Umuyobozi w’Akarere ka Nyaruguru, Dr Emmanuel Murwanashyaka, ashimangira iki gitekerezo avuga ko i Kibeho huzuye Hotel de Kibeho yubatswe na Kiliziya Gatolika irimo ibyumba 35, muri byo hakaba harimo n’ibyakira abanyacyubahiro (VIP na VVIP). Kuyubaka byatwaye amafaranga abarirwa muri miriyari ebyiri na miriyoni magana abiri.

Pacis Hotel y’ababikira b’Abenebikira na yo iri kwagura aho kwakirira abakerarugendo ku buryo ku byumba 36 n’uburiri 68 biri mu byumba rusange (dortoirs) bari basanganywe haziyongeraho ibyumba bishobora kwakira abantu babarirwa muri 200.

Hotel de Kibeho...

Sr Marie Emilienne Umutesi uhayobora agira ati "Twubatse ibyumba 46 harimo n’ibirimo ibitanda bibiri. Twubatse n’ibyumba rusange bishobora kwakira abantu barenze 120. Ibyo byumba rusange, kimwe gishobora kwakira abantu batandatu bitewe n’uko biyemeza kurara hamwe. Buri cyumba kandi kiba kirimo n’ubwiherero n’ubwogero."

Yongeraho ko ibyo byumba bubatse bikikijwe n’ubusitani umuntu ushaka gusenga ashobora kwicaramo hanyuma akihererana n’Imana. Mu byumba rusange kandi ngo harimo ibitanda bitagerekeranye.

Kuyubaka byatwaye miriyari na miriyoni magana inani by’Amafaranga y’u Rwanda.

Meya Murwanashyaka yongeraho ko hari n’andi macumbi ari kubakwa harimo aherereye i Nyarushishi na Guest House ya EAR.

Ngo hari n’abandi bari kugenda bagaragaza ubushake bwo kubaka amacumbi harimo n’abajyanama b’ubuzima ubu bari gushaka ibyangombwa byo kubaka.

Yagaragaje iki gitekerezo tariki 15 Gicurasi, mu gikorwa cyo kwibuka abari abakozi ba IRST (ubu yabaye NIRDA) bazize Jenoside yakorewe Abatutsi mu mwaka w’1994. Yarimo atanga ubuhamya ku byamubayeho mu gihe cya Jenoside, aho yari muri IRST.

Nyirakariza yavuze ko mu gihe cya Jenoside yari afite imyaka 17, ariko ko ku myaka 15 yigeze gukora muri kantine ya IRST. Icyo gihe yari arangije amashuri abanza ntiyemererwa gukomereza mu yisumbuye, kandi na se ntiyari kubasha kumurihira kwiga mu yigenga kubera ko yari yirukanywe mu kazi azizwa ko ari Umututsi.

Mu gihe cya Jenoside ntiyari agikora muri iriya kantine, ariko yihishe mu mashyamba ya NIRDA, aba mu bitaro bya CHUB, kuri Perefegitura ndetse no mu kigo cy’Abafurere mu Irango.

N’ubwo we yihishaga, ibyinshi azi akaba ari ibyamubayeho, ariko hari n’ibyabaye ku bandi yabonye, bituma anibaza impamvu abagize uruhare muri Jenoside batajya batanga ubuhamya ku byabaye nyamara ari bo babizi neza.

Yagize ati "Nabonye ababyeyi bamaze kubyara bajyanwa kwicwa, nabonye abana b’impinja bakuwe ku Karubanda bagera kuri 200 bamenwa mu kibuga ari utwana tujwigira, nabonye imfungwa z’Abatutsi zatemaguriwe muri gereza babeshywa ko baje kuvurwa nyamara bajyanwa mu byobo."

Anavuga ko aho yari ari kuri Perefegitura yabonye abantu burizwa imodoka babeshywa ko bajyanywe ahitwa i Nyange nyamara bagiye kwicwa, kugeza ubwo bo bahageze abicanyi bakanga kubica bavuga ko bananiwe.

Bari kuri Perefegitura no mu Irango kandi ngo uwashakaga yatwaraga umuntu akajya kumwica cyangwa yaba ari uw’igitsinagore akamusambanya.

Ati "Aho twari mu Irango dutegereje kuzoroswa umubyeyi amaze gushyingurwa, uwakeneraga umukobwa yamusabaga uwaturindaga, akamumuha. Bakumarana icyumweru, bakujyaho ari 30, igihe bazashakira bakakureka ukagaruka."

Ibi byose yiboneye n’amaso ye ni byo bituma yibaza icyo abahakana Jenoside bashingiraho.
Ati "Ko ibi byose byabaga ku karubanda, ni gute ababyeyi bihererana abana bakababwira ko bitabayeho? Abakoze ibi bintu cyangwa abo byakozwe bareba, ntabwo numva impamvu bahakana Jenoside. Ntabwo mbyumva."

Umuyobozi wungirije w’Akarere ka Huye ushinzwe iterambere ry’ubukungu, André Kamana, yifatanyije n’abakozi ba NIRDA mu gikorwa cyo kwibuka abagikoragamo bazize Jenoside.

Yavuze ko abapfobya Jenoside bakwiye kuzirikana ko iyo ubihamijwe n’inkiko ubihanirwa, kandi ko icyaha cya Jenoside kidasaza.

Yaboneyeho kwibutsa abantu bose kwirinda amacakubiri kuko ntacyo amariye igihugu n’abagituye.
Yagize ati "Twese duharanire ubumwe bw’Abanyarwanda, tuzirikana ko gushyira hamwe ari byo bizubaka igihugu, tukiyubakira u Rwanda twifuza."

Mu kwibuka ku nshuro ya 32 Jenoside yakorewe Abatutsi, bazirikana Abatutsi bakoraga muri IRST (NIRDA y’ubu), abakora muri iki kigo banegeranyije amafaranga yavuyemo ubushobozi bwo kubakira ababyeyi babiri barokotse Jenoside bahoze bahakora ubu bakaba bari mu kiruhuko cy’izabukuru. Abo babyeyi bari batuye mu nzu zendaga kubagwaho.

Amafaranga begeranyije kandi azavamo ubushobozi bwo kurihira mituweri abatishoboye 300, nk’uko bivugwa na Dr. Christian Sekomo, umuyobozi mukuru wa NIRDA.

Uru rugo mbonezamikurire rwa Ngoma ruherereye mu Karere ka Huye, Umurenge wa Ngoma, rwubatswe ku nkunga ya Banki y’Isi. Ruzajya rwakira abana guhera ku mezi atandatu kugeza barangije umwaka wa 2 w’ ishuri ry’inshuke, kandi kuri ubu ruri kwigiramo abana 20 bari hagati y’amezi 6 n’imyaka 2, ndetse na 60 bari mu mashuri y’inshuke.

Ababyeyi bafite abana muri uru rugo bararwishimiye kubera ko rwita ku bana babo kuva saa mbili za mu gitondo kugeza saa kumi n’imwe za nimugoroba, bityo bakabasha gukora badahangayikishijwe no kubitaho, bakabasha guteza imbere ingo zabo.

Nyiramana Valentine, umwe muri abo babyeyi, ahafite abana babiri. Uw’umwaka umwe n’uw’imyaka 3. Kubura uwo abasigira mu rugo byatumaga umurimo we w’ubudozi no gucuruza utagenda neza, none ubu arishimira ko urwo rugo rwamubereye igisubizo.

Agira ati "Iyo nabaga nta mukozi mfite mu rugo wo kubasigira narasibaga bigatuma abakiliya bagenda bancikaho, ariko ubu byarakemutse, n’imirimo yanjye yatangiye kugenda neza, ndagana mu iterambere."

Ababyeyi bishimiye uru rugo mbonezamikurire y’abana bato

Mu Karere ka Huye hari hasanzwe ingo mbonezamikurire 1221, harimo 1087 zo mu ngo, 20 zo hafi y’ingo, 111 ziri mu mashuri abanza n’izindi 3 z’icyitegererezo, nk’uko bivugwa n’umuyobozi w’Akarere, Sebutege Ange.

Agira ati "Mu ngo mbonezamikurire zo mu ngo ababyeyi bamwe basigarana abana abandi bakajya ku mirimo, bakagenda basimburana, ariko usanga mu mijyi ho nta wuba yahasigaye. Ni yo mpamvu hatekerejwe bene izi ngo mbonezamikurire z’icyitegererezo kugira ngo n’ababyeyi bo mu mijyi badafite ababasigaranira abana babashe kujya ku mirimo ntacyo bikanga."

Minisitiri w’Uburinganire n’Iterambere ry’Umuryango atangiza ku mugaragaro uru rugo yibukije ko Leta y’u Rwanda yashyize imbaraga mu ngo mbonezamikurire kubera ko ubwonko bw’umwana bukura ku rugero rwa 80% mu myaka itatu ibanza, na 90% mu myaka itanu ibanza.

Minisitiri w’Uburinganire n’Iterambere ry’Umuryango, Uwimana Consolée

Yashishikarije rero ababyeyi bose kuzifashisha, ariko anabasaba ko zitababera izo gusigamo abana babo gusa, ahubwo no gufatira ku nyigisho na bo ubwabo bazihererwamo, bakubaka umuryango uhamye.

Yagize ati "Uru rugo ntiruzabe aho gusiga abana ngo mugaruke muje kubatora gusa, ahubwo rube urwo gutuma muteza imbere imiryango yanyu mu mibanire myiza no mu bukungu."

Yunzemo ati "Turabasaba kwirinda amakimbirane n’indi myitwarire mibi ihungabanya imibereho y’abana n’iy’abagize umuryango. Mureke twese dufatanye kubaka umuryango ushoboye kandi utekanye."

Ange Sebutege uyobora Akarere ka Huye agaragaza ko ingo mbonezamikurire z’icyitegererezo ari ingirakamaro kuko zifasha ababyeyi kujya ku mirimo ntacyo bikanga

Kubaka uru rugo mbonezamikurire rw’icyitegererezo rwatashywe mu Karere ka Huye Kuri uyu wa 24 Werurwe byatwaye amafaranga agera kuri miliyoni 211. Haratahwa n’urundi nka rwo i Rusizi ku wa Gatatu tariki ya 25 Werurwe, ndetse n’i Rubavu ku wa Gatanu tariki 27 Werurwe 2026.

Icyakora hari kubakwa n’izindi 12 mu Turere twa Nyamagabe, Ruhango, Bugesera, Gakenke, Karongi, Kayonza, Nyaruguru, Ngororero, Rutsiro na Nyabihu.

Abayobozi babigarutseho mu nama bagiranye n’abashoramari banyuranye, ku bufatanye n’Urwego rw’igihugu rw’Iterambere (RDB), kuri uyu wa 11 Ukuboza 2025.

Janvier Gashema, umuyobozi wungirije w’aka Karere ushinzwe iterambere ry’ubukungu, yagaragaje ko nyuma yo gushyira kaburimbo mu muhanda ugana i Kibeho, hakanubakwa ibitaro binini ubu byagizwe ishami ry’ibitaro bya gisirikare bya Kanombe, abakerarugendo nyobokamana basura Kibeho bagenda biyongera.

Yagize ati "Mu myaka itatu ishize , abaza gusengera i Kibeho babarirwaga mu bihumbi 600 ku mwaka, ariko ubu bikubye kabiri. Abo bakerarugendo kandi bakenera aho kurara ndetse n’aho kurira, mu gihe kugeza ubu i Nyaruguru hari ibyumba 496 gusa. Abashoramari mu macumbi n’amaresitora byagenewe ibyiciro binyuranye by’abantu, barakenewe."

Yanasobanuye ko bafite intego yo kuzamura abasura Kibeho, bakazagera byibura kuri miriyoni 15 ku mwaka, mu myaka icumi iri imbere, mbese nk’uko za Lourdes, Jerusalem na Fatima basurwa n’abagera kuri uwo mubare, buri mwaka.

Visi Meya Gashema yanagaragaje ko uretse ubukerarugendo nyobokamana, i Nyaruguru hari n’amahirwe ku bifuza kuhashora imari mu bijyanye n’ubukerarugendo bushingiye kuri Pariki ya Nyungwe ndetse no ku mirima ibereye ijisho y’icyayi, yafasha abayisuye kuruhuka.

Ikindi cyafatirwaho, ni ukuba Umuhamirizo w’Intore, ukomoka ahitwa i Ngeri mu Murenge wa Munini warashyizwe mu Murage w’Isi.

Ati "Hari gutekerezwa uko i Ngeri hakubakwa igicumbi cy’umuhamirizo w’intore. Icyo gicumbi na cyo cyashyirwa mu hasurwa n’abakerarugendo baje mu Rwanda."

Iki gitekerezo cyashyigikiwe n’abakunze gukurikirana amateka n’umuco, bavuga ko cyafasha mu guteza imbere Nyaruguru, ndetse n’abayobora ba mukerarugendo.

Jérôme Kajuga ukora muri Komisiyo ya UNESCO yagize ati "Hanatekerezwa ku ishuri ry’umuhamirizo ryajya ryigishirizwamo ubwoko bwose bw’imihamirizo", maze yungamo ati "Kuki Nyaruguru itagira itorero rya mbere mu gihugu? Kuki tutahuza iyobokamana n’umuco wacu bityo tukarushaho guteza imbere Akarere kacu?"

Mu bindi byashorwamo imari i Kibeho harimo parikingi y’imodoka, kubera ko byagaragaye ko ku munsi mukuru wa Bikira Mariya n’uw’amabonekerwa i Kibeho hasurwa n’abantu benshi cyane, imodoka zikabura aho ziparika.

Hari n’umushinga wo gutunganya ibishanga bikikije Kibeho ku buryo byazajya bifasha abantu kuruhuka, n’uwo gukora ibiryo by’amatungo. Hakenewe kandi abavunja amafaranga kuko byagaragaye ko abanyamahanga bahaza babura aho bavunjishiriza, amashuri...

I Nyaruguru kandi hashobora gushorwa imari mu buhinzi bw’icyayi n’ubwo gutubura imbuto y’ibirayi.

Ku bijyanye n’ubuhinzi bw’icyayi, i Nyaruguru haracyari ubutaka budahinze nyamara icyayi gishobokana n’ubusharire buboneka mu butaka bwaho, n’abagihinga bakaba baracyise "Inka idateka" kubera akamaro kibafitiye mu by’ubukungu.

Visi Meya Gashema ati "Kugeza ubu muri Nyaruguru hamaze guterwa icyayi kuri hegitari ibihumbi icyenda, kandi intego ni uko muri 2029 kizaba kimaze guterwa kuri hegitari ibihumbi 12."

Ku bijyanye n’ubutubuzi bw’imbuto y’ibirayi, kugeza ubu i Nyaruguru hakenerwa toni ibihumbi 18 by’imbuto ku mwaka, nyamara ho babasha kwibonera toni ibihumbi bibiri gusa, ari na yo mpamvu hifuzwa abashoramari babyitabira.

Athanase Ndagijimana, umushoramari mu butubuzi bw’imbuto z’ibirayi witabiriye iyi nama yavuze ko yiteguye gufasha abashaka kubikora muri Nyaruguru, akanabafasha kubona ibikoresho byifashishwa mu gukora inzu zagenewe gutuburiramo imbuto (green house).

Visi Meya Gashema anavuga ko i Nyaruguru hari n’amashyamba menshi y’inturusu yakwifashishwa mu gutunganya imbaho bityo hakagabanuka amafaranga yo kujya kuzishakira hanze, dore ko ngo u Rwanda rusohora miriyoni 20 z’amadorari buri mwaka mu gutumiza imbaho hanze.

Ati "Ayo mashyamba y’inturusu yanakwifashishwa mu gutunganya amavuta ava mu mababi y’inturusu (huiles essentiels). U Rwanda rwinjije miriyoni eshatu n’ibihumbi 800 by’amadorari mu kohereza ayo mavuta hanze y’u Rwanda mu mwaka ushize."

Abo bagore ni abibumbiye mu matsinda afashwa n’umuryango AEE, mu mushinga REDAA (Reversing Environmental Degradation in Africa and Asia) ukorera mu Mirenge ibiri yo mu Turere twa Huye (Gishamvu na Mukura) n’ibiri yo muri Gisagara (Mugombwa na Ndora).

Aba bagore basanzwe bahurira mu matsinda bakizigamira bakanagurizanya, ariko mu rwego rwo kugira ngo babashe kubona ingemwe z’ibiti byo kwifashisha mu kurengera ibidukikije, hari amatsinda amwe n’amwe yigishijwe uko bategura pepiniyeri, bagahumbika ibiti bakanabishyira mu bihoho, hanyuma bagafasha amatsinda yose ndetse n’abaturanyi kubona ingemwe z’ibiti bivangwa n’imyaka.

Nk’abibumbiye mu itsinda Dukorane Umurava Kabeza ryo mu Murenge wa Mukura, bavuga ko bari mu mwaka wa kabiri bakorana na REDAA, kandi ko babona baramaze kumenya uko bategura ingemwe za Gereveriya, Siderera, Kariyandara, ibinyomoro na marakuja.

Ibi biti bazi gutunganyiriza ingemwe ngo birakenewe cyane, n’abantu batangiye kumva akamaro kabyo kubera ko babibabaza, ariko na none ngo hari izindi ngemwe bo ubwabo bumva bakeneye kimwe n’abaturanyi bakorera ariko batazi gutunganya ari zo avoka, amacunga n’amapapayi.

Uwitwa Françoise Mukantwali agira ati « Mbere ntabwo twari tuzi akamaro k’ibiti. Barabiduhaga muri Tubura, tukabona ari ibintu byoroheje, bimwe tukanabijugunya. Ariko aho twaherewe amahugurwa ku kamaro kabyo, tukamenya no kubyinaza imyumvire yarahindutse.

Akomeza agira ati « Abaturage bifuza avoka, amaronji (amacunga) n’amapapayi mu guharanira kubona indyo yuzuye. Ibi byose batwigishije uko twabasha kubyikorera byarushaho kudufasha. »
Aba bagore bo mu Murenge wa Mukura banavuga ko batekereza ko habonetse ingemwe zihagije ahari byakuraho ko hari abatera ibiti by’imbuto baba babashije kubona, bwacya bakisanga byibwe n’abo batazi.

Ibyo bavuga bishimangirwa n’abibumbiye mu Itsinda Abizeranye Cyambwe bo mu Murenge wa Gishamvu banongeraho ko baramutse bigishijwe uko bategura ingemwe za avoka, amacunga n’amapapayi bazabasha kubigira umwuga ubabyarira inyungu igihe bazaba batagikorana na REDAA.

Marie Chantal Uwitonze ukiriye aya matsinda agira ati « Kugeza ubu inyungu dukura mu gutunganya ingemwe mu mushinga REDAA ni ubumenyi, n’abana bacu bakabona amafaranga baguramo amakaye cyangwa inkweto kubera ko ari bo bapakira ibihoho, kandi bakabihemberwa.»

Akomeza agira ati « Ibyo turi gukora ariko, tubikuramo amasomo n’ubumenyi. Igihe AEE izaba itagihari tuzegeranya amafaranga, twigurire umwayi, tuzajye tubyikorera hanyuma tuzajye tugurisha. »

Wherny Namara, umukozi wa AEE ukurikirana ibikorwa bya REDAA umunsi ku wundi, avuga ko icyifuzo cya bariya bagore kizitabwaho.

Yagize ati "Kugeza ubu ibiti by’imbuto twabibashakiraga tukabibaha, ariko ubwo babishaka tuzabigisha kubyikorera, tubahe n’ingendoshuri zibafasha kurushaho kubyumva."

Francine Mukankusi, agronome w’Umurenge wa Mukura, na we yagize ati « Ingemwe z’amapapayi hari igihe zakorwaga, ukabona abantu batazishaka. Kubera ko dushishikariza buri rugo kugira byibura ibiti bitatu by’imbuto, basigaye bavuga ko bazikeneye. Tuzabivuganaho n’abafatanyabikorwa dukorana, zizaboneke. »

Ashyigikiye kandi igitekerezo cya bariya bagore bafite intego yo kuzakomeza gutunganya ingemwe z’ibiti bivangwa n’imyaka, igihe bazaba batagikorana na AEE, kuko ngo uretse ibiti by’imbuto, n’« ibivangwa n’imyaka nta gihe bitazakenerwa kubera ko iyo ubitemye bidashibuka, bikaba ngombwa ko utera ibindi. »

Inkongi yibasiye ububiko bw’ikimpoteri cya Huye

Ikimpoteri cya Huye giherereye mu cyanya cyahariwe inganda, ahitwa i Sovu mu Murenge wa Huye.

Nk’uko bivugwa n’abakozi ba kampani yitwa Green Care Rwanda Ltd, ari na yo yegeranya imyanda muri icyo kimpoteri ikayibyaza ibintu binyuranye, amasitoke yibasiwe n’inkongi yari arimo ibintu bitandukanye birimo ifumbire y’imborera yakuwe mu myanda ibora, ndetse n’indi myanda itabora irimo imyenda, ipamba n’ibindi bikoresho bikoze muri pulasitiki.

Imwe mu myanda itabora yari yaramaze kwegeranywa hifashishijwe imashini ituma babasha kuyihambira, hanyuma ikajyanwa ahabugenewe nko mu nganda zongera kuyibyaza ibindi bikoresho, indi na yo yari itegereje kwegeranywa. Yashyanye n’iyo mashini.

Bitewe n’uko ibyinshi mu byari muri ubwo bubiko bikoze muri pulasitiki, kubizimya byakomeje kugorana n’ubwo Polisi yatabaye yifashishije kizimyamoto ebyiri.

Kizimyamoto zirimo gusukamo amazi, hanyuma bigasa n’aho bitangiye kuzima, yajya kuzana andi mazi cyangwa yimukiye ahandi hakiri kugurumana, ha handi hasaga n’aho hatangiye kuzima umuriro ukongera ukihembera, maze ukongera ukaka.

Ku bijyanye n’icyaba cyateye iyo nkongi, Annuarita Umuhoza uyobora ibikorwa bya Green Care Rwanda Ltd mu kimpoteri cya Huye, yavuze ko kugeza ubu batarakimenya.

Ati “Inkongi itangira hari mu gihe cy’ikiruhuko cya saa sita. Aho twari turi turimo turuhuka twagiye kubona tubona umwotsi, tugerageje kuzimya na kizimyamoto zisanzwe biranga kuko mu byari byamaze gufatwa harimo amashashi n’amapamba. Byaturushije imbaraga.”

Akomeza agira ati “Uyu munsi nta n’umuntu wahakoreye ngo tube twavuga ko inkongi yaturutse kuri umwe muri twebwe. Twarimo dukorera mu mahangari ya ruguru.”

Ngo ntibaranamenya agaciro k’ibyahiye kuko bataricara ngo bagerageze kubyibuka.

Polisi yatabaye

Hari ibyo babashije gusohora

VIDEO - Ikimpoteri cya Huye cyafashwe n’inkongi, yibasira igice cy’inzu zizwi nka hangari zitunganyirizwamo imyanda ndetse no mu bubiko bw’ifumbire yamaze gutunganywa.

Giherereye i Sovu mu Murenge wa Huye mu cyanya cy'inganda. Hatangiye gushya mu ma saa sita z’amanywa, kugeza… pic.twitter.com/6bNnuaOnUu

— Kigali Today (@kigalitoday) June 25, 2025

Kuwizihiza bwa mbere byabaye mu kinyejana cya cumi na gatatu biturutse ku mubikira Yuliyana wa Koroniyo (Julienne de Cornillon), muri Diyoseze ya Liyeje (Liège) mu Bubiligi, nk’uko byavuzwe na Padiri Eric Twizigiyimana, mu nyigisho yagejeje ku bakirisitu bitabiriye kwizihiza uyu munsi kuri Katedarari ya Butare.

Yagize ati "Kugeza icyo gihe nta mihango yabagaho yo kuramya no gushengerera Isakaramentu Ritagatifu. Nyuma yo guhaza basigazaga Isakaramentu rigenewe abarwayi n’abagiye gupfa, nta kindi babaga bagambiriye. Kuva mu 1209, umubikira Yuliyana yagize amabonekerwa menshi, maze umunsi umwe ahishurirwa ko hari umunsi ubuze muri Kiliziya gatolika ari wo w’Isakaramentu Ritagatifu."

Uriya mubikira yasabwe guharanira ko wajyaho kugira ngo abakirisitu bemere ko Yezu Kristu ari mu Isakaramentu ry’Ukaristiya, ubutumwa arabutangira, ariko ahura n’ibitotezo.

Padiri Twizigiyimana ati "Abakire bo muri uwo mujyi bahagurukiye kumurwanya kuko basabwaga gusiba kurya kuri uwo munsi, ntibabone uko binezeza. Abihayimana na bo bamurwanyije bamushinja kwihangishwaho. Byamuviriyemo guhunga, ava aho yari atuye mu muryango, akihishahisha mu bigo by’abihayimana ava muri kimwe ajya mu kindi."

Ibyo bitotezo ntibyamubujije gukomeza gushishikariza abantu uwo munsi mukuru waje kwemerwa na Papa Urban wa 4 tariki ya 8 Nzeri 1264.

Padiri Twizigiyimana yanavuze ko icyemezo cya Papa Urban cyanafatiye ku kuba muri icyo gihe hari umupadiri w’i Boheme witwa Petero wa Prage washidikanyaga bikomeye ko Yezu ashobora kuba ari mu bimenyetso by’Umugati na Divayi, waje kubigaragarizwa mu buryo bufatika.

Ati "Umunsi umwe uriya mupadiri yari yakoze urugendo nyobokamana, arimo atura igitambo cya Misa, ageze mu gihe cya konsekarasiyo (aho padiri azamura umugati na Divayi yigana Yezu wavuze ko ari umubiri n’amaraso ye) abona Hositiya ihindutse ukundi, ifata ibara ry’iroza, maze itangira kuva amaraso, ibitonyanga byayo bigwa ku nsasirwagitambo no hasi kuri sima."

Icyo gihe uwo mupadiri ngo yahise agwa mu kantu, abura icyo akora n’icyo areka, nuko kera kabaye yigira inama yo gusubika igitambo cya Misa, afata rya sakaramentu arijyana mu Sakirisitiya.

Ibi byahuruje abantu benshi harimo na Papa Urban wa 4, waje gutangaza ku mugaragaro ko hagomba kubaho muri Kiliziya umunsi mukuru w’Isakaramentu Ritagatifu kugira ngo abakirisitu "baramye Yezu uri wese mu gisa n’Umugati na Divayi".

Uwo munsi yawushyize ku munsi wa kane ukurikira iminsi umunani nyuma ya Pentekositi, awugira itegeko ku bakristu bose, anasaba uwaje kuba Mutagatifu Tomasi w’Akwini gushyira ku murongo ibijyanye n’uko uzajya ugenda.

Icyakora, icyo gihe habayeho abasenyeri n’abahanga mu bya tewolojiya (inyigisho z’ubuhanga mu by’iyobokamana) barwanyije icyo cyemezo, byatumye Papa Clement wa 5 akigarukaho, yemeza burundu uwo munsi mu 1311.

Padiri Twizigiyimana ati "Kugeza kiriya gihe ariko, umutambagiro ntiwagendaga nk’uko tuwuzi uyu munsi. Washyizweho na Papa Yohani wa 22, mu 1318, wasabye ko igihe bizihiza uwo munsi abakirisitu bazajya bakora umutambagiro mu muhanda no mu mayira kugira ngo Yezu ayihe umugisha."

Inama Nkuru ya Kiliziya yabereye i Taranti mu 1545 kugeza 1563 na yo yemeje uwo mutambagiro, maze ihamya ko iyo abakirisitu batambagiza Isakaramentu Ritagatifu ku manywa y’ihangu baba bahamya ukwemera kwabo ko Yezu ari rwose mu Isakaramentu Ritagatifu ry’Ukaristiya.

I Roma ho umutambagiro watangiye gukorwa mu kinyejana cya 15, igihe Nicolas wa 5 yari Papa.

Umuganda wo kubakira abatishoboye witezweho ibisubizo

Yabigaragarije abafatanyabikorwa bakorana, banatangiye kugaragaza uruhare rwabo mu cyumweru cy’ubujyanama n’ubufatanyabikorwa, bagize guhera ku itariki ya 17 kugeza ku ya 20 Kamena 2025.

Ubundi, uyu muyobozi avuga ko muri Nyaruguru hari ingo 755 zikeneye gufashwa kubona aho kuba. Muri zo harimo 74 z’abatagira aho kuba, 633 z’ababa mu nzu zimeze nka nyakatsi, 16 z’abatuye mu manegeka na 32 z’abasenyewe n’ibiza.

Uyu muyobozi agira ati “Icyumweru cy’ubujyanama n’ubufatanyabikorwa cyari gifite insanganyamatsiko ivuga ngo ‘Ubufatanye mu gukemura ibibazo bibangamiye imibereho myiza y’abaturage ndetse no kubakura mu bukene’. Ni yo mpamvu mu gitondo twakoraga umuganda wo kubakira abatishoboye, mu gihe mbere icyumweru cy’ubujyamana n’ubufatanyabikorwa cyari icyo gutaha ibikorwa.”

Muri icyo cyumweru kandi hegeranyijwe amabati 1067, imifuka 330 ya sima, inzugi 40 n’amadirishya 80 ndetse n’amafaranga Miliyoni eshanu yo kuzagura andi mabati kimwe n’amadirishya n’inzugi, byo kubakira bamwe muri abo 755. Hatanzwe kandi amafaranga ya mituweli ku baturage 944, matela 26 n’imikeka 90.

Abaturage bashishikariye gufasha bagenzi babo kubona aho kuba

Mu rwego rwo gufasha abakene kubwikuramo kandi, abafatanyabikorwa batanze ingurube 277, inka eshanu ndetse na Miliyoni eshatu n’ibihumbi 50 byo gutangiza imishinga yo kwikura mu bukene.

Abafatanyabikorwa b’Akarere ka Nyaruguru kandi, biyemeje ko mu ngengo y’imari y’umwaka utaha wa 2025-2026, bazakomeza kugenda batanga amafaranga yo gufasha mu gikorwa cyo gukemura ibibazo bibangamiye imibereho myiza y’abaturage, kabone n’ubwo bitaba bijyanye n’ibyo basanzwe bafashamo.

Faustin Kanani uhagarariye umuryango IPFJ ubusanzwe ukora ibijyanye no kubungabunga ibidukikije, ufasha abaturage kubona ingemwe z’ibiti by’imbuto n’iz’ibivangwa n’imyaka, agira ati “Muri iyi minsi twatanze sima, ariko mu ngengo y’imari itaha tuzagira uruhare mu kugura amabati azifashishwa mu kubakira abatishoboye.”

Mu kubakira abatishoboye hanabumwbe amatafari

Mu cyumweru cy’umujyanama n’umufatanyabikorwa hatanzwe ibikoresho byo kubakira abatishoboye

Abaturage banahawe ingurube

Ni amakuru dukesha Umunyamabanga Nshingwabikorwa w’Umurenge wa Ruheru, Jean Bosco Kayiranga, unavuga ko umurambo w’uwo mubyeyi wari wajyanywe gupimirwa mu kigo cya RFI, naho ushinzwe ubutaka yari yagiye gusura, wari utaramara n’ukwezi muri izo nshingano, we ubu ari mu maboko ya RIB.

Ubundi uwo mubyeyi wapfuye yitwa Esther Mukeshimana. Yavutse mu 1995, akaba asize abana batanu. Yari umudiyakoni mu Itorero ry’Abametodiste i Nyagatare, kandi yari atuye mu Mudugudu wa Busana, Akagari ka Barija, Umurenge wa Nyagatare. Umugabo we ngo akora umurimo wo kurangurira abantu ibintu yifashishije igare.

Amakuru dukesha umuturanyi wa Valens Niyonsaba, ari we Mukeshimana yari yagiye gusura, avuga ko amakuru acicikana iwabo mu Mudugudu wa Gambiriro, Akagari ka Kabere, Umurenge wa Ruheru, ari uko Mukeshimana yageze iwabo ku wa Gatanu tariki 13 Kanama, akaharara mu buryo butazwi.

Ku wa Gatandatu tariki 14, Niyonsaba usanzwe ari umupasitoro, ngo akaba ari na we washyingiye Mukeshimana n’umugabo we, yamusize mu rugo ajya ku kazi, undi aza kumutelefona amubwira ko abona nta biryo biri mu rugo, ko atekereza guteka ahereye ku bishyimbo.

Umuturanyi ati "Undi yamurangiye aho biherereye, saa sita ataha agiye kurya, akomanze abura umufungurira, abaza abaturanyi niba batamubonye baramuhakanira, nuko ajya kurya mu isantere. Nimugoroba agarutse yasanze hagifunze, hanyuma noneho ahamagara nyiri inzu, nuko amena ikirahure, basanga yumye."

Haketswe ko nyakwigendera ashobora kuba yarazize imbabura yari atetseho basanze hafi ye, ariko umuturanyi we i Nyagatare yabwiye Kigali Today ko yari asanzwe arwara umutima.

Ubundi ngo nyakwigendera yari yavuye mu rugo abwiye umugabo ko agiye mu bukwe i Kigali, hanyuma umugore wa pasitoro basanzwe ari incuti, kandi banaturanye, amuha ibyo ari bumufashe akamwoherereza ageze i Kigali, kuko yari yamubwiye ko atari buharenge.

Nyakwigendera yashyinguwe i Nyagatare aho yari atuye n’umuryango we.

Amashanyarazi y’imirasire y’izuba bahawe ntagikora

Nko mu Murenge wa Ruheru, abatuye cyane cyane mu bice byegereye umupaka n’ishyamba rya Nyungwe bahawe amashanyarazi y’imirasire, usanga bavuga ko batagicana, bakifuza guhabwa ibyuma bishyashya cyangwa se bagahabwa ay’umurongo mugari.

Athanase Mazimpaka utuye mu Mudugudu wa Shenyi mu Kagari ka Kabere agira ati "Bari bakoze neza baduha amashanyarazi. Keretse uwari utarashinga urugo icyo gihe, abandi nta wari wasigaye. Ariko byarapfuye. Nta burambe byari bifite! "

Akomeza agira ati "Hirya no hino twumva abandi bavuga ko bafite amashanyarazi anyuzwa mu nsinga. Natwe azatugezweho. Icyakora twabonye bari kuduha amazi, ubanza n’amashanyarazi bazagera aho bakayaduha!"

Nyirashumbusho wo mu Ryanyaruja mu Kagari ka Gitita, na we ati "Amatara barayaduhaye, akaka ariko byaje gupfa burundu. Ubu ntiducana, tuba mu kizima."

Umuturanyi we na we ati "Turacana mu kanya gato k’iminota nka 30 bikaba birazimye. Rwose bazaduhindurire baduhe ibyuma bishyashya. Mbere byarakaga bikagera nka saa sita z’ijoro. Hari n’ibyakaga bikageza mu gitondo. None ubu byarazimye burundu."

Undi na we ati "Nta mwaka twacanye. Tubarwa nk’abafite amashanyarazi kandi ntayo."

Uwitwa Mukamana na we ati "Byapfuye tukibifata. Bamwe bagakeka ko ari ukubera imigozi imbeba zariye, ariko bareba bagasanga ni mizima. Urebye kuri buri nzu hari umurasire, ariko ntacyo itumariye. Telefone ni ukugenda isaha ugiye gusharija."

Umukobwa w’umwangavu w’i Nyacyonga mu Kagari ka Gitita, wiga mu mashuri yisumbuye na we ati "Nyuma y’icyumweru kimwe gusa byahise bipfa. Byatangiye byaka bigahita byikupa, umuriro ugakendera gake gake, hanyuma ukazima burundu. Ibyo kwigira mu rugo byabaye amateka."

Theogene Makuza, Umunyamabanga Nshingwabikorwa w’Akarere ka Nyaruguru, avuga ko abafite bene icyo kibazo bagenda babasanira buke bukeya.

Icyakora, abatuye mu Murenge wa Ruheru baganiriye na Kigali Today bo bavuga ko nta muntu bigeze babona uza kubafasha.

Uyu mwaka wa 2025 ngo uzarangira abafite amashanyarazi asanzwe ari 54%

Makuza anavuga ko bari kugenda babazanira amashanyarazi y’umuyoboro mugari kuko ari yo aramba.

Ati "Ku bufatanye na REG tugenda dushaka uko abaturage bagerwaho n’amashanyarazi yo ku muyoboro mugari kuko twasanze ari wo uramba unafasha abaturage kwiteza imbere kuko ubafasha gusudira, kogosha, n’ibindi byinshi."

Kugeza ubu mu Karere ka Nyaruguru babara ko abamaze kugezwaho amashanyarazi ari 86.7% kandi ko 48.68% bafite akomoka ku mirasire y’izuba naho 38.1%, bakaba ari bo bafite asanzwe y’umuyoboro mugari.

Icyakora ngo uyu mwaka wa 2025 uzarangira abafite ay’umuyoboro mugari bageze kuri 54%, kandi intego ni uko bazaba bageze ku 100% mu mwaka wa 2029.

Diane Mutimucyeye amaze guserukira u Rwanda kabiri abikesha kumenya imibare

Mutimucyeye ubu yiga mu mwaka wa gatandatu w’amashuri yisumbuye mu ishami ry’ubugenge, ubutabire n’ibinyabuzima (PCB), nyamara ntibimubuza gutsinda amarushanwa y’imibare ari na byo byamuhesheje kuba ku myaka 18 yaramaze kugera mu Bushinwa no muri Afurika y’Epfo.

Agira ati “Muri Afurika y’Epfo nabonye igihembo cya bronze (igihembo cya gatatu), mu marushanwa y’abakobwa bonyine n’amarushanwa rusange. Nagiye no mu Bushinwa ariko ho byari amahugurwa.”

Akomeza agira ati “Njya gukora amarushanwa icyizere cyo gutsinda cyari gihari ariko ntabwo cyari cyinshi cyane, kuko mba mvuga ngo abantu bazi imibare ni benshi. Cyari gike pe! Ariko kubera Imana ibintu byagenze neza.”

Ubwo mu ishuri yigamo bizihizaga yubile y’imyaka 25 rimaze rishinzwe, tariki 14 Kamena 2025, yabwiye bagenzi be ko gutsinda imibare nta kindi abikesha uretse gukora cyane, kwiga ashyizeho umwete, kudacika intege no gusenga ndetse n’ikinyabupfura.

Ahereye ku kuba kuva yiga mu mashuri abanza yari azi imibare, anayikunda, yasabye bagenzi be kutagira isomo bashyira ku ruhande, bagaharanira gutsinda yose kuko baba batazi irizabagirira akamaro.

Ati “Imibare n’andi masomo bikwiye kubahwa. Abanyeshuri bajye baha agaciro amasomo yose kuko nta wamenya. Bajye babagarira yose. Hari abajya bavuga ngo imibare irakomeye bakayitinya, ariko njyewe nayigiriyemo umugisha. Bituma numva nta somo dukwiye gusuzugura.”

Ishuri yigamo ryafunguye imiryango ku itariki ya 1 Ugushyingo 1999, kandi kuri ubu ryishimira ko mu myaka 25 rifite abaryizemo bagenda bagaragaza ubuhanga ku rwego mpuzamahanga.

Umuyobozi waryo, Mathias Ngezenubwo, agira ati “Twishimira yuko abo turera bahiganwa no ku ruhando mpuzamahanga bagatsinda. Turishimira ko no mu mikino muri uyu mwaka muri Handball tuyoboye mu Rwanda, tukaba tuzahagararira Igihugu cyacu mu mikino ya FEASSA izabera muri Kenya muri Kanama 2025.”

Mu bindi ririya shuri ryishimira ni uko mu bahize hari abakomeje kwiga bakaba n’abadogoteri, harimo n’uwitwa Olivier Uwishema uherutse guhabwa igihembo gitangwa n’Ubwami bw’u Bwongereza nk’umushakashatsi mu buvuzi bw’ubwonko.

Jean Marie Vianney Dunia waryizemo, akaba uwa mbere wayoboye abanyeshuri bahigaga (doyen), mu gihe cy’imyaka ibiri, yishimira intambwe ririya shuri yizemo rimaze gutera.

Ati “Ishuri ryacu rigenda ryiyubaka. Turashima ko zimwe mu ngorane zari zihari ritangira zakemutse uyu munsi, tukaba tubona bafite Laboratwari, hari abarimu b’inzobere, inyubako zariyongereye, ikigo cyaragutse mu buryo bwose. Mu mikino natwe twarakinaga, ariko si nk’uyu munsi.”

Mutimucyeye ashishikariza bagenzi be kudatinya imibare ahubwo bakayiha umwanya

Abahize kandi ntibishimira gusa ubumenyi bahakuye kuko kuri ubu biyemeje kwegeranya ubushobozi bakazareba umushinga watuma ikigo kibasha kubona amafaranga ahagije, n’abakigamo bakarushaho kugira ubuzima bwiza.

Théoneste Kabahizi, umwe muri bo wabaye rwiyemezamirimo, avuga ko bari gutekereza kuzubakira ishuri uruganda rutunganya ibigori, kuko ngo barebye bakabona nta na rumwe ruri hafi yaryo. Kandi batekereza ko ruhari rwagirira akamaro ishuri n’abaryigamo ndetse n’abarituriye babona akazi ndetse n’aho bagurisha umusaruro wabo.

Rifungura imiryango mu 1999, ishuri rya siyanse rya Nyamagabe ryari rifite abanyeshuri 84, ariko kuri ubu ririmo 801.

Gervais Butera Bagabe avuga ko umucuruzi wagize uruhare muri Jenoside atumvaga umurimo we

Yabibwiye abikorera bo mu Karere ka Huye ubwo bibukaga ku nshuro ya 31 Jenoside yakorewe Abatutsi mu mwaka w’1994, bazirikana by’umwihariko abikoreraga bazize Jenoside.

Yagize ati "Kumva ko uwikorera yagiye mu macakubiri ni ibintu biteye agahinda, kubera ko uwikorera agize umugisha yabona abamusanga, bamwegera."

Yunzemo ati "Uwikorera wagize uruhare muri Jenoside buriya yumvaga umurimo we koko? Wishe umuntu uba wishe igikorwa cyawe kuko uba wishe umukiriya."

Léopold Mubera, Uwikorera wo mu Karere ka Huye, na we ati "Uwikorera ntiyagombye kujya mu macakubiri kubera ko umuntu agurirwa n’uwo azi ndetse n’uwo atazi. Ufite amangazini hinjiramo buri wese. Iyo utangiye kujya mu macakubiri biba byakunaniye."

Léopold Mubera ati Uwikorera ntiyagombye kujya mu macakubiri kubera ko umuntu agurirwa n’uwo azi ndetse n’uwo atazi

Yunzemo ati "N’ubwo iyo habaye imyivumbagatanyo abanyapolitiki babigenderamo, ariko burya ababihomberamo ba mbere ni abacuruzi. Ni yo mpamvu abikorera twibuka kugira ngo twumve neza ibyabaye muri iki gihugu cyacu no kugira ngo turwanye ibyakongera kukigirira nabi."

Umuyobozi w’Akarere ka Huye, Ange Sebutege, yabunganiye avuga ko hari abikoreraga bagiye batanga imisanzu yo kugura imipanga yo kwica Abatutsi, kandi ko hari n’abagenda bagaragarwaho ingengabitekerezo ya Jenoside, ariko ko bidakwiye.

Yagize ati "Mu myaka 31 ishize, isaha nk’iyi, umunsi nk’uyu, umunota nk’uyu, hari abahigwaga badashobora gukora imirimo yabo, hari n’ababahigaga baretse imirimo yabo bajya kwica abakiriya, isoko ryabo mu bucuruzi. Abikorera mukwiye kubimburira abandi mu kurwanya ingengabitekerezo ya Jenoside."

Muri iyi minsi abikorera bo mu Karere ka Huye bari kwegeranya ubushobozi kugira ngo bazagire uruhare mu gusana zimwe mu nzu z’abarokotse Jenoside batishoboye.

Hamwe n’abikorera bo mu Karere ka Huye, Meya Sebutege yunamiye Abatutsi baruhukiye mu rwibutso rwa Jenoside rwa Ngoma

Butera asaba abikorera bose kumva ko iki gikorwa kibareba kuko ibikorwa byo gufasha abatishoboye, harimo n’abarokotse Jenoside b’abakene, bifasha ababikorewe, ariko na bo bikabagarukira.

Ati "Uwikorera mwiza agomba gutekereza ko ibyo akoze mu nyungu rusange bimugarukira. Kubakira abatishoboye, kubaremera n’ibindi, ni ukwifasha kuko bitugarukira mu bindi buryo. Iyo umuntu yazamuye imibereho akuviramo umukiriya."

Bunamiye abikorera bazize Jenoside

Tharcisse Ntijyinama, Perezida wa Koperative Ingenzi Kamegeri ari na yo ihinga muri kiriya gishanga, avuga ko ibigori babiteye mu kwezi kwa Mutarama muri uyu mwaka wa 2025, byagera igihe cyo gutangira kuzana imbuto bimwe bikuma, n’ibyahetse bikabora.

Agira ati “Byageze igihe cyo gusambura biruma, n’ibigize ngo birarokotse bigaheka bikabora. N’ubu n’ibirimo intete ubona zaragiye zumiramo ziteze.”

Yunganirwa na Melena Mukamazimpaka, umunyamuryango muri iriya koperative ugira ati “Ikigori cyarahekaga, cyamara kuva muri nyina ukabona gihise cyuma nk’icyeze, wagitonora ugasanga cyaraboze mo imbere kandi kitaranatondaho intete.”

Ku bijyanye n’icyateye biriya bigori kurumba bene kariya kageni, hari abahinzi bavuga ko bumvise hari abavuga ko bishobora kuba byaraturutse ku mbuto itarahawe igihe cyo guhora, abandi bakavuga ko ari indwara yaje mu bigori biturutse ku mihindagurikire y’ikirere, kuko imvura yabaye nyinshi.

Icyakora, Jean de Dieu Dushimimana uhagarariye RAB mu Karere ka Nyamagabe n’aka Nyaruguru we avuga ko babonye byaraturutse ahanini ku mbuto itajyanye na kiriya gishanga, kubera ko iyahageragejwe ikanatanga umusaruro mwiza ari RHM 1601 na RHM 1611, nyamara ngo ntabwo ari zo zifashishijwe.

Asaba abahinzi rero kwifashisha imbuto iba yaragaragaye ko ari yo iberanye n’aho bahinga agira ati “Biba byiza igihe bagiye kugura imbuto kubanza kureba izihari, bakareba izo basanzwe bifashisha, bazibura bakagisha inama agronome ku zindi zakwifashishwa. Si ugupfa gufata imbuto iyo ari yo yose.”

Ku rundi ruhande ariko, Ntijyinama we avuga ko ibyo kumenya ko imbuto bahawe ikwiye cyangwa idakwiye bitaborohera nk’ababahinzi, ko bikwiye kurebwa n’abagoronome, cyane ko ari bo babafasha mu gukora komande y’imbuto, bakabahuza na kampani yatsindiye iryo soko.

Agira ati “Komande ikorerwa muri sisitemu, goronome w’umurenge n’uw’akarere bakabyemeza, hanyuma uwatsindiye isoko ryo gutanga imbuto na we yifashishije sisitemu akohereza fagitire, ikishyurwa, hanyuma abahinzi bakajya gufata imbuto.”

Abahinga muri kiriya gishanga ubu barahangayitse kubera ko ibigori bacyezagamo ari byo byabatungaga mu mpeshyi. Iyo bitegereje ngo babona nta na toni eshanu zizava muri kiriya gishanga cyose, mu gihe cyeragamo izibarirwa mu 140.

N’utugori twajeho ahanini kandi ngo ni utwavuye ku mbuto yaguzwe ku ruhande, iyo baguze ku watsindiye isoko yabaye nkeya.

Ntijyinama ati “Nkanjye mpinga kuri ari icumi, ariko nta n’ikilo nzahakura. Twezaga ibigori bimwe abanyamuryango bakabitahana bakabona igikoma bagashesha na kawunga, tugasigarana bikeya bizavamo ubwishyu bw’imbuto n’ifumbire. Ibi byose ubu ntabyo.”

Mukamazimpaka na we ati “Twezaga hagati ya toni 146 n’150, ariko nta n’ebyiri zizavamo! Muri koperative ni ho twabaga duteze amakiriro y’imibereho yo mu mpeshyi ku bigori. Inzara ni ndende sinzi ko tuzayihonoka. N’imbuto ndetse n’amafumbire ni koperative yabidukopye, ntituzi aho tuzakura ubwishyu.”

Nyuma y’uko iki kibazo cyamenyekanye, umwishingizi Radiant yaraje ababarira ibyo bagomba kwishyurwa, ariko kuri ubu baribaza igihe bazishyurirwa kugira ngo babashe kubona byibura amafaranga yo kwishyura koperative.

Icyakora, umuyobozi wungirije w’Akarere ka Nyamagabe ushinzwe ubukungu, Thadée Habimana, avuga ko bitazatinda, kandi ko bazishyurwa miliyoni 14.

Imiti ikorwa na NIRDA igiye kujya ku isoko

Uyu muyobozi avuga ko iyo miti ari ikomoka ku bimera bamaze igihe bakoraho ubushakashatsi, kandi ko kugeza ubu iyo baboneye umuterankunga uzakora myinshi ikajya ku isoko ari itatu ari yo Batankor uvura inkorora, Calandular wifashishwa mu kuvura indwara z’uruhu ndetse na Rusendina wifashishwa n’abarwaye za rubagimpande.

Kuri ubu barimo gutunganya icyumba kizashyirwamo imashini zizajya zifashishwa mu gukora iyo miti, ku bufatanye n’umuryango FXB ari na wo uzayishyira ku isoko.

Agira ati "Hari gukorwa icyumba cyihariye kizajya gikorerwamo iyo miti, ku buryo izajya igisohokamo izajya iba imeze neza. Imiti yo kuyikora byararangiye, hasigaye gutangira gukora myinshi. Umwaka utaha byanze bikunze uzarangira yaramaze kugera ku isoko."

Muri Laboratwari ya NIRDA

Mugwiza anavuga ko urebye aho gukorera iyo miti hujuje ibisabwa n’imirima ihagije yo guheraho bakora imiti, biri mu byo bari basabwe n’ikigo gishinzwe imiti mu Rwanda (RFDA), kugira ngo bahabwe uruhushya rwo gutangira kuyikora ari myinshi, kandi ko umwaka utaha bazaba babikemuye.

Ba rwiyemezamirimo bashishikarijwe guha akazi abafite ubumuga kuko batiganda iyo bakagezemo

Babishishikarijwe mu nama bagiranye n’abakozi b’Ihuriro ry’Imiryango iharanira uburenganzira bw’abafite ubumuga (NUDOR), bagiranye ku wa 5 Kamena 2025.

Brigitte Murekatete, umukozi wa NUDOR muri porogaramu ishinzwe guteza imbere imibereho y’abafite ubumuga, mu mushinga Dukore Twigire, yavuze ko batekereje kwegera ba rwiyemezamirimo ngo babasabe gutanga akazi ku bafite ubumuga kuko byagaragaye ko batinya kukabaha batekereza ko badashoboye, nyamara atari byo.

Yagize ati "Byagaragaye ko ufite ubumuga iyo ageze mu kazi agakora neza, kuko nta biba bimurangaza. Agakorana umutimanama, kandi akagakora uko bigomba, ba rwiyemezamirimo rero baba bakeneye abakozi baza bagatanga umusaruro."

Kubera ko ngo byagaragaye ko muri rusange abantu bafite ubumuga bitinya, biturutse ku buzima baba baranyuzemo, yabasabye kuzajya babashaka, kandi ko umusaruro bizeye bazawubona.

Ati "Ba rwiyemezamirimo twabasabye kudategereza ngo naza nzamuha akazi, ahubwo bakaba batera intambwe, bakabaza inzego n’ubuyobozi bubakuriye. Niba wifuza ko ikigo cyawe kigira ubudaheza, wagateye intambwe kugira ngo ubabone."

Murekatete anavuga ko hataremezwa ibyagenerwa rwiyemezamirimo watanze akazi ku bafite ubumuga, ariko ko kugeza ubu abo bigaragaye ko babyitayeho babishimirwa bakanabiherwa agahimbazamusyi.

Pasitoro Juvenal Rwamunyana, umwarimu muri Kaminuza y’Abaporotesitanti (PUR), ahamya ko yasanze abafite ubumuga bashoboye kandi ko iyo bageze mu kazi bagakora batiganda.

Agira ati "Twakiriye umunyeshuri utabona mu ishami ry’uburezi, arangiza afite amanota meza (distinction), Kaminuza imuha imenyerezamwuga ry’amezi arindwi. Yakoreraga mu biro byanjye."

Akomeza agira ati "Yicaraga kuri mudasobwa ye, agakora akazi ke neza, agahaguruka mu gihe cy’ikiruhuko gusa. Abafite ubumuga na bo bafite ubwenge, by’akarusho ntibarangara."

Kaminuza akorera ngo inafite gahunda yo gutanga buruse yo kwiga masters ku ufite ubumuga.

Kuba abantu bafite ubumuga babura akazi nyamara ari n’abahanga, bihamywa na Charlotte Mukansanga wabirebeye ku muvandimwe we utuye mu Murenge wa Ntyazo mu Karere ka Nyanza.

Agira ati "Yitwa Elie. Yize Social Science, arangiza muri 2019, ubu yicaye mu cyaro iwabo. Yagerageje gushaka akazi ariko yarakabuze, nyamara yari umuhanga. Yatangiriye amashuri abanza i Gatagara, yiga n’ayisumbuye, abona buruse ya Leta ajya gukomereza muri Kaminuza y’u Rwanda."

Ba rwiyemezamirimo bagiriwe inama yo guha akazi abafite ubumuga biyemeje kuzabyubahiriza.

Ba rwiyemezamirimo batahanye umugambi wo kwimakaza ubudaheza mu mirimo bakora

Théoneste Nshimyumuremyi ukorera muri Motel Urwuri yagize ati "Batwibukije ko abafite ubumuga nta bibarangaza byinshi baba bafite, ko umutima wabo uhugira ku cyizere bagiriwe. Ntekereza ko umuntu abahaye amahirwe bayabyaza umusaruro. Tugiye gusaba NUDOR kuduhuza n’abo bahuguye, ariko kandi bakaduha abahuguwe ibijyanye n’ibyo badufashamo."

Kuri ubu mu Karere ka Huye hari abantu bafite ubumuga babarirwa mu bihumbi 19.

Ubuhamya bwe bugaragaza ko yakoraniweho n’abicanyi bo hirya no hino, ariko Imana ikinga akaboko.

Ni ubuhamya yatanze tariki 18 Gicurasi, ubwo mu Murenge wa Mukura bibukaga ku nshuro ya 31 Abatutsi biciwe ahitwa ku Kabakobwa.

Jenoside yabaye Ntigurirwa ageze mu mwaka wa kabiri w’amashuri abanza, afite imyaka umunani, maze we n’abavandimwe be bahungira kuri Kiliziya ya Kansi, bahasanga abandi batutsi benshi.

Icyo gihe ngo Abatutsi bagerageje kwirwanaho, ariko interahamwe zitabaza abajandarume barabarasa nuko bahindirwa mu mashuri, mu kiliziya no kwa muganga. Ishuri yarimo icyo gihe ngo abantu bari bagerekeranye kugera kuri pulafo (plafond), ku buryo ngo abicanyi bigiriye inama yo kubica mu byiciro.

Ntigurirwa agira ati “Njyewe nari ndi hasi, hafi y’umuryango. Ibyakorwaga byose narabirebaga. Baragutemaga bakagusohora, ab’amacumu bakagushinga icumu mu bisebe, babona utinyeganyeje bagakurura bakakujugunya bizeye y’uko bakwishe burundu.”

Akomeza agira ati “Bakomeje gutema rero bagenda bakuraho abari hejuru yanjye nanjye ngerwaho. Nari nubaraye, bantema mu mutwe w’inyuma ubwenge buhita bugenda, nakangutse hashize igihe ntazi ariko nisanze mu cyobo. Muri icyo gihe ariko numvise padiri w’i Kansi atanga amabwiriza ko uzajya ahamba umuntu umwe azajya ahembwa mironko ebyiri z’amasaka. Icyo gihe narumvaga ariko sinabashaga gukanura cyangwa kuvuga.”

Kimwe n’undi mwana witwa Rukundakuvuga ngo babajyanye mu cyobo. Ku bw’amahirwe bwira kidasibwe, hanyuma uko amasaha yagiye yicuma haje kuza imbeho ituma bazanzamuka, bisanga mu mirambo.
Agira ati “Narikuruye mva muri wa mwobo, mbona mfite ibisebe birindwi. Iby’amacumu, iby’imihoro, mbese ntako batagize ngo banyice, ibyo bari bashoboye byose barabikoze. Navuyemo ngenda nikurura, ngiye kwambuka umuhanda mbona umwana mu muhanda na we urimo wigendana, nsanga ni Rukundakuvuga. Bari bamutemye igikanu ariko amaguru ye akora, turagenda twihisha mu mashyamba yo ku Kantango, tuyagumamo. Abazaga guhiga abihishe mu mashyamba hamwe n’imbwa twabaga tubumva, tugakomeza tukihisha.”

Muri iryo shyamba ngo bahamaze nk’ibyumweru bitatu, barorongotana. Ntigurirwa ntiyabashaga kugenda kubera igikomere cy’icumu bari baramuteye mu itako, ariko umwana mugenzi we bari kumwe, yanze kumusiga. Byageze aho ibikomere bari bafite bibora,ari nako inzara irushaho kubarembya.

Aha ni ho bafashe icyemezo basubira iwabo i Buvumu, maze Ntigurirwa agira amahirwe yo kuhasanga Nyirasenge wari warashatse mu batarahigwaga.

Agira ati “ Twamanutse ari nijoro, imvura igwa, inkuba zikubita, iduhitiraho. Ntitwamenye amasaha, kubera ko bwadukereyeho. Twageze ahitwa mu Mburamazi duhura n’igitero giturutse i Buvumu, abari bakirimo bati dore za nyenzi zo kwa Bugirimfura.”

Akomeza avuga ko bari aba bicanyi bibwiraga ko uyu mutangabuhamya yaguye i Kansi, ariko bamubonye baravuga bati “Inyenzi ntizipfa. Aba twari tuzi ko baguye i Kansi. Baradufashe, ufite ubuhiri arakubita, ufite icumu araryifashisha, bagenda bazi ko batwishe. Barateruye baracunda bajugunya mu mazi. Navuga ko amazi batujugunyemo ari yo yaduhembuye, kuko twageze mu masangano ya Migina na Mukura dusa n’abagaruye umwuka, dufata ibyatsi, tuvamo.”

Uyu mutangabuhamya ma mugenzi we bakomeje kurorongotana, bihisha mu ishyamba, bamaramo ibyumweru bibiri, ariko bishize, bari bameze nabi, barembejwe n’inzara, maze biryamira ku nzira, barasinzira, interahamwe zibakanguza akaruru.
Yagize ati “Ufite ubuhiri yarabuhururanye, uzanye umwuko araza arakubita, abandi bazana amacumu. Yewe! ndahamya ko n’uwari ufite isahani yaje ayizanye! Uwo twari kumwe yabashije kwiruka, ariko jye kuko amaguru bari bayatemye, narakomeje ndiyicarira, nti n’ubundi byarangiye. Wa mwana mu kwiruka, yahubiranye n’uwitwa Alexis wari umuyobozi wa serire wari uri mu kwasa inkwi, nuko abangura ya nshoka yarimo yashisha arayimwicisha.”

Hagati aho, uyu mutangabuhamya ngo baramuzamukanye, bamugeza ku matongo y’iwabo w’uyu bari bamaze kwica, bamwicaza aho, ariko amenya ko bashyizeho ibihembo ku muntu uzamubona. Impamvu ngo batahise bamwica, ngo kwari ukugira ngo bazarye ibyo bihembo bamweretse abamushakaga akiri muzima kugira ngo yicwe urubozo.

Icyo gihe abakuru baragiye, bamurindisha abana barimo abo biganaga, abamurutaga n’abo yarutaga, bababwira ko ari we wari ugiye kuzababuza kuba mu gihugu.

Aha rero, hari umukecuru wari warashatse mu batutsi, umuryango we barawica, ariko we baramusiga, bakajya basahura ibintu babizana iwe. Uyu mutangabuhamya yaramutakiye ngo amuhembure, maze amuzanira ibishyimbo ku rushyi n’ikijumba n’amazi mu gikombe.

Abicanyi bari bafite ubugome bwinshi ku buryo ibi babimujijije.
Yagize ati “ Ibyo byamubereye impamvu yo kwirukanwa kuko abantu bakuru bagarutse ba bana babibabwiye. Inzu ye barayisenya n’ibye barabigabana, na ya nka bari baramusigiye bahita bayibaga, barayigabagabana.”

Bigeze nimugoroba, abari bamufite ngo bishatsemo umurarana ngo bazabashe kugororerwa, buri wese akavuga ko atararana Inyenzi mu nzu, ni ko kwiyemeza kumwica bakamujugunya mu musarane wari hafi aho wari ufite uburebure bwa metero nka 18, hanyuma bakazagaragaza umurambo, bityo bagahembwa.

Ati “Umugabo umwe yiyemeje kunyica, mugenzi we aramubwira ati ntutinya Imana? Urashaka kwica wambaye ishapule? Ati Nimureke tumujugunye muri uriya mwobo, tumurenzeho aya matafari, wikwiyanduriza ubusa n’ubundi yarapfuye, uzamushaka azamusangamo n’ubundi, tuzaza tumumwereke.”

Bamuhitishijemo hagati yo kumujugunya muri wa mwobo w’umusarane no kwijyanamo, ahitamo kwijayanamo. Nuko bakuraho igiti kimwe cyari hejuru y’umwobo, hanyuma ariko mu mwanya agishakisha ahantu yashyira akaguru ngo amanuke bamuhurizaho amashoka n’ubuhiri, amanuka uko.

Ati “Naramanutse, kubera uburebure bwaho ntegereza ko ngeramo ndaheba, kera kabaye ngeramo hasi. Harimo umwanda mukeya utarenga nk’amavi, kuko bari bamaze igihe gitoya bayikoresha. Ntabwo barekeye aho, bavugiraga hejuru bati Inyenzi ntizipfa, bati reka tumurenzeho amatafari yari yubatse iyi toilette, bati uzamukenera azaza tumukuremo tumumwereke. Abagore n’abana bari aho ngaho, abatugendereraga, abakoraga mu rugo, abana twiganaga, bagasenya ayo matafari, bakayaha abagabo, na bo bakayatera mu mwobo.”

Akomeza agira ati “Imana yokabyara itajya ibura uko igenza, itafari rikamanuka ryikubita mu mpande z’umwobo rikangeraho ritakiri ryose. Ubu mu mutwe wanjye haracyari ibikomere byanze kumeramo umusatsi kubera ibibaju by’ayo matafari. Yari akomeye, nta mvura yari yarayanyagiye. Uko yagendaga agwa mu mwobo narazamukaga nkayahagararaho, barunguruka mu mwobo ntibambone kubera ivumbi rya ya matafari.”

Agereranyije, amatafari bayarangirijemo amaze kuzuza nka metero eshatu za wa mwobo. Abicanyi basubijeho cya giti, batuma abana n’abagore amatafari yari ku nzu yari yasenywe, na yo bayarunda hejuru ya wa mwobo, bavuga ko hari igihe wasanga atapfuye, bityo barafunga ngo ataza kubasha gusohoka.

Ati “Ibyo babikoze mu masaa kumi n’imwe za nimugoroba. Inyoni za nimugoroba zimaze guceceka, nko mu masaa moya za nijoro, nazamukiye ku nkarwe abacukura imisarane bazamukiraho, mbasha kunyura mu kanya gatoya nashakishije ku ruhande batari babonye ngo barenzeho amatafari.”

Akomeza agira ati “Naghise njya kwa muramu wanjye utarahigwagwa, ariko ngira Ibyago nkubitana na murumuna we, induru ayiha umunwa, ati uzi ko koko inyenzi zidapfa?”

Ibyo kwinjira mu rugo yahise abyihorera, azenguruka mu gikari, yihisha mu rwina rwarimo ibishara n’ivu. Yarurayemo, arwirirwamo, nimugoroba yumvise mushiki we ari gukarabira mu gikari asesurukamo, aramusanga.

Ambonye ati “Ntigurirwa urajya hehe? Uragira ngo bazakunyicire mu maso? Ndamubwira nti basi mpa ibiryo by’umunsi umwe, ngende. Muramu wanjye yari yagiye mu bitero. Yaramfashe aranyuhagira, anyambika imyenda y’umukobwa we kuko nta muhungu yagiraga twanganaga, anshyira mu gikoni.”

Ku bw’amahirwe makeya ya Ntigurirwa, abana bo muri iyo miryango baramubonye bavuga ko ahari. Muramu we akigera mu rugo yahise abwira umugore we ngo nasohore Ntigurirwa amwiyicire.

Ati “Mushiki wanjye nta kindi yagombaga gukora, yaraje amfata akaboko aransohokana nk’ujyanye inka mu ibagiro. Muramu wanjye umuhoro aragenda arawutyaza, aramfata anjyana munsi y’urugo hafi ya rwa rwina nari nihishemo, anshyira hasi arankandagira, nk’aho yatemye ijosi, papa we wari wamwumvise kubera ko yavugaga cyane araza, amanika akaboko ati urashaka kwisiga amaraso ya muramu wawe? Ati nuramuka umwishe ntuzongere kunyita so. Uzi ko uriya muryamana ari mushiki we? Niiba umwica bicire rimwe, kuko ntacyo uba wikijije kuko n’ubundi Inyenzi urarana na zo.”

Umugabo yanze kuva ku izima, umugore we na we araza amubwira ko naramuka amwiciye umuvandimwe atazongera kuba umugore we, amusaba kumureka akagenda kuko n’ubundi atari ariho.

Umugabo wari ukimuhagazeho ashaka mumwica yariyumviriye abura icyo akora, amaze nk’iminota 20 akibitekerezaho amukubita ikibatira aramubwira ngo nagende.

Iyi nterahamwe yahereye ko ibwira Ntigurirwa ati “ guhera uyu munsi hano uhibagirwe nk’uko wibagiwe ibere rya nyoko. Ninongera kukumva hafi aha, umurambo wawe n’aho waba uri nzawutema.”

Akomeza agira ati “Nahise numva ibyanjye bindangiriyeho. Icyanteraga agahinda kurusha ibindi, bikinakantera n’ubu, ni ijambo ryahoraga rigaruka ngo uretse n’igihugu, n’Imana yarabanze. Na we iryo jambo arinsubiriramo, mfata inzira ntazi iyo njya. Ngenda ntekereza nti koko igihugu cyaratwanze n’Imana ubanza yaratwanze. Umuntu muzima wabyaye, na we wabyawe, agahinduka inyamaswa, mwari muturanye mwarasangiye, akaguhinduka nk’uko ikirere gihinduka?”

Yatangiye kurorongotana, kuko aho yari yiringiye hose bari bamuhakaniye. Yaje kwibuka ahitwaga kwa Tarisisi bari basigiye ibyabo, agenda atekereza ko ahari bamwemerera byibura akarara rimwe mu nzu.

Ntihamuhiriye na ho kubera ko umuhungu waho w’Interahamwe yamwumvise akigera hafi y’urugo, akabangura icumu ngo amwice, undi akamwibwira kugira ngo atarimutera, ariko akanga akarimutera, akagwa hasi. Icyo gihe ngo yamubajije ikimugenza amubwira ko yari aje ngo bamucumbikire byibura ijoro rimwe, undi na we amubwira ko hatanzwe inka ku uzamubona, nuko amujyana kuri wa muyobozi wa serire yari yacitse.

Uyu mugabo ngo yashatse kujyana umwana kuri bariyeri, ariko umugore we ngo aramuseka cyane. Ati “ugiye kwica umwana wo mu muryango wabwirijemo Inkuru nziza ya Yezu?”
Uyu mugabo ngo yari umukuru w’umuryango remezo, akaba yarajyaga yigisha abaturanyi ijambo ry’Imana. Yashubije umugore we ngo “abangaba igihugu cyarabanze n’Imana yarabatanze”, ariko umugore arakomeza arabatota, bageze aho baramurekura, ajya mu ishyamba bitaga Iryo kwa Kizigenza.

Ntigurirwa ati “Hari hamaze kuba nko mu masaa sita z’ijoro. Ndicara nshaka aho nerekeza ndahabura, mfata icyemezo cyo kwijyana kuri bariyeri ngo banyice. Ni bariyeri yari i Sahera, yari yitegeye agashyamba nari ndi mo. Ndaza nsanga babiri bari bayiriho bari ku mugina basinziranye akajerekani. Ndatambuka ndahagarara, nti ese ubu mbabyutse? Undi mutima urambwira ngo ninkomeze. I Sahera ni bwo bwa mbere nari mpakandagiye. Ndarorongotana. Nkajya nisanga nagarutse aho nari ndi. Ariko aho nagendaga hose nagumaga hafi y’akabande kugira ngo nindamuka mbonye n’ikijumba cyo guhekenya nze kubona amazi yo kunywa.”
Icyo gihe yarakomeje ararorongotana, anyura ku Kabakobwa, akomeza agana mu Irango.
Ati “Ingufu zari nkeya. Zashize neza neza ngeze kwa Mwami, ku nzu y’amategura iri hejuru y’umuhanda. Naragiye ndyama muri icyo kizu kitabagamo abantu, mpita ngwa muri koma.”
Hagati aho Inkotanyi zari zarageze mu Irango, ariko kimwe n’abandi bari bakihishe mu masaka ntiyari abizi. Ntazi igihe yahamaze. Abantu baravugaga akabumva, ariko ntabashe gukanura ngo abarebe cyangwa abe yanabavugisha.

Icyo yibuka ni uko abana bajya n’abava kuvoma banyuraga hafi y’icyo kizu ari bo batumye Inkotanyi zimubona. Ngo abavaga kuvoma babwiranye ko muri icyo kizu hapfiriyemo umuntu, hanyuma hamwe n’abajyagayo baza kumureba, abasirikare babonye bashungereye baza kureba icyo bari kureba.

Ati “Umusirikare umwe yankoze mu kwaha yumva ndacyahumeka, baranjyana. Nongeye kugarura ubwenge mu matariki ya nyuma y’ukwa karindwi. Nagarutse mu bumuntu nsanga baranyogeje, nkeye, baramvuye. Umuganga nakangukiyeho yanyerekaga ibintu nkavuga ibinyuranye. Yanyerekaga nk’icupa nkavuga ngo ni igikombe, kubera ko i Kansi bari bantemye mu mutwe, uwanshinze icumu mu mutwe ngo ishashi y’ubwonko yari yayiciye, hanyuma hajyamo amazi.”
Akomeza agira ati “Muganga yarambwye ngo n’iyo nakira, nzaba narangiritse mu mutwe. Ngo nzajya nsiga ikintu hano njye kugishakira nko mu Irango. Ariko ngo ku bw’amahirwe nshobora gukira. Bakomeje kunyitaho, banyandikira imiti, na n’ubu ndacyayifata. Isereri ishobora kumfata sintware na moto. Ngira isereri itavaho.”

Ashima Inkotanyi zabarokoye, akanavuga ko iyo zikererwaho nk’ukwa karindwi kugashira zitaraza nta n’umwe zari gusanga.

Ashima Inkotanyi yagize ati “Ndabashimira ko mwemeye mukabaho nabi, kugira ngo mukunde muturokore. Njya mbwira abantu ngo Perezida Kagame ni we wari ukwiye kuyobora iki gihugu kuko ari we wakirokoye.”

Ntigurirwa ntiyabashije gusubira mu ishuri, ku bwa biriya bikomere yari afite mu mutwe, ariko yariyubatse. Aracuruza akanakanika ibinyabiziga, akabasha kubaho hamwe n’umugore we n’abana batanu bibarutse.

Bunamiye inzirakarengane zazize Jenoside

Hari mu gikorwa cyo kwibuka ku nshuro ya 31 Jenoside yakorewe Abatutsi mu 1994, abakozi b’uyu muryango bagiriye mu Kagari ka Rwesero mu Murenge wa Busasamana, aho bifatanyije n’abarokotse Jenoside baho, bakanaremera ab’abakene muri bo, igikorwa cyabaye tariki 29 Gicurasi 2025.

Niyitegeka yagize ati "Action Aid ngira ngo ni umuryango mpuzamahanga wariho na mbere ya Jenoside. Icyo gihe witwaga Aide et Action. Ni inyito ijyanye n’igihe, ariko ibikorwa biracyari bya bindi. Nk’indi miryango mpuzamahanga Jenoside yateguwe Action Aid ibireba, ariko nta jwi amateka atwereka ko yamaganye Jenoside yari iri gukorerwa Abatutsi. Ibyo bibashyira mu cyiciro cyo kuba mudufitiye umwenda."

Yakomeje agira ati "Jenoside yakorewe Abatutsi yahagaritswe Action Aid ihari, u Rwanda dutera intambwe yo kwiyubaka ihari, ndetse iradufasha mu bikorwa by’iterambere rusange ry’Abanyarwanda, harimo n’abacitse ku icumu bakeneye gusindagizwa. Ariko nanone Action Aid iracyahari abantu bapfobya Jenoside, bayihakana ndetse barushaho kwiyongera ku Isi. Iryo ni ideni rya kabiri."

Yunzemo ati "Dukeneye kumva ijwi ryanyu mu ruhando mpuzamahanga mwamagana abapfobya n’abahakana Jenoside, ndetse n’abagihembera ingengabitekerezo yayo."

Abakozi ba Action Aid bifatanyije n’abarokotse Jenoside bo ku Rwesero mu kwibuka Jenoside yakorewe Abatutsi mu1994

Yababwiye rero ko Action Aid ibarimo amadeni abiri agira ati "Rimwe ryo ntitwaribishyuza, kuba twarapfuye muhari ntimwamagane, ariko irindi ryo turaribishyuza, kuba hari abakigambira kwica u Rwanda n’Abanyarwanda yaba abari hano mu gihugu cyangwa hirya no hino mu karere kuko u Rwanda ni rugari. Mufite ijwi ryagutse rivuga nk’umuryango mpuzamahanga."

Yabasabye kandi ko umuryango wabo utaba ubwihisho bw’abashaka gusenya u Rwanda agira ati "Nk’umuntu wa IBUKA, tubona byinshi, tuzi byinshi twumva byinshi, ariko ibigaragarira amaso tubona interahamwe yaba mu gihe cya Jenoside, nyuma yaho gato ndetse n’ubu inyinshi zihishe inyuma y’imiryango itari iya Leta."

Jeannette Murungi uyobora Action Aid mu Karere ka Nyanza, avuga ko n’ubwo hariho Action Aid mpuzamahanga, bo iyo bakorera ubu ari umuryango nyarwanda, kandi ko umurongo Igihugu cyatanze ari wo bagenderamo.

Ati "Tugira n’uruhare mu bumwe n’ubwiyunge aho tubumbira mu matsinda abarokotse Jenoside n’abayigizemo uruhare, bakaba babayeho mu buryo bwo kuzuzanya."

Jean Baptiste Niyitegeka, umuyobozi wa IBUKA mu Karere ka Nyanza

Akomeza agira ati "Ubutumwa bwacu ni ugukangurira buri wese kuvuga igikwiye. Igihugu cyacu aho cyavuye ntabwo kigomba gusubirayo, urwego tugezeho twiyubaka ntidukwiye kurebera abapfobya. Abashaka gusenya ibyo igihugu cyagezeho ntitubashyigikiye."

Abakozi ba Action Aid biyemeje kwifatanya n’abaturage bo ku Rwesero basanzwe bakorana mu gikorwa cyo kwibuka Jenoside kubera ko ubusanzwe bita ku bakene. Bagiraga ngo babereke ko babari hafi, babazirikana. Banabashyiriye impano z’ibiribwa n’imyambaro.

Abafatanyabikorwa b’Akarere ka Huye bagejejweho ibibazo bibangamiye imibereho myiza y’abaturage, biyemeza kuzafasha mu kubikemura

Ni mu gihe ubuyobozi bw’Akarere ka Huye bwo buvuga ko bugenda bwubakira bake bake buri mwaka, biturutse ku ngengo y’imari buba bwahawe na Leta.

Umuyobozi wungirije w’aka Karere ushinzwe Iterambere ry’Ubukungu, André Kamana, mu nama yabahuje n’abafatanyabikorwa bakorana tariki 27 Gicurasi 2025, yabasabye kubafasha mu kububakira, agira ati “Nko muri uyu mwaka w’ingengo y’imari wa 2024-2025 twahigiye kubakira imiryango 20 yonyine. Dukomeje kugendera kuri uwo muvuduko ntabwo twazabasha kubafasha bose.”

Ku rundi ruhande kandi, mu Karere ka Huye habaruwe izindi ngo zikennye zikeneye gufashwa kubona aho kuba 43, n’izindi 308 ziba mu nzu umuntu yagereranya na nyakatsi.

Hari kandi ingo 203 zitagira ubwihero, 2002 zifite ubutujuje ibisabwa na 203 zibana n’amatungo mu nzu.

Ibi byose na byo byagaragajwe, abafatanyabikorwa biyemeje kwegerana bagakorera hamwe, bakareba icyo gukora bahereye ku gukemura ikibazo cy’ubwiherero.

Cyprien Ugirumurera uyobora ihuriro ry’abafatanyabikorwa (JADF) mu Karere ka Huye, yagize ati “Dukurikije icyiciro cy’ibikorwa by’abafatanyabikorwa kandi dufatanyije n’ubuyobozi bw’imirenge, tugiye kwegerana turebe icyo gukora. Imibare twayihawe. Ikindi tuzakora ni ukubegera tukabafasha guhindura imyumvire kugira ngo ibyo tubafashije kugeraho bizarambe.”

Mu byo bagiye guheraho mu buryo bwihuse kandi, harimo gukemura ikibazo cy’ubwiherero, kubera ko kitabangamira ba nyiri kutabugira gusa, ahubwo n’abaturanyi babo.

Kasike yujuje ubuziranenge (iburyo), izasimbura izisanzwe zikoreshwa

Yabivuze mu biganiro bagiranye n’abamotari bo mu Karere ka Huye, ku wa 29 Gicurasi 2025, byari bigamije kubasobanurira iby’izo kasike no kubibutsa ko bakeneye kwitwara neza mu muhanda, bagasigasira ubuzima bwabo n’ubw’abo batwaye.

Yagize ati "Abazitumiza mu mahanga babanje kuzizana n’indege, turazipima. Ubu dutegereje nyinshi zizaza n’ubwato. Bitarenze amezi abiri ziraba zakwiriye mu gihugu hose. Abamotari ariko ntibari bakwiye kuba bakigura izitujuje ubuziranenge."

Eric Kabanda, umukozi mu kigo cy’Igihugu gishinzwe gutsura ubuziranenge, mu ishami rishinzwe gutanga ibirango by’ubuziranenge, avuga ko hafashwe icyemezo cyo gushakisha kasike zujuje ubuziranenge nyuma yo kubona ko izifashishwaga wasangaga zimeneka igihe zituye hasi, zikaba zitaranarindaga abazambaye neza kuko umuntu yagwaga ari kuri moto zikava mu mutwe, ntiziwurimde.

Yagize ati "Twaribajije ngo kuki tutareba uko haboneka izikwiye? Ni muri urwo rwego hashyizweho Laboratwari ireba ubuziranenge bwazo, ku bufatanye na Minisiteri y’Ibikorwa Remezo, HPR na Minisiteri y’Ubucuruzi n’Inganda. Izizaza noneho zizaba zifite ubuziranenge."

Yunzemo ati "Tuzajya dushyiraho ikirango cya S kigaragaza ko zujuje ubuziranenge. Hari izamaze gutumizwa. Ntabwo twamamaza nk’uko hari ababikeka, kuko tutari abacuruzi. Icyo twebwe twifuza ni izujuje ubuziranenge, ubwoko si bwo tuzareba."

Abamotari bo mu Karere ka Huye bumvise iby’izo ziriya kasike, bavuga ko biteze ko zizaza zinyuranye n’izo bari basanganywe.

Lenata Mushimiyimana ufite imyaka 24 akaba amaze umwaka umwe n’igice mu mwuga w’ubumotari ati "Kasike bazitweretse, uko bazitubwiye numvise ari na nziza. Izo twari dutuye dufite uba wumva ari nini mu mutwe, ku buryo iyo umuntu ayambaye iba inyeganyega. Izo bari kudushishikariza nabonye zizaba zegereye, mu buryo wikubise hasi itapfa kuva mu mutwe byoroshye."

Byiringiro Alfred avuga ko bitarenze amezi abiri kasike zujuje ubuziranenge zizaba zakwijwe mu gihugu hose.

Akomeza agira ati "Ndanakeka ko tuzazikunda birenze uko turi kubitekereza, kuko nta wanga kurinda ubuzima bwe. Igiciro ntiturakimenya. Iyari isanzwe mbere yaguraga ibihumbi 25. Ariko aho havugiwe izujuje ubuziranenge zarabuze ku buryo ziri kugura ibihumbi 40. Turifuza ko inshyashya zitazarenza amafaranga ibihumbi 20."

Idi Jean Pierre Ngiruwonsanga na we ati "Twumva niziza zizadufasha kwirinda kubera ko izo dusanzwe twifashisha zirekura iyo zimaze gusaza. Abazifite b’i Kigali batubwiye ko umuntu atanabasha kuzinjizamo telefone ngo ayivugireho atwaye nk’uko abamotari bajya babigenza. Ibi na byo bizarinda impanuka kubera ko hari abazigiraga bivuye ku kurangarira kuri telefone."

Ku bijyanye n’icyifuzo cy’uko ziriya kasike zitazarenza ibihumbi 20 by’amafaranga y’u Rwanda, Kabanda avuga ko igiciro cyazo kizaturuka ku bacuruzi, ariko ko Minisiteri y’ubucuruzi n’Inganda na yo izabikurikirana.

Uwitwa Madeleine Mukashema w’i Kirehe, yabibwiye Minisitiri w’Ubumwe n’Inshingano Mboneragihugu, Dr Jean Damascène Bizimana, ubwo tariki ya 24 Gicurasi 2025 yaganirizaga abagore 53 bari mu biganiro bibategura gutaha kugira ngo bazabashe kubana neza n’abandi Banyarwanda, kubera ko bari hafi kurangiza ibihano.

Yagize ati “Twiga mu mashuri abanza, twatangiraga amasomo abana b’Abatutsi bari hanze y’ishuri bari kubabaza imyirondoro yabo, amasomo twayageza hagati bakababwira ngo ngaho nibyinjire. Imikoro bo yarabananiraga kubera ko twabaga tutatangiranye. Bagahora babandikira amazeru, n’utwo bari bazi bakatubakura mu mutwe.”

Yakomeje agira ati “Uburozi bwatangiye icyo gihe nyine, batubwira ko Umututsi ari indyarya, ngo ntitukabizere, ngo bafite uburyarya bakomora kuri ba se. Ubwo ni bwo burozi nabanje kurya. Hanyuma igihe bavugaga ko Inyenzi zigiye gutera, na bwo ni ubundi burozi bwo kwitiranya abantu n’inyenzi nyamara ari abantu nk’abandi.”

Yunzemo ati “Leta y’Ubumwe yo kabyara iri kuturutsa ubwo burozi. Kandi ikindi, iyo tuza kuguma mu rugo ntidufungwe, ntabwo ubwo burozi twari kuzaburuka, twari kuguma kubiba ingengabitekerezo mu bantu. Ariko uyu munsi twageze mu magereza, umuntu icyaha cye arakimenya, agisabira n’imbabazi.”

Ku kibazo cyo kumeya niba abafungiwe gukora Jenoside bose bemera icyaha nka we, Mukashema yagize ati “Si abantu bose babyemera, kuko ni urugendo rurerure kugira ngo abantu bose babyumve. Ariko hari ababyemeye. Njyewe niteguye gusubira mu muryango, nkasaba imbabazi, nkashishikariza n’abandi kuruka ingengabitekerezo cyangwa se gupfobya no guhakana.”

Mukashema, n’ubwo mu mwaka w’1994 yari atuye i Kirehe, ubundi avuka i Musebeya mu Karere ka Nyamagabe. Ubu afite imyaka 68. Icyaha cya Jenoside cyamuhamye ngo ni icyo gutungira agatoki abicanyi umuntu bashakaga, byatumye bamubona hanyuma bakamwica, akavuga ko iyo ataza kuranga aho ari wenda ubu yari kuba akiriho.

Joséphine Kubwimana w’i Ndora mu Karere ka Gisagara, na we ubu uri gutegurwa gutaha kuko ari hafi kurangiza igihano. Avuga ko yahaniwe ubufatanyacyaha ku iyicwa ry’umwana wari wamuhungiyeho. Kimwe na Mukashema, avuga ko bakuze bangishwa Abatutsi, akanemera ko nk’ababyeyi b’abagore bakwiye kugira uruhare mu gutuma urwo rwango rutaba mu bana no mu buzukuru.

Yagize ati “Ibyo murimo mutubwira ko dukwiye kwigisha abana ni byiza kuko abo dukomokaho bo batwigishije bibi. Nabyirutse nanjye numva ari babi, n’ubwo murumuna wanjye yari yarabashatsemo nanjye narabyaranye na bo.”

Muri 53 bari gutegurwa kuzataha ariko, hari n’abagitsimbaraye ku kuvuga ko barenganyijwe, ku buryo Minisitiri Bizimana yababwiye ko buri wese akwiye kwakira uburemere bw’ubwicanyi yakoze kubera ko Jenoside ari icyaha ndengakamere, ko bivuga “kwica ubwoko” kandi kwica ubwoko bitandukanye no kwica umuntu umwe, kuko uwica ubwoko aba ashaka kubumaraho bwose.”

Yabasabye kandi kuzirikana ko iyo umugore yangiritse n’umuryango wangirika, abasaba kuzabwiza ababo ukuri ku byo bakoze, ariko bakanakubwira n’Abarokotse Jenoside kuko ari bo bagufite, kandi noneho bagatoza abana babo indangagaciro nzima.
Hari aho yagize ati “Ibihano mwahawe n’inkiko ku cyaha cya Jenoside, mubifate nk’imbabazi. Ni ibihano ariko ni n’imbabazi, kuko icyaha cya Jenoside, muzi ububi bwacyo kuko mwaragikoze, nta gihano ubundi bihwanye.”

Yabasabye rero kuzirikana ko Leta y’Ubumwe bw’Abanyarwanda ishaka ko Abanyarwanda bigira ku mateka mabi u Rwanda rwanyuzemo, bakayakosora, abakoze icyaha bakumva uburemere bwacyo, bakihana, bakaba bazima, bakaba abantu nyabantu, noneho bagafatanya n’abandi kubaka igihugu “n’ubwo hari abafite ibikomere.”

Dr Christian Ngarambe ashyira indabo mu rwibutso rwa Jenoside

Yabibwiye abitabiriye igikorwa cyo kwibuka ku nshuro ya 31 Jenoside yakorewe Abatutsi mu 1994, cyabaye kuri uyu wa 23 Gicurasi 2025.

Mu ijambo yagejeje ku bitabiriye iki gikorwa, Dr. Ngarambe yavuze ko Dr Lony Zachariah wayoboraga abaganga batagira umupaka (MSF) bakoreraga muri CHUB, mu buhamya ku byabereye muri ibi bitaro yavuze ko ku itariki ya 22 n’iya 23 Mata, abasirikare bari baturutse muri ESO babambuye abarwayi bagera ku 150 bakabicira mu maso yabo.

Muri abo barwayi kandi harimo abagabo n’abagore, abasaza n’abakecuru ndetse n’abana.

Icyo gihe kandi muri CHUB hazanywe inkomere z’abasirikare zibarirwa mu 140, ariko kuba bari barakomeretse ntibyababujije kwica batanu mu bakozi ba MSF harimo uwitwaga Nadine wari utwite inda y’amezi arindwi, bamuziza ko yari atwite inda y’Umututsi.

Abakozi ba CHUB, abayobozi mu Karere ka Huye n’abafite ababo baguye muri CHUB bitabiriye igikorwa cyo kwibuka

Tariki 24 abaganga ba MSF biyemeje guhungira i Burundi, Dr.Ngarambe ati "Icyo gihe ngo bagiye barenga imirambo myinshi, kandi mu Kanyaru ngo hamanukaga byibura umurambo umwe buri minota itanu."

Yakomeje agira ati "Abasirikare si bo bonyine bishe abantu hano, ahubwo n’abaganga barabafashije, bica abarwayi, bica na bagenzi babo. Mu bicaga harimo n’uwari Perezida wa Guverinoma y’Abatabazi, Dr. Sindikubwabo, muganga w’abana wanabaye Minisitiri w’Ubuzima ku Ngoma ya Kayibanda, ari na we watangije ubwicanyi muri Perefegitura ya Butare."

Yunzemo ati "Tariki 21 Sindikubwabo yakoranye inama n’abaganga abasaba kwifashisha ubumenyi bazi mu kwica Abatutsi mu buryo bwihuse anabasaba kubyigisha interahamwe, nko guca imitsi yo ku ijosi."

Mu baganga bari mu myanya y’ubuyobozi bwa CHUB ndetse na Kaminuza y’u Rwanda, bagize uruhare muri Jenoside yakorewe Abatutsi harimo Dr. Jean Berchmas Nshimyumuremyi wari umuyobozi wungirije wa Kaminuza y’u Rwanda, Dr. Alphonse Karemera, umuyobozi w’ishami ryigisha ubuvuzi, Dr. Yotamu Nshimyumukiza wayoboraga CHUB.

Bakoze urugendo rwo kwibuka

Harimo kandi Dr. Saustène Munyemana wari Umwarimu muri Kaminuza y’u Rwanda n’umuganga muri CHUB, Prof. Godefroid Gatera wari umuganga w’amagufa, bivugwa ko yakoresheje umuti ubundi uterwa imibiri y’abapfuye kugira ngo itangirika vuba, ariko ikagira umwuka uryana bidasanzwe, we akaba yarawuteraga mu mashyamba akikije CHUB kugira ngo bavumbure abihishemo.

Harimo kandi Dr. Pascal Habarugira wari umuganga w’abagore, Dr. Martin Kageruka na we wari umuganga w’abagore wanagize uruhare mu kwica umwamikazi Rosalie Gicanda.

Mu baforomo harimo Scholastique Mukabandora ndetse na Sr Theopiste wari ushinzwe igikoni cy’ibitaro na we wakatiwe burundu.

Muri aba bose harimo abagishakishwa n’ubutabera harimo n’uwitwa Berthe Nyiraruhango wari umuganga w’indwara zo mu kanwa, mu mazuru no mu muhogo, wavugaga ko atize kuvura amazuru y’Abatutsi.

Abagore 53 bari hafi kurangiza ibihano ku bw’ibyaha bya Jenoside batangiye kwigishwa

Izo nyigisho zatangirijwe mu Igororero rya Nyamagabe kuri uyu wa 21 Gicurasi zikazamara iminsi icumi.

Zagenewe abagore 53 bari hafi kurangiza ibihano, guhera ku basigaje amezi atandatu gusubza hasi.

Mu butumwa yageneye abatangiye guhabwa inyigisho, Marie Alice Kayumba Uwera, Umuyobozi Nshingwabikorwa ushinzwe ubumwe bw’Abanyarwanda n’Ubudaheranwa muri MINUBUMWE, yabasabye kongera gutekereza ku ruhare bagize muri Jenoside yakorewe Abatutsi, n’umukoro bafite mu kuzabanira neza abo bazasanga harimo imiryango yabo ndetse n’abo bakoreye ibyaha.

Yagize ati "Turabasaba kutazakora isubiracyaha nk’uko twagiye tubibona. Mu Igororero rya Nyamasheke ubwo twari muri gahunda nk’iyi mu kwezi gushize, umwe muri bo yatubwiye ko yari yakatiwe imyaka 15, arayirangiza, arataha, hanyuma akora ibyaha bigendanye n’ingengabitekerezo ya Jenoside, bamukatira imyaka 18, aragaruka. Ati ubu ndi hano ngiye kumaramo imyaka 30, harimo n’iy’ubuginga nishyiriyeho."

Yanabibukije ko bazasanga ibintu byarahindutse, bakaba bagomba kuzakora ku buryo bagendana neza n’abo basanze.

Ati "Abagabo twarababwiye ngo muzasanga umugore yaraguze inka cyangwa inzu. Ntuzavuge ngo inzu yanjye cyangwa inka yanjye kuko kera byose byari iby’umugabo. Uzavuga ngo inka yacu, inzu yacu. N’abagore ni kimwe. Niba warasize umwana mutoya, ubu yarakuze, arifatira ibyemezo. Uzamenye uko uzabana na we. "

Basabwe kuzitwara neza

Umuyobozi w’Akarere ka Nyamagabe, Hildebrand Niyomwungeri, we yabibukije ko igihe bamaze mu Igororero ari igice kinini cy’ubutabera gifasha mu gusigasira Ubumwe n’Ubudaheranwa bw’Abanyarwanda kuko mu mateka y’u Rwanda hari igihe cyageze ubutabera ntibutangwe bikaza kubyara Jenoside yakorewe Abatutsi, bagizemo uruhare.

Ati "Uwabireba neza yabona ko cya gice cy’ubutabera kitari cyaratanzwe kugira ngo amasomo aboneke, bigatuma mugira nyine uruhare muri Jenoside yakorewe Abatutsi mu 1994, none mukaba muri hano."

Yunzemo ati "Inyigisho zibategura gutaha muzazishyireho umutima n’ubwenge kugira ngo igice mugiye kuzamo na cyo muzabashe kukinyuramo neza. Nimudukenera turahari. Iyi ni intangiriro ibaduha, kugira ngo n’igihe muzaba mwaje muzabe muzi uburyo mushobora kutwegera, tugafatanya kubaka igihugu cyacu."

Igororero rya Nyamagabe rifite ubushobozi bwo kwakira abagororwa ibihumbi bitatu, ariko kuri ubu irimo abagera ku 1799, harimo abagabo 294 bahari kugira ngo babashe gufasha mu mirimo isaba ingufu, kuko iri gororero ryagizwe iry’abagore guhera muri 2014.

Meya Hildebrand Niyomwungeri

Kuri 53 bari gutegurwa kuzabana neza n’abo bazasanga iwabo, harimo 10 bamaze kurangiza ibihano bari bategereje izi nyigisho. Muri bo, 33 bari basanzwe mu Igororero rya Nyamagabe, naho barindwi baturutse mu rya Nyarugenge (Mageragere), bane baturuka mu rya Musanze naho icyenda baturuka mu rya Ngoma.

Iki cyiciro gikurikiye icy’abagabo cyahuguriwe mu Igororero rya Nyamasheke guhera ku itariki ya 18 Werurwe kugeza ku ya 18 Mata uyu mwaka.

Uwera yasabye abari gutegurwa gutekereza ku mukoro bafite mu kuzabanira neza abo bazasanga

Bibutse abana n’abagore 104 batwikiwe mu nzu

Hari mu gikorwa cyo kwibuka ku nshuro ya 31 Jenoside yakorewe Abatutsi mu 1994, hazirikanwa by’umwihariko abagore n’abana bishwe muri Jenoside, igikorwa cyabaye ku wa 19 Gicurasi 2025.

Umuyobozi w’Akarere ka Nyaruguru, Dr. Emmanuel Murwanashyaka, mu ijambo rye yagize ati "Turazirikana abana n’abagore bagera ku 104 biciwe hano urw’agashinyaguro, bagatwikirwa mu nzu ku manywa y’ihangu, abagome bidegembya, bahagarikiwe n’ubuyobozi bubi, bakora ibyo bishakiye, abandi babashungera."

Yunzemo ati "Turacyagaya cyane umuturage watanze inzu ye kugira ngo itwikirwemo abana n’abagore, yishimira indonke zo kuzungura no gutura mu nzu y’uwahigwaga, atubatse, kimwe n’abo bafatanyije kwica izi nzirakarengane. Bazicuze, kuko ibyo bakoze birenze imivugire n’ubwenge bwa muntu. Barengeje no kuba ibigwari."

Urwibutso rwa Mbuye

Perezida wa IBUKA mu Murenge wa Ngoma, Vincent Rurangwa, avuga ko inzu abo Batutsi 104 batwikiwemo yari iy’ibyatsi y’uwitwaga Kaje, akaba yarayitanze, agatuzwa mu nzu y’Umututsi witwaga Bundoyi.

Abicanyi baramuguraniye kugira ngo babone aho batwikira byoroshye abo bagore n’abana bari baregeranyijwe.

Hon. Depite Jeanne d’Arc Debonheur wari witabiriye iki gikorwa cyo kwibuka, yagarutse ku bibazo abarokotse Jenoside b’i Ngoma bagifite, harimo agahinda bamwe muri bo baterwa no kuba batarashyinguye ababo, imibereho ikiri mibi kuri bamwe, abafite ubumuga batewe na Jenoside n’imanza z’imitungo zimwe na zimwe zitararangizwa. Asaba ko buri wese bireba yabyitaho kugira ngo ubuzima bw’abarokotse Jenoside burusheho kuba bwiza, Nk’uko Igihugu kibiharanira.

Hon. Depite Jeanne d’Arc Debonheur

Meya Murwanashyaka yagaye uwatanze inzu ye igatwikirwamo abana n’abagore 104

Abakozi ba NIRDA bibutse abari abakozi ba IRST bazize Jenoside

Yabibwiye abakozi bo mu Kigo cy’Ubushakashatsi n’Iterambere ry’Inganda (NIRDA), ubwo yifatanyaga na bo mu gikorwa cyo kwibuka ku nshuro ya 31 Jenoside yakorewe Abatutsi.

Yagize ati “Kwibuka ntitukabifate nk’aho ari ukureba ibibi gusa, ahubwo tujye tubifata nk’umwanya mwiza wo kwisuzuma, tukareba mu mitima yacu. Ese umutima wacu uteye ute uyu munsi? Umutima wacu witandukanya ute n’ikibi icyo ari cyo cyose twigira muri aya mateka?”

Yakomeje avuga ko ingengabitekerezo ya Jenoside ubwayo idafatika, ikaba iba mu muntu imbere, hanyuma ikagaragarira mu bikorwa cyangwa mu mvugo cyangwa se nanone mu nyandiko.

Ati “Uko kwisuzuma rero kugomba kudufasha kwitandukanya n’ikintu icyo ari cyo cyose, gishobora kuganisha ku ihembera ry’ngengabitekerezo (ya Jenoside).

Yakomeje agira ati “Ntabwo ari urugamba rw’amasasu, ndashima urwatubohoye rukatugeza aho turi, ubu turi mu rugamba rwo mu mitima yacu no mu mitwe yacu. Ni urugamba rukomeye rwo gusesengura ibyo tuvuga, ibyo twigisha, ibyo dusobanurira abana bacu.”

Minisitiri Sebahizi ati turi mu rugamba rukomeye rwo gusesengura ibyo tuvuga, ibyo twigisha abana bacu

Yunzemo ati “Ni ukuvuga ngo kwigisha umwana kugira ngo avemo umuntu muzima uhereye ku byo wanyuzemo, ntabwo ari ibintu byoroshye. Kuko ushobora kumwigisha nabi, bikaba byamuviramo guhungabana. Dufite urugamba rukomeye.”

Ahereye ku kuba muri NIRDA, ahahoze hitwa IRST, ari ho abashakashatsi mu buhanga bwo kumenya umuntu (anthropology) b’Ababiligi, bakoreye ubushakashatsi bwavuyemo ko Abanyarwanda barimo amoko atatu ari yo Abatwa, Abatutsi n’Abahutu, yagize ati “Aha twicaye hari amateka ababaje, binashoboka yuko abashinzwe kubungabunga amateka bazahagira igicumbi cy’amateka turimo kwibuka uyu munsi.”

Yunzemo ati “Hari amateka ashingiye ku bantu tuzi, ariko hari n’amateka ashingiye ku banyamahanga bicaye bakadutekerereza, bakatwerekeza aho bifuza. Noneho ikibabaje, ubwo bushakashatsi babukoraga ku bantu bazima, bakanabica kugira ngo babakuremo ibyo bashaka gukoraho ubushakashatsi. Murumva aho ubwicanyi bwatangiriye! Bigakorwa n’umunyamahanga, yarangiza akatwumvisha yuko dutandukanye, akabyandika.”

Umuyobozi mukuru wa NIRDA we yabwiye abakozi ayobora ko kuri ubu bafite umukoro wo gukora ibiteza imbere Igihugu, nk’ikigo gifite mu nshingano gukora ibijyanye n’ikoranabuhanga.

Ati “Umukoro wacu ni ukuzana ubumenyi bushya bwubaka inganda kugira ngo twubake Igihugu cyacu. Nanone ariko ariya mateka ntabwo twayasibanganya. Hagomba kumenyekana, abantu bakamenya ibyakorewe.”

Umuyobozi mukuru wa NIRDA, Christian Sekomo, avuga ko bafite umukoro wo gukora ibiteza imbere igihugu

Kugeza ubu abari abakozi ba IRST bamaze kumenyekana bazize Jenoside ni 23, ari na bo amazina yabo yanditse ku rwibutso rwa Jenoside rwaho. Kwibuka muri NIRDA byabaye ku itariki 16 Gicurasi 2025.

Urwibutso rwa Jenoside rwo muri NIRD

Abayobozi n’abafatanyabikorwa bo mu Ntara y’Amajyepfo bagejejwehoibyavuye muri EICV7

Abakozi ba NISR babibwiye abayobozi bo mu nzego z’ibanze ndetse n’abafatanyabikorwa bo mu Turere two mu Ntara y’Amajyepfo, ubwo babagaragarizaga ibyavuye muri ubwo bushakashatsi tariki 15 Gicurasi 2025.

Ugereranyije n’imibare yatanzwe na EICV5 mu mwaka wa 2017, ari na bwo bushakashatsi buheruka kubera ko ubwa EICV6 bwari bwatangiye gukorwa muri 2020 bwarogowe n’indwara ya Coronavirus, EICV7 yakozwe muri 2023-2024 igaragaza ko mu Ntara y’Amajyepfo ubukene bwavuye kuri 47,6% bukagera kuri 34,7%. Ni ukuvuga ko bwagabanutseho 12,9%.

Ni mu gihe mu gihugu cyose muri rusange ubukene bwagabanutseho 12,4% (bwavuye kuri 39,8% bugera kuri 27,4%), naho ubukene bukabije bukagabanukaho 5,9% (bwavuye kuri 11,3% bugera kuri 5,4%).

Mu Ntara y’Amajyepfo kandi, mu Karere ka Nyamagabe by’umwihariko ni ho hagaragara abakene benshi kubera ko barenze ½ cy’abahatuye (EICV5 yagaragaje ko bari 67,6% naho EICV7 igaragaza ko ari 51,4%), hagakurikiraho Gisagara yari ifite 59,5 muri 2017 (EICV5) ubu bakaba ari 45,6%(EICV7). Muri Ruhango no muri Muhanga ni ho hari bakeya mu Ntara y’Amajyepfo kuko ubu habarurwa abakene 15% mu gihe muri 2017 i Muhanga hari 33,2% naho muri Ruhango hari 26,2%.

Ikindi cyagaragajwe na buriya bushakashatsi ni uko abakene benshi bagaragara mu batunzwe no guhinga kuko nk’i Nyamagabe, 51,2% bakennye ari abahinzi. Ibi kandi bituruka ahanini ko usanga abitwa ko ari abahinzi bafite ubutaka butoya bwo guhingaho (muri rusange hegitari imwe ihingwaho n’abantu 4), akenshi ntibanifashishe inyongeramusaruro cyane ko usanga nta n’amatungo yabafasha kubona ifumbire y’imborera.

Nko mu Karere ka Nyanza, abahinzi 39,2% nta tungo bafite mu gihe muri Muhanga ari ho bagerageza kurusha mu Ntara y’Amajyepfo habarurwa 22,3%. Ibi byose bituma usanga abenshi bahinga ibyo birira ubwabo gusa, nta gusagurira amasoko.

Abakozi ba NISR bagaragarije abayobozo n’abafatanyabikorwa bo mu Ntara y’SAmajyepfo ibyavuye muri EICV7

Hari kandi abantu benshi badafite ibyo bakora ku buryo usanga batunzwe n’abandi, nyamara bari mu myaka yo gukora. Nko mu Karere ka Nyaruguru habaruwe abadafite imirimo 19,4% ariko ubariyemo n’abitwa ko bakora nyamara ibyo bakora bidafatika (aha harimo n’abitwa ko ari abahinzi batagira aho guhinga), abadafite imirimo bagera kuri 70,9%.

Ibi kandi binajyana n’uko ubutaka bwo guhingaho bugenda bugabanuka, kuko hagati ya 2020 na 2024 ubutaka bwo guhingaho bwagabanutseho 12,8% i Nyamagabe, bugabanukaho 10,7% mu Karere ka Nyanza. Icyakora bwiyongereyeho 8,6% i Gisagara na 7,3% muri Kamonyi.

Guverineri w’Intara y’Amajyepfo, Alice Kayitesi, yaboneyeho gusaba abafatanyabikorwa kwifashisha iriya mibare agira ati “Iyi ni nk’indirorerwamo ikwiye kutuyobora aho tugomba kujya. Wishaka gukora ibikorwa aho bidakenewe. Niba uje kuba umufatanyabikorwa w’Akarere, banza urebe ahari imbaraga nkeya.”

Indi ngamba yagaragajwe yagira umumaro mu kurwanya ubukene ni iy’uko abakorana n’abaturage bya bugufi, harimo n’abafatanyabikorwa, mu byo babagezaho batajya bibagirwa kubafasha guhindura imyumvire, bagashishikarizwa gushaka ibyo bakora kandi umurimo bakawuha umwanya, kuko abenshi usanga bakora igihe gitoya cyane.

Umwe mu bari mu nama yagize ati “Niba abahinzi bacu bafite ubutaka butoya cyane bwo guhinga, hakwiye gushyirwa imbaraga mu buryo bwa butaka butoya bwabyazwa umusaruro ufatika. Ikindi hagahangwa n’indi mirimo idashingiye ku buhinzi.”

Musenyeri Louis Pasteur Kabayiza, umushumba wa EAR Gitwe na we ati “Niba dushaka gufasha abaturage bacu kwikura mu bukene, turebe uko bakoresha umunsi wabo. Umuntu aragera mu murima saa mbiri, saa tanu akaba aratashye, akamara umwanya munini ari kwifashisha dukeya yakuye mu musaruro.”

Yunzemo ati “Habeho gushyigikira udusoko twa nimugoroba, kuboneza urubyaro byitabweho, hanatekerezwe ku kubaka inzu zigerekeranye twoye gukomeza kumaraho ubutaka bwo guhingaho tubwubakaho.”

Basanga Nyange ari ikimenyetso cy’u Rwanda rushya n’urw’amateka mabi rwanyuzemo

Babivuga nyuma y’uko basuye urwibutso rwa Jenoside rwa Nyangemu Karere ka Ngororero, aho basobanuriwe ukuntu Abatutsi bahungiye kuri paruwasi ya Nyange bagasenyerwaho Kiliziya ikabagwira bakayipfiramo, ariko hakurya yaho hakaba ari ho hari ishuri ryabonetsemo abana banze kwitandukanya kugeza bamwe bishwe n’abacengezi, ryanagizwe Igicumbi cy’Ubunyarwanda.

Ubundi urwibutso rwa Jenoside rwa Nyange rwubatse ahahoze kiliziya ya Nyange ku gasozi kitegeye aka Ngobagoba, kariho ishuri ryagaragayemo abana b’Intwari. Uri ku ishuri aba abona hakurya urwibutso rwa Jenoside ndetse na Kiliziya nshyashya yubatswe hepfo yarwo, kimwe n’uko n’uri ku Kiliziya aba yitegeye ririya shuri.

Nyuma yo gusura aha hombi no kubona ko hageranye, Elie Uwayisaba, umunyeshuri muri Kaminuza Gatolika y’u Rwanda yagize ati "Uriya mupadiri (Padiri Seromba wasabye ko kateripurari isenya Kiliziya ikagushwa ku Batutsi) iyo ataza gutegeka ko urusengero ruhirikwa ngo bapfiremo, hari abari kurokoka. Ntabwo byagakwiye kubaho."

Yunzemo ati "Imyitwarire ya bariya bana (banze kumvira abasabaga Abatutsi kujya ku ruhande rumwe n’Abahutu ku rwabo) iragaragaza ko hari aho u Rwanda rwari ruvuye n’aho rwari rutangiye kujya. Nyange ni ikimenyetso cy’u Rwanda rushya, ikaba n’ikimenyetso cy’amateka mabi u Rwanda rwanyuzemo."

Bashyize indabo ku mva za zimwe mu Ntwari zishyinguye mu ishuri zagaragarijemo ubutwari

Sylvie Uwamahoro na we ati "Kumva ko Chantal yasubije Abacengezi ko bose ari Abanyarwanda, byansigiye isomo rikomeye. Hamwe na bagenzi be nabigiyeho kuba Intwari, kutivangura n’abandi, twese tukamenya ko turi Abanyarwanda."

Akomeza agira ati "N’ubwo ababyeyi bagerageza kumbwira ibihabanye n’ubumwe sinabumvira, ahubwo nabatangaho amakuru. Amateka mabi yabayeho arababaje, sinifuza ko yasubira."

Eric Karenzi ukora muri Kaminuza Gatolika y’u Rwanda, na we ati "Ndi Umunyarwanda yatangiriye i Nyange. Ibya bariya bana bagaragaje ubutwari byabaye mu 1997, ahandi dutangira kuyumva muri za 2007. Ubumwe n’ubwiyunge bikozwe neza bigirira akamaro ababirimo ariko n’Igihugu muri rusange."

Nicolas Rwaka, umuyobozi mu Rwego rw’Intwari z’Igihugu, Imidari n’Impeta by’Ishimwe, ari na we wafashije abakozi n’abanyeshuri biga muri Kaminuza Gatolika y’u Rwanda gusura Igicumbi cy’Ubunyarwanda, abajijwe aho bariya bana bakomoye ubutwari bwatumye banga kwitandukanya, yagize ati "Intwari z’i Nyange twaganiriye zatubwiye ko bari bamaze kubona ingaruka za Jenoside yakorewe Abatutsi, babona nta kamaro k’ivangura, kandi bakabona n’abakoze ibibi ntacyo byabamariye."

Rwaka avuga ko kimwe mu byateye ubutwari abana b’i Nyange ari uko bari barabonye ingaruka za Jenoside

Yunzemo ati "Babitewe kandi na gahunda ya Leta yari iriho. Abasirikare buri wa gatatu bazaga kubigisha, bakababwira iby’amacakubiri ubwayo n’ingaruka zayo. Ikindi ni imyemerere. Kuba ishuri bigagamo ryari irya Kiliziya, bafataga umwanya wo gusenga no gusabirana."

Ikindi, ngo bari bafite animateri wahoraga abigisha indirimbo ivuga ngo "Mujye mukora ibyiza, mureke ibibi."

Umuyobozi wa Kaminuza Gatolika y’u Rwanda, Padiri Dr Laurent Ntaganda, avuga ko umwaka umwe bibukira Jenoside yakorewe Abatutsi ku ishuri, ubundi bakagira ibiganiro bihurirwaho n’abanyeshuri bose ariko abahagarariye abandi bagakora urugendo bakajya gusura urwibutso rwa Jenoside.

Ati "Ni uburyo bwo kugira ngo abo turera barangwe n’ubumwe."

Kaminuza Gatolika y’u Rwanda kuri ubu iri kwigwamo n’abanyeshuri bagera ku bihumbi bine, ariko ababashije gusura Nyange ni 160. Hari ku itariki ya 10 Gicurasi 2025, batahanye umukoro wo kuzabwira bagenzi babo ibyo babonye.

Basobanuriwe amateka y’ubutwari bwaranze abanyeshuri b’i Nyinge

Bibutse abagore n’abana bazize Jenoside yakorewe Abatutsi

Yagaragaje iki cyifuzo ubwo tariki 9 Gicurasi 2025 mu Karere ka Gisagara, bibukaga abagore n’abana bazize Jenoside yakorewe Abatutsi.

Yagize ati “Iyo tubasuye aho batuye hatandukanye usanga bafite agahinda gakabije. Urabona twebwe Jenoside yabaye turi abana. Rimwe na rimwe iyo bakubwiye ubuzima banyuzemo, ihohoterwa bagiye bakorerwa, usanga twebwe tudashoboye no kubyakira, cyangwa rimwe na rimwe ntibanashake kubitubwira kuko babona nta bumenyi budasanzwe tubifiteho.”

Yunzemo ati “Usanga akenshi tubaganiriza impore, ihangane, ariko ukabona yuko hakenewe abantu bafite ubunararibonye ku buzima bwo mu mutwe, kugira ngo babaganirize ka gahinda gakabije bafite bagakire, babifashijwe n’abantu babizi neza.”

Jérôme Mbonirema, umuyobozi wa IBUKA mu Karere ka Gisagara, avuga ko iki cyifuzo bazagikorera ubuvugizi.

Yagize ati “Turashaka gukora ubuvugizi kugira ngo hazongerwe abasobanukiwe n’ubuzima bwo mu mutwe. Hari umukozi ubishinzwe mu Karere ariko tuzakomeza dukore ubuvugizi haboneke n’abandi bamufasha.”

Yongeyeho ariko ko bikwiye ko abarokotse Jenoside barushaho kwegerwa n’abaturanyi, cyane cyane abadafite abo bari kumwe, cyane mu bihe by’iminsi 100 yo kwibuka.

Ati “Uretse n’icyo ariko (cyo gushakirwa impuguke mu buzima bwo mu mutwe), uwarokotse Jenoside icyo aba akeneye ni umuba hafi, ni umushakira icyo adafite, ni umutera inkunga.”

Kwibuka abagore n’abana i Gisagara byajyaniranye no gushyingura mu cyubahiro imibiri yakuwe i Nyange mu Murenge wa Kansi

Kwibuka abagore n’abana bazize Jenoside yakorewe Abatutsi, byabereye ku rwibutso rwa Jenoside rwa Kabuye, ahashyinguye imibiri irenga 47,720.

Abagore bahagarariye abandi mu nama y’Igihugu y’abagore no mu rugaga rw’abagore rushamikiye kuri FPR kandi baremeye umubyeyi w’imyaka 73 warokotse Jenoside

Mukecuru Madalena uherutse kwitaba Imana

Yitwaga Mariya Madalena Mukarugaba, akaba yarakomokaga mu Murenge wa Mushubati mu Karere ka Rutsiro. Yari umupfakazi.

Ntiyabyinaga nk’uko abandi babigenza mu kiliziya, we yabyinaga nk’intore, akajya aca n’umugara, kandi akabyinira hafi ya Alitari. N’ubwo hari igihe bamubuzaga bitewe n’uko babonaga ari kurangaza abaje gusenga, urebye ntiyabumvaga.

Jean Baptiste Bizimana, umuhungu we w’imbyaro ya kane (yabyaye abana batanu), yabwiye Kigali Today ko kubyina mu Kiliziya atabihoranye kuva akiri mutoya, ko yabitangiye aho yihaniye, akiyemeza gutangira kubaho nk’umukirisitu. Icyo gihe ngo yari afite imyaka ibarirwa muri 50, kandi yitabye Imana yari afite 73.

Ati “N’ubwo yari asanzwe yarabatirijwe mu bagatolika yabayeho nk’umuntu usanzwe ukora ibikorwa bitari iby’ubukirisitu harimo n’ubusinzi. Mu myaka 22 ishize ni bwo yahindutse, atangira no kuzajya akunda kujya gusengera i Kibeho no mu Ruhango.”

Yakomeje agira ati “Yahindutse ahindutse, atangira no kuzajya abyina kuriya abantu bamuzi mu kiliziya iwacu ndetse n’ahateraniye abantu benshi nk’i Kibeho no mu Ruhango. Na mbere hose yakundaga kubyina nko mu bukwe, ariko aho ahindukiye agatangira gusenga cyane akareka inzoga n’itabi, yiyemeje kuzajya abyinira Imana yonyine. Yakundaga kuvuga ngo ko nabyiniraga abantu, ni gute ntabyinira Imana yanjye?”

Hari abamubonaga za Kibeho na Ruhango bagakeka ko atabona umwanya wo gukora bityo akaba yaba atunzwe no gusaba, ariko ngo si ko byari bimeze. Ngo yari atunzwe n’ubuhinzi.

Bizimana ati “Yarahingaga akeza agakunda kuduha ku byo yejeje, twebwe abana be. Urebye ariko ni njyewe yahaga byinshi kubera ko hari ukuntu ari njyewe twakundanaga cyane ugereranyije n’abandi.”

Kuva iwabo ujya i Kibeho n’amaguru abantu ngo bahagenda iminsi itatu. Umunsi arohama wari umunsi wa kabiri w’urugendo. Yari yaraye avuganye na Bizimana, amubwira ko aho yari yaraye bari babakiriye neza, ngo yongeraho amagambo avuga ngo “Ndumva ijuru ryahumuye!”

Bizimana ati “Wagira ngo yari yiyumvisemo ko agiye kwitaba Imana. Nabyibutse bambwiye ngo ararohamye. Ikinatangaje mu mipfire ye, ni ukuntu abamurohoye basanze agifashe mu ntoki umusaraba wo ku ishapule nini yakundaga kugendana. N’urugori rwe yari akirwambaye.”

Iyo namubonaga namenyaga ko hari abantu benshi bazaza i Kibeho - umwe mu bakorera i Kibeho

Umwe mu bakorera i Kibeho hafi y’Ingoro ya Bikira Mariya, avuga ko igihe cyose habaga hari buhurire abantu benshi, ari gahunda atazi, yabibwirwaga no kubona Madalena i Kibeho.

Yagize ati “Iyo namurabukwaga nahitaga menya ko muri iyo minsi hazaza abantu benshi. Sinzi icyabimubwiraga! Niba byarabaga byavuzwe kuri Radio Maria, sinamenya!”

Ku wa Gatandatu tariki ya 10 Gicurasi 2025, i Kibeho hazateranira abantu benshi bazaba baje kwizihiza umunsi w’impuhwe. Bazatangira kuhagera ku wa gatanu. Nta gushidikanya ko ari yo mpamvu Madalena yari ari kujyayo.

Yaguye mu mugezi wa Mbirurume, hagati y’Uturere twa Karongi na Nyamagabe, ubwo yageragezaga kuwambuka agana i Kibeho n’amaguru.

Icyo gihe ngo yari kumwe n’abandi bantu batanu, basanga Mbirurume yuzuye kubera imvura nyinshi yari yaguye, hanyuma abanziriza bagenzi be agira ngo arebe ko kwambuka bikunda, ni ko gutwarwa n’amazi, ku buryo abaturage batuye hafi aho bitabajwe baje kumurohora basanga yamaze kwitaba Imana.

Ku gicamunsi cy’itariki ya 7 Gicurasi 2025, abakunze kujya gusengera mu Ruhango n’i Kibeho bumvise inkuru y’urupfu rw’umukecuru wari uzwiho kubyina bidasanzwe mu gihe cya misa.

Yitwaga Mariya Madalena Mukarugaba, akaba yarakomokaga mu Murenge wa Mushubati mu Karere ka Rutsiro.… pic.twitter.com/tCJXXP0dpc

— Kigali Today (@kigalitoday) May 9, 2025

Hari abacururiza mu isoko ry’Ingenzi za Huye binubira kwibwa

Bamwe muri bo batashatse ko amazina yabo atangazwa babwiye Kigali Today ko ubu bujura butangiriye aho camera zari mu isoko zitagikora, ku buryo hatamenyekana abibye.

Umwe muri bo ucuruza imbuto yagize ati “Mu minsi yashize banyibye ibitoki by’imineke by’ibihumbi 20, banyiba na avoka zose nari naranguye, ku buryo byabaye ngombwa ko mba mpagaritse gucuruza nkabanza kujya gushaka ikindi gishoro.”

Umukecuru na we ucuruza imbuto twasanze yari yaraye yibwe yagize ati “Banyibye ibitoki by’ibihumbi 60. Ubu ndi kwibaza uko nza kubigenza.”

Mugenzi we na we ati “Mu minsi yashize naranguye mandarine z’ibihumbi 40, nje mu gitondo nsanga nta n’imwe ihari. Tekereza kwegeranya amafaranga y’abanyeshuri, wagira ngo ugiye kwisuganya ukisanga ibyari kugufasha nta na kimwe gisigaye!”

Yunzemo ati “Tubibaza ubuyobozi bw’Ingenzi bakatubwira ko bari bukore iperereza, tugategereza ibyavuye mu iperereza tugaheba.”

Undi na we ati “Ntiwamenya uwibye, yaba mugenzi wawe cyangwa umusekirite. Birasaba ko hashyirwaho camera kandi zikora, kuko n’izari zihasanzwe zari nkeya ubu zasinziriye.”

Abakorera muri iryo soko kandi binubira kuba batajya bakoreshwa inama, bituma bisanga hari ibyemezo bafatiwe, bakabiturwaho batazi aho byaturutse.

Bataka igihombo kubera kwibwa mu buryo budasobanutse

Muri iyi minsi bwo barinubira ko bategetswe kuzajya baba batashye saa tatu za nijoro, icyo cyemezo bakaba baragituweho batazi impamvu yacyo.

Umwe muri bo ati “Ubundi umuntu yacuruzaga, yabona nta bakiriya bagihari agafunga agataha. Ni gute batugabanyiriza amasaha yo gukora, nyamara ntibagabanye amafaranga y’ubukode?”

Undi ati “Nta nama badukoresha ngo dutange ibitekerezo nk’abakiriya babo, nta n’udusanduku tw’ibitekerezo bashyizeho ngo byibura tujye tubasha kugaragaza ibitubangamiye. Rwose dufashwe nabi nk’abakiriya.”

Hari n’umuryango abantu bakunze kunyereramo ukwiye gukosorwa

Abakorera mu isoko ry’Ingenzi banavuga ko hari hakwiye gusubirwamo imyubakire yo mu muryango usohoka mu isoko ry’imboga n’imbuto, uri ku muhanda ugana mu Rwabayanga kuko hari ukuntu hanyerera, kandi ko ubimenya ari uko uhaguye. N’ikimenyimenyi ngo ntihashira icyumweru nta bantu babiri cyangwa batatu bahaguye.

Umwe mu bacururiza hafi yawo ati “Ujya kubona ukabona umugore utwite cyangwa ufite umwana araguye. Haba mu zuba, haba mu mvura, haranyerera. Twebwe ducuruza mu isoko twamaze kuhamenya, ariko abatahazi bo rwose barahagwa.”

Mugenzi we ati “Umudamu umwe wo mu Rwabuye yarahamanutse ajya gutega moto, aranyerera aragwa, ahaguruka ajya kwa muganga. Niba yarakize, niba akirwaye, simbizi. Icyakora simperuka kumubona.”

Inyinshi muri camera zari zihasanzwe ntizigikora

Hari n’umudamu ukuze ucururiza muri iryo soko ugenda acumbagira, kandi na we ngo ni ho yaguye, yivuje imvune yanga gukira.

Francine Murekatete, Perezidante w’Ingenzi, avuga ko Camera zafasha mu gukaza umutekano bazitangiye isoko, ko zizaboneka bidatinze, ariko akanibutsa abacuruzi kurushaho kwita ku byabo, bagasiga bafunze neza, kuko byagaragaye ko hari abajya basiga badafunze.

Naho ku kibazo cyo kudakoreshwa inama, ngo buri gice cy’isoko kigira komisiyo y’abanyamuryango bagikurikirana, ku buryo hatagombye kubaho abavuga ko bagize ibibazo bakabura abo babishyikiriza.

Ati “Bajye batugana batubwire, ibibazo byabo nta cyatubuza kubikemura kuko burya umukiliya ari umwami.”

Naho ku bijyanye n’umuryango unyerera, ngo hari amavugurura y’inyubako bari hafi gushyira mu bikorwa, ku buryo n’aho uri hazavugururwa, bityo n’ikibazo kigakemuka.

Ku kazamuka kari muri uriya muryango ni ho hanyerera, ku buryo hari abantu bahagwa

I Ngoma hashyinguwe imibiri 473 harimo 471 yabonetse muri uyu mwaka

Yabivuze mu gikorwa cyo kwibuka ku nshuro ya 31 Jenoside yakorewe Abatutsi mu 1994 i Ngoma mu Karere ka Huye, ku wa 30 Mata 2025.

Ni igikorwa cyajyaniranye no gushyingura mu cyubahiro imibiri 473 harimo 471 yabonywe hirya no hino mu Murenge wa Ngoma, cyane cyane mu Kagari ka Matyazo, ndetse n’ibiri yimurirwaga mu rwibutso rwa Jenoside rwa Ngoma.

Nk’umwe mu bafite abe bashyinguwe, Amb. Karabaranga yagize ati "Ntabwo byumvikana ko nyuma y’imyaka 31 twubaka Igihugu cyacu, dufite Leta y’Ubumwe, ari bwo twabona amakuru (ku haherereye imibiri), na bwo ku buryo bw’impanuka, kuko abo dushyingura uyu munsi batabonetse ku bw’amakuru yatanzwe ku neza."

Yakomeje agira ati "Abenshi bavuye mu muryango wo kwa Supa. Byamenyekanye kuko abo kwa Supa bashwaniye mu mitungo, bikarangira bamwe bavuyemo abandi bagira bati nitutumvikana kuri iyi mitungo ndavuga bya bindi mwakoze mu rugo."

Yaboneyeho kongera gusaba abazi ahaherereye imibiri y’Abatutsi bishwe mu gihe cya Jenoside itarashyingurwa mu cyubahiro kuhagaragaza, kuko imyaka 31 bahishe ukuri ari myinshi.

Ati "Twagiye dutekereza ko bamwe dushobora kuba twarabashyinguye, abandi wenda baguye ahandi. Ariko birababaje kuba bamwe ubu tubabona mu bikari by’abaturanyi bacu ndetse barabubakiyeho amazu amwe bakayaturamo, abandi ugasanga bubatse salon hejuru y’ahashyinguye abacu, abandi ugasanga babubakiyeho ubwiherero. Ni ibintu bibabaje twamagana, twifuza ko byarangira rwose."

Yasabye rero ko Leta yashyiraho ubukangurambaga ku kugaragaza ahari imibiri y’Abatutsi, kuko bimaze kugaragara ko amakuru yagiye atangwa cyane cyane mu gihe cya Gacaca atari yose.

Amb. Karabaranga, yunamiye abaruhukiye mu rwibutso rwa Jenoside rwa Ngoma harimo n’abo mu muryango we

Yanifuje ko abakurikiranweho kudatanga amakuru nkana ku haherereye imibiri bajya baburanira mu ruhame, kugira ngo bibere isomo abandi bakiyabitse, bityo imibiri ibashe gushyingurwa yose, ababuze ababo baruhuke ku mutima.

Ati "Mu nkiko hajyayo abantu bakeya. Dukeka ko kuburanishirizwa mu ruhame nko kuri sitade, bigasohoka no mu bitangazamakuru no ku mbuga nkoranyambaga, byafasha kwigisha abantu kugira ngo bumve ubukana bwo guhisha amakuru. Amategeko arahari kandi arashaririye, ariko abantu bashobora kuba batayazi."

Muri uyu mwaka mu Murenge wa Ngoma habonetse imibiri 471. Amakuru dukesha Perezida wa IBUKA mu Murenge wa Ngoma, Jérôme Karangwa, ni uko imyinshi yabonetse mu Kagari ka Matyazo ahitwa mu Rurenda kwa Callixte Kanamugire bita Supa, kuko honyine havuye 179. Icyakora hari n’iyabonetse ahitwa Kamucuzi na ho mu Kagari ka Matyazo, ndetse no ku Karubanda mu Kagari ka Butare.

Kugeza ubu hari abagore batatu bamaze gufatwa bakurikiranyweho kuba barahishe auo makuru, harimo umubyeyi n’umukobwa we, ari na bo bashwaniye mu mitungo bagahishura ibihishe iwabo. Imibiri yindi ahanini yo yabonetse biturutse ku makuru yatanzwe n’uwahaniwe Jenoside wafunguwe, arangije igihano.

Mu mwaka ushize na bwo i Ngoma bari bashyinguye imibiri 2060, kandi imyinshi yari yabonetse mu Kagari ka Ngoma, ahitwa kwa Hishamunda. Ku bantu barindwi bari bakurikiranyweho guhisha amakuru, batatu bakatiwe ahanini igifungo cy’imyaka 7, batatu baba abere undi we apfa atarakatirwa.

Mu Kibaya cy’Amahoro no mu nkengero zacyo hari abantu benshi ku munsi w’Impuhwe 2025

Ubundi abajya gusengera kwa Yezu Nyirimpuhwe mu Ruhango buri cyumweru cya mbere cy’ukwezi, nk’uko byagenze ku ya 27 Mata 2025, bateranira mu kibaya basigaye bita icy’Amahoro, kiri ku buso bwa hegitari eshatu.

Ntabwo hatwikiriye ku buryo iyo imvura iguye inyagira abagiye kuhasengera, n’izuba ryava ari ryinshi rikabica, ku buryo utitwaje umutaka ahura n’ingorane.

Bikubitiyeho ko n’abajya kuhasengera bagenda biyongera uko imyaka igenda yicuma, hatekerejwe kuhatwikira, hakanagurwa, ariko Padiri Nizeyimana avuga ko umugabo bagombaga kugura aho kwagurira yakomeje kubashyiraho amananiza, ku buryo biyemeje gusubiramo inyigo y’uko bagomba kubaka.

Agira ati “Aho twateganyaga kugura hari ku buso bwa hegitari 3,8. Yabanje kuduca Miliyoni 100, zimaze kuboneka tugize ngo twishyure aduca 150, na zo zimaze kuboneka ati noneho ni 350, hanyuma Miliyoni 500. Yageze n’aho avuga ko ibikorwa biri ku butaka bwe yari yaragennye ko ari byo bizamufasha mu masaziro ye, bityo bakaba bakwiye kumwishyura Miliyoni 700.”

Kugenda yongera ibiciro kandi urebye ngo yagiye abiterwa n’uko yabonaga byanze bikunze bagomba kumugurira, bitewe n’uko igishushanyo cy’uko ingoro igomba kuba imeze cyakozwe, hanatekerezwa ku butaka bwe.

Ku Ngoro ya Yezu Nyirimpuhwe ngo ntibari barigeze batekereza ko yabananiza bene kariya kageni, kubera ko bari bamwizeye nk’umukirisitu ukomeye wabo.

Twifuje kumenya impamvu Ubuyobozi bw’Akarere butabafashije, Padiri Nizeyimana avuga ko ari Akarere ari n’Intara ntako batagize bikanga, kandi ko urebye agaciro k’iriya sambu gashobora no kurenga ibyo nyiri isambu yaka, kubera ko yamaze kumenya ko hari gahunda yo kuhagurira ingoro agateramo ibiti kugira ngo azabashe kuhahenda.

Ati “Kiretse tubonye umuterankunga uhatugurira, naho ubundi twebwe ntitwabona ariya mafaranga. Twiyemeje ko tuzakoresha ubutaka dufite, tugakora ikindi gishushanyo cy’inyubako ikenewe.”

Umuntu agendeye ku kuba ahagombaga kugurwa harutaho gatoya ahasanzwe hasengerwa, inyubako yari yatekerejweho yari kubasha kwakira abaza mu isengesho bose no ku munsi w’impuhwe, ariko nanone Padiri Nizeyimana atekereza ko akurikije uko abantu bitabira isengesho bagenda biyongera, hari igihe na ho hari kuzagera aho hakaba hatoya, kuko n’abaza no ku minsi isanzwe y’isengesho bagenda biyongera.

Ati “Kubaka ku butaka bwacu gusa, birasaba kuzubaka mu buryo bwa etaje, naho ubundi ni hatoya cyane. Tugiye gutangira kubitekerezaho.”

Ni isengesho ryitabirwa cyane

Gusengera mu Ruhango bitangira byaberaga muri kiliziya ntoya yari ihari (ubu yaraguwe). Uko abitabira isengesho bagiye biyongera, hatekerejwe kwimurira isengesho mu kibaya cyarimo ishyamba. Ibiti byagiye bikurwamo buke buke ku buryo nta kihasigaye, kandi mu rwego rwo kubasha kurindira umutekano abagiye kuhasengera, harazitiwe.

Isengesho ryo ku Munsi w’Impuhwe 2025 ryitabiriwe n’ababarirwa mu bihumbi

N’ubwo nta wabaze abitabiriye isengesho kwa Yezu Nyirimpuhwe mu Ruhango, ku Munsi w’Impuhwe wabaye ku cyumweru tariki ya 27 Mata 2027, hari abavuga ko ugereranyije ryitabiriwe n’ababarirwa mu bihumbi 200.

Mu Kibaya cy’Amahoro gisanzwe gisengerwamo nyiri izina, byageze saa yine hamaze kuzura, ku buryo wasangaga abantu bicaye begeranye cyane. Uretse abari bicaye ku ruhande hafi y’utuyira twaciwemo, abari hagati babashaga kuva hamwe bajya ahandi bitaboroheye.

Abari hanze y’urugo rukikije ikibaya cy’Amahoro, ni ukuvuga abahageze abarinda umutekano bamaze gufunga imiryango, bavuga ko urebye abari hanze y’ikibaya bashobora kuba bararutaga abari bakirimo imbere.

Bamwe bari bicaye muri kaburimbo, abandi mu mbuga ya kiliziya no mu mahema yari yahatewe, agenewe abaza gucuruza. Kimwe n’abari mu kibaya na bo bari begeranye cyane ku buryo kubonamo inzira bitari byoroshye.

Hari n’abari bicaye muri kiliziya, ndetse no mu ishyamba ry’inyuma ya Alitari, aho Ingoro ya Yezu Nyirimpuhwe yashakaga kwagurira aho abantu basengera.

Twifuje kumenya impamvu abantu baza ari benshi kuri uwo munsi, abenshi bahuriza ku kuba ari umunsi Yezu akora ibitangaza cyane, kuko ngo “Ntawe utaha Yezu Nyirimpuhwe atamukozeho, kubera ko uwo adakijije ku mubiri amukiza kuri Roho.”

Ndagijimana w’i Nyamagabe yagize ati “Ni ubwa kabiri nza mu Ruhango, kandi nza ku munsi w’Impuhwe. Ni bwo nza kubera ko ntabona ubushobozi bunzana igihe cyose. Nahisemo kuzajya nza ku munsi w’Impuhwe kuko ari bwo Yezu akora ibitangaza byinshi.”

Mukamutara w’i Kibilizi mu Karere ka Nyanza na we ati “Nsanzwe nza gusengera mu Ruhango, ariko ku munsi w’impuhwe w’umwaka ushize wa 2024 nazanye umukobwa wanjye kumusabira kubona umugabo, kuko yari amaze kubengwa n’abasore batatu, ubukwe bugapfa bwari bugiye kuba. Uyu munsi twaje gushima Imana hamwe n’umukobwa wanjye ndetse n’umukwe wanjye.”

Nirere na we wo mu Karere ka Nyanza ati “Umukobwa wanjye yamaze imyaka itanu ashatse atarasama inda, ku munsi w’impuhwe wa 2023 muzana kumusengera, tubwira Yezu ngo byibura n’iyo haboneka n’ivamo ariko akitwa umubyeyi. Yezu rero yaduhaye ibyo twamusabye kubera ko yatangiye kujya asama zikavamo. Twari twasabye nabi. Uyu munsi twaje kubwira Yezu ko noneho dukeneye umwana uzavuka ari muzima. Twiteze ko muri 2026 tuzaza hano tuje gushima, dufite n’umwana.”

Bifuza kubona aho basengera hatwikiriye

Inkuru bijyanye:

Ruhango: Rwagashayija arahakana kwimana ubutaka bwo kwaguriraho Ingoro ya Yezu Nyirimpuhwe

Meya Rutaburingoga avuga ko Jenoside itabaye impanuka kandi ko nta n’aho ihuriye n’intambara

Yabibwiye abitabiriye kwibuka Jenoside i Save, ku wa 25 Mata 2025, yabashishikarizaga kuzirikana ubwicanyi ndengakamere Abatutsi bakorewe, no guharanira ko Jenoside itazasubira, ndetse no kuzirikana intimba n’agahinda abarokotse Jenoside babana na byo, bakajya babakomeza aho kubatoneka.

Yateruye agira ati “Uwaje hano wese afite uwo banganyaga imyaka, wishwe azira ubusa, avutswa ubuzima. Jenoside ntiyabaye nk’impanuka, nta n’ubwo yabaye nk’intambara.”

Yakomeje agira ati “Intambara tuzi uko ziba. Intambara ijyamo ingabo zifite icyo zigamije, ntijyamo abaturage. Intambara iba igamije gutsinda, usabye imbabazi, uyobotse n’umunyantege nkeya ntawe ubakura. Intambara kandi igira imfungwa. Muri Jenoside hari uwafungwaga? Hari uwasabaga imbabazi?”

Yunzemo ati “Mu ntambara birabujijwe kwibasira abaturage, by’umwihariko abana, abagore, abasaza n’abarwayi. Abacu bagiye nta wari ku rugamba. Nta warwanaga n’abamuvukije ubuzima. Ni inzirakarengane.”

Habayeho kunamira Abatutsi baruhukiye mu rwibutso rwa Jenoside rwa Save

Yanasobanuye ko ari bwo bwa mbere mu Rwanda habayeho ubwicanyi ndengakamere (Jenoside), anavuga ko Jenoside atari inyarwanda, n’ikimenyimenyi ikaba nta nyito y’Ikinyarwanda igira.

Ati “U Rwanda ntirwatangiriye kuri Jenoside, yabaye hashize imyaka 100 abakoloni batugezemo, ari na bo bayitubibyemo. Mu 1924 basenye itorero ari ryo abana b’Abanyarwanda batorezwagamo imico myiza, ubupfura, gukunda igihugu no kukirinda, nuko batuma hatangira kubaho ibihazi, abatagira umutima. Ni yo mpamvu mu budaheranwa bwacu dusabwa kwiyubakamo Ubunyarwanda. Nubuta uzaba icyo ntazi.”

Yunzemo ati “Muri Jenoside habamo gukomeretsa imibiri n’imitima. Nti kwari ukubica (Abatutsi) gusa. Kwica umugore n’umwana mu Rwanda ni amahano. Ni yo mpamvu mu kwigisha tugomba kubwira Abanyarwanda gufata inshingano zidasanzwe, kuko aho twageze ntihagira munsi yaho nk’uko Nyakubwahwa Perezida wa Repubulika ahora abitubwira.”

Igikorwa cyitabiriwe n’abantu b’ingeri zose

Jérôme Mbonirema, Perezida wa Ibuka mu Karere ka Gisagara

Yanabibwiye abayobozi bitabiriye kwibuka ku nshuro ya 31 Jenoside yakorewe Abatutsi mu 1994, igikorwa cyabereye ku rwibutso rwa Jenoside rwa Kabuye mu Murenge wa Ndora mu Karere ka Gisagara, tariki 23 Mata 2025.

Mu ijambo rye, hari aho yagize ati “Ibiciro ku isoko byarazamutse, ariko inkunga yo ntizamuka kandi n’ubusanzwe ari ntoya.”

Yunzemo ati “Uburyo itangwamo nab wo ntibunoze. Ihabwa umuntu ku giti cye nyamara hari abo babana yarokoye, mu gihe mu gutanga izindi nkunga (z’ingoboka z’abatishoboye bageze mu zabukuru) babara abari mu rugo bose. Muzadukorere ubuvugizi kugira ngo n’abarokotse Jenoside babashe guhangana n’ibiciro ku isoko.”

Bashyinguye mu cyubahiro imibiri 34

Ahereye kandi ku kuba hari abahaniwe icyaha cya Jenoside batigeze basaba imbabazi barangije ibihano bagenda bafungurwa, ugasanga bafite umutima utari mwiza, yifuje ko bajya bakurikiranwa kugira ngo batazasubiza inyuma intambwe y’ubumwe n’ubudaheranwa yari imaze guterwa.

Yagize ati “N’uzafatwa azahanwe by’intangarugero.”

Ku bijyanye n’ingoboka, Senateri Soshtène Cyitatire wari waje kwifatanya n’Abanyendora mu gikorwa cyo kwibuka, yamwijeje ko ubwo buvugizi bazabukora.

Yanibukije abamwumvaga ko kwibuka ari umwanya wo kuvuga mu ijwi riranguruye ko Jenoside itazongera kubaho ukundi, kandi ko “ari n’umwanya wo gusubiza amaso inyuma, tugatekereza ibyatubayeho bityo tugakomera ku cyerekezo twahisemo cyo kuba umwe, kuko kugeza uno munsi hakiri abantu batavuye ku izima.”

Mu rwibutso rwa Jenoside rwa Kabuye haruhukiye imibiri 47,220. Mu gikorwa cyo kwibuka tariki 23 Mata 2025 hanashyinguwe imibiri 34, harimo 19 yabonetse na 15 yimuwe.

Minisitiri w’Uburezi, Joseph Nsengimana

Yabisabye ku wa 22 Mata 2025, ubwo yari mu gikorwa cyo kwibuka ku nshuro ya 31 Jenoside yakorewe Abatutsi mu mwaka wa 1994, hazirikanwa abari abanyeshuri ndetse n’abarimu muri Kaminuza y’u Rwanda bazize Jenoside yakorewe Abatutsi.

Mu ijambo rye, yavuze ko kwibuka ibyakorewe muri Kaminuza y’u Rwanda mu gihe cya Jenoside ari umwihariko, kuko Kaminuza yakagombye kuba ari yo yigishije abantu ubumuntu, n’abayizemo bakaba ari bo barengera ikiremwamuntu, bakanatabara abandi, nyamara akaba atari ko byagenze.

Avuga ko ahubwo abagatabaye abandi, ari bo bagize uruhare runini mu gutegura ndetse no gushyira mu bikorwa Jenoside yakorewe Abatutsi mu 1994.

Ati "Ibi rero bituma twibaza byinshi ku byerekeye uburezi bw’icyo gihe, ariko tukagaruka no kwibaza ku burezi turimo turatanga ubungubu, kuko turimo turubaka u Rwanda rw’ejo ruzira amacakubiri."

Yunzemo ati "Tujye tunakoresha uyu mwanya (wo kwibuka) dusuzuma aho Kaminuza y’u Rwanda ya nyuma ya Jenoside igeze itanga umusanzu mu guhindura ayo mateka mabi. Twibaza tuti yaba igeze he mu rugendo rwo kubaka umuryango nyarwanda uzira amacakubiri? Mbese ni gute abashakashatsi n’abanditsi bacu bagira uruhare mu kurwanya ingengabitekerezo ya Jenoside, no guca intege abakomeje kuyipfobya no kuyihakana?"

Ntiyanirengagije ariko ko hari byinshi bimaze gukorwa, n’ubwo urugendo rukiri rurerure.

Ati "Iyi Kaminuza yafatanyije n’izindi nzego mu gusana umuryango nyarwanda. Ni muri urwo rwego Minisiteri y’uburezi yashyizeho integanyanyigisho mu rwego rwa Kaminuza zirebana no gusana umuryango nyarwanda. Hashyizweho porogaramu mu gukemura ibibazo by’ubuhungabane n’ubuzima bwo mu mutwe (clinical psychology), gukemura amakimbirane (conflict resolution), guhindura imyumvire n’imibereho (social work), uburere mboneragihugihugu n’izindi."

Mu bakurikiye ubu butumwa, hari abagaragaje ibyo babona byakwitabwaho na Kaminuza y’u Rwanda, mu bushakashatsi bugamije kubaka u Rwanda rwa nyuma ya Jenoside.

Roger Imanishimwe wiga mu mwaka wa kabiri yagize ati "Kaminuza nk’ahantu navuga hari abanyabwenge, itanze umusanzu mu gukora ubushakashatsi butandukanye, urugero nko kugaragaza ukuri ku mateka, byafasha ko abayagoreka berekwa ibimenyetso ntasubirwaho. Byafasha mu guhangana n’abagoreka amateka yacu."

Prof Vincent Sezibera, umwarimu muri Kaminuza y’u Rwanda, na we ati "Kaminuza ni ikigo cyigisha abahanga binajyana no gukora ubushakashatsi. Ubwo bushakashatsi bugomba kugira uruhare mu gukemura ibibazo biriho, harebwa ibyariho n’ibisigaye kugira ngo na byo bibonerwe umuti."

Afatiye urugero ku bana bagiye bagaragarwaho n’ingengabitekerezo ya Jenoside mu minsi yashize, yagize ati "Umuntu yakwibaza ngo aho ntibaba bakoresha amagambo batazi uburemere bwayo? Ni byiza ko hamenyekana imvugo zishingiye ku kutamenya kw’abakiri batoya, bityo hakajyaho ingamba zo gutuma babimenya, bakabyirinda. Cyangwa niba babikora ku bwende, nanone hakajyaho ubundi buryo bwo guhangana na byo."

Perezida wa IBUKA mu Rwanda, Dr Philbert Gakwenzire, na we yitabiriye kwibuka Jenoside muri Kaminuza y’u Rwanda. Yasabye ko hakorwa ubushakashatsi bugaragaza uruhare rwa Kaminuza y’u Rwanda mu kubaka Igihugu, anifuza ko imihanda, inyubako n’ibyumba by’amasomo byo mu ishami rya Kaminuza y’u Rwanda ry’i Huye byakwitirirwa abarimu n’abarezi "bayizemo bibagoye, bakayikoramo bibagoye, bikarangira bahiciwe nabi."

Musenyeri Ntagungira ati guca k’uri mu byago ntumutabare si ubusirimu

Yabibwiye abakirisitu bizihirije Pasika kuri katedarari ya Butare, tariki ya 20 Mata 2025, ari na ho na we yayizihirije.

Mu ivanjiri yasomwe, hari ahavuga ko bakimara kumenya ko umubiri wa Yezu utakiri mu mva, abigishwa be Petero na Yohani bahise babaduka bajyayo. Yohani wari ukiri mutoya akagira ibakwe agatangayo Petero, ariko yagerayo ntahite yinjira akamutegereza.

Mu nyigisho ijyanye n’iryo jambo ry’Imana, Musenyeri Ntagungira yaboneyeho gusaba abakirisitu kugira ibakwe ryo gutabara uwo bamenye wagize ikibazo, nk’uko Petero na Yohani batazuyaje kwihuta bacyumva inkuru y’uko umurambo wa Yezu utakiri mu mva.

Yagize ati “Muri iki gihe umuntu agira impanuka mu muhanda, abatwaye ibinyabiziga bakamunyuraho bihuta, badashaka uwababwira ngo bamujyane kwa muganga, bakavuga ko uwagize impanuka ari uwa Leta.”

Yunzemo ati “Guca k’uri mu byago ntumurebe, si ubusirimu nk’uko hari ababikeka.”

Musenyeri Jean Bosco Ntagungira yizihirije Pasika ya 2025 kuri Katedarari ya Butare hamwe n’abapadiri bakeya

Ahereye ku myitwarire ya Yohani utarahise yinjira mu mva, ahubwo agategereza Petero, yibukije abakiri batoya ko bakwiye guha agaciro ubunararibonye bw’abantu bakuru.

Ati “Yohani yageze ku mva ategereza Petero, n’ubwo yari yamurushije amaguru. Abatoya namwe ntimukumve ko abakuze ntacyo bavuze, ngo mwumve ko ‘bexpirinze’ (barangije igihe mu mvugo y’ab’ubu). Yohani yamutegereje kubera ko yari azi ko amuruta anamurusha ubunararibonye. Abakiri batoya namwe mujye mwumva impanuro z’abakuru"

Yanibukije kandi ko ukwemera kutagira ibikorwa ntacyo kuvuze, bityo ko no kuvuga ngo Yezu yazutse mu magambo bidahagije, igihe umuntu atiteguye kumwakira.

Aha yatanze urugero ku Bayisiraheli bavuye mu gihugu cy’ubucakara, ariko ntibareke kuba abacakara kuko batahwemye kwinubira uko bari babayeho mu nzira, byatumye bagera aho bakabwira Musa ko bashaka kwisubirirayo.

Ati “Beretswe ibimenyetso, ariko bakomeje kugira ijosi rishingaraye. Byabaviriyemo ko ahantu bashoboraga kugenda mu gihe cy’ukwezi kumwe gusa bahagenze imyaka 40. Kwari ukugira ngo Uhoraho abamaremo ubucakara.”

Minisitiri Olivier Nduhungirehe

Yabibwiye abitabiriye igikorwa cyo kwibuka ku nshuro ya 31 Jenoside yakorewe Abatutsi mu 1994, bari bateraniye i Simbi mu Karere ka Huye, kuri uyu wa 18 Mata 2025.

Mu ijambo rye yabanje kwibutsa abari bahari ko kwibuka Jenoside yakorewe Abatutsi mu 1994 ari inshingano ya buri Munyarwanda, anabibutsa ko i Butare abaturage nta burakari bari bafite, koikibi cyazanwe n’abayobozi.

Yagize ati "Nk’uko mubizi, Jenoside mu cyahoze ari Perefegitura ya Butare yatangiye hashize ibyumweru. Bivuze ko nta burakari bw’abaturage bwari hano ku itariki ya 7 Mata. Ahubwo yazanywe n’abayobozi."

Yakomeje agira ati "Na Sindikubwabo wari Perezida yaje hano i Simbi, muribuka ijambo rutwitsi yavuze. Hari n’inama yakoresheje abari ababurugumesitiri bose bo muri Perefegitura ya Butare, byose bigamije gukwiza umugambi wa Jenoside cyane cyane muri iyi Perefegitura yari yaranangiye."

Yibukije kandi ko interahamwe hamwe n’abandi bakoze Jenoside bahungiye muri Congo, aho kugira ngo bamburwe intwaro, bashyirwe kure y’umupaka, guverinoma ya Congo ikabafasha kugeza n’aho ari bo bayobora inkambi z’impunzi, bakinjizwa no mu gisirikare cya yo.

Ati "Abongabo biyise FDLR. Ubu tuvugana FDLR n’ingabo za Congo nta tandukaniro, barakorana umunsi ku wundi. Urugero ni uriya wiyita Jenerali Ezechiel Gakwerere (uherutse gufatwa) wagize uruhare rukomeye mu gukora Jenoside mu cyahoze ari Perefegitura ya Butare, ndetse akaba yaranagize uruhare mu rupfu rw’Umwamikazi Gicanda Rosalie. Yari mu ngabo za Congo."

Yunzemo ati "Basize bishe Abatutsi mu Rwanda, bahungira muri Congo, basangayo abandi Batutsi, bakomeza kubahohotera. Kandi bikorwa ku manywa y’ihangu. Murabibona ku mbuga nkoranyambaga, abakubitwa, abicwa, abatwikwa, ndetse n’abaribwa. Muri Congo umudugudu muzima ushobora gutwikwa kubera ko utuwe n’Abatutsi b’Abanyekongo, Monusco n’Akanama k’umutekano ntibagire n’ijambo na rimwe bavuga. Ibyo byarabaye mu kwezi k’Ukwakira 2023, mu Mudugudu wa Nturo muri Teritwari ya Masisi. Ibyo bikorwa na FDLR n’indi mitwe kandi bikorwa umuryango mpuzamahanga (ONU) urebera."

Aha yibukije ko MONUSCO ihagarariye ONU muri Congo yibutsa Abanyarwanda ingabo zari iza ONU mu Rwanda mu gihe cya Jenoside zitwaga MINUAR.

Ati "Nta MINUAR nta MONUSCO, iyi imaze imyaka 26 muri Congo. Yashyizweho n’akanama k’umutekano ka ONU, ihabwa inshingano yo kurandura imitwe yose yitwaje intwaro harimo n’uw’Abajenosideri wa FDLR, ariko ntabyo yakoze. Usibye kutabikora, ahubwo yageze aho inafatanya. Bivuze rero ko iyo tuvuze ngo ntabwo bizongera kubaho ukundi, kuri bamwe ni amagambo, cyane cyane uwo muryango mpuzamahanga."

Yakomeje agira ati "Biragoye kubona iyo tujya mu Kwibuka mu Rwanda, ndetse na hamwe muri za Ambasade, ugasanga bamwe baza kwifatanya natwe ari bo bafunga amaso ku birimo kubera mu Burasirazuba bwa Congo. Ahubwo ugasanga abarimo bicwa ari bo bagirwa ikibazo, ko ari bo bateje umutekano mukeya."

Yanavuze ko Kwibuka bitavuga kwibuka ibyahise gusa, bikaba atari ukwibuka gusa inzirakarengane zazize Jenoside yakorewe Abatutsi. Ngo ni no kugira ngo ibyabaye bitazongera kubaho ukundi.

Yasabye rero abamwumvaga kugira uruhare mu gukomeza kubaka Igihugu, bakirinda amacakubiri, kuko Abanyarwanda bahisemo kuba umwe.

Igice kinini cy’urwibutso rwa Jenoside rwa Cyahinda ntigitwikiriye

Uwitwa Eliane Munyengabe agira ati “Kubona uwari umuvandimwe cyangwa umubyeyi ashyinguye mu rwibutso rudatwikiriye nka hariya, wumva hagombye kugira igikorwa. Twifuza ko bakubahwa, bakitabwaho mbese nk’uko Leta y’Ubumwe yitaye ku Banyarwanda muri rusange.”

Mugenzi we uhaturiye na we ati “Hashize igihe hasabwa ko uru rwibutso ruvugururwa. Ubundi mbere hari pasiparumu gusa hatanazitiye, bukeye bashyiramo amakaro banashyiraho uru rugo kugira ngo inka zitazongera kujya zihajya. Dutegereje ko hagira ikindi gikorwa.”

Hon. Christine Muhongayire, Visi Perezidante wa IBUKA ku rwego rw’Igihugu, akaba n’umwe mu barokotse Jenoside bakomoka muri ako gace, na we yibukije ubuyobozi bw’Akarere ka Nyaruguru ko urwo rwibutso rukeneye kuvugururwa, akaba yabivugiye mu gikorwa cyo kwibuka Abatutsi biciwe i Cyahinda cyabaye tariki 15 Mata 2025.

Mu ijambo rye, hari aho yagize ati “Uru rwibutso rushyinguyemo abacu barenga ibihumbi 58. Ni urwibutso rutameze neza, kandi turifuza ko ruba urwibutso rwiza, rwagutse, rusa neza, ruha abacu icyubahiro mu buryo bukwiye.”

Yunzemo ati “Imbaraga turazifite, twazibatiza, ariko tuzi ko iki gihugu gifite ubushobozi bwose. N’ibyo twatekerezaga ko bitashoboka byarashobotse. Haba mu bumwe n’ubwiyunge, haba mu kubaka iki gihugu, mu myaka mike cyarubakitse. Uru rwibutso turabyizeye ko rugiye gutunganywa.”

Hari igice gitoya cy’urwibutso rwa Jenoside rwa Cyahinda gitwikiriye

Umuyobozi w’Akarere ka Nyaruguru, Dr Emmanuel Murwanashyaka, yavuze ko bazirikana ko urwo rwibutso rukeneye gutunganywa, ko banakoze inyigo bagasanga hakenewe amafaranga Miliyoni 500. Icyakora ngo ntibarayabona.

Anavuga ko urwo rwibutso rwa Jenoside rw’i Cyahinda ruri muri eshanu bazasigarana mu Karere, nyuma y’uko byemejwe ko imibiri y’Abatutsi izagenda ihurizwa mu nzibutso nkeya, mu Turere twose tw’u Rwanda, kugira ngo ibashe kubungwabungwa uko bikwiye.

I Cyahinda hiciwe Abatutsi babarirwa mu bihumbi 30. Abenshi biciwe muri Kiliziya, mu nzzu zo kwa Padiri no ku kibuga cy’imbere ya Paruwasi ndetse no mu mashuri (ubu ni muri TTC Cyahinda).

Bishwe tariki 15 na 16 Mata 1994, kandi bishwe n’abasirikare n’abajandarume bari baturutse i Butare, abapolisi ba Komine Nyakizu n’impunzi z’Abarundi zabaga hafi ya Komine Nyakizu, hitwa mu Ryabidandi.

Kuri ubu urwibutso rwa Jenoside rwa Cyahinda ruruhukiyemo imibiri igera ku bihumbi 58, harimo iy’abo ibihumbi 30 bahiciwe n’iy’abandi Batutsi biciwe mu Karere ka Nyaruguru, hafi ya Cyahinda.

Hon Christine Muhongayire, Visi Perezidante wa Ibuka, yibukije ubuyobozi bw’Akarere ka Nyaruguru ko hakenewe ko urwibutso rwa Jenoside rwa Cyahinda ruvugururwa

Inzu zahiye ni amagorofa, ariko urebye hahiye igice cyo hasi. Abari bahari inkongi itangira bavuga ko hari mu masaa yine z’ijoro, kandi ko Kizimyamoto ari yo yatabaye, naho ubundi nta gice cy’izo nzu na gito cyari gusigara.

Umwe mu bahageze inzu zikiri gushya, akaba ari umucuruzi ukorera muri imwe muri izo nyubako ariko mu gice kitagezwemo n’inkongi yagize ati "Nari mvuye kureba umupira, mu masaa yine, bampamagara bambwira ko amaduka twegeranye ari gushya, mpita nza.

Yunzemo ati "Polisi yari itaraza na kizimyamoto, aho iziye amazi arashira bajya kuvoma andi. Bagarutse basanga ahari hahiye hahaye n’ahandi, inkongi iba inkongi. Hose byakaga cyane, binaturika, nta wari kubasha kugira icyo arokora."

Ku bijyanye n’imvano y’iriya nkongi, ba nyiri iduka yatangiriyemo bavuga ko ari amashanyarazi. Icyakora, umuyobozi wa REG mu Karere ka Huye, Omar Kambanda, avuga ko iyo biza kuba amashanyarazi bari gusanga cash power na za fusibles byangiritse , nyamara ngo ni bizima.

Ibyo avuga bishimangirwa n’umwe mu baharara izamu witwabJean Damascène
Havugimana uvuga ko we bitangira yari ku yindi nzu, ariko ko mugenzi we wari uhari yababwiye ko yumvise ikintu giturika, nuko abona imyotsi, n’umuriro.

Naho ku bijyanye n’ibyatikiriye mu nkongi, uwakoreraga mu iduka yatangiriyemo avuga ko bifite agaciro karenga kure miriyoni 200.

Yagize ati "Harimo za flat screen zigura 1,2 millions imwe, amafirigo abarirwa muri 60, za kettle, amaradio, amablender, iminzani, amasuka, ibikoresho byo mu gikoni, amasuka,..."

Kandi ngo nta bwishingizi yari bwafatire ibicuruzwa bye, n’ubwo yabiteganyaga.

Iruhande rw’aho yakoreraga, ibumoso, hari ibyumba biranguza imyenda na za bodaboda ndetse n’ibiryamirwa n’ibiringiti. Ibyo na byo byahiye byose. Naho iburyo hari indi nyubako ariko yo itahiye cyane kuko urebye hahiye icyumba kimwe cyakorwagamo n’abafite akaresitora.

VIDEO - Mu mujyi i Huye, ahitwa mu Cyarabu, inzu ebyiri z'ubucuruzi zafashwe n'inkongi ahagana saa yine z’ijoro, ibyarimo byose birakongoka. pic.twitter.com/5fwfR3tZjX

— Kigali Today (@kigalitoday) April 16, 2025

AMAFOTO – Inkongi yibasiye inzu ebyiri z'ubucuruzi mu mujyi wa Huye ahitwa mu Cyarabu yazimye hifashishijwe imodoka zizimya umuriro, ariko ibicuruzwa byarimo byari byamaze kwangirika. pic.twitter.com/FXSJ4bCHpx

— Kigali Today (@kigalitoday) April 16, 2025

VIDEO - Nyiri iduka inkongi yatangiriyemo mu mujyi wa Huye, yabwiye Kigali Today ko nta bwishingizi yari yafata, ngo yari amaze iminsi abitekerezaho.
Iwe honyine harimo ibintu by'agaciro karenga miliyoni 200 Frw: harimo za Televiziyo (flat screen) zigura Miliyoni n’ibihumbi 200… pic.twitter.com/WCnukkBL5N

— Kigali Today (@kigalitoday) April 16, 2025

Prof. Rutikanga avuga ko uwa mbere wafungiwe muri 1930 ari umushefu wangaga amacakubiri yabibwaga mu Banyarwanda

Yabibwiye imbaga y’abitabiriye igikorwa cyo kwibuka ku nshuro ya 31 Jenoside yakorewe Abatutsi mu 1994, i Kigoma mu Karere ka Huye, tariki 13 Mata 2025, mu kiganiro ku mvano y’amacakubiri yaje kuvamo Jenoside yakorewe Abatutsi.

Muri icyo kiganiro, uyu mugabo w’impuguke mu by’amateka, yavuze ko nta na rimwe Abanyarwanda bari barigeze bashyamirana, ariko ko byashobotse biturutse ku macakubiri yatangijwe n’Ababiligi baje gukoloniza u Rwanda, guhera mu 1916.

Musenyeri Class w’Umugatolika, ngo yabagaragarije ko kugira ngo babashe gutegeka u Rwanda neza bakwiye kwifashisha Abatutsi, kuko ari bo bari bazi ubwenge, kandi n’abandi baturage bakaba barashoboraga kubumva.

Ibyo ngo babigendeyeho, maze bashinze amashuri akigwamo ahanini n’abana b’Ababatutsi, ku buryo urebye bonyine bari 99%. Birumvikana ko no mu gutanga akazi bifashishaga abize, ari bo Batutsi.

Ati “Nko muri 1959 ku Bashefu 45 bari mu Rwanda, ab’Abatutsi bari 43, Abahutu ari babiri gusa. Naho ku Basushefu 559, ab’Abatutsi bari 549. Bashyirwagaho kandi n’abayobozi bo hejuru b’Ababiligi.”

Mu myaka ya za 1920, Abakoloni biyemeje gukora ibarura rusange ry’Abanyarwanda banagaragaza ubwoko bwabo, ariko bitegereje babona basa banashyingirana, ni ko gufatira ku mitungo bari bafite.

Kubera ko umutungo ukomeye mu Rwanda icyo gihe wari inka, abari bafite inka guhera ku 10 kuzamura babita Abatutsi, abafite inka munsi ya 10 babita Abahutu, umubumbyi yitwa umutwa. Nuko biyemeza no gutanga indangamuntu.

Rutikanga ati “Havuyemo umushefu umwe witwaga Nturo wo mu Kabagari, aravuga ati ariko ibi bintu mugiye gukora bizica Igihugu cyacu! Nimubireke! Icyo gihe gereza y’i Kigali izwi ku izina rya 1930 yari yuzuye. Bivugwa ko Nturo ari we wa mbere wayifungiwemo kubera kwanga iby’amoko mu ndangamuntu.”

Abitabiriye kwibuka Abatutsi bishwe i Kigoma barabunamiye, banabatura indabo

Rutikanga anavuga ko isenya ry’ubumwe bw’Abanyarwanda atari aho ryahagarariye kubera ko Ababiligi bashatse no kubaka imihanda, amashuri n’ibindi bikorwa by’amajyambere, ariko nta gihembo kigenewe ababikora, bagahitamo kubikoresha abaturage.

Icyo gihe abagomba kubikora bari bagizwe ahanini n’Abahutu, babatumaga Abashefu n’Abasushefu ndetse n’abamotsi, akazi katakorwa neza abayobozi bakabibazwa, hanyuma na bo mu rwego rwo kugira ngo bagume ku buyobozi bakifashisha ibiboko mu guhana abatakoze uko bigomba.

Abakubitwaga bafataga ko ababarenganya ari Abatutsi, bituma babanga.
Nyuma y’intambara ya kabiri y’Isi (1939-1945), umwami Rudahigwa yatangiye gusaba ubwigenge, bituma Abakoloni batangira kumwanga, noneho batangira kuzamura Abahutu bamwe na bamwe, Abatutsi bakigizwayo. Ni na bwo hatangiye amashyirahamwe yaje kuvamo amashyaka mu 1950, ku buryo hageze mu 1959 Ababiligi bavuga ko bagomba kwikiza Abatutsi.

Rutikanga ati “Ni bwo ku itariki ya 1 y’ukwa 11 mu 1959 byavuzwe ko umusushefu Dominique Mbonyumutwa, yakubiswe urushyi n’insoresore z’Abatutsi, imvururu zigatangira, Abatutsi bagatwikirwa bakanicwa ndetse bagacirwa ishyanga, Abakoloni babireba ntibagire icyo babikoraho.”

Ibyabaye nyuma ya 1959 byose narabibonye - Prof Rutikanga

Mu 1959 ngo ababyeyi ba Rutikanga banze guhunga bava ku Kabaya mu Kingogo aho bari batuye, ariko bigeze mu 1961 biba bibi, bava ku izima bahungira muri Congo.

Ati “Propaganda ya Kayibanda yadukurikiye muri Congo. Twari turi i Masisi, ahonga Abanyekongo batumerera nabi batwicamo bamwe, nuko duhungira muri Tanzaniya noneho. Nahamaze imyaka 30.”

Mu 1960, Kayibanda ngo yagiye mu Bubiligi, yiyemeza gukorana inama n’abanyeshuri b’Abahutu b’Abanyarwanda bahigaga, Abatutsi barahezwa.

Icyo gihe ngo bamubajije uko ibyo mu Rwanda bizarangira, arababwira ngo “Kugira ngo Abatutsi babeho neza mu Rwanda ni uko Yezu Kristu yagaruka ku Isi, kandi agacumbika i Rwanda.”

Rutikanga ati “Ibyabaye mu gihe cya Repubulika ya mbere murabizi. Ubwicanyi, ivangura. Muzi ubwicanyi bwabereye hano mu Bufundu mu 1963. Ni na bwo hatangiye gukoreshwa ijambo Jenoside. Abantu bavanwa mu byabo bajyanwa i Bugesera na Rukumberi, hari ahantu habi. Mu Bugesera ho hari isazi ya Tsetse yaryaga abantu bagapfa. Hazaho n’itegeko rivuga ko Abatutsi batazasubizwa ibyabo.”

Nyuma y’ibiganiro, abitabiriye Kwibuka i Kigoma bagiye gushyira indabo ku mva Abatutsi bahiciwe bashyinguyemo

Kayibanda kandi ngo uretse ubwicanyi n’ivangura, nta kindi kintu yari yaragejeje ku Banyarwanda, ku buryo muri za 1968 hari abadepite bagaragaje mu nyandiko ko nta terambere ari kuzanira Igihugu, ni bwo yatangiye ivanguraturere, yiyegereza Abanyenduga benewabo.

Habyarimana yaje kumusimbura mu 1973 avuga ko azanye amahoro, ubumwe n’amajyambere, ariko nanone na we yakomeje guheza Abatutsi ishyanga.

Ni bwo havutse Inkotanyi, hanyuma igihe zateraga u Rwanda mu 1990 bitangira kuvugwa ko Abatutsi bateye u Rwanda.

Rutikanga ati “Nyamara si Abatutsi bateye, ahubwo Abanyarwanda bari baraheze ishyanga. Harimo Abatutsi, Abahutu n’Abatwa. Ni bwo hatangiye gutegurwa Jenoside.”

Icyo gihe ngo byageze mu 1992, Perezida Habyarimana abwira umusirikare mukuru witwaga Gen Deogratias Nsabimana, kumutegurira raporo imugaragariza inyangarwanda n’icyo zigomba gukorerwa.

Icyo gihe Gen. Nsabimana yavuze ko abanzi b’u Rwanda ari Inkotanyi zateye Igihugu hamwe n’impunzi zahunze kuva mu 1959, Abatutsi bari mu gihugu, Abahutu bose badashyigikira Habyarimana, n’umunyamahanga wese washakanye n’Umutusikazi kimwe n’abantu batuye mu Karere u Rwanda ruherereyemo bafitanye isano n’Abatutsi.

Rutikanga ati “Ubwo ni ukuvuga Abahima, Abatutsi b’i Burundi, Abamasayi, n’abandi bose bita aba Nilotique bo muri aka Karere.”

Abandi banzi yagaragaje ngo ni Umuhutu wese utishimye cyane cyane abashomeri bize, kimwe n’Abahutu bahunze mu myaka ya vuba.

Icyo gihe ngo basanze igice cya mbere n’icya kabiri (Abatutsi) bakwiye kwicwa bose, abasigaye bo hakagenda hashakishwa umuntu ku wundi.

Ni muri urwo rwego Jenoside yatangiye gutegurwa, haba mu kugura intwaro zizifashishwa no mu gukwirakwiza inyigisho z’urwango hifashishijwe ibitangazamakuru bitandukanye, hanyuma muri Mata 1994 Jenoside iraba, iza guhagarikwa n’Inkotanyi mu Ntangiriro za Nyakanga 1994.

Kwibuka Jenoside yakorewe Abatutsi i Kigoma byitabiriwe n’abatari bake

Jean Bosco Habarurema ufite (micro) ubwo yatangaga ubuhamya, na Barambanza (upfukamye) asaba imbabazi mu ruhame

Habarurema atuye mu Mudugudu wa Gisagara, Akagari ka Shyembe, Umurenge wa Maraba, Akarere ka Huye. Yivugira ko Jenoside ikirangira yari yarahungabanye byatumaga ntacyo ageraho.

Agira ati “Natekerezaga abanjye nabuze, natekereza n’ibyo nari mfite ntakigira, nkumva ntaye ubwenge. Umutwe wahoraga undya, nta mahoro mfite mu mubiri wanjye. Guhura n’uwankoreye icyaha byanteraga ikibazo, nkumva ndashaka kumwihisha. Iyo namukubitaga amaso nahitaga ndwara umutwe. Paracetamol ni zo zari zintunze. Nari nzi ko zizantera igifu ahubwo.”

Akomeza agira ati “Iyo nabonaga Umuhutu naratitiraga, ariko nkabibana mu mutima wanjye. Numvaga kumwegera ari ikibazo, nkumva ashobora kunyica. Uwandebaga inyuma ntiyabibonaga, ariko nyine imbere narashize. Nari igikaratasi cyibereye aho ngaho.”

Yakoraga umurimo w’ubufundi, ariko nta faranga yatahanaga kuko yayamariraga mu nzoga, byatumaga ahora yasinze. Ngo wasangaga anasaba gufashwa mu buryo bw’imibereho, nyamara amafaranga yarabaga yayabonye.

Urugo na rwo urebye yari yararuhariye umugore, akaba ari we wita ku bana babyaye, we ari nk’aho ntacyo abamariye. Birumvikana ko atari anabanye neza n’umugore we.

Intandaro yo gukira ngo yabaye Padiri Ubald Rugirangoga, waje gutanga inyigisho ku gusaba imbabazi no kuzitanga muri paruwasi ya Rugango, muri 2019, na we arazitabira, aza no kuba umufashamyumvire wegera abantu bamwe akabashishikariza gusaba imbabazi, abandi akabashishikariza kuzitanga, kugira ngo bose babashe gukira mu mutima.

Ni no muri urwo rwego yegereye bamwe mu bamuhemukiye mu gihe cya Jenoside, abamara ubwoba, baramwegera bamusaba imbabazi, na we arazibaha. Ibi ni na byo byatumye amererwa neza ku mutima no ku mubiri.

Mu mvugo isa n’itebya ati “Naje kuvamo umufashamyumvire, ntangira no kuganiriza ba bandi baduhemukiye, ibikomere bitangira koroha. Ntangira kubaha impanuro! Ibaze guhanura umuntu waguhemukiye! Ubwo ariko umutima wanjye nari narawubatse warabaye urutare. Mbere ho narangwaga n’amarira.”

Akomeza agira ati “Maze kubaka umutima wanjye ni na bwo natangiye gutera imbere, ndubaka, nkakorera n’amafaranga nkabona araza ku mufuka. Ni ko kabiri ubona mfite. Nari nanutse cyane mfite ibiro 52. Inyigisho z’icyiciro cya mbere zatumye ngera kuri 54, ariko ku cya gatatu nahise ngira 60, icya kane 76. Icya gatanu urabona ko nezerewe. Ibitugu byari byarahetamye, sinegukaga, ariko urabona ubu ngenda nemye.”

Yungamo ati “Abana bari ab’umugore, njyewe nkavuga nti ese ubundi ndagira abana, ejobundi bazaba bongeye babishe! Numvaga no kubyara abo bazica nabireka. Mfite abana batandatu, bane barangije amashuri. Mfite uwarangije kaminuza, mfite n’abarimu. Ariko urumva mbere sinari kubagira! Ndi kurwana na babiri basigaye.”

Kuri ubu ngo yumva kwiyubaka bimurimo kandi akumva yanafasha bagenzi be.

Ati “Numva mugenzi wanjye ateye imbere nanjye naba nteye imbere, kuko hari igihe yaha umwana wanjye akazi, n’uwanjye akaba yaha uwe akazi, ugasanga abantu bose bagiranye urukundo. Ni yo mpamvu nubaka amahoro y’umutima, kuko iyo umuntu yayagize byose birashoboka.

Abo nahigaga ni bo banyitayeho mfunguwe - Ubuhamya bw’umwe mu bo Habarurema yababariye

Viateur Barambanza, ni umwe mu bo Habarurema yababariye. Kimwe n’abandi yasabye imbabazi, ngo yagiye aba mu bitero byo kubica, ku bw’amahirwe bakarokoka.

Nka Habarurema ngo yigeze kumwirukankana ngo amwice, aramucika. Ngo yigeze no kuba mu gitero cy’abagiye kumushakisha iwe ngo bamwice, baramubura.

Ati “Icyo gihe sininjiranye n’abagiye kumushakisha ngo bamwice, nasigaye hanze. Ariko iyo bamusangamo akabacika, njyewe aho nari nasigaye hanze ntiyari kuncika.”

Barambanza anasaba imbabazi abafite ababo baguye mu Babikira i Sovu bose, kubera ko yari mu bitero byabishe.

Agira ati “Mu Babikira haguye abantu benshi cyane. Nabigizemo uruhare kubera ko natoye amabuye yo kubatera. Amabuye si njyewe wayateye, ariko numva uwo ryafashe rikamwica naragize uruhare mu kumwica. Urumva niba naratoye amabuye 15, ubwo 15 mu bapfuye nakwemera ko ari njyewe wabishe.”

Jean Bosco Habarurema (ibumoso) na Viateur Barambanza bahujwe no gusaba ndetse no gutanga imbabazi none babanye mu mahoro

Habarureman na bagenzi be batanze imbabazi ndetse na Barambanza kimwe na bagenzi be baciye bugufi bakazisaba, bose bashima politiki ya Leta y’Ubumwe bw’Abanyarwanda yatumye habaho inyigisho z’isanamitima, bakanashimira by’umwihariko Komisiyo y’Ubutabera n’Amahoro ya Diyoseze Gatolika ya Butare yabahuje.

Barambanza ati “Nafunzwe imya 12 nta n’unshinja. Narafunguwe nsanga umugore wanjye yarapfuye, n’abana barapfuye hasigaye kamwe, nsanga n’inzu barayishenye. Abantu baranyegera barampumuriza, ba Habarurema bati ihangane, n’abandi nahemukiye bati ihangane, Imana ni yo nkuru.”

Akomeza agira ati “Abo nagize uruhare mu kubicira ababo ni bo banyakiriye, bandema agatima, baranyihanganisha bampa ibyo kurya. Umwe ati uzaze utore ibijumba, undi ati uzaze ufate ibishyimbo, Imana yarandokoye ndiho, nawe irakurokoye uvuyemo! Turabana, bampa ibiti ndubaka, nshaka umugore ufite abana batatu, aranyubaka, aranyubaha, ndamwubaha, ntera igikumwe, ndasezerana, dufitanye abana babiri.”

Nanone ariko, inzira yo kwizera abamwakiriye yabaye ndende, kubera ko ku ikubitiro atumvaga ukuntu bamwitayeho nyamara yarabahemukiye.

Ati “Habarurema twarasangiraga ariko mwishisha, ngatekereza ngo buriya nsanze afite ibijumba nkabiryaho hari igihe nasanga birimo uburozi, kiriya kigage hari igihe nasanga kirimo ikintu, hari ubwo twahura nijoro akantema. Ariko ibyo byose byarashize.”

Rusagara ngo yibuka Jenoside nk’aho yabaye ejo

Yabivuze atanga ubuhamya ku kuntu Jenoside yagenze i Karama, mu gikorwa cyo gutangiza icyunamo hibukwa ku nshuro ya 31 Jenoside yakorewe Abatutsi mu 1994. Ni igikorwa ubuyobozi bw’Akarere ka Huye bwifatanyijemo n’abatuye mu Murenge wa Karama kuri uyu wa 7 Mata 2025.

Yagize ati "Nanyuze muri byinshi, ariko nababajwe cyane no kubona abana bonka ababyeyi bamaze gupfa. Mu buzima bwanjye sinzabyibagirwa. Nababajwe no kubona umuntu bamutema ahagaze nk’utema igiti cyangwa insina, adafite aho ahungira, akitura hasi."

Yunzemo ati "Ikibi cya Jenoside wumva bibaye vuba. Reba imyaka 31 irashize, ariko iyo uri kwibuka wumva bibaye vuba. Uba wumva unabireba, na naka wabikoze muturanye ukaba uramuruzi, mu ishusho ye."

Perezida wa IBUKA mu Karere ka Huye, Theodat Siboyintore, na we avuga ko icyuho Jenoside yasigiye abayirokotse gituma bumva isa nk’aho yabaye ejo.

Ati "Jenoside yashyizwemo imbaraga zidasanzwe, yakorewemo n’ibikorwa binyuranye byagiye bikomeretsa abantu ku mutima. Kwibuka rero biremerera Abarokotse Jenoside nk’ibyabaye ejo, kubera ibibazo bahanganye na byo."

Umuyobozi w’Akarere ka Huye, Ange Sebutege ashyira indabo ku mva

Akomeza agira ati "Uwakwifuriza umuntu nabi yamwifuriza kubura uwe. Abarokotse Jenoside bo bababuze mu buryo butunguranye. N’ubwo kandi bababuze, babana na bo. Araryama akamurota, aragira ibirori akabona icyuho cyo kutagira umuba hafi, agira ibibi akabura umutabara, icyuho cyo gutakaza abe akakibona."

Yungamo ati "Ni ubuzima tuzahoramo kugeza igihe ntazi. Icyuho cy’abacu kizahora muri twe, ni yo mpamvu umuntu asubira mu mateka akumva ni nk’ejo hashize."

I Karama hari hahungiye Abatutsi benshi cyane ku buryo urwibutso rwa Jenoside rwaho rushyinguyemo abasaga ibihumbi 75. Bagerageje kwirwanaho, ariko haje kuza abasirikare barabarasa bituma bacika intege, nuko abafite imihoro, ubuhiri n’izindi ntwaro gakondo babirohamo, barabica.

Babishe tariki 21 Mata 1994, ariko urebye ngo abicanyi batangiye kubagota tariki 13.

Icyo gihe, uwafataga icyemezo cyo kuva aho bari bateranyirijwe, abicanyi ntibamwakuraga hanyuma bakaza kumukurikira bakamwica.

Kandi ubwo bari barabafungiye amazi, n’ugerageje gutarabuka ajya kuvoma mu kabande bakamwicirayo.

Rusagara ati "N’abagiye baturuka mu bindi bice bya Perefegitura ya Butare n’iya Gikongoro bakahahungira, nta wababuzaga kuza kuko babaga bazi umuriro binjiyemo."

Perezida wa IBUKA mu Karere ka Huye, Theodat Siboyintore

Rusagara anavuga ko tariki 20 Mata 1994 hari abari bahungiye i Karama, bamenye ko buri bucye bicwa bakagerageza guhunga, ariko ngo muri bose harokotse umukobwa umwe waje gutoragurwa n’umubyeyi umwe akamwitaho, ariko basaza be bakaza kumumwicana.

Ku munsi wo kubica, abicanyi ngo bahereye saa yine n’igice bageza saa cyenda z’amanywa, amasasu ashize.

Icyo gihe ngo abicanyi bagize ubwoba barahunga, ari na ko gahenge katumye hari ababasha guhungira i Burundi.

Rusagara ati "Nababajwe n’abari barokotse twabwiye ngo baze duhunge bakanga, bavuga ko n’ubundi basanga babategeye mu nzira. Hari n’abizeye incuti zabo zabatahanye hanyuma abicanyi babasangayo barabica."

Mu bari basigaye harimo abagore n’abana bari bafite intege nkeya. Abagore barishwe, abana na bo bahabwa igikoma kirimo aside, barapfa.

Abashakashatsi bagaragaje ko hakwiye gufata ingamba ku itangwa ry’imiti ya antibiyotike

Gukoresha nabi antibiyotike bivuga kuyinywa ntuyirangize cyangwa kuyinywa bidahuje n’uko byagenwe na muganga, cyangwa se nanone kunywa itajyanye n’indwara umuntu arwaye.

Byagarutsweho n’abaganga ndetse n’abanyeshuri biga iby’ubuganga, baturutse hirya no hino ku Isi, baje mu nama mpuzamahanga y’iminsi ibiri yateguwe n’ibitaro bya Kaminuza bya Butare (CHUB) guhera ku itariki ya 3 Mata 2025.

Christian Ngarambe, umuyobozi w’agateganyo wa CHUB, avuga ko biyemeje gukoresha iriya nama kubera ko byagaragaye ko ikoreshwa nabi rya antibiyotike rituma zigera aho ntizibashe kurwanya indwara, ari na byo bivamo impfu z’abagera ku bihumbi 700 ku mwaka, ku Isi.

Yagize ati "Ni ikibazo cyugarije Isi kubera ko iyo mibare isumba iy’abicwa n’ubwandu bwa Sida ku mwaka, ikaba inaruta iy’abicwa na Malariya ku mwaka. Kandi 90% y’abo ibihumbi 700 ni abo mu bihugu bikennye n’ibiri mu nzira y’amajyambere."

Yunzemo ati "Hatagize igihinduka, umubare w’abapfa waziyongeraho 67% muri 2030, bikazatera Isi gukoresha inyongera irenze 40% y’ikiguzi cy’ubuvuzi. Bikomeje gutyo kandi, muri 2050 abicwa no kuba imiti itakibasha kubavura kubera ikoreshwa nabi ryayo, bazaba bagera hafi Miliyoni 10."

Iyo nama yatumiwemo n’abashakashatsi barebwa n’ubuvuzi bw’amatungo ndetse n’abita ku buhinzi, kubera ko 60% by’indwara zitabasha kuvurwa n’imiti abantu bazandura biturutse ku matungo ndetse no ku buhinzi.

Umuyobozi w’ibitaro bya Kaminuza bya Butare CHUB, Dr Christian Ngarambe

Dr Jean Claude Udahemuka, umwalimu muri Kaminuza y’u Rwanda, ishami ry’ubuvuzi bw’amatungo, yakoze ubushakashatsi ku bushita bw’inkende.

Ati "Ibisebe biri ku mubiri bitagiriwe isuku ihagije cyangwa bikavurwa hadakurikijwe amabwiriza, bituma bagiteri ziba zitakibashije gutsindwa n’imiti. Icyo gihe gukira biratinda kandi uko bitinda udukoko twa ya ndwara turiyongera cyane ntibe ikibashije kuvurwa n’imiti ihari. Undi wayandura icyo gihe, kumuvura biragorana. Si ikibazo cy’umuntu ku giti cye, ni icy’abantu muri rusange."

Abashakashatsi bagaragaje ko umuti kuri iki kibazo, waba ko abantu bakwirinda kumva hari ikitagenda mu mubiri ngo bihutire kujya kugura imiti muri farumasi, cyangwa gufata umuti ngo kubera ko wavuye kanaka. Ahubwo bakajya kwa muganga, na we akabanza gupima akareba neza indwara umuntu afite, akamuha ingano y’imiti ikwiye, mu gihe gikwiye.

Kandi ngo hakwiye kubaho amabwiriza agenga itangwa rya za antibiyotike, igatangwa hagaragajwe urupapuro rwa muganga.

Ikigo cy’Igihugu gishinzwe ubuzima (RBC), na cyo ngo gikwiye gukora ku buryo ibitaro bigira za Laboratwari zibasha gupima za mikorobe, kugira ngo habashe kumenyekana imiti ya nyayo ikwiye gukoreshwa.

Denyse Niyoturamya, umuhanga mu by’imiti na we ati "Abaganga bakwiye kujya basobanurira abarwayi uko bagomba gufata imiti, bakanabibutsa ko kuyifata nabi bitera ingaruka zo kutongera kubasha kuvurwa na yo."

Abarwayi kandi ngo bakwiye no kumenya ko kutongera kubasha kuvurwa n’umuti runaka binagira ingaruka ku bukungu, kuko umuntu atinda gukira, akivuza igihe kirekire ari na ko yishyura, atanabasha gukora, rimwe na rimwe bikamuviramo urupfu cyangwa kurwara igihe kirekire bikaba byamuviramo ubumuga.

Ku rwibutso rwa Murambi mu Karere ka Nyamagabe hashyinguye abazize Jenoside yakorewe Abatutsi barenga ibihumbi mirongo itanu ahanini baturutse muri Superefegitura ya Karaba na Kaduha, bakahakoranyirizwa babeshywa ko bazaharindirwa, dore ko hari n’ingabo z’Abafaransa.

Uretse abashyinguwe mu mva rusange zo ku rwibutso, hari imibiri igera ku gihumbi ibungabunzwe ku buryo abaje gusura urwibutso no kunamira inzirakarengane ziharuhukiye bayibona.

Mu kiganiro yagiranye n’abanyamakuru tariki 3 Mata 2025 yavuze ko muri iyo mibiri isanzwe igaragara hari iyatunagnyijwe ku buryo bwisumbuyeho ikazakomeza kugaragara ariko indi igashyingurwa.

Yagize ati " Hari imibiri micye yarangije gutunganywa ku buryo bwihariye, aho wamenya imyaka uwishwe yari afite, uburyo yishwemo haba kuraswa, gutemwa, guterwa inkota, ukaba wanamenya igitsina cye, n’ibindi."

Dr. Bizimana avuga ko kugira ngo amateka akomeze kubungwabungwa, imibiri igomba gushyingurwa bazabanza bakayifotora, igafatwa n’amashusho, akabikwa bikazaba ikimenyetso ko yigeze kuhaba.

Muri rusange, Bizimana avuga ko gutunganya imwe mu mibiri ku buryo ishobora kubikwa igihe kirekire babikoze i Murambi gusa, kuko ari igikorwa badashobora kugeraho ku nzibutso zose.

Yagize ati "Biragoye, cyane ko n’imibiri ubungubu yamaze kwangirika. Ahubwo icyo duteganya ni uko iherezo igomba gushyingurwa. Ntabwo izabaho imyaka 200 cyangwa 300 cyangwa 1000, amaherezo izangirika. Aho kugira ngo rero ikomeze yangirike, tujya inama y’uko abahafite ababo baganirizwa noneho imibiri igashyingurwa."

Minisitiri Bizimana “Imibiri y'abazize Jenoside iri mu nzibutso iherezo turateganya ko igomba gushyingurwa, kubera ko igenda yangirika, ntabwo yabaho imyaka igihumbi. Tugeze mu cyiciro cyo kuganira n’abahafite ababo kugira ngo bitagira abo bikomeretsa, noneho iyo mibiri… pic.twitter.com/RH9Nk4mrte

— Kigali Today (@kigalitoday) April 4, 2025

Imiti ya Malariya y’igikatu izanwe na drone yakirwa n’umukozi wo kwa muganga

Mu muhango wo gutangiza iyi gahunda wabereye ku bitaro bya Gakoma biherereye mu Murenge wa Mamba, Akarere ka Gisagara, wabaye ku wa 3 Mata 2025, ubuyobozi bwa RBC bwavuze ko iyi gahunda yatekerejweho kubera ko abasanzwemo malariya y’igikatu baba bakeneye imiti byihutirwa, ku buryo igihe kwa muganga batayifite, gutegereza ko ibageraho mu buryo busanzwe bishobora kuvamo ko uyirwaye apfa.

Dr Jean Damascène Niyonzima, umuyobozi w’agateganyo wa porogaramu yo kurwanya malariya muri RBC, yagize ati "Inzira imiti inyuramo ikunze kuba ndende, no kuyitwara binyuze mu mihanda ugasanga ntibyihuta nk’uko bikenewe. Urabona nk’urwaye malariya y’igikatu, nta gihe kinini aba afite cyo gutegereza. Aba agomba kubona umuti ako kanya, byihuse. Kwitabaza ikoranabuhanga twabonye bizadufasha cyane."

Iyi gahunda yo gutwara imiti ya malariya y’igikatu hifashishijwe drones, izifashishwa no mu Turere twa Nyamasheke na Nyagatare na two turimo kugaragaramo malariya cyane. Nyuma y’umwaka hazarebwa icyo byatanze, hanyuma habone gufatwa icyemezo cyo kuyigeza no mu tundi Turere tw’u Rwanda.

Pierre Kayitana, umuyobozi w’ikigo gikoresha za drones mu Rwanda ari cyo Zipline, avuga ko batangiye gukorera mu Rwanda muri 2016 batanga amaraso mu bigo nderabuzima no mu bitaro. Kugeza ubu drone zihagurukira i Kayonza na Muhanga.

Kugeza ahabigenewe imiti ya malariya y’igikatu, bije rero byiyongera ku kugeza amaraso n’inkingo z’abantu ndetse n’iz’amatungo hirya no hino mu gihugu, kimwe no ku gutwara intanga z’ingurube.

Iyi gahunda yatangiriye mu Karere ka Gisagara

Bije kandi byiyongera ku gutwara imiti itifashishwa mu bihe byose, urugero nk’iyifashishwa mu gihe umuti wo ku rwego rwa mbere wananiranye. Bene iyo miti ngo ntiyoherezwa ku mavuriro runaka, mu rwego rwo kwirinda ko hari aho yakenerwa ikabura kandi ibitse aho idakenewe, ahubwo ikajyanwa kuri Zipline, iyohereza ahari umurwayi uyikeneye byihuse.

Mu Karere ka Gisagara malariya yari yaragabanutse kuko yavuye ku bayirwaye ibihumbi 212 na 564 muri 2020-2021, bakaba ibihumbi 39 na 799 muri 2022-2023, none abamaze kuyirwara muri uyu mwaka wa 2024- 2025 utaranarangira, bakaba bamaze kuba ibihumbi 106 na 394.

Muri uyu mwaka kandi malariya imaze guhitana abantu batatu muri Gisagara, ariko mu Rwanda hose imaze guhitana abantu 61.

Imwe mu mpamvu abatuye muri Gisagara bavuga yatumye malariya yiyongera, ni ukutagira inzitiramubu, ari na yo mpamvu umuyobozi w’aka Karere avuga ko yasabye RBC ko harebwa ukuntu zajya zigera ku baturage zitabahenze.

Ati "Inzitiramubu zirahenze kuko kuzigura mu buryo busanzwe ari ibihumbi 10. Twumvikanye na RBC ko hashakwa uko zihenduka, byibura ntizirenze ibihumbi bitanu, mu rwego rwo korohereza abaturage."

RBC irashishikariza abantu kwirinda malariya, igasaba n’abagifatwa kwihutira kujya kwa muganga kubera ko gutinda kwivuza ari byo bivamo malariya y’igikatu.

Ikindi kandi ngo malariya y’igikatu iravurwa igakira, ariko hari igihe isigira uwayirwaye ingaruka mu mubiri, urugero nko kurwara impyiko.

Imbuga ya Mukeshimana iteyeho imboga yifashisha mu gutegura indyo yuzuye akanasagurira isoko

Ugeze kwa Mukeshimana, ukareba imboga zihinze mu mbuga y’iwe, wakeka ko utungutse ku mirima y’imboga ya koperative yibumbiwemo n’abantu bahujwe, ngo batozwe gutegura indyo yuzuye.

Nyamara iyo mirima yose ni iye wenyine. Hari ihinzemo imboga rwatsi, hakaba iriho amashu, za puwavuro, ibitunguru, intoryi, seleri n’ubundi bwoko bw’imboga abatuye mu giturage batamenyereye bwitwa Sipinaci (Spinach).

Mukeshimana avuga ko adashobora kubura imboga zo kurya, kandi ko azicuruzaho, buri cyumweru agakuramo byibura ibihumbi bibiri, bityo ntabure amafaranga ajyana mu itsinda ryo kubitsa no kugurizanya ahuriyemo na bagenzi be.

Agira ati “Iyo nejeje amashu bwo n’ibihumbi bine mu cyumweru mbigezaho.”

Guhinga imboga kandi abijyaniranya no gucuruza ibitunguru, akabasha kwita ku bana bane umugabo we yamutanye.

Guhinga imboga yabyigishijwe n’umuryango FXB

Mukeshimana avuga ko yagiye yubaka imirima y’igikoni mu mbuga ye, ashaka gushyira mu bikorwa ibyo bahugurwamo mu buhinzi bw’imboga n’umuryango FXB, ufasha abagera kuri 400 mu Murenge atuyemo, muri gahunda yo kwikura mu bukene (graduation).

Uyu muryango ufasha abagenerwabikorwa bawo mu bijyanye no guhindura imyumvire, bagatozwa isuku no kurya neza, bakigishwa kwizigamira no gukora imishinga ibabyarira inyungu, kandi bakabaha igishoro kitarenze ibihumbi 120.

Mu rwego rwo kugira ngo badakora mu gishoro, mu mezi atandatu ya mbere buri muryango uhabwa ibihumbi 20 bya buri kwezi byo kwifashisha mu guhaha.

Mukeshimana yagize amahirwe yo gufashwa na FXB abayeho mu bukene bukabije, n’igikoni cyaraguye, nyuma y’uko umugabo ananiwe kwihanganira bukene babayemo, akamutana abana akigendera.

Icyo gihe ngo bari bagurishije ibyo bari bafite byose, bagura inzu ku bihumbi 700, hanyuma basigara badafite aho gukura amafaranga.

Amafaranga akura mu mboga no mu bucuruzi bw’ibitunguru yamubashishije kugura amatungo ku buryo ubu afite n’inka, amubashisha kwiyubakira ikindi gikoni, yubaka n’ubwiherero ndetse n’ubwogero.

Afite intego yo kurushaho gutera imbere, kandi ngo n’ubwo umugabo yamutanye abana bane, ubu imyaka irindwi ikaba yihiritse, ntiyabura kumwakirana yombi agarutse kuko yaba agarutse mu rwe ndetse no mu be.

Basabwe kongera ingufu mu marerero y’abana

Yabibwiye abayobozi bo mu Karere ka Nyaruguru bafite mu nshingano zabo guharanira imikurire myiza y’abana, mu mwiherero w’iminsi ibiri barimo kugirira ku Munini guhera ku itariki ya 1 Mata 2025, bagamije kurebera hamwe icyakorwa kugira ngo barwanye burundu igwingira ry’abana.

Mu biganiro abayobozi bagize hagaragajwe ko n’ubwo mu Karere ka Nyaruguru hari amarerero ahagije, kuko buri mudugudu urimo byibura atatu, muri iyi minsi habayeho kudohoka kw’amwe n’amwe usanga abana batayitabira buri munsi, ahanini bigaturuka ku babyeyi usanga batayoherezamo abana, cyangwa ntibitabire kujya gusigarana abana igihe batahiwe, bakabiharira abafite ingo abana bahuriramo.

Abatohereza abana mu marerero usanga ahanini banga gutanga ibiribwa byifashishwa mu kubagaburira igihe bagiyeyo, nyamara ubundi urebye ibyo umwana arya atari byinshi, mu gihe kuba hamwe na bagenzi be bituma abasha kujijuka ku bw’amasomo bigira hamwe, ndetse akanabasha kurya amafunguro yuzuye, ari na yo atuma babasha gukura neza.

Asaba abayobozi kwita ku mikorere myiza y’amarerero, Guverineri Kayitesi yagize ati “Nk’uko utatoranya abana bawe wibyariye ngo uwo nkwiriye kureka akagwingira ni uyunguyu, muharanire ko n’abana b’igihugu Leta yabashinze bakura neza bose. Mwibuke ko iyo umwana agwingiye bitagarurwa, kandi ko atagwingira ku mubiri gusa, ahubwo no mu bwenge ndetse no mu mitekerereze.”

Yunzemo ati “Abayobozi dukwiye kumenya ngo muri uyu mudugudu harimo abana aba n’aba, bari mu irerero ryo kwa kanaka. Ese rirakora neza? Tukarikurikirana, noneho kwita ku mwana bikava ku muryango mutoya bikagera ku muryango mugari, wa mwana tukamukurikirana umunsi ku wundi, tumurinda ko yagira ibibazo ibyo ari byo byose bishobora kuzamusunikira mu kugwingira.”

Assoumpta Byukusenge, umuyobozi wungirije w’Akarere ka Nyaruguru ushinzwe imibereho myiza, yaboneyeho kwibutsa ko n’ubwo hari amarerero yitabwaho na Leta cyangwa n’abafatanyabikorwa, aho usanga abayakoramo bo bahembwa, bidakwiye gutuma abasigaye badohoka.

Yagize ati “Hari amarerero tudafitiye abafatanyabikorwa bayitaho cyangwa ngo tugire ingengo y’imari dushyiramo, ariko n’ubundi amarerero atangira rwari uruhare rw’ababyeyi. Turagira ngo uwo muvuduko twatangiranye n’umumaro byatugiriye, n’ubundi ababyeyi bawugarukeho, kimwe n’abayobozi bareberera abaturage mu kazi ka buri munsi.”

Yunzemo ati “Kuko tutarwanyije igwingira n’imirire mibi, ntaho twaba turimo tugana. Twazasanga tuyobora abaturage bafite ibibazo.”

Mu Karere ka Nyaruguru, isuzuma ryakozwe mu mwaka wa 2005 ryari ryagaragaje ko abana bari munsi y’imyaka itanu bagwingiye ari 54%. Imbaraga zashyizwe mu kurwanya igwingira ryatumye muri 2010 hari 45%, bagera kuri 41% muri 2015 no kuri 39.1% muri 2020.

Mu ngamba zafashwe mu kurwanya igwingira ry’abana harimo n’iryo kubahuriza mu ngo mbonezamikurire, aho abana bo mu midugudu itarimo amashuri y’inshuke bahurizwa mu ngo bakigishwa bakanagaburirwa indyo yuzuye, ndetse n’ababyeyi babo bakaboneraho kuhigira uko indyo yuzuye itegurwa.

Izi ngo mbonezamikurire ni na zo ubuyobozi bw’Akarere bushaka ko zongererwa imbaraga kuko zisa n’izadohotse, mu rwego rwo kugira ngo abana bakure neza, hanyuma bazigirire akamaro, bakagirire n’igihugu cyabo.

I Nyaruguru mu Murenge wa Ngera, Ibuka yahatanze inka eshanu

Ibi bikorwa abahagarariye IBUKA ku rwego rw’Igihugu hamwe na Minisitiri w’Ubutegetsi bw’Ibihugu, babikoreye mu Murenge wa Ngera mu Karere ka Nyaruguru, ku wa 29 Werurwe 2025.

Babikoze nyuma y’itabaro ryo kwimura imibiri isaga 250 yari iruhukiye mu nzibutso ebyiri, ziri mu Tugari twa Nyamirama na Nyanza mu Murenge wa Ngera, izashyingurwa mu rwibutso rwa Jenoside rw’i Nyumba mu Murenge wa Gishamvu mu Karere ka Huye, mu rwego rwo guhuza inzibutso.

Ni nyuma kandi yo gutangiza imirimo yo kubakira Innocent Havugimana ufite imyaka 55 warokotse Jenoside, utuye mu Murenge wa Ngera, wari usanzwe utuye mu nzu ishaje cyane, ku buryo byabaye ngombwa ko yubakirwa bundi bushya.

Inka zatazwe ni eshanu zagenewe abarokotse Jenoside b’abakene, naho mituweli ni sheki y’amafaranga Miliyoni yagenewe abantu 333.

Abarokotse Jenoside bafite ibibazo by’ihungabana na bo bafashijwe mu buryo bw’ibiganiro, kandi abasaga ijana biyambaje abatangaga iyo serivisi.

Dr Philbert Gakwenzire, umuyobozi wa IBUKA mu Rwanda, yavuze ko ibyo bakoreye mu Karere ka Nyaruguru, bazanabikora hirya no hino mu gihugu mu gihe cy’iminsi 100 yo kwibuka, ku buryo muri uyu mwaka bazatanga inka 500 na mituweli ku barokotse Jenoside ibihumbi 10.

Hazabaho kandi kwegera no gutanga ubufasha ku barokotse Jenoside bagize ibibazo by’ihungabana (counseling) haherewe ku 2016 babaruwe, ndetse no gusura Abarokotse Jenoside mu ngo hakarebwa ibibazo by’imibereho myiza n’iterambere bafite, mu rwego rwo kubakura mu bwigunge no kubafasha kugana ubuzima bwiza n’Iterambere.

Akarere ka Nyaruguru kahawe sheki ya miliyoni yo kuzishyurira mituweli abantu 333

Dr Gakwenzire yunzemo ati "Hazabaho no kubakira ubushobozi urubyiruko 100 rwarokotse Jenoside. Ibi byose bikubiye muri gahunda "Survivors in the Community, Intango y’ubudaheranwa".

Minisitiri w’Ubutegetsi bw’Ibihugu, Dr Patrice Mugenzi, yasabye abantu bose kuba hafi y’abarokotse Jenoside, cyane cyane muri ibi bihe Abanyarwanda bitegura kwinjira mu bihe bikomeye byo kwibuka.

Yagize ati “Tubabe hafi kugira ngo tubafashe kwinjira mu bihe bikomeye byo kwibuka, bakomeye.”

Yaboneyeho gusaba abafatanyabikorwa batandukanye kwifatanya na IBUKA, mu bikorwa byo kwita ku mibereho myiza y’abarokotse Jenoside, anagaya ibikorwa byo guhohotera abarokotse Jenoside byagiye bigaragara hirya no hino mu gihugu harimo no kubavutsa ubuzima. Yasabye ko buri wese yazana uruhare rwe mu kwiyubakira ubumwe.

Abarokotse Jenoside bashimye IBUKA na Leta y’u Rwanda, badahwema kubatekerezaho

Uwitwa Agnès Mukarusanga yashimye cyane igikorwa cyo kuganiriza abakunze guhungabana agira ati “Biba bikenewe cyane cyane mu gihe cyo kwibuka kuko hari abo usanga bahungabana, bakamererwa nabi, ugasanga barijimye, nta kurya cyangwa kunywa, hatangira ibiganiro bakagwa muri koma.”

I Ngera kandi hatangijwe igikorwa cyo kubakira uwarokotse Jenoside utishoboye

Ariko kandi nanone ngo kuganirizwa ntibihagije kubera ko hari abo usanga bafite ibibazo byinshi, ari na byo ahanini bibabera intandaro yo guhungabana.

Muri ibyo bibazo ngo harimo nko kunanirwa kwivuza ku bitaro bikuru kubera kubura amatike, kunanirwa guhinga ku bw’ingaruka za Jenoside, ukananirwa no kwicira inshuro, bityo umuntu agaheranwa na ya ndwara ndetse n’agahinda.

Ati “Ariko iyo ufite ubufasha mu kibazo ufite biragufasha ukoroherwa. Uba wumva uri kumwe n’abantu.”

Minisitiri Mugenzi mu kubakira umuturage

I Ngera umuganda wasimbuwe n’itabaro ryo kwimura imibiri y’abazize Jenoside yakorewe Abatutsi mu 1994

Imibiri isaga 270 yari iruhukiye mu nzibutso ebyiri ziri mu Tugari twa Nyamirama na Nyanza mu Murenge wa Ngera mu Karere ka Nyaruguru, irimo irimurwa, ikazashyingurwa mu rwibutso rwa Jenoside yakorewe Abatutsi rw'i Gishamvu mu Karere ka Huye, mu rwego rwo guhuza inzibutso.… pic.twitter.com/eYF7e2MKY2

— Kigali Today (@kigalitoday) March 29, 2025

VIDEO - Minisitiri w'Ubutegetsi bw'Igihugu, Dr Patrice Mugenzi, Guverineri w'Intara y'Amajyepfo n'Umuyobozi wa IBUKA ku rwego rw’Igihugu, bakoreye umuganda rusange i Nyaruguru ahatangijwe ibikorwa byo kubakira umusaza warokotse Jenoside wo mu Murenge wa Ngera witwa Innocent… pic.twitter.com/orcK1uTZuG

— Kigali Today (@kigalitoday) March 29, 2025

Lt Col (Rtd) Murengezi avuga ko hari abagabo bagira abagore benshi ntibite ku bana babyara

Lt Col. (Rtd) Valence Murengezi, umuyobozi w’ibitaro bya Munini, ni umwe mu bavuga ko kugira abagore benshi biri mu bituma abana batitabwaho uko bikwiye, mu Karere ka Nyaruguru.

Mu nama abayobozi bo mu Karere ka Nyaruguru bafite mu nshingano zabo kwita ku bana , bahurijwemo n’umuryango Bamporeze ku bufatanye n’abakozi ba NCDA, tariki 20 Werurwe 2025, yavuze ko yitegereje abo bakira ku bitaro baba babayeho mu buzima bubi, nta n’ubushobozi bwo kuvuza ababyeyi bafite, aza gusanga akenshi baba babana na ba nyina, ba se barabataye.

Yagize ati "Abagabo ino aha mbona bigirira abagore benshi, akajya ku ufite ubushobozi! Ubyaye kane gatanu aramuta, agafata undi. Usanga bazengurukaaa..., bahindura abagore nk’uhindura umwenda!"

Yunzemo ati "Usanga aba bana batajya kwiga, n’imikurire ntayo kuko baba bitabwaho na ba nyina gusa batanafite ubushobozi. Abo bana baba bazakura neza gute? Umwana ajya kureba se, akamubwira ati sanga nyoko!"

Yasoje igitekerezo cye agira ati "Abo bantu bakwiye kwegerwa!"

Munyampeta avuga ko abagabo bahora mu gushaka abagore ari abigize ba ntibindeba

Emmanuel Munyampeta ushinzwe uburere buboneye muri NCDA, yamwunganiye avuga ko bene abo bagabo baba bari mu cyiciro cy’abo twakwita ba ntibindeba.

Yagize ati "Kuko niba afashe umugore bakabyarana abana batanu, agafata uwa kabiri na we bakabyarana abandi batanu, gutyo gutyo, birumvikana ko atabasha guha umwanya umuryango we. Ibyo asabwa kugira ngo uburenganzira bw’umwana bwubahirizwe ntazabibasha, kuko ibyo asabwa bizarenga ubushobozi bw’ibyo abasha kubona."

Yunzemo ati "Ni yo mpamvu ubushoreke ari umuco mubi twamagana. Kandi uretse no kunanirwa kurera, ni n’imyitwarire mibi aba ahamo urugero rubi abo yabyaye. Tuzi ko abana barebera ku babyeyi. Ni ukuvuga ko umwana niyubaka urugo na we azitwara nka se."

Assoumpta Byukusenge, umuyobozi wungirije w’Akarere ka Nyaruguru ushinzwe imibereho myiza, we avuga ko koko abo bagabo bakwiye kwigishwa, ariko ko n’abagore bakwiye guca akenge.

Agira ati "Tujye dukoma urusyo dukoma n’ingasire. Umugore wemera kwakira umugabo ufite ahandi abarizwa aba arimo kwitera ibibazo. Aba akwiye kumenya ko uko yataye uwa mbere na we aba azamuta agashaka undi, cyangwa akisubirira ku wa mbere."

Jean de Dieu Nsabiyaremye, umuhuzabikorwa w’inshuti z’umuryango mu Karere ka Nyaruguru, akaba atuye mu Murenge wa Ngoma, we avuga ko ibikorwa n’abagabo bariya bayobozi bavuga atabifata nk’ubuharike (gushaka abagore benshi), ahubwo nk’ubusambanyi bukabije.

Byukusenge avuga ko n’abagore bakwiye guca akenge bakirinda kubana n’abagabo bazi ko bafite abandi bagore

Ubu busambanyi kandi ngo buturuka ku makimbirane yo mu ngo, aho umugabo utabanye neza n’umugore ajya gusambana hanze y’urugo, ari na byo bivamo ko usanga batera inda abakobwa bakiri batoya.

Amakimbirane kandi ngo aturuka no ku bagore bajya mu tubari bakanywa inzoga bagasinda ntibabashe kumenya ibyo barimo, bagasambanywa.

Ati "Tubona byakemurwa no kwigisha abagiye gushakana ko guca mugenzi wawe inyuma bitemewe. Ikindi, twasanze abagabo bashyirirwaho kwigishwa bonyine ku ngaruka zo kubyara benshi, no kugira imiryango irangwamo amakimbirane, bakanibutswa ko kujya gusamabana hanze bivamo abana na bo bateza amakimbirane mu muryango."

Akomeza agira ati "Binashobotse, aho byanze, byaba byiza abo byagaragayeho bagiye bacishwaho akanyafu. Urugero nk’uwo bigaragaye ko yateye umuntu inda utari umugore we, kubera ko akenshi na kenshi usanga atanafite ubushobozi bwo kumurera, akiye kujyanwa mu ihaniro."

Ikimutera kwifuza akanyafu ni ukubera ko abo byagiye bigaragara ko bitwara nabi, bijya bibaho ko bagayirwa mu ruhame, nyamara ngo akenshi bene abo usanga batanatinya umugayo.

Ntanenge avuga ko mu byo bateganya gukorera i Nyaruguru harimo gushishikariza abagabo kugira uruhare mu burere bw’abana babo

Fabrice Ntanenge ushinzwe gahunda z’umuryango Bamporeze ukora ibikorwa byo kurengera abana, ukaba ukorera no mu Karere ka Nyaruguru, avuga ko bafite gahunda yo kwegera ahari ibibazo bituma umwana adakura neza, ko n’icy’uko abagabo bakwiye kugira uruhare mu burere bw’umwana kizitabwaho.

Barateganya no kwibutsa abagore inshingano zabo mu kugira umwana ukura neza, bishingiye ku muryango.

Kugira abagore benshi, impamvu ituma abana batitabwaho uko bikwiye

Imvura yangije inzu z’abaturage n’ikiraro kiri hagati y’Imirenge ya Mamba na Musha

Amakuru yatanzwe na serivisi ishinzwe ibiza mu Karere ka Gisagara, avuga ko kugeza ubu bamaze kumenya inzu zirindwi z’abaturage zasenyutse mu Mirenge ya ya Mamba na Gishubi.

Muri izo nzu harimo iy’umugore w’imyaka 42 ufite abana batanu. Inzu yaguye ariko ntawe yaguyeho, none umuryango wabaye ucumbikiwe n’abaturanyi.

Harimo n’iy’umugabo w’imyaka 53, yo igisenge cyagurutse hangirika amabati 20, kandi iyo nzu yari ituwemo n’umuryango w’abantu barindwi.

Hari inzu zavuyeho ibisenge

I Bweya mu Mudugudu wa Gatobotobo ho mu Murenge wa Ndora, na ho hari abaturage bari gutaka ko baraye batewe n’amazi mu nzu, yaturutse mu ngo ziri ruguru yabo.

Ayo mazi yinjiye mu nzu eshatu arengera imyaka ndetse yangiza na bimwe mu bikoresho byari mu nzu, igikoni kimwe kirasenyuka.

Urebye ayo mazi yateye mu nzu biturutse ku bahinze ruguru yazo, bagasiba umuferege wayoboraga amazi. Abasibye uwo muferege bategetswe kuwusibura.

Abashinzwe imicungire y’ibiza ndetse n’ubuyobozi bw’Akarere, bakurikiraniye hafi ibyangijwe n’ibi biza, kugira ngo abo byibasiye bagobokwe.

Bifuza kumenya aho amafaranga bakatwa ajya

Nk’uko bamwe muri bo batashatse ko amazina yabo atangazwa, ku bwo gutinya gutakaza akazi babivuga, tukaba twabahaye amazina atari ayabo, ayo mafaranga bayakatwa kuva batangira akazi, kandi hari n’abamaze kuhakora amezi agera kuri atanu. Nyamara ngo iyo babajije nomero bashyirirwaho amafaranga nta gisubizo bahabwa.

Harerimana yagize ati "N’iyo tugerageje kubaza ntacyo batubwira. Turibaza ngo umuntu yazabwirwa n’iki ko bamuzigamira? Nta nomero ya caisse social, nta ki!"

Bavuga kandi ko bagenda bakatwa amafaranga anyuranye bitewe n’umushahara ababakoresha babagomba, ariko nanone ngo urebye ingano yayo yariyongereye guhera muri Mutarama 2025.

Hari uwagize ati "Mbere bankataga amafaranga 2500, ariko guhera mu kwa mbere bankata 5000 ku kwezi, kandi urebye umushahara ntiwahindutse."

Kabanyana uvuga ko ahakoze amezi atatu na we ati "Mu kwezi kwa mbere nahembewe imibyizi 13 bankata amafaranga 600. Ubuheruka bwo muri uyu mwaka ku mibyizi 22 bankuyeho 2860.

Ikibatera impungenge ni ukuba abakora akazi nk’akabo ku ruhande rw’iki gishanga, ruherereye mu Karere ka Nyanza bo batabakata ayo mafaranga, nyamara batekereza ko rwiyemezamirimo utunganya hose ari umwe.

Habyarima ati "Iyo nitegereje mbona nta gihe kinini cyo kuhakora dusigaranye. Turibaza ngo nibigendera tuzabaza nde? Nk’ubu ibipande dukoreraho barabijyana ntibabitugarurie, twebwe nta kintu na mba dusigarana. Twazahera hehe tubaza?"

Yungamo ati "Twebwe turavuga ngo baramutse banatuzigamira byaba ari akarusho, kuko twamenya ngo umuntu agize aya, cyane ko tuba tubona ari n’akazi katarambye."

Umuyobozi wungirije w’Akarere ka Gisagara ushinzwe ubukungu, Jean Paul Habineza, avuga ko nyuma yo kumenya iki kibazo basabye kampani ikoresha abo baturage kubakoresha inama, bakabasobanurira kandi bakabereka aho amafaranga yabo ashyirwa, cyane ko kwiteganyiriza bifite akamaro.

Abakoresha barasabwa guha ibisobanuro abakozi babo

Rwemera uyu yari afite imyaka 31 mu gihe cya Jenoside. Ubu afite 62. Avuga ko yagize uruhare mu bwicanyi.

Mu batutsi yishe, yavuzemo mubyara we witwaga Angélique yiciye ku Kiliziya, i Simbi, na nyina wiyahuye amenye ko yagize uruhare mu kwica abanyesimbi kandi hari hatuye abavandimwe be, harimo na basaza be ndetse na bisengeneza be.

Agira ati "Nyuma y’uko Sindukubwabo wari perezida w’u Rwanda yaje ino agashishikariza abantu kwica, Abatutsi barasiwe muri Paruwasi ya Simbi, barashwe banatewe za gerenade. Hashize nk’iminsi ibiri twaje guhorahoza abatari bapfuye, tukajya dutera mu kiliziya amabuye."

Icyo gihe ngo haje kuza abasirikare bakingura inzugi, babwira abari bagihumeka ngo nibasohoke batahe, ihumure ryaratanzwe.

Akomeza agira ati "Nta humure ryo gutaha ryari rihari, kwari ukubabeshya kugira ngo n’abihishe mu mirambo bibizane, bicwe. Mu basohotsemo harimo kabyara kanjye Angélique kari gafite imyaka 12. Kampungiyeho nk’umuntu kazi kuko najyaga ngenda iwabo, aho kugira icyo nkamarira nafashe ubuhiri ndakica."

Atashye, nyina yamubonanye ubuhiri bugaragaza ko yari avuye kwica, amubajije aho avuye amubwira ko ari i Simbi, arababara, ajya mu nzu anywa simekombe, nuko arapfa.

Mu mwaka w’1996 yarafashwe arafungwa, akatirwa igifungo cy’imyaka umunani kubera ko yari yireze akemera icyaha. Igifungo akirangije ngo byaje kugaragara ko hari ibyo atasobanuye neza, noneho akatirwa imyaka 19.

Aho afunguriwe mu mwaka w’2023, yisanze ahorana ipfunwe ryo kuba yarabaye umwicanyi, yahura na muka nyirarume (nyina wa Angélique) akamwihisha, kuko yumvaga atamutunguka imbere.

Yaje gutangira urugendo rw’isanamitima bafashijwemo na Komisiyo y’Ubutabera n’Amahoro ya Diyoseze Gatolika ya Butare, aramwegera amusaba imbabazi, none ku cyumweru tariki 16 Werurwe 2025 yarongeye azimuha ku mugaragaro.

Icyo gihe abari mu rugendo rw’isanamitima bashoje urugendo bari 29 bakoze Jenoside na 17 batanze imbabazi.

Padiri Valens Niragire, umunyamabanga wa Komisiyo y’ubutabera n’amahoro mu nama y’Abepiskopi gatolika mu Rwanda wari witabiriye umuhango wo kongera kwakira bushya abakoze Jenoside nk’abana b’Imana bihannye, yasabye abakoze Jenoside kuzajya babwiza ukuri abana babo, mu rwego rwo kugira ngo badakurana urwango batekereza ko ababyeyi babo barenganyijwe, ariko no kugira ngo birinde ikibi.

Rwemera yabwiye Kigali Today ko ibyo abyitaho, akerurira umwana we w’umuhungu umwe rukumbi ko yakoze icyaha, ko we akwiye kucyiirinda kugira ngo atazahura n’ingaruka nk’izamubayeho na we ubwe.

Yagize ati "Ndamubwira nti nakoze icyaha, rwose mwana wanjye, ubwo ubona ndi kwiruka nsaba imbabazi, byanteye ipfunwe. Nti uzirinde, ntihazagire ugushuka ngo wicane. Njyewe nabigiyemo ari ubuyobe, urabona aho bingeze."

Nyuma yo gusaba imbabazi akanazihabwa ubu ngo yumva hari umutwaro wagabanutse ku mutima we kuko byibura atagihura n’abo yahemukiye ngo yihishe.

Urugendo rw’isanamitima arushishikariza n’abandi bakoze Jenoside, bakirega bakemera icyaha mu gihe cya gacaca, kuko yasanze ari rwo rufasha koroherwa n’umutwaro w’ipfunwe ku mutima.

Ati "Hari igihe wiregaga, wenda n’uguha imbabazi akaguha iza nyirarureshwa, ariko noneho kujya ku uwo wiciye mukaganira, ukamufasha n’umurimo, akumva na we aratuje, bibafasha mwembi."

Icyaha cy’ubwicanyi yacyanze burundu kuko cyamuvukije byinshi

Rwemera avuga ko yicuza icyaha cy’ubwicanyi yakoze kuko cyatumye amara imyaka 27 y’ubuzima bwe muri gereza, byamuviriyemo kuba ubu afite umwana umwe rukumbi w’umuhungu atabonye akura ngo amwiteho nk’umubyeyi kuko yavutse mu nda yasize umugore we atwite.

N’izina ngo yarimwitiye aho yari afungiye kuri Komine, atarajyanwa muri gereza.

Ikimubabaza kurushaho ni ukuba umwana we ataranize, agatekereza ko iyo aza kuhaba ishuri yari kuba yararigiyemo ubu akaba afite uko abayeho, akabyara n’abandi bana, akagira umuryango.

Agira ati "Nasanze uburere bwe ntabwo, nsanga ari inzererezi iri aho, n’indangamuntu ni njyewe warinze kuyimushakira ejo bundi agize impanuka akajya mu bitaro. Iyo mpaba aba yaragiye kwiga, nkamuha uburere bwiza."

Akomeza agira ati "Nicuza no kuba mama yariyahuye kubera njyewe. Iyo ntaza kwishora mu bwicanyi ntacyo yari kuba kuko n’ubwo na we yari mu cyiciro cy’abahigwaga, we abaturanyi bari baramubwiye ko batazigera bamwakura kubera ko yari umubyaza."

Ababazwa kandi no kuba ku myaka isaga 60 ari bwo ari guhanga ubuzima, agerageza kuva mu bukene, mu gihe abo bangana batishoye mu bwicanyi bo ubu bafite ingo zikomeye zanateye imbere.

Ati "Nta kintu kibi nakongera gukora, kuko umutima wanjye umbwira ngo ibi wabivuyemo, kora ibyiza, ujye imbere. N’uwambwira kwicana nakwemera noneho akanyica kubera ko ingaruka zabyo nazibonye."

Asoza agira ati "Nanjye ubu narakomeretse. None se kubona narasize umwana bamutwite nkaba naratashye afite imyaka 27, nkaba ntarirereye, atananzi, ..."

Ni umuhanda wapfaga kenshi, byatumye ushyirwamo kaburimbo mu gice cyahoraga cyangirika.

Imiferege yakozwe muri icyo gice kirimo n’amazu menshi y’ubucuruzi yayoboye amazi ahantu hamwe ku buryo aho iyo miferege igarukira, hari n’agateme kari mu muhanda, hamaze kwikora umukoki munini ugenda wiyongera uko amazi y’imvura ahamanukiye.

Igihangayikishije abatuye muri kariya gace ni uko hanyura abantu benshi harimo n’abana bava banajya ku ishuri, ku buryo n’ubwo kugeza ubu abagiye bagwamo nta wapfuye, bakaba baravunitse gusa, hari impungenge ko amaherezo hari n’abazapfiramo.

Uwitwa Habiyambere agira ati “Hano hanyura abana benshi bava ku ishuri. Ejobundi haguyemo umwana w’umuturanyi. Umubyeyi yasabye ubuyobozi ko hasubirwamo bazirikana ko n’ubwo ntawurapfiramo, bishoboka, bakaba bagomba gukumira ikibazo kitaraba. Nta kirakorwa!”

Delphine Mukanyandwi utuye mu nzu iri hafi y’uwo mukoki agira ati “Iki cyobo kiratubangamiye.
Nk’ejobundi haguyemo umwana, tugira amahirwe bamukuramo ari muzima ariko yamaze iminsi atajya ku ishuri nyine yaravunitse.”

Akomeza agira ati “Hano hajyaga hanyura imodoka zigiye epfo iyo mu Igambiriro, ariko nta yikihanyura kubera iki cyobo. Urabona ko n’akararo gasigaye kari mu manegeka. Umudamu umwe wari uhetse umwana yavuye gushesha arokamo. Hari mu kagoroba, abagabo baraza baramuzamura.”

Uwitwa Mukashema na we amwunganira agira ati “Umukecuru bita Mama Bingwa yari avuye gushesha hariya, ashatse kubererekera abo bari bagiye guhura agwamo. Iki gikoki kiratubangamiye!”

Ba nyir’amazu ari hafi y’uwo mukoki na bo bahangayikishijwe n’uko babona uzabasenyera, ku buryo hari n’abahubatse inzu y’ubucuruzi ubu idakoreshwa kubera umukoki wayisatiriye.

Marie Louise Mukamazina, nyiri iriya nzu y’ubucuruzi itifashishwa yanagaragarije urwego rw’Umuvunyi rwasuye abatuye mu Murenge wa Ruheru tariki 13 Werurwe 2025 ko bahangayikishijwe no kuba nta gikorwa ngo kiriya kibazo gikemuke nyamara badahwema kukigaragariza ubuyobozi.

Yagize ati “Twagerageje kwandika, no ku Karere twarahageze, ariko nta gisubizo baraduha. Icyakora bigeze kuza batubwira ko hazubakwa ruhurura, ariko na n’ubu turacyategereje.”

Umukozi w’Akarere ka Nyaruguru ufite mu nshingano ze ibijyanye n’inyubako yabwiye umuvunyi
wungirije wagejejweho icyo kibazo ko hafashwe icyemezo cy’uko abafite inzu ziri hafi y’uriya mukoki.

bazabarirwa agaciro kazo, bakishyurwa bakavamo, kandi ko yizeraga ko abagenagaciro bamaze
kubageraho. Ngo baraza kubyihutisha.

Kandi ngo begereye Ikigo cy’Igihugu gishinzwe Iterambere ry’Ubwikorezi (RTDA), ari na cyo
cyatunganyije uriya muhanda, kibemerera ko hazubakwa ruhurura imanura amazi kugeza hepfo
y’ahatuwe. Bategereje ko ibyo bemerewe bizashyirwa mu bikorwa.

Urusenda atunganya

Iyi myumvire yayigize guhera mu mwaka ushize wa 2024, atangiye gutunganya urusenda mu buryo bugaragara, akaba akorera mu Karere ka Kamonyi. Yanyuze mu ngorane zirimo gutwita imburagihe, guhanga umurimo bitamworoheye no gushakisha amasoko. Umushinga we wamuhesheje inkunga muri Youth Connect, none yatangiye kubona ko inzozi ze zo kuba umukire azazigeraho.

Asobanura iby’inzira yo kugera aho ageze ubu ndetse n’intumbero afite, yateruye agira ati "Nk’undi mwana wese, nakuze numva nshaka kuzaba umuntu ukomeye. Nyamara niga mu mwaka wa gatanu w’amashuri yisumbuye, hari muri 2018, naje gusama inda."

Akomeza agira ati "Murabizi gutwita imburagihe ntabwo biba byoroshye. Abantu barakuvuga, n’umuryango wawe uba uwuteje ikibazo, cyane mama wawe bavuga ngo ese ka gakobwa kawe ... Ariko naravuze nti n’ubwo ntarangije ishuri, ngomba kuba wa muntu navuze, ukomeye."

Umwana we agize amezi atanu yiyemeje gusubira mu ishuri. Ishuri yararibonye, ariko akarifatanya no gukora muri resitora. Yigaga kugeza saa saba, hanyuma agahita ajya mu kazi. Icyakora ari hafi gukora ibizamini bya Leta akazi yabaye akaretse.

Arangije kwiga yafashe amafaranga yari yarazigamye agura akamashini gakora imitobe, hanyuma agasigira umukozi ajya gushaka akazi ko gucuruza mu iduka. Icyakora umukozi yakoze nabi, akajya akora imitobe itaryoshye nk’iyo yakoraga akihibereye, bizinesi irahomba.

Ati "Burya bizinesi utibereyemo ntikunda."

Yaje guhura n’umuntu biganye watunganyaga urusenda akarucuruza hanze y’u Rwanda, amusaba igitekerezo cy’ibyo yakora agatera imbere, amubwira ko ibyo azi ari ugutunganya urusenda, anamwemerera kubimwigisha.

Uwineza nta gahunda agifite yo kujya gutura mu mahanga

Yatangiranye n’abakiriya babiri b’abanyamahanga, ariko akabona badahagije, nuko amaze kuzigama amafaranga ibihumbi 200 yiyemeza gukora rwinshi, ariko nanone abona icyo agomba guheraho ari ukubona isoko.

Ati "Nagiye gushaka isoko muri Simba Supermarket. Namaze ukwezi mbirukaho bararinyimye, bakavuga ngo ibi bintu byawe ni nde wabirya? Ngo ese ubundi tuguhaye isoko wakomeza kubitubonera igihe cyose tubishaka? Nti nzabishobora!"

Akomeza agira ati "Buri gitondo nabyukiragayo, uwo nasabaga isoko akambaza ngo ese noneho uje gukora iki? Nkamubwira nti nkora ibintu byiza, kandi ndashaka ko Abanyarwanda babimenya. Ngo ese hari abandi wabihaye? Ndamubwira nti barahari. Ambwira ibyo njya guhindura, ndagaruka akomeza kunaniza, ariko biza kurangira anyemereye. Icyo gihe yantumye uducupa 275."

Yari yaranze gushora muri iriya bizinesi ye menshi atarabona isoko, noneho aribonye abona gutangira gukora bya nyabyo, n’urusenda rwe rwarakunzwe.

Yaje kujya mu nama yari yatumijwe na Profemme Twese Hamwe, ahurirayo n’urungano, havamo umwe amugira inama yo kugana amarushanwa ya Youth Connect, ko yazayakuramo igishoro cyo kumufasha.

Ayitabiriye yabaye uwa mbere mu bagore, atsindira Miliyoni eshanu. Aya mafaranga yatumye yagura ibitekerezo ku buryo ubu afite intego yo kwagura ibikorwa bye, akagura amamashini yo kwifashisha, akava ku gukorana na supermarket z’i Kigali gusa kuko ubu akorana n’izirenga eshanu nini, akagemura no hirya no hino mu gihugu ndetse no hanze yacyo.

Ati "Ku isoko ubu tuhafite Neza Chill kandi turateganya kuhakwirakwiza na
Neza Heat ndetse na Neza Chill Oil. Kampani nashinze yitwa Neza Ltd."

Ku bagitinya guhanga umurimo, cyane cyane urubyiruko, ati "Icyo waba uri cyo cyose, ikintu cyose kirashoboka. Muzarebe, abateye imbere bose baba barahereye hasi. Ukora akantu gatoya kakakuzamura. Ushobora kugerageza kuri kimwe kikanga, ukajya ku kindi kikaguhira."

Akomeza agira ati "Niba dushaka ubuzima bwiza mureke tubukorere, kuko nta kintu na kimwe cyoroshye. Tugomba gukura amaboko mu mufuka tugakora."

Asoza agita ati "Kera najyaga numva ko nshobora gukirira mu kujya hanze, mbikesha kubona Green card. Ariko ubu namaze kubona ko nzajya njyayo ntagiye gukoropa, ahubwo mbashyiriye ibicuruzwa biturutse mu Rwanda. Ntabwo navutse mu bakire, ariko ngomba kuba umukire."

Yabibwiye urubyiruko ruhagarariye urundi rwo mu Ntara y’Amajyepfo mu nama bagiriye i Huye kuri uyu wa 5 Werurwe 2025, agamije kubashishikariza kwihangira imirimo, anabereka ko inzira yihuse yo kutagwa mu bushomeri ari ukumenya umwuga.

Yagize ati "Mbere nari umuganga uzi gusuzuma neza, ariko byaba ngombwa ko umurwayi abagwa nkamwoherereza undi muganga. Rimwe umuturage nari nasuzumye agarutse kundeba, atazi n’izina ryanjye, avuga ko muganga ashaka ari wa wundi uzi gusuzuma ariko utazi kubaga. Babimbwiye nahise mfata icyemezo cyo kujya kwiga kubaga, kubera ko nabonye umuturage yari yancishijemo ijisho."

Yaboneyeho gushishikariza urubyiruko kutabaho nta mwuga bazi, kuko imirimo y’amaboko ari yo itanga akazi. Yagize ati "Akarimo k’amaboko ni ingenzi. Umujene udafite umurimo w’amaboko azi ntaho agera. N’ubwo wakwiga ukaminuza, iyo wongereyeho umurimo w’amaboko biragufasha."

Yaboneyeho no gusaba abigisha urubyiruko ibijyanye no kwihangira imirimo kuba bafite umurimo na bo bahanze, batangaho urugero, naho ubundi ibyo bababwira babifata nk’ibigambo, ugasanga babaza ngo ese ibyo utubwira wowe wabishobora?

Ati "Nujya imbere y’abajene ubabwira kwihangira imirimo ujye ubanza ukore, ubereke icyo wagezeho."

Yanashishikarije abahagarariye urubyiruko kugira amatsinda rubarizwamo, kuko uri wenyine, adafite uwo bungurana ibitekerezo, ntaho agera.

Ati "N’uzabura itsinda ajyamo azajye muri korari. Mushobora kubahuriza no mu bimina, bajya bahuriramo bakanazigama."

Ibitaro by CHUB aho ikigo gishya kivura Kaseri kizaba kiri

Umuyobozi w’agateganyo wa biriya bitaro, Dr Christian Ngarambe, yabibwiye abitabiriye ibirori byo kwizihiza umunsi w’abarwayi ku cyumweru tariki 2 Werurwe 2025.

Yagize ati "Dufite icyizere ko guhera ku itariki ya 1 Nyakanga 2025 tuzaba dufite santere yo kuvura indwara za kanseri. Imyiteguro yararangiye, aho bazakorera harahari, ibikoresho bizakoreshwa byatumweho, ndetse n’abaganga bazahakora baratangira kujya mu mahugurwa mu cyumweru gitaha."

Yunzemo ati "Ibi bizajyanirana n’uko hari serivise zizatangira kwishyurwa na mituweri nk’uko byemejwe na Leta y’u Rwanda harimo kuvura kanseri no gutanga insimburangingo ku bavunitse bakuze."

Yasobanuye ko ubundi abatoya iyo bavunitse amagufa akenshi bavurwa, amaherezo amagufa yabo akazafatana, ariko ko ku bakuze akenshi bitemera ku buryo usanga biba ngombwa kwifashisha insimburangingo z’ibyuma.

Kwifashisha bene izo nsimburangingo ngo bishobora no gukenerewa igihe hari abarwaye indwara zimunga amagufa.

Kubona bene izo nsimburangingo mbere byasabaga amafaranga menshi. Urugero nk’icyuma cyifashishwa mu itako cyatwaraga miriyoni 3.5, haza kuboneka ibihendutse byishyurwa ibihumbi 900. Mituweri nitangira kubyishyura muri Nyakanga 2025, umurwayi azajya yiyishyurira ibihumbi 90.

Dr Ngarambe avuga ko bishimira kuba Leta y’u Rwanda yarabashoboje kugira inzobere zo kwita ku ndwara batari basanzwe bavura harimo kubaga mu mutwe, kubaga indwara zifata imisaya, kuyungurura amaraso, gufasha abarwaye impyiko n’indwara z’imisemburo zishobora gutera indwara zinyuranye ndetse no gupima mu gifu.

Kuri ubu kandi baritegura kwakira icyuma bita scanner cya kabiri kizafasha ko igihe kimwe cyapfuye bazaba bafite ikindi cyo kwifashisha bityo ntibibe ngombwa kohereza abarwayi kwipimishiriza i Kigali nk’uko byajyaga bigenda.

Muri CHUB kandi muri uku kwezi kwa Werurwe 2025 haratangira gukorera ishyirahamwe ry’abarwaye indwara yo kutavura kw’amaraso, rizajya rifasha mu gupima abafite icyo kibazo, bakababona imiti ku buntu.

Abarwayi bumvise iby’aya mavugurura agiye kuba muri CHUB barabyishimiye, bashima cyane kwegerezwa serivise zipima indwara nyinshi bajyaga bakenera kujya gupimisha i Kigali, bikabahenda.

Jeanne Nyirandagijima wabazwe mu mutwe, agira ati "Nkatwe duciye bugufi kujya kwipimishiriza i Kigali biraduhenda cyane kuko umuntu yishyura ambulance ku buryo hari igihe biba ngombwa ko ugurisha akantu kakakuramiye."

Asobanura iyi gahunda Dr. Bizimana yagize ati "Abakoze icyaha cya Jenoside basigaye muri gereza ni abahawe ibihano bikomeye, bakatiwe hejuru y’imyaka 25 n’aba burundu. Muri bo harimo ba ruharwa batigeze bemera uruhare rwabo muri Jenoside, baticuza, badasaba imbabazi, bagitsimbaraye. Ariko hari n’abenshi cyane bateye intambwe, bagororotse, bakeneye kumenya aho igihugu kigeze ngo bazashobore kubana n’abandi neza."

Minisiteri ngo yateguye gahunda yo kubahuriza hamwe, igihe basigaje amezi nk’atatu kugira ngo barangize igihano.

Bizimana yagize ati "Tuzanabahuza n’imiryango y’abo biciye kubera ko hari abiciwe babonaga umuntu wakatiwe imyaka 29 cyangwa 30 afunguwe, ugasanga aje kuri Minubumwe avuga ngo uwampemukiye afunguwe atarangije igihano kubera ko atari yarigeze yitegura ko imyaka 30 cyangwa 20 ishobora kurangira. Ariko igihe bazaba bategujwe ko ya myaka igiye kurangira bakitegura kubana na bo, bizanabafasha igihe bageze aho bari batuye."

MINUBUMWE ngo yamaze kumvikana n’urwego rw’igihugu rushinzwe igororero ko bazajya bareba igororero babahurizamo, bakaba ari ho bigishirizwa.

Ibi bizakuraho impungenge z’abibazaga uko bizagenda kurekurira hafi mu gihe kimwe abagize uruhare muri Jenoside.

Eric Havigimana wo mu Karere ka Gisagara, umwe mu bari bafite izo mpungenge agira ati "Singira masenge, singira bakuru banjye cyangwa bashiki banjye. Iyo mbonye icyototera gusubiza u Rwanda aho rwavuye mpita ngira igishyika, nkashaka gutabaza mu mbaraga zanjye. Rero uyu munsi numvise ko bimwe natekerezaga ko byakototera igihugu cyose, Leta y’Ubumwe yabitekerejeho."

Impungenge yari afite ahanini zari uko hari abantu bakuru bagize uruhare muri Jenoside batahindutse

Havugimana, yumvaga atewe impungenge n’abantu bakuru bazafungurwa, bakaba bacengeza mu bato ingengabitekerezo ya Jenoside.

Kuri ubu mu magororero yo mu Rwanda hari abafungiye icyaha cya Jenoside babarirwa mu bihumbi 22, habariyemo abagiye kurangiza ibihano n’abakatiwe burundu.

Ni urubyiruko rubarirwa mu gihumbi rwo mu Turere twa Gisagara, Huye, Nyaruguru, Nyanza, Ruhango na Nyamagabe, bari bateraniye i Gisagara kuri uyu wa 1 Werurwe, muri gahunda yiswe Rubyiruko Menya Amateka Yawe.

Ni gahunda ihurizwamo urubyiruko ruhagarariye urundi ruba rwaturutse mu Turere dutandukanye, bakaganirizwa ku mateka y’u Rwanda, bategurwa ku kwinjira mu gihe cyo kwibuka Jenoside yakorewe Abatutsi mu mwaka w’1994.

Yagize ati "Ubumwe rero mujye mubugereranya n’umwuka buri wese ahumeka. Ni ikintu cya ngombwa cyane. Ibi kandi mbabwira, ntabwo ari ibyo mpimba. Abakurambere bacu babyemeraga batyo, bakabigaragaza mu buryo bwinshi."

Yunzemo ati "Hamwe mu ho babigaragarizaga ni mu migani. Imigani burya yabaga ihanura. Bakavuga bati ’abajya inama Imana irabasanga’, byo kumvisha ko iyo abantu baganiriye, bahuje, n’Imana iza hagati yabo. Bakongera bagaca undi mugani uvuga ngo ’ababiri bajya inama baruta umunani barasana’. Ni ukuvuga ko niba abavandimwe babiri bashyize hamwe, hakaba hari nk’abandi umunani barwana, bashwana, batumvikana, ba bandi babiri babarusha gutera imbere, babarusha kubaho, kandi bakabaho neza. N’indi n’indi."

Kuba ubumwe ari ingenzi cyane mu buzima bw’Abanyarwanda ngo babigaragarizaga no mu mazina baha abana babo, bakavuga ngo Ntamugabumwe, n’ayandi.

Minisitiri Bizimana yanasobanuriye urubyiruko ukuntu abazungu basenye ubumwe bw’Abanyarwanda, bikabagusha mu macakubiri yaje kuvamo Jenoside, hanyuma abari bahari batahana umukoro wo kuzabwira ibyo bumvise bagenzi babo baje bahagarariye.

Eric Havugimana w’i Ndora mu Karere ka Gisagara, ni umwe muri bo.

Yagize ati "Ibyo u Rwanda rumaze kugeraho ni ukubera ko ubumwe bwagarutse nyuma y’uko abakoroni baje bakaducamo ibice, ubumwe bugakendera, hanyuma hakabaho Jenoside, abantu bakicana nyamara bari bene mugabo umwe. Ubumwe rero dukwiye kubukomeraho."

Niyonkuru Jean de Dieu w’i Kansi na we ati "No mu rugo abantu badafatanyije ntibatera imbere. Natwe Abanyarwanda dushyize hamwe nta kibazo twagira n’ubwo hari abari hanze y’u Rwanda batadushakira amahoro. Abo rero tugomba kubima amatwi."

Hari mu muhango wo gusoza urugerero rw’Inkomezabigwi icyiciro cya 12, rwarimo urubyiruko rwarangije amashuri yisumbuye muri 2023-2024.

Uwo muhango wabereye mu Murenge wa Tare mu Karere ka Nyamagabe, kuri uyu wa 28 Gashyantare ahari hateraniye abasoza urugerero bo mu Mirenge ya Tare, Kitabi, Uwinkingi na Kibilizi, mu Karere ka Nyamagabe.

Ahereye ku bana bagaragayeho amagambo y’ingengabotekerezo ya Jenoside muri Nyamagabe, mu minsi yashize, yagize ati " Iryo ritindi ry’irondamoko ryokamye u Rwanda kuva mu 1959 mwe mutaravuka, n’ababyeyi banyu benshi bataravuka, ariko bararisanga, barikuriramo. Hari abatararireka, bakarishyira mu bana, bakarishyira mu buzukuru n’abuzukuruza. Abo rero bariho barabaraga umurage mubi cyane."

Yunzemo ati "Umubyeyi ukuraga urwango, aba ariho aguhemukira, aba ariho akwangiza, aba ariho akubuza kuzabaho neza. Uwo mubyeyi ntukamwumvire kuri icyo. N’ubwo kumvira ababyeyi ari byiza ari na ngombwa, ariko umubyeyi ukwigisha ikintu kibi, icyo ari cyo cyose, ntukamwumvire."

Yanabashishikarije kugira Ubumwe, anabibutsa ko buhera mu muryango.

Ati "Uhereye no mu muryango, iyo abantu badashyize hamwe barisenya ubwabo. Umugabo n’umugore bahora muri rwaserera, mu businzi n’ibindi bibi, urugo rwabo rurasenyuka, ntirubaho. Imiryango ifite ibibazo by’imibanire ni na yo usanga ifite abana bagera mu kigero cyanyu ugasanga bagiye mu biyobyabwenge, mu buraya, ugasanga abana b’imyaka 10 na 12 bafite abana kandi na bo ubwabo bakeneye kurerwa."

Yababwiye kandi ko nk’uko bashyiraga hamwe mu rugerero, ari na ko bakwiye gukomeza guhuza imbaraga bagakorera igihugu cyabo, mu bupfura no kwanga umugayo.

Yagize ati "Kera ku rugerero ni ho bigiraga kurinda igihugu. Abantu ntibashobora kurinda igihugu badashyize hamwe, badatekanye, batiteje imbere, badafite umunezero, badafite amahoro y’umutima. Ibyo ni byo mugomba gufata. Iby’inzangano n’amacakubiri n’irondamoko by’ingengabitekerezo ya Jenoside mutandukane na byo rwose."

Urubyiruko rwashoje urugerero ngo rwiteguye kuba umusemburo wo gutuma amagambo mabi nk’ayagaragaye kuri bamwe mu bana b’i Nyamagabe acika.

Diane Mukahirwa wo mu Murenge wa Kibilizi yagize ati "Ibitekerezo by’ingengabitekerezo ya Jenoside ni bibi, bisubiza inyuma igihugu cyacu kandi twari tumaze kugera ku iterambere rifatika."

Inkomezabigwi zo mu Mirenge ya Tare, Kitabi, Uwinkingi na Kibilizi zahawe buriya butumwa ni 475 harimo abakobwa 242 n’abahungu 233. Icyakora, abarangije urugerero muri rusange mu Karere ka Nyamagabe ni 1846 kandi abenshi ni abakobwa kuko ubwabo ari 1053.

Naho mu gihugu hose, Inkomezabigwi icyiciro cya 12 cyari kigizwe n’abasore n’inkumi ibihumbi 48 na 302.

Ku bijyanye n’ibikorwa bakoze mu gihe cy’urugerero, abo mu Karere ka Nyamagabe bibanze ku gukemura ibibazo bibangamiye imibereho myiza n’iterambere ry’abaturage.

Bubatse amazu atatu basana 47, bubatse ubwiherero 25 basana 125, bakoze ingarani 57, imirima y’ibikoni 126 n’amateme abiri, basana imihanda ifite uburebure bwa km imwe, batera ibiti 2020 harimo ibivangwa n’imyaka 220 n’ibindi.

Umuyobozi w’Akarere ka Nyamagabe, avuga ko mu Karere ayobora hari ahagaragaye amagambo y’ingengabitekerezo ya Jenoside ku bana biga mu mashuri abanza n’ayisumbuye, mu minsi yashize.

Hamwe muri ho ni mu ishuri ryisumbuye rya Gisanze riri mu Mudugudu wa Kanserege, Akagari ka Buhoro, Umurenge wa Tare, aho abanyeshuri b’imyaka 15 na 16 bavuze amagambo arimo ingengabitekerezo ya Jenoside.

Ngo hari mu isomo ry’Ikinyarwanda, bari kwiga umwandiko ufite umutwe ugira uti “Jenoside ntizongere ukundi”, hanyuma mu itsinda ry’abanyeshuri 10, mu gusubiza ikibazo kigira kiti "Sobanura ibitera Jenoside, ingaruka zayo n’uko yakumirwa”, umuhungu w’imyaka 16 asubiza agira ati "harimo n’ingaruka nziza".

Icyo gihe ngo yasobanuye igitekerezo cye avuga ko abantu babaye bake bakabona aho batura, ubutaka bukiyongera n’igihugu kikamenyekana. Ikindi ngo hanatsembwe "imbéciles z’Abatutsi.”

Icyo gihe mugenzi we umwe yamwunganiye avuga ko "Hari abantu batari kuvuka iyo Jenoside itaba", ko "hari abakobwa bafashwe ku ngufu mu gihe cya Jenoside".

Ibi byabaye ku itariki ya 20 Gashyantare ariko mbere yaho muri GS Sekera iherereye mu Murenge wa Musebeya, no muri GS Ngororero, iherereye mu Murenge wa Tare na ho hari hagaragaye ingengabitekerezo ya Jenoside. Muri GS Ngororero by’umwihariko ngo hari hagaragaye abana bari banze kwigana n’abana b’impunzi z’Abanye-Congo bahiga.

Ni ubutumwa Minisitiri Dr. Bizimana yatanze ubwo hasozwaga Urugerero rw’Inkomezabigwi icyiciro cya 12, rwitabiriwe n’urubyiruko rugera ku 48.302 rwasoje amashuri yisumbuye mu mwaka wa 2023-2024.

Iki gikorwa cyabereye mu Karere ka Nyamagabe ku rwego rw’Igihugu, Minisitiri Dr Bizimana yavuze ko ubuyobozi bw’u Rwanda bushyira imbere Ubumwe, asaba uru rubyiruko kutazigana abaranzwe n’ingengabitekerezo ya Jenoside.

Yagize ati: “Bana bacu ntihagire uwigana abaranzwe n’ingengabitekerezo ya jenoside. Abanyarwanda twese turi umwe, tugomba gukorera hamwe tugateza imbere igihugu cyacu, ni byo tubifuzaho”.

Yakomeje agira ati: "Amasomo, n’ubumenyi bujyanye n’indangagaciro z’umuco Nyarwanda, n’ibikorwa by’iterambere mwakoze, bibafasha kugira imyumvire ikwiye."

Uru rugerero rudaciye ingando rwatangiye tariki ya 13 Mutarama 2025. Abitabiriye uru rugerero batojwe ingangagaciro z’umuco nyarwanda na kirazira, n’uburyo zikwiye kubayobora mu mitekerereze n’ibikorwa byabo, kuko bibafasha kuzagera ku ntego z’icyerekezo cy’Igihugu 2050.

Umusaruro w’uru rugerero ugaragarira mu bikorwa biteza imbere imibereho myiza y’abaturage n’iterambere ry’Igihugu urubyiruko rwakoze, nko kubaka no gusana inzu z’abatishoboye, gutunganya uturima tw’igikoni, kuvugurura no guhanga imihanda nyabagendwa, gukoresha imbuga nkoranyambaga mu buryo bwubaka, n’ibindi.

Abahinzi biyemeje kwisunga iteganyagihe mu mirimo yabo

Abo bahinzi ni abahagarariye abandi bo mu Turere twa Huye, Nyamagabe, Rusizi na Nyamasheke, nyuma yo guhugurwa ku buryo bwo kwifashisha iteganyagihe mu kugena igihe cyo guhingira n’ubwoko bw’imbuto zo guhinga, bagejejweho n’ikigo cy’u Rwanda cy’iteganyagihe (Meteo Rwanda), guhera ku itariki ya 18 kugeza ku ya 19 Gashyantare 2025.

Uwitwa Ezechias w’i Nyamasheke, nyuma yo guhugurwa yagize ati "Najyaga numva iteganyagihe kuri radio simbihe agaciro, ariko ubu namaze kumenya ko iyo umaze kumenya ingano y’imvura izagwa mu gihembwe cy’ihinga, ukabyitaho, bigufasha."

Yakomeje agira ati "Niba hari nk’imvura y’amezi atatu tukamenya igihingwa dushobora guhinga cyakwera muri ya mezi atatu. Niba nateganyaga guhinga ibishyimbo by’imishingiriro nkabona byerera amezi ane, nkahita mpindura ngahinga ibigufiya, na byo ngahitamo imbuto izerera amezi atatu."

Yavuze ko n’iteganyagihe ry’umunsi ku munsi na ryo rigira akamaro "Hari igihe najyaga gushyira ifumbire mu murima cyangwa ngatera imiti imvura igahita igwa, ikabitwara, nuko igishoro nari nabaze kikangirika, ngatangira kugwa mu gihombo. Noneho nzajya mbyitwararika."

Annonciata Mukarusanga w’i Tumba mu Karere ka Huye na we ati "Najyaga numva amakuru y’iteganyagihe atantwara umwanya, ariko numvise ko iteganyagihe ari ubuzima bwa buri munsi, umuntu wese akaba akwiye kuryitaho kuko riguha uko witwara. Niba hari nk’urugendo nari nteganyije cyangwa imyaka nari nanitse, nkabiha umurongo."

Yunzemo ati "Washoboraga gutera imbuto zitajyanye n’uburebure bw’igihembwe zikaba zakwangirika cyangwa zikicwa n’izuba cyangwa se nanone imvura ikaba nyinshi. Ariko iyo wamenye uko igihembwe kingana ugenda ukurikiza amakuru baguhaye.

Abahinzi basobanuriwe iby’iteganyagihe n’akamaro karyo, basabwe kuzagenda bigisha bagenzi babo, baranabyiyemeza, banemererwa ko aho bazakenera inyunganizi bazayihabwa.

Livingston Byandagara, umuhuzabikorwa w’umushinga wo kuzamurira ubushobozi abahinzi cyane cyane b’ibishyimbo, bongererwa ubushobozi ku kumenya amakuru ajyanye n’ihindagurika ry’ikirere mu muryango CIAT (International Center for Tropical Agriculture), avuga ko mu Rwanda hose hahuguwe abahinzi 100, bitezweho kuzahugura bagenzi babo ku buryo umushinga uzarangira hamaze guhugurwa abantu ibihumbi 100 byibura.

Anavuga ko batekereje guhugura abahinzi ku kwifashisha iteganyagihe mu mirimo yabo, kuko babonaga ko kubera ihindagurika ry’ibihe hari ibihombo bagenda bagwamo bashoboraga kwirinda, bifashishije amakuru yaryo.

Ati "Twabonye ryafasha abahinzi gukurikirana ibikorwa byo mu murima no kudapfusha ubusa igishoro cyabo. Tekereza kuba ufite nk’ibihumbi 10 byawe ushaka gushyira abahinzi mu murima, ukabashyiramo batari bwuzuze umubyizi. Biba byiza kumenya ngo imvura izagwa ejo, ukareba ibikorwa wakora bijyanye."

Akomeza agira ati "Mu gihe cy’isarura ho biba ibindi kuko umusaruro wacu utakara. Ugasanga ibishyimbo birimo biramera cyangwa bikangirikira mu bubiko bitewe no kuba amakuru ahari nyamara utazi kuyakoresha."

Mu matsinda, baraganira ku kamaro k’iteganyagihe

Asoza iki gitekerezo agira ati "Imihindagurikire y’ikirere iteje ikibazo. Ibyiza ni uko twakwemera science ikatuyobora kuko Leta yashyize imbaraga nyinshi mu iteganyagihe."

Naho ku bijyanye n’aho abantu bashobora gusanga amakuru y’iteganyagihe, avuga ko ikigo kirishinzwe mu Rwanda kiyanyuza kuri radio no kuri televiziyo y’u Rwanda, ku mbuga za Whatsapp, mu butumwa bugufi n’ahandi.

Kugeza ubu kandi ngo ukeneye ibisobaburo byihariye ahamagara ku murongo utishyurwa 6080, akabihabwa.

Ni igitekerezo cyagizwe n’ababafasha mu rugendo bagirira mu Rwanda, mu rwego rwo kugira ngo bajye batahana isura y’u Rwanda muri rusange, nk’uko bivugwa na Jean Paul Kayihura ukora mu muryango uhuza za Radio Maria ku isi, akaba anashinzwe kumenyekanisha Kibeho binyuze muri za Radio Maria.

Ubwo yari kumwe n’Abadage 40 bitabiriye urugendo nyobokamana i Kibeho, akanabajyana gusura uruganda rw’icyayi rwa Kibeho tariki 13 Gashyantare, yavuze ko ubundi abo bazanaga bamaraga iminsi ibiri i Kigali, aho basuraga n’urwibutso rwa Jenoside rwa Gisozi, hanyuma bagasura Bazirika ya Kabgayi, Ingoro y’Umurage w’u Rwanda ndetse na Parike ya Nyungwe.

Yagize ati "Iyo batashye ni bo bashishikariza n’abandi kuza. Ubu twongereyemo gusura ibyiza biri mu Karere ka Nyaruguru, ari yo mpamvu basuye uruganda rw’icyayi rwa Kibeho. Ni mu rwego rwo kugira ngo igihe basuye Kibeho banasure ibyiza bitatse u Rwanda."

Mu Badage baje mu rugendo nyobokamana i Kibeho, harimo Diyakoni Michael Wielath ukora kuri Radio Horeb ari yo Radio Maria yo mu gihugu cyabo, ukunze gushishikariza abakristu baho kuza i Kibeho, akanabaherekeza.

Avuga ko azana Abadage mu rugendo nyobokamana kabiri mu mwaka, mu kwezi kwa kabiri no mu kwa 11, kandi ko yabyiyemeje nyuma yo gusura Kibeho mu myaka itandatu ishize.

Ati "Naje i Kibeho bwa mbere ari tariki 28 Ugushyingo 2018. Bikira Mariya yahinduye ubuzima bwanjye, kuva icyo gihe numvise ko ngomba kuzajya nzana n’abandi."

Yunzemo ati "Iyo uri hano wumva Bikira Mariya agihari nko mu gihe cy’amabonekerwa, ukumva ko agukunda, hanyuma urukundo rwe rukaguhindura. Mu butumwa bwa Kibeho, turi indabyo, muri zo hakaba hari izitoshye n’izumye zikeneye kuhirwa. Iyo ndi hano mba numva ndi indabyo nziza."

Mugenzi we wari uje bwa mbere na we ati "Kibeho nayumvise kuri Radio Maria y’iwacu, ngira amatsiko yo kuhaza. Nakunze ukuntu Abanyarwanda bakira neza abashyitsi."

Gusura uruganda rw’icyayi na byo byabashimishije kuko babashije kwibonera uko icyayi bajya banywa kiva mu murima, kigasohoka mu ruganda babasha kukinywa.

Amakuru dukesha https://www.boisson-sans-alcool.com avuga ko Abadage banywa icyayi cyane, igihugu cyabo kikaba icya gatatu mu kunywa cyinshi ugereranyije n’ibindi bihugu bigize umuryango w’Ubumwe bw’ibihugu by’u Burayi.

Avoka zabaye imari ishyushye

Ubundi, ahitwaga muri Perefegitura ya Butare ni ho avoka zabanje guhingwa mu Rwanda. Ubu ni mu Turere twa Huye na Gisagara, ndetse n’igice gitoya cya Nyaruguru n’icya Nyanza.

Abahatuye bakuze bavuga ko zatangiye guhingwa mu gihe cy’abakoloni, zikaba zarakwirakwijwe ahanini n’abari abasisita agoronome (assistant agronome) ndetse n’abo bitaga ba moniteragiri (Moniteur agricole).

Joseph Ntirikindura utuye ahitwa mu Gatoki i Save mu Karere ka Gisagara, akaba yaravutse mu 1939, avuga ko abaturage bashishikarizwa kuzihinga yari ingimbi, muri za 1950.

Agira ati “Avoka zaturutse mu Bafurere b’Urukundo (Frères de la Charité) bakoreraga muri GSOB. Icyo gihe abaturanyi babakoreraga twabonaga bagenda bazizana bakazitera, nyuma yaho haza gukorwa pepiniyeri, bagashishikariza abantu kuzihinga.”

Ku kibazo cyo kumenya niba abantu barahise bazikunda, Ntirikindura avuga ko byasabye igihe kuko hari n’ababonaga aho zeze bakavuga ko bo “batarya intobo.”

Edouard Senyange utuye mu Murenge wa Ngoma mu Karere ka Nyaruguru, akaba mu kigero cy’imyaka nk’icya Ntirikindura, na we avuga ko abantu batangiye gutera avoka cyane mu gace k’iwabo muri za 1950. Icyo gihe abantu ngo bazikuraga ahitwa mu Rwabisemanyi, hazwi kuba ibyuzi byinshi by’amafi.

Yunganirwa n’umusaza Karawudiyani Nyagatare utuye i Nyaruteja mu Murenge wa Nyanza mu Karere ka Gisagara, ubu ufite imyaka 101. We avuga ko avoka iwabo zahakwirakwijwe na ba moniteragiri mu myaka ya za 1947.

Icyo gihe abantu ngo bashishikarizwaga kuzitera babwirwa ko ari imbuto nziza, ziryoshye kandi ko hari igihe zizabazanira amafaranga.

Avoka ubu zicuruzwa mu mahanga

Ku bijyanye no kumenya niba abantu barahise bazitabira, avuga ko hari ababanje kurya izari zaratewe n’umumoniteragiri bari baturanye, bakumva ziryoshye bagatangira na bo kuzihinga. Icyakora, hari n’abatarahise babyitabira, nk’uko bivugwa n’umusaza Yoronimu wo mu Kigero cye kandi batuye mu gace kamwe.

Agira ati “Ubwa mbere tuzirya twumvaga ari ibintu by’ibivuta, bitaryoshye, ariko uko iminsi yagiye yicuma abantu bagiye bazikunda, batangira no kuzihinga. Byari binoroshye kubera ko bateraga ibibuto by’izariwe.”

Mu myaka ya za 1980, abantu bari basigaye bazifite ari nyinshi, banakunze kuzirya, ku buryo zagize umumaro ukomeye ubwo muri Butare higeze gutera indwara mu butaka yatumaga bahinga ibishyimbo ntibyere, kuko byakukaga bikuma.

Uwitwa Margarita Nyiraminani w’i Ngoma muri Nyaruguru ati “Icyo gihe ntitwari tugihinga ibishyimbo, ahubwo Soya. Umubyeyi wabaga afite avoka ntiyagiraga ikibazo cyo kugaburira abana kuko yabatekeraga ibijumba bakarisha avoka, bakamererwa neza.”

Anatekereza ko ari ho havuye imvugo yo kuvuga ko Abanyabutare batunzwe na avoka. Icyo gihe kandi muri rusange avoka ntizagurishwaga.

Ati “N’abatangiye kuzigurisha wasangaga imwe bayigurisha ifaranga rimwe, cyangwa amafaranga abiri. Ni uko byari byifashe kugeza mbere ya Jenoside.”

Avoka yabaye igihingwa gitanga amafaranga

Nyuma ya Jenoside yakorewe Abatutsi mu 1994, avoka zatangiye kujya zigurishwa. Abashakashati b’ikigo ISAR (ubu cyitwa RAB) bigishije abaturage kuzibangurira bituma zera vuba. Kuri ubu iz’imbangurirano zo mu bwoko bwa Hass na Fuerte zisigaye zijya no ku masoko mpuzamahanga.

Avoka ku mafunguro zirakunzwe

Binakubitiyeho ko abazikunda biyongereye, ubu avoka isigaye ihenda ku buryo usanga mu mijyi avoka imwe, ntoya, igura amafaranga ijana (100), cyangwa ijana na mirongo itanu (150). Hadutse n’ubwoko bwa avoka nini usanga mu biturage imwe igura amafaranga magana atatu (300). Izo iyo zigeze mu mujyi usanga imwe bayigurisha amafaranga magana atanu (500). Mu nzu zigezweho zigurisha ibiribwa (alimentations), hari n’aho usanga avoka imwe igura amafaranga igihumbi (1000).

Abakusanya avoka zicuruzwa hanze y’u Rwanda, bavuga ko hirya no hino mu gihugu hagenda haboneka abiyemeje guzihinga kinyamwuga, usanga zibaha n’amafaranga menshi, kuko izo mu bwoko bwa Hass zikunze kujyanwa hanze y’u Rwanda ku bw’uko zishya bitinze ntizinangirike cyane, usanga imwe bayibagurira hagati y’amafaranga 80 -100.

Abazihinga bongeraho ko habonetse na kampani y’Abanyamerika yo yigerera ku bahinzi, itanyuze ku bazikusanya, igatanga amafaranga 1000 ku kilo. Ikilo kandi ngo kiba kigizwe na avoka hagati y’eshanu n’esheshatu.

Ikindi kivugwa n’abakusanya avoka zicuruzwa hanze y’u Rwanda, ni uko ngo n’ubwo mu Majyaruguru y’u Rwanda ari ho hashobora kuboneka avoka igihe cyose bitewe n’uko ho hatava izuba rikabije, bityo avoka zaho zikaba zihora zirabya, kugeza ubu mu Ntara y’Amajyepfo, cyane cyane kandi mu Turere twa Huye na Gisagara, ni ho bakura avoka nyinshi.

Uko imyaka igenda yicuma, avoka zicuruzwa hanze y’u Rwanda zigenda ziyongera, ari na ko zinjiriza u Rwanda amafaranga menshi.

Mu Kigo cy’Igihugu gishinzwe guteza imbere iyoherezwa mu mahanga ry’ibikomoka ku buhinzi n’Ubworozi (NAEB), bavuga ko mu mwaka w’ngengo y’imari y’imari 2019-2020 u Rwanda rwacuruje hanze yarwo ibiro 840,672 bya avoka, byavuyemo Amadolari y’Amerika 840,570, muri 2020-2021 hacuruzwa ibiro 763,751 byavuyemo Amadolari 1,583,771, muri 2021-2022 hacuruzwa ibiro 2,765,340 byavuyemo Amadolari 4,533,801.

Muri 2022-2023 hacurujwe ibiro 3,210,526 byavuyemo Amadolari 6,342,472 naho muri 2023-2024 hacuruzwa ibiro 4,518,229 ku Madolari 8,377,083.

Igitikimwe cyera imbuto nyinshi

Ni ukuvuga ko mu gihe cy’imyaka itanu u Rwanda rwacuruje ibiro 12,098,519 bya avoka, byatanze Amadolari 21,677,696 angana n’Amafaranga y’u Rwanda asaga Miliyari 30 (30,091,661,534).

Ibigori byahinganywe n’imivumburankwavu

Muri ubu bushakashatsi bwakozwe mu gihe cy’imyaka itatu, byagaragaye ko imivumburankwavu inukira nkongwa hanyuma zigahungira muri rwa rubingo cyangwa ivubwe, nuko zikagumamo, zikazapfiramo.

Mu gutera, umurongo umwe bawuteraho ibigori undi bakawuteraho imivumburankwavu, gutyo gutyo.

Dr Athanase Hategekimana, umuyobozi wa porogaramu ishinzwe kurwanya indwara n’ibyonnyi mu bihingwa muri RAB, avuga ko ubu bushakashatsi biyemeje kubukora nyuma y’uko guhera muri 2017 nkongwa yaje nk’icyorezo cyibasira ibigori.

Agira ati "Mu kurwanya nkongwa hifashishwaga imiti, tuza gutekereza ko ari ngombwa gushaka uburyo burambye cyangwa bushobora kugerwaho na buri muhinzi, bitamugoye. Ni muri ubwo buryo hatekerejwe kuri buriya buryo bwitwa Push and Pull, abahinzi bamaze kubumenya bita Hoshi Ngwino."

Ngo babwita Hoshi Ngwino kubera ko umuvumburankwavu wirukana nkongwa (Hoshi-Push) urubingo rukayakira (Ngwino-pull).

Abahinzi bumvise iby’ubu bushakashatsi barabwishimiye, kuko babubonyemo ibisubizo byinshi mu bijyanye n’umwuga bakora w’ubuhinzi.

Viviane Mukampore utuye mu Murenge wa Tumba mu Karere ka Huye, akibwumva akanitegereza uko bukorwa yagize ati "Nkongwa ku bigori irahangayikishije cyane kubera ko ituma umusaruro utuba. Urabona ibitangira bikiri bitoya, nyamara ibigori ni igihingwa tuba twizeye ko kizadutunga, kuko kirahunikika."

Yunzemo ati "Umuvumburankwavu ubusanzwe ni ibiryo by’amatungo, n’aho watewe utwikira ubutaka bikaburinda kuma. Kwa kundi dutera imiti ugasanga n’udukoko two mu butaka nk’iminyorogoto twapfuye, ibi biduha ubusugire tukagira umutekano. Kandi no kugura umuti bidutwara amafaranga, rimwe na rimwe wamara kuwushyiramo imvura ikagwa bikazaba ngombwa ko ushyiramo undi, ari na ko uba utwangiza mu bihaha."

Athanase Harerimana uyobora Ihuriro ry’amakoperative yo muri Gikongoro (Unicoopagi) avuga ko mu rwego rwo guteza imbere ubuhinzi butangiza ibidukikije bari basanzwe bigisha abahinzi guhinga imboga bazivanze n’ibitunguru.

Ati "Twigishaga abahinzi ko mu karima k’igikoni uvanga imboga n’ibitunguru kuko umuhumuro w’ibitunguru wirukana udukoko. Iby’imivumburankwavu ntitwari dusanzwe tubizi, ariko nabonye bifite akamaro. Tuzabyigisha abahinzi bacu."

Dr Hategekimana avuga ko uretse imivumburankwavu, hari n’icyatsi bita Coltararia mu bindi bihugu barya nk’imboga, basanze gishobora gusimbura imivumburankwavu.

Iyo wifashishije izo mboga ngo si ngombwa gukikirisha umurima urubingo, n’ubwo na byo ari byiza kuko rwifashishwa mu kugaburira amatungo.

imivumburankwavu ihinganye n’ibigore

Ziriya mboga ubwazo zikurura udusimba nk’ibivumvuri, amavubi ...bita inshuti z’abahinzi kuko tuzikuramo ibyo kurya, bityo twahagera tukajya no mu bigori, hanyuma tukarya na nkongwa.

Naho ku bijyanye no gukwirakwiza buriya bumenyi, ngo bamaze gukora imirimashuri mu Turere 10 harimo Nyanza, Nyagatare na Gatsibo. Ubu bari gukorera mu Bugesera n’i Musanze.

Imbuto y’imivumburankwavu na yo ngo bagenda bayishyikiriza abatubuzi bayo, uretse ko ngo biriya byatsi binaboneka mu bihuru no mu mashyamba amwe n’amwe mu biturage. Kandi mu gutera ngo umuntu ashobora gutera utubuto cyangwa ingeri nk’uko abantu batera imigozi y’ibijumba.

Dr. Hategekimana anavuga ko n’ubwo buriya buryo babonye burinda nkongwa ku rugero rwa 80% bidakwiye guca intege abahinzi kuko n’imiti basanzwe bakoresha itayirwanya 100%. Ubundi umuti ngo wemerwa iyo bigaragaye ko wagira umumaro guhera ku rugero rwa 50%.

Abapadiri bo muri Diyoseze ya Butare bitabiriye kwizihiza yubile

Musenyeri Filipo Rukamba wahoze ari umushumba wa Diyoseze Gatolika ya Butare, ubu akaba ari mu kiruhuko cy’izabukuru, yavuze ko abamisiyoneri baza mu Rwanda bashatse kubaka kiliziya ya mbere ahitwa i Mara haherereye mu Murenge wa Ruhashya mu Karere ka Huye, hanyuma bakahareka, bagahitamo kuza ku gasozi ka Save kari gatuwe cyane.

Ngo kari n’agasozi kariho ubutaka bwiza, n’ikimenyimenyi hari insina nziza.

Ati "Icyo gihe bahaguze amarupiya atanu, kandi n’ahandi hantu hose Kiliziya yagiye yubaka yabaga yahaguze."

Kiliziya icyo gihe yashinzwe na Padiri Alphonse Brard, Abanyarwanda bise Terebura, ari kumwe na Padiri Paul Barthélemie ndetse na Frère Anselme.

Padiri Brard cyangwa se Terebura, ni na we abantu bahereyeho bita Abaterebura abo yigishije akanabatiza aba mbere ari ku wa Gatandatu mutagatifu, tariki 12/4/1903. Bari 26, harimo abahungu 22 n’abakobwa bane. Umukuru muri bo yari afite imyaka 17.

Kuri ubu Kiliziya yishimira imyaka 125 itangijwe mu Rwanda, ahabarurwa abakirisitu 4,539,628 basengera mu maparuwasi 246. Hari abapadiri 1175, ababikira 2288 n’abandi biyeguriye Imana 456.

Kiliziya ya mbere y’i Save

Abamisiyoneri bashinze Kiliziya, ariko bashinga n’amashuri ndetse n’amavuriro. Mu Rwanda Kiliziya gatolika imaze gushinga amashuri 3934, amavuriro n’inzu zakira abashaje n’abatishoboye 334 n’ibitaro icyenda.

Barifuza ko i Save hashyirwa ikimenyetso cy’uko ubukirisitu bwahatangiriye

Padiri mukuru wa Paruwasi ya Save, Médard Kyebambe, yagize ati "Dukora ingendo nyobokamana zitandukanye. Mu Ruhango, i Kibeho, za Kabuga. Hari ndetse n’ahandi Abakirisitu bacu bajya hatemewe na Kiliziya. Turifuza ko abadukuriye badufasha guhesha agaciro aha hantu. Si Save nka Paruwasi, ahubwo nk’ahantu dukesha ivanjiri bwa mbere mu Rwanda, bityo na ho hakazajya hasurwa."

Domitilla Uwamariya wavuze mu mwanya w’abakirisitu b’i Save yagize ati "I Save dufite ibimenyetso bifatika by’intangiriro y’ubukirisitu mu Rwanda. Turabibungabunga kugira ngo bitazononekara. Kimwe na Padiri mukuru, turifuza ko byamenyekana, bikadukururira ubukerarugendo butagatifu."

Yunzemo ati "Muri byo harimo Kiliziya ya mbere yubatswe i Save. Yarasenyutse, ariko uruhanga rwayo rwasigaye rwahinduwe Chapelle. Ku mutwe wayo hari ishusho y’umutima mutagatifu wa Yezu iyi paruwasi yatuwe. Hari ishusho ya Bikira Mariya twasigiwe n’abo bamisiyoneri, n’ishusho ya Mutagatifu Fransisko Saveri, umumisiyoneri mukuru. Dufite inanga bacurangiragaho mu gitambo cya Misa, iriba rya Batisimu abavutse mbere ya 1960 babatirijwemo, n’irimbi ry’Abaterebura, ni ukuvuga abantu bumvise ijambo ry’Imana, rikabakora ku mutima, bakavamo abaryigisha, bakubaka ingo za gikristu, bakabyara abiyeguriye Imana,..."

Antoine Cardinal Kambanda yasabye ko hakomeza gushingwa amaparuwasi afasha abakirisitu

Narcisse Nsengimana utuye i Save na we yagize ati "Nkurikije ko i Save ari ho ubukirisitu gatolika bwinjiriye mu Rwanda, akaba ari ho hatangiriye kwamamaza ivanjiri mu Rwanda, hakwiye kubakwa inzu ndangamurage y’iyobokamana, bityo abajya gusura Kibeho bakazajya babanza kuhanyura, kuko ari ho hadukinguriye amarembo atuganisha ku Mana."

Ibi byanashimangiwe n’umuyobozi w’Akarere ka Gisagara, Jérôme Rutaburingoga, agira ati "Save koko ntikwiye kuba Paruwasi nk’izindi zisanzwe. Twiteguye gufatanya kugira ngo bizagerweho, Save na yo ijye isurwa na ba mukerarugendo."

Yunzemo ati "Kiliziya ya mbere twemeye umuganda wo kuzayubaka, muzaduhe umwanya dufatanye. Ntibikwiye kuba ibya Gisagara cyangwa ibya Kiliziya gusa kandi, bikwiye kuba iby’u Rwanda kuko kuba kwamamaza ijambo ry’Imana byaratangiriye hano, ntibikwiye gufatwa nk’ibisanzwe. Abagiye i Kibeho, abajya i Yeruzaremu, bakwiye guhera hano i Save."

Musenyeri Jean Bosco Ntagungira, umushumba wa Diyoseze Gatolika ya Butare Paruwasi ya Save iherereyemo, yavuze ko umushinga wo gutuma Save nk’ahahereye ubukirisitu mu Rwanda hagendwa, bari kuwuganiraho n’inzego z’ubuyobozi bwa Leta.

Yagize ati "Twabiganiriyeho, tuvugana ku mushinga w’inzu ndangamurage y’iyogezabutumwa (musée missionnaire), aho twazakusanyiriza ibikoresho bya kera, hakaba n’ibindi twagaragaza mu buryo bw’ikoranabuhanga kugira ngo abaza bose bazajye bahakura imbaraga za roho, n’ishyaka ryo kogeza inkuru nziza kure yacu".

Antoine Cardinal Kambanda, Arikiyepiskopi wa Diyoseze Gatolika ya Kigali, yaboneyeho gusaba abakirisitu kurushaho gukorera Imana bazirikana ku bamisiyoneri batangije ubukristu mu Rwanda, bagenze ibilometero 7,000 mu nyanja no mu migezi aho bahuye n’imihengeri, ku butaka bagenze n’amaguru bahura n’inyamanswa z’inkazi n’abashakaga kubambura, bararwara, bamwe bagwa no mu nzira.

Kiliziya kandi ifite n’ibindi bikorwa harimo ibya Caritas byo gufasha abakene, ndetse n’ibijyanye n’ubutabera n’amahoro.

Hahoze ari muri kiliziya ya mbere y’i Save, mu gice cy’imbere

Iriba rya batisimu rya kera

Iyi shusho ya François Xavier, umumisiyoneri mukuru, yazanywe n’abamisiyoneri, i Save

Aha harimo inanga yifashishwaga kera bacuranga mu kiliziya

I Save ni ho hatangirijwe ubukristu mu Rwanda

VIDEO - I Save muri Gisagara bahetse abana mu bwato, berekana uko Abamisiyoneri bazaniye Abanyarwanda ijambo ry'Imana bakoresheje ubwato, hanyuma bakagenda n'amaguru. Icyakora hari n’abagendaga ku ndogobe.

Tariki ya 8/2/1900 nibwo hubatswe Kiliziya ya mbere mu Rwanda, mu isambu… pic.twitter.com/TOFpDDXbH1

— Kigali Today (@kigalitoday) February 9, 2025

Aba bafatiwe mu bujura bw’inka

Nk’uko bivugwa n’umuvugizi wa Polisi mu Ntara y’Amajyepfo, SP Emmanuel Habiyaremye, igikorwa cyo gushaka no gufata abakekwaho ubujura bw’inka n’andi matungo, cyabereye mu Tugari dutandukanye two mu Murenge wa Cyahinda, hafatwa abagabo batandatu n’undi umwe uvugwa mu bujura bwo kwiba abantu abategeye mu nzira. Aba ubu bafungiye kuri sitasiyo ya polisi ya Nyagisozi.

Mu Murenge wa Nyabimata mu Tugari twa Ruhinga, Gihemvu na Kabere ho hafashwe abagabo barindwi bakekwaho guteza umutekano muke muri rusange, no gukora inzoga zizwi nk’ibikwangari, na zo ziri mu mpamvu zongera ibyaha. Bafungiye kuri sitasiyo ya polisi ya Muganza.

Umuvugizi wa Polisi mu Ntara y’Amajyepfo arasaba abakora ibyaha bihungabanya umutekano wa bagenzi babo kwisubiraho, kuko ngo “Nta watekereza guhungabanya umutekano ngo bimuhire”.

Barindwi bafatanywe ibikwangari

Akomeza avuga ko ibikorwa bifata abahungabanya umutekano babikomeje, akanasaba abaturage gukomeza gutanga amakuru kandi ku gihe, mu rwego rwo gukumira ibyaha.

Dr Albert Tuyishime ushinzwe ishami ryo gukumira no kurwanya indwara muri RBC agira ati “Twari tumaze iminsi twarayihashyije, ariko nko mu mezi abiri atatu ashize byari bitangiye kugaragara ko imibare y’abayirwaye yatangiye kwiyongera. Mu Turere 15 turi imbere mu kugira malariya nyinshi muri ino minsi kandi Gasabo irimo, Kicukiro irimo, na Nyarugenge irimo.”

Ibi rero ngo bigaragaza ko malariya itari mu byaro cyangwa mu bakene gusa, ahubwo no mu bo bita abasirimu.

Ati “Ikindi cyagaragaye malariya ntitoranya ngo uyu ni umusirimu cyangwa si umusirimu, ahubwo bikunze kugaragara ko abo wakwita nk’abasirimu ari bo bakunze kudashyira mu bikorwa ingamba zo kwirinda, urugero nko gukoresha inzitiramibu. Akenshi usanga abaturage bo mu cyaro bo babyubahiriza cyane.”

Ibi ngo biri no mu mpamvu ku wa gatanu no kuwa gatandatu tariki ya 25 Mutarama 2025, mu mikino ya nyuma y’umupira w’amaboko n’uw’amaguru ihuza amakipe y’abakozi bo mu bigo bya Leta n’ibyigenga yabereye i Huye, hatanzwe ubutumwa bushishikariza abantu kwita ku ngamba zo kurwanya malariya.

Icyo gihe Dr Tuyishime yagize ati “Ni yo mpamvu twavuze tuti reka dufate umwanya abantu bateranye, ari abakina, ari abaje gushyigikira amakipe, twongere dutange ubutumwa ko malariya igihari kandi ko kwirinda tugomba gukomeza kubikora.”

Ingamba zo kurwanya malariya kandi si izindi uretse gukuraho ibihuru, gusiba ibizenga by’amazi imibu ishobora kororokeramo, kurara mu nzitiramibu ndetse no kwivuza hakiri kare kandi kuri buri wese.

Ati “Wivuje hakiri kare, uretse wowe ubwawe ukira vuba, uba unagabanyije no kuyihererekanya byatuma n’abandi bayandura.”

Naho ku bijyanye n’imikino yahuje abakozi bo mu bigo bya Leta n’ibyigenga, ni ubwa mbere yabereye hanze y’umujyi wa Kigali, mu rwego rwo gushishikariza n’abakozi bo mu bigo bindi bitari iby’i Kigali gukunda siporo.

Dr Tuyishime yagize ati “Umukozi ku giti cye wakoze siporo agira ubuzima bwiza, n’umusaruro uriyongera. Kandi iyo siporo bayikoreye hamwe, byongera gukorera hamwe nk’abakozi, umusaruro ukiyongera.”

Yakomeje agira ati “Dushishikariza abantu gukora siporo kubera ko ituma umuntu agira ubuzima bwiza. Ikindi irwanya indwara zitandura harimo umuvuduko w’amaraso n’indwara y’isukari (diabetes). Ubushakashatsi bwanagaragaje ko ishobora no gufasha umuntu kwirinda indwara nka za kanseri.”

Thierry Mpamo, Perezida w’ihuriro ry’imikino y’abakozi mu Rwanda, avuga ko imikino ihuza ibigo byo mu Rwanda yatangiye mu mwaka w’1999 yitwa ascooki (Association des sportifs coorporatifs de Kigali), igamije guteza imbere imikino mu mujyi wa Kigali. Yaje guhinduka muri 2014 ishyirahamwe nyarwanda riteza imbere imikino mu bakozi, ARPST (Association Rwandaise pour la Promotion du Sport dans le milieu du Travail).

Amarushanwa yashyizwe muri uyu mwaka wa 2025 yitabiriwe n’ibigo 46 harimo n’ibyo hanze ya Kigali nka CHUB, IPRC Ngoma, ...

Spéciose Mukamugema, w’i Simbi mu Karere ka Huye, avuga ko aho yatangiye imbabazi ku bamwiciye abe asigaye yumva acyeye, afite n’umuryango, kandi uwo muryango avuga afite ni uw’abo yababariye.

Uyu mubyeyi utuye mu Kagari ka Kabusanza mu Mudugudu wa Muranda, avuga ko Jenoside yakorewe Abatutsi mu mwaka w’1994 yamusize wenyine, akabaho mu buzima bubi kuko yumvaga ari nyakamwe.

Agira ati “Nasigaye ndi umwe iwacu. Kwakira abaturanyi ntibyankundiraga, ngumya kwiyumvamo ko ndi njyenyine. Ndi umwe imbamo, iranzonga, ndananuka, mpfuka umusatsi nkawirizamo intoki, nshimashimamo, imisatsi yarizingazinze.”

Iyo yajyaga mu bantu ngo yabaga areba ku mazuru yabo. Ati “Nkareba ufite izuru rirerire nkibaza impamvu we batamwishe. Nkareba undi nti ese uriya we ko mbona dusa, njyewe bamporeye iki abanjye? Iyo nzigo n’inzika bimbamo. Nabikuwemo n’inyigisho nahawe na paruwasi ku bumwe n’ubwiyunge.”

Mbere yo gucengerwa n’inyigisho z’ubumwe n’ubwiyunge n’ubudaheranwa ariko, umwe mu bamwiciye abe wafunguwe nyuma yo kurangiza igihano ngo yagiye kumusaba imbabazi, amwirukankana n’umuhini ashaka kuwumukubita, ariko aramucika.

Ati “Yaje kundeba, numva ari nko guca umugani, kuko numvaga gutanga imbabazi ku maraso bitashoboka. Nyuma yo gutanga imbabazi ariko naribajije nti ese buriya iyo mushyikira sinari gukora nk’ibyo yakoze? Narabyicujije.”

Kuri ubu Mukamugema ni umufashamyumvire mu isanamitima, ubumwe, ubwiyunge n’ubudaheranwa. Nta mutima wo kwihorera agifite, ahubwo uwo kwegera abakoze Jenoside akabashishikariza gusaba imbabazi abo bahemukiye ndetse n’abarokotse Jenoside akabashishikariza gutanga imbabazi kuko yasanze biruhura.

Ku bijyanye n’uko kubabarira biruhura, yitanzeho urugero tariki ya 26 Mutarama 2025, ubwo yatangaga imbabazi ku bantu barindwi bamwiciye abe mu gihe cya Jenoside yakorewe Abatutsi mu mwaka w’1994.

Hari mu gikorwa cyo gusoza urugendo rw’Isanamitima, Ubumwe, Ubwiyunge n’Ubudaheranwa ku nshuro ya gatanu muri Paruwasi ya Rugango iherereye mu Murenge wa Mbazi mu Karere ka Huye. Ni igikorwa cyagezweho ku bufatanye bwa Komisiyo y’Ubutabera n’Amahoro ya Diyoseze Gatolika ya Butare na Minibumwe.

Yagize ati “Ubu ndacyeye, maze kugira umuryango. Ndacyeye! Mu gikorwa nk’ikingiki ubushize nasohokanye n’abagabo umunani nababariye, uyu munsi nababariye barindwi. Noneho fata abo bagabo bose hamwe n’abagore babo ndetse n’abuzukuru babo. Urumva atari umuryango se?”
Innocent Bagirase ni umwe mu bagize umuryango mushya wa Mukamugema nyuma y’uko yakatiwe igifungo cy’imyaka 29 agafungwa 14 akanakora TIG.

Yivugira ko ajya gutangira kwitabira inyigisho zatumye abasha gusaba imbabazi akesha kuba ubu yumva yararuhutse mu mutima yabishishikarijwe na Mukamugema, nyamara yaramuhemukiye.

Kubasha gutangira urugendo rwo gusaba imbabazi ariko ntibyamworoheye kuko hari abamucaga intege bamubwira ko gusaba imbabazi bisaba kuvugisha ukuri imbere y’abo yahemukiye, bakanamubwira ko atarebye neza byamuviramo gufungwa. Icyakora we ngo ntiyacitse intege kubera ko na mbere hose yari yireze akemera icyaha.

Nyuma yo kwakira imbabazi za Mukamugema, imbere y’ikoraniro ry’abakirisitu yagize ati “Nari narapfuye, none nazutse. Nazukiye muri Kristu.”

Ku bijyanye n’uruhare rwe muri Jenoside, Bagirase yivugira ko ku bwe nta muhoro yafashe ngo yice, ariko na none ngo kuba yari mu bitero byo kwica bituma yumva na we yarishe kuko iyo ataza kuhaba atari gutiza umurindi abicanyi.

Ati “Buri gitero cyose nabaga nkirimo. Urumva ko n’uwari kwirukanka nari kumutanga.”

Abapfukamye ni abasabye imbabazi ababafashe ku ntugu ni ababababariye

Yabibwiye abitabiriye gusoza inyigisho z’urugendo rw’isanamitima muri Paruwasi ya Rango iherereye mu Murenge wa Mukura mu Karere ka Huye.

Ni inyigisho z’igihe cy’amezi atandatu bahawe na Komisiyo y’ubutabera n’amahoro ya Diyoseze gatolika ya Butare ku bufatanye na Minubumwe, naho gusoza inyigisho z’urugendo byo byabereye mu misa yayobowe n’umushumba wa Diyoseze Gatolika ya Butare, Musenyeri Jean Bosco Ntagungira, tariki 19 Mutarama 2025.

Mu buhamya bwe, nk’umwe mu barokotse Jenoside 30 (abagore 28 n’abagabo 2) batanze imbabazi ku babiciye ababo 80 (abagabo 42 n’abagore 38), yagaragaje ko kwemera icyaha bigoye ahereye ku bakoze Jenoside azi bagiye babihakana ariko ko no gutanga imbabazi bitoroshye yihereyeho na we ubwe.

Burizihiza atuye mu Murenge wa Mukura. Mu gihe cya Jenoside yabohojwe n’umugabo wari uyoboye abakonseye bose bo muri Komine ya Ngoma. Ngo yamugendanaga hose, haba mu nama ziga ku iyicwa ry’Abatutsi no mu gihe cyo kwica. Aho hose ngo yahamujyanaga amubwira ko ashaka ko yibonera ko “Abahutu ari abagabo”.

Ku bijyanye n’impfu z’abe bishwe areba, agira ati “Impfu mbi cyane ni zo banyerekaga. Umwana wanjye bamukuruye mu kiziriko nk’imbwa baramunzanira ngo sezera nyoko. Yari afite imyaka 2.5. Bafata mama wacu wari utwite bamusaturamo umwana mu nda barambwira ngo ninze ndebe uko umwana w’Umututsi ateye mu nda.”

Akomeza agira ati “Urupfu rw’umugabo wanjye naruhagaze iruhande. Ntabwo nabashaga kurwivanamo kuko uwagiye kumwica ari na we wari warambohoje yaranshoreye ngo tujyane, ati ngaho reba ko Abahutu tutari abagabo! Akajya ambwira ngo tujye kumusuhuza aho aborogera muri toilette.”

Agahinda yagize katumye nyuma ya Jenoside yaraharaniye ko abakoze Jenoside bose bahanwa, ku buryo yajyaga no mu kiliziya atajyanywe no gusenga, ahubwo kubashakirayo kugira ngo bafatwe, bafungwe.

Ati “Nazaga mu Kiliziya nzanywe no gucunga abo ndi bufungishe. Numvaga nta Mana iri muri njyewe kuko nasangaga abicanye baje guhazwa, njyewe ngasubira inyuma simpazwe. Hari n’igihe padiri yambajije ngo ko ugiye udahagijwe? Ku mutima ndamubwira nti iyaba wari uzi ibyari binzanye!”

Gushakisha abanyabyaha byatumye abantu bamuhiga ngo bamugirire nabi, ku buryo byabaye ngombwa ko acumbikirwa mu kigo cya gisirikare cy’i Tumba. Icyo gihe abana b’abo yafungishije ngo baramubwiraga ngo “Utasema utachoka!” byo kuvuga ko azavuga akagera aho agaceceka.

Ati “Nyuma yo kwigishwa, uyu munsi nahoze.”

Inyigisho avuga zatumye atanga imbabazi abikuye ku mutima ngo yazihawe n’umuryango Abagabuzi b’Amahoro, zamufashije kumva ko imbere y’Imana nta cyaha kiruta ikindi. Naho ubundi ngo n’ubwo mbere yaho hari igihe yagiye avuga ko atanze imbabazi, ntizari zuzuye, zari izo kwikura imbere y’abamushishikariza kuzitanga.

Yanifuje ko abakeneye gusaba no gutanga imbabazi barushaho kwegerwa agira ati “Uyu munsi turi 80, ubutaha tuzabe 200. Abakoze icyaha cya Jenoside si 80. Hari n’abandi benshi. 20 si bo barokotse bagomba kubabarira. Hari n’abandi bakiri mu rugendo, bafite ibikomere nk’ibyo twarimo. Abo tugomba kubegera tukabafasha.”

Narishe, sinumva ukuntu nkiriho-Martin Nyandwi

Martin Nyandwi, umwe mu basabye imbabazi akazihabwa, yavuze ko yishe, ku buryo atumva ukuntu na we atishwe ahubwo akakirwa mu muryango w’Abanyarwanda,nyuma yo kurangiza igifungo cy’imyaka 25, kuri ubu akaba amaze imyaka itandatu afunguwe.

Yivugira ko mu gihe cya Gacaca yemeye icyaha, akavuga uko yakoze Jenoside guhera saa mbiri za mu gitondo kugera saa tatu za nijoro.

Yagize ati “Narishe, ikiganza cyanjye cyakoze amaraso. Ntabwo ari ibitero nagiyemo, si inka nariye, naricanye. Nakoze amaraso y’Abanyarwanda. Ndasaba imbabazi abo niciye ababo n’abakorewe Jenoside muri rusange. ”

Abahawe imbabazi basubiyemo amasezerano ya Batisimu

Yunzemo ati “Kuva nafungurwa numvaga ntashobora guhagarara mu kiliziya, imbere y’abapadiri, imbere ya Musenyeri n’abakristu bangana gutya. Numvaga bitashoboka kubera abantu nishe. None ku bw’imbaraga z’Imana n’izanyu, nabibashije.”

Umuyobozi w’Akarere ka Huye, Ange Sebutege, na we yitabiriye gusoza urugendo rw’isanamitima muri Paruwasi ya Rango. Yavuze ko bamaze igihe bakora Amahuriro y’Ubumwe n’Ubudaheranwa ku Mirenge no ku Tugari, ubu bakaba bageze ku Midugudu, kandi ko yasanze hakenewe ko abantu bakomeza gufashwa.

Yagize ati “Twagiye tubona ahakiri ibibazo bibangamiye urugendo rw’ubumwe. Hari ahakigaragara ubugome. N’ubwo bitari mu Karere kacu, hari aho byagaragaye bagifite umugambi wo kugirira nabi Abarokotse Jenoside, hari n’aho bagiye babambura ubuzima.”

Musenyeri Ntagungira yavuze ko bene ziriya nyigisho bazazikomeza, kandi ko bateganya kujya kuzitanga no mu magereza, kubera ko hari benshi mu bakoze Jenoside bazafungurwa mu minsi iri imbere.

Abahawe imbabazi basubiyemo amasezerano ya Batisimu

Yagize ati “Turimo turakora gahunda yo kugira ngo dutangire tunabasange muri za gereza. Aho kugira ngo baze mu miryango gutyo gusa, tugomba kugira uruhare mu kubategurira abo basanze kugira ngo hatazabaho guhungabana kw’impande zombi. Twabiganiriyeho na Minubumwe batwemerera ko bari gutegura inyandiko zizadufasha gutegura impande zombi.”

Inyigisho z’urugendo rw’isanamitima mu Karere ka Huye zimaze gukorwa mu maparuwase gatolika ane ari yo Rango, Rugango, Simbi na Kiruhura. Icyakora muri Diyoseze ya Butare igizwe n’Uturere twa Huye, Gisagara na Nyanza zimaze gutangwa mu maparuwasi 10.

Bene izi nyigisho zikurikirwa no kurema amatsinda ahuriyemo abagize uruhare muri Jenoside hamwe n’ababahaye imbabazi. Mu Rwanda hose muri rusange, Kiliziya Gatolika imaze gufasha irema ry’amatsinda asaga 350 nk’uko bivugwa na Padiri Valens Niragire, umunyamabanga wa Komisiyo y’ubutabera n’amahoro mu nama y’Abepiskopi gatolika mu Rwanda.

Jérôme Rutaburingoga watorewe kuyobora FPR muri Gisagara

Mu ijambo rye yashimye abongeye kumugirira icyizere, kimwe na bagenzi be bazafatanya mu kuyobora umuryango na bo batowe muri Gisagara, maze ababwira ko bafatanyije, bazakora ibidashobokera abandi, kandi ko bazabigezwaho no kongera umuvuduko ubaganisha mu bukire.

Yagize ati "Turashima abanyamuryango batugiriye icyizere. Amajwi yabo bayaduhaye kugira ngo tubakorere. Tugomba kubakorera rero tukazasoza manda hari aho bageze mu iterambere n’imibereho myiza."

Yakomeje avuga ko hari aho bari bageze mu iterambere, kandi ko bagomba kuhahera noneho bakavuduka bagana ubukire.

Ati "Aho turi ni urugero rw’ibishoboka ko n’ibyisumbuye dushobora kubigeraho. Imibare irahari, ibipimo birahari, hasigaye kuvuduka."

Komite yatowe

Yunzemo ati "Mbere ntitwihutaga kuko twari tumeze nk’abatazi aho bavuye n’aho bari, ariko uyu munsi twamaze gufata inzira cyangwa intambwe ku buryo umuvuduko ushobora koroha kurusha uko byari byifashe mu myaka irindwi ishize. Aho twagenze rero imyaka irindwi ubu noneho dushobora kuhagenda imyaka itatu kubera ko imyumvire, ubushake n’ubufatanye byiyongereye."

Abari mu nteko itora bavuga ko bongeye gutora Rutaburingoga, kuko biteze ko azabafasha kugera ku iterambere.

Uwitwa Emmanuel Ndayishimye yagize ati "Rutaburingoga muri manda irangiye yakoze byinshi. Twiteze ko azatugeza ku byiza kurushaho."

Mu byo Abanyagisagara bashima bagejejweho n’ubuyobozi bafite kuri ubu, harimo gahunda y’Inka kuri buri muryango, yatangijwe iwabo nyuma y’uko ibarura rusange ryo mu mwaka wa 2022 ryagaragaje ko abahinzi bonyine ari 86.4%.

Abantu bose bashishikarizwa kuzorora badategereje gahunda ya Girinka, kugira ngo babashe kubona ifumbire ihagije, bityo bahinge, beze, banasagurire amasoko, hanyuma babashe kugera no ku iterambere.

Iyi gahunda igamije rero gufasha abatuye i Gisagara kugera ku bukire "Guhera ku nka bakabasha kwigurira amagare, hanyuma za moto, imodoka,..." nk’uko bihora bivugwa na Jérôme Rutaburingoga, ashingiye ku ntego bihaye kugenderaho ivuga ko Akarere kabo ari "Urugero rw’ibishoboka".

Babigaragarije ubuyobozi bwa BDF (Ikigega gishinzwe guteza imbere imishinga mito n’iciriritse) mu nama nyunguranabitekerezo bagiriye i Huye kuri uyu wa 17 Mutarama 2025, bagamije kuganira nk’abafatanyabikorwa mu guteza imbere umuturage.

Muri ibi biganiro, BDF yagaragaje ko muri gahunda yo kuzahura ubukungu nyuma y’icyorezo cy’indwara ya Coronavirus, biteguye ko mu kwezi gutaha kwa Gashyantare bazatanga miriyari eshanu azanyuzwa mu bigo by’imari, abayagurijwe bakazayishyura ku nyungu y’8%.

Aya mafaranga azaba atanzwe ku nshuro ya gatatu kuko ku ikubitiro batanze miriyari esheshatu, hanyuma ubwa kabiri bagatanga umunani.

Aha ni na ho abacungamutungo b’Imirenge Sacco yo mu Ntara y’Amajyepfo bahereye bavuga ko ariya mafaranga ari makeya cyane ugereranyije n’ingano y’abayasaba.

Fiacre Ngabonziza, umucungamutungo wa Isange Ngoma Sacco yo mu Karere ka Huye yagize ati "ubuheruka twari dufite miriyari umunani. Twihutiye gusabira inguzanyo abanyamuryango bacu ariko hari dosiye nyinshi zasigaye. Dufite impungenge z’uko aya mafaranga yaba ari makeya bigendanye n’ubusabe twiteguye kuba twakwakira."

Umuyobozi wa Sacco(i Buryo) yakira igihembo aherejwe n’umuyobozi wa BDF Vincent Munyeshyaka

Ibi byashimangiwe na Donatha Uwiragiye ucunga umutungo wa Sacco Tuzamurane Mukingo yo mu Karere ka Nyanza wagize ati " ariya mafaranga ni makeya ugereranyije n’abayakeneye. Nk’ubushize mu Karere ka Nyanza bahaye Sacco ebyiri gusa, kuri Sacco 10 zo mu Karere, kandi n’abo twari twayasabiye bose ntabwo ari ko bayabonye."

Yunzemo ati "Bivuze ngo ni ukuyatanguranwa. Abashyizemo mbere ni bo bayabona, agahita ashira. Ku nshuro ya gatatu na ho twumvise ko bazahera ku bari basanzwe barasabye. Hazatangwa miriyari 5 nyamara bafite ubusabe bwa miriyari 10 zitegereje. Ibi bica intege."

Dorothée Mukarutamu ucunga umutungo wa Sacco yo mu Murenge wa Nyabinoni mu Karere ka Muhanga na we ati "Abasabye ubwa mbere ntabwo babashije kuyabona bose, no ku bwa kabiri hasabye benshi, ahabwa 5% gusa. Ni bakeya cyane. N’ubu nta cyizere cyo kuzayabona."

Hassan Habimana, umuhuzabikorwa w’imishinga nzahurabukungu muri BDF, avuga ko kuri iyi nshuro hari miriyari 30 zagenewe gahunda yo kuzahura ubukungu zizanyuzwa na BDF mu bigo by’imari, ariko ko ku ikubitiro hazarekurwa eshanu, zashira hagatangwa n’izindi.

Ikindi ngo harimo gutekerezwa ukuntu ariya mafaranga kimwe na miriyoni umunani ziherutse gutangwa atazasubizwa Banki y’isi yayatanze, ahubwo agakomeza kwifashishwa n’ibigo by’imari, mu rwego rwo gufasha abakiriya babyo kubona inguzanyo zidahenze zibafasha kuzahura ubukungu.

Ati "Turimo turatekereza uburyo ariya mafaranga uko yishyurwa yajya asubizwa mu bigo by’imari ku bayakeneye, ku buryo abantu bayabona mu buryo buhoraho, naho ubundi ziriya miriyari eshanu kimwe na 25 zisigaye na zo ntabwo zihagije."

Vincent Munyeshyaka, umuyobozi wa BDF, yongeraho ko amafaranga za Sacco zigira zitangaho inguzanyo atari aya BDF gusa, kandi ko bajya banunganira abadafite ingwate.

Kuva yafungura imiryango mu mwaka w’2011, BDF imaze kwishingira mu bigo by’imari ingwate za miriyari zisaga 91 zatanzwe ku mishinga ibihumbi 18 na 63, kandi yamaze kwishyura ibihombo bya miriyari zisaga enye.

Naho mu kuzahura ubukungu nyuma y’icyorezo cy’indwara ya Coronavirus imaze gutanga miriyari zisaga 14 mu byiciro bibiri.

Minisitiri Bizimana yibukije Abanyarwanda ko kubaka Igihugu ari inshingano ya buri wese

Yabibabwiye mu kiganiro yagiranye na bo kuri uyu wa 10 Mutarama 2025, aho yagarutse ku mateka yagushije u Rwanda muri Jenoside, maze aboneraho gusaba ababyeyi n’abarezi kugira uruhare mu kubaka Igihugu batoza abana ubumwe, kuko amacakubiri yigishijwe Abanyarwanda mu gihe cy’imyaka 38 yagushije u Rwanda muri Jenoside yakorewe Abatutsi mu 1994.

Yagize ati "Kubaka Igihugu Abanyarwanda twese duhuriyeho ni yo ntego, ni wo mugambi, ni imibereho, ni ubuzima bw’Igihugu. Ni inshingano ya buri wese, ntabwo ari amahitamo, kuko amahitamo biba bivuga ngo niba utabikoze ntacyo uzaba."

Ibi biganiro byabaye nyuma y’uko hagati y’ukwezi kwa Kanama n’uk’Ukuboza mu mwaka ushize wa 2024, hishwe abarokotse Jenoside batatu, mu Mirenge ya Muganza na Rusenge ndetse na Mata.

Ku ishuri ribanza rya Gahotora mu Murenge wa Ruheru ,na ho hagaragaye abana babwira mugenzi wabo ko ari inzoka.

Muri Nyaruguru kandi hari n’ibindi bikorwa by’ingengabitekerezo ya Jenoside byahagaragaye, bigikorwaho iperereza harimo icy’uwarokotse Jenoside waranduriwe imyaka, ndetse n’uvugwaho kubwira amagambo asesereza abarokotse Jenoside baturanye.

Umuyobozi w’Akarere ka Nyaruguru, Dr Emmanuel Murwanashyaka, yavuze ko bamaze kubona biriya bikorwa by’ingengabitekerezo ya Jenoside, biyemeje kuzenguruka mu Mirenge yose bareba uko Ubumwe n’Ubudaheranwa bihagaze.

Mu ngamba bafashe harimo gutegura inama nk’iy’uyu munsi, yari ihuriyemo ibyiciro bitandukanye by’abayobozi babarirwa muri 600, kugira ngo bose bumve kimwe uburyo bwo kurwanya ingengabitekerezo ya Jenoside, hanyuma na bo bazabibwire abandi bari bahagarariye.

Abayobozi bo mu Karere ka Nyaruguru bakurikiye ibiganiro

Ikindi ngo banatangije gahunda ‘Isibo Yanjye Ukubaho Kwanjye’ aho abaturage bazajya baganira ku bibazo bafite, ariko bakanahuzwa n’ikimina cyo kuzigama no kugurizanya.

Yakomeje agira ati "Turanateganya gutangiza amarushanwa y’ubuhanzi y’ubumwe n’Ubudaheranwa mu midugudu, azatuma abantu bumva uruhare rwabo mu kubaka u Rwanda twifuza."

Hejuru y’ibyo ngo bazatangira inama mu bigo by’amashuri, aho ababyeyi bahabwa ibiganiro bya Ndi Umunyarwanda.

Isengesho ryo mu Ruhango ‘Kwa Yezu Nyirimpuhwe’

Iryo sengesho ryamenyekanye nk’iryo kwiyambaza Yezu Nyirimpuhwe, ari na ho haturutse imvugo igira iti "tugiye mu Ruhango Kwa Yezu Nyirimpuhwe", bisobanuye ko baba bagiye mu mujyi wa Ruhango, ariko kubera iyo gahunda yihariye.

Aha rero, haba hateraniye imbaga y’abaje gusenga, harimo Abanyarwanda ndetse n’abanyamahanga. Umuntu yakwibaza ngo iyo mbaga ihateraniye y’abantu baba barenga ibihumbi 50 baba bakurikiyeyo iki?

Bamwe mu bakunze kujya kuhasengera batangarije Kigali Today ko bajyayo bashyiriye Yezu Nyirimpuhwe ibibazo bafite, kandi ngo aranabisubiza dore ko n’abayobora amasengesho baho akenshi usanga bavuga ngo "Yezu Nyirimpuhwe yakijije uwari urwaye uburwayi runaka, n’uburwayi runaka, ariko ko muri rusange nta watashye uko yaje."

Hari n’abajya batanga ubuhamya mu ruhame, bavuga ukuntu Yezu Nyirimpuhwe yabakijije.

Marie Claire Byishimo ni umukirisitu gatolika ukunze kujyayo, akaba n’umwe mu bavuga ko yahakiriye indwara y’umugongo.

Agira ati "Ntabwo ndabasha kujya gutanga ubuhamya mu ruhame mu gihe cy’isengesho, ariko Yezu Nyirimpuhwe yankijije umugongo, mu gihe nari naranibagiwe ko nywurwaye."

Byishimo uyu ari mu kigero cy’imyaka 50. Ngo hashize imyaka 15 akize umugongo. Uwo mugongo ngo yawufashwe afite imyaka 24. Ku myaka 32 yaje kubyara abazwe, maze kubera ko ikinya bagitera mu mugongo, wa mugongo urushaho kujya umurya, cyane cyane iyo yabaga yakoze imirimo ituma yunama cyangwa yakoze urugendo rurerure mu modoka.

Yaje kujya akunda kujya mu isengesho kwa Yezu Nyirimpuhwe, ariko mu byifuzo yajyanaga nta cyo gukira umugongo cyarimo. Impamvu ni uko yari yaramenyereye kubana na wo.

Ati "Umunsi nkira, umwe mu basenga mu ijwi riranguruye yavuze bamwe mu bo Yezu yakijije, hanyuma asoza avuga ngo Yezu yakijije n’abandi bantu benshi indwara y’umugongo. Akimara kuvuga atyo numvise ibintu bishyushye nagereranya n’amazi y’akazuyazi binzamutse mu mugongo uturutse hasi, bisa n’ibitogotera muri cya gice nababaragamo, hanyuma biragenda."

Yungamo ati "Nahise numva ko mu bakijijwe indwara y’umugongo nanjye ndimo. Ntiwahise ukira burundu, ariko nyuma y’igihe naje kwisanga ntakibabara na gato. Na n’ubu, umugongo umbabaza ari uko ibiro byiyongereye."

Uretse abakirisitu gatolika, n’abasengera mu yandi madini cyangwa badafite n’amadini babarizwamo bajya bajyayo kandi bakahakirira. Mu buhamya batanga usanga bavuga ko barwaye igihe kirekire gukira bikanga, hakagira abababwira ko gukira byashoboka bageze kwa Yezu Nyirimpuhwe.

Urugero ni umudamu witwa Josiane ubusanzwe ngo usengera muri EAR watanze ubuhamya tariki 3 Ugushyingo 2023 ko Yezu Nyirimpuhwe yamukijije.

Avuga ko yari yarabyimbye inda bikabije, akabimarana igihe kirekire, yivuza ahantu hose bayoberwa icyo arwaye, kwa muganga bamupima ntibagire icyo babona ariko ngo bakamubwira ko babonaga mu nda ye hijimye.

Yaje kumenya ko kwa Yezu Nyirimpuhwe mu Ruhango abantu bajya yo bagakira, ajyayo ari kuwa kane baramusengera, hanyuma ku munsi w’isengesho rusange (ku cyumweru cya mbere cy’ukwezi) wakurikiyeho asubirayo.

Mu gihe cy’isengesho, ngo uwasengaga mu ijwi riranguruye yavuze abantu Yezu yakijije, avugamo n’umudamu ngo "wari ufite inda nini cyane. N’ikimenyimenyi ngo arumva inda ye iri kwegerana."

Ati "Naratashye nguma mu rugo, nza kurwara iryinyo, ndijyana kwa muganga. Bampaye transfert injyana ku bitaro, ariko ngezeyo nsanga banyohereje kwa muganga w’abagore. Bampimye mu nda, noneho ngo babonamo ikintu kimeze nk’ikibuye, cyari gikikijwe n’amazi."

Akomeza agira ati "Barambaze bankuramo urunyama rukomeye rufite ishusho y’igisabo, na litiro 25 z’amazi. Ubu ndashima Yezu Nyirimpuhwe ko yankijije."

Ubundi mu isengesho rikirizwamo abarwayi kwa Yezu Nyirimpuhwe, hari ababa baharaye mu gitaramo. Ku munsi w’isengesho nyir’izina, abazindutse bafata igihe cyo kuvuga ishapule, bagakora n’isengesho ryo gusingiza Imana nk’uko abakarisimatike babigenza. Baba bateraniye mu kibaya kinini cyiswe "Ikibaya cy’Amahoro".

Nyuma yaho haba misa ari na yo sengesho rikuru ryo gusabira abarwayi, ibamo gutanga ubuhamya ku bakijijwe na Yezu, isozwa no gutambagiza Ukaristiya, abemera bemera ko Yezu urimo ari na we ukiza.

Mu gutambagiza Ukaristiya bikorwa n’abapadiri, hari abakarisimatike baba bari gufasha imbaga ihateraniye mu gusenga, batura Yezu Nyirimpuhwe ibibazo bafite, bifashishije indanguriramajwi. Abo ni na bo bavuga abakize.

Hagati aho, hari ibihe iri sengesho ryitabwirwa bikomeye kurusha andi mez. Mu mpera z’umwaka aho abantu baba bashaka gusaba Imana kubambutsa ikabageza hakurya mu wundi mwaka, no mu ntangiriro z’umwaka aho baba bashaka ko Imana ibayobora muri gahunda z’imihigo bafite.

Mu kwezi kwa Mata, aho u Rwanda rutangira icyumweru cy’icyunamo, naho usanga hari imbaga itabarika y’abafite imitima iremereye bavuga ko baba baje gushaka Yezu nyirimpuhwe uruhura.

Amakuru dukesha urubuga Wikipedia avuga ko Te Deum ari indirimbo ya gikirisitu. Imvugo yuzuye ni Te Deum laudamus bisobanura ngo "Mana yacu turagusingiza".

Ni indirimbo ndende yahimbwe mu rurimi rw’Ikilatini ku ikubitiro nk’uko na kera muri Kiliziya Gatolika indirimbo zose zari mu kilatini, yaje gushyirwa no mu zindi ndimi. Iyo mu Kinyarwanda yashyizwe mu majwi ane irenza iminota 10.

Iterura igira iti « Mana yacu turagusingiza, tukemeza ko ari wowe mutegetsi wacu. » igasoza igira iti « Nyagasani narakwizeye, sinzakorwe n’isoni bibaho. »

Mu nyandiko za kera hari aho bagiye bayita Laus angelica (igisingizo cy’abamarayika), Hymnus in die dominica (indirimbo yo ku cyumweru) cyangwa Hymnus ambrosianus (Indirimbo ya Ambrose), bafatiye ku kuba amagambo yayo ngo yaba yarahimbwe na Mutagatifu Ambrose.

Bivugwa ko yahimbwe ahagana mu mpera z’ikinyejana cya IV cyangwa mu ntangiriro z’ikinyejana cya V.

Muri Kiliziya Gatolika ikunze kuririmbwa mu masengesho yo gushimira Imana mu mugoroba wo ku itariki ya 31, ariko hari n’ubwo abihaye Imana bayiririmba mu masengesho ya mu gitondo cyangwa ya nimugoroba.

Ishobora no kuririmbwa mu minsi mikuru yo gushimira Imana harimo kwishimira insinzi, ku minsi mikuru yo ku rwego rw’ibihugu, havutse ibikomangoma, … nk’uko byagiye bigaragara mu mateka.

Tugarutse mu masengesho ikunze kuririmbwamo yo ku wa 31 Ukuboza, Hambere mu Rwanda abakirisitu bayitabiraga ntabwo basomerwaga misa. Bashengereraga isakaramentu ry’Ukarisitiya, bagashimira bakanasaba Imana, bakanaririmba Te Deum.

Hashize imyaka itagera ku 10 hashyizweho ko noneho kuri iriya tariki haba igitambo cya misa bisanzwe, ku buryo hari n’aho bataririmba iriya ndirimbo, bakaririmba izo gushimira zindi zisanzwe, bitabuza ko mu bitabiriye iyo misa habamo n’abavuga ko bagiye muri Tedewumu (Te Deum).

Bifuza ko hafatirwa ku muhanda Bugesera-Nyanza ugiye kurangizwa gushyirwamo kaburimbo na bo bagatunganyirizwa igice cy’Akanyaru Belt

Alexis Ntagengwa ukuriye Urugaga rw’abikorera mu Murenge wa Mamba agira ati “Icya mbere cyo iwacu i Mamba harera cyane. Uriya muhanda tuwukeneye cyane kuko ari inzira ya hafi y’ubuhahirane n’ubugenderanire na Kigali. Ni inzira y’ibusamo, ku buryo ntekereza ko n’ab’i Huye bajya banyura iwacu bajya za Kigali.”

Ephrem Mukeshimana ufite uruganda rwenga ibitoki mu Murenge wa Mamba na we agira ati “Uriya muhanda urakenewe cyane kubera ko kugeza ibicuruzwa ku isoko, no kujya gutora ibitoki hirya no hino muri Gisagara no mu tundi Turere duhana imbibi nka Nyanza biratugora, cyane cyane mu gihe cy’imvura. Icyakora twabonye baratangiye kuwupima, hari icyizere ko uzakorwa vuba.”

Eric Iyamuremye, Perezida wa Coopec Impamba yatangiye ikorana na koperative z’abahinzi b’umuceri zibumbiye muri Ucoribu, na we ati “N’ubwo dufite uruganda ruwutunganya i Gikonko, umuceri uvamo ujyanwa hirya no hino za Kigali n’ahandi. Urumva ko uriya muhanda ukozwe byafasha kujyana umuceri hirya no hino. Byaba ari byiza.”

Ibi binashimangirwa n’umuyobozi wungirije w’Akarere ka Gisagara ushinzwe Iterambere ry’Ubukungu, Jean Paul Habineza ugira ati “Gisagara dusa n’aho dufungiranye kuko twakoraga ubucuruzi cyane n’igihugu cy’u Burundi, ariko ubona ko bo batabishyizemo imbaraga n’ubwo imipaka ku ruhande rwacu ifunguye. Ibyo bituma amasoko nka za Nyaruteja na Kabuga atagishyushye cyane.”

Icyifuzo cyo gutunganyirizwa byibura igice cy’uriya muhanda cy’ibirometero 45, uturutse i Nyamiyaga muri Nyanza kugera ku biro by’Akarere ka Gisagara ngo bakigejeje kuri Perezida Kagame kandi ngo babonaga abyumva, ku buryo batekereza ko igitinze ari ukubona ingengo y’imari.

Ati “Ukozwe byatuma umusaruro uturuka mu Mayaga ugera za Bugesera na Kigali ku buryo bworoshye. Bityo ya Gisagara igendwa tuvuga ikagerwaho.”

Uwo muhanda, muri Gisagara wamanuka Ndora ukanyura i Musha, ugafata igice gitoya cya Gikonko na Mamba, ukambuka muri Nyanza. Muri Nyanza na ho wanyura muri Kibilizi, Muyaga na Ntyazo.

Visi Meya Habineza avuga ko umuhanda bifuza ku buryo bwihuta upima ibilometero 45 uturutse ku Gisagara, ku buryo utunganyijwe abanyagisagara batakongera gukenera kunyura i Huye bajya i Kigali. Ariko ubundi umuhanda Akanyaru Belt wose wo wakomeza ukanyura i Kibirizi n’i Nyaruteja, ukagera ku Kanyaru Bas wo waba ureshya n’ibilometero 110.

Ikindi, Akanyaru Belt ngo ni wo muhanda usanganya uturere ku nkiko z’u Rwanda usigaye gushyirwamo kaburimbo.

Abana bibukijwe kutigira indakoreka

Ibirori babikoreye i Kibeho, tariki 27 Ukuboza 2024, kuri Shapeli ya Bikira Mariya, aho bahuriye babarirwa mu bihumbi birindwi. Bari baturutse muri Diyosezi Gatolika zose z’u Rwanda.

Mu nyigisho isobanura ijambo ry’Imana ryasomwe mu gihe cy’igitambo cya Misa cyabimburiye ibirori, Musenyeri Célestin Hakizimana, umushumba wa Diyoseze Gatolika ya Gikongoro, ari na yo Kibeho iherereyemo, yasabye abana kwakira uburere bwiza bahabwa n’ababyeyi.

Yagize ati “Bana, mwirinde kunanirana no kuba indakoreka. Muri iki gihe cyacu abana ntibishimira guhanwa, gucyahwa. Igitsure ntibagikunda. Ndetse ngo babahaye telefone yo guhamagara polisi igihe umubyeyi akubwiye nabi!”

Ati “Twemerere ababyeyi bacu baduhane, kuko badukunda. Twemere abakuru baducyahe, kuko badufitiye urukundo. Ugira Imana agira umuhana, umukosora, umugira inama. Bana, nimwakire neza uburere muhabwa, mwirinde kunanirana no kuba indakoreka, bityo tuzavemo abana beza.”

Bafashijwe kwizihiza Noheli

Assoumpta Ingabire, Umuyobozi Mukuru w’Ikigo cy’Igihugu gishinzwe Imikurire no Kurengera Umwana, na we yunze mu rya Musenyeri Hakizimana, aboneraho no kwibutsa ko ababyeyi bakwiye kwita ku bana babo, ariko ntibanarengere mu kubahana.

Ati “Umwepiskopi wa Gikongoro yigeze kuvuga ko abana batacyemera guhanwa. Ni byo, ntabwo ari umuco muzima. Ariko kandi tugira n’ababyeyi bahana bihanukiriye. Abo twebwe turabagaya ndetse iyo bibaye ngombwa barahanwa. Hari ababica, hari ababatwika. Ibi ababyeyi dukwiye kubikosora kuko ntabwo wahana umuntu umwica cyangwa umusubiza inyuma mu mitekerereze ye.”

Antoine Caridinal Kambanda, Arikiyepiskopi wa Diyoseze Gatolika mu Rwanda, yabwiye abana ko Yubile yabo yizihirijwe i Kibeho, ku butaka butagatifu, hafatiwe ku kuba Yezu afite imyaka 12 ababyeyi be baramujyanye mu rugendo nyobokamana i Yeruzaremu ku butaka Butagatifu.

Yakomeje agira ati “Uyu rero ni undi murage, bana babyeyi barezi, tugira ngo uzakomeze. Uko mukura mujye muza gutaramira umubyeyi Bikira Mariya aho yadusuye, akaduha umugisha. Urugendo nyobokamana ni uburyo bwiza bwo kwitagatifuza, butwibutsa ko turi abagenzi mu buzima bwacu.”

Abarimo abayobozi batandukanye bizihije uwo munsi

Ibi kandi byanashimishije abana. Uwavuze mu mwanya wa bose yagize ati “Mwaduhitiyemo neza, kuko iyo tugeze hano i Kibeho tuhavoma ingabire, zituma tubera Umubyeyi Nyina wa Jambo indabo nziza zihumurira bose na hose.”

Yunzemo ati “Turabashimira kandi ko mwaduhitiyemo kwizihiza Yubile y’abana mu gihe twishimira ivuka ry’akana Yezu. Biratugaragariza ko mutwifuzaho gusa na Yezu, muri byose, mu mibereho yacu, twubaha ababyeyi kandi dukura neza mu bwenge no mu gihagararo, tunyuze Imana n’abantu.”

Urugendo rwo kwizihiza yubile y’impurirane y’imyaka 2025 y’ugucungurwa kwa bene Muntu n’imyaka 125 Ivanjiri igeze mu Rwanda, rwatangiye tariki 10 Gashyantare 2024, rutangirira muri Bazilika Nto ya Kabgayi.

Ku wa 6 Nyakanga 2024 hahimbajwe Isakaramentu rya Batisimu muri Paruwasi ya Zaza muri Diyoseze ya Kibungo, ku wa 25 Kanama 2024 hahimbazwa Yubile y’urubyiruko muri Diyoseze ya Ruhengeri, kuva ku wa 5 kugera ku wa 8 Ukuboza 2024 habaho ikoraniro ry’Ukaristiya i Butare, none ku wa 27 Ukuboza 2024 hizihijwe Yubile y’abana.

Biteganyijwe ko muri Gashyantare 2025 hazahimbazwa ingabire yo kwiyegurira Imana, muri Kamena 2025 hagahimbazwa Ubusaserdoti, muri Kanama 2025 hagahimbazwa ikenurabushyo ry’Umuryango, mu Ugushyingo 2025 hagahimbazwa Ubutumwa bw’Abalayiki, hanyuma kwizihiza Yubile nyirizina bikazaba mu Ukuboza 2025 muri Arkidiyosezi ya Kigali.

Abasenyeri bo mu madiyoseze yo mu Rwanda na bo bari bahari

Musenyeri Filipo Rukamba mu misa ya Noheli kuri Katedrali ya Butare

Mu gitambo cya Misa cyo kuri uyu munsi mukuru wa Noheli, ari wo wibutsa Abakristu ivuka rya Yezu umukiza, Imana yigize umuntu kugira ngo acungure isi, Musenyeri Rukamba yagize ati "Yezu ni Imana yabaye umuntu, iba uruhinja nk’abana b’abantu bose. Ugirira nabi uwo mwana uri mu nda ya nyina aba agiriye nabi Yezu Kristu."

Mu cyumweru gishize, ni bwo itangazo ryasinywe n’abepiskopi Gatolika bose bo mu Rwanda ryasabye Abakristu bose n’abantu bafite umutima mwiza kurengera ubuzima.

Iri tangazo ryashingiye kuri Gatigisimu aho igira iti "kwica umuntu bihabanye rwose n’agaciro muntu yaremanywe. Itegeko ry’Imana ribuza icyo cyaha rireba umuntu wese aho ava akagera aho yaba ari hose no mu gihe yaba arimo icyo ari cyo cyose."

Mu ngingo zinyuranye z’iri tangazo, abasenyeri uko ari icyenda bavuze ko gukuramo inda ku bushake ari icyaha cyo kwica inzirakarengane, bavuga kandi ko mu rushako rw’umugabo n’umugore ari ho hari inzira yemewe yo kubyara no kororoka.

Bavuze kandi ko imiti ibuza gusama inyuranye n’inyigisho za kiriziya, n’izindi ngingo zinyuranye.

Iri tangazo ryanzuye rigira riti "turasaba buri wese kubaha amategeko y’Imana, guha agaciro no kurinda ubuzima aho buva bukagera."

Tugarutse ku nyigisho ya Musenyeri Rukamba, yakomeje agira ati "Akenshi twibwira ko icyubaka ari ibintu. Yezu yavukiye mu kirugu, bamushyira mu kavure, ariko yari afite urukundo rwinshi, urw’ababyeyi n’urw’abaje kumureba ndetse n’urw’Imana yari imutwoherereje. N’ubwo rero yavukiye mu kavure, ahantu hatari heza, yari afite ikintu gikomeye kurusha ibindi : urukundo."

Yakomeje agira ati "Ibi bituma natwe twumva ko ikigize imiryango yacu ari urukundo. Urukundo rutareba mbere na mbere icyo umuntu afite, ko ari mutoya cyangwa mukuru. Ahubwo urukundo rwitanga, rukubaka imitima y’abantu, rukubaka ibihugu, mbese rukubaka ineza hagati y’abantu."

Yunzemo ati "Noheri ni umunsi w’umuryango rero kuko ari umunsi abana bose baba batwibutsa Yezu Kristu. Ni umunsi Imana yabaye umwana, nk’uko abana b’abantu bameze. Ni ngombwa rero kubarinda, kubigisha imico myiza."

Yanibukije ababyeyi ko bakwiye kwita ku bana, bakabaha uburere bwiza kandi bakabigisha urukundo kuko umwana ashobora kuvamo uwubaka igihugu cyangwa ucyoreka biturutse ku burere.

Ati "Kwita ku mwana wawe ni ukwita kuri murumuna wa Yezu Kristu. Kwita ku mwana uwo ari we wese ni ukwita kuri wa muntu wanyuze mu nzira Yezu Kristu yanyuzemo kugira ngo azakize isi."

Yunzemo ati " Umwana ni wa wundi ushobora gukiza isi, cyangwa akayoreka. Kwita rero ku mutima w’abana bacu, ni no kwita ku gukira kw’isi."

Ibiciro by’ibiribwa byazamutse

Ibi byatumye abari biteguye guhaha bahitamo kwihorera bimwe, kubera ko amafaranga bari bitwaje yababanye makeya, nyuma yo guhaha bimwe mu byo bari bakeneye.

Wasangaga abantu basohoka mu isoko bagira bati "Mbega ibiciro!"

Mukarusanga na Madeleine, bari baturutse ahitwa i Kabuga mu Murenge wa Mbazi biteguye guhahira mu mujyi, ariko batashye bacitse intege.

Umwe yagize ati "Umuceri wa Kigori wari umaze igihe ugura 750 ku kilo, ariko ubu ni 1000. Uwaguraga 1000 wageze ku 1200. Uwa 700 wabaye 900. Ibirayi twari tumaze iminsi tubigura amafaranga 400 ubu ni 500. Bari gukabya pe! Umuntu w’umukene kwizihiza Noheli biragoye!"

Abahaha ni benshi, gusa binubira izamuka ry’ibiciro

Undi na we ati "Indagara twaziguraga ku mafaranga 600 irobo, ariko ubu ziri kugura 700. Agatebo k’inyanya mu minsi yashize kaguraga ibihumbi bine, bine na 500 na bitanu. Ubu Kari kugurishwa ibihumbi birindwi. Abacuruzi bemeye baricara baratarama, bategereje amafaranga!"

Mugenzi wabo wari uje abirukankira ngo bafatanye urugendo rutaha ati "Nk’ubu nari naje guhaha intoryi n’inyanya ariko ntahiye aho, kubera ibiciro babyurije."

Umubyeyi waturutse i Mugombwa mu Karere ka Gisagara azanye n’umukobwa we kumuhahira ibya Noheri mu mujyi wa Huye, yifashe ku kananwa azunguza umutwe ati "Ibintu byahenze!"

Yunzemo ati "Nta nyama tuguze twebwe kuko tutazigondera. Ibirayi byahenze. Ubu biragura 600 na 500 ku bya Kuruza. Hari hashize iminsi ibiciro byaragabanutse, ariko uyu munsi byahenze. Karoti zigeze kugera kuri 300, zari zimaze iminsi zigura 650 na 700, ariko bari guca 800."

Inyama ziragura umugabo zigasiba undi

Umubyeyi ucururiza imboga mu isoko we ngo igiciro cy’inyama nticyamunejeje.

Ati "Ikilo cy’inyama y’iroti cyari gisanzwe kigura amafaranga ibihumbi bitandatu, ariko ubu kiri kugura ibihumbi birindwi. Baremera kukiguhera ibihumbi bitandatu ari uko niba ushaka ibiro bibiri kimwe kiba icy’iroti ikindi kikaba icy’imvange."

Yunzemo ati "Ni uko nyine Noheri nituyisohokamo ibintu bizongera bigahahika, naho ubundi ...! Bagiye kuturisha Noheri nabi!"

Umugabo ucuruza isambaza mu mujyi i Huye ati "Isambaza twazifatiraga 8000, ubu turi kuzifatira 11000, twagera hano tukazigurisha 14000 kubera ko imodoka zabituzaniraga twazifatiraga Nyabugogo, ubu zikaba ziri kuri sitade Pelé. Turi kwishyura umukarani uzizamukana, ni yo mpamvu ibiciro byazamutse."

Yunzemo ati "Ubugari bwaguraga 600 ubu ni 800. Amavuta ya karanga yaguraga ibihumbi bitandatu ubu ni 7500. Amavuta y’ibihwagari yaguraga ibihumbi 16 ubu ni 18. Amakaroni yaguraga 1200 ubu ni 1500. Inyama z’inka zo tumaze iminsi twarazihoreye, dusigaye tugura inkoko. Ipima ibiro bibiri ku kiranguzo ni ibihumbi birindwi."

Mu bindi bice bigize umujyi wa Huye na ho ibiciro biyongereye ariko bitari cyane ho.

Nk’i Tumba, ibirayi bya Ruhengeri n’ibya Nyamagabe biri kugura 480, bivuye kuri 460. Kinigi yavuye kuri 550 ijya kuri 600.

I Ngoma ho, inyanya urebye ngo ni zo zazamutse kuko ikilo cyavuye ku mafaranga 800 kikaba 1000. Ibirayi bya Nyaruguru ngo byaguze 550 na Kinigi igura 650.

Umuceri ngo uri kugura 1800, 1600 na 1500. Uwa Kigori wo ngo ni 1100.

Urubyiruko rusabwa kutaremererwa na Diplome ngo runanirwe gukora ibyaruteza imbere

Iki gitekerezo, kimwe n’ibindi byafasha urubyiruko kuva mu bushomeri, abayobozi n’urubyiruko rwo mu Karere ka Huye babigaragaje mu nama baherutse kugirana, barebera hamwe icyazamura umurimo.

Gervais Butera Bagabe, yabaye umwarimu n’umuyobozi w’ikigo cy’ishuri, aza kubireka none ubu arikorera. Ni na we Perezida w’Urugaga rw’Abikorera mu Karere ka Huye.

Abwira abakiri batoya ko ibyo umuntu yakora agatera imbere bihari, ari na byinshi, ko icya ngombwa ari ukwitegereza, ingorane ukazibyaza amahirwe.

Avuga kandi ko yasanze hari abaremererwa na diplome, bakiyumvamo ko hari imirimo batakora nyamara bayikoze yabateza imbere.

Agira ati “Ntangira kwikorera, hari umuntu wambwiye ati ariko se koko Masters zawe uzipfushije ubusa koko? Hari ukuntu za diplome zituremerera, zikatubera umuzigo aho kutubera igisubizo. Icyo nshaka kuvuga ni uko umwana abona ka diplome k’amashuri yisumbuye akumva nta gikoze mu itaka. Ukwiye gutekereza ko umurimo wose ari umurimo, icya ngombwa kikaba kuba ukubyarira amafaranga.”

Ikindi yabonye kizitira urubyiruko mu kwihangira imirimo ni ugushaka guhera ku ibintu bihambaye, yabona nk’amafaranga aho gushaka uko yayaheraho atera intambwe, agahita ayagura telephone uko yakabaye.

Ati “Kugura telefone na byo ni byiza, ariko ushobora kutagura iy’ibihumbi 200 ahubwo ukagura iy’ibihumbi 100, asigaye ugatekereza ku bindi yakora. Abantu benshi mubona bateye imbere, bahereye ku bintu bitoya bagenda batera imbere buke bukeya. Rubyiruko, nta bidasanzwe. Ushobora guhera kuri bikeya, iyo utekereza neza, urakora bigakunda.”

Umuyobozi wungirije w’Akarere ka Huye ushinzwe Iterambere ry’Ubukungu, André Kamana, yunga mu rya Bagabe akabwira urubyiruko ko no mu buhinzi hari akazi kandi ko bagakoze bijyanye n’igihe bo barushaho kubikora neza, aho gutegereza gutungwa n’ababyeyi.

Ati “Ni imbogamizi kubona umuntu avuga ngo nta kazi afite, ariko ntagire icyo akora ngo agashake. Ni imbogamizi kubona umuntu ufite imbaraga zo gukora, ariko ugasanga umukecuru n’umusaza ari bo bamutunze, cyangwa ugasanga atunzwe no gutwara iby’abandi.”

Mu rubyiruko rwamaze guhanga imirimo, hari abagira abandi inama. Raymond Pacifique yarangije kaminuza, atangira umushinga w’ubuvumvu kandi ugenda utera imbere.

Agira ati “Amahirwe ntatoragurwa mu nzira, umuntu arayashaka. Kandi bihera ku kantu gatoya. Baravuga ngo dukeya tuvamo twinshi. Uko ugenda wegeranya ugera aho ukagera ku kintu gifatika”.

Umuyobozi wungirije w’Akarere ka Huye ushinzwe Iterambere ry’Ubukungu, André Kamana

Ku ruhande rwabo, urubyiruko rugenda rugira ibitekerezo by’imishinga rukabura inkunga rwari rwizeye, rwo rwifuza gukurikiranwa.

Uwitwa Gloria agira ati “Hari gahunda nyinshi zifasha urubyiruko nka Youth Connect iza gufasha imishinga y’urubyiruko, ariko ugasanga nta wukurikirana imishinga itabashije gukomeza mu marushanwa. Hari igihe umuntu aba afite umushinga mwiza atazi kwisobanura bigatuma atsindwa. Habayeho ko n’itatsinze ikurikiranwa, byafasha ko havuka imishinga myinshi itanga akazi no ku rundi rubyiruko.”

Ibarura rusange ry’abaturage riheruka ryagaragaje ko 29,9% by’urubyiruko rwo mu Karere ka Huye badafite aho babarizwa, naho abashakisha imirimo bo bari 21,4% i Huye na 24% mu gihugu hose.

Gerard Rugira, agronome w’uruganda rw’icyayi rwa Kitabi ukurikirana abahinzi bakorana, barimo n’abahuye na kiriya kibazo, avuga ko basanze biterwa n’ubusharire bukabije bw’ubutaka.

Yagize ati "Ubusanzwe icyayi kimererwa neza mu butaka bufite ubusharire buri hagati ya kane na gatanu. Aho twasanze ibishorobwa ni mu butaka bufite ubusharire bwa gatatu kumanura."

Anasobanura ko ahari ubusharire bwa rimwe haba hashaririye kurusha aha gatanu. Kandi ngo ibishorobwa biboneka no mu yindi mirima yo muri biriya bice ihingwamo ibindi bihingwa nk’ibirayi, ariko ho ntibihateza ibibazo bikomeye kuko ababihinga bifashisha ishwagara, ari na yo kugeza ubu yifashishwa mu kurwanya ubusharire bw’ubutaka.

Akomeza agira ati "Ikindi, n’iyo barimo guhinga ibibonetse babikuramo bakabyica. Mu cyayi ho ntihahingwa ngo umuntu abe yabitoragura (ibishorobwa), kandi ntitwari dusanzwe tuhatera ishwagara."

Abahinzi bahuye n’iki kibazo cy’icyayi cyabo cyuma biturutse ku bishorobwa bavuga ko batangiye kubona iki kibazo kuva mu myaka ibiri ishize.

Ngo babonaga icyayi cyitora kikaraba hanyuma kikuma, baza kurandura bagira ngo barebe impamvu yabyo basanga ibishorobwa byinshi mu butaka byagiye bishishura imizi bikarya udushishwa.

Icyo gihe ngo bagiye batora ibishorobwa bakabyica, bagataha bibwira ko ikibazo bagikemuye, hashira iminsi ibindi byayi bikuma na byo biriwe n’ibishorobwa byavuye mu magi yasigaye mu butaka.

Ibi kandi ngo byatangiye babona ari ibintu byoroshye, ariko uko iminsi igenda yicuma aho kugira ngo ikibazo gikemuke bikarushaho kwiyongera, ku buryo byabateye igihombo.

Uwitwa Jean Claude Nyabyenda utuye mu Kagari ka Mukungu mu Murenge wa Kitabi, ati "Najyaga nsarura ibiro 800 by’icyayi ku kwezi, ariko ubu ndasarura 500. Nahombye ibiro 300 byose.”

Ibiro 300 kandi ubariye kuri 500 babishyura ku kilo, ni amafaranga ibihumbi 150. Kimwe na bagenzi be yifuza ko iki kibazo cyabonerwa umuti.

Umuyobozi wungirije ushinzwe iterambere ry’ubukungu mu Karere ka Nyamagabe, Thaddée Habimana, avuga ko aho bamenyeye iki kibazo bashatse ishwagara yo gutera mu byayi, kandi ko bizeye ko izabikemura.

Ati "Hari iyo dufite tuzatera ku muganda, kugira ngo tubirwanye mu buryo bwihuse."

Agronome Rugira yongeraho ko ku bufatanye na NAEB ndetse na RAB bakomeje ubushakashatsi bwo kugira ngo harebwe niba hari umuti urambye waboneka kuri iki kibazo.

Umuyobozi wa Koperative Kobacyamu, Marthe Mukanzirabatinya, avuga ko biturutse ku biza by’izuba ryinshi ryakurikiwe n’imvura nyinshi yagiye igwamo n’urubura ndetse n’ibyonnyi by’ibishorobwa, batabashije kugera ku musaruro bari biteze kugeza mu ruganda rwa Kitabi.

Ati "Muri uyu mwaka urimo urangira twari twihaye intego yo kuzagira umusaruro w’icyayi ungana na toni miriyoni eshanu, ibihumbi 835 n’134, ariko ukwezi k’Ugushyingo kwarangiye tumaze gusarura toni miriyoni enye n’ibihumbi 683 na 518. Twari tumaze kwesa umuhigo wacu ku rugero rwa 89%."

Izi ngorane ariko ntizabujije ko uruganda rw’icyayi rwa Kitabi rukomeje kugira icyayi gihatse ibindi mu bwiza mu Karere ka Afurika y’Iburasirazuba.

Umuceri uri mu bihingwa bikunda kwibasirwa n’ibiza ariko ukaba mu byishingirwa

Ibi babivugira ko akenshi babona amafaranga bishyurwa ari makeya ugereranyije n’ayakishyuwe.

Nk’abahinga umuceri mu gishanga cya Runukangoma bibumbiye muri Koperative Coorisi mu Murenge wa Simbi mu Karere ka Huye, bavuga ko gahunda yo gushinganisha ibihingwa ibafasha iyo bahuye n’ibiza.

Uwitwa Viviane Mukarubayiza agira ati “Hari igihe twahuye n’ikiza cy’amahindu, umuceri wari weze ushirira hasi. Iyo tutaba mu bwishingizi rwose abahinzi ntitwari kubasha kongera guhinga, kuko umuceri utwara ibishoro byinshi. Icyo gihe baratwishyuye tubasha kongera guhinga.”

Ku rundi ruhande ariko, hari abavuga ko iyo bitegereje babona amafaranga bagenerwa ari makeya, bityo bakifuza ko byibura abajijutse muri bo bakwigishwa uko babarirwa, kugira ngo bajye na bo bimenyera ibyo bagomba kwishyurwa, mbese nk’uko bigenda ku bworozi.

Uwitwa Vincent Munyentwari ati “Twifuza ko baduhugura ku kuntu batubarira, ku buryo umuntu na we yajya aba azi ayo azishyurwa.”

Kutishimira uko bagenerwa amafaranga bikabasigira urwikekwe, si muri koperative Coorisi ubisanga gusa.

Nk’umuhinzi umwe wo muri Koperative ihinga umuceri mu gishanga cya Nyiramageni, mu Karere ka Gisagara yagize ati “Usanga abantu bibaza uko bikorwa. Ni ukugenerwa, kandi usanga ayo baguhaye ari makeya ugereranyije n’ibyangiritse.”

Yvette Umuhoza, agronome wa Koperative Coorisi, na we ari mu bafite icyifuzo cy’uko abahinzi bakwigishwa uko babarirwa ibijyanye n’ibyangiritse, hanyuma n’umwishingizi akabikurikiza, kugira ngo bikureho urwikekwe, kuko akenshi iyo abahinzi babonye amafaranga ari makeya bakeka ko abayobora koperative bayariye bakabagenera dukeya, nyamara atari byo.

Ati “Mu buhinzi haba harimo abajijutse. Bamenye uko bibarwa byaba byiza, kubera ko hari abo usanga bavuga ngo kuri njyewe si ko byagakwiye kugenda.”

Twifuje kumenya icyo umwishingizi Radiant bakoranaga avuga ku bivugwa n’abahinzi, ntitwabasha kuvugana n’abo ku cyicaro gikuru kuko batitabaga telefone, ariko uhagarariye Radiant mu Karere ka Huye yavuze ko mu kubara ibyo bazishyura batajya mu murima wose, bagira aho bahitamo batwara nk’icyitegererezo.

Ikindi ngo ntibishyura ibyangiritse, ahubwo igishoro cyafasha umuhinzi kongera guhinga.

Naho ku bijyanye no kuba abahinzi batumvikana na koperative mu ngano y’amafaranga yagenewe ibyabo byangiritse, avuga ko ibi bituruka ku kuba koperative isaranganya abahinzi ititaye ku kureba uko bangirikiwe.

Ati “Iyo babasaranganyije rero, ni ho usanga buri muhinzi abona udufaranga dukeya, ugasanga bamuhanye nk’ibihumbi 15, yabona yarashoye 200 ati n’iyi koperative n’ubwishingizi mumbwira, nta kintu bimariye.”

Mu makoperative y’abahinzi bo ariko, bavuga ko kutanyurwa n’amafaranga y’ubwishingizi bidaturuka ku isaranganya, ahubwo ku ngano y’ayo umwishingizi aba yatanze.

Nko muri Koperative Coorisi, agoronome avuga ko ku ihinga riheruka yari yabaze akabona bakwiye kubishyura miliyoni n’ibihumbi 600, afatiye ku bishoro by’abahinzi bari bangirikiwe, ariko umwishingizi akabishyura ibihumbi 800 gusa. Na bwo kandi bayemeye nyuma y’uko bari batanze makeya kuri yo, agoronome akanga kubasinyira.

Ati “Hari igihe bakora raporo y’ibigomba kwishyurwa ntituyumvikaneho, bakongeraho dukeya ukanga gukomeza guharira ukayemera. Mbese ibyo bakora ni nko kugenagena.”

Ubwo babishyuraga ½ cy’akwiye, ngo uruhare rw’abahinzi mu bwishingizi (ubundi rungana na 60% kuko Leta ibatangira 40%) rwanganaga na 1,210,440.

Mu ihinga ry’ibiri mu murima kuri ubu, koperative Coorisi kimwe n’ihinga mu gishanga cya Nyiramageni ziyemeje gukorana n’umwishingizi mushyashya, ari we BK, kandi bizeye ko ahari we noneho bazakorana neza.

Mu mwaka wa 2020 abangavu batwaye inda mu Karere ka Huye bari 198. Umubare wabo wageze ku 137 mu 2021, bagera ku 101 muri 2022, baba 96 muri 2023 none kuva 2024 watangira kugeza ubu bamaze kuba 83.

Ababyeyi bo hirya no hino muri aka Karere bavuga ko mbere batatinyukaga kuganiriza abana babo ku buzima bw’imyororokere, ariko ko babifashijwemo n’abafatanyabikorwa batandukanye bagiye babitinyuka, ibi bikaba kimwe mu byafashije ko umubare w’abatwita ugenda ugabanuka, n’ubwo bataragera neza ku ntego y’uko nta wongera gutwita akiri mutoya, kuko bibangiriza ubuzima.

Annonciata Mukandagano utuye ahitwa mu Muyogoro mu Murenge wa Huye ati “Ababyeyi batinyaga kuganiriza abana ku myororokere. Byari nka kirazira kuri bo. Ariko hagiye habaho ibiganiro bihuza abana n’ababyeyi bari hamwe, bityo umubyeyi aratinyuka n’umwana aratinyuka, noneho no mu muryango bakabiganiraho.”

Akomeza agira ati “Umubyeyi akamenya ko umwana we yageze igihe cy’ubugimbi, agatinyuka kumuganiriza. Ariko ubundi mbere byari kirazira, nta mubyeyi wasobanuriraga umwana iby’ubuzima bw’imyororokere.”

Pelagie Mukarusanga w’i Sazange mu Murenge wa Kinazi na we ati “Byari umuco ko nta muntu w’umumama wavuga ibitsina cyangwa imibonano mpuzabitsina mu mazina yabyo. Ariko aho bagiye basobanukirwa, ubu ashobora kwegera umukobwa we akamubwira ati mwana wanjye, umuhungu nagutereta muri ubu buryo, uzamuhakanire umubwire ko bidashoboka. Nibura uwo muco umwana abe awibitsemo.”

Umuryango AEE ni umwe mu bagize uruhare mu gutoza ababyeyi kuganiriza abana babo ku buzima bw’imyororokere, kandi inyigisho zabo zatumye n’abana batinyuka kugana ibigo by’urubyiruko baherwamo ubumenyi n’ubujyanama bwisumbuye nk’uko bivugwa na Mukandagano.

Agira ati “Iyo umwana w’umukobwa yitabiraga icyumba cy’urubyiruko batangiraga kuvuga ko atwite, ariko ubu byabaye rusange, buri wese aravuga ati nkeneye ubujyanama, akajyayo. Muri icyo cyumba babigisha uko bakwiye kwitwara, bakababwira kwifata, ariko n’uwo binaniye bakamwereka uko yakwitwara kugira ngo adatwara inda itateganyijwe.”

Aloys Giraneza, umukozi wa AEE Rwanda wita ku bijyanye n’ubuzima bw’imyororokere, avuga ko mu Mirenge 11 kuri 14 igize Akarere ka Huye bakoreye mu gihe cy’imyaka itanu, bagiye baganiriza ababyeyi hamwe n’urubyiruko ruri hagati y’imyaka 15 na 18 rutiga.

Urubyiruko rucyiga rwo rwagiye ruganirizwa mu mashuri, bose bakagaragarizwa ko ubuzima bwabo buri mu maboko yabo.

Urubyiruko rutiga kandi rwagiye ruhurizwa mu matsinda yo kubitsa no kugurizanya, kandi ayo matsinda bakayaherwamo ibiganiro bibafasha kugira icyerekezo cy’ubuzima.

Ibi ngo byagiye bituma abana bareka kujya kuzerera, bava mu gakungu no kunywa ibiyobyabwenge bakajya bataha kare, bakibwiriza bagakora uturimo mu rugo iwabo.

Babibwiwe mu munsi mukuru w’ishuri bizihije tariki 14 Ukuboza 2024, ujyanirana no kwizihiza ubutasamanywe icyaha bwa Bikira Mariya ubundi bwizihizwa tariki ya 8 Ukuboza, kuko iri shuri ryaragijwe Bikira Mariya Utasamanywe icyaha (Virgo Fidelis).

Padiri Jean de Dieu Habanabashaka uyobora Seminari Ntoya ya Butare, mu ijambo rye yibukije ko iseminari ubundi ari irerero ry’abasaserudoti b’ejo hazaza, bityo bakaba bakeneye ubufatanye mu babyeyi no mu barezi, kugira ngo abaseminari basubiza ngo “Karame Nyagasani” biyongere.

Yagize ati “Ku baseminari 38 barangije umwaka ushize, batanu bonyine ni bo batubwiye bati dushobora gukomeza muri iyo nzira yo kuba abasaserudoti. Haracyakenewe rero kubigisha, kubaganiriza, ndetse no kubafasha kumva no guhitamo iryo jwi ry’Imana ribahamagara.”

Igitekerezo cye cyunganiwe n’icya Dr. Claudine Karera, umuyobozi wa Komite y’ababyeyi baharerera, wagize ati “Babyeyi, iyo umwana akubwiye ko ashaka kwiha Imana uramubwira uti reka reka ndashaka abakazana n’abuzukuru. Yego kurerera igihugu ni byo, ariko no kurerera Kiliziya ntabwo ari bibi. Iyo turebye ibyo abasaserudoti bagenda bageraho, n’abana bacu bababaye ntabwo byaba ari bibi.”

Yunzemo ati “Umwana afite umuhamagaro, tumushyigikire, turebe aho agana. Ushobora kuzamusunikira mu byo adashaka, bikazamubera umutwaro mu buzima, avuga ko wamushutse.”

Hari uwakwibaza impamvu ababyeyi bajyana abana kwiga mu iseminari nyamara ntibashake ko bakomeza inzira yo kwiha Imana. Janvier Namahoro wize mu Iseminari Ntoya ya Butare, ariko akaba atarakomeje inzira y’ubupadiri, agira ati “Kera hajyagayo abana barushije abandi, kandi bagakomeza gutsinda neza. Ikindi abahiga batozwa ikinyabupfura. Ni byo bituma ababyeyi bashaka ko abana babo bahiga.”

Iki kinyabupfura ni na cyo Musenyeri Jean Bosco Ntagungira yagarutseho, yibutsa abana ko Iseminari atari ishuri nk’ayandi, kandi ko kwitwa Umuseminari bigomba kujyana no kugaragaza ubudasa.

Kubera ko bagiye kujya mu biruhuko, yasabye ababyeyi kubategurira gahunda bazagenderaho, bakazagendera ku kugabanya amasaha 24 agize umunsi mo gatatu: amasaha umunani yo gukora, umunani yo kuruhuka, n’umunani yo gusabana n’abandi.

Yunzemo ati “Bazaruhuke ni byo, ariko ntibakaryame ngo bakangurwe n’umwuka w’inkono itogose mu masaa sita, ngo bongere baryame, izuba nirirenga bahaguruke bajye kubungera. Oya, mubahe gahunda! Kandi bafate n’umwanya wo kumenya imiryango, gusura abavandimwe, gusura bagenzi babo,…”

Kuri ubu mu Iseminari Nto ya Butare hariga abanyeshuri 477, harimo abiga mu cyiciro cya mbere cy’amashuri yisumbuye ndetse n’abiga mu cyiciro cya kabiri mu mashami ya MCB na PCB. Barerwa n’abapadiri umunani babana na bo umunsi ku wundi, bakagira abapadiri bane baza kuhigisha rimwe na rimwe.

Hari n’abandi barimu 14 babigisha mu buryo buhoraho, batandatu baza rimwe na rimwe, n’abandi bakozi bunganira bagera kuri 40.

Habonetse umurambo w’umugabo bikekwa ko yishwe

Umurambo w’uwo mugabo ngo wasanzwe muri metero nk’umunani uvuye ku muhanda nyabagendwa, ndetse ubu ukaba wajyanywe ku bitaro bya Munini, nk’uko bivugwa n’Umuvugizi wa Polisi mu Ntara y’Amajyepfo, SP Emmanuel Habiyaremye.

Iperereza ku rupfu rw’uwo mugabo ubu riri gukorwa, ndetse abantu icyenda bakekwa bakaba bamaze gufatwa aho bari kuri sitasiyo ya Polisi ya Kibeho.

SP Habiyaremye yavuze ko Polisi yihanganisha umuryango wa nyakwigendera ariko anaburira abatekereza kwica agira ati "Turaburira kandi utekereza wese kuvutsa undi ubuzima kubireka kuko uwabigerageza wese, aho yatekereza kwihisha hose agomba gufatwa agashyikirizwa amategeko."

Clémentine Nyirahabimana yigishijwe gukora inkweto nonearabikora abikunze kandi yamaze kwigurira akamashini gasena neza inkweto

Clémentine Nyirahabimana utuye mu Mudugudu wa Kibaga, Akagari ka Nyagisozi, Umurenge wa Musange mu Karere ka Nyamagabe, ni urugero rw’abafashwa bikababera imbarutso yo gutera imbere.

Hamwe n’umugabo we bari babayeho mu bukene, bitwa abahinzi nyamara nta butaka bwo guhinga bafite, ku buryo byabaga ngombwa ko bashaka aho bakorera amafaranga kugira ngo babashe gukodesha imirima. Ntibagiraga n’aho kuba.

Baje kubakirwa na Leta, hanyuma umuryango Compassion utangiye kubafashiriza umwana ubaha ihene n’ingurube. Uyu muryango waje kwigisha ababyeyi b’abana witaho kudoda imyenda no gukora ibikomoka ku mpu maze Clémentine ahitamo kwiga gukora ibikomoka ku mpu ari byo imikandara n’inkweto.

Nyuma y’amezi umunani atangiye kwiga ubu akora inkweto n’imikandara akanasana ibyangiritse, yaniguriye akamashini gaponsa inkweto, ni ukuvuga kazisena, kandi ngo amafaranga yo kukagura yayakuye muri ya matungo bamuhaye.

Agira ati “Ingurube yabwaguye ibyana bitandatu kimwe kirapfa, bine ndabigurisha ikindi ndakiragiza. Ihene yo yabyaye babiri imwe ndayitura indi ndayigurisha, hanyuma nigurira akamashini gaponsa ku bihumbi 100.”

Gukora inkweto na byo byabafashije gutunganya neza inzu yabo kuko yari isanzwe ari ibyondo none ubu bayometseho amatafari ahiye, kandi bakomeje kuyivugurura.

Clémentine Nyirahabimana n’umugabo we, ni urugero rw’uko kuva mu bukene bishoboka, nzu yabo yari ibyondo none bayometsehoa matafari ahiye

Clémentine arateganya kuzakomeza gukora ibikomoka ku mpu, akabyigisha n’umugabo we, bakazakomeza kwagura ibikorwa bakagera no ku ruganda rutoya.

Imitekerereze ye inyuranye n’iya Donatilla Uwitonze na we w’i Nyagisozi mu Murenge wa Musanze, wahawe ihene ngo ikamufasha kubona ifumbire.

Abajijwe ku cyo abona yahabwa kikamuteza imbere yavuze amafaranga, mu gihe ku bijyanye n’icyo yayakoresha ayashyikiriye asubiza agira ati “Navugurura inzu mbamo ikaba nziza.”

Kuri we gushaka ibyo ashoramo amafaranga byatuma ayo ahawe yiyongera akabasha kuba heza, kuko ngo icya mbere ari ukuba heza, ibindi bikaza nyuma.

Abatekereza nka Uwitonze, kimwe n’abafashishwa ikintu runaka ariko kuzamuka bikanga, muri rusange mu Rwanda, batumye Leta yiga ku buryo bushya bwo gufasha abaturage kuva mu bukene bukabije.

Muri ubu buryo, abakennye bahabwa iby’ibanze bibafasha kuzamura imibereho ari byo kugira aho kuba mu gihe batahafite, kubona amafunguro akwiye, ubwisungane mu kwivuza n’ibindi, hanyuma bagahitamo umushinga bakora ubyara inyungu, maze bagahabwa igishoro.

Ibyo byombi biherekezwa n’ubujyanama buhoraho, bugamije kubazamurira imyumvire no kubongerera icyizere, kubahuza na serivisi zitandukanye zitangwa na Leta n’abandi bafatanyabikorwa, no kubafasha gukurikirana wa mushinga ubyara inyungu umunsi ku wundi.

Clémentine kimwe na bagenzi be biganye ubu akora inkweto z’abagabo n’iz’abagore

Ubu buryo bwageze ku ntego ifatika muri Leta ya Bihar yo mu gihugu cy’Ubuhinde, mu Rwanda na ho biyemeje kubugeragereza muri Nyamagabe nk’Akarere gakennye cyane, kuko mu ngo zibarirwa mu bihumbi 95 zihari, izikennye zibarirwa mu bihumbi 49, ni ukuvuga izirenze 1/2.

Muri izo ngo zikeneye gufashwa kuva mu bukene z’i Nyamagabe kandi, basanze izigera ku bihumbi 42 ari zo zirimo abantu bafite imbaraga, bashobora gufashwa bakazamuka.

Ni na zo bateganya kwinjiza muri iriya gahunda bateganya gufashwamo n’umuryango Brac International, mu mushinga wayo Ultra-Poor Graduation Initiative.

Kugira ngo babashe kubigeraho, umuyobozi wungirije w’Akarere ka Nyamagabe ushinzwe iterambere ry’ubukungu, Thaddée Habimana avuga ko bari gukorana n’abafatanyabikorwa b’Akarere bose kugira ngo bafatanye, buri wese agire ibyo yiyemeza gukora, kandi ngo igikenewe kurusha ibindi ni ukuzamura imyumvire y’abagomba gufashwa.

Kugira ngo babashe kubigeraho neza, abafatanyabikorwa bazajya batanga raporo y’ibyakozwe buri kwezi, bityo habashe kumenyekana aho gahunda igeze n’ahakwiye gushyirwa imbaraga.

Imyenda bambaye ni iyo batijwe na bagenzi babo

Ibikoresho bashyikirijwe ni amakaye n’amakaramu n’ibiryamirwa ndetse n’ibikoresho by’isuku, harimo imifariso, amashuka n’uburingiti, ibitenge, inkweto zo kwigana n’izo gukarabiramo, amasogisi, amasabune, indobo, imiti yo kogesha amenyo n’uburoso.

Abashyikirijwe ibikoresho bashima bagenzi babo batagezweho n’iki cyago bagiye babatiza imyambaro, ariko uyu munsi bashimiye by’umwihariko ubuyobozi bw’Igihugu kuba bwabatekerejeho bukabazanira ibyo bikoresho bari bakeneye.

Uwavuze mu izina rya bagenzi be yagize ati “Nshimiye Leta yacu y’u Rwanda. Ni ukuri yagize neza. Abanyeshuri twese muri rusange mureke tuyishimire.”

Bahawe n’biryamirwa birimo imifariso

Ku rundi ruhande ariko, bafite impungenge z’aho bazatwara udukoresho dukeya bazaba bafite batashye, ku buryo bifuza uwabaha n’ibikapu.

Uwitwa Laurence Tuyishimire yagize ati “Habayeho ubushobozi hakaboneka n’ibikapu byadufasha kuzabona uko tugarukana ibindi bikoresho, cyangwa se tukanatira amakaye tukajya kwandikira note mu rugo.”

Cynthia Kanyana na we ati “Icyifuzo ni uko badufasha. Wenda bakaduha ibyo bashoboye, ibindi ababyeyi bakazabishaka.”

Ibikoresho byose bari bafite muri dortoir byarahiye

Ubundi inkongi yibasiye aharara abo banyeshuri yabaye mu ma saa moya na 45 (19h45) zo mu ijoro ryo ku wa Gatandatu tariki 7 Ukuboza 2024. Abanyeshuri bari bavuye gusubiramo amasomo (étude), bitegura kujya ku meza.

Cynthia Kanyana ari mu bari mu cyumba inkongi yaturutsemo. Agira ati “Dortoir ijya gushya nari ndyamye, numva ibintu biraturitse, nkangutse ndebye mbona iri gushya. Turasohoka tujya kubivuga, baraza bagerageza kuhazimya biranga. Umuriro wazimye ari uko irangiye.”

Aba banyeshuri bafashijwe kubona ibikoresho by’ibanze

Tuyishimire wari mu cyumba kindi cy’iyo dortoir na we ati “Twumvise ibintu biturika inshuro ebyiri, tugiye kumva twumva abana biruka bavuga ngo harahiye. Ndareba koko mbona harimo harashya. Harimo abana barwaye baryamye, turabasohora, ubundi dortoir itangira gufatwa cyane bikomeye, hahiramo ibintu byose. Nta kintu na kimwe twasohoye. Harimo abasohotse nta nkweto, hari n’abatari bambaye.”

Umuyobozi w’Akarere ka Nyaruguru, Dr Emmanuel Murwanashyaka, avuga ko iriya nkongi ishobora kuba yaratewe n’umuriro w’amashanyarazi, cyane ko yatangiye nyuma y’uko ngo umuriro wari ubuze kabiri.

Ngo bari kureba ibisabwa kugira ngo yongere isakarwe, kandi ngo uretse gusana ahahiye, barateganya gushyira insinga z’amashanyarazi nshyashya mu nyubako zishaje z’icyo kigo cy’amashuri zose.

Dortoir yahiye yari rwagati mu zindi

Ati “Ni amashuri yatangiye kubakwa muri za 1966. Hari ubusaze bw’inyubako hakaba n’ubusaze bw’insinga z’amashanyarazi. Turimo turareba uburyo byasubira mu murongo.”

Kuri ubu ishuri GS Runyombyi ya 1 ryigamo abanyeshuri 467 harimo abakobwa 258 n’abahungu 209. Dortoir yahiye ni imwe muri esheshatu ziraramo abakobwa zihari.

Muri rusange inyubako za kera zihari zirashaje ndetse zinasakaje amabati ya asbestos.

Bimwe mu bikoresho by’ibanze bahawe

Dortoir yahiye ni imwe muri esheshatu ziraramo abakobwa

Inkongi yibasiye GS Runyombyi mu ijoro ryo ku wa Gatandatu tariki 07 Ukuboza 2024

Iyo ababyeyi barangaye, abana bakinisha insinga

Bivugwa ko ahenshi mu hari iki kibazo ari ahantu hagejejwe amashanyarazi bwa mbere n’abaturage biyegeranyije bakishakira amapoto n’insinga z’amashanyarazi, abaturanyi bakaza gufatiraho.

Icyo gihe abaturanyi bafatiraho, abatanze amafaranga biyegereza amashanyarazi bifuje ko n’abashyashya bagira icyo batanga, babwirwa ko amashanyarazi ari aya bose, ko n’ibindi byakenerwa nko gusimbura amapoto ashaje, Leta yabyikorera.

Kuri ubu amapoto yashyizweho n’abaturage icyo gihe yarashaje ku buryo agenda agwa, byakubitiraho ko nta gufatanya kw’abayifashisha guhari, aguye hasi kimwe n’ayagondamye akabura uyegura.

François Nsigaye utuye mu Mudugudu w’Agakombe agira ati "Twatangiye turi 30 bazanye umuriro, uko abandi bagenda bafatiraho ugenda ucika intege n’amapoto arasaza. Twifuzaga ko badushyiriraho amapoto mashyashya bakatwongerera n’umuriro. Nta wasudira, nta wacana radiyo cyangwa ngo amenye amakuru."

Akomeza agira ati "insinga ziri hasi na zo zidutera impungenge. Abana iyo bari kwahirira amatungo usanga bari kuziterura bakazigizayo. Duhora twikanga impanuka."

Insinga zamanutse mu muhanda zo usanga bisaba abatwaye imodoka ndende kubyitwararika ngo batazingonga.

Hari insinga zamanutse zisatira ibinyabiziga n’abagenzi bakoresha imihanda

Nsigaye ati "Iyo imodoka itwaye nk’umucanga cyangwa ibiti, tandiboyi araterura, yarangara akabikurura bikagwa."

Pascal Mugiraneza na we ati "Hari imodoka zinyura hano zitwaye nk’umucanga cyangwa amabuye. Imwe iherutse guturitsa urusinga, inzu imwe yari igiye gushya, ni uko abantu baje bakavuga bati dore hano hatangiye gucumba umwotsi, nuko urusinga barukuraho. Iyo urebye ubona zizateza impanuka."

Yungamo ati "Ikibazo tukimaranye igihe kinini. Twabigejeje ku babishinzwe, baratubwira ngo bazabikosora, ariko umwaka ugashira undi ugataha, amaso yaheze mu kirere."

Mu Mudugudu w’Agakombe hari n’urugo byabaye ngombwa ko rubika cash power kuko yari yaraguye, hakaba n’aho umuriro wivana muri cash power, hashira nk’ibyumweru bibiri bakabona usubiyemo, nyuma y’igihe gitoya ukongera ukavamo.

Aba bose ngo basabye REG ko yabibakemurira, ariko hashize igihe kinini bategereje ko iza kubikemura, nyuma y’uko bari nababwiye ngo nimutegereze Gato tuzaza kubikemura.

Abatuye muri iyi nzu bibaza niba amashanyarazi atazayitwika

Umuyobozi wa REG mu Karere ka Huye, Omar Kayibanda, avuga ko iki kibazo bari hafi kugikemura kuko bahawe amapoto yo kwifashisha.

Mu butumwa bugufi kuri telefone, yagize ati “Kubafasha twarabitangiye turacyakomeza kandi biri mu nzira nziza.”

Icyakora Kigali Today imaze igihe kirekire ibwirwa ko iki kibazo kiri mu nzira zo gukemuka ariko kirasa nk’aho kitarakemurwa.

Mu mirima, hari aho abahinzi bagenda bigizayo insinga z’amashanyarazi iyo barimo guhinga

Insinga z’amashanyarazi zaguye mu ngo ni zo zibahangayikishije cyane, kuko baba bafite ubwoba ko amashanyarazi ashobora kubicira abana

Hari abagerageza kuzikura hasi bifashishije uduti

Hari amapoto yagwanye na cash power bituma abantu bibaza niba nta kibazo byatera

Hari n’amapoto amaze igihe aguye ku buryo yagiye arengerwa n’ibyatsi

Minisitiri w’Uburinganire n’Iterambere ry’Umuryango asaba abahagarariye Inama y’Igihugu y’Abagore kugira uruhare mu kurwanya ubuzererezi bw’abana n’urubyiruko

Minisitiri w’Uburinganire n’Iterambere ry’Umuryango, Consolée Uwimana, yabigarutseho mu nama aherutse kugirana n’abahagarariye Inama y’Igihugu y’Abagore mu Ntara y’Amajyepfo, abasaba kwita kuri iki kibazo.

Yagize ati "Mu bana bari mu bigo ngororamuco, 70% baba bafite ababyeyi bombi kandi bari mu makimbirane. Muri abo bana, 78% ntabwo baba bararangije amashuri abanza. Harimo na 18% batageze mu ishuri."

Icyo gihe yibutsaga abagize Inama y’Igihugu y’Abagore umukoro bafite wo guharanira iterambere ry’umuryango, barwanya amakimbirane yo mu ngo kandi banarwanya ko abana bata ishuri cyangwa batajya kwiga.

Yunzemo ati "Uyu munsi tuvuga guta ishuri tukabyumva nk’ikibazo gito, ariko abahagarariye inzego z’abagore ntibakwiye kwicara igihe hari umwana wavuye mu ishuri, cyane ko aba bana ari ikibazo cy’umutekano ku gihugu."

Abiganjemo urubyiruko iyo batahawe uburere bwiza bakunze kuba ikibazo ku mutekano

Ku rundi ruhande ariko, abakuriye Inama y’Igihugu y’Abagore bavuga ko hari ibyo bifuza gukora, bakabibuzwa no kutagira ingengo y’imari.

Séraphine Uzamushaka ukuriye Inama y’Igihugu y’Abagore mu Murenge wa Ruheru mu Karere ka Nyaruguru agira ati "Niba ari ahantu umuntu yashoboraga kujya hasaba itike cyangwa amazi, abura uko abigenza akabyihorera. Hari n’abavuga ko batata akazi bakora ngo bajye mu bikorwa bitabahesha amafaranga basigira uri kubahingira mu gihe badahari."

Icyakora, Minisitiri Uwimana avuga ko nubwo nta ngengo y’imari Inama y’Igihugu y’Abagore yagenewe, abayigize bagiye bicara bagategura ibikorwa bifatika batabura ubushobozi bwo kwifashisha.

Ati "Ku Mudugudu bari bakwiye kugaragaza ibikeneye gukorwa n’ibizakenerwa kugira ngo bigerweho, inzego zibakuriye zikabizamurana ubuvugizi, bikagaragazwa mu Nama Njyanama. Babikoze neza, nta rwego na rumwe rutabashyigikira."

Akomeza agira ati "Hari n’ubwo Leta ishobora kutabona ubushobozi, ariko nk’uko tubizi, abafatanyabikorwa bagira uruhare runini mu gufasha. Ntekereza ko byanze bikunze ibyo abagore bapanga neza babibonera ubushobozi."

Yongeraho ko abagize Inama y’Igihugu y’Abagore badakwiye kugendera mu kigare, ngo bahigire gukemura ibitari iwabo, urugero nk’abatuye rwagati mu mujyi usanga bahigira guca amavunja kandi nta muntu uyafite wahabona.

Abahagarariye abagore mu Ntara y’Amajyepfo bavuga ko kutagira ingengo y’imari bibabangamira mu guhigura imihigo bahize

Abiga mu kigo cy’abafite ubumuga bwo kutabona i Kibeho babasha gusoma inyandiko ziri muri word bifashishije udukoresho twitwa Orbit

Alphonse Bikorimana uhigisha amateka, avuga ko ikoranabuhanga ryari ryoroheje kwiga ku banyeshuri kuko bafite udukoresho bita Orbit bifashisha mu gusoma ibyanditse muri word.

Imbogamizi bagira ziterwa no kuba ibitabo byo kwigiramo REB ishyira ku mbuga zayo kugira ngo byifashishwe mu gihe ibicapye bitaraboneka, biba biri muri PDF, nyamara ibikoresho abanyeshuri bafite ubumuga bwo kutabona bifashisha basoma kugeza ubu bikaba byanditse muri word.

Agira ati "PDF kuyishyira muri word kugira ngo isomeke biragorana cyane. Bisaba kongera kubishyira ku murongo, ukuramo amashusho, bikagufata igihe kinini."

Abayobozi basuye ishuri ry’abafite ubumuga bwo kutabona ry’i Kibeho (Education Institute for Blind Children Kibeho)

Avuga ko no kugira ngo abana batabona neza, biganjemo abafite ubumuga bw’uruhu babashe gusoma, bisaba gufata inyandiko ubusanzwe ziba zanditse mu nyuguti z’urugero rwa 12 bakazishyira byibura kuri 14 kuko ibitoya batabibona.

Ku bw’ibyo, gutegura ibyo baha abanyeshuri birabagora kubera ko baramutse bakoze inshamake abana batabasha kubona ubumenyi buhagije, cyane ko bo batabasha kwisomera ibitabo babisanze nko mu isomero nk’uko bigenda ku badafite ubumuga bwo kutabona.

Bikorimana ati "Ntiwakwigisha ibiri mu gitabo byose, ariko bidusaba gutegura amasomo atari mu nshamake, ahubwo arimo ibintu byinshi kuko umwana nta gitabo aba ari bubone."

Umunsi w’abafite ubumuga wijihirijwe i Kibeho tariki 3 Ukuboza 2024

Yungamo ati "Bisaba ko mwarimu akora cyane, akabategurira ibintu bifatika, birimo iby’ingenzi byuzuye umwana azabasha gusoma agasobanukirwa. Bitandukanye n’uko umwana ubasha kureba agenda agafata igitabo agasoma, akunguka byinshi byiyongera ku byo yize."

Bikorimana kandi avuga ko iki kibazo bigeze kukigeza kuri REB, babemerera kuzabazanira ibitabo byanditse mu nyandiko zisomwa n’abafite ubumuga bwo kutabona, ariko amasomo y’amateka ahita ahinduka.

Ati "Byasubije ibintu irudubi. Ubu uretse natwe, n’ibigo bindi ntibirabona ibitabo."

Abanyeshuri biga mu ishuri ry’abafite ubumuga bwo kutabona ry’i Kibeho, na bo bavuga ko bifuza gusoma cyane, ntibabashe kubigeraho kubera ko ibyanditse mu nyandiko babasha gusoma ari bikeya.

Emmanuel Ndayisaba, umunyamabanga nshingwabikorwa w’inama y’Igihugu y’abafite ubumuga avuga ko n’imashini zicapa ibyamaze kwandikwa mu nyandiko abatabona babasha gusoma zigenda gahoro

Joséline Mushimiyimana wiga amateka, ubumenyi bw’isi n’ubuvanganzo, akaba mu bakenera inyandiko nini kuko areba gakeya, ati "Tugeze mu mwaka wa gatanu, na n’ubu ntiturabona ibitabo. Ibitabo ntibihagije."

Akomeza agira ati "Tuba dukeneye n’ibitabo by’inkuru ndende (novels) zivuga nko ku bantu babaye intwari ndetse no ku kuntu abantu babayeho, ariko ntabwo tubibona."

Jean de Dieu Niyonzima wiga mu mwaka wa kane w’indimi n’ubuvanganzo na we ati, "Ibitabo dusoma biracyari bikeya. Kubishyira mu nyandiko yacu biragoranye."

Jean de Dieu Niyonzima, ufite ubumuga bo kutabona, uherutse guhembwa muri 5 ba mbere bagize amanota meza mu bizamini bisoza icyiciro rusange, na we yifuza ko babona ibitabo bihagije babasha gusoma ngo biyungure ubwenge

Tariki 3 Ukuboza 2024, umunsi mukuru w’abafite ubumuga wizihirijwe i Kibeho, ndetse abayobozi bari bawitabiriye bagenderera iryo shuri, banagaragarizwa izo mbogamizi.

Emmanuel Ndayisaba, umunyamabanga nshingwabikorwa w’inama y’Igihugu y’abafite ubumuga, avuga ko na bo biboneye ko gukorera abafite ubumuga bwo kutabona ibitabo bigiramo bivunanye kandi bitwara igihe kinini, kuko nk’imashini zicapa mu nyandiko babasha gusoma zigenda gahoro, mu gihe icyo kigo gifite ebyiri gusa.

Izo mashini zigenda gahoro kandi igitabo cy’impapuro 300 iyo cyanditswe mu nyandiko isomwa n’abafite ubumuga bwo kutabona kiza ari hafi impapuro 1000.

Mu Karere ka Nyaruguru habereye ibirori byo kwizihiza umunsi mpuzamahanga w’abafite ubumuga ku rwego rw’Igihugu

Ati "Hamwe na REB turateganya kubashakira n’indi mashini yo kuba bifashisha mu gihe hakiri kurebwa ko kubera iterambere ry’ikoranabuhanga hatabobeka izihuta (imashini)."

Yongeraho ko kuba muri REB hasigaye hari ishami rishinzwe uburezi budaheza, bafite icyizere ko n’izindi nzitizi mu myigire y’abafite ubumuga zizagenda zikurwaho.

Marie Solange Kayisire, umunyamabanga wa Leta muri Minisiteri y’ubutegetsi bw’Igihugu, wari witabiriye kwizihiza umunsi w’abafite ubumuga yibukije ko Leta ikomeje gukora byinshi, mu kwita ku bafite ubumuga.

Umunyamabanga wa Leta muri MINALOC, Kayisire Marie Solange

Ni muri urwo rwego hashyizwe imbaraga mu gutanga insimburangingo, hagashyirwaho amashuri afasha abafite ubumuga, hagashyirwaho inkoranyamagambo y’ururimi rw’amarenga, n’imikino n’imyidagaduro ku bafite ubumuga.

Yavuze kandi ko hari ibizakomeza kwitabwaho nk’uburezi budaheza, ubuzima, gukomeza gufasha abafite ubumuga batishiboye hagamijwe kubafasha kwiteza imbere.

Umwe mu bafite ubumuga bwo kutumva no kutavuga agerageza gusobanura iby’umukobwa mugenzi wabo wabyaye ubu akaba ari mu bukene bukabije

Ibi babivuga bababaye kubera ko ngo mu bihe bitandukanye bagiye bandikira ubuyobozi babusaba ubufasha, bagategereza igisubizo bagaheba.

Ibi kandi ahanini ngo bituruka ku mbogamizi yo kutabasha kwigereza ibibazo aho bizera ko byakumvwa kubera ko batabasha kumvikana n’abakabahaye serivisi.

Uwitwa Félix Karangwa uyobora Koperative Nyereka Ibiganza, yibumbiyemo abafite ubumuga bwo kutumva no kutavuga b’i Huye, mu mvugo ye isaba kumukurikira cyane ariko ukamwumva, agira ati "Twandikiye Akarere tubasaba kudufasha kwitabira kwizihiza umunsi w’abafite ubumuga bwo kutumva no kutavuga uheruka kubera i Gisenyi, habura iminsi itanu ngo umunsi ube batubwira ko iyo baruwa batayibonye."

Uwo munsi wizihizwa mu cyumweru cya 3 cy’ukwezi kwa Nzeri, buri mwaka.

Ibyo byabaye nyuma y’uko bagombaga kujya gukina umupira w’amaguru i Kigali, bagasaba imodoka n’imyenda ya siporo ndetse n’amazi. Icyo gihe na bwo bagiye kwibutsa bababwira ko icyifuzo cyabo batakimenye.

Agira ati "Twirwanyeho, abakinnyi birwanaho baratega. Kandi abandi twahuriyeyo buri wese Akarere kari kamuhaye ibihumbi 60 byo kubona amazi n’ibyo kurya n’ay’urugendo. Naho twebwe, no gutaha twabigezeho bitugoye."

Abafite ubumuga bwo kutavuga no kutumva b’i Huye banavuga ko babona abafite ubumuga bw’ingingo ari bo bitabwaho kuko bugaragara n’inyuma, naho bo kuko batanabasha kwivugira, n’ubumuga bwabo ukaba utapfa kubumenya ukibabona, bakibagirana.

Ikindi, ngo hari umukobwa mugenzi wabo watwise, abyara imburagihe babona akwiye kwitabwaho kuko abayeho mu bukene bukabije.

Egide Habakubana, umukozi ushinzwe gukurikirana ishyirwa mu bikorwa ry’imishinga mu Muryango Nyarwanda w’abafite ubumuga bwo kutumva no kutavuga, avuga ko muri rusange kutumvikana n’abandi bantu bituma abo bakurikirana bakeka ko ari ukubirengagiza nyamara atari byo.

Agira ati "Mu byiciro birindwi by’abafite ubumuga dufite, buri wese yumva ko yibagirana, noneho bo kubera kutabasha kumvikana bagakeka ko hari ukuntu abandi bo bumvwa."

Akomeza agira ati "Twifuza ko iki kibazo cyakemuka. Byibuze kuri buri rwego rutangirwaho serivisi haba mu buyobozi, kwa muganga, mu burezi hakaba byibuze umuntu umwe uzi ururimi rw’amarenga wamufasha igihe ahageze, ibibazo bye bikabasha kumvikana."

Undi muti kuri iki kibazo ngo ni uko ururimi rw’amarenga rwagirwa rumwe mu zikoreshwa mu Rwanda, bityo rukigwa no mu mashuri.

Habakubana ati "Mu mwaka ushize hemejwe inkoranyamagambo y’ururimi rw’amarenga none ubu turimo turakora ubuvugizi ku buryo habaho ko ururimi rw’amarenga rwakwemerwa nk’izindi ndimi zikoreshwa mu gihugu."

Mu rwego rwo gukemura iki kibazo cy’abafite ubumuga bwo kutumva no kutavuga, hari Uturere twagiye dushaka abigisha bamwe na bamwe mu bakozi batwo ururimi rw’amarenga, ariko abagiye barwiga bavuga ko iyo hashize igihe utarukoresha, ubyibagirwa.

Kayitare Léon Pierre, umukozi w’Akarere ka Huye ushinzwe abafatanyabikorwa (JADF) ati "Nigeze kwiga ku marenga gato, ariko n’ibyo nari nize narabyibagiwe. Sinabasha kuganira na bo nifashishije amarenga. Bisaba umusemuzi. Mu gihe ururimi rw’amarenga tutararumenya, bakeneye abasemuzi mu nzego zose."

Ibarura rusange ry’abaturage rya gatanu mu Rwanda ryo mu 2022 ryagaragaje ko abafite ubumuga bari hejuru y’imyaka itanu mu Rwanda, ari ibihumbi 391,775 kandi ko muri bo, abafite ubumuga bwo kutumva no kutavuga ari ibihumbi 66,272.

Hari abatuye i Nyaruguru bavuga ko hari intambwe imaze guterwa mu buringanire n’ubwuzuzanye

Nk’uwitwa Gaspard Niyirora w’imyaka 70, avuga ko nko mu myaka irindwi ishize, ingo nyinshi zarangwagamo ihohoterwa, rikorewe ahanini abagore.

Agira ati “Barakubitwaga cyane ku buryo bajyaga iwabo bakamarayo iminsi myinshi, bakazataha bafite inzoga iwabo babatekereraga. Iyo umugabo yahozaga umugore ku nkeke, n’aho umugore avuka babaga bafite ikibazo cyo gushaka ibyo bazamutekerera ngo akunde atahe.”

Yunganirwa na Donatha Nyiramana uvuga ko icyo gihe umugore atavaga mu rugo, agakora imirimo yaho gusa, nta n’uburenganzira afite ku mutungo wo mu rugo, ariko ubu ngubu ngo basigaye bajya no gushakisha amafaranga kandi ntibibateranye n’abo bashakanye.

Ati “Turajya mu bimina, ukaba uzi ko uri butange 1000 cya buri cyumweru, ukagenda ukahakura ibihumbi 50 ukaza ukikenura, ukahakura ibihumbi 60 ukaza mu rugo ukagura imbuto, utwenda tw’abana, igitenge cyawe, ukagira n’agatungo ukagashyira mu rugo, ukabona umugabo ntacyo bimutwaye, mugakomeza mukanabana neza.”

Nyiramana akomeza avuga ko ngo hambere n’iyo mu rugo habaga hari inzoga yikubirwaga n’abagabo bahamagaraga bagenzi babo bakayisangira, umugore atemerewe gusomaho, ariko ubu byarahindutse kuko abasha no kuyigurira akagurira n’umugabo ndetse na we akamugurira.

Ati “Yaramubwiraga ngo umugore ni uwo kurya ibijumba n’ibishyimbo, si uwo kunywa agacupa nk’abandi bose. Ariko ubungubu uramubwira uti, nabonye ibihumbi 20 ngwino dukuremo bitatu tubinywemo agacupa. N’umugabo ayafite araguhamagara pe! ”

I Busanze banavuga ko n’ubwo hari abagabo usanga hamwe na hamwe batishimiye kuba n’abagore barahawe uburyo bwo gukora ku ifaranga bityo ntibabashe gukomeza kubatsikamira, hari benshi bamaze kubona ko uburinganire n’ubwuzuzanye ari bwiza.

Gaspard Niyirora agira ati “Ntacyo bintwaye. Kuko niba umugore afite amafaranga, nanjye sindi buburare. Ngomba kumenya ko niba yagiye gucuruza nkasigara mu rugo menya amatungo, nkanateka. Nkifite abana mu rugo sinabikoraga, ariko ubu ngubu nsigaranye n’umukecuru twenyine. Batsikamiwe ku bwa ba sogokuru na ba sogokuruza, ariko ubu ngubu turafatanya.”

Na none ariko ngo nta byera ngo de. N’ubwo hari abagabo bakeya batarumva neza uburinganire n’ubwuzuzanye, hari n’abagore bakeya batarumva ko uburinganire n’ubwuzuzanye atari ukwigaranzura abagabo, bituma babafata nabi.

Niyirora ati “Hari ababanira abagabo babo nabi, bakagira imibereho mibi, bigatuma bahukana bakigendera ku buryo hari n’abahezeyo. Hari n’abagore banga kurarana n’abagabo babo. Hari abo nzi bo mu kigero cyanjye bafashwe nabi batyo kugeza bapfuye.”

Abakuze bavuga ko basanze umugabo wemera gufatanya n’umugore we urugo rwabo ruzamuka, bityo bakanagira inama abagore n’abagabo batarumva neza uburinganire n’ubwuzuzanye.

Espérance Mukamabano w’imyaka 66 ati, “Abantu bose bakwiye kumenya ko uburinganire turimo atari ubwo gutesha umugabo agaciro, cyangwa na none ngo umugore niba umaze kumuzana umukandamize ngo ntafite ijambo, ngo wamukuye iwabo ntacyo azanye, bityo umukure ku nsina, ku ishyamba, ku nka, ngo byose ubyikubire, hanyuma aze kugusabiriza mu byanyu.”

Batandatu bakekwaho kwiba moto no kwambura abantu muri Tumba na Ngoma bafashwe

Mu bafashwe umuto muri bo afite imyaka 19 naho umukuru afite 48. Bane muri bo bakekwaho kwiba moto z’abaturage, ndetse banafatanywe moto ebyiri bikekwa ko ari izo bibye, naho umwe akekwaho gukoresha iri tsinda no kubagurira moto bibye, mu gihe undi akekwaho ubujura bwo gutega abantu akabambura.

Aba bose bafungiye kuri station ya Polisi ya Ngoma kugira ngo bashyikirizwe Ubugenzacyaha.

Umuvugizi wa Polisi y’u Rwanda dukesha aya makuru, arasaba abaturage gukomeza ubufatanye mu gutanga amakuru, akaburira n’abishora mu byaha kubireka.

Agira ati, "Polisi dukomeje ibikorwa byo kubafata aho bari hose."

Uwineza yasanze ibye byose byasohowe mu nzu

Avuga ko yari yagiye mu kabande gushaka ibiti byo gutera, abaturanyi bakamuhamagara bamubwira ko Abapolisi bari kumwe n’umuhesha w’inkiko witwa Emmanuel Habyarimana baje bakica urugi, bakinjiza abantu bagasohora ibyari mu nzu bakabijugunya hanze, n’inzu bagasiga bayishyizeho ingufuri bakigendera.

Agira ati "Bamaze kubimbwira, nahamagaye Gitifu w’Akagari n’uw’Umurenge ngira ngo mbabaze niba ibyo nari ndi gukorerwa mu rugo babizi bambwira ko batabizi. "

Imvano ya biriya ngo ni uko inzu abanamo na murumuna we hamwe na musaza we bayisigiwe na mama wabo, bakaba bari kuyiburana na mukase wa nyina, Kana Marie, wari warayigurishije n’uwitwa Alexis Ntakababaza hanyuma akigira i Burundi. Ngo hari muri za 2004.

Uwineza ati "Icyo gihe abana Kana Marie yari abereye mukase bamenye ko yagurishije iyo nzu baramurega, abaresiponsabure n’abakonseye bababwira ko yagurishije agatwara amafaranga akagenda, ko ntaho bamukura."

Akomeza agira ati "Baregeye mu rukiko rwa Kanto, rwanzura ko mukase yagiye kandi ko rutareka uwaguze na we ahomba, bababwira kumugurira. Mama (Thérèse Habonimana) ari na we wari ufite amafaranga yishyura Alexis ibihumbi 300 yari yatanze, yongeraho 50 yari yifashishije acukurisha anubakisha umusarane."

Me Habyarimana yari yandikiye Uwineza integuza

Thérèse Habonimana yaje kuva mu Rwanda, maze Uwineza, nk’umwana we w’imfura, ajya kuba muri ya nzu. Hari mu mwaka w’2009. Kana Marie abimenye ni bwo yagarutse ashaka kwisubiza ibyo yari yaragurishije.

Icyo gihe abari abayobozi bari bamusinyiye agurisha, bamubajije impamvu agarutse nyamara yari yagurishije, abima amatwi maze yiyemeza kurega Uwineza, asaba ko amuvira mu bye.

Uwineza yamutsinze mu bunzi, amutsinda mu rukiko rw’ibanze n’urwisumbuye. Mu rwisumbuye umwanzuro wabaye itegeko hanyuma Uwineza aheshwa iby’umuryango, ariko Kana ntiyashirwa noneho asubira mu rukiko rw’ibanze rwa Gisagara, arega Alexis ngo yari yarasigiye ibye, Uwineza ahamagarwa mu rubanza nk’uwabaga mu nzu yaburanwaga.

Icyakora ubwo urubanza rwabaga ntiyari ahari kuko yari arwaye, uretse ko na Alexis uregwa na we atari ahari kuko ngo atarongera kumubona nyuma yo kwamburwa iyo nzu. Icyo gihe urubanza rwarabaye, urukiko rwemeza ko Kana agomba gusubirana ibye.

Abavandimwe ba Uwineza bahise biyemeza na bo gutambamira urubanza, ku buryo hari ibikiri mu rw’ibanze i Gisagara, n’ibigeze mu bujurire i Nyanza. Ariko ibyo umuhesha w’inkiko Habyarimana yarabyirengagije aza kururangiza.

Me Habyarimana yari yabujijwe kuza kururangiza kuko bakiri mu manza

Yandikiye Uwineza amuha iminsi itanu yo kuba yamaze kuva mu nzu, n’ubwo ubusanzwe aba agomba gutanga 15, itariki yamuhaye ayimutegerezaho agira ngo amwereke ko inzu ikiri mu manza ntiyaza, hanyuma aza ku munsi atari amwitezeho, atanahari, atanamumenyesheje.

Ngo uretse umwana wa Uwineza urwaye mu mutwe, nta wundi wo mu rugo wari uhari.

Ati "Ubu nta kintu na kimwe nzi aho kiri, mu byo basohoye harimo n’amafaranga y’itsinda mbamo nari mbitse. Mfite ubwoba ko na yo ntari buyabone."

Ibi bibaye nyuma y’uko Uwineza yari akimara kubona ibaruwa imusaba kuva mu nzu yari yandikiwe na Me Habyarimana, maze yandikira inzego z’ubuyobozi na Polisi abasaba kutazaza gufasha kurangiza urubanza rwatambamiwe, ariko Uwineza ngo yatunguwe no kumva ko uwo muhesha w’inkiko yazanye n’Abapolisi.

Kandi ngo hari n’undi muhesha w’inkiko Kana yari yashatse mbere, we bamusobanuriye iby’imanza zikiri kuburanwa ntiyarurangiza.

I Kibeho haba hateraniye abantu benshi ku buryo hari abarara mu kibuga kubera kubura amacumbi

Nk’uko bivugwa n’ubuyobozi bw’Akarere ka Nyaruguru, abasura Kibeho kuri iyo minsi mikuru baba ari benshi cyane, ku buryo nko ku wa 28 Ugushyingo 2024 haje abatari munsi y’ibihumbi 30, naho ku wa 15 Kanama 2024 haje ababarirwa mu bihumbi 80.

Nyamara n’ubwo abubaka amacumbi bagenda biyongera, amacumbi aracyari makeya cyane. Amacumbi agenda yiyongera kuko mu mwaka wa 2020 habarirwaga ibyumba byo kuraramo 135 gusa, ariko kuri ubu hakaba habarirwa ibigera kuri 300 biri mu mahoteli, amamoteli n’amacumbi asanzwe hamwe n’ibyumba birimo ibitanda byinshi byakira abatari munsi y’igihumbi.

Birumvikana ko abatabashije kubona amacumbi muri ibyo byumba batanaziranye n’abatuye i Kibeho ngo babacumbikire barara hanze bicwa n’imbeho, n’imvura yagwa ikabanyagira.

Icyakora, umuyobozi w’Akarere ka Nyaruguru, Emmanuel Murwanashyaka, avuga ko ubutumwa bushishikariza abantu kubaka amacumbi badahwema gutanga burimo kugenda butanga umusaruro kuko hari abantu bamaze guhabwa ibyangombwa byo kubaka amacumbi, hakaba hari n’abandi barimo gutangira kubisaba.

Agira ati “Mu bagiye kubaka amacumbi i Kibeho harimo Papal Fondation, Diyosezi Gatolika ya Gikongoro, EAR Diyosezi ya Nyaruguru, n’abajyanama b’ubuzima.”

Hifuzwa ko habaho n’amacumbi yakwigonderwa n’abakene

Mu bagenda i Kibeho, kimwe n’abahatuye bakunze kwitegereza abahagenda, hari abavuga ko haramutse habonetse amacumbi aciriritse nk’arihwa amafaranga igihumbi, byarushaho kuba byiza.

Imodoka ziba zazanye abafite ubushobozi ni nyinshi

Uwitwa Jean Baptiste Manirarora agira ati “Mu by’ukuri amacumbi ntahagije. Abafite ubushobozi, aha makeya ni ibihumbi bitatu ariko hari n’aha bitanu, cumi na bitanu, kuzamura. Abatayabonye, hepfo ahangaha hari amahema abantu bajyamo bakararamo, ku buntu. Hashobora kujyamo abatarenze 500. Iyo huzuye, hano hose ku mbuga baraharyama.”

Akomeza agira ati “Hagombye kubaho n’aho abantu bishyura byibura amafaranga igihumbi, kugira ngo n’abadafite ubushobozi babashe kuhigondera, kuko ibihumbi bitatu ari byinshi.”

Illuminée Nyinawumuntu na we ati “Habonetse n’abubaka amacumbi yishyurwa amafaranga igihumbi byafasha benshi kubera ko hari abarara hanze ku bw’ubushobozi bukeya.”

Uretse amahoteli, hari n’amacumbi aciriritse, gusa aracyari makeya

Urubyiruko rw’i Gisagara rurashishikarizwa gushishoza, rukirinda abarugusha mu ngeso mbi bibaviramo gutwita na bo bagikeneye kurerwa

Muri uyu Murenge w’Akarere ka Gisagara kandi, mu mwaka ushize wa 2023 hari habonetse abangavu babyaye bagera kuri 51 kuri 239 babonetse mu Mirenge uko ari 13 igize aka Karere kose.

Naho imibare itangwa n’ikigo gishinzwe ubuzima (RBC), igaragaza ko n’ubwo guhohotera abangavu bihora byamaganwa, umubare w’abahohoterwa utagabanuka.

Iyo mibare igaragaza ko mu Rwanda hose, mu mwaka w’ingengo y’imari 2021-2022 abana bari munsi y’imyaka 18 babyariye kwa muganga ari 5432 naho abakuyemo inda mu buryo bwemewe ari 1384.

Muri 2022-2023 habyaye 5702 hakuramo inda 1959 naho mu mwaka ushize w’ingengo y’imari (2023-2024) habyaye 5656 hakuramo inda 2201.

Ni ukuvuga ko mu gihe cy’imyaka itatu, ababyariye kwa muganga ari 22446, abazikuyemo bakaba 5544, kandi muri rusange abatewe inda bafashijwe n’abaganga ari ibihumbi 22334.

Mu babyeyi batuye i Mamba hari abavuga ko ntako baba batagize ngo bagire inama abana babo ku buryo bagomba kwitwara, nk’uko bahora babyibutswa, ariko iki kibazo ntigicike.

Nk’uwitwa Donatha Hagenimana agira ati “Iby’abana b’iki gihe sinzi uko nabavuga. Niba navuga ko bashyushye, byaratuyobeye! Tubajyana mu nzu tukabigisha, tukabereka ingaruka, tukabereka ukuntu barimo biyonona, ariko nyine tukanga tukabona batwise, tukabura uko twabigenza.”

Yungamo avuga ko hari n’aho ajya agera agasanga abana bananiranye. Ati “Abana bashaka kwitwara uko biboneye. Hari aho njya ngera ngasanga babahanura ariko badashaka kumva. Iyo umwana yatangiye kwinjira muri ibyo bintu, imyitwarire ye irahinduka, ukabona afite ubukana, ukabona arashaka kwiyobora. Ababyeyi bakavuga wapi aho kugira ngo umwana yumve ukabona aratera hejuru.”

Clémentine Musabyemariya w’i Kinazi mu Karere ka Huye, avuga ko mu myitegerereze ye yasanze hari n’abana bashukwa n’abagabo baba bagenda bimuka ku bw’akazi, aho bageze bakigira abasore bakababeshya urukundo, maze bakabandagaza.

Ati “Hari nk’umugabo uba warataye urugo, yagera ino aha akigira umusore, akahafata umukobwa amubeshya ko nta mugore afite, ugasanga na we aramwandagaje. Ari uw’aho yavuye ntamutunze, n’uw’ino aha akamuta, akajya ahandi.”

Asaba rero abakobwa gushishoza, agira ati “Aho kujya mu bagabo bafite abandi bagore kandi batazabatunga, bategereze ababo. Umuntu arihangana akazagera aho akabona uwe.”

Denyse Dusabe, umuyobozi wungirije w’Akarere ka Gisagara ushinzwe imibereho myiza

Umuyobozi wungirije w’Akarere ka Gisagara ushinzwe imibereho myiza, Denise Dusabe, asaba abana gushishoza.

Ati “Ese wowe mwana utangiye kugirana ikiganiro n’umuntu runaka, utazi, utazi inkomoko ye, bite? Ni byiza ko abana bagira amakenga ku bo bahura na bo, kugira ngo bakumire, banirinde.”

Asaba n’abagabo bahohotera abana gusigaho, abibutsa ko icyaha cy’ihohotera rishingiye ku gitsina kidasaza.

Ati “Twababwira ko uyu munsi bacira, kuko birarura. Umuryango tuwukomeyeho, turifuza gufatanya, kandi na bo birabareba. N’iyo akoze icyaha uyu munsi ntafatwe, icyaha cy’ihohotera rishingiye ku gitsina ntigisaza, igihe cyose yafatwa, agashyikirizwa ubutabera.”

Ingingo y’133 y’itegeko Nº68/2018 ryo ku wa 30/08/2018 riteganya ibyaha n’ibihano muri rusange ivuga ko iyo uwasambanyije umwana abihamijwe n’urukiko, ahanishwa igifungo kitari munsi y’imyaka makumyabiri (20) ariko kitarenze imyaka makumyabiri n’itanu (25).

Iyo gusambanya umwana byakorewe ku mwana uri munsi y’imyaka cumi n’ine (14), igihano kiba igifungo cya burundu kidashobora kugabanywa kubera impamvu nyoroshyacyaha.

Naho ingingo y’136 yo ivuga ko uwashyingiwe ukora imibonano mpuzabitsina n’uwo batashyingiranywe na we aba akoze icyaha. Iyo abihamijwe n’urukiko ahanishwa igifungo kitari munsi y’amezi atandatu ariko kitarenze umwaka umwe.

Abahinga icyayi barifuza gufashwa kugera no ku bindi bikorwa by’iterambere

Muri rusange bishimiye umushinga wo guhinga icyayi kuko kibaha amafaranga, ariko usanga bavuga ko basanze icyayi cyonyine ntaho cyazabageza.

Hari abo usanga bagira bati: "Guhinga icyayi byadukuriyeho inkongi kuko hari abatwikaga amashinge bashaka aho baragira."

Abandi bati: "Byadukuriyeho kujya guca inshuro za Bwanamukari na Bugesera."

Abandi na bo bati: "No kumva baguhamagara utize ishuri, iwanyu barakubujije kwiga, ku kwezi ngo ngwino ufate amafaranga biratunezeza! Niba nta n’icyo akumariye, ariko byibura buri kwezi urambara ngo ngiye gufata amafaranga."

Aba bose ni na bo bahindukira bakavuga ko basanze gutegereza amafaranga avuye mu cyayi cyonyine ntaho bizabageza.

Nk’uwitwa André Mutabazi utuye mu Mudugudu wa Nkomero, Akagari ka Nyange, Umurenge wa Kibeho, agira ati: "Urabona batwigishije guhinga icyayi, abenshi mu bakene bidufasha gukora ku ifaranga. Ariko iyo twitegereje tubona hari n’ukuntu tudatera imbere."

Yihereyeho akabona ukuntu atarabasha kwigurira n’itungo ryamufasha kubona ifumbire, yifuza ko yagurizwa amafaranga yo kurigura, kuko abona ari byo byamufasha, cyane ko amafaranga n’ubwo ayabona, yisanga yashize nta terambere amusigiye.

Ati "Nta gahene, nta kagurube, [...] Uwo mushinga w’icyayi gusa nta hantu wageza umuntu. Amafaranga urayabona, ariko ugahita uyaha umukozi wiriwe mu cyayi akibagara. Nibadufashe tubashe no korora, tubone ibishingwe duhinge ibirayi, inyanya, amashu, maze Nyaruguru ive muri bwa bukene burundu."

Spéciose Mukandori utuye mu Mudugudu wa Mubuga, Akagari ka Mubuga, Umurenge wa Kibeho, avuga ko amatungo yabashije kuyageraho, ariko icyo akeneye ari ubundi bumenyi bwatuna abasha kugira ibindi akora bitari ubuhinzi.

Ati: "Burya rero guhinga byonyine, nta kintu byakugezaho. Twigishijwe nko gukora amasabune cyangwa amavuta tukabijyanirana na bwa buhinzi, byadufasha. Twajya tubikora igihe tutagiye mu cyayi."

Akomeza agira ati: "Amafaranga turayabona pe, akanatugirira umumaro kuko tubasha kugura isabune, umwenda wo kwambara, ibikoresho by’abanyeshuri, ukagira n’utubazo duto duto akemura. Ariko nyine, igikorwa kimwe ntabwo cyaguteza imbere. Twize na ya mishinga, byadufasha kugera ku iterambere twifuza."

Abahinga icyayi mu Murenge wa Kibeho bakorana n’umushinga SCON ubaha inguzanyo bifashisha mu kugihinga, bakazagenda bishyura gake gake. Ni mu rwego rwo kugira ngo uruganda rw’icyayi rwa Kibeho ruzabashe kubona icyayi gihagije cyo gutunganya.

Vincent Hategekimana uyobora SCON avuga ko guhera mu mwaka utaha bazatangira guhugura abahinzi bakorana ku mikoreshereze y’amafaranga.

Agira ati: "Ku masomo yo guhinga icyayi twabahaga turateganya kongeramo n’iryo kubahugura ku mikoreshereze y’amafaranga, ku buryo amafaranga babona mu cyayi bayashyira no mu bindi bikorwa kugira ngo bakomeze kwiteza imbere."

Ayo masomo ubusanzwe ngo bayabahera mu mashuri yo mu murima, kandi ni na ho bateganya kuzabigishiriza n’ibijyanye n’imikoreshereze y’amafaranga.

Abakekwaho ubujura bafashwe mu Murenge wa Gasaka

Abafashwe bari mu kigero cy’imyaka hagati ya 19 na 34, harimo ab’ igitsinagabo icyenda n’umwe w’igitsina gore, ubu bakaba bafungiye kuri sitation ya polisi ya Gasaka, nk’uko bivugwa n’Umuvugizi wa Polisi y’u Rwanda mu Ntara y’Amajyepfo, SP Emmanuel Habiyaremye.

Agira ati “Bakekwaho gutega abantu bakabambura bakanabakomeretsa, umwe muri bo akaba yanafatanywe icyuma bikekwa ko yifashishaga akomeretsa abantu.”

Yungamo ati “Turasaba abaturage kutemera guturana n’abantu nk’aba bahungabanya umutekano kuko nta mahoro ushobora kugira igihe cyose muturanye. Bakomeze kuduha amakuru, bafatwe.”

SP Habiyaremye anavuga ko polisi ikomeje ibikorwa nk’ibi byo gushakisha no gufata abajura, kandi ko nta gahenge bashobora kubaha.

Ni mu gihe i Kibeho bitegura kwakira abantu benshi bazahaza ku wa Kane w’icyumweru gitaha, baje kuhasengera nk’uko bigenda buri mwaka, bitabiriye kwizihiza isabukuru y’amabonekerwa iba ku itariki ya 28 Ugushyingo.

Mu bafashwe harimo ab’igitsina gabo bane n’ab’igitsina gore batatu, bari mu kigero cy’imyaka hagati ya 19 na 40. Mu byo bafatiwe harimo kwiba abaje gusenga i Kibeho bakabatwara amasakoshi, za telefone, kwiba imyaka, n’ibindi nk’uko bisobanurwa n’Umukuru w’Umudugudu w’Agateko, Aloys Habyarimana.

Agira ati “Abo bantu bafashwe ku bwo guteza umutekano muke bakora ubujura, gukora urugomo, gutega abantu bakabakubita, bakabambura telefone n’ibindi baba bafite. Ku bagabo hakiyongeraho guhohotera abagore babo iyo batashye basinze.

Thérèse Nyiramana na we utuye i Kibeho ati “Ino aha haba abajura biba inka bakabuza abantu kuryama, babona n’iyo hene cyangwa n’uwo mwenda bagatwara, nako iyo bageze mu nzu ntacyo basiga. No gutega abantu mu muhanda nk’uku nguku nka saa mbili, saa moya ugiye nko guhaha bwakwiriyeho, bakubonana ako gatelefone bakagakwabuza…”

Nubwo abafashwe ari bakeya ugereranyije n’abakora ibyaha, abatuye i Kibeho bavuga ko bizeye agahenge.

Nyiramana ati “Agahenge karahari, gusa nyine baba bafite abandi bagira uko bavugana. Icyakora iyo babonye havuyemo umuntu bahita bagira ubwoba.”

Umunyamabanga Nshingwabikorwa w’Umurenge wa Kibeho, Aphrodice Nkurunziza, arasaba abakora ubujura kubireka, bagakura amaboko mu mifuka bagakora, kuko imirimo itabuze iwabo.

Agira ati “Turasaba abaturage bacu kureka imico mibi y’ubujura, ahubwo bitabire umurimo, bakoreshe amaboko yabo, bareke gushaka kurya ibyo bataruhiye.”

Yongeraho ko kuri ubu bafite ahantu hari gukorwa amaterasi hakeneye abakozi benshi, ku buryo bakwishimira kwakira benshi bashoboka kugira ngo imirimo irangire vuba, kuko kuri ubu bari gukoresha abagera ku 1900 gusa kandi bakeneye gutunganya hegitari zigera ku 100.

Yungamo ati “Dufite n’ubuhinzi bw’icyayi turimo turagitera, tukakibagara tukanasarura. Imirimo irahari. Uretse ko nta n’umuntu nabonye wakijijwe no kwiba. Nta mpamvu yo kwiroha mu bujura.”

Polisi y’u Rwanda irashimira abaturage bakomeje gutanga amakuru ku bahungabanya umutekano, ibasaba gukomeza ubwo bufatanye, ikaburira kandi abishora mu byaha ko polisi ikomeje ibikorwa byayo byo kubashakisha no kubafata.

Irabasaba kuva mu byaha ahubwo bagafatanya n’abandi mu gukumira no kurwanya ibyaha, batangira amakuru ku gihe.

Abahagarariye amakoperative amwe n’amwe yo mu Ntara y’Amajyepfo basobanuriwe gahunda ya Kungahara na BK

Mu byo abahagarariye amakoperative basobanuriwe kuri ubu bwoko bw’inguzanyo, harimo kuba BK itanga inguzanyo y’amafaranga atarenze miriyoni 50, yishyurwa mu mezi 12, ku makoperative ahinga umuceri, icyayi n’ibigori, ingwate ikaba ubwishingizi.

BK kandi yagennye inguzanyo kuri fagitire aho amakoperative ahabwa inguzanyo yo kwifashisha mu kwishyura abanyamuryango mu gihe rwiyemezamirimo atarabishyura, ikaba yishyurwa mu gihe cy’amezi atatu.

Abasobanuriwe iby’iyi nguzanyo bayishimiye, bavuga ko izabafasha cyane cyane igihe abanyamuryango bakeneye amafaranga byihutirwa nyamara "batarahembwa.

Uwitwa Claude yagize ati "Hari ukuntu umuntu aba akeneye amafaranga byihutirwa nk’ay’ishuri, akareba aho kugira ngo umwana agume mu rugo ngo amasomo amucike, ati reka nemere mfate ariya mafaranga, nunguke udufaranga dukeya, ariko umwana ajye ku ishuri."

Hari abatari basanganywe konti muri BK bahise bazifunguza

Bashimye kandi kuba BK yarakuyeho gukata amafaranga ya buri kwezi ku bahafite konti.
Nka Elias Uzabakiriho uvuga ko nta gihe kinini gishize akorana na BK kuko yafunguje konti muri 2023 ati "BK iratanga serivise nziza ku bakiriya, isigaye imanuka ikegera abakiriya.

Bagufungurira konti aho uri, bakagusura, bitandukanye n’uko bakoraga mu minsi yashize."
Yungamo ati “BK iraza ikareba ngo ni iki uri gukora nyir’izina, yasanga ubirimo neza ikaguha andi mafaranga yasanga utabirimo ikakugira inama."

Beatrice Nkundiye we ati "BK Itanga amafaranga neza, igatanga n’inguzanyo neza idasiragije umuntu, nta kindi kintu twayinenga."

Bashimye imikorere mishyashya ya BK

Undi na we ati "Twari tuzi ko ari banki y’abakire bajyanaho amafaranga menshi bakabika, twebwe mu buhinzi tukumva yuko udufaranga twatujyana ahandi ariko batugaragarije ko uko angana kose tuzajya tuyajyanayo. N’ubwo yamarayo umwaka wose, tuzajya tuyasanga ari ko akiri."

Umukobwa yashwanye n’umusore babyaranye yiyahuza umuti udukoko

Nk’uko bivugwa n’abageze aho uyu mukobwa yari ari, ari kuruka ibintu by’umweru, nyuma yo kunyweshwa amata ku gahato, ngo bamenye ibyabaye ubwo babonaga nyina wari wahurujwe yiyamira avuga ngo "Ibintu unkoreye! Urampemukiye!"

Umukobwa na we akavuga ngo "Nyihorera, nimpfa uzasigarana n’abandi, sinavutse njyenyine."

Uwo mukobwa ngo yari yiriwe acaracara muri gare, ari kumwe n’akana kari mu kigero cy’imyaka itatu. Ngo yari yaje kureba umusore uri mu kigero cy’imyaka 26, ukorera muri gare, ari na we se w’ako kana.

Bivugwa ko uwo musore yibana mu Mujyi i Huye, ariko ko umukobwa akomoka i Nyaruguru akaba yajyaga aza kumusura akamara iwe icyumweru hanyuma agataha, akirenza ikindi cyumweru, nuko akongera akagaruka.

Uyu munsi ngo yaje asanga umusore ku kazi kuko yari amaze iminsi amuhamagara akanga kwitaba.

Yashatse kwiyahura ariko abantu baramutabara

Amaze kurutswa uburozi yari yanyoye, umukobwa yajyanywe ku kigo nderabuzima cyo mu Mujyi i Huye, aho bita kuri CUSP, na bo n’ubwo babonaga asa n’aho uburozi yanyoye yaburutse bwose, bamwohereza ku bitaro bya Kabutare kugira ngo afatirwe ibizamini nibiba ngombwa anavurwe byimbitse ngo ’atazavaho agira izindi nkurikizi’ nk’uko bivugwa n’umuyobozi w’icyo kigo nderabuzima.

Ntitwabashije kubona umukobwa ngo tumubaze icyatumye yumva ahaze ubuzima akiyemeza kwiyahura, n’umusore ntitwabasha kumubona haba aho akorera no kuri Telefone, ariko abakorera muri gare dukesha aya makuru, bavuga ko umukobwa ngo yamenye ko Se w’umwana we atari we mukobwa wenyine yateye inda, ku buryo hari uwamusimbuye mu rugo yitaga urwe, akaba ari na yo mpamvu yamuhamagaraga ntiyitabe.

Mu mwaka wa 2017 nibwo umufatanyabikorwa SCON yatangiye gukorana n’abahinzi b’icyayi bo mu Mirenge ya Kibeho, Munini, Cyahinda, Ruramba, Busanze na Mata hagamijwe kubageza ku gutera icyayi ku buso bwa Hegitari ibihumbi bitandatu, mu gihe cy’imyaka 15, hanyuma bakajya bishyura bahereye ku musaruro babonye.

Abahinzi bishimiye gufata izo nguzanyo kuko icyayi bahinze cyagiye kibafasha kubona amafaranga batari barigeze babasha kubona, ariko baje kwisanga umwenda wabo utagabanuka kuko wabarwaga mu madolari nyamara agaciro kayo kadahwema kuzamuka ugereranyije n’amanyarwanda.

Ibi byatumye batangira kwicuza kuko babonaga bazakorera kwishyura ubuziraherezo, nk’uko bamwe babyivugira.

Uwitwa Domitillia Mukamisha utuye mu Mudugudu wa Nkomero mu Kagari ka Nyange, Umurenge wa Kibeho, agira ati "Twisanze nk’uwafashe inguzanyo y’ibihumbi 100 agomba kuzishyura nk’ibihumbi 150. Kwishyura 150 kandi naragurijwe 100, ubwo se urumva ntaba narahombye?"

Vianney Singayirimana na we wo mu Nkomero ati "Nahinze hafi hegitari mu byiciro birindwi. Nari nsigaye numva nabireka kuko nabonaga icyayi gisaba ingufu nyinshi, kigashaka abakozi, nareba ibyo ninjiyemo ntabanje kubyiga neza ngatangira kwicuza, kuko abantu batubwiraga ko tuzishyura n’umwuzukuruza akishyura, bikaducanga."

Kuri ubu ariko abo bahinzi ngo bumva batuje kuko babwiwe ko noneho bazajya bishyuzwa amafaranga bahawe, habariwe mu manyarwanda.

Singayirimana ati "Ubu noneho numva ideni twafashe tuzabasha kuryishyura, ntibinatubuze gutera imbere."

Vincent Hategekimana uyobora SCON avuga ko inama bagize mu kwezi kwa Mata 2024 ari yo yafashe umwanzuro wo gukuraho ko abahawe inguzanyo bazishyura mu gaciro kayo mu madolari.

Agira ati "Twasanze idolari rigenda rizamuka cyane, tukabona umuhinzi avunika. Ni yo mpamvu inama y’ubutegetsi ya SCON yanzuye ko guhera ku itariki ya 01 Mata 2024, aho amafaranga yari ageze ahagarara aho, inguzanyo igakomeza kwishyura mu manyarwanda, iby’amadolari bigahagarara."

Iki cyemezo bagifashe bamaze kubona ko abitabira guhinga icyayi bashyashya bagenda bagabanuka, ntibagere ku ntego yo gufasha abahinzi kugihinga kuri hegitari 500 bari bihaye buri mwaka

Ati "Impamvu ni uko nk’uwo twagurije nk’ibihumbi 900 muri 2017, kubera agaciro k’idolari kagiye kazamuka ubu yari kuzasabwa kwishyura nka miliyoni imwe n’ibihumbi 300. Urumva ko haba harimo ikinyuranyo gishingiye cyane ku ivunjisha."

Akomeza agira ati "Abo twahaye amafaranga mbere, aho yari ageze tariki ya 1 Mata 2024 azakomeza abe ayongayo mu gaciro k’amanyarwanda, abo turi gukomezanya ubu ni ukubaguriza mu manyarwanda akaba ari yo bazishyura."

Asoza agira ati "Byatumye tutabasha kongera ubuso buhingwaho icyayi uko twabyifuzaga. Wabonaga abantu byarabateye impungenge. Mu myaka ibiri ishize twagejeje ku buso bushyashya buhinzeho icyayi bwa hegitari 420. Intego ya 500 ntitwayigezeho."

Yongeraho ko bafite icyizere cy’uko ubutaha noneho abahinzi baziyandikisha ari benshi.

Muri bo hari abavuga ko umuriro uba urimo ariko amatara yabo akaka buhoro, ahandi ntiyake na mba, na bwo bikaba mu ngo zimwe na zimwe.

Valens Bayisenge utuye mu Mudugudu w’Agakombe mu Kagari ka Rukira avuga ko iwe umuriro bawubona hagati ya saa tatu za nijoro na saa kumi n’ebyiri za mu gitondo.

Agira ati "Mbere ya saa tatu za nijoro amatara aba amurika nk’agashirira akongera akazima, gutyo gutyo, mbese nk’amatara ndangacyerekezo y’imodoka. Ujya kuri REG bakavuga ko ikibazo bakizi, wabinginga uti byibura nimuze mujye kundebera bakavuga ngo genda turaza, ugategereza umwaka ugashira undi ugataha!"

Nemeyimana Chrysostome utuye mu Mudugudu wa Kubutare mu Kagari ka Rukira na we ati "Mbere umuriro wari mukeya, ari nk’ agashirira, ariko ubungubu noneho warazimye burundu. Byibuze ku manywa ni bwo ushobora gusharija telefone. Twambara amakoboyi n’udupira, ntiwakwambara ipantalo y’itisi n’ishati kuko utabasha kubitera. Umwana ntiyasubiramo amasomo cyangwa ngo akore umukoro avuye ku ishuri, abajura mu kizima..."

Théoneste Nshimyumuremyi ukorera muri Motel Urwuri iherereye mu Mudugudu w’Agahenerezo, avuga ko na bo ikibazo cyo kubura amashanyarazi ahagije bagifite.

Agira ati "Njyewe hariya mu Rwuri maze imyaka ibiri mpakorera. Muri icyo gihe cyose, itara ntirishobora kumara isaha ryaka ritarazima. Itara rirazima, rikongera rikaka, firigo ni uko. Noneho uhamaze imyaka 10 na we akavuga ngo icyo kibazo ntikirakemuka. Ni iki icyabuze ngo icyo kibazo gikemuke?"

Abaturanye n’ibyuma bisya imyumbati n’indi myaka nk’amasaka n’ibigori, bo bavuga ko iyo ibyo byuma byatse umuriro wabo ugenda mu gihe cy’amasegonda nka 5, gucana kandi bikaba biba kenshi ku munsi.

Umwe muri bo agira ati "Iyo bakije imashini iwacu umuriro uhita ubura. Niba wari ucometse ugaruka ari mubi. Twigeze guhisha firigo tuyikoresha ku bihumbi 90. Muri salon amatara ahora ashya. Niba bakije wari uri ku mashini urongera ugatangira. Ntitukireba televiziyo, radio twarayiretse, twarumiwe."

Kimwe n’abandi bahuje ikibazo, aba bose bibaza impamvu bumva amashanyarazi agenda akwirakwizwa hirya no hino mu gihugu, ntihabeho kuzirikana aho yagejejwe mbere hasigaye hatuye abantu benshi ngo habanze hagezwe ahagije, cyane ko baba babarirwa mu bafite amashanyarazi, nyamara mu by’ukuri ntayo.

Nshimyumuremyi ati "Transfo yari ihari hataratangira guturwa cyane, ni yo bagikoresha, kandi muri tekiniki baba babizi. Installations bakoze mu myaka 20 cyangwa 30 ishize, bakumvise ko abantu bari batuye aho hantu biyongereye, bityo hakaba hakenewe umuriro ujyanye n’uko basigaye bangana. Niba firigo yari ifite abantu 10, bageze ku ijana, niba bizinesi zari ebyiri, zabaye ibihumbi bibiri."

Akomeza agira ati "Ibintu ntibyagakozwe ari uko abantu basakuje, kandi buri mwaka hakorwa ingengo y’imari. Bagombye kureba ngo mu myaka ishize hari hatuye ingo izi n’izi, none hatuye izi n’izi, mbese nk’uko n’imihanda igenda yagurwa. Kuki badapanga?"

Nshimyumuremyi anavuga ko mu bindi atishimira muri serivise za REG harimo kuba nk’abakiriya batamenyeshwa igihe umuriro uri bubure kugira ngo bafate ingamba, ndetse no kuba umuriro ugenda ukamara igihe kinini utaragaruka bikababuza abakiliya.

Ati "Ikindi ntubahamagara wagize panne ngo bakugereho vuba. Usanga bamaze nk’iminsi ibiri batarakugeraho. Akenshi bisaba guhamagara abo ku rwego rwo hejuru kugira ngo bagukemurire."

Omar Kayibanda uyobora REG mu Karere ka Huye avuga ko ikibazo cy’umuriro mukeya kitaboneka mu Murenge wa Huye gusa, ahubwo no mu yindi Mirenge igize Akarere ka Huye, kandi ko kizakemurwa mu mushinga barimo gukora kandi bizeye kuzabonera ubushobozi.

Ati "Mu gihe ubwo bushobozi butaraboneka, hari aho tugenda tubikemura twifashishije bukeya dufite. Ni muri urwo rwego turi gukorera ahitwa Gatobotobo mu Murenge wa Mbazi."

Yongeraho ko baramutse babonye ubundi bushobozi uriya mushinga uzakemura ibibazo byinshi utaratangira gushyirwa mu bikorwa, bakomereza no mu Murenge wa Huye bibanda cyane cyane ahari insinga zenda gukora ku butaka kuko ziri ku mapoto atujuje ubuziranenge.

Naho ku bijyanye n’imashini zisya zizimya amashanyarazi, ngo hari udukoresho bakwiye gukoresha muri installations z’abo twabarinda gucura umuriro abaturage. Ngo bagiye kuxagenzura, abo bazasanga bataratwifashishije babafungire, bajye gukorera mu gice cyahariwe inganda kuko ari cyo kirimo umuriro uhagije.

Umusore ari gushakishwa akekwaho kwica umubyeyi w’imyaka 55 agatoroka

Umunyamabanga nshingwabikorwa w’Umurenge wa Kibilizi, Philbert Uwamahoro, yabwiye Kigali Today ko uwo musore akekwaho kwica uwo mubyeyi wasanzwe mu murima yapfuye, atemwe ku ijosi, nyuma y’uko yashatse gutema n’umuhungu we w’imyaka 17.

Yagize ati "Mukanyangezi yari mu murima uri ruguru y’urugo, ariho atera imbuto, ari na ho uwamwishe yamusanze. Umuhungu wa nyakwigendera yahuriye na Sahinkuye hafi y’irembo ry’iwabo, afite umuhoro mu ntoki, aramusuhuza, ariko asa n’ufite ubwoba, binjirana mu rugo bavugana, hanyuma ashaka kumutema avuga ko nyina yamuhemukiye."

Wa musore ngo bagundaguranye aza kumucika, agenda yiruka anatabaza, hanyuma abari hafi aho barahurura, ariko umusore yitegereje abona mu bahuruye nyina atarimo kandi na we yagombye kuba ahari cyane ko bari hafi y’iwabo kandi yari n’umukuru w’umudugudu batuyemo.

Yagiye kureba aho yari yamusize abagara, asanga yapfuye atemwe ijosi, ari na ho bahereye bakeka ko uwashatse kumwica ari na we wishe nyina.

Umuvugizi wa Polisi mu Ntara y’Amajyepfo, SP Emmanuel Habiyaremye, mu butumwa bugufiya kuri Telefone yavuze ko Sahinkuye ari gushakishwa ngo ashyikirizwe ubutabera.

Yagize ati "Polisi yatangiye kumushakisha kugirango afatwe ashyikirizwe ubutabera. Iperereza ryatangiye, umurambo wa Nyakwigendera woherejwe ku bitaro bya Kigeme."

Polisi kandi yihanganishije umuryango n’inshuti za nyakwigendera inizeza abaturage ko uwakoze icyaha afatwa kuko nta mugizi wa nabi uko yaba ameze kose wakwibwira ko yacika ngo abure.

Abanyamakuru bahagarariye ibitangazamakuru bitandukanye mu Ntara y’Amajyepfo mu kiganiro n’Umuvugizi wa Polisi y’u Rwanda, ACP Boniface Rutikanga

Mu kiganiro yagiranye n’abanyamakuru bahagarariye ibitangazamakuru bikorera mu Ntara y’Amajyepfo, tariki 9 Ugushyingo 2024, yibanze ahanini ku biba amatungo, abiba insinga z’amashanyarazi n’abacukura amabuye y’agaciro mu buryo butemewe, kubera ko byose bifite uko bibangamira abantu benshi muri rusange.

Yasobanuye ko gukora ubwo bujura uko ari butatu bifite aho bihuriye no gusubiza inyuma iterambere ry’Igihugu, gusubiza inyuma iterambere ry’umuturage, kubangamira imibereho myiza n’ubuzima bwiza bw’umuturage, ariko no guhombya Leta.

Yagize ati “Twese tuzi impamvu hajeho gahunda ya Girinka. Umwana wanyoye amata ntagwingira kandi iyo habonetse umukamo n’amafaranga araboneka. Hanyuma umuntu umwe akaza, inka akayikura mu kiraro, akayibaga, akagurisha, undi za nyama akazifata, akazishyira muri boucherie (aho bazicururiza)!"

Yunzemo ati "Ahageze amashanyarazi hagera iterambere, abantu bakihangira imirimo, simvuze abari kwa muganga babayeho kubera umuriro. Hanyuma umuntu akaza agafata insiga akazica, akazigurisha!"

Yanavuze ko abakora ubucukuzi bw’amabuye y’agaciro butemewe bangiza ibidukikije, ugasanga hari inzu byashize mu manegeka, bakangiza imirima y’abaturage bakabura aho bahinga, bukangiza amashyamba ...

Yaburiye abajura rero agira ati "Aba bantu dufitanye na bo ikibazo. Tuzabahiga, kandi bazababara. Rwose ntihazagire utaka, ntihazagire uniha, ntihazagire urira, ubikora wese niyitegure ingaruka z’ibyo azahura na byo, kandi azabyihanganire.’

Yunzemo ati "Ntabwo tuzemera ko ibyo ubuyobozi bw’igihugu bushyiramo imbaraga kugira ngo abaturage biteze imbere, undi kubera ubusambo bwe n’ubusuma bwe aze abyangize ngo tumurebere. Oya!"

Umuvugizi wa Polisi y’u Rwanda, ACP Boniface Rutikanga

Yanasobanuye kandi ko mu bujura bw’amatungo harebwa uwayibye, imodoka cyangwa moto yatwaye inyama, umusheretsi wayaranze, n’ucuruza inyama utabasha gusobanura aho zavuye.

Guhana ishene y’abari mu bujura kandi bazabireba no mu biba insinga z’amashanyarazi ndetse no mu bacukura amabuye y’agaciro mu buryo butemewe.

Imibare itangwa na polisi y’u Rwanda igaragaza ko ubujura buri ku isonga mu byaha bigaragara hirya no hino mu gihugu, kuko nko mu kwezi kwa Nzeri n’uk’Ukwakira 2024, polisi yakiriye ibyaha by’ubujura bikabakaba 500, yakira ibyo gukubita no gukomeretsa bibarirwa muri 400, kwangiza iby’undi 116, ...

Nk’uko bamwe mu banyamuryango b’iyo koperative babivuga, ngo bagiye begeranya amafaranga kuva mu mwaka wa 2005 nk’abakozi b’uruganda.

Bayakuragamo inguzanyo bifashisha mu gukemura utubazo tw’amafaranga, bagafata n’ibyo kurya koperative yabaga yabegereje, amafaranga bakayakatwa ku mishahara.

Mu mwaka w’2021 baje kwisanga koperative yabo yarahombye, nta n’amafaranga isigaranye kuri konti, none abari bafitemo amafaranga basabye ko ababahombeje bakurikiranwa bakabishyura, ariko amaso yaheze mu kire.

Umubyeyi umwe wari umaze kugira ubwizigame bubarirwa mu bihumbi 300, agira ati "Twakuragamo mituweri, tukarihira abanyeshuri, koperative tuza kumva ko isenyutse tudasubijwe ibyacu."

Akomeza agira ati "Turabaza, bakatwizeza ko bazabidukurikiranira, na n’ubungubu."

Ku kibazo cyo kumenya impamvu abanyamuryango b’iriya koperative batagannye ubutabera, umwe mu bababajwe n’amafaranga ye agira ati "Ntabwo twari kujya mu nkiko na mudasobwa zigaragaramo umutungo wacu nyiri izina abo turega ari bo bazifite, tutereka n’urukuko umubare dukurikiranye nyawo."

Anavuga ko iki kibazo bakigejeje ku buyobozi bw’Akarere ntibabone igisubizo, bakakigeza no kuri Guverineri w’Intara y’Amajyepfo na we agasaba Akarere kugikemura, ariko na n’ubu bakaba babona nta kirakorwa.

Umuyobozi w’Akarere ka Nyamagabe, Hildebrand Niyomwungeri, we avuga ko imbogamizi irimo ari uko hari abari abanyamuryango b’iriya koperative batakihakorera kandi bayirimo imyenda, kuko ari koperative imaze imyaka igera kuri 19.

Agira ati "Icyo twe twasabye dufatanyije n’ubuyobozi bw’uruganda ni uko hakorwa isesengura hakamenyekana ufite umwenda n’ingano yawo, noneho tukazabahuza, hakabaho ubwumvikane n’uruganda bwo kugena ukuntu ubwishyu bwakatwa ku mushahara."

Icyakora Théobald Uhoraningoga uyobora iriya koperative kuri ubu, wanatangiye kuyiyobora yaramaze guhomba kuko ngo yayisanganye ibiceri 74 gusa kuri konti, we avuga ko urutonde rw’abarimo umwenda ruhari, ko ikibura ari ababishyuriza, cyane ko we nk’umukozi w’uruganda, atajya kureba umukoresha we, amwereka urutonde, amusaba kubishyuriza.

Agira ati "Bagiye badukoresha inama kenshi, bakavuga ko hashyirwaho uburyo bwo kwishyuza abo bantu ku bufatanye n’inzego za Leta zibifitiye uburenganzira, badusaba gukora urutonde rw’abakora mu ruganda bahita bishyura ako kanya turarukora, ariko habayeho kugenda biguru ntege mu kutwishyuriza."

Yungamo ati "Nanatekereza ko hari hakwiye kujyaho abagenzuzi (audit) bashyirwaho na RCA ku rwego rw’Umurenge cyangwa rw’Akarere, bakagaragaza uko kwishyuza byakorwa.

Anavuga ko n’ubwo hari uwahoze ari umukozi wa koperative watwaye mudasobwa yifashishaga mu kazi, iby’imyenda n’abayirimo biri mu mpapuro.

Bamwe bavuga ko koperative yahombejwe miliyoni 800 abandi bakavuga ko ari miliyoni zitagera no kuri 50

Ubundi abanyamuryango b’iriya koperative bavuga ko umutungo wa koperative wabo wahombejwe ari miriyoni 800 zavuye mu nyungu za butike ya koperative yabacuruzagaho ibiribwa, no mu bwizigame bwabo bubarirwa hagati y’ibihumbi 100 n’ibihumbi 800 ku muntu.

Icyakora, uwari Perezida w’iriya koperative ihomba, Cedrick Niyomugabo,
we avuga ko ababivuga babyitiranyije n’amafaranga ubuyobozi bwa Koperative bwigeze kubabwira ko yanyuze kuri konti yabo, harimo ayinjiye n’ayasohotse.

Kandi ngo n’ubwo hari abanyamuryango bavuga ko ubuyobozi ari bwo bwabaririye amafaranga ngo si byo, ahubwo ngo koperative yahombejwe n’abafashe inguzanyo z’amafaranga n’ibiribwa, ntibishyure.

Amafaranga ari kwishyuzwa abayagurijwe ntibayishyure abarirwa muri miriyoni 25, naho abanyamuryango bishyuza amafaranga yabo afitwe na koperative bo bari kwishyuza agera kuri miriyoni 24 n’ibihumbi 970.

Niyomugabo anasobanura ko koperative yatangiye ari nk’ikimina gihuriwemo n’abakozi bose b’uruganda babarirwa hagati y’ibihumbi bibiri na 500 n’ibihumbi bitatu. Agiye ku buyobozi muri 2017 bayihunduye koperative, abatarashakaga gukomeza gukatwa amafaranga bavamo, hasigara abanyamuryango bakabakaba 320.

Icyo gihe igishoro cyaragabanutse, ku buryo no kurangurira butike ya koperative bitongeye kuborohera. Bari basigaye bazana ibicuruzwa abanyamuryango bafatamo ibyo kurya ku mwenda, bakazishyura bishize.

Ati "Uruganda rwaje gushyiraho kujya ruhemba abakozi buri cyumweru, abafataga ibiryo muri Koperative barabihagarika, irahomba."

Amafaranga y’abanyamuryango atagaragara kuri konti ya koperative na yo ngo afitwe n’abandi banyamuryango babonye koperative ihombye bakicecekera ntibishyure.

Kuba hari abatarafashe inguzanyo ariko amafaranga yabo akaba adahari, mu gihe nyamara abanyamuryango bahabwaga inguzanyo ingana n’amafaranga bafitemo, ukeneye menshi akishingirwa na mugenzi we ku bwizigame bwe, ngo byaturutse ku burangare bw’umucungamutungo wa koperative wagiye aguriza abamaze gutiza amafaranga yabo.

Ingrid Karangwayire, umunyamabanga nshingwabikorwa wa BK Foundation n’umuyobozi wungirije wa Kaminuza y’u Rwanda ushinzwe imari, Ms. Françoise Kayitare Tengera, basinya amasezerano y’ubufatanye

Amasezerano yasinywe hagati y’impande zombi, aratangiza umushinga bise Career Professionals Hub ugiye gushyiraho aho abanyeshuri bazajya bahurira n’ababaha ubumenyi, haba mu buryo bw’imbonankubone cyangwa bw’ikoranabuhanga, buzabafasha kumenya uko bitwara mu gushaka akazi no mu kugahanga.

Abanyeshuri bazafashwa kumenya uko umuntu agaragaza ibyo ashoboye (CV), uko ashaka akazi, uko bitwara mu kizamini cy’akazi, ibikenewe ngo ubashe gukora mu kigo runaka, kandi bazanahurizwamo n’abakeneye abakozi kimwe n’ababashije kwihangira imirimo babagira inama.

Ingrid Karangwayire, umunyamabanga nshingwabikorwa wa BK Foundation

Ikigamijwe ni uko umunyeshuri azajya arangiza amashuri atangira akazi, kandi agakora neza, nk’uko bivugwa na Ingrid Karangwayire, umunyamabanga nshingwabikorwa wa BK Foundation.

Agira ati "Iyi gahunda igenewe gutegura abanyeshuri gushaka akazi no kwihangira imirimo mbere cyane y’uko barangiza amasomo, ikazabafasha kuva muri Kaminuza bashoboye, bifitiye icyizere kandi biteguye gukora akazi bashatse cyangwa bihangiye."

Urubyiruko rero ruzajya rubasha guhura n’abatanga akazi kugira ngo babone ubumenyi burenze ibyo biga mu ishuri bikenewe ku isoko ry’umurimo, cyane ko uko ibihe bigenda bisimburana usanga hari igihe ibyo abantu biga mu ishuri biba ari bikeya cyane ugereranyije n’ibikenewe ku isoko ry’umurimo.

Abanyeshuri biga muri Kaminuza y’u Rwanda bishimiye iki gikorwa kigamije kubahuza n’abatanga akazi

Abanyeshuri biga muri Kaminuza y’u Rwanda bumvise ibya Career Professionals Hub bayishimiye.

Nk’uwitwa Patrick Mizero yagize ati "Urubyiruko tuba dukeneye ahantu duhurira, bakatugira inama. Bizadufasha kwitegura neza, ku buryo nk’igihe umuntu abonye akazi yakitwaramo neza kuko aba yarabonye ubumenyi bukamuteguramo."

Dr. Joseph Nkurunziza, umuyobozi w’ishami ry’ubukungu muri Kaminuza y’u Rwanda, avuga ko Career Professionals Hub yatangirijwe mu ishami rya Kaminuza y’u Rwanda ry’i Huye, ariko ko ibikoresho by’ikoranabuhanga bizashyirwamo bizafasha n’abanyeshuri ba UR bari hirya no hino mu guhigu gukurikira ibihavugirwa.

Amakuru agera kuri Kigali Today avuga ko ibi byamenyekanye mu gitondo cyo kuri uyu wa Gatanu tariki 1 Ugushyingo 2024.

Umugabo witwa Emmanuel Mutunzi, ufite imyaka 55 ngo yagiye gusambanya umugore w’umupfakazi witwa Grâce Yankurije w’imyaka 43, maze umuhungu w’uwo mugore witwa René Iradukunda, ufite 19 ahageze amukubita ifuni mu mutwe, ahita yitaba Imana.

Umunyamabanga Nshingwabikorwa w’Umurenge wa Karama, Constantin Kalisa, yavuze ko iyo nkuru ari yo, kandi ko uwishe nyakwigendera yafashwe akaba ari mu maboko ya RIB.

Ku bijyanye n’ubutumwa agenera abaturage ayobora, yagize ati "Birinde kwihanira, n’abubatse ingo bareke guca inyuma abo bashakanye."

Yihanganishije kandi umuryango wabuze uwabo.

Utubuye turi muri aka gahanda kagenewe amagare ngo tubapfumurira amapine ari nayo mpamvu usanga banyura mu muhanda munini

Ku bilometero nka bitanu byatunganyijweho utwo duhanda, urebye bifashisha akari nko kuri kilometero kimwe, ku muhanda uturuka kuri gare ukagera kuri Hotel Faucon. Ahandi ngo ntihakoze neza, kuko harimo utubuye dutyaye dutuma amapine atoboka.

Aho ni ku muhanda wo hepfo ya gare ugana i Nyamagabe, aho usanga igice cyagenewe amagare cyifashishwa ari ikinyurwamo n’azamuka, n’aho amanuka yo ugasanga anakonkoboka (yirukanka cyane ahamanuka) kandi ari mu muhanda wagenewe ibinyabiziga.

Ku muhanda uturuka mu Matyazo ho kubera ko hanatambika, abanyonzi ntibakunze kunyura mu gahanda bagenewe.

Mu gahanda kagenewe amagare ugana mu Gahenerezo na ho ngo utubuye dutyaye dutobora amapine y’amagare

Uwitwa Dieudonné Ndaberetse agira ati "Si uko tuyobewe ko inzira ari iyacu, ariko hagiye harimo amacupa, utwuma n’utubuye dusongoye byinjira mu mipine, shamburayeri zigashwanyuka. Dutegereje ko hazakorwa neza tukazajya tuhifashisha."

Yungamo ati "Igihe batarahakora tuba twifashishije umuhanda munini. Ariko iyo ibinyabiziga bibaye byinshi mu muhanda kuko urabona ni hatoya, ukora ku buryo ukatiramo (mu gahanda k’amagare) kugira ngo udateza impanuka."

Icyakora, hari igihe no mu gice kirimo agahanda gakoze neza usanga amagare agenda mu muhanda munini.

Agahanda kagenewe amagare guturuka kuri gare kugera kuri Hotel Faucon ni ko gakoze neza, bityo n’abanyonzi bakakifashisha, ariko nyine hari n’ababirengaho

Uwitwa Ngabonziza avuga ko abakora ibyo akenshi atari abanyonzi, ahubwo abatwara amagare bisanzwe akenshi baba baturutse mu cyaro bazanye ibicuruzwa mu mujyi. Ngo ni na bo akenshi usanga bakora impanuka.

Ati "Abenshi ntabwo baba bazi ibisate banyuramo, ariko twebwe kubera ko twahuguwe ku mategeko y’umuhanda tubikora neza. Ntabwo ari 100 % ariko iyo ubyubahirije bigenda neza, n’umugenzi utwaye akagira umutekano."

Umuyobozi w’Akarere ka Huye, Ange Sebutege, we avuga ko abatwara amagare bose bakwiye gukurikiza amabwiriza yo kunyura mu muhanda, ko nta rwitwazo rwo kubica ku ruhande. Agira ati "Hariya banga hari abahanyura, kandi nta kibazo hafite rwose."

Umuvugizi wa polisi mu Ntara y’Amajyepfo, SP Emmanuel Habiyaremye, avuga ko impanuka z’amagare akenshi zituruka ku kutubahiriza amategeko y’umuhanda, kandi ko n’ubwo badahwema kuyasobanurira abantu, hari abakomeza kubirengaho.

Mu muhanda ugana mu Matyazo abatwaye amagare binyurira mu muhanda munini, ngo kubera ko agahanda kabo kadatunganyije neza

Yongera gusaba abagendera ku magare kutagenda hagati mu muhanda, kwirinda kwambara ama écouteur igihe batwaye no kutagira umuvuduko ukabije kubera ko usanga impanuka ahanini ziterwa n’umuvuduko.

Ati "Hari ukuntu amagare ahantu hamanuka bamwe batajya bafata feri, yagera mu ikoni gukata bikanga, rikaba rimurenganye umuhanda."

Ikindi yibutsa abagendera ku magare ni uko isaha yo kuva mu muhanda ari saa kumi n’ebyiri za nimugoroba, kuko byagaragaye ko impanuka nyinshi z’amagare ziba nijoro bitewe n’uko amagare atagira amatara ayamurikira.

Ni imvura yaguye mu gihe kitari kirekire, ariko umuyaga wari uyirimo wasenye amazu atandatu n’ibikoni bine mu Mudugudu wa Rwabuye, igusha n’ibiti bitatu by’inturusu byari ku muhanda wa kaburimbo, nk’uko bivugwa n’Umukuru w’Umudugudu wa Rwabuye, Diane Uwingeneye.

Igiti kimwe cyagwiriye insinga z’amashanyarazi zerekezaga mu rugo rumwe rwo mu Rwabuye, ikindi gifunga umuhanda uva mu Rwabuye werekeza i Kabuga, ikindi na cyo kigwira imodoka ya Coaster yari itwaye abagenzi ivuye muri gare ya Huye yerekeza mu muhanda wa Kigali. Icyakora ngo ku bw’amahirwe nta muntu cyakomerekeje.

Uwingeneye ati "Amashami y’igiti ni yo yaguye ku modoka, imeneka ibirahure, ariko ntabwo byageze ku bagenzi."

Umukozi ushinzwe ibiza mu Karere ka Huye, yongeyeho ko no mu Kagari ka Kabuga hasenyutse inzu zirindwi.

Kigali Today iracyakurikirana ngo imenye ibindi iyi mvura yaba yangije mu Karere ka Huye no mu nkengero zaho.

Abakozi ba Kaminuza y’u Rwanda basabye Minisitiri w’Intebe ko imishahara yabo yazamurwa

Babimubwiye ubwo hatangwaga impamyabumenyi ku banyeshuri basaga ibihumbi umunani bayirangijemo, na we yitabiriye, kuri uyu wa 25 Ukwakira 2024.

Prof David Tuyishime, umwarimu wavuze mu izina rya bagenzi be bakorana muri Kaminuza y’u Rwanda, yabwiye Minisitiri w’Intebe ko bishimira kuba ingorane bagiye babagaragariza zaragiye zikenuka, ariko ko kuri ubu noneho bahangayikishijwe n’abakozi bafite uburambe n’ubushobozi bagenda babacika.

Yagize ati "Mu gihe turi kurwana no kuzamura Kaminuza y’u Rwanda ku rugero rwo hejuru, hari ingorane tugenda duhura na zo, idukomereye cyane ikaba iy’uko abahanga bafite uburambe n’abahuguwe bihagije dufite bari kugenda baducika. Ntitwabasha kugera aho twifuza turi kugenda dutakaza abo bakozi."

Yunzemo ati "Ibi biraturuka ku mpamvu zitandukanye harimo iy’imishahara n’ibindi bihembo bitakijyanye n’igihe, kuko hashize igihe kirekire bitongerwa muri Kaminuza y’u Rwanda, mu gihe imibereho igenda irushaho guhenda. Turasaba Guverinoma y’u Rwanda kwita kuri iki kibazo."

Minisitiri w’Intebe yavuze ko amavugurura muri Kaminuza yatangiye kandi ko azakomeza.

Yagize ati "Nk’uko mubizi, mu ntangiriro z’uyu mwaka hatangajwe amavugurura ya Kaminuza y’u Rwanda, yari amaze igihe ategurwa, ariko yemejwe n’inama y’Abaminisitiri mu ntangiriro z’uyu mwaka. Uyu munsi turishimira ko bimwe mu byari biteganyijwe muri ayo mavugurura byatangiye gushyirwa mu bikorwa, bikaba bikomeje gushyirwa mu bikorwa."

Yunzemo ati "Hari n’ibindi bizagenda bikorwa, kandi mwese muzakomeza kubigiramo uruhare, kuko impinduka twifuza muri Kaminuza twese zizatugirira akamaro, ari Kaminuza, ari abakozi bayo, ari abarimu, ndetse n’igihugu muri rusange.

Ni ku nshuri ya 10 Kaminuza y’u Rwanda itanga impamyabumenyi ku banyeshuri bayirangijemo. Abazihawe kuri uyu wa 25 Ukwakira 2024 ni ibihumbi umunani na 68, Harimo ab’igitsina gore 3,109 n’ab’igitsina gabo 4959.

6,657 muri bo bahawe impamyabumenyi za Bachelor’s, 946 bahabwa iza Master’s. Hari n’abahawe izindi mpamyabumenyi harimo izisumbuyeho ku rwego rw’amashuri bari bagezeho ( Diplomas, Postgraduate Diplomas, Postgraduate Certificate).

Kandi abagera kuri 53 bahawe impamyabumenyi z’ikirenga (PHD), iyi ikaba ari intambwe iri guterwa na Kaminuza y’u Rwanda mu gutanga abahanga kuko mu mwaka ushize abazihawe ari 38.

Mu bahawe impamyabumenyi kandi, harimo 126 baturutse mu bihugu byo hanze y’u Rwanda.

Umubyeyi umwe utuye mu Murenge wa Gishubi, akaba afite umwana ugiye kuzuza amezi atatu, avuga ko yipimishirije ku kigo nderabuzima cya Gisagara (mu Murenge wa Ndora) ari ho atuye, aza kwimukira muri Gishubi, ariko ngo yageze ku bigo nderabuzima bitatu yangirwa gukingiza, none ubu yararekeye.

Agira ati "Nagiye gukingiriza i Kirarambogo muri Muganza, bantuma urupapuro nahawe no kwa muganga umwana avuka ndarubura kuko nabyariye mu rugo. I Gishubi, ari na wo Murenge ntuyemo, bo bambwiye kujya gukingiriza aho nipimishirije, i Gisagara na ho ngo ninjye mu Murenge nabyariyemo."

Uyu mubyeyi kandi ngo anahangayikishijwe no kuba umwana we atanditse mu irangamimerere, kuko yabyirutseho yagera aho akananirwa.

Ati "Njyewe nararekeye, umwana abayeho nk’imburagihugu. Ntakingiye, ntiyanditse. Ubu naracecetse."

Ibyo uyu mubyeyi avuga bishimangirwa n’undi na we utarashatse ko amazina ye atangazwa twise Nyirahabimana, akaba atuye mu Murenge wa Ndora. Yivugira ko yabyariye mu rugo bitewe no kutamenya igihe azabyarira, kuko umwana yavutse habura ukwezi kurenga ku gihe kwa muganga bari bamuhaye.

Umwana we yabashije gukingirwa nyuma y’amezi abiri avutse, na bwo abanje gusiragira, ku buryo yemerewe ari uko avugiwe n’umukozi wo ku Karere. Kwandikisha umwana byo na n’ubu byaramugoye kuko ku mezi atatu afite na we atarandikwa.

Agira ati "Hari uwo nabwiye nti nawe ubwawe uri umubyeyi. Hari inda igufata ntumare n’iminota 30, igahita ivuka. None uwo mwana ageze hasi wakongera ukamumira kugira ngo ajye kuvukira kwa muganga?"

Ibi bibazo kandi ngo ntibifitwe n’umubyeyi umwe cyangwa babiri, ahubwo ni benshi muri Gisagara.

Nyirahabimana ati "Si ikibazo mfite njyenyine, kuko hari n’abandi bagifite bicecekeye. Turi benshi. Hari n’umugore w’i Musange twahuriye ku Gisagara, ambwira ko umwana we banze kumukingira kuko atanditse. Iby’inkingo yarabyihoreye."

Ubundi ababyeyi bashishikarizwa kubyarira kwa muganga kugira ngo bitabweho bikwiye hamwe n’abana babo, kandi kwa muganga ni na ho basigaye bandikirwa.

Abavukiye mu rugo na bo, amabwiriza ahari ni ukwandikwa bitarenze iminsi 30. Kugeza ubu ariko ngo nta mabwiriza arashyirwaho ku mande bacibwa igihe iriya minsi irenze, n’ubwo hari aho inama njyanama ziyateganya.

Umukozi ushinzwe irangamimerere mu Murenge umwe wo mu Karere ka Huye yagize ati "Itegeko rigenga umuryango n’abantu ryavuze ko hazajyaho iteka rya Minisitiri ufite irangamimerere mu nshingano ze, rigena amande acibwa umubyeyi watinze kwandikisha umwana, ariko ntabwo rirajyaho."

Abarengeje iriya minsi ni bo basiragizwa, ku buryo usanga bifuza ko byibura bacibwa amande ariko abana bamaze kuvuka bagahabwa uburenganzira bwo gukingirwa no kwandikwa mu irangamimerere, kuko utanditse atanabasha kuvurizwa kuri mituweri.

Nyirahabimana ati "Nihajya haza ukwezi kw’impuhwe, tuzajya tugenda batwandikire. None uwo ku Karere ko namweretse ibipande akambwira ngo taha tuzabasanga mu midugudu tukaba twarategereje tugaheba!?"

Akomeza agira ati "Gitifu w’Akagari yarambwiye ngo umwana urengeje ukwezi yandikwa no ku Murenge, ngiye ku Murenge na ho barambwira ngo ninsubire mu Kagari. Kandi umwana utagaragara mu irangamimerere ntiyanavurizwa kuri mituweri. Ni ukubavuza ibyatsi, malaria yaza bagapfa, tugahamba."

Twashakishije ubuyobozi bw’Akarere ka Gisagara kuri telefone kugira ngo twumve niba hari ingamba bafatira ibi bibazo byombi, umuyobozi wungirije ushinzwe imibereho myiza, Denise Dusabe, avuga ko bitashoboka ko habaho bene ibyo bibazo.

Yasabye kumenya ababigaragaje kugira ngo bamenye aho bahera babikurikirana, ariko ntibyashobotse kubera ko bifuje ko amazina yabo atatangazwa. Uretse ko no kubamenya bitananirana baramutse bifashishije abajyanama b’ubuzima.

Yagize ati "Ntabwo njyewe numva icyo nagusubiza pe."

Umwana wujuje amezi atatu atarakingirwa aba ahombye iki?

Ku bijyanye n’icyo bariya bana b’amezi atatu bamaze guhomba mu bijyanye no kurindwa indwara, umukozi ushinzwe gukingira mu kigo nderabuzima cya Rango mu Karere ka Huye yavuze ko igihe cyose umwana atararenza imyaka itanu ashobora gukingirwa inkingo zose zihabwa abana, akazihabwa ku ntera yateganyijwe.

Icyakora na none, ngo urw’igitonyanga rw’imbasa ruhabwa abana bakivuka mu gihe kitarenze iminsi 14 rwo ntibarufata. Bakingirwa imbasa mu bindi byiciro.

Urukingo rw’impiswi na rwo, iyo umwana agize ibyumweru 15 atararufata ngo biba birangiye kuko n’izikurikiraho atazifata.

Ibiganiro mu kuvura indwara zo mu mutwe byagiriye akamaro besnhi kurusha imiti

Nk’uwitwa Niyibizi utuye mu Murenge wa Rwaniro, avuga ko ubuzima yabayeho mu gihe cya Jenoside bwari bwaramuviriyemo agahinda gakabije, kubabara umutwe, kubura ibitotsi, amarira menshi no kugenda igihe cyose haba ku manywa na nijoro nk’uwihaze.

Ngo yanashoboraga guhura n’umurusha imbararaga, bavugana gatoya akaba yamwihambaho bakarwana kandi we nta n’intege yifitiye.

Intandaro y’iyo myitwarire ngo ni ukuba mu gihe cya Jenoside yakorewe Abatutsi mu mwaka w’1994, barishe ababyeyi be areba, na we bakaba bari bamwishe ariko imvura yagwa akazanzamuka, yajya n’iwabo wa nyina bakamuta mu ruzi, akaza kurukurwamo n’Inkotanyi. Icyo gihe ngo yari afite imyaka 10.

Kwa muganga ngo bamuhaga imiti, irimo nk’iyo gutuma asinzira, ariko yamushiramo agasubira ku ke. Ngo yari amaze no kugera n’aho ayinywa akaribwa mu nda.

Yaje gufashwa mu buryo bw’ibiganiro n’uwitwa Thérèse Uwitonze biciye mu muryango MHDF yashinze, bahereye ku biganiro mu matsinda, ariko ibiganiro mu buryo bwihariye ngo ni byo byamugiriye akamaro, bamaze guhura inshuro zigeze kuri 25.

Agira ati "Ubungubu natisha umurima nkabasha guhinga, nkabasha kwihigira imbuto nkayitera, nkabasha no kwishakira amafunguro, nkasomera abandi ijambo ry’Imana mu Kiliziya, ndi n’umuririmbyi. Mu gihe kiri imbere ndifuza kuzaba umugabo, nanjye nkagira umuryango nkagira umugore n’umwana nk’uko ba data na bo bambyaye."

Uwitwa Mutarambirwa wo mu Murenge wa Mukura we Jenoside iba yari i Kigali, abaho akwepakwepa abicanyi, n’aho ashoboreye gutaha ageze iwabo abona imibiri y’ababyeyi be aho bari bariciwe, imbere y’umuryango.

Byamuviriyemo indwara yo kubura ibitotsi, nijoro akajya anyuzamo akabyuka akagenda kandi asinziriye akananyuzamo akitura hasi agata ubwenge. Ibi byatumaga mu bihe byabaga byagarutse umurwaza (umugore we) adahari, yarasigaga amuzirikiye ku gitanda kugira ngo ataza kugwa.

Ati "Narabyukaga nkahita nitura hasi, za ndwara zikazamo n’imvune. Imodoka zitwara imizigo ni zo bandambikagamo nk’urambika umurambo, nkajyanwa kwa muganga. Ubwo ibinini babimpa nkasinzira, byashira nkongera ngasubirwa."

Nyuma yo gufashwa na MHDF, ngo yumva yarakize. Ati "Amavi nababaraga, umugongo, umutima wateraga cyane, umutwe na wo warandyaga, ntabwo bikibaho. No kumva nihebye mbese niyanze byarashize, ubu mfite icyizere cy’ahazaza."

Kwiyanga ubwe ngo byanatumaga adakunda n’abe, umugore we agakunda kumwuka inabi, bityo mu rugo hagahora amakimbirane; none na yo yarashize, ahubwo bafatanyije bari mu bikorwa biteza imbere urugo rwabo.

Biguriye inka, boroye n’amatungo magufi harimo inkoko n’ihene. Mbese ngo umuryango wabo umerewe neza.

Batekereza ko abavura indwara zo mu mutwe ku bw’ibiganiro bakwiye kugera no mu biturage

Abafashijwe mu buryo bw’ibiganiro kimwe n’ababavuye, batekereza ko umubare w’abakora bene uriya mwuga wiyongereye bakaboneka no mu biturage byafasha mu gukemura ingorane nyinshi ziboneka mu miryango.

Beata Mukamana wigeze guhungabana biturutse ku gupfusha umwana yari yarasigaranye nyuma ya Jenoside, ubu akaba yishimira ko yafashijwe agakira, avuga ko abaganga nk’abamuvuye bakenewe hirya no hino mu gihugu kuko iyo yitegereje abona abarwaye ari benshi.

Agira ati "Hari nk’abantu bahora barwana, ukabona umwe aciye inyuma mugenzi we, abo na bo ukabona ko bakeneye uwabafasha, bakubaka bakagira iterambere."

Thérèse Uwitonze, we avuga ko abona hakwiye kuboneka benshi bafasha muri ubwo buryo, kuko abarwaye ari benshi, bikaba bigaragarira mu buryo butandukanye, bumwe muri bwo bukaba amakimbirane yo mu ngo.

Afatiye ku kuba mu minsi yashize ubwo hizihizwaga umunsi mpuzamahanga w’ubuzima bwo mu mutwe, RBC yaratangaje ko 63% by’abakozi basiba akazi batabibwiye abakoresha kubera ibibazo byo mu mutwe, agira ati "Niba abo bakozi bize na bo bimeze gutyo, noneho tekereza abatarageze mu ishuri! Kuko buriya n’ubumenyi n’ubumenyi bufasha mu gukumira, kuko umenya uko wifata kuko ibintu ubizi."

Yungamo ati "Njyewe nanakoze ubushakashatsi mu bashakanye ndangiza Kaminuza, ndeba ingaruka zo guhohoterana mu muryango ku buzima bwo mu mutwe, nsanga 65% by’abashakanye barwaye mu mutwe. Uburwayi burahari. Ahubwo twakwibaza ngo bazavurwa na ba nde?"

Yunganirwa n’umwe mu bavura nka we mu kigo nderabuzima cyo mu Karere ka Muhanga ugira ati "Mu biturage iwacu hari ibibazo byo mu mutwe bitandukanye harimo ihungabana, icyoba, indwara zituruka ku gukoresha ibiyobyabwenge, amakimbirane yo mu miryango, [...] ku buryo ubona umuryango ukeneye guherekezwa, haherewe ku kuwutegura."

Yungamo ati "Habayeho uburyo bwo kwita ku muryango ku buryo bw’umwihariko, hari icyahinduka."

Kuvura mu mutwe hifashishijwe ibiganiro ntibiramenyerwa cyane mu Rwanda, ku buryo ababikora bavuga ko abo bafasha akenshi batangira batabyumva.

Nk’abahohotera bagenzi babo baba bakeka ko ari uburyo bwo gushaka kubafata ngo bafungwe, abakoresha Jenoside na bo bagakeka ko ari ugushaka kongera kubafunga, ariko iyo bamaze kumenyera barafashwa kandi bagakira.

Itegeko rya Minisitiri No 20/39 ryo kuwa 29/01/2016 rigena ibikorwa by’ubuvuzi bitangwa kuri buri rwego rw’ibigo by’ubuvuzi rigena ko mu ndwara zivurwa mu buryo bw’ibiganiro harimo kubanira nabi abandi (anti social behavior), indwara zituruka ku kunywa ibiyobyabwenge (drug abuse) no gupfusha uwo ukunda (traumatic grief), agahinda gakabije (depression), icyoba (anxiety) n’ihungabana (post traumatic disorder).

Uwitonze avuga ko hari indwara zo mu mutwe zivurwa mu buryo bw’ibiganiro ariko hakabaho n’izikenera abaganga bifashisha imiti.

Katedarali ya Butare

Umunyamabanga w’Umwepiskopi wa Diyosezi Gatolika ya Butare, yemeza ko koko muri Butare ari ho hari imiryango (congregations) y’abihayimana myinshi ugereranyije n’ahandi mu Rwanda kuko habarirwa imiryango (congregations) 65, abayigize babarirwa muri 780 bakaba baba mu ngo (communautés) zihari 126.

Witegereje kandi, usanga imyinshi muri iyi miryango iri mu mujyi wa Butare, cyane cyane ahitwa ku Itaba.

Agira ati "Usanga ahandi baba bafite imiryango 10 cyangwa 15 mu gihe twebwe isaga 60."

Muri iyo miryango kandi harimo iyavukiye mu Rwanda, hakaba n’iyavukiye mu bindi bihugu nka Canada, i Burayi, Amerika, mu Buhinde n’ahandi, yagera mu Rwanda hakaba n’Abanyarwanda bayikunda, bakayijyamo.

Diyosezi ya Butare izwiho kugira imiryango myinshi y’Abihayimana ugereranyije n’ahandi mu Rwanda

Ku bijyanye n’impamvu yabyo, agira ati “Buriya Butare yahoze ari nini cyane kuko mbere ya 1992 na Gikongoro yari kuri Butare. N’amabonekerwa yabereye i Kibeho yabigizemo uruhare kuko mbere Kibeho yari muri Diyosezi ya Butare. Icyo na cyo cyakuruye imihamagaro ku buryo bwose bufatika."

Yongeraho ko no kuba Kiliziya Gatolika ari ho yatangiriye (i Save ni ho yatangiriye mu mwaka wa 1900 kandi ni muri Butare), hakaba hari na Seminari Nkuru irererwamo abapadiri (mu Nyakibanda) na byo biri mu bihakururira Abihayimana benshi.

Abenshi mu bafashijwe kwikura mu bukene bagiye biha intego yo korora inka kandi bakabigeraho

Abenshi mu bashyizwe muri gahunda yo gufashwa kwikura mu bukene bukabije ngo baryaga rimwe ku munsi, ariko ubu hari abishimira ko barya gatatu.

Uwitwa Marie Rose Mukandinda agira ati “Mu gitondo abana bajya ku ishuri banyoye igikoma, saa sita tugateka tukarya n’abana bakarya, kandi tukaba tuzi ko na nijoro turi burye. Rwose ntacyo twashinja Imana!”

Ibi kandi ngo babikesha kuba umufatanyabikorwa FXB yarabanje kubigisha, akabatoza gukorera ku ntego, bakareka gusesagura nk’uko bivugwa n’uwitwa Marthe Kwizera.

Agira ati “Hari igihe umuntu yabonaga amafaranga akayagura inzoga cyangwa akayahahisha mu buryo atabaze. Ubu buri kwezi mu rugo tuba dufite intego, wenda tukavuga ngo tuzahaha ibiro icumi, ibindi tuzarya ibyo mu murima, amafaranga yinjiye tuzayajyana mu matsinda, asigaye tukayabitsa muri SACCO, ku buryo ubu ngiye muri SACCO nshaka inguzanyo bayimpa.”

Ikindi babikesha ni ukuba uwo mufatanyabikorwa yaragiye abagenera amafaranga ibihumbi 20 bya buri kwezi, mu gihe cy’amezi ane, agamije ko amafaranga babahaye yo kwifashisha mu mishinga ibateza imbere batayayobereza mu gushaka ibyo kurya.

N’abana babo babatangiye amafaranga y’ishuri, babagurira ibikoresho by’ishuri, kandi imiryango yose banayirihira mituweli.

Mukandinda ati “Ya mafaranga twarihaga mu ishuri no kuri mituweli ubu aguma mu rugo. Byatumye kujya guca inshuro bigabanuka, ahubwo tukikorera, noneho kubera ko twabonye n’icyo kurya tukagerageza gukora amasaha menshi.”

Biturutse ku mishinga bakoze yo kubateza imbere ndetse no kwifashisha amafaranga babashije kuzigama ku bwo kurihirwa mituweli no kurihira ishuri abana babo, bagiye bafite imishinga bakuraho amafaranga yaba ubworozi, ubuhinzi ndetse n’ubucuruzi buciriritse.

Mukandinda ati “Urangura nk’ibishyimbo cyangwa ikindi kintu ubonye, ukabisubiza. Twe turaharanira kuzagura inka.”

Biteganyijwe ko umufatanyabikorwa FXB azabaherekeza mu gihe cy’imyaka itatu, kandi bavuga ko namara kugenda batazasubira inyuma.

Mukandinda ati “Twaguze ubutaka bw’ibihumbi 250. Ducuruza ihene n’ingurube, turateganya no kugura inka. Urumva ko twiteganyirije kugira ngo umushinga nuhagarara tuzabashe kurihira abana bacu amafaranga y’ishuri, nibarangiza icyiciro rusange.”

Jean Baptiste Habamenshi ufite abana batanu n’umugore, ubu akaba yarabashije kwiyubakira inzu akanayitera umucanga kandi atari yarigeze atekereza ko yabigeraho, na we ati “Nakoze umushinga wo kugura igare. Ubu mfata ibitoki nkabijyana i Butare, nabona n’ukeneye ko mutwara nkanyonga. Nibamara kugenda njyewe nta kibazo nzagira kuko namaze kumenya imikorere.”

Kwa Jean Baptiste Habamenshi mbere yo gutangira gufashwa mu rugendo rwo kwikura mu bukene. Inzu yari igiye kubagwira

Kwa Jean Baptiste Habamenshi ubu

Mu Murenge wa Nyanza, umuryango FXB urimo guherekeza mu kwikura mu bukene bukabije imiryango 400, ni ukuvuga 100 muri buri kagari nk’uko bivugwa na Nadine Mujawamariya, umuyobozi wungirije wa FXB Rwanda.

Avuga kandi ko batangira mu Kwakira 2022 bafashe igihe cy’amezi atandatu cyo gufasha imiryango guhindura imyumvire, aho bigishijwe kudasesagura no kwizigamira, banigishwa kugira isuku ndetse babaha n’ibikoresho by’isuku.

Nyuma yaho basabye gukora imishinga yo kwiteza imbere, babemerera kuzabaha amafaranga yo kuyifashishamo mu byiciro bibiri. Buri muryango wagenewe ibihumbi 200.

Mu rwego rwo kubafasha kugira intangiriro ihamye, biyemeje kubarihira amafaranga y’ubwisungane mu kwivuza n’ay’amashuri y’abana 100% mu mwaka wa mbere, babarihira 75% mu mwaka wa kabiri kandi bazabarihira 50% mu mwaka wa gatatu.

FXB yanageneye miliyoni 12 buri miryango 100 (yo mu Kagari) y’imishinga bazahitamo yabagirira akamaro muri rusange.

Jérôme Rutaburingoga, Umuyobozi w’Akarere ka Gisagara, avuga ko mu Karere ayobora kuva batangira gahunda yo guherekeza abakennye cyane gutera intambwe yo kuva mu bukene bukabije (graduation) bamaze gufasha abagera ku bihumbi 30, kandi muri uyu mwaka ngo hazaboneka abandi babuvuyemo ibihumbi 10.

Minisitiri w’Urubyiruko yarurangiye aho rwakura amafaranga yo kwiteza imbere

Ni urubyiruko rubarirwa mu gihumbi rwari ruteraniye ahitwa kuri Buzana mu Murenge wa Kibirizi, Akagari ka Kibirizi, Umudugudu wa Ruhuha mu Karere ka Gisagara, aho rwateye ibiti bibarirwa mu bihumbi 11.

Minisitiri Utumatwishima yabwiye urubyiruko ko uruhare rwabo rukenewe mu kurengera ibidukikije, cyane ko ari rwo rugize igice kinini cy’abaturarwanda, dore ko 73% ari bo bari munsi y’imyaka 35.

Yagize ati "Isi turimo guha abato ndetse n’isi turi kubaremera ejo hazaza, batagize uruhare mu kuyirinda none yazababera mbi kurusha iyo turimo muri ino minsi. Kandi no muri iyi minsi murabona ko ari Ibiza mu Rwanda birahari, imihanda irasenyuka, abaturage bitaba Imana kubera Ibiza. Ibiza ni kimwe mu bihangayikishije iyi si."

Yaboneyeho no kubashishikariza gukora imishinga batanga muri Youth Connekt, aho imishinga myiza iterwa inkunga y’amafaranga hagati ya miliyoni imwe na miliyoni 25.

Ababarirwa mu bihumbi bitandatu bitabiriye umuganda wo gutera ibiti mu Karere ka Gisagara

Yagize ati "Nababwira ko umuntu wese washyira imbaraga mu guteza imbere ibidukikije, no kurinda ubutaka, no kongera amashyamba, no kongera ibiti, ari we uri imbere mu guhabwa amafaranga yo kwiteza imbere no gukora umushinga we neza. "

Ibiti byatewe si inturusu nk’uko bikunze kugaragara ku haterwa amashyamba ku buso bunini, cyane ko ahatewe uyu munsi ari kuri hegitari esheshatu, ahubwo hatewe imigote, imyungo n’imihumuro.

Phocas Mureramanzi ukuriye ishami rishinzwe imirama n’imbuto by’ibiti mu Kigo cy’Igihigu gishinzwe Amashyamba, avuga ko ubwo bwoko bwatewe bwihanganira ihindagurika ry’ibihe kuko na kera kose byahoze mu Rwanda, bikaba kandi bitangiza ubutaka kuko amababi abivaho abora agatanga ifumbire.

Agira ati "Ibiti gakondo byihanganira imihindagurikire y’ikirere kuko bikoresha amazi makeya, ni ibiti kandi bifasha mu kurinda urusobe rw’ibinyabuzima, bikarwanya isuri. Ni ibiti kandi bivangwa n’imyaka bifasha ubutaka kugarura imiterere myiza bityo imyaka ikera neza."

Yungamo ati "Kandi ni ibiti na byo bikura bikavamo imbaho."

Urubyiruko rwitabiriye umuganda rwari rutewe ishema no gushyiraho uruhare rwabo mu kurengera ibidukikije.

Ibiti byatewe si inturusu ahubwo ni imyungo, imigote n’imihumuro

Esther Niyogisubizo ufite imyaka 16 yagize ati "Naje mu muganda kugira ngo dutere ibiti, turwanye ishuri, kandi tubone n’umwuka mwiza wo guhumeka."

Irené Niyomugabo ufite imyaka 15 na we ati "Nateye ibiti nka 50. Nabikuraga ku modoka ngenda nshyira mu myobo, ishashi nkayishyira aho bari batweretse."

Ku bijyanye n’impamvu ishashi yari ihumbitsemo igiti atayijugunyaga aho abonye, yagize ati "Ni uko iyo yegereye igiti ikizonga, kuko itabora, ikaba itavamo ifumbire."

Umuyobozi w’Akarere ka Gisagara, Jérome Rutaburingoga, avuga ko muri uyu mwaka mu Karere ayobora bazatera ibiti ibihumbi 100. Bizatanga akazi ku rubyiruko kuko ruhabwa akazi ko kubihumbika ndetse no kubungabunga ibyamaze guterwa mu gihe cy’amezi 10.

Urubyiruko rwabwiwe ko imishinga iganisha ku kurengera ibidukikije ihabwa amahirwe menshi

Abana bahagarariye abandi bashyikirije ubufasha begeranyirijwe n’ababyeyi umuvandimwe w’umwana wakomerekeye mu mpanuka yahitanye babiri

Ni igikorwa cyabaye kuri uyu wa 08 Ukwakira 2024, nyuma y’uko gitekerejweho n’umwe mu babyeyi barerera kuri ririya shuri wari urwarije kuri CHUB, ari na ho uwo mwana agiye kumara ibyumweru bitatu arwariye, yamubonye arembye na mama we ananiwe cyane ku bwo kudasinzira, akibaza ku cyo bakora ngo bamwereke ko atari wenyine.

Uwo mubyeyi agira ati "Kari karembye kari muri koma, gafite ibipfuko ku mutwe hose, icyo ubona ari izuru, umunwa n’amaso, ahandi hose gapfutse; ubona ari umwana ubuzima buri mu marembera, ari kumwe na nyina ubona arushye kubera kurara yicaye."

Hamwe n’abandi babyeyi batekereje ko na bo bafite abana bari mu kigero nk’icy’uriya, hanyuma biyemeza kwegeranya ubushobozi ngo babagemurire n’ubwo batari babazi batanababwiye ko hari ubufasha bakeneye.

Uwo mubyeyi wagize icyo gitekerezo, yakigeza kuri bagenzi be bakacyakira, ashima abagize uruhare begeranya ibihumbi 100 n’imisago mu gihe cy’iminsi ibiri, akanashima uriya muryango agira ati "Ndashima Imana ko batabifashe nabi, igisigaye ni ukubasengera kugira ngo umwana akire, azasubire ku ishuri."

Aboneraho no gusaba abantu bose kugira umutima ugirira abandi impuhwe agira ati "Ikoranabuhanga ryaciye ibintu. Umuntu agira impanuka aho kujya kumubyutsa abantu bagafotora. Njye numva abantu bagasubije amaso inyuma bakibuka ko mu bisekuru dukomokaho twakuyemo umutima wa kimuntu."

Kubera ko kuri ubu bitemewe gusura abarwariye kwa muganga ku bwo kwirinda indwara ya Marburg, abanyeshuri bo kuri New Light Complex Academy ntibabashije kugeza ubwo bufasha kuri mugenzi wabo ngo banamurebe, ariko babushyikiriza mushiki we, aho yabasanze ku ishuri.

Yabashimiye, avuga ko igikorwa babakoreye cyabatunguye, anababwira ko gasaza ke batekerejeho gafite imyaka icyenda, kakaba Kari kageze mu mwaka wa kane w’amashuri abanza, kandi ko kari koroherwa.

Yagize ati "Biri kugenda biza, atangiye kugenda agarura akenge mo gakeya. Ubungubu abasha kurya, no kugenda aragenda, ariko nyine ntabwo aratangira kuvuga no kureba ngo amenye umuntu."

Abana bahawe umukoro wo gukora barangwa n’urukundo

Abanyeshuri bo kuri New Light Complex Academy, bavuga ko bumva iby’impanuka yaguyemo abana bari bavuye ku ishuri byabakoze ku mutima.

Hari uwagize ati "Njyewe numvise ari ikintu kibabaje, kuko buri wese byamubaho, ari njyewe byabayeho ababyeyi banjye bababara. Kugemurira mugenzi wacu biratwigisha gukunda abandi no kutabatererana igihe bari mu kababaro."

Ibi ni na byo Edouard Mugwaneza, umuyobozi wa ririya shuri, yifuza ko byaranga abana bose.

Agira ati "Na kera na kare abantu barakundanaga, ugize ibyago bakamutabara ugize ingorane bakamufasha. Iri ni isomo abana bacu baba bakwiye gukura muri iki gikorwa, bakabikurana, bakazabyigisha na bagenzi babo, umuntu akagira neza, inyiturano akazayisanga imbere"

Impanuka uriya mwana yakomerekeyemo yabereye i Nyamasheke tariki 19 Nzeri 2024, babiri muri bagenzi be bahita bitaba Imana, abandi barakomereka. Ari mu bari bakomeretse cyane

Inzu ya Alphonse Bimenyimana yatewe amabuye kuko yari ayirimo ari gushakishwa ngo bamwice

Nk’uko bivugwa n’umwe mu baturanyi ba bugufi utuye hakurya yo kwa Alphonse Bimenyimana na Annonciata Nyirahabimana, ari bo bakubiswe bakekwaho uburozi, ngo hagiye havugwa inkuru nyinshi ku byabaye mu baturanyi be, harimo iy’uko nyakwigendera Marie Josée Yankurije yaba yaracimbuwemo kabiri n’ikiyoka, ariko ngo si ko byagenze.

Ikiri cyo ngo ni uko mwalimukazi Yankurije yavuye kwigisha, akajya gusengera mu rugo rw’abaturanyi (ruri ruguru y’urw’uwo dukesha aya makuru), yavayo atashye akikanga inzoka akanayirenga aho yari iri mu nzira ivuye mu rugo rugizwe n’uduti tw’umurimbo kwa Bimenyimana, ari na ho yari yiriwe ngo ikina n’injangwe.

Iby’iyo nzoka ariko ngo yari yabyumvanye abana b’iwe, ku buryo akimara kuyirenga yirukankiye mu rugo avuga ko ya nzoka ayibonye, akagwa mu maboko y’umwana yareraga ari na ko avuga ngo, “ya nzoka ndayibonye”, nuko ahita araba, bamujyanye kwa muganga agwayo.

Bukeye bwaho, ku gicamunsi, ni bwo umusore wagaragaje abaroze Yankurije yaje. Hari hateraniye abantu batari bakeya, harimo abaje gusura umuryango wagize ibyago, abandi na bo baje kumva iby’inkuru y’inzoka yishe umuntu cyane ko intumbi yayo yari ikiri hafi y’aho nyakwigendera yayisanze, dore ko ngo yamaze gupfa na yo igapfa, nk’uko bivugwa n’uwitwa Niyonsaba.

Agira ati “Umugabo uri mu kigero cy’imyaka 25 araza, nabonaga ari nk’umusore. Simuzi, ni ubwa mbere nari mubonye. Ati nimureke nze mbereke umuntu wishe uno muntu! Ati murampa amafaranga? Ati nako nimuyareke! Muri ayo masaha hari haje n’indi nzoka, arayica, ayishyira hamwe na ya yindi, arazitwika.”

Ngo yafashe ivu rivuye kuri za nzoka zombi, arishyira ku kiganza, azenguruka urugo rwapfuyemo wa mwalimukazi ari na ko avuga amagambo batumva, maze aravuga ngo uwabikoze mu mwanya mutoya arigaragaza.

Inzoka bivugwa ko yatumye Yankurije yitaba Imana yari muri turiya duti tw’umurimbo dukoze urugo kwa Alphonse

Icyo gihe ngo yanabajije abamwumvaga niba bashaka ko amwerekana mu ibanga cyangwa mu ruhame, abantu basaba ko agaragazwa mu ruhame.

Niyonsaba ati “Ntibyatinze, Bimenyimana asohoka mu nzu avuga ngo baranshitse we! Baranshitse we! Ahita ajugunya inyoni yari afite mu ntoki, iraguruka.”

Icyakora hari abavuga ko iyo nyoni yajugunywe n’umugore we.

Abiganjemo urubyiruko ngo bahise batangira kumukubita, hamwe n’umugore we wari uje amukurikiye. Umukuru w’umudugudu ni we wahagobotse abasubiza mu nzu, ahamagara inzego z’umutekano ari na zo zatabaye zigatuma baticwa.

Icyakora bakomeje gutera amabuye inzu yabo, bamena ibirahure, banayisamburaho ahantu hatoya. No ku mukazana we bari begeranye na ho bahateye amabuye.

Bukeye bwaho mu nzu y’uriya mugabo ngo abantu basohoyemo ibintu bituma hari abemeza ko yaba hari ibyo atunze bidasanzwe harimo ibyibo byarimo urubura, urwari rw’inyoni runini na malle batamenye ibyarimo kuko ngo wa musore yababwiye ko irimo ibintu biteye ubwoba. Iyo malle ngo yajyanywe n’inzego z’umutekano.

Umusore wagaragaje ‘umurozi’ ni muntu ki?

Nk’uko bivugwa n’umubyeyi witwa Mukamana wari ucumbikiye uriya musore watumye hamenyekana uwaroze Yankurije, akaba ari umusore w’imyaka 25 bakunze kwita Fisi, ngo yari amaze ibyumweru bitatu acumbitse iwe.

Kwa Bimenyimana (Batuye inyuma ya ziriya nsina) baturanye no kwa Kaberi (umugabo wa Yankurije), ari we nyiri izo nzu zibanza, kandi ngo bari basanzwe bapfa urubibi, Bimenyimana avuga ko bamurengereye bubaka iriya nzu ya rugur

Akomoka ahitwa i Kibayi mu Karere ka Gisagara, akaba yarageze i Sahera (mu Kagari ka Cyeru, Umurenge wa Mukura) hagitunganywa umuhanda wa Kaburimbo uturuka mu Irango ukagarukira i Sahera, kandi ngo yari awufitemo akazi.

Imirimo yo gukora uriya muhanda irangiye ngo yagiye gukorera mu Mutara, ari na ho abamukoreshaga bari bimukiye, nyuma yaho agaruka i Sahera ariko noneho akora amasambusa y’ibirayi (ibiraha), ari na yo yirirwaga azunguza, ashaka imibereho.

Umunsi mwalimukazi Yankurije yitaba Imana, ngo yari yanyuze ku irembo aho yari acumbitse, amubaza niba yajya amutumira mu rugo akaza kubimukorera (ibiraha) akamwishyura amafaranga igihumbi, undi arabyemera.

Bukeya bwaho ngo yamenye inkuru y’uko uwari ugiye kuzajya amuha ibiraka yapfuye, arababara, ariko abwira uwari umucumbikiye ko uwapfuye yagiye, ariko ko yari ababajwe n’umwana we w’imfura abamwishe bari bagiye kumukurikiza.

Mukamana yamutwamye amubaza aho ari gukura ibyo ari kuvuga, anamuburira ko hari igihe byamuviramo gufungwa, amusiga aho ajya kurema isoko mu gasantere, undi aza kumusangayo.

Ati “Yaraje yegama ku gisima, araguma ariyumviriza, ngo ariko Mana, uriya mwana agiye gupfa? Kandi nagenda nkamurengera! Ndamubwira nti, kandi Fisi urimo uritanga. Sinamenye igihe yagendeye!”

Ubwo yagendaga ni bwo yishe inzoka ngo yari ije kwica wa mwana, ari na yo yatwitse hamwe n’iyari yaraye ipfuye, ivu rizivuyemo akaryifashisha agaragaza uwishe wa mwalimukazi.

Abantu batangajwe n’ibyo yavuze ndetse n’ibyo yakoze, bagendeye ku kuba akiri mutoya cyane kandi ubusanzwe abavuzi gakondo bakunze kuba ari abantu bakuze, ariko bivugwa ko se umubyara ari umuvuzi gakondo uzwi iyo za Kibayi.

Inzoka yishwe na Fisi ngo atabara imfura ya Yankurikije kuko yari ije kumumukurikiza yayiciye hafi y’iriya poto y’amashanyarazi

Kuri ubu ari mu maboko ya RIB nk’uwatumye habaho intugunda habuzeho gatoya ngo zihitane bariya bantu babiri.

Abakubiswe na bo bari bajyanywe ku bitaro bya Kabutare kandi ubu barasezerewe, ariko umugabo yagize ikibazo mu misaya maze yoherezwa kuri CHUB, aho agomba kuzavurirwa mu minsi iri imbere. Kuri ubu ategereje inzobere izamubaga.

Hamwe n’umugore we ntibasubiye aho bari batuye, kimwe n’umukazana wabo bari baturanye. Icyakora ngo si n’ubwa mbere bakwimuka kuko babaye i Kigali, i Gikore no mu Cyeru mbere yo kuza gutura i Sahera.

Ntabwo bari babanye neza n’umuryango wa Yankurije n’umugabo we, bapfa urubibi kuko ngo bavugaga ko babarengereye bubaka inzu ya kabiri iri hagati y’aho Yankurije n’umugabo we bari batuye no kwa Alphonse Bimenyimana.

Iyi miryango yombi kandi, yaba abiswe abarozi kimwe n’abarozwe, ngo izwiho gukunda gusenga kuko bose ari abarokore.

Inkuru bijyanye:

Huye: Umugabo n’umugore bakubiswe bakekwaho amarozi

Minisitiri w’Ubutegetsi bw’Igihugu, Jean Claude Musabyimana, yari ahagarariye Guverinoma mu birori byo kwimika Musenyeri Jean Bosco Ntagungira

Minisitiri Musabyimana yijeje ubufatanye buhoraho bwa Leta na Kiliziya Gatolika n’andi madini kugira ngo umuturage ahore ku isonga binyuze muri gahunda zimuteza imbere nk’amashuri, guhinga no korora kijyambere, Mituweli, Ejo Heza no gukomeza gushyira mu ngiro ingamba zihangana n’ibyorezo bivugwa muri iyi minsi nk’ubushita bw’inkende (Mpox) na Marburg.

Minisitiri Musabyimana kandi yashimiye Musenyeri Jean Bosco Ntagungira wahawe inkoni y’ubushumba, avuga ko Guverinoma y’u Rwanda imwijeje ubufatanye buhoraho kugira ngo umurimo yatorewe uzarusheho kugenda neza.

Musenyeri Jean Bosco Ntagungira yasimbuye ku buyobozi bwa Diyosezi Gatolika ya Butare Musenyeri Filipo Rukamba ugiye mu kiruhuko cy’izabukuru.

Minisitiri Musabyimana yashimiye Musenyeri Filipo Rukamba ibikorwa bitandukanye yagizemo uruhare birimo ibikorwa by’isanamitima bigamije kubaka Ubumwe n’Ubudaheranwa by’Abanyarwanda, ibikorwa by’uburezi by’umwihariko uruhare rukomeye mu gutangiza Kaminuza Gatolika y’u Rwanda, avuga ko umuhango nk’uyu ari n’umwanya mwiza wo kwishimira iterambere rya Kiliziya Gatolika n’umusanzu wayo kuri Leta mu bikorwa binyuranye.

Diyosezi ya Butare igize ba Musenyeri babiri: Musenyeri Kijana na Musenyeri Muzehe

Umuhango wo guha inkoni y’ubushumba Musenyeri Jean Bosco Ntagungira ubaye nyuma y’uko yashyizweho na Papa Francis tariki 12 Kanama 2024.

Umushumba wa Diyosezi Gatolika ya Butare ucyuye igihe, Musenyeri Filipo Rukamba, yabwiye abakirisitu bo muri Diyosezi ya Butare ko guhera tariki 5 Ukwakira 2024 bagize ba Musenyeri babiri ari bo Musenyeri Muzehe (ukuze) na Musenyeri Kijana (ukiri muto).

Mu ijambo rye, Musenyeri Filipo Rukamba yagize ati "Hari abantu bahoraga, na n’ubu bahora iwanjye. Mwa bantu mwe nimuve ku giti, dore umuntu! Mumumenye, ni we muzafatanya kubaka ingoma y’Imana."

Aha barimo basabira Musenyeri Ntagungira

Yunzemo ati "Hari n’abibaza uko bazajya batwita twembi. Icyoroshye ni uko turi ba Musenyeri babiri. Hari Musenyeri Muzehe, uwo ni njyewe, hakaba na Musenyeri Kijana, uwo ni we!"

Yavuze kandi ko azakomeza kuba uw’i Butare, ariko akazakora n’indi mirimo yose azagenerwa na bagenzi be, kuko acyuye igihe ariko akaba atagiye mu kiruhuko cy’izabukuru.

Yunzemo ati "Nari nsanzwe numvira, ariko ubu noneho nzumvira kurushaho. Kandi nemera ko umusaseridoti aho ari hose atabura akazi. Akazi kariho, kwigisha abantu biriho, umutima mwiza uriho, ibyo ni byo twigisha kandi tuzahota tubyigisha igihe cyose."

Musenyeri Kijana ari we Jean Bosco Ntagungira, yabwiye Musenyeri Filipo Rukamba ko bazamukenera, anamushimira kuba abasezeranyije kumvira.

Yagize ati "Impanuro zawe, ubunararibobonye bwawe, tuzabikenera kandi bizaba ari ukugira ngo turusheho kunoza uyu murimo tugusimbuyeho."

Minisitiri w’Ubutegetsi bw’Igihungu, Jean Claude Musabyimana, yashimye Musenyeri Muzehe, ari we Filipo Rukamba, kuba yivugiye ko atagiye mu kiruhuko cy’iza bukuru, kuko Guverinoma y’u Rwanda yemera ko uwabaye umuyobozi akomeza kuba we kugera atakiri ku Isi.

Yagize ati "Iyo wabaye umuyobozi usabwa gukomeza kurangwa n’imitekerereze, imibereho, imikorere n’imyitwarire, ituma buri wese uhuye nawe agira icyo akwigiraho. Uzakomeza kuba umuyobozi, mpaka, kandi natwe tuzakomeza kubifata gutyo."

Abakirisitu bo muri Diyosezi Gatolika ya Butare bishimiye kuba bagize ba Musenyeri babiri, bafite imbaraga, kuko Musenyeri Filipo wasimbuwe akizifite, ku buryo bizeye ko bazabageza kuri byinshi.

Uwitwa Charles Kalinganire yagize ati "Urabona ibyo byose yari yaratangiye, isanamitima, kwigisha, gukunda urubyiruko, ingufu aracyazifite, bazafatanya rero badufashe by’umwihariko kurushaho kujya imbere mu bukristu."

Joseline Ntakirutimana we yagize ati "Musenyeri ucyuye igihe twari tukimukunze kandi imbaraga yari akizifite. Kuba haje undi ukiri mutoya uzanye imbaraga nshyashya, dufite icyizere ko namusanga bakaganira, akamugisha inama, ibyo Diyosezi yacu yari igezeho haba mu iterambere no mu buzima bwa roho, bizarushaho."

Musenyeri Filipo Rukamba yari amaze imyaka 27 ayobora Diyosezi ya Butare kuko yahawe inkoni y’ubushumba tariki 12 Mata 1997.

Yasimburaga Musenyeri Jean Baptiste Gahamanyi, ari na we wabaye umushumba wa mbere wa Diyosezi ya Butare guhera tariki 11 Nzeri 1961 kugeza ku asimbuwe na Musenyeri Filipo Rukamba.

Abapadiri benshi babarirwa muri 300 bitabiriye ibi birori

Dr Eugène Rwamucyo ubu arimo araburanishwa n’inkiko zo mu Bufaransa

Babibwiye abagize umuryango Haguruka babasuye tariki 4 Ukwakira 2024, bakabamenyesha ko guhera ku itariki ya 1 kugeza ku ya 31 Ukwakira 2024
Dr Rwamucyo ukurikiranyweho ibyaha bya Jenoside, wageze n’iwabo, ubu ari kuburana, kandi ko bazanagaruka kubabwira uko urubanza rwagenze.

Bavuze ko batemeranywa na we nyuma y’uko babwiwe ko mu ibazwa n’umugenzacyaha, Dr Rwamucyo atahakanye ibyo guhagararira abashyinguraga imirambo y’Abatutsi, ariko agasobanura ko nk’inzobere yangaga ko iyo mirambo yaborera ku gasozi igateza ibyorezo.

Impamvu yo kutemeranywa na we kandi ni ibyo biboneye n’amaso cyane cyane kuri Paruwasi ya Nyumba no ku Iseminari Nkuru ya Nyakibanda.

Hari uwari kuri Paruwasi ya Nyumba wagize ati "Yafashe ishuri twitaga sereburasiyo (ryigishirizwagamo abategurwa guhabwa amasakaramentu) araritibura (ararisenya), arirenza ku mubiri y’Abatutsi. Baba abari bapfuye n’abari bakiri bazima yarakusanyije. N’abari kubaho yabatabye bumva."

Undi na we wari ku Iseminari Nkuru ya Nyakibanda ati "Narabyiboneye rwose n’amaso yanjye. Bacukuraga ikinogo, bagakurura imirambo hariya, abatakaga na bo bakajyamo. Ubwo se nk’uwapfuye umwana agasigara ataka, ya modoka ikaza ikarenzaho ibitaka, yakuyemo wa mwana ajya kumwerekana?"

Ab’i Gishamvu banenga Dr Rwamucyo washyinguye Abatutsi bishwe agashyingura n’abakiri bazima

Hari undi wagize ati "Niba yari aje gutabara ngo akureho umwanda wenda wari guteza ingaruka, yari kubanza agatoramo abantu bakiri bazima, akabashyira uruhande rumwe akabatabara, abasigaye na bo akabashyingura neza, atari ukubatiburiraho amazu cyangwa gufata ibitaka aza ayora uko abonye."

Gerard Rutazigwa, Perezida wa IBUKA mu Murenge wa Gishamvu, yongeraho ko Dr Rwamucyo afatanyije n’umuganga wabaga iwabo i Gishamvu bigishije abantu guca Abatutsi umutsi w’akaguru kugira ngo bazatinde gupfa ariko batazanabaho.

Akomeza agira ati "Ni na ho hakomotse ya mirambo yaje gushyingurwa hakirimo abantu bazima. Kuko ntibabashaga kugenda bitewe no kuba baraciwe imitsi."

Gerard Rutazigwa, Perezida wa IBUKA mu Murenge wa Gishamvu, yasobanuye ubugome Dr Rwamucyo n’undi muganga mugenzi we bigishije abakoraga Jenoside

Undi muturage ukomoka i Gishamvu, akaba yari afite imyaka 16 mu gihe cya Jenoside, ariko we akaba yari yarahungiye mu mujyi wa Butare, avuga ko n’Abatutsi bari barahungiye ku biro bya Perefegitura ya Butare bakahicirwa ari na benshi na bo batabwe bihagarariwe na Dr Rwamucyo, kandi ko harimo n’abazima.

Agira ati "Ntabwo nari muzi ariko papa yigeze kujya kunkingiza mugiga aho yayoboraga kuri CUSP, ndamubona. Nabonaga isura ye nyizi. Yaraje (kuri Perefegitura) aravuga ngo izi nyandagazi zirakora hano iki? Nizijye kwandagara ahandi zikure umwanda hano."

Akomeza agira ati "Bazanye caterpillar, isiza hariya Radio Huye yakoreraga, n’ubu simpamya ko imibiri y’Abatutsi yahashize. Hari agace karimo abantu barwaye macinyamyambi, icyo gihe caterpillar iza na ba bandi bari barwaye macinyamyambi barakumunzuye barundamo, batarebye ngo uyu ni muzima, batarebye ngo uyu araneganega."

Yungamo ati "Ndibuka ko hari abantu bari bafite ibikomere batigeze bihangana nibura ngo babareke bazagere ku bitaro cyangwa bazire ibyo bikomere bafite. Barakusanyije bose barundamo. Caterpillar ni yo yacukuye, iratazura, hanyuma izana cya kinwa cyayo, ikajya igenda ihehurura, igenda isunika irohamo, itsindagiramo."

Kubera ko yabonaga aho bitangiye kugenda nabi agahungira ahandi, gushyingura Abatutsi bakiri bazima mu byobo rusange Mukagasana ngo yabibonye no mu irimbi ry’i Ngoma, hashyingurwa abakuwe ku kiliziya y’i Ngoma no ku ishuri ryo mu Matyazo.

Ati "Hari n’abo bari batwikiye ku mashuri mu Matyazo, babatwikishije essence. Babazanye ari bazima nta wahwanye urimo, batsindagira muri icyo kimpoteri bakiri bazima. Ari utaka ati nimunkuremo, ari utaka ati nimumpe amazi yo kunywa..."

Abarokotse Jenoside b’i Gishamvu bitabiriye biriya biganiro bashimye umuryango Haguruka kubegera ukababwira ku babahemukiye bari gukurikiranwa, kuko bibagaragariza ko ubutabera buriho bukora, cyane ko baba bakeka ko abahungiye mu mahanga ibyo kuryozwa ibyo bakoze byarangiye.

Dr Eugene Rwamucyo ahakana ibyaha ashinjwa

Dr. Eugène Rwamucyo yavukiye i Munanira muri Komine Gatonde, Perefegitura ya Ruhengeri, tariki 6 Kamena 1959.

Ni umuganga w’inzobere mu isuku n’isukura n’indwara zikomoka ku bumara bwo mu nganda. Yabyigiye mu Burusiya, aho yavuye mu 1989 agashingwa kuyobora ishami ry’ubuzima rusange ry’ibitaro bya Kaminuza (Centre Universitaire de Santé Publique).

Musenyeri Jean Bosco Ntagungira (uri imbere hagati) agiye guhabwa inkoni y’ubushumba

Ni umuhango witabiriwe n’Abapadiri barenga 300 bo mu Rwanda ndetse no hanze yarwo, kimwe n’abahagarariye inzego bwite za Leta harimo Minisitiri w’Ubutegetsi bw’Igihugu, Minisitiri w’Uburezi, Abasenateri, Guverineri w’Intara y’Amajyepfo ndetse n’abayobozi bo mu Turere tumwe na tumwe two mu Ntara y’Amajyepfo.

Musenyeri Jean Bosco Ntagungira yavukiye mu Mujyi wa Kigali ku wa 03 Mata 1964.

Yize amashuri yisumbuye muri Seminari Nto ya Kigali n’iya Rutongo aho yavuye ajya kwiga ibirebana na Filozofiya na Tewologiya mu Iseminari Nkuru ya Nyakibanda.

Yahawe Ubupadiri ku wa 01 Kanama 1993 mu muhango wabereye kuri Arikidiyosezi ya Kigali, hanyuma aza gushingwa imirimo muri Seminari Nto ya Ndera aho yari Umuyobozi Ushinzwe Amasomo, hagati ya 1993 na 1994.

Hagati ya 1994 na 2001 yagiye kwiga ibirebana n’Amategeko muri Kaminuza ya Pontifical Lateran iherereye i Roma aho yakuye Impamyabumenyi y’Ikirenga.

Yabaye Umuyobozi ushinzwe Iyogezabutumwa muri Arikidiyosezi ya Kigali kuva mu 2001 kugera mu 2002 mbere yo kuba Umuyobozi wa Seminari Nto ya Mutagatifu Vincent ya Ndera.

Ubu yari mu buyobozi bw’Urukiko rwa Kiliziya, urugereko rwa Kigali kuva mu 2002 kandi yari yaragizwe Padiri muri Paruwasi ya Regina Pacis guhera muri 2019.

Barimo kumusabira

Abapadiri benshi babarirwa muri 300 bitabiriye ibi birori

Inkuru bijyanye:

Guverinoma y’u Rwanda yijeje Musenyeri Ntagungira ubufatanye muri gahunda ziteza imbere umuturage

Padiri Ntagungira Jean Bosco yatorewe kuba Umwepisikopi wa Butare

Gutorerwa kuba Umwepisikopi nabyakiranye ibyishimo n’igihunga - Musenyeri Ntagungira

Musenyeri Ntagungira yasezewe n’Abanyakigali yakirwa n’Abanyabutare

Hatangajwe itariki yo kwimika umushumba mushya wa Diyosezi ya Butare

Uwitwa Martin Karangwa agira ati “Ntabwo hariho igiciro ngo abaturage babe bakizi, ngo bavuge ngo uterewe umuti runaka agomba kwishyura aya. Abenshi mu baveterineri anakurihisha amafaranga y’urugendo yakoze, kandi agenda kuri moto ye!”
Ibi bituma usanga baca amafaranga anyuranye kuri serivisi baha aborozi, nk’uko bivugwa n’uwitwa Musabyimana w’i Mukindo.

Atanga urugero rw’umuturanyi we warihishijwe amafaranga anyuranye ku guteresha intanga, n’ubwo babiri yitabaje bose baciye amafaranga 1000 y’urugendo.

Ati “Uwa mbere yaramubwiye ngo uranyishyura igihumbi cy’urugendo, unyishyure n’ibihumbi bitatu byo kurindisha inka no kuyitera intanga. Yaraje arayirindisha, ayitera intanga, ariko ntiyafata. Yatekereje ko byaba byiza ko azana undi muveterineri ubwa kabiri, we amuca 2500, anamwemerera ko nidafata azakomeza kumuterera nta yandi mafaranga yishyuye. Icyakora aya moto na we yarayishuje, kandi ntiyagarutse kuko kuri iriya nshuro yahise ifata.”

Kuba aborozi batazi ibiciro bigenderwaho bituma hari igihe batinda kuvuza inka bikaziviramo gupfa, bakiri gushakisha uwabaca makeya.

Umubyeyi umwe w’i Mugombwa agira ati “Hari nk’umuvandimwe warwaje inka yahakaga, ahamagara veterineri amubwira ko agomba kumwishyura ibihumbi 10, kubera ko ntayo yari afite ajya mu gushakisha abandi, birangira inka imupfanye.”

Akomeza agira ati “Byaba byiza tumenye ibiciro by’imiti n’ibya serivise, tukamenya ngo nk’inka irwaye indwara runaka, veterineri araduca ayangaya bitewe n’uko umuti ugura, ariko kuba nta mafaranga tuzi usanga baduca aya moto, amafaranga y’indenga, … kandi wasanga iyo miti muri farumasi wenda idahenda.”

Dr Charles Kayumba ukuriye ihuriro ry’abaganga b’amatungo mu Rwanda, avuga ko ubusanzwe ibiciro ngenderwaho biriho, ko abaganga bari bakwiye kujya babigaragariza abo bavurira amatungo.

Yongeraho ko amabwiriza ya Minisitiri w’ubuhinzi n’ubworozi aherutse gusohoka harimo ko nta wuzongera kuvurira abaturage adafite kampani abarizwamo, ku buryo batekereza ko noneho ibikorwa bizaba bifite inzira binyuramo, bikabasha no gukurikiranwa mu buryo bworoshye.

Agira ati “Amakampani azakora ipiganwa, abazatsindira isoko ni bo bazajya bafasha aborozi haba gukingira, haba mu gutera intanga intanga cyangwa kuvura, mu Karere. Icyo gihe bizaba byoroshye mu gukurikirana imikorere. Bigomba gutangira muri iki gihembwe, kuko amabwiriza yarasohotse. Igisigaye ni uko RAB yatanga igitabo gikubiyemo ibigomba kugenderwaho.”

Mu gihe amakampani ataratsindira amasoko, ubuyobozi bw’imirenge ngo ni bwo bukurikirana imikorere y’abaveterineri bigenga mu Karere ka Gisagara, kuko bajya aho imiti igurirwa, bakareba n’amafaranga bagiye baca abaturage nk’uko bivugwa n’umunyamabanga nshingwabikorwa w’Umurenge wa Mugombwa.

Ubwo bateraga ibigori bari kumwe n’abayobozi bari baje kwifatanya na bo tariki 1 Ukwakira 2024, batangiza igihembwe cy’ihinga, wumvaga nta cyizere cyo kuzeza igihe hatabaho kuhira, na byo bikozwe neza.

Uwitwa Théogène Nsanzimana yagize ati “Urabona hano ni mu kabande, imvura iguye inshuro ebyiri, ariko reba ukuntu hameze. Urabona ko imvura idashimishije muri make. Kuvuga ngo watera ibigori utagiyemo ngo uvomerere n’imashini cyangwa n’ubushobozi bwawe wakoresha, ntacyo wazasarura.”

Ikibahangayikishije ni uko nta bikoresho byo kuhira bihagije bafite, bitewe n’uko igishanga cyose cya hegitari 40 gifite amapompo ane yonyine, akaba atabasha kugera ku bagihingamo bose, bituma usanga abenshi bifashisha ibikoresho bituhira neza nk’amabase, nk’uko bivugwa n’uwitwa Thaciana Mukarukeba na we uhinga muri kiriya gishanga.

Agira ati “Ufata ibase n’akandi kantu koroshye nk’agasafuriya gatoya ukajya umisha mu myaka.”

Ubu buryo bwo kuhira ngo iyo babwifashishije ku birayi bujya butanga umusaruro kuko byo bidakenera amazi menshi, ariko ibigori byo ngo usanga bitameze neza nk’uko bivugwa n’uwitwa Vianney Sendaba.

Agira ati “Gushiburira amazi mu murima tujya tubikora, ariko icyo gihe ibigori ntibimera neza. Ibyinshi usanga byaratukuye, ibindi na byo bikarwara nkongwa. Urebye imashini zo kuhira ni zo zikenewe muri iki gishanga.”

Icyakora, uwitwa Anselme Nsanzimana w’umujyanama mu by’ubuhinzi mu Mudugudu wa Nyarusovu uherereye mu Kagari ka Mubuga, we avuga ko abahinzi bifashishije arrosoir babona umusaruro.

Agira ati “Ugiye ukadaha amazi na arrosoir, ukaza ukavomerera ibigori byawe, nta kibazo byatera. Ariko gushibura amazi n’ibase nawe urabyumva, ntabwo ibigori byawe byamera neza.”

Bari gutera ibigori ariko ntibizeye imvura, ari na yo mpamviu bifuza gufashwa kubona uburyo bwo kuhira

Ya mapompo ane bafite na yo, uretse kuba atabakwira, bakaba bayifashisha mu kuhira uruhande rumwe, bwacya bakuhira urundi, ngo ntanuhira neza nk’uko bajya babona aho abantu bafite ibyuhizo bimisha amazi nk’imvura, banatekereza ko ari byo na bo byabafasha.

Nsanzimana ati “Urabona ni umupira ugenda ugashyira mu mugende urimo amazi, ukawifashisha umisha amazi mu murima. Amazi aza ari menshi, ugatera mu murima, ku buryo hari igihe imbaraga z’amazi zigusha bya bigori.”

Umuyobozi w’Akarere ka Nyaruguru, Dr Emmanuel Murwanashyaka, avuga ko yari azi ko bafite uburyo bwo kuhira, ariko ko atari azi ko budahagije.

Agira ati “N’abafatanyabikorwa batandukanye bo mu buhinzi turi kumwe hano turaza kureba icyakorwa kugira ngo icyo kibazo gikemuke.”

Kunyuza amapoto y’amashanyarazi mu gishanga cya Rwamamba hari abo byangirije, bamwe barishyurwa, abandi bamaze imyaka itatu bategereje

Bavuga ko mu 2021, umuceri wabo wangijwe n’abashingaga amapoto akura umuriro w’amashanyarazi mu Kagari ka Mpare awujyana ku matara yo ku muhanda ari mu gice cy’umuhanda uturuka i Huye ugana ku Kanyaru.

Anne Mukeshimana, umufasha w’umwe mu bagitegereje kwishyurwa, bakaba barabariwe kuzishyurwa ibihumbi 130 n’amafaranga 830, avuga ko umuceri wabo wari umaze gusambura, ariko ko ntacyo babashije gusarura icyo gihe kuko wanyukanyutswe.

Ikibazo cyo kwangirizwa ku bw’ibikorwa byo gukwirakwiza amashanyarazi, bari bagisangiye n’abandi babarirwa muri 30, harimo n’abangirijwe amashyamba, kandi ngo bose barishyuwe, kimwe na bagenzi babo babarirwa mu icumi (10) bangirijwe umuceri.

Bababazwa no gukomeza gusiragizwa, ntibanabwizwe ukuri niba bazagera aho bakishyurwa cyangwa niba bakwiye gukurayo amaso, kuko ngo iyo bitegereje babona bananizwa, cyane ko ngo byageze n’aho babazwa ibyangombwa by’ubutaka bishyuriza nyamara bizwi ko ibishanga byose ari ibya Leta.

Mukeshimana ati “Ntibaduhakanira ngo banatubwire ko tutazishyurwa ngo dukureyo amaso. Baratubwira ngo nimwihangane uku kwezi gushire, nimutegereze, hari umuyobozi ubura, turiho turabikurikirana, umuyobozi turamuhamagara, [.....] Hari n’igihe bagira ngo tubave imbere bakaduha ama nimero ngo y’abayobozi, tukayahamagara ntibatwitabe. Muri makeya twarahahanywe, birakabije!”.

Yongeraho ko ku gashami ka REG k’i Huye bakunze kubabwira ko hari umuyobozi utarasinya kugira ngo babone amafaranga yabo, ko bica mu nzira ndende, dosiye zabo zaheze i Kigali.

Yungamo ati “Turanababaza tuti aho i Kigali mwahaturangiye tukigirayo? Banze kuturangira, twaheze mu gihirahiro!”

Kuba baratinze kwishyurwa byarabahombeje kandi byanabaciye intege nk’uko Mukeshimana akomeza abisobanura. Ati “Duhingisha amafaranga y’ibigo by’imari. Twifashishije amafaranga ya banki, birahomba. Twahuye n’ubukene bubi, ibyo bihombo ntituzanabikira. Byaratwangije mu bwonko, n’ubu iyo tugiye guhinga nta cyizere cy’uko tuzabicyura. Tuba tuvuga ngo haje n’ibindi twakwangirikirwa.”

Jean Bosco Ndagijimana we wabariwe ibihumbi 147 n’amafaranga 540 yunga mu rya Mukeshimana agira ati “Iyo tugiye ku ishami rya REG ry’i Huye batubwira ko tugaragara ku rutonde rw’abagomba kwishyurwa, ariko ko amafaranga yo atarashyirwaho.”

Umuyobozi wa REG mu Karere ka Huye, Omar Kayibanda, avuga ko amadosiye y’aba baturage akiri kwigwaho, ariko ko amaherezo bazishyurwa.

Ati “Uko byagenda kose bazishyurwa, n’ubwo igihe kitaramenyekana neza. Ni ugutegereza kuko bisaba inzira ndende. Kwishyurwa byo, ni uburenganzira bwabo.”

Uyu muyobozi ariko ntasobanura impamvu aba bane ari bo basigaye batishyuwe, cyane ko banivugira ko ibyangombwa batswe babitangiye rimwe na bagenzi babo, bakaba nta n’ibindi basabwe nyuma yaho uretse ibyangombwa by’ubutaka badafite, kimwe n’abishyuwe.

Abacuruzi batoya bakorera mu isantere ya Rango bavuga ko ipatante y’ibihumbi 60 ku mwaka ari menshi cyane kuri bo

Nk’abadozi bakora ahanini ibiraka byo gusana no gusubiramo imyenda bakorera ku mbaraza zo hafi y’isoko rya Rango mu Karere ka Huye, bavuga ko kubona ibihumbi 60 ku mwaka bivuga kwegeranya bitanu buri kwezi, nyamara hari n’igihe umuntu ashobora kumara iminsi ibiri atarakorera n’ibihumbi bitatu, kandi aba agomba no kwitunga hamwe n’abe, kimwe no kwishyura ubukode bw’inzu.

Ibi ngo bituma hari abahitamo gukwepakwepa abasoresha nk’uko bivugwa n’umukobwa umwe utarashatse ko amazina ye atangazwa, akaba yarabyaye akiri mutoya anagomba kwirwanaho hamwe n’umwana we.

Agira ati “Ntabwo nabona ayo kwishyura aho nkorera ku rubaraza, ngo mbone n’ay’umusoro. Ubwo rero iyo baje (abasoresha) nterura imashini nkirukanka, ejo nkayigarura, gutyo gutyo. Njyewe ntekereza ko uwaduhaye urubaraza ari we ukwiye gusora, twebwe dufite ubucuruzi butoya wenda bakatwishyuza makeya. Icyo gihe twayatanga nta kibazo.”

Uwitwa Alexis Ndayambaje ukorera Sosiyete MTN mu Irango na we ati “Twebwe twishyuraga ipatante y’ibihumbi bitandatu ku mwaka, tukishyura n’amafaranga 1500 y’amahoro y’isuku buri kwezi. Ay’isuku wasangaga ari ibihumbi 18 ku mwaka, washyiraho bya bihumbi bitandatu bikaba 24 ku mwaka. None ubu ndabazwa ibihumbi 60 ku mwaka.”
Akomeza agira ati “Urareba mpembwa ibihumbi 21 ku kwezi. Kuramo ibihumbi bitanu bya buri kwezi na bitandatu by’aho gukorera. Turakatwa umusoro wa 15% w’ari kuri sim card. Ubwo wabaho ute ko tugiye kuzasara?”

Asoza igitekerezo cye agira ati “Rwose ubuzima buratugoye, buradukomereye, turumva aho bigeze Leta ikwiye kwicara nk’umubyeyi, igashyiraho ko umuntu asoreshwa ibihwanye n’ubushobozi bwe.”

Umusore umaze igihe gitoya arangije amashuri yisumbuye na we ati “Urubyiruko dusoza kwiga, washinga nk’akamashini ngo reka ntange indirimbo, bakaza ngo sora, nta mafaranga wabonye bakagufungira bizinesi. Iyo bayifunze uriheba ukaba ikirara, ugatega abantu ukajya ubambura, ugasanga ubaye igisambo.”

Ikindi abasora batoya bavuga kibabangamira ni ukuba imirimo bakora ahanini usanga ijyanye n’umwuga umuntu atasimburwaho n’uwe, igihe umuntu arwaye cyangwa agize impamvu ituma atabasha gukora akisanga agomba kwishyura ipatante mu gihe atakoraga, hageretseho n’amande, bitewe n’uko abasora bose binjijwe mu ikoranabuhanga.

Ibi bituma hari abifuza ko hasubiraho uburyo bwo kwishyuzwa hatagendewe ku ikoranabuhanga ku basora batoya kuko icyo gihe hishyuzwa uwakoze. Abavuga gutya kandi ahanini babishingira ku kuba batamenya uko bahagarikisha gukomeza kubarirwa igihe badakora, cyane ko hari n’abavuga ko babigerageje baciye ku kwandikira inama njyanama y’Akarere ntibigire icyo bitanga.

Gervais Butera Bagabe ukuriye urugaga rw’abikorera mu Karere ka Huye, avuga ko kuba ipatante yarabaye nini cyane ubwo yahuzwaga n’amahoro y’isuku bitari ku basora batoya cyane gusa, ko no ku banini ari uko, kandi ko batangiye kubikorera ubuvugizi, bakaba bizeye ko Leta izabumva vuba, itegeko rigasubirwamo.

Agira ati “Hari abishyura ibihumbi 60, hari abatanga 150, hari abatanga 250 na 500, hari abatanga miriyoni, hari n’abageza ahari kuri miriyoni ebyiri n’igice.”

Naho ku bijyanye n’abinubira kwishyuzwa ipatante n’amande yayo mu gihe batakoraga, Bagabe avuga ko iyo habaye impamvu ituma usora atabasha gukora abimenyesha RRA, igahagarika gukomeza kumubarira muri ibyo bihe.

Mu Karere ka Huye umugabo n’umugore we bakubiswe bakekwaho amarozi

Nk’uko bivugwa n’umuvugizi wa Polisi mu Ntara y’Amajyepfo, SP Emmanuel Habiyaremye, abakubiswe hafi yo kwicwa ni Alphonse Bimenyimana ufite imyaka 67 n’umugore we, Annociata Nyirahabimana w’imyaka 66.

Bazizwaga gukekwaho kuroga umwalimukazi witwaga Marie Josée Yankulije bari baturanye, witabye Imana by’amarabira, mu masaa mbiri z’ijoro ku itariki ya 26 Nzeri 2024.

Mu butumwa yohereje kuri Telefone, SP Habiyaremye yagize ati "Umugore witwa Yankurije Marie Josée w’imyaka 38 wari umwarimu ku ishuri ribanza ryitwa Ingenzi, ubwo yari ageze mu rugo avuye ku kazi yafashwe n’uburwayi ajyanwa ku bitaro bya CHUB, agezeyo ahita yitaba Imana. Abo mu muryango bakeka ko yazize uburozi."

Ku mugoroba w’itariki 27 Nzeri 24, mu ma saa kumi n’imwe, abaturanyi bateye mu rugo rwa bariya bakekwaho kuroga nyakwigendera, barabakubita barabakomeretsa bikomeye ndetse banabicira ihene ebyiri.

Polisi yatabaye ihosha ako kavuyo irokora abashoboraga kwicwa ndetse n’abandi bashoboraga gukomerekeramo.

Umuvugizi wa Polisi mu Ntara y’Amajyepfo, yasoje ubutumwa agira ati "Hafashwe umwe mu bakekwa guteza ako kavuyo mu gihe hagishakishwa abandi bagize uruhare muri ako kavuyo. Iperereza rirakomeje."

Amarozi yagaragariye mu nzoka

Abatuye muri kariya gace babashije kuvugana na Kigali Today, bavuze ko mwalimukazi Yankulije yinjiye mu rugo akikanga inzoka yari mu muryango, akayirenga, yagera mu nzu agahita aremba, bamujyana kwa muganga agahita yitaba Imana.

Bamwe bavuga ko ya nzoka abantu bagerageje kuyica ntipfe, bugacya ikirirwa aho, umupfumu ngo wahaje bwakeye ni we wayishe ayitwitse, anavuga ko Yankulije yayitererejwe n’abaturanyi be ari bo Bimenyimana n’umugore we Nyirahabimana.

Abaturanyi barimo na bene wabo na nyakwigendera ni bwo bagiye mu rugo rw’abo bitaga abarozi bamena ibirahure by’inzu na bo barabakubita.

Hari n’abavuga ko bitari ubwa mbere uriya musaza n’uriya mukecuru bakekwaho kuroga abo mu rugo kwa Yankulije, kuko ngo hari n’umwana mutoya wabo wapfuye n’ubundi hagakekwa ko yishwe n’uriya musaza n’umukecuru we.

Inkuru bijyanye:

Huye: Imvo n’imvano ku mugabo n’umugore bakubiswe bavugwaho amarozi n’uburyo byamenyekanye

Espérance Nyirasafari yigishije abatuye i Nyamagabe kurya amafi n’isambaza ngo bamubere abakiriya

Nyirasafari avuga ko akomoka i Rubavu, akaba yaratuye i Nyamagabe ashatse umugabo, kuko ari ho batuye. I Rubavu iwabo rero ngo yakundaga kurya amafi n’isambaza, ariko ageze i Nyamagabe arabibura.

Agira ati "Naratwise numva nshaka isambaza. Niba ari uko nari nsanzwe nzizi? Ariko nzishatse ndazibura, barambwira ngo i Nyamagabe ntabwo bazizi. Uwagiye kuzinshakira w’umubyeyi yagiye i Huye. Nibaza ukuntu umuntu ashaka ikintu akava mu Karere kamwe akajya mu kandi, ndavuga nti iyingiyi ni yo bizinesi nzakora!"

Umwana yabyaye amaze kugira imyaka ibiri, yiyemeje gutangira gucuruza, n’ubwo umugabo we atabyumvaga neza avuga ko umwana wabo akiri mutoya.

Yagiye mu itsinda bamuguriza amafaranga ibihumbi 200, ari na yo menshi yashoboraga kubona biturutse ku bwizigame yari amaze kugeraho, agura udukoresho yari akeneye, nuko ajya kurangura i Rusizi. Icyo gihe ngo yahereye ku biro bitanu by’insambaza.

Yatangiye acururiza mu muhanda. Ntibyari byemewe, ariko nta kundi yari kubigira kuko nta bushobozi bwo gukodesha aho gukorera yari afite. Mu gitondo yacuruzaga imbisi, ku gicamunai akazicisha mu mavuta akazicuruza zikawushije.

Yacuruzaga kandi afite n’umurimo ukomeye wo gusobanurira abantu ibicuruzwa bye ariko n’abirukana abacururiza mu muhanda batamworoheye.

Ati "Byari ikibazo. Kwirukankana imbabura ishyushye n’ibase ku mutwe, n’abakiriya bakuri inyuma bakubaza !"

Akomeza agira ati "Umuntu wa mbere waje kunyiyama njyewe ubwanjye yarambwiye ati madamu ibyo bintu bikurura amasazi mu muhanda. Naramubwiye nti hari undi wari wabibonana muri aka Karere? Ati ntawe! Ati ariko njyewe ndi mu kazi!"

Yungamo ati "Ndamubwira nti dore abantu ba hano nta nsambaza bazi, mumbabarire mbanze mbibigishe, nibamara kubimenya nzigendera! Araseka, azunguza umutwe, arambwira ati singusange aho!"

Uwo muntu ngo yaragiye, agarutse asanga abantu bamukozeho uruziga ari benshi cyane arimo arasobanura, bamwe bakavuga ngo ni udusimba ntibaturya. Uwo muntu ariko, kimwe na bagenzi be, ngo nta wongeye kumukoma.

Ku bijyanye n’ibisobanuro yahaga abamugana, ngo yavugaga ko insambaza zifitiye umubiri akamaro nk’ibikomoka ku matungo.

Ati "Umuntu yarazaga akambaza ngo ibi ni ibiki? Nti ni insambaza! Nkasobanura uko zitekwa n’uko ziribwa, nkanababwira ko ari kimwe mu biribwa bishobora kudufasha kurwanya imirire mibi n’igwingira ry’abana, kandi bidahenze, ko binyuranye no kurya inyama rimwe ku bunani!"

Icyo gihe yatangaga n’utw’100 ndetse n’utwa 200, bamwe mu bo aduhaye bakicara bakaturira ahongaho (utwo yacishije mu mavuta) nuko bagataha, bakazagaruka noneho bitwaje amafaranga ahagije yo guhaha.

Mu barebaga iby’imicururize ye, harimo n’ukora mu muryango Orora Wihaze waje kumwegera, bamugira inama yo gukora umushinga maze bamutera inkunga y’ibikoresho harimo firigo enye nini, imashini ikata amafi n’ibindi bikoresho nk’ibyo gutwaramo amafi ntiyangirike (cooler box). Yahise anashinga Kampani yise Hope and Fine.

Ibi byamuteye kwegera abagore bari mu ngo badafite ibyo gukora, abashishikariza kuza bagakorana, bahereye ku dufaranga dukeya. Uwabaga afite amafaranga yo kurangura ikilo kimwe yamukopaga icya kabiri, akazamwishyura agarutse kurangura.

Kuri ubu akorana n’abagore 48 baza bakamurangurira hanyuma bakajya gucururiza hirya no hino muri Nyamagabe. Baba bambaye amataburiya yanditseho Hope and Fine. Kubera ko yamenyekanye bigatuma na bo babasha gucuruza.

Fortunée Uwamahoro, ni umwe mu bagore bakorana na Kampani ya Nyirasafari. Avuga ko yatangiye arangura ibiro bitanu, ubu akaba ageze ku rugero rwo kurangura 20. Abakiriya bakeneye amafi n’insambaza baramuhamagara akabashyira, ubundi akarema amasoko.

Agira ati "Ku kwezi sinabura ibihumbi 20 nizigamira kandi nanahashye, ntanakoze no mu gishoro."

Kimwe na Hope and Fine, abakorana na yo bakora ku buryo n’ufite amafaranga makeya abasha guhaha, kuko nk’amafi batanga n’aya 500.

Donatha Ayinkamiye ushinzwe ishami ry’Ubuzima mu Karere ka Nyamagabe, avuga ko n’ubwo hari icyo Kampani Hope and Fine yamaze mu gutuma abaturage biga kurya insambaza n’amafi, muri rusange muri Nyamagabe bataramenyera umuco wo kurya ibikomoka mu matungo, nyamara bifite umumaro mu kurya indyo yuzuye.

Donatha Ayinkamiye ushinzwe ishami ry’Ubuzima mu Karere ka Nyamagabe

Agira ati "Ubushakashatsi twakoze ku babyeyi bafite abana bafite imirire myiza n’abafite abari mu mirire itari myiza bari munsi y’imyaka itanu,
mu cyumweru cyahariwe kwita ku buzima bw’umwana n’umubyeyi giheruka, bwatugaragarije ko inyama, amafi, indagara n’amagi bitaribwa bihagije. Ntibarabigira umuco."

Akomeza agira ati "Kuba bihari byo birahari, n’amakuru barayafite y’uko ibikomoka ku matungo bifite intungamubiri zirinda imirire mibi, igisigaye ni ukubishyira mu bikorwa mu buryo buhoraho."

Aha atanga urugero ko ushobora gusanga nk’umuryango woroye inkoko ku buryo babona nk’amagi 20 ku munsi, bakayagurisha yose, bo bakayarya nka rimwe mu cyumweru nyamara abana baba bakeneye byibura igi buri munsi, kugira ngo babashe gukura neza.

Gutunganya igishanga bizakuraho ibidendezi byari byariretse mu mirima imwe n’imwe

Abavuga batyo ahanini ni abafite imirima mu gice cyakundaga kurengerwa imvura yaguye, amazi yakamuka imirima yabo igasigaramo umucanga cyangwa umusitwe warengeye umuceri, ku buryo akenshi byabaga ngombwa ko batanga amafaranga yo kubikuramo, rimwe na rimwe bakongera no gutera bundi bushya.

Bitegereza imashini ziri mu mirimo yo gutunganya icyo gishanga, usanga bagira bati “Twashoragamo ibishoro byinshi cyane, akenshi ntitubashe kubigaruza. Biraza guhinduka!”.

Abandi bati “Turishimye rwose! Turanezerewe ahubwo! Hano abantu bari barapfuye barashize, none hari gutunganywa. Tugiye kurya noneho !”.

Hari n’imirima yari yararengewe burundu n’amazi ava mu mugezi w’Akanyaru, ku buryo itari igihingwa kuko hari harabaye ikidendezi abana barobagamo amafi, rimwe na rimwe bakanagwamo, bagapfa.

Imirimo yo kugitunganya yatangiye tariki 12 Nzeri 2024, n’ubuso bwo guhingamo umuceri bukaba buri kongerwa kuko ahari ibikuka na ho hari kugirwa amapariseri, ku buryo n’amazi nayoborwa neza mu mirima bizatuma abahinzi babasha guhinga mu bihembwe byose by’ihinga, nta kongera kwikanga imyuzure.

Imirimo yo gutunganya igishanga cya Nyiramageni irarimbanyije

Iyo mirimo izasiga inatunganyije umuhanda uhuza Umurenge wa Ntyazo n’uwa Mamba uca muri icyo gishanga urebye wari warapfuye kubera imyuzure ya hato na hato, nyamara ari wo wa hafi unyuramo Imbangukiragutabara ziva i Ntyazo zijyanye abarwayi ku bitaro bya Gakoma.

Ubwo yatangizaga ku mugaragaro imirimo yo gutunganya igishanga cya Nyiramageni tariki 18 Nzeri 2024, Guverineri w’Intara y’Amajyepfo, Alice Kayitesi, yavuze ko bafite gahunda yo gutunganya n’ibindi bishanga byo mu Ntara y’Amajyepfo, harimo n’icya Mwogo gihurirwaho n’uturere 5, ubu kirimo gukorerwa inyigo.

Yagize ati “Imusozi iwacu ni hato ku buryo tugomba kubyaza umusaruro ibishanga. Usibye iki gishanga cya Nyiramageni gisaga hegitari 600 gihuriraho Akarere ka Gisagara n’aka Nyanza, hari n’ibindi bishanga bigiye gutunganywa mu mushinga wa CDAT, ku bufatanye na RAB.”

Yunzemo ati “Harimo ibishanga byo mu Turere twa Nyanza, Ruhango na Gisagara, harimo ibizatangira muri uyu mwaka n’ibiri mu nyigo. Turashaka ko mu gihe cy’imyaka itanu ibishanga byinshi byo mu Ntara y’Amajyefo bizaba bitunganyijwe.”

Iki gishanga cya Nyiramageni kiri gutunganywa ku bufatanye bwa RAB na Leta ya Koreya y’Epfo ibinyujije muri KOIKA

Iki gishanga cya Nyiramageni kiri gutunganywa ku bufatanye bwa RAB na Leta ya Koreya y’Epfo ibinyujije mu kigo mpuzamahanga cyayo gishinzwe ubutwererane (KOICA). Imirimo yo kugitunganya izamara umwaka umwe ikazarangira itwaye miliyoni enye n’ibihumbi 530 by’amadolari ya Amerika bingana n’amafranga y’u Rwanda asaga Miliyari esheshatu.

Iki gishanga gihingwa na koperative enye zifite abanyamuryango basaga 2600 bo mu Mirenge ya Mamba na Gikonko yo mu Karere ka Gisagara ndetse n’abo mu Murenge wa Ntyazo mu Karere ka Gisagara.

Umugabo wo mu Karere ka Nyaruguru arakekwaho kwica umugore we amuziza kumuca inyuma

Uwo mugabo witwa Eric Dushimirimana w’imyaka 25, niwe bivugwa ko yaba yarishe umugore we Delphine Nyiragabiro w’imyaka 27, mu ma saa mbiri z’ijoro ku itariki 16 Nzeri 2024. Inkuru y’urupfu rw’uwo mugore yamenyekanye uwo mugabo agiye kwirega kuri RIB.

Haravugwa amakuru atandukanye y’uburyo ashobora kuba yaramwishemo ariko umukozi ushinzwe irangamimerere wasigariyeho Umunyamabanga nshingwabikorwa w’Umurenge wa Muganza, Jean Claude Mwiseneza, avuga ko hakekwa ko umugabo we yaba yaramukubise ingumi nk’uko abyivugira. Ariko hari n’abakeka ko yaba yaramunize.

Ku bijyanye n’imvano yo kumwica, Mwiseneza avuga ko yabwiwe ko uwo mugabo n’umugore, bashyamiranaga biturutse ku kuba umugabo yaramushinjaga kumuca inyuma, akanavuga ko umwana w’umuhungu w’ukwezi kumwe nyakwigendera yasize atari uwe.

Yagize ati: “Bishoboka ko yaba yaramujijije ko umwana yabyaye atari uwe, niyo makuru twavanye mu baturanyi. Ukundi kuri kuzamenyekana mu bizava mu iperereza riri gukorwa na RIB.”

Binavugwa ko umugore yagiye kubyara aturutse iwabo aho yari yarahukaniye, umugabo akamusanga kwa muganga avuga ko yabonye gihamya ko umwana atari uwe ariko yabonana na muganga, akamugaragariza ko umwana ari uwe, afatiye ku kubara igihe umugabo yatangiye kubana n’umugore we.

Icyo gihe umugore yagarutse mu rugo biturutse ku kubumvikanisha byakozwe n’imiryango yabo (uw’umugabo n’uw’umugore).

Abaturanyi bo bavuga ko gushyamirana byajyaga bituruka ku mugabo watumaga umugore imitungo y’iwabo ngo kuko bari bifashije, ku buryo uwa nyuma yazanye ari ingurube bagurishije ibihumbi 90 Frw, umugabo akamuhaho ibihumbi icyenda (9000 Frw) byonyine.

Icyo gihe umugabo ngo yabwiye umugore ngo ajye kuzana indi mitungo, undi amubwira ko icyari gisigaye ari iyo ngurube yari yazanye, cyane ko n’inzu babagamo bari bakiri no kubaka ngo yari yavuye mu mafaranga umugore yakuye iwabo.

Abayobozi b’ibigo by’amashuri biherereye hafi y’uruganda CONAFO, ari rwo rutunganya ibishyimbo rukabigeza mu bigo by’amashuri bihiye, bo bavuga ko nta kibazo bafite kuko bibagereraho igihe.

Moïse Mutangana, umuyobozi w’agateganyo w’ishuri ribanza rya Mutunda EAR, agira ati "Bitugeraho kare, keretse mu ntangiriro ni bwo habaye ikibazo. Icyakora hari igihe bazanaga ibidahiye neza, ariko na byo si ko bikimeze. Urebye bimaze kujya mu buryo."

Ku rundi ruhande ariko, abayobora ibigo biri kure y’uruganda bo bavuga ko bibageraho bitinze.

Nka Alexis Nzeyimana uyobora ikigo cya GS Gishihe giherereye mu Murenge wa Kigoma, nko ku birometero 24 uvuye ku ruganda rwa CONAFO, agira ati "Hari igihe bigera saa saba bataratugeraho, nyamara dufite n’abana biga mu ishuri ry’incuke baba bakeneye gutaha saa tanu."

Kuri iri shuri, gukererwa kugezwaho ibishyimbo bituma n’isaha ya mbere y’amasomo ya nyuma ya saa sita itigwa neza, kuko iyo bihageze babanza kubishyushya gatoya mu mboga ziba ziri ku ziko, abana bakarangiza kurya no gukora amasuku mu ma saa munani mu gihe amasomo ya nyuma ya saa sita ubusanzwe ngo atangira saa saba na 45.

Alexis Nzeyimana akomeza agira ati "Hari n’igihe biza byakarishye cyangwa bifite impumuro itari nziza! Bagombye kwiga uko bitwarwa kugira ngo natwe bitugereho ari bizima."

Nzeyimana avuga ko ikindi yabonye ari uko bihenze, ati "Nabaze amafaranga bizadutwara muri iki gihembwe cya mbere, mbona agera kuri miliyoni eshanu n’ibihumbi 420. Kandi ubundi ku gihembwe byadutwaraga miliyoni zibarirwa muri eshatu. Ntabwo twigeze tugeza kuri miliyoni enye."

Yungamo ati "Leta iduha nka miliyoni zirindwi n’igice yo kugaburira abana ku gihembwe. Ibishyimbo byonyine bitwaye miliyoni eshanu n’igice, ubwo ibirenze 3/4 bigiye ku bishyimbo gusa. Ibindi tuzabigura iki? Iyo ngengo y’imari ntibyakunda."

Icyakora ikibazo cy’uko byaba bihenze ntakivugaho rumwe n’undi muyobozi uvuga ko yabikoresheje mu gihembwe cya mbere cy’umwaka ushize w’amashuri.

Ati "Ngo birahenze? Oya! Kandi ari byo bihendutse? Sinzi uko imibare y’ababivuga imeze, kuko twebwe tubyifashisha umwaka ushize hagize akantu gasaguka. Bareba ikiguzi cy’ibishyimbo bakibagirwa inkwi bitwara, amazi yo kubiteka, n’amabuye n’imyanda umuntu aba yajugunye. Twe twateganyaga no gushaka undi mukozi, bituma tumwihorera."

Twifuje kumenya icyo uruganda ruvuga ku gutinda kugeza ibishyimbo ku mashuri cyangwa ku kubihageza bitakimeze neza, umuyobozi w’urwo ruganda yanga kugira icyo abivugaho.

Yagize ati "Mwabajije Akarere? Njyewe nta makuru mfite!"

Icyakora, Umuyobozi w’Akarere ka Huye, Ange Sebutege, we avuga ko nta mbogamizi barabona muri gahunda yo kugemura ibishyimbo bihiye mu mashuri.

Ati "Twe tubikurikirana buri munsi, nta mbogamizi turabibonamo. Kandi tureba ibitabangamira imyigire y’abana, tukareba ko n’ubuziranenge bukomeza kubahirizwa."

Akomeza agira ati "Kandi ntibinaribwa n’abana gusa, ahubwo no mu ngo, kuko no muri za ‘supermarket’ bihari kandi bigurwa.

Ange Sebutege uyobora Huye avuga ko kugeza ubu ibigo by’amashuri birimo kugabura ibishyimbo bihiye ari 54 kuri 98 abana bigamo bataha, ari na byo bihahirwa n’Akarere. Ibisigaye 44 ni ibigifite ibyo guteka byasagutse ku mwaka w’amashuri ushize.

Iyi gahunda kandi bayitangije nyuma y’uko mu mwaka ushize hari ibigo 10 bari bayigeragerejemo, bakabona bitanga umusaruro.

muri ziriya nzu ziri hepfo ya kaburimbo bafungiwe amazi mu gihe hatarakemurwa ikibazo cy’ayanyuraga muri uru ruhombo bivugwa ko yahombyaga WASAC

Abataka gufungirwa amazi ni abatuye mu gace ko munsi y’umuhanda, bavuga ko ubusanzwe batajyaga bayabura kuva bayagezwaho mu myaka y’ 1997, bakaba kandi barayagejejweho babigizemo uruhare kuko urebye ari bo bishakiye abacukura umuyoboro uyabazanira, bakishyura n’ibikoresho byifashishijwe mu kuyabegereza.

Aba bantu ariko baturanye na Motel Urwuri yo kuva yatangira gukora yakoreshaga amazi yikuriye ku iriba, yagiye inahaho abantu amatiyo yayo yanyurijwe mu masambu.
Motel Urwuri yiyegereza amazi yakuye ku isoko, yari yanagejeje amazi hepfo mu gasantere, ihafungura ivomero inateganya kuhashyira ikinamaba cyo koza ibinyabiziga. Icyakora iby’ikinamba ntiyabyemerewe, ihita inafunga ivomero yari yashyizeho.

Ubwo kaburimbo yo mu muhanda Huye-Kitabi yavugururwaga, hafi y’ahahoze ivomero rya Motel Urwuri haturitse amazi, abantu bazana uruhombo barayafata, batangira kuzajya bayifashisha.

Bo bibwiraga ko bavoma ya yandi y’isoko y’Urwuri cyangwa indi soko yaba yaraturitse hafi aho, ariko ntibyari byo. N’ikimenyimenyi aho WASAC yafungiye amazi yajyaga muri za ngo zo munsi y’umuhanda, na yo yarakamye.

Abari basanzwe bifashisha amazi ya WASAC muri kariya gace bifuza ko bayafungurirwa kuko ukwezi kose batavoma ari kurekure.

Abavomaga kuri rwa ruhombo na bo, barimo abahaturiye, barifuza ko byibura WASAC yabashyiriraho akazu k’amazi, kugira ngo bajye babasha kuvoma hafi.

Umubyeyi umwe yagize ati “N’iyo batubwira ngo tuyagure twayagura, kubera ko aho tuvoma ni ku iriba riri mu ishyamba, kandi ntitwabasha kujyayo nijoro. Saa mbiri z‘ijoro umuntu yaburaga amazi akitabaza hano. Uwadushyiriraho kwishyura n’amafaranga 20 twayishyura.”

Abahogerezaga amagare na za moto bakabona amaramuko kimwe n’abagenzi bahanyuraga bakahanywa amazi, bo bifuza ko basubirizwaho amazi y’isoko yo mu Rwuri, kuko ngo ari yo yabafasha.

Umwe ati “Utambutse hano yabonaga amazi yo kwinywera, none twarayabuze.”
Undi ati “Ni yo yatumaga tubona akazi. Akagare cyangwa moto yazaga tukoza, ukabona 500 yo kurya.”

Undi na we ati “Twebwe twaturukaga iwacu mu giturage, wagera hano ugakaraba ukajya mu mujyi usa neza. Aho bayafungiye uratunguka mu mujyi bati uyu muntu aturutse mu cyaro!”

Ku Urwuri Motel na ho, barinubira kuba barafungiwe amazi, bakibaza impamvu babikorewe batabanje kugishwa inama nyamara amazi yabo ntaho ahuriye na WASAC, nk’uko Théoneste Nshimyumuremyi uhakorera kuri ubu abishimangira.

Agira ati “Hari nk’amazu dufite atageramo ayo mazi bitewe n’uko nta pression afite. Iyaba ari aya WASAC yakabaye agera hose kuko yo aba afite pression. Ayacu ntayo afite, n’ikimenyimenyi iyo hari itiyo icitse ameneka nk’aho waba uri kumena amazi yo mu ijerekani. Yo ntatumbagira nk’aya WASAC.”

Umuyobozi wa WASAC mu Karere ka Huye, Richard Bwanakweli, avuga ko urebye amazi yaturikiye muri kaburimbo, bakaba barasabwe gukemura ikibazo batayikozeho. Ngo bamaze kwegeranya ibya ngombwa byose, ku buryo bitarenze tariki ya 18 Nzeri 2024 abakupiwe amazi bayasubizwa.

Naho ku bijyanye n’uko baba barafunze amazi ya Motel Urwuri, ngo ntabwo ari byo.
Ati “Ayo mazi yaho narahageze, ndababaza nti ese aturuka hehe, bati ni isoko. Isoko rero ntituzi aho ituruka n’aho inyura. Wajya kuyafunga utazi ibyaho? Byashoboka ko ari ikibazo tekinike bagize tuhavuye, bakagira ngo wenda ni twebwe twabikoze, ariko ntabwo ari twebwe rwose.”

Naho ku bijyanye no gushyira akazu k’amazi ahahoze uruhombo rwazagamo amazi, ngo babikora ari uko babisabwe n’ubuyobozi bwaba bwagaragaje ko bikwiye, kuko n’utwo basanganywe tubahombya.

Icyo bifuza ngo ni uko abantu muri rusange bafata amazi mu ngo zabo, kubera ko ayo mu ngo ari yo babasha gukurikirana mu buryo bworoshye. Amavomero ashyirwa aho babona ko abahatuye nta bushobozi bwo kuyigereza mu ngo bafite.

Gare ya Nyanza izatwara miriyari ebyiri na miliyoni 850

Ubundi abakorera muri gare ya Nyanza bavuga ko ari ntoya cyane, ku buryo n’iyo imodoka za kompanyi ebyiri zihakorera ari zo Horizon na Volcano zihahuriye, hari nk’izakererewe, usanga nta bwinyagamuriro.

Hari abo usanga bagira bati “Gare ni ntoya. Imodoka iyo zihahuriye ari nyinshi twebwe turasohoka tukajya hanze yayo. Si ukubeshya, hano iyo haje imodoka z’andi ma kompanyi nk’abiri zikahahurira n’amabisi ya Volcano na Horizon, duhita tuva muri gare tukajya hariya hepfo.”

Umwe mu bacuruzi uvuga ko akunze kugenda mu masoko menshi agira ati “Nk’ugenda mu masoko menshi, za Musanze, za Butare na za Gikongoro, iri soko rya Nyanza riri inyuma cyane. Kuri zeru nako.”

Gare ya Nyanza izaba yubatse bijyanye n’igihe

Akomeza avuga ko Nyanza iri inyuma urebeye no kuri gare agira ati “Hera no kuri gare! Na yo iri hasi. Byose biri hasi cyane ukurikije aho iterambere ry’Igihugu rigeze. Twifuza ko twagira isoko na gare byiza. Yego n’Umujyi wacu uracyari nyuma, ariko byibura tugire ibikorwa bisobanutse, biri ku rugero nk’urw’ahandi.”

Umuyobozi w’Akarere ka Nyanza, Erasme Ntazinda, avuga ko rwiyemezamirimo uzubaka isoko na gare yamaze kuboneka, bikaba kandi byombi bizubakwa mu kibanza bisanzwemo. Ubu hari gukorwa inyigo y’uko bizaba bimeze no gushaka uburyo ikibanza birimo cyajya mu maboko ya rwiyemezamirimo, kuko gisanzwe icya Leta.

Isoko rya Nyanza rizuzura ritwaye hafi miliyari eshatu n’igice

Agira ati “Kugeza uyu munsi gare n’isoko twabiboneye umushoramari, turi mu biganiro no gushaka uko yatangira kubaka. Twizera ko bitarenze umwaka utaha mu kwa mbere imirimo ishobora kuba yatangiye. Kuko igisigaye ni ugukora ku buryo abona ubutaka byemewe n’amategeko.”

Biteganyijwe ko kubaka isoko rya Nyanza bizatwara hafi miriyari eshatu n’igice (Frw 3,463,185,974) naho gare ikazatwara miriyari ebyiri na miriyoni 850 (Frw 2,850,427,866). Igihe imirimo yo kubaka izarangirira bizaturuka ku nyigo iri gukorwa ubu ngubu n’igihe imirimo izatangirira.

Ibiro by’Akarere ka Gisagara

Agira ati “Yaraje ansanga muri salon, aza anteraho amahane, kugeza igihe amfungiraniye muri salon, amvuna urutoki, antwara n’imashini nogosheshaga hamwe na appareil nafotozaga. Icyo gihe polisi ni yo yanjyanye kwa muganga, kandi icyo yamporaga ngo ni ibiceri 200 yavugaga ko murimo njyewe ntanabizi.”

Icyo gihe ngo yaramureze, baraburana aramutsinda, akatirwa igifungo cy’imyaka ibiri ku cyaha cyo gukubita no gukomeretsa mu buryo bukabije. Ngo yaje gufatwa arafungwa, ariko amaramo umwaka umwe gusa kuko yafunguwe ku bw’imbabazi za Perezida wa Repubulika.

Macumi rero yamuregeye indishyi z’akababaro, acibwa amafaranga ibihumbi 300, ariko kugeza na n’ubu ntarayamwishyura, kandi akabona ngo ubuyobozi bwaragiye bubitinza bubishaka, kuko ngo batishimira kuba atanga amakuru ku bibera i Gisagara, cyane cyane kuri radiyo.

Ibi kandi ngo byabaye nyuma y’uko n’umukozi wa Ngali na we yari yamutwaye imashini yogosheshaga akayimarana ukwezi, bakayimugarurira barayishe.

Ati “Imashini n’ubu narayibitse, kandi ni yo nifashishaga mpahira abana. Bayimpaye hashize ukwezi, bananshyiraho n’iterabwoba ngo nintayakira baramfuga, banziza ko ntanga amakuru. Kandi amakuru ntanga, yubatse Akarere ka Gisagara, ibiyobyabwenge na za nyirantare biracika, ariko kubera ko hari abayobozi babaga babyihishe inyuma bikuriramo umusaruro ni icyo naje kuzira, n’ubu ngubu kikinkurikirana.”

Yungamo ati “Ni kumwe tuvuga ngo aha n’aha umuhanda umeze nabi, hakenewe iteme, umuhanda waracitse. Bampaye gasopo ngo ceceka, ntaho uzavuga ngo ibibazo byawe byumvikane.”

Ikimubabaza kurushaho ngo ni ukuntu abuzwa amahoro, yanashaka kugira icyo akora agakomwa mu nkokora.

Ati “N’ubu ngubu sinagenda ngo mfungure agasalon hariya ku Gisagara. Ni uguhita banteza abayobozi ntazi n’aho baturutse. Kugeza n’ubwo ngize iki kibazo nkirukira inzego zose z’Akarere ngo ndangirizwe urubanza, bakaba ntacyo baramarira.”

Umunyamabanga Nshingwabikorwa w’Umurenge wa Kibilizi, Clisante Giraneza, umaze igihe kitari kirekire ayobora uwo Murenge, avuga ko bari mu nzira yo kumurangiriza urubanza.

Ati “Twakiriye kopi yatsindiyeho indishyi, twandikira uwagombaga kwishyura, iminsi 30 ishira atarishyura. Igikurikiyeho ni uko tugiye gufatira umutungo we, kugira ngo utezwe cyamunara, abone ubwishyu.”

Kuri ubu ngo bari no gufatanya na Macumi mu kugenza ahari imitungo ya Nyandwi, bityo bazabashe kuyifashisha bashaka ubwishyu.

Naho ku bijyanye n’uko yaba atotezwa azira gutanga amakuru, umuyobozi w’Akarere ka Gisagara, Jérôme Rutaburingoga, mu butumwa bugufi kuri telefone yavuze ko iryo totezwa ntarimubaho, ahubwo ko akunda guhamagara ahantu hose ataka nk’ufite ikibazo, bakurikirana ntibakibone.

Ati “Ubu tugiye kongera gukurikirana.”

Ahahoze ibiro bya Perefegitura ubu harimo kubakwa inzu nini y’ubucuruzi

Nk’uko bigaragarira mu imurika ry’igihe gito mu Ngoro y’Umurage y’i Huye (ryatangijwe ku mugaragaro tariki 30 Kanama 2024), amafoto n’amakuru abashakashatsi bo mu Nteko y’Umuco babashije kwegeranya agaragaza ko ishingwa ry’Umujyi wa Huye (witwaga Astrida icyo gihe, kandi witiriwe igikomangoma cyo mu Bubiligi), ryajyaniranye no kuhubaka ibiro bya Teritwari ya Astrida, nk’imwe muri teritwari icyenda zari zigize u Rwanda igihe rwakoronizwaga n’Ababiligi.

Ibiro bya Teritwari byubakwa hari mu Ukuboza 2023. Byubatswe mu gitwa cy’umusozi wa Butare wari hagati y’imisozi ya Ruhande, Save, Buye na Mamba. Kubyubaka byatumye havuka urusisiro rw’umujyi na wo witwaga Astrida, waje kwitwa Butare mu mwaka wa 1962 kuko wari muri Perefegitura ya Butare, hanyuma witwa Huye mu mwaka wa 2006 kuko uri mu Karere ka Huye.

Ibiro bya teritwari ya Astrida byubatswe na Joseph Dardenne bitaga Bwana Yozefu, ari na we wa mbere wayoboye iyi teritwari, ari kumwe na Padiri Briquet. Aho byari biri ubu harimo kubakwa inzu nini y’ubucuruzi, ahigeze no kuba ibiro bya Perefegitira ya Butare hakanakorerwamo n’Umurenge wa Ngoma.

Hari imbere y’inzu ya Dardenne yari iherereye mu gice kirimo inzu y’ibitabo ya Caritas.

Simon Bizimana, umushakashatsi uri mu kiruhuko cy’izabukuru, avuga ko muri icyo gihe cy’ishingwa rya teritwari ya Astrida, ahari igorofa rya Semuhungu kuri ubu hashyizwe urukiko rwa teritwari n’inzu y’imfungwa.

Astrida, umugore w’igikomangoma cyo mu Bubiligi ni we witiriwe teritwari

Agira ati “Imfungwa zakubitwaga ibiboko bine mu gitondo, na saa munani. Ikiboko ni igikoresho cyabaga cyarakaswe mu ruhu rw’imvubu. Icyo gihe imfungwa zabaga mu duce tw’inyubako bitaga block mu Gifaransa, ari na ho havuye inyito uburoko. Nyuma ya 1950 uburoko bwimuriwe mu Cyarabu. Gereza ya Karubanda yo yubatswe nyuma.”

Isura y’Umujyi yagiye ihinduka, ari na ko waguka. Ni muri urwo rwego guhera mu mwaka wa 1936 hubatswe inzu zo gucururizamo ziswe amazina bitewe n’abazikoreragamo.

Ahitwa mu Cyarabu (ubu ni hagati y’isoko ryo mu mujyi na IPRC-Huye), hiswe gutyo kubera ko hacururizwaga ahanini n’Abarabu, mu Kigereki (uhereye ku nzu ya RRA iri hakurya ya BK kugera ku isoko) hari umwihariko w’uko hari higanje abacuruzi b’Abagereki, ariko urebye izina ryafashe cyane ni iry’Ikizungu uhereye kuri Hotel Faucon ugakomeza ukagera ku isoko kuko hakorerwaga n’abazungu muri rusange.

Muri ibyo bihe ni na bwo hubatswe Hotel Faucon na Hotel Ibis, ari na zo hotel zabarizwaga i Huye zonyine kugeza mu mwaka w’1952.

Aphrodice Misago, umucuruzi uzwi mu mujyi i Huye, avuga ko yatangiye acururiza mu isoko ritari ryubakiye mu mwaka w’1980. Icyo gihe ngo yafatanyaga na mukuru we. Isoko ryakwitwa irya kijyambere ngo ryubatswe nyuma n’uwari Burugumesitiri wa Ngoma witwaga Kanyabashi, afatanyije n’Umufurere witwaga Gratien.

Akomeza agira ati “Ubundi umujyi wa Butare mbere wari ugizwe n’amaduka y’Abahinde n’Abarabu n’Abagereki. Abanyarwanda batangiye nyuma ari bakeya, guhera mu mwaka w’1983 n’1984.”

Ubucuruzi bwakomeje kugenda butera imbere, ariko buza gukomwa mu nkokora na Jenoside yakorewe Abatutsi mu mwaka w’1994, kuko abacuruzi bamwe bari bamaze gutera imbere bishwe, abandi bagahunga.

Umusigiti wa mbere wubatswe i Ngoma

Mu mwaka w’2011 haje igitekerezo cyo kugira ngo amaduka ashaje n’ayasenyutse akurweho hubakwe ay’amagorofa ageretse byibura kabiri.

Abafite inzu z’ubucuruzi mu Cyarabu no mu Kizungu rero basabwe kuzivugurura bakubaka iz’amagorofa, ariko byafashe igihe kirekire kugira ngo bigerweho, bigera n’aho inzu zimwe na zimwe zo mu Cyarabu zisenywa kugira ngo ba nyira zo bubake uko babisabwaga.

Buke bukeya biri kugenda bijya mu buryo, kuko nko mu Cyarabu hasigaye ibibanza bine byonyine byasenywemo inzu bitarubakwa.

Misago ati “Habaho rero gufunga umujyi, abantu bamwe babura aho bakorera, abandi bajya hirya no hino, ni bwo nyuma y’umwaka wa 2012 habayeho igitekerezo cy’abacuruzi bishyize hamwe, isoko ryari rihari Leta iraribaha, bararisenya, bubakamo isoko rigeretse gatatu. Twaritangiye turi abantu 11, turaryubaka rirarangira, dukusanyirizamo abacuruzi bose, noneho n’abandi baratinyuka batangira kubaka.”

Umujyi watangiye ugizwe n’insisiro umuntu yagereranya n’Isibo kuri ubu, ubu utuwe n’ababarirwa mu bihumbi 100, nk’uko bivugwa n’Umuyobozi w’Akarere ka Huye, Ange Sebutege.

Abagifite inzu zubatse mu buryo butari ubw’amagorofa mu Cyarabu no mu Kizungu ubu bari gushishikarizwa gukora ku buryo bazivugurura.

Kugira ngo bigerweho, umuyobozi w‘Akarere ka Huye asaba abafite ubushobozi bukeya bafite ibibanza kwiyegeranya n’abafite ubuhagije ariko bakabasha kubaka bijyanye n’igishushanyo mbonera cy’Umujyi.

Umusozi wa Butare ni wo wubatsweho ibiro bya Teritwari ya Astrida

Agira ati “Nta mpamvu yo kugundira ikibanza ufite mu mujyi mu gihe ushobora kuba wavugana n’abafite ubushobozi bwo kukibyaza umusaruro, hanyuma nawe ukabonamo uruhare rwawe. Ubu biremewe ko umuntu abona ibya ngombwa by’inzu aho iteretse, n’uwubatse hejuru ye akabona icya ngombwa cye.”

Mu mujyi wa Huye hagiye hari n’ahandi hantu hari inzu zishaje za Leta umuntu yavuga ko zitajyanye n’icyerekezo cy’umujyi, ku buryo hari abibaza impamvu Leta na yo itazivugurura.

Meya Sebutege avuga ko kuri bo ari ibibanza bishobora kuzashyirwamo inyubako nini.

Ati “Kuba ahantu runaka hari ikibanza ntabwo ari ikibazo. Gishobora kuba igisubizo mu gihe kiri imbere. Uko tugenda tuganira n’abashoramari, uko tugenda tubona imishinga yo kwagura umujyi, bigenda bishoboka. Urugero ni ahari kubakwa inzu nini y’ubucuruzi (Mall)”

Ishingwa ry’amashuri n’ibigo bya Leta biri mu byaranze iterambere rya Huye

Nta wavuga iterambere rya Huye ngo yibagirwe amashuri kuko hari mu ha mbere yubatswe, bikozwe ahanini na Kiliziya gatolika. Misiyoni (kiliziya) ya mbere yahubatswe mu mwaka w’1928, iza kwitwa Diyoseze mu mwaka w’1952.

Abayisiramu na bo babanje gukorera ahitwa Buye, hanyuma bubaka umusigiti wa mbere i Ngoma muri za 1940.

Amashuri abanza, habanje iryo bita ku Kibikira mu 1933 (ubu hitwa kuri Butare Catholique), hakurikiraho iry’i Ngoma mu 1952 n’irya Kabutare 1953 (ryari mu mashuri ari ku muhanda ubu ari muri GSOB).

I Ruhande na ho hari iryigirwagamo n’abana b’abazungu gusa, inyubako zaryo zaje kugirwa Kaminuza y’u Rwanda mu mwaka w’1963.

Amashuri yisumbuye na yo, habanje iryubatswe n’Abafurere b’urukundo mu mwaka w’1929 (ubu ni muri GSOB), muri za 1950 hubakwa iry’imyuga (ahari GS Gatagara bitaga kwa Gishyoti). Nyuma y’ubwigenge hashyizweho ishuri rya gisirikare (ESO) n’ishuri ryigenga CEFOTEC muri za 1970.

Umujyi wa Huye ukomeje kugenda utera imbere

Mu mwaka w’1950 hashinzwe ikigo cy’ubushakashatsi IRSAC (Institut de Recherche Scientifique en Afrique Centrale) cyaje kwitwa INRS (Insitut National de Recherche Scientifique) mu mwaka 1964, kiba IRST (Institut de Recherche Scientifique et Technologique) mu 1989, hanyuma NIRDA (National Industrial Research and Development Agency) mu 2011.

Mu mwaka w’1989 kandi, ni na bwo hashyizweho Ingoro y’Umurage w’u Rwanda yari i Butare, yaje kugaba amashami ikitwa Ikigo cy’Ingoro z’igihugu z’Umurage w’u Rwanda muri 2006, none Ingoro z’Umurage w’u Rwanda zibarizwa mu Nteko y’Umuco.

Nta wavuga amateka ya Huye kandi ngo yibagirwe kuvuga ko hari ikibuga cy’indege ntoya cyahubatswe mu mwaka w’1946, orcheste yari muri kaminuza y’u Rwanda guhera muri za 1970 yitwaga Salus Populi, ndetse n’itorero Amasimbi n’Amakombe yakoreraga muri INRS guhera mu 1976.

Imirimo yo kubaka iyi nzu yaratangiye

Igishushanyo mbonera kigaragaza uko iyi nzu y’ubucuruzi iri kubakwa izaba imeze

Agatebe gafasha umwana guhagarara (iburyo) hamwe n’akihariye (ibumoso)

Badukora mu bikarito n’impapuro begeranya bifashishije colle bakora bahereye ku ifu y’ubugari. Ibyo bikarito n’impapuro begeranyije bivamo urubaho rufite umubyimba bifuza bitewe n’icyo bagiye gukora.

Bakora rero agatebe k’inguni (corner sit) kifashishwa ku mwana utozwa kwicara, hakaba agatebe kihariye (special chair) kicazwamo umwana wamaze kubimenya ku buryo umubyeyi ashobora kukamwicazamo akamuha udukinisho cyangwa ibyo kurya ashyira ku kameza kakoranywe n’agatebe, bityo akabasha kwikorera uturimo twe. Hari n’akigisha umwana guhagarara (standing frame).

Jean Dushime, umwe mu bashinze umuryango Friends of Mother land Initiative Ubumuntu (FMI Ubumuntu) ari na wo ukora turiya dutebe, avuga ko biyemeje kudukora bamaze kubona ko hari abana batabasha kujya kwiga, n’ababyeyi ntibabashe kubavuza, dore ko Nyanza iri kure cyane y’umujyi.

Ati “Twarebeye ku bikoresho byo kwa muganga bya kizungu, turaza turabyigana, tuza gutumaho inzobere mu kugorora ingingo babyigiye, baraza basuzuma inyunganirangingo zacu, basanga ziruzuye, nuko dutangira kuziha ababyeyi duturanye. Tuzitanga nk’inkunga, ariko ntabwo tuzigeza kuri benshi kubera ko tudafite ubushobozi buri hejuru.”

Turiya dutebe dukoze ku buryo dufite imyenge umubyeyi acishamo igitambaro ajishisha umwana kugira ngo atagwa, mu gihe ataramenyera, bitewe n’aho ageze afashwa, kandi ababyeyi bigishwa uko twifashishwa, n’igihe umwana akwiye kukamaramo, bitewe n’urwego agezeho.

Kuba dukoze mu mpapuro n’ibikarito bituma tutakomeretsa umwana utarakomera igihe akaguyeho, n’umubyeyi bikamworohera kugatwara wenda amujyanye nko mu itsinda bahurijwemo nk’ababyeyi bafite abana bafite ubumuga.

Kuri ubu FMI ubumuntu bita ku bana 26, ariko ngo babonye ubushobozi bafasha abarenze. Iyo habonetse nk’umuterankunga wiyemeza gufasha umwana ufite ubumuga, cyangwa na none umubyeyi ufite umwana ufite ubumuga ufite ubushobozi, agatebe kamwe bakamuhera amafaranga ibihumbi 30.

Aya mafaraga yifashishwa mu gufasha abandi baba batarabasha kugeraho, bakennye.
Kwifashisha ibikarito kandi bituma duhenduka kuko urebye igiciro cy’ibikoresho byakwifashishwa mu guherekeza umwana kuva ataramenya kwicara kugeza abasha kugenda byatwara amafaranga angana n’ayagura agakoresho kamwe ka kizungu.

Ababyeyi bafite abana bafite ubumuga bagiye bafashwa na FMI Ubumuntu bavuga ko turiya dutebe dutanga umusaruro, akarusho kakaba ku kuba abana bafashirizwa iwabo batarinze guhora mu bitaro, n’ubwo bijya biba ngombwa ko bajyanwayo, barwaye izindi ndwara cyangwa bagiye kugorozwa.

Naom Nyinawumuntu avuga ko n’ubwo bifata igihe kirekire, turiya dutebe dufasha abana. Urugero atanga ni uwe yatangiye kukicazamo amaze amezi icyenda, atarabasha kwicara, none ubu ku myaka ibiri bikaba bitangiye kuza.

Ati “Aricara mu gatebe nkabona biremeye. Birimo biragenda biza. Turiya dutebe turadufasha cyane. Nk’ubu mbere nta kintu yashoboraga gufata kuko nta ntege yari afite, ariko ubu arafata. Nka telephone arayifata. Yego ku bw’intege nkeya igera aho ikamucika ikagwa, ariko arayifata ukabona ko ayibona.”

Nyiraminani afite umwana wavutse amugaye ukuguru, n’umugongo udakomeye. Yatangiye kwifashisha agatebe k’inguni umwana afite amezi icyenda, ubu arahagarara, yatangiye kujya atera n’intambwe. Ngo azakorerwa agakoresho basunika, bagatera intambwe.

Agira ati “Turabashimira rwose cyane, ririya rubyiruko. Niba abasore nka bariya bareba barumuna babo bakavuga ngo mubazane tubafashe, urumva se atari byiza ? ”

Umuryango FMI ubumuntu washinzwe n’abanyeshuri batandatu bo mu Murenge wa Nyanza bari barangije mu bijyanye na social work, biyemeje kugira umumaro aho bakomoka bahereye ku byo bize.

Batangiye bafasha mu gusubiza abana mu ishuri, bakabashakira ibikoresho by’ishuri, none mu myaka itatu bamaze batangiye bamaze kurisubizamo abagera kuri 72. Banabakurikirana buri munsi kandi bakabazamurira impano ku buryo hari abafite itorero ryo kubyina n’abari mu makipe akina umupira w’amaguru.

Nyuma yaho biyemeje gufasha muri gahunda yo gufasha abakene kubuvamo (graduation) hanyuma bitewe n’uko babonaga hari n’abana bafite ubumuga, biyemeza na bo kubafasha.

Kwa Musinga ni uku kera inzu zabaga zubatse

Gushyira umurwa uhoraho w’Abami i Nyanza, byabaye intangiriro yo gukura k’uyu Mujyi, ari na yo mpamvu bigoye gutandukanya amateka ya Nyanza n’ay’Abami b’u Rwanda.

Ubundi umwami Musinga yimye ingoma mu mwaka w’1896, abanza gutura ahantu hanyuranye harimo ahitwa i Runda mu Karere ka Kamonyi, ahitwa i Bweramvura ndetse n’i Mwima.

Nyuma yaho ngo indagu zemeje ko ajya gutura ahitwa mu Gakenyeri (hafi ya Kiliziya yaragijwe Kiristu Umwami iherereye mu mujyi wa Nyanza), nk’uko bivugwa na Celestin Nyirishema, umushakashatsi n’umwanditsi, ndetse na Jean Baptiste Rwabikumba wari utuye i Nyanza ku ngoma y’Umwami Rudahigwa.

Mu gukura kwa Nyanza hagenda hazamurwa inyubako z’amagorofa

Ingoro ya Musinga yari igizwe n’inzu 16 harimo inini ya kambere n’izindi zari zigiye zifite imimaro inyuranye nk’iy’amata, iy’inzoga n’ibindi.

Mu Gakenyeri umwami Musinga yahatuye kugeza mu mwaka w’1931, ubwo abazungu bamuciraga i Kamembe, bamuziza ko yari yanze imigirire yabo yo kwinjirira umuco n’imiyoborere y’Igihugu.

Mu mwaka w’1940, abazungu babonye ko i Kamembe abantu bakomezaga kumusura noneho bamucira i Moba muri Congo, ku birometero igihumbi uvuye i Kamembe, kandi hirya y’Ikiyaga cya Kivu.

Umusezero w’i Mwima uruhukiyemo umwami Mutara III Rudahigwa n’umwamikazi Rosalie Gicanda ndetse n’umwami wa nyuma w’u Rwanda, Kigeli V Ndahindurwa

Umwami Musinga bamaze kumukura ku ngoma abazungu bimitse umuhungu we Mutara III Rudahigwa. Bamwimikiye i Mwima nyuma yaho bamutuza mu Rukari aho bari bamwubakiye inzu itari iy’ibyatsi. Yatanze yari amaze kubaka indi nzu ahitwa ku Rwesero, ariko yari atarayitaha. Ubu yagizwe Ingoro y’Amateka yo Kwigira.

Nyanza yakomeje kuba umurwa kugeza mu mwaka w’1961. Kigeli V Ndahindurwa, ari na we Mwami wa nyuma, yimitswe abakoroni baramaze gukuraho ubwami ku buryo we yatuye mu nzu yari ntoya, iri hafi y’ahitwa ku bigega.

Uretse Musinga, Rudahigwa na Ndahindurwa, hari n’abandi bami bari baratuye muri Nyanza nk’uko bivugwa n’umushakashatsi Nyirishema.

Nyanza ibumbatiye amateka menshi yo hambere nk’Umurwa mukuru w’Abami

Agira ati “Mutara ll Rwogera yatuye i Mwima na Rungu. Yari ahafite umurwa ukomeye warimo inzu yaruse izindi zose z’abami zabayeho. Yari yubakishije ubuhivu, ku buryo n’abasizi bayivuze. Nta yindi ngoro yigeze ingana n’iya Rwogera. Rwabugiri nyuma ahaje na we, muri uwo murwa, barabihindura bati, ntabwo umwami yaza gutura i Rungu nk’uko byahoze, habaye Mushirarungu.”

Avuga kandi ko na Ndahiro Cyamatare kimwe na Mibambwe Sekarongoro Mutabazi na bo batuye i Nyanza.

Ikimenyetso gisigaye cy’aho umwami Musinga yatuye, ni igiti kinini cyane cy’umuvumu. Bacyita ikigabiro, ni ukuvuga ikirango cy’ahahoze urugo rw’Umwami. Hafi yaho ugana mu kabande haracyari iriba ryashorwagamo inka ze.

Ikigabiro cy’ahari Ingoro y’Umwami Musinga, ari na ho umujyi wa Nyanza watangiriye

Musinga amaze kuhirukanwa, mu mwaka w’1935 haje gusenywa, maze hubakwa amashuri na Kiliziya umwami Rudahigwa yatuye Kristu Umwami mu mwaka w’1946, nyuma y’uko yari yabatijwe mu mwaka w’1943.

Ubwiyongere bw’ibikorwa by’iterambere rya Nyanza

Hagati y’umwaka w’1899 n’uw’1960 habayeho ukwiyongera kw’ibikorwa remezo i Nyanza.

Mu w’1937 hubatswe ikaragiro ry’amata, bigizwemo uruhare rukomeye n’Umwami Rudahigwa, nk’uko bisobanurwa n’umusaza Rwabikumba.

Agira ati “Umwami Mutara ni we wasabye ko ryajyaho, kugira ngo amata y’u Rwanda yoye gupfa ubusa, bajye bayakuramo za fromage na za beurre.”

Ikaragiro ry’amata rya Nyanza ryashinzwe bigizwemo uruhare rukomeye n’umwami Rudahigwa

Mu mwaka w’1957 ryaje gufunga imiryango ku bw’imvururu zabaye mu Rwanda, mu 1967 ryongera kubyutsa umutwe ku nkunga y’Abadage na UNICEF.

Ryakomwe mu nkokora na Jenoside yakorewe Abatutsi, ariko mu mwaka w’1995 ryongera gukora, hanyuma mu w’1999 ryegurirwa Minisiteri y’Ingabo, riravugururwa riva ku bushobozi bwo gutunganya litiro ibihumbi bibiri ku munsi, ubu rikaba rigeze kuri litiro ibihumbi 20. Intego kandi ngo ni ukongera kwagura, bakagera ku gutunganya litiro ibihumbi 50 ku munsi.

Nyuma y’inzara ya Ruzagayura yaturutse ku ntambara ya kabiri y’isi yose (yabaye hagati ya 1940 na 1945) umwami Mutara yubatse n’ibigega byo guhunikamo imyaka, biherereye aho bita ku Bigega.

Icyuzi cya Nyamagana cyafukuwe n’umuzungu witwaga Dubois, kugira ngo abahinzi bajye babona amazi yo kuhira mu gihe cy’izuba

Rwabikumba ati “Biriya bigega na byo Rudahigwa yabishyizemo intege kugira ngo bazajye babihunikamo imyaka, igihe imbuto yabuze noneho bajye bongera bayisubize mu baturage.”

Mu rwego rwo kurwanya inzara nanone, i Nyamagana hacukuwe icyuzi cyayobowemo amazi yo kwifashisha mu kuhira imyaka.

I Nyanza kandi, umwami Rudahigwa yahubatse urukiko mu mwaka w’1937 yaciragamo imanza, arekera aho gucira imanza ku Karubanda.

Nta wavuga kwaguka kwa Nyanza ngo yibagirwe ikipe ya Rayon Sports yahaboneye izuba, ikaza kwimukira i Kigali. Icyakora kuri ubu buri mwaka iza gukinira kuri Sitade yaho, Abanyenyanza bakabyishimira, muri gahunda bise ‘Gikundiro ku ivuko’.

Nyanza yagizwe igicumbi cy’umuco kubera amateka yayo

Hagati y’umwaka w’1960 n’uw’1994 habayeho kudindira k’Umujyi wa Nyanza kubera ko ubuyobozi bwariho mu Rwanda bwanakoze ku buryo iryo zina ridakomeza kuvugwa, hitwa Nyabisindu.

Iterambere rya Nyanza rijyana nyumabko zijyanye n’igihe zikomeje kuhubakwa

Nyuma ya Jenoside yakorewe Abatutsi mu mwaka w’1994 wongeye kuzamurwa, ku buryo ugenda ugira ibikorwa biwuteza imbere, harimo ibikorwa remezo nk’imihanda ya kaburimbo, amahoteli agenda ahubakwa, n’ibindi.

Hari n’Ingoro z’Umurage w’u Rwanda ebyiri ari zo iyo mu Rukari yiswe Ingoro y’Amateka y’Abami n’Ingoro y’Umurage yo Kwigira iri mu nyubako Umwami Rudahigwa yari yujuje ku Rwesero, agatanga atayitashye.

Kuri ubu Nyanza yagizwe Igicumbi cy’Umuco, ku buryo hari imishinga yo guteza imbere ubukerarugendo bushingiye ku muco igenda ihashyirwa. Ni no muri urwo rwego inyubako yahoze ari urukiko rw’Umwami ubu yagizwe inzu iyobora ba mukerarugendo.

Uko Nyanza igenda itera imbere, nyuma y’uko yari yarasubijwe inyuma, hagenda hashyirwa n’inyubako zijyanye n’igihe

Hagenwe n’inzira zo gusura amateka yaho, harimo inzira nyabami, n’inzira yo kujya ku musozi witegeye ahantu henshi mu Rwanda (Nyanza Big View). Barateganya no kubaka Umudugudu Ndangamuco (Cultural Village) ku gasozi kari hejuru y’icyuzi cya Nyamagana.

Umuyobozi w’Akarere ka Nyanza, Erasme Ntazinda, asobanura ko amateka y’Umujyi wa Nyanza ahatse ubukungu bushingiye ku muco, ari na yo mpamvu bawuhaye icyerekezo cyo kuba ‘Izingiro ry’ubukerarungendo bushingiye ku muco’.

Kuri ubu kandi bari kwizihiza yubile y’imyaka 125 umaze ushinzwe, nk’uburyo bwo kugira ngo Nyanza n’amateka yayo bimenyekane.

Inzu z’ubucuruzi mu mujyi wa Nyanza zagiye zirimbishwaho amabara y’imitako gakondo mu rwego rwo guteza imbere ubukerarugendo bushingiye ku muco

Ati “Nyanza ni Umujyi ufite amateka, ufite ubukungu, ufite uko wabayeho n’uko wakuze, n’aho ugeze uyu munsi, ndetse ufite n’icyerekezo kiwuganisha mu cyerekezo Igihugu kirimo cyane cyane cyo kuvuga ngo, ni iki cy’umwihariko dufite cyatuma ubukungu buzamuka?”

Intego ni uko ngo Nyanza kuri ubu isurwa n’abakabakaba ibihumbi 100 bitaranageraho ku mwaka, yazajya isurwa n’abagera kuri miriyoni ku mwaka.

Ku bijyanye n’ibikorwa byo kwizihiza isabukuru y’imyaka 125 Nyanza imaze ishinzwe, byatangiye kuva tariki ya 2 kugeza ku ya 7 Nzeri 2024.

Iterambere rya Nyanza rigaragarira buri wese uhagenderera

Muri ibyo bikorwa harimo ibyo kumurika bimwe mu bishingiye ku muco biri i Nyanza, kunyura mu Nzira Nyabami abantu basobanurirwa amateka y’ubwami i Nyanza, isiganwa ry’amagare, hanyuma byose bigasozwa n’umukino w’umupira w’amaguru uhuza ikipe ya Rayon Sports n’iya Mukura.

Ikipr ya Rayon Sports nayo iri mu bimurikwa mu kwizihiza imyaka 125 y’Umujyi wa Nyanza

Umujyi wa Nyanza wakomeje kuzamurwamo inzu zijyanye n’igihe

Ibiro by’Akarere ka Nyanza nabyo bikorera mu nzu ijyanye n’igihe

Umuyobozi w’Inteko y’umuco, Ambasaderi Robert Masozera, yavuze ko iki gitekerezo bakigize mu gihe cya Gumamurugo yatewe n’icyorezo cy’Indwara ya Coronavirus, ubu bakaba.

Ubwo yatangizaga buriya buryo bwo gusura Ingoro z’Umurage, bwatangiriye ku Ngoro Ndangamurage y’Imibereho y’Abanyarwanda iherereye i Huye, kuwa gatanu tariki 30 Kanama 2024, yagize ati “Mu bihe bya Covid twagize icyuho cy’abashyitsi, ni bwo twatangiye gutekereza ngo ingoro zacu zijye zisurwa mu buryo bw’ikoranabuhanga, duhera kuri iyingiyi y’i Huye”.

Yunzemo ati “Nishimiye kumenyesha abantu bose ko umuntu yaza mu Rwanda atahaza, aho yaba ari hose, ashobora kureba ibiyirimo.”

Ubusanzwe abasura Ingoro z’Umurage w’u Rwanda barabyishyurira, nyamara kugeza ubu nta giciro kirashyirwaho ku basuye bifashishije ikoranabuhanga.

Ku kibazo cyo kumenya niba iri koranabuhanga ritazabahombya, Amb. Masozera yagize ati “Icyo kibazo natwe twarakibazaga, tuvuga ngo ese ubundi ko abantu basura ingoro ndangamurage ku bw’amatsiko, bakishyura, nituyishyira ku ikoranabuhanga umuntu wese ashobora kuyibona, tuzongera kubona abayisura?”.

Akomeza agira ati “Ariko abamaze kubikora batubwira ko ikoranabuhanga urisura, ukamenya n’ibihari, ariko byongera n’amatsiko, ku buryo uri nko mu Bushinwa cyangwa muri Autralia, wiyemeza kujya kubyirebera noneho imbonankubone. Ukavuga uti reka njye kukireba, nkihumurize, mvugane n’abagikoze.”

Asoza iki gitekerezo agira ati “Byongera amatsiko. Twibwira ahubwo ko bizongera umubare w’abasura.”

Abashaka gusura ingoro z’umurage bifashishije ikoranabuhanga bashobora kunyura ku rubuga rwa Internet rw’Inteko y’Umuco, kandi n’abibereye ku ngoro y’umurage bashobora gutizwa ibyuma bareberamo (Virtual Reality Headsets) ku buryo baba bareba neza ibumuritse.

Minisitiri w’Uburinganire n’Iterambere ry’Umuryango, Consolée Uwimana

Hari mu rwego rwo kubashishikariza kwirinda gutwara inda imburagihe, kuko bibicira ubuzima, bikababuza kugera ku ntego bari bafite mu buzima. Ni inama bakoze ishingiye ku nsanganyamatsiko igira iti ‘Ejo Ni Njye’. 

Solange Tetero, umukozi muri Minisiteri y’urubyiruko, akaba umwe mu bahaye ibiganiro bagenzi be bakibyiruka, yabasabye kutemerera uwo ari we wese kubakorakora kuko akenshi bibaviramo gukora ibyo batari bateganyije.

Yakomeje ubutumwa bwe agira ati “Abahungu icyo mbasaba, mudukunde ariko munaturinde kudushora mu busambanyi tukiri batoya, kugira ngo ubuzima bwacu butangirika. Nk’uko wifuza ko mushiki wawe atatwara inda akiri mutoya, bibe no ku mukobwa mugenzi wawe n’uw’aho mutuye.”

Yunzemo ati “Ku bakobwa namwe, umuhungu w’umusore cyangwa w’umugabo nagusaba ko muryamana uzandike urwandiko ruvuga ngo: Njyewe ... na... twemeranyije ko ingaruka zizavamo tuzazisangira. Nantera indwara zandurira mu mibonano mpuzaitsina azamvuza; umwana tuzabyarana tuzafatanya kumurera kugeza igihe azaba afite ubushobozi bwo kwibeshaho. Tubyemeranyije tariki ..., byemejwe na ... hamwe na ...hanyuma musinye mwese.”

Yashoje iki gitekerezo agira ati “Icyo ndi kubasaba ahangaha, ni ukubanza gutekereza ku ngaruka mbere yo kugira icyo mukora (kuryamana)”.

Minisitiri w’uburinganire n’iterambere, Consolée Uwimana, yamwunganiye asaba urubyiruko kuvuga oya, kuko ubwayo ihagije.

Yagize ati “By’umwihariko abageze mu cyiciro cy’ubugimbi n’ubwangavu, ndagira ngo mbasabe mwirinde ababashuka. Mugenzi wanyu yababwiye ngo nibabashuka muzafate akanya mwandike urupapuro. Njyewe ndababwiye ngo ntimuzakabahe, uzasubize ngo OYA.”

Solange Tetero yabasabye ko uzifuza kuryamana na bo bazamusabe ko bndikirana

Yunzemo ati “Ni OYA, kubera ko uretse kubicira inzozi nta kindi kizima baba babifuriza. Umunyarwanda yaravuze ati, urusha nyina w’umwana imbabazi aba ashaka kumurya.”

Urubyiruko rwakurikiye inama rwagiriwe, na rwo ruhamya ko icyoroshye kurusha ibindi ari ukuvuga ‘Oya’, kuko ngo n’ubwo gusaba uri kugushuka kwandikirana na we hari abo bitashobokera n’abo bitatera ubwoba.

Uwitwa Shadrack Byiringiro w’imyaka 18 yagize ati “Irari nta kintu ritagukoresha. Tekereza ko ushobora kuba ugiye kuryamana n’umukobwa akakubwira ko arwaye Sida kandi uzi ko ari mbi, bitewe n’irari ukavuga ngo nta kibazo nzirengera ingaruka, ukazibuka kwicuza byararangiye!”

Yunzemo ati “Yego hari ushobora kugira ubwoba yumvise amagambo y’inyandiko, ariko hari n’ushobora gutekereza ngo, ejo nzigendera ntaho azambona. Icyiza ni Oya, akayishimangira.”

Fanny Tumukunde w’imyaka 16 na we ati “Oya irahagije. Nyine uba umuhakaniye! Kuko iyo ubyemeye, ya nsanganyamatsiko ‘Ejo Ni Njye’ ntiba igishobotse, ntuba ukiri wowe ejo, kuko ubuzima bwawe buba bugiye mu kangaratete. Kandi igihe cyagiye ntikijya kigaruka. Tugomba gufata icyemezo tukavuga ngo, Oya.”

Mu bindi abana bashishikarijwe harimo kwirinda kugendera mu bigare, kwirinda ibiyobyabwenge no kudaceceka igihe babonye hari umwana uri guhohoterwa, urugero nko guhabwa inzoga cyangwa no gusambanywa.

Abasambanyijwe kandi bikabaviramo gutwita no kubyara imburagihe bibukijwe ko icyaha cyo gusambanya umwana kidasaza, ko n’ubwo uwo yabyaye yaba afite imyaka icumi uwamusambanyije yakurikiranwa, cyane ko bwaba ari uburyo bwo gutabara n’abandi bana kuko akenshi usanga usambanyije umwe iyo adahanwe atihana, agasambanya n’abandi.

Inzu yakubiswe n’inkuba irashya irakongoka

Iyo nzu ni iy’uwitwa Venuste Hategekimana ufite imyaka 38. Iki kiza cyabaye mu ma saa cyenda n’igice zo ku wa 29 Kanama 2024, mu mvura yagwaga, nk’uko bivugwa n’Umunyamabanga nshingwabikorwa w’Akagari ka Shanga, Trifina Munganyimana.

Yagize ati “Inkuba yakubise iriya nzu amategura amwe arahanuka agwa hasi, hanyuma itera inkongi ku buryo nta kintu na kimwe abo muri ruriya rugo babashije kuyisohoramo. Imyambaro, ibiryamirwa, ibyo kurya, nta na kimwe basigaranye.”

Harakekwa ko inkongi yaturutse ku kuba inkuba yakubise muri prise yari iri mu cyumba ababyeyi bararagamo.

Muri uriya Mudugudu kandi inkuba yakubise abana batatu bo mu rugo ruri hirya yo kwa Hategekimana, bari kuri terefone. Umwe muri bo ntiyatinze kuzanzamuka, ariko babiri bandi b’imyaka 11 na 16 n’ubwo na bo baje kuzanzamuka, bahise bajyanwa kwa muganga kuko bari bakomeje gutaka kubabara umutwe, umugongo no mu nda.

Gitifu Munganyimana avuga ko atari ubwa mbere inkuba ikubise muri kariya gace, kuko ngo hari n’igihe yakubise amashanyarazi yaho bikaba ngombwa ko ashyirwamo bundi bushya, akaba ari yo mpamvu yasabye abahatuye kwitwararika, bagacomora ibintu byose bicometse ku mashanyarazi, igihe imvura iri kugwa, bakazimya na telefone.

Nyuma y’uko inzu yahiye, aba bari kugerageza gukuraho amategura akiri mazima ari na ko bazimya ibiti byari bigize igisenge bigicumba umwotsi

Ngo yanabasabye gutekereza ku mirindankuba, bamubwira ko batakwibonera ubushobozi bwo kuyigura.

Abazi iby’amashanyarazi bavuga ko gushyiraho umurindankuba mutoya (wo mu rugo) kuri ubu byatwara amafaranga abarirwa mu bihumbi 100, habariyemo amafaranga y’umurindankuba nyiri izina uba uri ahirengeye, icyuma gitabwa mu butaka kikayobora amashanyarazi y’inkuba mu butaka, n’utundi dukoresho ndetse n’igihembo cy’umutekinisiye uwushyiraho.

Aya mafaranga ngo si makeya, ariko na none ngo urebye agaciro k’ibikoresho umurindankuba urinda, ntabwo ari menshi cyane.

Nko mu Karere ka Gisagara gaherereye mu Ntara y’Amajyepfo, hari amavuriro y’ibanze 47 ariko 6 muri yo ntakora.

Mu Karere ka Rubavu gaherereye mu Ntara y’Iburengerazuba habarurwa amavuriro y’ibanze 34 ariko 9 muri yo ntakora.

Mu Ntara y’Amajyaruguru, mu Karere ka Burera ku mavuriro y’ibanze abarirwa muri 50 bafite, hari agera kuri 13 adakora, naho muri Rurindo, ku mavuriro 39 bafite, 14 ntakora.

Abaganiriye na Kigali today bavuga ko no muri ayo akora, hari akorana n’ibigo nderabuzima, ariko ugasanga hari akora rimwe na rimwe, hakaba n’agera aho agafunga imiryango kubera ko n’ibigo nderabuzima ubwabyo nta bakozi bahagije bifite.

Umunyamabanga nshingwabikorwa wo mu Kagari kamwe ko mu Ntara y’Amajyaruguru, ku kibazo cyo kumenya impamvu ivuriro ryo mu Kagari ayobora ritagikora yasubije agira ati: “Ivuriro ryo mu Kagari nyobora rimaze umwaka rifunze. Abaganga bavaga ku kigo nderabuzima none umubare w’abaganga wabaye mucye ntibongera kubohereza. Icyo ni cyo kibazo.”

Amavuriro yeguriwe abigenga na yo, hari ayagiye afunga imiryango kubera guhomba, biturutse ku mikoranire na RSSB nk’uko bivugwa n’undi munyamabanga nshingwabikorwa w’Akagari kamwe ko mu Ntara y’Amajyaruguru.

Ati “Ntabwo nibuka neza igihe gishize ivuriro rifunze. Hari umuganga wakoraga nk’uwigenga akorana na RSSB, biza kugera aho mbona atakiza, muhamagaye ambwira ko atazagaruka kubera ko hari ibyo atumvikanaho na RSSB.”

Mu mavuriro yigenga agikora na yo, hari ubwo usanga bagera aho bagatanga serivise abaturage birihira imiti 100%, ni ukuvuga ko hirengagizwa mituweri bafite, nk’uko bivugwa n’umuturage umwe wo mu Karere ka Gisagara.

Agira ati “Hari igihe ujyayo bakakubwira ngo niba wivuza ku giti cyawe, utambwira ngo nzishyurirwa na mituweri, aho turavugana.”

Ibiciro bya serivise n’imikoranire na RSSB birimo imbogamizi

Umwe muri ba rwiyemezamirimo ufite ivuriro ryigenga mu Karere kamwe ko mu Ntara y’Amajyepfo, twise Bikorimana kuko atashatse ko amazina ye atangazwa, avuga ko ayagiye afunga bituruka ku biciro bagenderaho no ku mikoranire na RSSB.

Ku bijyanye n’ibiciro bagenderaho, asobanura ko byashyizweho mu mwaka wa 2003, nyamara ngo kuva icyo gihe ibiciro by’ibindi byose byagiye bizamuka uretse ibyo kwa muganga.

Ati “Ikibazo cya mbere ni ibiciro. Urugero, umuntu uje kwa muganga kwipfukisha, batwishyura amafaranga 300 yonyine. Muganga ashobora kumumaraho iminota 30 amupfuka, kandi umuganga wa makeya ahembwa ibihumbi 200. Nawe fata umuntu uhembwa ibihumbi 200, ufate iminsi y’akazi, urebe ngo ku isaha akorera angahe ?”

Avuga rero ko Minisiteri y’ubuzima yari ikwiye gusubiramo ibiciro bya serivise batanga, kuko nk’isukari nk’amazi cg n’amashanyarazi uko byaguraga mu myaka 10 ishize atari ko bikigura, umushahara w’umuforomo mu myaka icumi na wo ukaba warahindutse, ariko aho amafaranga ava ni muri serivise zitangirwa kwa muganga kd zo ibiciro byazo ntibipfa guhinduka.

Ikindi kibagora ngo ni ukubona amasezerano na RSSB bamara no kuyabona, bagira ngo batanze fagitire bakagira ibyo bakatwa, ntihabeho inzira yo kubiganiraho ngo babe babyumvikanaho, ahubwo rwiyemezamirimo atakora ibyo bamubwiye bakamwihorera ntibamwishyure. Ibi byose ngo bibateza igihombo no kudindira kandi ntiwakora utunguka.

Igitera iyi mbogamizi kandi ngo ni ukuba mu gihe cyo gusinyana amasezerano RSSB itabanza kubagaragariza ibyo itemera, ngo inabahe ilisiti y’imiti batemerewe gutanga, ahubwo bakabimenyeshwa bagiye kwishyuza.

Bikorimana ati “Iyo muri RSSB baguhaye amasezerano bavuga ko bometseho imiti yemewe, ariko ntayo bashyiraho. Wowe kuko uba uje ushaka amasezerano wumva ko ugiye gukorana n’abantu ntabwo wibuka kubibaza. Na bo ubwabo ntibakwicaza ngo bakubwire ngo ku ndwara runaka turashaka ko muzajya mutanga iyi miti, iyi n’iyi nimuyitanga ntituzayishyura.”

Ikindi kibangamira abikorera bafite amavuriro yigenga ngo ni uko hari igihe RSSB itinda kubishyura, nyamara farumasi z’uturere baguriramo imiti zidashobora kuyibakopa.

Bikorimana akomeza iki gitekerezo agira ati “Urumva RSSB igize kudukata ngo ibyo twakoze ntabwo ari byo, n’utwo batwemereye tugakatwaho umusoro wa 15% noneho hakaniyongeraho kuyaguha aho bashakiye.

Wareba ugasanga urahomba, ukavamo, Ni icyo gituma usanga ahanini nta vuriro ry’ibanze rishobora kumara imyaka ibiri rikora ritarahagarara.”

Imbogamizi bahura na zo zituma badatanga serivise nziza

Bikorimana avuga ko imbogamizi ku biciro no ku kwishyurwa na RSSB bituma badatanga serivise uko bazitezweho, kuko abikorera batananiwe ngo bafunge imiryango, usanga hari igihe bavura abaturage birihiye 100% nyamara bafite mituweri.

Regis Rugemanshuro, umuyobozi mukuru wa RSSB

Ati “Hari nk’ugaruka kwivuza waramuhaye imiti yemewe na RSSB ntimuvure, nyamara wenda kujya ku kigo nderabuzima byamutwara urugendo rw’isaha n’igice n’amaguru. Iyo aje umubwira ko iyo uvuye kuri uyu muti wagafashe uriya kugira ngo ukire, nyamara nywuguhaye ntibazawunyishyura, wiyishyurire!”

Akomeza agira ati “Icyo gihe akora imibare, yabona ko yakwifashisha amafaranga ibihumbi bine byo kugenda no kugaruka kuri moto akemera akiyishyurira 500 cyangwa 1000, hanyuma ukamuha wa muti.”

Kwishyuza imiti 100% kandi na byo bajya babikora ku miti bagiye gushakira muri farumasi y’Akarere bakayibura, hanyuma bakayigura muri farumasi zisanzwe, ibahenze

Hari n’igihe batavura uko bikwiye, banga kuzakatwa ibijyanye na serivise batanze

Bikorimana ati “Urugero nk’umurwayi hari igihe aza kwivuza, nkamusangamo marariya, ariko akavuga ko anakorora cyane kandi nanjye mbibona. Nkasanga nimuha imiti ya marariya n’iy’inkorora, iy’inkorora muri RSSB bazayinkata bakemera iya marariya kuko yo ari ubuntu. Icyo gihe muvura marariya yonyine, yagaruka ku bwa ya nkorora iminsi 15 itarashira, na bwo simuvure kuko na bwo muhaye imiti nazayikatwa.”

Ku bijyanye n’imbogamizi zituruka muri RSSB, umuyobozi mukuru wayo, Regis Mugemanshuro, mu butumwa bugufi, yavuze ko RSSB yishyura ibikorwa by’ubuvuzi n’imiti hagendewe ku mabwiriza aba yatangajwe na Minisiteri y’ubuzima. Ikibazo ngo kiba igihe habaye kutubahiriza aya mabwiriza n’ibiciro byashyizweho na Minisiteri y’ubuzima.

Hari aho agira ati “Mu gihe hari serivise cyangwa imiti bifuza ko ijya ku rutonde, turabagira inama kuyishyikiriza Minisiteri y’ubuzima kugira ngo byigweho bihabwe agaciro mu gihe cyo kuvugurura urutonde, bibaye byujuje ibisabwa.”

Asoza ubutumwa avuga ko mu gihe hari aho abakozi ba RSSB banze kwishyura serivise cyangwa imiti kandi biri ku rutonde rw’ibyemewe kuri urwo rwego kandi bikurikije amabwiriza y’imivurire, babibamenyesha bakabikurikirana.

Ku rundi ruhande, umuyobozi ushinzwe isakazabutumwa mu Kigo gishinzwe Ubuzima (RBC), Julien Mahoro Niyingabira, avuga ko ikibazo cy’ibiciro mu mavuriro kizwi kandi kiri gushakirwa umuti.

Ati “Icyo kibazo cyaramenyekanye, kandi habayeho ibiganiro n’inzego bireba byo gukora ku buryo ibiciro ariya mavuriro akoreraho bijyana n’igihe. Ni ikibazo kizwi kandi kiri gushakirwa umuti.”

Gusa ntitwabura kuvuga ko uko ibi bibazo bikomeza gutinda gukemurwa ari ko amavuriro agenda afunga hirya no hino mu gihugu maze byose bikagira ingaruka ku muturage, kuko avurwa nabi cg se akanabura serivisi z’ubuvuzi hafi ye. Ikindi kandi ni uko amafaranga Leta yashoye mu kubaka aya mavuriro ariko akaba adakora na byo byabarwa nk’igihombo kuko icyari kigamijwe kitagezweho.

Imicurangire ndetse n’imiririmbire by’amakorali mu nsengero biranengwa

Janvier Namahoro, umwe mu bazi umuziki kandi bawukunda, akaba aba i Huye, ni umwe mu banenga imiririmbire yo mu nsengero, ahereye ku ho asengera.

Agira ati “Ntakubeshye, ahantu hose numva misa, kuva kuri Katedarali kugera mu ma Paruwasi agize Diyosezi, kugera no mu miryango y’abihaye Imana, harimo umuziki uri ku rwego rwo hasi! Hasi! Hasi!”

Akomeza agira ati “Ni ukuvuga ngo ubumenyi ni bukeya cyane, ariko noneho ikibazo gikomeye kikaba ko ufite ubumenyi bukeya aba yibwira ko afite ubuhanitse.”

Ikibazo ahuje n’abandi bakunda kandi bazi umuziki ni ukujya gusenga agasanga haririmbye abantu batabizi, baba baririmba indirimbo ndende zitaryoheye amatwi bakanaziririmba nabi, n’umucuranzi ubaherekeza asa nushakisha.

Abo bose usanga bagira bati “Mana we! Hari igihe rwose wumva korari mu misa ukavuga uti ese nsohoke ntahe?”

Namahoro akomeza avuga ko iyo yitegereje imihimbire y’indirimbo kuri ubu asanga inyuranye n’iya kera aho wasangaga hariho indirimbo ngufi, zifatika vuba, ziryoheye amatwi kandi zifasha abazumva gusenga.

Emmanuel Niyibizi usengera mu itorero ADEPR, na we ati “Akajagari k’umuziki wo mu nsengero kanatugonganishije na Leta muri ibi bihe, gaterwa n’uko ubumenyi abaririmbyi n’ababacurangira bafite ari bukeya.”

Akomeza agira ati “Umuntu arafata inanga (Piano), gitari, ingoma, agakubita n’imbaraga zose cyangwa akamariramo umuriro (Volume) akumva yabemeje. Nyamara abifiteho ubumenyi, yacuranga ibiryoheye abantu, agatanga ubutumwa, ntabangamire abatabikeneye.”

Kuri we kandi ngo n’ubwiyemezi bw’abacuranzi buri mu bituma ibintu bitagenda neza, kuko usanga akenshi batazi uko bakwiye kwitwara mu rusengero, cyane ko hari n’igihe insengero ziba zabasabye kuza gucuranga batanazisengeramo.

Ati “Akenshi gufata umucuranzi wa Piano, uwa gitari, uw’ingoma wenda n’uw’umwirongi, ukababwira ngo muducurangire kandi muduhe umuziki uryoshye, birabagora guhuza kuko buri wese aba ashaka kumvikana kurusha abandi, hanyuma bakabangamirana kuko baba batarize gukorera hamwe (Band system performance).”

Kuri we kandi ngo ipfundo ry’akajagari mu muziki ni uko abacuranga ntaho baba barabyigiye, ngo babe babikora kinyamwuga.

Ibi aba bose bahurizaho biri mu byatumye umuyobozi w’Umuryango ADPE washinze ishuri ryigisha imyuga ETP (Ecole Technique Polyvalente) i Karama mu Murenge wa Ruhashya mu Karere ka Huye, yariyemeje gutangiza mu kwezi kwa Nzeri 2024 ishuri rizajya rihugura abarigana mu bijyanye n’umuziki wo mu nsengero.

Ati “Tuje kunganira ya madini, ba bacuranzi n’abaririmbyi, kugira ngo cya cyuho bari bafite kigabanuke.”

Joseph Karuranga, umuyobozi w’ishuri ETP ryari risanzwe ryigisha n’ubwubatsi, ubudozi, ubukanishi no gusubiranya ibikoresho byifashisha amashanyarazi, avuga ko mu ishami ry’umuziki wo mu nsengero bagiye gutangira bazigishamo amasomo (Module) icyenda.

Ati “Hari ibijyanye no gusoma no kwandika indirimbo (Solfège), hari uburyo bwo gutunganya amajwi (Sound system) no gutunganya indirimo (Music production). Hari n’imyitwarire ikwiye umuvugabutumwa kuko burya abaririmbyi n’abacuranzi bo mu nsengero na bo ni abavugabutumwa.”

Akomeza agira ati “Ariko abantu bazakenera no gukora za studio kugira ngo babashe gusohora indirimbo. Tuzigisha no gucuranga za Piano na za gitari. Hazabaho guhugura abasanzwe babikora kugira ngo babashe kubikora neza, ndetse n’abatangizi.”

Ibi ngo bizafasha n’urubyiruko ruri muri za korari zo mu nsengero rwize umuziki kuko ruzabasha gukora n’ibikorwa birwinjiriza amafaranga.

Jean de Dieu Niyonzima (uhagaze uhereye ibumoso) yabaye uwa gatanu ku rwego rw’Igihugu mu bizamini bya Leta

Sr Nicolas Nsanabo Hyacinthe, umucungamutungo w’ishuri ry’abatabona ry’i Kibeho, yavuze ko batewe ishema no kuba umwana wiga mu ishuri ryabo aza muri batanu ba mbere ku rwego rw’Igihugu, ariko ngo ntibanatunguwe cyane kuko asanzwe ari umuhanga, nk’abandi bavandimwe bavukana.

Yagize ati “Wenda ntitwari tuzi ko yaza ku mwanya wa gatanu mu Rwanda hose, ariko kuba ari umuhanga turabizi.”

Ngo yigeze kwitabira n’amarushanwa mu by’indimi (Spelling Competition) arayatsinda, ku buryo yageze no muri Kenya.

Niyonzima afite ubumuga bwo kutabona ku rwego rwa 60%. Ngo ashobora kubona nk’ibiri muri metero ebyiri gusa, ariko ntaharenze, nk’uko bivugwa na Sr Nicolas. Na we mu kwiga yifashisha inyandiko z’abatabona (Braille).

Yivugira ko amasomo yatsinze cyane ari imibare, ibinyabuzima (Biology) n’ubutabire (Chemistry) kandi ngo abikesha umuhate ashyira mu kwiga.

Ku bijyanye n’uko yitwaye ngo abashe kugira amanota meza mu bizamini vya Leta, agira ati, “Nabanje kwiha ingengabihe y’uko niga amasomo yanjye. Nkavuga nti, ku wa Mbere nziga nk’imibare na Phyisique (Ubugenge), muri Weekend nkakora imyitozo nkanasubiramo gakeya.”

Jean de Dieu Niyonzima avuga ko amasomo yatsinze arimo imibare, ibinyabuzima n’ubutabire

No mu gihe cy’ibizamini nyiri izina, ngo kubera ko abatabona batabasha kwandika bihuta nk’abandi banyeshuri muri rusange, bagiye babongereraho isaha ku gihe cy’ibizamini, kandi byaramufashije kuko ngo urebye mu isaha ya nyuma ari bwo yabashaga kurangiza gusubiza ibibazo.

Mukuru we Jean Paul Niyitegeka wamuherekeje ajya kwakira ibihembo akesha umwanya wa gatanu, yavuze ko nk’umuryango bishimiye kuba umwana wabo yagize amanota meza, kandi ngo hamwe n’ababyeyi biteguye kumufasha akazabasha gutsinda neza no ku cyiciro gikurikiyeho.

Jean de Dieu Niyonzima afite imyaka 18. Yatangiye kwiga mu ishuri ry’abatabona ry’i Kibeho kuva afite imyaka itandatu, aho yatangiriye mu kiburamwaka. Yiga mu ishuri riherereye mu Karere ka Nyaruguru mu Ntara y’Amajyepfo, ariko akomoka mu Majyaruguru y’u Rwanda.

Imimero y’ibigori mu cyumweru kimwe itanga ibiryo by’amatungo bitubutse kandi bifite intungamubiri

Gérard Bizimana ukurikirana uruhererekane nyongeragaciro rw’ingurube mu muryango Duhamic Adri, akaba umwe mu bigisha aborozi b’ingurube bo mu Karere ka Gisagara bakoresha ubwo buryo bwo kongerera ibigori agaciro, avuga ko ibigori bishobora guhingwa mu gice cy’ijerekani cyangwa ibase ishaje, mu gihe cy’icyumweru bigatanga imimero ikungahaye ku byubaka umubiri itanatakaje ibitera imbaraga ibigori biba bisanzwe byifitemo.

Asobanura ko mu kubihinga babanza kubyinika mu gihe cy’amasaha 12, hanyuma bakabishyira muri cya gice cy’ijerekani cyangwa ibase ishaje babanje gutobora munsi kugira ngo amazi bakoresha buhira mu gitondo na nimugoroba atazarekamo agatuma ibyahinzwe bibora.

Nyuma y’icyumweru ngo imimero iba ishobora kugaburirwa amatungo, kandi ntiba yungutse ibyubaka umubiri gusa ahubwo biba byanatubutse kuko inusu y’ibigori ivamo ibiro bitatu by’ibiryo by’amatungo.

Agira ati “Ni nk’inyunganiramirire. Byunganira ibiryo umworozi atanga, kuko byongera ibyubaka umubiri (Protéine) ku kigero cyo kuva ku 9 kugeza kuri 13.”

Yungamo ati “Dukangurira aborozi ubundi kumenya kwivangira ibiryo, kugira ngo uvuge ngo niba nagabanuye soya, ndongera bya bigori nkoresheje bya byubaka umubiri byanjye ndi bukure mu bigori. Cyangwa ukavuga uti, hari ibyo ndi buze kugabanya mu bigori ndikuvanga kuko nzagabura bya bigori twahinze mu gice cy’ijerekani.”

François Xavier Nsengiyumva, umwarimu muri TSS Kabutare ukunze no gutanga amahugurwa ku bijyanye n’ubworozi muri rusange, yunga mu rya Bizimana agira ati “Uko kumera kongerera ibigori vitamini n’ibikungahaye ku ntungamubiri (Protéine), kubera wa mumero wazamutse, n’ibitera imbaraga bikagumamo.”

Asobanura kandi ko umumero uturutse mu kigori uba ufite vitamine nyinshi zitandukanye cyane cyane vitamine B complexe. Iyo vitamine B iyo yisanishije n’indi myunyu ngugu iringaniza karisiyumu na fosifore ndetse na vitamine D, cyane cyane ko ikigori kiba kirimo n’ibitera imbaraga, byahura n’indi munyu ngugu bigatuma itungo rikura neza.

Mu imurikabikorwa ry’abafatanyabikorwa b’Akarere ka Gisagara ryabaye kuva ku itariki ya 20 kugeza ku ya 23 Kanama 2024, aho umuryango Duhamic Adri wari washyize ibikorwa byawo hari bene biriya bigori byameze.

Elisaberth Gwaneza, umuhinzi mworozi wo mu Murenge wa Ndora, na we ngo yifashisha ibigori ahinga mu gice cy’ijerekani mu kugaburira ingurube ze

Abahageraga bahatindaga babaza icyo ibyo bigori bikora ahongaho, bagatangazwa no kubwirwa ko ari ibiryo by’amatungo byahinzwe mu gice cy’ijerekani, mu rwego rwo gutubura ibigori no kubyongerera agaciro mu bijyanye n’intungamubiri ku matungo.

Elisaberth Gwaneza, umuhinzi mworozi wo mu Murenge wa Ndora, yavuze ko akoresha biriya bigori mu kwita ku ngurube yorora.

Yagize ati “Biriya biryo by’ingurube ndabikoresha. Ni ibigori bisanzwe mfata, hanyuma nkaba mfite ikibaraderi (igice cy’ijerekani) natobaguye munsi, hanyuma nkasukamo ibigori, nkatereka ahantu nkajya mbivomerera. Uko mbivomerera ni ko bimera bihanga bizamuka, byagira amababi umunani cyangwa 12 nkahita mbisarura nkabiha ingurube.”

Yanasobanuye ko niba ingurube yayihaye sondori mu gitondo, ayiha bya bigori-byatsi saa cyenda, nimugoroba akayiha ibisigazwa by’ibiryo by’amazi yogesheje mu byombo cyangwa se ibindi biryo yabonye.

Ngo ntagurisha ingurube yoroye ku biro, ariko iyo amaranye amezi atandatu bamwishyura ibihumbi 100 by’amafaranga y’u Rwanda.

Abantu icyenda bo mu Karere ka Huye bahiriye muri operasiyo yo kumena inzoga z’inkorano

Nk’uko bamwe mu batuye muri kariya gace batashatse ko amazina yabo atangazwa babivuga, ahabereye iyo nsanganya hasanzwe depo y’inzagwa zipfundikiye abantu bakunze kwita ‘Dundubwonko’, ariko ngo mu gikari cyaho, ari no kwa nyiri idepo, hakaba n’akabari ka kanyanga abantu banyweramo bihishe.

Ku cyumweru tariki 18 Kanama 2024 ngo hababaye imirwano, hafatwa umugore wari uyirimo arafungwa, hanyuma aza gutanga amakuru avuga ko n’ubwo kuri iriya depo bacuruza inzoga yitwa ‘Ganura’, banakora kanyanga, ibisigazwa byayo bigakorwamo inzoga bita ‘Wazo Banana’. Yanababwiye ko ngo mu gukora iyo nzoga hari ibinyabutabire atazi basukamo.

Kuwa kabiri tariki 20 Kanama 2024 habayeho operasiyo yo kujya kumena izo nzoga no gufata abazikora, hanyuma mu byo bafashe harimo amajerekani yari arimo bya binyabutabire bamwe bavuga ko ari tineri ijya yifashishwa mu kuvanga amarangi.

Abari muri operasiyo ngo bashatse kwerekana ububi bw’ibyari byafashwe, maze umwe muri bo asaba uwitwa Butoya wari uri aho gukongeza ibyari byamenwe hasi, nuko byototera imwe muri ya majerekani iraturika, ikomeretsa abari bashungereye ihereye ku uwitwa Butoya ari na we wabikongeje hanyuma agakomereka kurusha abandi.

Umwe mu batanze amakuru yagize ati “Urumva bababwiraga ukuntu icyo kinyabutabire ari kibi, babwira uwo Butoya afata ikibiriti, mu kurasa umuriro wahise umutwika igituza cyose, ararembye cyane. Watwitse n’abari bashungamirije, abo byakomerekeje bose hamwe ngo ni abantu 17.”

Icyakora, umuvugizi wa Polisi mu Ntara y’Amajyepfo, SP Emmanuel Habiyaremye, mu butumwa bugufi kuri telefone yavuze ko hakomeretse abantu icyenda, ariko ntaho yavuze ko hari uwakongeje amajerekani yarimo biriya binyabutabire.

Abahiye bajyanywe ku bitaro bya Kabutare

Yagize ati “Inzoga z’inkorano (Muriture) twagiyeyo dusanga zihari, twahafatiye litiro 962. Nyuma yo kwigisha abaturage ububi bwazo ziramenwa, ariko twanahafatiye utumashini tubiri akoresha apfundikira amacupa y’izo nzoga zitemewe n’udupfunyika 14 tw’urumogi. Hari n’andi majerikani abiri ya litiro 20 arimo ibinyabutabire tutaramenya.”

Yakomeje agira ati “Ubwo zari ziteruwe ngo zijyanwe mu modoka zijye gupimwa, imwe muri zo yaraturitse iteza umuriro aho abaturage icyenda bahiye ku buryo budakomeye bajyanwa kuvurirwa ku bitaro bya Kabutare. Bane muri bo bamaze gusezererwa, mu gihe iperereza ryatangiye.”

Umuyobozi w’ibitaro bya Kabutare, Dr Jérôme Mfitumukiza, na we mu butumwa bugufi kuri telefone yavuze ko bakiriye icyenda batwitswe na biriya binyabutabire kandi ko bari kwitabwaho na muganga. Umwe ngo yoherejwe ku bitaro bya CHUB kandi hari amahirwe menshi ko bose bazakira bagakomeza imirimo bisanzwe.

Nk’uko bamwe mu bibumbiye muri iriya koperative baganiriye na Kigali Today babivuga, rwiyemezamirimo Théogène Munyaneza, nyiri kampani Crop Selling Society isanzwe ibagurira umuceri ngo yatwaye umusaruro wabo mu ntangiriro z’ukwezi kwa Gicurasi 2024, avuga ko igiciro nikimara gushyirwaho azabishyura nk’uko asanzwe abigenza, none amaso yaheze mu kirere.

Hari abagira bati “Kuva yawutwara icyo yakoze ni ukuduha 30% by’umusaruro wacu, wa wundi bajya baduha ngo turye. N’iyo tuvugishije ubuyobozi bwa koperative batubwira yuko Munyaneza ngo yanze gutanga amafaranga nyamara ibiciro nyiri izina byarasohotse.”

Hari n’abandi bagira bati “Wumve ko no kugira ngo duhinge undi twagiye dufata amadeni. Na wa muceri baduhaye wo kurya twarawugurishije. Ubu tugeze igihe cyo kubagara bwa kabiri, amafaranga yo kwifashisha twarayabuze.”

Abatarishyurwa kandi bafite impungenge z’uko batazabona amafaranga yo kwifashisha mu ihinga ry’ibindi bihingwa bitari umuceri mu kwezi kwa cyenda kuri imbere, kuko ubushobozi bari basigaranye babushoye mu ihinga ry’imiceri ubu iri mu mirima.

Anysie Nyamvura, umuyobozi w’iriya koperative, avuga ko kiriya kibazo bagisangiye n’andi makoperative ahinga umuceri, akaba afite icyizere ko kiza gukemuka kuko “Leta yagihagurukiye”.

Yongeraho ko mu byo batumvikana na Munyaneza ari uko ashaka kubishyura amafaranga 505 yemejwe gutangwa ku kilo cy’umuceri uringaniye nyamara uwo bo bahinze ari umuremure bagomba kwishyurwa 515 ku kilo.

Munyaneza we ati “Bariya bahinzi ntibagira imbuga, ntibagira n’aho babika umuceri. Twagiranye amasezerano yo kuwubabikira, noneho igiciro cyazashyirwaho tugakorana amasezerano y’icyo giciro cyumvikanyweho. Uyu munsi rero igiciro cyasohotse mu ibwiriza rya Minisitiri cyari igiciro kinini kinyuranye n’isoko turi gucururizaho.”

Akomeza agira ati “Ubungubu Leta yabonye igisubizo. Hari kampani yitwa EAX yanyujijemo uburyo bwo kugurira abaturage imiceri yabo yaheze ahongaho. Tutumvikanye rero, umuceri wabo urahari, nababwiye ko baza bakawutwara, bawuboneye isoko.”

Ku bijyanye n’amafaranga 505 ngo ashaka gutanga ku kilo, we avuga ko ari yo ajyanye n’umuceri bariya bahinzi bahinze, n’ubwo bo bavuga ko uwo bahinze ari utangwaho amafaranga menshi (515).

Umuyobozi wungirije w’Akarere ka Huye ushinzwe ubukungu, André Kamana, avuga ko kuba inganda zarabaye zibikiye umuceri abahinzi ari byo koko, akanasaba abahinzi kuba bihanganye bakagerwaho n’abawubagurira Leta yashyizeho.

Ati “Nibabe bihanganye. Niba bawubabikiye, uwo umucuruzi atazafata Leta izawufata yo ibishyure kuri ya mafaranga yashyizeho.”

Yongeraho ko uwo muceri Leta iri kugura izawifashisha muri school feeding. Ngo basanze aho kugira ngo umuceri wangirike n’umuturage ahombe kandi akeneye kwiteza imbere Leta yawufata igakemura ikibazo cy’abahinzi n’abanyeshuri bakazawurya aho kubagurira ku yandi masoko.

Hamaze kuboneka 8.5% by’akenewe mu kugura ahazagurirwa Ingoro ya Bikira Mariya

Yabigarutseho mu gitambo cya misa cyo kwizihiza umunsi mukuru wa Asomusiyo tariki 15 Kanama 2024, abwira imbaga yari iteraniye i Kibeho ko bari bamaze kwegeranya amafaranga abarirwa muri miriyoni 300 gusa, nyamara hakenewe miriyari eshatu n’igice. Ushyize mu mibare, hakaba hamaze kwegeranywa 8.5% by’amafaranga yose akenewe.

Yagize ati “Twatanze ubutumwa bw’uko abantu biminjiramo agafu. Nibura buri Munyarwanda ubatije atanze amafaranga igihumbi kimwe twahita tuyuzuza nta n’ibyumweru bibiri bishize. Turizera ko babyumvise kandi bazagira vuba.”

Yunzemo ati “Natwe mu mugambi dufite turashaka gutangira twishyura bamwe kugira ngo ayo mafaranga baduhaye ye kuguma muri banki, kuko iyo utangiye gukora abantu baravuga bati, ya mafaranga twatanze ntibayakoresheje ibyo bashaka. Batangiye, ahubwo reka dutange inkunga yacu igikorwa kirangire.”

Musenyeri Celestin Hakizimana yibukije abari bateraniye i Kibeho tariki 15 Kanama 2024 ko uruhare rw’abakirisitu rukenewe mu kugura ahazagurirwa Ingoro ya Bikira mariya i Kibeho

Miliyari eshatu n’igice zikenewe ni izo kugura ubutaka bwa hegitari 10 buherereye mu kuboko kw’ibumoso bwa kaburimbo uturutse ku Ngoro ya Bikira Mariya kugera kuri gare ya Kibeho, no mu kuboko kw’iburyo uhereye kuri Hotel Notre Dame ugaruka kuri iyo Ngoro.

Musenyeri Hakizimana anavuga ko nibabasha kugura ubwo butaka, n’igihe bazaba batararangiza kuhubaka hose mu bikorwa by’imishinga 20 bafite, nibura bizafasha ko imbaga y’abaje gusengera i Kibeho ku minsi mikuru izwi bazajya baruhukira ku butaka bw’ingoro, aho kwifashisha n’ubw’abandi.

Ubutaka nibamara kubugura hazashakwa n’ubushobozi bwo kwagura Ingoro ya Bikira Mariya haherewe kuri kiliziya nini izaba igizwe n’igice kidatwikiriye gishobora kwakira abantu ibihumbi 100, n’ahatwikiriye hashobora kwakira abagera ku bihumbi 10 ndetse na parikingi ishobora kujyamo imodoka 300.

Ingoro ya Bikira Mariya ikeneye ubufasha bw’abakirisitu mu kuyagura

Anathalie Mukamazimpaka wategetswe na Bikira Mariya guhagarika kwiga no kuguma i Kibeho

Berthilde Mukashyaka ufite imyaka 78, akaba yari atuye hafi cyane y’ishuri bariya bakobwa batatu babonekewe bigagamo, bityo akaba yarakunze kujya aho amabonekerwa yaberaga, yabwiye Kigali Today ko umubikira wabanje kwangira Anathalie kuguma i Kibeho yabihaniwe.

Mukashyaka asobanura ko Anathalie mu kubonekerwa kwe yarwaraga akananirwa kujya mu ishuri, Bikira Mariya akamubwira kubireka ariko akaguma aho, yamubaza icyo azakora natiga undi akamubwira ko azakimubwira.

Ati “Yararyamaga agaha abandi amakaye ngo bamwandikire, bamuzanira ibyo bamwandikiye aho aryamye akabona byandikishije ikaramu itukura, yababaza impamvu ari yo bandikishije bo bakamubwira ko bandikishije iy’ubururu.”

Yakomeje kuba ku ishuri nyamara atajya kwiga, maze biza kurakaza umubikira wayoboraga iryo shuri witwaga Germaine, amutegeka kuzinga ibye bakamucyura iwabo ku Munini, undi na we aramwumvira, nuko bamuha umushoferi witwa Rubaduka n’umubikira witwa Mama Athanase ngo amuherekeze.

Mukashyaka ati “Bageze i Ndago batangiye kumanuka ahitwa i Nyarusozu, Anathalie atangira kuvuga ko yumva ananiwe, acika intege, uko bagenda akarushaho kuremba kugeza ubwo agwa mu gatuza ka wa mubikira ameze nk’uwapfuye. Rubaduka yageze ku Kanyaru ahita akata baragaruka, bageze aho komine yahoze atangira kugarura ubuzima, bageze ku ishuri bamusukaho amazi arahembuka.”

Akomeza agira ati “Yongeye kubonekerwa Bikira Mariya aravuga ati, uyu mubikira wasuzuguye ibyanjye na we agiye kurwara, n’umurambo we ntuzahambwa mu Rwanda. Sr Germaine yarwaye umugongo, arivuza biranga, biza kugera aho ajya kuvurizwa hanze. Ni na ho yaguye, ntabwo yigeze agaruka mu Rwanda.”

Ibyo uyu mubyeyi avuga bishimangirwa na Anathalie uvuga ko Bikira Mariya yabwiye Alphonsine Mumureke kuba umubikira, abwira Marie Claire Mukangango ko agomba gushaka, naho we (Anathalie) amuha kubaho mu isengesho no kwibabaza asengera isi.

Ati “Ndangije umwaka wa kane ngiye mu wa gatanu, yarambwiye ati, ndashaka kukunyuza mu nzira y’ububabare, anyuza mu bubabare bwinshi bituma ntakomeza kwiga. Ni wo muhamagaro yampaye.”

Ubundi babonekerwa, Alphonsine yigaga mu mwaka wa mbere, naho Anathalie na Marie Claire bo bari bageze mu mwaka wa kane. Aba bombi barize amashuri barayarangiza bakomeza n’umuhamagaro bari bahawe, naho we (Anathalie) yagarukiye mu wa kane.

Amabonekerwa ya Kibeho bamwe bakekaga ko ababonekewe bafashwe n’amashitani

Sekunde Twagirumukiza utuye i Kibeho, ari naho yavukiye mu mwaka w’1957 akanahakurira, avuga ko amabonekerwa atangira yakoraga umurimo w’ubufundi muri Koleje ya Kibeho (ubu hitwa GS Mère du Verbe) abakobwa batatu bemejwe ko babonekewe bigagamo.

Agira ati “Njye nari ndi mu kazi, mu gitondo batubwira ko hari umwana wabonekewe. Yitwaga Alphonsine. Abantu bati ubwo ni amagini y’iwabo baterereje abanyeshuri ba hano! N’ababikira babifata gutyo, bakamubwira bati ubwo ni amagini y’iwanyu. Bashaka no kumwirukana.”

Akomeza agira ati “Ariko bukeye twumva ko habonekewe n’uwitwa Anathalie. Bati, ibi ni ibiki noneho? Umwana yarazaga akikubita hasi, akareba hejuru mu zuba ukibaza uti, umuntu areba mu zuba ntahumbye? Tuti ya magini y’i Kibungo koko arakomeye!”.

Twagirumukiza wakundaga kwitabira amabonekerwa avuga ko yatangiye kwemera ko bariya bakobwa batabaga bahanzweho n’amashitani yitegereje ukuntu itsinda ry’abaganga ryari ryashyizweho kubareba babateraga inshinge ntibabyumve, mu gihe ababaga bahanzweho (na bo bajyaga bagaragara mu gihe cy’amabonekerwa) bazibateraga bagataka.

Yungamo ati “Hari igihe haje ikizubazuba, (uwabonekerwaga) aravuga ngo Bikira Mariya araje. Izuba ririkaraga ririkaraga, tubona habaye ubwire, kandi bibera aho twari turi. Nta telephone zariho icyo gihe ngo duhamagare abandi, ariko nageze mu rugo ndababwira nti, ese mwabonye ukuntu habaye ubwirakabiri? Bati ahagana hehe? Nti aho twari turi bwahabaye. Birabatangaza.”

Mu bindi byemeje abagiye bitabira amabonekerwa ni ukuba abakobwa babonekerwaga baravuze ko i Kibeho hazameneka amaraso menshi kandi bikaba byarabaye.

Twagirumukiza ati “Uwabonekerwaga yarivugiye ati, izi ndabo ko mbona ziva amaraso?! Ararira ati, Nyagasani izi ndabo zicitse imitwe, zivuye amaraso! Byahuje na Jenoside yakorewe Abatutsi.”

Yunganirwa na Silas Nsanzabaganwa utuye i Kibeho, wigeze no kuba Burugumesitiri wa Komine Mubuga (ni yo yarimo Kibeho) guhera mu Ukuboza 1976 kugera muri Gashyantare 1982.

Agira ati “Amaraso bahanuye twarayabonye hano i Kibeho kuko yahamenetse ari menshi no kubonekerwa byararangiye. Hari Jenoside yahabaye, ubundi haba no gucyura impunzi z’Igihugu cyose zari zahungiye hano, mu kuzicyura habayemo urugomo, benshi ibihumbi n’ibihumbagiza barahapfira.”

Bikira Mariya yasabaga abakobwa babonekerwa kuhira indabo ze

Abakunze kujya gusengera i Kibeho, igihe cyose bataha bamaze guterwa amazi y’umugisha. Ibi ngo byatangijwe na Bikira Mariya mu gihe cy’amabonekerwa, kuko yasabaga ababonekerwa kuzana amazi, bakagenda bayamena ku bo yagendaga abereka.

Iyo bamenaga amazi ku baje gusenga bo ngo babaga babona bari mu murima w’indabo, Bikira Mariya akabasaba kumwuhirira indabo yaberekaga zarabye.

Berthilde Mukashyaka atuye i Kibeho kuva mu mwaka w’1976, ariko n’ubundi akaba yaravukiye muri Paruwasi ya Kibeho ari na yo yaherewemo amasakaramentu yose uhereye ku kubatizwa kugera ku Ugushyingirwa. Ni umwe mu bavuga kuri iryo yuhira.

Agira ati “Hari umwarimu wigishaga muri ririya shuri witwaga Jean Baptiste, Alphonsine yakundaga kumumenaho amazi nyamara yaranamwigishaga. Nk’akajerekani k’ane yakamumariragaho. Koko urwo rurabo rwaregutse! Byageze igihe tuza kumva ko yagiye mu iseminari, ubu yabaye padiri.”

Uyu Jean Baptiste ubusanzwe ngo yari umuntu utaritabiraga no gusenga.

Kwigaragariza i Kibeho kwa Bikira Mariya byabanjirijwe no kumushakashaka kw’Abakirisitu

Hari abatuye i Kibeho bavuga ko hari ibimenyetso byabanjirije ukwigaragariza i Kibeho kwa Bikira Mariya batekerejeho nyuma y’amabonekerwa.

Silas Nsanzabaganwa ni umwe muri bo, ubisobanura, aho avuga ko ikimenyetso cya mbere ari uko Kiliziya ya Kibeho yubakwa mu mwaka w’1934, yaragijwe Bikira Mariya.

Icyo gihe ngo yari isakaje ibyatsi, hanyuma haza kubakwa indi y’inkuta z’amatafari ahiye, ari na yo ihari ubungubu, ikaba yo yari yarasakajwe amategura. Yatashywe mu mwaka w’1944.

Ikindi kimenyetso ni uko mu mwaka w’1975 Padiri Ladislas Habimana wo muri iyo Paruwasi yahawe ubupadiri, hanyuma mu gihe cyo kumuha impano baza gusanga padiri wari uhari yaribagiwe kwegeranya ubushobozi bwo kumushakira inka, nk’uko byari byarabaye akamenyero ko uwabuhawe wese ayihabwa.

Ibyo ngo byarakaje Musenyeri Gahamanyi wari waje kumwimika (Kibeho yari ikibarirwa muri Diyoseze ya Butare), abaza uwo Mupadiri impano yumva yamwihera.

Abari bahari ngo bari biteze ko agiye gusaba ivuriro batari bafite nyamara rikenewe, batungurwa no kumva asabye ko ishusho ya Bikira Mariya yari hafi aho yari imaze imyaka irenga ibiri yaramenwe n’umuntu wari ufite uburwayi bwo mu mutwe.

Icyo gihe ngo Musenyeri yaramushimye, ahita anamugororera kuzajya kwiga mu Busuwisi.

Nsanzabaganwa ati “Icyo kiba ikimenyetso nyine ko abakirisitu b’ino, Bikira Mariya bamushaka.”

Umuyobozi w’Akarere ka Nyaruguru, Emmanuel Murwanashyaka, yavuze ko mu gitaramo cya Asomusiyo, ni ukuvuga ku itariki 14 Kanama 2024 bari biteze ababarirwa mu bihumbi 25 nyamara haraye ababarirwa mu bihumbi 55.

Yakomeje agira ati "Uyu munsi na ho twari twiteze ababarirwa mu bihumbi 50, ariko hari abarenga ibihumbi 85."

Hari n’abitegereje abaje i Kibeho bo bavuga ko abaje babarirwa mu bihumbi 100.

Umwe muri bo wagiye agera mu nguni zitandukanye kuko yari ari kumva niba indangururamajwi zikora neza na we yunze mu ry’abavuga ko haje abarenga ibihumbi 100.

Yagize ati "Ni ubwa mbere nabona abantu bangana gutya i Kibeho. Harimo abanyamahanga benshi nk’abaturuka muri Repubulika Iharanira Demokarasi ya Congo na Uganda. Abanyarwanda na bo bari benshi kandi si Abagatolika gusa."

Yunzemo ati "Njyewe hari n’abasengera mu yandi madini nahabonye. Ndatekereza ko umubare wiyongereye cyane kubera ko insengero nyinshi zifunze. Hari n’abagiye baza, ugasanga biyegeranyije ahantu biherereye bagasenga, kuko bari bazi ko bari i Kibeho ho nta wababaza impamvu bahateraniye."

Ku isoko ya Bikira Mariya hari imirongo miremire, kuhabona amazi ntibyari byoroshye

Hari abananiwe kwihanganira imirongo ku isoko ya Bikira Mariya bahitamo kuyihorera, bakazagaruka ikindi gihe hari abantu bakeya, nk’uyu musaza

Korali yaturutse muri Diyosezi ya Cyangugu yizihije Asomusiyo 2024 irimo ababyeyi bateze ingori

Amaturo yari menshi

Nk’uko bisanzwe, mu gihe cyo gushimira bamwe batangariye ibyo bafata nk’igitangaza babonera mu zuba. Kuri uyu munsi aha i Kibeho hari ababonye izuba ryaka nk’ukwezi, riri mu ishusho ya Ukarisitiya

Abanyamahanga baje ari benshi, izi ni zimwe mu modoka zabazanye

Ku ishusho ya Bikira Mariya iri mu masangano y’umuhanda ukomeza i Ndago n’ukomeza ku Ngoro ya Bikira Mariya hari ababanza kuhasengera mbere yo gukomeza urugendo

Umwe mu bize bakuze agaragaza ibyo amaze kumenya gusoma no kwandika

Bamwe muri abo bakuze bagiye batabasha kwiga ku bw’impamvu zitandukanye. Harimo ababibujijwe n’inshingano zo mu muryango nko kwisanga umubyeyi umwe apfuye bikaba ngombwa ko bareka ishuri ngo bafashe usigaye kurera barumuna babo, abandi bakarikurwamo n’ababyeyi bababwira ko kwiga ntacyo bizabamarira, abandi bagategekwa kwita ku matungo,...

Uwitwa Mukamutara wo mu Karere ka Gisagara, nyuma y’amezi icyenda yiga mu ishuri ry’abakuze agira ati “N’Igifaransa bakizanye ngo tucyige nacyiga. N’Icyongereza n’Igiswayire byose nkabimenya, kuko Ikinyarwanda maze kukimenya, gusoma ndabizi, no kwiyandikira ibaruwa maze kubimenya.”

Joséphine Mukambabajende w’imyaka 60 na we ati “Uwampa gukomeza nabyemera, kuko mba numva hari ibyo ntaramenya. Nk’Igifaransa kije nacyiga.”

Jean Bosco Nsabimana w’i Nyanza, ubu akaba afite imyaka 54, yongeraho ko kuri we igihe cy’amezi icyenda yamaze yiga cyamufashije kumenya gusoma, kwandika no kubara, ariko ko habayeho ko ishuri rikomeza yarushaho kunononsora ibyo yize.

Ati “Umuntu akomeje yamenya kwandika neza, hanyuma amaze kunononsora agashobora kuba kujya mu buyobozi bw’Umudugudu, akajya mu buyobozi bw’umutekano, bisaba kuba usobanukiwe kwandika.”

Jean Havugimana na we ati “Habayeho ko kwiga bikomeza, nabikora. Hari ibindi nagenda nunguka.”

Genevieve Kayirangwa, umwe mu barimu bigisha abakuze wo mu Karere ka Nyanza avuga ko amezi icyenda bigisha abakuze asiga bazi gusoma, kwandika no kubara, ariko ko igihe bigishwamo cyongerewe bakigishwa n’ibindi byarushaho kuba byiza.

Ati “Bakongeraho bakabigisha nk’icyongereza, hanyuma bakigishwa n’ikoranabuhanga bitewe n’ibihe turimo bya Viziyo.”

Ange Felix Habassa ushinzwe uburezi bw’abakuze mu rwego rw’igihugu rushinzwe uburezi bw’ibanze (REB), avuga ko Politike y’uburezi bw’abakuze yo muri 2014 iteganya ko ishuri ry’abakuze ryongererwa igihe rikava ku mwaka umwe rikagera kuri itatu. Abakuze kandi ngo ni abafite guhera ku myaka 15 kuzamura, batazi gusoma, kwandika no kubara, batari mu mashuri asanzwe.

Agira ati “Byaragaragaye ko abiga muri gahunda y’uburezi bw’abakuze gusoma, kwandika no kubara, barangiza icyo cyiciro bakabura aho bakomereza. Ni muri urwo rwego Minisiteri y’uburezi, binyuze muri REB, yatekereje ku cyiciro cya kabiri n’icya gatatu.”

Akomeza agira ati “ REB iri kwandika ibitabo bijyanye, ndetse no guteganya n’abazabigisha kuko bo ntibazigishwa n’abarangije amashuri abanza. Bazigishwa n’umwarimu urangije nibura amashuri atandatu yisumbuye.”

Ku bijyanye n’amasomo ateganyijwe muri biriya byiciro bikurikiraho harimo imibare, Ikinyarwanda, SET(social and Elementary techonogy), ubumenyi nyamuntu (social studies), ikoranabuhanga, Igiswayire, Icyongereza n’Igifaransa.

Habasa ati “Harimo mbese amasomo azababashisha kubona impamyabushobozi ingana n’iy’urangije amashuri abanza, kugira ngo aramutse ashaka gukomeza mu yisumbuye bimushobokere.”

Habasa anavuga ko iyi politike itaratangira gushyirwa mu bikorwa ku bw’imbogamizi y’ingengo y’imari.

Ati “Niba hari ikintu gihenze mu burezi, ni ukwandika ibitabo. Hakenewe n’ubushobozi bwo gutanga akazi no guhugura abazigisha muri iriya progaramu. Ni yo mpamvu hakenewe ingengo y’imari nini.”

Yongeraho ko muri uyu mwaka w’Ingengo y’imari Leta yashyize mu burezi bw’abakuze miriyoni 81 kandi ko ari makeya ugereranyije n’uko buri mwaka haba hagomba kwigishwa ababarirwa mu bihumbi 127.

Agereranyije ariya mafaranga ngo ni nka 0.04% by’ingengo y’imari igenerwa Uburezi muri rusange, nyamara ngo ubushakashatsi bwakozwe n’ibihugu bitandukanye bwaragaragaje ko kugira ngo imyigire y’abakuze igende neza yagenerwa ingengo y’imari iri hagati ya 3% n’10%.

Abo mu Ruramba bavuga ko ikiraro cyo mu kirere bafite kidahagije kugira ngo babashe kugira ubuhahirane na Kivu

Akagari ka Rugogwe kagejejwemo amashanyarazi mu mwaka ushize w’ingengo y’imari. Abagatuyemo barabyishimiye, kuko ngo bari bategereje igihe kirekire.

Uwitwa Thérésie Nyiramana agira ati “Hano hagiye haza abayobozi kenshi, tukababwira ko dukeneye umuriro, bakatubwira ngo harabura umwaka harabura ukwezi, tugakomeza kwihangana ntiducike intege kubera ko tuzi ko ibibazo byose bitakemukira rimwe.”

Akomeza agira ati “Hanyuma ku bw’amahirwe tubona bashinze amapoto, dutangira kwizera, bashyiraho imigozi tuti yenda ni mu mwaka utaha, tugiye kubona tubona umuriro w’amashanyarazi utugezeho.”

Ikibateye kwishima ni uko bakeneraga gushesha ibigori n’amasaka bakishyura moto amafaranga 3000, kugenda no kugaruka, none ubu bakaba ibyuma bisya babifite hafi, ku bw’amashanyarazi begerejwe.

Nyiramana ati “Ubu imashini zirakora, ndagenda nkajya mu mirimo nahinguka nkahita ninyakuranira ibiro byanjye bibiri nkavuga nti uyu munsi ndararira kawunga. Ngatanga amafaranga 200 yonyine mu gihe natangaga ibihumbi bitatu, nkagerekaho n’ayo gushesha. Twiyogoshesherezaga mu Ruramba, twaba tutagiyeyo tugahozamo ibitambaro umusatsi ukaducwiririraho, ukazategereza kuzakora urugendo kuko ntiwatega ugiye kwiyogoshesha.”

Kuri ubu aba baturage barifuza ko n’umuhanda ugera iwabo uturutse i Kibeho ugakomeza i Nyamagabe watunganywa kuko ngo kuba warangiritse bituma kugera i Kibeho bibahenda, cyane ko kugeza ubu ari moto zonyine bashobora gutega.

Marcelline Nyinawumuntu ati “Turifuza ko umuhanda wakorwa neza, ugashyirwamo n’imodoka, bityo kujya kurangura bikatworohera, natwe tugacuruza, tugatera imbere.”

Jean Marie Vianney Nizeyimana na we ati “N’ubwo utashyirwamo kaburimbo, ariko ukaba umeze neza utsindagiye, byadufasha.”

Bifuza kandi ko umuhanda ubahuza n’Umurenge wa Kivu wasiburwa kuko uwahahoze kera wasibamye biturutse ku kuba utagikoreshwa, na byo biturutse ku kiraro cyo ku mugezi w’Akanyaru utandukanya iyo Mirenge yombi cyacitse.

Jean Bosco Ayirwanda ati “Nta muhanda uduhuza na Kivu dufite. Bashyizeho akararo ko mu kirere, ariko mu gihe cy’imvura hari ahantu Akanyaru kadutwarira abantu. Umuntu aramanuka, yagera hejuru y’Akanyaru kubera ko nta n’umuhanda, yadandabirana akagwamo bikaba byamuviramo n’urupfu.”

Akomeza agira ati “Hamaze kugwamo abantu nzi bagera mu munani, bakabakuramo bapfuye. Uwadukorera byibura n’akayira kanyuramo na moto cyangwa igare tukabasha kunyura ku kiraro cyo mu kirere.”

Umuyobozi w’Akarere ka Nyaruguru, Dr Emmanuel Murwanashyaka, avuga ko kugeza ubu hari imihanda ibiri bifuza kubonera ubushobozi bwo gutunganya ari yo Kibeho-Mata-Ruramba-Nyamagabe w’ibilometero 33, ariko ko uruhande rwo muri Nyaruguru rureshya n’ibirometero 21, n’uwa Kibeho-Rusuzumiro ugakomeza ku Ruganda rw’icyayi rwa Muganza-Kivu unyuze ku ruganda rw’icyayi rwa Kibeho, ureshya n’ibilometero 22,8.

Ati “Ni yo mihanda kugeza ubu iduhangayikishije nk’Akarere ka Nyaruguru. Turimo turaganira n’izindi nzego kugira ngo badufashe, ariko mu bushobozi bwacu n’ubundi tuzakomeza kuyibungabunga mu buryo busanzwe.”

Naho ku bijyanye n’umuhanda uhuza Imirenge ya Ruramba na Kivu, Maya Murwanashyaka avuga ko kuba harashyizweho ikiraro cyo mu kirere ari uko ikiraro cyo ku ruzi ubwacyo kidashoboka, kuko ubusanzwe icyo mu kirere ari cyo gihenda.

Icyakora ngo bazareba niba umuhanda wasiburwa hanyuma moto zikabasha kunyura kuri icyo kiraro cyo mu kirere, kuko ubundi biba bikoze ku buryo zishobora kunyuraho.

Imigenderanire yifashisha imodoka yo ngo yakwifashisha undi muhanda uhuza iyi Mirenge yombi watunganyijwe.

Jean Bizumuremyi yajyanywe kwa muganga n’ubuyobozi bw’umurenge, agezeyo bamuciye amafaranga atabona ahitamo gusubira mu rugo, nka mbere

Nk’uko Jean Bizumuremyi ubwe, ari na we urwaye, abyivugira, ngo kuwa gatatu w’icyumweru gishize, ni ukuvuga tariki 31 Nyakanga 2024, ubuyobozi bw’Umurenge wa Huye atuyemo bwazanye imbangukiragutabara (ambulance) imutwarana n’umugore we wari ugiye kumurwaza, ku bitaro bya Kabutare.

Bukeye bwaho ngo kwa muganga babasabye kwishyura amafaranga ibihumbi 22 ajyanye n’ibyo yari yamaze gukorerwa kugira ngo bamwandikire transfert imujyana ku bitaro bya Kaminuza bya Butare (CHUB) kuko na mbere hose ari ho bari bamwohereje, maze barayabura. Amaze kuyabura ngo ivuriro ryahisemo kumusezerera nawe yisubirira mu rugo nk’uko n’ubundi bari barabyiyemeje nyuma yo kubona ko ntaho bazakura ubushobozi bwo kumuvuza.

Ariya mafaranga ngo yababanye menshi kuko n’ubwo umurenge wari wabemereye kubatangira mituweri zikanandikwa, icyo gihe amafaranga ubwayo yari ataragera ku mazina yabo muri RSSB.

Ku kibazo cyo kumenya ukuntu uriya mugabo utabasha kwiyegura yabashije kwicara kuri moto ngo bamutahane, umuturanyi ukunze kujya kumusura yabwiye Kigali Today ati “Bamwicaje kuri moto, bamuzirika ku mumotari, hanyuma aramutahana.”

Umuyobozi w’Akarere ka Huye, Ange Sebutege, avuga ko igikomeye cyabaye kumushakira mituweri, ko n’umuryango wari ukwiye gushaka uko wamwishyurira 10% asabwa.

Ati “Ntabwo ibintu byose bikorwa n’ubuyobozi kandi hari ibyo n’umuryango ushobora kuba wakora. Umuryango na wo ukwiye gushyiraho uruhare rwawo. Ibirenze ubushobozi na byo barabisaba, hanyuma bijyanye n’ingengo y’imari uko ibonetse bakabihabwa.”

Umunyamabanga nshingwabikorwa w’Umurenge wa Huye, Vital Migabo, we yabwiye Kigali Today ko batari barigeze bamenya ko uriya mugabo yahise asubira mu rugo, kuko mituweri bo bari bazishyuye.

Icyakora ngo araza gukurikirana uriya muryango, barebe uko babafasha ariko uriya mugabo avuzwe.

Abayobozi na bo bansangiye amarwa n’abaturage

Hari mu birori byo kwizihiza umuganura yifatanyijemo n’abatuye mu Kagari ka Buremera mu Murenge wa Maraba, kuri uyu wa 2 Kanama 2024.

Afatiye urugero ku ruhare rw’ababyeyi rw’amafaranga 975 abafite abana biga mu mashuri abanza basabwa gutanga ku gihembwe kugira ngo abana babo babashe gufatira amafunguro ku ishuri, yagaragaje ko ababyeyi bashobora gutanga n’ibiribwa bifite agaciro k’ariya mafaranga.

Yagize ati “Umubyeyi asabwa gutanga umusanzu w’amafaranga 975. Uwubariye mu mifungo y’imboga havamo itanu, uwubariye mu mifungo y’ibijumba na ho havamo itanu. Ubariye mu gufasha mu guhemba utekera abana ku ishuri, wamwishyura umunsi umwe.”

Basangiye ku mafunguro yateguwe

Yunzemo ati “Umuyobozi w’ishuri ntiyajya kugura inkwi igihe hari ababyeyi bazizanye. Ntabwo yakenera kujya kugura imboga, igihe hari abazizanye.”

Yagiriye ababyeyi inama yo gutekereza ku ruhare rw’abana babo muri gahinda yo gufatira amafunguro ku ishuri, mu gihe cyo kuganura ku byo umuntu yejeje.

Ati “Twifuza ko mu gihe twishimira umusaruro ukomoka ku bikorwa by’ubuhinzi twakoze, rwa ruhare rw’abana twajya tubyibuka tukarushyira ku ruhande. Niba ari mironko y’ibishyimbo ukayishyira ku ruhande, niba ari imifungo itanu y’imboga tukayishyira ku ruhande mbere yo kujya ku isoko.”

Abana na bo baganujwe

Abaturage b’i Maraba bavuga ko uruhare basabwa mu gufasha abana babo kurira ku ishuri atari runini, ko n’abatabikora ari ukutabyitaho.

Claudine Mukeshimana utuye mu Mudugudu wa Nkorwe ati “Ariya si amafaranga umubyeyi yabura cyane ku buryo atayatangira umwana.”

Innocent Mudacyahwa na we wo mu Mudugudu wa Nkorwe ati “Ntabwo amafaranga 975 yatunga umwana mu gihe cy’igihembwe cyose. Ni nka Nkunganire Leta iba yasabye ababyeyi. Rwose ababyeyi dukwiye kwikubita agashyi, ayo mafaranga tukajya tuyatanga, byaba ngombwa n’imyaka twejeje tukayitanga, ariko abana bacu bagafungura.”

Bacinye n’umudiho bishimira ibyo bamaze kugeraho

Mudacyahwa yongeraho ko kuba hari ababyeyi batita ku gutanga amafaranga Leta ibasaba mu kunganira ibyo itanga ku bana babo bituma ku ishuri babasaranganya ibihari. Ati “Nyamara buriya bufaranga tugerageje tukabutanga, za mboga zirahahwa, abana bakarya indyo yuzuye, n’ibyo kurya bigatubuka.”

Anavuga ko kuba ababyeyi batayatanga, abana bakabatumwaho kubibutsa, hari ukuntu bituma abana bigiramo ipfunwe ryo kumva ko bari kurya ku by’abandi.

Ku ishuri ribanza rya Nkorwe ryabereyeho ibirori, umwaka ushize abana batanze 975 basabwa mu kunganira ibyo Leta ibatangaho bari 87%, naho ku ishuri ribanza rya Buremera biri mu Kagari kamwe bayatanze ku rugero rwa 92%.

Ibirori byasojwe no gucinya akadiho

Bizumuremyi Jean uryamye hagati y’uwamuherekeje (Parrain) n’umugore we, yahawe amasakaramentu, arasezerana, aranabatirisha

Mu babonye Bizumuremyi Jean uzwi ku izina rya Bahiga, w’imyaka 47 ari gushyingiranywa n’umugore we Blandine Tuyishime w’imyaka 32, buri wese agasezeranya mugenzi we kumukunda no kumwubaha kugeza batandukanyijwe n’urupfu, hari abagiye barira, batabitewe n’akababaro, ahubwo bitewe n’amarangamutima yo kubona Tuyishime asezeranira umugabo we kumukunda, nyamara amaze amezi umunani ateguka, nta n’icyizere cy’uko byahinduka kuko umugabo ngo yamunzwe uruti rw’umugongo.

Nk’uko bivugwa na Joséline Uwitonze uturanye n’uriya muryango akaba yaranawuherekeje kugeza biyemeza gushyingirwa mu kiliziya, uriya mugabo uretse kuba ateguka, n’izindi ngingo ze z’umubiri nk’amaguru n’intoki byatangiye kwihina. Arababara cyane, akanahora ataka, bituma hari abakeka ko arwaye kanseri, n’ubwo nta muganga wabyemeje.

Ati “Kubera ubukene no kutagira mituweri yivuje ku Bitaro bya Kabutare bamubwira ko uruti rw’umugongo rwe rugenda rumungwa. Icyo gihe yari akibasha kwicara. Bamwohereje gukomeza kwivuriza kuri CHUB, abura ubushobozi, ahita ajya kurwarira mu rugo, aho aba nta n’umuti wo kumworohereza ububabare.”

Imvano yo kwiyemeza gushyingiranwa n’umugore we, wari watangiye kujya gusengera mu barokore, ngo yabaye ko abana Uwitonze ategurira guhabwa isakaramentu ry’ugukomezwa kuri paruwasi ya Ngoma bagiye gusura uriya mugabo kuko arwaye, bakanamushyira impano zavuye mu bushobozi bakomoye ku babyeyi babo.

Nubwo bari basanzwe ari abagatolika kuko bombi (umugabo n’umugore) babatijwe bagahabwa ukaristiya bakanakomezwa, bari barasezeranyijwe n’ubuyobozi, ariko nta sakaramentu ry’ugushyingirwa bari barahawe.

Abaturanyi banabashakiye imyambaro y’ubukwe

Uwitonze ati “Umugabo yaravuze ati biranshimishije kubona ntari nzi ko hari abantu bantekereza none abana bakaba bantekereje, ati rwose ndifuza ko nanjye nagarukira Imana, abana banjye bakazaba abakirisitu nka bariya bana.”

Akomeza agira ati “Abana baratashye, ruriya rugo nkomeza kujya ndusura, mbasaba kugira ngo bige, bigera aho barabyemera, hanyuma padiri na we ampa uburenganzira bwo kujya kubigisha.”

Kubera ko Bahiga atakibasha kweguka, Padiri yazanye burankari yo kumutwaraho asohorwa mu nzu ajyanwa ahaturiwe igitambo cya misa hafi y’iwe (mu nzu yasigiwe n’ababyeyi), cyabayemo kubasezeranya ndetse no kubatiza abana babo babiri. Umukuru ubu afite imyaka ine, naho umutoya ubu afite umwaka umwe n’amezi atatu.

Ku bijyanye n’impamvu yo gusezeranya abantu babiri harimo n’utabasha kweguka, Padiri Eric Twizigiyimana, ari we Padiri mukuru wa paruwasi ya Ngoma abashyingiranywe baherereyemo, akaba anashinzwe ubutumwa bw’ingo muri diyoseze ya Butare, asobanura ko mu myemerere ya Kiliziya gatolika, roho y’umuntu idapfa nyuma y’ubuzima bwo ku isi, umuntu akaba agomba kuyitegurira uko izabaho, akiri ku isi, akora ibikorwa byiza.

Ati “Imana idutegurira kugira ubuzima bwiza kandi ikaduha n’inzira yo kunyuramo twitagatifuza y’amasakaramentu, kandi buri sakaramentu rikagira ingabire zaryo.”

Muri ayo masakaramentu rero harimo n’iryo gushyingirwa riha abashakanye uburenganzira bwo kubana, bakiyemeza kubana bakundanye, bakazatandukanywa n’urupfu, kandi bakazarera neza abana bazabyara.

Ngo si n’ubwa mbere muri Kiliziya bashyingiranya abantu harimo n’urwaye, kuko hari n’abo Padiri Twizigiyimana yivugira ko aherutse yashyingirira mu bitaro mu gitondo, nyuma ya saa sita umugabo ari na we wari urwaye agapfa.

Ni umuryango ukeneye gufashwa

Bizumuremyi na Tuyishime bari basanzwe babayeho mu bukene, ariko bakundana kandi bumvikana, bakabeshwaho no guca inshuro.

Umugabo yakoraga ahanini akazi ko gucukura imisarane no kuyividura ndetse no kwikorera ifumbire, ariko yabona n’uwo ahingira akabikora. Umugore yanyuzagamo akamufasha, cyangwa akajya gushakisha akazi mu ngo, hanyuma bakabasha kubona ibibatunga hamwe n’abana babo.

Abaturanyi babakoreye ubukwe baranabutaha

Aho umugabo yarwariye, Tuyishime ni we utunze urugo ku buryo babayeho mu bukene bukabije, ha handi umugabo urwaye kuriya atagira na matela yo kuryamaho.

N’ibirori byo kubasezeranya babikorewe n’abakirisitu bo mu muryangoremezo barimo. Ni bo babashakiye imyambaro bambaye basezerana, babaherekeza bakenyeye, hanyuma kandi ubukwe babwizihiza basangira ikigage bari benze (ba bakristu baturanye).

Ntibabakoreye ubukwe gusa kandi, kuko ngo banabazaniye ibiseke birimo ibyo kurya byo kubunganira mu mibereho, baniyemeza kubarihira mituweri.

Gushyingiranya Bizumuremyi na Tuyishime bibaye nyuma y’igihe kitari kirekire Padiri Twizigiyimana ahaye isakaramentu ryo gushyingirwa umusaza w’imyaka 75 n’umukecuru we w’imyaka 79 ufata imiti y’uburwayi bwo mu mutwe. Na bo yari yabasanze aho batuye kuko batari kubasha kugera kuri paruwasi.

Abana babo na bo bahise babatizwa

Aba bahinzi bavuga ko bawusaruye mu kwezi kwa gatanu, ubu ukaba umaze amezi abiri utarabonerwa abawugura, nyamara ubusanzwe abanyenganda bwutonora barawutwaraga nyuma y’ibyumweru bibiri gusa bawusaruye.

Uwitwa Jean Damascène Nyaminani uri muri Koperative Coogaru ihingira umuceri mu Murenge wa Rwaniro agira ati “Twabuze isoko, imifuka twanuriyemo umuceri yacikiye ku gasozi. Ndabona bizasaba kugura indi tukawushyiramo.”

Francine Mugeni na we wo muri Coogaru ati “Kugeza ubu imiceri itwarwa n’inganda ni duke dukeya two gutonorera abahinzi ngo babone uwo barya, ariko ubundi ntabwo bari gupakira umuceri rwose. Imiceri iri ku mbuga, turimo guhomba.”

Akomeza agira ati “Kuva twasarura imiceri iracyari ku mbuga, imifuka yarashwanyaguritse, nk’ahantu hatari imbuga ifite sima imifuka irimo gushwanyukira mu byatsi. Abana bacu ntibarimo kubona ibyo kurya kubera ko tutagurishije ngo tubone amafaranga, igihombo ni cyinshi mbese.”

Ikindi gihombo abahinzi bari kukigirira mu kwishyura abazamu bawurarira, kuko mbere bishyuraga abawurinda ku manywa na nijoro mu gihe cy’ibyumweru bibiri gusa, none ubu ayo mafaranga amaze kwikuba kane kuko hashize ibyumweru umunani.

Ibi byatumye hari abatangira kwifuza ko babagurira kuri makeya ariko ntukomeze kwangirika, hakaba n’abifuza ko bahabwa uwo bejeje bakawirira bakanawukoresha uko babyumva, hanyuma bakazashaka amafaranga yo kwishyura inguzanyo bahawe y’amafumbire kugira ngo babashe guhinga uri mu mirima ubungubu.

Abafite inganda zitonora umuceri bavuga ko bo batanze kuwugura nk’ibisanzwe ahubwo ko ikibazo cyabaye igiciro basabwa kuwufatiraho cyo guhera ku mafaranga 500 ku kilo nyamara umuceri uri guturuka muri Tanzaniya wo uza ku giciro cyo hasi.

Ni mu gihe kandi ngo bagifite mu masitoke uwo baguze ku isarura riheruka, kandi ngo urebye hahise amasarura abiri yose ibiciro by’umuceri wo mu Rwanda bitajyanye n’iby’uturuka hanze, ku buryo bibaviramo ibihombo.

Nk’uwitwa Patrick Gakara ufite uruganda rutonorera umuceri i Huye yagize ati “Urumva umuceri waturutse muri Tanzaniya ni mwinshi, kandi ku giciro gitoya. Tuwuguze ku giciro cyashyizweho mu Rwanda byasaba ko agafuka k’ibiro 25 tukagurisha ku bihumbi 24 nibura kandi urumva umutanzaniya uri kugura ibihumbi 18.”

Hari n’usobanura ko ubundi ikilo cy’umuceri utonoye kiva mu kilo n’inusu cy’udatonoye. Kuba mu Rwanda barashyizeho ko ikilo cy’udatonoye kigura guhera ku mafaranga 500 mu gihe icy’igitonoye muri Tanzaniya na cyo bagifatira amafaranga 500 ari byo bituma usanga uwo mu Rwanda uhenze.

Ku banyenganda rero, umuti kuri iki kibazo ngo waba ko habaho gufungura hakabaho ubwumvikane bw’abahinzi n’abacuruzi, nta gushyiraho igiciro ntakuka, cyangwa se hakajyaho nkunganire haba ku bahinzi cyangwa ku banyenganda.

Aba banyenganda banavuga ko u Rwanda rushatse rwarebera kuri Tanzaniya, aho iyo habayeho ibibazo by’uko igiciro cy’umuceri gishobora kujya hasi ugereranyije n’ibyo umuhinzi aba yawutanzeho mu kuwuhinga, bashaka abanyenganda banini bizewe bagahabwa inguzanyo yo kuwugura izishyurwa nta nyungu, bityo bakishyura abahinzi amafaranga na bo azabagirira akamaro.

Cassien Karangwa, umuyobozi w’ishami rishinzwe iterambere ry’ubucuruzi muri Minisiteri y’Ubucuruzi n’Inganda (Minicom) avuga ko icyo kibazo bakizi kandi ko hari abagenzuzi bohereje hirya no hino mu gihugu ahahingwa umuceri, kugira ngo bamenye utaragurwa, bityo babone gufata ingamba.

Yizeza kandi ko igisubizo kuri iki kibazo kizaboneka mu mpera z’iki cyumweru dutangiye (cyo kuva kuwa 22 kugeza kuwa 26 Nyakanga 2024).

Ati “Hari inganda ziri kuwugura tugenda duhuza n’aho batarabona abawugura. Ariko n’abacuruzi barimo n’abawutumiza hanze y’u Rwanda na bo twaravuganye, bazawucuruzanya n’uwo bavana hanze.”

Yongeraho ko ingamba zo gushyiraho igiciro fatizo cy’umuceri kidashyirwaho na MINICOM yonyine, ahubwo ko cyemezwa n’inzego zinyuranye harimo na Minisiteri y’ubuhinzi, abahagarariye abawuhinga n’abanyenganda.

Anavuga ko habayeho ibituma abahinzi bagurirwa munsi y’igiciro cy’amafaranga yashyizweho batabasha guhinga undi.

Ubundi igiciro cyashyizweho ku kilo ni amafaranga 500 ku muceri wa Kigori, 505 ku w’intete ziringaniye, 515 ku w’intete ndende na 773 ku wa Basmati.
Abahinzi bifuza ko niba kuwugura bidashobotse bahabwa uwo muceli bakawukoresha ibindi, noneho ubutaha ba rwiyemezamirimo bazabona isoko bakabariha ibyo babahaye nk’amafumbire, n’ibindi.

Bakomeza bavuga ko aho kugira ngo umuceli bahinze ukomeze kwangirikira ku mahangari abanyenganda baza bakawujyana, noneho aho bazumvikanira na Leta ku giciro bakabishyura, ariko umusaruro wabo udakomeje kwangirikira mu mahangari.

Imyenda ya Musenyeri bayikoze mu mpapuro

Nk’abana biga mu ishuri ribanza ACEPER Gikongoro, riherereye mu mujyi i Nyamagabe, mu birori bisoza amasomo y’umwaka w’amashuri 2023-2024, abarangije mu mwaka wa Mbere beretse ababyeyi udukino bagaragayemo bambaye imyenda bafite n’ibikoresho byose bakoze bifashishije impapuro.

Muri abo bana harimo uwari wambaye nka Musenyeri (Bishop) afite n’inkoni nk’iye, akagenda atanga umugisha nk’uko Musenyeri abigenza iyo anyuze mu bakirisitu, waje no guha umugisha abari abageni (Abasore n’inkumi!).

Abo bageni bagendaga imbere n’uwari ufite telephone na yo ikoze mu mpapuro, wabafotoraga ndetse n’uwari ubatwaje indabo na zo zikoze mu mpapuro.

Bishop atanga umugisha

Ababyeyi babonye ibyo abana bakoze babishimye bavuga ko bigaragaza ko mu bihe biri imbere abo bana bashobora kuzakora ibyenda gusa n’ibyo bakinaga. Bashimye kandi kurushaho izo mpano zo gukora imyenda bari bambaye.

Etienne Nambajimana ukora imirimo ijyanye n’ubugeni mu mujyi i Nyamagabe, akaba afite abana biga muri iri shuri, yashimye udukorikori n’ikinamico abana batozwa, kuko kuri we ngo uretse kuba bigaragaza ibyo bashobora kuzakora mu bihe bizaza, binatuma bataba abanebwe.

Ati “Nk’ubu hari igihe ntaha ngasanga bakoze inzu, bayishyiraho amabaraza, bashyiraho n’ibigega by’amazi, kandi ugasanga ni umwana wabyifashije, atari umuntu mukuru wabimufashije. Ukavuga uti uyu mwana naba mukuru ashobora kuzaba umwubatsi, akaba ingenieur.”

Imyenda bambaye n’indabo ziri hirya yabo bikoze mu mpapuro

Valentine Tuyisabe, umwe mu barimu bigisha abo bana, avuga ko muri rusange abana bigishwa ubugeni (Arts) mu mashuri abanza kandi ko bene ubwo bukorikori bwo gukora ibikoresho mu mpapuro zajugunywe babubatoza bagira ngo babafashe gutekereza no gukuza impano bifitemo, kuko bagenda bakora utuntu tunyuranye.

Ati “Niba umwana afata urupapuro agakora ikanzu cyangwa ingofero, kera ashobora kuzakora bizinesi yo kujya adoda imyenda abantu bakaza bakagura.”

Kwigisha binyuze mu bihangano bikuza impano z’abana

Eugene Birori, umwarimu uyobora ishami ry’uburezi ryigisha ibijyanye n’ubugeni (Perfoming arts) muri Kaminuza y’u Rwanda, bakaba bigisha abarimu baba bagomba kuzigisha muri za TTC, ari nazo zitanga abarimu bigisha mu mashuri abanza, avuga ko kwigisha abana binyuze mu bihangano bibafasha gutekereza neza, bagakuza impano bifitemo.

Ibindi abo bana bagiye bakora

Agira ati “Hari ubushakashatsi bwakozwe bugaragaza ko umwana atekereza neza, akagaragaza uwo azaba we n’icyo azaba cyo binyuze mu kwisanzura, aririmba, akina cyangwa yigana. Twebwe rero dushingira kuri ibyo kugira ngo umwana yige neza binyuze mu bihangano bitandukanye.”

Asoza iki gitekerezo agira ati “Ashobora gutangira abyigana, ahereye ku byo abandi bakoze. Bene ibyo bihangano biba bigamije gushimisha abantu, kwigisha no gutanga ubutumwa, ariko ku bana bo bibafasha gutekereza neza, kuzamura impano, no kwisobanukirwa bakagaragaza icyo bazaba cyo mu buzima buzaza.”

Indabo

Abana ntibakwiye guhutazwa mu turimo bakora kuko ari two tugararamo impano zabo

Donat Iyakaremye uyobora umuryango VSO (Volontary Service Overseas) mu Ntara y’Amajyepfo, avuga ko mu mushinga ’Twigire mu mikino’ bahugura ababyeyi n’abarezi bigisha abana bo kuva ku myaka itatu kugeza kuri itandatu, ku kuntu bagomba gufasha abana mu gukuza impano zabo.

Mu byo bashishikariza ababyeyi n’abarezi harimo kutabuza abana gukina no kugira ibyo bakora n’intoki babashinja kwiyanduza cyangwa gukubagana no guta igihe, kuko ibyo bakora ari byo biba bijyanye n’ibyo ubwonko bwabo bushoboye kurusha.

Bimwe mu bindi abana bakora

Agira ati “Ubwonko bugira ubushobozi bunyuranye ku bantu. Umwana ashobora kuba umuhanga mu mibare, mu ndimi akaba ari ku rugero ruringaniye. Nk’igihe ari kubaka ateranya amatafari ukamubuza, ugashaka ko ajya wenda mu bijyanye n’inyuguti, nyamara azifiteho ubushobozi bwa 70%, urumva nakura ubushobozi bwe buzakora kuri 70%, hari impano bapfukiranye yari kuri 95%.”

Avuga ko hakwiye kubaho kwitegereza abana iyo bakina, umuntu akareba ibyo bakunda, bakabaha n’ibikoresho by’ibanze, kugira ngo barusheho gutera imbere mu mpano zabo.

Yari yambaye nka Bishop

Babivuga nyuma y’uko muri batanu bari bakurikiranyweho biriya byaha, babiri bari babihamijwe n’urukiko rwisumbuye rwa Huye, ari bo Rtd Major Paul Katabarwa n’uwahoze ari Umunyamabanga Nshingwabikorwa w’Umurenge wa Maraba, Jacqueline Uwamariya, na bo barekuwe n’urukiko rw’ubujurire rw’i Nyanza, tariki 12 Nyakanga 2024.

Ruriya rukiko rw’ubujurire rwagize Jacqueline Uwamariya umwere ku byaha byo kuba icyitso mu cyaha cyo gukora ubucukuzi bw’amabuye y’agaciro bitemewe, n’ubufatanyacyaha mu gukoresha ububasha ahabwa n’itegeko mu nyungu bwite.

Icyakora, n’ubwo Major (Rtd) Paul Katabarwa yagizwe umwere ku cyaha cyo kudakurikiza ibipimo ngenderwaho, bifite impamvu nkomezacyaha yo kuba byarateje urupfu, yahamwe n’icyaha cyo gukora ibikorwa by’ubucukuzi bw’amabuye y’agaciro nta ruhushya, ahanishwa amezi atanu y’igifungo, hanyuma kubera ko yari amaze mu buroko amezi arenga ayo yakatiwe ahita arekurwa.

Marthe Mukakarera nyinawabo wa Jeanne Ntakirutimana watwariwe isambu ikagirwa ikirombe abeshywa kubakirwa no kuzanirwa amazi meza, agira ati “Imanza zitangira twashatse kuregera indishyi baratubwira ngo nitube tubyihoreye, dutegereze uzatsindwa azabe ari we tuziregera.”

Akomeza agira ati “None baravuze ngo bose baratsinze, numva biranshobeye, mbura uwo mbaza. No mu bapfushije abantu hari uwari uhari urubanza rusomwa, yumvise ko babahaye uburenganzira bwo gutaha ahita akubita amavi hasi, acika umugongo.”

Icyakora, abazi iby’amategeko bavuga ko bariya bashaka kuregera indishyi z’akababaro bumvise ko abantu bose barekuwe bagatekereza ko bahanaguweho ibyaha bose, bibagirwa ko uwaregwaga kuba nyiri ikirombe we icyaha cyo gucukura mu buryo butemewe cyamuhamye, bityo bakaba bashobora kuba ari we baregera kuzabishyura.

Hari uwagize ati “N’ubwo nyiri ikirombe yarekuwe, ni ukubera ko yari amaze igihe kirenze icyo yakatiwe mu buroko. Icyaha ariko cyaramuhamye. Ni we bashingiraho, bakaregera indishyi.”

Umuvugizi w’urwego rw’ubushinjacyaha, Faustin Nkusi, na we ati “Mu gihe bagaragaza ko ibyo birombe cyangwa ibyacukurwaga hari icyo byabangirije ku giti cyabo, bashobora kuba baregera indishyi zabo. Bitagiye mu manza nshinjabyaha, bakajya mu nkiko zisanzwe.”
Nkusi yongeraho ko begereye ubushinjacyaha bw’urukiko rwisumbuye rwa Huye babagira inama ku kuntu babyitwaramo, kandi ko byarushaho kuba byiza bashatse umwunganizi mu by’amategeko.

Uko Katabarwa wahakanaga kuba nyiri ikirombe yabihamijwe

Kuva Rtd Major Paul Katabarwa yatangira kuburana, yahakanye ibyaha yaregwaga. Nk’icyo gukora ibikorwa by’ubucukuzi bw’amabuye y’agaciro nta ruhushya, yagiye agihakana avuga ko byabazwa uwitwa Naomi wagiye no ku Murenge abeshya ko ashaka uruhushya rwo kwegereza amazi meza no kubakira Jeanne Ntakirutimana, kandi ko n’ubwo bari baziranye (na Naomi) bitavuga ko bakoranaga.

Icyo kudakurikiza ibipimo ngenderwaho bifite impamvu nkomezacyaha yo kuba byarateje urupfu na cyo yagiye agihakana, avuga ko adakwiye kuregwa kudakurikiza ibipimo kandi no gucukura ubwabyo atarabikoze.

Kuri ibi birego byombi yanavugaga ko nta bimenyetso simusiga bigaragaza ko yabikoze.
Icyakora, urukiko rukuru ruburanisha ku rwego rw’ubujurire imanza z’inshinjabyaha rw’i Nyanza yari yajuririye, nyuma y’uko we na Jaqueline Uwamariya bari bakatiwe igifungo cy’imyaka irindwi n’ihazabu ya miriyoni eshanu buri wese, rwasanze icyaha cy’ubucukuzi butemewe cyo kimuhama.

Mu isesengura rwagaragaje ko n’ubwo impande zombi (ubushinjacyaha n’abaregwa) zitemeranywaga ku cyashakishwaga, kuba harabaye ubucukuzi byo bidashidikanywaho.
Kandi nyuma yo kubona igihe byatwaye, ingufu zakoreshejwe, ibikoresho byitabajwe n’ubuhamya bw’abatangabuhamya bemezaga ko mu gucukura atari amazi yashakwaga ahubwo amabuye y’agaciro, nyuma kandi yo kubona ko Katabarwa asanzwe akora imirimo yo gucukura amabuye y’agaciro, rwanzuye ko ibyo bimenyetso byose bihamya nta shiti ko icyashakishwaga ari mabuye y’agaciro, kandi ko byakozwe nta burenganzira uwabikoraga yari yahawe n’urwego rubishinzwe.

Urukiko kandi rwanzuye ko icyaha cyo kudakurikiza ibipimo ngenderwaho kidahama Katabarwa kuko kidashobora kubangikanywa n’icy’ubucukuzi bw’amabuye y’agaciro nta ruhushya.

Mudugudu akurikiranyweho gukubita umusore w’imyaka 18 akamunegekaza

Bernard Uwitije ni we wakubiswe aranegekazwa. Afite inguma mu mutwe, mu nda, ku rutugu no ku kaboko k’iburyo. Ikigo nderabuzima cya Kigoma ubu cyamwohereje ku bitaro, kugira ngo ahabwe ubuvuzi bwisumbuye.

Umunyamabanga nshingwabikorwa w’Umurenge wa Kigoma, Jean Baptiste Hakuzimana, yabwiye Kigali Today ko uwo mukuru w’Umudugudu yitwa Athanase Musabyimana kandi ko bamufashe ngo ashyikirizwe RIB, kuko urebye yahohoteye uwo musore, cyane ko n’ibyo yamujijije bidafatika.

Yagize ati “Amakuru twahawe ni uko yamusanze apima ikigage, aramubwira ngo kuki yagipimye atabizi, undi amubajije niba ari ngombwa kubanza kumubwira baterana amagambo, birangira amukubise.”

Aho Uwitije yapimiraga ikigage ngo ni mu nzu y’iwabo, bimwe mu cyaro umuntu abona afite amasaka akenga ikigage hanyuma abaturanyi bakaza kugura.

Abarokotse Jenoside bo mu Karere ka Gisagara bifuza ko MINUBUMWE yabavuriza no ku bitaro by’Akarere

Iki cyifuzo bakigaragarije Imboni z’imiyoborere myiza, zikorana n’Umuryango FVA, zikunze kwegera abaturage mu nteko z’abaturage, bakabagaragariza ibyo bifuza bakorerwa kugira ngo barusheho kwishimira serivise bahabwa n’inzego z’ubuyobozi.

Martin Karangwa uhagarariye Imboni z’imiyoborere myiza mu Karere ka Gisagara, ari na we wegeranyije ibitekerezo byatanzwe mu Mirenge yose, agira ati “Abarokotse Jenoside badutumye ko tuzabasabira Akarere kubakorera ubuvugizi, bakemererwa ko serivise bahabwa ku rwego rw’ibitaro by’Intara bazihabwa no ku rwego rw’Akarere.”

Karangwa asobanura ko serivise bahabwa ku bitaro bikuru ari ukuvurwa n’abaganga b’inzobere ndetse bakanahabwa imiti, nta mafaranga batanze kuko yishyurwa na MINUBUMWE. Iyo serivise kandi ihabwa abafite nomero ibaranga (PIN) bahawe na MINUBUMWE.

Ibi byashyizweho kubera ko kwivuza ku nzobere bihenda, nyamara abarokotse Jenoside batishoboye bafite indwara basigiwe na Jenoside, akenshi usanga nta bushobozi bafite bwo kwiyishyurira izo nzobere.

Karangwa asobanura ko ababatumye bababwiye ko nyuma y’imyaka 30 Jenoside ibaye hari abageze mu zabukuru ku buryo bagenda bafatwa n’indwara cyane cyane izidakira nk’umuvuduko w’amaraso, diyabete n’izindi. Rero, kimwe n’abamugajwe na Jenoside bari basanzwe bivuza kenshi, na bo basigaye ari uko.

Guhora kwa muganga kandi ngo ntibyorohera abadafite ubushobozi buhagije kuko ku bitaro by’Akarere akenshi babandikira imiti itari muri farumasi y’ibitaro, bajya kuyigurira muri farumasi yo hanze bakiyishyurira 100%.

Muri serivise sosiyare (social) y’Akarere ka Gisagara bavuga ko kugeza ubu bafite abarokotse Jenoside 1895 bivuza kenshi kuko barwaye indwara zidakira harimo umuvuduko w’amaraso, umutima n’umutwe udakira. Abenshi kandi ngo bafite imyaka iri hejuru ya 50.

Bavuga kandi ko kwivuza mu bitaro ubwabyo atari ikibazo kuko bishyura 10% by’amafaranga basabwa kuko baba bafite Mituweli, ko ikibazo ari ukwigurira imiti. Akarere kandi gafasha abo byananiye.

Abakora muri iyi serivise banavuga ko iki kibazo cyagejejwe kuri MINUBUMWE bakaba bizeye ko amaherezo kizabonerwa umuti. Kuri bo kandi, umwe mu miti ishoboka ni ugushyiraho farumasi zikorana na Mituweli, byakuraho ikibazo cyo guhendwa n’imiti, mbese nk’uko hari izikorana na MINUBUMWE ari nazo zitanga imiti ku bo ivuza.

Yabyaye abazwe, ikinya kimushizemo yihutira kujya gutora

Ivan Ihirwe Ganza, ni ryo zina ryahawe umwana Niyonsenga yibarutse, nyuma y’uko yafashwe n’ibise yari abyutse agira ngo ajye gutora, kuko yari yamenye ko no ku bitaro bya CHUB yari arimo na ho hashyizwe site y’itora.

Yabwiye Kigali Today ati "Byanshimishije cyane kubyara kuri iyi tariki ya 15 Nyakanga 2024. Naje kwipimisha ejobundi kuwa gatanu, bambwira ko nzabyara uyu munsi, numva nishimiye itariki nzabyariraho."

Yakomeje agira ati "Uyu munsi mu gitondo nabyutse ngira ngo njye gutora, ibise biba biramfashe. Ndatekereza nti ubu ntabwo ndi butore koko?! Abaganga bahise bakora ibishoboka byose banyitaho, bajya kumbaga, hanyuma ndabyara."

Ikinya ngo nticyatinze kumushiramo, yumvise ntakibazo afite abona n’umwana amerewe neza, asaba muganga wari uri kumukurikirana ko yajya gutora. Bamushyize mu kagare, maze akikira umwana maze ajya gutora.

Ihirwe ni imbyaro ya gatatu ya Niyonsenga. N’akanyamuneza ati "Nabyaye umuhungu, nari nsanganywe abakobwa. Urumva nyine ni byiza cyane. Twishimye."

Ku bijyanye n’icyamuteye ishyaka ryo kujya gutora akimara kubyara, yagize ati "Numvaga nanjye ngomba kwitorera umukandida mwiza uzatugirira akamaro. Numvaga ijwi ryanjye ritagomba gusigara."

Kuri site y’itora ya CHUB hatoreye abantu barenga 700 harimo abarwayi, abarwaza ndetse n’abandi bantu bari baje kwivuza ariko bari butahe.

Badges z’ishimwe zahawe abazindutse baza gutora mu Mudugudu wa Karubanda

Hari abaketse ko abazambaye ari abafite umurimo bashinzwe mu matora, nyamara kuko bagendaga biyongera byateye amatsiko yo gushaka kumenya ibyazo.

Ni badges zari zanditseho ngo “Ubuyobozi bw’Umudugudu wa Karubanda buragushimira ko witabiriye amatora ya Perezida wa Repubulika n’Abadepite ya 2024."

Venuste Bizimana, umwe mu bari muri komite y’Umudugudu wa Karubanda, akaba n’umwe mu bagiye bambika aka gashimwe abitabiriye amatora, yabwiye Kigali Today ko ari mu bazindukiye kuri site y’itora, agamije gukora ku buryo ntawazindutse utaha atayitahanye, nk’agashimwe ko kuba yitabiriye amatora azindutse.

Meya w’Akarere ka Huye nawe ni umwe mu bashimiwe

Yagize ati “Twari dufite gahunda yo gushimira buri wese witabiriye aya matora. Kubera ko ubu bukwe buba bwateguwe abaturage baba babugizemo uruhare, biba biri ngombwa ko tubashimira. Nazindutse kugira ngo mpere ku ba mbere bitabiriye amatora.”

Ku bijyanye n’icyabateye gutekereza kuri ziriya badges yagize ati “Twavuze ngo reka dushimire abantu kuko ubusanzwe tubana muri byinshi. By’umwihariko muri ubu bukwe, byabaye ngombwa ko tubashimira ku mugaragaro.”

Hari harimbishijwe ku bwinjiriro bwa nsite ya Autonome

Bene iri shimwe kandi, no mu matora ya Perezida aheruka mu mwaka wa 2017, na bwo ku Karubanda bari bayateguye. Icyo gihe ariko bwo badges zariho agashumi kafashaga uyihawe kubyambara mu ijosi.

Ku ilisiti y’itora y’Umudugudu wa Karubanda hari abantu 1341 ariko badges zakozwe ni 500. Ngo zagenewe abazazindutse bagatora kare hanyuma bakajya ku yindi mirimo.

Mu bindi byaranze amatora i Huye harimo kuba site n’ibyumba by’itora byari byarimbishijwe nk’ahantu habereye ubukwe. No mu masangano y’imihanda ntihasigaye.

Aha ni kuri Butare Catholique

No mu masangano y’imihanda ntihasigaye

Aha ni kuri site ya Ecole Autonome iherereye mu Mudugudu wa Taba, Akagari ka Butare, Umurenge wa Ngoma

Ab’abanyeshuri bitabiriye amatora bambaye uniforme, bakaba baje baturutse ku bigo by’amashuri bigamo kuko bategereje kuzakora ibizamini bya Leta, aho bari ku mirongo bategereje kwinjira ngo na bo batore, aho wabonaga baganira, bishimye.

Hari uwari gukeka ko bari bishimiye kuba bari kumwe na bagenzi babo, banatemberereye hanze y’ishuri bigamo, ariko abaganiriye na Kigali Today bamaze gutora bagaragaje ibitekerezo binyuranye.

Gad Iradukunda w’imyaka 21 akaba yiga mu mwaka wa gatandatu muri GSOB yagize ati “Ni ubwa mbere ntoye. Ndishimye cyane kuko nanjye nagize uruhare mu kugena abazatuyobora.”

Sandrine Mukantwali w’imyaka 19 akaba yiga mu mwaka wa gatandatu muri Petit Seminaire Baptiste na we yagize ati “Ndi kumva nishimye kuba ari bwo bwa mbere nitoreye umuyobozi nshaka. Mu matora aheruka numvaga nanjye nshaka gutora, ariko barambwira ngo igihe ntikiragera.”

Yunzemo ati “Numvaga ariko mfite n’amatsiko yo kumenya uko batora. Nkibaza nti ese bigenda gute? Ngo ese barakubwira ngo tora uyu? Nkatekereza ko babategeka. Ariko nyine uyu munsi niboneye ko utora uwo ushatse.”

Danny Nkomeje na we w’imyaka 19 wigana na Mukantwali na we ati “Biranejeje cyane, ni n’iby’agaciro kuba dutoye Umukuru w’Igihugu ndetse n’Abadepite. Nkiri umwana mutoya numvaga nanjye nshaka gutora, ariko nyine nkagongwa n’imyaka.”

Meya Sebutege ubwo nawe yitabiraga gutora Perezida wa Repubulika n’Abadepite

Kuri bo kandi, ngo ntawe ukwiriye gupfusha ubusa ijwi, haba abatoye bwa mbere ndetse n’ababimenyereye.

Nkomeje ati “Urubyiruko bagenzi banjye ndabasaba kujya gutora bafite intego, bazi ko bagiye gutora uzagira akamaro. Ntafate ijwi ngo aripfushe ubusa, kuko riba rizagirira akamaro abari hasi, abari hejuru yacu ndetse natwe ubwacu.”

Abdancine Banamwana wiga muri Kaminuza y’u Rwanda na we yifuje ko hatagira upfusha amajwi ubusa agira ati “Ugiye kugira amahirwe yo gutora wese ntapfushe amajwi ubusa nko kuba yatora ahantu habiri kandi azi ko hemewe hamwe, no kuzinga urupapuro neza kugira ngo aho yatoye hagaragare neza.”

Uwitwa Urimubenshi na we ati “Umuntu wese uri butore atore neza, atore umuntu w’ingirakamaro ufite aho azatuvana n’aho azatugeza.”

Muri rusange mu Karere ka Huye hagomba gutora abaturage 254,110 naho mu Ntara y’Amajyepfo haratora 2,055,915.

Inteko zizatora abafite ubumuga zo mu Turere tw’Intara y’Amajyepfo twakurikiye imigabo n’imigambi

Hari mu gikorwa cyo kwiyamamaza abo bakandida bakoreye mu Karere ka Ruhango imbere y’Inteko zizabatora zari zaturutse mu Turere twose two mu Ntara y’Amajyepfo, kuwa 12 Nyakanga 2024.

Nyuma yo kumva imigabo n’imigambi yabo, Ndayisaba yagize ati “Hari ibyo turimo bigeze kure, hari ibyo tutaratangira. Buriya natwe tuzabishyira muri gahunda y’Inama y’Abafite ubumuga, kugira ngo byibuze nyuma y’imyaka itanu bazabe basaba bikeya, ahubwo bajye bavuga byinshi byakozwe.”

Mu byo abiyamamaje bavuze ko bakora baramutse batowe harimo guharanira ko ingengo y’imari igenerwa gufasha abafite ubumuga yongerwa mu Turere, hakajyaho n’ikigega gifasha abafite imishinga ibateza imbere.

Abakandida 13 bahatanira umwanya umwe

Hari uwagize ati “Hari imishinga ifasha ibindi byiciro. N’abafite ubumuga twabakorera ubuvugizi ku buryo haboneka ikigega cyabafasha na bo bakiteza imbere. Ufite umushinga atarabasha gushyira mu bikorwa agahabwa inkunga.”

Hari n’undi wagize ati “Hari ishuri rya Laboratwari ryari ririho ryafashaga abafite ubumuga. Ntabwo rikiriho. Hamwe na bagenzi banjye mu Nteko Ishinga Amategeko nzakora ubuvugizi iryo shuri ryongere rishyirweho.”

Undi na we, utumva, ariko uvuga, yateruye agira ati “Icya mbere nzakora ni ugukora ubuvugizi kugira ngo Leta y’u Rwanda ishyireho imyanya ibiri y’Abadepite bahagarariye abafite ubumuga. Hasanzwe hariho umwanya umwe, ugasanga uwawutsindiye ari umugabo, abagore bagasigara, cyangwa se ari umugore abagabo na bo bakaba basigara.”

Mu Ruhango babateguriye neza, kandi byabashimishije

Yunzemo ati “Turifuza ko hazabaho Abadepite babiri bahagarariye abafite ubumuga, umugore n’umugabo.”

Hari n’uwagaragaje ko nk’uko abagore baharirwa 30%, azaharanira ko n’abafite ubumuga bahabwa imyanya irenze umwe.

Mu bindi byifuzo byagaragaye mu migabo n’imigambi y’abahatanira umwanya w’umudepite uhagarariye abafite ubumuga mu Nteko Ishinga Amategeko harimo kuba abafite ubumuga bagabanyirizwa imisoro haba ku mishahara cyangwa ku bikorera kuko mu mibereho yabo bifashisha amafaranga menshi ugereranyije n’abadafite ubumuga, bikaba mu bibasubiza inyuma.

Harimo no kuba insimburangingo n’inyunganira ngingo ziboneka kuri Mituweli mu bitaro bikuru gusa n’i Gatagara, ku buryo hari abo bitorohera kuzibona kuko kuhagera bitaborohera.

Abakandida biyamamaje ni 13, harimo abagabo 10 n’abagore batatu. Muri bo kandi harimo babiri batumva ariko bavuga, banabasha kumenya ibyo abantu bavuga iyo babareba ku munwa.

Kubera ko bahataniraga umwanya umwe, nyamara bigaragara ko hari n’abashoye amafaranga atari makeya mu kwiyamamaza, basabwe kuzakira ibizava mu matora.

Kwiyamamaza byabereye mu nzu mberabyombi y’Akarere ka Ruhango

Béatrice Cyiza, umuyobozi mukuru ushinzwe ibidukikije n’imihindagurikire y’ibihe muri Minisiteri y’Ibidukikije, avuga ko nk’uko imihindagurikire y’ibihe igera kuri bose, no kuyirwanya bireba buri wese

Ubu butumwa bwanatambukijwe mu bukangurambaga bwateguwe n’aba bafatanyabikorwa, bwajyaniranye n’amarushanwa y’umupira w’amaguru yahuje Imirenge yo mu Ntara y’Amajyepfo yatangijwe ku mugaragaro tariki 10 Gicurasi igasozwa ku ya 10 Nyakanga 2024.

Imikino ya nyuma y’ayo marushanwa yabereye kuri Sitade Kamena. Béatrice Cyiza, umuyobozi mukuru ushinzwe ibidukikije n’imihindagurikire y’ibihe muri Minisiteri y’Ibidukikije, yabwiye abayitabiriye ko mu masezerano u Rwanda rwasinyiye i Paris rwiyemeje ko kugeza mu mwaka wa 2030 ruzagabanya ibyuka bihumanya ikirere ku rugero rwa 38%.

Mu byo Abanyarwanda basabwa gukora muri urwo rugamba rwo kugabanya ibyuka bihumanya ikirere muri rusange, harimo gukora ubuhinzi budacokoza ubutaka, gutera ibiti bivangwa n’imyaka, gucukura imirwanyasuri, kwifashisha imbabura zirondereza ibicanwa ndetse na Gaz, no kubungabunga amazi hamwe n’ibyogogo byayo.

Beatrice Cyiza, DG muri Minisiteri y’Ibidukikije (wa kabiri uturutse iburyo ugana ibumoso) na Markus Maier waturutse muri GIZ (umuterankunga w’umushinga) na bo bitabiriye umukino wa nyuma w’amarushanwa

Cyiza yanavuze ko impamvu abantu bose bakwiye kumva ko bibareba ari ukubera ko iyo ibihe bibaye bibi bitagwirira abataritaye ku kubungabunga ibidukikije gusa, ahubwo bigera kuri bose.

Kandi ngo ihindagurika ry’ibihe ryatangiye kwigaragaza nk’uko bishimangirwa n’abagiye bumva ubutumwa bwatangiwe muri ariya marushanwa.

Chantal Mukamarara wo mu Karere ka Kamonyi agira ati “Nk’ubu mu gihe cy’imvura isanzwe hasigaye hagwa nyinshi cyane igatera inkangu n’imyuzure. Urugero rwa bugufi ni Sebeya yasenyeye abatari bakeya biturutse ku mvura nyinshi mu minsi yashize. No mu gihe cy’izuba, risigaye riva bidasanzwe.”

Guverineri w’Intara y’Amajyepfo, Alice Kayitesi, yabwiye abitabiriye imikino ya nyuma y’amarushanwa ko kurengera ibidukikije bibareba bose

Hatazige igikorwa rero, ni ukuvuga abantu bose batumvise ko bibareba ngo bafate ingamba, ibintu byarushaho kuba bibi nk’uko bivugwa na Cyiza.

Ati “Nta gikozwe, haza ibirenze ibyo tubona ubu ngubu. Wenda ibyo tubona biza mu gace kamwe, ariko n’akari gasigaye kafatwa. N’amapfa yagera mu duce twari dusanzwe tweza.”

Abakurikiye buriya bukangurambaga, bavuga ko bagiye babwungukiramo byinshi.

Diogène Rubimbura ati “Ntabwo nari nzi ko ibimera bidufasha guhumeka umwuka mwiza bikanaturinda isuri. Nabonaga nyine ari ibiti biri aho ngaho. Nafashe umwanzuro wo gukangurira bagenzi banjye kubibungabunga.”

Abayobozi b’Uturere twose two mu Ntara y’Amajyepfo bitabiriye umukino wa nyuma

Tugarutse ku mikino nyiri izina, uwa nyuma w’abakobwa wahuje ikipe y’Umurenge wa Busasamana mu Karere ka Nyanza n’iy’uwa Nyarubaka mu Karere ka Kamonyi, warangiye Nyarubaka itsinze ibitego bibiri ku busa (2-0).

Imikino y’abahungu yahuje ikipe y’Umurenge wa Ngoma mu Karere ka Huye n’iy’uwa Kaduha mu Karere ka Nyamagabe. Yo yarangiye Ngoma itsinze Kaduha igitego kimwe ku busa (1-0).

Mpayimana yijeje ko natorwa azashyiraho ikigega cyo gufasha abashomeri

Ahitwa mu Matyazo ho mu Murenge wa Ngoma mu Karere ka Huye, niho yiyamamarije. Hari hateraniye abantu babarirwa muri 300, bari bafite amatsiko yo kumva imigabo n’imigambi ye.

Gahunda ye ikubiye mu ngingo 52 yayibashyikirije yanditse, ariko avuga no kuri zimwe na zimwe. Yagize ati "Nifuza ko imirimo yiyongera mu Banyarwanda kandi imirimo yose igahabwa gahunda, igashyigikirwa, ikanasora, igatuma twunganira ibigega nk’icya Mituweli, ikigega cyo kugoboka abari mu byago, mu biza, abakene, abatishoboye, hakabaho n’ikigega cyo gufasha abashomeri, igihe umuntu ataye akazi agafashwa kugira ngo azabone akandi adahungabanye."

Yunzemo ati "Muri iyo mirimo harimo uw’ubunyamakuru n’uw’ubukomisiyoneri."

Ku bijyanye no guhanga imirimo y’ubunyamakuru, yasobanuye ko nk’uwize itangazamakuru abona ko kuri buri Murenge hashyizwe igitangazamakuru byafasha urubyiruko kubona ibyo rukora, abikorera bakabona aho bamamariza ibikorwa byabo, hanyuma ibitangazamakuru na byo bigatera imbere.

Naho ku bijyanye n’ubukomisiyoneri, yavuze ko burimo akajagari, buri wese mu babukora akaba ashyiraho ibiciro uko yishakiye. Ati "Buri muntu yabaye umukomisiyoneri. Ni akajagari kandi byica ubucuruzi. Ni umurimo wahabwa gahunda, abawukora bagasora hanyuma tukarushaho gukora neza."

Ababarirwa muri 300 bari baje kumva imigabo n’imigambi ye

Mpayimana kandi yabwiye Abanyahuye ko ayoboye u Rwanda yashyiraho ko urubyiruko rurangije amashuri yisumbuye rwose runyura mu gisirikare, bityo abakiri batoya bakarushaho kukiyumvamo, no gushaka abakijyamo bikoroha.

Mu Banyahuye bitabiriye ukwiyamamaza kwe hari uwamubwiye ko nta gishya abona ari gusezeranya Abanyarwanda.

Yatanze urugero ku burezi n’ubutabera, ashimangira ko ku bijyanye n’uburezi abana bose biga n’abakuru bakaba bafashwa kwiga imyuga.

Yamusubije ko koko Abanyarwanda bamaze kugezwa kuri byinshi, ariko ko icyo we ashaka ari ukubafasha gutera "Indi Ntambwe" ari na ko intego ye ivuga.

Bimwe mu bikoresho biri mu cyumba ndangamurage ku ishuri Ikibondo

Ni icyumba kimwe iri shuri riherereye mu Murenge wa Tumba mu Karere ka Huye ryafashe rishyiramo bimwe mu bikoresho gakondo by’Abanyarwanda.

Rachel Muhawenimana, umwe mu bana baharangije mu mwaka wa gatandatu w’amashuri abanza, avuga ko mu byo yahabonye harimo “Ingobyi, ibikoresho bifashisha barwana mu ntambara harimo umuheto, icumu, n’imyambi y’amoko atatu.”

Akomeza agira ati “Hari n’ibikoresho kera bifashishaga bari kwenga nk’umuvure n’ibindi. Hari n’ibyifashishwaga mu buhinzi nk’isuka, ifuni na najoro ya kera.”

Muhawenimana avuga ko hari n’inkoko n’isekuru, ariko byo iwabo babifite, akanavuga ko kubibona ku ishuri bituma barushaho gusobanukirwa n’ibyo basanga mu bitabo bigiramo.

Ababyeyi barerera muri ririya shuri bashima igitekerezo ryagize kuko n’ubwo no mu Ngoro y’Umurage y’i Huye bihari, kubigira hafi bifasha abana kurushaho gusobanukirwa n’ibyo biga.

Uwitwa Alfred Ngabonziza agira ati “Iyo babiberekeye ku ishuri, umwarimu asobanura byimbitse uko ibyo bikoresho byifashishwa, mu gihe iyo babisanze mu Ngoro y’Umurage bahamara igihe gitoya kitangana n’icyo abana bamarana na mwarimu.”

Yungamo ati “Kandi noneho, mu Ngoro y’Umurage umwana abona icyo gikoresho rimwe gusa, ariko hano ku ishuri babibona kenshi bakarushaho gusobanukirwa neza.”

Ibi bishimangirwa n’umuyobozi w’ishuri Ikibondo, Françoise Uwera, uvuga ko igitekerezo cyo gushyiraho icyumba ndangamurage cyaturutse ku gushakisha uko abana barushaho kumva ibya kera, no kugira ngo bajye babibona hafi batarinze kujya mu Ngoro Ndangamurage.

Ati “Nko mu wa kane tuhafite amashuri atanu. Gushorera abana bangana gutyo ntibyoroshye. Ibikoresho byose biri mu bitabo turabishaka, tukabibereka mu gihe cy’amasomo. Twabanje guhugura n’abarimu bacu kuko muri bo hari abakiri batoya na bo ubwabo batari babizi.”

Ishuri ribanza Ikibondo ryashinzwe mu mwaka w’1996, rifite abana 33 bigaga mu mwaka wa gatatu w’ishuri ry’incuke. Kuri ubu rifite abanyeshuri 910 harimo abo mu ishuri ry’incuke no mu mashuri abanza.

Ventilateurs bazikora bifashishije imipfundikizo y’indobo na dynamo bakura mu maradiyo yifashishaga bande

David Habingabire wiga mu mwaka wa gatandatu mu ishami ry’Amateka, Ubukungu n’Ubumenyibwisi (HEG), ni umwe mu banyamuryango 62 bagize iyo club iri mu ishuri riherereye mu Murenge wa Ngoma, Akarere ka Nyaruguru. Avuga ko ibyo bakora biba bigamije gukemura ibibazo babona aho batuye, ariko bagatekereza no ku kubungabunga ibidukikije.

Agira ati “Tureba ibibazo byugarije rubanda muri rusange hanyuma tugashaka uko twabikemura twifashishije ibikoresho byashaje bimwe biba bigomba kujugunywa bikajya kwangiza ikirere, bikangiza n’ibidukikije muri rusange. Cyane cyane dukoresha amapulasitike kuko atabora.”

Ni muri urwo rwego bakora ibikoresho bizana akayaga byifashishwa hashyushye (Ventilateurs) bifashishije imipfundikizo y’indobo hamwe na dynamo bakura mu maradiyo ya kera yifashishaga bande (Cassette) cyangwa mu cyuma cyifashishwa mu gusoma ibiri kuri CD (Lecteur).

Mixeur bacomekaho baffres bakoze mu majerekani na yo barayikoreye

Bakora kandi indangururamajwi (Baffres) bifashishije ibijerekani bitacyifashishwa, hanyuma mikoro bigendana bakazikora bifashishije uburoso busiga irangi butacyifashwa. Ibi byombi bijyana n’impuzamajwi (Mixeur) bakora bifashishije ibyuma bakura mu maradiyo yashaje.

Bakora kandi imashini ivomerera imyaka, indabyo, amasabune y’amazi, ibyo byose mu rwego rwo gukemura ibibazo babona hafi yabo nk’uko bishimangirwa na Clarisse Niyonsaba wiga mu mwaka wa gatandatu mu ishami ry’indimi.

Agira ati “Turahera nko mu kigo cyacu. Umuyobozi yajyaga aduhuriza hamwe ngo aduhe amabwiriza, ariko bitewe n’uko turi benshi, ab’inyuma ntibabashe kumva. Turavuga ngo ese iki kibazo ntacyo twagikoraho? Hanze aha baffres zirahenda. Ese nka Club ntitwazikora ikigo kikazajya kidukodesha?”

Mikoro nazo ni bo bazikoreye

Akomeza agira ati “Turabikora, tubimurikira umuyobozi w’ikigo, ubu rwose basigaye badukodesha. Urumva ni ikibazo twakemuye muri sosiyete dutuyemo.”

Uretse ikigo bigaho, haba igihe bashaka kugira ibyo bababwira nk’abanyeshuri ndetse n’igihe habaye inama y’ababyeyi, n’abandi bantu, urugero nk’abizihije isabukuru y’amavuko cyangwa ubukwe, bakodesha izo ndangururamajwi.

Ventilateurs na zo ngo bajya bazibonera abakiriya kuko bamaze gukora izibarirwa muri 15, batabariyemo iziri mu mashuri bigiramo.

Ku kibazo cyo kumenya aho bakura ubumenyi bwo gukora ibyo byose, nyamara bitari mu byo biga, David Habingabire avuga ko ku giti cye yiyumvamo impano yo gukanika no gukora ibikoresho byifashisha amashanyarazi (Electronic) kandi ko iyo bitaza ikibazo cy’ubushobozi bukeya bw’ababyeyi yari kubyiga.

Mixeur bayikoze bifashishije radiyo yashaje

Agira ati “Bitewe n’ubushobozi hari igihe tugenda tugira inzitizi zo kwiga neza. Bityo rero ntabwo nabashije gutsinda, kandi n’iyo ntsinda ntabwo nari kubona ubushobozi bwo kujya kuyiga. Hamwe na bagenzi banjye tugiye duhuje iki kibazo.”

Yongeraho ko ibi byose babigezeho ku bw’ubujyanama bahabwa n’umuryango Educate wabashishikarije gushyira mu bikorwa ibyo biga mu isomo rya Entrepreneurship, byatumye batekereza ku cyo bazakora barangije amashuri, mu rwego rwo kwihangira imirimo.

Ubwo bagaragazaga ibyo bakora mu imurikabikorwa ry’abafatanyabikorwa bo mu Karere ka Nyaruguru ryabereye i Cyahinda, tariki 18 Kamena (Hari mu cyumweru cy’umujyanama n’umufatanyabikorwa cyabaye guhera tariki 18 kugeza ku ya 20 Kamena 2024), hari ababagaragarije ko ibikoresho byabo byarushaho kugurwa bashatse uko babinoza, bakaba batekereza nko ku irangi babisiga bikarushaho kugaragara neza.

Perezida Kagame yasabye urubyiruko kuzasigasira politike nziza y’Igihugu

Hari mu muhango wo kwizihiza isabukuru y’imyaka 30 u Rwanda rumaze rubohowe n’ingabo zari iza FPR-Inkotanyi, wabereye kuri Sitade Amahoro, kuri uyu wa Kane tariki 04 Nyakanga 2024.

Mu ijambo rye, Perezida Kagame yagize ati “Ubu butumwa ndabubwira urubyiruko rwo mu Rwanda, cyane cyane abavutse mu myaka mirongo itatu ishize. Iki gihugu ni mwebwe mugomba kukirinda, mukakirwanirira bityo kigakomeza gutera imbere.”

Yakomeje agira ati “Birakwiye ko twongera kubabwira ko kwibohora nyako gutangira iyo urusaku rw’imbunda rugabanutse cyangwa rutagihari. Ibyo twabitangiye mu myaka mirongo itatu ishize, kandi ni mwebwe twitezeho kubikomeza.”

Yanavuze ko urugamba u Rwanda ruriho kuri ubu atari ukubaho bya bucye ndamuke, ko ahubwo ari uguharanira kubaho neza, abantu bagatsinda ubukene no kubaho uteze amaramuko ku bandi, kandi bagatsinda nk’Igihugu cy’Abanyafurika bagira uruhare mu gutuma umugabane wabo n’Isi muri rusange birushaho kuba byiza.

Yunzemo ati “Mufite uburenganzira n’amahirwe byo kubaho ubuzima mwifuza. Ariko aho ubuzima buzabajyana hose, muzazirikane gushyigikira politiki nziza twubatse. Ntimukwiye guceceka. Mubigiremo uruhare kandi mutange umusaruro. Izo ni zo ndangagaciro twifuza ko zizaranga abazadukomokaho!".

Kureba andi mafoto menshi, kanda HANO

Reba ibindi muri izi Videwo:

Amafoto na Videwo : Eric Ruzindana & George Salomo

Avoka na zo zirarwara

Gaudence Mukarurangwa w’i Ntyazo mu Karere ka Nyanza agira ati “Ibiti by’imbuto byaratanzwe mu baturage ariko twese ntabwo twabibonye. Twebwe twateye ibisanzwe bitabanguriye bya avoka zirenze imwe n’indimu imwe.”

Akomeza agira ati “Ikibazo ariko byararwaye ntibyera. Nka avoka zirarabya zikuma, ntabwo zizaho. Indimu na yo yanze kwera, yarwaye ubuntu bumatira. Mu mwaka washize na bwo twahinze ibinyomoro birarwara. Twagerageje kugura imiti mu bushobozi twari dufite biranga birapfa. Twabisariyeho inshuro imwe kandi ubundi bisarurwa kabiri cyangwa gatatu.”

Donatha Nyiramana na we w’i Ntyazo, avuga ko bateye avoka, umwembe n’icunga, ariko ko nta musaruro babona kubera udusimba tumatiraho.

Agira ati “Avoka na zo zirimo uburwayi, ijeho izana utuntu tw’amahindu ku rubuto rwayo, ukabona ko kuyirya bidakunda. Nta n’imiti yabyo turabona.”

Veneranda w’i Ngoma mu Karere ka Nyaruguru na we ati “Indimu n’amacunga byo byatunaniye neza neza. Indimu ziruma, amacunga na yo akazaho udukoko, wateraho n’umuti ntibiveho. Amapera muri iki gihe na yo yaranze. Azamo urunyo, agahunguka. Hari igiti dufite twahariye ingurube.”

Jean Tubane na we w’i Ngoma avuga ko afite ibiti bibarirwa muri 20 bya avoka harimo bitandatu gusa bibanguriye, ariko ko hari avoka zimwe na zimwe baba batabasha kujyana ku isoko.

Agira ati “Hari utuntu tuzaho, ukabona twazanyeho ibintu bimeze nk’ifu. Mbese ni nk’imungu. Bene izo umuntu arazirira, ntazijyana ku isoko. Iyo ugiye kuyirya ukata ha handi hangiritse.”

Dr. Concorde Nsengumuremyi uyobora Ikigo cy’igihugu gishinzwe amashyamba (RFA) avuga ko mu rwego rwo gushyira mu bikorwa ibyasabwe na Minisitiri w’Intebe, mu myaka itatu ishinze ibigo bitandukanye birimo icyo ayobora, REMA, RAB, ICRAF, World Vision n’indi miryango itari iya Leta (NGOs) bagiye bategura ingemwe z’ibiti by’imbuto byagiye bihabwa abaturage.

Muri rusange ingemwe zatanzwe ni miriyoni eshanu, ibihumbi 529 na 435 (5,529,435) harimo avoka, imyembe, indimu, amacunga n’amapapayi.

Indimu n’amacunga birarwara, bakagerageza kubitera umuti bikanga bikuma

Nta gushidikanya ko mu babiteye bigafata, harimo abavuga nka bariya baturage b’i Ntyazo mu Karere ka Nyanza n’i Ngoma mu Karere ka Nyaruguru.

Dr. Athanase Hategekimana, umuyobozi wa porogaramu ishinzwe kurwanya indwara n’ibyonnyi muri RAB, avuga ko umuti kuri izi ndwara z’ibiti by’imbuto ari ukwegera abacuruzi b’inyongeramusaruro kuko bagira n’imiti yo kwifashisha mu kuzirwanya.

Iki ni kimwe mu byifuzo bagaragarije Imboni z’imiyoborere myiza zashyizweho n’umuryango FVA (Faith Victory Association), mu bushakashatsi bakoze ku kuntu abaturage bishimira serivisi bahabwa, bakoreye mu Mirenge yose igize Akarere ka Nyanza guhera muri Gashyantante kugera muri Kamena 2024.

Justin Muhemeri uyobora Imboni z’imiyoborere myiza zo mu Karere ka Nyanza agira ati “Abaturage bagaragaje ko igihe umwe mu bakozi bo ku Kagari ari mu kiruhuko, uwasigaye akagira inshingano zitandukanye nko kujya mu nama, ku biro by’Akagari habura utanga serivisi bigatuma hasa nk’aho hamara igihe hakinze.”

Akomeza agira ati “Abaturage bifuza ko hashyirwaho undi mukozi wunganira abari ku Kagari kugira ngo n’ubwo yaba adatanga serivisi umuturage akeneye, nibura akahamusanga akamuhuza na wa muyobozi akamuha gahunda, kugira ngo nagaruka azabone iyo serivisi.”

Abatuye mu duce tumwe na tumwe two mu Karere ka Nyanza kandi bavuga ko n’ubwo bagejejweho amashanyarazi hari serivisi yakabagejejeho batabona ku bw’umuriro mukeya.

Nka Antoinette Nyirabasabose wo mu Kagari ka Cyerezo mu Murenge wa Mukingo, akaba na we ari Imboni y’imiyoborere myiza, atanga urugero rw’ikigo cy’amashuri baturanye kirimo amashanyarazi adashobora gucana mudasobwa.

Yungamo ati “Mu ngo ntiwacomeka ipasi ngo utere umwenda. Dufite ibyuma bisya imyumbati bibitse. Dutekereza ko duhinduriwe transfo (Ibyuma biringaniza umuriro) iki kibazo cyakemuka.”

Umuyobozi w’Akarere ka Nyanza, Erasme Ntazinda, avuga ko ikibazo cy’abakozi bake mu Tugari batangiye kugishakira umuti bifashisha abakorerabushake, ku buryo hari utugari 11 kuri 51 tubafite.

Agira ati “Politike ya Leta n’ubundi ni uko Utugari tugomba kongererwa abakozi. Biracyategurwa. Ariko hagati aho twari twifashishije abakorerabushake mu Tugari tugira abaturage benshi n’utugira akazi kenshi. N’ahandi hose turateganya kubashyiraho kugira ngo byibura babafashe mu gutanga serivisi, cyane cyane ariko mu kwegeranya amakuru ya ngombwa kuko dushaka kugira amakuru ahagije.”

Ku bijyanye n’ubuke bw’amashanyarazi, avuga ko hari umushinga wo kuyakwirakwiza hirya no hino bafite, yizeye ko uzasiga iki kibazo gikemutse.

Mu bindi abaturage bo mu Karere ka Nyanza bagaragarije Imboni z’imiyoborere myiza harimo kuba hari abatinda kubona ibya ngombwa byo kubaka, abafite ubumuga bwo kutumva no kutavuga bagorwa no kubona serivisi, abahinzi-borozi binubira kuba batererwa intanga amatungo ntizifate, abifuza ko imbuto y’ubwatsi bw’amatungo yajya ibagereraho ku gihe ndetse n’uko hajyaho inguzanyo y’ubuhinzi ku nyungu yo hasi.

Meya Erasme avuga ko ibyo babasha gukemura bazabikora, kandi ko n’ibigombera ubuvugizi kubera ko ubwabo ntacyo babasha kubikoraho bazabukora.

Jean Marie Vianney Gakwaya ukora muri FVA avuga ko ubundi Imboni z’imiyoborere myiza ari abantu bagiye bashyiraho kugira ngo bajye bagaragaza ibibazo by’abaturage, kuko byagaragaye ko hari ibyo batinya kubwira abayobozi ariko bakabibwira abaturage bagenzi babo.

Buri Kagari mu Turere dutanu bakoreramo kaba karimo Imboni eshatu kandi ibitekerezo bikusanyirizwa mu Nteko z’abaturage, hanyuma bigashyikirizwa inzego zegereye abaturage. Ibyo inzego zo hasi zitabashije gukemura ni byo bishyikirizwa uturere.

Bamwe mu barwanashyaka ba PL bari kwiyamamariza kuzajya mu Nteko Ishinga Amategeko

Iki ni igisubizo batanga muri ibi bihe byo kwamamaza abakandida ku mwanya wa Perezida w’u Rwanda no ku w’abagize Inteko Ishinga Amategeko, iyo babajijwe impamvu bamamaza Paul Kagame wa FPR ku mwanya wa Perezida w’u Rwanda, hanyuma bakamamaza abarwanashyaka babo ku myanya y’Abadepite gusa.

Cléophas Nzeyimana, umwe mu bari kwiyamamariza ku mwanya w’Ubudepite muri PL, agira ati “Twese nk’Abanyarwanda tuzi aho Perezida Kagame agejeje u Rwanda. Turifuza rero ko akomerezaho. Imbaraga aracyazifite, ubushake aracyabufite, ubushobozi aracyabufite.”

Akomeza agira ati “Rero twahisemo kumushyigikira, kugira ngo akomeze afashe u Rwanda rwacu gutera imbere, twebwe tukamufasha turi mu Nteko Ishinga Amategeko.”

Senateri Adrie Umuhire, umunyamabanga Mukuru w’ishyaka PL, avuga ko icyemezo cyo gushyigikira umukandida wa FPR ku mwanya wa Perezida aho gushyiraho uwabo, cyafashwe n’inama y’Igihugu y’ishyaka bibumbiyemo tariki 24 Werurwe 2024.

Abarwanashyaka ba PL i Huye

Ati “Cyafashwe kubera ko Nyakubahwa Paul Kagame yatugejeje ku miyoborere myiza, yatugejeje ku kwishyira ukizana, tubona ubutabera, tugera ku majyambere arambye nk’Igihugu. Ni ukuvuga ngo intego za PL yadufashije kuzishyira mu bikorwa mu gihe cyose amaze ayobora iki gihugu.”

Naho ku bijyanye n’ibyo abakandida ba PL bateganya kuzakora umunsi bageze mu Nteko Ishinga Amategeko, bavuga ko bazihatira kwegera abaturage, bace imvugo y’abajya bavuga ko baheruka Abadepite biyamamaza, ntibongere kubabona nyamara ngo ari Intumwa za rubanda.

Nzeyimana, ubwo biyamamazaga i Huye tariki 28 Kamena 2024 yagize ati “Ishyaka riharanira Ukwishyira ukizana kwa muntu ni ishyaka ryegera abaturage. Tuzarushaho kwegera abaturage kugira ngo twumve ibitekerezo byabo, tube ari byo tujyana mu Nteko Ishinga Amategeko, bityo turusheho gutora amategeko ajyanye n’ugushaka kwabo.”

Aba PL bamamaje abakandida babo mu Nteko bamamaza n’umukandida wa FPR ku mwanya wa Perezida w’u Rwanda

Médiatrice Mukeshimana nawe uri muri PL akaba ari umukandida Depite, ku kibazo cyo kumenya igishyashya azazana aramutse abaye umudepite yagize ati “Ni ugukomereza aho twari tugeze. N’ubundi ishyaka ryacu ryashyigikiye umukandida Paul Kagame ku mwanya wa Perezida tugira ngo imihigo ikomeze.”

Yunzemo ati “Dusanzwe turi mu ngamba. Turashaka kurushaho, tugashyiramo vitense ya karindwi. Navuga ko twari tugeze nko mu ya gatandatu ngereranyije. Mbese turashaka ko birushaho.”

Ishyaka PL rifite abakandida 54 riri kwamamaza ku budepite, harimo abagabo 28 n’abagore 26.

Michel Campion

Abanyehuye bamuzi bavuga ko yari agize imyaka 78 akaba yazize kanseri y’igifu yari amaranye amezi arindwi. Yaguye mu Bubiligi aho yari amaze amezi ane yivuriza.

Michel Campion yari umuhungu wa Lucien Campion bivugwa ko ari we wubatse ibitaro bya CHUB. Nyina yitwa Léa Campion kandi ngo yagiraga mushiki we witwa Françoise Campion.

Nubwo akomoka mu Bubiligi yahisemo kuguma i Huye ubuzima bwe bwose akajya mu Bubiligi gake agiye gusura abavandimwe n’inshuti.

Michel Campion wahoze ari nyiri Hotel Ibis yitabye Imana

Hashize igihe ababyeyi be bapfuye kandi ni bo bari bamusigiye Hotel Ibis yaje kugurisha mu mwaka wa 2018 agashinga akabari kitwa E-BIS gakorera mu busitani bw’igorofa Fondation Mgr Patrick Building Diyosezi Gatolika ya Butare yubatswe ahahoze BCR (hakurya y’iposita).

Aho Hotel Ibis yahoze ubu hari Hotel Mont Huye.

Umwe mu banyehuye utashatse ko amazina ye atangazwa dukesha aya makuru yabwiye Kigali Today ko nta mugore uzwi Campion yabanaga na we.

Aho Hotel Ibis yahoze ubu hari Hotel Mont Huye.

Yagize ati "Icyakora yigeze umugore w’umuzungukazi. Yamutwawe n’umuzungu w’i Burundi wari waje mu marushanwa y’amasiganwa y’amamodoka yakinwagamo n’Umunyarwanda witwa Bivove mu myaka ya za 1984."

Hotel Ibis yubatswe mu 1943 yitwa Pattyn. Se wa Michel Campion yayiguze mu mwaka wa 1953. Bivugwa ko yabaye Hotel ya kabiri mu Rwanda nyuma ya Faucon bituranye yubatswe mu 1937.

Michel Campion abanyehuye ndetse n’abagenze Huye cyane cyane abize muri Kaminuza y’u Rwanda kuva yamenyekana bamufataga nk’umwe muri bo.

Mu busitani bw’iri gorofa ni ho Michel Campion yari asigaye akorera ahafite Bar&Restaurant yita E-Bis

Uruganda rw’icyayi rwa Kibeho

Nk’uko bisobanurwa na Innocent Kayitare ukora mu ruganda rw’icyayi rwa Kibeho, 123 ni abarukoramo imbere harimo abakoresha imashini n’abagenzura ubwiza bw’icyayi, abazamu n’abakora isuku. Naho abakora mu mirima ni ukuvuga ababagara n’abasoroma icyayi babarirwa mu 1900.

Abenshi muri bariya bakozi kandi bakomoka mu Karere ka Nyaruguru kuko urebye muri rusange barenga 85% by’abakozi bose.

Valentine Nikuze utuye mu Kagari ka Gorwe mu Murenge wa Mata, ni umwe mu babonye akazi abikesha ruriya ruganda. Yatangiye arimbura ibishyitsi ahagombaga guterwa icyayi, atunganya imirima aranagitera, none ubu akora isuku mu biro by’uruganda.

Agira ati “Mbere mugenzi wanjye yarandebaga akambwira ngo uzaze nguhe igitabu cy’igitenge, undi akampa ijipo, bitewe n’ubuzima bw’uko ntaho amafaranga yashoboraga kuva. Ubu ndigurira igitenge cy’ibihumbi 12 nkakidodesha, umwana wanjye arabona amafaranga y’ishuri.”

Akomeza agira ati “Mujye mudushimirira Paul Kagame wakoze uyu mushinga agatekereza kuri Nyaruguru, akaduha n’abashoramari bafatika.”

Kugeza ubu ruriya ruganda rufite inzira imwe ifite ubushobozi bwo gutunganya toni 50 z’icyayi kibisi ku munsi, kivamo toni 12 z’amajyane, ariko kubera ko icyayi cyatewe kitaratangira kwera neza, binakubitiyeho n’ibihe by’izuba, kuri ubu bari gutunganya icyayi kibisi hagati ya toni 20 na 35 ku munsi.

Biteganyijwe ko mu mwaka wa 2032 uruganda ruzaba rwaramaze gushyirwamo n’izindi nzira ebyiri, ku buryo ruzaba rufite ubushobozi bwo gutunganya toni 150 z’icyayi ku munsi.
Icyo gihe imirima y’abaturage bagenda bahabwa inguzanyo yo gutera icyayi izaba igihinzeho kuri hegitari 6400 kandi ubu bamaze kugitera kuri hegitari 2112. Uruganda ubwarwo rwo rwamaze kugitera kuri hegitari 735.

Bifuza kaburimbo igera ku ruganda

Mu ruganda rw’icyayi rwa Kibeho bavuga ko babangamiwe n’umuhanda uhagera kuko ngo mu gihe cy’imvura imodoka zinyerera ntizibashe kubageraho.

Mu cyumweru cy’Umujyanama n’umufatanyabikorwa Akarere ka Nyaruguru kagize guhera tariki 18 kugeza ku ya 21 Kamena 2024, Kayitare yabwiye abajyanama n’abafatanyabikorwa babagendereye ati “Iyo imodoka zituzaniye amafumbire hari aho zigera zikanga kuharenga, hakifashishwa izacu.”

Yababwiye ko banabangamiwe n’abashumba babaragirira mu byayi, bakabangamirwa n’abatema ibiti mu mashyamba bahawe na Leta ndetse no kuba abakozi babakorera bakunze guterwa n’abajura baba bavuga ko bahembeshwa igitiyo kuko bahembwa mu madorari.

Perezida Kagame yasabye abitabira ibikorwa byo kwiyamamaza kwirinda impanuka

Yagize ati "Nigeze kumva ko hari impanuka yabaye mu bantu bamwe bazaga hano ndetse bamwe bagatakaza ubuzima abandi bagakomereka. Rwose nagira ngo nifatanye n’abavandimwe b’abo yahitanye ndetse n’abakomeretse. Turi kumwe na bo."

Yunzemo ati "Harakorwa igishoboka cyose abakomeretse bavurwe, ariko ndanababwira ngo muri ibi byose turimo mugerageze. Ntawe ubuza impanuka kubaho ariko hari ukuntu abantu bakora bakazigabanya."

Impanuka yavugaga ni iyabereye ahitwa mu Matyazo mu Murenge wa Ngoma mu Karere ka Huye, mu gitondo cya kare kuri uyu wa Kane, yari itwaye abaje mu gikorwa cyo kwamamaza yahitanye bane, batatu bagakomereka.

N’aho abantu bakunze kwita ku Mukobwa Mwiza, mu Murenge wa Mbazi mu Karere ka Huye, hari imodoka yarenze umuhanda mu masaha ya saa tatu za mu gitondo, yari irimo umuntu wajyaga mu gikorwa cyo kwamamaza umukandida wa FPR-Inkotanyi. Ku bw’amahirwe ariko ntacyo yabaye, n’imodoka isubizwa mu muhanda.

Perezida Kagame yibukije ko no mu kwiyamamaza aho batangiriye, hari aho abantu bagwiriranye hagapfamo babiri, maze agira ati " N’umuntu umwe ntagapfe muri ubwo buryo."

Kureba amafoto menshi, kanda HANO

Reba ibindi muri iyi Video:

Shyaka ashimira Kagame kuba yarasubije agaciro abafite ubumuga

Mu gihe abadafite ubumuga bacinyaga umudiho, Shyaka nawe ntiyatanzwe kuko yawucinyaga mu buryo bwe, yicaye mu igare agenderaho. Yarikaragaga azunguza n’ibendera rya FPR.

Yatangarije Kigali Today ko ari uburyo bwo kugaragaza uko yishimiye umukandida Kagame ku bw’ibyo FPR yamugejejeho, ari nayo mpamvu yabyutse saa cyenda hanyuma saa kumi n’imwe agafata umuhanda n’igare rye.

Yagize ati "Yampaye agaciro, ampa umutekano, mbona akagare, mfite umugore n’abana, inzu mbamo ni iyo yanyubakiye, mfite amazi n’umuriro mu rugo. Iyaba byashobokaga ngo imyaka nsigaje kubaho ku isi ngo nyimwihere, nipfire, ariko we akagumya akiberaho akayobora Abanyarwanda."

Yunzemo ati "Ariko ubu nta kindi namuhemba uretse kumutora. Kuri 15 nzambara neza nk’umuntu ugiye mu kirori, nk’umuntu ugiye gutera igikumwe, mutore, mwereke ko natwe abantu bafite ubumuga tumuri inyuma. Iyaba byashobokaga natora n’inshuro 100 ariko nkamushyigikira."

Ibi avuga kandi ngo abikomora ku buryo abafite ubumuga batarahabwa agaciro yari abayeho nabi.

Ati "Nta gare nagiraga. Nirirwaga mu rugo. Narinzi ko nzasaba kuko bavugaga ko ntacyo tumaze."

Samson Ndayambaje w’imyaka 40, ugendera ku mbago, akaba yaramugaye amaguru yombi, nawe wari hafi ya Shyaka n’abandi bacinyaga akadiho, we abyinira ku mbago.

Samson nawe yaturutse i Nyanza aje kwamamaza umukandida wa FPR Inkotanyi

Yabwiye Kigali Today ko ashimira FPR yahaye abafite ubumuga agaciro. Ari nayo mpamvu yaturutse iwabo i Ntyazo mu Karere ka Nyanza na moto, aza gushyigikira umukandida Paul Kagame.

Ngo yabyutse saa saba, imodoka zatwaye ab’iwabo zimusize yiyemeza gufata moto, ku buryo saa cyenda n’igice yari yageze mu mujyi i Huye.

Yagize ati "Ntakubeshye iwacu barantwitse mu ziko, ngo ntabwo ndi umuntu. Nta mategeko aturengera twagiraga. Twarafatwaga abafite ubumuga tukicwa, umubyeyi yabyara umwana ufite ubumuga akaba agushije ishyano."

Ashimira ubuyobozi bw’igihugu bwatumye na we asigaye agera ahari abandi, akidagadura, akiyumvamo ishema ryo kuba Umunyarwanda nk’abandi.

Yagize ati "RPF Inkotanyi yampaye ubushobozi ngenderaho. Bangenera ingoboka y’ibihumbi 21 buri kwezi. Ayo nyacunga neza, igihembwe cy’ihinga cyaza nkishyura umuhinzi akampingira nanjye nkeza nk’abandi Banyarwanda, nkabasha kwibeshaho. Abana banjye bane bariga. Bantangira mituweli, bampaye inka."

Ibi byose bimutera kuba yaje gushyigikira umukandida Paul Kagame, kandi ngo yiteguye kumutora.

Abikorera bo mu Karere ka Huye barifuza ko ibiro bya MAGERWA byakongera gukora

Abikorera b’i Huye bavuga ko bifuza ko biriya biro byakongera gukora kuko byabafasha kwihutisha ko ibicuruzwa bibageraho, bitarinze gutonda umurongo mu biro bya MAGERWA by’i Kigali.

Gervais Butera Bagabe uyobora Urugaga rw’Abikorera mu Karere ka Huye agira ati “I Kigali biba biri buze gutonda umurongo muremure, biba biri buze guca mu ntoki nyinshi z’abantu, ariko bihise biza, gusora byakwihutishwa.”

Ikindi ngo byatuma haremwa imirimo mishya bityo muri Huye hakinjira n’andi mafaranga yafasha mu guteza imbere abahatuye.

Icyakora, umuyobozi w’Akarere ka Huye, Ange Sebutege, we avuga ko kuba biriya biro byakongera gufungura imiryango byaturuka ku guhuza imbaraga kw’abikorera b’i Huye.

Agira ati “Tumaze iminsi dukangurira abikorera b’i Huye bahuje ibyo bakora gukorera hamwe, aho kugira ngo bajye kurangura ku bandi ahubwo bakishyira hamwe bakajya kurangura hanze y’u Rwanda hanyuma ibyo baranguye bikaba ari byo bitanga n’amahirwe yo kuba hakongera gukoreshwa.”

Aho MAGERWA yahoze ikorera hakorera ishami rya polisi y’u Rwanda ryo kurwanya magendu (RPD)

Akomeza agira ati “Umukoro uri ku rwego rw’abikorera, naho abatanga iyo serivise bo bategereje ko hagira abayisaba.”

Ibyo Meya Ange Sebutege avuga byenda gusa n’ibyo Perezida Paul Kagame yabwiye abikorera b’i Huye ubwo yaganiraga n’abavuga rikumvikana baho tariki ya 12 Mata 2015, kuko yari yabemereye ko nibatangira gutumiza ibicuruzwa hanze, amazu ya MAGERWA atari agikora azashyirwamo abakozi.

Ku bijyanye no guhuza imbaraga bagatumiriza hamwe ibicuruzwa, Bagabe avuga ko batarabigeraho akongeraho no kuba imipaka y’i Burundi ifunze, bityo hakaba nta bicuruzwa bihaturuka byinjira mu gihugu na byo bituma ubucuruzi budatera imbere vuba.

Agira ati “Iyaba bizinesi yagendaga neza hagati yacu n’u Burundi, hano hagombye kuba hakora cyane kubera ibituruka i Burundi n’i Bukavu byahahitira bikabona kujyanwa ahandi, hakaba n’ibyaza biturutse mu Bushinwa cyangwa ahandi na ho bigahita bizanwa ino, hanyuma hakagira n’ibiva ino bijya i Burundi n’i Bukavu.”

Meya Sebutege avuga ko kugeza ubu aho MAGERWA yahoze ikorera hakorera ishami rya polisi y’u Rwanda ryo kurwanya magendu (RPD), naho ahahoze ububiko (Stock) hakifashishwa n’abakwirakwiza ifumbire n’inyongeramusaruro .

Impunzi zo mu nkambi ya Mugombwa zagaragaje bimwe mu bikorwa byo Kwigira zimaze kugeraho

Babigaragarije Minisitri w’Ibikorwa by’Ubutabazi hamwe n’abandi bashyitsi babagendereye tariki 20 Kamena 2024, bifatanyije mu kwizihiza umunsi mpuzamahanga w’impunzi.

Mu bikorwa bijyanye no kwishakamo ibisubizo no kwigira impunzi zagaragaje harimo gukora imigati, kudoda imyenda, gukora ibikapu, gukora ibyibo, gukora amasabune n’amarangi, gushyiraho za Salon de Coiffure no gukora ubucuruzi bunyuranye.

Solange Mukobwajana ni umupfakazi. Afite abana bane na barumuna be bane yitaho. Nyuma y’amahugurwa ya Hindukira Wigire bigishijwemo gukora amasabune, amarangi, amavuta yo kwisiga bita gikotora n’imitobe, yiyegeranyije na bagenzi be batatu, batangira kubishyira mu bikorwa none ubuzima bugenda bumworohera.

Bimwe mu bikorwa impiunzi zikuraho amafaranga yo kwibeshaho

N’ubwo ataramara igihe atangiye, agereranyije ibihumbi 40 arabyinjiza ku kwezi kandi yizeye ko iminsi izagenda yicuma azarushaho kwagura ibikorwa bye.

Agira ati “Tutaratangira uyu mushinga ubuzima bwari bukomeye ku buryo umuntu yaguhaga amafaranga igihumbi ukumva aguhaye nk’isi n’ijuru. Ariko ubu tubasha kwizigama, tukagurizanya, tukiha n’iby’ibanze dukenera mu buzima. Waba wagize n’ikibazo cyo kutabona ya nkunga tugenerwa nk’impunzi ntuhite useba ugahita wirukira mu itsinda cyangwa se ukifashisha ayo wizigamiye ku ruhande.” 

Nk’abandi Baturarwanda, n’impunzi ziridagadura

Brigitte Bazirete we adoda imyenda n’imipira y’abana, agakora ibikapu byo guhahiramo n’ibyibo, akadoda ibikapu abana bajyana ku ishuri. Akigera mu nkambi yabanje kwigunga, ariko aho yiyemereje gukora bene ibi bikorwa ngo byamukuye mu bwigunge, bikamufasha ariko cyane cyane mu mibereho.

Agira ati “Batampaye iriya nkunga ibingibi nabyifashisha, noneho kubera kuba naraguye ubwenge n’ibingibi nkaba nabireka nkakora ibindi byisumbuyeho.”

Minisiti w’Ibikorwa by’Ubutabazi Maj. Gen (RTD) Albert Murasira yijeje impunzi ziri mu Rwanda ko bazakomeza kubafasha ariko abasaba no Kwigira

Minisiti w’Ibikorwa by’Ubutabazi (MINEMA) Maj. Gen (RTD) Albert Murasira yijeje impunzi ziri mu Rwanda ko bazakomeza kubafasha ariko na none abasaba gukoresha amahirwe bahawe bigira kugira ngo badahora batega amaboko.

Yagize ati “Politiki ya Leta izakomeza gushyigikira impunzi isubiza ibibazo bagenda bahura na byo, ariko cyane cyane ishyira imbere kubashyigikira mu kwiteza imbere.”

Abayobozi barimo Minisitiri muri MINEMA bifatanyije n’impunzi z’i Mugombwa mu kwizihiza umunsi mpuzamahanga w’Impunzi

Mu Rwanda hari impunzi zirenga ibihumbi 135, zirimo Abanyekongo babarirwa mu bihumbi 83 n’Abarundi basaga ibihumbi 51. Mu Murenge wa Mugombwa habarizwa impunzi zirenga ibihumbi 11.

Minisitiri Musabyimana yahaye imfunguzo Gitifu w’Umurenge wa Gasaka muri Nyamagabe nyuma y’uko Umurenge ayoboye uhembwe imodoka

Ubwo yayishyikirizwaga tariki 19 Kamena 2024 na Minisitiri w’Ubutegetsi bw’igihugu i Cyahinda mu Karere ka Nyaruguru, Guillaume Furaha, Umunyamabanga Nshingwabikorwa w’Umurenge wa Gasaka, yavuze ko izabafasha cyane, kandi muri byinshi.

Yagize ati "Twajyaga dukenera imodoka mu bikorwa by’umurenge, rimwe na rimwe ugasanga twakodesheje. Iriya modoka itubereye igisubizo kuko hari igihe twaburaga amikoro."

Yunzemo ati "Nimba ari nk’umurwayi tubonye mu mudugudu iwacu ukeneye ubuvuzi bw’ibanze, iyi modoka izajya yihuta ijye gutabara. Cyangwa se irondo rikeneye ko hari umuntu twafata, iriya modoka izadufasha mu kubungabunga umutekano."

Umuyobozi wungirije w’Akarere ka Nyamagabe ushinzwe imibereho myiza, Agnès Uwamariya, ashimira Gitifu Guillaume Furaha ku myitwarire yatumye batsindira imodoka

Mu byatumye baza kuri uyu mwanya harimo kuba ubukangurambaga bakoze bwasize inzu hafi ya zose zikurungiye, abaturage bafite uturima tw’imboga n’ibiti byibura bitatu by’imbuto n’imbuga zisa neza, abantu bafite udutara tw’amasahani, n’uko bicungira umutekano kuko bitabira amarondo, bagiye bashakira n’ibikoresho.

Udusantere tw’ubucuruzi ubu dufite isuku kuko inzu zisa neza n’imbuga zikaba ziriho amapave, ibigo by’amashuri n’iby’ubuvuzi na byo byitabiriye guhinga imbuto no guhinga ibihumyo mu rwego rwo kurwanya igwingira.

Umuyobozi wa Polisi mu Ntara y’Amajyepfo, ACP Désiré Twizere, na we yashimiye Gitifu Furaha

Gitifu Furaha kandi ati "Isuku ku mubiri na yo igaragarira buri wese. Mbere abaturage bacu bagendaga kuri kaburimbo bambaye ibirenge ariko ubu barambara inkweto, bambara n’imyenda imeshe "

Umuyobozi wungirije ushinzwe imibereho myiza mu Karere ka Nyamagabe, Agnès Uwamariya, avuga ko muri rusange mu Karere kose impinduka mu isuku no kurwanya igwingira bigaragarira buri wese.

Ati "Nko ku bijyanye n’igwingira, isuzuma riheruka ryari ryagaragaje ko tugeze kuri 33,6%. Intego yari uko muri 2024 hazaba hasigaye byibura 19%. Nkurikije ingamba twafashe dushobora kuzajya munsi yaho."

Umurenge wa Gasaka wahize indi mu bukangurambaga ku mutekano isiku n’isukura wahawe imodoka

Ishusho y’uko abaturage bishimira imiyoborere n’imitangire ya serivise mu Nzego z’Ibanze ikorwa n’Urwego rw’igihugu rw’imiyoborere (RGB) buri mwaka, mu bijyanye n’isuku mu mwaka ushize wa 2022-2023 Nyamagabe yagize amanota 73% yayishyize ku mwanya wa 14, ivuye ku manota 64,5% mu mwaka wawubanjirije yari yatumye iba iya 28 mu Turere 30 tugize u Rwanda.

Minisitiri w’ubutegetsi bw’igihugu Jean Claude Musabyimana ashyikiriza umunyamabanga nshingwabikorwa w’Umurenge wa Gasaka, Guillaume Furaha infunguzo z’imodoka