma habaho urujya n’uruza rw’abantu n’ibintu”.

Ati “Icyakora haracyari ibintu bibangamiye umubano wacu. Muri byo hari ko Uganda ishyigikiye abarwanya u Rwanda, gufata, gufunga no gukorera iyicarubozo Abanyarwanda bajya muri Uganda no kubangamira inyungu z’u Rwanda”.

Yakomeje avuga ko u Rwanda rwiteguye kubahiriza amasezerano ya Luanda uko byamera kose, asaba abahuza kugenzura no kuyobora impande zombi kugira ngo iyubahirizwa ry’ayo mazeserano rigerweho.

Minisitiri Kutesa yavuze ko abaturage b’igihugu cya Uganda na bo banyotewe amahoro hagati y’ibihugu byombi.

Ati “Igikorwa cy’uno munsi ni ingirakamaro. Abaturage b’ibihugu byombi ni bo bifuza ko umubano watera imbere kurusha abandi, turagomba rero gukora ku buryo bwihuse kugira ngo umubano ugaruke. Ndemeza ko Uganda na yo yiteguye gukora ibishoboka kugira ngo amahoro agaruke hagati y’ibihugu byombi”.

Ati “Icyo ntegereje kuri ibi biganiro ni uko hari bugire ibyo twumvikanaho ndetse hanashyirweho ingengabihe igaragaza uko amasezerano ya Luanda ashyirwa mu bikorwa”.

Yakomeje avuga ko Uganda yiyemeje gukorana neza n’u Rwanda ndetse n’abahuza ari bo ba Angola na DRC, kugira ngo ariya masezerano yubahirizwe.

Andi mafoto:

Amafoto: Roger Marc Rutindukanamurego

Ayo masezerano yashyizweho umukono ku ruhande rw’u Rwanda na Perezida Paul Kagame, naho ku ruhande rwa Uganda ashyirwaho umukono na Perezida Yoweli Museveni.

Biteganyijwe ko abo bayobozi bazahurira i Kigali ku wa mbere w’icyumweru gitaha, hazaba ari tariki 16 Nzeri 2019.

Abo ku ruhande rwa Uganda bazaba bayobowe na Minisitiri w’Ububanyi n’Amahanga Sam Kutesa, mu gihe abo ku ruhande rw’u Rwanda bazaba bayobowe n’Umunyamabanga wa Leta muri Minisiteri y’Ububanyi n’Amahanga n’Ubutwererane, Ambasaderi Olivier Nduhungirehe.

Ayo masezerano yashyiriweho umukono mu nama yabereye i Luanda muri Angola ku wa gatatu tariki 21 Kanama 2019, izozwa abakuru b’ibihugu by’u Rwanda na Uganda bumvikanye kongera kunoza umubano w’ibihugu byombi ku bw’inyungu z’abaturage n’inyungu z’ibihugu by’u Rwanda na Uganda ndetse n’inyungu z’ibindi bihugu byo mu karere muri rusange.

Mu bandi bari muri ibyo biganiro harimo Perezida João Lourenço wa Angola, Perezida Tshisekedi wa Repubulika Iharanira Demokarasi ya Congo na Perezida Sassou Nguesso wa Congo Brazzaville.

Imyanzuro yafatiwe muri iyo nama yavugaga ko u Rwanda na Uganda byemeranyijwe ko buri gihugu kigiye kubaha ubusugire bw’ikindi ndetse n’ubusugire bw’ibindi bihugu by’abaturanyi.

Impande zombi kandi zemeranyijwe gukumira ibikorwa biganisha ku guhungabanya umutekano w’igihugu kimwe cyangwa ikindi, ndetse no kwirinda ibikorwa byahungabanya umutekano w’ibihugu by’abaturanyi.

Ibihugu by’u Rwanda na Uganda byemeranyijwe no gusubukura urujya n’uruza rw’abantu n’ibintu ku mipaka y’ibihugu byombi, no koroshya ubucuruzi n’ibindi bikorwa bitandukanye byambukiranya imipaka mu rwego rwo gushakira imibereho myiza abaturage b’ibihugu byombi.

Ibihugu byombi kandi byiyemeje guteza imbere umubano n’imikoranire igamije iterambere ry’akarere biherereyemo n’iterambere rya Afurika muri rusange. Mu byo ibyo bihugu byiyemeje gukoranamo harimo ibijyanye na Politiki, umutekano, ubucuruzi, umuco, ishoramari n’ibindi.

Ibihugu byombi kandi byemeye gushyiraho komisiyo ishinzwe gukurikirana iyubahirizwa ry’aya masezerano, iyo komisiyo ikaba iyobowe na ba Minisitiri b’Ububanyi n’amahanga, ikabamo kandi ba Minisitiri bashinzwe ubutegetsi bw’ibihugu n’abashinzwe ubutasi ku mpande zombi.

Uwingenzi Jean Berchmas avuga ko yakubitiwe muri Uganda kugeza ubwo adashobora kwicara neza kubera ibisebe bamuteye

Mu buhamya bwabo, Uwingenzi Jean Berchmas ukomoka i Rutsiro na Bagwaneza Pascal w’i Burera, bavuga ko Polisi ya Uganda yinjiriwe n’abantu bo mu mutwe wa Kayumba Nyamwasa witwa RNC, bakaba ngo barimo kwinjiza muri uwo mutwe Abanyarwanda bajya muri Uganda.

Uwingenzi uzwi ku kazina ka Pasiteri, avuga ko mu kugaruka yabanje gufungirwa kuri Polisi ya Kisoro muri Uganda akanahingishwa ibirayi.

Aho ngo yahahuriye n’Abanyarwanda baza barabwiwe ko bagiye muri RNC, ndetse ko bagezwa kuri iyo sitasiyo ya Polisi bazi ko ari icyicaro cy’ibiro bya Kayumba Nyamwasa.

Ati”Nahahuriye n’abasore batatu nari nsanzwe mbona ku Gisenyi umwe arambaza ati ‘hano kwa Kayumba wahageze ute?’ Birantagaza cyane, arakomeza ati ‘nari nzi ko tuje mu gisirikare none turabona mwirirwa mutera ibirayi!”

“Nyuma naje kuhabona(kuri Polisi) umugabo wajyaga uza kurya muri resitora nakoragamo ku Gisenyi(mbere yo kujya muri Uganda), yari yambaye ipantaro y’igisirikare afite n’icyombo, abanza kuvugana n’abo basore nyuma nanjye aranyegera mbona na we nsanzwe muzi neza”.

“Hariya muri Uganda bamwita Amosi ariko ino bamwita Vincent, yaranyegereye ambuza kuza mu Rwanda ansobanurira ko baza kumfunga, abonye nanze ansaba kwemera ikiraka(mission) cyo kuza gushaka abasirikare, ndetse antungira agatoki ko abasore nabonye na bo ari byo bajemo”

“Yakomeje ambwira ko umuntu waje mu Rwanda akabasha kohereza muri Uganda umuntu wabaye umusirikare, ngo ahabwa amashilingi 32,000 ariko yaba yohereje ukiri umusivili ngo ahabwa hagati y’amashilingi 15,000-25,000.”

Uwingenzi akomeza avuga ko hari n’Abanyarwanda barimo kuva muri Uganda bashobora kuba bajijisha nyamara baratumwe gushakira RNC abayoboke, kuko na we ngo yabisabwe akabyanga.

Avuga ko mu mfungwa harimo abemera guhita bajya muri RNC, ariko ngo hari n’abahitamo kuza mu Rwanda gushakira uwo mutwe abayoboke.

Bagwaneza Pascal avuga ko mu Banyarwanda basohoka muri gereza zo muri Uganda harimo abahita bajyanwa mu mitwe ya RNC

Uwitwa Bagwaneza Pascal na we wari umaze umwaka urenga afungiye ahitwa i Ndorwa, akomeza avuga ko muri gereza zo muri Uganda hahora abantu baza bavuga ko ari abakozi b’ishami ry’Umuryango w’Abibumbye rishinzwe impunzi(HCR), ariko ngo baba bashakira RNC abayoboke.

Ati “Ikijyanye n’iriya mitwe yitwara gisirikare(RNC) hazaga abantu bitwa UN buzurisha imfungwa ibipapuro bakabajyana, ntiwamenya aho babatwara ariko ntabwo abantu bose barekurwa baza mu Rwanda”.

Uwingenzi na Bagwaneza basaba Abanyarwanda batekerezaga kujya muri Uganda, kubihagarika kuko ngo uretse kujyanwa mu mitwe ivugwaho kurwanya igihugu cyabo, ngo bagerayo bagafungwa bakanakoreshwa imirimo y’uburetwa.

Mu birego Leta y’u Rwanda ishinja inzego z’umutekano muri Uganda, harimo ikijyanye no gufasha imitwe yitwara gisirikare irwanya u Rwanda gukorera ku butaka bw’icyo gihugu.

Dusabimana wakubiswe akanakomeretswa agira inama Umunyarwanda wese yo kutajya muri Uganda

Abo bari kumwe haje imodoka ya Polisi irabajyana, gusa ngo ntazi aho yabajyanye na we ngo bafata ibiti bimeze nk’imbaho baramukubita cyane, baramukomeretsa ku buryo ngo bamuciye umutsi munini w’inyuma ku kirenge cy’iburyo, bamuta aho barigendera.

Ngo yaje gushaka uko asindagira ajya ahitwa Rubare kwivuza kugira ngo arebe ko yareka kuva amaraso bityo abone uko ataha, gusa ngo byaramugoye nk’uko abyivugira.

Agira ati “Nagize amahirwe umugiraneza arantwara mu modoka, ngera ku ivuriro rya Rubare nka saa yine z’ijoro nsanga batashye ndyama hasi, amaraso avirirana. Mu gitondo ni bwo umuforomo yaje, ampa utunini aranampfuka hanyuma ntegereza umuganga aza ku mugoroba arandoda”.

Dusabimana ngo yari afite amafaranga makeya mwenewabo yari yamuhaye, afataho ayo yishyura kwa muganga no kugura imiti, arakomeza aba muri ako gace kugira ngo akomeze kwivuza, aho ngo yahingiraga abantu kugira ngo abeho.

Ku itariki ya 2 Nzeri ngo ni bwo yagarutse mu Rwanda kuko ngo yumvaga yorohewe, gusa ibirenge bye n’ubu biracyabyimbye.

Uwo musore w’imyaka 26, avuga ko bamufashe bamushinja ko ari umusirikare w’u Rwanda ariko we arabahakanira ababwira ko atigeze akora iyo mirimo, gusa ngo ntibyababujije kumukubita, akagira inama Abanyarwanda yo kwirinda kujya muri Uganda.

Ati “Umunyarwanda muri Uganda aba ari nk’igitotsi. Nagira inama rero Umunyarwanda wese yo kutajya yo, niba hari ikibazo cy’uburwayi afite yumva yakwivuriza yo akabyihorera agashaka ahandi, cyangwa hari n’ikindi cyamujyana yo akakireka kuko agerayo akagirirwa nabi”.

Undi na we witwa Niyonzima Wilson w’imyaka 21 ukomoka mu karere ka Burera, ngo yagiye muri Uganda muri Gicurasi 2018 ajyanywe no gupagasa, bahita bamufata arafungwa.

Ati “Nabonaga nkennye njya Uganda gupagasa ngo ndebe ko nakwigurira igare ryamfasha gushaka amafaranga. Nambukiye ku mupaka wa Cyanika ariko sinageze kure bahise bamfata kubera ndi Umunyarwanda, banjyana ku rukiko rwa Kisoro bankatira gufungwa amezi 23, ariko bambwira ngo nishyure miliyoni ebyiri z’amashiringi ndazibura bahita bamfungira ahitwa Ndorwa”.

Aho yari afungiye ngo hari abandi Banyarwanda bagera kuri 30, ngo bakababyutsa buri munsi saa kumi za mu gitondo, bakajya kubumba amatafari, gupanga amatanure no kuyatwika, bakageza saa cyenda inzara yabishe bagasubira muri gereza bakabona bagahabwa ibyo kurya.

Niyonzima warekuwe nyuma y’umwaka n’igice kuko yagarutse mu Rwanda ku ya 31 Kanama 2019, agaruka ku cyamubabaje cyane muri icyo gihe yamazeyo.

Niyonzima ngo ababazwa no kuba yarakoreshejwe imirimo y’agahato adashimirwa

Ati “Nababajwe no kwirirwa nkorera abantu badashima ahubwo bakanyiriza inkoni ku mugongo, kurya bigoranye kandi ukora akazi kabo, bakurekura ntihagire n’icya cumi baguha”.

Uyu na we avuga ko yazinutswe kiriya gihugu ku buryo yumva nta kintu cyamusubizayo na kimwe ndetse akanasaba n’undi Munyarwanda kudatekereza kujya yo.

Twambazimana Prince avuga ko abo bari bafunganywe muri Uganda barimo kuribwa n’inzoka mu mashyamba ya Kiburara

Avuga ko akajeto Abanyarwanda baturiye umupaka basanzwe bambukiraho bajya mu bihugu bituranyi ntacyo kavuze, kuko ngo abapolisi muri Uganda bagafata bakagaca, indangamuntu nazo bakazigumana.

Bwarakeye we na bagenzi be bagezwa mu rukiko, rubakakatira igifungo cy’imyaka ibiri buri muntu, nubwo amanywa n’ijoro bibarwa nk’iminsi ibiri.

Twambazimana agira ati “Uwo twari kumwe we yatanze miliyoni ebyiri z’amashilingi (ifaranga rikoreshwa muri Uganda) baramurekura, ariko njyewe kuko ntayo nari mfite banshyize muri gereza”.

Inkovu Twambazimana afite ku gutwi yayitewe n’urushyi yakubitiwe muri gereza

“Imfungwa zihora zijyanwa guhinga mu mashyamba n’imirima bya gereza ya Kiburara harimo inzoka nyinshi, jyewe nzi bagenzi banjye babiri bapfuye bishwe no kurumwa n’inzoka, hari n’undi witwa Sam na we sinamenye irengero rye”.

"Iyo gereza irimo Abanyarwanda benshi babarirwa hagati ya 180-200, ni bo bakoreshwa mu mirima. Mbabazwa cyane n’uko badukoresha imirimo y’ubucakara, turakubitwa cyane kuko n’iyi nkovu mfite ku gutwi yatewe n’urushyi abacungagereza bankubise".

Twambazimana avuga ko abajyanwa gukora mu mirima bagenda babeshywa ko batahanywe iwabo.

Kugeza ubu ngo ntabwo aramenya irengero ry’inshuti ye yitwa Hillary yari agiye gusura muri Uganda, akaba aburira Abanyarwanda bari bafite gahunda yo kujyayo kuba babiretse.

Muhire Jean Baptiste avuga ko adatekereza gusubira muri Uganda vuba

Yaje no gutekereza gukora umwuga w’ubukanishi bw’ibikoreshwa n’amashanyarazi, kuko ngo yabonaga muri Uganda hamushimishije no kuhakorera ahita ajya kwiga i Kampala.

Avuga ko mu gihe yari atararangiza kwiga uwo mwuga hashize nk’amezi abiri gusa, yaje guta ibyangombwa bye ahita afata bisi imuzana mu Rwanda gushaka ibindi.

Ageze i Kisoro ku mupaka w’u Rwanda na Uganda ngo yasanze haparitse imodoka nyinshi za bisi, zimwe zavaga mu Rwanda izindi zerekezayo.

Ati "Abanyarwanda twese badukuye muri izo modoka batujyana muri Polisi. Twaramutse tujya mu rukiko ku itariki 10/5/2018, buri wese bamukatira igifungo kirengeje umwaka muri gereza".

"Twari benshi cyane turenga nka 600, ku buryo byabaye ngombwa ko batujyana mu magereza atandukanye y’i Kiburara, Kabale, Mbarara, Ibuga na Ibanda".

"Icyakora baguhitishamo gufungwa cyangwa gutanga amafaranga kuva kuri miliyoni imwe y’amashilingi kugera kuri ebyiri bakakurekura ugataha iwanyu. Waba utayafite rero nibwo bagufunga ukajya guhinga".

"Abantu barakoreshwa! Bahinga bakubitwa kuva mu gitondo kugeza nimugoroba nta kintu bashyira mu kanwa, amazi yonyine ni yo umuntu atangira gushyira mu nda nka saa cyenda-saa kumi".

"Abanyarwanda bahindutse abacakara cyangwa ibicuruzwa muri Uganda, n’ubwo twumvise ko abakuru b’ibihugu bashyize umukono ku masezerano y’i Luanda muri Angola, ntacyo byahinduye kuko Uganda itatekereza kurekura abo bantu".

Muhire avuga ko icyatumye we adakoreshwa imirimo ivunanye muri Uganda ari uko ngo yari afite ’Salon’ yo kogosheramo izwi, ku buryo batamushyiragaho ’agahato nk’ako bakorera abandi Banyarwanda b’abakene’.

Avuga ko agarutse ubutazasubira muri Uganda, kandi akaba akangurira abandi Banyarwanda bahatekerezaga kuzinukwa inzira yerekezayo.

Aba Banyarwanda bane baraburira abandi ko Uganda itakiri nyabagendwa, abaturage baho basigaye baradukanye umuco wa kera wo gukoresha abantu imirimo y’ubucakara

Bagiye muri Uganda binjiriye ku mupaka wa Cyanika ku itariki 07 Kanama 2018, aho bamwe bajyaga guhaha abandi bagiye mu mirimo nk’uko byari bisanzwe, bahitira muri gereza bazira "kuvogera igihugu cy’amahanga".

Nyamara Uganda yari yarashyize umukono ku masezerano agenga Umuryango wa Afurika y’Iburasirazuba(EAC), yemera urujya n’uruza rw’abantu no kwambukiranya imipaka y’ibihugu byombi nta byangombwa basabwe uretse indangamuntu.

Uwizeyimana ukomoka mu Karere ka Burera avuga ko yari agiye guhinga, ageze i Kisoro asanga hakozwe umukwabu ku buryo ngo n’umuntu wabaga afite ibyangombwa bimuranga yabyamburwaga.

Ati "Twarafashwe tubanza gufungirwa kuri Polisi, hashize gatatu tujyanwa mu rukiko badukatira igifungo kingana n’umwaka umwe buri wese. Twabanje gufungirwa muri gereza ya Kisoro, twimurirwa i Ndorwa, abandi i Mbarara, Mparo na Kiburara".

"Abantu dusize muri gereza ya Ndorwa ni nka 500, abari ahandi umubare sinywuzi ariko ni benshi cyane. Umuntu asabwa kwishyura amafaranga y’insimburagifungo agera kuri miliyoni imwe n’igice y’amanyarwanda kugira ngo bakurekure ugaruke mu Rwanda, waba utayafite ukamara umwaka ukoreshwa ubucakara".

"Muri icyo gihe cyose tumara dukoreshwa imirimo y’agahato yo guhinga, kwikorera amatafari n’ibiti, kandi waba ugize intege nke ugakubitwa, abasigayeyo inkoni zirenda kubica, mwatubariza Uganda icyo iduhora".

Twizerimana Emmanuel na we akomeza asobanura ko abaturage bo muri Uganda ari bo baza gusaba ubuyobozi bw’amagereza abakozi b’Abanyarwanda kuko ngo ari bo bakora cyane kandi ntacyo bahembwa.

Twizerimana agira ati "Bagukoresha imirimo y’agahato nta n’ikintu wariye na kimwe, muri aka kanya mvugira aha saa kumi n’imwe z’umugoroba nibwo umuntu wa mbere ashyize amazi mu kanwa".

Aba baturage batanga ubuhamya mu rwego rwo kuburira Abanyarwanda batekerezaga kujya muri Uganda, ko inzira itakiri nyabagendwa.

Bavuga ko barangije igifungo ku itariki ya 24 y’uku kwezi bahabwa imodoka ya gisirikare ije kubafata, ikaba yarabazanye ibururukiriza ku mupaka wa Cyanika aho binjiriye bajya muri Uganda.

Imanizabayo Albert, umusore w’imyaka 27 avuga ko amaze umwaka urenga muri gereza za Uganda

Imanizabayo Albert, umusore w’imyaka 27 utuye i Burera, avuga ko mbere y’itariki 10/8/2018 yari asanzwe yambuka umupaka wa Cyanika akajya kogosha i Bunagana(aho Uganda igabanira ba Congo).

Ku itariki 11 Kanama 2018 ngo nibwo yashatse kwambuka aza mu Rwanda, abakozi ba Uganda bakorera ku mupaka bakamuhagarika bamubwira ko agapapuro yambukiraho(jeto) karengeje igihe.

Avuga ko yafashwe agashyirwa muri mabuso mu mujyi wa Kisoro muri Uganda, nyuma yaho yaje kwimurirwa i Kabare, hashize igihe naho aza kuhava ajyanwa muri gereza y’ahitwa Gihihe.

Imanizabayo yakomeje asobanurira itangazamakuru ko ari mu Banyarwanda barenga 100 yabonye bafungiwe mu magereza ya Uganda, banakoreshwa imirimo y’uburetwa.

Ati"Dukoreshwa imirimo ivunanye yo guhinga, kwikorera ibiti n’amabuye, hari aho twategetswe guhinga hegitare 10 z’ubutaka ku munsi turi abantu nka 40".

"Umunsi umwe turi mu murima nibwo badutegetse gufatira amafunguro haruguru y’aho twahingaga, banyikoreza inkono ya kawunga ivuye ku muriro ako kanya".

Imanizabayo avuga ko uretse imirimo y’uburetwa bakorera abasirikare n’abapolisi muri Uganda, ngo yanahamburiwe amashilingi ibihumbi 170.

Uyu musore wagarutse ku wa gatandatu w’icyumeru gishize tariki 24 Kanama 2019 arangije igihano yari yarakatiwe n’urukiko, ni umwe mu basaba Abanyarwanda kuzinukwa kujya muri Uganda.

Muhigirwa Paul, Umunyarwanda wafunzwe n’inzego z’umutekano za Uganda

Perezida Paul Kagame na Yoweri Kaguta Museveni ku wa gatatu tariki 21 Kanama 2019 bashyize umukono ku musezerano yo kurangiza ibibazo biri hagati y’ibihugu byombi.

Perezida Kagame yahise avuga ko aya masezerano adakwiye kubahirizwa igice mu gihe hifuzwa ko umubano usubira kuba nk’uko wari umeze mbere.

Amasaha make nyuma yo gushyira umukono kuri ya masezerano, u Rwanda rwahise ruvuga ko Uganda itangiye gukora ibihabanye n’aya masezerano nyuma y’uko ikigo cya Uganda gishinzwe itumanaho (UCC) gitegetse abacuruza interineti mu gihugu guhagarika imbuga zimwe na zimwe zo mu Rwanda zandika amakuru mu gihugu cya Uganda.

Umunyamabanga wa Leta muri minisiteri y’Ububanyi n’Amahanga ufite umuryango wa Afurika y’Uburasirazuba mu nshingano Amb. Olivier Nduhungirehe yabwiye Kigali Today ko u Rwanda rwiteguye gushyira mu bikorwa aya masezerano yasinyiwe i Luanda, harimo no guhagarika ubutumwa buburira Abanyarwanda bajya Uganda, igihe cyose Uganda yagaragaza ubushake.

Ambasaderi Olivier Nduhungirehe

Yagize ati “ishyirwa mu bikorwa ry’aya masezerano rizashingira ahanini ku bushake bwa Uganda bwo kuyubahiriza. Kurekura Abanyarwanda bose bafungiye muri Uganda bizaba ari ikimenyetso cyiza cy’ubushake bwabo”.

Amb. Nduhungirehe, n’ubwo nta gihe yatanze bizabera, yavuze ko ubutumwa buburira Abanyarwanda bubasaba kwitondera gukorera ingendo muri Uganda bwatanzwe mu kwezi kwa kabiri uyu mwaka buzavanwaho igihe amagana y’Abanyarwanda bafungiye Uganda azaba afunguwe. Ibi ngo bizaba byerekana ko Umunyarwanda washaka gukorera urugendo muri Uganda nta mpungenge akwiye kugira.

U Rwanda rwakomeje kuvuga ko rusaba Uganda guhagarika ibyo guta muri yombi no gukorera iyica rubozo Abanyarwanda batuye cyangwa se bagenda muri Uganda ndetse no kubazana mu Rwanda mu buryo butabereye ikiremwamuntu, igahagarika gutera inkunga imitwe irwanya Leta y’u Rwanda ndetse no kubangamira ibikorwa by’iterambere ry’ubukungu u Rwanda rufitemo inyungu.

Amasezerano yashyizweho umukono ku munsi w’ejo ku bushake bwa perezida wa Angola João Lourenço, atanga umurongo watuma bihugu byombi byongera kubyutsa umubano.

Aya masezerano yanitabiriwe kandi na perezida Félix Tshisekedi wa RDC hamwe na Perezida Denniss Sassou Nguesso wa Repubulika ya Congo, nk’abahuza.
Bimwe mu byemeranyijwe n’impande zombie harimo kubaha ubusugire bw’ikindi gihugu, ndetse no kugendera kure ibikorwa bigamije kubuza umutekano umuturanyi.

Hemeranyijwe kandi ko muri uyu mujyo, buri gihugu kizavanaho imbogamizi zose zabangamira iyi nzira nko gutera inkunga no guha amahugurwa imitwe igamije guhungabanya umutekano w’ikindi gihugu.

Imwe mu ngingo zigize aya masezerano ivuga ko ibihugu byose bizasubukura ibijyanye n’urujya n’uruza rw’abantu n’ibintu mu gihe cya vuba, hagamijwe iterambere ry’abaturage b’ibihugu byombi.

Perezida Kagame yavuze ko aya masezerano akora ku ngingo zireba ibihugu byombi, kandi ko bikwiye ko yubahirizwa uko yakabaye atari uguhitamo ingingo zimwe na zimwe zo gushyira mu bikorwa no kureka izindi.

Yavuze ko iyo hari imbogamizi zibangamira ubucuruzi bwambukiranya imipaka ndetse n’urujya n’uruza rw’abantu, kuko batabasha kwambuka cyangwa se bakwambuka bagatabwa muri yombi, bigira ingaruka ku rujya n’uruza rw’abantu, ibintu ndetse n’ubucuruzi muri rusange.

Mu bindi bikubiye muri aya masezerano ni ugushyiraho akanama gahuriwe na ba minisitiri bafite ububany n’amahanga mu nshingano ndetse n’abafite ubutegetsi bw’igihugu mu nshingano ku mpande zombi gashinzwe kugenzura iyubahirizwa ry’aya masezerano ndetse n’abakuriye inzego z’iperereza.
Harimo kandi ko intambwe yose itewe mu iyubahirizwa ryayo igomba kumenyeshwa abahuza.

Mu itangazo ryashyizwe hanze na perezida Museveni ubwo yatumirwaga na perezida Lourenco wa Angola, ryavugaga ko yari (Perezida Museveni) yatangiye ibiganiro na Perezida Kagame bigamije gushakira umuti urambye ikibazo.

Cyakora ibiganiro byahuje abakuru b’ibihugu bombi mu bihe byashize nta musaruro ugaragara byatanze, u Rwanda rukavuga ko Uganda itagira icyo ikora ku bibazo bihari bigaragazwa n’u Rwanda.

Ibyo biganiro byahuje Perezida Kagame ku ruhande rw’u Rwanda, Perezida João Lourenço wa Angola, Perezida Museveni wa Uganda, Perezida Tshisekedi wa Repubulika Iharanira Demokarasi ya Congo na Perezida Sassou Nguesso wa Congo Brazzaville.

Imyanzuro yafatiwe muri iyo nama ivuga ko u Rwanda na Uganda byemeranyijwe ko buri gihugu kigiye kubaha ubusugire bw’ikindi ndetse n’ubusugire bw’ibindi bihugu by’abaturanyi.

Impande zombi kandi zemeranyijwe gukumira ibikorwa biganisha ku guhungabanya umutekano w’igihugu kimwe cyangwa ikindi, ndetse no kwirinda ibikorwa byahungabanya umutekano w’ibihugu by’abaturanyi.

Ibihugu by’u Rwanda na Uganda byemeranyijwe gusubukura urujya n’uruza rw’abantu n’ibintu ku mipaka y’ibihugu byombi, no koroshya ubucuruzi n’ibindi bikorwa bitandukanye byambukiranya imipaka mu rwego rwo gushakira imibereho myiza abaturage b’ibihugu byombi.

Ibihugu byombi kandi byiyemeje guteza imbere umubano n’imikoranire igamije iterambere ry’akarere biherereyemo n’iterambere rya Afurika muri rusange. Mu byo ibyo bihugu byiyemeje gukoranamo harimo ibijyanye na Politiki, umutekano, ubucuruzi, umuco, ishoramari n’ibindi.

Ibihugu byombi byiyemeje gushyiraho komisiyo ishinzwe gukurikirana iyubahirizwa ry’aya masezerano, iyo komisiyo ikaba iyobowe na ba Minisitiri b’Ububanyi n’amahanga, ikabamo kandi ba Minisitiri bashinzwe ubutegetsi bw’ibihugu n’abashinzwe ubutasi ku mpande zombi.

Uhereye ibumoso: Perezida Sassou Nguesso wa Congo Brazzaville, Perezida Museveni wa Uganda, Perezida João Lourenço wa Angola, Perezida Kagame w’u Rwanda na Perezida Tshisekedi wa Repubulika Iharanira Demokarasi ya Congo

U Rwanda na Uganda byiyemeje kuzajya bimenyesha buri gihe aho bigeze byubahiriza ayo masezerano.

Buri gihugu kandi cyiyemeje ko mu gihe kitazubahiriza ibikubiye muri ayo masezerano kizabibazwa.

Mu gihe haramuka hari ibyo impande zombi zitumvikanyeho mu ishyirwa mu bikorwa ry’ayo masezerano, ngo ikibazo kizajya gikemurwa binyuze mu biganiro by’impande zombi, bitashoboka hakifashishwa ibihugu byagize uruhare n’ubundi mu isinywa ry’ayo masezerano.

Itangazo rikubiyemo iyi myanzuro rivuga ko ibyo impande zombi zemeranyijweho bihita bitangira gushyirwa mu bikorwa.

Perezida Kagame yashimiye abafashije kumvikanisha u Rwanda na Uganda

Mu ijambo rye, Perezida wa Repubulika y’u Rwanda Paul Kagame yashimiye Perezida João Lourenço wa Angola na Perezida Tshisekedi wa Repubulika Iharanira Demokarasi ya Congo kubera inama z’ingenzi zabo zafashije u Rwanda na Uganda kumvikana.

Perezida Kagame yavuze ko yizera ko bitagoye gukemura ibibazo ibihugu byombi bimaze iminsi bifitanye.

Ati “Bishobora gufata igihe kugira ngo twembi tubyumve kimwe, ariko ndatekereza ko intambwe tugezeho ishimishije. Ndatekereza ko mu Rwanda nta kibazo cyatubuza gushyira mu bikorwa ibyo twiyemeje.”

Perezida Kagame yasobanuye impamvu gufungura umupaka ari ingenzi kuko bituma ingendo z’abantu n’ibintu zoroha, avuga ko ibicuruzwa bidakwiriye kubuzwa kwambuka umupaka, asaba ndetse ko n’abantu bambuka umupaka badakwiriye gukomeza gutabwa muri yombi, kuko bibangamira ingendo n’ubucuruzi hagati y’ibihugu byombi.

Yavuze ko ibikubiye mu masezerano yashyizweho umukono bisobanutse, agasanga byose bikwiye kubahirizwa uko bimeze, aho kubahiriza bimwe ngo ibindi byirengagizwe.

Amafoto: Urugwiro

Ba Perezida Kagame na Museveni bamaze gushyira umukono ku masezerano

Perezida Kagame araganira na Perezida João Lourenço wa Angola, Perezida Museveni wa Uganda, Perezida Tshisekedi wa Repubulika Iharanira Demokarasi ya Congo na Perezida Sssou Nguesso wa Congo Brazza, barebere hamwe umutekano n’imibanire mu karere cyane cyane baganire ku mubano w’u Rwanda na Uganda.

Uhereye ibumoso: Perezida Sassou Nguesso wa Congo Brazzaville, Perezida Museveni wa Uganda, Perezida João Lourenço wa Angola, Perezida Kagame w’u Rwanda na Perezida Tshisekedi wa Repubulika Iharanira Demokarasi ya Congo

President Kagame has arrived in Luanda, Angola where he joins the host President João Lourenço of Angola, President Museveni, President Tshisekedi and President Sassou Nguesso for the second quadripartite summit aimed at strengthening regional security and cooperation. pic.twitter.com/O9nWAd7EfI

— Presidency | Rwanda (@UrugwiroVillage) August 21, 2019

Tariki 12 Nyakanga 2019, itangazo ry’inama yahuje abakuru b’ibihugu bine ari byo Angola, u Rwanda, Repubulika ya Demokarasi ya Congo (DR Congo) na Uganda ryavugaga ko ibihugu bya Angola na DR Congo bigiye guhuza ibiganiro hagati y’u Rwanda na Uganda.

Ubwo abakuru b’ibihugu bahuriraga muri Angola mu kwezi kwa karindwi 2019

Mu nama yari yatumijwe na perezida Lourenço, abo bakuru b’ibihugu barebeye hamwe uko akarere ibyo bihugu biherereyemo gahagaze, barebera hamwe n’uburyo bwo kurushaho guteza imbere umubano mwiza hagati y’ibyo bihugu bine.

Mu ntangiriro z’uku kwezi, abakuru b’ibihugu bahuriye i Luanda nanone bagirana ibiganiro, cyakora ibyavuye muri ibi biganiro ntabwo byashyizwe ahagaragara.

Perezida Kagame ageze i Luanda avuye i Windhoek muri Namibia aho yakoreye urugendo rw’akazi rw’iminsi itatu.

Ubwo Perezida Kagame yakirwaga i Luanda kuri uyu wa gatatu

Inkuru bijyanye

Angola na DR Congo byiyemeje guhuza u Rwanda na Uganda

Tuyishimire avuga ko akimara gufungwa yasabwe gutanga miliyoni n’igice y’amashiringi ya Uganda kugira ngo arekurwe, ariko arayabura.

Tuyishimire yagiye muri Uganda mu kwezi kwa Kamena 2018, agiye gukora akazi ko kubaka. Yaje gufungwa mu kwezi kwa Nzeri 2018, ashinjwa kuba muri Uganda nta byangombwa afite, gusa we avuga ko yari abifite.

Yagejejwe mu rukiko aregwa ibyaha byo kutagira ibyangombwa, kuvogera igihugu no gushaka guhirika ubutegetsi bwa Uganda biramuhama, ahanishwa igifungo cy’umwaka umwe.

Tuyishimire avuga ko akimara gufungwa yasabwe gutanga miliyoni n’igice y’amashiringi ya Uganda kugira ngo arekurwe, ariko arayabura.

Kuva ubwo we n’abandi banyarwanda bari bafunganywe batangiye gukoreshwa imirimo ivunanye kandi ku gahato, no gukubitwa buri munsi.

Ati “Muri gereza nta munyarwanda udakubitwa. Harimo abagore, abagabo, abana, buri munsi ni ugukubitwa kandi muri gukora, waba ufite integer nke, baragukubita, ndetse harimo n’abapfuye”.

Tuyishimire avuga ko yafungiwe muri hereza ya Kisoro, ariko yamara gukatirwa akajyanwa muri gereza ya Ndorwa iherereye mu gace ka Kabale.

Aha muri iyi gereza, Tuyishimire avuga ko yari ahafungiwe n’abandi banyarwanda 60, bose akaba yarabasizemo kandi babayeho mu buzima bubi cyane bwo gukubitwa no gukoreshwa imirimo ivunanye buri munsi.

Uyu musore avuga ko ikibazo gikomeye ku banyarwanda baba muri Uganda atari ukutagira ibyangombwa, kuko ngo uwitwa umunyarwanda wese batamushaka muri icyo gihugu.

Ati “Jyewe nararebye nsanga kudufata atari ikibazo cy’ibyo byaha badushinja, ahubwo bo ikibazo ni umunyarwanda uwo ari we wese ntabwo bamushaka muri Uganda. Ibyangombwa waba ubifite waba utabifite, ntibibabuza kugufata bakagufunga bakanagukatira”.

Tuyishimire kandi agira inama Abanyarwanda bashaka kujya muri Uganda kubireka , kuko nta mutekano bashobora kuhagirira kabone n’ubwo baba badafunze.

Ati “Icyo nababwira, n’uwari ufite iyo gahunda yayireka, kuko nta mahoro yabonerayo. Hari n’abadafunze bari yo, ariko nta mahoro bafite. Nta kintu wakorera muri Uganda ngo ukibone nk’uko wagitekerezaga. Hari abacuruzaga, barabafunze ibyabo barabitwara, abubatse barabafunga inzu zabo bakazigurisha, mbese nta mahoro ari yo ku munyarwanda”.

Tuyishimire yafunguwe tariki ya 14 Kanama 2019, agezwa mu Rwanda kuya 16 Kanama 2019, akavuga ko n’ibyangombwa yari afite byose yabitaye yo kuko batabimusubije.

Ubusanzwe inzego zishinzwe umutekano z’icyo gihugu ngo zajyaga zizana aba baturage b’u Rwanda zikabageza ku biro bya gasutamo ku mupaka uhuza ibihugu byombi.

Rugororotsi Eric (Gasongo)

Uwitwa Rugororotsi Eric(Gasongo) arashima ubushishozi bw’inzego z’umutekano z’u Rwanda zitamurashe ari kumwe n’uwitwa Maniriho Saidi, ubwo binjiraga mu gihugu banyuze mu bihuru, mu gicuku cy’itariki 29 Kamena 2019.

Ahagana saa saba z’ijoro nibwo inzego za Uganda ngo zabazanye zikabajugunya mu bihuru mu gishanga cya Rwempasha kigabanya uturere twa Ntungamo(muri Uganda) na Nyagatare mu Rwanda.

Rugororotsi agira ati" Ni Imana twagize kandi habayeho ubushishozi bw’abashinzwe umutekano mu gihugu cyacu, ubu nari kuba narapfuye narahambwe kandi abatuzanye bo muri Uganda nibyo bashakaga".

"Abakozi b’igisirikare cya Uganda ni abajura kandi barabyishinja, kuko batinyaga ko hagira ubabona iyo batuzana habona bakadusiga ku mupaka ahantu hemewe".

Rugorotsi abivuga ashingiye ku kuba ngo yarirukanywe amaze kwamburwa ibifite agaciro k’amadolari ya Amerika 5,900(amanyarwanda asaga miliyoni eshanu), kandi ko agarutse yihagarika amaraso bitewe n’umugeri ngo yakubiswe mu kiziba cy’inda ubwo bari bakimufunga.

Rugororotsi w’imyaka 49, avuga ko yafatiwe muri Uganda ku itariki 24 Ukwakira 2018 yagiye kugura ibikoresho bigize ibinyabiziga(pieces de rechange), akaba yarafungiwe muri gereza zo muri Uganda mu gihe cy’amezi icyenda.

Mu mafaranga n’ibicuruzwa bye avuga ko byari bifite agaciro k’amadolari ya Amerika 6,400, ngo bamugaruriye amadolari 500 yonyine.

Inzego za Uganda ziramushinja(kimwe nk’abandi Banyarwanda bajyayo), kuba intasi za Leta y’u Rwanda.

Avuga ko atigeze aba na ’Local Defense’ ariko Uganda ikamushinja kuba umusirikare w’u Rwanda ufite ipeti rya majoro, ngo wari uje kuneka no gutwara amakuru agaragaza imyirondoro y’abasirikare bakuru muri icyo gihugu.

Imyaka ibiri igiye gushira Abanyarwanda bajya muri Uganda bavuga ko bakorerwa iyicarubozo, ndetse hakaba n’abamaze gutanga ikirego mu Rukiko rw’Umuryango wa Afurika y’Uburasirazuba, bashinja Uganda kwica amasezerano agize uwo muryango.

Nzabonimpa Joseph w’imyaka 25 y’amavuko avuga ko yihinduye umurwayi wo mu mutwe kugira ngo adakubitwa

Nzabonima yagiye muri Uganda tariki ya 6 Mutarama 2019, agiye gushakisha imibereho. Nyuma yo kubona igishoro yari asigaye ahakorera ubucuruzi bw’amasambusa.

Avuga ko tariki ya 3 Werurwe 2019 ari bwo yafashwe n’inzego z’umutekano mu gace ka Kisoro aho yakoreraga, ashinjwa kuba muri Uganda nta byangombwa, nyamara kandi urupapuro rwamwemereraga kuhaba rwari rugifite agaciro.

Nyuma yo kumufata, ibyangombwa bye barabiciye, ajyanwa gufungirwa kuri polisi ya Uganda ikorera mu gace ka Kisoro, aho yamaze amezi atanu muri gereza.

Nzabonimpa akigera muri gereza avuga ko yasanze Abanyarwanda bahafungiye bakubitwa nk’aho atari abantu, ahitamo kwigira umurwayi wo mu mutwe ngo arebe ko yacika izo nkoni.

Agira ati “Ibyabaye ku Banyarwanda bagenzi banjye, abo nasanzemo, abansanzemo, ni agahinda gusa. Narabirebye ndavuga nti hano utakwigira umusazi yajya akubitwa buri munsi, mpera ko nigira umusazi, bose bakabona ko nasaze, n’umuyobozi yaza akavuga ngo uriya ni umusazi ntimukamukubite! Baradukubitaga, bakadukubitira ubusa”.

Nzabonimpa kandi avuga ko yagejejwe mu rukiko akaburana ndetse akanatsinda, ariko agasabwa gutanga ruswa y’amashilingi ya Uganda ibihumbi 100 ngo abone kurekurwa (ni ukuvuga abarirwa mu bihumbi 25 by’Amafaranga y’u Rwanda), yanayatanga ntahite arekurwa.

Nzabonimpa yarekuwe ku wa 23 z’uku kwezi kwa Nyakanga 2019, nyuma aza koherezwa mu Rwanda.

Kimwe na Nzabonimpa, undi musore witwa Irakiza Fiston w’imyaka 20 na we yari amaze amezi umunani afungiye muri Uganda mu Karere ka Kasese.

Irakiza Fiston w’imyaka 20 na we yari amaze amezi umunani afungiye muri Uganda

Ni umusore ugaragaraho intege nkeya, ndetse uvuga ko yaje arwaye kubera umunaniro w’imirimo y’agahato yakoreshejwe mu gihe yari amaze afunze.

Na we avuga ko yafashwe azira kuba muri Uganda nta byangombwa afite.

Aho uyu Irakiza yari afungiye, Abanyarwanda bahafungiye ngo bakoreshwa ubuhinzi bw’ibigori ku gahato, aho bazindukira mu murima bakageza nimugoroba bagihinga.

Irakiza avuga ko uwanze guhinga cyangwa utabishoboye ari we ukubitwa, cyangwa se agatanga amafaranga kugira ngo arekurwe.

Ati “Ni uguhinga uri gukubitwa ngo ugire vuba, n’abasaza, n’abadafite ingufu bose barahinga. Iyo ubona utabishoboye ubwo ni ugutumaho iwanyu bagatanga amafaranga ukabona gutaha. Batubyutsa saa kumi n’imwe tukanywa igikoma, tukajya mu murima kugeza saa kumi n’imwe tugataha”.

Aba basore bagira inama Abanyarwanda batekereza kujya muri Uganda kuhashakira imibereho ko babihagarika, kuko umutekano wabo ari ntawo.

Kuri Nzabonimpa wakoraga ubucuruzi bw’amasambusa, avuga ko yari amaze kugira igishoro kigaragara none cyose akaba yaragisize muri Uganda, agasaba ko yafashwa kubona ikindi gishoro agakorera mu Rwanda.

Maniriho Saidi w’imyaka 22, avuga ko yagiye muri Uganda asangayo nyina utuye i Kampala, ariko ngo ntiyari yakamenya ko kujya guhahirayo ari nko kujya mu rupfu.

Mu kwezi kwa mbere k’uyu mwaka wa 2019, nibwo inzego zishinzwe umutekano muri Uganda zamutaye muri yombi zimushinja (we n’abandi Banyarwanda) kuba ba maneko b’u Rwanda muri icyo gihugu.

Ati"nababwiye ko uretse njyewe, nta n’undi wo mu muryango w’iwacu wigeze ukora ku mbunda, kuko niyo bansabaga".

"Bamfashe ahagana saa ine za mu gitondo maze gukatisha itike yo kuza mu Rwanda, banjyana muri gereza y’ahantu bita Kyengera, bari bampfutse mu maso".

