Dore ibimenyetso byakwereka ko wugarijwe n’umuvuduko ukabije w’amaraso

Umuvuduko ukabije w’amaraso (hypertension) ni indwara ifata umuntu bucece ikagera ubwo imuzahaza atabimenye. Mu yandi magambo ni indwara yica bucece kuko nta kimenyetso cyihariye igaragaza.

Hari uburyo busanzwe bukoreshwa kwa muganga bwo kuyisuzuma hifashishijwe imashini zipima umuvuduko w’amaraso.

Ariko hari ibimenyesto byatuma ukeka ko uyifite ukihutira kureba muganga:

1. Kumva umutima utera cyane ukanabyumvira mu gutwi kumwe cyangwa yombi, cyane cyane uryamye cyangwa uri ahantu hacececetse.

2. Kuribwa umutwe biherekejwe no guhorana umunaniro, akenshi ubu bubabare bukunze kubaho mu gihe umuntu akangutse. Ishami ry’umuryango w’abibumbye ryita ku buzima (OMS) ritangaza ko umuntu mukuru umwe muri batatu aterwa umutwe n’umuvuduko ukabije w’amaraso.

3. Kutabona neza: Umuntu yumva ikizungera cyangwa isereri bigendana no kumva atabona neza cyangwa akabona ibikezikezi.

4. Kubira ibyuya: Gututubikana bidafite indi mpamvu bishobora kuba impuruza y’uko umuvuduko w’amaraso wazamutse.

5. Kuva imyuna (Kuva amaraso mu mazuru)

Indwara y’umuvuduko w’anaraso ihangayikishije abatuye isi. OMS itangaza ko abantu miliyari 1.28 bari hagati y’inyaka 30 na 79 barwaye umuvuduko ukabije w’amaraso, kandi ko 2/3 byabo ari ababa mu bihugu bikennye n’ibiciriritse. Ikindi kandi iyi ndwara ni imwe mu za mbere zitera gupfa imburagihe, cyangwa se gukenyuka kw’abatuye isi.

Hypertension ishobora kwirindwa

1. Gukora imyitozo ngororamubiri
2. Kurya ifunguro riboneye ririmo imboga n’imbuto
3. Kugabanya inzoga cyangwa ibisindisha no kwirinda kunywa itabi
4. Kugabanya umunyu
5. Kumenya guhangana na stress

ADVERTISEMENT
rkad1
kigalitoday android app mobile

Ibitekerezo   ( 4 )

Birahangayikishije p twex twitabire kwisuzumisha😥🤔🤔🤔

Japhet Jyambere yanditse ku itariki ya: 8-10-2022  →  Musubize

Mfite umuturanyi wacu amaze icyumweru atunguwe n’umuvuduko ukabije ugera kuri 120/180 ,afite imyaka 45 ans ,byabaye ngombwe ko ashyirwa ku miti y’umuvuduko ,Mudufashe kucyo gukora niba yubahirije ingingo mutubwiye haruguru z’ubwirinzi zibasha kumufasha akaba yahagarika imiti ;mwongereho n’ubundi bujyanama bwabasha kumufasha kurama .

MJYAMBERE Alfred yanditse ku itariki ya: 9-09-2022  →  Musubize

Iyo umuntu yamaze kumenya ko umuvuduko ukabije wamaze kumugeramo se ashobora gukora biriya byo kuyirinda uyu muvuduko ukaba wahagarara burundu. Muzansubize,
Murakoze.

Eric yanditse ku itariki ya: 7-07-2022  →  Musubize

Nonese umuntu unanutse ntabwo yarwara umuvuduko

Muhawenimana yanditse ku itariki ya: 7-04-2022  →  Musubize

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka