Bikurikire muri iyi video:

Sankara yagabanyirijwe igihano

Uru rukiko rugumishijeho ibihano ku bandi bose bagize uwo mutwe barimo Paul Rusesabagina na Nizeyimana Marc, bashinjwa kuba ku isonga mu gushinga no gutera inkunga ibikorwa bya FLN.

Ubushinjacyaha bwari bwasabiye Rusesabagina na Nizeyimana igifungo cya burundu, Nsabimana we bukaba bwari bwamusabiye gufungwa imyaka 25 bitewe n’uko gufasha ubutabera.

Urukiko rw’Ubujurire rwavuze ko hari ibyo Nsabimana Callixte yarusobanuriye byashingiweho agabanyirizwa ibihano, kuko ngo yagaragaje uburyo yafashije ubutabera kubona amakuru ajyanye n’imikorere y’Umutwe w’Iterabwoba wa MRCD-FLN.

Umucamanza mu bujurire yavuze ko Urukiko rubanza (Rukuru) rutahaye agaciro gakwiye hakurikijwe guhuza igihano n’uburemere bw’icyaha, ibijyanye no kuba Nsabimana yarafashije ubutabera atanga amakuru akwiye ku birebana n’imitwe y’iterabwoba, ku bantu bayigize n’uburyo ibihugu n’abantu bayiteraga inkunga.

Yagize ati “Nsabimana yatanze amakuru atuma hafatwa ingamba zikwiye mu rwego rwo gukumira no guhana ibyaha bikorwa n’uwo mutwe, kubera izo mpamvu uru rukiko rukaba rusanga ibyo asaba ko yakongera kugabanyirizwa ibihano bifite ishingiro”.

Urukiko rw’Ubujurire ruvuga ko izindi mpamvu Nsabimana yatanze zidahabwa ishingiro, ari ukuba yaravuze ko ari impfubyi ya Jenoside, kuba afite uburwayi, kuba avuga ko yari agiye gushinga urugo ndetse yari afite fiancé, kuba akiri muto (imyaka 38 y’ubukure), ndetse no kuba hari abandi ngo bari bakuriye FLN batafunzwe, bakaba bari mu ngando i Mutobo.

Ku birebana no kugabanyiriza ibihano abandi barimo Paul Rusesabagina, Nizeyimana Marc, Urukiko rw’Ubujurire rwagiye rusobanura impamvu buri muntu yatangaga asaba kugabanyirizwa ibihano cyangwa kurekurwa, ruvuga ko izo mpamvu zidafite ishingiro.

Urukiko rw’Ubujurire rwavuze ko Rusesabagina yasobanuriye Urukiko Rukuru uburyo bashinze MRCD-FLN, inshingano bayihaye n’uko bazigabanyije ndetse akanemera ko hari amafaranga yoherereje uwo mutwe, maze urwo rukiko rukaba rwarahise rwemeza ko yemeye icyaha rukamugabaniriza ibihano, nyamara atemera ko FLN yakoze ibikorwa by’Iterabwoba.

Rusesabagina ngo yavuze ko nk’umuyobozi niba hari ibikorwa by’iterabwoba FLN yakoze we abyicuza akanabisabira imbabazi, ibyo Urukiko (rw’Ubujurire) ngo rusanga ari ukwiyerurutsa, kuko n’ubwo avuga ko yicuza kandi ababajwe n’ibyabaye, ngo atemera ko yaba we, yaba na FLN babigizemo uruhare.

Umucamanaza yakomeje agira ati "Kubera izo mpamvu Urukiko (rw’Ubujurire) rusanga ukwemera kwe (Rusesabagina) kutari gushingirwaho agabanyirizwa ibihano".

Ku birebana na Nizeyimana Marc, Urukiko rw’Ubujurire rusanga icyaha yemeye ari icyo kurema umutwe w’ingabo utemewe, nyamara yaragihanaguweho ku rwego rwa mbere.

Urukiko ruvuga ko ibindi Nizeyimana yahamijwe mu buryo budasubirwaho yabihakanye, kubera iyo mpamvu ngo Urukiko rubanza (Rukuru) rwaribeshye mu kumugabanyiriza igihano, hashingiwe ku mpamvu y’uko hari ibyo yemeye aburana urubanza mu mizi, igihe yaburanaga ku bijyanye n’ifungwa n’ifungurwa ry’agateganyo ndetse no mu iperereza.

Abandi baburanyi bose bari barasabye kugabanyirizwa ibihano, kubisubika cyangwa kurekurwa, Urukiko rw’Ubujurire rwagumishijeho ibihano bari bakatiwe n’Urukiko Rukuru kuko n’ubundi ngo byari byagabanyijwe hashingiwe ku bushishozi bwarwo.

Uru rubanza rwasomwe kuva saa tatu za mu gitondo kugeza ku mugoroba wo kuri uyu wa Mbere. Rwabaye runini bitewe n’uko abaregwa bari benshi (21), ibyaha biburanywa ari 13 ndetse n’abaregera indishyi bari bageze kuri 98.

Kurikira ibindi muri iyi video:

Ubushinjacyaha bwari bwajuririye icyemezo cy’Urukiko Rukuru buvuga ko Rusesabagina wahanishijwe igifungo cy’imyaka 25, hamwe n’icy’imyaka 20 kuri Nsabimana na Nizeyimana, ari ibihano bito hashingiwe ku byaha baregwa.

Ubushinjacyaha bwavugaga ko inyito y’ibyaha baregwa ari yo yatumye bagabanyirizwa ibihano, kuko Urukiko Rukuru rwabahamije kugira uruhare (kuba ibyitso) mu bikorwa by’iterabwoba.

Mu isomwa ry’urubanza rikomeje kuri uyu wa Mbere tariki 04 Mata 2022, Urukiko rw’Ubujurire rwasanze Urukiko Rukuru rwaribeshye mu kwemeza ko Nsabimana, Rusesabagina na Nizeyimana Marc, bagize uruhare mu byaha byakozwe n’abagize Umutwe wa MRCD-FLN.

Urukiko rw’Ubujurire ruvuga ko hashingiwe ku ngingo ya 19 y’Itegeko ryo muri 2018 ryerekekeye kurwanya iterwabwoba, rikaba ribahamya gukora iterabwoba aho kugira uruhare (kuba ibyitso) mu iterabwoba, kuko ngo ari bo bari abakuru b’umutwe w’Iterabwoba wa MRCD-FLN.

Ubushinjacyaha bwavugaga ko iyo hadashingiwe ku mpamvu nyoroshyacyaha zijyanye no korohereza ubutabera, gukora akazi ndetse no kubuha amakuru, ibi byaha byo gukora iterabwobwa bihanishwa igifungo cya burundu.

Icyaha cyo kurema umutwe w’Ingabo utemewe, gutera inkunga ibikorwa by’iterabwoba hamwe n’ibindi, na byo birimo guhama Paul Rusesabagina wikuye mu rubanza kuva mu mwaka ushize, ubwo rwari rukirimo kuburanishwa mu rukiko Rukuru.

Kurikira ibindi muri iyi video:

Ibi bitero byanakomerekeyemo abandi baturage, bisahura imitungo yabo binabatwikira indi ibarirwa muri za miliyoni zigera mu magana, nk’uko ababurana basaba indishyi bagiye babisobanura.

Isomwa ry’uru rubanza ryari riteganyijwe kuri uyu wa Mbere tariki 21 Werurwe 2022 nk’uko Urukiko rw’Ubujujire rwari rwabimenyesheje mu kwezi gushize kwa Gashyantare, ubwo rwari rumaze kumva impande zose zajuririye icyemezo cy’Urukiko Rukuru cyo guhanisha Rusesabagina igifungo cy’imyaka 25.

Umukuru w’Iburanisha mu Rukiko rw’Ubujurire yavuze ko uyu munsi urubanza ruregwamo abagera kuri 21 hamwe n’abaregera indishyi barenga 80 rudashoboye gusomwa, bitewe n’uko iminsi 30 Urukiko rwari rwihaye yo kurwandika ngo yabaye mike.

Umucamanza Mukuru yagize ati “Uru rubanza ntirushoboye gusomwa uyu munsi kuko igihe cy’iminsi 30 yo kurwandika urukiko rwari rwihaye hakurikijwe ibiteganywa n’Itegeko ryo muri 2019 ryerekeye imiburanishirize y’imanza z’inshinjabyaha cyabaye gito ugereranyije n’ubunini bwa dosiye ndetse n’umubare munini w’abaregwa n’abaregera indishyi”.

Urukiko rwahise rutangaza ko isomwa ry’uru rubanza ryimuriwe ku itariki ya 04 Mata 2022 saa tatu za mu gitondo.

Ni urubanza rwakurikiwe cyane mu gihugu no ku rwego mpuzamahanga kuva Rusesabagina yafatwa mu kwezi kwa Kanama k’umwaka wa 2020.

Ubushinjacyaha bwahagarariwe na Ruberwa Bonaventure, Dushimimana Claudine na Habarurema Jean Pierre bwajuririye icyemezo cy’Urukiko Rukuru cyo mu kwezi kwa Nzeri k’umwaka ushize wa 2021, buvuga ko Rusesabagina na bamwe muri bagenzi be bari bakwiye igifungo cya burundu.

Abaregwa hamwe na we barimo Nsabimana Callixte(Sankara), Nizeyimana Marc, Nsengimana Herman bo bakomeje kuburana bavuga ko igifungo bahawe ari kinini bashingiye ku kuba ngo barorohereje ubutabera bakaburana bemera ibyaha.

Ku wa Gatatu tariki 16 Gashyantare 2022 Urukiko rwumvise Me Munyamahoro René na Mukashema Marie Louise hamwe na bamwe mu bo bunganira baburiye ababo n’ibyabo mu bitero bya FLN mu turere twa Nyaruguru, Rusizi na Nyamagabe.

Abunganira abaregera indishyi bavuga ko hari ubuhamya na raporo z’ubuyobozi bw’imirenge ya Ruheru, Kivu, Nyabimata, Kitabi(Nyungwe), Kamembe na Nyakarenzo, zose zivuga ko abaturage bari bafite imitungo ikaza gusahurwa no kwangizwa na FLN.

Izi raporo nta zari zagaragarijwe Urukiko Rukuru mu mwaka ushize, bikaba ari byo byatumye rwanga gusabira indishyi aba baturage nk’uko babyifuzaga, bitewe n’uko nta bimenyetso bari bagaragaje.

N’ubwo Urukiko rw’ubujurire rutajya rwemera kuburanisha urubanza rushya, ingingo ya 154 y’Amategeko agenga imiburanishirize y’imanza zose, iteganya ko rushobora kwakira ibimenyetso bishya bishobora kumvikanisha ibyavuzwe mbere.

Aha ni ho Me Munyamahoro René ahera asaba Urukiko rw’Ubujurire kwemera raporo z’ubuyobozi bw’imirenge zigaragaza ko abaturage bagabweho ibitero na FLN bari bafite imitungo ikaza gusahurwa no kwangizwa, n’ubwo izo raporo zitari zashyikirijwe Urukiko Rukuru kuko zakozwe nyuma y’uko rufashe umwanzuro.

Izi raporo ariko Urukiko rw’Ubujurire rwagiye rugaragaza ko zifite ibyo zibura kuko zivuga ibyo abaturage babwiraga ubuyobozi ko bibwe, ariko hatarimo ibimenyetso byerekana ko iyo mitungo bari bayifite koko.

Iki ni na cyo Urukiko Rukuru rwari rwashingiyeho mu gufata imyanzuro yo kwanga kubahesha indishyi cyangwa rukabaha indishyi nke bagereranyije n’iyo basabaga.

Perezida w’Iburanisha mu Rukiko rw’Ubujurire na we yagize ati “Kuba Urukiko rwaravuze ko badafite ibigaragaza ko bangirijwe, niba mutagaragaza ikosa ryabaye mu rubanza rwa mbere, nta kibabuza kuvuga ko mutabajuririra, cyangwa se mukatugaragariza icyo Urukiko Rukuru rwibeshyeho, ariko ntibibe nk’ibyo mwari mwavuze mu rwego rwa mbere kuko hano ni mu bujurire”.

Me Mukashema Marie Louise yahise akomeza gushimangira ibyo yari yabwiye Urukiko ko rwakoresha ubushishozi mu gusabira indishyi abarega, hashingiwe ku buhamya bwabo na raporo z’ubuyobozi bw’inzego z’ibanze z’iwabo.

Yagize ati “Twifuzaga y’uko Urukiko nirwiherera ruzareba ibyo twavuze byose harimo n’izo mvugo za ba nyiri ubwite bavuga ibyo bibwe, runabihuze n’iyo raporo, kuko raporo impamvu…wenda si ukurushya urukiko, ariko ni uburyo bwo kugira ngo ibe yaherwaho harebwa ingano y’ibyibwe”.

Mu baregera indishyi harimo Uwambajimana Françoise wiciwe umugabo mu bitero bya FLN ku Kitabi mu Ishyamba rya Nyungwe, wari wasabye Urukiko Rukuru kumuhesha amafaranga y’u Rwanda miliyoni 100 ariko rukamusabira indishyi ya miliyoni 10 gusa.

Uwambajimana avuga ko yasubiye inyuma mu mibereho kuko umugabo we ngo yinjizaga agera kuri miliyoni enye ku kwezi, akaba yabwiye urukiko ko hashobora gushakwa inyandiko za banki zibigaragaza.

Hari aho Urukiko rwasabaga impapuro zigaragaza ibyo umuntu ukora umwuga w’ubuhinzi yinjiza, zikaba ari zo zaherwaho mu kumusabira indishyi ariko abunganira abarega bakavuga ko bitoroshye.

Hari n’abaturage ngo bagiye bavuga ko bari bafite imitungo nk’imodoka, moto, telefone… ariko badashobora kugaragaza inyemezabuguzi zayo, bamwe bakavuga ko babiguze byarakoreshejwe nta mpapuro zabyo bafite.

Abunganira abaregera indishyi barishyuriza abakiriya babo hashingiwe ku ngingo ya 104 y’Itegeko ry’Ibimenyetso risaba urukiko gushingira ku kintu kizwi (nk’aho umuntu ari umuhinzi) kugira ngo hagaragazwe ikitazwi(nk’ibyo yari yejeje) biba bigoye kubonera inyemezabuguzi.

Nsabimana Callixte

Nsabimana ari mu baregwa basobanuriye Urukiko rw’Ubujurire kuri uyu wa Mbere tariki 31 Mutarama 2022 ko batanyuzwe n’umwanzuro w’Urukiko Rukuru, bakaba barimo abasaba kongera kugabanyirizwa ibihano bikajya munsi y’ibyo bahawe, hamwe n’abasaba isubikagifungo cyangwa gusubizwa mu buzima busanzwe.

Urukiko rwasomye ingingo z’ubujurire Nsabimana yarugejejeho arusaba kwita ku kuba azarangiza igifungo cy’imyaka 20 ashaje atakigira icyo yimarira, kuba yaba avukijwe amahirwe yo gusubira mu muryango nyarwanda,
kwita ku kuba yarafunzwe agiye gukora ubukwe ndetse ko umukunzi we bari kuzashingana urugo yasigaye muri Afurika y’Epfo ubu akaba atazi aho aherereye.

Nsabimana kandi yasabye Urukiko kwita ku mibereho ye bwite nk’umuntu wagizwe impfubyi na Jenoside yakorewe Abatutsi agifite imyaka 12, akaba yariciwe ababyeyi bombi n’abavandimwe bose usibye mushiki we wasigaranye ubumuga.

Nsabimana yabwiye Urukiko rw’Ubujurire ko yitandukanyije n’Imitwe y’Iterabwoba irimo uwa MRCD-FLN akabimenyesha amahanga, akihana ibyaha yayikoreyemo akanabisabira imbabazi, kandi ko yashinje ku mugaragaro ibihugu byateraga inkunga FLN birimo u Burundi, Uganda hamwe n’uwari Perezida wa Zambia witwa Edgar Lungu.

Nsabimana kandi avuga ko afite uburwayi bumukomereye bw’umuvuduko w’amaraso n’igifu, kandi ko yumva yagirirwa imbabazi nk’izo abayoboye ibitero bya FLN bagiriwe, ubu ngo barimo gutegurwa gusubira mu buzima busanzwe.

Nsabimana umaze imyaka itatu atawe muri yombi, asaba Urukiko rw’Ubujurire kumuhanisha igifungo kitarengeje imyaka itanu, akizeza ko azakorera u Rwanda gusa kuko ageze ahandi ngo bashobora kumugirira nabi kuko yahindutse umwanzi wabo.

Mu gushimangira ibyo yandikiye Urukiko yagize ati "Ndisabira igihano umuntu ashohora gukora akagororwa kandi agasubira mu muryango nyarwanda, nyuma ya Jenoside yakorewe Abatutsi mu 1994, iyo Leta iza guhitamo umurongo wo kuvuga ngo ’ijisho rihorerwe ijisho, iryinyo rihorerwe iryinyo, muri iki gihugu nta buye riba risigaye rigeretse ku rindi".

Nsabimana asaba Urukiko gushingira ku bwigenge bw’Ubucamanza rukagira imbabazi nk’uko abarokotse Jenoside na bo ngo basabwaga gutanga imbabazi bakazitanga kugira ngo urukundo runeshe urwango.

Abaregwa batishimiye ibihano bakatiwe n’Urukiko Rukuru bavuga ko impamvu nyoroshyacyaha zatuma bakatirwa ibihano bito biri munsi y’ibiteganywa n’amategeko cyangwa kurekurwa bagasubira mu buzima busanzwe ari uko bemeye bakirega ibyaha, kuba ari ubwa mbere bakatiwe igifungo n’inkiko ndetse no kuba ngo baratanze amakuru afasha ubutabera gukora neza.

Hari n’abavuga ko igifungo bahawe kidatangirana n’igihe bafatiwe ndetse n’abavuga ko hari amakuru bahaye Urukiko rukuru ntirwayitaho, rukagera ku rwego rwo kubakatira ibihano ntacyo ruvuze kuri ayo makuru.

Ubushinjacyaha buvuga ko impamvu zajuririwe n’abaregwa nta shingiro zifite bitewe n’uko Urukiko Rukuru rwari rwabakatiye ibihano hashingiwe ku mpamvu nyoroshyacyaha ziteganywa n’amategeko, ndetse hakaba n’aho ngo rwagiye munsi y’ibihano biteganyijwe n’amategeko hashingiwe kuri izo mpamvu nyoroshyacyaha.

Umushinjacyaha avuga ko by’umwihariko kuri Nsabimana uzi ingaruka z’intambara zirimo ubupfubyi ndetse akaba yaragiye muri MRCD-FLN arangije kwiga amategeko muri Kaminuza, ibi ubwabyo ngo byaba impamvu yo gukomeza ibihano.

Urukiko rw’Ubujurire rurimo kuburanisha abaregwa kugaba ibitero mu turere twa Nyaruguru na Nyamagabe muri 2018-2019, nyuma y’aho Ubushinjacyaha, abaregwa n’abaregera indishyi batangiye ibirego by’ubujurire, kuko bose batanyuzwe n’ibihano byatanzwe n’Urukiko Rukuru.

Me Herman Twajamahoro wunganira Munyaneza yabwiye Urukiko ko adashobora kuguma mu iburanisha ryari kumara amasaha arenga atandatu bitewe n’uko yagombaga kujya gutabara.

Yagize ati "Nagize ibyago ntakaza umuntu w’ingirakamaro muri ’famille’, nkumva icyifuzo cyanjye mwahera ku wo nunganira noneho mukanyemerera nkajya gutabara kuko ’social’ na yo iba ikenewe".

Umukiriya wa Me Twajamahoro yemereye Urukiko ko rwagendera kuri icyo cyifuzo ariko Ubushinjacyaha buvuga ko byaba bidakurikije amategeko, buba ari bwo busaba ko iburanisha risubikwa aho kugira ngo uregwa aburanishwe umwunganizi we adahari.

Nyuma yo kwiherera k’Urukiko, Umucamanza uyoboye iburanisha yatangaje ko iburanisha ryo kuri uyu wa Gatanu risubitswe, rikazasubukurwa ku wa Mbere tariki 31 Mutarama 2022.

Kuri uyu wa Gatanu Urukiko rw’Ubujurire rwari kumva abareganwa na Rusesabagina, aho bamwe basaba kugabanyirizwa ibihano, abandi bagasaba kurekurwa bagasubira mu buzima busanzwe.

Ubushinjacyaha ntibwanyuzwe n’icyemezo cy’Urukiko Rukuru cyo gushingira ku mpamvu nyoroshyacyaha zatumye rugabanyiriza ibihano abaregwa, kuko ngo ibyo bihano byagiye munsi y’ibiteganyijwe n’Itegeko.

Mu mpamvu nyoroshyacyaha Urukiko Rukuru rwashingiyeho, ni uko abaregwa baburanye bemera ibyaha banabisabira imbabazi, bakaba ari ubwa mbere bari bakatiwe ibihano n’inkiko, ndetse ko borohereje ubutabera mu gihe cy’iburanisha ry’ibanze.

Urukiko Rukuru rwashingiye ku ngingo ya 60 y’Itegeko riteganya ibyaha n’ibihano, ivuga ko iyo hari impamvu zigabanya ububi bw’icyaha, igihano cyo gufungwa burundu gishohora kugabanywa ariko ntikijye munsi y’imyaka 25.

Iyi ngingo ikomeza ivuga ko igihano cy’igifungo kimara igihe kizwi cyangwa ihazabu, bishobora kugabanywa ariko ntibijye munsi y’igihano gito ntarengwa giteganyirijwe icyaha cyakozwe.

Ubushinjacyaha buvuga ko Urukiko Rukuru rwashingiye kuri iyi ngingo rukirengagiza izindi nyinshi, ndetse ko n’iyi ubwayo rwayisobanuye mu buryo butari bwo.

Ubushinjacyaha buvuga ko Nsabimana Callixte wari ukwiriye igifungo cya burundu, iyi ngingo ya 60 imukatira igifungo kitari munsi y’imyaka 25, nyamara Urukiko Rukuru rukaba rwaramukatiye igifungo cy’imyaka 20.

Umushinjacyaha yagize ati "Iki ni icyemezo cy’urukiko kandi ntabwo icyemezo cy’urukiko gisimbura itegeko, kereka iyo ari icy’Urukiko rw’Ikirenga".

Nsabimana Callixte(Sankara) hamwe n’Umwunganira witwa Me Rugeyo Jean bahagurutse bavuga ko Urukiko Rukuru n’Ubushinjacyaha, bombi bemeye kugabanyiriza ibihano abaregwa hashingiwe ku itegeko riha Umucamanza ubwigenge mu gufata icyemezo.

Me Rugeyo yagize ati "Mbere na mbere Ubushinjacyaha ubwabwo ni bwo bwasabye Urukiko ko Sankara agabanyirizwa ibihano, Sankara ni ho yahereye avuga ati ’ndasaba Urukiko ko nagabanyirizwa ibihano".

Nsabimana na we avuga ko kuba yarakatiwe igifungo cy’imyaka iri munsi ya 25 giteganywa n’itegeko mu gihe habayeho impamvu nyoroshyacyaha, na byo atabishima mu gihe abo bari kumwe muri FLN bo batigeze baza mu nkiko ngo babazwe iby’ibitero bagabye, ahubwo ngo barimo gutegurirwa gusubira mu buzima busanzwe.

Nsabimana yashingiye ku ngingo ya 15 y’Itegeko Nshinga ivuga ko abantu bose bareshya imbere y’Amategeko, avuga ko bagenzi be bari abayobozi bakuru ba FLN bajyanywe mu ngando i Mutobo nyamara we akaba afunzwe.

Nsabimana yagize ati "Minisitiri w’Ingabo muri FLN Col Ntamuhanga Anthere bamujyanye i Mutobo, uwari ushinzwe Ubutasi Lt Col Uzziel Hakizimana na we bamufatanye na ba Herman mu ishyamba bamujyanye i Mutobo, uwo ni we bagakwiye gufata bakamuzana mu rukiko gusobanura uko bamenye ahari imodoka kugira ngo bazitwike, nyamara itegeko rivuga ko twese tureshya imbere y’amategeko".

Hari n’abandi mu baregwa buririye kuri uku kwisobanura kwa Nsabimana na bo basaba kurekurwa, cyane ko bamwe bavuga ko binjijjwe mu mitwe y’Iterabwoba ku gahato.

Abarimo kuburana ku bihano Ubushinjacyaha buvuga ko ari bito, ni Nsabimana Callixte(Sankara), Nizeyimana Marc, Nikuzwe Simeon, Ntabanganyimana Joseph, Niyirora Marcel, Iyamuremye Emmanuel, Nsengimana Herman, Kwitonda André, Nshimiyimana Emmanuel, Ndagijimana Jean Chrétien, Hakizimana Theogène na Mukandutiye Angelina.

Rusesabagina Paul na Nizeyimana Marc basabiwe gufungwa burundu

Ubushinjacyaha buvuga ko Mushayidi waregwaga gukoresha inyandiko zikangurira abaturage kujya mu ntambara abanje kubabibamo umwiryane, yahanishijwe igifungo cya burundu nkanswe ibitero bya FLN byo byahitanye abantu icyenda, bigakomeretsa abandi, bikanangiza imitungo yabo.

Urukiko rwafunze Mushayidi nyuma yo kumuhamya ibyaha byo kugambanira igihugu ashaka guhirika ubutegetsi buriho, ibyo akabikora abanje kubiba urwikekwe n’umwiryane mu baturage akoresheje inyandiko ze.

Urukiko rwavugaga ko uwo ari we wese wagambanira igihugu cye agitezamo intambara, atitaye ku mubare w’abantu bazayigwamo, ibizangirika ndetse n’igihugu ubwacyo kigasenyuka, ari icyaha ndengakamere ku buryo rusanga Mushayidi Deogratias nta mbabazi akwiye guhabwa kubera uburemere bw’icyaha aregwa.

Ubushinjacyaha bwaregeye Urukiko rw’Ubujurire buvuga ko ibyaha Rusesabagina na Nizeyimana Marc na bo baregwa badakwiye kubibabarirwa, kuko ngo byagize ingaruka ku buzima bw’abantu n’imitungo.

Umushinjacyaha yakomeje ashimangira imbere y’Urukiko rw’Ubujurire agira ati "Ingingo ya 49 y’Itegeko riteganya ibyaha n’ibihano ivuga ko kugabanya ibihano Umucamanza abishingira ku buremere bw’icyaha n’ingaruka cyagize, tukabona rero ibyaha Rusesabagina yahamijwe n’ingaruka byagize ku bantu n’imitungo yabo, akaba yari akwiye igihano cyo gufungwa burundu".

Bitewe n’uko Rusesabagina atari ahari kuko ngo yanze kwitabira iburanisha, nta wundi wagize icyo asobanura kuri ubu busabe bw’Ubushinjacyaha.

Urukiko rwakomeje rusoma ingingo y’ubujurire bwagejejweho n’Ubushinjacyaha buvuga ko butanyuzwe n’uko Nizeyimana Marc na we yakatiwe igifungo cy’imyaka 20, nyamara na we ashinjwa kuba mu mutwe w’Iterabwoba hamwe na Rusesabagina.

Nizeyimana Marc ahakana ibyaha umunani aregwa, akemera kimwe gusa cyo kuba mu mutwe utemewe, n’ubwo Urukiko Rukuru rwamuhamije icyo kuba mu mutwe w’Iterabwoba.

Yavuze ko atigeze aburana ku cyaha cyo kuba mu mutwe w’Iterabwoba, ahubwo ngo yaburanye ku cyo kuba mu mutwe utemewe akaba ari na cyo ngo yemeye akanagisabira imbabazi.

Kuba atemera ibindi ngo yabitewe n’uko babimushinje atarabikoze ndetse n’inyandikomvugo yakorewe mu iperereza ngo iramubeshyera, kuko ngo hari aho yabwiraga ubugenzacyaha bukandika mu buryo atabivuzemo.

Yagize ati "Hari aho navugaga ngo ’sinari’ bakandika ngo ’nari’, ’si’ bakayikuraho, ibyaha rero bandega ko nakoze kugeza n’ubu simbyemera".

Ubushinjaha busabira abaregwa bagera kuri 12 mu rubanza rw’abagize Umutwe wa MRCD-FLN kongererwa ibihano, bakaba biriwe bisobanura kuri uyu wa Mbere mu Rukiko rw’Ubujurire.

Benshi muri bo bahuriza ku kutemera ko babaye mu ishyirahamwe ry’Iterabwoba ari ryo FDLR-FOCA, bo bakaryita Umutwe w’Ingabo utemewe, mu gihe Ubushinjacyaha bwo buvuga ko bakoze ibyaha uwo mutwe waramaze kwitwa Ishyirahamwe ry’Iterabwoba.

Muri uru rubanza rw’ubujurire, Ubushinjacyaha buvuga ko Urukiko Rukuru rworohereje ibihano Rusesabagina, Nsabimana Callixte na Nizeyimana Marc, nyamara ngo bari abayobozi b’Umutwe wa MRCD-FLN.

Umushinjacyaha witwa Ruberwa Bonaventure yagize ati "Icyo twifuza ko Urukiko rw’Ubujurire rwazatangaho umurongo ni ikijyanye n’uburyo Umuyobozi (wa MRCD-FLN) nk’umuntu watanze inkunga ya ngombwa, washishikarije, atafatwa nk’uwagize uruhare mu gikorwa cy’iterabwoba ahubwo afatwa nk’uwakoze igikorwa cy’iterabwoba”.

Nsabimana Callixte wahawe umwanya wo kwisobanura yavuze ko nk’uwari umuvugizi wa FLN atari we wari ukwiriye guhanishwa igifungo cy’imyaka 20, mu gihe uwitwa Col Gatabazi Joseph ngo wari uyoboye ibikorwa by’iterabwoba by’uwo mutwe arimo gutegurirwa i Mutobo gusubizwa mu buzima busanzwe.

Yagize ati "Icyo ntemeranywaho n’Abashinjacyaha ni ukumva ko ngomba kubazwa ibyo bikorwa bya gisirikare byakozwe n’abarwanyi ba FLN, mu gihe Col Gatabazi Joseph wari ushinzwe ’operations militaires’, yari akuriye ’Etat Major’ yose ya FLN bamujyanye i Mutobo mu ngando ngo bamusubize mu buzima busanzwe”.

Nsabimana avuga ko bitari bikwiye ko ari we ufatwa agafungwa cyangwa akabazwa ibyakorewe mu Rwanda we yibereye mu gihugu(ibirwa) cya Comores, ari “umuvugizi udafite ijambo na rito ku ngabo za FLN”.

Nizeyimana Marc wakatiwe igifungo cy’imyaka 25 yisobanuye avuga ko Urukiko rukuru rutitaye ku bisobanuro yatanze arubwira ko nta gitero na kimwe yigeze agaba ku butaka bw’u Rwanda, kuko ngo byose byakorerwaga muri Congo, kandi ko yari umusirikare usanzwe mu ngabo za MRCD-FLN.

Ubushinjacyaha ntabwo bwemeranywa na Nizeyimana Marc ngo wafashwe ashoreye abarwanyi barimo kuva muri Congo bambukira muri Nyungwe, we akavuga ko yaganaga muri iryo shyamba ryitwa Kibira ku ruhande rw’u Burundi.

Uwitwa Nshimiyimana Emmanuel na we yagiye impaka n’Ubushinjacyaha imbere y’Urukiko, aho yaburanaga ku cyaha cyo kuba mu mutwe w’iterabwoba, ngo yinjijwemo ku ngufu kandi yari umwana w’imyaka 17.

Ubushinjacyaha buvuga ko kuba Nshimiyimana yari umwana ngo byaba impamvu nyoroshyacyaha ariko bitatuma agihanagurwaho burundu.

Urukiko rwamaze kumva Ubushinjacyaha n’abaregwa, rutangaza ko ku wa mbere w’icyumweru gitaha ruzumva Ubushinjacyaha n’abaregwa bazaba bisobanura ku bihano bahawe, hanyuma ku wa Gatatu rukazakomeza rwumva abaregera indishyi.

Mu kwezi kwa Nzeri k’Umwaka ushize wa 2021, Urukiko Rukuru, Urugereko ruburanisha Imanza z’ibyaha byambukiranya imipaka, rwategetse ko Rusesabagina ahanishwa igifungo cy’imyaka 25, mu gihe Ubushinjacyaha bwari bwamusabiye gufungwa burundu.

Ubushinjacyaha Bukuru bw’u Rwanda hamwe na bamwe mu baregera indishyi z’ibyabo n’ababo biciwe mu bitero bya FLN byagabwe i Nyaruguru na Nyamagabe mu myaka ya 2018-2019, bahise bajuririra iki cyemezo mu Rukiko rw’Ubujurire.

Abaregwa bose uko ari 20 barimo Nsabimana Callixte na Nsengimana Herman bari abavugizi b’Umutwe wa FLN bitabye urubanza, uretse Paul Rusesabagina wagumye muri gereza.

Ubushinjacyaha bwasobanuye ko Rusesabagina ufungiwe muri Gereza ya Mageragere yanze gusinya ku nyandiko yahawe n’Ubuyobozi bwa gereza imuhamagaza kuzaburana kuri uyu wa Mbere, aho ngo avuga ko yahamagawe mu buryo bunyuranyije n’amategeko.

Ubushinjacyaha bwagaragaje uburyo uregwa yahamagajwe mu buryo bwubahirije amategeko, kuko ngo inyandiko yanditswe n’Umwanditsi Mukuru w’Urukiko Rusesabagina yagombaga gushyiraho umukono, yayishyikirijwe tariki 17 Ukuboza 2021.

Ubushinjacyaha n’abaregera indishyi bahise basaba Urukiko gukomeza kuburanisha urubanza kabone n’ubwo Rusesabagina adahari, kuko ngo Itegeko rigenga imiburanishirize y’imanza z’inshinjabyaha mu ngingo yaryo ya 128 ribyemeza.

Impaka zahise zivuka ubwo urukiko rwasabaga abunganira abaregwa kugira icyo babivugaho, bo bakomeje bagaragaza uburyo ihamagarwa mu rubanza rwa Rusesabagina ryagombaga kumugezwaho n’Umuhesha w’Inkiko aho kuba Ubuyobozi bwa gereza.

Me Ngamije Kirabo Guido wunganira bamwe mu baregwa yashimangiye ibyo bagenzi be bavugaga ati "Twumva ku bwacu igifite ishingiro mu gihe urukiko ruza kuba rwiherereye, ko rwasuzuma niba gereza koko ifite ububasha bwo kumenyesha (uregwa ko agomba kujya kuburana), ko tuzi ko Abanditsi cyangwa Abahesha b’Inkiko b’Umwuga ari bo bamenyesha, mu gihe hagaragaye ko gereza ari yo yamenyesheje twumva byaba bitakurikije amategeko".

Ubushinjacyaha bwavuze ko ihamagara ryakozwe n’Umwanditsi Mukuru w’Urukiko rigashyirwa mu ikoranabuhanga inzego zose zirabimenya, ubuyobozi bwa gereza icyo bwakoze akaba ari ugusohora iyo nyandiko ku mpapuro igahabwa abaregwa bose kugira ngo bashyireho umukono bemeza ko bazitaba urubanza.

Umushinjacyaha Ruberwa Bonaventure yagize ati "Ntabwo kumenyesha ababuranyi byakozwe na gereza ahubwo ni Umwanditsi wabikoze hashingiwe ku ngingo ya 98 y’Itegeko rigena imiburanishirize y’imanza z’inshinjabyaha, iteganya y’uko guhamagarwa bishobora gukoresha ikoranabuhanga, tugasanga rero igihe cyose uregwa yabimenyeshejwe muri ubu buryo, ihamagarwa riba rikurikije amategeko".

Umucamanza wari uyoboye iburanisha mu rubanza rwabereye mu cyumba cy’Urukiko rw’Ikirenga yahise atangaza ko Urukiko ruzatangaza umwanzuro kuri izi mpaka kuri uyu wa Kabiri tariki 18 Mutarama 2022 saa kumi z’igicamunsi.

Yanatangaje ko ibijyanye n’igihe urubanza ruzasubukurirwa na byo abantu bazabimenyeshwa.

Ku wa Mbere tariki 20 Nzeri 2021, Urugereko rw’Urukiko Rukuru rushinzwe kuburanisha ibyaha mpuzamahanga n’ibyambukiranya imipaka, rwakatiye igifungo cy’imyaka 25 Paul Rusesabagina n’abandi 20 baregwa hamwe na we ibyaha by’iterabwoba, bagenda bahabwa ibihano binyuranye.

Urukiko ruvuga ko ibyo byaha bishingiye ahanini ku bitero MRCD-FLN yayoborwaga na Paul Rusesabagina, yagabye mu turere twa Nyaruguru, Nyamagabe, Rusizi na Huye, rukongeraho ko ibyo bitero byahitanye abantu icyenda muri Nyaruguru, Nyamagabe na Rusizi.

Urukiko ruvuga ko uretse ubwo bwicanyi, gukomeretsa no gushimuta abantu, FLN ngo yanyaze imitungo y’abaturage ndetse yangiza n’indi irimo inzu n’ibinyabiziga kugeza ubu byose bitaramenyekana agaciro.

Umucamanza yavuze ko benshi mu baregeye indishyi nta bimenyetso bafite by’uko imitungo bavuze ari iyabo, ariko hari n’abandi yahise yanzura ko bagomba kwishyurwa, ndetse anabagenera amafaranga bagomba kwishyurwa hashingiwe ku bushishozi bw’Urukiko.

Bamwe mu bo urukiko rwasabiye indishyi barimo Nsengiyumva Vincent wari Umunyamabanga Nshingwabikorwa wa Nyabimata (Nyaruguru), hamwe n’abaturage barimo Rugerinyange, Ntabareshya, Rudahunga, Munyaneza, Nyirayumve, Karegeya, Niwenshuti bapfushije ababo, ndetse n’ibigo bitwara abagenzi bya Omega na Alfa byatwikiwe imodoka.

Igiteranyo cy’agomba kwishyurwa aba bonyine kirarenga amafaranga y’u Rwanda miliyoni 330, ariko n’abandi ngo bazakomeza kujurira nibamara guhabwa inyandiko zisobanura imitungo yabo yibwe cyangwa yangijwe, nk’uko Nsengiyumva Vincent yakomeje abisobanura.

Nsengiyumva agira ati “Tuburana hari ibyo tutabashije kugaragaza ko twabona, cyane cyane nk’abantu imitungo yabo yagiye itwarwa, iyatwitswe, bamwe muri twe dushobora kujurira, turaza gukora ibishoboka byose kugira ngo raporo z’inzego z’ibanze zibashe kugaragaza neza ko iyo mitungo ba nyirayo bari bayifite koko”.

Umuyobozi Nshingwabikorwa w’Urugaga rw’Abavoka mu Rwanda, Liberal Majyambere, avuga ko mu gihe Rusesabagina n’abandi baba bafite imitungo mu Rwanda, ari byo byakoroha ko abaregeye indishyi bahita bayihabwa.

Majyambere avuga ko kuba urukiko rwanzuye ko bazahabwa indishyi ari intambwe ya mbere, igikurikiraho ari ukureba niba abaregwa bafite ibyo bishyura, bagatangira kuyitanga ku neza ariko byakwanga hakifashishwa imbaraga z’amategeko.

Yakomeje agira ati “Jyewe ntabwo mbazi ndetse nta n’ubwo mvugira Ubushinjacyaha, bushobora kuba bo bubazi ariko guhita bumenya ngo ‘bafite imitungo mu Rwanda cyangwa ntibayifite, na cyo ubanza atari icyo bwasubiza nonaha, wenda bisaba kubanza kujya kubimenya.”

Ni mu gihe Ubushinjacyaha bw’u Rwanda na bwo buvuga ko kumenya niba mu Rwanda hari imitungo ya Rusesabagina n’abo baregwa hamwe yakoreshwa mu kwishyura ibyangijwe na FLN, byabazwa abagize Urugaga rw’Abavoka bunganira abaregera indishyi.

Ni igikorwa cyamaze amasaha asaga atandatu, buri wese akaba yamenyeshejwe igihano yahawe n’urukiko.

Urukiko rwahanishije Rusesabagina Paul igifungo cy’imyaka 25 nyuma yo kumuhamya icyaha cyo kuba mu mutwe w’iterabwoba n’icyo gukora no kugira uruhare mu bikorwa by’iterabwoba, icyakora rukaba rutamuhamije icyaha cyo kurema umutwe w’ingabo mu buryo butemewe.

Paul Rusesabagina yakatiwe gufungwa imyaka 25

Urukiko rwahanishije Nsabimana Callixte igifungo cy’imyaka 20. Ni nyuma yo kumuhamya icyaha cyo kuba mu mutwe w’iterabwoba, gukora no kugira uruhare mu bikorwa by’iterabwoba, guhakana Jenoside, gupfobya Jenoside, n’icyaha cyo guhabwa ku bw’uburiganya cyangwa gukora no gukoresha inyandiko n’impapuro bitangwa n’inzego zabigenewe.

Nsabimana Callixte

Urukiko rwemeje ko Nizeyimana Marc ahamwa n’icyaha cyo kuba mu mutwe w’iterabwoba n’icyo gukora no kugira uruhare mu bikorwa by’iterabwoba rumuhanisha igifungo cy’imyaka 20.

Nizeyimana Marc

Urukiko rwahanishije Bizimana Cassien, Matakamba Jean Berchimans, Shabani Emmanuel, Ntibiramira Innocent, Byukusenge Jean Claude na Nsabimana Jean Damascene buri wese igifungo cy’imyaka 20.

Bose bahamijwe icyaha cyo kuba mu mutwe w’iterabwoba, gukora no kugira uruhare mu bikorwa by’iterabwoba, gukoresha mu buryo bunyuranyije n’amategeko ibintu biturika ahantu hakoreshwa na rubanda n’icyo kugambana no gushishikariza abandi gukora iterabwoba.

Urukiko rwemeje ko uwitwa Nikuzwe Simeon ahamwa n’icyaha cyo kuba mu mutwe w’iterabwoba, rumuhanisha igifungo cy’imyaka 10.

Ni mu gihe Nsanzubukire Felicien, Munyaneza Anastase na Hakizimana Theogene bahamwe n’icyaha cyo kuba mu ishyirahamwe ry’iterabwoba ariko ntibahamwa n’icyaha cy’iremwa ry’umutwe w’ingabo bitemewe.

Urukiko rwahanishije Nsanzubukire Felicien, Munyaneza Anastase na Hakizimana Theogene buri wese igifungo cy’imyaka itanu.

Ntabanganyimana Joseph, Nsengimana Herman, Iyamuremye Emmanuel, Niyirora Marcel, Kwitonda André, Nshimiyimana Emmanuel, Ndagijimana Jean-Chrétien (umuhungu wa Wilson Irategeka), na Mukandutiye Angelina (umugore rukumbi uri muri iri tsinda) bahamijwe icyaha cyo kuba mu mutwe w’iterabwoba.

Mukandutiye Angelina yashakaga abagore n’abakobwa bajya mu bikorwa bya gisirikare

Ndagijimana Jean-Chrétien avuga ko se yari umwe mu bayobozi ba MRCD-FLN, akaba yaramuhatiye kujya muri uwo mutwe w’abarwanyi

Urukiko rwahanishije Nsengimana Herman, Iyamuremye Emmanuel, Niyirora Marcel, Kwitonda André, na Mukandutiye Angelina, buri wese igifungo cy’imyaka itanu.

Urukiko rwahanishije Ntabanganyimana Joseph, Nshimiyimana Emmanuel, na Ndagijimana Jean-Chrétien buri wese igifungo cy’imyaka itatu.

Urukiko rwategetse abaregwa indishyi bose uretse Nsanzubukire Felicien na Munyaneza Anastase, gufatanya kwishyura:

Nsengimana Vincent indishyi zingana na Miliyoni 21 n’ibihumbi 500.
Havugimana Jean Marie Vianney ibihumbi 600.
Rugerinyange Dominique na Ntabareshya Dative buri wese miliyoni eshanu.
Habyarimana Jean Marie Vianney ibihumbi 300.
Ingabire Marie Chantal miliyoni 10.
Shumbusho Damascene ibihumbi 300.
Nsabimana Anastase ibihumbi 300.
Mukashyaka Josephine miliyoni 10.
Siborurema Venuste ibihumbi 300.
Ngendakumana David ibihumbi 300.

Urukiko rwabategetse kandi kwishyura:

Ndutiye Yussuf indishyi zingana na Miliyoni 7.
Omega Express Limited Miliyoni 164 n’ibihumbi 700.
Alpha Express Company Ltd Miliyoni 80 n’ibihumbi 100.
Rudahunga Ladislas Miliyoni 7 n’ibihumbi 390 n’amafaranga 200.
Kirenga Darius, Umulisa Adeline, Shumbusho David, na Rudahunga Dieudonné buri wese Miliyoni ebyiri.

Karegesa Phenias Miliyoni eshanu n’ibihumbi 500.
Nyirayumva Eliane Miliyoni 10 n’ibihumbi 500.
Ngirababyeyi Desiré Miliyoni ebyiri n’ibihumbi 500.
Habimana Zerot Miliyoni ebyiri n’ibihumbi 500.
Niyontegereje Azele miliyoni ebyiri.
Kayitesi Alice miliyoni ebyiri.
Nyirandibwami Marianne Miliyoni eshanu.
Uwambaje Francoise Miliyoni icumi.

Abana batanu ba Mukabahizi Hilarie buri wese Miliyoni eshanu.
Abavandimwe barindwi ba Mukabahizi Hilarie buri wese miliyoni ebyiri.
Nkurunziza Jean Nepomscene miliyoni eshatu.
Nsabimana Joseph Miliyoni eshatu.
Rutayisire Felix Miliyoni enye.
Mahoro Jean Damascene Miliyoni eshanu.
Nzeyimana Paulin miliyoni ebyiri.

Uwashaka kujurira ngo arabyemerewe mu gihe cy’iminsi 30 kuva igihe urubanza rwaciriwe.

Umva muri iyi video ibijyanye n’indishyi basabwe gutanga:

Isomwa ry’urubanza rwa Rusesabagina n’abo bareganwa rirakomeje

Urwo rubanza ruregwamo Paul Rusesabagina na bagenzi be Nsabimana Callixte, Nsengimana Herman n’abandi 17 bahoze muri FDLR, rurimo gusomwa kuri uyu wa Mbere tariki 20 Nzeri 2021.

Urukiko rwemeje ko umutwe wa FLN ushamikiye ku mpuzamashyaka MRCD yayoborwaga na Paul Rusesabagina, ari umutwe w’iterabwoba kandi ukaba ari wo wagabye ibitero mu turere twa Nyaruguru, Nyamagabe, Rusizi na Huye mu myaka ya 2018-2019.

Urukiko ruvuga ko muri iyo myaka ya 2018-2019, uwo mutwe wishe abantu icyenda ukomeretsa abandi, urasahahura, utwika inzu n’imodoka, ushimuta abantu harimo n’ababuriwe irengero.

Umucamanza, Beatrice Mukamurenzi wasomye ibyaha Rusesabagina na bagenzi be baregwa yagize ati "Hashingiwe ku biteganywa n’Ingingo ya 18 y’Itegeko ryo muri 2018, Urukiko rusanga Nsabimana Callixte na Rusesabagina Paul bagomba guhamwa n’icyaha cyo kuba mu mutwe w’Iterabwoba wa FLN".

Nsabimana Callixte kandi yahamijwe icyaha cyo gupfobya no guhakana Jenoside yakorewe Abatutsi mu 1994.

Urukiko rwakomeje ruvuga ko Nsabimana na Rusesabagina barabaye mu mutwe wa FLN babizi neza ko ukora iterabwoba, babishaka ndetse bakanigamba ibitero wagabye mu turere twa Nyaruguru Nyamagabe na Rusizi.

Urukiko rwavuze ko umuntu wese uhamwe n’icyaha cyo kuba mu mutwe w’iterabwoba, ahanishwa igifungo cy’imyaka kuva kuri 15 ariko itarenze 20.

Urukiko rukomeza ruhamya Paul Rusesabagina gutera inkunga uwo mutwe wa FLN, kikaba ari icyaha gihanishwa igifungo kirenze imyaka irindwi.

Abaregeye indishyi kubera ababo bishwe, bakomeretse ndetse n’imitungo yabo yangijwe ni abaturage 90.

Isomwa ry’urubanza rirakomeje...

Paul Rusesabagina wari umuyobozi w’umutwe MRCD/FLN, we na bagenzi be 20 bashinjwa ibyaha birimo kurema umutwe w’Ingabo utemewe, kuba mu mutwe w’iterabwoba, gutera inkunga iterabwoba, ubwicanyi nk’igikorwa cy’iterabwoba n’ibindi.

Ubushinjacyaha bwasabiye Paul Rusesabagina igihano cyo gufungwa burundu, hanyuma Nsabimana Callixte bumusabira igifungo cy’imyaka 25. Abandi na bo bagiye basabirwa ibihano birimo igifungo cya burundu no gufungwa imyaka 25.

Kigali Today yabateguriye icyegeranyo ku mavu n’amavuko y’uru rubanza.

Ibimenyetso bigaragaza ko Rusesabagina n’itsinda rye bashobora kuba barakoranaga bya hafi n’abanyamakuru b’ibitangazamakuru mpuzamahanga

Ibimenyetso Ubushinjacyaha bw’ u Rwanda bwabonye bubihawe n’abayobozi b’u Bubiligi binyuze mu bufatanye mu by’ubutabera, bigaragaza ko hari abanyamukuru b’ibinyamakuru bibiri bizwi, byakoranaga bya hafi na Rusesabagina n’abo bakoranaga, bahanahana amakuru hagati y’umwaka wa 2018 na 2019 mu gihe FLN yagabaga ibitero mu Rwanda.

Ubutumwa bwa WhatsApp bwagaragaye muri mudasobwa na telefoni bya Rusesabagina byabonywe n’Ubushinjacyaha bw’u Bubiligi igihe bwajyaga gusaka inzu ya Rusesabagina i Buruseli, bugaragaza ko hari abanyamakuru bamwe b’Ijwi rya Amerika (VOA) muri serivisi y’Ikinyarwanda na BBC Gahuzamiryango babanzaga guha Rusesabagina inkuru bateguye kugira ngo azemeze mbere y’uko bazitangaza.

Hari n’aho bigaragara ko hari abanyamakuru b’ibyo bitangazamakuru ndetse n’abayobozi babo (editors) bakoranaga cyane na Rusesabagina n’ikipe ye, cyane cyane mu bihe bishyira ifatwa ry’umuvugizi wa FLN Callixte Nsabimana, muri Mata 2019.

Mu nkuru yabanje, hagaragayemo uko Rusesabagina n’abandi banyamuryango ba MRCD bateguye umugambi wo kugereka ibitero bya FLN yagabye mu Majyepfo no mu Burengerazuba bw’u Rwanda, ku Ngabo z’u Rwanda, babifashijwemo n’uwari umujyanama wabo mu by’itumanaho icyo gihe witwaga Espérance Mukashema, wakoraga nk’umuhuza hagati y’izo Radio mpuzamahanga ebyiri.

Muri kimwe mu biganiro byabaye nyuma y’ifatwa rya Callixte Nsabimana, Rusesabagina (witwaga ‘Humura’ mu buryo bwo kujijisha) yaganiriye na Mukashema, Thomas Kamirindi na Etienne Karekezi bakorera Ijwi rya Amerika, biga uko bagomba gutangaza ibijyanye n’ifatwa ry’umuvugizi wa FLN Callixte Nsabimana, nyuma bemeranya ko babyita ‘gushimutwa’.

Muri icyo kiganiro kandi ngo hazamo undi muntu witwa Appolinaire Nsengiyumva, n’umunyamakuru wa BBC abagenzacyaha bemeje ko yari Ally Yussuf Mugenzi, aganira ku kiganiro Perezida Paul Kagame yari yagiranye n’abanyamakuru, kikavuga ku bibazo byo mu karere .

Ikiganiro kimwe cyo kuri whatsapp kigaragaza Rusesabagina aganira n’abagize MRCD hakagarukamo n’abanyamakuru b’ibitangazamakuru mpuzamahanga

Muri icyo kiganiro, bigaragara ko Karekezi wa Karekezi yoherereje ‘MRCD’ inkuru (audio) yari yakozwe n’umunyakuru witwa Eric Bagiruwubusa, kugira ‘MRCD’ iyemeze mbere y’uko itangazwa. Ndetse uwo Karekezi abihanangiriza kugira undi muntu uwo ari we wese utari muri iryo tsinda bayisangiza.

Muri icyo kiganiro, bigaragara ko Rusesabagina na bagenzi be, icyo gihe barimo bategura uburyo bwiza bwo gutangaza ibijyanye n’ifatwa rya Nsabimana Callixte ndetse akanazanwa mu Rwanda, bakabikora ku buryo bidahungabanya abagize FLN, nyuma bakanashyiraho Nsengimana Herman nk’umuvugizi mushya wa FLN .

“Mwaramutse , ndasaba Humura (Rusesabagina) inama, nibaba ngombwa abe ari we uvuga. Aho ndi ntabwo binyemerera kuvugira kuri Radio cyangwa gukora ku buryo bweruye ”. Ibyo ni ibyavuzwe na Nsengiyumva, iryo zina rikaba ryaravuzwe kenshi mu rubanza rwa FLN, abwira itsinda ryarimo Rusesabagina, ubwo butumwa bigaragara ko yabwohereje 05:52 ku itariki 20 Mata 2019.

Nsengiyumva wari uzwi ku izina rya ‘Pasteur’, ni umunyamuryango wa MRCD akaba n’umucuruzi icyo gihe wakoreraga muri Zambia, agatinya rero kuvugira kuri Radio nka BBC cyangwa se Ijwi rya Amerika kuko byari kumushyira mu bibazo n’ubuyobozi bw’igihugu kimucumbikiye.

Muri iki kiganiro, bigaragara nk’aho Karekezi w’Ijwi rya Amerika yasabaga ko inkuru ibanza gusuzumwa mbere y’uko itambutswa

Uwo Nsengiyumva yemeje ko yavuganye na Rusesabagina (Humura) kugira ngo ari abe ari we utanga ikiganiro ku Ijwi rya Amerika (VOA).

Yagize ati “Maze kumvikana na Humura, araza kuvugana na Espérance na BBC na Kamirindi” .

Mu bundi butumwa bwo ku itariki 2 Nyakanga 2019, ku isaha ya 16:38, Rusesabagina yavuganye na nomero ya telefoni Abagenzacyaha bemeje ko ari iya Ally Yussuf Mugenzi, imubwira ibyari byavugiwe mu kiganiro Perezida Kagame yari yagiranye n’itangazamakuru , avuga ko u Rwanda rwiteguye gufasha Guverinoma ya Repubulika Iharanira Demokarasi ya Congo (DRC) , mu bikorwa irimo byo kurwanya imitwe yitwaje intwaro mu Burasirazuba bw’icyo gihugu.

Muri icyo kiganiro, Karekezi wa Radio Ijwi rya Amerika yasangije inkuru y’amajwi (audio) n’intangiriro yayo (intro) yari yakozwe na Eric Bagiruwubusa ayiha umwe mu banyamuryango ba MRCD.

“Kuri uyu wa Kabiri, u Rwanda rwatangaje ko rwiteguye gufasha igihugu gituranyi cya Repubulika ya Demokarasi ya Kongo mu rugamba rwo kurwanya imitwe yitwaje intwaro iba ku butaka bwa Kongo. Mu kiganiro yagiranye n’abanyamakuru, Perezida Paul Kagame yavuze ko iyo mitwe itabangamira Congo gusa, ahubwo inabangamira ibihugu bituranyi n’abandi”. Ibyo ni byo byari muri iyo ntangiriro y’inkuru (intro) ya Eric Bagiruwubusa.

Mu kindi kiganiro bigaragara ko cyabaye tariki 30 Mata 2019, saa 14:38, Ally Yussuf Mugenzi yaganiriye na Rusesabagina ku bijyanye n’aho Nsabimana Callixte yaba aherereye, uyu akaba yarahoraga aha amakuru izi radio zombi yerekeranye n’umuvugizi wa FLN, dore ko byari bikomeje kuvugwa ko yaba yatawe muri yombi.

Rusesabagina ngo yaba yaravuganaga kenshi na Ally Yusuf Mugenzi wa BBC

Nk’uko bigaragazwa n’abagenzacyaha, ibimenyetso bigaragaza ko imikoranire yari hagati y’izo Radio mpuzamahanga zombi na MRCD/FLN yari irenze iyo ikinyamakuru cyagirana n’uwo gikuraho inkuru bisanzwe.

Biteganyijwe ko umwanzuro w’urubanza rwa Rusesabagina n’abandi 20 uzasomwa ku itariki 20 Nzeri 2021.

Ibimenyetso byerekana ko Rusesabagina, wagaragaye hano avugana n’umwunganizi we muri Werurwe 2021, yagize uruhare rukomeye mu bikorwa bya gisirikare bya FLN

FLN ni umutwe w’ingabo ushingiye ku ihuriro rya MRCD (Rwanda Movement for Democratic Change) ryayoborwaga na Rusesabagina. FLN ishinjwa kuba yarishe abantu bagera ku icyenda (9) abandi benshi bagakomereka mu turere twa Nyaruguru, Nyamagabe, Rusizi na Nyamasheke, ndetse ikahangiza ikanasahura imitungo ifite agaciro kabarirwa muri za miliyoni.

Rusesabagina yagaragaye muri za videwo no mu biganiro bitandukanye avuga ko atangije intambara kuri Guverinoma y’u Rwanda, ikindi kandi yavugaga ko ingabo za FLN zizaguma muri Nyungwe kugeza misiyo (mission) irangiye.

N’ubwo ibyo biganiro bikiri kuri interineti, harimo na kimwe kiri ku rubuga rwa Radio Ijwi rya Amerika mu Kinyarwanda (https://www.radiyoyacuvoa.com/a/4886849.html ), Rusesabagina n’abamushyigikiye bakomeje gutsimbarara bavuga ko uruhare rwa Rusesabagina rugarukira gusa mu bya ‘dipolomasi na Politiki’.

Gusa, ibimenyetso byaturutse mu madosiye Ubushinjacyaha bw’u Rwanda, bwabonye binyuze mu bufatanye mu buryo bw’ubutabera n’igihugu cy’u Bubiligi, byabonetse ubwo hasakwaga inzu ya Rusesabagina mu Bubiligi, bigaragaza uko Rusesabagina yagize uruhare mu gutegura, gutera inkunga no gushyira mu bikorwa ibitero byagabwe mu Rwanda.

Rusesabagina, nk’umuyobozi mukuru, yabonaga amakuru ya buri kanya y’uko ibikorwa bya gisirikare bya FLN birimo gukorwa.

Bumwe mu butumwa bwa WhatsApp KT Press dukesha iyi nkuru yabonye, bwemeza ko Rusesabagina yatanze amapeti anazamura mu ntera abarwanyi ba FLN.

Ubutumwa bumwe bagaragaramo uko Rusesabagina yazamuye mu ntera Nsengimana Herman, na we uri mu bakurikiranywe mu rubanza rwa FLN, amuha ipeti ryagombaga gutuma ashobora kuba umuvugizi wa FLN, kugira ngo asimbure Nsabinama Callixte, wari waramaze gufatwa icyo gihe ndetse yaranagejejwe mu Rwanda.

Muri ubu butumwa, Rusesabagina na Gen. Irategeka bajyaga inama ku kuzamura mu ntera Nsengimana, bavugana mu mvugo ijimije

Mu kiganiro cyabaye ku itariki ya 1 Gicurasi 2019, kigaragaza uko Rusesabagina yaganiriye na Gen. Wilson Irategeka (nitegekawil) kuri numero ya telefoni yo muri Repubulika Iharanira Demokarasi ya Congo, amubaza ipeti yumva bakwiye guha Nsengimana.

Nyuma Rusesabagina abitangiye uburenganzira, bemeranyjwe ko Herman Nsengimana yahabwa ipeti Nsabimana yari afite ariko bakuyeho rimwe , kuko Nsabimana Callixite yari afite ipeti rya ‘Major’ ubwo Herman Nsengimana yahise ahabwa ipeti rya ‘Captain’ hanyuma ahita agirwa umuvugizi wa FLN.

Itangazo ryasohotse ku itariki 5 Gicurasi 2019, ryasinywe na Rusesabagina, ryemezaga Nsengimana Herman nk’umuvugizi mushya wa FLN, rikuraho ibyari byabanje gutangazwa ko Capt. Nahimana Straton ari we muvugizi mushya.

Rusesabagina yagize ati “Capitaine Herman Nsengimana aje afite uburambe mu kazi gasanzwe ka Gisirikari, akaba kandi yarakoranye bya hafi na Major Callixte SANKARA, bityo tukaba tumuhaye izi nshingano tuzi neza ko azagera ikirenge mu cy’uwo asimbuye.”

Ibi Rusesabagina akaba yarabivuze, asaba abantu gushyigikira umuvugizi mushya ndetse no gusabira Nsabimana.

Iri ni itangazo ryashyizweho umukono na Rusesabagina ryavugaga ku ishyirwaho rya Herman Nsengimana nk’umuvugizi mushya wa FLN

Muri iryo tangazo, Rusesabagina yanavuze ko ngo barimo gukora ibyo bashobora byose kugira ngo batabare Nsabimana wari uzwiho kuvuga cyane, ndetse asaba abarwanyi kudacika intege no kuba yafashwe.

Nsabimana Callixte akaba yarakundaga kumvikana cyane cyane kuri Radio BBC n’Ijwi rya Amerika ashima ibikorwa by’abarwanyi ba FLN mu ishyamba rya Nyungwe no mu nkengero zaryo, agatanga n’ubutumwa buburira Guverinoma y’u Rwanda.

Rusesabagina ati “ Mu gihe cy’impinduramatwara nk’iki, byanze bikunze hagomba kubaho ibitambo, kandi ko amaraso y’ibyo bitambo ari kimwe mu bizatuma urugamba rwihutishwa.”

Uko amakuru y’urugamba yageraga kuri Rusesabagina

Nk’umuyobozi w’urugamba , Rusesabagina yakiraga raporo umunsi ku wundi zituruka kwa Gen. Irategeka na Gen. Antoine Jeva Alexis, bakurikiranaga ibikorwa bya FLN, bakoherereza Rusesabagina amakuru y’aho imirwano igeze, ibimaze kugerwaho, ibikenewe ndetse n’ibyo bateganya gukora mu minsi ikurikiraho.

Rusesabagina yanagize uruhare mu gukemura ibibazo byo kurwanira ubuyobozi byari hagati ya Gen. Irategeka na Gen. Jeva, byashingiraga ku micungire y’amafaranga yabaga yoherejwe na Rusesabagina.

Gen. Jeva ngo yajyaga arenga ku muyobozi we Gen. Irategeka, akavugana na Rusesabagina. Ibyo rero ngo ntibyashimishije Irategeka. Kuko Rusesabagina yari azi ko akeneye abo bagabo bombi, yakoze uko ashoboye kugira ngo bakomeze gukorana neza.

Mu biganiro n’inyandiko zitandukanye, hagaragaramo uko Gen Jeva yahoraga yoherereza Rusesabagina amakuru, by’umwihariko ayerekeye uko ibintu byabaga bimeze muri Repubulika Iharanira Demokarasi ya Congo.

Mu kiganiro bagiranye ku itariki 29 Mutarama 2019, Gen Jeva yabwiye Rusesabagina ko bahuye n’ikibazo cy’ingabo za Guverinoma ya Congo-Kinshasa (FARDC) n’indi mitwe y’abarwanyi nka Mai Mai NDC na Nyatura, ikorana na Kigali.

Gen. Jeva yabwiye Rusesabagina ku mirwano yabereye mu duce dutandukanye aho muri Congo-Kinshasa, harimo ahitwa Masisi na Gatare, aho ngo bishe abasirikare 8 ba Guverinoma ya Congo. Jeva yabwiye Rusesabagina ko bavuye mu birindiro byabo aho bari bafite imyaka bahinze, bakaba ngo batangiye kugira ikibazo cy’ibiribwa.

Rusesabagina yijeje abarwanyi, ko barimo gukora uko bashoboye kose, kugira ngo baboherereze ubufasha.

Paul Rusesabagina wari uyoboye ihuriro MRCD, Innocent Twagiramungu, umujyanama mu by’amategeko wa MRCD na Mukashema Espérance wari uyoboye Radio Ubumwe bifashishaga, banogeje umugambi wo kwitirira Guverinoma y’u Rwanda ibitero byo muri Nyungwe

Gusa, ubu birazwi ko Rusesabagina n’abagize impuzamashyaka MRCD, bateguye ndetse bakomeza kwitirira Guverinoma y’u Rwanda, ibitero byagabwe muri Nyungwe, bigabwe n’umutwe wa FLN (National Liberation Front).

Ibijyanye n’uwo mugambi wihishe wo kwegeka ibitero byo muri Nyungwe kuri Guverinoma y’u Rwanda, ku buryo burambuye byagaragariye mu rubanza, Ubushinjacyaha bw’u Rwanda, bukaba bwarabibonye binyuze mu bufatanye mu buryo bw’ubutabera n’igihugu cy’u Bubiligi , nka kimwe mu bigize iperereza ku bijyanye n’ibitero by’iterabwoba byo mu 2018-2019.

Ikinyamakuru KT Press cyabonye bimwe mu bimenyetso byaturutse muri za mudasobwa na telefoni zafatiwe mu nzu ya Rusesabagina mu Bubiligi, bikozwe n’abayobozi bo mu Bubiligi , Ubushinjacyaha bw’u Rwanda bukaba bwarahawe kopi.

Rusesabagina, inshuro nyinshi yagiye agerageza kwitandukanya n’ibikorwa bya FLN uko yitabaga urukiko, ariko ibimenyetso bigaragaza ko ahubwo yabigizemo uruhare rukomeye, harimo no kwifatanya n’ ubuyobozi bwa MRCD mu kwitirira Guverinoma y’u Rwanda ibitero byishe abantu muri Nyungwe .

Mu butumwa bwa Whatsapp KT Press yabonye, bwerekana ko Rusesabagina yakiraga umunsi ku wundi ubutumwa bujyanye n’imigendekere y’ibitero bya FLN agatanga n’inama y’uko bakora.

Mu kiganiro kuri whatsapp cyo ku itariki 17 Ukuboza 2018, Rusesabagina aganira n’uwitwa Twagiramungu Innocent, umujyanama mu mategeko wa MRCD , bavuganye uko bakwiye gutangaza ibijyanye n’ibitero bya Kitabi, barandika bati : “Amakuru mbonye mu kanya ava ku cyitabi ni uko haguye kandi hakomerekeye abantu benshi! Imodoka zarashwe ngo ni bus nini 3 zitwara abantu ku buryo abapfuye n’abakomeretse ari benshi! Umwuka ntumeze neza abantu bahahamutse !!!”

Bakomeje baganira bati “Hari abavuga ngo hatangwe itangazo kuri Radio cyangwa hagire igikorwa ku bya Kitabi.”

“Njyewe navuga ko twabyitwaramo ku buryo bubiri , uburyo bwa mbere ni uguceceka tukareka abahinzi (abarwanyi) bagakomeza ibikorwa byabo, tukajya tugira icyo tuvuga ari uko abibasiwe ari abasirikare cyangwa abapolisi, cyangwa ibindi bikorwa bitaguyemo abasivili. ”

“Uburyo bwa kabiri, mu gihe hari igikorwa cyaguyemo abasivili, dushobora no gukora itangazo (communiqué) tukavuga ko ari DMI (rwahoze ari Urwego rw’Ubutasi bwa Gisirikare) yabikoze ngo ibitwitirire.”

Rusesabagina na Innocent Twagiramungu bemeranyijwe kuri ubwo buryo bwa kabiri, ndetse bagerageza no gukwirakwiza ayo makuru atari yo (propaganda), cyane cyane babinyujije ku maradio mpuzamahanga.

Uko Mukashema Espérance yinjiyemo

Muri icyo kiganiro, Rusesabagina na Twagiramungu bemerenyijwe kugisha inama Espérance Mukashema, icyo gihe wari umuyobozi wa radio ‘Ubumwe’ bifashishaga mu bukangurambaga ndetse ikaba yaraterwaga inkunga na Rusesabagina, bakamubaza uburyo bwiza bakoresha kugira ngo bagere ku mugambi wabo neza.

Muri icyo kiganiro, Rusesabagina yagaragaye asaba numero ya telefoni nshya ya Mukashema, Twagiramungu arayimuha.

Mukashema Espérance, ni izina ryavuzwe kenshi mu rukiko mu gihe cyo kuburanisha Rusesabagina, aho ngo yemeje ko igitekerezo cyo kubishyira kuri Guverinoma y’u Rwanda ari cyo cyagira ingufu cyane.

Icyo gihe Mukashema, ngo yavuze umuntu yumva wafasha mu gukwiza iyo nkuru ndetse aniyemeza gushaka umuntu ubishoboye.

Mukashema, wapfuye muri Nyakanga aguye mu Buholandi, yatanze inama y’uko bakwifashisha ibiganiro bya BBC n’Ijwi rya Amerika (VOA) byo mu Kinyarwanda bikajya bibatangariza inkuru.

Rusesabagina ukurikiranyweho ibyaha bigera ku icyenda bifite aho bihuriye n’ibitero FLN yagabye mu Majyepfo no mu Burengerazuba bw’u Rwanda hagati y’ukwezi kwa Kamena 2018 na Mata 2019, yikuye mu rubanza muri Werurwe uyu mwaka wa 2021. Birashoboka ko yaba yaratinye ko ibimenyetso byari byabonetse biturutse mu Bubiligi bimuhamya ibyaha ashinjwa birimo n’ibyo kwica abantu.

Urubanza rwakomeje rurimo abantu b’ingenzi bo muri FLN, harimo n’abari abavugizi bayo babiri, Callixte Nsabimana na Herman Nsengimana, bo mu buhamya bwabo bakaba baragaragaje uburyo Rusesabagina yari afite ingufu mu bikorwa by’itsinda ryabo.

KT Press ivuga ko inkuru zizakurikira iyi zizaba zigaragaza uburyo ibitangazamakuru bikomeye byifashishijwe mu gusakaza izo nkuru z’impimbano zigereka ibyo bitero kuri Guverinoma y’u Rwanda.

Biteganyijwe ko umwanzuro w’urukiko ku rubanza rwa Rusesabagina na bagenzi be uzasomwa ku itariki 20 Nzeri 2021.

Yabitangaje ku wa Kane tariki 15 Nyakanga 2021, ubwo yasabwaga n’Urukiko rukuru urugereko ruburanisha ibyaha mpuzamahanga n’ibyambukiranya imipaka, ku cyo avuga ku bihano yasabiwe n’ubushinjacyaha.

Nikuzwe agitangira kwisobanura yabwiye urukiko ko umwunganizi we mu mategeko atakimukeneye mu rubanza rwe kuko ngo yifuza ko azajya akurikiza ibyo avuga nyamara ngo yakagendeye ku byo yamusobanuriye kuko ko ari we uregwa.

Ikindi ngo ni uko yashatse kumwemeza ko yabaye muri MRCD-FLN kuko ngo yafatanywe gerenade gusa.

Ati “Ubwo rero ashaka kunyemeza iby’uwo mutwe ubwo yagaragaza ibyo ashingiraho keretse niba twarajyanye aho ukorera, tukajyanayo twembi, tukagirana ibiganiro nkemera amasezerano yanditse agasinyaho barangiza bakamuha inzoga z’abagabo, ibi rero bitumye ntamukeneye mu rubanza rwanjye”.

Nikuzwe Simeon kandi yasabye urukiko gutesha agaciro inyandiko umwunganizi we yakoze ndetse n’imvugo ze zose ku bwe ndetse arusaba guha agaciro umwanzuro yikoreye ubwe akawushyira muri sisiteme.

Yanahakaniye urukiko ko umwunganizi we mu mategeko atigeze amuha umwanya ngo babiganireho bafatire umwanzuro hamwe.

Yavuze ko yamugaragarije uruhare yagize mu gukora icyaha cy’iterabwoba nyamara ngo umwunganizi we akamuhatira kwemera icyaha cyo kuba mu mutwe w’iterabwoba aregwa rukumbi.

Yavuze ko n’ubwo yafatanywe gerenade ebyiri bitavuze ko yabaye mu mutwe w’iterabwoba kuko ngo ntacyo yazikoresheje byongeye abazimuhaye ngo ntibigeze bamukangurira kujya muri uwo mutwe dore ko we ahubwo ngo yari azi ko ari abantu ku giti cyabo agiye gukorana nabo.

Abajijwe niba yakwirengera ingaruka zo kuburana nta mwunganizi afite, Nikuzwe yavuze ko aho urubanza rugeze bitakiri ngombwa gushaka umwunganira wundi.

Yagize ati “Aho urubanza rugeze ntabwo nasubira inyuma ngo mvuge ngo ndacyashaka undi Avoka, oya, ndasobanura uko imbaraga zanjye zingana ibyo nzi n’ibyo nakoze, ahasigaye mu bushishozi bw’urukiko, ni rwo ruzahuza ibyo mvuga n’amategeko”.

Umwunganizi we mu mategeko, Me Gidon, yavuze ko ibyo avuga byose amubeshyera kuko uretse we abandi batatu afatanyije kunganira ari we umufiteho ikibazo wenyine.

Ati “Naramubwiye ngo bibaye byiza yakwemera icyaha kuko harimo inyungu zo kugabanyirizwa igihano ariko sinamubwiye ngo yibeshyere ibyo atakoze”.

Yongeraho ko kuba umukiriya we atakimushaka mu rubanza rwe ari uburenganzira bwe.

Ku bijyanye n’indishyi, Nikuzwe Simeon avuga ko icyaha ari gatozi bityo harebwa igihe yafatiye gerenade n’igihe ibitero byagabiwe kuko we yari atarabonana n’abazimuhaye.

Ku gihano cy’imyaka 20 yasabiwe n’ubushinjacyaha, Nikuzwe Simeon yavuze ko mu guhabwa igihano urukiko rwazabanza kureba icyo gerenade yahawe zakoze.

Ikindi ni uko yorohereje inzego z’umutekano agatanga amakuru yatumye abagaba ibitero muri Rusizi bafatwa ndetse n’uburyo yitwaye haba mu bugenzacyaha, mu bushinjacyaha ndetse no mu rukiko, kuko ataruhanyije bityo akagabanyirizwa ibihano kugera ku cyo hasi ndetse kikanasubikwa agasubira mu muryango nyarwanda.

Nikuzwe Simeon aregwa icyaha kimwe, ari cyo cyo kuba mu mutwe w’iterabwoba.

Yabitangaje kuri uyu wa Gatatu tariki ya 23 Kamena 2021, ubwo yisobanuraga ku byaha aregwa n’ubushinjacyaha ndetse no ku bihano yasabiwe.

Nsabimana Callixte ashinjwa ibyaha 12, akaba mu kuburana kwe yarabyemeye byose ndetse abisabira imbabazi.

Mu gusabirwa ibihano ubushinjacyaha bwahaye ishingiro ukwemera kwe ndetse busaba urukiko kuzamugabanyiriza ibihano agahanishwa imyaka 25 y’igifungo aho kuba burundu.

Mu kwisobanura kuri ibyo byaha, Nsabimana Callixte yavuze ku byaha bibiri atemeranyaho n’ubushinjacyaha ku cyo kurema umutwe w’iterabwoba aho avuga ko yawusanzeho ahubwo akawujyamo.

Ikindi ni icyaha cy’iterabwoba ku nyungu za Politiki aho yavuze ko we atari agamije kugirira nabi abaturage, ahubwo amakosa yakozwe n’abasirikare yari ashinzwe ari na yo mamvu yemera kuryoza ibyaha bakoze.

Ati “Nagerageje kuba umunyakuri ngaragaza uruhare rwanjye mu bikorwa twakoze ndetse n’urwo abo bakoranaga kandi nemera kuryozwa ibyaha byakozwe n’abasirikare ba FLN, mu gihe amategeko ariko abiteganya, ibyanjye nakoze ku giti cyanjye byo nemera kubiryozwa ijana ku ijana”.

Avuga ko ubushinjacyaha bwahinduye inyito bukamukurikiranaho ibyaha nka gatozi, aho kuba umufatanyacyaha ntacyo yabivugaho ahubwo yizeye urukiko.

Yashimiye urukiko ko rwubahirije uburenganzira bwe bwo kwiregura mu rubanza bityo atanashidikanya ko azahabwa ubutabera buboneye.

Yagize “Nyakubahwa Perezida namwe bacamanza, jye nagira ngo mbashimire kuko mwubahirije uburenganzira bwanjye bwo kwiregura muri uru rubanza, ni nayo mpamvu ntafite gushidikanya ko nzahabwa ubutabera kuko kuva urubanza rwatangira mu 2019 kugeza uyu munsi mwagaragaje kutabogama".

Nsabimana Callixte avuga ko uko yatezwe amatwi, ibibazo yabajijwe, ibyabajijwe ubushinjacyaha bigaragaza ko bazahabwa ubutabera.

Yashimiye kandi ubuyobozi bwa RCS kuko bwubahirije uburenganzira bwe ku buryo nta bwahungabanye.

Yasabye urukiko kuzamugabanyiriza ibihano hakurikijwe ukuri yagaragaje imbere y’ubugenzacyaha no mu rukiko.

Nsabimana Callixte yavuze ko imyaka ibiri amaze muri gereza ngo yatumye yongera gutekereza ku bubi bw’ibyaha yishoyemo bityo asaba imbabazi Umukuru w’igihugu, Abanyarwanda muri rusange, abagizweho ingaruka n’ibitero bya FLN n’urukiko kuzahabwa imbabazi kuko yiteguye guhinduka.

Ati “Nk’umuntu uhagaze imbere y’ubucamanza nzi ko ari mwe mumfiteho ububasha, ahazaza hanjye mpashyize mu biganza byanyu nk’abacamanza. Ku bw’amateka y’iki gihugu cyacu nemera ko aho kigeze ishingiro ryacyo ari imbabazi”.
Akomeza agira ati “Iyo bitaba ibyo ntituba tugeze aho tugeze, amasomo jye nigiyemo ni uko nta muntu utahinduka. Hari abantu benshi bakoze ibikorwa bigayitse bigize icyaha, baza kubabarirwa bagira uruhare mu kubaka igihugu cyacu, mu bushishozi bwanyu nanjye ndifuza guhabwa ayo mahirwe mu gihe gikwiye”.

Nsabimana Callixte avuga ko ibyabaye byabaye ariko hari ibyiringiro byo gukora ibyiza kuko bishoboka guhindura ibyabaye, ari ko bishoboka guhindura ibiri imbere.

Umwunganira mu mategeko, Me Moise yasabye urukiko kuzasuzuma ubwiregure bw’umukiriya we ko imbabazi ze zifite ishingiro maze agahanwa hakurikijwe itegeko ryo mu mwaka wa 2012 aho kuba irya 2018, kuko ritamuha ibihano byoroheje. Ikindi ngo ni uko yahanwa nk’umufatanyacyaha aho kuba gatozi.

Na ho kubireba indishyi akaba yavuze ko abafite ibimenyetso bigaragaza ko imitungo yabo yangijwe n’abarwanyi ba FLN, abazahamwa n’ibyaha bazafatanya kuyishyura ariko na none idafitiwe ibimenyetso bidakwiye kuzahabwa agaciro.

Nsabimana Callixte wiyise Sankara

Yabitangaje kuri uyu wa Gatatu tariki ya 23 Kamena 2021, ubwo yisobanuraga ku bihano yasabiwe n’ubushinjacyaha ku byaha aregwa.

Nsabimana Callixte yahakanye icyaha cyo kurema umutwe w’iterabwoba wa FLN, kuko yawuhasanze ahubwo yemera ko yagiye mu mutwe w’iterabwoba wa FLN.

Ati "FLN yashinzwe tariki 10 Kamena 2016 ari umutwe w’ingabo za CNLD, yaje kuba umutwe w’ingabo z’impuzamashyaka MRCD tariki ya 04 Nyakanga 2017".

Nsabimana Callixte avuga ko atari mu bashinze FLN ahubwo we yabaye umuvugizi wayo.

Ibisobanuro bye akaba yabishingiye ku mvugo za bamwe mu baregwa muri urwo rubanza ndetse n’iz’ubushinjacyaha ku bandi bareganwa mu rubanza.

Yakomeje avuga ko n’ubwo FLN zari ingabo za MRCD, ariko amabwiriza yose yatangwaga na CNLD ari yo yari nyiri ingabo.

Agira ati "Tuganira ku meza dushyiraho MRCD, CNLD yazanye ingabo ari zo FLN iba ari na yo ikomeza gutanga amabwiriza. Abandi twari dufite ibindi tuzana bijyanye na Politiki".

Nsabimana Callixte avuga ko yageze mu mpuzamashyaka MRCD, abarwanyi ba FLN baramaze kugera mu Burundi zije mu bitero i Nyaruguru.

Avuga ko atiyumvisha ukuntu ari we na Rusesabagina baregwa kurema umutwe w’iterabwoba wa FLN nyamara hari abawushinze.

Ati "Kuki ari jye na Rusesabagina turegwa kurema FLN nyamara hari abasirikare barenga 80 bitandukanyije na FDLR-FOCA, bagashinga CNLD ifite umutwe w’ingabo wa FLN, ari na bo bayoboraga uwo mutwe?"

Nyamara mu iburanisha ryo ku wa 23 Gicurasi 2019, Nsabimana yari yemeye ibyaha byose aregwa uko byari 16.

Bwabimusabiye kuri uyu wa 17 Kamena 2021, ubwo Urukiko rukuru urugero ruburanisha ibyaha mpuzamahanga n’ibyambukiranya imipaka, rwumvaga ubushinjacyaha ku bihano busabira abaregwa mu rubanza ruregwamo Paul Rusesabagina na bagenzi be.

Bizimana Cassien aregwa ibyaha bitandatu birimo kuba mu mutwe w’iterabwoba, ubwinjiracyaha bw’ubwicanyi, kugambana no gushishikariza abandi gukora iterabwoba.

Mu kwiregura kwe kwababye ku wa 06 Gicurasi 2021, Bizimana Cassien yemeye ibikorwa bigize ibyaha byose aregwa ariko akavuga ko yabikoze yubahiriza amabwiriza y’abayobozi be ba MRCD-FLN.

Ikindi ni uko yasabaga ko hakubahirizwa amasezerano ya Lusaka na Nairobi akajyanwa mu kigo cya Mutobo na we agasubizwa mu buzima busanzwe nk’uko bikorerwa abandi bari abarwanyi mu mitwe yitwaje intwaro.

Ubushinjacyaha buvuga ko ubwiregure bwe butahabwa agaciro kuko amabwiriza yubahirizaga yayahabwaga n’umuyobozi utemewe.

Na ho kuba hakubahirizwa amasezerano u Rwanda rwasinyinye agamije gusubiza mu buzima busanzwe abari abarwanyi mu mitwe yitwara gisirikare, Ubushinjacyaha buvuga ko ibyo bitamubuza gukurikiranwa kuko igihe yabimenyeye atashyize intwaro hasi ngo atahuke.

Ikindi ni uko ngo gutanga imbabazi kuri abo barwanyi biri mu nyungu z’igihugu ariko atari itegeko ko buri wese ababarirwa kandi afite ibyaha akurikiranyweho.

Ubushinjacyaha bwasabye urukiko kwemeza ko Bizimana Cassien ahamwa n’ibyaha byose akurikiranyweho.
Bwasabye urukiko gushingira ku bisobanuro byatanzwe n’ubushinjacyaha maze rukemeza ko Bizimana Cassien yemera ibikorwa bigize ibyaha gusa, ariko atemera uburyozwa cyaha bwabyo bityo ko ukwemera kwe kutuzuye, kandi ibikorwa akurikiranyweho bikaba bigize icyaha cy’ubugome bityo akaba atagabanyirizwa ibihano.

Hashingiwe ku ngingo ya 61, igika cya 3, agace ka mbere n’aka kabiri z’itegeko no 68/2018 ryo kuwa 30/08/2018, riteganya ibyaha n’ibihano muri rusange, iteganya ko impurirane mpuzamugambi ibaho, iyo igikorwa kimwe ubwacyo gikubiyemo ibyaha byinshi, cyangwa iyo ibikorwa bitandukanye, bigize ubwabyo ibyaha bitandukanye, n’uko bihujwe bigamije umugambi w’icyaha kimwe cyangwa igikorwa kimwe, Ubushinjacyaha busanga ibyaha Bizimana Cassien akurikiranyweho bigize impurirane mbonezamugambi kubera ko ari ibyaha bitandukanye, bihujwe n’uko bigamije umugambi w’icyaha kimwe.

Bityo hashingiwe ku ngingo ya 62, igika cya kabiri cy’iryo tegeko, ubushinjacyaha bukaba bumusabiye igihano ntarengwa cyo hejuru giteganyijwe ku cyaha kirusha ibindi gukomera aricyo igihano cy’igifungo cy’imyaka 25.

Nsengimana Herman

Nsengimana ni uwasimbuye Callixte Nsabimana wiyita Sankara ku buvugizi bw’umutwe witwaza intwaro urwanya Leta y’u Rwanda wa MRCD-FLN, kugeza afashwe.

Uwo mugabo aregwa ibyaha bibiri, ari byo gutorerwa kujya mu mutwe w’iterabwoba no kuba mu mutwe w’iterabwoba.

Yiregura kuri ibi byaha muu rubanza rwo ku wa 29 Mata 2021, Nsengimana Herman yemeye ibikorwa bigize icyaha ariko ahakana ibyaha.

Ubushinjacyaha bwagaragarije urukiko rukuru urugereko ruburanisha ibyaha mpuzamahanga n’ibyambukiranya imipaka ko Nsengimana Herman yari yaremeye ibyaha aregwa mu Bugenzacyaha, mu Bushinjacyaha ndetse no mu rukiko ku ifunga n’ifungurwa ry’agateganyo.

Ubushinjacyaha bwasabye urukiko kwemeza ko Nsengimana Herman ahamwa n’icyaha cyo gutorerwa kuba mu mutwe w’iterabwoba agahanisha igifungo cy’imyaka 10.

Bwasabye kandi ko rumuhamya icyaha cyo kuba mu mutwe w’iterabwoba agahanishwa igifungo cy’imyaka 20.

Ubushinjacyaha bwasabye kandi urukiko gusuzuma ubwiregure bwe maze rukemeza ko atemeye ibyaha bityo ntazagabanyirizwe ibihano.

Kubera impurirane y’ibyaha bigamije icyaha by’iterabwoba, ubushinjacyaha bwasabye urukiko ko Nsengimana Herman yahabwa igihano kiremereye, maze agahanishwa igifungo cy’imyaka 20.

Nyirayumve wapfakajwe n’ibitero bya FLN

Yabitangaje kuri uyu wa 16 Kamena 2021, ubwo yasobanuriraga Urukiko rukukuru urugereko ruburanisha ibyaha mpuzamahanga n’ibyambukiranya imipaka mu rubanza ruregwamo Paul Rusesabagina na bagenzi be, ibyamubayeho ndetse n’ibijyanye n’indishyi y’akababaro yatswe n’umuhagarariye mu rukiko.

Nyirayumve wo mu Karere ka Nyamasheke, Umurenge wa Karengera, yabwiye urukiko ko umugabo we yishwe n’ibitero bya FLN, ubwo ari atashye iwe aturutse mu Bugesera aho yari acumbitse dore ko ngo yakoreraga ubucuruzi bw’imbaho mu mujyi wa Kigali.

Yavuze ko umugabo we Nteziryayo Samuel, yamusigiye abana bane ndetse n’inda y’amezi atatu, ubu akaba arera wenyine abana batanu.

Yavuze ko kubarera wenyine bimugora byongeye ngo umugabo we akaba yarishwe arimo kuvugurura inzu batuyemo, na yo ikaba yarahagarariye aho.

Ati “Nkaba rero mpagaze imbere y’urukiko nsaba ubutabera ko bwahatubera abana bagakurikiranwa bakiga. Ikindi nongeraho yantanye umushinga utoroshye wo guhindura ubuturo (inzu), ahantu nari ndi yendaga gusanura, nkaba nasaba ko n’icyo na cyo mwamfasha nkaba nava mu bwigunge bw’uko uwo mushinga na wo wahagaze”.

Iyamuremye Emmanuel yemera ko yabaye mu mitwe y’iterabwoba ariko yafashwe agiye kuyisohokamo

Iyamuremye aregwa icyaha cyo kujya mu mitwe y’iterabwoba no kuba mu mitwe y’iterabwoba, ibyaha yemera byombi.

Yemereye urukiko ko yahunze mu Rwanda mu mwaka wa 1994 ari umusivili, ajya mu nkambi ya Kashusha ahava 1996 ahungira muri Congo Brazaville.

Aha na ho ngo yahavuye mu mwaka wa 1998 nyuma yo gushishikarizwa kujya mu gisirikare cya Congo-Kinshasa n’abahoze muri Ex-FAR.

Yabwiye Urukiko rukuru urugereko ruburanisha ibyaha mpuzamahanga n’ibyambukiranya ko yabaye mu ngabo za FAC azivamo mu mwaka wa 2002, abanyamahanga birukanywe mu ngabo z’icyo gihugu.

Mu mwaka wa 2003 ngo yinjiye mu ngabo za FOCA z’umutwe wa FDLR azivamo mu mwaka wa 2016, ajyana na Gen Wilson Irategeka mu mutwe wa CNLD. Avuga ko yawubayemo kugeza igihe habaho impuzamashyaka ya MRCD-FLN.

Muri Werurwe 2019 ngo yasabwe na Gen Jevah kuyobora ingabo ziza mu bitero mu Rwanda arabyanga bitewe n’impungenge z’ibikorwa boherezwagamo.

Avuga ko abayobozi be batangiye kutamwemera ndetse ngo hatangira no kumvikana amakuru agamije kumugirira nabi.

Yavuze ko yabwiye umugore we wari i Bujumbura mu Burundi kwandikira abayobozi be ko umuryango we urwaye bityo akenewe kugira ngo awiteho.

Ati "Naranze, uwari unyungirije Majoro Appolinaire yemera kuzana abasirikare. Bahise bandeba nabi mpitamo guhunga ariko nkoresheje umugore wanjye kugira ngo ngende mu buryo batamenya ko mbacitse".

Inzandiko z’umugore we ngo zatumye ahabwa uruhushya, ku wa 25 Nyakanga 2019 ava i Karehe yerekeza i Bukavu, akomereza Uvira kwaka ibyangombwa bimujyana mu Burundi.

Ari ku rwego rw’abinjira n’abasohoka ku wa 30 Nyakanga 2019, yarafashwe ndetse ku wa 03 Kanama 2019 agezwa mu Rwanda.

Iyamuremye avuga ko adahakana ibyaha ashinjwa kuko yabaye muri iyo mitwe ndetse akabisabira imbabazi.

Yagize ati “Jye nafashwe nshaka kujya mu Burundi ariko ntazagaruka muri FLN. Nafashwe umugambi wanjye utagezweho. Ndabasaba imbabazi ku gihe namaze cyose muri iyo mitwe, nkasaba imbabazi Perezida wa Repubulika n’Abanyarwanda bose”.

Iyamuremye ariko yahakanye ko yabaye muri FLN azi ko ari umutwe w’ingabo utemewe kuko ngo iyo aza kubimenya aba atawuratinzemo.

Icyakora yemereye Urukiko ko yari abizi ko MRCD-FLN yari iyobowe na Paul Rusesabagina.

Munyaneza Anastase ureganwa na Rusesabagina

Munyaneza Anastase aregwa ibyaha bibiri ari byo kwinjira mu mutwe w’Ingabo utemewe no kujya mu ishyirahamwe ry’imitwe y’iterabwoba.

Akigera imbere y’urukiko, Munyaneza Anastase, yabanje kurusaba kwiregura yicaye kuko ngo atahagarara igihe kirekire ndetse aranabyemerwa, yiregura yicaye.

Munyaneza Anastase yemeye icyaha cyo kujya mu mitwe y’iterabwoba, aho yasobanuye ko yavuye mu Rwanda ari umusirikare wa Ex-FAR afite ipeti rya Sous-Lieutenant ahungira i Goma ahava ajya muri Centre Africa mu 1999, agarurwa muri Congo ku bwumvikane bwa Leta ya Congo na HCR ahita yinjira mu gisirikare cya Congo kugeza muri 2002 birukanwamo.

Mu mwaka wa 2003 yabaye muri FDLR-FOCA ashingwa imirimo itandukanye kugeza ku wa 31 Gicurasi 2016, FDLR icikamo ibice bibiri akajya ku ruhande rwa Gen Wilson Irategeka muri CNLD. Avuga ko ku wa 10 Gashyantare 2017, yafashwe n’Ingabo za Congo.

Icyakora yahakanye ko yabaye muri FLN kuko yashinzwe mu mwaka wa 2018 yaramaze gufatwa.

N’ubwo yemera icyo cyaha ariko yabwiye urukiko ko adakwiye kugirikiranwaho kuko ahubwo yakabaye anyuzwa mu kigo cyakira abahoze ari abarwanyi muri Congo, na we agasubizwa mu buzima busanzwe.

Ibyo akaba yabishingiye ku masezerano anyuranye hagati ya Leta y’u Rwanda na Congo ndetse n’iteka rya Minisitiri n’Itegeko Nshinga bigamije kwambura intwaro abari abarwanyi muri Congo batakoze ibyaha by’intambara, ibyibasiye inyoko-muntu ndetse n’ibya Jenoside.

Munyaneza Anastase yahakanye icyaha cyo kuba mu ishyirahamwe ry’imitwe y’iterabwoba kuko yafashwe atakiri muri FDLR-FOCA, ahubwo yayivuyemo kubera kutemeranya n’imigambi yayo.

Ku wa 24 Werurwe 2021, nibwo Ubushinjacyaha bwatangiye gushinja buri wese ibyaha aregwa n’uburyo byakozwe haherewe kuri Paul Rusesabagina, humvwa abatangabuhamya barimo Prof. Michelle ndetse na Habiyaremye Noel.

N’ubwo haherewe kuri Paul Rusesabagina, umuyobozi w’ishyaka MRCD-FLN, wahurijwemo imitwe ya CLND-Ubwiyunge wa Gen Wilson Irategeka, RLM wa Callixte Sankara ndetse na PDR-Ihumure ya Rusesabagina, ntiyitabiriye iburanisha kuko yikuye mu rubanza avuga ko atiteze ubutabera mu gihe adahawe amezi atandatu yo gutegura urubanza.

Abo batangabuhamya bagaragarije urukiko uko Rusesabagina yari afite umugambi wo kugirira nabi Abanyarwanda akora ibikorwa by’iterabwoba ku nkunga yahabwaga mu bikorwa by’umuryango Hotel Rwanda Rusesabagina Foundation, yabeshyaga ko ukora ibyo gufasha abatishoboye cyane abacitse ku icumu.

Nyamara ngo izo nkunga iyo yazibonaga yazifashishaga mu gushakisha uko yabona abasirikare bazamufasha guhungabanya umudendezo w’Abanyarwanda.

Aha ngo ni ho yahuriye na Gen Wilson Irategeka ndetse na Nsabimana Callixte bashinga MRCD-FLN, Rusesabagina aba umuyobozi w’uwo mutwe ndetse n’umuterankunga nk’uko byagaragajwe mu buhamya bw’abatangabuhamya kimwe n’abo bareganwa.

Nsabimana Callixte wamaze kwiregura yabwiye urukiko ko bari bafite umugambi wo guhirika ubutegetsi kandi ko Paul Rusesabagina ari we wagombaga kuba umukuru w’Igihugu. Nsabimana yanavuze ko na we ubwe amafaranga bifashishaga yatangwaga na Paul Rusesabagina.

Ubushinjacyaha bwagaragarije urukiko ko ibitero by’umutwe utemewe wa MRCD-FLN byahitanye ubuzima bw’abaturage mu turere twa Nyaruguru i Nyabimata, Nyamagabe i Kitabi na Rusizi ndetse hangizwa imitungo y’abaturage.

Abaregwa cyane mu bitero mu Karere ka Rusizi, harimo harajyamo Nsabimana Jean damascene bita Motari na Mukandutiye Angelina wari komiseri w’iterambere ry’umuryango by’umwihariko abari n’abategarugori.

Hari kandi Bizimana Cassien Passy wayoboye ibitero mu Karere ka Rusizi, Matakamba Jean Berchmas, Shabani Emmanuel, Ntibiramira Innocent, Byukusenge Jean Claude, Nikuzwe Simeon na Ntabanganyimana Joseph alias Combe Barama Matata.

Ubushinjacyaha bwagaragarije urukiko Ntabanganyimana Joseph wari umushoferi w’imodoka itwara amabuye yubakishwa inzu, imicanga n’imbaho yamenyanye n’uwitwa Bugingo amusaba kumushakira ubwato yagura amuhuza n’abaturage bo ku Nkombo arabugura.

Ntabanganyimana ngo ni nawe washakiye abarwanyi ba FLN icyambu banyuraho bagatunguka mu Karere ka Nyamasheke kandi kure y’aho batahura n’ingabo z’u Rwanda.

Ntabanganyimana ngo yiboneye ubwe abarwanyi binjira mu bwato kandi bafite intwaro ndetse ko yari azi ko zije kwifashishwa gukora ibikorwa by’iterabwoba ariko ntiyabitangira amakuru.

Ibi kandi byemezwa na Nizeyimana Marc wivugira ko ari we wambukije abarwanyi 105 bavuye mu ishyamba rya Karehe muri Congo banyura i Nyamasheke berekeza mu ishyamba rya Nyungwe.

Mu iburanishwa ryo kuri uyu wa gatatu tariki ya 28 Mata 2021, Ubushinjacyaha bwatangiye kurega abari abasirikare barimo Nsanzubukire Felicien alias Irakiza Fred, Munyaneza Anastase alias Rukundo John Kuramba n’abandi.

Abagabye ibitero by’iterabwoba i Rusizi batangiye kuburanishwa

Abaregwa muri urwo rubanza bakekwaho kugaba ibitero byakomerekeyemo abaturage ndetse banatwika n’imodoka zabo no kujya mu mutwe w’iterabwoba.

Ubushinjacyaha bwagaragarije Urukiko rukuru urugereko rubaranisha ibyaha mpuzamahanga n’ibyambukiranya imipaka, ko Bizimana Cassien alias Passy ari we wayoboye ibitero byagabwe mu Karere ka Rusizi hagati ya Gicurasi n’Ukwakira 2019.

Bizimana Cassien yavuye mu Rwanda muri 1994 ari umusirikare wa Ex-FAR, nyuma ajya mu mutwe wa FDLR-FOCA. Mu mwaka wa 2016 uwo mutwe ujemo kutumvikana ngo yagiye mu mutwe wa CNLD-Ubwiyunge wa Col. Wilson Irategeka.

Ku bwumvikane bwa Wilson Irategeka, Nsabimana Callixte na Paul Rusesabagina imitwe bari bayoboye yahurijwe muri MRCD yari iya Paul Rusesabagina, bashinga n’umutwe w’ingabo wa FLN.

Bizimana Cassien yemereye ubushinjacyaha ko yaje i Bukavu avuye i Rucuru aho yavuraga abayobozi ba CNLD, ahasanga Bugingo Justin wari usanzwe uhagarariye MRCD-FLN muri ako gace maze bafatanya gushakisha abazabafasha mu bikorwa by’iterabwoba mu Karere ka Rusizi nk’uko yari yabitumwe n’abayobozi be.

Ubushinjacyaha buvuga ko Bizimana yafatanyije na Bugingo Justin ndetse na Matakamba Jean Berchmas wabaga i Rusizi gushakisha abandi bantu bashobora kuba barigeze kuba abasirikare ku buryo baba bazi gukoresha gerenade.

Bizimana kandi yashatse uwitwa Shabani Emmanuel nk’umuntu uzajya amwereka inzira akagera ku mugezi wa Rusizi akambukana intwaro agasanga abantu yateguriwe na Matakamba Jean Berchmas.

Mu ibazwa rye, Bizimana Cassien ngo yemereye ubushinjacyaha n’ubugenzacyaha ko yambukanaga intwaro zigizwe na gerenade, amasasu ndetse n’imbunda akazishyikiriza Matakamba nawe akazibika mu murima we.

Abo Bizimana yakoranye nabo muri ibyo bitero harimo Matakamba Jean Berchmas uregwa ibyaha bine, Shabani Emmanuel uregwa ibyaha bine, hari murumuna we Nikuzwe Simeon, Ntibaramira Innocent nawe uregwa ibyaha bine, Byukusenge Jean Claude n’abandi.

Bose bakekwaho kuba mu mutwe w’iterabwoba, ubwinjiracyaha bw’ubwicanyi nk’igikorwa cy’iterabwoba, gutwikira undi ku bushake inyubako n’ibigenewe gutwara abantu cyangwa ibintu no gukoresha binyuranyije n’amategeko ibintu biturika ahantu hakoreshwa na rubanda.

Gusa kuri Matakamba Jean Berchmas, Shabani Emmanuel na Bizimana Cassien bihariye icyo kugambana no gushishikariza abandi gukora iterabwoba ariko Bizimana Cassien nawe akiharira icyo kujya mu mutwe w’ingabo utemewe.

Ubushinjacyaha buvuga ko Matakamba ubwe ngo yiyemereye ko ariwe wagezwagaho intwaro akazihisha mu murima we akaziha abagomba kujya mu bitero mu mirenge itandukanye y’Akarere ka Rusizi ndetse nawe ubwe hakaba hari ibitero yajyagamo.

Naho Shabani Emmanuel ubushinjacyaha bumurega kuba yarayoboraga umuntu abizi neza ko afite intwaro kandi agiye kuzikoresha mu gutera ubwoba abaturage ndetse no kuba ubwe hari ibitero yagiyemo. Uyu kandi ni nawe winjije murumuna we Nikuzwe Simeon muri uwo mugambi mubisha wo gukora ibikorwa by’iterabwoba.

Ntibaramira Innocent ngo yemereye ubugenzacyaha ndetse n’ubushinjacyaha ko bagabye ibitero bitanu muri Rusizi kandi byose bikaba byari bigambiriye ahantu hahurira abantu benshi ndetse no gutwika imodoka z’abaturage basanzwe.

Ibyo bitero ngo yagiye abijyanamo na Sibomana Jean Bosco, Nsabimana Jean Damascène witwa Motari, Byukusenge Jean Claude, Shabani Emmanuel, Nikuzwe Simeon, Matakamba Jean Berchmas n’abandi umuyobozi wabo ari na we wabagezagaho intwaro akaba Bizimana Cassien.

Ibitero by’iterabwoba byagabwe i Kamembe mu mujyi hafi n’akabari ahakomerekeye abantu kubera gerenade, mu Karangiro ku ruganda rw’ifu y’imyumbati, ku ruganda rwa kawa, icyakorewe i Nyakarenzo.

Ubushinjacyaha buvuga ko ibyo bitero byakomerekeyo abantu ndetse hatwikwa n’imodoka z’abaturage.

Buvuga ko nta kindi byari bigamije uretse gutera abaturage ubwoba, kugaragaza ko umutwe w’iterabwoba wa FLN uhari ndetse no guhatira Leta gukora ibyo itakabaye ikora.

Bose ubushinjacyaha bubashinja kuba ibyo byose barabikoze ku bushake, babigambiriye kandi babizi neza ko bigamije gutera abaturage ubwoba.

Iburanisha ryo kuri uyu wa 22 Mata 2021, ryarezwemo abantu batanu bose bahuriye ku kugaba ibitero by’iterabwoba mu Karere ka Rusizi.

Bwabitangaje kuri uyu wa Gatatu tariki ya 21 Mata 2021, ubwo bwagaragarizaga Urukiko rukuru urugereko ruburanisha ibyaha mpuzamahanga n’ibyambukiranya imipaka, ibyaha bukurikiranyeho Nizeyimana Marc.

Ubushinjacyaha buvuga ko Nizeyimana Marc yahoze mu mutwe wa FOCA ushamikiye kuri FDLR, nyuma ayoboka uwa CNLD na wo waje kwifatanya na MRCD-FLN.

Mu ibazwa rye Nizeyimana Marc ngo yiyemereye ko yari yungirije umuyobozi wa FLN mu gice cy’amajyaruguru, General Jevah, ari na cyo cyohereje abarwanyi mu Rwanda.

Ubushinjacyaha buvuga ko yakuraga abarwanyi muri Congo bakanyura i Burundi abifashijwe na bamwe mu bayobozi b’ingabo muri icyo gihugu, ndetse ngo hari n’igihe batewe inkunga y’ibikoresho bya gisirikare.

Nizeyimana ngo yatoranyaga abasirikare yohereza kugaba ibitero by’iterabwoba mu Rwanda banyuze i Burundi, abandi akabanyuza muri Nyamasheke bakinjira mu ishyamba rya Gishwati. Ibyo bitero ni nabyo bagize ibyaha Nizeyimana aregwa ndetse aniyemerera akanabisabira imbabazi.

Ibyaha akurikiranyweho uko ari icyenda bihura n’ibiregwa Paul Rusesabagina wari shebuja kuko yari umuyobozi wa MRCD-FLN akaba ari na we watangaga amabwiriza ku bigomba gukorwa n’umutwe w’ingabo zitemewe wa FLN.

Ibyaha bibiri gusa ni byo biregwa nk’umwihariko kuri Nizeyimana aribyo kujya mu mutwe w’iterabwoba no kugirana umubano n’abakozi ba Leta z’amahanga abigiriye gushyigikira iterabwoba.

Ubushinjacyaha bwasabye urukiko ko Nizeyimana Marc aryozwa ibyaha byose aregwa nka gatozi n’ubwo atari aho byakorerwaga ariko ari we wabiyoboraga, agatoranya abarwanyi, akabereka inzira akabaha n’ibikoresho.

Nizeyimana Marc ni uwa kabiri ubushinjacyaha bugaragarije urukiko ibyaha bumurega nyuma ya Paul Rusesabagina, iburanisha ryo ku wa Kane tariki ya 22 Mata 2021, hakazakurikiraho undi mu bantu 21 baregwa muri urwo rubanza.

Rusesabagina ngo akwiye kubazwa ibyaha byose byakozwe na MRCD-FLN

Bwabitangaje kuri uyu wa Gatatu tariki ya 21 Mata 2021, ubwo Urukiko rukuru urugereko ruburanisha ibyaha mpuzamahanga n’ibyambukiranya imipaka, rwumvaga ibindi byaha biregwa Paul Rusesabagina.

Nk’uko bisanzwe ubushinjacyaha bwagaragarije urukiko ibyaha bitatu byari bisigaye buregamo Paul Rusesabagina adahari kuko yikuye mu rubanza.

Ibyaha ubushinjacyaha bwagaragarije urukiko mu iburanisha ryo kuri uyu wa gatatu, birimo gutwikira undi nk’icyaha cy’iterabwoba, ubwinjiracyaha mu cyaha cy’ubwicanyi no gukubita no gukomeretsa nk’icyaha cy’iterabwoba.

Ku cyaha cyo gutwikira undi, ubushinjacyaha buvuga ko cyakorewe mu turere twa Nyaruguru mu Murenge wa Nyabimata, ahatwitswe inzu ya koperative y’abajyanama b’ubuzima yari icumbitsemo Umunyamabanga Nshingwabikorwa w’Umurenge wa Nyabimata ndetse hatwikwa n’imodoka ye.

I Nyabimata kandi hanatwitswe moto ebyiri, iya Havugimana Jean Marie Vianney ndetse n’iya Bapfakurera Venuste mu gitero cyo ku wa 19 Kamena 2018.

Ubushinjacyaha kandi buvuga ko igitero cyagabwe mu Karere ka Nyamagabe mu Murenge wa Kitabi muri Nyungwe, hatwitswe imodoka ebyiri za Coaster zavaga i Rusizi zerekeza i Kigali.

Hari kandi imodoka ya Minibus itwara abagenzi ndetse n’ivatiri y’umwunganizi mu mategeko, Ndutiye Yussouf zatwitswe ndetse we yamburwa n’ibyangombwa byose na telefone.

Ubushinjacyaha buvuga ko ibi bimenyetso bigaragazwa n’amafoto yafashwe n’ubugenzacyaha ndetse n’ubuhamya bw’abarokotse ibi bitero n’ababibonye.

Ku cyaha cy’ubwinjiracyaha mu cyaha cy’ubwicanyi nk’igikorwa cy’iterabwoba, ubushinjacyaha buvuga ko iki cyaha cyakorewe mu turere twa Rusizi, Nyaruguru na Nyamagabe.

Buvuga ko harashwe abantu batandukanye hakoreshejwe amasasu na gerenade, harimo Umunayamabanga Nshingwabikorwa w’Umurenge wa Nyabimata, Nsengiyumva Vincent, warashwe mu mutwe.

Hari kandi Rutayisire Félix wo mu Karere ka Rusizi, raporo ya muganga igaragaza ko yagize ubumuga bwa 20% kubera gerenade yatewe.

Ku cya cyenda ari na cyo cya nyuma, Paul Rusesabagina aregwa cyo gukubita no gukomeretsa ku bushake nk’igikorwa cy’iterabwoba, ubushinjacyaha buvuga ko hakubiswe abaturage benshi mu turere twa Rusizi, Nyaruguru na Nyamagabe kandi nta kindi cyaha bazizwa uretse kubagirira nabi hagamijwe kubatera ubwoba.

Ubushinjacyaha buvuga ko Paul Rusesabagina n’ubwo atageze ahakorerwaga ibyaha ariko akwiye kubiryozwa nka gatozi kuko ariwe wari umuyobozi w’umutwe utemewe wabikoze.

Buti "Icyo dushingiraho dusaba ko Rusesabagina yaryozwa ibi byaha nka gatozi ni uko yari umuyobozi wa MRCD-FLN akaba n’umuterankunga w’ibikorwa by’iterabwoba uyu mutwe wakoze".

Ubushinjacyaha buvuga ko iyo ataza gutanga amabwiriza ibyo bitero biba bitarabayeho byongeye ngo n’iyo atagira inkunga atera ibikorwa by’umutwe yayoboraga ibitero bitakabayeho.

Ubushinjacyaha buvuga ko impamvu ibi bikorwa byose byakwitwa iby’iterabwoba ari uko byari bigambiriwe ku baturage kandi bigakorerwa ahantu hategereye ahaherereye abasirikare cyangwa Polisi.

Paul Rusesabagina aregwa ibyaha icyenda ari byo kurema umutwe w’ingabo utemewe, kuba mu mutwe w’iterabwoba, gutera inkunga iterabwoba, ubwicanyi nk’icyaha cy’iterabwoba, itwarwa ry’umuntu ritemewe n’amategeko nk’icyaha cy’iterabwoba, kwiba hakoreshejwe intwaro nk’igikorwa cy’iterabwoba, gutwikira undi nk’igikorwa cy’iterabwoba, ubwinjiracyaha mu cyaha cy’ubwicanyi nk’igikorwa cy’iterabwoba no gukubita no gukomeretsa ku bushake nk’igikorwa cy’iterabwoba.

Urukiko rwanzuye ko Rusesabagina akomeza gufungwa

Bwabitangaje kuri uyu wa Kane tariki ya 01 Mata 2021, ubwo hasubukurwaga urubanza Rusesabagina n’abo bareganwa by’umwihariko ku cyaha cy’ubwicanyi nk’icyaha cy’iterabwoba, icyaha ubushinjacyaha burega Rusesabagina ubwe mu byaha icyenda bumushinja.

Ubushinjacyaha buvuga ko ku wa 14 Nzeli 2020, mu ibazwa rya Paul Rusesabagina yiyemereye ko yashinze umutwe wa FLN akaba n’umwe mu bawuha inshingano.

Mu bitero bitandukanye ahitwa i Nyabimata mu Karere ka Nyaruguru, Nyungwe muri Nyamagabe ndetse na Rusizi, abarwanyi b’uyu mutwe bishe abantu icyenda, batwika imodoka ndetse basahura n’imitungo.

Umwe mu bahitanywe n’ibyo bitero akaba n’umuyobozi w’Inama Njyanama y’Umurenge wa Nyabimata, Munyaneza Fidel, mbere y’uko apfa yabwiye ubugenzacyaha ko yahurujwe n’umuturanyi amubwira ko abona ahantu batwitse undi asohoka ahuruye.

Ageze mu nzira ngo yahamagawe n’Umunyamabanga Nshingwabikorwa w’Umurenge mu gihe amwitaba abona abantu bitwaje intwaro kandi bambaye gisirikare bamwaka telefone bamusaba kugenda.

Akigenda ngo bahise bamurasa ukuguru no mu bitugu iruhande rw’ibumoso agwa hasi bamuteragura imigeri bamusiga aho bazi ko yapfuye.

Kimwe n’abandi batangabuhamya ngo bagaragarije ubugenzacyaha ko abarwanyi baje bashakisha abayobozi babo ariko abanze kwerekana aho batuye nabo bakicwa.

Ubushinjacyaha buvuga ko kuba aba barwanyi baraje bahiga abayobozi b’abaturage ari inshingano bari bahawe n’ubuyobozi bwabo bwa MRCD-FLN.

Ikindi ubushinjacyaha bushingiraho buvuga ko aba barwanyi bari batumwe n’ubuyobozi bwabo ngo ni uko nyuma y’ibyo bitero uwari umuvugizi wa FLN Callixte Nsabimana yabyigambye.

Ikimenyetso ubushinjacyaha bwagaragarije urukiko akaba ari ijwi ry’ikiganiro Nsabimana Callixte yagiranye n’umunyamakuru wa Radio Ubumwe Nsabimana abazwa n’umunyamakuru Mukashema Agnes ku gitero cyagabwe i Nyabimata, yemera ko ari abarwanyi abereye umuvugizi bagikoze.

Yagize ati “Ni byo koko i Nyabimata twagezeyo twarabarashe yego, ubu nta mwanya mfite ariko nimpuguka ndaza kukwihamagarira”.

Ubushinjacyaha kandi bwagaragarije urukiko ikindi gihe Nsabimana Callixte yigambye ibitero byo muri Nyungwe aho na none yavugiraga kuri Radio avuga ko Nyungwe ari agace k’imirwano anaburira abaturage kudahirahira bayinjiramo.

Ubushinjacyaha kandi bwagaragarije urukiko ko mu ibazwa rya Paul Rusesabagina ryo ku wa 31 Kanama 2020 mu bugenzacyaha yemeye ko umutwe wa MRCD-FLN, awufatanyije na Nsabimana Callixte na Irategeka Wilson.

Rusesabagina yagize ati “Ni byo koko ndi mu bantu batanze amabwiriza muri ibi bikorwa kuko amabwiriza n’ubundi yatangwaga n’inama y’abaperezida (College President) kuko twari aba Perezida ba MRCD, bayoboye imitwe ihuriye muri MRCD”.

Yakomeje agira ati “Ni ukuvuga jyewe Rusesabagina Paul, perezida wa PDR Ihumure, Irategeka Wilson perezida wa CNRD Ubwiyunge na Nsabimana Callixte perezida wa RLM”.

Ubushinjacyaha kandi byavuze ko Paul Rusesabagina yongeye kwemera uruhare rwe muri ibi bikorwa imbere y’ubushinjacyaha mu ibazwa ryo ku wa 11 Nzeli 2020 ndetse no mu rukiko rw’ibanze rwa Kicukiro kuwa 14 Nzeli 2020, aburana ku ifungwa n’ifungurwa ry’agateganyo.

Buvuga ko yemeye ibyo bikorwa by’iterabwoba byakozwe n’abarwanyi ba FLN ndetse abisabira n’imbabazi ariko avuga ko atabiryozwa kuko atageze aho byakorewe ndetse akaba ataranabibatumye.

Ubushinjacyaha busanga kuba Rusesabagina Paul yemera ubuyobozi bwa MRCD-FLN ndetse akanemera ibikorwa byakozwe uko byakozwe ndetse akabisabira imbabazi akwiye kuryozwa icyaha cy’ubwicanyi nk’icyaha cy’iterabwoba.

Ikindi ubushinjacyaha bushingiye ku manza zagiye zicibwa mu bindi bihugu ku cyaha cyo ku kwica nk’icyaha cy’iterabwoba, busanga umuyobozi w’umutwe w’iterabwoba, adakwiye gutandukanywa n’ibikorwa uwo mutwe uba wakoze kuko ari umuyobozi wawo, akawutera inkunga, akawushakira ibikoresho n’imyitozo.

Aha rero ubushinjacyaha bugasanga hahanwe abakoze icyaha (abarwanyi) hadahanwe umuyobozi wabo wateraga inkunga ibyo bikorwa byaba ari ukwirengagiza ko ari we watanze amabwiriza kandi iyo atayatanga bitari bube.

Ubushinjacyaha bwasabye urukiko gushingira kuri ibyo bimenyetso, icyaha akurikiranyweho akakiryozwa nka gatozi, nk’umuterankunga wanayoboye ibyo bikorwa.

Paul Rusesabagina

N’ubwo mu mezi arindwi ashize itangazamakuru ry’amahanga ritanenzwe bigaragara kubera ko nta byinshi ryari rizi ku bikorwa by’iterabwoba bya Rusesabagina, bimaze kugaragara ko nta kindi rigamije usibye gukingira ikibaba ibyagaragajwe muri filime ya Hollywood itwerera Rusesabagina ubutwari atigeze agira.

Amagambo y’umwanditsi akaba n’umunyamakuru w’Umunyamerika Tom Zoellner, na Keir Pearsons wanditse filime ya Hotel Rwanda, yerekana bisesuye uburyo ibitangazamakuru byakomeje kugorwa no gusobanukirwa ko umuntu bamaze igihe basingiza “nk’intwari n’umugiraneza” nta kindi ari cyo usibye umuyobozi w’agatsiko k’abagizi ba nabi.

Ibi rero nta kindi birimo kubamarira usibye kwiha urw’amenyo bo ubwabo n’ibinyamakuru banyuzamo ibitekerezo byabo, kuko ubuhamya n’ibimenyetso bihari kandi bifatika ku byo Rusesabagina ashinjwa.

Mbere na mbere, nta n’umwe uyobewe ko habaye ibitero by’iterabwoba byinshi byagabwe ku Rwanda bigamije kugirira nabi no kwambura ubuzima abaturage b’inzirakarengane.

Ku itariki 17 Ukukoboza 2018, hashize igihe ibyo bitero bitangiye, ambasade y’u Budage mu Rwanda yasohoye itangazo riburira abaturage babwo bakorera ingendo mu Rwanda. Iryo tangazo ryaragiraga riti: “Mu gace gaherereyemo parike y’igihugu ya Nyungwe hari ibitero by’iterabwoba”.

Nyuma gato y’ibyo bitero, ahagana mu mpera z’Ukuboza 2018, Rusesabagina yagaragaye mu mashusho ya videwo yemeza ko ari we uri inyuma yabyo, no gushishikariza Abanyarwanda kwifatanya nawe mu rugamba rwo kurwanya “ingabo za Kagame” ndetse anatanga inkunga ye yivuye inyuma ku mutwe wa FLN.

Umuvugizi wa FLN, “Major” Callixte Nsabimana, uri mu bareganwa hamwe na Rusesabagina, we yemeye ibyaha byose ashinjwa ndetse na n’ubu aracyasaba imbabazi Abaturarwanda.

Naho Rusesabagina, Nsabimana avuga ko ari we wamukoreshaga, we yakomeje guhakana ko ari we wateguye ibitero byahitanye inzirakarengane yirengagije ko yabyiyemereye mu mashusho ya videwo mbere y’uko atabwa muri yombi.

Imbere y’urukiko Rusesabagina ati: “Twashyizeho umutwe wa FLN (National Liberation Front) nk’umutwe wa gisirikare, utari uw’iterabwoba nk’uko ubushinjacyaha buhora bubivuga. Simpakana ko FLN yakoze ibikorwa by’ubugizi bwa nabi ariko uruhare rwanjye rwari mu rwego rwa dipolomasi”.

Niba Rusesabagina ubwe yemera ko yashinze umutwe wa gisirikare wishe abaturage, kuki Zoellner na Pearsons bata umwanya wabo bavuga ko ibyo ashinjwa ari ibihimbano”? Ukuri guhari ni uko, itangazamakuru ry’amahanga mu buryo bugaragarira buri wese ryakoze uko rishoboye riyobya uburari ku byaha ashinjwa, rinajijisha abarikurikira ribakinga mu maso ibirego “by’ishimutwa” bidafite ishingiro.

Icya kabiri, ubuhamya bwa Professor Michelle Martin, umuturage wa Leta Zunze Ubumwe za Amerika (US) akaba yarigeze gukorana na Rusesabagina, mu rukiko yatesheje agaciro byimazeyo amagambo yavuzwe na Zoellner na Pearson. Kuba Rusesabagina ashinjwa gutera inkunga FDLR ishinjwa Jenoside, ntabwo ari “ibinyoma” nk’uko bariya banditsi bombi babivuga.

Professor Michelle Martin yanahamije ko mu gihe yakoranaga n’umuryango washinzwe na Rusesabagina, yabashije gukusanya ibimenyetso byerekana ko yarafitanye imikoranire na FDLR ndetse abishyikiriza ubutabera bwo muri Leta Zunze Ubumwe za Amerika (US).

Ku itariki 4 Ukwakira 2013, Ubutabera bwa US bwandikiye Ubushinjacyaha bw’u Rwanda, bwemeza ko Rusesabagina we ubwe yoherereje amafaranga FDLR. Iyo baruwa na yo iri mu birego ashinjwa.

Ibi rero bikaba bishyigikiwe n’amakuru n’ubuhamya bifatika, kandi binahura neza n’amagambo yavuzwe n’Umushinjacyaha Mukuru Martin Ngoga muri 2011, ubwo yatangazaga ko ibiro bye byabonye “ibimenyetso bishya byerekana uruhare rwa Paul Rusesabagina mu bikorwa by’iterabwoba”.

Ibi ndetse biruzuzanya n’ubuhamya Callixte Nsabimana aheruka gutanga yemeza ko Rusesabagina yashyikirije umutwe w’iterabwoba wa FLN inkunga ya $150.000.

Bityo rero, gushyigikira ko uruhare rwa Rusesabagina muri FLN rwari urwa dipolomasi ni nko kwemeza ko uruhare rwa Bin Laden muri Al-Qaida rwari “urw’impuguke mu by’itumanaho.”

Ubuhamya bwa Professor Michelle Martin bugaragaza byimazeyo ko abashyigikiye Rusesabagina bigiza nkana. Professor Martin avuga ko abayoboke ba Rusesabagina bakimara kumenya ko afite umugambi wo kwamagana ibikorwa byabo by’ubugizi bwa nabi, bahise batangira kumushyiraho iterabwoba.

Iryo terabwoba ryaturukaga mu gatsiko kavugaga ko kiyemeje kuzana ‘demukarasi’ mu Rwanda kabinyujije mu gushyigikira raporo z’ibinyoma za Human Rights Watch zibeshyera u Rwanda, n’itangazamakuru ry’amahanga rigakomeza kubatiza umurindi.

Hejuru y’ibyo kandi, amagambo adafite ishingiro ya Zoellner avuga ko Rusesabagina yangiwe guhagararirwa mu rubanza n’abo yifuza, yo noneho impamvu zayo imbere y’ubutabera ntizumvikanye na buhoro utaretse n’ibyo ‘gushimutwa’ bitwazaga kandi nabyo byarateshejwe agaciro n’urukiko.

Ingigo ya 6 y’itegeko No 83/2013 ryo kuwa 11/09/2013, rishyiraho Urugaga rw’Abavoka mu Rwanda rikanagena ku buryo busobanutse imiterere n’imikorere yarwo, ivuga ko “umunyamahanga nawe ashobora gukora umwuga w’abavugizi, ariko bigakorerwa impande zombi”. Iryo tegeko ryatangiye gukurikizwa muri 2013 kandi rireba abaregwa bose, si Rusesabagina gusa, ari yo mpamvu mu rubanza rwe yunganirwa n’abavoka b’Abanyarwanda.

Ikindi kandi, Zoellner na Pearson nk’uko bo babibona, birasa nk’aho guverinoma y’u Rwanda cyangwa Perezida Kagame ari bo bari imbere y’ubutabera aho kuba Rusesabagina. Ahubwo ugasanga baririrwa mu birego bidafite ishingiro ko guverinoma y’u Rwanda ibangamira uburenganzira bwa muntu, nk’aho ibyo ari byo byagira Rusesabagina umwere.

Niba ushinjwa yifuza kuzamura ibibazo by’uburenganzira bwa muntu bivugwa kuri guverinoma y’u Rwanda nk’uburyo bw’inyoroshyacyaha, yagombye mbere na mbere kwemera ibyaha ubundi akabona gusobanurira urukiko impamvu yishoye mu bikorwa by’iterabwoba.

Yagombye no kugerageza gusobanura impamvu abambari be bagabye ibitero ku baturage bakabavutsa uburenganzira we avuga ko aharanira.

Biratangaje cyane kubona ibirego bishinja u Rwanda kubangamira uburenganzira bwa muntu bitangwa nk’ibimenyetso simusiga kandi ahubwo nta n’ishingiro na rito bifite, mu gihe ibireba Rusesabagina bihari kandi bifite gihamya isesuye ari byo bakomeza kwirengagiza, cyangwa ugasanga barabikoresha nk’ubwiregure bwa nyirarureshwa mu rubanza.

Ni yo mpamvu amagambo ya Rusesabagina ubwe ari yo agomba gushingirwaho, ubwo yiyemereraga ko yagize uruhare mu iyicwa ry’abaturage b’inzirakarenga muri Nyabimata.

Ibimenyetso birahari ku bashaka kubimenya bose, kandi inzira ni imwe, yewe n’iyo kwifashisha CNN ifatwa nk’igihangange, yashobora kubisibanganya.

Ni inkuru ya New Times yashyizwe mu Kinyarwanda na Gasana Marcellin

Byagarutsweho mu iburanisha ryo kuri uyu wa Gatatu tariki ya 31 Werurwe 2021, aho Ubushinjacyaha bwatangiye kugaragariza urukiko rukuru urugereko ruburanisha ibyaha mpuzamahanga n’ibyambukiranya imipaka ibyaha bya buri wese mbere y’uko bazabyisobanuraho.

Ni iburanisha ryabaye n’ubundi Paul Rusesabagina adahari kuko yatangarije urukiko ko atazongera kwitaba urukiko.

Ubushinjacyaha bwavuze ko bushinja Rusesabagina Paul ibyaha icyenda nk’umuyobozi w’impuzamashyaka MRCD yari abereye umuyobozi mukuru.

Ibyaha Paul Rusesabagina aregwa ni Kurema umutwe w’Ingabo zitemewe, kuba mu mutwe w’iterabwoba, gutera inkunga iterabwoba, icyaha cy’ubwicanyi nk’igikorwa cy’iterabwoba, icyaha cy’itwarwa ry’umuntu ritemewe nk’igikorwa cy’iterabwoba;

Hari icyaha cyo kwiba hakoreshejwe intwaro nk’igikorwa cy’iterabwoba, icyaha cyo gutwikira undi nk’icyaha cy’iterabwoba, ubwinjiracyaha bw’ubwicanyi nk’igikorwa cy’iterabwoba ndetse n’icyaha cyo gutwikira undi ku bushake nk’igikorwa cy’iterabwoba.

Ubushinjacyaha buvuga ko Rusesabagina yashinze FLN, umutwe w’ingabo ushamikiye kuri MRCD abizi neza ko ari icyaha kuko hashingiwe ku Itegeko Nshinga ry’u Rwanda ingabo zemewe mu Rwanda ari RDF gusa.

Ubushinjacyaha kandi buvuga ko yashinze FLN agamije gukora ibikorwa by’iterabwoba nk’uko bigaragara mu matangazo abayobozi bawo bagiye bashyira hanze bavuga ko bagamije gukora intambara ndetse n’amasasu bagahirika ubutegetsi bw’u Rwanda.

Mu matangazo yabo ngo humvikanagamo kugaba ibitero ku baturage hagamijwe gushyira igitutu kuri Leta kugira ngo yemere imishyikirano.

Kuba ibitero by’uyu mutwe byagabwe ku baturage aho kuba ku basirikare ubwabyo ngo bigaragaza ko ibikorwa byakorwaga ari iterabwoba atari intambara ifite icyo igambiriye.

Ubushinjacyaha kandi bushinja Paul Rusesabagina kuba mu mutwe w’iterabwoba wa MRCD-FLN.

Ubushinjacyaha bwagaragarije urukiko ko guhera muri Kamena 2018 kugera mu Kwakira 2019, umutwe w’iterabwoba wa FLN wagabye ibitero wica abaturage, usahura imitungo yabo indi irangizwa mu turere twa Nyamagabe, Nyaruguru na Rusizi.

Bwavuze ko Rusesabagina abarizwa mu mutwe w’iterabwoba kuko yawushinze kandi akaba yari akiwubarizwamo kugeza afashwe.

Ikindi ni uko ngo yagize uruhare rukomeye mu gutera inkunga ibikorwa bya FLN kuko ari we wakusanyaga inkunga y’amafaranga ndetse ubwe akaba yiyemerera ko hari amafaranga yatanze.

Ubushinjacyaha kandi mu kumushinja iki cyaha bushingira no kuri video iri kuri YouToube Rusesabagina yiyemerera ibitero byishe abantu mu Rwanda ngo bagamije gushyira igitutu kuri Leta na Perezida Kagame ngo bemere imishyikirano.

Mu bimenyetso Ubushinjacyaha bwatanze harimo ibyakuwe muri Telefone ya Rusesabagina ku butumwa yagendaga yandikirana n’abantu batandukanye harimo Lt General Irategeka Wilson, Faustin Twagiramungu n’abandi.

Urugero ni aho ku wa 30 Ukuboza 2018 yagize ati “Mwaramutse neza, abahungu banjye bari mu muriro, nanjye ubu ndi muri rwinshi, nagira ngo mbasabe ya gahunda muyimurire undi munsi tuzavuganaho, icyumweru cyiza.”

Hari n’aho yabwiye Twagiramungu Faustin ko ataboneka arimo gushakisha inkunga y’abarwanyi be dore ko yanabyemereye ubushinjacyaha ku wa 16 Nzeri 2020 aho yivugiye ko abo yitaga abahungu be ari FLN.

Ikindi ngo ni ikiganiro yagiranye na Lt Gen Irategeka aho uyu yamubwiye ati “Twe turi gushaka kohereza abahinzi mu murima wowe ukohereza amafaranga aho tutazi koko, urashaka gucamo ibice abahinzi ukoresheje amafaranga?

Paul Rusesabagina abazwa mu bugenzacyaha ngo yasobanuye ko abahinzi ari abarwanyi, imbunda zikaba amasuka, amasasu akaba imbuto naho umurima akaba ariho barwanira.

Ubushinjacyaha kandi bushinja Paul Rusesabagina gutera inkunga iterabwoba aho we ngo ubwe yiyemereye ko yatanze 20,000 by’ama Euro ndetse agakoresha inama zo gukusanya amafaranga.

Rusesabagina kandi yemereye urukiko rw’ibanze rwa Kicukiro ko bari bamaze koherereza abarwanyi ba FLN Amadolari ya Amerika 300,000 kugira ngo abafashe ku bikorwa byabo by’iterabwoba.

Ubushinjacyaha bwagaragarije urukiko uko umubitsi wa MRCD-FLN Munyemana Eric, Umugore we Uwiragiye Thacienne n’abandi bagiye bohereza amafaranga yakusanyijwe ahantu hatandukanye harimo n’ishyaka MRCD bagiye bohereza amafaranga mu bihugu bitandukanye ku isonga muri Congo ahari ibirindiro bya FLN, muri Madagascar na Comores aho Nsabimana Callixte yakunze kuba, muri Afurika y’Epfo, u Burundi no mu Rwanda ariko amenshi akaba yaroherejwe muri Repubulika Iharanira Demokarasi ya Congo.

Hanagaragajwe amwe mu mazina y’abanyamahanga bifashishwaga mu kohereza amafaranga ndetse no kuyakira binyuze muri Real Transfert, Western Union na Money Gram.

Mbere y’uko ubushinjacyaha bugaragariza urukiko ibyaha biregwa Paul Rusesabagina, bwabanje kuvuga ibyaha burega Nsengimana Herman wavuye muri Uganda akajya mu myitozo ya gisirikare muri Repubulika Iharanira Demokarasi ya Congo ku wa 18 Mata 2018 yoherejwe na Nsabimana Callixte wari umuvugizi wa FLN akaba na Visi Perezida wa kabiri wa MRCD-FLN.

Nsengimana Herman asoje imyitozo, yakoranye na FLN ibikorwa by’iterabwoba ndetse aza no kuba ari we uba umuvugizi w’uyu mutwe nyuma y’ifatwa rya Nsabimana Callixte.

Iburanisha ryo kuri uyu wa Gatatu ryasubitswe Ubushinjacyaha bumaze kugaragariza urukiko ibyaha bitatu ku byaha icyenda burega Paul Rusesabagina.

Prof. Michelle Martin yabanje kurahirira imbere y’Urukiko ko ibyo agiye kuvuga ari ukuri

Dr Michelle Martin avuga ko yamenyanye n’uwitwa Providence Rubingisa mu mwaka wa 2009 bahuriye mu nama avuga ko yacitse ku icumu kandi afasha abarokotse amusaba kumwandikira igitabo ku buzima bwe bwite.

Avuga ko icyo gihe yari ashimishijwe cyane no kwifatanya n’umuntu warokotse Jenoside ndetse no gufasha abo yagizeho ingaruka.

Icyo gihe ngo Rubingisa kandi yamusabye kumufasha mu bukangurambaga bw’umuryango yashinze kugira ngo abashe kubona inkunga.

Avuga ko icyo gihe yamuhaye urufunguzo rwa email ye kugira ngo ajye abasha gusubiza abaterankunga b’umuryango we.

Avuga ko mu biganiro yagiranye na Rubingisa kenshi yumvagamo ko ashyigikiye Hutu Power ndetse agapfobya Jenoside yakorewe Abatutsi.

Ati “Rubingisa yambwiraga ko umwe mu babyeyi be ari Umututsi ariko ikindi gihe akambwira ko nta muvandimwe wishwe muri Jenoside ndetse ko uwitwa Omar yamufashije guhungira muri Congo kuko ngo yabaga kuri bariyeri. Ubundi nkumva imvugo ye irimo Hutu Power ndetse ipfobya Jenoside yakorewe Abatutsi.”

Rusesabagina na Providence Rubingisa bavuzweho kugirana imikoranire

Rubingisa Providence ngo yamuhuje na Paul Rusesabagina bahurira muri Hoteli i Chicago muri Leta Zunze Ubumwe za Amerika.

Rusesabagina ngo yamusabye kumubera umujyanama mu bya Politiki mu muryango yashinze wa Hotel Rwanda Rusesabagina Foundation undi na we aramwemerera.

Mu nama zose z’uyu muryango ngo wasangaga basaba abantu baje mu bukerarugendo mu Rwanda kujya babaza abamwakiriye ibibazo byinshi bavuga Icyongereza kuko ngo ari Abatutsi.

Amakenga ku muryango wa Rusesabagina ngo yayagize ahanini abifashijwemo n’umunyeshuri yari yarohereje muri uyu muryango kuko ngo yabaye mu Rwanda igihe kinini mu imenyerezamwuga aho ngo basesenguye bagasanga uwo muryango ukora Politiki aho kuba ibikorwa by’ubugiraneza.

Agira ati “Nanjye nari narageze mu Rwanda ariko mbona ko ibyo nabwirwaga muri Amerika bitandukanye n’ibyo niboneye, uwo munyeshuri na we ni ko yabibonye, duseseguye dusanga uwo muryango ushingiye kuri Politiki ugamije gukuraho Kagame atari ibikorwa byo gufasha impfubyi n’abapfakazi.”

Ikindi ngo ni uko hari abarwanashyaka ba PDR Ihumure bamusabaga ubushuti kuri Facebook ariko ugasanga hariho amafoto, amakarita yabo bari mu nzirabwoba n’andi makarita agaragaza amakuru nk’indangamuntu zabo za kera zigaragaza ubwoko.

Uyu munyamerikakazi avuga ko mu nama ya nyuma y’umuryango washinzwe na Rusesabagina ari ho yamenyeye amakuru y’impamo ko ugamije Politiki no gushyira igitutu ku butegetsi bw’u Rwanda.

Iyo nama ngo bavugaga ku mabuye y’agaciro, gufata abasirikare bakuru ba RPF ndetse no gushakisha uburyo Perezida Kagame atafata ijambo mu nama y’ikinyagihumbi yagombaga kubera muri Esipagne.

Icyo gihe ngo Abanyamerika bakoranaga na Rusesabagina ngo bakoze ibishoboka byose kugira ngo Perezida w’u Rwanda adahabwa ijambo muri iyo nama ariko birananirana.

Avuga ko icyatumye akusanya inyandiko zose yabonye ndetse akanazibika ari uko ari umubyeyi byongeye akaba yari amaze kumenya ko akorana n’abakoze Jenoside mu gihe we yari azi ko akorana n’abayirokotse.

Uyu Munyamerikakazi avuga ko ishyaka rya PDR Ihumure ryakoze ibishoboka byose kugira ngo rihungabanye umutekano w’u Rwanda nk’aho bashakishije ibihugu birimo Tanzaniya, Afurika y’Epfo, Congo n’u Burundi kugira ngo haboneke inzira zo gutera u Rwanda.

Avuga ko ishyaka PDR Ihumure yakoranaga bya hafi na RNC, FDLR ndetse n’uwari umuyobozi wayo Munyeshyaka.

Ikindi ni uko ngo abagize iryo shyaka bashakishaga inkunga yo kugura intwaro ndetse no kurema umutwe wo kurwanya u Rwanda.

Avuga ko ikindi ari uko Rusesabagina abinyujije mu muryango yashinze wiyemeje gufasha Ntanganda Bernard gutegura amatora ya Perezida wa Repubulika cyane ko ngo iyo aza kuyatsinda byari korohera Rusesabagina kugera ku butegetsi.

Anavuga ko hari inyandiko nyinshi zanditswe na Rusesabagina ubwe, ishyaka rye ndetse n’umuryango yashinze zigamije kwangisha amahanga Leta y’u Rwanda.

Kuba ari imbere y’urukiko atanga amakuru ngo ntiyigeze abisabwa n’u Rwanda ahubwo ngo yabikoze nk’umubyeyi kandi uharanira ineza ya buri wese no kubabazwa cyane no gukorana n’abajenosideri.

Uyu mutangabuhamya yitabajwe n’ubushinjacyaha mu rwego rwo kugaragaza uruhare rwa Paul Rusesabagina n’abo bareganwa ku cyaha cy’iterambwoba no kurema umutwe w’iterabwoba.

Rusesabagina yavuze ko yikuye mu rubanza

Rusesabagina wari wagarutse imbere y’ Urugereko rwihariye ruburanisha Ibyaha Mpuzamahanga n’Ibyambukiranya Imipaka ruherereye i Nyanza mu Majyepfo y’u Rwanda ajuririra icyemezo cyo gukomeza gufungwa cyafashwe n’urukiko ku busabe bw’ubushinjacyaha yasabye ko aho afungiye adahabwa uburenganzira bwo kwiga dosiye ye ngo ayigireho amakuru.

Mu byo yasabye urukiko harimo kumushyirira mu cyumba cye mudasobwa ihoramo murandasi (internet), imashini ifotora (Printer) byo kujya bimworohereza gutegura urubanza rwe .

Mu bindi yasabye harimo guhabwa amezi atandatu yo gutegura neza urubanza kuko avuga ko atigeze agira uburenganzira busesuye kuri dosiye ye. Yanasabye ko yemererwa abanyamategeko be bo mu Bubiligi bakaza kumwunganira mu rubanza rwe.

Impamvu Rusesabagina yatanze ubushinjachaha bukuriwe n’umushinjacyaha mukuru wungirije muri uru rubanza madamu Habyarimana Angelique bwavuze ko gusaba amezi atandatu ari amayeri yo gushaka gutinza urubanza kuko Rusesabagina amaze amezi 4 azi ibikubiye muri dosiye aregwa.

Ku bijyanye no kunganirwa n’abanyamategeko bo hanze baturutse mu gihugu cy’u Bubiligi barimo Vincent Larquin avuga ko yari asanzwe ari umunyamategeko we, ubushinjacyaha bwemeye ko ari uburenganzira bwe kunganirwa n’uwo yihitiyemo nk’uko biteganywa n’ingingo ya 68 y’itegeko rigenga imiburanishirize y’imanza z’inshinjabyaha.

Hisunzwe ingingo ya 7 y’itegeko nº 83/2013 ryo ku wa 11/09/2013 rishyiraho urugaga rw’abavoka mu Rwanda, rikanagena imitunganyirize n’imikorere byarwo Ubushinjachaha bwavuze ko bidashoboka ko yakunganirwa n’abavoka bavuye mu Bubiligi na CANADA na Australia kuko itegeko riteganya ko bibaho mu gihe amategeko y’igihugu uwo mwunganizi (Avocat) akomokamo atabuza Abanyarwanda uburenganzira bwo kunganira abantu mu gihugu uwo mwunganizi na we akomokamo kandi bitanyuranyije n’amasezerano mpuzamahanga.

Ku bw’ubushinjacyaha ngo kuba rero Abanyarwanda batemerewe kujya kunganira abantu mu nkiko zo mu Bubiligi no muri CANADA na Autralia ngo ntabwo abunganizi Rusesabagina yifuza bakomoka muri ibyo bihugu na bo bakwiriye guhabwa ubwo burenganzira bwo kunganira abantu mu Rwanda.

Rusesabagina wakunze kugaragaza inzitizi kuva ku munsi wa mbere ubwo yitabaga urukiko, yabishimangiye ku wa Gatanu imbere y’Inteko Iburanisha avuga ko hari uburenganzira bwe bw’ibanze butubahirijwe bityo ko ahagaritse urubanza rwe.

Yagize ati “Ndagira ngo mbwire urukiko n’ubucamanza ko uburenganzira bwanjye bw’ibanze bwo kwiregura no kugira uburenganzira ku rubanza ruboneye, urukiko rwanze kubwubahiriza.”

Yakomeje agira ati “Kuba rero uburenganzira bwanjye bwanze kubahirizwa, ndagira ngo menyeshe urukiko ko nta butabera na bumwe ntegereje hano bityo nkaba mbamenyesha ko ntazongera kwitabira uru rubanza. Urubanza rwanjye ndaruhagaritse.”

Umucamanza wari uyoboye iburanisha abajije umwe mu banyamategeko be Maitre Rudakemwa Felix, yavuze ko ntacyo yarenza ku byo uwo yunganira avuze kuko asanga ari uburenganzira bwe.

Dr Kayitana Evode , Umwalimu w’amategeko muri Kaminuza y’u Rwanda no muri Kaminuza yigenga ya Kigali (ULK ) akaba n’inzobere mu ishami ry’imanza nshinjabyaha avuga ko kwivana mu rubanza ari uburenganzira bw’umwe mu baburanyi bityo ko amategeko abimwemerera.

Dr Kayitana yagize ati “Hari ababuranyi benshi baba bafunzwe batumizwa mu rukiko kuburana ntibitabe, iyo Urukiko rusanze rwaragutumije mu buryo bwemewe n’amategeko agasinya kuri assignation yarangiza ku munsi wo kwitaba ntiyitabe urukiko rumuburanisha nk’umuntu udahari.”

Kayitana yakomeje avuga ko mu itegeko ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi ryasohotse muri 2018 rivuga ko iyo ababuranyi ari benshi umwe muri bo cyangwa bamwe muri bo bakanga gukomeza urubanza kandi baratumijwe urubanza rukomeza rukazafatwa nk’aho rwaburanishijwe bahari, ngo kuba Rusesabagina yari ari kumwe n’abandi bantu 20 bareganwa urubanza ruzakomeza.

Ati “Nibamugeraho ngo yisobanure akabura bazavuga ko bamutumije mu buryo bwemewe n’amategeko akanga kwitaba hanyuma bavuge ko bagiye gusuzuma ibimenyetso by’ubushinjacyaha nibasanga bifite ireme icyaha bazakimuhamya.”

Dr Kayitana Evode yakomeje avuga ko nk’umuntu ufunze kandi ubushinjacyaha bwakoresha ubundi buryo bwo kujya kumuzana mu Rukiko akaburana akaza akanga kuvuga ari mu Rukiko ngo kuko nta burenganzira bwo kwanga kwitaba uregwa agenerwa uretse uburenganzira bwo kwanga kuvuga kuko ari bwo bwanditse busanzwe buzwi.

Iki gihe ngo urukiko rumugezeho akanga kwiregura byaba bigaragara ko yahawe ubwo burenganzira akanga kubera ko afite uburenganzira bwo guceceka.

Abajijwe niba bitaba bihabanye n’ihame ry’ubutabera buboneye (Fair Trial ) yavuze ko bitaba bibangamiye ubwo burenganzira kuko bavuga ko bwabangamiwe iyo uregwa yimwe umwanya wo kwiregura.

Ati “Kugira ngo avuge ko ihame ry’ubutabera buboneye (Fair Trial) ryishwe na none ni igihe yavuga ko yimwe igihe gihagije cyo gutegura urubanza. Icyo gihe urukiko nabwo ni rwo rusuzuma kandi urukiko rureba niba igihe cyo gutegura urubanza wasabye atari ukunanizanya mu rwego rwo gutinza urubanza, rushobora gusuzuma rukavuga ko amezi atandatu adakwiriye.”

Dr Evode Kayitana yakoze ubusesenguzi

Rusesabagina wari wasabye amezi 6 yo kwiga urubanza impamvu ze ntabwo zemewe ngo ahabwe icyo gihe.

Urukiko rwafashe umwanzuro ko urubanza rukomeza noneho Rusesabagina akazisobanura nyuma y’abandi mbere y’uko urubanza ruburanishwa mu mizi (Hearing the case on Merits) amaze gusoma dosiye yose no kuyiga.

Mu bindi urukiko rwasabye, rwasabye gereza ya Mageragere kujya imuha igihe gihagije cyo kumworohereza kwiga dosiye ye. Urubanza ruracyakomeje aho harimo kumvwa abareganwa na Paul Rusesabagina, Urukiko rwavuze ko na we niyongera kugerwaho azahabwa umwanya n’ubwo we yavuze ko atazagaruka mu rubanza.
.
Mu gihe cyo kwikura mu rubanza iyo ruburanishijwe n’ubundi nk’uko bisanzwe icyemezo cy’urukiko gishingira ku bimenyetso byatanzwe n’uwareze. Iyo uwareze atagaragaza ibimenyetso bituma uwarezwe ahamwa n’ibyaha ashobora kugirwa umwere kabone n’iyo yaba yarikuye mu rubanza.

Uretse kwikura mu rubanza, amategeko y’u Rwanda anateganya ko uregwa ashobora kwihana umucamanza cyangwa se inteko iburanisha.

Ingingo ya 103 n’iya 106 z’itegeko ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi ziteganya uko bigenda mu gihe umuburanyi ahisemo kwihana umucamanza.

Ingingo ya 106, iteganya ko kwihana umucamanza bikorwa mu nyandiko igihe cyose urubanza rutaracibwa. Uwihannye Umucamanza mu iburanisha agomba kwandikira Perezida w’Urukiko inyandiko isobanura impamvu z’ubwihane mu gihe kitarenze umunsi umwe ukurikira uwo iburanisha ryabereyemo ubwihane.

Amategeko kandi anateganya kwivana mu rubanza k’uwareze ( uwaregeye Urukiko). Uyu ashobora kwivana mu rubanza mu gihe yaba atakirubonamo inyungu cyangwa yaba adafite ibimenyetso bihagije. Urugero kwivana mu rubanza bishobora gukorwa n’ubushinjacyaha.

Amategeko ateganya ko ikirego kizima nk’uko ingingo ya 5 y’itegeko ryerekeye imiburanishirize y’imanza z’inshinjabyaha rya 2019 ibivuga aho igira iti “Mu gihe uwari wareze yemeye kureka ikirego igihe biteganywa n’amategeko, icyo kirego kirazima.”

Ntabwo ari ubwa mbere kwivana mu rubanza bibayeho mu Rwanda n’ahandi

Kwivana mu rubanza ariko si ubwa mbere bibayeho mu Rwanda kuko byanabaye mu rubanza rwa Ingabire Victoire RP 0081-0110/10/HC/KIG rwari ruhuriwemo n’abo bareganwaga ubwo yaburanaga n’ubushinjacyaha bw’u Rwanda bwamuregaga icyaha cy’ingengabitekerezo ya Jenoside, icyaha cy’ubufatanyacyaha mu bikorwa by’iterabwoba, icyaha cyo gukurura amacakubiri, icyaha cyo kwamamaza nkana ibihuha bigamije kwangisha rubanda ubutegetsi buriho, icyaha cyo kurema umutwe w’ingabo bagamije igitero cy’intambara n’ icyaha cy’ubwinjiracyaha mu cyaha cyo kugirira nabi ubutegetsi buriho.

Mu iburanisha ryo ku wa 16/04/2012, Ingabire Umuhoza Victoire yamenyesheje urukiko ko atazongera kuburana no kwitaba urukiko, asaba n’abavoka be kutongera kuburana. Ubushinjacyaha na bwo bwasabye ko ategekwa kwitaba urukiko n’ubwo yafata icyemezo cyo kutagira icyo avuga kandi busaba ko mu nyungu z’ubutabera hagenwa umu avoka urengera inyungu z’uregwa.

Urukiko rwemeje ko atari ngombwa guhatira Ingabire Umuhoza Victoire kurwitaba ariko ko umwanditsi w’Urukiko azamumenyesha itariki urubanza ruzakomerezaho n’aho iburanisha rizabera. Rwemeje kandi ko atari ngombwa ko agenerwa umu avoka uhagarariye inyungu ze muri uru rubanza.

Icyo gihe urubanza rwarakomeje Urukiko Rukuru rwemeza ko Ingabire Umuhoza Victoire ahamwa n‘icyaha cy’ubugambanyi bwo kugirira nabi ubutegetsi buriho n’ingingo z’imena z’Itegeko-Nshinga hakoreshejwe iterabwoba n’igitero cy’intambara n’icyaha cyo gupfobya Jenoside ahanishwa igufungo cy’imyaka cumi n’itanu (15 ) ariko nyuma aza guhabwa imbabazi na Perezida wa Repubulika.

Mu mwaka wa 2007 mu rubanza No. ICTR-99-52-A ubushinjacyaha bw’Urukiko Mpuzamahanga Mpanabyaha Rwashyiriweho u Rwanda (ICTR bwari bukuriwe n’umushinjacyaha Hassan Bubacar Jallow bwaregagamo Ferdinanand Nahimana, Jean Bosco Barayagwiza na Hassan Ngeze, umwe mu baregwaga ari we Jean Bosco Barayagwiza yikuye mu rubanza.

Muri uru rubanza, Barayagwiza wunganirwaga n’abanyamategeko Donald Herbert na Tanoo Mylvagana. Urukiko rwa ICTR rwanzuye ko rukomeza gukorana n’abanyamategeko be urubanza rugakomeza kuburanishwa.

Muri uru rubanza Barayagwiza Jean Bosco yaraburanishijwe ahanishwa igifungo cy’imyaka 35 kiza kugabanywa kijya ku myaka 32 nyuma yo guhamwa n’icyaha cyo gukangurira rubanda gukora Jenoside (Incitement to Genocide) n’ibindi byaha bifitanye isano na Jenoside yakoze akoresheje umuyoboro w’itangazamakuru nka KANGURA na Radio RTLM no kuba mu mpuzamigambi z’ishyaka rya CDR.

Mu Rukiko Mpuzamahanga Mpanabyaha Rwashyiriweho u Rwanda (ICTR) urundi rubanza kwikura mu rubanza byabayeho ni urwa André Rwamakuba, washinjwaga ibyaha bya Jenoside yakorewe Abatutsi aho yavuze ko atazongera kugaruka imbere y’urukiko.

Ageze mu Rukiko ku munsi wa mbere w’iburana, yagize ati “Ntabwo nzongera kuza kuburanira imbere y’uru rukiko ruyoborwa na satani, ntabwo nzongera kuza kwitaba kuko mbona umucamanza ari nko kuburana na satani.”

Urukiko rugendeye ku ngingo ya 18 igendanye no kwivana mu rubanza no kwihana umucamanza, perezida w’Urukiko yashyizeho inteko y’abacamanza 3 bashinzwe kwiga kuri iki kibazo birangira iyo nteko igaragaje ko impamvu za André Rwamakuba zifite ishingiro maze umucamanza arasimbuzwa urubanza rurakomeza.

Muri urwo rubanza rwa Rwamakuba rwabaye rukarinda rurangira atitabye yaratsinze urukiko ruramurekura nyuma yo kugirwa umwere.

Kwivana mu rubanza byanabaye mu gihugu cya Senegal k’uwahoze ari Perezida wa Tchad Hissène Habré wabaga muri Senegal aho yari yarahungiye nyuma yo gukatirwa igihano cy’urupfu mu 2008 n’urukiko rw’i Ndjamena muri Tchad.

Uyu mugabo waregwaga ibyaha yakoreye muri TCHAD aho yanakomokaga na we yivanye mu rubanza ubwo yaburanishwaga n’urukiko rudasanzwe rwari rwashyizweho n’umuryango w’ubumwe bwa Afurika . Urubanza rwe rwarakomeje mu 2016 aza no gukatirwa igifungo cya burundu nyuma yo guhamwa n’ibyaha byibasiye inyokomuntu, gufata abagore ku ngufu n’ibindi.

Nyuma y’uko Rusesabagina atangaje ko avuye mu rubanza, Me Rudakemwa umwunganira na we yavuze ko ashyigikiye ibyo Rusesabagina yavuze byo gusezera mu rubanza.

Ibi Rusesabagina yabivuze nyuma y’uko urukiko rwari rumaze kwanzura ko rutesheje agaciro ubusabe bwa Rusesabagina bw’amezi atandatu yo gutegura dosiye, rwemeza ko urubanza rukomeza.

Umucamanza yavuze ko iburanisha rikomeza, Nsabimana Callixte akaba ari we wari ugezweho.

Bigenda bite iyo umuntu yikuye mu rubanza?

Iyo umuntu yikuye mu rubanza nk’ibi bya Rusesabagina, amategeko ateganya ko urukiko rumuhamya ibyaha byose aregwa nk’uko abishinjwa n’Ubushinjacyaha, rukamukatira ibihano.

Soma inkuru irambuye HANO ku bijyanye no kwikura mu rubanza.

Kuri uyu wa Gatanu tariki 12 Werurwe 2021, urugereko rw’urukiko rukuru ruburanisha ibyaha mpuzamahanga n’ibyambukiranya imipaka, rwasubukuye urubanza ruregwamo Paul Rusesabagina, Nsabimana Callixte, Nsengimana Herman n’abandi bantu 18 bose baregwa ibyaha binyuranye bifitanye isano n’iterabwoba.

Mu gutangira iburanisha ryo kuri uyu wa Gatanu, umucamanza yavuze ko uruhande rwa Rusesabagina rwanditse rusaba ko nanone urubanza rwasubwikwa kubera impamvu zitandukanye.

Muri izo mpamvu harimo ko bifuza ko Paul Rusesabagina yabasha kubona umwanya n’ibikoresho bihagije byamufasha gutegura kwiregura kwe.

Me Jean Felix Rudakemwa umwunganira yavuze ko ibyo urukiko rwasabye gereza ya Mageragere gukemura mu rwego rwo korohereza Rusesabagina kubasha kwiregura bitakozwe, bityo bagasaba ko byabanza bigakorwa.

Urukiko rwari rwavuze ko Paul Rusesabagina akwiye guhabwa uburyo bumworohereza dosiye ye, bityo ko akwiye guhabwa mudasobwa irimo dosiye ye, kandi gereza ikamuha igihe gihagije cyo kwiga dosiye.

Hari hagaragajwe kandi ko hari dosiye ze zifatirwa, icyo gihe nab wo urukiko rwari rwasabye ko impapuro Rusesabagina ahererekanya n’abamwunganira zitajya zifatirwa.

Rusesabagina na we yagaragaje ko atarabasha gusoma dosiye ye yose kubera ubunini bwayo cyane ko avuga ko ihuriyemo abantu 21, akaba asaba igihe cyo kuyiga neza no kuyiganiraho n’abamwunganira, hanyuma akazabona kuburana.

Me Rudakemwa kandi yanibukije Urukiko ko umukiriya we yari yarasabye kunganirwa n’abavoka babiri baturutse mu Bubiligi ariko akabyangirwa kandi amategeko abimwemerera ko akwiye kunganirwa n’abo yihitiyemo.

Ubushinjacyaha bwo bugaragaza ko imigirire yose ya Rusesabagina n’abamwunganira mu mategeko igamije gutinza urubanza, kuko umwanya watanzwe uhagije kandi uteganywa n’amategeko, kuba Rusesabagina yize dosiye ye.

Ni icyemezo gifashwe nyuma y’ubusabe bw’ababuranyi batunganiwe harimo Rusesabagina wunganirwa na Me Rudakemwa Jean Félix, kikaba gifatiwe mu iburanisha ryo kuri uyu wa Kane tariki 11 Werurwe 2021.

Akigera mu rukiko, Rusesabagina yarusabye gusubika iburanisha kubera ko umwunganizi we atabonetse kuko bumvaga ko kuba barajuririye icyemezo cyafashwe n’urukiko kirebana no kuvanaho icyemezo kimufunga by’agateganyo, urubanza rutari buburanishwe kandi yabivuganyeho n’umwunganizi we Me Rudakemwa.

Ubushinjacyaha nabwo bukaba bwasabye ko urubanza rwasubikwa kubera inyungu z’ubutabera, kuko urubanza rwa Rusesabagina rwahujwe n’izindi zikaba zisobekeranye kandi akaba ari uburenganzira bwe bwo kunganirwa.

Ni mu gihe kandi bamwe mu baburanyi basabaga ko urubanza rwaburanishwa kuko uburenganzira bwa Rusesabagina butagomba kubangamira ubwabo.

Urukiko rumaze kubona ko hari n’abandi baburanyi batunganiwe, rugashingira ku ngingo ya 29 y’Itegeko Nshinga rya Repubulika y’u Rwanda nk’uko ryavuguruwe kugeza ubu, rushingiye kandi ku ngingo ya 14 y’amasezerano mpuzamahanga yerekeranye n’uburenganzira mu by’imbonezamubano na Politiki ndetse n’iya 126 yerekeranye n’imiburanishirize y’imanza z’inshinjabyaha, ziteganya ibijyanye n’uburenganzira ku butabera buboneye no kunganirwa.

Urukiko rwasanze urubanza rugomba gusubikwa kugira ngo hubahirizwe uburenganzira bw’ababuranyi batunganiwe.

Urukiko kandi rwasanze iburanisha rigomba gukomeza ejo ku wa gatanu tariki ya 12 Werurwe 2021 kugira ngo ababuranyi bose bazabe bafite ababunganira.

Urukiko rwategetse ko abavoka batitabiriye iburanisha ry’uyu munsi kuwa Kane tariki 11 Werurwe 2021, bagomba kuboneka mu iburanisha ryari risanzwe riteganyijwe ejo ku wa Gatanu saa mbiri n’igice za mugitondo (8:30).

Kuri uyu wa Kane tariki ya 11 Werurwe 2021, ubwo hakomezaga urubanza rwa Paul Rusesabagina n’abo bareganwa, Rusesabagina yasabye urukiko gusubika iburanisha kubera ko umwunganira mu mategeko atabonetse, avuga ko iburanisha rikomeje atunganiwe haba hari uburenganzira yimwe.

Ati "Twumvaga tutaburana mu gihe hari icyemezo cyafashwe ejo tutishimiye kandi twajuririye. Nkaba nasabaga ko iburanisha ryasubikwa kubera ko ntunganiwe".

Abajijwe niba abandi baburanyi batakwiregura ku byaha bashinjwa, Rusesabagina yasubije ko mu gihe ntacyo aribubazwe ku byavuzwe n’abo bahuriye mu rubanza ntacyo bimutwaye.

Umwunganizi wa Rusesabagina yabuze asabirwa ibihano

Ubushinjacyaha bwavuze ko iburanisha ryasubikwa kuko abandi baburanye ku byaha na Rusesabagina ashinjwa kugiramo uruhare byaba atari byo.

Ariko nanone bwasabye ko umwunganizi wa Rusesabagina, Me Rudakemwa Jean Félix, yafatirwa ibihano kuko yasibye iburanisha nkana.

Bati "Me Rudakemwa yasibye iburanisha ku bushake, si ukuvuga ko atazi amategeko. Twumva mu bushishozi bw’urukiko yafatirwa ibihano kugira ngo ubutaha bitazongera".

Me Moise wunganira Nsabimana Callixte, nawe yasabye ko Me Rudakemwa yafatirwa ibihano kuko ibyo yakoze ari ugushaka gutinza urubanza.

Ati "Jye ndumva iburanisha ryakomeza kuko uwo nunganira niwe ugomba kwiregura uyu munsi hanyuma Rudakemwa agahabwa ibihano kuko ibyo yakoze ni ugutinza urubanza nkana".

Nsabimana Callixte avuga ko kubyasabwe na Rusesabagina ndetse n’ubushinjacyaha ku gusubika iburanisha, ko uko urukiko rwahaye agaciro ibazwa rya Rusesabagina atunganiwe, ari nako rwafata icyemezo cy’uko iburanisha ryakomeza atunganiwe.

Yavuze ko bigaragara ko hari indi mpamvu yatumye umwunganizi wa Rusesabagina ataboneka, yakwemera ko iburanisha risubikwa, ariko ubu atabyemera kuko byakozwe nkana.

Mu gufata uwo mwanzuro, urukiko rwatesheje agaciro impamvu zose zatanzwe na Rusesabagina zirimo gufatwa no gufungwa binyuranyije n’amategeko ndetse no kuba yarashimuswe azanwa mu Rwanda.

Urukiko rwemeje ko nta burenganzira umuburanyi yavukijwe bityo akomeza kuburana afunze, Rusesabagina akaba yahise ajuririra icyo cyemezo.

Ubwo aheruka mu Rukiko, Rusesabagina yagaragaje inzitizi ko ari mu Rwanda mu buryo bunyuranyije n’amategeko kandi akaba yarahazanywe ashimuswe, asaba urukiko kubahiriza uburenganzira bwe agafungurwa.

Ni mu buhamya uyu mukozi w’Imana w’Umurundi, yatanze imbere y’Urugereko rwihariye rw’Urukiko Rukuru ruburanisha ibyaha mpuzamahanga n’ibyambukiranya imipaka. Ni mu rubanza ruregwamo Rusesabagina Paul, Nsabimana Callixte ‘Sankara’ na Nsengimana Herman ndetse n’abandi 18 ku byaha bifitanye isano n’ibikorwa by’iterabwoba.

Bikurikire muri iyi Video:

Dore uko Paul Rusesabagina, Nsabimana Callixte ‘Sankara’ na Nsengimana Herman ndetse n’abandi 18 bareganwa bageze ku rukiko rw’Ikirenga ruri ku Kimihurura aho urubanza rurimo kubera hirindwa icyorezo cya COVID-19.

Niyomwungere ubwo yari ageze mu rukiko aje gutanga amakuru

Yabitangaje kuri uyu wa Gatanu tariki ya 05 Werurwe 2021, ubwo yumvwaga n’urukiko mu rubanza ruregwamo Paul Rusesabagina na bagenzi be ku nzitizi yari yatanze y’uko akwiye kurekurwa kubera ko kuba ari mu Rwanda binyuranyije n’amategeko kandi ahari nk’ingwate kuko yashimuswe.

Niyomwungere Constantin akomoka mu Burundi ariko akaba afite ubwenegihugu bw’u Bubiligi.

Avuga ko yamenyanye na Paul Rusesabagina bahuriye i Buruseli mu Bubiligi bahujwe n’inshuti ya Niyomwungere mu mwaka wa 2017.

Ngo Rusesabagina yamusabaga ko yamufasha akamuhuza n’abayobozi mu Burundi kuko ngo aribwo yashoboraga kunga abarwanyi be bari bamaze gucikamo ibice kubera kutumvikana.

N’ubwo yamuhakaniye ariko ngo yamuhuje n’umuntu ukora muri Ambasade.
Icyababaje Niyomwungere ngo ni uko nyuma y’igihe gito yaje kumva kuri BBC ko hari abantu bapfuye mu Rwanda bivugwa ko byakozwe n’ishyaka rya Paul Rusesabagina ndetse n’umutwe w’abarwanyi wa FLN.

Icyo gihe ngo yamwandikiye ubutumwa kuri Whatsapp amwemerera ko ari umutwe ayoboye wabishe. Byamwanze mu nda ngo aramuhamagara kuri telefone amubaza impamvu bahisemo kumena amaraso undi ngo amusubiza ko atababajwe n’abapfuye ahubwo yababajwe n’uko Nsabimana Callixte yabyigambye.

Niyomwungere Constantin

Ati “Ikintu cyatumye ntinya uyu mutama ni ukuntu yambwiye ko atababajwe n’abantu bapfuye ahubwo yababajwe n’uko Nsabimana Callixte yabyemeye kandi ubundi bakabigeretse ku ndongozi (ku bayobozi) z’u Rwanda.”

Iyi mvugo ngo yaramubabaje nk’umukozi w’Imana, atangira kuvugana gake na Rusesabagina ariko ngo afata n’umwanya wo kumwigaho cyane.

Mu mwaka wa 2019 Niyomwungere ngo yaje mu Rwanda mu bihe by’iminsi mikuru ariko ngo mu gihe yiteguraga gusubira mu Bubiligi mu kwezi kwa kabiri, ahamagarwa n’umuntu amubwira ko ashaka kumutuma ku muntu mu Bubiligi.

Ngo yafashe inzira ajya kumwitaba ariko atungurwa n’uko abwiwe ko ari abo mu rwego rw’Igihugu rw’Ubugenzacyaha (RIB) bamushaka kandi bamushinja kuba mu mutwe w’iterabwoba wa Rusesabagina.

Niyomwungere ngo yabasobanuriye uburyo yahuye na Rusesabagina ndetse abaha n’amakuru yose. Nyuma y’iminsi itanu ngo nibwo yahawe uburenganzira bwo gukomeza urugendo rwe.

Ajya kugenda ariko ngo yabemereye kuzajya abaha amakuru ya Rusesabagina ku buryo igihe nikigera azafatwa akagezwa imbere y’ubutabera.

Rusesabagina ngo yamusabye kumufasha kugera mu Burundi ariko atanyuze ku mugabane w’i Burayi ndetse no mu bihugu bya Afurika kuko ngo yari yarashyiriweho impapuro zimuta muri yombi.

Rusesabagina ngo yemeye guca i Dubai ariko nabwo yemerewe na Niyomwungere indege yihariye (Private Jet) ndetse Niyomwungere ngo yari yamubeshye ko hari abayobozi mu Burundi bayimukodeshereje.

Niyomwungere Constantin ngo yavuye muri Kenya amara iminsi ibiri i Dubai ariko kuri gahunda yari afitanye n’umukozi wa RIB wari wabashakiye indege ibazana.

Ngo yakiriye Rusesabagina ndetse ntiyatuma baharara ahubwo amusaba ko baruhuka ari uko basoje urugendo bageze i Burundi.

Bageze mu ndege ngo yashatse ukuntu Rusesabagina ataza kumenya amakuru y’aho indege igana aramuganiriza cyane ndetse agera n’aho amusaba ko bakwiryamira mu ndege bakaruhuka.

Agira ati “Tugeze mu ndege namuhinduriye umwanya wo kwicaramo kugira ngo atareba ku kibaho cy’amerekezo y’indege, naramuganirije cyane kugira ngo atumva n’amatangazo ayitangirwamo ngeze aho musaba ko twaryama tukaruhuka arabyemera ndetse aranasinzira yakangutse tugeze hejuru ya Kigali ariko azi ko ari i Bujumbura.”

Rusesabagina ngo yisanze i Kigali yari azi ko agiye i Burundi

Niyomwungere Constantin avuga ko ibyo kuza i Kigali ari we wari ubiziranyeho n’umukozi wa RIB gusa naho Rusesabagina ngo ntabwo yari abizi.

Niyomwungere avuga ko icyatumye yisabira RIB kumufasha kuzana mu Rwanda Rusesabagina kugira aryozwe ibyaha umutwe w’abarwanyi yayoboraga wakoze ari uko yatewe agahinda n’abana b’impfubyi ndetse n’abapfakazi kubera ibitero by’umutwe yayoboraga.

Ati “Nkibona abana b’impfubyi ndetse n’abapfakazi kubera ibitero by’umutwe wa Rusesabagina numvise ngize intimba nk’umuntu w’Imana wifuza ineza, mpitamo gufasha kugira ngo agezwe imbere y’ubutabera, abantu bagizweho ingaruka n’ibitero bye bahabwe ubutabera.”

Avuga ko ibyo Rusesabagina yamubwiraga ari byo byatumye afatwa kuko Niyomwungere yagenderaga ku byo amubwiye ntamuhakanye ariko na none yaramuhishe intego ye.

Niyomwungere yasobanuye ko Rusesabagina batigeze basengana ndetse nta n’ibyerekeranye n’ijambo ry’Imana bigeze baganira mu gihe cyose bamaranye.

Reba ubuhamya bwa Niyomwungere muri iyi Video:

Urubanza rwa Paul Rusesabagina n’abo baregwa hamwe rukaba rutaratangira kuburanishwa mu mizi kuko yakomeje kuzana inzitizi avuga ko inkiko z’u Rwanda zidafite ububasha bwo kumuburanisha.

Paul Rusesabagina yari yarabwiye Urukiko rukuru rurimo kumuburanisha, ko hari inyandiko z’Ubushinjacyaha zimurega atigeze abona, kubera iyo mpamvu ngo akaba afunzwe mu buryo butubahirije amategeko.

Ubushinjacyaha bwari bwarasabwe izo nyandiko, buvuga ko bwazitanze ku itariki 03 Werurwe 2021, ariko Rusesabangina n’umwunganizi we Me Félix Rudakubana bagasaba igihe kingana n’icyumweru kugira ngo babanze basuzume iby’izo nyandiko.

Urukiko rwabanje kwiherera rugaruka ruvuga ko rutakuraho icyemezo cyo gufunga Rusesabagina bitewe n’uko yahawe izo nyandiko ariko ntasome ngo asobanure inzitizi zirimo zituma atakomeza gufungwa by’agateganyo.

Urukiko rwamusabye kubanza gusuzuma izo nzitizi akazazigaragaza mu iburanisha ry’ubutaha, ariko ko bitabuza urubanza gukomeza.

Rusesabagina yakomeje asobanura inzitizi y’uko yashimuswe akazanwa mu Rwanda avanywe muri Leta zunze ubumwe z’Abarabu, i Dubai, kubera iyo mpamvu ngo ari mu Rwanda mu buryo bunyuranyije n’amategeko.

Me Rudakubana wunganira Rusesabagina, yakomeje agira ati "Paul Rusesabagina yarashimuswe, yavuye i Dubai azi ko agiye i Bujumbura, ariko kubera amayeri Bishop (Umupasiteri witwa Niyomwungeri Constantin w’i Burundi) yari yarapanze hamwe n’Ubugenzacyaha bw’u Rwanda, Rusesabagina yashidutse ari i Kigali".

Mu kwisobanura, Ubushinjacyaha buvuga ko Rusesabagina atashimuswe bitewe n’igisobanuro cy’ijambo gushimutwa, kuko ngo nta mukozi wa Leta y’u Rwanda wateye umujyi wa Dubai akajya kuzana Rusesabagina.

Umwe mu bashinjacyaha yashingiye ku nyandiko z’abahanga mu mategeko barimo uwitwa Polson na Demot ngo banditse bavuga ko umuntu ashobora gufatwa mu buryo budakurikije amategeko, ariko agafungwa mu buryo bukurikije amategeko.

Umushinjacyaha yakomeje agira ati "Kugira ngo habeho gushimutwa, ni uko umuntu aba yakuwe mu gihugu(A) akajyanwa mu gihugu (B) hakoreshejwe imbaraga, ikindi kandi ni uko abakozi b’igihugu runaka baba bagize uruhare mu kujya kuvogera ikindi gihugu wa muntu abamo, dushingiye kuri ibyo turagaragaza ko uburyo Rusesabagina yageze mu Rwanda bitakwitwa gushimuta".

Ubushinjacyaha buvuga ko Rusesabagina yari avuye i Dubai ajya i Bujumbura kubonana n’abasirikare bakuru b’umutwe wa FLN uregwa iterabwoba, akaba ari na wo Rusesabagina ashinjwa gushinga no gutera inkunga.

Ubushinjacyaha bwakomeje busaba urukiko kumva ubuhamya bwa Bishop Niyomwungeri wavuzwe ko ari we wamuzanye mu Rwanda, ariko Rusesabangina akaba yamwiyamye avuga ko yamureze mu zindi manza.

Rusesabagina akavuga ko uwo muntu adakwiye gutanga ubundi buhamya bwiyongera ku byo yabwiye ubushinjacyaha.

Ni umwanzuro wasomewe mu rukiko kuri uyu wa Gatanu tariki ya 05 Werurwe 2021 nyuma y’uko Rusesabagina yari yagaragarije urukiko ko atinda kohereza umwanzuro ku nzitizi mu rubanza rwe kubera kutabona umwanya wo kuwutegura.

Nyuma y’ibiganiro hagati y’uregwa n’abamwunganira, n’ubuyobozi bwa gereza ya Mageragere n’Ubushinjacyaha, urukiko rwafashe umwanzuro ku bintu bibiri, ikijyanye no gufatira inyandiko za Paul Rusesabagina ndetse no kuba yahabwa uburyo bumufasha gutegura urubanza.

Urukiko rwasabye ko Rusesabagina ahabwa uburyo bwo gutegura urubanza burimo guhabwa mudasobwa irimo inyandiko zose zigize dosiye ye ndetse na gereza afungiyemo ikamuha igihe gihagije cyo kwiga urubanza rwe.

Ikindi cyagaragaye kigomba gukosorwa ngo ni inyandiko ze zirebana n’urubanza n’izindi zifatirwa akamara igihe atarazisubizwa.

Urukiko rwanzuye ko ku bw’imigendekere myiza y’urubanza no ku bw’uburenganzira bw’umufungwa nk’uko biteganywa n’amategeko arimo itegeko rishyiraho Urwego rw’Igihugu rw’Imfungwa n’Abagororwa, ndetse no ku mahame mpuzamahanga, urukiko rwasanze inyandiko zirebana n’urubanza Rusesabagina Paul ahererekanya n’abunganizi be zidakwiye gufatirwa.

Naho ku zindi nyandiko zitarebana n’urubanza n’ibindi bintu yohererezwa binyujijwe ku bunganizi be, byajya bikorerwa urutonde bikanyuzwa ku buyobozi bwa gereza.

Mu iburanisha riheruka ryo ku wa 26 Gashyantare 2021, Rusesabagina Paul n’abunganizi be bari batanze inzitizi zituma batarashyira umwanzuro muri systeme harimo kuba Rusesabagina yari afite ibibazo birimo kutabona uburyo buhagije bwo gutegura urubanza rwe, kuba hari inyandiko zirebana n’urubanza rwe zifatirwa n’ubuyobozi bwa gereza izindi zikamugeraho zitinze bikamugiraho ingaruka mu gutegura dosiye ye ntatange umwanzuro we ku gihe ndetse ngo akaba hari n’imiti ye atahawe, bikaba imbogamizi ituma ubwo yasurwaga yari ataratanga umwanzuro wo kwiregura.

Rusesabagina yavuze ko atazi umubare w’inyandiko zafatiriwe kandi ngo n’iyo azisubijwe ntamenya izavuyemo.

Rusesabagina Paul n’abamwunganira mu mategeko bavuga ko kubera ko dosiye ye ari nini nk’inyandiko itanga ikirego ifite paji 269 naho ibindi bijyanye na yo bikaba paji zigera ku bihumbi bitatu.

Yasabye ko yahabwa mudasobwa (Computer) ndetse agahabwa n’igihe gihagije ku matara kuko atabona igihe gihagije cyo gusoma dosiye kuko ngo amatara bayazimya hakiri kare ariko agashima uburenganzira ahabwa bwo kuganira n’abunganizi be.

Ubuyobozi bwa gereza ya Mageragere buvuga ko nta nyandiko ze bufatira ariko nanone amabwiriza ya RCS ateganya ko nta kintu cyinjira muri gereza kitagenzuwe na gereza kandi ngo arazisubizwa ntizifatirwa ikindi ngo ntiyigeze akibagezaho uretse kucyumvira mu rukiko uretse ko ngo bemera ko hari igihe zitinda.

Naho kuzimya amatara ngo biterwa n’umutekano w’abagororwa nk’uko amabwiriza ya RCS abiteganya ariko bagiye gushaka uko cyakemuka kugira ngo abashe kwiga dosiye ye neza.

Ku bijyanye no kumushakira imashini (Computer), ubuyobozi bwa gereza bwemeye ko nabisaba buzafatanya n’izindi nzego kuyimushakira nabwo bukaba bwemera ko ari bwo buryo bwiza bwakemura ikibazo.

Kuba hari imiti ya Rusesabagina yafatiriwe, ubuyobozi bwa gereza bwavuze ko amabwiriza ya RCS atemera ko umugororwa abana n’imiti mu cyumba ahubwo ishyirwa kwa muganga umugororwa akajya ayihabwa igihe ayikeneye.

Urukiko nyuma yo kwinjira mu cyumba cya Rusesabagina rwasanze afite uburyo bwo kuba yategura dosiye ye kuko afitemo ameza n’akabati yabikamo impapuro ze.

Rusesabagina n’umwunganizi we Maitre Rudakemwa Felix bavuze ko bataburana kubera ko bageze mu rukiko Ubushinjacyaha butarashyira muri système umwanzuro wabwo ku nzitizi batanze bityo bakaba ngo bataburana kuko ibikubiye muri uwo mwanzuro batabizi.

Ubushinjacyaha bwasobanuye ko impamvu bwatinze gushyira umwanzuro wabwo muri système ku gihe byatewe n’uko uruhande rwa Paul Rusesabagina rwatinze gushyira umwanzuro wabo muri système.

Ubushinjacyaha kandi bwavuze ko umwanzuro bwashyize muri système kuri uyu wa Gatanu tariki ya 05 Werurwe 2021 saa tatu z’amanywa, utashingirwaho ahubwo hakurikizwa umwanzuro usanzwe watanzwe tariki ya 25 Werurwe 2021.

Rusesabagina n’umwunganizi we basabye urukiko ko bahabwa icyumweru bakazaza biteguye kuburana.

Maître Rudakemwa wunganira Rusesabagina ati “Jye nshingiye ku zindi gahunda mfite, twaburana ku wa Gatanu w’icyumweru gitaha kuko nibwo nabona umwanya kandi twaba twamaze gusoma neza ibikubiye mu mwanzuro w’ubushinjacyaha twanawumvise kimwe jye n’umukiriya.”

Ahawe ijambo nk’umwe mu bareganwa na Paul Rusesabagina, uwari umuvugizi wa FLN Callixte Nsabimana yavuze ko ibyo Rusesabagina arimo ari uburyo bwo gutinza urubanza nkana.

Yavuze ko nk’uwari umuyobozi w’ishyaka MRCD-FLN ibyo akora ari nk’umunyeshuri utinya ikizamini.

Ati “Jye ku giti cyanjye ndabona Rusesabagina n’umwunganira sinzi ariko bimeze nka ba banyeshuri twiganaga batinya ikizamini ku buryo noneho igihe habaga habaye ikizamini cyangwa isuzuma (Interrogation) avuga ati ‘muyimure’ bagahora bavuga ngo mwimure isuzuma.”

Nsabimana Callixte ibi akaba abishingira ku kuba uruhande rwa Rusesabagina rugaragara nk’aho rufitiye Ubushinjacyaha impuhwe zo kuba butariteguye kuburana.

Maître Moise Nkundabarashi wunganira Nsabimana Callixte Sankara we yibukije ko uru rubanza ruregwamo abantu 21 n’abaregera indishyi barenga 80, nyamara hakaba hamaze kuba iburanisha inshuro 3 haburana umuburanyi umwe Paul Rusesabagina kandi na we akaba ataraburana mu mizi.

Maître Moise Nkundabarashi avuga ko bikomeje gutyo, urubanza rwazarangira muri 2024, ikaba ari yo mpamvu hakwiye gushyirwaho umurongo kandi ukubahirizwa bitakubahirizwa hakabaho ibihano bikomeye kuko ngo bidakozwe urubanza rutazarangira.

Uhagarariye abaregera indishyi 86, Maître Mugabo Fidele avuga ko igihe cyasabwe na Rusesabagina n’abamwunganira ku gusubiza ku mwanzuro w’ubushinjacyaha ku nzitizi batanze ibyo atari byo ahubwo ari ugutinza urubanza.

Avuga ko bitangaje kuba ubushize baranze kugaragaza inzitizi kuko ngo batayiteguye neza none bakaba bayigaragaje ariko bakaba batifuza kuyiburana ngo kuko ubushinjacyaha ntacyo bwayivuzeho.

Avuga ko mu gihe inzitizi zimaze gusubikwa inshuro eshatu, iburanisha mu mizi rishobora kuzasubikwa inshuro nyinshi zirenze izo.

Yasabye urukiko kudaha agaciro igihe gisabwa na Rusesabagina ahubwo urubanza rukaburanwa kuko ibikenewe byose bihari.

Mugenzi we Maitre Alice Umulisa we yasabye ko urukiko rwasuzuma kureshya kw’ababuranyi mu rubanza kuko hari uruhande rushaka gutinza nkana urubanza.

Avuga nk’abahagarariye abagizweho ingaruka n’ibitero byateguwe bikanashyirwa mu bikorwa n’abaregwa mu rubanza, bifuza ubutabera bwihuse.

Yatakambiye urukiko avuga ko mu gufata umwanzuro hakwitabwa ku kureshyeshya ababuranyi kuko umwe mu baburanyi asa n’uwiharira urubanza rwose.

Maître Mukashema Marie Louise na we wunganira abagizweho ingaruka n’ibitero byagabwe n’umutwe wa FLN, avuga ko n’ubwo ari uburenganzira bwa Rusesabagina gusaba kongererwa igihe cyo kwitegura kuburana ariko nanone uburenganzira bwe burangirira aho ubw’abandi butangirira.

Naho Maître Murekatete Ariette wunganira babiri mu bareganwa na Paul Rusesabagina we yavuze ko ikibazo ari uko icyemezo cyamaze gufatwa ariko ubundi urubanza rwakabaye rutandukanywa kuko uruhande rwa Rusesabagina rutifuza kuburana.

Rusesabagina wahakanye ko ari Umunyarwanda

Ikinyamakuru KT Press cya Kigali Today cyabonye kopi z’inyandiko zo mu mwaka wa 2004 harimo n’ibaruwa Rusesabagina yandikiye Urwego rw’Igihugu rushinzwe Abinjira n’Abasohoka (Immigaration&Emigration), avuga ko yataye urwandiko rw’abajya mu mahanga (Pasiporo).

Urwo rwandiko rw’abajya mu mahanga(pasiporo) ubusanzwe rwemerwa nk’indangamuntu ndetse rukaba ari n’icyangombwa kigaragaza ubwenegihugu bw’umuntu urufite.

Rusesabagina akurikiranyweho gushinga no gutera inkunga umutwe w’iterabwoba wa FLN, ubu akaba arimo kuburana mu rubanza rumwe n’abari abavugizi n’abarwanyi bakuru b’uwo mutwe ushinjwa kwica, gutwika imitungo no gusahura abaturage b’i Nyaruguru na Nyamagabe mu Ntara y’Amajyepfo muri 2018.

Kuva mu Rukiko rw’Ibanze rwa Kicukiro, mu Rwisumbuye rwa Nyarugenge ndetse no mu Rukiko Rukuru mu rugereko ruburanisha ibyaha byambukiranya imipaka aho arimo kuburanira muri iki gihe, Rusesabagina yagiye avuga ko atari Umunyarwanda kuko ngo nta byangombwa by’Ubunyarwanda afite.

Mu cyumba cy’iburanisha cy’Urukiko rw’Ikirenga aho urubanza rwaberaga ku itariki 17 Gashyantare 2021, Paul Rusesabagina yasubije Umucamanza wari umubajije ibijyanye n’umwirondoro we ati "Nongere mbisubiremo ntabwo ndi Umunyarwanda, igihe nari mvuye hano mu Rwanda muri 1996 mpunze, ikintu cya mbere nabanje gutanga ni indangamuntu yanjye ndetse na pasiporo, icyo gihe nari mbaye umuntu utagira igihugu".

Rusesabagina avuga ko yahise yakirwa n’igihugu cy’u Bubiligi nk’impfubyi yari ibuze umubyeyi ari we Rwanda.

Avuga ko icyo gihe yari abaye umuturage w’Umuryango w’Abibumbye (UN) kandi atasubiranye ubwenegihugu bw’u Rwanda kuko ngo atongeye kujya kubusaba.

Rusesabagina yakomeje abwira urukiko ko yashatse kugaruka mu Rwanda abaza ambasade yarwo mu Bubiligi uko byagenda, babanza kumubaza pasiporo afite iyo ari yo, ababwira ko afite iyo mu Bubiligi, bamwemerera ko bazamutereramo viza(kashe) akabona akaza mu Rwanda.

Avuga ko yaje mu Rwanda kuva tariki 01-15 Gashyantare 2003, ndetse no mu mwaka wakurikiyeho wa 2004 mu kwezi kwa Nyakanga (ukwa karindwi), akaba ngo yaragenderaga kuri pasiporo y’u Bubiligi muri izo ngendo zose.

Ati "Ntabwo rero jyewe nongeye gusubirana ubwenegihugu bw’u Rwanda kuko ntabwo nongeye kujya kubusaba".

Paul Rusesabagina, mu iburana rye ashimangira ko Urukiko Rukuru rudafite uburenganzira bwo kumuburanisha, kuko atari Umunyarwanda. Iyumvire uko abisobanura. @ktpressrwanda @ktradiorw #RwOT pic.twitter.com/k4deFFjqnD

— Kigali Today (@kigalitoday) March 3, 2021

Nyamara (nk’uko inkuru ya KT Press ikomeza ibigaragaza), Rusesabagina yaje mu Rwanda mu mwaka wa 2004 abwira Ubushinjacyaha ko yataye pasiporo ye yari yarahawe mu 1996, yari ifite nimero A003469.

Inyandiko y’Urwego rushinzwe Abinjira n’Abasohoka yo ku itariki 21 Nyakanga 2004, igaragaza ko yakiriye icyemezo Rusesabagina yahawe n’Ubushinjacyaha cy’uko yataye Pasiporo ya mbere akeneye indi nshya.

Rusesabagina kandi yahise yuzuza imbonerahamwe y’ibyo yasabwaga ndetse yunganirwa na Minisiteri y’Ububanyi n’Amahanga y’u Rwanda, na yo yahise yandikira Urwego rushinzwe Abinjira n’Abasohoka, isaba ko Rusesabagina yafashwa kubona Pasiporo nshya kuko yavugaga ko indi yatakaye.

Mu kuzuza urutonde rw’ibyo yasabwa bigeze kuri 19 kugira ngo abone indi pasiporo, Rusesabagina yasubije ku gisabwa cya 17 ko ubwenegihugu bundi afite ari Umubiligi, aho yasobanuraga ko ubwenegihugu bw’ibanze bwari Umunyarwanda.

Rusesabagina yahise ajya no kwishyura kuri Rwanda Revenue Authority amafaranga y’u Rwanda ibihumbi 50 (gitansi y’ubwo bwishyu ifite nimero 1309929) kuko yari amaze kugira icyizere ko nta kabuza abonye pasiporo nshya y’u Rwanda.

Ntabwo byatinze kuko muri uwo mwaka wa 2004, Leta y’u Rwanda yaje guha Rusesabagina Pasiporo nshya yari ifite nimero PC 009914, bigaragara ko yarangije igihe mu mwaka wa 2009.

Aha ni ho Rusesabagina afatirwa n’ikimwaro cyo kubeshya, kuko yagiye mu Bubiligi avuga ko ahunze agatanga ibyangombwa yari afite kugira ngo ahabwe pasiporo yaho (bigaragara ko yari ifite nimero EE 760 957).

None Rusesabagina aragarutse abwira inkiko z’u Rwanda ko yahunze agatanga ubwenegihugu bw’u Rwanda kandi atongeye kubusubirana. Hamwe ngo yaratanze ahandi ngo yarataye, none amezi arenze atanu imanza zisubikwa ahanini bitewe n’iyo nzitizi ishingiye ku bwenegihugu.

Ibihugu by’i Burayi na Amerika na byo bikomeje gusaba uyu muturage bivuga ko ari uwabyo, nyamara yaravugaga ko ubwenegihugu byamuhaye ari ubw’inyongera.

Rusesabagina asaba Pasiporo muri 2004 kuko indi yari yarayitaye

Ibaruwa ya Rusesabagina isaba Pasiporo muri 2004

Aho Rusesabagina yishyuriye amafaranga asabwa ngo ahabwe Pasiporo

Icyemezo cy’uko Rusesabagina yari yarataye Pasiporo yahawe mbere

Umunyamakuru Marc Lamont Hill wa Aljazeera ni we wakoze ikiganiro kitavuzweho rumwe

Iyo televiziyo ivuga ko ifite amakuru kuri Minisitiri Busingye aganira n’abajyanama be, aho ngo yavugaga ko Leta yishyuye indege yazanye Paul Rusesabagina i Kigali, nyamara Leta y’u Rwanda yo ivuga ko Rusesabagina yizanye ku bushake ashutswe n’umupasiteri w’inshuti ye wamubwiraga ko bagiye i Burundi.

Al Jazeera kandi ivuga ko uretse ayo makuru yahawe na MINIJUST, yagiranye ikiganiro na Minisitiri Johnston Busingye ku bijyanye n’ifatwa n’ifungwa rya Paul Rusesabagina kuri uyu wa gatanu.

Itangazo MINIJUST yasohoye ku wa Gatanu tariki ya 26 Gashyantare, rivuga ko ibyo biganiro Al Jazeera yerekanye bivuga kuri Minisitiri Busingye n’abajyanama be, bidasobanura ko Guverinoma y’u Rwanda ifite uruhare mu kuzana Paul Rusesabagina mu Rwanda.

Itangazo rya MINIJUST rigira riti “Minisitiri yemeje ko Guverinoma y’u Rwanda yafashije mu rugendo rwageze ku ifatwa rya Paul Rusesabagina i Kigali muri Kanama 2020, ni amakuru yari asanzwe azwi muri rusange kuva muri Nzeri umwaka wa 2020.

Uruhare rwa Leta y’u Rwanda rwanaganiriweho mu rukiko, ni uko itabwa muri yombi ngo ryanyuze mu mucyo kandi ryubahirije amategeko, nta gihe na kimwe uburenganzira bwa Rusesabagina bwigeze buvogerwa.”

MINIJUST ikomeza ivuga (muri iryo tangazo) ko Minisitiri Busingye yashimangiye ko ibiganiro hagati y’abaregwa n’ababunganira, harimo n’ababa bafunzwe by’agateganyo, amategeko y’u Rwanda ateganya ko bitagomba kugira aho bitangazwa.

Minisitiri Busingye (mu kiganiro yahaye Al Jazeera ) ngo yashimangiye ko ibikoresho byose byinjira muri gereza bibanza gusakwa nk’uko amabwiriza agenga Urwego rw’Igihugu rushinzwe Imfungwa n’Abagororwa RCS, abiteganya.

Itangazo rya MINIJUST rikomeza rivuga ko igihe Minisitiri Busingye yari amaze kumenya ko hashobora kuba harabayeho ibitubahirijwe mu kwezi k’Ukuboza 2020, yahise ategeka ko Rusesabagina asubizwa inyandiko ze ndetse na RCS igasabwa gutandukanya inyandiko z’ibanga n’izidakwiye kugirwa ibanga.

Itangazo rya MINIJUST rivuga kandi ko Minisitiri Busingye atigeze asobanura iby’iki kibazo mu kiganiro yagiranye na Al Jazeera, kuko yabonaga ko abunganira Rusesabagina bashobora kubigaragaza nk’inzitizi z’urubanza mu iburanisha ryabaye kuri uyu wa 26 Gashyantare 2021.

Me Gatera Gashabana yabwiye urukiko kuri uyu wa gatanu ko umukiriya we afite ikibazo cyo kwamburwa ibyo afite iyo ageze muri gereza, bigatuma abamwunganira badakora umwanzuro w’urubanza.

Ibi ni byo Rusesabagina n’abamwunganira bavuga ko inyandiko z’uregwa zitagirwa ibanga kandi n’ubusanzwe nta kintu cyihariye ziba zibitse cyabangamira iburanisha ry’urubanza rwe.

Icyakora izi mpungenge gereza izishingira ku kuba hari inyandiko ngo yigeze gufatana Rusesabagina yoherejwe n’umukobwa we, yagaragazaga ko barimo gutegura kumutorokesha, ariko gereza ikaba yaraje kuyisubiza Rusesabagina.

Mu iburanisha ryo kuri uyu wa 26 Gashyantare 2020, Urukiko rwanzuye ko ruzabaza Gereza ya Nyarugenge niba ijya isaba Rusesabangina inyandiko aba yitwaje, kugira ngo ikibazo gikemurwe.

Rusesabagina avugana n’abamwunganira

Uwo mwanzuro ufashwe nyuma y’aho Paul Rusesabagina yangiye kuburana ku nzitizi yari yatanze mbere kuko ngo hari indi ikomeye yagize nyuma yo guhabwa umwanzuro w’uko urwo rukiko rufite ububasha bwo kumuburanisha, uwo mwanzuro ukaba wafashwe mu ibiranisha ryo mu gitondo cyo kuri uyuwa Gatanu.

Umwunganizi wa Paul Rusesabagina, Maître Gatera Gashabana, yavuze ko bataburana kuko batari biteguye, bitewe n’uko batari bazi umwanzuro uri bufatwe n’Urukiko.

Yavuze ko nyuma yo kumenya umwanzuro bahise bagira inzitizi ikomeye kurusha izo bari baratanze mbere.

Yagize ati “Ntitwaburana kuko ntitwiteguye bitewe n’uko nyuma yo kumenya umwanzuro duhise tugira inzitizi ikomeye kuruta izo twatanze mbere. Iza mbere ntitwaziburana kuko ni amakuru twabahaga cyangwa imbogamizi twabagaragarizaga”.

Urukiko rwasubitse urubanza rwa Rusesabagina

Maître Gashabana yasabye urukiko ko bahabwa igihe bakabanza kugaragaza inzitizi bafite ikomeye.

Ubushinjacyaha bwo bwasabaga Urukiko ko rutakwemera ubusabe bwa Rusesabagina bwo gusubika urubanza, ahubwo akaba yaburana ku nzitizi yatanze mbere.

Nyuma yo kwiherera, Urukiko rwanzuye ko Rusesabagina Paul ahabwa uwo mwanya wo kugarariza urukiko inzitizi ikomeye afite.

Urukiko rukaba rwafashe icyemezo cy’uko iyo nzitizi izaba yagejejwe ku Rukiko ku wa Kabiri tariki ya 02 Werurwe 2021, ikaba ariyo izaburanwa ku wa Gatanu tariki ya 05 Werurwe 2021.

Rusesabagina n’umwunganizi we basabye Urukiko igihe cyo gutegura urubanza

Uwunganira Rusesabagina muri urwo rubanza, Me Gatera Gashabana, yavuze ko inzitizi bagaragaje mbere badashobora kuziburana mu gihe hari indi ikomeye bafite batagaragarije Urukiko mbere.
Agira ati "Ntabwo twaburana kuri izo nzitizi twatanze mbere kuko twazitanze tutaramenya umwanzuro w’Urukiko. Nyuma yo kumva umwanzuro dusanze hari indi nzitizi izihatse tugomba kugaragaza ikaba ariyo iherwaho".

Ku ruhande rw’Ubushinjacyaha bwo buvuga ko Rusesabagina akwiye kuburana ku nzitizi yatanze mbere indi ikazaza nyuma.

Buti "Erega twibuke ko atari Rusesabagina uburana wenyine, hari abandi batanze inzitizi zabo. Twaburana ku nzitizi zatanzwe hanyuma iyo ikazaza nyuma".

Ubushinjacyaha buvuga ko kuba Rusesabagina adashaka kuburana ku nzitizi yatanze ari uburyo bwo gutinza urubanza nkana.

Urukiko rwanzuye ko Rusesabagina agomba kuburanira mu Rwanda

Urwo Rukiko rwahamije ko rufite ububasha bwo kuburanisga Rusesabagina kuko ibyaha akurikiranyweho yabikoreye ku butaka bw’u Rwanda, ikindi ngo ni uko ibyo byaha agomba kubikurikiranwaho yaba Umunyarwanda cyangwa umunyamahanga.

Nyuma yo gusoma uwo mwanzuro, Rusesabagina n’abamwunganira bahise batangariza Urukiko ko bagiye guhita bajuririra icyo cyemezo.

Senateri Uwizeyimana Evode azwiho ubuhanga mu mategeko

Yabitangaje ku Cyumweru tariki ya 21 Gashyantare 2021 ubwo yari yatumiwe mu kiganiro kuri Televiziyo yitwa ISIBO.

Senateri Evode Uwizeyimana avuga ko Rusesabagina Paul kuba avuga ko ataburanishwa n’inkiko z’u Rwanda ari ukwibeshya kuko icya mbere giherwaho mu kugena ububasha bw’inkiko harebwa aho icyaha cyabereye.

Ikindi gishingirwaho mu kugena ububasha bw’urukiko ni ubwenegihugu bw’uregwa ndetse n’ubw’uwakorewe icyaha.

Ati “Abafaransa igihe bashakaga kuburanisha bamwe mu ngabo zacu aho ububasha babushingiraga, buriya abapilote b’indege bari Abafaransa, buriya u Bufaransa bwari muri iriya dosiye, ububasha bw’inkiko zabo bwari bushingiye ku kuba abakorewe icyaha ari Abafaransa.”

Senateri Uwizeyimana akomeza agira ati “Ikindi ujya kureba ubwenegihugu bw’uwakoze icyaha cyangwa uwakorewe icyaha, ubanje kureba aho icyaha cyakorewe. Urukiko rufite ububasha bwo kuburanisha icyaha, urwa mbere ruza ni urw’ahakorewe icyaha.”

Senateri Uwizeyimana Evode avuga ko kwihakana ubwenegihugu kwe ntacyo byamufasha mu rubanza kuko harebwa aho icyaha cyakorewe n’abagikorewe.

Uwizeyimana avuga ko inzira Rusesabagina Paul anyuramo yihakana/atakaza ubwenegihugu ntaho zihuriye n’iziteganywa n’amategeko.

Avuga ko itegeko Nshinga ry’u Rwanda harimo ingingo zivuga ko nta muntu n’umwe ushobora kwamburwa ubwenegihugu bw’inkomoko.

Rusesabagina aherutse kuvugira mu rukiko ko atari Umunyarwanda

Icya kabiri ngo hari Abanyarwanda bagiye bajya mu mahanga kubera gushaka imibereho cyangwa mu buryo bwo guhaha ndetse n’uburyo umuntu ashobora kuba impunzi ariko nabwo kugira ngo umuntu atakaze ubwenegihugu bw’inkomoko abanza kubisaba.

Agira ati “Muri ubwo buhunzi hari ubwo umuntu abona adahabwa uburenganzira bitewe n’uko atari umwenegihugu waho kandi kugira ngo ubone ubwenegihugu bwaho ugomba kwiyambura ubwo ufite.”

Akomeza agira ati “Uburyo bwo kwikuraho ubwenegihugu bw’u Rwanda ni ubuhe? Wandikira umuyobozi mukuru ushinzwe abinjira n’abasohoka.”

Senateri Uwizeyimana Evode avuga ko mu mvugo ya Rusesabagina yivugira ko yavuye mu gihugu ari impunzi ndetse yimenyekanisha nk’impunzi mu mwaka wa 1996. Avuga ko kwimenyekanisha nk’impunzi bitavuze ko uba utakaje ubwenegihugu wari ufite.

Senateri Uwizeyimana avuga ko amasezerano mpuzamahanga yo mu 1948 yemerera umuntu gusaba ubuhunzi mu gihe ari imbere y’itotezwa, icyo gihe nabwo ngo igihugu wasabyemo ubuhungiro kikaba ari cyo gifata umwanzuro wo kubuguha cyangwa kubukwima.

Senateri Uwizeyimana avuga ko kuba impunzi ari ibintu bidahoraho ahubwo birangira igihe runaka, akavuga kandi ko kuba ufite Pasiporo na Visa cyangwa utabifite, atari byo bigize ubwenegihugu ahubwo ko ari ibimenyetso by’ubwenegihugu.

Avuga ko Rusesabagina Paul ari Umunyarwanda ufite ubwenegihugu bw’u Bubiligi nk’uko na Evode Uwizeyimana na we ngo ari Umunyarwanda ufite ubwenegihugu bw’ikindi gihugu.

Senateri Uwizeyimana Evode avuga ko nta gihugu gihatira umuntu ubwenegihugu ariko nanone ko mu Rwanda umuntu atabutakaza uko abonye ahubwo yandikira umuyobozi mukuru ushinzwe abinjira n’abasohoka na we akandikira Minisitiri ufite urwo rwego mu nshingano na we akabigeza mu nama y’Aabaminisitiri ikaba ari yo imwemerera kureka ubwenegihugu bw’inkomoko.

Uwizeyimana Evode yakomoje no kuri Idamange uherutse gutabwa muri yombi

Senateri Uwizeyimana Evode avuga ko akurikije ibyo yumvise byavuzwe n’uwitwa Idamange Iryamugwiza Yvonne bikomeye ku buryo ashobora kuba afite ikibazo cyo mu mutwe, Uwizeyimana agasanga Idamange akwiye kubanza gusuzumwa.

Senateri Uwizeyimana ntiyemeranywa n’ibyo Idamange Iryamugwiza Yvonne aherutse gutangaza

Avuga ko kuba Idamange apfobya Jenoside yakorewe Abatutsi kandi yarayirokotse ari agahomamunwa kandi nta gitangaza kuko hari n’abagiye bahabwa amafaranga kugira ngo bajye gushinjura abayikoze.

Senateri Uwizeyimana atangazwa cyane n’ibyo uwo mugore Idamange yavuze by’uko Umukuru w’igihugu cy’u Rwanda atakiriho nyamara Senateri Uwizeyimana amaze guhura na we inshuro nyinshi, ndetse akaba yari ahagararanye na we igihe yarahiriraga inshingano nshya aherutse guhabwa.

Iburanisha kandi ryari ryitabiriwe n’Abanyarwanda barimo n’abaregera indishyi, abanyamahanga bahagarariye ibihugu byabo mu Rwanda barimo n’abavuye muri Ambasade z’u Bubiligi na Leta zunze ubumwe za Amerika, n’u Bwongereza.

Hari kandi umunyamategeko Lilian Langford wavuye mu rugaga rw’Abavoka bo mu ishyirahamwe ry’umuryango uharanira uburenganzira bwa muntu.

Me. Gatera Gashabana yasobanuye ko ibyashingiweho n’ubushinjacyaha mu gukora dosiye yashyikirijwe urukiko ku ifatwa n’ifungwa ry’umukiriya we ari impfabusa bityo ko Urukiko rudakwiye gushingira ku bimenyetso byakusanyijwe mu buryo budakurikije amategeko.

Me. Gashabana yabwiye Urukiko ko Umukiriya we yafashwe mu buryo yise gushimutwa kuko nta nyandiko zo kumuta muri yombi bwigeze bugenderaho ubwo yafatwaga, akibaza n’ukuntu Urukiko rwabishingiyeho rukemera gutangira guca urubanza mu mizi.

Yavuze ko yaba ifatwa rya Rusesabagina, kubazwa mu Bugenzacyaha n’Ubushinjacyaha, gukorerwa dosiye no kuyishyikiriza urukiko byose ari impfabusa kandi kuko bitakurikije amategeko.

Umucamanza yabajije Me. Gatera Gashabana niba ari kujuririra ifatwa n’ifungwa n’ifungurwa maze Gashabana asobanura ko icyo agamije ari ukugaragariza Urukiko ko rudafite ububasha bwo kuburanisha Paul Rusesabagina ku byaha akurikiranyweho.

Me. Gashabana yakomeje avuga ko inyandiko zakozwe zo gufata no gufunga Rusesabagina zagiye zikorwa hashingiwe ku cyo yise uburiganya, bivuze ko n’Urukiko rwaregerwa ibyo bintu rudafite ububasha bwo kuburanisha Paul Rusesabagina.

Ibyo byongeye gushimangirwa n’uregwa Paul Rusesabagina aho yagaragaje ko mu ifatwa rye hatakurikijwe amategeko kuko yafashwe yitwa Umunyarwanda kandi ari Umubiligi bivuze ko ahubwo yashimuswe, agasaba ko ikirego cyatanzwe n’Ubushinjacyaha kitahabwa agaciro mu Rukiko.

Ubushinjacyaha bwasobanuye ko Rusesabagina atashimuswe, kandi akurikiranywe nk’Umunyarwanda

Umucamanza yahaye ijambo Ubushinjacyaha ngo bugire icyo buvuga ku byo Me. Gashabana n’umukiriya we bagaragarije urukiko, maze umushinjacyaha atangira avuga ko bishoboka ko Me. Gashabana na Rusesabagina batasomye neza Dosiye.

Umushinjacyaha yavuze ko dosiye yose igizwe n’ibika bisaga 800, ariko uregwa n’umwunganira mu mategeko bibanze gusa mu gika cya 71, maze yifuza gusobanura ibijyanye n’izo nzitizi zagaragajwe.

Umushinjacyaha yagaragaje ko ibivugwa ko Paul Rusesabagina yafashwe nk’Umunyarwanda kandi ari Umubirigi atari byo kuko Ubushinjacyaha buzi neza uwo burega, bityo ko butemeranwa n’ibyasabwe ko umwirondoro we wakosorwa.

Umushinjacyaha kandi yagaragaje ko hagize ibikurwa mu mwirondora wa Rusesabagina byaba bigamije kugira bimwe bihishwa muri uru rubanza, maze ahamya ko ibyashingiweho byose Rusesabagina agafatwa byakurikije amategeko kuko kugeza ubu, bafashe Rusesabagina w’Umunyarwanda kabone n’ubwo afite ubwenegehugu bw’u Bubiligi.

Umushinjacyaha yasomye indi ngingo igaragaza ko Urukiko rukuru rufite ububasha bwo kuburanisha umunyamahanga cyangwa Umunyarwanda ukoreye ibyaha mu Rwanda, mu gihe Rusesabagina we avuga ko ibyo aregwa yigeze no kubiregwa mu nkiko zo mu bubirigi kandi urubanza rutararangira.

Kuri iyi ngingo ya Rusesabagina, Ubushinjacyaha bwagaragaje ko Paul Rusesabagina yigeze koko gukurikiranwa n’ubutabera bwo mu Bubirigi bisabwe n’u Rwanda ariko Ubushinjacyaha bw’Ububirigi bugakorana n’ubw’u Rwanda haba mu gukusanya ibimenyetso no gukora dosiye.

Ubushinjacyaha bwahakanye ko imikoranire y’u Rwanda n’u Bubiligi mu gukurikirana ibyaha Rusesabagina yaketsweho mu 2010 yajemo agatotsi

Umucamanza yasabye ubushinjacyaha ngo busobanure ku iburabubasha ry’urukiko rigaragazwa na Rusesabagina kubera ko yafashwe yitwa Umunyarwanda kandi ari Umubiligi, n’ikimenyinyi ko yigeze kuregerwa ubushinjacyaha bw’Ububirigi kuko bitari gushoboka ko Umubirigi yoherezwa mu Rwanda kandi urwo rubanza rutararangira.

Icyo gihe kandi Ubushinjacyaha ngo bwagaragaje ko koko Rusesabagina ari Umubirigi bityo ko atakurikiranwa n’iniko z’u Rwanda.

Ubushinjacyaha bwasobanuye ko dosiye bwakurikiranyeho Rusesabagina muri 2010 koko yakurikiraniwe mu Bubiligi ariko ko Ubushinjacyaha bw’u Rwanda ari bwo bwabisabye kandi bugafasha ubwo mu Bubiligi gukora dosiye.

Ubushinjacyaha kandi bwasobanuye ko iyo dosiye atari yo buri gukurikirana kuko ubu akurikiranweho ibyaha yakoreye mu Rwanda nk’Umunyarwanda unafite ubwenegihugu bw’u Rwanda kuko ataragaragaza uko ubwo bwenegihugu kavukire yabutakaje.

Ubushinjacyaha kandi bwagaragaje ko ibimenyetso by’urwo rubanza bwamaze kubikura uko byakabaye mu Bubirigi kugira ngo bizakurikiranwe mu Rwanda, ibyo bikaba bigaragaza ko Ububirigi bwakoranye n’u Rwanda mu kumuregera inkiko zabwo.

Umushinjacyaha yavuze ko ibyo bisobanuro by’imikorere hagati y’ubutabera bw’ibihugu byombi buca akarongo mu kugaragaza ko mu ikurikiranwa rya Rusesabagina icyo gihe nta gatotsi kajemo.

Yagize ati, “Ibimenyetso byari byarashatswe n’u Rwanda n’ibyashatswe n’Ububirigi, n’ibyari byaratanzwe n’u Rwanda byose byohererejwe Ubushinjacyaha bw’u Rwanda ku buryo Ubushinjacyaha bw’u Rwanda buzabyikurikiranira”.

Yasabye ko Urukiko rubishingiraho rugakurikinara Rusesabagina kuko ibyo yari akurikiranweho mu Bubirigi byabaye bihagaze ubu akaba ari gukurikiranwa ku byaha yakoreye mu Rwanda.

Ubushinjacyaha bwagaragaje ko Rusesabagina n’umwunganira mu mategeko bitiranyije ingingo ebyiri zitandukanye

Ubushinjacyaha bwagaragaje ko icya mbere uregwa n’umwuganizi we bashingiraho bagaragaza ko urukiko rudashobora kuburanisha urwo rubanza, nta shingiro bifite kuko birangira ntaho bagaragaje ingingo yashingirwaho Iburabubasha ry’Urukiko.

Ubushinjacyaha bwagaragaje ko itegeko rigena ububasha bw’Inkiko mu Rwanda mu ngingo ya 42 iteganya ububasha rw’Urugereko rwihariye ruburanisha imanza mpuzamahanga n’ibyaha byambukiranya imipaka.

Bwifashishije agace ka kabiri k’iyo ngingo ubushinjacyaha bwagaragaje ko Urugereko rw’Urukiko rukuru rufite ububasha bwo kuburanisha abantu bose harimo n’abanyamahanga, imiryango itari iya Leta cyangwa amashyirahamwe y’Abanyarwanda cyangwa ayo mu mahanga, igihe bikurikiranweho ibyaha byakorewe mu ifasi y’u Rwanda cyangwa mu mahanga ibyaha byo ku rwego mpuzamahanga.

Ibyo byaha ni iby’iterabwoba, ibyo gucuruza abantu, iby’ubucakara n’ibifitanye isano nabyo hamwe n’ibindi bikomeza muri iyo ngingo kugeza ku gace ka cyenda kayo, ibyo ngo kuba bitagaragajwe n’abaregwa ngo byerekana uburyo inzitiza yatanzwe na shingiro ifite.

Icya kabiri bushingiraho ngo ni uko hashingiwe ku cyo itegeko riteganya kuko ibigaruka ku ngingo ya 71 yashingiweho hatangwa ikireho, ko ikorwa ry’ibyaha byakozwe n’uko byatangiye kugeza uyu munsi.

Ubushinjacyaha bwasobanuye ko abaregwa bagaragaza ko muri icyo gika havuzwe ibijyanye no koherezanya abakurikiranweho ibyaha kuko, ibyo atari byo bishingirwaho ngo hagenwe ububasha bw’inkiko.

Hagaragajwe ko n’ubwo ubushinjacyaha bwemeye ko Rusesabagina aburanira mu Bubirigi ku byaha yaregwaga bitashingirwaho mu kugena ububasha bw’inkiko z’u Rwanda kandi kugira ubwenegihugu bw’Ububirigi bitashingirwaho byambura inkiko zo mu Rwanda ububasha.

Ku kijyanye no ku kibazwa n’Ubucamanza niba Umubiligi ukoreye icyaha mu Rwanda atakurikiranwa n’inkiko z’u Rwanda, Me. Gashabana agaragaza ko yakurikiranwa gusa igihe yaba yarafashwe mu buryo bukurikije amategeko.

Nyamara Ubushinjacyaha bwagaragaje ko ibyo byaburanwe kandi bigafatwaho umwanzuro ko urubanza rukomeza nk’uko biteganywa n’ingingo ya 86 kandi ko icyemezo cyajuririrwe, kigasuzumwa kandi inzira zarangiriye aho bityo ko kidashobora kugaruka mu rubanza mu mizi.

Mu bindi ubushinjacyaha bwagaragaje ko ikirego bwatanze cyakirwa kandi ko urukiko rubifitiye ububasha ni uko hashyirwa mu mwanzuro ikijyanye no kuba Rusesabagina ubwe yaratanze ikirego muri Rukiko rwa Afurika y’i Burasirazuba (EAC) nk’Umunyarwanda kandi ko yabaga ko icyo kirego cyakwakirwa n’urwo rukiko kuko ari Umunyaranda ubarwa nk’umunyamuryango wa (EAC).

Urukiko rwongeye guha ijambo Me. Gashabana n’uwo yunganira maze bagaragaza ko igihe cyose bazabona ko ibyashingiweho byose Rusesabagina ashyikirizwa ubucamanza kandi binyuranyije n’amategeko bazakomeza kubigaragaza.

Yabitangaje kuri uyu wa Gatatu tariki 17 Gashyantare 2021, mu rubanza ruregwamo Paul Rusesabagina n’abandi bashinjwa ibyaha birimo ibyerekeranye no guhungabanya umutekano w’u Rwanda.

Ahawe ijambo ngo avuge ku nzitizi zatanzwe n’uruhande rwa Rusesabagina ku kuba urukiko nta bubasha rufite rwo kumuburanisha, Nsabimana Callixte yavuze ko atewe isoni n’amagambo ya shebuja.

Ati "Jyewe nagize isoni ncyumva amagambo ya Bwana Rusesabagina nanungirije mu ishyaka, kandi urugamba twateguye tukanarutsindwa, tugafatwa, byagaragaraga ko dukuyeho ubutegetsi ari we wari kuzaba Perezida."

Nsabimana Callixte avuga ko atumva ukuntu yajyaga kuba Perezida w’u Rwanda atari Umunyarwanda.

Yagize ati "None se niba atari Umunyarwanda yajyaga kuba Perezida warwo gute? Ni bya bindi se bya mpatse ibihugu (Ne-colonialism)?"

Nsabimana Callixte bakunze kwita Sankara asanga ibyo Rusesabagina avuga ari uburyo bwo gutinza urubanza, agasaba ku giti cye nk’umaze imyaka ibiri aburana, urubanza rwakwihutishwa akamenya aho ahagaze.

Bikurikire muri iyi Video:

Rusesabagina yavuze ko atari Umunyarwanda

Ubushinjacyaha bushingiye ku kirego giherutse kuregerwa Urukiko rwa (EAC) gitanzwe na Rusesabagina yagaragaje ko ari Umunyarwanda utuye i Kigali bityo ko urukiko rwabishingiraho ruha agaciro icyo kirego nk’Umunyarwanda ubarizwa muri uwo muryango wa (EAC).

Ubushinjacyaha kandi bwasobanuye ko Rusesabagina ari Umunyarwanda bwareze nk’Umunyarwanda ufite ubwenegihugu bwa kabiri bw’u Bubiligi, afite ababyeyi bazwi b’Abanyarwanda kandi adahakana ko ari ababyeyi be, bivuze ko ari Umunyarwanda ufite ubwenegihugu bwe bw’ifatizo nk’ubwenegihugu nyarwanda.

Ubushinjacyaha bugaragaza ko kuba yaragize ubundi bwenegihugu bidakuraho ubwenegihugu bw’u Rwanda igihe atagaragaza mu buryo bwemewe n’amategeko uko yaje gutakaza ubwenegihugu bw’Ubunyarwanda ngo abone gushaka ubundi.

Ubushinjacyaha busaba Urukiko gusaba Rusesabagina ibimenyetso bishingiye ku ngingo y’itegeko iteganya uburyo bwo kureka Ubenegihugu bw’Ubunyarwanda.

Umucamanza yabwiye urukiko ko ntacyo bitwaye kuba Rusesabagina yagira ubwenegihugu bubiri kugira ngo akurikiranwe.

Umushinjacyaha agaragaza ko umuntu ukurikiranwe n’urukiko agomba kuba afite umwirondoro nyawo kugira ngo hatazamo inzitizi zo kuba urukiko rwakurikirana umuntu utari we ku byaha aregwa.

Rusesabagina avuga ko ari imfubyi y’Umuryango w’Abibumbye (UN)

Rusesabagina avuga ko kuva mu 1996 ageze mu Bubiligi yatakaje ikarita ye ndangamuntu na Pasiporo bye bivuze ko icyo gihe yahise aba umwana w’Umuryango w’Abibumbye (UN) ari na ho u Bubiligi bwatangiye kumufasha nk’umuntu wa UN, bityo ahabwa indi karita ndangamuntu ya UN na Pasiporo ya UN kandi yakomeje kubikoresha uretse mu Rwanda gusa kuko atari akiri Umunyarwanda.

Ahamya ko u Bubiligi bwamureze nk’impfubyi ya UN kugeza muri 2000, akaba atyo Umubiligi kuko atongeye gusubirana ubwenegihugu bw’u Rwanda, avuga ko ubwo yashakaga kuza mu Rwanda muri 2003 yangiwe na Ambasade y’u Rwanda ko ataha nk’Umunyarwanda kuko byasabye ko yishyura amafaranga ya Visa y’u Bubiligi.

Avuga ko ageze mu Rwanda ku wa 01 kugeza ku ya 15 Werurwe 2003 yakiriwe nk’Umubiligi, kuko anashatse kuhagaruka mu mwaka ukurikiyeho yaje nk’Umubiligi yongera kwakirwa nk’Umubiligi.

Avuga ko uyu munsi akiri Umubiligi wafatiwe mu Rwanda ashimuswe kuko byakozwe mu buryo bunyuranyije n’amategeko, ko akwiye gufatwa nk’umunyamahanga uri mu Rwanda mu buryo bunyuranyije n’amategeko.

Avuga ko ashingiye ku busabe bw’Ubushinjacyaha bwo gusaba ko Rusesabagina yoherezwa mu Rwanda ku byaha yaregwaga, u Bubiligi bwanze kumutanga kuko umuturage wabo atakoherezwa mu Rwanda, ko iyo aza kuba Umunyarwanda bwari kumutanga.

Avuga ko Ubushinjacyaha bwagiye kumurega mu Bubiligi kuko iyo bumushaka nk’Umunyarwanda buba bwarazanye umuturage warwo bigaragaza ko ari Umubiligi kuko Abanyarwanda bataregwa mu Bubiligi.

Umucamanza yagaragarije Rusesabagina ko hakurikijwe ibyo amategeko y’u Rwanda ateganya uregwa agomba kugaragaza uko yatakaje Ubunyarwanda maze Rusesabagina asubiza ko amategeko y’u Rwanda atayazi, kuko nta byangombwa by’u Rwanda afite, ntaho atuye mu Rwanda, nta Pasiporo y’u Rwanda cyangwa indangamutu nyarwanda agira.

Ku bijyanye no kuba mu Rukiko rwa Arusha uregwa yaratanze ikirego mu rukiko rw’Umuryango wa Afurika y’Iburasirazuba (EAC) avuga ko ari Umunyarwanda utuye i Kigali, Rusesabagina avuga ko icyo yibuka ari uko yagaragaje ko mu Rwanda ahafite aderesi ariko atavuze ko ari Umunyarwanda bityo ko ibyo azabanza akabisuzuma niba hari ahanditse ko yavuze ko ari Umunyarwanda.

Ni urubanza Urukiko Rukuru ruvuga ko rudashobora kurangira vuba mu gihe haba habayeho kuburanisha umwe umwe cyangwa buri tsinda ukwaryo, bitewe n’umubare munini w’abarega n’abaregwa.

Me Mukashema Marie Louise hamwe na bagenzi be Me Alice Umulisa na Me Mugabo bunganira abaregera indishyi, basimburanye mu gusoma amazina y’abaturage biciwe ababo n’abangirijwe imitungo, abenshi bakaba ari abo mu murenge wa Nyabimata mu karere ka Nyaruguru.

Hari n’abandi baregera indishyi batuye mu turere twa Rusizi, Nyarugenge na Kayonza, bakaba bari bafite ababo n’ibyabo mu turere twa Nyaruguru na Nyamagabe.

Ubushinjacyaha buvuga ko muri utwo turere hapfuye abaturage icyenda baguye mu bitero byagabwe n’umutwe wa FLN w’impuzamashyaka MRCD muri 2018-2019, icyo gihe iyo mpuzamashyaka ikaba yarayoborwaga na Paul Rusesabagina.

Rusesabagina ushinjwa ibyaha 13 byo kurema no gutera inkunga umutwe w’Iterabwoba wa FLN, yemereye urukiko ko yawuteye inkunga y’amayero ibihumbi makumyabiri (akaba arenga amanyarwanda miliyoni 20).

Ku mbuga nkoranyambaga zitandukanye na ho Rusesabagina yavugaga ko ashyigikiye umutwe wa FLN wavaga muri Nyungwe ukagaba ibitero ku baturiye iryo shyamba mu turere twa Nyaruguru na Nyamagabe.

Hari igitero cyagabwe mu murenge wa Nyabimata mu karere ka Nyaruguru ku itariki 19 zishyira 20 Kamena mu mwaka wa 2018, cyiciwemo uwitwaga Maniraho Anatole wari umuyobozi ushinzwe amasomo mu rwunge rw’amashuri rwa Nyabimata hamwe na Habarurema Joseph wari umucuruzi w’inyama.

Iki gitero kandi cyakomerekeyemo abantu batavuzwe umubare ariko barimo n’Umunyamabanga nshingwabikorwa w’Umurenge wa Nyabimata, ndetse we akaba yaranatwikiwe imodoka.

Umwe mu bahoze ari abavugizi ba FLN, Nsabimana Callixte yabwiye urukiko ko ibyo aregwa bifitanye isano n’ibya Paul Rusesabagina wabayoboraga ku rwego rw’ikirenga, bikaba ari imwe mu mpamvu zatumye imanza z’abahoze muri FLN zihuzwa n’urwa Paul Rusesabagina.

Urubanza mu mizi rwatangiye kuburanishwa kuri uyu wa gatatu, ni rwo ruzagaragarizwamo ibyo abaregwa bose uko ari 20, barimo Nsabimana Callixte, Nsengimana Herman na Paul Rusesabagina bagomba gutanga nk’indishyi y’akababaro.

Paul Rusesabagina mu rukiko kuri uyu wa Gatatu

Yabivuze mu iburanisha ryo kuri uyu wa 17 Gashyantare 2021 ryabereye mu cyumba cy’Urukiko rw’Ikirenga i Kigali.

Iri buranisha ryari risanzwe ribera ku cyicaro cy’urugereko rw’Urukiko Rukuru rwa Nyanza mu Ntara y’Amajyepfo rukurikirana ibyaha mpuzamahanga n’ibyaha byambukiranya imipaka, rukaba rwimuriwe muri iki cyumba, i Kigali kubera impamvu zatangajwe zirimo, kwirinda ikwirakwira ry’icyorezo cya COVID-19 no korohereza abaregera indishyi muri uru rubanza kugira ngo babashe gukurikira iburanisha ku buryo bw’ikoranabuhanga.

Nyuma yo gusomerwa ibyaha abaregwa bakurikiranyweho n’imyirondoro yabo, Perezida w’Urukiko rukuru, urugereko ruburanisha ibyaha mpuzamahanga n’ibyaha byambukiranya imipaka, uyoboye iburanisha yatanze umwanya ngo abaregwa bagire icyo bavuga kuri iyo myirondora n’impapuro z’ihamagara ndetse n’ibyaha baregwa.

Nyuma ya Nsabimana Callixte, na Herman Nsengimana, hakurikiyeho Paul Rusesabagina maze abajijwe niba umwirondoro yasomewe ari uwe arabihakana kuko ngo banditse ko ari Umunyarwanda kandi ari Umubiligi.

Yasabye ko mu mwirondoro handikwamo ko ari Umubiligi naho ku byaha yasomewe, avuga ko ntacyo abihinduraho.

Nsabimana Callixte, Paul Rusesabagina na Herman Nsengimana bose batawe muri yombi bashinjwa ibyaha bifitanye isano

Umwanzuro wo guhuza izi manza wafashwe n’Urukiko Rukuru, Urugereko ruburanisha ibyaha byambukiranya imipaka ku wa 03 Ukuboza 2020, nyuma y’uko Paul Rusesabagina yiyemereye mu rukiko ko yateye inkunga umutwe wa FLN ushinjwa kwica, kwambura no kwangiriza abaturage mu turere twa Nyamagabe na Nyaruguru muri 2018-2019.

Paul Rusesabagina amaze amezi arenga atanu mu Rwanda aburana ku bijyanye n’ifungurwa ry’agateganyo, nyuma yo gufatirwa mu Rwanda kubera kuba yarayoboye impuzamashyaka MRCD ifite umutwe wa FLN.

Ku itariki 14 Nzeri 2020, Paul Rusesabagina yemereye Urukiko rw’ibanze rwa Kicukiro ko yahaye Umutwe wa FLN inkunga y’amayero ibihumbi makumyabiri(ararenga amanyarwanda miliyoni 20).

Icyo gihe Rusesabagina yagize ati "Mu bibazo nabajijwe (mu gihe hakorwaga inyandikomvugo y’urubanza), ibyo nashubije ’Yego’ ntabwo ari byinshi ariko icyabazaga ngo ’wafashije FLN?’ Naravuze nti ’Yego’ nafashishije FLN ibihumbi 20 by’amayero".

Uretse n’ibyo, mu gihe Paul Rusesabagina yari Perezida w’Impuzamashyaka MRCD, yagiye yigamba(ku mbuga nkoranyambaga) ko ashyigikiye umutwe wa FLN igihe wagabaga ibitero mu turere twa Nyaruguru na Nyamagabe.

Abari abavugizi ba FLN ari bo Nsabimana Callixte na Nsengimana Herman bagiye bifuza ko urubanza rwabo ruhuzwa n’urwa Paul Rusesabagina, kuko ngo ibyo baregwa bifitanye isano n’ibyo Paul Rusesabagina aregwa.

Ibi ariko Inteko Ishinga Amategeko y’Umuryango w’Ubumwe bw’u Burayi ntabwo yabyitayeho, kuko ku itariki 11 Gashyantare 2021 yafashe umwanzuro wo gusaba Leta y’u Rwanda kurekura byihuse Paul Rusesabagina.

Nyuma y’iminsi itanu ku itariki 15 Gashyantare 2021, Inteko Ishinga Amategeko y’u Rwanda yahise ifata umwanzuro wo gusubiza Inteko y’u Burayi ko irekurwa rya Rusesabagina ritashingira kuri uwo mwanzuro, bitewe n’uko ngo nta kuri n’icukumbura byakozwe ku byaha aregwa.

Ubushinjacyaha bw’u Rwanda burega Paul Rusesabagina ibyaha 13 ari byo (1)kurema umutwe w’ingabo utemewe cyangwa kuwujyamo, (2) no gutera inkunga iterabwoba.

Gukora (3) iterabwoba ku nyungu za politiki, (4)gukora no kugira uruhare mu bikorwa by’iterabwoba, (5)gutanga amabwiriza mu gikorwa cy’iterabwoba, (6)kuba mu mutwe w’iterabwoba.

Akurikiranyweho kandi (7) kugambana no gushishikariza abandi gukora iterabwoba (8) ubufatanyacyaha ku cyaha cy’ubwicanyi buturutse ku bushake, (9) ubufatanyacyaha ku cyaha cyo gufata umuntu ho ingwate, (10) ubufatanyacyaha ku cyaha cyo kwiba hakoreshejwe intwaro.

Rusesabagina kandi araburana ku bijyanye n’(11)ubufatanyacyaha ku cyaha cyo gutwikira undi ku bushake inyubako, (12) ubufatanyacyaha ku cyaha cyo gukubita cyangwa gukomeretsa ku bushake, ndetse (13) n’ubufatanyacyaha ku cyaha cyo gushyira abana mu mirwano no kubakoresha imirimo ijyanye n’inshingano za gisirikare.

Nsabimana Callixte, Paul Rusesabagina na Herman Nsengimana na bagenzi babo bose batawe muri yombi bashinjwa ibyaha bifitanye isano

Kwimura ahabera urubanza byanatumye iburanisha ryo kuri uyu wa 26 Mutarama 2021 ryabereye ku Rugereko rw’Urukiko Rukuru ruburanisha ibyaha mpuzamahanga n’ibyaha byambukiranya imipaka i Nyanza mu Ntara y’Amajyepfo risubikwa kubera impamvu zagaragarijwe abaregwa n’ababunganira mu mategeko.

Urukiko twatangarije abari aho ko rwari ruje gusoma umwanzuro warwo wo kwimurira urubanza mu i Kigali mu cyumba cy’Urukiko rw’Ikirenga mu Mujyi wa Kigali, kandi ko abaregera indishyi batari kubona uko bagera ku Rukiko kubera Guma mu Rugo mu Mujyi wa Kigali na Guma mu Karere aho abandi batuye.

Ubushinjacyaha bwasabye ko urubanza rwakwigizwa mu matariki ya 10 Gashyantare 2021 kuko bwiteguye kuburana, icyifuzo cyanashyigikiwe na Nsabimana Callixte, ariko kikabangamirwa na Paul Rusesabagina wasabye ko urubanzwa rwashyirwa ku wa 17 Gashyantare 2021 ari na byo Urukiko rwahaye agaciro rushyiraho itariki yo kuburana.

Ibindi byatangarijwe mu Rukiko ni uko abaregwa noneho bazaburana imbona nkubone kuri iyo tariki ya 17 Gashyantare ku kicaro cy’Urukiko rw’Ikirenga saa 08h30’ za mu gitondo, aho kuburanira ku ikoranabuhanga nk’uko byakunze kugenda mu maburanisha yarangiye, ibyo na byo bikaba byanyuze abaregwa.

Paul Rusesabagina wari Perezida w’Impuzamashyaka (MRCD) ashinjwa ibyaha 13 birimo gufasha imitwe irwanya u Rwanda, naho Nsabimana Callixte wari umuvugizi wa FLN ashinjwa ibyaha 17 na we birimo kurema imitwe y’iterabwoba n’ubwicanyi, ibyaha ahuriyeho na Herman Nsengimana wamusimbuye ku buvugizi bwa FLN uregwa ibyaha 5 birimo iterabwoba.

Perezida Kagame yavuze ku by’abasaba ko Rusesabagina arekurwa

Perezida Paul Kagame abitangaje mu gihe benshi mu banyamahanga bazi Rusesabagina nk’intwari kubera filime Hotel Rwanda, nyamara bakirengagiza uruhare yagize mu mutwe w’inyeshyamba FLN yari abereye umuterankunga wateye mu Rwanda ukica abaturage mu Ntara y’Amajyepfo abandi bagasigirwa ubumuga n’ibitero by’izi nyeshyamba.

Umudepite mu Nteko Ishinga Amategeko ya Leta Zunze Ubumwe za Amerika, Carollyn B. Maloney, aherutse kwandikira Perezida Paul Kagame amusaba kurekura Paul Rusesabagina, agasubira muri Leta Zunze Ubumwe za Amerika dore ko yemerewe kuhaba.

Yanditse avuga ko Leta y’u Rwanda yakoresheje uburyo butanoze mu guta muri yombi Rusesabagina, ngo kuko hirengagijwe inzira ziteganywa n’amategeko ya Amerika zerekeye gusaba no guhererekanya abakekwaho ibyaha.

Paul Rusesabagina mu rukiko

Perezida Paul Kagame asubiza uyu muyobozi kimwe n’abandi bumva ko Paul Rusesabagina yarekurwa, yabasabye gutegereza umwanzuro w’ubutabera aho kugendera ku marangamutima, avuga ko kujyanwa mu butabera kwa Rusesabagina bishingiye ku bimenyetso bihari kandi ubutabera buzakora akazi kabwo.

Perezida Kagame yijeje ubutabera ku bagizweho ingaruka n’ibitero bya FLN

Nubwo umuryango wa Rusesabagina n’imiryango imushyigikiye basaba ko yarekurwa, Mukashyaka Josephine wapfakajwe n’ibitero by’umutwe wari uyobowe na Rusesabagina muri Nyaruguru avuga ko ashimira ingabo z’u Rwanda zabatabaye.

Agira ati “Ndi umwe mu bapfakajwe na FLN muri Nyabimata, turabashimira umutekano dufite ubu, kuko ubwo twaterwaga ari mu gicuku abana bagaterwa ibyuma mwarahabaye mugarura umutekano ubu turarinzwe. Ikindi dushima ni uko abagize uruhare muri ibyo bitero barimo Rusesabagina na Sankara bafashwe bityo tukaba twizeye ubutabera.”

Perezida Paul Kagame avuga ko ubutabera buzaboneka kandi bukanyura mu mucyo ku bagize uruhare mu guhungabanya umutekano w’u Rwanda ndetse yizeza n’abandi bakomeje kuwangiza ko ubutabera buzabageraho.

Yagize ati, “Icyo nasezeranya urangije kuvuga, ni uko ubutabera buzaboneka n’abandi bagira batya bakinjira bakongera bagasubira inyuma y’umupaka tuzabageraho, ubutabera buzabageraho, iminsi yabo irabaze bizageraho bifate umurongo.”

Abaturage bo mu Murenge wa Nyabimata mu Karere ka Nyaruguru no mu Murenge wa Uwinkingi mu Karere ka Nyamagabe, bagizweho ingaruka n’ibitero by’umutwe wa FLN mu mwaka wa 2018.

Mukashyaka Josephine wo mu Murenge wa Nyabimata muri Nyaruguru wapfakajwe n’ibitero bya FLN yashimye ingabo z’u Rwanda zabatabaye

Ni umutwe wari uyobowe n’impuzamashyaka yari iyobowe na MRCD Ubumwe yari iyobowe na Paul Rusesabagina hamwe n’umuvugizi wawo Callixte Nsabimana wari uzwi nka Majoro Sankara na Nsengimana Herman.

Rusesabagina Paul yari umuyobozi w’impuzamiryango MRCD, ishamikiyeho umutwe witwaje intwaro wa FLN wakunze kugaba ibitero mu nkengero z’ishyamba rya Nyungwe bihungabanya umutekano w’ u Rwanda bihitana abaturage ndetse biranabangiriza.

Rusesabagina Paul yari umuterankunga mukuru w’iyi MRCD ishamikiyeho imiryango myinshi irimo uyu mutwe wa FLN, PDR-Ihumure, n’iyindi.

Paul Rusesabagina mu rukiko

Mu ibaruwa yashyizweho umukono na Minisitiri w’Ubutabera akaba n’intumwa nkuru ya Leta Johnston Busingye, Leta y’u Rwanda yibukije Carollyn Maloney ko Paul Rusesabagina atigeze ashimutwa, ko ahubwo ari we ubwe wizanye mu Rwanda.

Carollyn Maloney yandikiye Perezida Kagame ku wa 14 Ukoboza uyu mwaka, amusaba ko Paul Rusesabagina arekurwa agasubira muri USA.

Leta y’u Rwanda ivuga ko ubutabera bw’u Rwanda bwigenga, kandi ko Rusesabagina ari mu maboko y’ubutabera, ifatwa rye ndetse n’ikurikiranwa rye rikaba rikurikije amategeko.

Yibukije ko yaba Urwego rw’Ubugenzacyaha (RIB) ndetse n’Ubushinjacyaha bw’u Rwanda, basobanuriye ku buryo bwumvukana urukiko n’itangazamakuru ko Rusesabagina atigeze ashimutwa cyangwa ngo yoherezwe mu Rwanda, ko ahubwo ari we ubwe wizanye mu Rwanda, hanyuma agafatwa hakurikijwe impapuro zo kumuta muri yombi zari zarashyizweho n’Ubushinjacyaha bwa Repubulika y’u Rwanda muri 2018.

Ubushinjacyaha bushinja Rusesabagina hamwe n’abandi bantu 18 ibyaha birenga 9 bikomeye, birimo kurema umutwe witwaza intwaro, kwinjira mu mutwe w’iterabwoba, gutera inkunga iterabwoba, ubwicanyi, ubushimusi, ubujura bwitwaje intwaro, ndetse n’ibindi, urukiko rukaba rwarashyize iburanisha ryabo ku itariki ya 26 Mutarama 2021.

Bazaburanishwa n’Urugereko rw’Urukiko Rukuru, rwashyiriweho kuburanisha ibyaha mpuzamahanga n’ibyambukiranya imipaka, ruri i Nyanza mu Ntara y’Amajyepfo.

Ubushinjacyaha kandi bugaragaza ko ibyaha Rusesabagina ashinjwa bitakozwe mu ibanga, kuko nko mu Ukuboza 2018, nk’umuyobozi w’impuzamashyaka MRCD/Ubumwe ndetse n’umutwe wayo wa gisirikare wa FLN, Rusesabagina yashyize amashusho kuri Youtube yise iy’umwaka mushya, yemera inkunga ye isesuye mu gushyigikira urubyiruko rwa FLN, ndetse yerura ko bagiye gushoza intambara ku Rwanda.

Ubushinjacyaha bugaragaza kandi ko FLN ya MRCD yagabye ibitero mu Turere twa Nyaruguru na Nyamagabe ndetse no muri Nyungwe muri 2018, byahitanye abantu 9 bikomeretsa abandi benshi.

Leta y’u Rwanda ivuga ko impungenge za Carollyn Maloney ku buzima bwa Rusesabagina cyangwa ko atazahabwa ubutabera bwuzuye nta shingiro zifite, kuko Rusesabagina abayeho neza kandi ko ahabwa ubuvuzi n’inzobere ndetse ko na bamwe mu bagize umuryango we bavugana na we babizi.

U Rwanda kandi ruvuga ko nk’umuntu ufite ubwenegihugu bw’u Rwanda n’u Bubiligi ndetse akaba n’umuturage wa USA, Rusesabagina asurwa na Ambasade z’u Bubiligi ndetse na USA iyo byasabwe.

Rusesabagina kandi ngo yunganiwe mu rukiko n’umunyamategeko yihitiyemo, kandi nk’undi Munyarwanda wese, afite uburenganzira ku butabera bwuzuye, nk’uko biteganywa n’Itegeko Nshinga.

Urubanza rwabaye hifashishijwe ikoranabuhanga

Ni iburanisha ryabaye kuri uyu wa Kane hifashishijwe ikoranabuhanga aho ubushinjacya bwari ku Cyicaro ku Kimihurura, abaregwa bari muri gereza ya Mageragere aho bafungiye, naho abacamanza bari ku cyicaro cy’Urugereko rw’Urukiko Rukuru ruburanisha imanza mpuzamahanga n’ibyaha byambukiranya imipaka ruri i Nyanza.

Umucamanza yahaye ijambo ubushinjacyaha ngo busobanure icyifuzo cyabwo cyo guhuza imanza za Nsabimana Callixte na Herman Nsengimana bari abavugizi ba FLN, maze busobanura ko guhuza imanza zabo biri mu nyungu z’ubutabera kuko ibyaha baregwa bifitanye isano kuko bihuriye ku mutwe wa FLN bari babereye abavugizi.

Abaregwa n’ababunganira mu mategeko bahawe umwanya wo kugira icyo bavuga ku cyifuzo cy’ubushinjacyaha, maze bagaragaza ko nta kibazo babibonamo ariko ko ubucamanza bukwiye gufata umwanzuro bushishoje ko ntacyo wabangamiraho ku butabera.

Nsabimana Callixte wemera ibyaha ashinjwa, yagaragaje ko n’ubundi yari yaremeye ko urubanza rwe ruhuzwa n’urwa Nsengimana hamwe na Paul Rusesabagina yita shebuja.

Icyakora yagaragaje impungenge z’uko hari abandi bantu 18 bari muri dosiye atazi, na ho Nsengimana agaragaza ko hari abandi bantu 300 bafatiwe mu mashyamba ya Kongo bashobora kuza muri dosiye ye.

Abunganira abarengwa ni ho bahereye basaba ko guhuza dosiye ya Nsabimana na Nsengimana bari abavugizi ba FLN byafatwaho umwanzuro mu bushishozi.

Me Moise Nkundabarashi wunganira Nsabimana Callixte, yasabye urukiko kuzakorana ubushishozi rukareba ko urubanza rw’uwo yunganira n’abo bandi zahuzwa ntihagire icyo bibangamira, naho Me Kabera Johnston wunganira Herman Nsengimana asaba urukiko gukorana ubushishozi mu guhuza imanaza zabo.

Urukiko rwanzuye ko ruzatanga umwanzuro warwo ku wa Kane tariki ya 3 Ukuboza 2020.

Nk’uko byatangajwe n’umuvugizi w’Ubushinjacyaha Bukuru, Faustin Nkusi, ngo iki kirego cyo gusaba urukiko kuburanisha ibi byaha mu mizi ni uko gishingiye ku kuba urwo rukiko ari rwo rwonyine rufite ubwo bubasha.

Ibi bije mu gihe Paul Rusesabagina arimo kuburana ubujurire ku ifungwa n’ifungurwa ry’inyogera y’iminsi 30, aho ubushinjacyaha bwasabye Urukiko Rwisumbuye rwa Nyarugenge ko hari ibindi bimenyetso bikenewe gukorerwa iperereza, bityo bugasaba ko akomeza gufungwa.

Urukiko rwa Nyarugenge rwari rwarateganyije gusoma umwanzuro warwo ku itariki 20 z’uku kwezi k’Ugushyingo 2020.

Ibyaha birengwamo Rusesabagina uzwi muri filimi ya Hotel Rwanda, byagaragajwe muri dosiye yakorewe, aho ubushinjacyaha buvuga ko yateye inkunga mu buryo butandakanye akanakorana n’umutwe wa FLN.

Ubwo urwo rukiko rwari rumaze gufata icyemezo cyo gukomeza kumufunga by’agateganyo ku wa 23 Ukwakira 2020, Rusesabagina yahise ajururira mu Rukiko Rwisumbuye rwa Nyarugenge ku nshuro ya kabiri.

Urwo rukiko rwari kumuburanisha ku wa Gatanu w’icyumweru gishize, ariko na bwo abamwunganira mu mategeko barabuze bituma urwo rubanza rwimurirwa kuri uyu wa Kabiri tariki 10 Ugushyingo 2020.

Rusesabagina yari yabwiye Urukiko Rwisumbuye rwa Nyarugenge ko abamwunganiraga ari bo Me David Rugaza na Me Emelyne Nyembo babiretse bagasubira mu Rrugaga rw’Abavoka.

Kuri uyu wa Kabiri na bwo urubanza ntirwaburanishijwe bitewe n’uko Me Gatera Gashabana uje kunganira Rusesabagina ngo ari i Arusha muri Tanzania mu kazi ko kunganira abantu mu mategeko.

Me Gashabana yari yarandikiye urukiko ko azaboneka ku itariki 20 Ugushyingo 2020 bitewe n’ifatwa ry’ibipimo bya Covid-19 ritinda ku mipaka y’ibihugu byombi (Tanzania n’u Rwanda).

Umucamanza yasabye ubushinjacyaha kugira icyo bubivugaho, bukaba bwahise bwemerera urukiko ubusabe bwa Me Gashabana, n’ubwo ngo imanza zijyanye n’ifungwa n’ifungurwa ry’agateganyo ziba zigomba kwihutishwa.

Umucamanza yafashe umwanzuro wo kwimurira urubanza rw’ubujurire rwa Rusesabagina ku itariki 20 Ugushyingo 2020 nk’uko Me Gatera Gashabana yari yanditse abisaba.

Paul Rusesabagina kuri ubu ufungiwe muri gereza ya Mageragere, kuri uyu wa Kabiri yahaye ibisobanuro Urukiko Rwisumbuye hifashishijwe ikoranabuhanga rya Iyakure (Teleconference).

Rusesabagina arasaba ko urubanza rwe rwimurwa

Rusesabagina asaba ko yahabwa igihe cyo kubonana n’undi mwunganizi uzakomeza kumwunganira.

Rusesabagina yabivuze kuri uyu wa Gatanu tariki 06 Ugushyingo 2020, mu rubanza Urukiko Rwisumbuye rwa Nyarugenge rwagombaga kuburanishamo ubujurire bwe, ku cyemezo cy’Urukiko rw’Ibanze rwa Kicukiro cyo kumwongerera igihe cyo gufungwa by’agateganyo.

Abunganiraga Rusesabagina ari bo Me Nyembo Emelyne na Me David Rugaza yari yahawe n’Urugaga rw’Abavoka, rwabasubiranye, ashaka uwa gatatu ari we Me Gatera Gashabana ariko akaba avuga ko batarahura.

Ubushinjyacyaha bwasabwe n’urukiko kuvuga kuri iki cyifuzo, busubiza ko ari uburenganzira bwa Paul Rusesabagina, ko yaburana afite abamunganira mu mategeko, gusa busaba ko urukiko rwashyira itariki yimuriweho urabanza hafi, kugira ngo ruburanishwe ku gihe.

Urukiko rwisumbuye rwa Nyarugenge rwavuze ko ibindi kuri uru rubanza, bizamenyeshwa ababuranyi, gusa rwibutsa ko aho ruzabera ari mu Rukiko Rwisumbuye rwa Nyarugenge.

Twabibutsa ko kuri uyu wa Gatanu, urubanza rwa Rusesabagina Paul, rwabereye mu nyubako z’Urukiko rw’Ubucuruzi kubera impamvu zikoranabuhanga ryari rikenewe kugira ngo Rusesabagina aburane ari muri Gereza ya Mageragere mu Mujyi wa Kigali.

Urukiko rwafashe icyo cyemezo uregwa adahari, aho yakurikiranaga imirimo y’urukiko ari muri gereza i Mageragere.

Urukiko rwatesheje agaciro impamvu Rusesabagina yari yatanze z’uko atari Umunyarwanda kuko hari aho ubushinjacyaha buvuga ko yari yarabyemeye.

Rusesabagina kandi yari yamaganye ibyo ubushinjacyaha buvuga ko burimo kumusabira gukomeza igifungo cy’agateganyo kubera gushaka ibimenyetso bishya by’ibyaha asangiye n’abo baregwa hamwe, ariko urukiko rwamumenyesheje ko ubushinjacyaha bwemerewe n’amategeko gushaka ibimenyetso by’inyongera mu gihe ibihari bidahagije.

Ubushinjacyaha buvuga ko impuzamashyaka MRCD yayoborwaga na Paul Rusesabagina mu myaka ya 2018 na 2019, ubwo umutwe wa FLN wigambaga ko urimo kugaba ibitero mu Turere twa Nyaruguru na Nyamagabe.

Rusesabagina yafatiwe icyemezo cyo gukomeza gufungwa by’agateganyo hifashishijwe ikoranabuhanga

Uyu mutwe wabanje kugira umuvugizi witwa Nsabimana Callixte waje gusimburwa na Nsengimana Herman, bombi ubu barafashwe bakaba bari muri gereza mu Rwanda ndetse n’abandi 16 bafatiwe mu mashyamba ya Kongo.

Mu ntango z’uku kwezi k’Ukwakira, Ubushinjacyaha bw’u Rwanda bwatangaje ko buhuje urubanza rwa Rusesabagina n’urwa Nsabimana na Nsengimana ndetse n’abo 16 barimo n’abari abakuru b’umutwe wa FLN.

Rusesabagina avuga ko umutwe wa FLN wigengaga mu kugaba ibitero i Nyaruguru na Nyamagabe, ariko akemera ko yawuteye inkunga y’amafaranga.

Urukiko rukimara gusoma umwirondoro we no kumumenyesha ko agiye kuburana ku ifunga ry’agateganyo, Rusesabagina yahise avuga ko uwo mwirondoro atari uwe kuko urukiko rwari rumaze kuvuga ko atari Umunyarwanda kuko kuva muri 1996 yahise atakaza ubwenegihugu bwe.

Umwe mu bunganira Rusesabagina, Me David Rugaza na we yahise akomeza abwira urukiko, ati “Mbere ya 1999 nta Munyarwanda wari wemerewe kugira ubwenegihugu bubiri, kandi kugira ngo asubirane Ubunyarwanda bimusaba kwandika abisaba”.

Rusesabagina n’abamwunganira bavuga ko kugeza ubu afite ubwenegihugu bw’u Bubiligi.

Ubushinjacyaha ariko bukomeza buvuga ko umwirondoro we ari uko ari Umunyarwanda, busaba ko iburanisha rikomeza ku bijyanye no kongera igifungo cy’agateganyo.

Umushinjacyaha yagize ati “Icyatuzinduye si icyo, niba ashaka kuburana kuri icyo bizamuzindure undi munsi”.

Abunganira Rusesabagina bahise bavuga ko ubushinjacyaha atari bwo bwagakwiriye guhakana umwirondoro w’umuntu.

Umushinjacyaha yahise agira ati “Ubwo Rusesabagina yari mu rukiko, umucamanza yaramubajije ati ‘umwirondoro wavuzwe ni wo’? Na we ati ‘ni wo cyane”.

Rusesabagina n’abamwunganira bavuga ko kuba ubushinjacyaha bufata ko umwirondoro wa Rusesabagina udashobora guhinduka, babibona nk’abafite izindi mbaraga.

Rusesabagina yakomeje abaza ati “Niba ndi Umunyarwanda, ibyangombwa bindanga ni ibihe! Passport yanjye ni iyihe”?

Urukiko rwahise rumenyesha Rusesabagina n’abamwunganira ko iyo mbogamizi bagaragaza izasuzumwa ikindi gihe, rusaba ubushinjacyaha kuvuga impamvu busaba ko Rusesabagina akomeza gufungwa.

Ubushinjacyaha bwavuze ko Urukiko rw’Ibanze rwa Kicukiro rwaherukaga gufatira Rusesabagina icyemezo cyo gufungwa by’agateganyo ku itari 17 Nzeri 2020, ubu rero hakaba ngo hari hakenewe ko icyo gifungo cyongerwaho indi minsi 30.

Me David Rugaza avuga ko kuva icyo gihe kugeza uyu munsi iminsi 30 y’agateganyo yarangiye, akaba asaba ko umukiriya we afungurwa byihuse kuko ngo afunzwe mu buryo bunyuranyije n’amategeko.

Umushinjacyaha ashingiye ku ngingo ya 261 na 262 z’itegeko rigenga imiburanishirize y’imanza z’inshinjabyaha ndetse n’ingingo ya 79, zigaragaza ko hatabarwa amasaha ahubwo habarwa iminsi.

Ubushinjacyaha buvuga ko bwasabye urukiko kongerera Rusesabagina igifungo cy’agateganyo ku itariki ya 17 Ukwakira 2020 (icyo gihe iminsi 30 ngo ntiyari yarangira).

Me Rugaza yavuze ko habayeho kurenza amasaha kandi Ubushinjacyaha bwagenekereje mu gihe mu mategeko ibyo bitabaho.

Nyuma yo kumva Paul Rusesabagina n’Ubushinjacyaha bumusabira gukomeza gufungwa by’agateganyo, Urukiko rw’Ibanze rwa Kicukiro rwamenyesheje ko ruzabifatira umwanzuro ku wa Gatanu tariki 23 Ukwakira 2020, saa cyenda z’igicamunsi.

Ku itariki 02/10/2020, Urukiko Rwisumbuye rwa Nyarugenge rwatesheje agaciro ubujurire bwe ku cyemezo cyo gufungwa by’agateganyo yari yafatiwe n’Urukiko rw’Ibanze rwa Kicukiro.

Nyuma yo kugumishaho igifungo k’Urukiko Rwisumbuye rwa Nyarugenge, umwe mu bunganira Rusesabagina, Me Emelyne Nyembo, yavuze ko nta kundi kongera kujurira, ahubwo ko bazategereza kuburana urubanza mu mizi.

Rusesabagina Paul yazanywe mu rukiko kuri uyu wa Kabiri ahagana saa mbiri n’igice za mu gitondo, nta n’umwe mu bamwunganira icyakora Ubushinjacyaha bwo bwari buhari.

Umwe mu bunganira Rusesabagina, Me David Rugaza na we yaje kuhagera ku isaha ya saa tatu n’iminota 18.

Paul Rusesabagina aregwa ibyaha 13.

Rusesabagina wafatiwe ku kibuga cy’indege i Kanombe ku itariki 28 Kanama 2020 (nk’uko ubushinjacyaha bubivuga), akurikiranyweho ibyaha 13 birimo icyo (1) kurema umutwe w’ingabo utemewe cyangwa kuwujyamo, (2) no gutera inkunga iterabwoba.

Araregwa kandi icyaha cy’ (3) iterabwoba ku nyungu za politiki, (4) gukora no kugira uruhare mu bikorwa by’iterabwoba, (5) gutanga amabwiriza mu gikorwa cy’iterabwoba, (6) kuba mu mutwe w’iterabwoba.

Akurikiranyweho kandi (7) kugambana no gushishikariza abandi gukora iterabwoba, (8) ubufatanyacyaha ku cyaha cy’ubwicanyi buturutse ku bushake, (9) ubufatanyacyaha ku cyaha cyo gufata umuntu ho ingwate, (10) ubufatanyacyaha ku cyaha cyo kwiba hakoreshejwe intwaro.

Rusesabagina kandi azaburana ku bijyanye n’(11) ubufatanyacyaha ku cyaha cyo gutwikira undi ku bushake inyubako, (12) ubufatanyacyaha ku cyaha cyo gukubita cyangwa gukomeretsa ku bushake, ndetse (13) n’ubufatanyacyaha ku cyaha cyo gushyira abana mu mirwano cyangwa ngo bakore imirimo ijyanye n’inshingano za gisirikare.

Ku itariki 05 Ukwakira 2020, Umushinjacyaha Mukuru w’u Rwanda, Aimable Havugiyaremye, yatangaje ko urubanza rwa Paul Rusesabagina rwahujwe n’urw’abavugizi b’umutwe wa FLN ari bo Callixte Nsabimana na Herman Nsengimana.

Ku isaha ya saa tatu n’igice ni bwo Rusesabagina umaze hafi isaha yicaye mu cyumba cy’iburanisha cy’Urukiko rw’Ibanze rwa Kicukiro yari amaze kubona abamwunganira bombi, kuko Me Emelyne Nyembo na we yari ahageze.

Kuri iyi nshuro, Ubushinjacyaha burasaba ko iminsi 30 y’igifungo cy’agateganyo Rusesabagina yari yahawe yakongerwa, kuko ngo bukiri gukora iperereza ku byaha bumushinja.

Yavuze ko ubushinjacyaha bwifuza ko bose hamwe na Rusesabagina Paul bazaburanishirizwa hamwe. Bo na Rusesabagina, dosiye zabo zizahuzwa n’iya Nsabimana Callixte hamwe na Herman Nsengimana, bombi bahoze ari abavugizi ba FLN.

Yagize ati “Turizera ko aba bakekwaho ibyaha uko ari 19 bazaburanishirizwa hamwe. Ibi bisanzwe bikorwa kandi biteganywa n’amategeko. Iyo abantu baregwa ibyaha bimwe bakoreye ahantu hamwe igihe kimwe, biba ari mu nyungu z’ubutabera ko baburanishirizwa hamwe.”

Umushinjacyaha Mukuru Aimable Havugiyaremye

Havugiyaremye kandi yashimiye mugenzi we w’u Bubiligi, Johan Dermulle kuba yaremeye ko Rusesabagina asakwa mu rugo rwe, mu rwego rwo gushaka amakuru ajyanye n’ibyaha aregwa.

Yagize ati “Ibyavuye muri iryo sakwa bizagaragazwa mu rukiko”.

Umushinjacyaha Mukuru w’u Rwanda akaba yakomeje atangaza ko impamvu urubanza rwa Rusesabagina rwahujwe n’urwa Nsabimana na Nsengimana ndetse n’abandi barwanyi 16 bahoze muri FLN, ari uko ibyaha baregwa babikoreye hamwe.

Havugiyaremye yagize ati “Ibi ni ibintu bisanzwe bikorwa iyo abantu baregwa ibyaha bimwe, bakoreye rimwe mu gihe kimwe, biba biri mu nyungu z’ubutabera ko baburanishirizwa hamwe”.

Ku itariki ya 14 ukwezi gushize kwa Nzeri, Ubushinjacyaha Bukuru bw’u Rwanda, Urwego rw’Ibanze rwa Kicukiro, bwasohoye itangazo rivuga ko Rusesabagina wari ukuriye impuzamashyaka MRCD ifite umutwe wa FLN, akurikiranyweho ibyaha 13 byo gushinga no gufasha uwo mutwe ushinjwa kwica abaturage mu Turere twa Nyaruguru na Nyamagabe.

Rusesabagina wafatiwe ku kibuga cy’indege i Kanombe ku itariki 28 Kanama 2020 (nk’uko ubushinjacyaha bubigaragaza), akurikiranyweho ibyaha birimo icyo (1) kurema umutwe w’ingabo utemewe cyangwa kuwujyamo, (2) no gutera inkunga iterabwoba.

Araregwa kandi icyaha cy’ (3) iterabwoba ku nyungu za politiki, (4) gukora no kugira uruhare mu bikorwa by’iterabwoba, (5) gutanga amabwiriza mu gikorwa cy’iterabwoba, (6) kuba mu mutwe w’iterabwoba.

Akurikiranyweho kandi (7) kugambana no gushishikariza abandi gukora iterabwoba, (8) ubufatanyacyaha ku cyaha cy’ubwicanyi buturutse ku bushake, (9) ubufatanyacyaha ku cyaha cyo gufata umuntu ho ingwate, (10) ubufatanyacyaha ku cyaha cyo kwiba hakoreshejwe intwaro.

Rusesabagina kandi azaburana ku bijyanye n’ (11) ubufatanyacyaha ku cyaha cyo gutwikira undi ku bushake inyubako, (12) ubufatanyacyaha ku cyaha cyo gukubita cyangwa gukomeretsa ku bushake, ndetse (13) n’ubufatanyacyaha ku cyaha cyo gushyira abana mu mirwano cyangwa ngo bakore imirimo ijyanye n’inshingano za gisirikare.

Iburanisha ku bijyanye n’ifungwa n’ifungurwa ryabereye mu Rukiko rw’Ibanze rwa Kicukiro, rukaba rwaraje gutegeka ko aburana afunzwe, ariko Rusesabagina yagaragaje ako atishimiye icyo cyemezo ahita ajururirira mu Rukiko Rwisumbuye rwa Nyarugenge i Nyamirambo.

Nyuma yo kumva impande zombi (Ubushinjacyaha) na Rusesabagina ufite abamwunganira babiri, Urukiko Rwisumbuye rwa Nyarugenge na rwo rwategetse ko Rusesabagina akomeza gufungwa by’agateganyo.

Reba ibisobanuro birambuye muri iyi video:

Paul Rusesabagina uregwa gushinga umutwe wa FLN wari ufite abavugizi Nsabimana Callixte na Herman Nsengimana wigambye ibitero by’i Nyaruguru na Nyamagabe, araburana urubanza rw’ubujurire mu Rukiko Rwisumbuye rwa Nyarugenge ku ifungwa n’ifungurwa ry’agateganyo.

Yajuririye urwo rukiko nyuma y’umwanzuro yafatiwe n’Urukiko rw’Ibanze rwa Kicukiro, rwari rwategetse ko aburana afunzwe ku itariki 17 Nzeri 2020.

Ku wa Gatanu tariki 25 Nzeri 2020 Rusesabagina yaje kuburana yambaye impuzankano isa n’iroza y’umuntu ufunzwe, akaba yaraburanye avuga ko Urukiko rw’Ibanze rwa Kicukiro ngo rutigeze ruha agaciro ukwiregura kwe.

Rusesabagina avuga ko atari Umunyarwanda, ko yari mu mahanga muri 2018 igihe ibyaha ashinjwa byakorewe, ariko akemeza ko yahaye ubufasha bw’amafaranga umutwe ufatwa nk’uwiterabwoba wa FLN, ari na byo ashinjwa.

Ubushinjacyaha bufite amagambo ya Rusesabagina wavugaga ko atangije intambara mu Rwanda, kandi na we yemereye Urukiko ko yahaye FLN amafaranga y’amayero ibihumbi 20, anayishakira ibihumbi 300 by’amadolari mu bantu batandukanye.

Rusesabagina yahakanye ko atategekaga FLN, w’impuzamashyaka MRCD, kuko ngo wahabwaga amabwiza n’ishyaka rimwe mu yagize MRCD rya CNRD, ariko ubushinjacyaha bwamugaragarije uburyo FLN yagabye ibitero i Nyaruguru na Nyamagabe, Rusesabagina ari we Perezida w’iyo mpumashyaka kandi yahabwaga raporo buri munsi.

Ubushinjacyaha buvuga ko Rusesabagina yatawe muri yombi ari i Kanombe kandi yihutiye guhabwa ubutabera, ko Rusesabagina ari Umunyarwanda w’inkomoko udashobora kuvuga gusa ko atari Umunyarwanda ngo byemerwe.

Nyuma y’iki cyemezo cy’Urukiko Rwisumbuye rwa Nyarugenge, nta kundi kujurira kuri Rusesabagina ku mwanzuro wo gufungwa by’agateganyo.

Me Emelyne Nyembo umwe mu bunganira Rusesabagina yavuze ko n’ubwo batajuriye bitavuze ko banyuzwe n’imikirize y’urubanza.

Ati "Ntabwo tubyishimiye, tuzategereza kuburana urubanza mu mizi".

Rusesabagina avuga ko nubwo yari mu bayobora impuzamashyaka MRCD-Ubumwe, ntaho yari ahuriye n’umutwe ushinjwa iterabwoba wa FLN ya Callixte Nsabimana ndetse na Herman Nsengimana. Ubushinjacyaha buvuga ko Paul Rusesabagina atabasha kwitandukanya na FLN.

Bikurikire muri iyi Video yatunganyijwe na Richard Kwizera wa Kigali Today

Paul Rusesabagina hamwe n’abamwunganira bari babanje gusobanura impamvu aho bavuga ko Rusesabagina atari we wayoboraga MRCD, ko abarwanyi ba FLN b’iyo mpuzamashyaka bategekwaga gusa ba CNRD (imwe mu bigize MRCD) kandi ko buri shyaka ryigenga, ko Rusesabagina atari Umunyarwanda, kandi ko yafashwe bidakurikije amategeko.

Ubushinjacyaha buvuga ko ibikorwa by’ibyaha Rusesabagina aregwa biri hagati y’umwaka wa 2009 na 2018, kandi byambukiranyije amategeko ahana ibyaha mu Rwanda yombi (iryo muri 2012-2018, ndetse n’irya 2018 kugeza ubu).

Umushinjacyaha yagize ati “mu kwezi k’Ukuboza 2018 ni bwo habaye ibitero hafi y’ishyamba rya Nyungwe, ni bwo imodoka zatwitswe, ni bwo hishwe abantu.

Ntabwo Paul Rusesabagina yakwitandukanya n’ibyo bitero kuko kuva muri 2015 kugera muri 2018, Paul Rusesabagina yari Perezida wa MRCD, kandi ni bwo hakozwe ibyaha byinshi bya FLN”.

Ubushinjacyaha

Yakomeje agira ati “Rusesabagina ni we wari Perezida wa PDR Ihumure, Gen Wilson Irategeka akaba Visi Perezida wa mbere, Nsabimana Callixte yari Visi Perezisa wa kabiri wa MRCD, akaba n’umuvugizi wa FLN”.

Umushinjacyaha yakomeje agira ati “Rusesabagina ni we wayoboraga inama akaba yarahabwaga raporo y’uburyo ibintu byakozwe, byose bigaragaza ko afite uruhare rukomeye muri ibyo bitero”.

Ubushinjacyaha bukomeza buvuga ko ibi byaha ndetse n’ibyo gutera inkunga y’amafaranga FLN byose Rusesabagina abyemera kandi akanabisabira imbabazi.

Ibijyanye n’uko Rusesabagina atagombaga kuburanishwa n’inkiko z’u Rwanda kuko ngo atari Umunyarwanda, ubushinjacyaha buvuga ko mu mwirondoro we bigaragazwa ko afite ubwenegihugu bw’u Rwanda bw’inkomoko, yaravutse ku babyeyi b’Abanyarwanda, uburyo yari yarabutakaje ngo habaye kwandika abisaba byonyine.

Ubushinjacyaha bwanasobanuye ko indwara Rusesabagina arwaye isanzwe, itamubuza gufungwa by’agateganyo, kandi ko ubuyobozi bwa gereza bufite ubushobozi bwo kumukurikirana, ariko ngo iyo bibaye ngombwa umuntu akaremba, arasohoka akajya kwivuriza mu bitaro byo hanze ya gereza.

Nyuma yo kumva impande zombi, umucamanza yamenyesheje ko urubanza rw’ubujurire ku ifungwa n’ifungurwa ry’agateganyo rya Rusesabagina Paul ruzasomwa ku itariki ya 02 Ukwakira 2020, i saa munani z’igicamunsi.

Rusesabagina arimo kuburana urubanza rw’ubujurire ku ifungwa n’ifungurwa ry’agateganyo mu Rukiko Rwisumbuye rwa Nyarugenge, nyuma y’umwanzuro atishimiye wo kumufunga by’agateganyo wafashwe n’Urukiko rw’Ibanze rwa Kicukiro ku itariki ya 17 Nzeri 2020.

Rusesabagina avuga ko nubwo ari mu bayobora impuzamashyaka MRCD-Ubumwe, ntaho ahuriye n’umutwe ushinjwa iterabwoba wa FLN ya Callixte Nsabimana ndetse na Herman Nsengimana.

Nsabimana Callixte na Herman Nsengimana bafashwe ari abavugizi b’umutwe wa FLN, na bo bafungiwe muri gereza zo mu Rwanda.

Rusesabagina hamwe n’abamwunganira bavuga ko mu mpuzamashyaka MRCD, buri shyaka ryose rifite icyo rishinzwe kandi ryigenga.

Yagize ati “Ishyaka CNRD ni ryo ryari rishinzwe abasirikare, FLN bari abasirikare bayo, twebwe (PDR-Ihumure) twari dushinzwe dipolomasi, ntaho nari mpuriye na FLN”.

Ati “FLN kandi yari ifite umuvugizi wayo, ni yo mpamvu Callixte Nsabimana ari we wabaye Umuvugizi”.

Nubwo Rusesabagina avuga atya ariko, Nsabimana Callixte ushinjwa ibyaha by’ubugizi bwa nabi yakoze ubwo yari umuvugizi w’umutwe witwara gisirikare wa FLN, we ubwo aheruka mu rukiko yasabye ko dosiye y’urubanza rwe itahuzwa n’iya Herman Nsengimana wamusimbuye ku buvugizi bw’uwo mutwe.

Icyakora icyo gihe yavuze ko igihe dosiye ye yaburanishirizwa hamwe n’iya Herman Nsengimana, ubucamanza bwahita bunazana dosiye ya Paul Rusesabagina wayoboraga impuzamashyaka ya MRCD yanashinze uwo mutwe wa FLN bose bakoreraga bakaburanira hamwe.

Mu rubanza rwa Rusesabagina ku ifunga n’ifungura ry’agateganyo kandi, mu Rukiko rw’Ibanze rwa Kicukiro, Rusesabagina yemeye ko yafashije FLN, ndetse anabisabira imbabazi.

Abunganira Rusesabagina bakomeza bavuga ko ibyaha umukiriya wabo aregwa ntaho ahuriye na byo, kuko ngo Rusesabagina atari ari mu Rwanda, “atari Umunyarwanda, atabikoreye ku butaka bw’u Rwanda kandi itegeko rihana ibyaha ryo muri 2012 ritakiriho”.

Me David Rugaza, umwe mu bunganira Rusesabagina avuga ko Urukiko rw’Ibanze rwa Kicukiro ngo rutigeze rugira icyo ruvuga niba rufite ububasha bwo kuburanisha ibi byaha biregwa Rusesabagina.

Ati “Tukaba dusaba Urukiko (Rwisumbuye) kwemeza ko Urukiko rw’Ibanze rwa Kicukiro rutari rufite ububasha bwo kuburanisha uru rubanza, kuko rwashingiye ku mpamvu zitemewe n’amategeko”.

Me Rugaza avuga ko guhera muri 1997 kugeza uyu munsi Rusesabagina atari Umunyarwanda, kandi atari ari mu Rwanda kuva muri 1996 kugera mu Kanama 2020.

Ashingira ku ngingo ya 11 y’Itegeko ryo muri 2012-2018 rishyiraho igitabo cy’amategeko ahana, ivuga ko uhamwa n’iki cyaha agomba kuba yaragikoreye mu Rwanda, kandi iri tegeko ntabwo rikibaho mu gihe icyaha Rusesabagina aregwa cyakozwe muri 2018.

Bikurikire muri iyi Video yatunganyijwe na Richard Kwizera wa Kigali Today

Urukiko rwatesheje agaciro inzitizi ku buzima bwa Rusesabagina zari zagaragajwe n’abamwunganira, ruvuga ko umukiriya wabo ashobora kujya kwivuza nubwo yaba afunzwe.

Iki cyemezo cy’urukiko ntabwo cyashimishije Rusesabagina, akaba we ubwe yahise ajuririra mu rukiko rwisumbuye.

Video: Richard Kwizera

Rusesabagina yinjiye mu rukiko rw’Ibanze rwa Kicukiro, ku isaha ya saa munani n’iminota 41, ku gicamunsi cyo kuri uyu wa Kane tariki 17 Nzeri 2020.

Urukiko rwabanje gusomera Rusesabagina incamake y’ibyaha 13 Ubushinjacyaha bumurega, byose bijyanye no gushinga umutwe w’iterabwoba wa FLN no kuwutera inkunga.

Uwo mutwe urashinjwa kugaba ibitero ku nkengero z’Ishyamba rya Nyungwe mu Turere twa Nyaruguru na Nyamagabe, ukaba uvugwa ko wishe abaturage icyenda, ubasahura imitungo ndetse unabatwikira imodoka n’inzu mu mwaka wa 2018 na 2019.

Urukiko rwashingiye ku ngingo ya gatatu (3) y’itegeko ryerekeye imiburanishirize y’imanza z’inshinjabyaha, ruvuga ko ibyaha Rusesabagina aregwa biteganyirizwa igifungo kirengeje imyaka ibiri, kubera iyo mpamvu akaba agomba kuburana afunzwe.

Urukiko rwatesheje agaciro inzitizi ku buzima bwa Rusesabagina zari zagaragajwe n’abamwunganira, ari bo Me David Rugaza na Evelyne Nyembo, ruvuga ko umukiriya wabo ashobora kujya kwivuza nubwo yaba afunzwe.

Icyo cyemezo cy’urukiko ntabwo cyashimishije Rusesabagina, akaba we ubwe yahise ajuririra mu rukiko rwisumbuye.

Rusesabagina yagize ati “Ndamenyesha yuko iki cyemezo cy’urukiko cy’aka kanya nkijuririye kandi nsaba ko bishyirwa mu bikorwa”.

Uru rukiko rwari rwaburanishije urubanza rwa Rusesabagina ku ifungwa n’ifungurwa ry’agateganyo ku wa mbere w’iki cyumweru tariki 14 Nzeri 2020.

Rusesabagina utuye mu Bubiligi afite ubwenegihugu bw’icyo gihugu hamwe n’ubw’u Rwanda, aregwa kuba umwe mu bayobozi b’impuzamashyaka ya MRCD, ifite umutwe w’abarwanyi wa FLN.

Yagize ati “Mu bibazo nabajijwe, ibyo nasubije ‘Yego’ ntabwo ari byinshi, ariko icyabazaga ngo ‘wafashije FLN’! Naravuze nti ‘Yego’ nafashishije FLN ibihumbi 20 by’amayero”.

Rusesabagina avuga ko atigeze atuma uwo mutwe gukora ubwicanyi, kandi ko mu byaha 13 aregwa hari ibyo atemera.

Ubushinjacyaha bwasobanuye ko ibyaha 13 Rusesabagina aregwa bubishingira ku buhamya bw’abantu, ku nyandiko zitandukanye ndetse n’ibyo uregwa yihamiriza ubwe.

Buvuga ko amafaranga yo gutera inkunga ibikorwa bya FLN, MRCD ya Rusesabagina yayanyuzaga kuri konti y’Umunyekongo witwa Baroka Christian hakoreshejwe uburyo bwa Western Union.

Umubitsi wa MRCD witwa Munyemana Eric hamwe n’uwitwa Ingabire Odette, bagaragazwa mu nyandiko z’ibigo bya Western Union na Money Gram, ko ari bo bohererezaga amafaranga FLN na Callixte Nsabimana wavugiraga uwo mutwe ari mu birwa bya Comores.

Ubushinjacyaha buvuga ko bwahawe amakuru na Polisi yo mu Bubiligi yasanze muri mudasobwa ye, mu byo yivugira, mu nyandiko z’ibigo byohereza amafaranga mu mahanga, no mu buhamya n’inyandiko-mvugo bya Nsabimana Callixte.

Ibirego kandi bishingirwa ku buhamya bw’abarokotse ibitero bya FLN i Nyaruguru na Nyamagabe ndetse n’ubw’abana 82 babwiye ubushinjacyaha uburyo binjijwe muri FLN.

Ibirego kandi birashingirwa ku bivugwa n’ibitangazamakuru byo kuri internet (murandasi) birimo radio yitwa ‘Ubumwe’ ikorwaho n’uwitwa Mukashema Esperance, “Rusesabagina akaba amuhemba amadolari 300 buri kwezi”.

Nyuma yo kumva ko FLN yishe abantu i Nyaruguru na Nyamagabe, Rusesabagina yagize ati “Mbisabiye imbabazi, nsabye imbabazi iyo miryango ndetse n’igihugu muri rusange”.

Nyuma yo kumva ubushinjacyaha burega Rusesabagina runamusabira gufungwa by’agateganyo, ndetse n’abamwunganira bamusabira kuburana adafunzwe ku mpamvu z’ubuzima bwe butameze neza, urukiko rwatangaje ko ruzabifataho umwanzuro ku wa Kane tariki 17 Nzeri 2020, saa munani z’igicamunsi.

Video: Richard Kwizera

Rusesabagina araregwa ibyaha 13

Mu itangazo Ubushinjacyaha bwageneye itengazamakuru kuri uyu wa mbere, bugaragaza ko Rusesabagina Paul ari mwene Rupfure Thomas na Nyirampara Kezia, akaba yarashakanye na Mukangamije Tatiana.

Rusesabagina wavukiye i Nyakabungo mu Karere ka Ruhango mu mwaka wa 1954 ku itariki ya 15 Kamena, ubu afite ubwenegihugu bw’u Rwanda n’u Bubiligi.

Ubushinjacyaha burega Rusesabagina bushingiye ku Itegeko Nshinga rya Repubulika y’u Rwanda mu ngingo ya 142, Itegeko rigena ububasha bw’Inkiko ryo muri 2018 mu ngingo ya 26, ndetse n’Itegeko ryerekeye imiburanishirize y’imanza z’inshinjabyaha ryo muri 2019 mu ngingo ya 24 na 74.

Mu rubanza rwa Rusesabagina, Ubushinjacyaha buzagaruka ku byaha 13 aregwa buhereye ku kijyanye no (1) kurema umutwe w’ingabo utemewe cyangwa kuwujyamo, (2) no gutera inkunga iterabwoba.

Rusesabagina kandi akurikiranyweho (3) iterabwoba ku nyungu za politiki, (4) gukora no kugira uruhare mu bikorwa by’iterabwoba, (5) gutanga amabwiriza mu gikorwa cy’iterabwoba, (6) kuba mu mutwe w’iterabwoba.

Akurikiranyweho kandi (7) kugambana no gushishikariza abandi gukora iterabwoba, (8) ubufatanyacyaha ku cyaha cy’ubwicanyi buturutse ku bushake, (9) ubufatanyacyaha ku cyaha cyo gufata umuntu ho ingwate, (10) ubufatanyacyaha ku cyaha cyo kwiba hakoreshejwe intwaro.

Rusesabagina kandi azaburana ku bijyanye n’(11) ubufatanyacyaha ku cyaha cyo gutwikira undi ku bushake inyubako, (12) ubufatanyacyaha ku cyaha cyo gukubita cyangwa gukomeretsa ku bushake, ndetse (13) n’ubufatanyacyaha ku cyaha cyo gushyira abana mu mirwano cyangwa ngo bakore imirimo ijyanye n’inshingano za gisirikare.

Mu rubanza rwabaye kuri uyu wa Mbere, Rusesabagina ari kuburana ku ifunga n’ifungurwa ry’agateganyo.

Nyuma yo kumva ubushinjacyaha burega Rusesabagina runamusabira gufungwa by’agateganyo, ndetse n’abamwunganira bamusabira kuburana adafunzwe ku mpamvu z’ubuzima bwe butameze neza, urukiko rwatangaje ko ruzabifataho umwanzuro ku wa Kane tariki 17 Nzeri 2020, saa munani z’igicamunsi.

Urukiko rwatesheje agaciro ibyavuzwe n’abunganizi ba Rusesabagina, rwanzura ko iburanisha rikomeza

Urukuko rwagarutse nyuma y’isaha imwe n’igice irenga, ruvuga ko rufite ububasha bwo kuburanisha Paul Rusesabagina ku bijyanye n’ifungwa n’ifungurwa ry’agateganyo, kuko “yafatiwe mu murenge wa Nyarugunga (Kanombe)”.

Urukiko rukaba ruvuga ko inzitizi zagaragajwe n’abunganira Rusesabagina nta shingiro zifite, rwemeza ko iburanisha ry’urwo rubanza rihita rikomeza kuri uyu wa mbere tariki 14 Nzeri 2020.

Urubanza ruhise rutangira kuburanishwa ku gicamunsi cyo kuri uyu wa mbere, hari abashinjacyaha babiri, abunganira Rusesabagina babiri ndetse n’itangazamakuru.

Rusesabagina n’umwunganizi we mu Rukiko rw’Ibanze rwa Kicukiro

Rusesabagina n’umwunganizi we basanga nta bubasha Urukiko rw’Ibanze rwa Kicukiro rufite bwo kumuburanisha.

Uwunganira Paul Rusesabagina yasabiye umukiriya we kutaburanira muri urwo rukiko, kubera impamvu z’uko ibyaha aregwa ngo atabikoreye ku butaka bw’u Rwanda kandi atari Umunyarwanda.

Me Rugaza David yashingiye ku ngingo ya 93 y’Itegeko rigenga imiburanishirize y’imanza z’ibyaha mbonezamubano, yagaragaje izo nzitizi avuga ko Paul Rusesabagina atari Umunyarwanda ko ahubwo ari Umubiligi.

Umushinjacyaha yavuze ko Rusesabagina yafatiwe mu ifasi y’urwo rukiko rw’ibanze (i Kanombe), kubera iyo mpamvu urwo rukiko rukaba rufite ubwo bubasha bwo kumuburanisha.

Yagize ati “Ingingo ya 9, 10 na 11 z’Itegeko rihana ryo muri 2018 zivuga ko umuntu wese ukoreye ibyaha mu Rwanda, yaba Umunyarwanda cyangwa Umunyamahanga, abikurikiranwaho”.

Yagaragaje ko ibyaha Rusesabagina aregwa ari ibyo kuba akuriye impuzamashyaka MRCD ifite umutwe wagabye ibitero ku baturage ku nkengero z’ishyamba rya Nyungwe kuva muri 2009 kugera 2019.

Umushinjacyaha yakomeje asobanura ko Paul Rusesabagina ubwe yiyemerera ko ari Umunyarwanda ndetse n’ihuriro MRCD akuriye rivuga ngo ‘Mouvement Rwandais pour le Changement Democratique’.

Izo nzitizi Me Rugaza agaragaza nta shingiro zifite.

Umushinjacyaha avuga ko Paul Rusesabagina ubwe yiyemerera ko hari inkunga yatanze ku mutwe wa FLN kugira ngo ugabe ibitero mu Rwanda.

Umushinjacyaha ati “Kuba yari ari mu Bubiligi, ariko akumva ko umutwe wa FLN akuriye urimo kwica abantu, yakoze iki”!

Me Rugaza yakomeje abaza itegeko rihana ibyaha Rusesabagina akurikiranyweho iryo ari ryo, kuko hari iryo muri 2012 ndetse n’iryo muri 2018.

Kuba Rusesabagina yemera ko ari Umunyarwanda na byo ngo bigomba itegeko ribihamya, bikareka gushingira ku byo uregwa avuga.

Ibyo gutanga amafaranga, Rusesabagina avuga ko “yahaye Abanyarwanda, yayatanze nk’umugiraneza kuko amadolari 700 ntabwo yatera igihugu”.

Umushinjacyaha yahise afata ijambo avuga ko ibyaha Rusesabagina aregwa byari ibyaha mu itegeko rihana ryo muri 2012 ndetse ni n’ibyaha mu itegeko rihana ryo muri 2018, ibyo bikazasobanurwa mu miburanishirize y’urubanza mu mizi.

Umushinjacyaha ati “Ibyo gufasha abantu nk’umugiraneza, hano ntabwo yaje kuburana nk’umugiraneza ahubwo yaje kuburana nk’umuntu uregwa ibyaha by’iterabwoba, hari aho agira ati ‘nafashije FLN ibihumbi 20 by’amayero’, ntabwo kuyifasha ari ubugiraneza”.

Nyuma yo kumva impande zombi z’ababurana, urukiko rutangaje ko rugiye kwiherera kugira ngo rufate umwanzuro ku ifungwa n’ifungurwa ry’agateganyo rya Rusesabagina.

Nyuma yo kumva ubushinjacyaha burega Rusesabagina runamusabira gufungwa by’agateganyo, ndetse n’abamwunganira bamusabira kuburana adafunzwe ku mpamvu z’ubuzima bwe butameze neza, urukiko rwatangaje ko ruzabifataho umwanzuro ku wa Kane tariki 17 Nzeri 2020, saa munani z’igicamunsi.

Rusesabagina yitabye Ubushinjacyaha ari kumwe n’abanyamategeko be

Paul Rusesabagina yeretswe itangazamakuru ku wa Mbere tariki 31 Kanama 2020. Ni nyuma y’igihe ashyiriweho impapuro mpuzamahanga zisaba ko afatwa agashyikirizwa ubutabera.

Aregwa ibyaha bikomeye, birimo iterabwoba, gutwika, ubushimusi n’ubwicanyi byakorewe abaturage b’inzirakarengane b’Abanyarwanda mu duce dutandukanye tw’u Rwanda turimo Nyabimata mu Karere ka Nyaruguru muri Kamena 2018, no muri Nyungwe mu Karere ka Nyamagabe mu Ukuboza 2018.

Rusesabagina asuhuzanya n’umwe mu banyamategeko be

Umukuru w’igihugu yavuze ko nta kibazo afite kuri Rusesabagina uvugwa ko yarokoye abantu mu gihe cya Jenoside yakorewe Abatutsi mu 1994, ariko ko azabazwa ubwicanyi bwakozwe n’abarwanyi ba FLN b’ihuriro ry’amashyaka ryitwa MRCD, riyoborwa na Rusesabagina.

Muri icyo kiganiro Perezida Kagame yasobanuye ibintu bitatu kuri Rusesabagina, bijyanye no kugirwa intwari kwe muri filime yiswe ‘Hotel Rwanda’, ibyaha aregwa ndetse n’uburyo yagejejwe mu Rwanda.

Avuga ko hari Rusesabagina witiriwe ibintu, byaba ari byo cyangwa atari byo, bijyanye n’uko yakijije abantu muri Jenoside yakorewe Abatutsi mu 1994 muri Hoteli Mille Collines “biragenda bimuha izina ko ari igitangaza ndetse akina n’amafilime ajyanye na byo”.

Perezida Kagame avuga ko ibyo bifite amateka yabyo kuko ngo hari abantu bari muri Hoteli icyo gihe bavuga ko yakijije abantu, ndetse n’ingabo za LONI zari mu Rwanda muri 1994 (MINUAR) icyo gihe na zo zanabivugaho, ibyo nta wabitindaho.

Umukuru w’igihugu yagize ati “Wenda ntibanamubajije bahisemo abantu bamuha izina, ariko ibyo ntabwo nabitindaho, ntabwo bikunze kuntwarira umwanya, yaba yarigize igitangaza cyangwa barakimugize bitari byo, izo ni izindi mpaka kandi zirahari, bifite uko byasobanurwa ubwabyo.

Kuri ibyo, impamvu ntajya muri izo mpaka ni uko ibyabaye, wenda bamwitirira ibitari byo, nta n’ubwo ari icyaha twashingaho urubanza”.

Ikibazo Perezida Kagame abona kuri Rusesabagina ngo ibimuvugwaho byamuhesheje kuba “umuntu ushaka guhindura ubuzima bw’igihugu ariko amena amaraso”, afatanyije na bamwe mu Banyarwanda n’abanyamahanga.

Perezida Kagame ati “bashobora kuba banavuga ko icyo bagamije ari cyiza, ari uguhindura u Rwanda kuko ngo rutameze neza, ariko uburyo bakoresha ni ubwo kwica abantu, hari ibyitwa FLN na MRCD byose hamwe (Rusesabagina) akitwa ko ari umuyobozi wabyo, akitirirwa ibikorwa by’iyo mitwe kandi akabyigamba”.

Perezida Kagame mu kiganiro kuri RBA

Ati “Abantu bicwa muri Nyaruguru, abicwa muri Nyamagabe n’ahandi ku nkengero za Nyungwe, (ibitero) bigaturuka mu Burundi bikinjira mu Rwanda, akabyigamba, aho hari ikibazo agomba gusubiza, amaraso y’Abanyarwanda afite ku ntoki, ibyo ni ibigomba gusubizwa byanze bikunze”.

Perezida Kagame avuga ko ibi bikorwa Rusesabagina yabigiyemo kuva mu myaka 10 ishize, bijyane no “kugambanira u Rwanda no kwica Abanyarwanda” binyuze mu mitwe yitwara gisirikare yose avuga ko ayobora.

Umukuru w’igihugu yakomereje ku buryo Rusesabagina yageze mu Rwanda, aho avuga ko nta muntu wamushimuse nk’uko byagiye byandikwa mu mbuga za murandasi, ahubwo ko yageze mu Rwanda ari we umeze nk’uwizanye.

Perezida Kagame ati “ariko uwanabwira abantu ko ari we wizanye ubwo urubanza rwaba ruri kuri nde! Ushobora kwizana ubishaka, uzi n’icyo ukora icyo ari cyo, ushobora kwizana wabeshywe ukisanga hano, ubwo icyaha ni icyo kubeshya gusa ntabwo ari ikindi kibazo, kuva aho yavuye kugera hano nta cyaha na kimwe cyigeze gikorwa hagati aho”.

Perezida wa Repubulika avuga ko hari ibyo inzego zishinzwe gushaka abanzi b’u Rwanda zishobora kuba zakora binyuranyije n’amategeko y’ahantu runaka bikavamo urubanza, ariko ko hari n’ibindi umuntu atasangamo inenge ahubwo ikosa rikaba irya nyir’ubwite.

Yavuze ko Rusesabagina yaje asanga Callixte Nsabimana wari umuvugizi w’inyeshyamba (FLN) z’ihuriro ry’imitwe ya MRCD iyoborwa na Rusesabagina, bose hamwe n’abandi bafashwe bakazagera igihe bakicarana mu nkiko, bagatangira gushinjanya.

FLN ni umutwe w’ingabo w’impuzamashyaka MRCD yayoborwaga na Paul Rusesabagina. Mu minsi ishize ni bwo uyu Paul Rusesabagina yatawe mu yombi, akaba afungiye mu Rwanda.

Araregwa ibyaha bikomeye birimo iterabwoba, gutwika, ubushimusi n’ubwicanyi byakorewe abaturage mu duce dutandukanye tw’igihugu, turimo Nyabimata mu Karere ka Nyaruguru no mu nkengero za Nyungwe mu Karere ka Nyamagabe.

Umva ubuhamya bwabo muri iyi video

Video: Richard Kwizera

Imodoka yari iy’uwari Umunyamabanga Nshingwabikorwa w’Umurenge wa Nyabimata, Vincent Nsengiyumva yaratwitswe

Paul Rusesabagina weretswe itangazamakuru ku wa 31 Nyakanga 2020, ni Visi Perezida w’Ishyaka MRCD Ubumwe, rikaba ari ryo rifite umutwe w’inyeshyamba zitwa FLN zari zifite umuvugizi witwa Callixte Nsabimana, na we akaba afungiwe muri gereza mu Rwanda.

Abarokotse ibyo bitero barashinja izo nyeshyamba kubashyiraho itoteza no kubatera ubwoba, kubakomeretsa no kubicira ababo, ndetse no gusahura imitungo yabo.

Nyirashyirakera Theophila w’i Nyabimata

Uyu mubyeyi w’imyaka 31 avuga ko ku itariki 07 Nyakanga 2018, umutwe wa FLN wateye urugo rwe ahagana saa tatu z’ijoro, umutegeka gukingura bamubwira ko ari abashinzwe umutekano, batinze gato bakubita urugi barinjira.

Avuga ko batutse umugabo we ko ari ikigoryi, bafata ibirayi byari mu nzu iwe, umwe muri bo yamujombye imbunda mu mbavu, bafata umugabo we (Shumbusho Damascène) bamwikoreza ibyo basahuye mu rugo rwe no mu baturanyi.

Nyirashyirakera agira ati “bantwaye igitenge cy’amafaranga ibihumbi bine, bantwara ibishyimbo na telefone, umugabo yaje kugaruka nka saa munani z’ijoro Ingabo z’u Rwanda ziramuhumuriza kuko yagarutse yarwaye ihungabana”.

Avuga ko icyo cyari igitero kigabwe muri ako gace ku nshuro ya kabiri, kandi kuva ku gitero cya mbere ngo ntabwo bari bagisinzira, hari n’igihe ngo bararaga mu mirwanyasuri ku gasozi.

Karerangabo Antoine w’i Nyabimata

Avuga ko ku itariki 18 Nyakanga 2018, hagati ya saa sita na saa saba z’ijoro bumvise amasasu avuga, babona ku biro by’umurenge imodoka y’umunyamabanga nshingwabikorwa irimo gushya bajya kureba.

Karerangabo ati “bahise banyambura telefone, bankubita ubuhiri mu mutwe ndagwa hasi mpamara nk’isaha, nza kuzanzamuka ngenda nikuba ngera mu rugo, ako kanya ushinzwe amasomo ku ishuri yari amaze kwicwa hamwe n’undi muhungu wari mu kabari”.

Ati “Gitifu (w’umurenge) n’uwari Umuyobozi w’ishuri bahise babajyana kwa muganga, Gitifu bari bamumenaguye umutwe, uwo muyobozi w’ishuri we bamumennye amatako yaje no gupfa nyuma yaho, nanjye bahise banjyana kwa muganga bantera serumu nk’eshatu”.

Karerangabo avuga ko izo nyeshyamba za FLN icyo gihe zasahuye abaturage imyaka (ibirayi), amafaranga n’amatungo, ndetse ko zagiye zigaruka nyuma yaho mu duce twegereye umudugudu atuyemo.

Siborurema Venuste w’i Nyabimata

Uyu mugabo w’imyaka 33 avuga ko ku mugoroba w’itariki ya mbere Nyakanga 2018 yumvaga umutima we utari hamwe, naho abarwanyi ba FLN bari hafi aho, bakaba baraje gutera bakinjira iwe ahagana saa yine n’igice.

Siborurema avuga ko baje kumutegeka gukingura, havamo umwe aramuniga, undi arinjira aterura imifuka y’ibishyimbo ajugunya hanze, batwara n’utujerekani tune n’igice tw’amata ‘inzu isagara year’.

Ati “Abana bamaze kuryama abo barwanyi bankoreye umufuka w’ibishyimbo dusanga abandi bikorejwe ibindi bintu ku irembo, mu zindi ngo duturanye bahatwaye intama n’ihene, turagenda tugeze haruguru baratangira bararasa”.

Rusesabagina Paul yeretswe abanyamakuru tariki ya 31 Kanama 2020

Ati “Turagendaaa tugeze ahantu dusanga hari abandi (barwanyi) bahasigaye, abo twajyanye bati ‘aba bantu ntibatugoye’, baratubaza bati ‘muzi yuko hano mukwiriye kuhava tukabereka aho muhungira? Tuti ‘turahunga igihugu twagikozemo iki’? Bati ‘niba ntaho mwahungira ariko Nyabimata si iyanyu, kandi nitugaruka amaraso yawe tuzayakaraba (babwira Siborurema).

Baratubwira bati “mureke uwo muyobozi wabakolonije, mugende kandi mukomeze uwo muhanda. Ni uko nyine naraje nicara mu rugo ndatuje, bukeye Ingabo (z’u Rwanda) ziraza ziradusura, Umuyobozi ati ‘ubu tugiye kwicunganira na bo’, umuyobozi wacu atuzanira ingabo, ubu ndaryama ngasinzira”.

FLN i Rugogwe mu Karere ka Nyamagabe

Ayingeneye Chantal w’imyaka 37 wo mu Kagari ka Rugogwe mu Murenge wa Uwinkingi muri Nyamagabe, avuga ko inshuro nyinshi bagiye baterwa n’ibisambo byambaye gisirikare bikajyana ibiribwa bitetse, amatungo n’imyaka babaga babitse mu nzu.

Ati “Rimwe narasohotse mpura n’abantu mu muharuro, mbwira abaturanyi nti ‘mwikomeera’ mbonye ari abasirikare, umugabo witwa Ndagijimana aravuga ati ‘ariko amabwa y’abagore! Abasirikare barara biba, hano inkono barayihenesheje, ihene barayijyanye, ni basirikare bwoko ki”!

Ati “Tuza gusanga umuturanyi wacu bamurashe, amatungo bayatwaye, ariko twari dusanzwe twibwa rwihishwa, twaje kumenya ko ari inyeshyamba ari uko tubabonye”.

Ayingeneye yumvise ko Paul Rusebagina na Nsabimana Callixte ari bo bari inyuma y’ibyo bitero, asaba ubuyobozi bw’igihugu ko bwabakurikirana kugira ngo abaturage bangirijwe bishyurwe ibyabo.

Ntakirende Ntirandekura na we w’i Rugogwe muri Uwinkingi, avuga ko ku itariki atibuka neza ahagana mu saa moya z’umugoroba, yatewe n’abarwanyi ba FLN bakamurasa mu bitugu no mu kwaha bashaka kumutwara inka, bakaza gusiga bayishe.

Ntirandekura yarashwe amasasu ane Imana ikinga ukuboko

Yaje kujyanwa kwa muganga mu gitondo n’Ingabo z’u Rwanda ariko ubu afite ubumuga budakira yatewe n’ayo masasu, akaba na we asaba ko Rusesabagina na Nsabimana bagezwa mu butabera kugira ngo bishyure ibyo bangirije abaturage.

Ati “Jyewe icyo nifuza ni uko ubutabera bwabashyira ahabona, nifuza ko ibyanjye byangiritse bagomba kubindiha, si jyewe jyenyine ndetse n’iby’abaturage byangiritse babituriha rwose”.

Umunyamabanga nshingwabikorwa w’Umurenge wa Nyabimata Rudasingwa Aphrodis, yayoboye umurenge wa Nyabimata kuva tariki 24 Nyakanga 2018, avuga ko intego y’inyeshyamba za FLN yari iyo gusahura no kwica kuko abo Siborurema yavuze bose bapfuye ngo ari abishwe n’izo nyeshyamba.

Uyu munyamabanga nshingwabikorwa w’Umurenge avuga ko kuri ubu ingamba z’umutekano zakajijwe, kugira ngo bakumire ibindi bitero n’ibyaha bitandukanye byagaragara muri Nyabimata.

Nsabimana Callixte ubu ari mu butabera akurikiranyweho ibyaha 16

Rudasingwa yagize ati “Muri buri mudugudu kuri buri site abaturage n’abashinzwe umutekano bafite amatelefone, telefone nini cyane ifite itoroshi (yitwa Two in One), dufite abantu batatu muri buri mudugudu bashinzwe kugenzura amarondo”.

Ati “Ibikorwa by’iterambere mu Murenge wa Nyabimata nk’uko mwabibonye birakataje, amatara ngayo ku mihanda”.

Nta gihe kiratangazwa cy’urubanza rwa Paul Rusesabagina, ariko ubugenzacyaha bumukurikiranyeho ibyaha byo kurema no kuyobora umutwe n’ihuriro MRCD ry’imitwe y’iterabwoba yitwara gisirikare.

Video: Richard Kwizera

Paul Rusesabagina yeretswe itangazamakuru ku wa Mbere

Muri icyo kiganiro cyafatiwe i Washington DC, aho yagombaga gukusanya inkunga muri urwo rugamba, yavuze ko bari “ku marembo y’u Rwanda kandi ko bidatinze bari hafi kwinjira bakabohora Abanyarwanda, bakava mu maboko ya (RPF-Inkotanyi)”.

Ntibyatinze kuko muri Kamena 2018, agatsiko k’abarwanyi biyise National Liberation Forces (NLF/FNL), kashyizweho n’umutwe witwa Movement for Democratic Change (MRCD), iki kikaba ihuriro ry’imitwe ya politike ryashinzwe na Rusesabagina afatanyije na Faustin Twagiramungu wigeze kuba Minisitirie w’Intebe mu Rwanda, n’abandi, batangiye kugaba ibitero mu Rwanda mu Ntara y’Amajyefo binjiriye mu Burundi.

Muri Nyakanga 2018, uwari umuvugizi wa FNL Callixte Nsabimana, mu mashusho ya video kuri Youtube, yagaragaye avuga ku mugaragaro ko bacengeye mu Rwanda kandi ko bamaze gufata ibirindiro muri Parike y’Igihugu ya Nyungwe no mu bindi bice by’u Rwanda, ari naho bateganyaga gutegurira ibitero byo guhirika ubuyobozi bw’u Rwanda.

Ibitero bya mbere babigabye mu Murenge wa Nyabimata mu Karere ka Nyaruguru Intara y’Amajyepfo, bica abaturage babiri bakomeretse batatu.

Nk’uko byemejwe na Police y’u Rwanda icyo gihe, mu bakomeretse harimo Umunyamabanga Nshingwabikorwa w’Umurenge wa Nyabimata Vincent Nsengiyumva watwikiwe imodoka, abandi baturage benshi bararashwe abandi batemeshwa imihoro mu ijoro ry’icyo gitero.

Abo bacengezi bagerageje no kugaba igitero ku nyubako ya Sacco ya Nyabimata, ariko basubizwa inyuma n’ingabo z’u Rwanda.

Banagabye igitero mu rusisiro (centre) rw’ubucuruzi rwa Rumenero basahura ibicuruzwa byinshi n’ibiribwa mu maduka y’abaturage.

Ku itariki 10 Kamena 2018, na bwo bari bagabye ikindi gitero mu Kagari ka Mukunge, Umurenge wa Ngera muri Nyaruguru bakomeretse abaturage, basahura n’ibicuruzwa byinshi mu gasantere k’ubucuruzi.

Rusesabagina agezwa ku cyicaro cya RIB ku Kimihurura

Igitero giheruka cy’inyeshyamba za FNL ni icyo mu Ukuboza 2018, ubwo zinjiraga mu Rwanda na none zinyuze mu Burundi, zigatega imodoka z’abagenzi eshatu mu Ishyamba rya Nyungwe, zicamo benshi abandi barakomereka bikomeye.

Nyuma baje gusubizwa inyuma n’Ingabo z’u Rwanda (RDF), ndetse zibasohora mu Ishyamba rya Nyungwe ari na ko inyeshyamba zigenda zitakaza abantu n’ibikoresho muri iyo mirwano; kugeza ubwo Ishyamba rya Nyungwe ryongeye kuba nyabagerwa n’ibikorwa by’ubukerarugendo birasubukurwa.

Kwemera uruhare

Aho yakoreraga muri Leta Zunze Ubumwe za AmeriKa (USA), Rusesabagina wamamaye kubera filime ‘Hotel Rwanda’ ishingiye ku binyoma bye, yiyemereye ubwe ko ari we wateguye ibyo bitero ndetse agaragara no mu biganiro bitandukanye by’amashusho (video) ahamya ko ari we uri inyuma y’ibitero byose byahitanye abaturage batari bake bigakomeretse abandi benshi mu Rwanda.

Muri kimwe muri ibyo biganiro, Rusesabagina yaragize ati “Kuva muri Nyakanga 2018, FLN yatangije urugamba rwo kubohora Abanyarwanda, kugeza ubu muri 2019, turasabwa gushyiramo imbaraga tukihutisha urugamba rwo kwibohora. Abanyarwanda ntibagishoboye kwihanganira ubugome n’ibikorwa by’ubugizi bwa nabi dukorerwa n’ubuyobozi bwa RPF,”

“Igihe kirageze ngo dukoreshe uburyo bwose bushoboka tukazana impinduka mu Rwanda. Niba uburyo bwose bwa politike twagerageje bwaranze, iki ni igihe cyo gukoresha uburyo bwa nyuma bushoboka”, aha Rusesabagina yashakaga kuvuga uburyo bwo gukoresha intwaro.

Rusesabagina yakomeje agira ati “Nzakomeza kwitanga uko nshoboye ntere inkunga urubyiruko rwacu”, aha yavugaga inyeshyamba za FNL avuga ko zirwanya ‘ingabo za Kagame’ kugira ngo zibohore Abanyarwanda – nk’uko yabyivugiye mu magambo ye.

Rusesabagina ati “Nk’Abanyarwanda, tugomba kumva ko ubu ari bwo buryo bwonyine bwo kuzana impinduka mu gihugu. Ni yo mpamvu mpamagarira Abanyarwanda bose, imitwe n’amashyirahamwe ya politike yose, gushyigikira uru rubyiruko rw’abasore n’inkumi bafashe iya mbere muri uru rugamba n’ubukangurambaga”.

Hashize amezi make Rusesabagina avuze ayo magambo, uwari umuvugizi wa FNL Nsabimana yatawe muri yombi yoherezwa mu Rwanda mu mpera za Mata 2019, ashyikirizwa ubutabera ku byaha by’uruhurirane 16 ashinjwa, birimo iterabwoba n’ubugambanyi. Urubanza rwe na n’ubu ruracyaburanishwa.

Mu biganiro byinshi yagiye atanga ahantu hatandukanye, Rusesabagina ntiyigeze yemera ko Nsabimana yatawe muri yombi, kandi yari yaracakiriwe mu birwa bya Comores/Comoros.

Ni byo Rusesabagina yavuze muri aya magambo, ati “Icyo nababwira ni uko ‘Sankara’ ameze neza kandi ari ahantu hatekanye. Azajya ahagaragara igihe nikigera”. Aha Rusesabagina yari mu kiganiro na VOA ku itariki 22 Mata, ubwo yemezaga ko FLN iri ku butaka bw’u Rwanda kandi ko izahaguma kugeza ivanyeho ubuyobozi buriho.

Ku itariki 30 Mata hashize icyumweru, Minisitiri w’Ububanyi n’Amahanga wariho icyo gihe, Dr. Richard Sezibera, yemeje ko Nsabimana ari mu Rwanda kandi ko agomba gushyikirizwa ubutabera kugira ngo aryozwe ibyaha yakoze.

Nsabimana Callixte yafashwe muri Mata 2019

Gutabwa muri yombi no koherezwa mu Rwanda kwa Nsabimana, byahungabanyije bidasubirwaho imitwe yitwara gisirikare n’abarwanya u Rwanda bakorera mu mahanga, mu gihe leta y’u Rwanda na yo yari imaze gufata icyemezo cyo guta muri yombi no kugeza mu butabera uwo ari we wese ufite umugambi wo kwica Abanyarwanda no guhungabanya umudendezo w’igihugu.

Mu Ugushyingo 2019, nyuma y’ibindi bitero byagabwe ku Rwanda mu Ukwakira k’uwo mwaka mu Turere twa Musanze na Burera bigahitana abaturage 14, Perezida Paul Kagame yaburiye umuntu uwo ari we wese uzishora mu bikorwa byo guhungabanya umutekano w’u Rwanda, avuga ko uzabifatirwamo azabiryozwa ku rwego rwo hejuru.

Ubwo yari mu muhango wo kurahiza Abaminisitiri bashya muri Guverinoma n’abayobozi bashya muri RDF, Perezida Kagame yaragize ati “Tugiye kuzamura igiciro ku muntu uwo ari we wese wifuza kuduhungabanyiriza umutekano”.

Kagame yarongeye ati “Bazabiryozwa ku buryo buhanitse by’umwihariko abo bose bashaka guhungabanya igihugu cyacu, igiciro kigiye kuba kinini cyane, ni ukuri pe. Ndabibabwiye, kandi nzi neza ko mwumva neza icyo nshaka kuvuga”.

Gutabwa muri yombi

Amakuru yageze kuri Kigali Today aravuga ko urupapuro rwo guta muri yombi Rusesabagina binyuze muri Polisi Mpuzamahanga (Interpol), rwasohotse muri Werurwe 2019. Ni rumwe mu mpapuro zirindwi (7) zatanzwe n’ubuyobozi bw’u Rwanda zisaba guta muri yombi abayobozi b’udutsiko tw’iterabwoba dukorera mu karere, by’umwihariko mu Burasirazuba bwa Repubulika ya Demukarasi ya Kongo (DRC).

Icyo gihe, Umuyobozi Mukuru wa Police (IGP) Dan Munyuza yemeje ko u Rwanda rurimo gukorana na Interpol mu gushakisha no guta muri yombi bamwe mu bantu bari inyuma y’ibitero byo guhungabanya umutekano w’u Rwanda.

Umushinjacyaha Mukuru wariho icyo gihe, Jean Bosco Mutangana, yemeje ko u Rwanda rwatanze impapuro zirindwi zibasabira gutabwa muri yombi, ariko ntiyigeze atangaza amazina yabo, kuko byari kubangamira iperereza ryakorwaga.

Amakuru ya mbere yabonetse yavugaga ko Rusesabagina, umuyobozi wa MRCD/FLN na Kayumba Nyamwasa, wemejwe nk’umuyobozi w’icyiswe ‘P5 Coalition’ muri raporo y’itsinda ry’impuguke z’Umuryango w’Abibumbye, bombi bari mu bashakishwaga.

Rusesabagina (ibumoso) ari kumwe na Faustin Twagiramugu

P5 ni ihuriro ry’imitwe ya politike itanu (5) irimo uwitwa Amahoro People’s Congress (AMAHORO-PC), Forces Démocratiques Unifées-Inkingi (FDU INKINGI), People’s Defence Pact-Imanzi (PDP-IMANZI), Socialist Party-Imberakuri (PS IMBERAKURI) na Rwanda National Congress (RNC) iyobowe na Kayumba Nyamwasa.

Nsabimana na we yari mu bashakishwaga, ndetse aza gufatwa yoherezwa mu Rwanda muri Mata 2019.

Ifatwa rya Rusesabagina, igihirahiro muri bagenzi be

Nyuma y’uko umuvugizi wa FLN/NLF Nsabimana atawe muri yombi, Rusesabagina ku itariki 1 Gicurasi 2019, yavuze ko gutabwa muri yombi k’umuvugizi w’abarwanyi be bitaciye intege umugambi wabo. Ntibiteye kabiri na we (Rusesabagina) aba yisanze i Kigali, aho ndetse bitegerejwe ko bombi bashobora kuzahurira mu cyumba kimwe cy’urukiko.

Kuwa mbere Tariki 31 Kanama, Urwego rw’Igihugu rw’Ubugenzacyaha (RIB), ni bwo rwerekanye akanya gato Rusesabagina w’imyaka 66 imbere y’itangazamakuru, RIB isobanura ko yatawe muri yombi binyuze mu bufatanye mpuzamahanga, ariko ntiyavuze ibihugu byagize uruhare mu gufatwa kwe.

RIB yasobanuye ko “Rusesabagina akekwaho gushinga, kuyobora, gutera inkunga no kwifatanya n’udutsiko tw’abagizi ba nabi b’abahezanguni bakora iterabwoba barimo MRCD na PDR-Ihumure, bakorera mu bice bitandukanye by’akarere no mu mahanga”.

RIB kandi yavuze ko Rusesabagina yashakishwaga n’ubutabera mpuzamahanga, akaba agomba gushyikirizwa ubucamanza ku byaha ashinjwa birimo iterabwoba, guteza inkongi y’umuriro, ubushimusi n’ubwicanyi, byakorewe abaturage b’inzirakarengane b’Abanyarwanda badafite intwaro ku butaka bw’u Rwanda, birimo ibyabereye i Nyabimata mu Karere ka Nyaruguru muri Kamena 2018, no muri Nyungwe mu Karere ka Nyamagabe mu Ukuboza 2018.

Umuvugizi w’Umusigire wa RIB Dr. Thierry Murangira, yavuze ko ibihugu byagize uruhare mu guta muri yombi Rusesabagina amazina yabyo adashobora gutangazwa ubu ku bw’impamvu z’iperereza rikirimo gukorwa.

Umuvugizi w’umusigire wa RIB Dr Thierry Murangira

Dr. Murangira ati “Icyo twavuga kugeza ubu ni uko uwo ari we wese ushaka guhungabanya umutekano w’u Rwanda atazigera aca mu rihumye ubutabera. Bazakomeza bafatwe no mu bihe biri imbere. Dufite ubushobozi n’ubushake bwo kubikora dufatanyije n’amahanga kubera ko nta gihugu na kimwe gishobora gushyigikira ubwicanyi bukorerwa abaturage b’ikindi gihugu. Ntawe ushobora kwica Abanyarwanda ngo birangirire aho”.

Gutabwa muri yombi kwa Nsabimana kwatunguye benshi, ariko ifatwa rya Rusesabagina ryo ni agahebuzo; dore ko na bagenzi be ba hafi cyane nka Twagiramungu batazi uko byagenze. Ibihugu byinshi n’imijyi byaravuzwe, ariko nta muntu n’umwe - yewe n’umuhungu we Trésor Rusesabagina - , ntazi uko byagenze.

Mu butumwa burebure yanyuje kuri Facebook, Trésor Rusesabagina yatabarije se n’ubwoba bwinshi, ariko ntiyasobanura aho yaba yaraherereye cyangwa icyo yari arimo gukora ubwo yatabwaga muri yombi.

Twagiramungu, inkoramutima ya Rusesabagina, mu kiganiro n’itangazamakuru na we yavuze ko atigeze amenya igihe n’ahantu Rusesabagina yazindukiye, asobanura ko ashobora kuba wenda yari yagiye muri gahunda ze bwite zidafite aho zihuriye n’ibikorwa by’imitwe yabo ya politike.

Hagati aho ariko Twagiramungu yemeje ko hari undi muntu wamuhaye amakuru avuga ko Rusesabagina yari yakoreye urugendo muri Afurika, ariko ngo ntiyabashije kumenya igihugu yagiyemo n’impamvu. Twagiramungu yavuze ko mu mezi atandatu ashize, Rusesabagina yarari muri Leta Zunze Ubumwe za Amerika, ariko anemeza ko yari arimo gukorwaho iperereza mu Bubiligi nk’igihugu yigeze kubamo.

Aganira na BBC, Twagiramungu yaragize ati “Icyo nababwira ni ibirebana n’ibyabereye mu Bubiligi. Hari abantu baje baturutse mu Rwanda muri RIB baza guhata ibibazo Rusesabagina. Icyo gihe banasatse inzu ye ariko ntibamuta muri yombi”.

Muri icyo kiganiro na BBC, Twagiramungu yavuze uburyo yabonaga ko Rusesabagina yari agiye gutabwa muri yombi ariko ntibyabaho kubera ko yari afite ubwenegihugu bw’Ababiligi.

Twagiramungu ndetse yavuze ko nyuma yaho ngo amaze kubona ko batamutaye muri yombi, yibajije ko iperereza na ryo ryari rirangiriye aho. Ibi kandi ngo byabaye mu mezi arindwi (7) ashize nk’uko yabyemeje.

Mu majwi byumvikana ko ari ay’abambari ba Rusesabagina akomeje gusakazwa ku mbuga nkoranyambaga, harimo abavuga ko gutabwa muri yombi kwe ari nko gukubitwa n’inkuba kuko batigeze babitekereza habe na mba, dore ko n’abamuteraga inkunga, abamushyigikiye n’abo bakorana bose nta n’umwe wamenye uko byagenze.

Kwifatira Abanyaburayi

Abasesenguzi bavuga ko Rusesabagina yamaze imyaka hafi 20 yifatira amahanga abeshya ko ari ‘intwari’ yatabaye Abatutsi barenga 1,200 kuri Hotel des Mille Collines, aho yakoraga nk’umuyobozi w’abakozi mu gihe cya Jenoside yakorewe Abatutsi (1994), hashingiwe kuri filime y’ikinyoma ya ‘Hotel Rwanda’ yakinwe mu izina rye muri 2004, batitaye ku byavugwaga n’abarokotse Jenoside babeshyuzaga ishingiro ry’iyo nkuru.

Tom Ndahiro, umushakashatsi akaba n’umusesenguzi kuri Jenoside, avuga ko Rusesabagina yifatiye amahanga igihe kirekire abasha kuyobya uburari abamuteraga inkunga ntibigera na rimwe bamenya ibindi bikorwa yari ashyizeho umutima, ahubwo bakomeza kumubona nk’umuturage usanzwe wabashije gutabara amagana y’abahigwaga.

Tom Ndahiro ati “Bamaze igihe kinini baranze kwemera ko Rusesabagina ahakana akanapfobya Jenoside yakorewe Abatutsi ari na yo yamugize icyamamare ayikoresha mu magambo yavugaga n’ibikorwa yakoraga. Ni ibintu byagaragariraga buri wese. Yabikoze ku mugaragaro bose barebera, ntihagira n’umwe ugerageza kubimuryoza,”

“Igiteye urujijo kurusha ibindi ni ukubona Rusesabagina yariyemereye ku mugaragaro ko arwanya ubuyobozi bwemewe bw’u Rwanda, ndetse akemera ko ari we uri inyuma y’ibitero byitwaje intwaro byahitanye abaturage b’inzirakarengane mu Karere ka Nyaruguru, benshi bikabasiga nta ngingo, ariko agakomeza kwifatira amahanga na yo akomeza kumubonamo intwari”.

Ndahiro avuga ko cyari ikibazo cy’igihe gusa kugira ngo u Rwanda n’amahanga azi agaciro k’ubutabera, bahagurikire Rusesabagina kugira ngo aryozwe ibyo yakoze, kandi asigeho gukomeza kwidegembya nk’uko yari amaze imyaka yidegembya.

Ibinyoma bya Rusesabagina byanamuhesheje ibihembo bitandukanye kubera uruhare yagize muri filime ya ‘Hotel Rwanda’, birimo Umudari w’Ubwigenge utangwa na Perezida wa USA ‘Presidential Medal of Freedom’ yambitswe na Perezida George W. Bush muri 2005.

Ibi ariko ntibyamubujije kunengwa imyaka irahita indi irataha kubera kugoreka amateka, by’umwihariko abarokotse Jenoside yakorewe Abatutsi batahwemye kugaragaza uburyo yiyitiriye ibikorwa by’ubutwari atigeze akora.

Igitabo cyamuritswe muri 2015 na Edouard Kayihura, umwe mu barokokeye muri Hotel des Mille Collines, ni cyo cyashyize hanze ibinyoma bya Rusesabagina, kigaragaza ubuhamya bw’abarokotse bemeza ko Rusesabagina atari umuyobozi mukuru wa hoteli nk’uko bivugwa muri ‘Hotel Rwanda’, ndetse ko yishyuzaga abantu babaga bahahungiye.

Muri icyo gitabo, abatangabuhamya basobanuye uburyo utarabashaga kwishyura Rusesabagina, yajugunywaga hanze aho abicanyi b’interahamwe n’abasirikare batagira ingano babaga bategeye Abatutsi.

Rusesabagina yabashije kujijisha amahanga imyaka n’imyaniko

Icyo gitabo cya Edouard Kayihura yise “Inside the Hotel Rwanda: The Surprising True Story…and Why It Matters Today” ugenekereje mu Kinyarwanda: Imbere muri Hoteli Rwanda: Inkuru y’Ukuri Itangaje…n’impamvu ari ikibazo uyu munsi, gisobanura byimbitse ibikorwa bitavugwa muri filime ‘Hotel Rwanda’, uburyo Rusesabagina yafatiranaga abantu babaga bari mu kaga bahunga abicanyi bamaraga abantu mu mihanda, mu ngo n’aho babasangaga bihishe.

Inkuru ziri mu gitabo cya Kayihura zemezwa n’akaga abarokokeye kuri Mille Collines bahuye na ko, barimo ndetse n’abantu bari bakomeye nka Bernard Makuza waje kuba Minisitiri w’Intebe, Ambasaderi Wellars Gasamagera na nyakwigendera Bertin Makuza wari umucuruzi; abo bose muri 2011 bamaganiye kure inkuru ya Rusesabagina.

Umusesenguzi Tom Ndahiro avuga ko kuba Rusesabagina agiye kugezwa imbere y’ubutabera ari amahirwe yari ategerejwe kuva kera, kugira ngo ibinyoma bye bishyirwe ku mugaragaro nyuma y’imyaka hafi 20, bityo ikirura cyari kimaze imyaka hafi 20 kiyambitse uruhu rw’intama, isura yacyo nyayo ijye ahagaragara.

Paul Rusesabagina yeretswe itangazamakuru kuri uyu wa Mbere

Rusesabagina arakekwaho kurema no kuyobora umutwe n’ihuriro ry’imitwe y’iterabwoba yitwara gisirikare igizwe n’abahezanguni, irimo MRCD na PDR-Ihumure, ikorera mu bice bitandukanye mu karere no mu mahanga.

Itangazo rya RIB rivuga ko hari hashize igihe Rusesabagina ashyiriweho impapuro mpuzamahanga zisaba ko afatwa agashyikirizwa ubutabera, kugira ngo abazwe ku byaha bikomeye aregwa birimo iterabwoba, gutwika, ubushimusi n’ubwicanyi byakorewe abaturage b’inzirakarengane b’Abanyarwanda mu duce dutandukanye tw’u Rwanda turimo Nyabimata mu Karere ka Nyaruguru muri Kamena 2018, no muri Nyungwe mu Karere ka Nyamagabe mu Ukuboza 2018.

Ubu Rusesabagina afungiye kuri Sitasiyo ya Police ya Remera, mu gihe hagikorwa iperereza ku byo akurikiranyweho hakurikijwe ibiteganywa n’amategeko y’ikurikiranabyaha.

Mu gitondo cyo kuri uyu wa Mbere, ni bwo Paul Rusesabagina yeretswe itangazamakuru ku cyicaro cya RIB mu Mujyi wa Kigali.

Reba iyi Video wumve ibyo ashinjwa byose

Video: Richard Kwizera