Mu mpera z’ukwezi gushize kwa Mata 2025, hasakaye inkuru y’Umusaza Rwagashayija Boniface washinjwaga na Kiliziya Gatolika Paruwasi ya Ruhango, kuyinaniza mu kugura ubutaka bwo kwaguriraho Ingoro ya Yezu Nyirimpuhwe, imenyerewe kwakira imbaga y’Abanyarwanda n’Abanyamahanga mu rugendi nyobokamana rwa buri kwezi.

Mu isengesho riheruka ryabaye ku cyumweru gikurikira Pasika, ni bwo humvikanye ubuhamya buvuga ko uwo Rwagashayija Boniface, yari yumvikanye na Kiliziya Gatolika Paruwasi ya Ruhango kuyigurisha ubutaka, aho ngo yanze amafaranga kuva kuri Miliyoni 100frw, kugeza kuri miliyoni 350frw mu bihe bitandukanye.

Rwagashayija ahakana ibyavuzwe kuko ngo bigamije gutesha agaciro ubwumvikane bwari bwabayeho hagati ye n’ubuyobozi bw’Ingoro ya Yezu Nyirimpuhwe, hagamije kumwangisha Abakirisitu, no gushaka kumutwarira ubutaka buteshejwe agaciro.

Rwagashayija uvuga ko ku myaka isaga 80 afite, yakuze asanga iwabo badikanyije n’abo bapadiri, yongeraho ko ari umukirisitu Gatolika ubarizwa mu muryango wa Agisiyo Gatolika w’Abasaveri akirimo n’ubwo ageze mu zabukuru.

Rwagashayija ku myaka ye afite umugore n’umwana umwe utuye muri Canada, ari nawe afata nk’umuzungura we, dore ko mu kwezi k’Ukuboza 2024 uwo muhungu we ngo ari we waje kumvikana na Padiri uyobora Ingoro ya Yezu Nyirimpuhwe, uko ubutaka bwe bwagurwa na Padiri bukazagurirwaho Ingoro ya Yezu Nyirimpuhwe.

Ubwo butaka bugizwe uko bwakabaye n’ishyamba ry’inturusu ku gice cyaryo kinini, imiringoti ibiri iteyeho ubwatsi bw’amatungo, n’ahubatse inzu za Rwagashayija, byose ku buso busaga hegitari enye, ariko ngo Rwagashayija ntazi neza ubuso bwe usibye ko ari bunini ku buryo umubajije adahita akubwira uko hangana.

Uruzitiro rw’Ingoro ya Yezu Nyirimpuhwe rugabana ku ntangiro yose, unyuze munsi ya Alitari yo mu Ngoro ugakomeza ukagera ku muhanda uvuye hasi mu kibaya, ku buryo byoroshye cyane kwagura Ingoro mu butaka bwa Rwagashayija, kuruta mu bundi butaka busigaye bw’abapadiri, ari nayo mpamvu bari bamusabye ko yabagurishaho igice, ariko nyuma ngo bakaza kubwifuza bwose kuko uko imyaka ishira indi igataha, abaza gusengera kwa Yezu Nyirimpuhwe bariyongera ku buryo barenga uruzitiro bakinjira mu ishyamba rya Rwagashayija.

Gushaka ubutaka bwa Rwagashayija byatangiye bite?

Rwagashayija asobanura ko mu myaka nk’ine ishize, Padiri wayoboraga Ingoro ya Yezu Nyirimpuhwe, yamusabye ko yabagurisha igice gito kiri munsi ya Alitari y’Ingoro (Aho baturira Igitambo cya Misa), maze amusaba miliyoni 100frw, ariko ngo nyuma Padiri amubwira ko banzuye kubaka ku butaka bwabo.

Mu kwezi ’Ukuboza 2024 nibwo ngo hasubukuwe ibyo kongera kumusaba kubagurisha ubutaka bwo kwaguriraho Ingoro ya Yezu Nyirimpuhwe, ariko noneho bisabwe na Padiri uyobora iyo Ngoro uyu munsi.

Ngo bahamagaye Rwagashayija avuga ko atafata umwanzuro kandi ashaje, ko byaba byiza bivuganiye n’umuhungu we uba muri Canada, ari nabwo bamusabaga kumutumiza, maze uwo muhungu we aza mu minsi mikuru kubikurikirana, ahageze aca abo bapadiri miliyoni 700frw nabo baranga ngo ni menshi umuhungu yisubirira muri Canada.