"Ku munsi wa mbere maze gukubitwa, naraye mbohesheje iminyururu ku maboko bayabambye nk’uko byagendekeye Yesu, nari nambaye ubusa buri buri".

"Bambohesheje n’indi minyururu mu nda no ku maguru kugira ngo ntinyagambura burinda bucya, barampambuye mpita nikubita hasi babanza kunjyana kwa muganga".

Maniriho avuga ko yagaruwe muri gereza avanywe kwa muganga asanga harimo abandi Banyarwanda batatu, ari bo Sam Tumushabe, Gato Moses hamwe na Rugoroki Eric, uzwi nka Gasongo.

Avuga ko muri buri cyumba cy’iyo gereza hafungiwemo Abanyarwanda, kuko aho yagiye yimurirwa hose ngo yabasangagamo.

Ati "hari ikindi cyumba banyimuriyemo nsangamo Umunyarwanda umwe bita Mukunzi Kennedy, hashize iminsi bahazanye n’uwitwa Tumushabe Joseph, ndetse na Byarugaba Dan".

Maniriho avuga ko byageze igihe umwe mu Bagande bari bafunganywe atoroka gereza, bituma hafatwa ingamba zo kugirira nabi abasigaye.

Ati"Bafunze buri cyumba, batuzanira indobo imwe ikaba ari yo twitumamo turi abantu barenga 60, turara hasi mu bukonje bukabije, akaba ari naho turira ibyo kurya iruhande rw’iyo ndobo".

"Ibyo kurya baduhozaho ni kawunga n’ibishyimbo bidahiye, icyakora ku cyumweru nibwo iyo kawunga bayisimbuza umuceri".

"Jyewe nageze ubwo ndwara hano mu bugabo, burashishuka bwenda no gutakara hasi, umuntu akajya agenda afasheho bujejeta amaraso. Baduha ifu ya kawunga ikaba ari yo twivurisha ibyo bisebe".

Avuga ko byageze mu kwezi kwa gatatu k’uyu mwaka wa 2019 bajyanwa kubonana n’Umuyobozi w’Urwego rushinzwe umutekano w’imbere mu gihugu muri Uganda, Col Kaka Byagenda.

Uyu ngo yabasabye kureka kuneka igihugu cya Uganda ariko abemerera kubarekura bagataha iwabo mu Rwanda, n’ubwo ngo bakomeje gufungwa kugera mu kwezi gushize kwa gatandatu.

Ku itariki 29 Kamena 2019 bashyizwe mu modoka irabazana, aho kubakuriramo ku mupaka wa Gatuna ngo yaratambitse irabajyana ibaroha mu kibaya mu karere ka Ntungamo ku ruhande rw’u Rwanda cyitwa Rwempasha mu karere ka Nyagatare.

Maniriho yahise yambuka arataha mu Rwanda arangije ikimeze nk’inzira y’umusaraba.

Agira ati "Ndahamagara Abanyarwanda bakiri hakurya gutaha mu rwatubyaye kuko muri Uganda nta butunzi bukiriyo kubera akavuyo n’ubwo bugome badukorera".

Avuga ko atazi uburyo nyina abayeho, akaba yaravuye muri Uganda yambuwe ibihumbi 300 by’amashilingi ya Uganda, ibihumbi 550 by’amanyarwanda hamwe n’itike y’imodoka ndetse n’indangamuntu.

Baziruwiha wari umurobyi

Baziruwiha yabitangaje kuri uyu wa kabiri 16 Nyakanga 2019, nyuma y’uko we na mugenzi we Rwagasore Bernard bagejejwe mu Rwanda bavuye muri gereza yo muri Uganda.

Baziruwiha we yavuze ko yageze muri Uganda mu kwezi kwa Gicurasi mu mwaka ushize wa 2018, aho yakoraga akazi k’uburobyi bw’indagara mu kiyaga cya Victoria.

Nyuma yaje kwinjira mu itorero rya ADEPR, bita Pentecote church Internation/Uganda, atangira kurisengeramo nk’umuyoboke waryo, ndetse nyuma aza no kuba umwe mu bayobozi baryo ku rwego rw’ibanze.

Baziruwiha avuga ko tariki ya 23 Gicurasi muri uyu mwaka ari bwo yafashwe, ashinjwa kuba intasi y’igihugu cy’u Rwanda, ndetse akabwirwa ko atemerewe gushing itorero mu gihugu kitari icye.

Ati “Ubwo twageze muri polisi baradufunga, bukeye mu gitondo haza umupolisi aratubaza ngo ni mwebwe b’Abanyarwanda muri hano ba ‘Intergency’ (abatasi)! Musubiza ko iryo jambo nta narizi, ati mwebwe mwatumwe n’igihugu cyanyu kuza kutuneka”.

Kimwe na Baziruwiha, Rwagasore nawe yafashwe ashinjwa kuba intasi y’u Rwanda ku butaka bwa Uganda, ndetse nawe akaba yari umwe mu bayoboke b’itorero ADEPR/Uganda.

Rwagasore we yavuze ko yari amaze imyaka 10 aba muri Uganda, aho yakoraga mu kigo cy’amashuri.

Avuga kandi ko we yari yagiye muri Uganda anyuze mu nzira zitemewe n’amategeko, ariko ko akigerayo yagerageje gushaka ibyangombwa bimwemerera kuhaba no kuhakorera akaba yari yarabibonye.

Aba bagabo bombi bagejejwe mu Rwanda ku Cyumweru tariki ya 14 Nyakanga 2019.

Bavuga ko aho muri Uganda umutekano w’Abanyarwanda bariyo ari mucye cyane, bagasaba abandi Banyarwanda batekereza kujya gushakirayo amahaho ko bajya bitonda.

Rwagasore yakoreraga ikigo cy’ishuri

Rwagasore agira ati “Rwose nkurikije ibyo nabonye yo, ndasaba umuntu wese wumva yajya muri Uganda gushakira yo amahaho, ko yajya yitonda akagenda ari uko yizeye ko afite ibyangombwa byose byuzuye, kuko umutekano w’abanyamahanga cyane cyane Abanyarwanda muri Uganda wifashe nabi cyane”.

Basaba kandi ko bafashwa kugira ngo imitungo yabo n’imiryango yabo yasigaye muri Uganda ibashe kubasanga mu Rwanda, kuko batewe impungenge n’umutekano wabo.

Inama yabereye muri Angola ihuza abakuru b’ibihugu by’u Rwanda, Angola, Uganda na DR Congo

Iyo nama yabereye i Luanda muri Angola kuri uyu wa gatanu tariki 12 Nyakanga 2019. Perezida wa Angola, João Lourenço, ni we wayitumiyemo bagenzi be bandi batatu, ari bo Perezida w’u Rwanda Paul Kagame, Perezida wa Uganda, Yoweri Museveni, na Perezida wa DR Congo Antoine Félix Tshisekedi, baganira ku ngingo zitandukanye.

Abo bakuru b’ibihugu barebeye hamwe muri rusange uko akarere ibyo bihugu biherereyemo gahagaze, barebera hamwe n’uburyo bwo kurushaho guteza imbere umubano mwiza hagati y’ibyo bihugu bine.

Bagarutse ku kamaro k’ibiganiro bihoraho, bikozwe mu bwisanzure no mu mucyo, nk’inkingi y’ingenzi mu kubaka amahoro n’umutekano hagati y’ibyo bihugu. Ibyo biganiro kandi abari muri iyo nama basanze byagira uruhare rukomeye mu iterambere ry’ubukungu bw’akarere muri rusange.

Ku ruhande rwa Repubulika ya Demokarasi ya Congo, abakuru b’ibihugu bari muri iyo nama bashimiye igihugu cya DR Congo kubera ingufu kirimo gushyira mu gushakira umutekano igihugu cyose, ariko bamagana imitwe yitwaje intwaro ikomeje kurangwa mu mashyamba ya Congo, ikabangamira inzira y’amahoro muri icyo gihugu, igahungabanya n’umutekano w’ibihugu bituranye na Congo.

Baganiriye no ku kibazo cy’icyorezo cya Ebola kimaze iminsi kivugwa muri Repubulika ya Demokarasi ya Congo, bashima ingufu Congo ishyira mu guhashya icyo cyorezo ifatanyije n’abafatanyabikorwa b’icyo gihugu batandukanye.

Abakuru b’ibihugu bishimiye ibyavuye mu nama ya 12 idasanzwe y’Umuryango wa Afurika yunze Ubumwe, inama yahuje abakuru b’ibihugu na za Guverinoma, ikaba yarabaye tariki 07 Nyakanga 2019 ibere i Niamey muri Niger. Iyo nama yari igamije gutangiza isoko rusange rya Afurika (African Continental Free Trade Area). Iryo soko ryitezweho koroshya ubucuruzi hagati y’ibihugu bya Afurika.

Mu bindi abo bakuru b’ibihugu bishimiye harimo umutekano ukomeje kugenda urangwa mu bihugu byo mu karere ibyo bihugu biherereyemo, bavuga ko uwo mutekano ugira uruhare mu iterambere ry’ibyo bihugu.

Abakuru b’ibihugu bari muri iyo nama yabereye muri Angola kuri uyu wa gatanu biyemeje gukomeza gushaka uko umubano warushaho kuba mwiza hagati y’ibihugu. Biyemeje kandi kujya bihutira gukemura amakimbirane yaramuka avutse hagati y’ibyo bihugu, hakoreshejwe inzira z’amahoro zumvikanyweho kandi amakimbirane agakemurwa mu buryo bwa kivandimwe.

Ibyo bihugu byiyemeje no gufasha Repubulika ya Demokarasi ya Congo kurandura icyorezo cya Ebola, no kwirinda ko cyasakara kikagera no mu bihugu bituranye n’ahabonetse Ebola muri Congo.

Ku byerekeranye n’umubano w’u Rwanda na Uganda udahagaze neza muri iki gihe, abari muri iyo nama bashimye ubushake bw’u Rwanda na Uganda bwo gukomeza kuganira ku bibazo ibyo bihugu bifitanye, no kubishakira umuti urambye.

Abari muri iyo nama bashimye ubushake bw’ibihugu bya Angola na Repubulika ya Demokarasi ya Congo byiyemeje guhuza ibiganiro hagati y’u Rwanda na Uganda.

Abakuru b’ibihugu bya Uganda, RD Congo n’u Rwanda bashimye Perezida wa Angola João Lourenço n’abaturage ba Angola muri rusange kubera umutima mwiza bagaragaje mu kwakira abashyitsi bari bitabiriye iyo nama.

Amafoto: Urugwiro

Gakwerere yarekuwe amaze amezi atatu afungiye muri Uganda

Gakwerere avuga ko yagiye muri Uganda tariki 07 Mutarama 2019 agiye mu kazi yari asanzwe akorayo k’ubworozi. Tariki 13 Werurwe 2019 ubwo yari mu nzira agaruka mu Rwanda avuye mu Majyaruguru ya Uganda mu Karere ka Gulu, yuriye imodoka araza, bageze ahitwa Ruhwero, imodoka ibapfiraho, bayivamo kugira ngo ibanze ikorwe bajya gushaka icyo kunywa.

Aho muri resitora yasanzemo abantu, bumva avuga ikinyarwanda kuri telefoni ubwo umugore we yari amuhamagaye. Arangije kuvugira kuri telefoni ngo baramwegereye baramusuhuza bamubaza aho ava n’aho ajya, ababwira ko avuye ku kazi, akaba atashye iwe mu rugo mu Rwanda.

Ngo baramubwiye ngo ubwo imodoka yari arimo yapfuye, aze bamugeze i Kampala aho ategera imodoka zijya mu Rwanda. Gakwerere yarabyemeye ajya mu modoka yabo ariko abona yisanze mu kigo cya gisirikare ahitwa Kireka muri Kampala, batangira kumubaza igihe yatorokeye igisirikare.

Ati “Mu by’ukuri, nitwa jye sindakora igisirikare. Igisirikare si ukwiba ngo ngikoze byaba ari ishyano ariko sinigeze ngikora kuko wenda ayo mahirwe ntayabonye.”

Gakwerere yabasobanuriye ko atigeze ajya mu gisirikare ariko banga kubyumva, bamukuramo inkweto bamwaka n’igikapu yari afite, abisiga aho, barangije bamwuriza imodoka bamujyana ahitwa Makindye asangayo abandi Banyarwanda bagera kuri 40 bafungiweyo. Bamwe ngo bari intere kubera gukubitwa abandi bakaba bafite ibikomere ntibinaborohere kubona ubuvuzi.

Gakwerere avuga ko hashize amezi atatu afungiweyo akaba ari we wa mbere bafunguye muri abo bandi bose bahafungiwe.

Icyo gihe ahafungiye ngo hari abantu bavugaga ikinyarwanda bakamwegera bakamushishikarizaga kujya ku ruhande rwabo niba ashaka kuba muzima. Icyakora ngo yayoberwaga abo ari bo kuko yabonaga afungiye ahasanzwe hakorera inzego z’umutekano za Uganda, mu gihe abandi bo basaga n’Abanyarwanda, kuko harimo uwamubwiye ko ari uwo mu Mutara, undi amubwira ko ari uwo hakurya yo mu Mutara i Ntungamo.

Ngo yabazaga n’icyo azira ntibamubwire, dore ko yambutse muri Uganda afite ibyangombwa anyuze no mu nzira zemewe.

Hagati aho abamufashe tariki 13 Werurwe bavugaga ko ari Abanyarwanda ntiyongeye kubabona.

Avuga ko Abanyarwanda ari bo bafata abandi Banyarwanda bakabashyikiriza inzego z’umutekano za Uganda ngo zibafunge.

Gakwerere yarafunguwe ariko yibwa amafaranga ye

Tariki 18 Kamena 2019, umunyankole umwe w’umu-Captain mu ngabo za Uganda ngo yaramuhamagaye hanze amubaza niba uwamurekura yataha, Gakwerere yikiriza atazuyaje ko yahita ataha kuko n’ubundi bamufashe ari mu nzira ataha.

Bukeye bwaho ku wa gatatu tariki 19 Kamena, uwo musirikare yaragarutse, asaba ko bamusohora, baramurekura arataha.

Ngo bamusubije n’igikapu yari afite ariko asanga baramutwariye amafaranga.

Ati “Biteye isoni kubona bajya mu gikapu cy’umuhashyi nkanjye bagakuramo utwari turimo.”

Gakwerere avuga ko yari afitemo ibihumbi 712 by’Amashilingi ya Uganda, ni nk’ibihumbi 176 by’Amafaranga y’u Rwanda, batwara ibyo bihumbi 700 basigamo ibihumbi 12, ni ukuvuga ko bamusigoye abarirwa mu bihumbi bibiri na magana icyenda (2,900) by’amafaranga y’u Rwanda.

Indangamuntu ye na yo yarayibonye ariko akandiko k’inzira babahera ku mupaka asanga nta karimo mu byo bamusubije.

Abamurekuye ngo baramutwaye bamugeza i Kampala ahakorera imodoka za Trinity ziza mu Rwanda, agezeyo atekerereza abakozi b’izo modoka ibyamubayeho, bamugira inama yo kujya kuri Ambasade y’u Rwanda muri Uganda, barahamwereka ajyayo, Ambasade imufasha kugaruka mu Rwanda.

Mu iyicarubozo avuga ko yakorewe harimo kuba yaramaze iminsi itatu atarya, atanywa amazi, atanakaraba. Afite ku mubiri ibimenyetso bigaragara ko yarwaye indwara ziterwa n’umwanda, akavuga ko yazirwariye aho yari afungiwe. Ngo babimukoreraga bashaka ko azemera ku ngufu ko yahoze mu gisirikare, kandi we ngo ntacyo yigeze ajyamo.

Gakwerere atekereza ko hari umutwe urwanya Leta y’u Rwanda ukorana n’inzego z’umutekano za Uganda kuko bafata Abanyarwanda biganjemo abasore n’abagabo bakiri bato bakabasaba kujya ku ruhande rwabo.

Umutwe w’iterabwoba wa Kayumba Nyamwasa wa RNC umaze igihe uvugwaho gukorana n’inzego z’umutekano za Uganda mu bikorwa bigamije guhungabanya umutekano w’u Rwanda.

Gakwerere atekereza ko ayo mafaranga basanze mu byangombwa bye bakayatwara ashobora kuba ari yo yatumye bamurekura. Ashimira Ambasade y’u Rwanda yamufashije kugaruka, akagira inama abandi Banyarwanda bari mu Rwanda kumvira inama Leta y’u Rwanda ibagira yo kwirinda kujya muri Uganda mu gihe hakiri ibibazo byo guhohotera Abanyarwanda bajyayo, ndetse ntibanashyikirizwe ubutabera, ahubwo bagakorerwa ihohoterwa n’iyicarubozo, ari nako bakoreshwa imirimo y’agahato.

Hashize iminsi harangwa umubano utari mwiza hagati y’u Rwanda na Uganda. U Rwanda rumaze igihe rushinja Uganda kuba hari Abanyarwanda benshi bafungiye muri gereza zo muri Uganda mu buryo budakurikije amategeko.

Mu kiganiro cyasohotse mu gitangazamakuru cyo mu Budage cyitwa TAZ ku wa kane tariki 20 Kamena 2019, Perezida Kagame yavuze ko intambara idashoboka kuko ibihugu byombi bizi neza ko byayihomberamo.

Yagize ati “Abantu batinya intambara hagati yacu. Simbona intambara hagati y’u Rwanda na Uganda kuko ntekereza ko igihugu cya Uganda kizi uburyo intambara yangiza byinshi bihenze. Ntidushaka kugera kuri iyo ntera kuko buri wese yabihomberamo.”

Perezida Kagame kandi yatangaje ko ashyigikiye Igihugu cya Repubulika ya Demokarasi ya Congo cyasabye kwiyunga ku bihugu bigize Umuryango wa Afurika y’Iburasirazuba (EAC). Igihugu cya Tanzania na cyo cyamaze gutangaza ko gishyigikiye ubusabe bwa Repubulika ya Demokarasi ya Congo.

Mu gihe cyaramuka cyemerewe, cyaba kibaye umunyamuryango wa karindwi wa EAC kuko cyakwiyongera ku bidi bihugu bitandatu bisanzwe muri uwo muryango ari byo u Rwanda, u Burundi, Uganda, Tanzania, Kenya, na Sudani y’Amajyepfo.

Niyomucunguzi Jean Baptiste asaba Abanyarwanda kutongera kujya muri Uganda

Uwo mugabo w’imyaka 25, avuga ko yageze muri Uganda ku itariki 03 Kamena 2018, bamufata bukeye bw’aho ari mu nzira agaruka ari kumwe n’abandi, babambura indangamuntu n’utujeto (Jeton) bari bambukiyeho, ni ko gutangira guhura n’ibibazo mu gihe bari bajyanywe no guhaha gusa.

Niyomucunguzi avuga ko abapolisi ba Uganda bakimara kubafata, babatse mafaranga menshi kugira ngo babarekure barayabura bahita bajya kubafunga.

Agira ati “Badufashe turimo kugaruka mu Rwanda, abapolisi ba Uganda badusaba amafaranga menshi ngo baturekure, badusabaga imitwaro 20 tubabwira ko ntayo dufite. Bahise batujyana ku mucamanza, adukatira amezi 18 ariko batugabanyirizaho atandatu, bahita badufungira muri gereza ya Kiburara, turateseka kubera kuduhingisha tutaruhuka”.

Imitwaro 20 bisobanura ibihumbi 200 by’Amashilingi ya Uganda, ni ukuvuga abarirwa mu bihumbi 48 mu mafaranga y’u Rwanda.

Uwo mugabo bigaragara ko ibirenge bye byari byarashishutse cyane, akavuga ko byaterwaga n’inkweto bambaraga bagerageza kwirinda amahwa yo mu mirima.

Ati “Ibirenge byashishuwe n’uko twahoraga twambaye bottes (Inkweto ndende zambarwa ahantu hari amazi) twirinda amahwa kuko twahoraga mu bisambu duhinga. Si n’izo baduhaga, twebwe twarazishakiraga, utazibonye ibirenge bye byaratobagurikaga kandi nta mpuhwe bamugiriraga”.

Niyomucunguzi yarekuwe ku itariki ya 15 Kamena 2019, yirwanaho kugira ngo agere mu Rwanda, agasaba buri Munyarwanda kudatekereza kujya muri icyo gihugu.

Gusura mushiki we byamuviriyemo gufungwa

Uwitwa Nizeyimana Samuel wo mu Karere ka Musanze warekuriwe rimwe na Niyomucunguzi nubwo batari bafungiye hamwe, we ngo yari yagiye muri Uganda gusura mushiki we utuyeyo, aza gufatirwa ahitwa Kisoro na polisi y’icyo gihugu.

Ngo bahise bamugeza imbere y’umucamanza, amuhamya icyaha cyo kwinjira muri icyo gihugu nta byangombwa mu gihe we avuga ko yinjiye abifite bakabimwambura. Yahise akatirwa amezi 18 ariko na we bamukuriraho atandatu afungwa amezi 12.

Nizeyimana Samuel ngo yababajwe n’inkoni yakubitiwe muri gereza

Nizeyimana avuga ko yababajwe cyane n’ukuntu babahingishaga buri munsi ariko ntibite ku mibereho yabo.

Ati “Twabyukaga saa cyenda z’ijoro, tukajya hanze gukaraba mu maso hanyuma tugafata amasuka tukajya mu murima. Twahingaga kuva saa kumi n’ebyiri za mu gitondo kugeza saa kumi n’ebyiri z’umugoroba nta cyo kurya baduhaye ndetse nta n’amazi yo kunywa, ibyo bikaba buri munsi”.

Arongera ati “Muri gereza nari mbayeho nabi cyane kubera itotezwa, iyo twabaga tugiye guhinga bafataga Abagande turi kumwe bakabaha inkoni zikoze mu nsinga bakagenda badukubita. Kubera twanakoraga cyane ntawutwitayeho, hari Abanyarwanda babiri twari dufunganywe bapfuye”.

Akomeza agira inama Abanyarwanda yo kwirinda kujya muri Uganda n’ubwo baba bafite ibyangombwa.

Ati “Ndashishikariza Abanyarwanda bafite umutima wo kujya muri Uganda kubireka kuko nta cyiza kiriyo. Nubwo waba ufite ibyangombwa barabikwambura bakabijugunya bakakwereka ko ntacyo umaze mu gihugu cyabo, ubu nta cyangombwa na kimwe mfite”.

Nizeyimana avuga ko aho yari afungiye yari kumwe n’abandi Banyarwanda benshi bagiye bafatwa mu bihe bitandukanye, ku buryo ngo yabonaga bari bageze kuri 300.

Leta y’u Rwanda ntihwema kugaragaza ko hari Abanyarwanda benshi bafungiye ahantu hatandukanye muri Uganda mu buryo butemewe n’amategeko, ikanasaba abari mu gihugu kureka kujyayo kuko bagirirwa nabi.

Ambasaderi Olivier Nduhungirehe, Umunyamabanga wa Leta muri Minisiteri y’Ububanyi n’amahanga ufite mu nshingano ze Umuryango wa Afurika y’Iburasirazuba, yihanganishije abo Banyarwanda n’imiryango yabo kubera akaga bahuriye na ko muri Uganda.

Yagize ati “Uko gufungwa mu buryo budakurikije amategeko, uko gufatwa nabi ndetse no kwirukanwa, ni zo mpamvu Guverinoma y’u Rwanda ishingiraho igira abaturage bacu inama yo kwirinda kujya muri Uganda.”

Ambasaderi Nduhungirehe yasabye Igihugu cya Uganda guhagarika imikoranire yacyo n’imitwe y’iterabwoba irimo na RNC, igira uruhare mu gufunga mu buryo butemewe Abanyarwanda no kubakorera iyicarubozo.

U Rwanda kandi rusaba ko Abanyarwanda bafungiye muri Uganda bahabwa ubutabera bakaburanishwa ku byaha baba bakekwaho.

U Rwanda ruvuga ko abo Banyarwanda birukanywe mu buryo bugayitse atari aba mbere bahohotewe n’Igihugu cya Uganda. U Rwanda rushinja Uganda kuba hari Abanyarwanda babarirwa mu magana kandi bazwi na Guverinoma ya Uganda bishwe, abandi batabwa muri yombi, bafungirwa ahantu habi, bakorerwa iyicarubozo, ndetse ntibemererwe no gusurwa.

U Rwanda kandi ruvuga ko ikibabaje ari uko ibibazo abo Banyarwanda bahurira na byo muri Uganda bidasuzumwa hakurikijwe inzira ziteganywa n’amategeko, ahubwo bagahambirizwa mu buryo budakwiriye. Ni mu gihe u Rwanda rwasabye inshuro nyinshi ko ibyo bibazo byakemurwa binyuze mu nzira ya Dipolomasi ariko Uganda ntishake kubyumva.

Ishimwe Moses yasobanuye akaga gakomeye yahuye na ko muri Uganda

Agarutse mu Rwanda nyuma y’amezi ane yari amaze afunzwe n’urwego rw’iperereza rw’Igisirikare cya Uganda, CMI(Chieftaincy of Military Intelligence), hakaba ngo harakoreshejwe amashilingi ya Uganda angana na miliyoni makumyabili, harimo n’ayasabwe nka ruswa kugira ngo arekurwe.

Ishimwe yabaga mu gihugu cya Uganda kuva mu mwaka wa 2012. Amashuli ye ni ho yayize kandi yari umucuruzi. Avuga ko yabaga mu gihugu cya Uganda afite ibyangombwa bimwemerera kuhaba, akaba yarakoraga akazi ariko akunda no gusengera muri Zoe Fellowship Ministries.

Avuga ko yafashwe ari mu materaniro i Bugoloobi muri Kampala ubwo yasohokaga ajya kwitaba uwari umuhamagaye kuri telefoni igendanwa. Kuri uwo mugoroba, ngo yambitswe amapingu ajyanwa gufungirwa ku cyicaro cya CMI.
Mu kiganiro yagiranye n’itangazamakuru, Ishimwe, mu ijwi rituje, bigaragara ko nta ngufu afite kubera ibyamubayeho, yasobanuye inzira y’umusaraba yanyuzemo ubwo yafatwaga tariki ya 22 Ukuboza 2018.

Yagize ati “Nari nsohotse aho twari mu materaniro, kubera urusaku rw’imiziki nsohoka mu gipangu. Nari ngiye kwitaba kuko ni mama umbyara wari umpamagaye, maze umuntu araza arambaza ngo mfite ibyangobwa?”

Ati “Baramfashe mbabwira ko mbifite, banyambika amapingu, ndetse n’igitambaro mu mutwe ngo ntabona aho banjyanye i Mbuya kumfunga, ngo ni ho nari kubarizwa, narakubiswe ingumi n’ibindi. Muri ibyo byose naziraga ko naba ndi intasi y’u Rwanda muri Uganda, ngo hari abasirikari bakuru dukorana. Rwose sinigeze mba umusirikari kandi sinari intasi”.

Akomeza kandi avuga ko bararaga bambitswe amapingu, bakarara hasi bagipfutse mu maso, bumva gusa urusaku rw’amazi y’ikiyaga. Ibi byamuviriyemo uburwayi, asaba kuvuzwa, nyuma ajyanwa i Kileka.

Ishimwe ati “Nasabaga ko bamvura, ariko haza umuntu arambwira ngo ese waba uzi ko ntakuvuye nakwandika urupapuro rw’uko wapfuye nkarwoheraza mu Rwanda? Nyuma navanywe aho banyerekeza muri gereza ya Luzira, nza no gufungurwa”.

Nyuma y’iminsi itatu nibwo umuryango we wabashije kumenya ko Ishimwe Moses yaba yarafashwe afunze.

Mukuru we witwa Irumva Fred Rutare avuga ko bakimara kumenya ko umuvandimwe we yabuze, babimenyesheje Minisiteri y’Ububanyi n’Amahanga y’u Rwanda, na yo imenyesha ambasade y’u Rwanda muri Uganda batangira gukurikira no gushakisha Ishimwe.

Irumva agira ati “Nyuma y’iminsi itatu murumuna wanjye afatiwe muri Uganda, twifashishije inzego za Leta y’u Rwanda, n’ inshuti ziriyo ngo turebe noneho uko yafungurwa dore ko nta n’icyaha yari afite. Twatanze amashilingi miliyoni eshatu n’igice dushaka umwunganira mu mategeko, dutanga n’andi miliyoni 15 kugira ngo asomerwe urubanza.”

Yakomeje ati “Nyuma icyatangaje amaze gufungurwa by’agateganyo, umushinjacyaha yadusabye ruswa y’amashilingi miliyoni ebyiri ngo bamuhanagureho icyaha. Twarabikoze kugira ngo umuvandimwe wanjye abashe gutaha mu Rwanda”.

Ishimwe yafashwe tariki 22 Ukuboza 2018, afungurwa tariki 11 Werurwe 2019. Yageze mu Rwanda mu cyumweru gishize ku wa kane.

Abanyarwanda bakorera muri Uganda kimwe n’ababayo bakomeje kugaragaza ko bene ibi bibazo bikibabangamiye kuko nibura buri munsi ngo hafatwa Umunyarwanda agafungwa bamubwira ko ari umukozi(intasi) y’u Rwanda.

Kamuzizi agira inama Abanyarwanda yo kudatekereza kujya muri Uganda muri iyi minsi

Uwo mukobwa w’imyaka 21 wigaga mu mashuri yisumbuye, avuga ko yagiye muri Uganda tariki 25 Kamena 2018 ajyanywe no gusura mukuru we utuyeyo, bamaze kwambuka umupaka bageze ahitwa Nyakabande, abapolisi ngo bahagarika bisi bari barimo bakuramo Abanyarwanda bose uko bari 15 hanyuma babwira umushoferi ngo akomeze bo barasigara.

Mu masaha y’umugoroba ngo bapakiwe imodoka bajyanwa kuri sitasiyo ya Polisi ya Kabare, bahamara iminsi ibiri hanyuma bajyanwa mu rukiko bashinjwa kwinjira mu gihugu nta byangombwa bafite, bakatirwa gufungwa umwaka n’amezi atatu ariko ngo ufite miliyoni imwe n’igice y’amashilingi ya Uganda bamubwiye ko ayatanze bamurekura, gusa bose ngo nta wari uyafite.

Mu buhamya bwa Kamuzizi, avuga ko bose bahise babafunga bamara amezi ane aho i Kabare hanyuma baza kubimurira ahandi.

Agira ati “Twahafungiwe amezi ane twirirwa duhinga, nyuma batwimurira muri gereza iri ahitwa Mbarara, batangira kutubaza ubwoko bwacu tubabwira ko turi Abanyarwanda. Twahasanze abandi Banyarwanda bahafungiye batubwira ko tuzakora imirimo ivunanye ariko badusaba kwitonda ntiduhangane batazatwica”.

Aho muri gereza ya Mbarara ngo ni ho babakoreshaga imirimo myinshi ivunanye ariko kandi bakanabicisha inzara.

Ati “Nahingiraga abasirikare nkanabamesera imyenda, bakanyereka igiti kinini cyane bakampa ishoka nkagitema ndetse nkanacyasa. Iyo yari imirimo ya buri munsi kuva saa kumi n’imwe za mu gitondo kugeza saa kumi z’umugoroba, nta kurya, mu gitondo watinda kubyuka kubera umunaniro bakagukubita”.

Avuga ko n’iyo babaga babagaburiye babahaga kawunga yaboze irimo udusimba ku buryo bayiryaga batayireba banga kwicwa n’inzara.

Indi mirimo bakoraga uretse guhinga ngo kwari ukwita ku nka n’ingurube zororerwaga muri gereza, kwahira ibyatsi mu gishanga, ngo hakaba hari na mugenzi wabo wapfuye azira iyo mirimo.

Kamuzizi ati “Hari umukobwa w’inshuti yanjye witwaga Nirere Joselyne wakomokaga i Rwamagana wapfuye bamujyanye kwahira ibyatsi mu gishanga, yatebeye mu byondo arabura. Ntibanatinze bamushakisha ngo akurwemo, baravuze ngo ubwo ari Umunyarwanda twigendere, nta gaciro twabaga dufite”.

Avuga kandi ko na we yahakuye uburwayi, ati “Twajyaga mu byuzi bororeragamo amafi twambaye akenda k’imbere gusa, tukajya gufata amafi barya. Muri iyo sayo twirirwagamo ni ho nanakuye uburwayi bw’amabere, navuga ko ndwaye ntari bujye guhinga abasirikare bagahita bankubita”.

Kamuzizi avuga ko aho bari bafungiye bari Abanyarwanda 23 ariko batatanye, kandi bose ngo bakorerwaga iryo yicarubozo ririmo ahanini kwicishwa inzara kandi bakora cyane.

Uwo mukobwa yarekuwe ku itariki ya 4 Kamena 2019, akavuga ko imodoka ya gereza ya Mbarara yamugejeje i Kabare we na bagenzi be babiri, nta cyangombwa na kimwe bafite kuko batabibasubije, yigira inama yo guhamagara se amwoherereza itike abona kugaruka mu Rwanda.

Kamuzizi agira inama Abanyarwanda, ati “Ndabagira inama yo kwirinda kujya muri Uganda kuko nta rukundo badufitiye na ruto”.

Paul Muhigirwa wari uzwi muri Uganda nka Apôtre Muhirwa araburira abashaka kujyayo ko inzira zitakiri nyabagendwa

Baraburira umuntu wese wifuza kujya muri Uganda ko icyo gihugu kitakigendwa, ndetse ko Umunyarwanda ufatiweyo wese iyo atishwe ngo afungirwa mu mwijima w’icuraburindi cyangwa mu muyaga n’imbeho.

Ngo habaho no kumenwaho amazi akonje buri kanya kugira ngo umuntu ufungiwe muri ubwo buvumo adasinzira. Avuga ko barazwa hasi ku isima yuzuye amazi, ubundi bakicishwa inzara n’umwanda.

Muhigirwa Paul wageze muri Uganda akitwa Apôtre Paul Muhirwa, avuga ko yari umushumba mu Itorero ’Community Church’ mu Karere ka Kanungu, n’ubwo ngo yarivuyemo mu mwaka ushize.

Avuga ko yafashwe yitwa maneko w’u Rwanda ku itariki 11/4/2019 ajyanwa gufungirwa muri gereza z’Igisirikare cya Uganda(CMI), aho ngo yakomeje yimurirwa ahantu hatandukanye kandi we n’abandi bari kumwe ngo bajyanwaga bapfutswe mu maso.

Ati "Umusirikare wamfashe yaje ansanga ku muturanyi wanjye dusangira icyayi. Yarambajije ati ‘Kagame yagutumye iki?’ Kuko nari ntunguwe, ntacyo namushubije, yahise anjyana".

"Ubu undebye wasanga mfite inda (udusimba duterwa n’umwanda), hari n’abandi benshi twagiye duhurira muri izo gereza. Niboneyeyo Abanyarwanda bagera nko muri 50, uwumva ahaze ubuzima bwe ni we wajya muri Uganda".

Muhirwa Paul akeka ko umuntu wamuvuganiye kugira ngo afungurwe, ngo yaba ari umuntu yabwirije "ubutumwa bwiza".

Imodoka za gisirikare za Uganda zaraye zimugejeje ku mupaka wa Kagitumba we na Mibungo Emmanuel w’imyaka 32, bakaba bakiriwe mu Rwanda n’ikigo gishinzwe imisoro n’amahoro (Rwanda Revenue Authority).

Mibungo Emmanuel na we yateshejwe umuryango we n’imitungo

Mibungo wagiye muri Uganda muri 2014 agamije gusura mwene wabo wari usanzwe atuyeyo, avuga ko ubuzima bwari bumaze kumuhira ku buryo ngo yari yarabaye umworozi w’inka, afite n’ikirombe cy’ubucukuzi bw’amabuye y’agaciro.

Ati" Nsizeyo umugore n’abana babibiri, sinzi ko nzongera kubabona, sinshobora kumenya n’uwasigaranye imitungo yanjye".

"Abadufata baravuga ngo amafaranga dufite ni ayo Kagame aduha, twamara kurengwa tugatangira kuneka".

Mibungo uvuga ko yafungiwe muri Uganda kuva tariki 14 Mata 2019, yibutse bagenzi be asize muri gereza barimo uwitwa Karangwa wari umuyobozi w’ishuri.

Ati "Hari n’undi witwa Edmond w’umugogwe, Damascene w’umunya Cyangugu ukora akazi k’uburobyi, undi ntibuka ariko ni mwarimu w’aba ADEPR ndetse n’umupasteri muri iryo torero akaba ari umusaza w’imyaka nka 46".

Abanyarwanda barimo koherezwa mu Rwanda baravuga ko bahemukirwa na bene wabo bo mu mutwe wiyita RNC wa Kayumba Nyamwasa, uvugwaho gukorana n’Urwego rw’ubutasi rw’igisirikare cya Uganda(CMI).

Umuyobozi w’Akarere ka Nyagatare (iburyo) aganira n’abari bahagarariye Uganda muri icyo gikorwa cyo guhererekanya umurambo

Ibi byagarutsweho kuri uyu wa mbere tariki 27 Gicurasi 2019 ubwo Leta ya Uganda yashyikirizaga Leta y’u Rwanda ku mupaka wa Gatuna, umurambo w’Umunyarwanda warashwe nyuma yo kugerageza guhangana n’inzego z’umutekano zari zimuhagaritse zimukekaho kwinjiza mu Rwanda ibicuruzwa mu buryo butemewe.

Umudepite uhagarariye agace ka Rukiga muri Uganda witwa Kamusiime Caroline ni we wari kumwe n’abandi bayobozi bo muri Uganda baherekeje umurambo w’umunyarwanda wagombaga kugezwa mu gihugu cye.

Umurambo w’Umunyarwanda aha wari urimo ukurwa mu modoka yo muri Uganda yawuzanye

Umuyobozi w’Akarere ka Nyagatare, David Claudien Mushabe (ari na we uyobora agace uyu Munyarwanda yarasiwemo mu Murenge wa Tabagwe ubwo yashakaga kwambutsa magendu ayizana mu Rwanda, ariko abo bari kumwe bakamuhungishiriza muri Uganda nyuma yo kuraswa) yibukije abayobozi ba Uganda ko u Rwanda rutakwemerera buri wese ushaka kugira icyo azana binyuranyije n’amategeko, kandi abibutsa ko hari n’abandi banyarwanda bakigirirwa nabi muri Uganda na bo bakeneye gutaha iwabo.

Mushabe yagize ati “Kuki mutuzanira abapfuye, ntimuduhe abazima bafunzwe mu gihugu cyanyu bakomeza gukorerwa iyicarubozo?”

Abahagarariye Polisi mu bihugu byombi na bo bagiranye ibiganiro

Leta y’u Rwanda ikomeza kugaragaza ko hari Abanyarwanda benshi baba mu gihugu cya Uganda bakomeza guhohoterwa n’inzego z’ igisirikare cya Uganda zishinzwe iperereza.

Biteganyijwe ko umurambo w’uyu Munyarwanda ugomba gushyingurwa mu Karere ka Nyagatare. Impande zombi zemeranyije gukomeza iperereza ryimbitse kuri iki kibazo.

Depite Caroline Kamusiime wo muri Uganda aganira na Mayor Mushabe Claudien w’Akarere ka Nyagatare

Abari bahagarariye Uganda barangajwe imbere na Depite Kamusiime Caroline, baje bari kumwe n’abahagarariye ibihugu byabyo n’imiryango mpuzamahanga muri Uganda

Amafoto: Roger Marc Rutindukanamurego

Bombi ni abaturage bo mu Mudugudu wa Gahamba, mu Kagari ka Tabagwe, mu Murenge wa Tabagwe mu Karere ka Nyagatare.

Aho bakomoka ni na ho hadutse ikibazo cy’umutekano muke mu ijoro ryo ku wa gatanu tariki 24 Gicurasi 2019, ubwo inzego zishinzwe umutekano z’u Rwanda zashyamiranaga n’abaketsweho kwinjiza mu Rwanda ibicuruzwa mu buryo butemewe babivanye muri Uganda, biviramo babiri kuraswa, bahasiga ubuzima.

Polisi y’u Rwanda iratangaza ko Samvura na Habiyambere bashimutiwe muri Uganda ahitwa Gasheke, ku ntera y’ikilometero kimwe n’igice (1,5km) uvuye ku mupaka w’u Rwanda kuri iki cyumweru tariki 26 Gicurasi 2019 mu ma saa sita n’igice z’amanywa. Ngo bari bagiye mu birori by’umubatizo w’umwana w’inshuti yabo yitwa Muhwezi Silver.

Abo Banyarwanda babiri mbere yo kwerekeza muri Uganda ngo bagiriwe inama na bagenzi babo yo kutajya muri Uganda kuko bashobora gushyira ubuzima bwabo mu kaga, ariko birengagiza izo nama, bafata icyemezo cyo kujyayo, banga gusuzugura inshuti yabo yari yabatumiye mu munsi mukuru.

Samvura na Habiyambere biyongereye ku rutonde rurerure rw’ibihumbi by’Abanyarwanda babayeho nabi mu magereza y’Urwego rw’Igisirikare cya Uganda rushinzwe Ubutasi (CMI).

Abafungiyemo ngo ntibemererwa gusurwa n’urwego ruhagarariye u Rwanda muri Uganda, ntibashobora guhabwa ubufasha mu by’amategeko, ndetse ngo ntibanajyanwa mu nkiko za Uganda ngo baburanishwe.

Minisitiri w’Ububanyi n’Amahanga n’Ubutwererane, Dr Richard Sezibera, abinyujije kuri Twitter, yavuze ko nta bashinzwe umutekano b’u Rwanda bambutse umupaka

Itangazo rya Minisiteri y’Ububanyi n’Amahanga n’Ubutwererane y’u Rwanda rivuga ko iyo Minisiteri yabonye ibaruwa yanditswe na Minisiteri y’Ububanyi n’Amahanga ya Uganda ku wa 25 Gicurasi 2019, ivuga ko hari ubwicanyi bwabereye ahitwa Kiruhura mu Karere ka Rukiga muri Uganda mu ijoro ryo ku wa 24 Gicurasi 2019.

Minisiteri y’Ububanyi n’Amahanga y’u Rwanda yavuze ko ibyatangajwe muri iyo baruwa atari byo kuko ikibazo cy’ubushyamirane (incident) cyabereye mu Kagari ka Tabagwe, mu Murenge wa Tabagwe, mu Karere ka Nyagatare, mu Rwanda.

Minisiteri y’Ububanyi n’Amahanga y’u Rwanda ivuga ko muri iryo joro ryo ku wa gatanu inzego z’umutekano z’u Rwanda zahagaritse umuntu wari winjije mu buryo butemewe ibicuruzwa mu Rwanda abivanye muri Uganda abitwaye kuri moto, abinyujije ahantu hatemewe.

Uwo muntu ngo yanze guhagarara, ahubwo abandi bantu barahurura baza kumutabara bitwaje imipanga, bashaka kugirira nabi izo nzego z’umutekano z’u Rwanda.

Mu kwirwanaho, abashinzwe umutekano ngo bararashe, amasasu afata abantu babiri, ari bo Umunyarwanda Kyerengye John Baptist n’undi witwa Nyesiga Alex waje kwitaba Imana nyuma.

Minisiteri y’Ububanyi n’Amahanga y’u Rwanda ivuga ko abari bagabye icyo gitero ku nzego z’umutekano z’u Rwanda bahise bambuka umupaka bahungira muri Uganda, bajyana n’abo bantu bari barashwe, bituma abashinzwe umutekano w’u Rwanda batabakurikira.

Mu guhunga kwabo ngo basize inyuma moto ifite Pulake (Plaque) RE 736 G n’ibicuruzwa yari yikoreye byari byinjijwe mu Rwanda mu buryo butemewe.

Ku wa gatandatu tariki 25 Gicurasi 2019, icyo kibazo cyaganiriweho hagati y’abahagarariye impande zombi, u Rwanda na Uganda, ibiganiro bibera ku mupaka uhuza ibihugu byombi.

U Rwanda rwari ruhagarariwe n’Umuyobozi w’Akarere ka Nyagatare, Mushabe David Claudien, naho Uganda yo ikaba yari ihagarariwe n’abayobozi mu Karere ka Rukiga barimo uwitwa Alex Kampikaho. Iyo nama kandi yari irimo n’abahagarariye inzego z’umutekano ku mpande z’ibihugu byombi.

Itangazo rya Minisiteri y’Ububanyi n’amahanga y’u Rwanda rivuga ko iyo nama yemeje ko ubushyamirane bwabereye ku butaka bw’u Rwanda.

Muri iryo tangazo, Guverinoma y’u Rwanda, ivuga ko yababajwe n’urupfu rw’abo baturage b’ibihugu byombi, ikaba yiteguye kwakira umurambo w’uwo munyarwanda uri muri Uganda. Guverinoma y’u Rwanda kandi izakomeza guharanira umubano mwiza hagati y’abaturage b’u Rwanda na Uganda, by’umwihariko abatuye ku mupaka w’ibihugu byombi.

Guverinoma y’u Rwanda yaboneyeho no gusaba ko habaho ubufatanye mu guhangana n’ibyaha byambukiranya imipaka.

Polisi y’u Rwanda na yo ibinyujije mu itangazo ryo ku wa gatandatu tariki 25 Gicurasi 2019, yabeshyuje amakuru akubiye mu itangazo ryashyizwe ahabona n’umuvugizi wa Polisi ya Uganda na bimwe mu bitangazamakuru byavugaga ko inzego z’umutekano zavogereye igihugu cya Uganda zikurikiranyeyo abo bantu.

Itangazo ryashyizweho umukono n’umuvugizi wa Polisi y’u Rwanda, CP John Bosco Kabera, rivuga ko inzego z’umutekano z’u Rwanda zizakomeza gukora kinyamwuga nk’uko ari byo bisanzwe bizirangwaho.

Minisitiri w’Ububanyi n’Amahanga w’u Rwanda, Dr Richard Sezibera, na we, abinyujije kuri Twitter, yavuze ko nta bashinzwe umutekano b’u Rwanda bambutse umupaka.

Fake news: no such thing happened. Detailed response in a few!! https://t.co/IFbsvtqeGf

— Richard Sezibera (@rsezibera) May 25, 2019

No crossing of borders.... https://t.co/TugdjYNGLx

— Richard Sezibera (@rsezibera) May 25, 2019

Iri ni ryo tangazo rya Minisiteri y’Ububanyi n’Amahanga y’u Rwanda:

Inkuru bijyanye:

Polisi y’u Rwanda iranyomoza amakuru yo kuvogera igihugu cya Uganda

Itangazo ryashyizwe ahagaragara na Polisi y’u Rwanda rivuga ko muri iryo joro inzego z’umutekano z’u Rwanda zari mu kazi kazo ko gucunga umutekano, zihagarika umuntu wari utwaye moto zimukekaho kwinjiza mu Rwanda ibicuruzwa mu buryo butemewe, ariko aho guhagarara, atangira guhangana no kwanga gukurikiza ibyo zamusabaga.

Abandi bantu ngo bahise baza bifatanya n’uwo muntu wari utwaye moto, bashaka guhangana n’inzego z’umutekano bifashishije imipanga, banagerageza guhungira muri Uganda. Byabaye ngombwa ko inzego z’umutekano z’u Rwanda zikoresha izindi mbaraga, zirasamo abantu babiri bahasiga ubuzima, umwe akaba yari Umunyarwanda, undi ari uwo muri Uganda.

Nyuma y’uko abo bantu bari bamaze guhungira ku butaka bwa Uganda, ngo nta kindi gikorwa cyongeye kubaho cyo kubakurikirana.

Abo bantu ngo basize iyo moto ndetse n’imyenda ya caguwa yari ipakiye.

Nyuma y’icyo gikorwa cyabaye, abayobbozi muri ako gace byabereyemo ku mpande z’ibihugu byombi, u Rwanda na Uganda, bahuye kuri uyu wa gatandatu tariki 25 Gicurasi 2019 kugira ngo bagenzure ibyabaye.

Uruhande rw’u Rwanda rwari ruhagarariwe n’Umuyobozi w’Akarere ka Nyagatare, Mushabe David Claudian na ACP Emmanuel Hatari, umuvugizi wa Polisi mu Ntara y’Iburasirazuba.

Uruhande rwa Uganda rwari ruhagarariwe n’abayobozi mu Karere ka Rukiga barimo Alex Akampikaho, CSP Byaruhanga n’Umuyobozi wungirije wa Polisi muri Kabare.

Abo bayobozi kandi baganiriye n’abaturage baturiye umupaka w’ibihugu byombi, babashishikariza kurangwa n’imibanire myiza.

Babasabye no kwirinda kwambutsa umupaka ibicuruzwa mu buryo butemewe, no kwirinda ubucuruzi bw’ibiyobyabwenge.

Itangazo rya Polisi y’u Rwanda rivuga ko hahise hatangira iperereza kuri uko gushyamirana kwabayeho.

Polisi y’u Rwanda kandi yabeshyuje amakuru akubiye mu itangazo ryashyizwe ahabona n’umuvugizi wa Polisi ya Uganda na bimwe mu bitangazamakuru byavugaga ko inzego z’umutekano zavogereye igihugu cya Uganda zikurikiranyeyo abo bantu.

Itangazo ryashyizweho umukono n’umuvugizi wa Polisi y’u Rwanda, CP John Bosco Kabera, rivuga ko inzego z’umutekano z’u Rwanda zizakomeza gukora kinyamwuga nk’uko ari byo bisanzwe bizirangwaho.

Minisitiri w’Ububanyi n’Amahanga w’u Rwanda, Dr Richard Sezibera, na we, abinyujije kuri Twitter, yavuze ko nta bashinzwe umutekano b’u Rwanda bambutse umupaka.

Fake news: no such thing happened. Detailed response in a few!! https://t.co/IFbsvtqeGf

— Richard Sezibera (@rsezibera) May 25, 2019

No crossing of borders.... https://t.co/TugdjYNGLx

— Richard Sezibera (@rsezibera) May 25, 2019

Aba Banyarwanda bari bafungiye muri Uganda bavuga ko bakorerwaga ibikorwa byinshi bibi

Ku wa 17 Mutarama uyu mwaka nibwo aba Banyarwanda bambutse umupaka wa Kagitumba bahawe agapapuro k’inzira kagira agaciro k’umunsi umwe bita ‘Jeton’.

Maniragaba Tharcisse avuga ko bahise bafatwa bajyanwa gufungirwa muri Ntungamo na ho bahava bajya gufungirwa ahitwa Nyarushange nyuma yo gukatirwa igifungo cy’amezi atatu bashinjwa kwinjira muri Uganda mu buryo bunyuranije n’amategeko.

Aba bagabo n’abasore bavuga ko bakoreshwaga imirimo y’ubuhinzi n’ubuyedi inkoni zibari ku mugongo.

Ati “Kwicara ni ugukubitwa, gucira ni inkoni, kurya ni igiti, mbega kubona umunyarwanda hariya ni nko kubona shitani. Twirirwaga duhinga, duterura amatafari inkoni zituri ku mugongo twaziruhukaga turyamye mu ijoro.”

Izi nkoni babyukirizwagaho, bakaziririrwaho, bakaziruhuka baryamye ngo zituma bamwe bifuza gutoroka.

Nizeyimana Mupenzi yemeza ko ngo ufashwe agerageza gutoroka atwikwa mu birenge kandi ntibimubuze gukubitwa no gukora.

Agira ati “Nzi babiri, bashatse gutoroka twagiye gukora. Barabahize babafashe abasirikare bahise bacana umuriro bashyiramo imihoro imaze gushyuha neza bayibatwikisha munsi y’ibirenge kandi bukeye ntibyatuma batabakoresha, nta mpuhwe bagira.”

Maniragaba Tharcisse asaba abandi banywarwanda bajya gushakira imibereho muri Uganda kubicikaho bagakorera iwabo kandi bakanyurwa n’iby’iwabo.

Ati “Ni kenshi twakoreraga muri Uganda tugataha iwacu ku mugoroba, none aho baduhindukiye, ndasaba uwatekerezaga kujyayo kubireka agakorera iwacu akazi karahari naho ashobora kwirukankira byinshi akahaburira ubuzima.”

Abo bantu uko ari batandatu, bose bakomoka mu tugari dutandukanye tw’Umurenge wa Matimba twegereye umupaka nka Cyembogo, Kanyonza na Kagitumba.

Bose bafatiwe umunsi umwe kuko bakoraga akazi kamwe ko kubumba amatafari ahitwa Sofia, mu isantere yegereye umupaka wa Mirama hills na Kagitumba mu Rwanda.

Aba bemeza ko aho bari bafungiye i Ntungamo na Nyarushange basizeyo abandi banyarwanda bagera ku 100 uretse ko ngo hari n’abajyanwa gufungirwa i Mbarara.

Uyu mugabo wabaye mu Ishyaka Riharanira Demokarasi (DP) mu 1995, ubu akaba ari umwarimu wigisha isomo ryitwa guverinoma n’amateka muri Kaminuza ya Leta iri i New York, yahunze igihugu nyuma yo gutotezwa kenshi n’Ingabo za Leta ya Uganda.

Kiwanuka, wari umunyamakuru wa “The Citizen and Munnansi” akaba n’umwanditsi mukuru wacyo, wahunze nyuma yo gufungwa inshuro nyinshi yita Perezida wa Uganda Yoweri Kaguta Museveni umubeshyi wabuvukanye, wamunzwe na ruswa wigize “Impfizi mu kiraro” akanaba gashozantambara.

Mu kiganiro na Prof. Kiwanuka, ku mugoroba wo ku wa 27 Werurwe 2019, yavuze ko iyo ugeze muri Uganda bwa mbere ushobora kwibwira ko abaturage ba Uganda bishimye, nyamara abanya-Uganda hafi ya bose bibera mu cyuka cy’icyoba cy’indengakamere cyazamuwe na Museveni n’akazu ke.

Nk’umunyamakuru n’umunyapolitiki, Prof. Kiwanuka akubwira Museveni na Guverinoma ye neza kuva Museveni akijya ku butegetsi mu 1986.

Gusa, ikiganiro twagiranye dukora iyi nkuru gitangirira hagati agihunga igihugu kuko ahagana mu 1995, Prof Kiwanuka yajyanaga neza n’ingengabitekerezo ya DP, bityo nk’umunyamakuru atangira gushyira ku karubanda ibikorwa bya Guverinoma ya Museveni bibangamira uburenganzira bwa muntu.

Icyo gihe Kiwanuka yanditse inkuru nyinshi ku bantu bafungirwaga mu bigo bya gisirikare, abafungirwaga ahantu hatazwi, uyu munsi yita “utuzu twihereye turi mu gihugu yose muri Uganda”.

Avuga ko izi nkuru zarakaje Guverinoma ya Museveni cyane maze igisirikare cya Uganda gitangira guhiga bukware Kiwanuka, maze inzira ye ibuditse itangira ubwo.

Agira ati “Twakoze ubutitsa noneho Museveni atangira kwibwira ko kudufunga cyari cyo gihano gikomeye kandi kugeza n’ubu ni ko akibyumva kuko niba wararebye mu cyumweru gishize ukuntu afata Umudepite wa Kyadondo, Hon Robert Cyagulanyi Sentanu uzwi nka Bobi Wine.

Akomeza agira ati “Ageza ijambo ku bakada be i Kyankwanzi yavuze ko Bobi Wine yasekuweho gato n’igisirikare.”

Ati “Kubera ibikorwa nk’ibyo nashyiraga ku karubanda, nagiye mfungwa inshuro nyinshi. Bashoboraga no kugufunga iminsi ibiri cyangwa itatu bagutera ubwoba ubundi bakakurekura kubera igitutu cy’Umuryango Mpuzamahanga.”

Kiwanuka avuga ko n’ubwo yafunzwe inshuro nyinshi ikibabaje ari uko nta na rimwe yigeze anakatirwa n’inkiko ko ahubwo wasangaga rimwe na rimwe abasirikare bagerageza kumuha ruswa batumwe n’Ubutasi bwa Gisirikare bwa Uganda (DMI) yaje guhinduka CMI bagamije kumupfuka umunwa.

Kugira igisirikare igikoresho kigamije imigambi mibisha

Prof. Kiwanuka avuga ko igisirikare cya Uganda cyahinduwe igikoresho Museveni yifashisha mu migambi ye mibisha muri Uganda no mu karere, afungira abantu hatanzwi ku buryo na Polisi nta makuru iba ibafiteho.

Ati “Hari abandi bantu benshi banyuze mu byo nanyuzemo. Bamwe muri twe bagize amahirwe yo kubisohokamo mu gihe hari benshi bishwe.”

Kiwanuka atanga urugero rw’umunyamakuru bakoranaga witwa Hadji Hussein Musa Njuki wafunzwe n’ibyo bikoresho bya Museveni, bamuzengurutsa mu bice byinshi bitandukanye muri utwo tuzu tutazwi bafungiramo abantu barangije bamujugunya kuri Sitasiyo ya Polisi.

Ati “Bakimugeza kuri Polisi yahise apfa kandi urutonde rw’abapfuye urupfu nk’urwo ni rurerure.”

Iyo avuga Museveni, Kiwanuka akomeza agira ati “Dufite umuntu utihanganira na gato abatavuga rumwe na Leta. Urugero, ni gute abenshi mu bari inshuti za Museveni bararanye rwantambi ku rugamba, abayobozi bakuru n’abandi batakiri kumwe na we? Bamwe barishwe abandi barafungwa.”

Atanga zimwe mu ngero z’abishwe n’abafunzwe muri ubwo buryo kandi bari inshuti za Museveni, Kiwanuka avugamo, Gen Kazini.

Avuga kandi ko Museveni akimara gufata ubutegetsi yahise ata muri yombi Dr Andrew Kayiira maze agejweje mu rukiko ku wa 20 Gashyantare 1987, Museveni ategeka ko ari umunyabyaha agomba guhanwa.

Akavuga ko ku wa 6 Werurwe muri uwo mwaka, Kayiira wari umuyobozi ukunzwe cyane mu gace ka Buganda yahise yicwa.

Agira ati “Museveni yahise yitumishwaho komisiyo ya Polisi ngo ikore iperereza ku kishe kayiira ariko kugeza n’ubu iryo perereza ntirirangira ngo bagaragaze icyo yazize kandi hashize imyaka 30.”

Akomeza avuga ko mu burya nk’ubu Museveni yishe Kaweesi, Ibrahim Abiriga, Anthony Sekweyama, Noble Mayombo wishwe arozwe, Francis Ayume n’abandi bari abayobozi bakomeye muri Uganda.

Ati “Nyamara iyo aba bareba Uganda bibwira ko igihugu gitekanye mu gihe abantu babayeho mu cyuka cy’icyoba. Nk’abadepite usanga baterwa ku nteko batiriwe banategereza ko basohoka.”

Akomeza agira ati “Hari umudepitekazi witwa Betty Namboze wagerageje kubuza Museveni guhindura Itegeko Nshinga ariko yakubiswe iz’akabwana, ajya kwivuriza mu Buhinde, agarutse arongera arafungwa aranakubitwa cyane…urabona nka Kizza Besigye uhozwa ku nkoni no muri gereza yari umuganga wihariye wa Museveni.”

Kiwanuka akavuga ko niba umuntu adashobora kwizera umuganga we, bigaragaza ko abantu bashwanye na Museveni haba muri Uganda no mu karere “ari bantu bagiye bakora ibintu bituma bagaragara kurusha Museveni.”

Museveni yifuza kuba impfizi imwe mu kiraro

Uyu munyapolitiki w’umunyamakuru akaba n’umwarimu muri kaminuza, agaruka ku myitwarire ya Museveni ku bandi bayobozi mu karere, no mu myaka yashize kuri Sudani y’Epfo.

Ati “Dufate nka John Garang. Naganiriye na bamwe mu bayobozi bayoborana na Museveni ku cyamuteranyije na John Garang babwira ko Museveni yari afitanye ibibazo n’abaturage bo mu bwoko bw’ Abacoli mu Majyaruguru ya Uganda kandi abenshi muri bo bari barahungiye mu Majyepfo ya Sudani.

Byongeye, hari abasirikare benshi ba Joseph Kony wamurwanyaga babaga mu Majyepfo ya Sudani noneho Museveni agashaka kohereza yo ingabo ze ngo zihabakure. Garang yamusabye kugirana imishyikirano na Kony akareka impunzi z’Abacoli kuko bigoye gutandukanya Abacoli n’abandi baturage bo mu Majyepfo ya Sudani.”

Kiwanuka akavuga ko byababaje Museveni kuko ku bwe yumvaga yari yarafashije Garang mu ntambara ku buryo yibwiraga ko ntacyo yakamubwira ngo acyange. Ibi ngo ni byo byatumye mu gihe Garang yari amaze gushinga imizi Museveni amwirenza.

Avuga ko Museveni yakoze ibishoboka byose kugira ngo amukureho amusimbuze undi, kuko byagaragaye ko guhera icyo gihe yahise atangira kwinjira mu bikorwa bihungabanya umutekano muri Sudani y’Amajyepfo bituma abaturage bo muri icyo gice binjira mu makimbirane y’urudaca.

Ati “Ibi ni byo twabonye muri Congo nyuma yo kutumvikana na Kabila. Yashakishije uko yingira muri Kongo none dore kubera intambara ya Kongo, Uganda igomba Kongo akayabo k’asaga miliyari 10 z’amadolari mu gihe abantu bari mu bikorwa byo kuyisahura nka Sam Kuteesa, Yoweri Museveni, Kahinda na Salim Saleh barimo kwirira ubuzima.

Muribuka indege nto zigeze gufatirwa i Beirut bikagaragara ko zari zaguzwe na Salim Saleh nyuma yo guhabwa ruswa y’amadolari ibihumbi 100 akemera ko koko yayifashe ariko aho kugira ngo Museveni amusabe kuyagarura akavuga ko amubabariye.

Akagira ati “N’ ibyaha nk’ibi byose, nta gikorwa cy’iterambere kigaragara barageza kuri Uganda, ni uko bimereye, uyu rero ni we muntu twifitiye muri aka gace k’Ibiyaga bigari by’Afurika.”

Kiwanuka akomeza asaba abaturage ba Uganda gusenyera umugozi umwe bagakora ibishoboka byose baharanira impinduka mu gihugu cyabo, bitaba ibyo ibibazo bikaba akarande karenga imipaka kakanakomeza kuvangira n’ibihugu by’abaturanyi.

Ati “Ibi bibiri ni nabyo bituma Museveni ahora ashaka ko igisirikare cye gihora gihugiye mu bindi kikibagirwa abaturage.”

Akomeza avuga ko nk’umunyagitugu, Museveni ahora ashoza intambara akazishoramo abasirikare ba Uganda bigatuma ibibazo by’abaturage byirengagizwa, mu gihe zimwe muri izo ntambara ari izibiba amacakubiri mu baturage kugira ngo abone uko yigumira ku butegetsi ubuziraherezo.

Kiwanuka ati “Iyo hari ibihugu bifite amahoro mu karere, Museveni arabireba bikamutera impungenge ku buryo bituma atagoheka. Iyo Museveni abonye igihugu nk’icyo, aravuga ati ‘aba barimo gutera imbere bizatuma ngaragara nk’umuyobozi mubi’ kandi ku bwe yahora ameze nk’ ‘impfizi imwe mu kiraro’.

Amayeri yo kuyobya Umuryango Mpuzamahanga

Kiwanuka avuga kandi ko mu gushoza intambara kwa Museveni, akora ku buryo ahuma amaso Umuryango Mpuzamahanga yohereza abasirikare ba Uganda nk’ibitambo muguhungabanya amahoro mu Karere k’Ibiyaga Bigari.

Ati “Murebe nka Somalia, habaye amahano aho abasirikare bitwa ko baharinda amahoro barimo n’aba Uganda bafashwe bagurisha intwaro Al-Shabaab. Abasirikare ba Museveni bishoye muri ubwo bucuruzi kuko ngo bari bamaze igihe badahembwa neza kuko abayobozi babo bapyetaga imishahara yabo.”

Ati “Nyamara igihe cyose Umuryango Mpuzamahanga wabazaga Museveni kuri iki kibazo, yahitaga azana iterabwoba ryo gukura ingabo muri Somalia.”

Ruswa yamunze ubukungu bwa Uganda

Kiwanuka agaruka no ku bibazo bya ruswa muri Uganda akavuga ko abaturage ba Uganda babaye ibitambo by’ubutegetsi bwa Museveni kuko ubukungu bwa Uganda ngo burimo kurindimuka bitewe na ruswa avuga ko yamunze ubuyobozi bw’icyo gihugu.

Atanga urugero aho ngo nko mu buzima buterwa inkunga ahanini n’ibihugu by’amahanga, ku wambere ushize, Perezida w’Umutwe w’Abadepite yarwaye akavuga ko byatewe n’umunaniro w’indege mu gihe ngo yari yuriye indege ajya kwivuza muri Kenya.

Kiwanuka akabishingiraho avuga ko ibyo bisobanuye ko nta bitaro na bimwe Uganda ifite bishobora kuvura umunaniro. Agatanga izindi ngero z’ibibazo biri mu buvuzi aho avuga ko Uganda imaze imyaka 15 itagira imashini ifasha mu buvuzi bwa kanseri, akavuga ko ibyo byose bituruka ku kuba igihugu cyaramunzwe na ruswa ndetse n’igenamigambi ribi.

Ati “Uburyo Museveni ayoboramo bwaciyemo igihugu ibice bibiri. Igice kimwe cy’abaherwe n’igice cy’abatindi kandi byose bitewe na ruswa yamunze igihugu.”

Akomeza avuga hari amakuru avuga ko Uganda igiye kubaka ibitaro bifite agaciro ka miliyoni 480 z’amadolari hafi ya Entebbe, ko hari kompanyi ngo igiye kubyubaka ariko Guverinoma ikabeshya abaturage ko ari abashoramari yahaye amafaranga ngo bubake ibyo bitaro mu gihe “twakurikiranye tugasanga amafaranga bahaye Arab Emirates izubaka ibyo bitaro yagura ibikoresho byo mu cyumba kimwe cy’inama gusa.”

Agakomeza avuga ko bimeze bityo mu gihe ibindi bihugu by’abaturanyi bifite kompanyi z’indege mu gihe Uganda ari yo yonyine itayifite.

Ati “baravuga ko Uganda Airline igiye kugaruka, nyamara amakuru yagiye ahagaragara ejo ahamya ko n’ubwo Uganda ari yo yafashe inguzanyo ku kubyutsa Uganda Airlines Uganda iyifitemo imigabane ingana na 0.9% gusa.”

Ati “Wakwibaza nyir’iyi migabane 99.1% yindi. Ni nde mu by’ukuri”? Imishinga nk’iyi y’amanyanga irimo guteza ibibazo Uganda kandi nyamara Museveni yemerera abo bose bamunzwe na ruswa kuguma mu buyobozi.”

Kiwanuka akavuga ko ingero ari nyinshi cyane kandi ko Museveni ubwe ari we wateje ibyo bibazo igihugu yikikiza abantu bakururira ibibazo igihugu, agatanga urugero aho Sam Kuteesa yigeze kwigarurira Ikibuga cy’Indege cya Enteebe mu gihe cy’imyaka 11 akiguze ubusa binyuze muri komanyi ye yitwa Entebbe Handling Services Ltd (ENHAS) nyamara ntihagire n’umwe ugira icyo abivugaho kuko guverinoma ngo yari ibifitemo akaboko.

Akomeza avuga ko muri New York hari umuntu uherutse gukatirwa n’inkiko ahamwe n’icyaha cyo guha Museveni ruswa y’ibihumbi 500 by’amadolari Museveni akabyita impano.

Museveni afite ubwoba bwo kurekura ubutegetsi

Prof Kiwanuka avuga ko kubera ruswa n’imitungo Museveni yigwijeho, ngo afite ubwoba bwo kurekura ubutegetsi. Akavuga ko ibyo byose bituruka kukuba adashobora gutandukanya guverinoma n’imitungo ye ndetse n’umuryango we, bityo ngo akaba atinya ko avuye ku butegetsi yabiryozwa.

Muri ubu busesenguzi, Prof Kiwanuka avuga ko ikibazo u Rwanda rumaze iminsi rusaba Uganda gusobanura cyo gukorera Abanyarwanda iyicarubozo no kubafungira mu bigo bya gisirikare n’ahantu hatazwi ndetse no kubirukana mu buryo bunyuranyije n’amategeko bakanashinjwa gutunga intwaro bitamutangaza.

Ati “Niba warakurikiye Uganda ku buyobozi bwa Museveni ntibyakagutanganje wumvise ibikorwa nk’ibyo, kuko abantu bahora bafungwa bahimbiwe ibyaha.”

Ati “Ubu icyakagombye kuduhangayikisha ni uko Abanyarwanda badatwarwa mu nkiko za gisivile bagatwarwa mu za gisirikare mu gihe amategeko n’ibimenyetso bikenerwa mu nkiko za gisirikare bitandukanye n’ibikenerwa mu za gisivile.”

Prof Kiwanuka akavuga ko ikibazo cy’Abanywarwanda bafungiwe Uganda gikwiye gukemurwa n’akarere ndetse n’Umuryanga Mpuzanamahanga bagashyira igitutu kuri Guverinoma ya Museveni kugira ngo abo baturage bahabwe uburenganzira bwabo.

Abavuga ko hari Abanyarwanda bari kwica abantu muri Uganda... twumvise abatawe muri yombi bakurikiranyweho impfu za Kaweesi, Abiriga, Kirumira n’abandi, ariko nta n’umwe muri abo w’Umunyarwanda; nta n’ufite amaraso ya Uganda n’u Rwanda.

Ati “Bose ni Abanya-Uganda buzuye kandi nyamara mu gihe gishize Museveni yatwibwiriye ko abo bicanyi ari intagondwa z’Abayisilamu zo mu mutwe wa ADF, none bahindutse Abanyarwanda.”

Akagira ati “Uyu mugabo ni umubeshyi kabuhariwe wavukanye kubeshya mu maraso ye.”

Museveni yemeye ko yahuye na Mukankusi uri iburyo hejuru ndetse anashyira hanze byinshi

Ibi byanemezwaga n’umugabo wamureraga akiri umwana, nyakwigendera Boniface Byanyima, wakundaga kumwita umunyabinyoma w’amasura abiri “two-faced liar.”

Uyu Musaza yigeze kubwira ikinyamakuru the Observer ati “Ntabwo wakumva Museveni inshuro imwe ngo umenye ikimurimo. Hari uruhande rumwe akwereka n’urundi aguhisha.” Ni mu nkuru cyasohoye tariki 22 Gicurasi 2017.

Muri iyi minsi, u Rwanda ni rwo ruri gusoma kuri iyo ntago isharira ya kamere ntindi ya Museveni.

Ikinyamakuru cya Leta ya Uganda The New Vision cyasohoye ‘ibaruwa’ yanditswe na Museveni yandikiye mu ibanga perezida Kagame w’u Rwanda. None ubwo butumwa bwari bugenewe umuntu umwe, bwagaragaye mu kinyamakuru maze busomwa n’ibihumbi by’abantu. Ibyo ni iki?

Icyambere umuntu ahita abona, agifungura iyi ngirwa baruwa, ni uko ngo yanditswe tariki 10 Werurwe 2019, nyamara isohoka mu kinyamakuru cya Leta ya Uganda tariki 19, ni ukuvuga iminsi icyenda nyuma y’igihe yandikiwe.

Amakuru yizewe aravuga ko yageze mu biro by’uhagarariye u Rwanda muri Uganda ku wa mbere w’iki cyumweru. Ibi birerekana ko Museveni atanditse iriya baruwa kuri iriya tariki (10 Werurwe 2019).

Ashobora kuba yarayanditse nka tariki 18 Werurwe 2018, umunsi bayohereje kuri ambasade y’u Rwanda. Akaba ari nyuma y’uko havumbuwe amafoto ya pasiporo y’inya Uganda yahaye Umunyarwandakazi Mukankusi Chalotte, umuyobozi mukuru muri RNC, ari wo mutwe urwanya u Rwanda, umutwe ukuriwe na Kayumba Nyamwasa.

Igihe amafoto yageraga mu itangazamakuru, Museveni yagize ubwoba, niko guhita yandika ibaruwa,agerageza kujijisha ngo abantu bakeke ko yayanditse mbere. Cyakora hari ibibi byinshi iyi baruwa yagerageje guhishira cyangwa se kutezaho urujijo mbere y’uko bijya ahagaragara.

Museveni akunze guhura n’abayobozi muri RNC, harimo n’ushinzwe kubatera inkunga ariwe Tribert Rujugiro Ayabatwa n’ubwo akomeje kwigira nyonyinyinshi yigarama imikoranire ya hafi afitanye na RNC. Mu by’ukuru Museveni ashyigikiye wese ibikorwa bya RNC bikorerwa muri Uganda. Yahuye na Mukankusi ari kumwe na Eugene Gasana, undi munyamuryango wa RNC, mbere y’uko ahura na Rujugiro, byose mu gihe kitarenze ibyumweru bibiri.

Ibi ni we ubwe wabyiyemereye.
Ubusanzwe ibihugu ntabwo byakira imitwe irwanya ubuyobozi bwemewe n’amategeko bw’ibindi bihugu. Cyakora Museveni yisanze ari mu bihe bituma buri munsi hasohoka ibimenyetso simusiga bigaragara uburyo afasha n’umutima we wose, agatanga inkunga muri RNC ndetse no muri FDLR, umutwe ugizwe n’abarwanyi bakoze Jenoside yakorewe Abatutsi.

Abagize inzego z’ubutasi za Uganda batwaye pasiporo zabo kugirango bakore ibisabwa n’inzego z’abinjira n’abasohoka abandi bo bamaze kugenda kare. Gusa amakuru y’uko aba babiri bari muri Uganda ndetse bagiye kubonana na Museveni yaranze ajya ahagaragara.

Uburyo Mukankusi na Gasana bakiriwe i Entebbe ubwo bazaga bavuye muri Amerika y’Amajyaruguru biragira byinshi byerekana. Ubuyobozi bwa Uganda bwagerageje guhisha cyane iby’uru rugendo. Hari amakuru yizewe avuga ko imodoka yaje kwakira aba bayobozi bakuru muri RNC ku kibuga cy’indege bagisohoka mu ndege neza bahita binjira mu modoka.

Amaze kubona ko ibyari ibanga byagiye hanze, harimo n’amafoto ya pasiporo ya Mukankusi, uyoboye Uganda yahise yihutira kwandika ibaruwa ngo arebe ko yayobya uburari. Gusa uburyo yayanditsemo bwa cyane, nta kindi byamaze uretse gusetsa abantu gusa.

Atangira ati “Nyakubahwa Paul Kagame, Ndagusuhuje mu izina ry’abanyaUganda ndetse n’iryange bwite. Nkwandikiye ngirango nkubwire ko ku bw’impanuka, nahuye n’umunyarwanda wiyemerera ko ari umunyamuryango wa wa mutwe wambwiye ho witwa Rwanda National Congress (RNC). Ni umugore witwa Mukankusi, kandi nzi neza ko umuzi, cyakora bwari ubwa mbere duhura rwose nari ntarigeze mpura nawe.”

Nk’umusomyi ndibaza nti: “Ni gute bishoboka ko umukuru w’igihugu ahura n’umuntu ku bw’impanuka?”

Wagirango ni umwana w’imyaka itanu uri kuvuga ngo imbwa yandiriye ikayi – birasekeje kandi ntawe utabona ko ari ibinyoma.
Ahubwo kuba yarasohoye iyi baruwa yuzuye ibinyoma bisekeje, ni ikimenyetso gishimangira ko ibyo u Rwanda rwamushinje, nk’umwe ku isonga ry’abashyigikiye umutwe urwanya u Rwanda ari ukuri. Uburyo ibaruwa igerageza guhakana, guhunga ukuri, kuvuga amakuru ibice ndetse n’ibinyoma byose ni ibimenyetso simusiga.

Tugendeye ku byo Museveni yiyemerera, yahuye na Mukankusi, Gasana na Rujugiro, ariko yirengagiza neza ibyo kugaruka kuri pasiporo. Ese kuki byo atabivugaho kandi nabyo byarasohotse byuzuye hirya no hino? Arabyirengagiza kuko yatanze izo pasiporo nta kindi.

Museveni w’imyaka 75, akomeza mu buryo bumeza nk’ubwa cyana ari gukoramo ibye, yifashishije iyo baruwa we ngo ashyire hanze ibirego bidafite ishingiro.

Yagerageje kugoreka icyagenzaga ibi bikonyozi muri RNC mu gihugu cye. Urugero ni nk’aho avuga ko amaze kubaza Mukankusi icyo ashaka, “undi yamusubije ko umugabo we yiciwe mu Rwanda.”

Ibi bituma umuntu yibaza uburyo wahura n’umuntu ku bw’impanuka, umuntu uzanye ibirego nk’ibyo ku kindi gihugu, maze warangiza ukajya hanze ugashyira hanze ibyo birego, byongeye uri umukuru w’igihugu? Nta kindi byerekana uretse kureba hafi, kutagira imitekerereze ya kiyobozi ndetse bikanashyira hanze imitekerereze Museveni akunze guhisha y’uburyo yanga u Rwanda.

Ibihugu bigira inzego zabyo z’ubutabera, bikagira inzego zabyo z’ubutasi n’ibindi. Ese Museveni kuki atagerageza ngo agerageze kumenya amakuru nyayo mu Rwanda mbere y’uko asohora mu binyamakuru ibintu bikomeye yabwiwe n’umuntu avuga ko bari bahuye bwa mbere? Ntiyigeze abikora. Ibyo ari mo ni ya mayeri ye amenyereye yo kuyobya uburari.

Ukuri ni uko uyu muyobozi wa Uganda ari kwifashisha iyi ngirwa baruwe ye ngo asige icyasha u Rwanda, ari nako ahisha ingingo nyamukuru baganiriye. Barimo baganira ku bijyanye n’uburyo ndetse n’igihe RNC izatangira gutera inzego za polisi n’iz’ingabo mu Rwanda, cyangwa se ibikorwaremezo, ari nabwo Museveni yavuze ko azabatera inkunga ku buryo bweruye.

Abantu bibereye I Kigali bakomeje kwibaza bati ese Museveni nta kindi kintu afite akoresha umwanya we uretse guhura n’impunzi eshatu z’Abanyarwanda? Ese umukuru w’igihugu cya Uganda yatekereza iki perezida w’u Rwanda ahaye umwanya abarwanya Museveni, umaze kugira guverinoma ye nabi cyane kurusha iya Idi Amini, akawuha abantu biteguye kuba bapfa ariko bamurwanya?

Cyakora u Rwanda rwakomeje gushakira igisubizo mu buryo bwa diporomasi, rwirengagije ibi bikorwa bw’urwango rukabije bya Museveni. Uganda yakomeje kugaragarizwa ko yanywanye na RNC ndetse na FDLR.
Ibi kandi byagiye binagaragazwa n’ibikorwa binyuranyije n’amategeko kandi bya kinyamaswa bikorwa na CMI ari rwo rwego rushinzwe ubutasi bwa gisirikare muri Uganda ku bufatanye n’izindi nzego z’ubutasi muri Uganda, byibasira inzirakarengane z’Abanyarwanda b’abasivile.

Mu by’ukuri mu bihe byashize, Museveni yagiye aha impapuro z’inzira ibikomerezwa muri FDLR, mu buryo bumwe neza n’uko yazihaye Mukankusi. Ikinyamakuru The monitor tariki 15 Gicurasi 2006, yashyize hanze inkuru ifite umutwe ugira uti “Ni nde wahaye imitwe yitwaje intwaro igizwe n’Abanyarwanda pasiporo z’inya Uganda?” Muri iyi nkuru, havugwa mo ko umwe muri abo yari uwari umuyobozi wa FDLR muri icyo gihe witwa Ignace Murwanashyaka.

The New Times yo yari yaramaze kwandika kuri ayo makuru mbere tariki 13 Gicurasi 2006, mu nkuru yari ifite umutwe ugira uti “Uganda ikomeje guceceka ku birebana na pasiporo inyurangije n’amategeko ya Murwanashyaka.” Iki kinyamakuru cyagaragaje ko atari Murwanashyaka gusa wari warabonye pasiporo ya Uganda mu buryo bumeze nk’ubw’ibitangaza, ahubwo ko hari n’abandi bayobozi muri FDLR nka Hyacinthe Rafiki na Majoro Wellars Nsengiyumva.

Ubuyobozi i Kampala bwavuze ko butangiye amaperereza ariko ntibwigeze bugaraza icyayavuyemo.

Ibi byonyine ni rumwe mu ngero nyinshi zerekana uburyo Museveni yakomeje kurwanya u Rwanda mu ibanga.

Tuje hafi aha, twavuga ubwo havumburwaga abantu 46 bafatiwe ku mupaka wa Uganda na Tanzaniya ahitwa Kikagati mu Kuboza 2017, bajyanywe mu gisirikare cya RNC gikorera mu burasirazuba bwa Congo Kinshasa. Aba basore bari barashatswe na CMI ifatanyije bya hafi n’abakozi ba RNC bari mu nkambi z’impunzi muri Uganda.

Inzego z’abinjira n’abasohoka za Uganda zarabahagaritse kubera ko bari bafite impapuro z’inzira zikemangwa. Nyuma yo kubahata ibibazo, aba bantu bemeye ko bafite impapuro z’inkorano. CMI yari yajenjetse mu guhimba izi mpapuro. Polisi ya Uganda yataye muri yombi aba bantu maze ibarega iterabwoba.

Perezida Museveni ubwe yemeye iby’aya makuru mu kiganiro n’abanyamakuru hamwe na Perezida w’u Rwanda mu ntangiriro z’umwaka ushize.

Yagize ati “Ubwo nahuraga na Perezida Kagame i Addis, yampaye amakuru maze ndakurikirana. Itsinda ry’Abanyarwanda ryarimo rijyanwa mu gisirikare rinyuze muri Tanzaniya n’Uburundi rigana muri Congo.”

Yakomeje agira ati “Bavuze ko bari bagiye mu bikorwa by’amasengesho ariko bamaze guhatwa ibibazo byagaragaye ko ibyo bari bagiyemo atari iby’amasengesho.” Museveni yemeye ibi kuko yari atewe ipfunwe n’uko byamaze kumenyekana.

Raporo y’impuguke z’umuryango w’abibumbye yasohotse tariki 31 Ukuboza 2018, ni ikimenyetso simusiga gihamya ko ingoma ya Museveni yijanditse mu bikorwa birwanya u Rwanda. Iyi raporo ivuga Uganda nk’ikibugo cyo gushaka no kwinjiza abaranyi mu mitwe yamaze kuvuga ko irwanya Leta y’u Rwanda.

Mu nyandiko ya Museveni agira ati “Ntabwo Uganda ishyigikiye imitwe irwanya u Rwanda”, gusa ibikorwa bye birusha ijwi kure ibyo yandika.

Asoza ibaruwe ye, Museveni yongera gutunga agatoki ariko nano bya cyana nk’uko yari yanatangiye agira ati “ikibi ni uko abakozi b’u Rwanda bagerageza gukorera muri Uganda mu buryo butazwi. Numva amakuru menshi, ariko ntabwo nzagira icyo nyavugaho igihe cyose ntarayabonera gihamya.”

Gusa yamaze gukora ibyo avuga ko atazakora! Ari gushyira hanze ibirego kandi nawe ubwe yiyemerera ko atarabibonera gihamya.

Ng’uwo Museveni utandukanye n’uwo abantu babona.

Source: TNT

Pasiporo Nshya ya Mukankusi yahawe yitwa umugandekazi hamwe n’iy’u Rwanda yataye agaciro

Mu nkuru yacu iheruka, twari twababwiye ko Mukankusi yari yungirije Kayumba Nyamwasa ubwo yari ambasaderi w’u Rwanda mu Buhinde. Icyo gihe Mukankusi yahawe pasiporo zigenerwa Abanyarwanda bari mu butumwa bw’akazi mu mahanga (diplomatic passport), ariko irangiye ntiyongerewe igihe, kuko yari yaramaze guta inshingano ze akiyunga ku mutwe washinzwe n’uwari umuyobozi we i New Delhi.

Yaje gukora urugendo ajya guhura na Perezida Museveni wa Uganda ubona witwara nk’umuyobozi wa RNC, yabifashijwemo na guverinoma ye. Ku itariki 11 Gashyantare 2019, Mukankusi yahawe pasiporo nshya ya Uganda ifite nomero “No. A00019997”. Iyo pasiporo izamara imyaka itanu ikoreshwa. Ni ukuvuga ko izarangira ku itariki 10 Gashyantare 2024.

Mu byangombwa Mukankusi yahoranye, bigaragara ko ari Umunyarwandakazi, wahawe ibyangombwa by’ingendo bitandukanye by’u Rwanda harimo, pasiporo ihabwa abagiye mu butumwa mu mahanga “diplomatic passport” ifite numero “no. PD 000223”, pasiporo y’akazi “Service Passport” ifite numero “no. PS009269”, ikagira pasiporo isanzwe “Ordinary Passport” ifite numero “No. PC061537”, akagira n’indangamuntu y’u Rwanda ifite numero “No. 1197070004061075”.

Gahunda ya Mukankusi yo kwangisha abantu ubuyobozi bw’u Rwanda yabangamiwe n’uko atari afite pasiporo, bigatuma adashobora gukora ingendo uko abyifuza. Icyakora kuba Uganda yamufashije ikamuha pasiporo, birumvikana neza ko yoroherejwe mu gukomeza akazi ke.

U Rwanda rwimye Mukankusi Pasiporo nshya bitewe n’isano iri hagati ye n’umutwe w’iterabwoba, ndetse hafatwa n’ingamba zigamije gukumira ko yagira abantu ashishikariza kujya muri uwo mutwe. Icyemezo cya Uganda cyo kumworohereza mu ngendo ze, ni ibyerekana umugambi wa Perezida Museveni ko ashyigikiye imitwe ihungabanya umudendezo w’u Rwanda harimo n’imitwe y’iterabwoba.

Icyo ni cyo cyatumye ku itariki 31 Ukuboza 2018, Umuryango w’abibumye utangaza raporo igaragaza ko leta ya Museveni ikorana n’imitwe yitwaza intwaro ikorera ahanini mu karere ka Kivu y’Amajyepfo muri Repubulia iharanira Demokarasi ya Congo, umuyobozi mukuru w’iyo mitwe akaba ari Kayumba Nyamwasa.

Uganda rero yashinjwe kuba ifasha mu gushaka abantu bajya muri iyo mitwe yitwaza intwaro “recruiting”, ikanafasha abashaka kuyijyamo kubona uko bayigeramo.

Mbere gato y’uko iyo raporo ya Loni isohoka, Perezida Museveni yashyizeho umunyamabanga wa leta ushinzwe gukurikirana ibikorwa byo mu karere “regional affairs”, Dr Philemon Mateke, amushinga gutegura inama ihuza umutwe RNC na FDLR igizwe ahanini n’abantu bagize uruhare muri Jenoside yakorewe Abatutsi mu Rwanda, kandi FDLR ivuga ko intego yabO ari ukuza kuzuza umugambi wa Jenoside, kuko yo ivuga itarangiye “unfinished business.”

Umuvugizi wa FDLR, Nkaka Ignace, bakunda kwita “Laforge Bazeye Fils” n’ushinzwe iby’ubutasi Lt. Col. Nsekanabo Jean Pierre bakunda kwita Abega Kamala, bafatiwe ku mupaka wa Bunagana bavuye mu nama i Kampala. Abayobozi ba Repubulika Iharanira Demokarasi ya Congo babashyikirije u Rwanda, nyuma mu byo bagaragaje, harimo icyifuzo cya Museveni cy’uko RNC na FDLR bahuza imparaga, kugira ngo bigaragare ko abarwanya ubuyobozi bwa Perezida Kagame baturuka mu moka abiri azwi cyane mu Rwanda, ni ukuvuga Abahutu n’Abatutsi.

Mu nama yo kuri 14 kugeza 15 Ukuboza 2018, RNC yahagarariwe n’uwitwa Ntwari Frank utuye muri Afurika y’Epfo, uza i Kampala kenshi atumiwe na Perezida Museveni. Urugendo rwa Mukankusi, ni rumwe mu ngendo nyinshi ziterwa inkunga n’abayobozi bakuru ba Uganda, bakira abahagarariye FDLR na RNC aho usanga baborohereza mu ngendo zabo. Urwa Mukankusi akaba ari uruheruka.

Uko byagenda kose, Mukankusi bizarangira ari gusabwa ibisobanuro ku bikorwa bye mu guteza imbere iterabwoba. Cyakora nubwo Uganda ikomeza kugaragaza ibikorwa byo gushotorana, u Rwanda rukomeza gukemura ikibazo cy’abahohoterwa mu buryo bushoboka, rukanahitamo gushaka uko rukumira ibikorwa bibi byategurwa n’abanzi barwo, aho guhangana na Uganda nk’igihugu mu buryo butaziguye.

Charlotte Mukankusi uri ibumoso yakiriwe na Perezida Museveni tariki 01 Werurwe 2019

Ibimenyetso bikomeje kujya ahagaragara, birerekana neza cyane ko Perezida Museveni ari we nkingi ya mwamba mu gushyigikira imitwe y’iterabwoba igamije guhungabanya umutekano w’u Rwanda ibifashijwemo na Uganda.

Tariki ya 01 Werurwe 2019, ukuriye ububanyi n’amahanga muri RNC Charlotte Mukankusi yari i Kampala, maze ahura na Perezida Museveni. Uyu Mukankusi yari yungirije Kayumba Nyamwasa ubwo yari ambasaderi w’u Rwanda mu Buhinde.

Iki ni ikimenyetso kimwe muri byinshi byerekana ko guverinoma ya Museveni yorohereza abantu ndetse n’imitwe igamije guhungabanya umutekano w’ umuturanyi wo mu Majyepfo y’igihugu cye mu ngendo.

Cyakora ntabwo ari guverinoma ye gusa ahubwo na Museveni ubwe, nawe yibereye muri uyu mugambi mubisha: yagiranye inama ebyiri imbona nkubone na Mukankusi, wamaze hafi icyumweru muri Uganda hagati ya tariki 01 na tariki 06 Werurwe 2019.

Icyagenzaga Mukankusi muri Uganda, kwari ukongera imbaraga mu mugambi uhuje Uganda na RNC, n’ubwo bari mu bihe bigoranye. Amakuru yizewe yagaragaje ko uyu muyobozi mukuru muri RNC, yaciye akarongo ku kamaro ko gushyigikirwa na Museveni muri rusange, ndetse anamusaba ko yakora uko ashoboye maze agasibanganya ibimenyetso mu muryango w’abibumbye (UN), yitandukanya na raporo y’impuguke yashyizwe ahagaragara tariki 31 Ukuboza 2018, yerekana neza uburyo Guverinoma ya Museveni ikorana bya hafi na RNC, muri byinshi, nko mu kwinjiza mu gisirikare abantu babakura mu bice bitandukanye bya Uganda, ndetse no mu guha amahugurwa ingabo za RNC zibarizwa i Minembwe muri Repubulika Iharanira Demokarasi ya Congo.

Museveni yamwemereye ubufasha bwose yifuza agira ati “turi kumwe ‘we are together’”, yakomeje amwereka ko Uganda yemeye ko umubano wayo n’u Rwanda uhungabana ndetse ko yiteguye ko byanagenda uko hamwe n’ibindi bihugu ariko agakomeza gushyigikira inyungu za RNC.

Amakuru aturuka ku bahafi ba Mukankusi, avuga ko uyu mugore wari uje uhagarariye RNC, yashimishije cyane Museveni, nyuma yo kumwereka uburyo RNC yubatse, imigambi ifite, ingabo ifite muri Kivu y’Amajyepfo muri Congo n’ibindi, maze bituma amwemerera (Museveni) gukomeza kubashyigikira.

Museveni kandi yakomeje amusaba gukomeza kwinjiza abantu mu gisirikare cya RNC, anamubwira ko ariko bagomba gukora uburyo bwose bushoboka bagacamo ibice ingabo z’u Rwanda (RDF).

Amakuru yizewe yerekana uburyo Museveni yamugaragarije ko imbaraga yashyize mu guca mo ibice RDF ahagana mu myaka ya za 2000 zatumye Majoro Alphonse Furuma, Patrick Karegeya na Kayumba Nyamwasa bahunga u Rwanda.

Museveni ntabwo yarimo yivuga ibigwi gusa. Yemereye Mukankusi ko inkunga nyinshi kandi yeruye azayibaha ubwo uyu mutwe uzaba watangiye ibikorwa byibasira guverinoma y’u Rwanda, mu bya gisirikare ndetse no mu bindi nk’ibikorwaremezo bya gisirikare. Aya makuru yongereye imbaraga nyinshi abagize uyu mutwe w’iterabwoba. Umuntu utazi uburyo Museveni yafashe ubutegetsi, ni we gusa utaha agaciro ibyo yemereye RNC.

Perezida Museveni kandi, yagaragaje ko yemeranya rwose n’inama yagiriye Mukankusi. Nk’urugero, umuntu yakwibaza ati ese yari azi neza ko kuba umuyobozi mukuru muri RNC amusuye akamusaba ubufasha bundi, bizakomeza kuzahaza umubano hagati ye na mugenzi we w’u Rwanda?

Ibi biragaragaza ko Museveni afite amahitamo abiri imbere ye. Amahitamo yambere, ni ugukomeza kwirengagiza ukuri, agafata amakuru ahabwa n’umutwe w’iterabwoba nk’ukuri, ari na ko atera ishoti ayo ahabwa n’ubuyobozi bw’u Rwanda, akayafata nk’ibinyoma. Bamubwira ibyo bazi ko akeneye kumva, kuko bazi neza ko akeneye ikintu cyo gusobanura umugambi bahuriyeho wo guhungabanya u Rwanda.

Urugero umuntu yatanga, ni uburyo Museveni akoresha urwitwazo kugirango ayobye uburari abantu ntibabashe gusobanukirwa uburyo yifashisha abashinzwe umutekano be ngo bikize abo yita ko ari abanzi be. Ubwo rero iyo RNC ivuga ko ari u Rwanda ruri kwica abantu, abyemera abizi neza ko ari ibinyoma, nk’uko byagenze ubwo hatabwaga muri yombi Rene Rutagungira ukomeje kuborera muri gereza z’urwego rw’ubutasi bwa Uganda, kandi ari umwere udafite ibyaha akurikiranyweho.

RNC yabwiye Museveni ko ifite abarwanyi benshi biteguye kurwana inkundura harimo no gusenya ibikorwaremezo mu Rwanda. Gusa ngo bagomba gufatanya n’abicanyi kabuhariwe nka FDLR, umutwe wakunze gutangaza mu ruhame ko ufite inyota yo gusoza umugambi wa Jenoside bise ‘Umurimo utarasojwe’ (Unfinished business). Muri ubu bufatanye kandi, Museveni yateye indi ntambwe ashyiraho intagondwa yitwa Philemon Mateke, amugira umunyamabanga wa leta ushinzwe iby’imibanire mu karere, amushinga ibijyanye no kumuhuza n’umutwe wasize ukoze Jenoside mu Rwanda ukorera muri Congo Kinshasa.

Icya kabiri, Museveni ashobora gukomeza kugendera kuri aya makuru y’ibinyoma, agakomeza gupyinagaza inzirakarengane z’Abanyarwanda bari muri Uganda, benshi muri bo bagenda batungirwa agatoki na RNC yamaze kumuhindukira umuvandimwe.

Cyakora amahitamo nayo agira ingaruka. Ukuri buri wese adashobora guca ku ruhande, harimo na Charlotte Mukankusi, ni uko buri wese ugambanira igihugu cye, ashinga umutwe witwaje intwaro, ngo ahungabanye umutekano w’abantu b’inzirakarengane, akenshi birangira bibagarutse kandi ku buryo bukomeye, kuko nta gihugu na kimwe ku isi cyakwihanganira ubushotoranyi bungana butyo.

Ibyo kandi bimaze kuba nk’ihame ku isi yose, ko abashyigikira imitwe y’iterabwoba iteka birangira babonye ko ibyo bakoze byari amakosa akomeye. Ibyo ni ibyo amateka yerekana. Buri wese ujya usoma ibitabo by’amateka yabisobanukirwa.

Museveni kandi afite amahitamo ya gatatu. Ashobora guha agaciro ukuri nyako guturuka ku bayobozi b’u Rwanda, budasaba byinshi birenze kubyutsa umubano n’ubucuti. Ibi kandi byagira ingaruka nziza zirimo umudendezo mu bihugu byombi. Aya mahitamo ya gatatu arasaba ko Museveni akorana na bagenzi be muri Kigali, bakunze gusubiramo kenshi ko icyo bifuza ari amahoro hagati y’ibihugu byombi.

Uruhare Perezida Museveni ari kugira mu guhungabanya umutekano mu karere rutangiye kugaragarira buri wese harimo n’abanya-Uganda basanzwe, abatuye umuryango w’uburasirazuba bwa Afurika, ndetse n’abandi ku isi yose. Yahisemo ko igihugu cye kiba ikicaro cy’ibikorwa bya RNC bigamije kwibasira u Rwanda.

Mukankusi ashobora kuvuga ko gusura Museveni kwe muri Kampala byageze ku ntego. Cyane ko yasubiye iyo yaturutse afite ‘inkuru nziza’ yavuye mu mwanzuro w’ibiganiro bagiranye igira iti ‘Turi kumwe’ (We are toghether).

Aba ni bamwe mu banyarwanda bagejejwe ku mupaka wa Kagitumba ku wa 13 Werurwe 2019

Mu ijoro ryo ku wa 13 Werurwe 2019, Abanyarwanda batatu bari bafungiye mu kigo cya gisirikare cya Makenke, Mbarara baraye bagejejwe ku mupaka w’u Rwanda.

Ngabonzima Amon w’imyaka 15 wigaga mu mwaka wa gatanu w’amashuri abanza ukomoka mu Karere ka Gakenke mu Murenge wa Kivuruga avuga ko yavuye mu rugo iwabo ku wa 05 Ukwakira 2018 agiye Fort Portol muri Uganda gusura mushiki we, anyuze ku mupaka wa Gatuna.

Ngo imodoka yari arimo ikigera Ishaka, Bushenyi, Abanyarwanda bari kumwe na we ngo bahamagaye abaturage hafi aho, we na mugenzi we bari bajyanye witwa Maniragaba Augustin bayikurwamo bajyanwa kuri polisi bashinjwa kuba maneko y’u Rwanda.

Ati “Tugeze Ishaka hari Abanyarwanda batatu twari kumwe muri Bus, bahamagaye Abagande hafi aho imodoka ihagaze jye na mugenzi wanjye badukuramo batujyana kuri Polisi badushinja kuba maneko b’u Rwanda.”

Aha ngo ntibahamaze umwanya kuko bahise bajyanwa mu kigo cya gisirikare cya Makenke muri Mbarara.

Aha ngo ni ho batangiye guhura n’ibibazo kuko bamaze igihe bafungiye ahantu hamenwaga amazi bakayararamo bakanayirirwamo.

Agira ati “Buri wese yafungiwe mu kazu ke mu nzu yo hasi, bakajya bamenamo amazi amajerekani abiri tukayirirwamo tukayararamo. Mu gitondo batwirizaga ahantu bakaturaramisha bakagutera amazi mu mazuru.”

Ngo iyo bayateraga umuntu inshuro eshatu yahitaga ava amaraso yakuzura igikombe.

Gashongore Xavier wo mu Karere ka Bugesera we yafashwe ku wa 01 Gashyantare uyu mwaka, afatirwa i Bundibugyo aho yari amaze imyaka 19 akora akazi ko guhinga no kogosha.

Avuga ko ubwo yarimo kogosha yabonye abantu batandatu bazirikanije, bageze aho akorera na we baramufata abanza gufungirwa i Fort Portol nyuma azanwa i Mbarara mu kigo cya gisirikare.

Ati “Mu gisirikare twarakubitwaga mu gitondo na mbere yo kuryama, twambikwaga gisirikare ngo hatagira umenya ko turi abasivili.”

Bavuga kandi ko bari bahafungiye ari Abanyarwanda barenga 40 ndetse ngo bahavuye hari babiri bamaze kwitaba Imana kubera inkoni no gusukwa amazi mu mazuru hiyongereyo no kugaburirwa amamiminwa y’ibishyimbo n’akawunga.

Aba bose bambuwe ibyo bari bafite byose harimo n’amafaranga.

Minisitiri Sezibera mu kiganiro n’abanyamakuru kuri uyu wa gatatu

Iri tangazo rivuga ko aya matangazo ari guca ku ruhande ikibazo cy’amagana y’Abanyarwanda, Leta ya Uganda izi amazina, bishwe abandi bagatabwa muri yombi bakanafungwa ari na ko bakorerwa iyicarubozo kandi ambasade n’imiryango ntibemererwe kubasura, ndetse ntanavuge ku bihumbi by’Abanyarwanda bari kwirukanwa muri Uganda bakajugunywa mu Rwanda mu buryo butari ubwa kimuntu.

Aya matangazo kandi ngo ntabwo ari kugaruka ku bibazo by’ imitwe yitwaje intwaro ishakira inabi u Rwanda nka RNC, FDLR n’indi, ifashwa n’ inzego z’igihugu cya Uganda mu bikorwa byayo nko kwinjiza mu gisirikare cyazo abarwanyi. Ibi kandi ni kenshi byashyikirijwe Leta ya Uganda.

Icya gatatu minisiteri y’ububanyi n’amahanga ivuga, ni ukwirengagiza ikibazo cyo kwibasira Abanyarwanda basanzwe bikorera ubucuruzi busanzwe muri Uganda, nk’uko babyemererwa n’amasezerano menshi harimo n’ay’umuryango wa Afurika y’Uburasirazuba, ndetse no kubangamira urujya n’uruza rw’ibicuruzwa harimo n’ibyangirika bijya cyangwa se binyura muri Uganda.

Statement by the @RwandaMFA: The recent statements issued by the Ministry of Foreign Affairs of Uganda including the one dated 13 March 2019 are diversionary and do not address fundamental issues raised by Rwanda. Read more: https://t.co/OkyPAdEKjS

— Government of Rwanda (@RwandaGov) March 14, 2019

Iri tangazo rivuga ko bidashoboka ko habaho ubucuruzi bwisanzuye igihe abacuruzi bicwa, bagakorerwa iyicarubozo, bakavanwa mu byabo ndetse n’imitungo yabo igafatirwa mu buryo bunyuranyije n’amategeko.

Iri tangazo rikomeza rivuga ko ibi ari byo bibazo by’ingenzi byagakwiye kuba bivugwaho. Kuvuga ko u Rwanda rwakomanyirije Uganda mu by’ubucuruzi ari ikinyoma nk’uko n’ubundi bakomeje kubeshya abaturage bahunga ibibazo bya nyabyo.

Iri tangazo risoza rivuga ko nta gushidikanya ko ubushake bw’u Rwanda ku bijyanye n’urujya n’uruza rw’Abantu harimo n’AbanyaUganda ndetse n’urujya n’uruza rw’ibicuruzwa mu karere ari ntamakemwa.

Guverinoma y’u Rwanda irasaba Guverinoma ya Uganda kwita ku bibazo nyamukuru byavuzwe haruguru cyane ko ari kenshi ibi bibazo byagejejwe kuri Uganda.

Minisitiri Nduhungirehe avuga ko u Rwanda ruzakomeza gushakira umuti w’ikibazo muri diporomasi

Byavugiwe mu kiganiro bamwe mu ba minisitiri bagiranye n’abanyamakuru kuri uyu wa 12 Werurwe 2019, cyavugaga ku byavuye mu mwiherero wa 16 w’abayobozi bakuru b’igihugu, umwiherero wabereye i Gabiro mu karere ka Gatsibo.

Perezida wa Kenya, Uhuru Kenyatta, yagiriye uruzinduko rw’umunsi umwe mu Rwanda anahita ajya i Gabiro aho yaganiriye na Perezida Kagame.

Minisitiri Nduhungirehe yavuze ko urwo ruzinduko ntaho ruhuriye n’ibibazo biri hagati y’u Rwanda na Uganda nk’uko hari ababyibazaga.

Abaminisitiri hamwe n’Abanyamakuru batandukanye mu kiganiro gikurikira umwiherero

Yagize ati "Uruzinduko rwa Perezida Kenyatta rwari rugamije gutsura umubano uri hagati y’ibihugu byombi, baganiriye ku mibanire, ubucuruzi n’ibindi. Ibyo guhuza u Rwanda na Uganda ntaho bihuriye na rwo kuko Perezida Kenyatta atari umuhuza w’u Rwanda na Uganda".

Yagarutse kandi ku bibazo bitatu by’ingutu biri mu mubano w’u Rwanda na Uganda.

Icya mbere ngo ni Abanyarwanda bafatirwa Uganda nta mpamvu bagakorerwa iyicarubozo. Ibyo ngo binyuranyije n’amasezerano y’imigenderanire muri EAC.

Icya kabiri ngo ni inzego z’umutekano za Uganda zifasha abarwanya u Rwanda, bibumbiye mu mutwe RNC.

Icya gatatu ni kubangamira u Rwanda mu by’ubucuruzi kuko ngo hari amakamyo yo mu Rwanda apakiye ibicuruzwa yahejejwe muri Uganda nta mpamvu igaragazwa.

Nduhungirehe kandi avuze ko u Rwanda ruzakomeza gukoresha inzira ya diplomasi mu kugerageza gukemura ikibazo kiri hagati ya Uganda n’u Rwanda.

Perezida Kagame mu mwiherero wa 16 w’abayobozi bakuru b’igihugu

Perezida Kagame ubwo yatangizaga umwiherero w’abayobozi bakuru b’igihugu, uri kuba ku nshuro ya 16, i Gabiro mu karere ka Gatsibo, yavuze ko yakunze kutavuga cyane ku bibazo biri hagati y’u Rwanda na Uganda, ariko ko agiye ‘kubamenera amabanga’ ku muzi w’ikibazo.

Perezida Kagame yavuze ko abo mu miryango y’abashimuswe ndetse n’abarekurwa bagahita birukanwa muri Uganda, bavuga ko uwo RNC (umutwe urwanya u Rwanda washinzwe n’uwitwa Kayumba Nyamwasa) isaba gukorana mu mugambi wo guhungabanya u Rwanda akabyanga ahita ashakirwa ibyaha, ku bufatanye na Uganda bamwe bagafungwa, bagakorerwa iyicarubozo, abandi bakaburirwa irengero.

Perezida Kagame yatanze urugero rw’uwitwa Rene Rutagungira, wahoze ari umusirikare mu Rwanda ariko akaza gusezererwa, wari usanzwe akorera ubucuruzi muri Uganda.

Yagize ati “abantu ba RNC, bahawe uburenganzira bwo gushaka abayoboke muri Uganda, barabegereye mu myaka nk’ibiri n’igice ishize, abasore baranga, baravuga bati twebwe dufite ibyo dukora bidutunze, ibyo ntabwo tubizi. Abandi bati ok, niba mwanze, ntabwo muzakora mutekanye muri Uganda… Ibi mvuga mbifitiye ibimenyetso ndetse nabiganiriye na perezida wa Uganda.”

Perezida Kagame yakomeje avuga ko abo bantu badashakira u Rwanda ikiza, bahise bavuga ko Abanyarwanda bari muri Uganda badashaka kwifatanya na bo babarwanya. Ati “Baravuze bati aba bantu baza hano, banze kutwumva, baba baje gutera ibibazo, ndetse no kwica abantu… Guverinoma ya Uganda yemeye kubikora kuko basanzwe bashyigikiye ibikorwa bya RNC byo guhungabanya umutekano mu Rwanda. Baramufunga hamwe n’abandi bari kumwe n’ubu niho akiri.”

Perezida Kagame yavuze ko ibi yabiganiriyeho imbona nkubona na Perezida Museveni wa Uganda ubwe. Yagize ati “ni cyo cyatumye mbivuganaho na Perezida Museveni ubwe, arambwira ati uyu muntu icyo bamufatiye ni uko baje kubona amakuru avuga ko hari umuntu yishe.”

N’ubwo bimeze bitya, nyuma yo kubura ibimenyetso bagiye bamuhindurira ibyaha, ubu noneho ngo hakaba haherutse kuzanwa ibyaha bishya by’uko bamusanganye imbunda.

Ikibazo kimaze imyaka irenga 20

Perezida Kagame yagarutse kandi ku mwanditsi witwa Gérard Prunier, wakunze kugaragara avuga nabi u Rwanda n’ubuyobozi bwarwo. Mu gitabo yise “from genocide to continental war”, avuga mo uburyo yahuye n’uwitwa Seth Sendashonga i Nairobi muri Kenya mu 1998, hamwe n’abasirikare bakuru b’Abanya - Uganda, bakaganira ku buryo uyu mugabo yahabwa imbaraga zose harimo n’iza gisirikare, akabasha gukura ku butegetsi RPF na Kagame mu Rwanda.

Yagize ati “Uyu mwanditsi yanditse ko ibyo ari byo byatumye Seth Sendashonga apfa, kuko ngo yari ‘yarenze umurongo mu maso ya Leta y’u Rwanda’. Impamvu mvuga ibi ni ukugira ngo mbereke ko bimaze imyaka irenga 20. Hari umuntu uvuga ati ntabwo tuzabemerera. Nta byinshi mfite mbivugaho, ariko nta n’ubwo mbisabira imbabazi.”

Yagarutse kandi ku mikoranire ya Uganda na Rujugiro

Perezida Kagame yagarutse ku buryo yagaragarije perezida Museveni uburyo imikoranire ya Uganda na Rujugiro utera inkunga y’amafaranga RNC bibangamiye u Rwanda, akabanza kumubwira ko uwo mugabo atanamuzi.

Yagize ati “Namubwiye (Perezida Museveni), ko Rujugiro afite business muri Uganda, kandi mu byo akora byose, atanga amafaranga yo kuturwanya. Umunsi umwe yarambwiye ngo ntabwo amuzi … mbanza kumwereka ko amuzi”.

“Yarambwiye ngo ikibazo namwe Abanyarwanda mukeneye kumenya gutandukanya politiki na business. Maze ndamushimira ndagenda.”

Perezida Kagame yerekanye uburyo hari ubwo politiki na business bidatandukanywa agira ati “Niba umunti ari guha amafaranga umutwe ngo uze guhungabanya umutekano mu gihugu, ndakeka iyo atari business isanzwe. Naramubwiye nti ibi ndabikurekeye ubikemure uko ubyumva, kuko birabera mu gihugu cyawe.”

Perezida Kagame avuga kandi ko yabajije Perezida Museveni ikibazo yaba afite ku Rwanda maze akagikemura ariko ntiyagira icyo amusubiza.

Ati” Niba hari ikintu urega u Rwanda ndasubira mu Rwanda maze ngikemure. Niba ntanakizi ndasubira mu rugo mbaze, ariko nta nakimwe yambwiye. Naramubwiye nti njye naguhaye ibi bintu byose… bimwe umbwira ko utabizi, ibindi ukampa ibisobanuro. Ndamubwira nti ndabikurekeye ngo ubikemure. Twebwe dukeneye gushyira imbaraga ku byo tugomba kuzishyiramo, aribyo iterambere, kurinda abaturage bacu n’ibindi nk’ibyo.”

Perezida Kagame yashoje yibutsa ko umuntu ashobora gutoteza Abanyarwanda, akaba yanabakorera iyicarubozo ariko ko hari ibidashoboka.

Yagize ati “Nta muntu n’umwe, aho ariho hose, ushobora kumfukamisha. Kuko gupfukama ni amahitamo. Kuri njye ntabwo bishoboka. Ndakeka ko ku gihugu cyacu bidakwiye.”

Minisitiri w’Ububanyi n’Amahanga, Amb Dr Richard Sezibera

Ibi Minisitiri w’Ububanyi n’Amahanga yabitangaje mu kiganiro yagiranye n’Itangazamakuru kuri uyu wa kabiri tariki 05 Werurwe 2019, cyanitabiriwe n’abandi baturage babajije ibibazo bakoresheje telefone.

Hari abaturage bagaragaje ko baboneraga imibereho muri Uganda ndetse bakaba ari ho bahahiraga honyine, ariko Dr Sezibera abamenyesha ko hari uburyo butandukanye bagomba kubaho badahanze amaso Uganda cyangwa ibindi bihugu.

Minisitiri Sezibera yagize ati “Hari uwabajije niba Uganda itavuye ku izima iby’uburenganzira bw’Abanyarwanda bizagenda bite! Uburenganzira bw’abanyarwanda ntabwo bushingiye ku bindi bihugu. Ari Uganda, ari ibindi bihugu, byaba bivuye ku izima, byaba bitavuye ku izima, ntabwo bigena uko Umunyarwanda w’iki gihe abayeho”.

“Turabwira Abanyarwanda ko dufite igihugu cyacu, turacyubaka, iki gihugu ni cyo kidutunga, kiratwambika, kiratuvuza, ni cyo kidutungira imiryango, ntabwo ari ibindi bihugu, ibindi turafatanya”.

“Iki gihugu Abanyarwanda ni bo bakiyobora, ni bo bagena uko kiyoborwa, ni bo bagena uko ababayobora bakiyobora, ni bo bagena uko bavaho n’uko bahanwa iyo batayobora neza, hari ubwo wumva abantu bamwe bibwira ko batariho u Rwanda rutabaho, ibyo ni ukwibeshya”.

Minisitiri w’Ububanyi n’Amahanga akomeza avuga ko abacuruzi batagomba kuzamura ibiciro by’ibicuruzwa bitwaje ko bitakinyuzwa ku mupaka wa Gatuna( kuri ubu uwo mupaka urimo kubakwa hakaba hatanyuzwa amakamyo aremereye).

Agira ati “Ntabwo nibwira ko abacuruzi bagomba kuzamura ibiciro kubera ko batajya muri Uganda, kuko tuzi ibintu biva muri Uganda, mbere ya byose abantu baracyabifite mu bubiko.”

“Ikindi ni uko Leta irimo gukorana n’abikorera kugira ngo ibibazo biri ku muhora wa ruguru(uturuka muri Uganda) bidahungabanya ubucuruzi muri rusange mu Rwanda, nta kibazo gikomeye kizabaho cy’izamuka ry’ibiciro”.

Abanyamakuru basobanuriwe ibyerekeye umubano w’u Rwanda n’amahanga

Minisitiri w’Ububanyi n’Amahanga akomeza asobanura ko Leta imaze igihe ishaka uburyo Abanyarwanda bakwihaza mu biribwa, mu myambaro n’ibindi bikenerwa bya buri munsi hashingiwe kuri gahunda yiswe “Made in Rwanda”.

Akavuga ko ibyo u Rwanda rutarageraho ari byo ruzatumiza mu bihugu bitandukanye, atari ngombwa gusa kubinyuza mu gihugu cya Uganda.

Akomeza asobanura ko Leta y’u Rwanda ikomeje gukora ibishoboka byose kugira ngo Abanyarwanda batazongera kujya muri Uganda bagashimutwa cyangwa bagahohoterwa, ariko ko mu gihe ibibazo bitarakemurwa ngo baba bifashe bakareka kujyayo.

Kuva mu myaka ibiri ishize inzego zishinzwe umutekano muri Uganda zakomeje kuregwa gushimuta Abanyarwanda bajyayo, kubahohotera, kubakorera iyicarubozo ndetse no kubambura imitungo yabo, aho zibashinja kuba intasi.

Minisitiri Sezibera yavuze ko ikibazo cya Uganda ari ikibazo gikubiyemo ibintu byinshi. Avuga ko nta mipaka y’u Rda na Uganda ifunze, hafunze umupaka wa Gatuna kubera imirimo yo kubaka inyubako ’One Border Pos’t izuzura muri Gicurasi uyu mwaka.

Imodoka nini ngo ni zo zoherejwe ku mipaka ya Cyanika na Kagitumba.

Minisitiri Sezibera yakomeje avuga ko byabanje kuba ikibazo ku makamyo yari yageze ku mupaka hafatwa icyemezo kubera kwinangira gukata ngo bace ku yindi mipaka.

Minisitiri Sezibera ati "iby’ibivugwa ko u Rwanda rwashyize ingabo ku mipaka y’u Rwanda na Uganda si byo, nta ngabo u Rwanda rwashyize ku mipaka kandi umutekano urahari nk’ibisanzwe."

Avuga ko ibibazo u Rwanda rufitanye na Uganda gishingiye ku Banyarwanda Uganda ifunga mu buryo bunyuranyije n’amategeko, ikabakorera iyicarubozo hakaba n’abo yirukana muri icyo gihugu bakabatanya n’imiryango yabo.

Ati "U Rwanda twifuza kumenya aho buri Munyarwanda ari tutivanze mu bibazo bya politiki na Uganda ariko nta gisubizo turimo kubibonera."

Ati "Ni yo mpamvu twabaye dusabye Abanyarwanda kudakomeza kujya muri Uganda tutarabibonera igisubizo."

Ikindi kibazo ngo ni icy’abanyarwanda bafite imigambi mibisha ku mutekano w’u Rwanda bitoreza muri Uganda.

Ati "Ibyo byose tumaze imyaka ibiri tubiganira na Uganda ariko kugeza ubu nta gisubizo."

Ikindi kibazo ngo n’icy’ibicuruzwa by’Abanyarwanda bifatirwa na Uganda nta mpamvu kdi nta bisobanuro babihereye u Rwanda.

Yavuze kandi ko hashize igihe Uganda yarahagaritse amata aturuka mu Rwanda ndetse ko n’iby’ubucukuzi bw’amabuye y’agaciro byari byarahagaritswe n’ubwo byo bimaze iminsi mike bikomororewe.

Imwe mu mishinga y’umuhora wa ruguru irimo gari ya moshi, ’pipeline’ ndetse n’amashanyarazi ngo yaradindiye bituma u Rwanda ruhitamo kuba rukora ku mishinga y’umuhora wo hagati nka gari ya moshi ya Isaka.

Ati "Ubona imishinga yo mu muhora wa ruguru muri rusange yaradindiye ariko tumaze igihe tubiganiraho turezera ko bizakemuka bitarenze muri Gicurasi uyu mwaka."

ku bijyanye n’amakimbirane y’u Rwanda na Uganda, Minisitiri Sezibera yavuze ko abanyarwanda barenga 900 bamaze kwirukanwa muri Uganda hakaba hari ababarirwa muri 190 bakiri mu gereza za Uganda.

Nyamara ibyo byose ngo biba batanamenyesheje Ambasade y’u Rwanda muri Uganda kugira ngo ishobora kubakurikirana no gukurikirana uko ibibazo byabo bikemurwa.

Ati "Hari abantu bari muri gereza za Uganda guhera muri 2017. Nta miryango yabo ibageraho nta n’ababunganira mu mategeko bashobora kubageraho."

Hari ibyo impande zombi zagiye ziganiraho ariko bikongera bigasubira kandi nta bisobanuro.

"Turabasaba ikintu gito cyane. Kuduha ibisobanuro ariko baba batanabiduhaye nibura bakirukana abantu mu buryo bukurikije amategeko mpuzamahanga."

Ati "Abanya-Uganda n’abandi baturage bo muri EAC dukomeje kubaha ikaze mu Rwanda kdi nta kibazo bazahagirira ariko twebwe turagira Abanyarwanda inama yo kuba baretse kujya muri Uganda mu gihe ibi bibazo bitarakemuka."

Ku bijyanye n’imitwe y’abashaka guhungabanya umutekano w’u Rwanda avuze ko ari RNC ya Kayumba Nyamwasa na FDLR kdi ngo no mu minsi ishize bagabye ibitero ku Rwanda.

Yagize ati "Ibyo ni byo bibazo bitatu dufitanye na Uganda kandi si ibya none cyakora ubu wenda n’uko byashyizwe ahabona (byagizwe public)."

Minisitiri Sezibera avuga ko uku gukumira abantu cyangwa kubirukana bifite ingaruka ku rujya n’uruza rw’abantu n’ibicuruzwa.

Avuga ko ubusanzwe u Rwanda nk’igihugu kidakora ku nyanja giha agaciro cyane ubucuruzi mpuzamahanga.

Ati "Ni byo kuri twe ibicuruzwa ni ingenzi ariko abantu ni ingenzi kurushaho."

Avuga ko ikirenze byose ari uko u Rwanda rutazigera rugirwaho ingaruka zikomeye n’ibibazo.

Ati "Tuzi uko duhangana n’ibibazo byacu kandi turabizeza ko ikibazo cy’u Rwanda na Uganda kitazigera gituma ingano y’ibicuruzwa twohereza mu mahanga igabanuka cyangwa ngo gitume umutekano n’umudendezo byacu bihungabana."

Perezida Kagame asanga imbogamizi mu mibanire y’ibihugu bya EAC zikwiye kurangira kugira ngo uwo muryango wihute mu iterambere

Mu kiganiro yagiranye n’ikinyamakuru The EastAfrican, Perezida Kagame yabajijwe niba uwo mubano udahagaze neza utazabangamira ubuyobozi bwe.

Perezida Kagame yagize ati “Ndatekereza ko atari byo. Niba twabyita imibanire mibi hagati ya Uganda n’u Rwanda, ibyo byabangamiye bite igihugu cya Uganda igihe cyayoboraga EAC? Wari kubaza uhereye aho. Niba ubuyobozi bwa Uganda butarabangamiwe, rero n’ubwanjye ntacyo ibibazo bihari bizabuhungabanyaho.”

Perezida Kagame yavuze ko nubwo haba hari ibitagenda neza hagati y’ibihugu bigize EAC, hashyizwe ingufu kandi zizakomeza gushyirwa mu gukemura ibyo bibazo bibangamira iterambere rya EAC.

Nta buryo buhamye yasobanuye bizakorwamo, gusa yasobanuye ko abifite mu bitekerezo, kandi ko yanabitekerezaga na mbere yo gutangira manda ye yo kuyobora uwo muryango. Yavuze kandi ko yizera ko n’abandi bayobozi b’ibihugu bigize EAC bazi ko ibyo bibazo bikwiye kurangira kuko bibangamira iterambere rya EAC.

Ati “Dukenye gushaka uburyo ibyo bibazo byarangira, ntitubyemerere ko bibangamira amajyambere twagakwiye kuba tugeraho.”

Abajijwe niba umubano w’u Rwanda na Uganda urimo kuba mwiza cyangwa niba urushaho kuba mubi, Perezida Kagame yasobanuye ko hari intangiriro nziza ibihugu byombi birimo guheraho binoza umubano.

Mu magambo make, yavuze ko ikibazo gihari gishobora gukemuka, kandi ko kigomba kurangira kuko nta yandi mahitamo.
Yasobanuye kandi ko byavuzwe kenshi ndetse bishyirwa no mu nyandiko, ariko ko ubu noneho igikwiye kwihutishwa ari ukubishyira mu bikorwa.

Abajijwe niba ibyo ari na ko bigomba gukorwa ku mubano w’u Rwanda n’u Burundi, Perezida Kagame yavuze ko na ho ari ko bimeze.

Ati “Mu by’ukuri, ikibazo cy’u Burundi kiroroshye kandi kirasobanutse. Urugero, u Burundi bwavuze mu ruhame ko u Rwanda ari cyo kibazo cyonyine bufite. Abantu bavuga ibintu uko bashaka. Reka dutekereze ko wenda u Rwanda rutariho, ese koko ni ukuri ko u Burundi nta bibazo bwaba bufite?”

Perezida Kagame yibukije ko hashyizweho abashinzwe kurangiza ikibazo cy’u Burundi, barimo Benjamin Mkapa wigeze kuyobora Tanzaniya na Perezida Museveni uyobora Uganda nk’abahuza b’impande zitavuga rumwe mu Burundi. Icyakora ubufasha bwahawe u Burundi ngo ntibwageze ku ntego yo kurangiza ibyo bibazo Abarundi bafitanye hagati yabo.

Perezida Kagame ati “ Bagombaga kuvuga ko basanze mu Burundi nta kibazo gihari, ahubwo ko ikibazo gituruka hanze y’u Burundi.”

Umunyamakuru yabwiye Perezida Kagame ko Pierre Nkurunziza w’u Burundi yabivuze mu ibaruwa ndende yanditse, ariko Perezida Kagame asobanura ko atarimo kurengera u Rwanda ahubwo ko arimo gusobanura ibintu uko biri.

Naho ku byatangajwe na Nkurunziza, Perezida Kagame yasobanuye ko atabishingiraho, yongeraho ko abashinzwe gukemura ibibazo by’u Burundi batigeze batangaza ko ikibazo ari u Rwanda.

Ati “Niba hari ibibazo bigera ku Burundi biturutse ku Rwanda, ntabwo byaba ari byo biri ku isonga ry’ibibazo nyamukuru. Ibyo na byo byakemurwa ukwabyo.”

Cyemayire Emmanuel avuga ko yamaze iminsi 25 akorerwa iyicarubozo n’inzego z’iperereza za Uganda

Mu itangazo ryashyizweho umukono n’umuyobozi w’iri shyaka wungirije Fred Dennis Mukasa Mbidde, rigamije kwifuriza igisirikare cya Uganda (UPDF) umunsi mwiza wo gutangira urugamba rwo kubohoza Uganda uzwi nka ‘Tarehe Sita’, iri shyaka ryasabye igisirikare kureba umuturage mbere ya byose aho gukorera mu kwaha k’uwo ari we wese, cyane ko biri no munyito yacyo ‘People’s Army’.

Iri tangaro rivuga ko igisirikare cya Uganda gifite amateka akomeye, kuko cyavutse ku ngabo zashakaga impinduka zigizwe n’Umutwe wabohoye Uganda ‘NRA’ n’izindi ngabo zaje kubohora ibindi bihugu harimo n’u Rwanda.

Rigira riti “ku bw’ibyo rero, UPDF na RPF ni nka ba bana basangiye ibere rimwe ryo kwemera ko Abanyafurika bagomba kubohorwa iyicarubozo, itabwa muri yombi rya hato na hato ndetse n’imfu abantu bazira ukwemera kwabo”.

Iri tangazo rikomeza ryibutsa ko batakwicara ngo bikomanga ku gatuza, ahubwo ko bakwiye kwisuzuma bakareba ejo hazaza nk’igisirikare cyabo.

Rigira riti “Igisirikare cyigomba kwiga kandi gutandukanya abanza ba nyabo, ndetse n’abavandimwe bakwiye gushimangira imikoranire”.

Gatsinzi Fidele we yageze mu Rwanda atabasha gukandagira

Ryibutsa kandi ko iki gihugu cyashyize umukono ku masezerano n’amabwiriza mpuzamahanga atandukanye harimo ashyiraho umuryango w’Uburasirazuba bwa Afurika, amasezerano nyafurika ku iyubahirizwa ry’Uburenganzira bwa Muntu ndetse n’amasezera no ya Vienne.

Ryibutsa kandi ko itegeko nshinga rya Uganda ryemera aya masezerano avuzwe haruguru kimwe n’andi mategeko yose ya Uganda.

Itangazo rikomeza rivuga ko ishyaka DP ryabonye ko abaturage b’Umuryango wa Afurika y’Uburasirazuba baturuka mu Rwanda bakagombye kuba binjira ndetse bagasohoka nta nkomyi muri Uganda nk’uko biteganywa n’amasezerano agenga isoko rusange, badashobora kwisanzura muri Uganda bitewe n’uko bari gutotezwa n’inzego z’umutekano muri icyo gihugu.

Itangazo rigira riti “Bakomeje guhura n’ikibazo cyo gutabwa muri yombi nta mpamvu, bagafungwa imiryango yabo ntimenyeshwe aho bari, bagakorerwa iyicarubozo hakaba hari impungenge ko bamwe baba baranishwe”.

Bamwe muri aba bantu bavugwa ni Rutagungira Rene washimuswe tariki 5 Kanama 2018, akaba amaze iminsi 120 afunze ntawe uzi ibye, nyuma aza kugerekwaho ibyaha ajyanwa mu rukiko rwa gisirikare akaba agikomeje gufungirwa muri gereza ya gisirikare ya Makindye.

Hari kandi Siborurema Peter washimuswe tariki 11 Werurwe 2018, akaba ari mu maboko y’urwego rwa gisirikare rushinzwe ubutasi rwa Mbuya.
Undi ni Rwamu Emmanuel, wafashwe tariki 26 Gicurasi 2018, wageretsweho ibyaha byo gutunga intwaro akaba afungiye muri gereza ya gisirikare ya Makindye.

Undi ni Rutayisire Augustin, washimuswe tariki 26 Gicurasi 2018 nawe wageretsweho ibyaha byo gutunga intwaro akaba afungiye muri gereza ya gisirikare ya Makindye.

Hari kandi Rugorotsi Eric, washimuswe tariki 25 Nzeri 2018, akaba ari mu maboko ya CMI. Undi ni Kwizera Bernard washimuswe tariki 15 Ukuboza 2018, nawe akaba ari mu maboko ya CMI.

Patrick Niyigena wari usanzwe akorera ubucuruzi muri Uganda we avuga ko bamuhambiriye amaguru n’amaboko

Hari kandi Muhawenimana Damascene naTwahirwa David, nawe bashimuswe tariki 15 Ukuboza 2018, bakaba bari mu maboko ya CMI.

Itangazo ry’ishyaka DP rivuga kandi uwitwa Ishimwe Moses, yashimuswe tariki 22 Ukuboza 2018, ajyanwa muri gereza z’urwego rw’ubutasi bwa gisirikare CMI.

Undi uvugwa ni Kayibanda Rogers Donne, waburiwe irengero tariki 11 Mutarama 2019, akaba abarizwa mu maboko ya CMI, nddetse na Ndayambaje Emmanuel nawe washimuswe tariki 10 Mutarama akaba ari mu maboko ya CMI.

Pastor Mufasha Rogers we yashimuswe tariki 10 Mutarama 2019, akaba ari mu maboko ya CMI na Uwineza Claudine n’umugabo we Darius Kayobera bashimuswe tariki 28 Mutarama 2019, bakaba bari mu maboko y’urwego rw’ubutasi bw’igisirikare cya Uganda CMI, barateshejwe abana babo bato batatu bafite imyaka imyaka icyenda, itandatu ndetse n’ itatu.

Itangazo rya DP, rikomeza rivuga ko iri shyaka risaba leta ya Uganda gusobanura neza uko umubano wayo n’u Rwanda uhagaze mu buryo budashidikanywaho.

Risaba kandi ko abasivile bareka kuburanishirizwa mu nkiko za gisirikare, haba hari ibyaha bifatika baregwa bagakurikiranirwa mu nkiko za gisivile, byaba byiza bagafungurwa kugirango bakomeze bite ku miryango yabo.

Rigira riti “Guverinoma niduhe uruhushya dusure abaregwa tunamenye uko bameze cyane ko bikekwa ko bamwe bishwe”.

Risaba kandi ko guverinoma y’u Rwanda na Uganda bashyiraho itsinda rihuriweho n’ibihugu byombi rigacukumbura imvano ya byose, ndetse rigatanga inama y’uko umubano wazahuka hagati y’ibi bihugu bihuriye mu miryango itandukanye.

Itangazo risoza zivuga ko Uganda ifite byinshi yakungukira mu ishyirwa mu bikorwa ry’ibikubiye mu masezerano y’isoko rusange.

Rigira riti “ku bw’ibyo, Abanya-Uganda ntabwo bazifatanya na guverinoma yabo mu rugendo rw’intambara n’u Rwanda, bityo ibi bikaba ari intambwe y’ibanze mu gusaba ko bagaragarizwa iby’umubano n’u Rwanda mu bihe biri imbere”.

Rutagungira washimutiwe Uganda, umuryango we arasaba ko yagarurwa

Umutangabuhamya wemeza iri shimutwa, avuga ko uyu mugabo Rutagungira wasezerewe mu ngabo z’u Rwanda akaba afite ipeti rya Sergeant, yajyanywe ubwo yarimo asangira n’inshuti ze mu kabari kitwa Bahamas kari Kampala.

Avuga ko hari mu masaha ya saa munani z’ijoro, ubwo hazaga umusirikare wa Uganda ufite ipeti rya Capiteni anafite intwaro, akamujyana amushushubikanya, akamwinjiza mu modoka yo mu bwoko bwa Toyota premio ifite purake UAT 694T, imujyana ahantu hatazwi.

Kuva ku cyumweru tariki 7 kugera uyu munsi, umuryango wa Rutagungira nturamenya aho aherereye, ariko ukavuga ko ashobora kuba ari mu kaga.

Jacinta Dusangeyezu umugore wa Rutagungira akimara kumenya iyo nkuru yihutiye kuri sitasiyo ya polisi gushaka ubufasha ngo umugabo we aboneke.

Gusa avuga ko n’ubwo abapolisi yahasanze basaga n’abamenye iyo nkuru mbere ye, bamubwiye ko ari ikibazo cya Leta kireba urwego rwa gisirikare rwa Chieftaincy of Military intelligence (CMI) n’Umuryango mpuzamahanga ushinzwe umutekano (ISO).

Nyamara Dusangeyezu we avuga ko mu buhamya bw’uwabonye umugabo we ashimutwa, yemeje ko yajyanywe n’uwo mukapiteni wa CMI.

Asubiza bimwe mu bitangazamakuru bya Uganda bivuga ko Rutagungira yatwawe na ba maneko b’Abanyarwanda, Dusangeyezu yavuze ko umugabo we w’umucuruzi nta kibazo afitanye n’u Rwanda, ndetse ko atemberera i Kigali kenshi asura umuryango.