Muri Mutarama 2025 ngo Padiri yongeye gusaba Rwagashayija kuza kuri Paruwasi bakumvikana kuko ari bwo hari hanaje Komisiyo ivuye kwa Musenyeri, agezeyo abasaba ko bamwishyura miliyoni 500frw, ariko hakuwemo ubutaka yubatseho n’ubuteyeho ubwatsi bw’amatungo maze abapadiri bamubwira ko ari menshi batayabona aritahira.

Meya na Visi Maya ba Ruhango ngo babyinjiyemo ngo bamuhuze n’abapadiri

Rwagashayija avuga ko yongeye gutumwaho n’Ubuyobozi bw’Akarere ka Ruhango, ngo kamuhuze n’Abapadiri arabyemera baranahura, ariko bamusaba ko yagabanya igiciro, abawira ko umuhungu we atabyemera, bamusaba kubimumenyesha, ariko icyo gihe banamusaba kubongereraho imiringoti ihinzeho ubwatsi bw’amatungo maze avuga ko atayibaha kuko ari ho hamutunze.

Agira ati, "Nabanje kwanga kubaha iyo miringoti ariko ngeze aho kuko Visi Meya ushinzwe ubukungu yabinsabye nemera kubaha umwe ngasigarana undi, ariko bakampa miliyoni 500frw nk’uko nari nabibabwiye mbere".

Umuyobozi w’Akarere ka Ruhango Habarurema Valens nawe ngo yasabye Rwagashayija ko bahura, nawe agerageza mugezaho ibintu bitatu yatumwe n’abapadiri ngo yemere gutanga ubutaka.

Agira ati, "Meya tumaze guhura yambwiye ko abapadiri bamuntumyeho ibintu bitatu icya mbere, kwemera kugabanyaho miliyoni 50frw kuri miliyoni 500frw nabasabaga, icya kabiri kwemera bakanyishyura mu byiciro, icya gatatu kubaha ya miringoti yose ibiri mpingaho ubwatsi bw’inka, mubwira ko bitashoboka kuko iyo miringoti niyo intunze n’inka zanjye".

Avuga ko akimara kubwira umuyobozi w’Akarere ibyo byifuzo bye, Meya Habarurema yamusabye ko bajyana kwa Padiri, ariko bwari bumaze nko kugera mu ma saa mbiri z’ijoro ntibajyana.

Natunguwe no kumva bavuga ko nazanye amananiza no kwifuza

Rwagashayija avuga ko kuva mu Ukuboza 2024, kugera mu mpera za Mata 2025, ntaho yigeze agirana amasezerano na Padiri y’uko agomba kwishyurwa, dore ko no kwishyurwa mu byiciro batigeze babifataho umwanzuro.

Avuga ko yongeye kumva ayo makuru mu isengesho ry’icyumweru cy’impuhwe z’Imana ubwo hari uwavugiye mu ruhame ko bumvikanye nawe kenshi akabananiza, nyamara ngo ntabyabayeho, kandi ko atigeze asaba kwishyurwa mu madorari.

Agira ati, "Ntabwo nigeze nsaba kwishyurwa mu madorari, nasabye ko nibanyishyura mu byiciro, asigaye bazajya bayampa bagendeye ku gaciro k’idorari ku isoko, kuko niba bari bambwiye kumpa bwa mbere miliyoni 200frw, andi akaza nyuma azaba yariyongereye ku idorari bazayongeraho nabo, ntabwo nanze kubaha ubutaka".

Umuyobozi wungirije ushinzwe ubukungu mu Karere ka Ruhango Rusilibana Jean Marie Vianney avuga ko ubuyobozi koko bwegereye Rwagashayija bukamuhuza n’abapadiri bikaba bitaratanga igisubizo.

Rusilibana avuga ko ibiganiro bigikomeje kandi hari icyizere cy’uko hazaboneka igisubizo cyiza, ubutaka bwe bukazagurirwaho Ingoro ya Yezu Nyirimpuhwe na Rwagashayija akishyurwa neza, kuko yaba we na Meya Habarurema bose bari kugerageza guhuza impande zombi.

Reba ibindi muri iyi video: