Bashyize indabo ku Rwibutso rwa Kibilira

Chairperson wa RPF Inkotanyi muri uwo Murenge Duhozanye Beline avuga ko impamvu nyamukuru biyemeje kujya basura inzibutso za Jenoside yakorewe Abatutsi, ari ukumenya neza amateka nyayo ya Jenoside by’umwihariko ku rubyiruko, no kuyasobanurira abandi hagamijwe guhangana n’ingengabitekerezo yayo.

Agira ati, "Aha hari amateka yivugira imibiri iruhukiye hano ni myinshi isaga ibihumbi 24, n’ahandi mu nzibutso hari imibiri myinshi nka gihamya ko Jenoside yateguwe, ikanashyirwa mu bikorwa n’Ubuyobozi buyihagarikiye, twe rero turi abahamya ko amakuru twamenye ari ingenzi atuma tunigira ku Nkotanyi zitanze zigahagarika Jenoside".

Chairman wungirije w’Umuryango FPR Inkotanyi mu Karere ka Ngororero Rushyana Etienne, avuga ko gusura urwibutso ari umwanya wo kongera gutegereza ku bukana bwa Jenoside yakorewe Abatutsi, no gukumira ko yakongera kubaho ukundi, kuko ibyabaye ari ubugome ndengakamera.

Agira ati, "Aha twongera kwibuka ko Abanyamuryango ba FPR Inkotanyi dufite umukoro ukomeye wo kurwanya Jenoside n’ingengabitekerezo yayo, tukaba aba mbere mu kwigisha ububi bwa Jenoside kuko nitwe moteri ya Guverinoma, kumenya amateka atandukanye rero buzadufasha kugira urubyiruko rusobanukiwe kandi rwiyemeza guharanira ukuri".

Biyemeje kujya basura urwibutso nibura rimwe mu mwaka

Rushyana avuga ko Abanyamuryango ba FPR Inkotanyi bakwiye kugira uruhare mu kubanisha Abanyarwanda, kandi bakagira uruhare mu kwegera abagifite amakuru y’ahajugunywe imibiri y’abishwe muri Jenoside, bagatanga ayo makuru kuko ari kimwe mu bituma Abarokotse Jenoside badaheranwa n’agahinda.

Umuryango uharanira inyungu z’Abarokotse Jenoside yakorewe Abatutsi mu 1994 IBUKA mu Karere ka Ngororero, urasaba kandi Imirenge yose igize ako Karere kwigira ku Murenge wa Muhanda, ku bikorwa byiza wiyemeje byo gusura inzibutso za Jenoside no kuremera abayirokotse batishiboye.

Umuyobozi wa IBUKA mu Karere ka Ngororero Jean Claude Ntagisanimana, avuga ko umwihariko wa Muhanda ari uko Abanyamuryango wa FPR Inkotanyi baho, biyemeje ko buri mwaka bakora igikorwa cyo gusura urwibutso nibura rumwe kandi bakanaremera uwarokotse, ku buryo n’abandi bagiye babikora byarushaho guhashya abahembera ingengabitekerezo ya Jenoside no guhindura imibereho y’abarokotse batishiboye.

Bagabiye inka uwarokotse Jenoside utishoboye

Ntagisanimana asaba ko n’Indi Mirenge yigira ku wa Muhanda

Rushyana avuga ko Abanyamuryango ba FPR-Inkotanyi bakwiye kugira uruhare mu kubanisha Abanyarwanda

Abantu 18 bakomerekeye muri iyi mpanuka

Ni impanuka yabereye mu Kagari ka Runyinya mu Mudugudu wa Marembo, aho iyo modoka yarenze umuhanda ikagwa hafi mu mugezi wa Nyahene, abagenzi bose n’umushoferi barakomereka, n’imodoka irangirika cyane.

Amakuru atangazwa n’Umunyamabanga Nshingwabikorwa w’Umurenge wa Hindiro, Musabyimana Japhet, avuga ko iyo mpanuka ari iya kane ihabereye mu mezi atandatu ashize, hagakekwa ko abashoferi bahagera bamaze kwirara kubera ko ikoni riberamo izo mpanuka, riba ritagaragara neza.

Agira ati "Urebye mbere y’uko ugera ahabera izo mpanuka no muri uku kwezi, haguye imodoka yari itwaye abagororwa ibajyanye ku bitaro bya Kabgayi, iyo ugiye kuhagera hateye neza abashoferi bakiruka, bakagera muri iryo koni rikabatungura bakarenga umuhanda. Imiterere y’umuhanda no kwirara kw’abashoferi ni byo nyirabayazana w’izo mpanuka".

Avuga ko muri izo mpanuka zose nta wahise uhasiga ubuzima, ariko impanuka ya Minibisi yo ku mugoroba wo ku wa 22 Kamena 2025, birakekwa ko umuntu umwe yaba yamaze kugwa mu bitaro bya Kabaya, naho abandi barembye bakaba barimo kwitabwaho.

Agira ati "Hari abarimo kwitabwaho ku bitaro bya Kabaya, hari n’abagiye koherezwa mu bitaro i Kigali. Turakeka ko haba hari uwamaze gupfa, hari n’aboherejwe ku bitaro bya Ruhengeri".

Musabyimana asaba abakoresha umuhanda Ngororero-Mukamira kwitwararika mu makorosi yo mu misozi ya Hindiro na Kabaya, kuko ahabereye iyo mpanuka hateye nabi kandi bimaze kumenyerwa ko imodoka nyinshi zihagwa.

Bamwe mu bakoresha uwo muhanda baganiriye na Kigali Today, bavuga ko ikorwa ry’uyu muhanda rizorohereza abawukoresha.

Emmanuel Iyakaremye, umuyobozi wa kimwe mu bigo bishinzwe gutwara ba mukerarugendo mu Rwanda agira ati “ntibyari byoroshye kugeza imodoka kuri iri shuri. Gukora uyu muhanda bizoroshya ingendo n’imodoka nto zikaba zashobora kuhagera, n’umubare w’abasura wiyongere.”

Umunyamabanga Nshingwabikorwa wa CHENO, Deo Nkusi, avuga ko bakoze ubuvugizi bitewe n’uko kugera ku ishuri rya Nyange bitari byoroshye.

Aha yagize ati “Uyu munsi turishimira ko batangiye kuwukora. Hashize igihe kinini barabitwemereye none babishyize mu bikorwa.”

Ku rundi ruhande abangirijwe imitungo n’ibikorwa by’umuhanda, bavuga ko ibikorwa by’ubucuruzi bari bahafite birimo amaduka n’utubari bitagikora bitewe n’uko bagonzwe n’umuhanda, inzu zabo zigasenywa, bakaba batarahabwa ingurane bemerewe.

Bamwe mu bo twaganiriye batifuje kugaragara mu itangazamakuru, babwiye Kigali Today ko bari bahafite ibikorwa by’ubucuruzi byabinjirizaga amafaranga, ubu bikaba byarahagaze batazi n’igihe bazabonera ingurane bemerewe.
Ubuyobozi bw’Akarere buvuga ko ingurane ku bikorwa byangijwe n’umuhanda yatanzwe uretse ku bantu bake bataruzuza ibisabwa.

Christopher Nkunsi, Umuyobozi w’Akarere ka Ngororero yabibwiye Kigali Today ati “Abandi bose babonye ingurane. Aho mperukiye hari abaturage bagera muri batatu bari batarishyurwa, ariko bari mu nzira zo kuzuza ibyangombwa. Igihe cyose bizaba bimaze kuboneka nabo bazishyurwa.”

Ikibazo cy’ingurane zitinda si gishya

Mu cyumweru gishize, Inteko Rusange y’Umutwe w’Abadepite yagarutse ku kibazo cy’ingurane ikwiye, aho yasabye Minisiteri y’Imari n’Igenamigambi (MINECOFIN) kwita ku nama n’ibitekerezo byatanzwe ku mbanzirizamushinga y’ingengo y’Imari ya Leta 2025-2026, birimo kwishyura ibirarane by’ingurane zagombaga guhabwa abaturage.

Nko mu Karere ka Gakenke hari abaturage batarahabwa ingurane ku mitungo yabo yanyujijwemo ibikorwa remezo, bagomba kwishyurwa na RTDA, WASAC na EDCL, amafaranga angana na 2,241,529,227 Frw, abaturage 275 bafite ikibazo cy’ingurane ikomoka ku rugomero rwa Nyabarongo, batarishyurwa ingurane ingana na 411,618,163 Frw.

Hari kandi abaturage 17 bo mu Kagari ka Ngiryi, mu Murenge wa Jabana, Akarere ka Gasabo bangirijwe imitungo n’ikwirakwizwa ry’amashanyarazi, bakaba batarahabwa ingurane ikwiye ku mitungo yabo kuva muri 2012.

Basanga Nyange ari ikimenyetso cy’u Rwanda rushya n’urw’amateka mabi rwanyuzemo

Babivuga nyuma y’uko basuye urwibutso rwa Jenoside rwa Nyangemu Karere ka Ngororero, aho basobanuriwe ukuntu Abatutsi bahungiye kuri paruwasi ya Nyange bagasenyerwaho Kiliziya ikabagwira bakayipfiramo, ariko hakurya yaho hakaba ari ho hari ishuri ryabonetsemo abana banze kwitandukanya kugeza bamwe bishwe n’abacengezi, ryanagizwe Igicumbi cy’Ubunyarwanda.

Ubundi urwibutso rwa Jenoside rwa Nyange rwubatse ahahoze kiliziya ya Nyange ku gasozi kitegeye aka Ngobagoba, kariho ishuri ryagaragayemo abana b’Intwari. Uri ku ishuri aba abona hakurya urwibutso rwa Jenoside ndetse na Kiliziya nshyashya yubatswe hepfo yarwo, kimwe n’uko n’uri ku Kiliziya aba yitegeye ririya shuri.

Nyuma yo gusura aha hombi no kubona ko hageranye, Elie Uwayisaba, umunyeshuri muri Kaminuza Gatolika y’u Rwanda yagize ati "Uriya mupadiri (Padiri Seromba wasabye ko kateripurari isenya Kiliziya ikagushwa ku Batutsi) iyo ataza gutegeka ko urusengero ruhirikwa ngo bapfiremo, hari abari kurokoka. Ntabwo byagakwiye kubaho."

Yunzemo ati "Imyitwarire ya bariya bana (banze kumvira abasabaga Abatutsi kujya ku ruhande rumwe n’Abahutu ku rwabo) iragaragaza ko hari aho u Rwanda rwari ruvuye n’aho rwari rutangiye kujya. Nyange ni ikimenyetso cy’u Rwanda rushya, ikaba n’ikimenyetso cy’amateka mabi u Rwanda rwanyuzemo."

Bashyize indabo ku mva za zimwe mu Ntwari zishyinguye mu ishuri zagaragarijemo ubutwari

Sylvie Uwamahoro na we ati "Kumva ko Chantal yasubije Abacengezi ko bose ari Abanyarwanda, byansigiye isomo rikomeye. Hamwe na bagenzi be nabigiyeho kuba Intwari, kutivangura n’abandi, twese tukamenya ko turi Abanyarwanda."

Akomeza agira ati "N’ubwo ababyeyi bagerageza kumbwira ibihabanye n’ubumwe sinabumvira, ahubwo nabatangaho amakuru. Amateka mabi yabayeho arababaje, sinifuza ko yasubira."

Eric Karenzi ukora muri Kaminuza Gatolika y’u Rwanda, na we ati "Ndi Umunyarwanda yatangiriye i Nyange. Ibya bariya bana bagaragaje ubutwari byabaye mu 1997, ahandi dutangira kuyumva muri za 2007. Ubumwe n’ubwiyunge bikozwe neza bigirira akamaro ababirimo ariko n’Igihugu muri rusange."

Nicolas Rwaka, umuyobozi mu Rwego rw’Intwari z’Igihugu, Imidari n’Impeta by’Ishimwe, ari na we wafashije abakozi n’abanyeshuri biga muri Kaminuza Gatolika y’u Rwanda gusura Igicumbi cy’Ubunyarwanda, abajijwe aho bariya bana bakomoye ubutwari bwatumye banga kwitandukanya, yagize ati "Intwari z’i Nyange twaganiriye zatubwiye ko bari bamaze kubona ingaruka za Jenoside yakorewe Abatutsi, babona nta kamaro k’ivangura, kandi bakabona n’abakoze ibibi ntacyo byabamariye."

Rwaka avuga ko kimwe mu byateye ubutwari abana b’i Nyange ari uko bari barabonye ingaruka za Jenoside

Yunzemo ati "Babitewe kandi na gahunda ya Leta yari iriho. Abasirikare buri wa gatatu bazaga kubigisha, bakababwira iby’amacakubiri ubwayo n’ingaruka zayo. Ikindi ni imyemerere. Kuba ishuri bigagamo ryari irya Kiliziya, bafataga umwanya wo gusenga no gusabirana."

Ikindi, ngo bari bafite animateri wahoraga abigisha indirimbo ivuga ngo "Mujye mukora ibyiza, mureke ibibi."

Umuyobozi wa Kaminuza Gatolika y’u Rwanda, Padiri Dr Laurent Ntaganda, avuga ko umwaka umwe bibukira Jenoside yakorewe Abatutsi ku ishuri, ubundi bakagira ibiganiro bihurirwaho n’abanyeshuri bose ariko abahagarariye abandi bagakora urugendo bakajya gusura urwibutso rwa Jenoside.

Ati "Ni uburyo bwo kugira ngo abo turera barangwe n’ubumwe."

Kaminuza Gatolika y’u Rwanda kuri ubu iri kwigwamo n’abanyeshuri bagera ku bihumbi bine, ariko ababashije gusura Nyange ni 160. Hari ku itariki ya 10 Gicurasi 2025, batahanye umukoro wo kuzabwira bagenzi babo ibyo babonye.

Basobanuriwe amateka y’ubutwari bwaranze abanyeshuri b’i Nyinge

Rukundo (ufite mikoro) avuga ko ababazwa n’abahakana Jenoside kandi yararokotse wenyine n’abaturanyi babizi

Rukundo avuga ko abantu 14 mu be bishwe baruhukiye mu Rwibutso rwa Kesho, bane bari mu Rwibutso rwa Kabaya mu Karere ka Ngororero naho babiri bakaba baraburiwe irengero.

Kwa Rukundo hahoze imiryango y’abe, agasozi kose ubu gahinze icyayi, inzira yajyaga iwabo ubu ijya ku rwibutso rwa Jenoside yakorewe Abatutsi mu 1994, ku gasozi ka Kesho.

Inzuri zikikije iwabo zahoze ari iz’abasirikare bakuru, ni ingenzi kuri we mu gihe cya Jenoside kuko ubwo barimo bihishahisha mu bihuru, bahengeraga bwije abashumba baryamye, bakajya gukama inka zo muri izo nzuri bakabona amata, ubu zirimo inka z’abandi baturage bahororera.

Avuga ko ahubatse urwibutso rwa Kesho hari mu isambu ya se, bari batuye mu yahoze ari Komini Gaseke, muri Segiteri Rwiri. Gusa ngo kuva mu 1959, yatangiye kubona Abatutsi bahohoterwa, bazizwa ubusa kugeza n’ubwo abayobozi babwiye abaturage ko umugabo witwa Nyakarundi (Umuryango we warazimye), ngo yabarogeye iriba bavomaho, hagamijwe guhembera umujinya ngo Abatutsi bicwe.

Mu mpinga ya Kesho kwa Rukundo ni ho hubatse urwibutso rwa Jenoside rwa Kesho ruruhukiyemo imibiri isaga 2500

Rukundo avuga ko mu 1991 ubwo Abatutsi benshi bari bahungiye ku gasozi ka Kesho, abaturanyi n’inshuti zabo bajyaga babagemurira, bityo bakabona imbaraga zo guhangana n’ibitero by’interahamwe.

Babagemuriye inzuki ngo zibarye batatane

N’ubwo habagaho ibikorwa by’urukundo byo gufasha abari bahungiye kuri Kesho, hari interahanwe zabibyaje amayeri maze zishaka umwe mu basanzwe bagemura, zimukorera igiseke cyuzuye inzuki, maze abari bahahungiye banga kumuhagarika azamuka Kesho, kuko bakekaga ko abagemuriye, akigera aho bateraniye apfundura cya giseke inzuki zirara mu Batutsi zirabadwinga.

Ubwo hafi aho ariko interahanwe zari zagose ako gasozi, zishaka ko abiruka bahunga inzuki bagwa mu bico byazo, ari nako byaje kugenda ariko inzuki ziracogora ibitero by’interahamwe ntizabona uko byinjira neza mu nkambi, bakomeza kwihagararaho, kugeza haje ubufasha bw’abapolisi.

Rukundo avuga ko nyuma yo gukomeza gushakisha ubuhungiro, umuryango we wageze aho ukamwohereza n’abavandimwe be bahungishirizwa muri Congo, aho yaje kuva agaruka yumvise ko ingabo za RPA zari zageze muri CND.

Agira ati "Nubwo kugera muri Congo byaduhenze cyane kuko twagendaga badufatira kuri bariyeri, bashaka kutwica tugatanga amafaranga, dore ko ababyeyi bari baragurishije inka ngo tubone impamba, byarangiye tugeze muri Congo. Ariko ubwo numvaga ko Inkotanyi zageze muri CND nahisemo kugaruka, kuko numvaga ko ibintu ari amahoro, ntawe uzongera kutwica n’ubwo nabyibeshyagaho".

Ni igikorwa cyitabiriwe n’abantu benshi

Akaga kenshi ku bahungiye Kesho nyuma y’urupfu rwa Habyarimana

Rukundo n’Abatutsi bahungiye ku gasozi ka Kesho, bavuga ko Perezida Habyarimana akimara kwicwa indege yari imutwaye ihanuwe, umurambo we wahungishirijwe ku ruganda rw’icyayi rwa Rubaya, maze hoherezwa n’abasirikare kuwurinda.

Kubera ko uruganda rw’icyari rwitegeye neza agasozi ka Kesho ahari harahungiye Abatutsi benshi, byatumye abo basirikare batiza umurindi interahamwe maze batangira kubica, kugeza umuryango wa Rukundo uhatikiriye, kuko kugeza ubu mu Rwibutso rwa Kesho hashyiguyemo abe 14.

Agira ati "Aho nari ndi baturashe amasasu menshi, natwe twasaga nk’abakoze ibirindiro bizengurutse agasozi kose. Nari hafi mu gashyama ko hepfa hasanzwe inkangu, urusasu rwa mbere rwafashe murumuna wanjye ahita apfa, urwa kabiri ruhitana data wacu urwa gatatu rutwara murumuna wanjye, njyewe mpita ntoroka njya hakurya mu gashyamba kari gahari”.

Avuga ko mu kabande ka Kesho hatemba umugezi wa Giciye wari wuzuye cyane kuko harimo kugwa imvura nyinshi, ituma hari abadashobora kuwusimbuka maze abanyantege nke benshi bararohama ku buryo mu bagize imiryango yazimye, hari n’abatwawe n’uwo mugezi.

Rukundo avuga ko kugeza ubu iyo areba ibyabaye iwabo, nubwo yarokotse bimubabaza kumva hari abahakana n’abapfobya Jenoside yakorewe Abatutsi, dore ko ku gasozi kabo imiryango 40 yazimye.

Basaba ko ku mugezi wa Giciye hashyirwa ikimenyetso cy’amateka

Arondora amazina y’abantu bamuzi neza biganye, banabanye mbere na nyuma ya Jenoside bakiriho, ko ari abagabo bo kubihamya kandi ko kuba ari we wenyine warokotse mu bagize umuryango we, abavuga ko Jenoside itabaye bigiza nkana.

Agira ati "Urubyiruko ruri mu basigaye bafite ingengabitekerezo ya Jenoside kubera ko babeshywa, none se ko mvuka mu muryango w’abantu 20 nkaba nsigaye ndi umwe abandi bagiye he? Hano hari abo mbona twiganye twari duturanye babihamya ko iwacu bashize, guhakana no gupfobya Jenoside biratubabaza cyane".

Rukundo hamwe n’abagize komite z’Umuryango IBUKA mu Karere ka Ngororero, basaba ko bashyirirwaho ikimenyetso cy’amateka ku mugezi wa Giciye kuko watwaye Abatutsi benshi, kandi bagashyirirwaho uburyo bazajya nabo bibuka imiryango yazimye nk’uko bikorwa ahandi.

Inzira yajyaga kwa Rukundo ubu isigaye ijya ku rwibutso rwubatse mu butaka bwa se

Rukundo n’abo bari bihishanye bahengeraga bwije bakajya gukama inka muri ziriya nzuri ngo babone amata yo kunywa, kuko ntabyo kurya bari bakibona ariko abashumba ngo bageze aho barabivumbura

Twagirumwami avuga ko aticuza kuba yarajyanye umwana we kwiga i Nyange

Twagirumwami wo mu Murenge wa Kagano mu Karere ka Nyamasheke, umukobwa we nyakwigendera Marie Chantal Mujawamahoro, yari mu mwaka wa gatandatu ku ishuri ryisumbuye rya Nyange mu 1997, ubwo abacengezi babagabagaho igitero mu ijoro rya tariki 18 Werurwe, abakirokotse bakaba barashyizwe mu Ntwari z’Igihugu mu cyiciro cy’Imena.

Ni igitero cyagabwe kuri iryo shuri ariko by’umwihariko mu mwaka wa gatanu n’uwa gatandatu, ubwo abacengezi binjiraga muri ayo mashuri bagasanga abanyeshuri barimo gusubira mu masomo, bakabategeka ko Abatutsi bajya uruhande rumwe n’Abahutu bakajya mu rundi, ari nabwo humvikanye bwa mbere Mujawamahoro wari ufite imyaka 22, ahakanira abacengenzi ababwira ko bose ari Abanyarwanda, bibaviramo guterwa za gerenade, banaraswa urufaya rw’amasasu.

Twagirumwami avuga ko uyu mukobwa we mbere ya Jenoside yakorewe Abatutsi, yigaga mu ishuri nderabarezi i Nyamasheke, amasomo akaza guhagarara mu gihe cya Jenoside, akaza kumujyana kwiga i Nyange, kubera ko ari cyo kigo cya mbere cyafunguye imiryango nyuma ya Jenoside, kandi bigisha inderabarezi.

Ati “Marie Chantal, tumuzana hano kugira ngo ashobore gukomeza amashuri ye, yari ageze mu mwaka wa gatanu yimukira mu wa gatandatu ari naho yapfiriye. Yapfuye bamwishe, yishwe n’abacengezi nk’inkurikizi ya Jenoside. Bari mu ishuri biga, basubiramo amasomo yabo, abacengezi binjira mu ishuri basaba abana kwitandukanya.”

Arongera ati “Chantal ni we wavuze bwa mbere ati “Twese turi Abanyarwanda nta mpamvu yo kwitandukanya”. Amaze kuvuga atyo, bahise bamuvuza amasasu, umwana yitaba Imana.”

Se wa Mujawamahoro amwunamira aho ashyinguye i Nyange

Kwicwa kwa Mujawamahoro azira indangagaciro yagaragaje ntabwo byigeze bitungura se, kuko ngo ko yari umwana warangwaga n’urukundo ku bantu azi n’abo atazi.

Ati “Ubutwari yari afite ntabwo ari ibigwirirano by’uwo munsi, ni ibintu byari byarabaye umuco kuri we, kubera ko mu myaka 53 maranye na mama we, ubumwe bwacu nibwo bwaranze ubumwe Marie Chantal Mujawamahoro yagize.”

Yungamo ati “Ubwo bumwe bwagaragariraga mu buryo abana n’abavandimwe, abanyeshuri biganaga, no mu buryo abanira abandi baturanyi. Ni uko nibagiwe impapuro z’ubuhamya bw’abantu, bwerekanye ko ari kumwe na bo bafitanye ubumwe.”

Uyu musaza avuga ko aticuza kuba ari we wafashe iya mbere ajyana umwana we (Mujawamahoro) ku ishuri ryisumbuye ry’i Nyange, nubwo byamuviriyemo kuhasiga ubuzima.

Ati “Sinshobora kubyicuza, kuko kiriya gikorwa ntabwo ari jye gikomokaho, nta n’ubwo ari Chantal gikomokaho, gikomoka ku Mana. Imana yashatse y’uko tumwohereza hano agakomeza amashuri, ariko noneho icyo yamushakagaho ni cyo cyabaye, bigashaka kuvuga ko ugushaka kw’Imana gutera umuntu, iyo agukurikije, kuba icyo ishaka.”

Uyu mubyeyi asanga urubyiruko rw’uyu munsi, rukwiye kwigira kuri aya mateka, bakumva ko Ubunyarwanda budafite itandukanirizo, bakagira indangagaciro y’ubumwe aho bari hose, bakareka kwigana ibiriho muri iki gihe, kubera ko ivangura hari aho rikigaragara, kandi baricengeza mu rubyiruko.

Hapfuye batandatu muri iryo joro

Iby’uko Mujawamahoro ari we munyeshuri wabwiye abacengezi bwa mbere ko bose ari Abanyarwanda icyo gihe, binashimangirwa na Phanuel Sindayiheba, umwe mu Ntwari z’u Rwanda ziri mu cyiciro cy’Imena, kibarizwamo abigaga ku ishuri ryisumbuye ry’i Nyange, wiganaga na Marie Chantal Mujawamahoro.

Ati “Mu kutwereka guhitamo Abahutu i buryo ndetse n’Abatutsi i bumoso, umwe mu bo twari turi kumwe witwa Mujawamahoro Chantal uruhukiye hariya, ni we wateye iya mbere arababwira ati “Nta Muhutu uri hano, nta n’Umututsi uri hano, twese turi Abanyarwanda.” Umucengezi arabaza ngo ye, ari nk’udusubirishamo kugira ngo yumve ko ibyo avuze twese tubyemeranywaho, cyangwa uwo mwana afashwe n’ibisazi, turavuga ngo yego twese turi Abanyarwanda.”

Arongera ati “Icyo gisubizo bigaragara ko kitabanyuze, kuko bahise basohoka, begera hanze, bamennye ikirahure cy’idirisha bateramo gerenade ya mbere mu ishuri, yakomerekeje bamwe muri twebwe. Barongera bateramo indi ya kabiri, ikomeretsa abandi barimo jyewe. Barongera kudusubirishamo kwa kundi, dusubiramo ko turi Abanyarwanda, bahise batangira kuturasa, bahereye kuri ba bandi b’imbere, barimo Mujawamahoro Chantal, baramurasa yitaba Imana, bakurikizaho Mukambaraga Béatrice bicaranaga na we yitaba Imana.”

Muri rusange igitero cy’abacengezi cyagabwe ku banyeshuri muri iryo joro, cyasize gihitanye batandatu barimo Marie Chantal Mujawamahoro, unashyinguye kuri iryo shuri.

Ibyumba by’amashuri barasiwemo byagizwe urwibutso

Abarokotse icyo gitero bahise bashyirwa mu Ntwari z’Igihugu, mu cyiciro cy’Intwari z’Imena bose hamwe bari 41, umwe yaje gupfa mu 2001 azize ibikomere yatewe n’igitero bagabweho, undi apfa mu 2018 azize uburwayi busanzwe, hakaba hasigaye abagabo n’abagore 39 bibumbiye mu ishyirahamwe ‘Komeza Ubutwari’.

Buri mwaka tariki 18 Werurwe, ni umunsi wizihirizwaho ubutwari bw’abanyeshuri b’i Nyange, uyu mwaka ukaba warizihizwaga ku nshuro ya 28, ku nsanganyamatsiko igira iti “Ubutwari n’Ubumwe bw’Abanyarwanda, inkingi z’iterambere”.

Ikimenyetso cyo gushyira hamwe cyashyizwe kuri iryo shuri

Abana biga ku ishuri rya Nyange bibuka Intwari zababanjirije

Ni bimwe mu byo yagarutseho ubwo bari mu Murenge wa Nyange mu Karere ka Ngororero, kuri uyu wa Kabiri tariki 18 Werurwe 2025, ubwo ku ishuri ryisumbuye rya Nyange harimo kwizihirizwa ubutwari bw’abanyeshuri b’i Nyange, wizihizwaga ku nshuro ya 28.

Ni munsi wizihizwa buri tariki 18 Werurwe, hagamijwe guha agaciro ubwitange buhebuje n’umutima ukomeye, byaranze abanyeshuri bigaga mu mwaka wa 5 n’uwa 6 mu 1997 ku ishuri rya Nyange, icyo gihe hari muri Komine Kivumu muri Purefegitura ya Kibuye.

Mu ijoro rya tariki 18 Werurwe 1997, abacengezi binjiye mu kigo cy’ishuri bagera muri ayo mashuri basanga abanyeshuri barimo kwiga, babasaba kwitandukanya Abahutu bakajya uruhande rumwe Abatutsi kakajya ku rundi, kugira ngo bice abo bashakaga kwica bitabagoye, abanyeshuri barabyanga, basubiza abacengezi ko nta Bahutu cyangwa Abatutsi babarimo, kuko bose ari Abanyarwanda.

Abagizi ba nabi babonye ko banze kuva ku izima, babateramo za gerenade (grenade) banabarasa n’urufaya rw’amasasu, bamwe bahasiga ubuzima abandi barakomereka bikomeye, ku buryo hari abakuyemo ubumuga.

Ni abana bagaragaje umutima ukomeye, baba gihamya cy’umusaruro w’imbuto nziza z’inyigisho z’ubuyobozi bwiza bwa Leta y’Ubumwe bw’Abanyarwanda, bwari bumaze igihe kitari kinini cyane.

Ngarambe François uyobora CHENO

Kugeza ubu abariho ni 39 bakaba barashyizwe mu cyiciro cy’Intwari z’Imena, bakaba baribumbiye mu ihuriro (Association) yitwa ’Komeza Ubutwari’.

Mu ijambo rye, Umuyobozi Mukuru wa CHENO, François Ngarambe, yahamagariye urubyiruko kwanga amacakubiri bakarwanya urwango n’akarengane.

Yagize ati "Rubyiruko mufite inshingano zo gukomeza kubaka Igihugu cyacu, mukoreshe ubumenyi n’impano zinyuranye mufite, mushake ibisubizo ku bibazo Igihugu cyacu kigenda gihura nabyo muri iki gihe. Mwitabire ibikorwa bishimangira iterambere ry’Igihugu binyuze mu murimo unoze, mwitabire guhanga udushya mu ikoranabuhanga, mumenye n’ibindi bikorwa byinshi bigira uruhare mu iterambere ry’u Rwanda."

Yongeraho ati "Mugomba kwanga amacakubiri mukarwanya mwivuye inyuma urwango n’akarengane ako ari ko kose. Mugomba kuba amajwi yamagana ikibi icyo ari cyo cyose, mukaba amaboko yubaka ibiraro bihuza Abanyarwanda, aho kubaka inkuta zibatanya. Mu gihe twizihiza intwari zacu, dusubize amaso inyuma turebe ibyo twakora kugira ngo umurage w’intwari zadusigiye ukomeze kuturanga."

Phanuel Sindayiheba, umwe mu bigaga ku ishuri ryisumbuye ry’i Nyange, akaba n’umuyobozi wa Komeza Ubutwari, avuga ko abacengezi babasabye ko Abatutsi bajya ukwabo n’Abahutu bakajya ukwabo, bakabyanga ku buryo byabaviriyemo guterwa za gerenade no kumishwamo urufaya rw’amasasu bigahitana bamwe, abandi bagakurizamo ubumuga bukomeye.

Abanyeshuri bakinnye umukino werekana uko byari byifashe

Nyuma yo gutabarwa n’ingabo z’Igihugu, hari abavuwe ibikomere birakira, kuri ubu bakaba ari abagabo n’abagore b’Intwari z’Igihugu.

Sindayiheba ati "Turongera tugaragaze ko dufite icyizere mu buyobozi no mu ngabo z’Igihugu zahagaritse Jenoside, bakagarura umutekano wari warazahajwe n’intambara y’abacengezi. N’uyu munsi ya maboko aracyahari kandi mu gushima nk’Intwari z’Imena z’i Nyange, kuba Igihugu cyarabonye ko icyo gihango twagiranye n’u Rwanda kidakwiye guhagararira gusa ku kuba abanyeshuri, tukagirwa Intwari z’Imena, natwe ntabwo tuzatatira icyo gihango."

Bamwe mu rubyiruko by’umwihariko abanyeshuri bo ku ishuri ryisumbuye rya Nyange, bavuga ko ibyabaye kuri bagenzi babo bibaha isomo rikomeye, ryo kurwanya ikibi kabone n’iyo cyaba gishyigikiwe n’umunyembaraga.

Edison Dufitimana wo mu Karere ka Muhanga, wiga ku kigo cyabonetseho abanyeshuri bagaragaje ubutwari bwo kwanga kwitandukanya na bagenzi babo, kandi bashyizweho imbunda ariko bagahagarara mu kuri kwabo, avuga ko hari isomo bimwigisha.

Ati "Icya mbere binyigisha ni uguhagarara mu kuri kwanjye, nkareba icyiza, n’irinda ikibi. Ikindi kandi nkirinda icyo ari cyo cyose cyantandukanya na bagenzi banjye, nkibuka ko twese turi Abanyarwanda kabone n’iyo naba ndimo guterwa ubwoba.”

Amakaye yose abigaga mu wa gatandatu barimo kwigiramo icyo gihe

Uwitwa Odile Uwera ati “Nk’urubyiruko umukoro dufite ni ugutera ikirenge mu cy’intwari zatubanjirije, tukigiraho kubyo bakoze, kuko niba turi Abanyarwanda tugomba kumenya agaciro ko kwitwa Abanyarwanda, tukarebera ku byashyize. Tugomba gutera intambwe irushijeho, mu rwego rwo kugira ngo natwe tube twaba nk’izo ntwari zatubanjirije.”

Abanyeshuri bagabweho igitero n’abacengezi ku ishuri ry’i Nyange bari hagati y’imyaka 17 na 24, batandatu ni bo baguye muri icyo gitero muri iryo joro, Intwari z’Imena zarokotse icyo gitero mu 1997 bose hamwe bari 41, umwe yaje gupfa mu 2001 azize ibikomere yatewe n’igitero bagabweho, undi apfa mu 2018 azize uburwayi busanzwe, hakaba hasigaye 39.

Ni igikorwa cyitabiriwe n’abantu batandukanye

Hari abanyeshuri babiri bashyinguwe ku ishuri bazize ibikomere batewe n’amasasu na gerenade

Ikimenyetso cyo gushyira hamwe cyashyizwe kuri iryo shuri

Kubera iterambere ryakomeje kwiyongera muri uwo Mudugudu, hagacibwa imihanda hagashyirwamo amazi n’amashanyarazi, abaturage ba hafi bari batuye mu manegeka, bihutiye kuhagura ubutaka banahabwa ibyangombwa byo kubaka, maze baratura.

Mu myaka ibiri ishize Kompanyi ya Ruli Mining itangiye kuhakorera ubucukuzi, nibwo hatangiye kugaragara ibibazo by’inzu za bamwe muri abo baturage zisaduka kugeza ubwo zimwe zinasenyuka burundu.

Kuva icyo gihe kugeza uyu munsi abaturage batuye mu miryango 12, bakomeje gutakambira inzego n’ubuyobozi bw’ibanze kubarenganura, kugira ngo iyo Kompanyi bavuga ko ibasenyera kubera ibikorwa byayo ibimure, bahawe ingurane ikwiye kuko babangamiwe kandi ubuzima bw’abo buri mu kaga.

Umwe muri bo agira ati, "Inzu yanjye ifite agaciro k’amafaranga miliyoni enye, ariko ibikorwa by’ubucukuzi biri kuyangiza yarasadutse, ubuyobozi ntacyo budufasha ngo Kampanyi ihacukura itwishyure twigendere".

Undi nawe agira ati, "Abaherukaga kuza gupima bavuze ko inzu yanjye yasenyutse ntaho ihuriye n’ibikorwa by’ubucukuzi, kandi aho hantu nari mpatuye nta kibazo mfite, ubu ndasembera mu bukode mbayeho nabi kandi nari nagerageje kwiyubakira ahantu heza".

Ubuyobozi bwakoze iki?

Umuyobozi w’Akarere ka Ngororero Nkusi Christophe yabwiye Kigali Today inshuro zirenze imwe ko ikibazo cy’abo baturage bakizi, kandi bakomeje kugikorera ubuvugizi mu kigo cy’Igihugu gishinzwe ubucukuzi RMB, kuko ari cyo kizobereye mu byo kumenya ubuziranenge bw’abo bukorerwa

Cyakora Nkusi nawe yagaragazaga ko abo bahanga mu by’ubucukuzi bagiye batinda, kandi ko Akarere kakomeje kubasaba kuza kubafasha muri icyo kibazo, ariko nabo bategereje ko bazaza kugira ngo hasuzumwe niba koko ibikorwa by’ubucukuzi bubangamiye abaturage.

Yagize ati, "Ikibazo tumaze kukimenya twakoze ubuvugizi muri RMB ngo ize idufashe kugikorera ubugenzuzi, tumenye niba koko gusenyuka kw’izi nzu z’abaturage gufitanye isano n’ubucukuzi cyangwa zubatse nabi tuzakomeza gukora ubuvugizi".

Abaturage bitabaje Intara

Mu mvura yaguye ku Muhindo wa 2024 abaturage bakomeje kugira impungenge z’uko inzu zabo zabagwaho, kuko zasadutse mu bikuta n’ahandi, maze bongera gutakambira Akarere ko kagira icyo kabafasha.

Icyaje kubatungura ni ukubwira ko batuye mu manegeka, bityo ko bakwiye kwemera kwimuka bakajyanwa gukodesherezwa ahari inzu zidashyira ubuzima bwabo mu kaga, maze abaturage biyumvisha ko noneho ibyabo birangiriye aho ko Kampani ikomeje gukingirwa ikibaba.

Imiryango ifite icyo kibazo muri uwo Mudugudu yibajije ukuntu inzu zabo zishyizwe mu manegeka, nyuma y’igihe bagaragaza ko zisenywa na Kampani ihacukura amabuye y’agaciro kandi uwo ari Umudugudu ntangarugero Akarere kazi, dore ko inzu ku yindi ubwo butumwa bwo kubimura nta ngurane bwabagejejweho.

Abaturage bavuga ko basiragijwe mu nzego z’ibanze, ku Murenge, ku Karere ariko ntibahabwe ibisubizo kuri icyo kibazo, bahitamo kujya ku rwego rw’Intara y’Iburengerazuba ngo barenganurwe.

Umwe muri bi agira ati, "Akarere katwizezaga kudukorera ubuvugizi, RMB ikaza gusuzuma ikibazo cyacu, none barabihinduye ngo dutuye mu manegeka, ubwo se urumva atari uburyo bwo gushaka kutwimura ngo inzu zacu nizigwa bizitwe ko zari zubatse nabi, Kampani ibe itakitwishyuye ibyacu, nibabanze basuzume ikibazo cyacu mbere yo kutwimurwa tumenye aho tuzabariza n’aho batwerekeje".

Akarere ka Ngororero ko kagaragaza ko kwimura abo baturage bakajya gukodesherezwa, impamvu byatekerejwe mbere y’uko RMB isuzuma ikibazo cy’abo, bijyanye n’impamvu zihutirwa ku bwo kurengera ubuzima bwabo, mu gihe bigaragara ko izo nzu zabo zabagwaho kubera imvura.

Meya Nkusi avuga ko kubimura badapimiwe biri ukwabyo, no gusuzumirwa inzu zabo biri ukwabyo, bityo ko bakwiye kwemera bakimurwa ikibazo cy’abo kikazakemuka ariko bariho.

Ubwo abaturage berekezaga ku biro by’Intara y’Iburengerazuba, Guverineri w’iyo Ntara yahise asaba Akarere ka Ngororero kubikurikirana byihuse, kuko kasobanuraga ko ibyo kakoze birimo gukorera ubuvugizi abaturage byari bihagije.

Nyuma y’itegeko rya Guverineri ntibyateye kabiri kuko ku wa mbere tariki ya 16 Ukuboza 2024, abantu baturutse i Kigali muri RMB bageze mu Mudugudu wa Nganzo, bagenzura inzu ku yindi yavuzweho ikibazo cyo kwangizwa n’ubucukuzi.

Abaturage babwiwe ko noneho ibyabo bigeze ku musozo, kuko hagiye kugaragara ukuri gushingiye ku bipimo bya gihanga maze hagakurikiraho kureba abigiza nkana.

Kigali Today yashatse kuvugisha Umuyobozi w’Akarere ka Ngororero wungirije ushinzwe ubukungu wari kumwe n’itsinda rya RMB, ku gihe ibisubizo by’abaturage kuri ibyo bipimo bya gihanga bizaba byabonetse ariko ntabyakunda.

Abatuye muri uyu Mudugudu bavuga ko basenyerwa n’ubucukuzi bw’amabuye y’agaciro, none bakaba babwirwa ko batuye mu manegeka

Abo baturage batangaje ibyo nyuma yo gusaba imiryango yabo igera kuri itandatu, kwitegura kuva mu nzu zabo, bakajyanwa gucumbikirwa ahantu hizewe umutekano, babwirwa ko batuye mu manegeka, nyamara ngo Umudugudu wabo ari uw’intangarugero.

Abo baturage bavuga ko ikibazo cy’isenyuka ry’inzu zabo kimaze imyaka igera kuri ibiri, kizwi mu nzego zitandukanye z’ubuyobozi, ariko nta gikorwa ngo barenganurwe bimurwe kubera inyungu z’ubucukuzi bubangiriza inzu.

Umwe muri bo avuga ko yabwiwe n’Umunyamabanga Nshingwabikorwa w’Akagari ko yitegura akimuka, ariko uwo muturage akibaza ukuntu yimurwa nk’utuye mu manegeka kandi inzu ye yarangijwe n’ubucukuzi kandi ntakirakorwa ngo yimurwe n’abamwangiriza.

Agira ati, “Baje batubwira ko dutuye mu manegeka, kandi turasenyerwa n’abacukura amabuye y’agaciro. Twumva aho kujya gucumbikirwa na Leta uwadusenyeye ari we wakatwitayeho ni nabwo twamenya niba ibyacu bitazagendera ubusa, naho ubundi turabona ari nko kutubeshya ngo twimuke bizarangire gutyo”.

Undi muturage agira ati, “Ubuyobozi bwatwijeje kenshi ko buzadukorera ubuvugizi abadusenyera bakatwimura, none aho kubikora ngo nitwimukire ahandi. Turasaba ko tutakwimurwa nk’abatuye mu manegeka kuko aho dutuye turasora nko mu butaka bwo guturaho, habanje kwigwa uko haturwa, niba hari utwangiriza kuki twimurwa na Leta atatwishyuye ibyacu?”

Ubuyobozi bw’Akarere ka Ngororero butangaza ko kuba abo baturage basabwa kwimuka bakajya gukodesherezwa, ntaho bihuriye n’ikibazo bafitanye n’uwo bavuga ubangiriza inzu, ko ahubwo ari ukurengera ubuzima bwabo ngo inzu zitabagwaho.

Umuyobozi w’Akarere ka Ngororero, Nkusi Christophe, avuga ko abo baturage bakwiye kwemera kwimuka, hanyuma ibibazo byabo bikazasuzumwa nyuma, kuko kwimura uri mu manegeka bikurikiza gusa uko ubuyobozi bubona ingaruka zaba igihe umuturage atuye nabi.

Agira ati, “Turacyategereje uko Ikigo cy’Igihugu gishinzwe ubucukuzi (RMB) kizadufasha mu kugaragaza niba izo nzu zarasenywe n’ibikorwa by’ubucukuzi koko, cyangwa ari ukubera uko zubatse, ariko ubu icyo tureba ni ukuba izo nzu zashyira ubuzima bw’abaturage mu kaga, ni yo mpamvu tugiye kuba tubakodeshereje aho gutura, hanyuma ikibazo cyabo kigasuzumwa nyuma”.

Akarere ka Ngororero ubu kari gukodeshereza abaturage b’imiryango isaga 600 ituye ahashobora gushyira ubuzima bwabo mu kaga, ibyo bigakorwa hanubakirwa bamwe muri bo ariko ngo hakaba hari kurebwa umuti urambye wo kubakira abaturage, inzu zikomeye zitapfa gusenywa n’ibiza byoroheje.

Ubuyobozi bw’Akarere kandi busaba abaturage batuye ahashobora gushyira ubuzima bwabo mu kaga, kutabihishira ngo batungurwe n’ibiza, hakaba hari no kwitegura ko ibiza biramutse birengeje ubukana hakwiyambazwa site enye zateguwe kwakira abantu benshi icyarimwe, kugeza ubu zitaratangira gukoreshwa.

Biyemeje guhindura imikorere bagatanga amakuru ku ihohoterwa

Abo bayobozi basobanura ko guhishira ihohoterwa babiterwaga ahanini no kutamenya amoko yaryo n’ibyaha biyashingiyeho, no kuba abahohoterwa ubwabo badakunda uwabatangira amakuru kuko bifatwa nko gusebya umuryango.

Nshutiraguma Patrick wo mu Murenge wa Kabaya, avuga ko kubera ko ari umwe mu bagize inshuti z’umuryango, bimugora gukemura amakimbirane mu miryango kubera ko bayituyemo, bityo ibyaha bibaye bakihutira kunga ababigiranye kubera ko baziranye kandi banga kwiteranya.

Agira ati, “Usanga tugifite imbogamizi zo gutanga amakuru kubera ko abo muturanye baba bifuza ko ibintu byakemukira mu miryango, ariko ubu tumaze kumenya ko ibyo ari ihohoterwa tuzajya tuyatanga”.

Abayobozi b’inzego z’ibanze bagaragaza ko hari igihe birinda gutanga amakuru kugira ngo batiterana

Ngendahayo Jean Baptiste na we uba mu nshuti z’umuryango mu Murenge wa Kabaya, avuga ko hari amakuru bamenya ariko bikaba byagorana kuyatanga mu nzego zishinzwe kurwanya ihohoterwa kuko bene yo baba badashaka ko asohoka ngo ajye hanze.

Agira ati, “Usanga umubyeyi ahohoterwa ariko ntashake gutanga amakuru kuko iyo abantu badutabaje umuntu tukamugeza kwa muganga, ariko akagenda avuga ko yaguye akavunika kandi yari yakubiswe, ibyo bituma natwe tutamenya uko twakurikirana ibyo bibazo kuko niba nyir’ubwite nawe adashaka ko amakuru ye asohoka akatwita abanyamagambo ntitwabona uko tumufasha, ariko ubu ubwo tubimenye tugiye kwatsa umuriro dutange amakuru kuko twaburaga uko tubigenza”.

Umukuru w’Umudugudu wa Kimisagara mu Murenge wa Kabaya, Twagirimana Jean Claude, avuga ko iyo bakoze raporo ikagezwa mu nzego z’ubuyobozi wenda nk’umugore yakubiswe, usanga yanga kujya gutanga ikirego ahubwo bikitwa ko abayobozi ari bo bari gusenya uwo muryango.

Abayobozi b’inzego z’ibanze bari guhabwa amaguhurwa y’uko bagira uruhare mu gutanga raporo zituma uwahohotewe arenganurwa

Agira ati, “Niba umugore yakubiswe, tugakora raporo umugabo akajyanwa kuri RIB, umugore akajya kwa muganga, agenda avuga ko yagize impanuka ugategereza ko ajya gutanga ikirego ugaheba, ahubwo ugasanga agarutse yatwikomye ngo nitwe dushaka kumusenyera”.

Nzakizwanimana Beatrice, uyobora Umudugudu wa Rwantozi avuga ko nawe atajyaga ahirahira gutanga amakuru mu buryo bugamije gukumira ihohoterwa, kuko hari aho yageraga akifata yirinda ko umuryango urimo ihohoterwa wamufata nk’urimo kuwusenya.

Agira ati, “Usanga umugore iyo tumugiriye inama ngo aregere ihohoterwa yakorewe, yanga kubikora ngo batamufungira umugabo, nsanga abagore ari bo bari kwizira, usanga umugore avuga ngo umugabo nashaka anyice, ubu hari urugo ntabasha kugeramo kuko umugabo waho arampiga avuga ko ari njyewe umusenyera urugo, sinzi niba mwaduha inama zo kujya duca inyuma tukabakorera raporo”.

Mukansanga asaba abashakanye gukora imibonano yabanje gutegurwa hagamijwe kwirinda ihohoterwa

Umukozi wa RIB muri Isange One Stop Centre, Alice Mukankaka avuga ko kudatanga amakuru ku wahohotewe, bituma inzego zikurikiraho zitabasha gufasha uwahohotewe, bikaba byatuma uwahohotewe arengana no mu butabera.

Agira ati, “Ntimukagire impungenge ko umuntu yahishiriye amakuru cyangwa adashaka gutanga amakuru, nimutinyuke mutange amakuru kuko niyo azadufasha mu kurenganura uwahohotewe, ntabwo wavuga ko umuntu yihohotera, ahubwo ndabona bijya gusa nka ruswa kuko uwo mwita ko yihohotera ntatange amakuru cyangwa akifuza ko umugabo we arekurwa ngo badasonza cyangwa bamusenda (kumwirukana) abikora atishimye, mutinyuke mutange bene ayo makuru”.

Imiryango nayo iracyashyigikiye ihohohoterwa

Umukozi w’Akarere ka Ngororero ushinzwe iterambere ry’umuryango, Odette Mukantabana avuga ko hari abagore bagihohoterwa kubera imiryango bashatsemo, aho ubwe azi urugero rw’umugabo wakubise umugore akamukomeretsa, ariko inkiko zikaza kumugira umwere kubera ko abagize umuryango we basabye umwe mu bana be kubeshya ko nyina yakomerekejwe no kugwa hasi aho gukubitwa.

Umukozi w’Akarere ka Ngororero ushinzwe iterambere ry’umuryango, Mukantabana Odette avuga ko hari aho azi umwana washinje nyina ubusinzi no kugwa hasi agakomereka bituma se wamuhohoteye agirwa umwere

Agira ati, “Uwo mugabo yarafunzwe agirwa umwere kuko abo mu muryango we basabye umwana we ko abeshya ko nyina atahohotewe, byatumye urukiko rubishingiraho kuko umwana yari umutangabuhamya mwiza, twabimenyeye ku butumwa nyina wabo yamwandikiye amushimira ko yafunguje se amusaba kujya gutura mu matongo ya nyirakuru ngo nyina atazabimenya akamwihimuraho”.

Umunyambanga Nshingwabikorwa w’Umurenge wa Kabaya, Ndayisenga Simon avuga ko mu miryango harimo ikibazo cy’imyumvire, aho ubwabo baba badashaka ko amakimbirane yabaye amenyekana, kubera umuco wo kumva ko umugabo atajya akora ikosa kandi ko arikoze umugore akamurega byaba bimurangiranye.

Umunyamabanga Nshingwabikorwa w’Umurenge wa Kabaya avuga ko gutinda kubona amakuru ku ihohoterwa bituma hari ibyago biba bitunguranye

Agira ati, “Ibibazo bishingiye ku makimbirane n’ibyaha by’ihohoterwa turabimenya ariko turacyahura n’ikibazo cy’uko abayobozi ku rwego rw’Imidugudu bashobora kumvikanisha uwakoze ihohoterwa, ibyo bigatuma usanga amakuru atugezeho yatinze ku buryo hashobora no kuba ibyago biturutse ku kuba amakuru yaratinze kutugereraho igihe, ariko ubu ubwo bahawe amahugurwa bakanerekwa ingaruka zirimo turizera ko amakuru agiye kujya abonekera igihe”.

Mu bindi bibazo by’ihohoterwa rikorerwa mu ngo bigahishirwa harimo gusambanya abana, gukubita no gukomeretsa, gusesagura umutungo w’urugo, umwe mu bashakanye agatinya kubiregera byitwa ko abikoze yaba ashenye urugo, ingaruka zivamo zikabamo no kwicana ku bashakanye kuko habuze uwabafasha kugaragaza ibibazo biri mu ngo.

Bakomeje gushakisha umusore umaze iminsi itandatu agwiriwe n’ikirombe

Icyo kirombe cyafunzwe ku wa 15 Ukwakira 2024, ariko ikigo cy’Igihugu gishinzwe ubucukuzi RMB, cyari cyahaye amezi atatu abasanzwe bagikoreramo aribo, Kompanyi yitwa Rwanda Young Miners Ltd, kugira ngo bakureho ibikoresho bahashyize birimo iby’ubucukuzi.

Ku wa 31 Ukwakira 2024, mu ijoro ngo nibwo nyakwigendera yinjiranye na bagenzi be bane (4) mu kirombe harimo n’umukobwa, banyuze mu nzira y’ubuhumekero bwacyo, kuko cyari gifite ubwinjiriro bumwe kandi burinzwe n’umuzamu.

Bagezemo ngo nibwo batangiye gucukura bitemewe n’amategeko ikirombe kirabagwira, barahunga, ariko uwitwa Habimana Gilbert kiramufata, ku buryo bagenzi be bananiwe kumukurura ngo bamukure mu bitaka byari bimaze kumurengera.

Umuyobozi wa Young Miners Ltd, Bizimana Jean Bosco avuga ko nyuma y’uko bahagaritswe ku itariki ya 23 Ukwakira 2024, kuri icyo kirombe hatangiye kwigabizwa n’abahembyi ndetse hakaba hari ibirego biri muri RIB, kubera ubwo bugizi bwa nabi bw’abashakaga guhita batangira gucukura mu buryo butemewe.

Imashini imazemo iminsi ine itaragera ku muntu

Agira ati, “Uwo muntu yaguyemo n’ubundi kuko ntawari uri kumufasha gukora ubucukuzi mu buryo bwemewe, turasaba ko niba RMB itaradusubiza kuko twayandikiye tuyisaba gukosora ibyatumye batwaka uruhushya rwo gucukura, inzego zibishinzwe zasakaza umutekano kugira ngo hakomeze kwirindwa ingaruka zo kuba tutakihakorera”.

Umuyobozi w’Akarere ka Ngororero, Nkusi Christophe avuga ko hataramenyekana niba uwaguye mu kirombe yaba ari umuhebyi, cyangwa uwari usanzwe ari umukozi wa Kompanyi yahacukuraga, ibyo bikaba bizasuzumwa nyuma yo kumukuramo kuko n’ubundi yagiyemo ngo aciye mu rihumye umuzamu.

Agira ati, “Ibyo twazabimenya turebye ibijyanye n’aho bahemberaga abakozi, aho babatangiraga ubwishingizi, kuko ubu icya mbere turi gukomeza gushaka uko yakurwamo, ibindi byemezo byafatwa nyuma yo gushakisha bihagije kuko ntawavuga ko hahita hasibwa”.

Ku kijyanye n’umutekano w’ibirombe bifungwa ariko uburinzi bwabyo bukaba bukeya ku buryo abahebyi bigabiza ahamaze gufungwa, Nkusi avuga ko bakomeje gusaba RMB kubashakira abaza kuhakorera bujuje ibisabwa, cyangwa bagasubiza vuba abamaze gufungirwa nabo bakuzuza ibisabwa bagasubukura imirimo.

Habimana yaguye mu kirombe ku wa 31 Ukwaira 2024 na n’ubu ntaraboneka

Agira ati, “Turakomeza gusaba RMB ko yakomorera abahagaritswe kuko si aho honyine hari izindi Kompanyi eshanu zahagaritswe, kugira ngo baduhe abahakorera cyangwa basuzume ubusabe bw’abahagaze basubukure imirimo kugira ngo bakomeze no kurinda aho hantu”.

Nkusi avuga ko mu gihe ubwo busabe butarahabwa agaciro, bagiye kureba uko hashyirwa imbaraga mu kubungabunga ubwo butaka bacukuramo, kuko abahagaritswe baba batakihashyira imbaraga zo kuharinda. Kugeza ubu uwaguye mu kirombe ari gushakishwa hifashishijwe imashini isanzwe ya tingatinga.

Abayobozi bafashije abahinzi gutera imbuto y’ibishyimbo

Abahinzi kandi bahawe ishwagara yo kubafasha kurumbura ubutaka, dore ko aho bagiye guhinga iyo mbuto y’ibishyimbo, hari harapimwe bagasanga ubutaka bwaho busharira, ubu bakaba bizeye kuzabona umusaruro ushimishije.

Gutangiza igihembwe cy’ihinga 2025A ku rwego rw’Akarere byabereye mu Kagari ka Birembo mu Murenge wa Kavumu, ahatewe iyo mbuto y’ibishyimbo y’indobanure kuri hegitari enye (4) ziri ku butaka bwaciweho amaterasi y’indinganire.

Iyo mbuto y’indobanure y’ibishyimbo, irimo gutangwa ku buntu n’umuryango wita ku guhangana n’ingaruka z’imihindagurikire y’ibihe no kubungabunga ibidukikije RCCDN, ku nkunga y’umuryango (CJC) nawo wita ku ngaruka z’imihindagurikire y’ikirere no kubungabunga ibidukikije.

Abahinzi bahawe n’imborera yo guteza ibishyimbo

Umukozi uhagarariye umuryango RCCDN-CJC mu Karere ka Ngororero, Ntambara Damascene avuga ko imbuto y’indobanure y’igishyimbo yatanzwe, yatuburiwe mu Karere ka Ngororero ku buryo nta mpungenge abahinzi bakwiye kugira ku kuzamura umusaruro muri ako Karere.

Agira ati, “Twateye imbuto kuri hegitari enye ariko imbuto yose twatanze izaterwa kuri hegitari 20, abahinzi twabahaye ishwagara yo kurumbura ubutaka, tuzabaha kandi ifumbire y’imborera yo kubagaza ikozwe mu buryo bw’amazi, nayo yizeweho ubushobozi mu kuzamura umusaruro habungwabungwa umwimerere w’ubutaka”.

Umuyobozi w’Akarere ka Ngororero wungirije ushinzwe ushinzwe iterambere ry’ubukungu, Uwihoreye Patrick watangije icyo gihembwe cy’ihinga, yaganirije abaturage kuri gahunda y’Igihugu yo kwihaza mu biribwa no gusagurira amasoko.

Amaterasi azaterwaho ibishyimbo by’imbuto y’indobanure

Abashishikariza gufata neza imbuto bahawe, no gukoresha neza ifumbire bazahabwa mu kubagara, kugira ngo umusaruro witezwe uzaboneke bihaze banasagurie amasoko.

Agira ati, “Turasaba abahinzi guhinga no gutera neza kandi bagashyira ibihingwa byatoranijwe mu bwishingizi, dore ko n’ibishyimbo ubu byinjijwe mu bwishingizi, kuko bugoboka umuhinzi igihe ikirere kimutengushye".

Iki gihembwe gitangiye igihe hari impungenge ko imvura yatinze kugwa ariko abahinzi bafite icyizere ko iri hafi, ari nayo mpamvu barangije kwitegura guhinga bakaba baratangiye no gutera imbuto.

Bahinze imbuto nshya yatuburiwe mu Karere ka Ngororero

Umuyobozi mukuru w’Ikigo gicuruza ifumbire ya Locolan SOP, Uwiragiye Andre avuga ko ifumbire bazahabwa yo kubagaza igizwe na Rokolan, Rokoyimin na Rokoactive ikorwa n’uruganda ROKOSAN, zose zikaba ari ifumbire mborera ariko ziterwa mu mazi, zikaba zizwiho ko kuba umaze imyaka itatu azikoresha, aba ashobora gutera imbuto nta yindi fumbire akoresheje kuko ubutaka buba bwamaze kugarura umwimerere wabwo.

Agira ati, “Iyo fumbire y’amazi iterwa ku mababi ku gishyimbo kimaze kugira ibibabi bibiri, nibwo bateraho bwa mbere, ikongera guterwa inshuro ya kabiri igishyimbo kigize santimetero 15, ubwa gatatu bitangiye gupfundika uruyange, ubundi umuhinzi akitegura umusaruro ushimishije”.

Abaturage bahawe imbuto yo gutera, bavuga ko n’ubwo ikirere cyatinze kuvuba imvura bagitegereje kandi ko bazakurikiza amabwiriza yo gutera no gufata neza imbuto ku buryo bazabona umusaruro uhagije.

Ahaciwe amaterasi babanje gushyiramo ishwagara ngo bazeze neza

Musabyimana Etienne na mugenzi we bo mu Murenge wa Kavumu, bahawe imbuto y’ibishyimbo, bavuga ko iwabo bigaragara ko ikirere kiri gushaka kuzana imvura ku buryo izabisangamo kandi bakaba bizeye kuzasarura neza.

Agira ati, “Tugiye gutera ibishyimbo imbuto y’indobanure dufite icyizere ko izagwa kandi n’ubundi hano ihinga rirageze, bizashoboka imvura igwe kuko hano tugira ikirere cyiza kandi twahawe imbuto nshya izadufasha kongera umusaruro”.

Ubuyobozi bw’Akarere ka Ngororero butangaza ko n’ubwo imvura yatinze kugwa nk’uko bisanzwe, abahinzi badakwiye kwiheba ahubwo bakwiye gukomeza kwitegura aho bataratera, mu gihe yazagwa bakitabira gutera.

Bafite ubwoba ko inkangu zizabasenyera

Abo baturage barimo n’umwe uvuga ko yamaze kuva mu nzu ye akagenda kubera yamusenyukiyeho, bavuga ko hashize imyaka ibiri iyo Kompanyi itangije ubucukuzi aho batuye, ari nabwo batangiye kubona ibimenyetso by’uko inzu zabo ziri kwangirika ariko ubuyobozi ntacyo bwakoze ngo barenganurwe.

Abaturage bavuga ko bageze mu nzego zitandukanye z’ubuyobozi kugera no ku Karere ka Ngororero, ariko nta gisubizo kibanyuze bahawe, dore ko n’abatekinisiye baje gupima niba koko ubwo bucukuzi bwangiza inzu zabo, ngo batanze ibisubizo by’uko ntaho uko kwangirika kw’inzu zabo bihuriye n’ibikorwa by’ubucukuzi.

Baravuga ko inzu zabo zangizwa n’ubucukuzi bw’amabuye y’agaciro

Abo baturage bari mu miryango igera ku 10 bavuga ko nyuma yo kugaragaza ikibazo cyabo, koko abayobozi bagiye bahagera, ariko ntibabikemure bakibaza ko Kompanyi ihakorera ubucukuzi yaba ifite imbaraga zituma ubuyobozi butinjira neza mu kibazo.

Uwitwa Solange Mutuyemaliya, avuga ko abayeho nabi yikodeshereza kandi nta bushobozi afite bwo kwita ku bana be bikaba bimugoye, akifuza ko ubuyobozi bwamurenganura agahabwa ingurane y’inzu ye yangiritse.

Agira ati, “Aho hantu nari mpatuye kuva na mbere inzu ntiyasenyutse, nshyiramo sima mpoma n’urugo ntibyasenyuka, none ubu inzu ikomeye nibwo yagize ikibazo, bahakana ko batansenyeye, ndifuza ko abansenyeye banyishyura kuko buri muyobozi mbibwiye avuga ko ngo inzobere z’i Kigali zasanze nta kibazo gihari, ariko mbona ari amanyanga”.

Inzu z’abaturage ziri gusaduka

Maniriho Silas nawe ufite inzu iri gusaduka avuga ko nawe atewe impungenge n’inzu ye ishobora kuzamugwira, mu gihe imvura yagwa bataragira aho berekeza, nawe akifuza ko ubuyobozi bwabakorera bukabarenganura.

Agira ati, “Njyewe aha hantu nari mpatuye bataraza kuhakucura, binjira mu Ndani hasi ariko bagacukura munsi y’inzu zacu, bituma ziyasa zigasenyuka, uba usanga abayobozi badashaka kubyinjiramo neza, ariko turi mu karengane gakabije abayobozi nibadutabare”.

Ubuyobozi bwa Ruli Mining butangaza ko kugeza ubu nta kibazo busanga bufitanye n’abaturage, kuko impuguke zaje gupima zasanze ibikorwa by’ubucukuzi bitangiriza abaturage, ariko na raporo ya Kompanyi ubwayo ngo yagaragje ko ubwo bucukuzi nta ngaruka bufite ku baturage.

Aho bacukura bavuga ko binjira bakurikiye amafiro ntaho bahurira n’inzu z’abaturage

Agira ati, “Iyo ducukura tuba twerekeza mu mafiro, kandi raporo zagaragaje ko nta ngaruka bifite ku baturage, aho ducukura ni ukuva ku bw’abazungu usanga abaturage bifuza ko bahabwa amafaranga kubera ko babona haje umushoramari, nyamara ngo aho hantu ntihemerewe n’imiturire, kuko izo nzu bagaragaza n’ubundi zari zisanzwe zifite ibibazo ntabwo aho hantu hemerewe guturwa”.

Umuyobozi w’Akarere ka Ngororero Nkusi Christophe avuga ko icyo kibazo bagikurikiranye koko, kandi ko abagaragaje ikibazo bohereje amazina yabo mu Kigo cy’Igihugu gishinzwe ubucukuzi RMB ngo bohereze abahanga baze gukora isuzuma.

Agira ati, “Mbere baje gupima bagaragaza ko ukwangirika kw’inzu zabo ntaho zihuriye n’ubucukuzi, twarongeye dusaba RMB ngo yohereze impuguke ngo zisuzume icyo kibazo, turabikurikirana vuba maze abo baturage niba bafite ukuri koko barenganurwe”.

Ruli Mining ivuga ko ubucukuzi butangiriza abaturage

Kugeza ubu imiryango irindwi niyo yabashije kugaragaza ikibazo cyabo muri KigaliToday, ariko Ubuyobozi bw’Akarere busaba ko ababa batari ku rutonde rwoherejwe muri RMB, nabo bagana ubuyobozi kugira ngo barenganurwe.

Bifuza ko umuhanda Nyange-Gatumba ukorwa vuba ukabakemurira ibibazo birimo n’ubujura buwukorerwamo

Bamwe mu baturage baganiriye na Kigali Today, bagaragaje ko ikibazo cy’umutekano muke kibahangayikishijwe bitewe no kuba umuhanda Nyange-Gatumba, udakoze bigatuma batinya kuwunyuramo bwije kugira ngo batagirirwa nabi.

Umwe muri bo utashatse gutangaza amazina ye, wo mu Kagali ka Bijyojyo, agaragaza ko ubuyobozi bukwiye kugira icyo bukora ku rugomo rurangwa muri uwo muhanda kugira ngo bajye bagenda nta nkomyi.

Ati: “Icyo dusaba ubuyobozi ni ugukaza umutekano bakahazana irondo ry’umwuga cyangwa ikigo cya Gisirikare wenda bajya babatinya kuko ikigo kiri hano hafi, kiba mu Karere ka Muhanga. Abashinzwe umutekano babaye hafi, byaba byiza bakajya bakumira urugomo rwabo ndetse bakabiryozwa”.

Akomeza avuga ko hari umuturanyi wabo w’umukobwa wari ufite ubukwe mu minsi yashize, ibyo bisambo byambuye. Ati: “Aha hari umukobwa ava i Nyange kugura amajyambere agera kuri Secoko bwije, ahakubitanira n’insoresore ziramwambura ariko aratabaza bamutabara zamaze kumwambura zihita ziruka ndetse zasize zimukomerekeje”.

Mukantwari Xavera wo mu Kagari ka Bitabajye avuga ko umutekano w’umuhanda wa Nyange-Gatumba ari mubi, kuko kuwugenda nijoro bishyira ubuzima bw’abantu mu kaga.

Ati: “Uyu muhanda ni mubi, iyo ugeze ahitwa ku rutindo rwa Secoko, hari ubwo uhasanga ibirara bikakwambura ndetse bikaba byakwica. Biteye ubwoba kuko ntawe batinya, kuko iyo saa kumi n’ebyiri n’igice zigeze utaragera iwawe ujya gucumbika kuko n’abagabo babagirira nabi”.

Uyu mubyeyi akomeza agaragaza ko ibi bituma badatekana. Ati: “Kera twatumaga abana hakurya y’uruzi rwa Nyabarongo muri Muhanga ku bavandimwe bacu, ariko ubu nti watinyuka kuko tuba dutekereza ko bahurira munzira bakaba babagirira nabi”.

Mukantwari w’imyaka 55, akomeza agaragaza ko ingendo z’aha zose zikorwa ku manywa kubera impungenge baba bafite, bagasaba ko umuhanda wakorwa vuba, ukajya unyuramo ibinyabiziga bityo bigabanye urwo rugomo.

Ubuyobozi bwizeza abaturage ko uyu muhanda Nyange-Gatumba watangiye gukorwa kandi uzuzura vuba

Ati: “Dusanga uru rugomo rukururwa no kuba aha hari umuhanda mubi kuko urabibona, iyi Nyabarongo ikikije uyu muhanda wa Nyange-Gatumba, rero ukozwe ukanyuramo ibinyabiziga byinshi twajya dutega imodoka ikakugeza hafi y’aho utaha, mu gihe ubu Moto iduca amafaranga 2500, ku muturage ni menshi bigatuma tuhagenda n’amaguru kandi ni kure uva i Nyange ukagera muri Ndaro bwije, niyo mpamvu ubuyobozi bukwiye kwiga kuri iki kibazo mu buryo bwagutse”.

Ubuyobozi bw’Akarere ka Ngororero, buvuga ko nta muturage ukwiye kugira impungenge kuko u Rwanda ari Igihugu gifite umutekano, ndetse n’umuhanda watangiye gukorwa ariko ko mu gihe bagize impungenge bakwiye kumenyesha ubuyobozi bakarushaho kubafasha gutekana.

Ibi ni ibyatangajwe n’Umuyobozi w’Akarere wungirije ushinzwe iterambere ry’ubukungu, Uwihoreye Patrick mu kiganiro yagiranye na Kigali Today. Ati: “Namara impungenge abaturage ko umutekano wabo wizewe kuko mu Gihugu hose haratekanye, bakamenya ko ubundi abasirikare barinda umutekano ahantu hadasanzwe harimo ku imbibi z’imipaka. Ndabizeza ko umutekano wabo uhari, naho baba bakeka ko bikanga badusangize amakuru natwe turebe aho bafite impungenge bityo tunoze umutekano kugira ngo umuturage ahanyure atekanye”.

Uwihoreye yakomeje agira ati: “Uyu muhanda watangiye gukorwa kandi neza bihangane ugiye kurangira, kuko uyu muhanda ntabwo urimo gusanwa ahubwo uri gukorwa”.

Umuhanda Nyange-Gatumba uhuza Imirenge itandukanye irimo Nyange na Ndaro y’aka Karere ukaba witezweho koroshya ingendo, kwagura ubuhahirane, koroshya uburyo bw’ubuvuzi kuko ibitaro by’Akarere aho Umurenge wa Nyange wohereza abarwayi ni ku Muhororo bikaba byajyaga bibavuna kujya kuzenguruka mu Karere ka Muhanga.

Uyu muhanda uzuzura ufite ibilometero 48 ukaba witezweho kuzagabanya igihe abantu bamaraga mu nzira bajya gushaka inzira nziza berekeza ku Karere ka Ngororero gushakayo serivise kuko banyura muri Muhanga.

Kigali Today iganira na bamwe mu baturage, bari bagaragaje imbogamizi zitandukanye zirimo kuba iyo bejeje icyayi gitunganyirizwa mu ruganda rwa Rubaya, ariko kuhageza umusaruro bibagora.

Uwitwa Uwingabire Jackeline, umucungamutungo wa Koperative y’abahinzi b’icyayi cya Rubaya yitwa KOTRAGAGI, yagize ati: “Koperative yacu yinjiza Miliyari ebyiri ku mwaka, icyerekana ko dufite umusaruro mwinshi. Dufite icyayi gituruka mu bice bitandukanye, ariko cyane cyane mu gihe cy’imvura duhura n’imbogamizi y’imihanda mibi, aho dushobora kumara iminsi itatu imihanda yarangiritse ntitubashe kugeza umusaruro wacu ku isoko kandi ubusanzwe dusoroma icyayi buri munsi”.

Undi muhinzi w’icyayi yagize ati: “Imihanda iteje ikibazo gikomeye cyane, uyu muhanda wavaga Kabaya-Rutagara-Kagano-Ngororero, ubuhahirane bwacu bukoroha ariko ubu ntibishoboka kuko n’Umurenge ubwawo ntabwo uri nyabagendwa”.

Uwimana ucururiza mu isantere ya Kabaya na we yagize ati: “Iyi mihanda ituma dusigara inyuma kuko hari ubwo imihanda yifunga bigatuma byinshi bidindira. Hano haturuka amakara ndetse hari n’ibyo bagemura mu Mujyi ariko akenshi usanga bizinesi zahagaze ubucuruzi bukadindira. Uretse n’imodoka n’amoto hari ubwo byanga ukayiterura cyangwa ukayisiga ukagenda n’amaguru”.

Aba baturage bagaragaza ko abafite imodoka baziparika kure y’aho batuye, mu gihe abayobozi bo imodoka bazisiga ku Mirenge kugira ngo babashe kugera mu baturage.

Bavuga ko imihanda myinshi yo muri aka gace yangiritse ubwo u Rwanda rwibasirwaga n’ibiza aho byangije ibikorwa remezo ndetse bigatwara ubuzima bw’abantu.

Bamwe mu batwara abantu kuri Moto muri aka gace nabo bagaragaza imbogamizi. Hakizimana Sylver, utwara abagenzi kuri Moto bavuye ku Kabaya berekeza Rubaya. Ati: “Uyu muhanda urimo ibinogo, turasaba ubuvugizi bazawushyiremo kaburimbo kugira ngo moto zirambe. Hari ubwo tubura abagenzi batinya kugwa hasi kubera umuhanda mubi nko mu gihe cy’imvura”.

Umuyobozi w’akarere wungirije ushinzwe iterambere ry’ubukungu, Uwihoreye Patrick

Ibiciro kuri Moto ubusanzwe ni amafaranga 1500 ariko iyo imvura yaguye aba 2000.

Umuyobozi w’akarere wungirije ushinzwe iterambere ry’ubukungu, Uwihoreye Patrick, yasobanuye ko iki kibazo cyari gihari ariko kuri ubu hari rwiyemezamirimo urimo gukora uyu muhanda. Ati: “Nibyo ikibazo cyari gihari, ariko ubu twashatse uburyo bwo kugikemura, dufitanye amasezerano na rwiyemezamirimo ndetse yatangiye gukora. Ubu twakwizeza abahinzi b’icyayi ndetse n’abandi muri rusange ko ntawe uzongera kubura uko ageza umusaruro ku isoko kuko ahangiritse hose harimo gusanwa”.

Uwihoreye akomeza avuga ko mu masezerano bafitanye, ari uko uyu muhanda utazarenza ukwezi kwa Kanama 2024.

Ubuyobozi bw’Akarere ka Ngororero bwatangaje ko inkuba zishe abantu babiri mu Murenge wa Muhanda, umwe wo mu Murenge wa Sovu, undi umwe wo mu Murenge wa Kabaya n’umwe wo mu Murenge wa Nyange.

Umuyobozi w’Akarere ka Ngororero, Nkusi Christophe, yavuze ko imvura yaguye ku manywa igakomeza nijoro, ku buryo abakubiswe n’inkuba bamenyekanye bwije, agira ibyo yibutsa abaturage.

Yagize ati "Turasaba abaturage kwirinda inkuba nk’ibindi biza kuko twatunguwe n’imvura idasanzwe. Twafashe ingamba zo kwakira amakuru yose ahari, ibibazo babitubwire, kuko twiteguye nk’ubuyobozi kubafasha".

Nkusi avuga ko hariho uburyo bwo gufasha abahuye n’ibiza, ariko kubera imihindagurikire y’ikirere abaturage bakwiye gutanga amakuru y’ahari ibibazo bakaba bafashwa byihuse.

Ubuyobozi bw’Akarere ka Ngororero bwihanganishije imiryango y’ababuze ababo kandi burizeza ko buzababa hafi mu kubaherekeza, kandi busaba abahura n’ikibazo bose kubumenyesha.

Umukandida-Perezida, Frank Habineza

Ibi ni bimwe mu byo abayobozi muri iri Shyaka bavugiye ku Kabaya mu Karere ka Ngororero, ubwo ryahiyamamarizaga kuri uyu wa Gatandatu tariki 29 Kamena 2024.

Umukandida wa Green Party, akaba asanzwe ari na Perezida wayo, Dr. Frank Habineza, yabwiye abaturage ba Kabaya ko natorwa, hazashyirwaho uburyo abaturage bazajya batanga ibitekerezo binyuze kuri telefoni zigendanwa, bikoherezwa ku Karere, hanyuma bigakusanywa, bikoherezwa kwa Minisitiri w’Intebe.

Dr. Frank Habineza yavuze ko ibitekerezo by’abaturage nibigera ku 1000, bizajya byoherezwa mu Nteko iIshinga Amategeko, hanyuma bikagirwa umushinga w’Itegeko.

Yagize ati “Turashaka ko Leta iba hafi y’umuturage, ibyo akeneye byose akabibonera hafi ye adakoze urugendo. Ibyo byose bizakunda nimutugirira icyizere”.

Umunyamabanga Mukuru w’Ishyaka Green Party, Jean Claude Ntezimana, yavuze ko gahunda y’ishyaka ari ukwakira ibitekerezo biturutse mu baturage, kuko ari uburyo bwiza bwo kumenya neza icyo umuturage akeneye.

Agira ati “Tuzashyiraho ikigo gikorana n’Inteko Ishinga Amategeko, gishinzwe kwakira ibyo bitekerezo, noneho byagera ku 1000 bikaba byaba umushinga w’itegeko. Ni gahunda ihari kandi ishiboka, kandi ni na gahunda yo gusangira ijambo uko buriya ibyo unyifuriza, ntabwo ukwiriye guhamya 100% ko ari byo bimbereye, uretse jyewe umbajije kandi wamara kumbaza ukampa n’amahirwe yo kubyivugira”.

Umunyamabanga Mukuru w’Ishyaka Green Party, Jean Claude Ntezimana

Nk’uko bisanzwe mu kwiyamamaza kwiri Shyaka, risezeranya abaturage ko nibatora umukandida waryo ku mwanya wa Perezida wa Repubulika, rizagabanya umusoro ku nyongeragaciro, ukava kuri 18% ukagera kuri 14%, kuburyo ibiciro by’ibicuruzwa cyane cyane ibiribwa bizagabanuka.

Dr. Frank Habineza agira ati “Dufite gahunda yo kwigisha urubyiruko rwacu imyuga ndetse no guteza imbere umurimo hashyirwaho ishuri ry’imyuga muri buri murenge, ariko rikaba ari ishuri ryigisha cyane cyane imyuga ijyanye n’ibintu bihaboneka”.

Mu rwego rwo guteza imbere ubuhinzi n’ubworozi, Ishyaka Green Party rivuga ko umukandida waryo natorwa, rizashyiraho ikigega gitanga amafaranga y’inguzanyo ku bahinzi n’aborozi, ariko ku nyungu iri hasi cyane itarenze 2%.

Dr. Habineza ati “Tukumva ko abantu bose bashaka gushora mu buhinzi n’ubworozi bazajya bakora imishinga bakiyandikisha ku Murenge, bamara kwemezwa bakabona amafaranga akabateza imbere”.

Dr. Habineza agaragaza ko ibi bizafasha kwihaza mu biribwa ariko no guhanga imirimo abantu bakava mu bushomeri.

Dr. Habineza agaragaza ko Ishyaka rye rishyize imbere ubumwe bw’Abanyarwanda, kandi ko kugira ngo Abanyarwanda batere imbere, basabwa gusigasira ubumwe bwabo, birinda uwabacamo ibice.

Yagarutse kandi kuri gahunda yo gukuraho igifungo cy’iminsi 30 y’agateganyo, avuga ko kidakwiye, ko ahubwo uketsweho ibyaha yajya afatwa, ariko basanga nta bimenyetso bimuhamya icyaha akarekurwa.

Ati “Habineza yanga akarengane kurusha ibindi byose. Nimungirira icyizere, ibintu byo gufungira abantu ubusa bizavaho”.

Dr. Habineza yavuze ko ibyo Ishyaka rya Green Party ryizeza abaturage rizabibagezaho nibaritora, na cyane ko n’ibyo ryabasezeranyije mu matora y’Abadepite yo muri 2018, byagezweho ku kigero kiri hejuru ya 70%.

Dr. Vincent Biruta avuga ko ishyaka PSD ritewe ishema cyane no kuba abayoboke baryo bagize kongere y’Igihugu barahisemo neza, bagahitamo ko umukandida bazamamaza kandi bagatora ari Paul Kagame

Ni bimwe mu byo Perezida wa PSD, Dr. Vincent Biruta yatangaje kuri uyu wa mbere tariki 24 Kamena 2024, ku munsi wa gatatu w’ibikorwa byo kwiyamamaza, ubwo Perezida Paul Kagame, umukandida wa FPR-Inkotanyi yari mu Karere ka Ngororero, aho yakomereje ibyo bikorwa nyuma yo kwakiranwa urugwiro no kwerekwa urukundo n’abatuye mu Karere ka Rubavu aho yari tariki 23 Kamena 2024.

Mu ijambo rye Dr. Vincent Biruta yavuze ko ishyaka PSD ritewe ishema cyane no kuba abayoboke baryo bagize kongere y’Igihugu barahisemo neza, bagahitamo ko umukandida bazamamaza kandi bagatora ari Paul Kagame.

Yagize ati “Kuvuga ibigwi bya Nyakubahwa Paul Kagame ntabwo bigoye na gato, u Rwanda atashoboye kubamo kubera amateka y’urwango n’amacakubiri ntabwo yigeze arwibagirwa, mu buto bwe aharanira igishoboka cyose ngo abana b’u Rwanda bari ishyanga bazashobore gutaha, agana urugamba rwo kubohora u Rwanda n’Abanyarwanda, arwanya ikibi, yanga ivangura ahuriza hamwe Abanyarwanda bose ngo u Rwanda rusubirane rwongere kuba ingobyi iduhetse twese.”

Arongera ati “PSD nayo yavutse iharanira icyatuma Abanyarwanda baba mu gihugu cyabo, iharanira ubumwe bw’Abanyarwanda, imibereho myiza y’abaturage bose b’u Rwanda kandi tuzi neza ko ibyo bitari gushoboka iyo tutagira umuyobozi w’intwari nka Paul Kagame, wumva imitwe ya politiki yakorana neza, ikubaka u Rwanda n’Abanyarwanda ntawikubira twese dusenyera umugozi umwe.”

Ibikorwa bya Perezida Paul Kagame ngo ni bimwe mu byatumye abayoboke ba PSD bahitamo kuzamushyigikira mu matora y’umukuru w’Igihugu.

Ngo abayoboke ba PSD n’abandi bagize imitwe ya Politiki myinshi yemewe mu Rwanda ntibabona uko bashima ubuyobozi bwa Perezida Paul Kagame, kandi ko urugamba arwana rwo kubaka u Rwanda bari kumwe

Dr. Biruta ati “PSD rero twahisemo neza duhitamo umukandida ukunzwe mu Rwanda akemerwa no mu mahanga, wavanye Abanyarwanda mu icuraburindi ry’irondabwoka n’irondakarere, u Rwanda rukaba rutekanye, waciye inzara n’amapfa mu gihugu, umuyobozi wakamiye Abanyarwanda, wahaye uburezi buri mwana wese, wagejeje ubuvuzi kuri buri wese, wahaye ijambo umwana w’umukobwa, watumye ibyaro bibona amashanyarazi, udakangwa no kurwanya ikibi no guhangana n’abadashaka ko u Rwanda rutekana.”

Agaruka kubufatanye bw’imitwe ya Politiki n’Umuryango FPR Inkotanyi, mu ijambo yavugiye mu Ngororero, Perezida Paul Kagame yashimiye imitwe ya Politiki yahisemo gufatanya n’umuryango FPR Inkotanyi kubera ko gufatanya atari intege nke ahubwo bigaragaza ubushake n’imbaraga nyinshi.

Yagize ati "Iteka iyo abantu bashyize hamwe ntagishobora kubananira, muri politiki hari ubwo abantu babyumva gutyo ngo imitwe yafatanyije na FPR ngo buriya kuki bo batakoze ibyabo bakibwira ko ari uko byabananiye, ahubwo ni uko bashyize mu kuri, babona ko dufatanyije bagafatanya na FPR ibyagerwaho ni byinshi kurusha uko buri umwe yanyura inzira ye ashaka kugerageza ibyo ashaka kugerageza bamwe bigakunda abandi ntibikunde.”

Arongera ati “Ariko iyo abantu bafatanyije birakunda byose bikabakundira, hanyuma rero twaje hano kugira ngo tujye umugambi w’ibyo tuzakora itariki 15 z’ukwezi tugiye kujyamo, nabyo kandi bifite amateka aganisha aho ngaho, no muri 2017 twari hano ndetse na mbere yaho nabwo twaje hano, ibyo n’urugendo rwa politiki, demokarasi gushyira hamwe ndetse n’iterambere.”

Ngo abayoboke ba PSD n’abandi bagize imitwe ya Politiki myinshi yemewe mu Rwanda ntibabona uko bashima ubuyobozi bwa Perezida Paul Kagame, kandi ko urugamba arwana rwo kubaka u Rwanda bari kumwe, kuko nta cyaruhungabanya ngo basigare, bakazafatanya kurwanya abanzi batandukanye bagenda bigaragaza kubera ishyari baterwa naho agejeje u Rwanda.

Reba ibindi muri iyi Video:

Video: Salomo George

Umukandida wa FPR Inkotanyi, Paul Kagame, ubwo yari mu gikorwa cyo kwiyamamaza mu Ngororero

Ati “Baturage ba Ngororero n’abandi bavuye ahandi nagira ngo mbabwire ko nishimiye kuba naje kubashimira mu bufatanye bwanyu ku byiza igihugu cyacu cyagezeho ndanashimira abayobozi bari hano baturutse mu mitwe ya Politike yemeye gushyigikira umuryango FPR Inkotanyi ku mukandida umwe ku mwanya wa Perezida”.

Umukandida Paul Kagame yavuze ko gufatanya no gushyira hamwe ari byiza kuko iteka iyo abantu bashyize hamwe ntakibananira.

Umukandida wa FPR, Paul Kagame avuga ko hari igihe muri Politike abantu batabyumva neza bakavuga ko indi mitwe ya Politike yafatanyije na FPR yagombye kuba yarakoze ibyayo bakibwira ko byabananiye ntibamenye ko ibyakozwe ari ukubera gushyira mu kuri kuko babona ko bafatanyije n’Umuryango FPR Inkotanyi bagera kuri byinshi.

Ati “Ariko iyo abantu bafatanyije byose birakunda niyo mpamvu twaje hano kugira ngo tujye umugambi w’ibyo tuzakora tariki 15 z’ukwezi kwa Nyakanga 2024 nabyo bifite amateka aganisha ku bufatanye bw’imitwe ya Politike”.

Umukandida wa FPR Inkotanyi Paul Kagame avuga ko kuba bahuriye hamwe mu gikorwa cyo kwiyamamaza ari igikorwa kigenda kigaruka kuko no muri 2017 yari muri Ngororero byose bikaba ari urugendo rwa Politike, na Demokarasi, rwo gushyira hamwe hagamijwe kugera ku iterambere ry’igihugu cy’u Rwanda.

Ati “Uyu munsi ndetse no kuri iyo tariki 15 z’ukwezi gutaha ni uguhitamo gukomeza iyo nzira ndetse mugahitamo n’abayobozi mufatanya iyo nzira, barimo abadepite n’uzayobora Repubulika y’u Rwanda”.

Umukandida Paul Kagame avuga ko hari abatajya bumva uko u Rwanda rukora ariko bazajya babyemezwa n’ibikorwa byarwo.

Ati “Ibyo tuzakora tariki 15 Nyakanga 2024 ni ibireba u Rwanda, ntabwo bibareba, hari uwo nabajije ejobundi nti abayoborwa na 15% iyo ni demukarasi gute? Ndetse n’ababatoye ari nka 30% cyangwa 40% y’abagomba gutora iyo simbona ko ariyo Demokarasi”.

Umukandida Paul Kagame avuga ko ibikorwa byivugira kandi abanyarwanda n’u Rwanda bazakomeza gukorera hamwe.

Umukandida wa RPF Inkotanyi Paul Kagame avuga ko abanyarwanda bagomba gukora cyane bashingiye kubyo u Rwanda n’Abanyarwanda bamaze kugeraho muri iyi myaka 30 ishize bagakomereza kwiyubaka bashyize hamwe.

Ati “Aho tugana mu myaka 5 iza turashaka gushimangira imyumvire y’imikorere yo kwikorera yo kugerageza ibyo dushoboye byose duhereye no kubyo dufite kandi birahari kuko icyambere igihugu gifite ari abaturage”.

Umukandida Paul Kagame yabwiye abaturage ba Ngororero ko ibyo bavuga byigeze kuba muri aka karere bihungabanya umutekano ko bitazongera kuko ntacyakongera guhungabanya umutekano w’abanyarwanda.

Ati “Twarafatanyije turabikemura tubishyira ku ruhande ntabwo byakongera, kuko twubatse inzira y’amahoro n’inzira y’ubumwe ndetse n’inzira y’iterambere tuyirimo igisigaye ni ugushaka uko twakwihuta gusa kugira ngo ikibazo dushobora kurangiza mu kwezi kumwe cyangwa abiri no mu mwaka umwe n’ibindi bishobora gutwara igihe bikorwe ku gihe”.

Perezida Kagame yabwiye abaturage ko azakomeza kubateza imbere mu byiciro bitandukanye birimo ubuzima, Uburezi, ibikorwa remezo, imibereho myiza n’ibindi bikorwa byose bibafitiye akamaro ko bigomba kwihutishwa mu iterambere.

Umukandida Paul Kagame yasoje ijambo rye abashimira ko bemeye gufatanya nawe muri gahunda itegerejwe tariki 15 Nyakaganga 2024.

Dative Yashimye umukandida wa FPR Inkotanyi wabubakiye amashuri akabasha kwiga

Dusabirema usanzwe ari mu rubyiruko rw’abakorera bushake mu Karere ka Ngororero avuga ko yarangije amashuri yisumbuye muri 2016 aho yize kuvura amatungo.

Mu buhamya bwe, avuga ko ababyeyi be bamushakiye igishoro gito atangira kuvura amatungo no gutera intanga amatungo.

Agira ati "abaturage banyitaga wa mukobwa w’intanga".

Dative avuga ko kubera impanuro za Perezida Kagame yiteje imbere abikuye mu korora ingurube ndetse azigurishije akuramo ibihumbi 600 ashinga iguriro ry’imiti y’amatungo.

Yongereye igishoro atangira gucuruza inyongeramusaruro, yegera ba agronome mu Murenge atangirira ku mifuka 20, none ubu apakira Howo ifumbire ndetse baturage barahinga bakeza bagasagurira amasoko.

Yashimye Perezida Kagame wabubakiye amashuri kuko niyo yizemo akamugirira akamaro ndetse ahamya ko iyo atubakwa atari kuba uyu munsi yarize. Ati, "Abana ba Ngororero ntitwari kwiga iyo tutagira amashuri wubatse".

Yavuze ko mu Karere ka Ngororero bafite byinshi bashima birimo ibikorwa remezo nk’amashanyarazi n’amazi.

Dative yakomeje agira ati, "Iyo udashyiraho ihame ry’uburingane riteza imbere umukobwa sinari kuba mpagaze hano".

Dusabirema Dative yavuze ko yongeye kwishima ubwo yumvaga ko Paul Kagame azongera kwiyamamaza kuko kumutora ari ukwiteganyiriza.

Seturatsinze Emmanuel ni umuturage mu murenge wa Hindiro mu Karere ka Ngororero, yabyutse saa cyenda ajya ahiyamamariza umukandida wa FPR-INKOTANYI kugira ngo amushimire ibyo yabagejejeho

Agira ati "Twaje kugaragariza ibyishimo dutewe nibyo yatugejejeho, yaduhaye imihanda ihuza imirenge, bituma umusaruro ugera ku isoko. Yaduhaye amashuri abana bariga kandi bagahabwa ifunguro bishyuye amafaranga makeya. Paul Kagame yaduhaye amashanyarazi n’amazi, urubyiruko rurahanga imirimo, dufite byinshi byo kumushimira ariko ikiruta ibindi ni umutekano, kuko umuturage agenda igihe ashakira kandi ntakibazo agira."

Seturatsinze avuga ko bizeye ko umukandida bashyigikiye azatsinda agakomeza kubateza imbere.

Ati, "Yahaye u Rwanda agaciro, Umunyarwanda arubashywe, turifuza ko ako gaciro gakomeza kwiyongera, turifuza ko ibyiza twagezeho bikomeza kwiyongera, abana bakiga, bagahanga imirimo, abari mu cyiciro cy’ubukene bakagabanuka."

Ingabire Olive ni umubyeyi w’imyaka 47, akaba amaze imyaka 7 arwaye kanseri. Avuga ko yaje gushyigikira Perezida Kagame kuko yahaye abanyarwanda amavuriro.

Agira ati "undebye ntiwamenya ko maranye imyaka irindwi kanseri, kubera imiyoborere myiza yaduhaye amavuriro. Naje kumushyigikira, naje kumubwira ko ndiho kubera imiyoborere myiza."

Ingabire avuga ko azashyigikira Paul Kagame agatsinda amatora agakomeza kugeza ibyiza ku banyarwanda.

Ati, "Abanyarwanda yaduhaye amata, abana kuva ku myaka ibiri bashyirwa mu mashuri, yarwanyije igwingira, ubuzima burushaho kuba bwiza. Tuzamutora kugira ngo amata akomeze yiyongere twibereho neza dufite umubyeyi wacu udutekerereza ibyiza."

Umukandida wa FPR Inkotanyi, Paul Kagame agiye kwiyamamaza mu Karere ka Ngororero nyuma ya Musanze na Rubavu.

Ni Akarere gaheruka guhura n’ibiza imihanda myinshi irangirika ndetse ibiraro bitwarwa n’imigezi, cyakora abaturage bavuga ko imiyoborere myiza itabatereranye kuko byahise bisanwa.

Ngororero nk’Akarere k’icyaro karimo gukwirakwizwamo amashanyarazi n’amazi.

Akarere ka Ngororero kazwi kugira ubucukuzi bw’amabuye y’agaciro, abaturage bavuga ko ubu bucukuzi bwatanze akazi kuri benshi bashobora gutunga imiryango yabo.

Mu migabo n’imigambi y’umuryango wa FPR-Inkotanyi biteganyijwe ko ibitaro bya Muhororo biri mu Karere ka Ngororero bizagurwa bifashe abatuye Ngororero kubona serivisi nziza z’ubuzima.

Basabye ko abo amateka yasigaje inyuma bajya baturana n’abandi kugira ngo bareke kwigunga bonyine

Babitangarije mu gikorwa cyo kugaragaza ibyavuye mu biganiro hagati y’abaturage bagize ibyo byiciro, n’ubuyobozi bw’Akarere ka Ngororero, byakusanyijwe n’Umuryango wita ku burenganzira bw’abantu bo mu byiciro byihariye (IDA Rwanda) mu Mirenge ya Ngororero, Gatumba na Muhororo.

Umuyobozi w’Inama y’Igihugu y’abagore mu Murenge wa Gatumba, avuga ko ikibazo cy’imyumvire no kubakirwa ubushobozi, bikiri mu bica intege ibyiciro byihariye ntibabashe kuzamuka byihuse.

Nko ku bo amateka agaragaza ko basigajwe inyuma, avuga ko usanga ntaho bagira bari mu Gihugu, kuko nk’iyo bubakiwe ahantu usanga bacucitse hamwe, bigatuma batagira imibereho yo kwigira ku bandi.

Agira ati “Byaba byiza batujwe hamwe n’abandi baturage kugira ngo basangire ibitekerezo byo kwiteza imbere, naho abana bafite ubumuga baracyafungiranwa mu nzu, bagahera mu nzu kandi uwaheze mu nzu ntiyamenya ko izuba ryarashe. Hari aho byagaragaye muri Gatumba ariko ubu ubwo amakuru yabo yamenyekanye na bo bazashyirwa ahabona”.

Twahirwa Modeste wo mu cyiciro cy’abo amateka agaragaza ko basigaye inyuma avuga ko uko babayeho, bikiri hasi cyane kuko Leta nubwo yakoze ibishoboka ikabubakira amazu, n’ubundi usanga hari imiryango ihurijwe hamwe ntibabone ubwisanzure.

Agira ati “Turacyatuye mu miryango usanga irimo abagore batatu n’abagabo batatu n’abana, nta bwisanzure, ikindi kuba ntaho tugira duhinga ni ikibazo kidukomereye. ushobora kubona umushyitsi ntubone icyo umuzimanira. Ibyo bituma n’abana tubyara babura uko biga kuko nta mibereho mizima dufite. Turifuza ko Leta yashyira imbaraga mu kutubonera ubutaka bwo guhingaho tukiteza imbere, tukaba twaniyishyurira n’amafaranga y’ubwisungane mu kwivuza”.

Ibyiciro by’abafite ubumuga na byo biracyarimo abahezwa mu ngo kubera imyumvire y’ababyeyi

Dusabimana Faustin uhagarariye abafite ubumuga mu Murenge wa Muhanda avuga ko abana bafite ubumuga bukomatanyije, ari bo bakunze guhishwa mu miryango, kuko usanga bafatwa nk’umutwaro ku muryango bakomokamo.

Agira ati “Kugira ngo abana badakomeza guhohoterwa, hakwiye gukomeza kubaho kwigisha kugira ngo abo bana bakurwe mu miryango, kuko ababyeyi babo ni bo bagifite imyumvire iri hasi, hakenewe izindi mbaraga”.

Umukozi wa IDA Rwanda mu Karere ka Ngororero Olivier Habigena avuga ko ikibazo kiri hagati y’ibyiciro byihariye n’abayobozi b’inzego z’ibanze

Umukozi wa IDA Rwanda mu Mirenge ya Muhororo, Gatumba na Ngororero, Olivier Habigena avuga ko hari ubuvugizi bukomeje gukorerwa abaturage by’umwihariko mu rubyiruko, abagore n’abakobwa, abafite ubumuga n’abo amateka agaragaraza ko basigaye inyuma.

Avuga ko hakwiriye kunozwa imikorere n’imikoranire y’inzego z’ibanze n’iz’ibyo byiciro, kuko hari bamwe mu nzego z’ibanze batarasobanukirwa imikorere y’inzego z’ibyiciro byihariye, bigatuma habaho kudahuriza hamwe n’inzego zifata ibyemezo.

Agira ati “Usanga nk’Umunyamabanga Nshingwabikorwa w’Umurenge atarumva neza imikorere y’inzego z’ibyiciro byihariye, bigatuma mu gihe cyo gufata ibyemezo habaho kudahuza kw’izo nzego zombi, naho ku bana bagifungiranwa mu ngo, bo twafashe umwanzuro wo kugera kuri iyo miryango bakoherezwa mu mashuri no mu ngo mbonezamikurire y’abana bakitabwaho nk’abandi”.

Umukozi ushinzwe igenamigambi ry’Akarere ka Ngororero, Birorimana Jean Paul, avuga ko nk’abo amateka agaragaza ko basigaye inyuma hari gahunda yo kubashyira mu mashuri y’imyuga n’ikoranabuhanga kugira ngo bazamure imyumvire mu miryango yabo.

Umuyobozi w’ishami ry’igenamigambi mu Karere ka Ngororero, Birorimana Jean Paul, avuga ko mu myaka itanu iri imbere ibyiciro byihariye bizitabwaho cyane

Agira ati “Hari ikibazo gikomeye cyo kuzamura imyumvire yabo, ni yo mpamvu twatangiye kubashyira mu byiciro bisangamo n’abandi, naho ku kijyanye no guhabwa ubutaka, bagenda bashakisha aho babyaza umusaruro bahinga kijyambere ndetse no kuba bakwihangira imirimo bitanyuze gusa mu buhinzi”.

Birorimana avuga ko hari igenamigambi ry’Akarere ryo gukurikirana kandi imyigire y’abana bafite ubumuga, mu mashuri y’uburezi budaheza, gukomeza kubumbira mu mashyirahamwe abagize ibyiciro bitandukanye kugira ngo bazamurane na bagenzi babo, ndetse no kureba igenamigambi rirambye kugira ngo bagire uruhare mu iterambere ryabo n’iry’Igihugu muri rusange.

Baganiriye ku mbogamizi zicyugarije ibyiciro byihariye

Ni amarorerwa yabereye mu Murenge wa Kavumu w’Akarere ka Ngororero, Akagari ka Gikwa, Umudugudu wa Nyaramba, kuwa Gatandatu tariki 25 Gicurasi 2024.

Umunyamabanga Nshingwabikorwa w’Umurenge wa Kavumu, Hibukimfura Jean Pierre, avuga ko aya mahano yabaye biturutse ku rugomo. Ati: “Ni urugomo rwabaye rwo gukubita no gukomeretsa, aho Umazekabiri Froduard, yakubise mushiki we bikamuviramo urupfu ndetse n’umugore w’umuvandimwe we ariko we ajyanwa kwa muganga kuri ubu akaba ari kwitabwaho n’abaganga."

Gitifu Hibukimfura, avuga ko Umazekabiri kuri ubu ari mu bugenzacyaha, ahari gukorerwa iperereza ngo hamenyekane icyabiteye, gusa ko na we yemera ko ariwe wishe mushiki we.

Umwe mu baturanyi b’uyu muryango avuga ko ibyabaye ari amahano, aho ngo aba bashobora kuba barapfaga amasambu. Ati: “Umubyeyi wabo yahaye ububasha umwe mu bana be, abandi bamugirira ishyari kuko batashakaga ko agura isambu y’iwabo, mu gihe agiye gushaka amafaranga ngo ayigure, umuvandimwe we azamuka yigamba ko agiye kwica umugore we, mushiki we abyumvise ajya kumuburira, bakubitana avayo maze amukubita ishoka yari afite, akomeza ajya mu rugo rw’umuvandimwe we maze akomeretsa umugore we.”

Amakuru aba baturage batangarije Kigali Today, bavuga ko bombi bapfuye (Mushiki we ndetse n’umugore w’umuvandimwe we), ndetse ko uyu musore Umazekabiri, ngo yahise yitanga ku nzego z’Ubuyobozi ku Murenge avuga ko akoze amahano akica umuvandimwe we n’umugore wa mukuru we.

Umunyamabanga Nshingwabikorwa wa Kavumu ahabereye aya mahano, akomeza asaba abaturage kubana neza mu mahoro birinda ibyabateza intonganya n’ubwo ahamya ko uyu muryango utigeze na rimwe ugera mu nzego z’ubuyobozi kubera amakimbirane.

Hibukimfura ati: “Uyu muryango nta na rimwe twigeze tubakira nk’abafitanye amakimbirane. Gusa icyo dusaba abaturage ni ukwirinda ikintu cyose kiganisha ku rugomo, aho habaye kutumvikana akihutira kumenyesha inzego z’ubuyobozi tukabafasha cyane ko urugomo ruvamo ingaruka mbi."

Uyu musore aramutse ahamijwe icyaha cyo gukubita cyangwa gukomeretsa ku bushake yahanishwa ingingo ya 121 y’Itegeko No 68/2018 ryo ku wa 30/08/2018 riteganya ibyaha n’ibihano muri rusange.

Iri tegeko rigena ko ugihamijwe ahanishwa igifungo kitari munsi y’imyaka itatu ariko kitarenze itanu n’amafaranga y’u Rwanda atari munsi ya 500.000Frw ariko atarenze 1.000.000 Frw.

Gusa iyo gukubita cyangwa gukomeretsa byateye urupfu, igihano kiba igifungo kitari munsi y’imyaka cumi n’itanu ariko kitarenze imyaka makumyabiri n’ihazabu y’amafaranga y’u Rwanda atari munsi ya miliyoni eshanu ariko atarenze miliyoni zirindwi z’amafaranga y’u Rwanda.

Mukandori Beatrice avuga ko benshi mu baguye mu mugezi wa Giciye babaga bananiwe kuhasimbuka bahunga

Kuri ako gasozi ngo hari Abatutsi benshi bahigwaga mu gihe cya Jenoside, ariko bitewe n’uko kari ahantu harehare hakikijwe n’umugezi wa Giciye, byatumye abahungaga amasasu y’imbunda ziremereye zakoreshwaga n’abasirikare bari mu ruganda rw’icyayi rwa Rubaya rwari rwarahungishirijwemo umurambo w’uwahoze ari Perezida wa Leta y’icyo gihe Juvenali Habyarimana, benshi bananirwa kuhasimbuka bituma hagwamo abana, abagore, abakecuru n’abasaza.

Aho niho abarokokeye kuri ako gasozi bahera basaba ko hashyirwa ikimenyetso cyihariye, ku buryo hagira umwihariko waho wo kwibuka abo bantu bose nkuko hari ahandi bikorwa ku migezi itandukanye iri hirya no hino mu gihugu.

Beatrice Mukandori ni umwe mu barokokeye mu Kesho, avuga ko muri ako gace hari amateka yihariye kuri Jenoside yakorewe Abatutsi, bitewe n’uburyo kuhahungishiriza umurambo wa Habyarimana byayitije umurindi.

Ati “1994 imvura yaragwaga cyane, imbunda zari ku ruganda zaraje zica abantu, ushoboye kwiruka n’ubwoba atarapfa, yamanuka umugezi wuzuye akagwamo, udashoboye gusimbuka yagiye agwamo, abana, abagore, abakecuru, abasaza, twabuze abantu benshi bajyanywe n’umugezi wa Giciye kandi nyamara batakagombye kuba barapfuye.”

Guhungishiriza umurambo wa Habyarimana mu ruganda rw’icyayi rwa Rubaya ngo byatije umurindi Jenoside yakorewe Abatutsi mu Kesho

Arongera ati “Icyo kimenyetso tugikeneye kugira ngo n’abantu bacu baguye mu mazi, n’abana bacu dufite igihe tuzaba tutagihari nkuko tubivuga bazabyibuke bamenye ko hari abavandimwe babo bajyanywe n’amazi.”

Ubuyobozi bw’Akarere ka Ngororero buvuga ko hari Abatutsi benshi biciwe ku gasozi ka Kesho, ndetse ko hari imwe mu mibiri yabonetse igashyingurwa mu cyubahiro mu rwibutso rwa Kesho, ariko kandi hari n’abandi baroshywe mu migezi ihegereye irimo n’uwa Giciye.

Umuyobozi w’Akarere ka Ngororero wungirije ushinzwe imibereho myiza y’abaturage Benjamine Mukunduhirwe, avuga ko kuba ku mugezi wa Giciye hashyirwa ikimenyetso kigaragaza abawuroshywemo ari kimwe mu bishobora gutanga inyigisho.

Ati “Kuba twahashyira ikimenyetso kigaragaza bamwe mu baroshywe mu mugezi, tuzabikora nk’ubuyobozi bw’Akarere, numva nta kibazo, nk’abarokotse twabiganiriyeho kandi muri gahunda y’Akarere tuzabikora kuko n’inshingano zacu kuhashyira ikimenyetso, kugira ngo n’uhageze yongere yibuke ubukana Jenoside yakorewe Abatutsi yakoranywe, arebe bamwe mu batutsi bajugunywe mu migezi.”

Abarokokeye mu Kesho basaba ko hashyirwa ikimenyetso ku mugezi wa Giciye cyo kwibuka Abatutsi bawuroshywemo

Akomeza agira ati “Icyo kimenyetso kiriho amazina y’Abatutsi baroshywe mu mazi nabyo ni kimwe mu nyigisho biha yaba abahagera ndetse n’abandi, bizadufasha kugira ngo Jenoside ntizongere kuba ukundi, tuzabikora nta kibazo.”

Urwibutso rwa Kesho ruri mu Murenge wa Muhanda mu Karere ka Ngororero ruruhukiyemo imibiri y’Abatutsi bishwe muri Jenoside 2517.

Igikorwa cyo Kwibuka abari abakozi bw’uruganda rw’icyayi rwa Rubaya cyabimburiwe no gushyira indabo ahari urwibutso rw’uruganda rwanditseho amazina y’abahiciwe bamaze kumenyekana

Ni igikorwa cyabaye ku wa Kane tariki 16 Gicurasi 2024, cyitabirwa n’inzego zitandukanye zirimo ubuyobozi bw’Akarere ka Ngororero hamwe n’abandi barimo imiryango y’abiciwe muri urwo ruganda, kibimburirwa no gushyira indabo ku rukuta rwanditseho amazina y’abari abakozi b’uruganda 30, hamwe n’abandi 6 bahahungiye bakahicirwa.

Uruganda rw’icyayi rwa Rubaya ruri mu Murenge wa Muhanda mu Karere ka Ngororero, rukaba rufite amateka yihariye kuri Jenoside yakorewe Abatutsi, kubera ko ari ho umurambo w’uwahoze ari Perezida w’u Rwanda Juvenal Habyarimana wahungishirijwe, uherekejwe n’abari bagize Leta y’abatabazi.

Guhungishiriza umurambo wa Habyarimana muri urwo ruganda, byongeye ubukana Jenoside yakorewe Abatutsi yaba mu ruganda cyangwa no mu bari bahaturiye, kubera ko abakozi bo mu ruganda ndetse n’izindi nterahamwe batangiye kujya bahemberwa kuba bishe Abatutsi, bisumbira umubyizi w’imirimo yo guhinga no gukorera icyayi, bari basanzwe bakora mu ruganda.

Kugeza ubu hamaze kumenyekana Abatutsi 30 bishwe muri Jenoside bari abakozi bw’uruganda rw’icyayi rwa Rubaya hamwe n’abandi 6 bahiciwe

Abarokokeye mu nkengero z’uruganda rw’icyayi rwa Rubaya ahitwa mu Kesho bavuga ko kuzana umurambo wa Habyarima muri urwo ruganda byatije cyane umurindi Jenoside yakorewe Abatutsi, kuko ubwicanyi bwahise bukaza umurego, Abatutsi bicwa ku bwinshi, abicanyi bagira ngo babasasire Habyarimana atagenda wenyine, azabone abamumara imbeho.

Emmanuel Nshuti ni umwe mu babuze abavandimwe bakoraga mu ruganda, avuga kuzana mu ruganda umurambo wa Habyarimana byagize ingaruka kuri benshi.

Ati "Nk’umubyeyi wanjye yarishwe ndetse n’abandi batutsi bicirwa mu Kesho guhera tariki 08 Mata, ibyo byose babikoze kugira ngo basasire umurambo wa Habyarimana ntibazamushyingure wenyine, bashake abamumara imbeho, bwari ubugome. Iyo ubuze umuvandimwe, inshuti kubera umurambo wa Habyarimana, yari wa mugambi mubisha wo kugira ngo bazarimbure umututsi mu Rwanda, azasigare ari amateka."

Beatrice Mukandori wo mu Murenge wa Muhanda, ni umwe mu barokokeye mu Kesho, avuga ko kuzana mu ruganda umurambo wa Habyarimana byagize ubukana bukomeye kuri Jenoside yakorewe Abatutsi mu gace kabo.

Beatrice Mukandori avuga ko guhungishiriza umurambo wa Habyarimana mu ruganda rw’icyayi rwa Rubaya byongeye ubukana Jenoside yakorewe Abatutsi mu gace kabo

Ati "Byagize ingaruka zikomeye cyane ko imbunda zari zarabitswe hano zirakoreshwa, kuko bumvaga ko barimo kwikiza Inkotanyi ku gasozi ka Kesho kaharwanirwaga, bigira ingufu zikomeye n’umubyeyi wabo, bitaga umubyeyi wabo kuko abaturage bari barabyigishijwe bavuga ngo Habyarimana yabyaye Imana, bumva ko umurambo wabo uje iwabo, barabibonaga bikababaza."

Yongeraho ati "Kubabazwa n’umurambo wa Habyarimana bakanawibonera byatumye bagira igikorwa gikomeye cyo kwica Abatutsi, cyane ko babyumvaga mu nkuru muri za Kigali, ariko byatumye bigera ino barabyibonera, babona umurambo wa Habyarimana abakoraga mu ruganda."

Umuyobozi Mukuru w’uruganda rw’icyayi rwa Rubaya Emile Mukiza, avuga ko kwibukira Jenoside yakorewe Abatutsi ku ruganda rw’icyayi rwa Rubaya bibibutsa amateka mabi yayo yitwaga gutema ibihuru.

Mu ruganda rw’icyayi rwa Rubaya hari amateka yihariye kuri Jenoside yakorewe Abatutsi mu 1994

Ati "Kwibukira hano ku ruganda rw’icyayi rwa Rubaya bitwibutsa amateka mabi yihariye yitwaga gutema ibihuru, hahigwa Abatutsi babaga bari mu mashyamba y’uru ruganda ndetse no mu cyayi, ubuyobozi bw’uruganda bw’icyo gihe, aho kubarinda bakaba aribo batanga amategeko n’amabwiriza ndetse n’ubufasha mu kubahiga aho bahungiye, birangira hano ku ruganda hiciwe kugeza ubu umubare twabonye ni 36, nibo twabashije kumenya kugeza ubu ngubu."

Perezida w’umuryango uharanira inyungu z’abarokotse Jenoside (IBUKA) mu Karere ka Ngororero, Jean Claude Ntagisanimana, yavuze ko umwanya nk’uyu aba ari uwo kugira ngo bibuke kuko bibafitiye akamaro gakomeye.

Yagize ati "Ni umwanya mwiza ku bantu twabuze abacu, dufata tukongera tukabana nabo, tukazirikana ibyiza byabarangaga kandi tukabigira ibyacu kugira ngo bitazibagirana, ni umwanya wo kwibuka ko twagize ubuyobozi bubi bwishe abo bagombaga kurinda."

Umuyobozi w’Akarere ka Ngororero wungirije ushinzwe Imibereho myiza y’abatutage, Benjamine Mukunduhirwe, avuga ko muri ako Karere bagifite imibiri y’Abatutsi bishwe muri Jenoside itaraboneka.

Abakozi bw’uruganda rw’icyayi rwa Rubaya bishimira ko ubuyobozi buriho butandukanye n’ubwariho mbere ya Jenoside yakorewe Abatutsi

Ati "Icya mbere ni ugukomeza gusaba abaturage kuko Abatutsi bicwa hari abantu barebereraga batahigwaga, turakomeza gusaba abaturage kugira ngo uwaba afite amakuru yaho imibiri y’abazize Jenoside yakorewe Abatutsi iherereye atange amakuru bityo tubashake nk’ubuyobozi, tubashyingure mu cyubahiro mu nzibutso zitandukanye dufite mu Karere kacu."

Urwibutso rwa Kesho rwo mu Murenge wa Muhanda ruruhukiyemo imibiri y’Abatutsi bazize Jenoside 2517.

Ni igikorwa cyitabiriwe n’inzego zitandukanye

Bamwe mu bayobozi bitabiriye imurikabikorwa

Byatangarijwe mu gikorwa cy’imirukabikorwa ry’iminsi itatu ryatangiye tariki 07 kugeza tariki 09 Gicurasi 2024, aho abagera kuri 70 baryitabiriye biganjemo abamurika ibikomoka ku buhinzi n’ubworozi.

Umuyobozi w’Ihuriro ry’abafatanyabikorwa, JADF Isangano, mu Karere ka Ngororero, Padiri Rutakisha Jean Paul, avuga ko umwaka ushize abafatanyabikorwa binjije mu Karere ka Ngororero Miliyari 15, ayo yose akaba arimo n’afasha Akarere mu kurandura igwingira ry’abana.

Rutakisha avuga ko abafatanyabikorwa bagiye kurushaho kurwanya imirire mibi mu bana

Agira ati “Igwingira n’imirire mibi si ikibazo tutashobora kurandura kuko ibyo kurya byo birahari birasaba gusa kwigisha ababyeyi uburyo bwo gutegura indyo yuzuye. Ngororero irera, hari imboga, amagi, amafi n’ibindi byinshi bikomoka ku buhinzi. Abana benshi bageze mu cyatsi, tuzakomeza kwigisha abaturage guhindura imyumvire, turandure burundu igwingira mu bana”.

Umuyobozi w’Akarere ka Ngororero, Nkusi Christophe, avuga ko imurikabikorwa rifasha abaturage kugaragarizwa ibibakorerwa, kandi bagasabwa uruhare rwabo mu iterambere ry’Akarere.

Nkusi avuga ko abafatanyabikorwa bafasha abaturage gusobanukirwa uko barwanya imirire mibi

Ku bijyanye n’uruhare rw’abafatanyabikorwa mu kuzamura imibereho myiza y’abaturage, by’umwihariko kurwanya igwingira, Nkusi avuga ko bagira uruhare mu gutanga amatungo magufi n’amaremare, ibiti byera imbuto ziribwa no kwigishwa imitegurire y’amafunguro ku bana bafite ibibazo.

Avuga ko kubera ubwo bufatanye, Akarere ka Ngororero kamanutse mu mibare y’abana bafite ikibazo cy’imirire mibi kava kuri 50.5%, umwaka wakurikiyeho kagera kuri 47%, naho mu mwaka wa 2023, kari gasigaranye abana 27% bafite imirire mibi, ni ukuvuga ko muri rusange kagabanyije igwingira hejuru ya 12% mu myaka ibiri ishize.

Agira ati, “Turi kugenda tumanuka, byose biva ku nkunga ya Leta tugenerwa by’umwihariko mu guhangana n’igwingira, hakiyongeraho abafatanyabikorwa badufasha kurwanya igwingira mu bana bacu”.

Umuyobozi mukuru w’uruganda rw’icyayi rwa Rubaya avuga ko kumanura icyayi batunganya bakacyereka abaturage, bituma basobanukirwa akamaro kacyo kuko hari benshi batari bazi icyayi.

Icyayi cya Rubaya ni kimwe mu byamuritswe

Agira ati “Hari abantu benshi batari bazi ko dufite icyayi kuko babonaga amababi ku gasozi gusa. Twabwiye abaturage ko barushaho kuzamura ubuso bahingaho icyayi, tukazamura ubushobozi kugeza ku buryo twatunganya icyayi cyinshi kugeza ku kwakira toni 70 z’amababi y’icyayi ku munsi. Icyayi ntigikwiye kunyobwa n’abanyamahanga gusa ahubwo n’Abanyarwanda bakwiye kukinywa kuko gifitiye akamaro umubiri w’umuntu.”

Abitabiriye imurikabikorwa bungutse ubumenyi butandukanye

Abaturage bitabiriye imurikabikorwa bavuga ko hari byinshi bahigiye birimo gutegura indyo yuzuye, kwisuzumisha indwara zitandura no kwihugura mu buhinzi bugezweho, no kumenya amakuru y’aho bakura imbuto nziza.

Mawanda Anastase waturutse mu Murenge wa Bwira avuga ko iwabo nta mbuto zibanguriye bagira, kandi ko bishimiye kuba na bo bagiye kubona ibiti byera imbuto ziribwa.

Agira ati “Nk’ubu njyewe ndi uwo mu Murenge wa Bwira ntabwo tugira ibiti by’imyembe bibanguriye nungutse amakuru ko natwe bagiye kuzabitugezaho, abana bacu bakabona imbuto tukarusho kurwanya imirire mibi”.

Abaturage baganaga ahatangirwa serivisi zitandukanye bagafashwa

Undi mubyeyi agira ati, “Njyewe nungutse inama mu buhinzi, nabonye igitoki kinini cy’umuhinzi wahawe amahugurwa yo kuvugurura urutoki urumva ko nanjye ngiye guhinga neza nkiteza imbere”.

Daniel Hategekimana ukorera ikigo mpuzamahanga mu kurengera ibidukikije no kuzamura imibereho myiza y’abaturage, ALCOS Network mu mushinga wabo ‘Murakira’ ufasha abahinzi kubona imbuto z’indobanure n’ibiti bivangwa n’imyaka, avuga ko muri gahunda yo gukomeza kugabanya igwingira mu bana bafite intego yo gukomeza kongera ibyo biti.

Agira ati “Dufite gahunda yo kongera amaterasi ndinganire, ubu turakoresha abantu basaga 700 bakiteza imbere, turateganya gutegura ubuhumbikiro 19 bugizwe n’amoko asaga 25 ngo abaturage bakomeze kubona ibiti bifuza. Umushinga wacu ‘Murakira’ uzakorana n’abaturage ibihumbi 160, bo mu ngo ibihumbi 40 buri muturage akazahabwa ibiti byera imbuto zitandukanye”.

Abaturage basobanuriwe uko babona ibiti byera imbuto ziribwa

Mu bindi biri kugaragarizwa abaturage ngo barusheho kugira ubumenyi mu kunoza ubuhinzi n’ubworozi hagamijwe kurwanya imiririe mibi n’igwingira mu bana, harimo ubworozi bw’amafi n’inkoko, no kuhira uturima tw’igikoni.

Umunyamabanga Nshingwabikorwa w’Intara y’Iburengerazuba, Uwambajemariya Florence, yashimye uko abafatanyabikorwa bamurikiye abaturage ibibakorerwa

Inzu ziri mu byangijwe n’ibiza

Umuyobozi w’Akarere ka Ngororero, Nkusi Christophe, avuga ko usibye gutakaza ubuzima bw’abaturage, ibikorwa remezo by’imihanda, n’ibiraro na byo biri kwangirika, bidasize n’imyaka y’abaturage n’amatungo kubera imvura yabaye nyinshi.

Umuyobozi w’Akarere ka Ngororero avuga ko ubu abaturage bari mu bice bishobora gushyira ubuzima bwabo mu kaga bari gukodesherezwa inzu, ndetse hanateguwe ahantu habugenewe (evacuation sites) bashobora guhungishiriza abaturage ibiza bibaye bikomeye.

Agira ati “Turimo kwimura imiryango 257 igizwe n’abantu 1057, ariko ni igikorwa gikomeje, imibare ishobora kwiyongera, twanateguye aho guhungishiriza abantu mu bice bine by’Akarere, nka Karambo mu Murenge wa Gatumba, Rurembo mu Murenge wa Kabaya, ESCOR Ramba muri Kageyo, na Mutake mu Murenge wa Kavumu, ahashyirwa abaturage igihe imvura byagaragara ko ikomeje gukaza umurego”.

Nkusi avuga ko ahateguwe bibaye ngombwa hashingwa amahema nko muri Gatumba mu gihe ahandi hasigaye ho, hari amazu afite ibyangombwa by’amashanyarazi n’amazi kandi ibikenerwa byose bibaye ngombwa baba biteguye.

Amateme n’imihanda biri kwangizwa n’ibiza

Mu mwaka ushize kandi imiryango 725 igizwe n’abantu 2,738 yari yavanywe aho ituye ijyanwa gukodesherezwa, ariko hakaba n’iyatangiye kubakirwa mu byiciro. Mu cyiciro cya mbere hubakiwe imiryango 32, icya kabiri hubakirwa 55, icya gatatu 104, naho icyiciro cya kane hazubakirwa imiryango 96.

Mu buryo burambye umuyobozi w’Akarere ka Ngororero avuga ko bitoroshye kwimura abantu kubera imiterere y’Akarere k’imisozi miremire, hakaba hakomeje gushyirwa imbaraga mu buryo bwo kurwanya isuri, hakurikijwe icyo ubutaka bukwiye gukoreshwa kubera imiterere yabwo (Vocation du sol), guca amaterasi ndinganire no gutera ibiti by’amashyamba n’ibivangwa n’imyaka.

Asaba abaturage kuva ahantu babona ko hashyira ubuzima bwabo mu kaga, kugira inama abaturage kubaka babanje gusaba gupimisha ubutaka bwubakwaho, no kubaka inzu zishobora guhangana n’ibiza.

Agira ati “Turasaba abaturage kubaka ahemewe, no kubaka ahashobora guhangana n’ibiza, inzu zifite fondasiyo zikomeye zashobora kwihanganira amazi menshi”.

Avuga ko Minisiteri Ishinzwe Ibikorwa by’Ubutabazi na yo yiteguye kubunganira ku ngaruka zose zavuka kubera ibiza, ariko n’abaturage bakaba bakwiye kuba maso bakitwararika kugira ngo bataburira ubuzima bwabo mu biza.

Byabereye mu Kagari ka Cyome, Umurenge wa Gatumba, ku ruhande rw’Akarere ka Ngororero.

Abakoresha uyu muhanda bagiriwe inama yo gukoresha umuhanda Kigali-Musanze-Mukamira-Ngororero.

Polisi y’u Rwanda yatangaje ko uwo muhanda utari nyabagendwa kubera imvura nyinshi yaguye mu Murenge wa Gatumba, igatera amazi kurenga urugomero rwa Nyabarongo ya mbere akimena mu muhanda, ukaba wabaye ufunzwe by’agateganyo.

Mu kiganiro Umuvugizi wa Polisi mu Ntara y’Iburengerazuba, SP Karekezi Twizere Bonaventure yagiranye na Kigali Today, yavuze ko nyuma y’uko uwo muhanda utari nyabagendwa, hari ahandi abakoresha uwo muhanda basabwa kunyura bidahagaritse ingendo zabo.

Ati “Umuhanda Ngororero-Muhanga ntabwo uri nyabagendwa, ariko abantu basanzwe bakoresha umuhanda Kigali-Ngororero-Kabaya, bashobora gukoresha Kigali-Musanze-Nyabihu-Kabaya”.

Arongera ati “Icyo dukora nka Polisi, ni uguhagarara ahongaho dukumira abantu bashobora gufata icyemezo cyo kwambuka amazi bakaba bahura n’ibibazo, twashyizeho poste ukurikirana uburyo ikibazo kigenda kigabanuka cyangwa se cyaba cyiyongereye tukagira abaturage inama yo kudakomeza icyo cyerekezo”.

SP Karekezi, yavuze ko bagenda bakurikirana uko amazi agenda agabanuka, mu rwego rwo kureba uburyo uwo muhanda wakongera kuba nyabagendwa.

Irondo rigenzura ayandi ryaciye ubujura

Iryo rondo rigenzura ayandi ritaratangira gukora, Umurenge wa Hindiro wari wiganjemo ikibazo cy’abajura biba insinga, abatobora inzu, uburaya n’ubusinzi, bamwe mu bakekwagaho ibyo byaha n’imyitwarire mibi bakaba barafahswe barafungwa, abandi bakaganirizwa bakabicikaho.

Umunyamabanga Nshingwabikorwa w’Umurenge wa Hindiro, Musabyimana Japhet, avuga ko irondo rigenzura ayandi ryagabanyije cyane ibikorwa by’ubujura n’imyitwarire mibi, kuko wasangaga higanje ubujura bw’insinga.

Agira ati “Hindiro wari Umurenge wa mbere mu Karere ka Ngororero mu bujura bw’insinga, ariko aho irondo rigenzura ayandi ritangiriye, abanyerondo ntibongeye kwirara ngo bitahire, byatumye rero abibaga bafatwa”.

Yongeraho ati “Ikibazo cyabaye ni uko iyo twamaraga kugenzura irondo mbere, abanyerondo babonaga ko nta kindi kibazo gihari bagataha, abajura babacunze bagatangira kwiba bwacya tukibaza uko byagenze. Abaturage ubwabo bahisemo kwitoramo abantu b’abasore bagenzura irondo kugeza bukeye”.

Musabyimana avuga ko kugeza ubu hari amatsinda abiri y’abantu 12, barimo abasore n’abagabo bamaze kureka ubujuru n’indi myitwarire mibi, ubu bakaba baritabiriye imirimo itandukanye irimo ububaji, gupakira no gupakurura imodoka, gusudira n’ibikorwa by’isuku bikoreshwa amaboko, kugira ngo badasubira mu ngeso mbi.

Agira ati “Abari basanzwe biba bamwe barafunzwe abandi baza gusaba imbabazi, biyemeza kutongera kwiba tubahangira imirimo kandi ubu bameze neza nta bikorwa b’ubujura bikirangwa iwacu, kuko ntaho banyura ngo bibe kandi bakeneye amafaranga, ubu rero twabafashije kwifasha”.

Umuyobozi w’itsinda rikora mu bubaji n’indi mirimo y’amaboko, wahoze mu bikorwa by’ubujura, Nzabonimpa Mustafa, avuga ko bameze neza kuko ntawe ugitegereje gufungwa cyangwa kujyanwa mu nzererezi, kuko ubu icyo bashatse bakigurira.

Agira ati “Mbere tutarabona icyo dukora twajyaga mu bujura, gutega abantu nijoro tukabambura amatelefone, ariko ubu ibyaha byaragabanutse cyane kuko abantu babonye imirimo byanatumye umutekano ugaruka, ntawe ucyiba insinga nta n’abagitobora inzu”.

Yongeraho ati “Ubuzima bwacu bwararokotse kuko nk’abo twashikuzaga telefone bagusumbije imbaraga cyangwa bafite intwaro babaga bakwivuna, gutobora inzu nabyo byashoboraga guteza impfu”.

Asaba ubuyobozi gukomeza guhoza ijisho ku rubyiruko rugaragara ko ntacyo rukora, kuko ari rwo ruba rurekereje ngo rwirohe mu ngeso mbi zirwangiza, babagire inama bajye mu mirima bahinge banafashe ababyeyi kuko ngo birirwa mu rusimbi kandi bikavamo ibibazo.

Mu rwego rwo gukomeza gufasha kurwanya iyo myitwarire mibi, ubu Umurenge wa Hindiro uri mu bukangurambaga bwo gukangurira abaturage kwirinda ibyo bituma umurynago Nyarwanda uhungabana, binyuze mu irondo rigenzuira ayandi bise ‘Umutekano iwawe ishema ryanjye’, ubwo bukanguramabaga bukaba buzanatangwamo ibihembo mu marushanwa y’umutekano n’isuku.

Minisitiri Bizimana yasobanuye ubutwari u Rwanda rwifuza muri iki gihe

Iki cyerekezo giteganya ko buri Munyarwanda yazaba yinjiza Amadolari ya Amerika ibihumbi 12 ku mwaka (yagereranywa muri iki gihe n’umushahara w’Amafaranga y’u Rwanda Miliyoni imwe n’ibihumbi 300 buri kwezi).

Kugeza ubu impuzandengo y’umushahara buri Munyarwanda ahembwa iragera hafi ku bihumbi 60 by’Amafaranga y’u Rwanda buri kwezi, nk’uko bigaragazwa n’Umuryango mpuzamahanga wita ku murimo OIT/ILO.

Minisitiri w’Ubumwe bw’Abanyarwanda n’Inshingano Mboneragihugu, Dr Jean Damascène Bizimana, yashimiye Intwari z’i Nyange zirimo 8 bitabye Imana na 39 bakiriho kugeza ubu, kubera ubutwari bwabaranze ubwo bose biyemezaga kwitwa Abanyarwanda, aho kwitandukanya kw’Abahutu n’Abatutsi.

Dr Bizimana avuga ko ubutwari bukenewe mu Banyarwanda no mu rubyiruko by’umwihariko muri iki gihe, ari ubumenyi n’indangagaciro z’umwete mu byo abantu bakora, gukorera hamwe no kuba inyangamugayo, akaba ari byo byafasha buri Munyarwanda kujyana n’icyerekezo 2050.

Minisitiri Bizimana hamwe n’abakozi b’ibigo bishanikiye kuri MINUBUMWE, bari ku Gicumbi cy’Intwari z’i Nyange muri Ngororero

Dr Bizimana agira ati "Ubutwari bujyana n’izi ndangagaciro n’Umuco, igikomeye ni ukureba icyerekezo u Rwanda rufite, aho muri 2050 u Rwanda ruzaba rufite Iterambere rirambye, buri muntu ashobora kwinjiza Amadolari ibihumbi 12 ku mwaka, tudafite umuco n’indangagaciro z’ishyaka no gukora ntabwo twabigeraho."

Urwego rushinzwe Intwari z’Igihugu, Imidari n’Impeta by’Ishimwe(CHENO) rushamikiye kuri MINUBUMWE, rwizihiza buri mwaka ubutwari bwaranze abanyeshuri b’i Nyange, aho mu ijoro ryo ku itariki ya 18 Werurwe mu mwaka 1997 basabwe kwitandukanya (Abahutu ukwabo n’Abatutsi ukwabo kugira ngo Abatutsi bicwe), ariko abanyeshuri bose bakabyanga.

Bose ngo bagize bati "Twese turi Abanyarwanda", maze abacengezi barimo abari barakoze Jenoside mu 1994, batangira kubateramo ibisasu no kubarasa batavanguye, bamwe bahita bitaba Imana abandi barakomereka.

Umwe muri izo Ntwari z’Imena zikiriho, Nkunduwera Angelique, avuga ko kuba Jenoside yakorewe Abatutsi mu 1994 yari imaze imyaka itatu ibaye, hamwe no kugira abarezi babatozaga kwirinda amacakubiri, byatumye babona igisubizo cyihuse cyo guha abicanyi.

Minisitiri Bizimana yunamiye Intwari z’Imena z’i Nyange

Nkunduwera yabwiye abanyeshuri bakirimo kwiga mu kigo cy’i Nyange, ko ibyiciro by’Intwari zikiriho ari byo Imena n’Ingenzi bibategereje, ariko kubijyamo ngo bisaba kwiga, cyane cyane Ikoranabuhanga.

Umuyobozi w’izi Ntwari zibumbiye mu ishyirahamwe ryitwa ’Komeza Ubutwari’, Sindayiheba Phanuel, avuga ko bakomeje kwigisha ubutwari mu rubyiruko, ariko ko hari n’ibikorwa by’iterambere bateganya gukora byaza bitanga urugero, kuko bose uko ari 39 basigaye babashije kwiga.

Kugeza ubu izi Ntwari zirimo abarimu, abayobozi mu turere no mu mirenge, abashumba b’amatorero n’abakorera imirimo itandukanye mu bihugu by’amahanga.

Aba ni bamwe mu Ntwari z’i Nyange zikiriho kugeza ubu

Leta y’u Rwanda yashyize aba banyeshuri mu Ntwari z’Igihugu, mu cyiciro cya kabiri cyitwa Imena, barimo umunani bitabye Imana hamwe na 39 bakiriho kugeza ubu.

Abahise bicwa hamwe n’abaje kwitaba Imana nyuma yaho ni 8, bakaba ari Benimana Hélène, Bizimana Sylvestre, Mujawamahoro Marie-Chantal, Mukambaraga Béatrice, Mukarutwaza Séraphine, Ndemeye Valens, Niyongira Ferdinand na Sibomana Ananie.

Intwari z’Igihugu zikiriho kugeza ubu zarokotse igitero cy’abacengezi cyabereye i Nyange mu ijoro ryo ku ya 18 Werurwe 1997, ni Abayisenga Théodette, Bavakure César, Bayisenge Noel, Birori Jean Népomuscène, Gatera Silas, Kamayirese Grâce, Kanyemera Augustin, Kayiranga Aloys, Minani Pascal na Muhayimana Libérée.

Hari na Muhinyuza Florence, Mukahirwa Joséline, Mukanyangezi Dative, Mukeshimana Béatrice, Mukeshimana Florence, Musabimana Florence, Musoni Clément, Mvukiyehe Jean-Baptiste, Ndagijimana Pierre-Célestin na Ndahimana Jean-Baptiste.

Hari na Nishimwe Marie, Niyitegeka Vénant, Nizeyimana Emeritha, Nizeyimana Emmanuel, Nkunduwera Angélique, Nsabimana Ntwali, Ntakirutimana Jean Claude, Nyagasaza Joseph, Nyinawandinga Espérance na Nyirandayisaba Monique.

Abandi bari muri izo Ntwari z’Igihugu zikiriho ni Nyiranzabandora Marie-Rose, Ruhigira Emmanuel, Sibomana André, Sindayiheba Phanuel, Tuyishimire Jean-Marie Vianney, Ukulikiyimfura Adolphe, Urimubenshi Emmanuel, Uwamahoro Prisca na Uwizera Florence.

Mu Miko y’Abakobwa

Mu kiganiro Kigali Today yagiranye na André Ntagwabira, umushakashatsi ushinzwe Amateka ashingiye ku Bisigaratongo mu Nteko y’Umuco, yavuze ko Mu Miko y’Abakobwa ari ahantu ndangamurage h’amateka, kuko ari ho hiciwe umugabekazi n’abamikazi bose mu itanga ry’Umwami Ndahiro II Cyamatare, nk’uko byasobanuwe na Alexis Kagame mu 1959, mu gitabo ‘Inganji Karinga’ ku ipaji ya 160, yanditse asobanura amateka yaho.

Haragira hati “Mu ipfa rya Ndahiro II, umugabekazi Nyirandahiro II Nyirangabo afatanwa n’Abamikazi bose. Abanyabungo bababambira ahantu mu Cyingogo, hitwa mu Miko y’Abakobwa; ubundi hakitwa no ku Rwegekangabo”.

Uretse aya mateka yo ku ngoma ya Ndahiro II Cyamatare, abaturage benshi bagaragaza ko batazi neza, hari ibindi bisobanuro (legends/légendes) ku Miko y’Abakobwa usanga ari byo byabaye uruhererekane mu bahaturiye, kurusha amateka yaho nyakuri.

Ntagwabira agaruka ku bushakashatsi bakoze ku mateka y’u Rwanda n’ibisigaratongo, bahawe n’abaturage batandukanye.

Ati “Igisobanuro cya mbere twahawe n’uwitwa Makinalodi Théophile, avuga ko akomora ku mubyeyi we n’abari urungano rwa se, ni ikivuga ko ngo Umwami Kigeri IV Rwabugiri yaba yarahazanye abakobwa umunani, bose bizeye ko azabarongora. Nuko ahageze ngo ahitamo umwe aba ari we arongora, abandi barindwi ategeka ko babubakira hamwe. Abo barindwi ngo babonye ko atabarongoye, bariyahura, babashyingura ahaje kwitwa Mu Miko y’Abakobwa, banahatera umuko”.

Igisobanuro Inteko y’Umuco yahawe na Niyitegeka Alphonse, na we avuga ko yumvanye abantu benshi, ni ikivuga ko abakobwa bakundaga ‘kuhacira imyeyo’, bukeye baza kurigita; bivuze ko hashobora kuba harimo iriba! Aho hantu ubu harangwa n’agahuru, kera ngo habagamo umunyana, agasimba bivugwa ko iyo ukabonye ntugire uwo ubibwira, biguha kuramba!

Ntagwabira asobanura ko Umuko witiriwe aho hantu ubu utakigaragara, keretse ibishibuka byawo. Abahaturiye ariko bemeza ko bawusanze, igihe kiza kugera abantu bakavuga ko babona usa n’uwika, urigita. Hashize igihe ngo baza kuwubura burundu.

Ati “Kubera ko ari ahantu hakikijwe n’agahuru katinjirwagamo, ntibashoboraga gusobanukirwa neza iby’uwo Muko. Ubu kubona hari ibishibuka byawo birabatangaza. N’abahigi bo hambere bemeza ko ari imbwa zabo, ndetse n’inyamaswa bahigaga, byose byakikiraga ako gahuru ntihagire igihirahira ngo cyinjiremo”.

Agahuru ko mu Miko y’Abaobwa

Ntagwabira akomeza avuga ko muri iki gihe bigaragara ko ako gahuru kagabanutse cyane, nubwo ubuyobozi bw’inzego z’ibanze bwatangiye kuhakoma no kuharinda ibihangiza.

Ubu aho mu Miko y’Abakobwa ni umurima wa mpande eshatu urimo agahuru gafite ubuso bwa are enye, kagizwe n’amoko atandukanye y’ibyatsi n’ibiti, harimo imihokoro, mana yeze. Imikeri, umuhanda (babohesha inkoko), isagara, umushishiro, icyatsi kivura amakore y’inka, urukarara, umukondogoro, umurara, umunkamba, umwungo (babazamo inanga), umukuzanyana, umutisyi, umubirizi, inturusu iteye ku Igongo n’imiko y’imishibuka.

Minisitiri Dr Nsanzimana aganiriza ababyeyi ku ngamba zigamije kurwanya imirire mibi

Ni igikorwa cyatangiriye mu Karere ka Ngororero tariki 17 Mutarama 2024 ariko kikazagera mu tundi turere, kikaba cyitezweho kuzihutisha kugabanya igwingira mu bana riboneka mu Rwanda.

Leta y’u Rwanda irakoresha umuvuduko uri hejuru mu kurwanya igwingira mu bana bafite imyaka iri munsi y’itanu.

Ni urugendo rutangira umwana agisamwa, ndetse umugore utwite akaba agomba kwitabwaho, kuko kugira amaraso makeya atwite bimugiraho ingaruka mu kubyara umwana ufite ibiro bikeya, bigasaba imbaraga mu kumufasha kugira imikurire myiza kuko atayibonye ashobora kugwingira.

Leta y’u Rwanda yihaye intego yo kugabanya imibare y’abana bafite igwingira ikagera kuri 19% mu mwaka wa 2024, nyamara henshi mu turere umubare uri hejuru hagendewe ku bushakashatsi bwakozwe n’Ikigo cy’Igihugu gishinzwe Ubuzima (RBC) kigaragaza ko igwingira riri hejuru ya 25%.

Uretse kwigisha ababyeyi gutegura indyo yuzuye, kwegera ibigo nderabuzima n’ingo mbonezamikurire kurwanya imirire mibi n’igwingira, hatangijwe gahunda yo gufasha ababyeyi batwite guhabwa ubwunganizi ku babyeyi batwite butuma bashobora kubyara abana bafite ibiro ndetse ubu buryo bukagabanya impfu ku bana bavuka.

Ni uburyo bugizwe n’inyongeramirire ikomatanyije buhabwa umubyeyi utwite, buba bukungahaye ku ntungamubiri zitandukanye (MMS) zigafasha umubyeyi utwite kongera amaraso kugera mu gihe cyo kubyara ndetse agashobora kubyara abana bafite ibiro bishyitse.

Guverineri w’Intara y’Iburengerazuba ahereza umubyeyi ikinini

Mu Rwanda ubusanzwe abagore babarirwa kuri 13% bagira ikibazo cyo kubura amaraso babyara, naho abagore bagera kuri 25% bahura n’ikibazo cyo kubura amaraso batwite (25%) bikagira ingaruka mu kubyara abana bafite ibiro bikeya rimwe na rimwe bigatera impfu z’abana 203 ku bana 100.000 bavuka.

RBC igaragaza ko gukoresha MMS bizaca intege ibibazo bitera imirire mibi harimo n’uruhererekane rw’imirire mibi kuko igeragezwa ryakozwe ryagaragaje ko MMS ishobora kugabanya umubare w’abana bavutse bafite ibiro bike (LBW) ku kigero cya 12%, kugabanya kubyara hakiri kare kugeza ku 8%, kugabanya umubare w’abana bavuka bapfa kugeza kuri 5%, kandi ugabanye impfu z’amezi 6 muri rusange ho 7%.

Julianna Lindsey, uhagarariye UNICEF mu Rwanda, avuga ko yishimiye uruhare rwa UNICEF mu gufasha kuzamura ubuzima n’imirire y’ababyeyi n’abana mu Rwanda.

Agira ati: "UNICEF yishimiye gufatanya n’u Rwanda mu gikorwa kigamije kuzamura ubuzima n’imirire y’ababyeyi n’abana mu Rwanda. Gushyira imbere imirire myiza y’ababyeyi ni ingenzi.Turi hamwe, duharanira guteza imbere ejo hazaza heza, tukareba ko buri mubyeyi ahabwa inkunga ikenewe mu muryango wateye imbere kandi ugaburirwa. Ibyo twiyemeje bigamije kubaka umusingi aho ubuzima bw’ababyeyi n’abana buratera imbere kandi buratanga icyezere ku hazaza h’u Rwanda. "

Minisitiri Dr Nsanzimana ahereza ikinini umwe mu babyeyi mu Karere ka Ngororero

Minisitiri w’ubuzima Dr. Sabin Nsanzimana asobanura ko gahunda izafasha mu guhangana n’imirire mibi mu bana.

Agira ati: “Kunoza imirire y’ababyeyi no gutanga inyongeramirire ikomatanyije ku bagore batwite bishobora gufasha kugabanya imirire mibi mu bana bato. Ubu buryo bufasha umubyeyi mu gihe atwite kandi ikagira uruhare rukomeye ku mikurire y’umwana.”

Akomeza agira ati “Mu gufasha ababyeyi batwite kubona inyongeramirire ikomatanyije, tuba duhaye abana amahirwe meza yo kugera ku bushobozi bwabo bwose no kubaho neza.”

Ubu buryo bwo gutanga inyongeramirire ikomatanyije ku babyeyi batwite izatangwa mu turere dutanu mu kugabanya igwingira mu bana.

inyongeramirire ikomatanyije (MMS) ikungahaye kuri vitamine 15 zingenzi n imyunyu ngugu, harimo fer na aside folike.

Ubushakashatsi bwa gatandatu ku bwiyongere n’ubuzima bw’abaturage (DHS) bw’umwaka wa 2019-2020 bwagaragaje ko umubare w’abana bagwingiye wagabanutseho 5%, kuko bari bageze kuri 33% bavuye kuri 38% mu myaka 8 ishize.

Muri Kamena 2023 habayeho gupima abana mu cyumweru cyahariwe ubuzima bw’umwana n’umubyeyi imibare igaragaza ko abana bagwingiye bageze kuri 25%, mu gihe u Rwanda rwihaye intego ko muri 2024 ruzaba rugeze kuri 19%.

Ngororero yambaye umutuku yatsinze Kavumu 6-0

Ibyo bitangajwe mu gihe urubyiruko rwitabiriye ayo marushanwa mu mupira w’amaguru, aho Imirenge yahataniraga kugera muri kimwe cya kabiri cy’amarushanwa, yahuraga mu bice bitandukanye, narwo rugaragaza ko rwifuza ko impano zarwo zitaguma gusa mu marushanwa ku rwego rw’Akarere, ahubwo zakwaguka binyuze mu gushinga ikipe y’Akarere mu mupira w’amaguru, kuko kanafite ikibuga cyo kwitorezaho.

Urubyiruko rwo mu Karere ka Ngororero ruri mu marushanwa Umurenge Kagame Cup, rurifuza ko ubuyobozi bwabahozaho ijisho, kugira ngo impano zitandukanye bafite zibashe kugaragara no kuzamuka ngo ziteze imbere urubyiruko.

Imanizabayo Hassan, avuga ko abayobozi baramutse begereye abakinnyi bakiri bato, byatuma koko impano zigaragaza Akarere kakazagira ikipe ikomeye, kuko ibyo bakora bigaragaza ko impano zihari, ibyo akabihurizaho na mugenzi we kapiteni w’ikipe y’Umurenge wa Ngororero.

Umurenge wa Kabaya mu bahungu

Agira ati “Turacyari batoya ubuyobozi butwegereye bukatuba hafi impano zirimo zatanga imbuto mu ikipe y’Akarere. Turabasaba gusa kutuba hafi naho ubundi kuba dufite sitade, tunafite Akarere kanini twabona impano mu ikipe y’Akarere nk’ahandi mu Ntara y’Iburengerazuba”.

Umunyambanga Nshingwabikorwa w’Umurenge wa Ngororero, Mugisha Daniel, avuga ko kubera ko bitegura kubona ikipe y’Akarere ka Ngororero, amarushanwa Umurenge Kagame Cup azabafasha gutahura impano kugira ngo babashe kuzubaka ikipe irimo abakomoka mu Karere ka Ngororero koko.

Agira ati “Umurenge wa Ngororero nk’Umurenge w’Umujyi natwe turitegura gukora ikipe y’Akarere, igizwe ahanini n’abo muri uyu Murenge. Ni byiza rero kuko aya marushanwa adufasha gutoranya hakiri kare impano zihari tukazirerera kuri iki kibuga”.

Ikipe y’abakobwa y’Umurenge wa Ngororero

Ibyo kugira ikipe y’Akarere mu kiciro cya kabiri binemezwa n’Umuyobozi w’Akarere ka Ngororero, Nkusi Christophe, ugaragaza ko amarushanwa Umurenge Kagame Cup azafasha koko kubona impano zikenewe ngo ikipe ishingwe, gusa akavuga ko bizaterwa n’ubushobozi ariko buri gushakishwa.

Agira ati “Ni byo koko amarushanwa Umurenge Kagame Cup, azadufasha kubona impano tuzashingiraho twubaka ikipe y’Akarere ka Ngororero, gusa turacyashakisha ubushobozi kuko ikipe ikenera byinshi birimo uburyo bw’ingendo, aho kuba n’ibiyitunga mu gihe iriho, byose ni byo tugikusanyiriza ubushobozi”.

Mu marushanwa yo gushaka itike ya kimwe cya kabiri mu marushanwa Umurenge Kagame Cup 2023-2024 ikiciro cya mbere, mu bagabo ikipe y’Umurenge wa Ngororero yatsinze iya Kavumu ibitego 6-0, Umurenge wa Gatumba watsinze uwa Hindiro kuri penaliti eshatu kuri ebyiri, naho Kabaya itsinda Kageyo ibitego 4-0.

Abakobwa ba Bwira

Mu bagore ikipe y’Umurenge wa Bwira yatsinze iya Hindiro kuri Penariti 3-1, Umurenge wa Kabaya utsinda uwa Muhororo kuri Penaliti 3-2, Umurenge wa Ngororero n’ubundi utsinda uwa Kageyo ibitego 3-0.

Icyiciro cya kabiri kikaba gikina kuri uyu wa gatatu tariki ya 11 Mutarama, 2024.

Ikipe y’abagabo ya Gatumba

Abari bakurikiye umukino barimo n’abaherekeje amakipe

Itegeko ryo gukuramo inda ku bushake riteganya ko umuntu asaba gukurirwamo inda ku bushake iyo abaganga babona uwasamye inda ishobora guhitana ubuzima bwe, kuba yafashwe ku ngufu, cyangwa bisabwe na nyiri ubwite iyo nda yarayitewe n’uwo bafitanye isano.

Uwo mwana wigaga mu mwaka wa gatandatu w’amashuri abanza watewe inda, avuga ko ari nyirarume babanaga kwa nyirakuru, wahengereye nta wundi muntu uhari akamusambanya akanamutera inda, cyakora nyirarume ngo ahakana icyaha, ndetse ngo avuga ko atabyara bikanemezwa n’abo mu muryango we, bavuga ko yaba afite ibibazo byo mu mutwe byamuteye kutabyara.

Kuba hakekwa nyirarume w’umwana watewe inda bisaba gusa inyandiko yo kwemererwa gukuramo inda ku bushake isinyweho n’uwatewe inda, cyakora uwo mwana wigaga ku kigo cy’amashuri cya Nyagisagara ibye bikomeje kuzamo urujijo kuko habanje kuvugwa ko nyina umubyara yanze ko ikurwamo, ariko ubu bavuga ko umwana ari we wafashe umwanzuro wo kwanga ko ikurwamo.

Ubwo hamenyekanaga amakuru ko uwo mukobwa yaba atwite kubera ibimenyetso yagaragazaga by’ubuzima bwe butameze neza, yoherejwe ku kigo nderabuzima cya Ntaganzwa arapimwa basanga atwite, hatangira iperereza ku wayimuteye.

Iryo perereza ryari rigamije gukurikirana icyaha cyo gusambanya umwana no kumutera inda, uhamijwe ibyo byaha n’urukiko akaba ahanishwa igifungo kiri hejuru y’imyaka 25, iyo hasambanyijwe umwana uri hagati y’imyaka 14-17.

Iperereza ryakozwe na RIB ryagaragaje ko nyirarume w’umwana, ari we ukekwaho kuba yaramuteye inda hashingiwe ku bimenyetso uwo mwana yatanze, bituma inkuru zahwihwiswaga ko yaba yarayitewe n’umwe mu barimu bamwigishaga bidahabwa agaciro.

Nyirarume w’umwana amaze gutabwa muri yombi, hakurikiyeho kuganiriza umwana na nyina, bikorerwa muri Isange One Stop Centre ku bitaro bya Muhororo, ariko bigeze ku mwanzuro wo gukuramo iyo nda, ntibyakorwa kuko nyiri ubwite ngo yabyanze.

Nyina w’umwana yaba yarabanje kwanga gukuramo iyo nda

Umuyobozi wa Centre Scolaire Nyagisagara, Uwingabe Dieudonné, avuga ko bigeze ku mwanzuro wo gukuramo iyo nda, nyina w’umwana yabyanze asaba ko igihe baba bafashe uwo mwanzuro hazanapimwa abarimu bashyirwaga mu majwi ku gutera uwo mwana inda.

Uwingabe yahamyaga ko umwana we yemeraga gukuramo iyo nda, kandi yabiganirijweho n’abakozi ba Isange One Stop Centre mu Karere ka Ngororero, ariko umwana yatashye nta gikozwe.

Mu gushaka kumenya icyo ubuyobozi bw’Akarere ka Ngororero bwakora ngo kuri icyo kibazo cy’uwo mwana, Umuyobozi w’Akarere ka Ngororero, Nkusi Christophe, amaze kumenya icyo kibazo yabwiye Kigali Today ko na we agiye kubikurikirana.

Yagize ati, “Ubundi umwana wasambanyijwe ajyanwa kuri Isange One Stop Centre bakamufasha, ni we wifatira umwanzuro akurikije ubujyanama yahawe, ku gukuramo inda ku bushake ngiye kubikurikirana”.

Amakuru agera kuri Kigali Today avuga ko uwo mwana yongeye gusubizwa mu kigo cya Isange One Stop Centre, akaganirizwa ariko hakabura umwanzuro wo gukuramo iyo nda kuko umwana noneho ngo yaba ari we wanze gusinya inyandiko.

Ibyo kandi binemezwa n’umubyeyi we wamugaragarije ibyiza byo gukuramo iyo nda ku muryango, no ku buzima bw’umwana ubyaye undi mwana, kugeza ubu ibitaro bya Muhororo bikaba bigitegereje ko uwo mwana yakwemera ko inda atwite ikurwamo ku bushake ngo bimufashe.

Ni izihe ngaruka zo kubyara utarakura no kubayarana n’uwo mufitanye isano?

Umuyobozi mukuru w’ibitaro bya Muhororo, Dr. Namanya William, avuga ko nyuma yo gusuzuma uwo mwana, basanze inda ye igifite igihe cyo kuba yakurwamo kuko mu kwezi gushize yari ifite ibyumweru 15, mu gihe inda yemewe gukurwamo iba itarengeje ibyumweru 22.

Dr. Namanya avuga ko ntacyo ibitaro byari gukora hatabonetse inyandiko ya nyiri ubwite, yo kwemera ko inda ye ikurwamo ku bushake ariko ko igihe cyose yabigana itararengerana byiteguye kumufasha.

Dr. William Namanya avuga ko zimwe mu ngaruka zo kubyara umuntu utarageza ku myaka y’ubukure, harimo kubyara abazwe kuko amatako ye aba ataragira ubukomere bwo gucamo umwana.

Agira ati “Abenshi mu babyara kuri iriya myaka barabagwa kuko baba bataragira ubushobozi bwo kwibyaza kubera ko batarakomera, hari n’igihe baba bafite ikibazo cy’imirire bikaba byatuma ubukure bwabo bukererwa bityo ntabe yabyara atabazwe”.

Agaragaza ko n’iyo bamaze kubyara imitekerereze yabo iba itaragera ku rwego rwo kwita ku mwana w’uruhinja, ku buryo akura neza bigasaba ko akenera abandi bo kumwitaho, bikaba bitazorohera uwo mwana kuko we arerwa na nyirakuru na we ugeze mu zabukuru utifashije.

Agira ati “Hari igihe bene uwo mwana ubyaye undi yibagirwa ko amufite, yajya kwikinira ntiyibuke iby’umwana, ibyo bisaba ko wa umubyeyi w’uwabyaye amuba hafi akarera abo bana babiri”.

Mu gihe ibitaro bya Muhororo bigitegereje ko uwo mwana yabigana bikamufasha gukurirwamo inda ku bushake, ubuyobozi bw’ishuri buvuga ko yasubiye ku ishuri nyuma y’uko avuye kwa muganga, akaba yaravuze ko ngo atakwemera ko inda atwite ikurwamo, ko azemera akabyara.

Ubwo umunyamakuru wa Kigali Today yavuganaga n’umubyeyi we, yahamyaga ko kugira ngo yemere ko umwana we akuramo inda, habanza kwemezwa niba bazapima ibizamini byimbitse (DNA) ku bo yakekaga bose ko bamuteye inda, no kuri musaza we we ubu ufungiye mu Igororero rya Nyakiriba kubera gukekwaho gutera inda umwishywa we.

Biyemeje gukorera hamwe

Babitangarije mu namu rusange y’Umuryango yabaye ku wa 10 Ukuboza 2023, inama yanabereyemo amatora y’Umuryango RPF Inkotanyi yo kuzuza inzego z’ubuyobozi ku rwego rw’Akarere zari zituzuye no gusimbuza izicyuye igihe.

Bimwe mu bikorwa bahigiye kugeraho bafatanyije, ni ukwegera abanyamuryango bakabakemurira ibibazo ku gihe, kwitegura gutanga umusanzu ukenewe ngo Umuryango ugire imbaraga, no kwitegura amatora y’umukuru w’Igihugu ategerejwemo Chairman mukuru wa RPF Inkotanyi Paul Kagame wamaze kwemera ko aziyamamaza.

Umuyobozi w’Akarere ka Ngororero Nkusi Christophe wanatorewe kuba Chairman w’Umuryango ku rwego rw’Akarere, avuga ko bakwiye kurangwa n’ubwitange ngo umuryango ukomeze gutera imbere bigakorwa bakorera hamwe.

Agira ati, “Iyo umuntu akora ibye undi agakora ibye nibwo wa musaruro uba mukeya kandi abantu bari mu cyerecyezo kimwe bakwiye kuba bakorana bakajya inama kandi bagaharanira kunga ubumwe kuko amacakubiri asenya aho kubaka”.

Nkusi avuga ko nibakorera hamwe bazagera kuri byinshi

Irankunda Modeste uhagarariye urubyiruko muri Komite nyobozi y’Umuryango RPF Inkotanyi ku rwego rw’Intara y’Iburengerazuba, ahamya ko kuba haragiye humvikana abayobozi begura cyangwa bikirukanwa mu Turere dutandukanye, byari bigamije gusimbuza abatakiri mu murongo uganisha ku cyerecyezo k’Igihugu.

Ashimira abayobozi b’Akarere ka Ngororero kuko iyo nkundura itabagezemo, bisobanuye ko hari ubufatanye n’imikoranire myiza mu nzego z’Ubuyobozi, abasaba gukomeza kunga ubumwe no guharanira iterambere y’abanyamuryango.

Agira ati, “Byaba bibabaje kumva na hano mu Ngororero mwaragezwemo n’amacakubiri cyangwa guteshuka ku nshingano, imikoranire myiza ikomeze kubaranga, mwemere kujya no kugisha inama aho bishoboka nibwo muzarushaho kugendera mu nzira imwe igamije iterambere ry’Umurynago RPF Inkotanyi”.

KOmite yatowe

Abanyamuryango ba RPF Inkotanyi mu Karere ka Ngororero basoje inshingano basezeranyije ubufatanye ku bashya binjiyemo, mu kugira ngo bazarusheho kuzuza ibyo biyemeje dore ko hari ibigihari byo gukurirkirana, kongera ibikorwa.

Inzego zatowe n’izujujwe zirimo Komite nyobozi y’Umuryango ku rwego rw’Akarere, Abahagarariye urugaga rw’urubyiruko n’abagore bashamikiye ku muryango RPF INkotanyi, n’abagize za Komisiyo z’Ubukungu, imibereho myiza n’ubutabera.

Uwihoreye yabwiye abahinzi kuba maso bagafata uwangiza ibigori byabo

Bitangajwe nyuma y’uko mu Murenge wa Nyange mu gishanga cya Songa, habonetse abahinzi bagaragaza ko abahirira amatungo hari igihe banarandura, cyangwa bakavuna ibigori bikiri bito bakabishyira amatungo yabo.

Igishanga cya Songa gifite ubuso bwa hegitari zisaga 30, kikaba cyitezweho gutanga umusaruro w’ibigori usaga toni 100 mu gihembwe cy’ihinga 2024A, Leta ikaba yarahaye abaturage ifumbire ku buntu ngo batere muri ibyo bigori mu gihe cyo kubagara.

Haterwa iyo fumbire wasangaga hari imwe mu mirima yaranduwemo ibigori, bikavugwa ko ari bamwe mu baturage batari inyangamugayo, bihishahisha bakavunaguza ibyo bigori bigashyirwa amatungo.

Uyu ubyeyi ni umwe mu baranduriwe ibigori

Umuyobozi wungirije w’Akarere ka Ngororero ushinzwe iterambere ry’Ubukungu, Patrique Uwihoreye, avuga ko kuba Leta itanga ifumbire ngo abahinzi bazabone umusaruro uhagije, abandi bagaca inyuma bakangiza ibigori byatewe bitazakomeza kwihanganirwa, ko uzafatwa azahanwa bikomeye.

Agira ati “Hari ahantu batubwiye ko abantu baza kwahira ibigori bagashyira inka zabo, uramuka amenye amakuru atumenyeshe, kuko Igihugu cyashoye asaga Miliyari 200Frw kugira ngo abahinzi bihaze mu biribwa bahabwa ifumbire, none hakaduka umuntu akaza kwahira ibigori nk’ibi, ibyo si byo, inzego z’umutekano zidufashe bafatwe bahanwe”.

Uwihoreye asaba abahinzi kwita ku bihingwa by’umwihariko ibigori, kugira ngo bazabone umusaruro mwinshi, ahubwo akabashishikariza kujya mu bwishingizi, kugira ngo haramutse habaye ibiza bigateza ibihombo, abahinzi bazishyurwe.

Igishanga cya Songa cyitezweho gutanga toni zisaga 100 z’ibigori muri iki gihembwe cy’ihinga

Ingingo ya 187 ihana ibyaha nshinjabyaha, ivuga ko umutu wese ku bw’inabi wangiza cyangwa wonona ibiti, imyaka, ibikoresho by’ubuhinzi n’ubworozi by’undi cyangwa bye, ariko bifite ingaruka ku bandi aba akoze icyaha.

Iyo abihamijwe n’urukiko ahanishwa igihano cy’igifungo kiri hejuru y’umwaka umwe ariko kitarenze imyaka ibiri, n’ihazabu y’amafaranga ari hejuru ya Miliyoni imwe ariko zitarenga ebyiri, cyangwa kimwe muri ibyo bihano.

Abahinzi barahabwa ifumbire ku buntu

Umuyobozi w’Akarere ka Ngororero, Nkusi Christophe, avuga ko ikibazo cya Nyiransababera bakimenye ubutaka bwe bwararangije gutezwa cyamunara, ku buryo ntacyo bari bakimufashije, ariko ko ubuyobozi bumaze kukimenya butari guterera iyo.

Avuga ko ubu babaye bashakiye Nyiransababera aho kuba akava muri shitingi yari atuyemo, hakaba hagiye gukurikiraho uburyo bwo kwinjira mu bucukumbuzi bw’ikibazo cye ngo hamenyekane hagati ye n’umuhungu we nyiri ubutaka bwagurishijwe.

Nkusi avuga ko kugira ngo hafatwe undi mwanzuro kuri ubwo butaka, ari ngombwa kwitabaza umubitsi w’impapuro mpamo z’ubutaka mu ifasi y’Intara y’Iburengerazuba, hagasobanuka ukuntu ubutaka bwa Nyiransababera bwageze ku muhungu we.

Nyiransababera ari hagati ya Gitifu n’Umuyobozi wa Polisi mu Murenge wa Gatumba muri Ngororero ubwo bari bamaze kumushakira aho aba

Ntawamenya niba umubitsi w’impapuro mpamo z’ubutaka mu Ifasi y’Iburengerazuba, azivuguruza ku nyandiko ubwe yahaye Nyiransababera, igaragaza ko ubutaka bufite nomero 6508 ari ubwa Sebera Sylvere na Nyiransababera Xavera n’ubwo bitabujije ko Banki y’Abaturage ishami rya Nyabihu ibuteza cyamunara, mu mazina ya Harerimana Medard, umuhungu wa Nyiransababera.

Agira ati "Tuzafata umwanzuro tumaze kumenya ngo nyiri ubutaka ni nde, ibintu byamaze kugera mu mategeko, ni yo mpamvu tugomba gukurikiza amategeko. Uwo muhungu we na we twamutumije ngo azaze asobanure uko ubwo butaka bwamugezeho, tuzafatanya na komite z’ubutaka ukuri kugaragare. Amakuru tuzabona ni yo tuzafata nk’ukuri, kandi tuzashaka igisubizo kirambye".

Ese Nyiransababera ashobora gusubirana ubutaka bwe?

Nkusi avuga ko kuba ubutaka bwa Nyiransababera bwaratejwe cyamunara, akabagezaho ikibazo babimenye batinze inkiko zararangije gufata imyanzuro ku buryo ntacyari guhita gikorwa, ariko ubu bagiye kugicukumbura ngo barebe ukuri kwacyo nibiba ngombwa hafatwe undi mwanzuro.

Agira ati, "Ntacyo twari gukora ku byemezo by’Inkiko, ariko ibyo turi gukora nitumenya andi makuru dushobora kuzagira ibyo duhindura n’ubundi hakurikijwe amategeko".

Umunyamabanga Nshingwabikorwa w’Umurenge wa Gatumba avuga ko ubu Nyiransababera yashakiwe aho aba acumbitse, anashyirwa mu bagomba guhabwa inkunga y’ingoboka, ndetse akazagenerwa inkunga yihutirwa y’Umurenge wa Gatumba mu gihe ibibazo bye biri gukurikiranwa.

Nyiransababera yaracumbikishirijwe, nyamara umubitsi w’impapuro mpamo z’ubutaka mu Ifasi y’Iburengerazuba agaragaza ko ahagurishijwe ari mu kwe

Ubutaka bwa Nyiransababera bwatejwe cyamunara kuri miliyoni ebyiri n’ibihumbi 200Frw, ariko amakuru ahari ni uko ababuguze ubu basaba miliyoni umunani ku wabwifuza.

Icyaje guteza urujijo ni ukuntu umuhungu we yabwibarujeho kugeza abutanzeho n’ingwate muri banki, agahabwa icyangombwa gihuje nomero y’ubutaka (UPI) n’iya nyina umubyara, abashinzwe iby’ubutaka ntibabashe kubona ko ubwo butaka bahaye undi bwanditse ku wundi.

Iyi nkuru Kigali Today izakomeza kuyibakurikiranira

Inkuru bijyanye:

Ngororero: Umukecuru yaterejwe cyamunana nta nguzanyo yasabye none arangara

Nyiransababera ubu atuye muri shitingi inyuma y’ubutaka bwe

Nyiransababera avuga ko yamenyeshejwe ko ubutaka bwe buri mu ngwate ya banki iherereye mu Karere ka Nyabihu, aho umuhungu we yagujije amafaranga miliyoni esheshatu akananirwa kuzishyura, bakaza guteza cyamunara umutungo wa nyina kandi nta ngwate yigeze amuha cyangwa ngo ayimutize.

Kitansi yo ku itariki 10 Ukwakira 2011 yishyuriweho amafaranga 1000, igaragaza ko yishyuwe na Sebera Sylver washakanye na Nyiransababera Xavera batuye mu Kagari ka Karambo mu Murenge wa Gatumba, ubwo butaka bukaba bufite nomero 6508. Sebera akaba yadikanyije na ba nyir’ubutaka bufite nomero 6507, 6505, n’ubufite nomero 881.

Nyuma yo gusohora icyangombwa cy’ubutaka, bigaragara ko bubaruye kuri Sebera Sylvere na Nyiransababera Xavera, kuri UPI 3/05/02/04/6508, ibyo bikanashimangirwa n’inyandiko y’umwanditsi w’inyandiko mpamo z’ubutaka ushinzwe Ifasi y’iyandikisha ry’ubutaka y’Iburengerazuba yasohotse ku wa 04 Nzeri 2023.

Iyo nyandiko igaragaza ko umubitsi w’inyandiko mpamo z’ubutaka mu Ifasi y’Iburengerazuba yemeje ko ubutaka bufite nomero 6508, bwo mu Kagari ka Karambo mu Murenge wa Gatumba ari ubwa Sebera Sylvere na Nyiransabaera Xavera, nk’uko byanditse mu bitabo by’iyandikisha rusange ry’ubutaka.

Mu mwaka wa 2017 Nyiransababera yapfushije umugabo we bashakanye bituma ari we usigara ari umuzungura, ari nayo mpamvu ubu ari we uri kwibaza ukuntu yaterejwe cyamunara atarigeze yaka inguzanyo.

Byagenze bite ngo aterezwe cyamunara?

Mu mwaka wa 2019 ni bwo nyiransababera yamenyeshejwe ko ubutaka bwe buri mu ngwate ya banki kubera inguzanyo yatswe n’umuhungu we, witwa Harerimana Medard.

Uwo Harerimana Medard bigaragara ko afite ubutaka bumubaruyeho ko ari ubwe 100% buhuje neza ibiranga ubutaka bwa nyina umubyara, Nyiransababera Xavera kuko nabwo bufite UPI 3/05/02/04/6508.

Nyiransababera avuga ko icyo cyangombwa cyatanzwe n’Akarere ka Ngororero mu buryo bunyuranyije n’amategeko kuko atumva ukuntu umuhungu we bahuza icyangombwa, kandi atarigeze amuha ubwo butaka kandi ko n’iyo abumuha hari kubaho ihererekanya imbere ya Noteri maze bukamwandukurwaho ariko ubutaka bukajya ku muhungu we. Ariko se bishoboka bite ko bombi bagira ibyangombwa bias kandi bifite UPI imwe?

Agira ati, “Njyewe ntabwo numva ukuntu ubutaka bwanjye bwanditswe ku muhungu wanjye no kuri jye kandi tukanahuza nomero ziburanga, byakabaye byaragaragaye ko bunyanditseho, bajya kumuha icya ngombwa bakabitahura kuko biba bigaragara”.
Nyiransababera avuga ko yigeze kubura icyangombwa cye cy’ubutaka, agakeka ko umuhungu we yaba yarakimwibye, maze atanga amatangazo kuri radio ko yakibuze ariko ntiyajya kwaka ikindi.

Hagati aho ariko umuhungu we Harerimana yahise nawe atanga amatangazo ko yabuze icyangombwa cye cy’ubutaka, maze ajya ku biro by’ubukataka bw’Akarere ka Ngororero bumuha icyangombwa cy’ubutaka bwa nyina mu mazina ya Harerimana, ari naho Nyiransababera asanga hari urujijo.

Aho yahoze atuye mbere yo guterezwa cyamunara mu manyanga

Agira ati, “Ni gute abashinzwe gutanga ibyangombwa bagendeye ku matangazo umuhungu wanjye yatanze, bakamwandikaho ubutaka bwanjye, bakamuha n’ibiburanga byanjye batabona ko bibeshye”?

Umuyobozi w’ishami ry’ibiro by’ubutaka mu Karere ka Ngororero Muberantwari Reverien, avuga ko kugira ngo Harerimana ahabwe icyangombwa, byaturutse ku kuba yarazanye amatangazo n’ibindi bisabwa ngo umuntu wataye icyangombwa ahabwe ikindi.

Avuga ko mu buryo bw’ikoranabuhanga bigaragara ko Nyiransababera afite ubutaka na Harerimana akagira ubundi ariko ntasobanura neza ukuntu ubwo butaka buhuje nomero y’iyandikisha kuko ari ho hatumye Harerimana ahabwa icyangombwa gisimbura icyo yavugaga ko cyatakaye.

Muberantwari avuga ko habayeho uburiganya mu gushaka icyo cyangombwa bityo ko Nyiransababera akwiye kurega umuhungu we mu bugenzacyaha, bugakurikirana uko Harerimana yabonye ibyangombwa bya nyina kugeza yiyandikishijeho ubutaka bwe.

Agira ati, “Kugeza ubu ubutaka bwanditse kuri Harerimana ni nawe waterejwe cyamunara ntabwo twamenya uko bwavuye kuri nyina bukamwandikwaho, ibyo byasuzumwa n’urwego rw’ubugenzacyaha RIB bazaze mbajyane kuri RIB batange ikirego kuko twebwe twatanze icyangombwa hakurikijwe ibimenyetso by’uwataye igisanzwe”.

Nyiransababera avuga ko yarenganye kuko yananyuze mu nkiko asaba gutesha agaciro icyo cyangombwa cyahawe umuhungu we kugira ngo batamutereza cyamunara, ariko birananirana kuko mu rukiko rw’ibanze rwa Gatumba n’urwisumbuye rwa Rubavu, zose zanzuye ko zidafite ububasha bwo gutesha agaciro ibyangombwa by’ubutaka.

Kugeza ubu Nyiransababera ari gusembera mu ihema rya shitingi mu baturanyi kuko yamaze gukurwa mu butaka bwe n’inzu yari atuyemo biragurishwa, akaba asaba inzego kumurenganura agasubirana ibye kuko yarenganyijwe n’abakamurenganuye. Kigalitoday yashatse umuhungu w’uyu mukecuru ngo imubaze uko yabonye ubu butaka ariko kugeza ubu ntawe uzi aho aherereye.

Inkuru bijyanye:

Intara n’Akarere byinjiye mu kibazo cy’umukecuru waterejwe cyamunara nta nguzanyo yatse

Umunyamabanga Nshingwabikorwa w’Umurenge wa Nyange, Niyihaba Thomas, aganira na Kigali Today, yagize ati:"Iyi mvura yaguye ahagana saa sita z’amanywa irimo umuyaga mwinshi, isakambura ibisenge by’ishuri ribanza rya EP Gaseke. Ibisenge bibiri by’amabati byagurutse bigwa ku mashuri ane yari asakaje amategura na yo arasenyuka. Nta muntu wakomeretse kuko abana batari bize".

Kimwe muri ibi byumba kigiragamo abo mu mwaka wa mbere, irindi ntabwo bigiragamo.

Niyihaba akomeza avuga ko mu byumba bitandatu(6) byangiritse, bibiri(2) byari iby’amabati n’ibindi bine(4) by’amategura.

Ubuyobozi bw’Umurenge bufatanyije n’umuyobozi w’ishuri ndetse na Pasiteri wa EPR Gaseke bagenzura iri shuri, batangaje ko kuri uyu wa Mbere abanyeshuri batazabura aho bigira kuko bazigira kuri Paruwasi Gaseke mu gihe bategereje ibikorwa byo gusana ibyangiritse.

Gitifu Niyihaba agira inama abaturage yo kuzirika ibisenge, gufata amazi yo ku mazu, gusibura imirwanyasuri ihari no kuyongera.

Ikigo cy’Igihugu cy’Ubumenyi bw’Ikirere, Meteo-Rwanda, kivuga ko mu gice cya kabiri cy’uku kwezi k’Ukwakira 2023 (kuva tariki ya 11 kugeza tariki ya 20), mu Rwanda hateganyijwe imvura irenze urugero rw’impuzandengo y’isanzwe igwa muri iki gihe.

Amakuru y’uko hari abagore batatu, umukobwa umwe n’umusore wo mu kigero cy’imyaka 20 basaga n’abataye ubwenge, yamenyekanye tariki 10 Ukwakira 2023, nyuma y’uko abaturanyi bavumbuye ko hari ababonye ko abo bantu batameze neza, kubera imiti bari bahawe n’uwababeshyaga kubafatira umujura.

Abahawe umuti babwiye abaganga ku bitaro bya Muhororo ko bawuhawe mu ijoro ryo ku wa 09 Ukwakira 2023, aho buri wese yahabwaga agakombe k’amazi karimo n’agafu gakoze mu bintu bitandukanye.

Uwaje kubavura rero yasabye abagize umuryango bose kunywa kuri uwo muri, ngo barebe uko umujura asa n’ibimubaho kugira ngo agarure ayo mafaranga, maze aho kubona umujura batangira gusinzira umwe umwe, cyane cyane uwo musore na mushiki we.

Umuyobozi mukuru w’Ibitaro bya Muhororo byakiriye abo bantu bikanabavura, Dr. William Namanya, avuga ko uwo muti banyweye ukoze mu byatsi gakondo, kandi ko bishoboka ko abavuzi gakondo bavanga ibyo byatsi bikavamo uburozi businziriza.

Agira ati, "Bageze ku bitaro wabonaga bavuga ibintu biterekeranye, ndetse ubu hari n’abatazi ukuntu bageze kwa muganga. Twasanze baranyweye imiti ica intege, umuntu agasinzira agakanguka avuga ibiterekeranye nk’uwataye ubwenge".

Dr. Namanya avuga ko batahita batahura ibintu byifashishijwe mu gukora ubwo burozi, kuko badafite ubushobozi bwo kubupima, ariko ko hafashwe ibizamini bizajya gusuzumirwa muri Laboratwari y’Igihugu ngo hamenyekane ibyari bibugize.

Agira ati "Byagaragaraga ko ibyo banyweye bifite uburozi buca intege, umuntu agata ubwenge. Twabahaye imiti yoza impyiko n’umwijima kuko ni zo nyama ziyungurura amaraso imyanda igaca mu nkari umuntu agakira. Ubu borohewe ndetse turabasezerera batahe".

Dr. Namanya avuga ko bazakomeza gusuzuma abo bantu ngo harebwe niba nta zindi ngaruka zabageraho bapimwa impyiko n’umwijima, kuko ari byo bishobora kuzahazwa n’ubwo burozi.

Dr. Namanya avuga ko bamaze kuzanzamuka bavuze uko byagenze, ari nabwo uwo musore wibwe, ngo yavuze ko yari amaze kwishyura uwo muvuzi amafaranga ibihumbi 200frw, mbere yo kubaha umuti waje kubasinziriza bagakanguka batakimubona ahubwo bacitse intege banataye ubwenge.

Avuga ko andi makuru yo gukurikirana uwo watanze ibyitwa umuti ukarembya abantu, bikomeza gukurikiranwa n’inzego z’umutekano kuko zatangiye iperereza.

Ubuyobozi bw’Umurenge wa Muhororo busaba abaturage kugana inzego z’ubuyobozi zikabakemurira ikibazo, aho kwishora mu byabagirira nabi birimo no kwivuza mu buryo butemewe n’amategeko.

Abaturage bababonye bazanwa mu ngobyi bakagezwa ku biro by’Umurenge wa Muhororo, bavuga ko bari bataye ubwenge ku buryo umwe muri bo bari bamuzirikiye mu ngobyi gakondo, kubera ko babonaga asa n’uwagize ikibazo cyo mu mutwe.

Umuturage wabonye abo bantu bazanwa ku Murenge wa Muhororo yavuze ko yabiboneye bahagera, abarembye ari babiri muri abo batanu, ariko ko abari babahetse bavuze ko byatewe n’umuti banyoye bahawe n’umuvuzi gakondo, mu gikorwa cyo gushakisha umuntu wabibye amafaranga.

Yagize ati, “Bahabagejeje mpari, umusore umwe bamuzirikiye mu ngobyi ya Kinyarwanda, undi mukecuru na we arembye, wabonaga mu mutwe wabo bitameze neza. Ngo bazanye umuganga gakondo ngo abahe umuti wo kuvumbura uwabibye amafaranga ibihumbi 350Frw, bamaze kuwunywa baba ari bo bata umutwe”.

Umunyamabanga Nshingwabikorwa w’Umurenge wa Muhororo, Barekayo JMV, avuga ko atiriwe ku biro by’Umurenge kuko yakoreye hanze yawo, ariko ko yamenye ko abo bantu bageze ku Murenge bazanywe ngo boherezwe ku bitaro bakurikiranwe.

Avuga ko ibyo kuba barozwe cyangwa banyoye imiti gakondo atabihamya, kuko byakwemezwa n’abaganga, ari na yo mpamvu bahise bahamagarizwa imbangukiragutabara ngo bajyanwe kwa muganga.

Agira ati “Ni abo mu Kagari ka Mubuga, ariko batwawe n’imbangukiragutabara, bahageze mu kanya gashize imvura igwa, turaza kubaza ibindi tumenye icyabaye. Ntabwo baje ku Murenge ahubwo bagiye ku kigo cy’ubuvuzi bw’ibanze, bahabwa icyemezo (transfer), yo kujyanwa ku bitaro bya Muhororo, ntabwo twamenya niba banyweye iyo miti kuko na bo bararwaye ntacyo batubwira”.

Uyu Munyamabanga Nshingwabikorwa w’Umurenge wa Muhororo, Barekayo JMV, yasabye abaturage kutihutira kwivurisha imiti gakondo ahubwo ababwira ko bakwiye kujya bagana inzego z’ubuvuzi zikabafasha, naho ku byo kuraguza bashaka gufata umujura, akabasaba kutabyishoramo kuko hari inzego zabugenewe zikurikirana ibyaha.

Yagize ati, “Imiti gakondo ntabwo ari yo yafasha abaturage gufata abajura kuko hariho uburyo bwizewe bwo gukurikirana ibyaha hatanzwe ibirego mu bugenzacyaha, n’izindi nzego z’ubuyobozi. Kwirukira mu bavuzi gakondo ntabwo ari byo twabagiraho inama kuko hari inzego zizewe zibishinzwe”.

Kigali Today yavuganye n’umuyobozi mukuru w’ibitaro bya Muhororo, atangaza ko mu mugoroba wo ku wa Kabiri tariki 10 Ukwakira 2023 aribwo barimo bakira abo bantu.

Inkuru bijyanye:

Ngororero: Yabahaye umuti ubasinziriza ababeshya kubagaruriza amafaranga

Abaturage bavuga ko hashize imyaka hafi itatu batarishyurwa kandi ibyabo byarangijwe

Abo baturage bavuga ko mu 2021 ari bwo babonye abiyita abakozi b’ishami rishinzwe ingufu z’amashanyarazi, REG, baza kubarura imitungo yabo, irimo ibiti byera imbuto ziribwa, amashayamba n’ibindi bihingwa, ariko bakaba barategereje kwishyurwa bagaheba.

Umukecuru wo mu Kagari ka Rugogwe avuga ko ibye byangijwe birimo ibiti by’imbuto ziribwa n’ibisanzwe, ndetse n’urutoki.

Agira ati “Twaravuganye baratubwira ngo bazatwishyura, nasinyiye ibihumbi 440Frw hashize imyaka hafi itatu. Turifuza ko batwishyura ayo mafaranga kuko ni indishyi y’ibyacu byangijwe, kuko ubuyobozi ntacyo buri kudufasha, ingaruka zihari ni uko duhora ku cyizere, ariko ntacyo tubona”.

Shiramanyama Evariste wangirijwe urutoki, avuga ko bamaze kumubarurira ubwa mbere bakamwizeza amafaranga, bakongera kugaruka bakabarura kandi yatanze ibisabwa byose, ariko iyo akurikiranye ubuyobozi bubabwira gukomeza kwihangana.

Agira ati “Ingaruka ni ubukene kuko ibyari bintunze barabyangije, imbuto ziribwa n’urutoki rwari runtunze rwarangijwe, bari bambaruriye ibihumbi 500Frw bongeye kugaruka bambarira ibihumbi 900Frw”.

Mukabambari Dative wangirijwe ibihingwa birimo n’ibishyimbo, we avuga ko bakomeje kubaza mu buyobozi bukababwira ko amafaranga yabo bazayahabwa ariko akaba yarahebye, akaba yugarijwe n’inzara.

Agira ati “Avoka nararyaga nkagurisha nkabonamo amakayi y’abana, none ubu ntayo nkibona, twaheze mu gihirahiro twayobewe aho tugana bari bambariye asaga ibihumbi 600Frw”.

Ku kijyanye n’abaturage bavuga ko bangirijwe ibyabo ariko batarabaruriwe, abahawe ikiraka cyo kubarurira imitungo abo baturage, batagaragaza neza aho dosiye zabo zigeze zikurikiranwa, bavuga ko hari abaturage babaruriwe koko n’abatarabariwe imitungo yabo, dore ko uwari watangiye kubababrira atari we wakomeje ako kazi.

Umuyobozi w’Akarere ka Ngororero Nkusi Christophe, avuga ko abo baturage bari mu babaruriwe imitungo kandi ko hari abo mu Mirenge ya Hindiro, Muhororo na Ngororero, batangiye kwishyurwa.

Agira ati “Navuganye n’uhagarariye REG ambwira ko hari abatangiye kwishyurwa, niba baratanze ibisabwa bakwiye kuza ku Karere tukareba ku rutonde rw’abagomba kwishyurwa, niba bariho cyangwa barishyuwe ntibabimenye”.

Abaturage babaruriwe bavuga ko batazi aho ibyabo bigeze bikurikiranwa

Ku kijyanye no kuba hari abaturage basaba kwishyurwa ariko imitungo yabo itarabaruwe, Nkusi avuga ko bazitabaza umugenagaciro wa REG, nabo bakabona ingurane y’imtungo yabo kuko uko byamera kose abangirijwe bagomba kwishyurwa.

Nkusi avuga ko kuba umuturage yangirizwa imitungo hagashira imyaka hafi itatu batishyuwe, biterwa n’impamvu zimwe zirimo kwihutisha ibikorwa remezo, no gusuzuma ibyabaruwe n’uburyo bizishyurwa.

Agira ati “Kuba bitinda biterwa no kubabarira no kugena amafaranga y’ingurane ikwiye, turaza gukurikirana kugira ngo abangirijwe imitungo bishyurwe amafaranga yabo abashe kubakemurira ibibazo”.

Ibibazo by’ingurane ikwiye bikunze guteza ikibazo ku isosiyeti ya REG, mu gutinda kwishyura abaturage ugasanga ubuyobozi butarabasha gufasha abaturage kubahiriza itegeko rigena kwangiza ibintu by’undi ku nyungu rusange abanje kubyishyurwa.

Musenyeri Anaclet Mwumvaneza ni we watuye igitambo cya Misa

Yabitangarije mu birori byo kwizihiza Yubile y’imyaka 75, Paruwasi Muhororo imaze ivutse, aho yavuze ko guhimbaza Yubile ari ugusana ibyangijwe, gusubiza abantu uburenganzira n’agaciro bambuwe, kugira umutima w’impuhwe kandi uharanira ubutabera.

Agira ati "Yubile ni igihe cyo kunoza umubano wacu no kubana n’Imana, kuko guhimbaza Yubile atari ibirori byo kwishimisha gusa ahubwo ari ukuzirikana Imana n’urukundo rwayo".

Musenyeri Mwumvaneza avuga ko Paruwasi Muhororo yabayeho ngo imenyeshe inkuru nziza mu gace iherereyemo, kuko ari nk’isoko abantu bavomaho bagashira inyota.

Agira ati "Iyi Yubile itubere inzira yo kwiyunga n’abavandimwe bacu twahemukiye, isige tunogeje umubano wacu n’abavandimwe mu kubaka ingo nziza zizira amakimbirane, hagati y’abashakanye, ikibatsi cyo kubaka imiryango myiza, kongera ibikorwa by’urukundo n’impuhwe kugira ngo dufashanye kuzamuka neza kuri Roho no ku mubiri".

Bakase umutsima w’isabukuru

Asaba ko Paruwasi yababera inzira y’urukundo ku buryo nibura urimo undi ideni ryakabaye gusa iry’urukundo, kandi ko imyaka 75 ihagije ngo abantu bemenye ukuri n’uko bitwararika.

Avuga ko Yubile y’imyaka 75 ikwiye kubera ishimwe, abatangije Paruwasi barimo abapadiri bera ndetse n’ababakurikiye.

Abakirisitu ba Paruwasi Muhororo bifuje ko kubera ko Paruwasi ya Muhororo ari nini, bakongererwa umusaseridoti, kandi basaba ko Santarali ya Rusebeya, yagirwa Paruwasi kugira ngo abakirisitu bakomeze kwegerezwa iyogezabutumwa badakoze ingendo ndende.

Padiri mukuru wa Paruwasi Muhororo, Ufitimana Temistocles, avuga ko mu rwego rwo gukomeza kubaka ubumwe bw’Abakirisitu, bazakomeza kwagura ibikorwa by’iterambere bibahuriza hamwe, kandi bakomeze kwigisha abakirisitu ibyiza byo kubana neza n’isano iri hagati y’imibanire myiza n’ubukirisitu.

Abakirisitu bavuye hirya no hino bitabiriye

Paruwasi Muhororo yizihije imyaka 75 imaze ishinzwe ikaba yaratangiranye n’abapadiri bera, yubatswe mu 1948 aho yatangingiranye abakirisutu babarirwa mu 2000, ubu ikaba ibarirwa mu bagera mu bihumbi 80.

Biteganyijwe ko santarari ya Rusebeya izagirwa Paruwasi, igihe abakirisitu bakomeza gufashanya hakubakwa inzu y’icumbi ry’abapadiri, kuko ubu ari bo barebwa n’icyo gikorwa kuko Kiliziya Gatolika ngo nta handi yakura ubwo bushobozi.

Muri iyi Yubile kandi hanafunguwe ku mugaragaro icumbi ry’abapadiri, ryavuguruwe ritwaye amafarnga asaga Miliyoni 60Frw.

Baririmbye indirimba irata Muhororo

Abayobozi bari bitabiriye barimo n’inzego z’umutekano

Abahinzi barifuza imashini zuhira

Abo bahinzi bavuga ko ubundi iyo imvura igwa neza babona umusaruro uhagije, ariko iyo izuba rivuye nta bundi buryo birwanishaho ngo barengere imyaka yabo itaruma.

Vedaste Nturanyenabo wo mu Kagari ka Gaseke, avuga ko biteguye ku gihe gutera imbuto y’ibigori, ku buryo ubwo imvura yabonetse kare bizeye kuzabona umusaruro uhagije, ariko akifuza ko babona imashini zo kuhira ku buryo izuba ritunguranye babona uko buhira ntibazahombe.

Agira ati “Ikirere nicyo kitugenera umusaruro, iyo imvura itadutengishye tureza, izuba iyo rivuye turarumbya, turifuza ko Leta itwegereza izo mashini kuko twitegute natwe gutanga uruhare rwacu mu kuzishyura”.

Mukeshimana Horeste wo mu Kagari ka Bambiro, avuga ko hakenewe ubwishingizi bwo kuhira imyaka igihe izuba ryabaye ryinshi, kuko igihe cy’izuba igishanga cya Songa bahingamo cyumagara bakarumbya.

Agira ati “Mu gihembwe cya 2023A twararumbije kubera kubura imvura, izuba ryatumye duhomba uwaduha imashini zivomera byazajya bidufasha”.

Igishanga cya Songa cyitezweho kwera toni 120 z’ibigori muri iki gihembwe cya 2024A

Umubyeyi Julienne avuga ko umwaka ushize barumbije kubera izuba ryabaye ryinshi ibigori ntibyera neza, akifuza ko babona izo mashini zivomera kuko nko mu gihembwe gishize, imboga bahinzemo zabuze amazi ntizitange umusaruro.

Agira ati “Imvura yagiye mbere ibigori byacu birarumba, ariko si no ku bigori gusa n’indi myaka mu bindi bihembwe iba ikeneye kuhirwa kuko igishanga gifite amazi”.

Giverineri w’Intara y’Iburengerazuba, Dr. Dushimimana Lambert, avuga ko bifuza ko abaturage bihaza mu biribwa, ibyo bigakorwa ari uko ahantu hose bagenewe guhingwa hadasigara ubutaka budahinze, kandi ko abayobozi n’izindi nzego zishinzwe ubuhinzi zikurikirana inshingano zazo.

Guverineri Dushimimana avuga ko ikibazo kigihari ari uko abantu biyita abahinzi kandi bagasagura ubutaka bwinshi budahinze, bigatuma umusaruro uba muke, kuba hari abantu badakoresha amafumbire n’imbuto y’indobanure, agasaba ko habaho gukurikirana ibihingwa.

Agira ati “Turifuza ko umuhinzi akurikirana igihingwa n’ubuzima bwacyo, kujya mu bwishingizi bw’ibihingwa kugira ngo nibiramuka bitagenze neza bagobokwe n’ubwo bwishingizi”.

Ku kijyanye no kubona imashini zuhira, Guverineri Dushimimana avuga ko hagiye gukora ikurikiranabikorwa mu buhinzi, kugira ngo babone izo mashini bityo imbaraga ziri gushyirwa mu buhinzi zidapfa ubusa.

Guverineri Dushimimana atangiza igihembwe cy’ihinga mu Murenge wa Nyange

Agira ati “Byaba bibabaje kuba duhinze igishanga nk’iki tukajyanamo n’abaturage imyaka yabo ikaza gupfa kubera ko babuze uko buhira, turakurikirana buri gikorwa cyose mu Turere n’Imirenge kugira ngo igihe cyose izuba ryaza hatagira umuhinzi uhomba kandi duhari”.

Mu gihanga cya Songa mu Murenge wa Nyange, hateganyijwe guhingwa hegitari 30 ziteyeho ibigori, ahitezwe nibura toni 120 muri iki gihembwe cy’ihinga 2024A.

Iryo shuri ribanza ryitwa Gatikabisi, ni iryo mu Mudugudu wa Nyenyeri, Akagari ka Matare Umurenge wa Matyazo mu Karere ka Ngororero, aho ibyumba bibiri by’amashuri bigaragara ko bikomeje kwangirika.

Abo babyeyi bavuga ko bagejeje iki kibazo kuri Kigali Today, mu rwego rw’ubuvugizi nyuma y’uko ngo bakigejeje ku buyobozi, bubima amatwi.

Ibyo ngo bikaba bikomeje kugira ingaruka ku myigire y’abana biga bacucitse, nyuma y’uko abigiraga muri ayo mashuri yasambutse babagabanyirije mu yandi.

Bamwe mu baturiye iryo shuri n’abaharerera, baremeza ko birengagijwe mu buryo bukabije, bakaba basaba Leta ubufasha bagasakarirwa iryo shuri bavuga ko ryari ribafitiye akamaro.

Umwe muri bo yagize ati “Aya mashuri amaze imyaka itanu asambuwe n’imvura, twaratekereje tuti ese abayobozi ko bahagera ikigo kikaba kizwi mu rwego rw’Igihugu, bakaba bazi uburyo abana biga babyigana mu mashuri kandi bibujijwe, bakatwizeza ko bazayasakara tukaba twararambiwe, tukibaza tuti ese twatutse Imana, ese twaribagiranye mu rwego rw’Igihugu, byagenze bite?”.

Arongera ati “Abana bamwe bagiye mu bindi bigo aho biga bakora ingendo ndende, abandi bongerwa mu byumba aho biga bacucitse, icyo ni igihombo gikomeye twagize, twaratereranwe rwose wagira ngo turi inyuma y’Igihugu, nta n’amashanyarazi ahari abandi bana bigira kuri computer, twe ni ibibazo”.

Undi muturage ati “Umuntu agira ibiza Leta ikamwegera ikamufasha, none n’iri shuri ko ari irya Leta, rikaba iry’abaturage ni gute ryamara imyaka igera muri itanu ridasakarwa, ni ishuri ryari rikomeye ryubakishije amatafari ahiye, ariko ntibashaka kurisakara, abana biga bacucitse mu buryo buteye ubwoba, abandi bakigira mu rusengero Abaporoso badutije, ibi ni ibiki koko?”

Arongera ati “Ni gute abayobozi barebera ishuri rikangirika abana bakiga babyigana? Hakagombye gusakarwa, abana ntacyo bakura mu masomo mu gihe biga bacucitse, Leta nidufashe ikurikirane iki kibazo, abana batangire amashuri yasakawe”.

Ubuyobozi bw’Akarere ngo ntibuzi icyo kibazo

Mu gushaka kumenya icyo Ubuyobozi bw’Akarere ka Ngororero buvuga kuri icyo kibazo, ku murongo wa Telefoni, Kigali Today yaganiriye n’Umuyobozi w’Akarere wungirije Ushinzwe imibereho myiza y’abaturage, Mukunduhirwe Benjamine, avuga ko atari afite amakuru kuri icyo kibazo.

Ati “Ko nta makuru mfite? ishuri se ryarasambutse ku buryo abana batabona aho bigira? Ni byo koko hari ibigo birimo na Gatikabisi bifite ibyumba bishaje, ariko abana bafite aho bigira, muri gahunda ya Leta yo kugenda dusimbura ibyumba by’amashuri bishaje, na ho hari muri gahunda y’aho tuzagenda twubaka uko ubushobozi bugenda buboneka”.

Arongera ati “Ariko kugeza ubu abana ba Gatikabisi bafite aho bigira, n’ubwo tubizi ko hakenewe ibindi byumba, ariko hari ikibazo gishyashya nagikurikirana iby’uko hari ibyumba byasambutse ndumva ntabizi, gusa amakuru mfite ni uko hari ibyumba bishaje nk’ahandi hose turi kugenda dusimbuza buhoro buhoro, aho tugenda duhera ahari ikibazo cy’ubucucike”.

Bakoze urugedo rwo gukangurira abaturage kurwanya ihungabana

Ni ubukangurambaga bwibanda ku gusobanurira abaturage ubwoko bw’ihungabana n’ibimenyetso byaryo, uko ryakwirindwa n’uko hacika uruhererekane rw’ihungabana mu Banyarwanda.

Umutesi Grace utuye mu Murenge wa Gatumba avuga ko yahawe amahugurwa ku kurwanya ihungabana rikunze kwibasira abatuye umuryango, aho agaragaza ko bimwe mu bitera ihungabana harimo ibihombo ku mishinga ibyara inyungu, kubura abagize umuryango wawe, no kumva amakuru yabaye ku bandi cyangwa wabonye ntushobore kugira ubushobozi bwo kubyakira.

Avuga ko bimwe abona bitera ihungabana mu miryango aho atuye, ari ikibazo cy’amakimbirane mu miryango, kuko nk’abana bata imiryango yabo bakajya mu biyobyabwenge n’ubuzererezi bitewe no kuba nta mutekano bafite iwabo.

Agira ati “Abana bata ingo kuko babona iwabo batumvikana, naho abagabo bakicana n’abagore babo kuko bananiwe kugira ibyo bumvikanaho, akaba asanga imbaraga zishyizwe mu kurwanya amakimbirane mu miryango, byaba igisubizo ku kurwanya ihungabana ry’abana”.

Uwimana Célestin wakoze Jenoside yakorewe Abatutsi, na we yahawe amahugurwa ku kurwanya ihungabana, aho yigishijwe uburyo bwo kubana n’abo yahemukiye kugira ngo abashe kubana n’abo yakoreye icyaha.

Abamotari bakorera mu Murenge wa Gatumba na bo bitabiriye ubukangurambaga

Avuga ko ihungabana yari afite agifungurwa ryagiye rishira gahoro gahoro, kuko iyo yahuraga n’uwo yahemukiye yumvaga afite ubwoba bw’uko uwo yahemukiye azihorera, dore ko wasangaga n’imbaraga zo gukora ntazo afite.

Agira ati “Naje gukira ihungabana binyuze mu guhura n’abo nahemukiye tugasangira tukabwirana neza, umwe akajya agenderera undi ni uko byagiye biza, naho ubundi ntaha nari nzi ko ntazabana na bo bazihorera, ariko twasanze abo twakoreye ibyaha biteguye kutwakira”.

Ahamya ko abakoze Jenoside n’abo bayikoreye babanye neza nta rwikekwe, dore ko bagenderana n’imiryango yabo n’abana bakabana neza, akaba asaba abagize uruhare muri Jenoside yakorewe Abatutsi, kurushaho kwirinda ibyatuma abakorewe Jenoside bahungabana kandi baratanze imbabazi.

Umuhuzabikorwa w’umushinga ushinzwe kubaka amahoro, isanamitima n’Ubwiyunge (PHARP), Julienne Mukansanga, avuga ko kugira ngo Abanyarwanda bagire ubudaheranwa bisaba kuba bafite amahoro muri bo, bigatuma ibikomere bafite bikira.

Mukansanga avuga ko kugira ubwubahane mu muryango ari umuti wo kurwanya amakimbirane no kwirinda ibyangiza ubuzima bwo mu mutwe

Avuga ko mu mushinga wa Minisiteri y’Ubumwe bw’Abanyarwanda (MINUBUMWE), basanze mu Karere ka Ngororero mu Murenge wa Gatumba harabereye Jenoside ndengakamere, bigateza ibikomere bikomeye bituma bakenera kwitabwaho kurusha abandi.

Ibyo byatumye bahugura abahoze mu ngabo, urubyiruko, abakoze Jenoside n’abayikorewe kugira ngo basobanukirwe n’ibikomere bafite, barusheho kwegerana no gusangira amakuru, ndetse bahugurwe ku isananamitima no ku kubaka amahoro kugira ngo barwanye urwikekwe, bityo bakore biteze imbere.

Agira ati “Abanyarwanda bakwiye kumenya ko ihungabana rihari, kandi barifite. Turifuza ko Abanyarwanda barushaho kugira imiryango izira amakimbirane kuko abana nibabona urukundo mu muryango, ubwubahane n’ubufatanye mu miryango, bizatuma abana bagira indangagaciro kandi bazikurane”.

Umuyobozi w’Akarere ka Ngororero Wungirije Ushinzwe Imibereho myiza y’Abaturage, Mukunduhirwe Benjamine, avuga ko kwita ku buzima bwo mu mutwe birimo kurwanya ibiyobyabwenge no kubaka umuryango utekanye.

Mukunduhirwe Benjamine avuga ko umuryango utekanye ufasha kurinda ubuzima bwo mu mutwe

Avuga ko bimwe mu bibangamiye ubuzima bwo mu mutwe harimo ihungabana ry’abagizweho ingaruka na Jenoside yakorewe Abatutsi, kwishora mu biyobyabwenge bityo ko hakenewe guhagarika urwo ruhererekane rw’ingaruka z’ubuzima bwo mu mutwe.

Agira ati, “Umuti wo kurwanya ihungabana ni ukumenya ko urifite akwiye kurigaragaza kuko iyo rihari ukariceceka, bituma rikura agaheranwa n’agahinda bikaba byamuviramo ikibazo gikomeye kirimo no kwiyahura”.

Avuga ko ku bigo nderabuzima hashyizwe abakozi bashinzwe kurwanya ihungabana, ku buryo abantu bitabiriye kugana abajyanama mu buzima bwo mu mutwe, byarushaho gutanga umuti ukenewe.

Bamwe mu bayobozi bitabiriye ubukungurambaga ku buzima bwo mu mutwe

Ubukangurambaga bwitabiriwe n’abantu bari mu ngeri zitandukanye

Umunyamabanga Nshingwabikorwa w’Umurenge wa Nyange mu Karere ka Ngororero, Niyihaba Thomas, avuga ko kwizihiza isabukuru y’abana bibashimisha ubwabo kuko bahakura amasomo menshi.

Ati:"Kuvuka ni kimwe, kwizihiza uwo munsi bikaba ikindi. Imiryango myinshi cyane cyane mu cyaro ntiyita ku kwizihiza ibyo birori kandi nyamara biri mu bishimisha abana kuko bibaha imbaraga zo gukurana intego n’ubutwari, bakamenya ko bakuze bagahindura imitekerereze, imikorere, icyerekezo bitewe n’imyaka umwana aba afite".

Abizihirijwe isabukuru ni abana bagera kuri 350, aho bateguriwe ibikorwa bitandukanye bibafasha kwizihiza ibyo birori nk’uko byemejwe na Nsanzimana Froduard, umukozi muri uyu mushinga mu Karere ka Ngororero.

Ati:"Iki gikorwa ni ngarukamwaka mu bice bitandukanye dukoreramo. Dukata umutsima(cake) abana bakagaburirwa, bagahabwa umutobe(Juice) n’ibisuguti (Biscuits) ndetse nyuma yaho tukabagezaho n’ibindi bikorwa bibafasha mu buzima bwa buri munsi".

Nsanzimana akomeza avuga ko ibyo bikorwa bakorera abana mu kwizihiza isabukuru y’amavuko aho bahuriza abana hamwe bagakata cake, bibereka ko bakunzwe kandi bitaweho mu muryango Nyarwanda cyane ko usanga batabikorerwa mu miryango baturukamo.

World Vision isanzwe ari umufatanyabikorwa wa Leta aho ikorera mu bice bitandukanye by’igihugu mu kubaka ibikorwa remezo nk’imisarani, gufasha abana kwiga bahabwa ibikoresho n’amafaranga y’ishuri, kwigisha abaturage ibikorwa by’isuku n’ibindi.

Gitifu Niyihaba avuga ko World Vision ari umuryango ufatanya cyane n’uyu murenge ayoboye kuko iyo bahurije abana hamwe gutya bitagarukira ku kwishimira imyaka runaka baba bagize, ahubwo hari n’ibindi babafasha. Ati:"ibi bifasha abana kubagarurira icyizere aho bahabwa inyigisho zibakangurira kwirinda ihohoterwa ribakorerwa, gusobanurirwa inshingano zabo hagendewe ku myaka bafite zirimo gukurikirana amasomo yabo neza, kubasobanurira uburenganzira bwabo, kubashishikariza umurimo ndetse n’ishuri muri rusange".

Akomeza agira ati: "Ku murenge wacu ubufatanye n’uyu muryango bisobanuye urugendo ndetse n’iterambere rirambye kuko kugira umufatanyabikorwa mu kubaka umwana ni ukubaka igihugu cya none n’ejo hazaza kandi Nyange ikeneye abantu b’ejo bashoboye kandi bashobotse basobanukiwe akamaro ko kwigira no kubaka igihugu".

Muri iki gikorwa haganiriwe kuri gahunda zo guteganyiriza umwana muri Ejo Heza kugira ngo atazasaza asabiriza ndetse n’ibindi by’ingenzi mu iterambere ry’umwana birimo ko umwana agomba kwishyurirwa ubwiteganyirize mu kwivuza (MUSA), abana bagomba kwibumbira mu matsinda yo kuzigama, abana bagomba kugira Umutekano, ndetse bakarindwa imirimo mibi n’ihohoterwa ribakorerwa.

Umuhanda uzatwara amafaranga y’u Rwanda abarirwa muri Miliyari esheshatu

Ni umuhanda ku ikubitiro ugiye kubakwa igice cya mbere kireshya na kilometero 16,6 naho icya kabiri, kikazakorwaho kilometero 30 wose ukaba kilometero 46.6 unyuze mu dusantere dutandukanye tugize Imirenge ya Gatumba, Bwira, Muhororo na Nyange.

Umunyambanga Nshingwabikorwa w’Umurenge wa Gatumba, Soline Mukamana, asobanura ko kugeza umurwayi ku bitaro bya Muhororo byari bigoranye ku buryo yashoboraga no kuhagera yazahaye cyangwa akaba yanaburira ubuzima mu nzira, ariko icyo kibazo kikaba kigiye gukemura.

Umunyambanga Nshingwabikorwa w’Umurenge wa Gatumba, Soline Mukamana, avuga ko umuhanda uzafasha abaturage mu buhahiranire

Agira ati “Imbangukiragutaraba yagezaga umurwayi hano yarushijeho kuzahara kubera umuhanda mubi cyangwa umubyeyi akaba yagira ikibazo. Uyu muhanda rero uzadufasha guhahirana no kugenderana abaturage banezerwe”.

Ibyishimo afite ni na byo abaturage bashaka serivisi z’ibitaro bya Muhororo baturutse mu Mirenge ya Bwira na Ndaro, ndetse na Gatumba bafite, bagashimira ubuyobozi bugiye kububakira umuhanda.

Umuyobozi w’Akarere ka Ngororero, Nkusi Christophe, atangiza kubaka umuhanda

Nyirigira Jean Damascene avuga ko kubona ibikorwa remezo bibasanga bibaha icyizere cyo gukora bakiteza imbere kuko baba babona ibibafasha mu buzima bibegereye, ndetse bikabafasha gutuza.

Agira ati “Iyo ibikorwa remezo bije bidusanga twumva turuhutse tukagira icyizere. Nk’ubu uyu muhanda uzaturuhura cya gihe twatakazaga duhetse abarwayi tugikoremo ibindi bikorwa. Turashimira Leta yadutekerejeho ngo wubakwe”.

Nyiramvuriye Fronille avuga ko bitari byoroshye ngo umuturage abone ukuntu atega imodoka aza kwivuza ku bitaro bya Muhororo, none bakaba babonye umuhanda kandi bazanasaba akazi mu kubaka uwo muhanda.

Nkusi avuga ko abaturage bazagirwaho ingaruka no gukora umuhanda bazishyurwa bidatinze

Agira ati “Abana bacu bari baratangiye kwigira mu bujura kubera ubukene none tugiye kubona umuhanda tunakorere amafaranga”.

Muneza Robert waherukaga gukorera impanuka mu Muhanda wa Bwira-Gatumba avuga ko n’ubwo we yamugajwe n’impanuka, abandi batazongera guhura n’imbogamizi zaturukaga ku muhanda mubi.

Agira ati “Iyo imvura yabaga yaguye ubwo ni ugusubika urugendo. Njyewe naravunitse ariko abandi bagiye koroherwa n’ingendo. Turashimira abayobozi bakomeje kudutekerezaho”.

Umuhanda witezweho koroshya imigenderanire yari igoye

Amashyirahamwe y’abahetsi bagizwe n’abasore n’abagabo b’imbaraga, ni bo bahoraga biteguye kujya mu mujishi igihe umubyeyi akeneye kugezwa ku bitaro bya Muhororo, haba mu ijoro cyangwa ku manywa nta yandi mahitamo yabaga ahari usibye gushyira umurwayi mu ngobyi bagakora urugendo rutari ruto ngo barengere ubuzima bw’umurwayi.

N’ubwo uwo muhanda uzaba wubatse utarimo Kaburimbo, abatsindiye isoko ryo kuwukora bavuga ko uzaba ukomeye kuko bamenyereye kubaka imihanda yo mu misozi, bakizeza abaturage kubabanira neza no gukorana aho bafitanye ikibazo kikaba cyakemuka.

Abashinzwe gukora umuhanda baganira n’abaturage uko bazishyurwa ibyabo bizangizwa

Umusaruro w’ingano uragenda wiyongera

Abo baturage bahinga ibihingwa bitandukanye birimo ibirayi, ingano, ibigori n’ibishyimbo bahuje ubutaka bavuga ko mbere bahingaga imvura yagwa ubutaka bwose bukamanukana n’isuri ariko ubu ifumbire iguma mu murima bahinga bagasarura neza.

Umwaka ushize w’ingengo y’imari, Akarere ka Ngororero kaciye amaterasi ndinganire ku buso bugera hafi kuri hegitari 500, n’imirwanyasuri ku buso busaga hegitari 650, bikaba byarafashije kurwanya isuri no kurumbura ubutaka.

Basigariyekubona avuga ko kurwanya isuri byatumye ubu beza ibigori

Basigariyekubona Celestin avuga ko mbere uwahingaga nta murwanyasuri, yatahiraga aho mu gihe cy’isarura, ariko ubu hari impinduka zigaragara.

Agira ati “Amaterasi ni meza kuko ubu ifumbire iraguma mu butaka, turahingaho ubwatsi tugaburira amatungo yacu, n’iyo waba uragiriye mugenzi wawe, itungo ntirikicwa n’inzara kandi byose twabikorewe ku buntu”.

Nzeyimana Saidi wo mu Murenge wa Kabaya avuga ko bahinga ingano ku buso bwa hegitari 16 zaciweho amaterasi ku butaka buhuje, bikaba byaratumye bigishwa uko barumbura ubutaka bakabona umusaruro mwiza.

Nzeyimana avuga ko bazeza toni zisaga 16 kuri hegitari umunani zihinzeho ingano

Agira ati “Ubu turashyiramo imborera, imvaruganda n’ishwagara, duhinga kijyambere ku mirongo ku buryo ubu guhuza ubutaka byatumye tubona umusaruro mwiza twumva nta kibazo, ubu turateganya kuzasarura toni 16”.

Ubuyobozi bw’Akarere ka Ngororero butangaza ko uko abaturage bagenda bahindura imyumvire mu guhinga kijyambere ku butaka buhuje ari nako bagenda babona amasoko, kuko nko ku gihingwa cy’ingano, ubu bafite isoko rya RAB, ndetse hakaba hari no kunozwa isoko ry’uruganda rwa BRALIRWA.

Umuyobozi w’Akarere ka Ngororero ushinzwe Iterambere ry’Ubukungu, Patrick Uwihoreye, avuga ko bari batekereje kuba bakwishingira uruganda rutunganya ingano, ariko bakaza kubona umukiriya bigatuma baba babisubitse.

Ubuso buhujweho ingano buzongerwa kugera kuri hegitari ibihumbi bitandatu

Agira ati “Twariho duteganya kubaka uruganda ruciriritse rwatunganya ingano, ariko ubu dufite umukiriya uzikeneye ku buryo tutahita tubona izo dutunganya n’izo tumugurisha, ahubwo turi gushishikariza abahinzi kwitegura kumwakira kuko ni ingano zizajya zifashishwa mu kwenga inzoga muri BRALIRWA.

Avuga ko ku musaruro w’ingano bageze kuri hegitari ibihumbi bitatu, ariko bakaba bagiye gutunganya izindi ibihumbi bitatu zose hamwe zikaba bitandatu ku buryo zizahaza iryo soko.

Kurwanya isuri biri gukorwa ku buso bwa hegitari hafi 650

Serge Brammertz na Aimable Havugiyaremye, basobanuriwe ubutwari bw’abana b’i Nyange

Serge Brammertz avuga ko mu byumweru bibiri biri imbere bazasura Afurika y’Epfo, bagiye gutegura ibikenewe kugira ngo Kayishema avanwe muri icyo gihugu yafatiwemo ajyanwe i Arusha muri Tanzania, aho azava azanwa mu Rwanda, ngo akurikiranweho ibyaha bya Jenoside akekwaho.

Mu ruzinduko yagiriye ku rwibutso rwa Jenoside yakorewe Abatutsi rwa Nyange, Umushinjacyaha Brammertz, yavuze ko ari byiza kwigerera ahabereye icyaha ngo ubushinjacyaha burusheho gucukumbura ibimenyetso, no kuganira n’abarokotse Jenoside kuko ari bo bakeneye ubutabera.

Yabemereye ko nyuma yo gufata Kayishema, ubu arimo kuburana ku byaha byo gukoresha inyandiko mpimbano muri Afurika y’Epfo, nyuma akaba azoherezwa i Aruhsa kuko yashakishwaga n’ubushinjacyaha bwa IRMCT.

Agira ati “Hari ibirimo gukorwa muri Afurika y’Epfo kuko ubu arimo gukurikiranwa n’ubushinjacyaha bw’icyo gihugu, kubera ibyaha byo gukoresha inyandiko mpimbano zirimo ibya ngombwa by’inzira n’ibimuranga, agamije gushaka ubuhungiro muri Afurika y’Epfo, ubwo nibyo yabanje gukurikiranwaho.”

Umushinjacyaha Mukuru, Havugiyaremye avuga ko ibimenyetso bya IRMCT bizazanwa mu Rwanda ngo byunganire mu birego Kayishema ashinjwa

Ati “Ubwo natwe twiteguye guhita dukorana na Afurika y’Epho mu kumwohereza i Arusha muri Tanzania, akabona gukorerwa dosiye imuzana i Kigali. Icy’ingenzi rero ni uko yafashwe, naho igihe azazira byo ni mu mezi make yaba angahe, ariko ni igihe gito kandi nizeye ko inzego z’ubuyobozi za Afurika y’Epfo zizadufasha kugira ngo mu minsi mike, abe yagejejwe mu Rwanda”.

Umushinjacyaha mukuru w’u Rwanda, Aimable Havugiyaremye, avuga ko hazakomeza kubaho ubufatanye mu gushakisha ibimenyetso bishinja Kayishema Fulgence, dore ko hari ibyo Ubushinjacyaha bw’u Rwanda bufite, ariko hakaba hazabaho no gutanga ibimentetso bifitwe n’ubushinjacyaha bwa IRMCT.

Agira ati “Imikoranire myiza isanzweho kuko hari ibimenteso bafite natwe hari ibyo dufite, tuzabihuza n’iby’ubushinjacyaha bwa IRMCT, kuko twebwe ibya Kayishema ibyinshi turabifite, byose bizagenda neza”.

Ku kijyanye no kuba abarokotse Jenoside yakorewe Abatutsi bifuza ko Kayishema yazaburanishirizwa aho yakoreye icyaha, avuga ko hazakurikizwa ibiteganywa n’amategeko kugira ngo abakeneye ubutabera babuhabwe, kandi n’ukurikiranyweho icyaha ahabwe uburenganzira bwe.

Yanditse mu gitabo cy’abashyitsi ku rwibutso rwa Nyange

Abarokotse Jenoside yakorewe Abatutsi i Nyange bashimiye Umushinjacyaha Brammertz, wabazaniye inkuru nziza yo guta muri yombi Kayishema, bavuga ko nabo biteguye gufasha ubutabera gutanga ubuhamya no kugaragaza ibimenyetso by’uko yakoze Jenoside.

Kayiseham Fulgence yari umukozi wa Komini, ushinzwe ubugenzacyaha muri poilisi ya Komini Kivumu aho yakoreye Jenoside, akaba yari akomeje kwihishahisha hirya no hino ashaka ubuhungiro, aho yaje gutabwa muri Yombi mu Gihugu cya Afurika y’Epfo.

Umushinjacyaha Brammertz yanasuye Igicumbi cy’Intwari cya Nyange, aho yasobanuriwe ubutwari bwaranze abana b’i Nyange.

Serge Brammertz yasuye ibice bitandukanye by’Urwibutso rwa Nyange

Muri urwo ruzinduko, yasobanuriye abarokotse Jenoside b’i Nyange aho gahunda yo kuzana mu Rwanda Kayishema Fulgence wakoze Jenoside i Nyange igeze, nyuma yo gufatirwa mu Gihugu cya Afurika y’Epfo.

Kuzana Kayishema kuburanira mu Rwanda biri mu masezerano Urukiko Mpuzamahanga Mpanabyaha rwashyiriweho u Rwanda (ICTR) rwagiranye n’u Rwanda mbere yo kurangiza imirimo yarwo.

Kayishema ashinjwa ibyaha bya Jenoside yakorewe Abatutsi byakorewe i Nyange aho Abatutsi basaga 2000 basenyeweho Kiliziya bari bahungiyemo, afatanyije n’uwari Padiri Mukuru w’iyo Paruwasi Seromba Athanase wahamijwe ibyaha bya Jenoside agakatirwa gufungwa burundu.

Umushinjacyaha Mukuru Serge Brammertz avuga ko kuza gusura abarokotse Jenoside b’i Nyange, biri mu kubahumuriza no kubizeza ko ubutabera buzakomeza gutangwa, kandi ko abakoze Jenoside bazakomeza gukurikiranwa.

Agira ati "Mu cyumweru gitaha tuzajya muri Afurika y’Epfo kubashimira ko badufashije gufata Kayishema, no kuganira uko yazanwa mu Rwanda agacirwa urubanza".

Avuga ko abayobozi ku nzego z’Uturere, ab’ingabo na Polisi n’abapadiri ari bo bari bashinzwe kurinda abaturage ariko bakaba ari bo babishe i Nyange, ariko ubutabera bukaba bwaratanzwe kuri abo bose bishe i Nyange hakaba hari hasigaye Kayishema na we akaba yarafashwe.

Avuga ko hakiri abasaga 1200 bakoze Jenoside ariko ko ubutabera bukomeje kubashakisha, kandi ko ku bufatanye na Leta y’u Rwanda bizakomeza kugenda neza.

Serge Brammertz yaganiriye n’abatangabuhamya mu rubanza rwa Kayishema Fulgence ushinjwa kugira uruhare mu gusenyera Kiliziya ya Nyange ku Batutsi bari bahahungiye

Gupima abana biri mu ngamba zo gukurikirana imikurire yabo ngo batajya mu mirire mibi

Nkusi avuga ko izo ngamba zashyizweho zirimo kwigira guteka indyo yuzuye ku gikoni cy’Umudugudu, guha abana amata, gutera imboga, gahunda y’Umuganura w’umwana no kuba buri muyobozi wese yaragiye afata umwana wagwingiye akamukurikirana kugeza avuye mu gipimo cy’imirire mibi.

Avuga ko n’ubwo hakiri abana batarava mu bugwingire, izo ngamba zikomeje kugira ngo barandure burundu imirire mibi y’abana, kandi bibe umuco ku babyeyi ko bakwiye kwita ku mirire y’abana babo.

Agira ati, "Umwaka washize twagabanyije igwingira kugeza kuri 47%, ushize na wo dukomeza kugabanya ubu tugeze kuri 23%, bigaragara ko twavuye kuri ya 50.5% dukomeza kumanuka kandi ingamba zirakomeje tuzarushaho kumanura ku buryo uyu mwaka uzashira tugeze ku bipimo byiza kurushaho".

Ku gikoni cy’Umudugudu abana bahabwa ifunguro ryuzuye rihabwa umwana n’ababyeyi bakiga kuritegura

Guverineri w’Intara y’Iburengerazuba, Habitegeko François, avuga ko kuba ubuyobozi bw’Akarere bwarashyize imbaraga mu kugabanya igwingira ry’abana bigashoboka, nta zindi mpamvu zakabaye zituma bisubira inyuma kuko ikibazo cyagaragaye bityo ko ahubwo cyaranduka burundu.

Agira ati "Gahunda ntibe gusa kugabanya ahubwo habeho kurandura burundu, ni byiza ko mwafashe ingamba zigatanga umusaruro ntimugomba gusubira inyuma".

Minisitiri Ushinzwe Ibikorwa by’Ubutabazi, ubwo yaganirizaga abayobozi ku rwego rw’Umudugudu kugeza ku rwego rw’Akarere, yagaragaje ko kugwingira kw’abana ari ikibazo kuri ejo hazaza h’Igihugu, na we asaba ubuyobozi bw’Akarere ka Ngororero kutongera kugira ibipimo bibi kuko byaba ari ukwangiza ahazaza h’abaturage b’Akarere n’Igihugu muri rusange.

Amarerero yo mu ngo na yo ari mu byafashije kwita ku mikurire y’abana no kugabanya igwingira

Agira ati "Mu myaka iri imbere Akarere kanyu kazaba gafite abantu bagwingiye kubera ya 50.5% yagaragajwe n’ubushakashatsi. Ngaho mwumve aho mwaba mugana, ni byiza gukomeza ingamba mwafashe zo kurwanya igwingira ariko muzikomeje mwarirandura neza".

Ikibazo cy’igwingira ry’abana benshi mu Karere ka Ngororero cyatumye inzego zitandukanye zigihagurukira, hashyirwaho ingamba zo kwita ku mirire y’abana, ababyeyi bigishijwe kugaburira abana indyo yuzuye bakaba na bo bavuga ko baruhutse kugendana ipfunwe basekwa ko barwaje imirire mibi.

Minisitiri Kayisire ashyikiriza umwe mu bayobozi b’Imidugudu ibihembo

Byagarutsweho mu nama mpuzabikorwa iba buri mwaka, ihuje abayobozi kuva ku rwego rw’Umudugudu kugera ku Karere, aho baganira ku buryo bwarushaho guteza imbere imiyoborere inyuze umuturage.

Minisitiri Kayisire yagaragarije abayobozi ko igihe bitwaye nabi ari bwo buryo uwo bayoboye yitwara, kandi iyo bitwaye neza n’abaturage bahitamo kwitwara nk’abayobozi, kuko baba bafite ibyo babigiraho.

Agira ati “Kuba ba bandebereho ni uburyo bwiza bwafasha umuturage guhinduka, niba uri umuyobozi umubyeyi wawe aba ahantu habi, utishyura ubwisungane mu kwivuza, ari wowe urwana n’umugore, urwaje bwaki, n’umuturage uyoboye ni uko azabigenza, ariko niba iwawe nta makimbirane, mubayeho neza, mukora akazi mukishima n’umuturage azaharanira kubigeraho”.

Guverineri Habitegeko yasabye abahembwe kuganira n’abaturage icyo bakoza ibyo bihembo

Byanagarutsweho kandi na Guverineri w’Intara y’Iburengerazuba, Habitegeko François, aho yagaragarije abayobozi ko burya ibikorwa byabo n’umusaruro ubivamo, ari wo musaruro abaturage batanga.

Agira ati “Abayobozi bakemuye ibibazo biri iwabo, gukemura iby’ahandi ni nko kuzimya buji. Nimureke rero twisubireho nk’abayobozi, cyangwa niba wumva kuyobora bikunaniye jya mu bayoborwa kuko kuyobora si umunyenga, niba wabyumvaga gutyo umenye ko wibeshye umuhamagaro”.

Guverineri Habitegeko yagaragaje ko hari abayobozi bakora neza kandi bakabishimirwa, ariko biba bikwiriye gukomeza kugira ngo umuturage amugirire icyizere, amurebereho yiteze imbere, kuko iyo ubatereranye nawe baguharira ibyawe.

Atanga urugero ku baherutse guhabwa ibihembo na Polisi ku isuku n’isukura, ko baramutse baticaranye n’abaturage ngo baganire icyo babimaza, byazarushaho kuba bibi abayobozi babyikoreshereje uko bashaka.

Agira ati “Umuyobozi wahembwe miliyoni, naramuka agiye akayikoreshereza uko ashatse kandi iyo miliyoni yaragizwemo uruhare n’abaturage, niyongera kubakenera ngo bagire ibindi bakorana bazamubwira ngo genda ibyikorere, kuko n’ubundi ni wowe uhembwa”.

Mukamana wahawe ibihembo byinshi avuga ko byagizwemo uruhare n’abaturage

Umunyamabanga Nshingwabikorwa w’Umurenge wa Gatumba, Soline Mukamana wahawe ibihembo bitatu, birimo n’ikijyanye n’imihigo y’inzego z’imitegekere yegereye abaturage, avuga ko ibyo bihembo abaturage babigizemo uruhare, ku buryo n’abandi bayobozi babikurikije barushaho kujyanamo.

Agira ati “Ibyo byose ni ibihembo abaturage bagizemo uruhare, kuko nibo twafatanyije kugaragaza ibibazo dufite tukiyemeza kubikemura dufatanyije twese, kandi ibihembo tugiye kubimurikira abaturage kugira ngo imihigo yose tujye tuyesa”.

Umuyobozi w’Akarere ka Ngororero Nkusi Christophe, na we yemera ko ari ngombwa ko umuyobozi aba nkore neza bandebereho, kandi ko bazakomeza gufasha abayobozi b’inzego kuva ku Midugudu kugera ku Karere bazakomeza gushyiramo imbaraga.

Agira ati “Ni byiza ko ibyo umuyobozi yigisha abaturage na we aba abikora kugira ngo abaturage barebere ku byiza dukora, nabo barebereho bwa butumwa bubafashe, ibyo tubasaba biborohere gushyirwa mu bikorwa”.

Meya Nkusi yavuze ko umuturage agera ikirenge mu cy’umuyobozi we

Muri iyo nama hanabayeho gushyikiriza ibihembo abayobozi bitwaye neza kurusha abandi, no guha abakuru b’Imidugudu telefone zigezweho zibafasha koroherwa mu gusangira amakuru n’izindi nzego.

Meya Nkusi yasabye abaturage gukomeza ubumwe bwabo

Babisabwe mu birori byo kwizihiza ku nshuro ya 29 isaburuku yo Kwibuhora, aho abaturage b’ingeri zitandukanye bagaragaje ibyo bakora, bishingiye ku bumenyi ngiro, ubuhinzi, ikoranabuhanga hamwe n’ubukorikori.

Umuyobozi w’Akarere ka Ngororero, Nkusi Christophe, avuga ko mbere ya Jenoside nta bumwe bwariho, kuko Abanyarwanda bari bafite urwikekwe n’ivangura, bigatuma badahuza imbaraga ngo bakorere hamwe.

Avuga ko uko gutakaza ubumwe byatumye iterambere ridindira, kuko iyo abantu batiyumvanamo batatanya ubushobozi bwo gukorera hamwe, kandi bikagira ingaruka ku bikorwa biteza imbere abaturage n’igihugu muri rusange.

Agira ati “Kwibohora byatumye tugera ku bumwe twifuza bw’Abanyarwanda, birafasha ngo imbaraga zishyirwe hamwe iterambere ryihute bigizwemo uruhare na buri wese. Turasaba abaturage kubukomeza kugira ngo Igihugu gikomeze kugera ku ntego cyihaye zo kuzamura imibereho myiza y’umuturage”.

Ingabo zishimanye n’abo mu Ngororero

Bamwe mu baturage bagizwe n’urubyiruko n’abagore bagaragaza ko kwibohora byatumye babasha gukora bakiteza imbere binyuze, mu myuga n’ubumenyi ngiro n’ubukorikori mu makoperative bakoreramo ntawishisha mugenzi we.

Umuyobozi wa Koperative UKOVANGO ikora ibijyanye n’ubukorikori, Yakujije Anastasie, agaragaza ko bakomeje gukora ariko bakaza no guterwa inkunga yatumye basigaye bakora n’isabune yo kumesa no koza ibikoresho bitandukanye.

Agira ati “Kwibohora byatumye umugore ahabwa ijambo, twishyize hamwe dutangira tuboha ibikoresho mu birere no mu bisigazwa by’ibigori, none ubu twahawe miliyoni eshesatu zatumye twongera ibyo dukora tugenda twiteza imbere kubera kwibohora”.

Didier Ndayishimiye wiga muri Kaminuza y’u Rwanda waje kumurika imashini (ishyiga rikoresha amashanyarazi mu guteka), avuga ko kuba yiga Kaminuza akabasha gutekereza ibishobora kugirira abaturage akamaro ari ko kwibohora nyakuri.

Agira ati “Ubu iri shyiga ryacu rikoresha amashanyarazi ariko iyo umuriro ugiye rimara isaha rigishyushya, ku buryo umuriro ugiye bitarashya bikomeza gushya nta mpungenge, bizafasha Abanyarwanda kubungabunga ibidukikije, ducana ariko twirinda kwangiza amashyamba n’urusobe rw’ibinyabuzima”.

Ndayishimiye yagaragaje ishyiga arimo gukora rikoresha amashanyarazi ariko rikanabika umuriro

Abiga imyuga mu ishuri rya TVET Hindiro bakora ibijyanye no kongerera agaciro ibikomoka ku buhinzi n’ubworozi, bavuga ko bamaze kugera ku rwego rwo gukora imitobe mu mbuto, kubera ko urubyiruko rwatekerejweho ngo rugire uruhare mu guteza imbere Igihugu ruhanga udushya.

Nsabimana Thiery wigisha muri Hindito TSS, avuga ko abatari bagana imyuga n’ubumenyi ngiro bari kwihemukira, kuko kwibohora byatumye abantu barangizaga amashuri yisumbuye bakabura akazi, ubu bashobora nibura kukihangira.

Mu bindi bikorwa byatashywe harimo imiyoboro y’amazi, inzu zubakiwe abatishoboye no kuvugurura inzu zari zarangijwe n’ibiza.

Bihangiye imirimo

Barishimira Kwibohora bataha ibyumba by’amashuri bishya

Ibyumba 12 by’amashuri y’incuke nibyo byubatswe mu mwaka w’ingengo y’imari 2022-2023, n’ikigo cy’imyuga n’ubumenyi ngiro, byose byatwaye hafi Miliyoni 300frw.

Mu Murenge wa Muhanda ahatashywe ishuri ry’imyuga n’ubumenyingiro rya TSS Runayu, abaturage bagaragaza ko kuva babaho aribwo babonye amahirwe yo kugira ishuri ryigisha imyuga, rizatuma abana babo bacika ku guta amashuri bakajya gukora mu mirima y’icyayi, kuko iyo myuga izabafasha kwihangira imirimo.

Umuyobozi w’Akarere ka Ngororero, Nkusi Christophe, avuga ko kugira ibigo byigisha imyuga muri buri Murenge, bizatuma abanyeshuri barangiza icyiciro rusange cy’amashuri yisumbuye bakomereza mu y’imyuga badakoze ingendo ndende, kandi bakarangiza amasomo yabo bashobora kujya ku isoko ry’umurimo.

Ahigirwa imyuga

Asaba ababyeyi kwemerera abana bakaza kwiga imyuga, nk’uko bari babitanze mu byo bifuza ko bagezwaho ngo babashe kwiteza imbere, kandi ko bishimangira ihame ry’imiyiborere myiza ryo gushyira umuturage ku isonga.

Agira ati "Byaba bibabaje kugira ishuri nk’iri ugasanga ntimuribyaza umusaruro, byaba bisa nko kwihemukira, kandi tuzi neza ko umubyeyi mwiza araga umwana ishuri ryiza kuko nibwo uwo mwana wamenye umwuga, aba atanga icyizere cyo kwiteza imbere n’umuryango we".

Umuturage wo mu Murenge wa Muhanda, avuga ko kuba bizihiza isabukuru yo Kwibohora ku nshuro ya 29, bataha ibikorwa biteza imbere uburezi ari nko gucira abana akabando k’iminsi.

Agira ati "Ubu tubonye aho abana bacu bagiye kwigira imyuga izabagiria akamaro, kuko bajyaga bata amashuri bakajya kwikorera mu cyayi no mu nzuri za Gishwati".

Ibyo Kandi binemezwa n’Umunyamabanga Nshingwabikorwa w’Umurenge wa Muhanda, Habamenshi Jean Maurice, aho agaragaza ko abarangizaga icyiciro rusange cy’amashuri yisumbuye babonye igisubizo, kuko byabasabaga kujya kwiga kure nko muri kilometero zirenga 10 mu yindi Mirenge.

Ibindi byumba bitatu byuzuye ku mu Murenge wa Kabaya ku kigo cy’ishuri cya GS Kageshi, bizakira abana b’incuke, igikoni n’ibyumba by’ubwiherero 6 byubatswe nabyo biri mu byashimishije ababyeyi.

Umunyamabanga Nshingwabikorwa w’Umurenge wa Kabaya, Simon Ndayisenga, avuga ko ibyo byumba bizakemura ikibazo cy’ubucucike bw’abana, no gutuma batajyaga mu mashuri kuko batuye kure yayo boroherwa n’ingendo.

Ababyeyi bafite abana ku Kabaya nabo bavuga ko kwakira ibyumba bishya by’amashuri ari ukwibihora ubujiji.

Hategekimana Bernard avuga ko kwibohora ubujiji ari intangiriro yo kugera ku bukungu, kandi ko abaturage ba Kabaya bakunze kwiga ariko amahirwe akaba makeya, ubu bakaba bishimira kuba uburezi butangirira ku bana b’incuke, bakazakurana uburere n’ubumenyi bufite ireme.

Agira ati "Ubundi umuntu yagiraga umwana kugira ngo azabone ishuri bigasaba ko aba afite mwenewabo wishoboye, uzamucumbikira akanamwishyurira, ariko ubu Leta y’Ubumwe yatubohoye guhakirizwa dushaka amashuri, ubu abana bacu biga hafi".

Akarere ka Ngororero kamaze kubaka ibyumba by’amashuri 12 mu mwaka ushize w’ingengo y’imari, kakaba karubatse ibigo by’imyuga 10, kandi umwaka wa 2023 ukaba uzarangira buri Murenge ufite ishuri ryigisha imyuga nk’uko biteganywa muri gahunda ya Leta y’imyaka irindwi izarangirana na 2024.

Bashyize indabo ku rwibutso rwa Nyange

Abo banyamuryango bamaze kumva amateka ya Jenoside yakorewe Abatutsi i Nyange, bavuze ko basuye urwo rwibutso bagamije gusobanukirwa neza itandukaniro mu mateka ya Jenoside iwabo i Muhanda, kuko ho yakozwe n’abari bashinzwe kurinda Perezida Habyarimana.

Zirimwabagabo Jean Bosco, Chairman wa RPF-Inkotanyi mu Murenge wa Muhanda, avuga ko kuba abari abayoboke ba Kiliziya Gatolika bahagarikiwe na Padiri mukuru wa Paruwasi yabo, bifite icyo bikwiye gusobanura ku buzima bw’umukirisitu cyangwa umutima we n’ibyo akora.

Avuga ko kuba Jenoside yarahagaristwe, bidakuraho gukomeza kwibuka kugira ngo ibyabaye bitazongera kubaho, kandi abantu bakwiye guhinduka mu mitima yabo kugira ngo hirindwe ko Jenoside yazasubira ukundi.

Bunamiye inzirakarengane zishyiguye mu rwibutso rwa Nyange

Zirimwabagabo avuga ko kuba Leta yariho yarashyigikiye gukora Jenoside, abayoboke b’amadini n’amatorero bica Abatutsi, ndetse n’inzego zishinzwe umutekano zariho zibafasha, bigaragaza ko Jenoside yateguwe ari nayo mpamvu yihuse, abasaga miliyoni bakicwa mu minsi 100 gusa.

Agira ati, “Uyu munsi Leta y’Ubumwe bw’Abanyarwanda imaze imyaka hafi 30 yubaka ubumwe bwangiritse mu yindi myaka 30 kuri Repubulika ya mbere n’iya kabiri, kandi ntibyagoranye kuko mu myaka itatu yonyine amasomo yari amaze gufata agarura ubumuntu, aho nk’urugero abana ba hano i Nyange banze kwitandukanya hakurijwe amoko banga gutatira Ubunyarwanda”

Avuga ko nubwo batuye Muhanda kuza gusura urwibotso rwa Jenoside rwa Nyange bivuze ko umuntu wizera Imana na Kirisitu, akwiye kugira umutima wo kumenya Imana nyakuri no kubaha abo yaremye.

Banashyize indabo ku mva yo hanze

Agira ati “Twize ko Abakirisitu ba kiriya gihe bari abo ku mubiri gusa, kuko batinyutse kwica bagenzi babo. Uyu munsi birakwiye ko abakirisitu bahinduka mu mitima bakarangwa n’ibikorwa byiza, aho kugumana umutima wa kinyamaswa”.

Yongeraho ati “Aha twahumviye ubugome ndengakamere bwakorewe Abatutsi barimburiweho Kiliziya, ntabwo bari bananiranye ku buryo hafatwa uwo mugambi, ntabwo bari bakwiye kwicwa kuko bari abavandimwe b’ababishe. Bigaragara rero ko Jenoside yakozwe yateguwe, kandi abanyamuryango ba RPF-Inkotanyi bakwiye kurinda ko ibyabaye byakongera kubaho, kandi ko kwibuka ari kimwe mu bituma bitazasubira koko”.

Umunyamabanga Nshingwabikorwa w’Umurenge wa Muhanda, unashinzwe ubukangurambaga bw’Umuryango RPF-Inkotanyi muri uwo Murenge, Habamenshi Jean Maurice, avuga ko kuba abanyamuryango ba RPF baratekereje gusura urwibutso rwa Nyange, biri muri gahunda y’umuryango yo kurwanya Jenoside n’ingengabitekerezo yayo.

Zirimwabagabo Jean Bosco

Ingengo y’imari nshya izibanda ku gusana ibyangijwe n’ibiza

Perezida w’Inama Njyanama y’Akarere ka Ngororero, Nyiramasengesho Jeannette, avuga ko muri rusange ibikorwa remezo bizakorwa birimo kubaka ibiraro n’amateme byangijwe n’ibiza, gusana imihanda iherutse kwangizwa n’ibiza, kubakira abo byasenyeye no kubafasha gusubira mu buzima busanzwe.

Ibyo bikorwa byose bizatwara amafaranga angana na 10.6% by’ingengo y’imari yose y’umwaka wa 2023-2024, akaba asaba abaturage kuzarushaho kwita ku nama bagirwa n’abayobozi, kugira ngo babashe kurinda ibikorwa biba byagezweho.

Agira ati "Icyo dusaba abaturage ni ukwita ku bikorwa biba byagezweho, ahubatswe umuhanda bakawurinda isuri, ibiraro bakabirinda kwangirika kugira ngo birinde ingaruka zatuma ibikorwa remezo byangirika".

Ku kijyanye no kuba abatuye Akarere ka Ngororero batunzwe n’ubuhinzi, Perezidante w’Inama Njyanama y’Akarere avuga ko amafaranga angana na 6.3% azashyirwa muri gahunda yo guteza imbere ubuhinzi, hibandwa ku kwigisha abaturage gukora ubuhinzi kinyamwuga.

Agira ati "Abaturage bacu ahanini batunzwe n’ubuhinzi, hazabaho kubigisha kuvugurua urutoki, gutera icyayi na kawa mu rwego rwo kuzamura umusaruro w’ubuhinzi, nka kimwe mu bikorwa shingiro umuturage wacu akuraho imibereho".

Avuga kandi ko igice kikini cy’amafaranga kizinjira mu guhemba abarimu no kwita ku burezi, aho agera kuri 48% yose azakoreshwa mu bikorwa byo kwita ku burezi no guhemba abarimu.

Ingengo y’imari y’Akarere ka Ngororero y’umwaka ushize, yabarirwaga hejuru ya Miliyari 32Frw, ikaba yiyongereye ikagera muri Miliyari 33Frw, ibyo ngo bikaba bitanga icyizere cy’uko ibyemejwe kugerwaho bizashoboka.

Abarokotse Jenoside b’i Nyange bishimiye ko babonye ababasura

Babitangaje ubwo abahagarariye inganda zitunganya umuceri mu Rwanda babasuraga, bakanabagenra inkunga irimo n’umuceri bakura mu nganda zabo, n’ibindi bikoresho bakenera mu buzima bwa buri munsi.

Umubyeyi wahohotewe mu gihe cya Jenoside yakorewe Abatutsi i Nyange, avuga ko abarokotse Jenoside b’i Nyange iyo bagereranyije n’ibihe banyuzemo muri Jenoside, nyuma yayo bakiheba kandi bakitakariza icyizere, kubona ababasura ari ukubongerera iminsi yo kubaho.

Mukagakire Madeleine avuga ko kubera ubushobozi bw’uwarokotse Jenoside ugeze mu zabukuru, byari bigoranye ngo yigondere ibyo kurya ku isoko kuko ibiciro byazamutse, kandi nta mbaraga benshi bafite ngo babashe guca inshuro, dore ko n’inkunga bahabwa na Leta iba idahagije.

Agira ati "Iyo tubonye abatuzanira inkunga, ni amaboko y’abana bacu bakabaye badufasha, ubu turishimye cyane, umuceri urahenze, ibishyimbo birahenze, twarahinze turihinga kubera izuba. Twaryaga umuceri uhenze ariko iyi nkunga ni ingirakamaro kuri twe, ubu tugiye kunywa agasukari kandi iyi nkunga izatugeza natwe kubyo turimo kwikorera".

Bakiranye urugwiro abaje kubasura

Musabeyezu Waridride avuga ko yarokotse Jenoside n’abana batatu, ariko yari abayeho nabi kubera kurumbya n’ibiciro bikaba byarazamutse ku isoko.

Agira ati "Njyewe navukanaga n’abana 13, twasigaye turi batatu ku buryo bitoroshye ngo tuzamurane, ariko iyi nkunga y’ibyo kurya ni iyunganira iy’ingoboka, uzi kurya ibiryo bikaranze ko wongera ukaba mutoya, wanywa agasukari mu gikoma cya rutuku ukumva imeze neza".

Umuyobozi w’ihuriro ry’abafite inganda zitunganya umuceri mu Rwanda, Laurent Ndagijimana, avuga ko uwakoze amaraso y’umuvandimwe we n’umuturanyi we, bitinda bikamugaruka kuko abarokokeye i Nyange bagenda babona ubutabera, nyuma yo guta muri yombi benshi mu babahekuye barimo na Padiri Seromba wabasenyeho Kiliziya.

Ndagijimana avuga ko kwigira ku rwibutso rwa Nyange bituma barushaho kugira ubumenyi ku miterere ya Jenoside

Avuga ko nk’abafite inganda zitunganya umuceri bahisemo gusura urwibutso rwa Nyange, kubera ko rufite amateka ya Jenoside yihariye, aho uwari Padiri mukuru wa Paruwasi ya Nyange yafashe umwanzuro wo gusenyera Kiliziya ku Batutsi.

Agira ati "Kurimburira Kiliziya ku bantu ibihumbi bibiri ni ubugome bukabije, n’inkuba iyo ikubise yica bakeya, ariko nanone tukishimira kuba ukuboko k’ubutabera kutarasigaye inyuma, kuko na Fulgence Kayishema yamaze gufatwa, twifuza ko yazanwa hano ngo na we arebe ibyo yakoze".

Avuga kandi ko kuba Nyange yarabaye igicumbi cya ’Ndi Umunyarwanda’, aho abana bigaga mu ishuri rya Nyange banze kwitandukanya hakurikijwe amoko, bikwiye kubera urugero rwo kwigaya ku bagitsimbaraye ku ngengabitekerezo ya Jenoside.

Asaba abarokotse Jenoside gukomera kuko nubwo benshi bageze mu zabukuru, abo bazasiga bazasigara mu Gihugu cyizewe ko kizakomeza kubaha ubuzima.

Musabyeyezu avuga ko kubasura ari ukubongerera iminsi yo kubaho

Abagize ihuriro ry’abafite inganda zitunganya umuceri, baremeye ibyo kurya n’ibikoresho by’isuku imiryango 25 y’abarokotse batishoboye, banatera inkunga ya Miliyoni imwe urwibutso rwa Nyange.

Beretswe bimwe mu bisigazwa bya Kiliziya ya Nyange

Uyu muhanda wa kaburimbo ukunze kurengerwa n’amazi bikabangamira abawukoresha

Umuyobozi w’Akarere ka Ngororero, Nkusi Christophe, avuga ko hari ibiganiro n’Ikigo cy’Igihugu gishinzwe Iterambere ry’Ubwikorezi (RTDA) mu rwego rwo gushaka ibisubizo kuri icyo gice cy’umuhanda kimaze igihe gihagarika imigenderanire y’abaturage no kugeza ibicuruzwa mu bice bigize Akarere ka Ngororero.

Usibye kuba bateganya ko umuhanda wakwimurwa igice gitoya, baranateganya ko wazamurwa kugira ngo amazi naba menshi atawurengera, ariko iki gisubizo kikaba kimaze imyaka irenga itanu kidashyirwa mu bikorwa.

Nkusi uyobora Ngororero ati “Haracyashakwa iby’ingengo y’imari kuko inyigo ebyiri zo kwimura igice cy’umuhanda ukanyura ahandi, cyangwa ukazamurwa zararangiye. Turizera ko hamwe na RTDA umuhanda uzakorwa abaturage bakabasha kujya batambuka nta nkomyi".

Nu gihe hagitegerejwe ibisubizo ariko, abaturage bakomeje kugorwa no gukoresha umuhanda Muhanga – Ngororero - Mukamira mu bihe by’imvura, kuko hari abo amazi ya Nyabarongo atuma basiba amasoko, gusubika ingendo no kurara mu nzira ku bo yuzuriyeho.

Nyiransengiyumva Janvière wari uturutse mu Karere ka Gatsibo agiye i Kageyo mu Karere ka Ngororero, avuga ko akigera ku kiraro cya Nyabarongo gihuza Muhanga na Ngororero yatunguwe no gusanga umuhanda ufunze kubera amazi ya Nyabarongo, bikamusaba gukora urugendo rw’amaguru ahasigaye cyangwa agahitamo gusubira mu rugo i Gatsibo.

Agira ati, "Shoferi ansubije igice cy’amafaranga ngo ndebe niba nabona indi modoka ngeze i Gatumba, ubwo ninyibona ndakomeza ninyibura ndakoresha amaguru".

Mu ikoni riri nko muri metero 800 ni ho hatinda gukama igihe Nyabarongo yuzuye

Abayisenga Patience werekezaga mu Karere ka Nyabihu avuga ko Nyabarongo yamwuzuriyeho none akaba agomba gukora urugendo rw’amaguru azamuka imisozi, kugira ngo abone uko ajya gutega izindi modoka wigiye imbere mu gasantere ka Gatumba ku buryo bigoye kugerayo kare bitewe na gahunda zari zimujyanye.

Agira ati, "Ingaruka byatugizeho ni ukuba twakererewe, ubu ngiye kugenda nyeranyereza ndebe ko nza kubona indi modoka imbere. Turifuza ko Leta yagira icyo idufasha umuhanda ukazamurwa.

Bakurirehe Innocent wari ugemuye ibiribwa i Rubavu avuga ko kubona uko atambutsa imodoka bigoranye kuko amazi agenda yiyongera, kandi we bimaze kumubaho inshuro eshatu.

Agira ati “Igihe cyose uyu muhanda utazamuwe cyangwa ngo wimurwe amazi azahora atubuza gutambuka kuko byateza impanuka imodoka ikaba yarohama".

Igice cy’ikorosi riri nko muri metero 800 uvuye ku kiraro cya Nyabarongo ni cyo gikunze gusigaramo amazi kuko Nyabarongo ikirengera ntihagire imodoka ishobora gutambuka. Ingengo y’imari yigeze gutangazwa ngo icyo gice cya metero 800 kizamurwe ikabakaba hafi miliyari ebyiri z’amafaranga y’u Rwanda ariko RTDA ntacyo irabasha gukora kugeza ubu, abakoresha uyu muhanda bakaba bakomeje kugorwa no guhahirana cyangwa kugenderana.

Uru rubyiruko rwahawe umukoro wo kuzana bagenzi babo bagafatanya kubaka Igihugu

Ubu butumwa bwatanzwe ku wa 23 Mata 2023, ubwo Minisiteri y’Ubutegetsi bw’Igihugu (MINALOC) na Polisi y’Igihugu, basuraga urubyiruko rw’abakorerabushake banyuranye muri aka karere.

Uru rubyiruko rwibukijwe ko ubukorerabushake n’ubwitange ari umuco ukomoka ku ngabo za RPF Inkotanyi, zabashije kubohora Abanyarwanda mu bushobozi buke zari zafite, ariko zifitemo ubushake bwo gukunda Igihugu.

MINALOC yashimiye cyane urubyiruko rw’abakorerabushake b’aka karere, kuba bari ku isonga mu kugira umubare munini ku rwego rw’Igihugu, kandi ko bakwiye kwifashisha ayo mahirwe mu kwimakaza imibereho myiza y’Abaturarwanda muri rusange.

Akarere ka Ngororero ni ko gafite abakorerabushake benshi ku rwego rw’Igihugu

Umuyobozi w’Akarere ka Ngororero, Nkusi Christophe, yabwiye uru rubyiruko ko iki Gihugu cyabohowe n’urundi rubyiruko, ayo akaba ari amahirwe yo kubakiraho iterambere rirambye.

Ati “Iki Gihugu kugira ngo tube tugifite mu by’ukuri ni urubyiruko rw’Inkotanyi rwakoze ibishoboka byose rukakibohora, ndetse rugahagarika Jenoside. Ubu dufite Igihugu cyiza gifite imiyoborere ihamye kandi iha agaciro urubyiruko. Ni amahirwe rero dufite kugira ngo tuyabyaze umusaruro bityo twiteze imbere mu buryo burambye”.

Mayor Nkusi yabatumye ku rundi rubyiruko agira ati “Gahunda yo kongera umubare w’abakorerabushake twese tujyanemo, kugira ngo abatari baba ‘youth volunteers’ baze, twese tugire imtumbero imwe. Urubyiruko rwose rw’Akarere ka Ngororero rugera ku bihumbi 92, twese tugomba kuba mu itsinda ry’abakorerabushake tugatera ikirenge mu cya bakuru bacu b’Inkotanyi”.

Ubuyozi ku nzego zinyuranye bwabashimiye umurava n’ubwitange

Akarere ka ngororero gatuwe n’abaturage basaga ibihumbi 407, muri abo abasaga gato ibihumbi 92 bakaba ari urubyiruko rururi hagati y’imyaka 16-30. Mu mwaka w’ingengo y’imari urimo kugana ku musozo (2022-23), uru rubyiruko rwibumbiye mu rwego rw’abakorerabushake, mu nama y’Igihugu y’Urubyiruko, urushamikiye ku muryango RPF Inkotanyi ndetse n’urwo mu Muryango uhuza Abiga muri za Kaminuza n’Amashuri Makuru, babashije kubaka ibikorwa remezo byose hamwe 1,203 birimo inzu, ubwiherero n’uturima tw’igikoni.

Hanasanwe ibibuga by’umupira bitandukanye, ndetse hanakorwa n’ubukangurambaga ku ngingo zireba cyane urubyiruko n’imibereho myiza y’abaturage.

Umuhanda wongeye kuba nyabagendwa

Itangazo Polisi yanyujije ku mbuga nkoranyambaga riragira riti “Polisi y’u Rwanda irabamenyesha ko ubu umuhanda RN 11, Muhanga - Ngororero - Mukamira ari nyabagendwa”.

Umuhanda Muhanga-Ngororero-Mukamira akunze kwibasirwa n’ibiza by’imvura, aho amazi n’ibyondo bituruka mu misozi byiroha mu muhanda bikawufunga, hakiyongeraho no kuridukirwa n’inkangu kubera imikingo iwugize ifite ubuhaname burebure.

Uyu muhanda ukunze kwibasirwa n’ibiza biterwa n’imvura

Minisitiri Bizimana Jean Damascène

Mu kiganiro yagejeje ku bitabiriye igikorwa cyo Kwibuka no gushyingura mu cyubahiro imibiri yabonetse ku Rwibutso rwa Nyange mu Karere ka Ngororero, Minisitiri Bizimana yagaragaje uko ibintu bikwiye kuba bivugwa uko biri, kugira ngo byumvikane neza abantu basobanukirwe uko Jenoside yakozwe.

Dr. Bizimana avuga ko Jenoside irangwa no kuyikora, binyuze mu mugambi wo kwica abantu bazira uko bavutse uko baba bangana kose, bitandukanye n’abakeka ko Jenoside bivuze kwica abantu benshi gusa, kuko ibyo ngo bituma abantu bagwa mu mutego wo kuvuga ko Jenoside yageragejwe nyamara ahubwo yarakorwaga.

Agira ati "Nko muri Komini Kibirira abantu bakeka ko mu 1990 nta Jenoside yageragazwaga, kuko hatishwe Abatutsi miliyoni, nyamara iriya yari Jenoside kuko abishwe baziraga ko ari Abatutsi nta yindi mpamvu. Ntabwo ryari igerageza yari Jenoside kuko bicwaga byateguwe na Leta".

Urwitwazo rwo kwica Abatutsi mu 1990 muri Komini Kibirira

Minisitiri Bizimana asobanura ko nyuma y’iminsi mike Ingabo za RPA zitangije urugamba rwo kubohora Igihugu, mu kwezi k’Ukwakira 1990, muri Komini Kibilira, hakorewe inama yatumijwe n’uwari Superefe wa Superefegitura ya Ngororero, witwaga Niyitegeka Bernard, hamwe na Burugumesitiri wa Komini Kibirira, Jean Baptiste Nteziryayo.

Iyo nama yabereye ku Muhororo ngo yari yatumiwemo n’Abahutu bakomeye bavukaga i Kibirira bakoraga ahandi, barimo Leon Mugesera, icyo gihe yari umwarimu muri Kaminuza y’u Rwanda akaba n’umujyanama mu bya Politiki mu biro bikuru bya MRND.

Iyo nama kandi ngo yitabiriwe n’uwari umuyobozi w’ikigo gishinzwe ubuhinzi bw’ibirayi (PENAPE), Pierre Tegera, nk’uko biri muri Raporo y’inama yakozwe icyo gihe, ku ngingo y’umunsi hakaba hariho kwiga ku kibazo cy’inyangarwanda zateye Igihugu zifatanyije n’Abatutsi, kandi zishe abayobozi bakomeye bakomokaga muri Kibilira, bityo ko Abahutu ba Kibilira bagombaga kwica Abatutsi kubera ko babiciye abayobozi bahavukaga.

Agira ati "Muri iyo nama hahimbwemo ikinyoma cy’uko Inyangarwanda n’Abatutsi bishe uwari umugaba mukuru w’Ingabo, Laurent Serubuga na Charles Uwihoreye, wayoboraga Ikigo cy’Abajandarume cya Ruhengeri, bose bavugaka Kibirira, bityo ko Abahutu bakwiye guhaguruka bakikiza umwanzi wabiciye abategetsi bakomeye".

Minisitiri Dr. Bizimana asobanura ko ikinyoma nk’icyo atari gishya, kuko no mu 1959 hari hahimbwe ikindi kinyoma ko Mbonyumutwa wari umutware wa Ndiza yakubiswe n’Abatutsi, ndetse hakaba n’abavugaga ko yishwe, icyo gihe Abatutsi baricwa hirya no hino mu Gihugu uhereye za Ndiza, Ruhengeri na Kibuye n’ahandi.

Avuga kandi ko hari amakuru atajya avugwa ya Jenoside yakorewe Abatutsi mu myaka ya za 1960 kugeza 1963, aho muri Raporo ya Colonel Logiste wari umutegetsi mukuru w’u Rwanda, bigaragara ko hari Abatutsi bishwe mu Bumboga (Gasabo), ku rwitwazo rushingiye ku kinyoma cyahimbwe ko Abatutsi bishe uwari Minisitiri w’Ubutabera wtiwaga Anastase Makuza.

Agira ati "Icyo gihe Abatutsi barishwe abandi baratwikirwa muri Gasabo, ku kinyoma cy’uko Anastase Makuza yishwe n’Abatutsi nyamara yari yakoze impanuka y’imodoka nta n’icyo yabaye, batwikira Abatutsi za Bumbogo abandi barabica mu 1961".

Ikindi kinyoma Dr. Bizimana agaragaza cyabaye urwitwazo ngo Abatutsi ba Kibungo na Rwamagana bicwe, ni uko hadutse abavuga ko Umudepite bitaga Kajangwe yishwe n’Abatutsi, nyamara ngo yari yishwe n’Abaparimehutu kubera amakimbirane yari afitanye na mugenzi we babanaga muri iryo shyaka.

Ibyo ngo byarabaye kandi mu 1969 ubwo hicwaga Umuparimehutu ukomeye witwara Barthazar Bicamumpaka, kandi nabwo Abatutsi baricwa nk’uko byakomeje kugeza mu 1990 ubwo Abatutsi bicwaga muri Kibilira.

Abatutsi bicwaga urupfu rubi ku byiciro byose birimo n’abagore n’abana

Minisitiri Bizimana avuga ko Jenoside yakorwaga Abatutsi bicwa urupfu rubi bashinyaguriwe, kandi ibyiciro byose bigashishikarizwa kwica ndetse n’abagore bajya mu bwicanyi, nk’aho byakozwe mu yahoze ari Segiteri Gatumba muri Serire Makoma, aho uwayiyoboraga Josephine Mugeni, ari we wayoboraga ibitero mu 1990 bijya kwica Abatutsi.

Agira ati "Mu muco Nyarwanda ubundi nta mugore wicaga, ariko uwo Mugeni wanitwaga izina ryiza we yanavuzaga ingoma ayoboye ibitero, bijya kwica abana nabagore bagenzi be".

Raporo kandi zigaragaza ko nyuma yo kwica Abatutsi habarurwaga abishwe, abakomeretse, inzu zatwitswe, inka zariwe n’abahunze ndetse n’aho bahungiye mu rwego rwo kumenya uko bapima uko ubwicanyi bwakozwe n’ibizakurikiraho.

Minisitiri Bizimana atanga urugero rwa raporo y’uko Abatutsi bishwe muri Kibirira, yasohotse ku wa 19 Ukwakira 1990, ikozwe n’umuyobozi w’urwego rushinzwe iperereza witwaga Niyibizi Damien, igaragaza ko mu minsi itatu gusa hagati y’itariki ya 13 na 16 Ukwakira 1990, muri Superefegitura ya Ngororero hishwe Abatutsi 365.

Naho Raporo ya Komini Kibirira ikagaragaza ko hagati ya tariki 11 na 15 Ukwakira 1990, hishwe Abatutsi 236, hakomereka 45, hahunga 3107, harimo 701 bahungiye kuri Superefegitura ya Ngororero, kuri Paruwasi Muhororo hakaba 2385, Komini Buringa ya Gitarama hahungira 21, hakaba haratwitswe inzu zisaga 600, hafi 200 zirasenywa, haribwa inka n’ihene n’intama nyinshi ndetse hari n’abasaga 300 bari barahungiye mu baturage.

Minisitiri Bizimana agaragaza ko kuba abayobozi barafataga umwanya wo kubarura iyo mibare yose, aho gukora ibikorwa by’iterambere bizanira abaturage amahoro, ari umugambi karundura wa Jenoside yariho ikorwa.

Agira ati "Aho kugira ngo umuyobozi abe ariho yishimira gutanga raporo y’iterambere ry’abaturage, ahubwo arishimira gutanga raporo y’abantu bishwe, inka zariwe, murumva rero ko ari umugambi wa Jenoside, niyo mpamvu tugomba kuyifata no kuyita uko yitwa".

Icyo gihe kandi Raporo ya Burugumesitiri wa Buringa igaragaza ko hari Abatutsi bari bahungiye kuri Komini, ariko bo bataratangira ubwicanyi ariko hari abakomeretse bajyanywe kwa muganga, hari n’abakiri kwambuka muri Nyabarongo bagaterwa amacumu n’interahamwe zo muri Kibirira zitifuzaga ko bahunga.

Minisitiri Bizimana kandi agaragaza ko hari igitabo cya François Nsengiyumva, kigaragaza uko ubwicanyi bwakozwe muri Kibirira mu buryo bw’iyicarubozo, aho bicaga n’abana babashinyaguriye, nk’urugero rw’umwana bishe batemye amaguru bagasiga igihimba, nyina yasanga ataka agahitamo kwiyahurana na we muri Nyabarongo.

Hari kandi akandi kana batwikiye mu nzu iwabo ko ntikashya, ariko abicanyi baguma iruhande rw’iyo nzu iminsi itatu kugeza ako kana kanogotse, ibyo byose bikaba bigaragaza uko Jenoside yakorwaga mu bwicanyi butagira urugero.

Guverineri Habitegeko avuga ko Politiki mbi yatumye Abanyarwanda bica bagenzi babo kandi ntihabeho guhana

Abashaka kugoreka amateka bitwaza ko Jenoside yakorewe Abatutsi yatewe n’ihanurwa ry’indege ya Habyarimana Juvenal, ariko si byo kuko Ngororero ifite umwihariko w’uko kuva mu 1990 Abatutsi batangiye kwicwa.

Guverineri Habitegeko avuga ko abicanyi bakoraga Jenoside aho guhanwa bakagororerwa, politiki mbi ikimakaza ubugome bwo gutsemba igice kimwe cy’Abanyarwanda, kandi bari bakwiye kubaho no kubana mu mahoro.

Agira ati "Umusaruro twakuye muri Pilitiki mbi ni uyu wo kuza Kwibuka abacu bishwe nabi bakajugunywa muri Nyabarongo, ntabwo ari ko byari bikwiye kugenda kuko ntawe utarifuzaga kubaho, ariko ubuyobozi bubi bwagize uruhare mu kumara abantu, aho kubafasha kubaho no kugira ubuzima. Nta kundi ni uguhora tubibuka tukanibuka ko ubuyobozi bubi bugira ingaruka ku bayoborwa, bityo bidakwiye gusubira".

Guverineri Habitegeko avuga ko umunyepolitiki w’uyu munsi atandukanye n’uwo hambere, kuko ubu asabwa kubanisha neza abaturage, kubigisha kuba umwe, gutekereza kure no kubazwa inshingano, bigaragaza itandukaniro rya politiki yakanguriraga abaturage kwanga abaturanyi babo.

Agira ati "Kuba twibuka amateka tukarahirira rimwe ko bitazongera, ni imbuto nziza yeze kuri politiki nziza y’uyu munsi, umunapolitiki asabwa gusa kwereka umuturage uko yiteza imbere no kugira ubuzima bwiza, no kurushaho kubaka Igihugu".

Bashyize indabo ahashyinguye imibiri y’Abatutsi biciwe mu Ngororero

Tariki ya 13 Mata 1994, nibwo Abatutsi basaga ibihumbi 25 biciwe kuri Paruwasi ya Muhororo mu yahoze ari Komini Kibilira, naho ku mugezi wa Nyabarongo hakaba hibukirwa abasaga 400 bahiciwe bakanarohwa muri uwo mugezi, amazina yabo akaba yanditse ku rwibutso rwahashyizwe.

Perezida wa Ibuka mu Karere ka Ngororero, Ntagisanimana Jean Claude, avuga ko ayo amakuru y’abishwe bakajugunywa muri Nyabarogo agikomeje gukusanywa, kugira ngo n’abandi bazamenyekana, amazina yabo azandikwe ku rwibutso ruri kuri uwo mugezi.

Abarokotse ba Kesho bashyize indabo ahashyinguye imibiri y’ababo

Biravugwa mu gihe kuri uyu wa 10 Mata 2023, hibukwa Abatutsi hafi ibihumbi 15, biciwe ahari Ingoro ya MRND batwikishijwe lisansi, abandi bakaraswa.

Uru rukurikirane rw’Iminsi rugaragaza ko ku itariki 07 Mata 1994, Ku Kabaya hishwe Abatutsi basaga 200, Kesho muri Muhanda hicirwa hafi 2000 hari tariki 08 Mata, Kibilira hicirwa hafi 25000 ku itariki 13 Mata mu gihe tariki ya 10 Mata hishwe abari barahungiye ku Ngoro ya MRND hafi 15000 batwikishijwe lisansi.

Umuyobozi w’Umuryango IBUKA mu Karere ka Ngororero, Ntagisanimana Jean Claude, avuga ko kuba Abatutsi barishwe mu buryo bukurikiranye muri izo Komini byateguwe kuko kuva ku wa 07 Mata 1994 Abatutsi bahise bicwa ahandi henshi mu Gihugu ubwicanyi butaratangizwa.

Ntagisanimana (wa kabiri iburyo) avuga ko Jenoside yihuse cyane muri Ngororero kubera amagambo ya Mugesera n’abandi bacurabwenge ba Jenoside bahavuka

Avuga ko na mbere hose Jenoside yakorwaga mu makomini yari agize Ngororero, kuko nko mu 1992 hishwe Abatutsi b’i Ramba, ubu ni mu Murenge wa Kavumu ahashyinguye imibiri isaga 300, naho mu 1990, Inkotanyi zitangiza urugamba rwo kubohora Igihugu Jenoside ikaba yaratangijwe muri Komini Kibilira.

Ntagisanimana avuga ko amagambo Leon Mugesera yavugiye ku Kabaya ko Abatutsi bazanyuzwa iy’ibusamo bagasubizwa aho bavuye muri Etiyopiya, yabaye umusemburo wo gushishikariza Abahutu kwica Abatutsi ariko yanagaragazaga aho umugambi ugeze utegurwa.

Agira ati, "Ibyo byumvikanisha uko umugambi wagendaga utegurwa kandi hanakorwa ubwicanyi mu bice bitandukanye, bigaragaza uburyo Jenoside yategurwaga ikanageragezwa kugeza umugambi ushyizwe mu bikorwa uko wakabaye muri Mata 1994".

Imibiri isaga 200 y’Abatutsi bishwe tariki 07 Mata 1994 ishyinguye ku Rwibutso rwa Kabaya

Atanga urugero rugaragaza ko abaturage n’Interahamwe bari barateguwe aho kuva ku itariki 07 Mata 1994, ku Kabaya bakoze Jenoside bakoresheje imbunda n’amagerenade, nyuma y’iminsi ibiri, i Kesho bikagenda gutyo, nyuma y’iminsi itatu na Ngororero bikaba gutyo, kimwe nk’uko byagenze ku itariki 13 Mata Kibilira ahishwe ibihumbi hafi 25 bari bahahungiye kuva mu 1990.

Agira ati, "None niba bitari byateguwe izo mbunda na gerenade abaturage babikuye he ku itariki zirindwi? Bari bazifite baranigishijwe kuzikoresha, nka Kesho umuturage yajugunye inzuki mu Batutsi ngo zibarye batatane babone uko babica, uwo mugambi yari awigiye he ako kanya niba atari awumaranye igihe?".

Umuyobozi w’Akarere ka Ngororero, Nkusi Christophe, na we yemeza ko kuba Abatutsi barishwe mu byiciro byikurikiranya mu gihe gito gishoboka bigaragaza uko Jenoside yari yarateguwe, dore ko ku Ngoro ya MRND hari haranazanwe Abatutsi bavuye i Kabgayi.

Nkusi avuga ko kuba Harabayeho urukurikirane rwo kwica Abatutsi iminsi yegeranye bigaragaza uko Jenoside yateguwe mbere

Nkusi asaba abaturage gukomeza gufata mu mugongo abarokotse Jenoside, birinda amagambo mabi abakomeretsa bakanirinda Ingengabitekerezo ya Jenoside, ahubwo bakihatira ibikorwa bikomeza kubagira umwe kuko u Rwanda rwahisemo kurwanya icyo ari cyo cyose cyatuma Abanyarwanda bongera gucikamo ibice.

Abarokokeye ku Ngoro ya MRND bongeye gucana urumuri rw’icyizere

Bibukiye ku ngoro ya MRND aho Abatutsi bahungiye bizera ko ubuyobozi buzabarengera

Ku gasozi ka Kesho kuhakura Abatutsi birwanagaho hifashishijwe inzuki zirabarya baratatana baricwa

CHENO ivuga ko uwo ari umurage wasizwe n’abo banyeshuri bigaga mu mwaka wa Gatanu n’uwa Gatandatu wisumbuye, ubwo bangaga kwitandukanya kw’Abahutu n’Abatutsi babisabwe n’abacengezi ku itariki ya 18 Werurwe mu 1997.

Umuryango wa Mwarimu witwaga Muligande Aloys watoje abanyeshuri b’i Nyange kurangwa n’ubumwe wahawe inka

Uwitwaga Uwamahoro Marie Chantal ni we wabaye uwa mbere mu kuvuga ati "Twese turi Abanyarwanda", kuko bari barabitojwe na mwarimu wabo witwaga Muligande Aloys.

Uwitwaga Ndemeye Valens we wari ufite ubumenyi mu bijyanye n’igisirikare yagerageje kurwanya abo bacengezi bahita bamwica, batangira no gutera za gerenade mu mashuri.

CHENO ivuga ko abari ingabo z’u Rwanda (Ex-FAR) hamwe n’Interahamwe zishinjwa gukorera Jenoside Abatutsi mu 1994 bari barahungiye mu cyari Zaire(Repubulika iharanira Demokarasi ya Congo y’ubu) ari bo bagarutse ari abacengezi.

Ingabo z’u Rwanda zari iza FPR-Inkotanyi zumvise icyo gitero ziri hafi y’iryo shuri ryisumbuye ry’i Nyange ni zo ngo zahise zitabara zitesha abo bacengezi barahunga nk’uko CHENO ikomeza ibisobanura.

Umuyobozi muri CHENO ushinzwe Ubushakashatsi, Rwaka Nicolas avuga ko abana b’Abanyarwanda ubu basabwa guharanira icyabahuza bakaba umwe, ndetse bakemera gukunda Igihugu bitangira abandi.

Rwaka agira ati "Ku banyeshuri b’i Nyange wakuramo inyigisho nyinshi, hari aho bagize bati ’ntabwo twemera kwitandukanya kuko abo dutanga barapfa’, umwana akagira ati ’ndemera guhara ubuzima bwanjye aho gutanga abandi."

Uwungirije Umukuru w’Urwego CHENO, Godeliève Mukasarasi avuga ko mu yandi masomo abari abanyeshuri b’i Nyange batanga harimo gushyigikira no guharanira igihuza abantu kurusha ikibatanya.

Harimo kandi gushyigikira isano y’ubunyarwanda Abanyarwanda bose basangiye, kurwanya ikibi no guharanira icyiza, kwanga akarengane ndetse no gutinyuka.

Umwana witwa Hirwa Remy Gentil wiga mu mwaka wa Kabiri wisumbuye muri icyo kigo cy’i Nyange avuga ko umuco w’ubutwari bigira kuri bakuru babo bawukomereje mu bikorwa byo gufashanya.

Ati "Turafashanya nyine niba wumva isomo runaka uragenda ugasobanurira mugenzi wawe, na we yaba afite icyo akurusha akakiguha, twiyemeje ko nta mwana ugomba kubona amanota ari munsi ya 60%."

Muri 46 bari abanyeshuri b’i Nyange bagabweho igitero n’abacengezi muri 1997 hasigaye 39, ubu bakaba barashinze Umuryango witwa Komezubutwari ushinzwe gufatanya na CHENO kwigisha ubutwari, cyane cyane mu babyiruka.

Sindayiheba Phanuel uyobora Komezubutwari avuga ko ingengabitekerezo ya Jenoside ikirimo kugaragara mu Karere k’Ibiyaga Bigari, Abanyarwanda ngo bakwiye guhaguruka bakayirwanya.

Bizeye imbere heza kubera imyuga bize

Ibyo babihera ku kuba ibyo bakora mu budozi n’ubukorikori, byaratangiye kujya ku isoko kandi bikagurwa, bakavuga ko nabo nibarangiza amasomo baziteza imbere, bikarushaho kubera abasuzugura abafite ubumuga urugero ko nabo bashoboye.

Igirimpuhwe Gedeon w’imyaka 23 y’amavuko, uvuga ko yatangiye kwiga imyuga muri iryo shuri, avuga ko ubundi akiri iwabo yahabwaga akato, kubera ubumuga bw’ingingo no kugira umugaga byatumaga abandi bamuheza.

Nyamara mu gihe amaze yitabwaho n’ikigo cya APAX Muramba, yize kudoda kandi afite icyizere cyo kuziteza imbere, kuko amaze kumenya neza kuboha imipira mu budodo kandi igakundwa.

Agira ati “Numvaga ntari umwana nk’abandi dore ko bagenzi banjye banengaga ngo kiriya ntacyo kizamara, ariko maze kubona ubufasha, mu mbaraga nkeya nabashije kugira ibyo menya kandi birakunzwe, baza kubigura barabikunze”.

Ingabire Esperence utazi kuvuga neza, dore ko atazi n’imyaka ye, aboha ibyitwa napero, bigurishwa ibihumbi 25Frw iyo byuzuye ari bitandatu, bigaragara ko imyuga ayumva neza.

Agira ati “Ndishimye cyane, ndaboha ibitambaro bakangurishiriza bakabijyana mu isoko bakongera kungurira ibikoresho bakamfasha, ndishimye cyane”.

Undi mukobwa witwa Igirimpuhwe Yvette ufite ubumuga bwo kutumva no kutavuga, we aboha imipira yo kwifubika ku banyeshuri akoresheje ubudodo, amaze imyaka ibiri aboha imipira kandi akaba abyiyumvamo kuko byamuje mu mutwe.

Igirimpuhwe avuga ko yizeye kuzibonera igishoro akiteza imbere

Igirimpuhwe wunganirwa n’umusemuzi, avuga ko yabanje kwiga amashuri yisumbuye, ariko akimara kurangiza icyiciro rusange cy’amashuri yisumbuye, yifuje kuza kwiga kuboha imipira kandi yifitiye icyizere cyo kwiteza imbere.

Agira ati “Nimara kurangiza amasomo nzajya mbohesha intoki, hanyuma amafaranga ngende nyakusanya, noneho nimara kubona inyungu nanjye nigurire imashini yo gukoresha kandi nzabigeraho kuko nzi kuboha neza”.

Umuyobozi w’ishuri rya APAX Muramba, Soeur Mukankubana Domina, avuga ko cyashinzwe n’abitwa ikigo cy’Abagabuzi b’amahoro ba Kristu Umwami, gifite icyicaro mu Ntara y’Amajyaruguru.

Avuga ko ikigo cyabo uko abana bagenda bakura bamwe bakomereza mu mashuri abanza, abandi bagakomeza ay’imyuga kandi bigaragara ko bibafasha kubaka icyizere cyabo cy’uko bazabaho mu minsi iri imbere.

Agira ati “Umuntu ufite ubumuga ni umuntu nk’undi n’ubwo mu muryango Nyarwanda bagifite ubujiji bwo kutakira abafite ubumuga, ariko guhera mu mwaka wa 2015 dutangira kwakira aba bana, hari umubare munini w’abagiye mu mashuri abandi baravuzwa, kandi bigira akamaro ku buryo bigaragaza ko umuco wo guheza abafite ubumuga ugenda ugabanuka”.

Umuyobozi wungirije ushinzwe imibereho myiza y’abaturage mu Karere ka Ngororero, Mukunduhirwe Benjamine, avuga ko abafite ubumuga bakora ibintu bitandukanye bishingiye ku bukorikori, ubuhinzi, ubuvumvu n’imyuga y’ubumenyi ngiro kandi bibinjiriza.

Agira ati “Abafite ubumuga nabo bagira uruhare mu iterambere ryabo kandi bakanarigirira Igihugu, kuko abafite ubumuga basigaye barateye intambwe yo kwitinyuka”.

Soeur Mukankubana avuga ko guheza abafite ubumuga bidakwiye

Umwe mu bayobozi mu Nama y’Igihugu y’abafite ubumuga, Uwambaye Marie Gaudence, avuga ko kwibona mu muryango mugari Nyarwanda ku bafite ubumuga, ari kimwe mu bituma babasha gukora bakiteza imbere, kuko iyo ufite ubumuga yihebye, burushaho kumugiraho ingaruka.

Byari ibyishimo gusezerera Ishimwe n’ababyeyi be bagataha mu rugo nyuma y’amezi atatu mu bitaro

Ubuyobozi bw’ibitaro bya Muhororo ahabereye ibyo bisa nk’ibitangaza, buvuga ko abana bacye cyane bavutse ku byumweru 27 ari bo bashobora kubaho, ariko bagerageje amezi atatu agashira uwo mwana afite ikilo kimwe n’amagarama 820, icyo ngo kikaba ari igipimo gishimishije cy’uko ubuzima bw’uwo mwana bumeze neza.

Umuyobozi mukuru w’ibitaro bya Muhororo, William Namanya, avuga ko uwo mwana w’umukobwa amaze kuvuka, yitaweho muri serivisi zita ku bana bavutse batagejeje igihe, kandi byatanze umusaruro kugeza ubwo nyuma y’amezi abiri bamukuye mu byuma bishyushya, agatangira konka kuko mbere bamugaburiraga binyuze mu miheha yabugenewe.

Agira ati “Ubundi umwana avukira mu byumweru 38 kugera kuri 41, bakavukana nibura ibilo biri hejuru ya 2 n’amagarama 500, ariko uriya yavutse hakiri kare, ndetse avukana ibilo bikeya, twamwitayeho kandi turabona nta bindi bibazo bivutse umwana azakura neza”.

Dr. Namanya avuga ko kuba umwana yavuka atagejeje igihe biterwa n’ibintu bitandukanye, birimo no kuba nyina umutwite yaba afite uburwayi runaka, bukaba bwatuma umwana avuka igihe kitageze.

Hakizimana n’umugore n’umwana basohotse ibitaro

Avuga ko umwana wavukanye bene ibyo biro ahabwa imiti imurinda udukoko tumutera kurwaragurika, kumurinda ubukonje, kumurinda isukari nke kuko ari byo bikunze kwica bene abo bana.

Akandi kazi kakozwe ngo uwo mwana ubuzima bwe bugende neza, harimo kwita ku isuku ye kuko ari ho udukoko twamutera uburwayi duturuka, ikaba igomba gukomeza kwitabwaho mu rugo kuko n’ubundi atarakomeza neza.

Agira ati ‘Uriya mwana ni igitangaza kuba twaramuvukishije agakura, navuga ko ari akazi gakomeye abakozi b’ibitaro bya Muhororo bakoze, tuzanakomeza kumusura, tumenye ubuzima bwe umunsi ku munsi”.

Hakizimana Emmanuel wo mu Murenge wa Ndaro akaba se wa Ishimwe Rusi, avuga ko yakiriye neza ibyo gusezererwa mu bitaro we n’umugore we n’umwana, kuko yajyaga agira impungenge z’uko ibitaro bitazashobora kumuvurira umwana.

Agira ati “Imana yumvise amasengesho yanjye yo kutisubiza umwana wanjye w’imfura, nanjye nzita ku isuku ye uko batugiriyemo inama ndashimira abaganga ubwitange bagize, ntako batagize”.

Imodoka y’ibitaro bya Muhororo yacyuye ababyeyi n’umwana

Nyina wa Ishimwe Rusi na we yishimiye kuba abaganga baramubaye hafi mu gihe cy’amezi atatu, kuko byari bikomeye cyane kwita ku mwana we.

Byari bigoye kwita ku buzima bw’uwo mwana

Iyakaremye Marie Beatrice uhagarariye serivisi y’abana bavutse, avuga ko kugira ngo Ishimwe Rusi abeho byasabye imbaraga za nyina n’iz’abaganga, kugira ngo bigende neza dore ko hari n’igihe yajyaga asubira inyuma.

Agira ati “Urumva yavukanye amagarama 790, bigera aho asigarana amagarama 600 ndetse n’ibitaro bya Kaminuza bya Kigali (CHUK) byatubwiye ko ntacyo byadufasha, ariko hamwe n’Imana n’abaganga turakora uko bishobotse arongera ariyongera agera ku kilo kimwe na 660”.

Iyakaremye avuga ko umwana atangiye konka amashereka yayobye akanyura mu nzira y’umwuka, bigatuma yongera gusubira inyuma akagera ku kilo kimwe n’amagarama 280, guhumeka biba ikibazo, ariko baramukangura arongera arazamuka akaba ageze ku kilo kimwe n’amagarama 835.

Uko ababyeyi bagomba kwitwararika

Ubuyobozi bw’ibitaro bya Muhororo bwabwiye ababyeyi ba Ishimwe Rusi, ko bitemewe ko uyu mwana bamukorakoraho mbere y’amezi atatu nabwo kandi abaganga babanje kumuha uburenganzira nyuma yo gusuzuma ubuzima bwe.

Dr Namanya avuga ko ubundi abana bavutse munsi y’ibyumweru 27 badakunze kubaho

Nyina w’umwana kandi agomba kumuhora hafi bishoboka nta kindi yitaho, kuko aba agomba gusuzuma niba nta bindi bibazo agira, byaba iby’ubukonje cyangwa kuba yafatwa n’uburwayi akihutira kubimenyesha abaganga bamwegereye, dore ko bamushinze ikigo nderabuzima cya Ntobwe kimwegereye.

Mu gihe cyose nyina w’umwana yibagiwe agasuhuza umuntu, agomba kongera kwegera umwana ari uko abanje gukaraba intoki, akaba yahawe umuti usukura intoki anahabwa amasabune yo kumufasha kumesa.

Reba ibindi muri iyi video:

Ntibahagaritse gusoroma icyayi n’ubwo uruganda rwa Pfunda rwangijwe n’ibiza

Mu Karere ka Ngororero mu Murenge wa Rubaya, ni hamwe hahingwa icyayi cyinshi kandi gikunzwe ku isoko, kiri ku mwanya wa kane w’icyayi gikunzwe mu Rwanda no mu Karere k’Afurika y’Iburasirazuba.

Abahinzi bacyo bavuga ko bishimira kugihinga kuko babigereranya n’inka idateka, bitewe n’uko bahembwa buri kwezi, ariko bagasaba Leta kubaba hafi mu kazi bakora kugira ngo icyayi cy’u Rwanda gikomeze kuba icya mbere, ari ho bahera basaba nkunganire ku ifumbire kuko isigaye ihenze.

Nzabakurikiza Juvenal watangiye guhinga icyayi mu 1972 atangiriye ku biti 500, avuga ko amaze kugira hegitare 35 hamwe n’umuryango we, kandi ashobora kweza toni 20 ku kwezi.

Ibintu avuga ko byamutungiye umuryango w’abana 20, ndetse agashobora kubigisha mu mashuri meza.

Ati “Icyayi gifite akamaro kuko kiduha amafaranga buri kwezi, umuntu ufite icyayi ntashobora kubura amafaranga kuko aba yiteguye guhembwa.”

Kamaliza we avuga ko guhinga icyayi bibaha amafaranga buri gihe, bigatuma bamera nk’abakozi ba Leta.

Ati “Ntaho dutaniye n’abakozi ba Leta kuko icyayi kiraduhemba, ntitubura amafaranga kubera ubu buhinzi.”

Bizihije umunsi wahariwe umuhinzi w’icyayi

Abahinzi b’icyayi n’ubwo bahembwa mu kwezi bavuga ko batangiye guhomba kubera igiciro cy’ifumbire cyazamutse kikagera ku mafaranga 890 kivuye kuri 600, ibintu bavuga ko Leta ikwiye kubafasha.

Nzabakurikiza ngo ubwe akoresha nibura Toni 20 mu cyayi cye, akavuga ko ifumbire ikomeje guhenda byazagora umuhinzi kubona icyayi cyiza nk’uko byari bisanzwe.

Ati “Ubwiza bw’icyayi biterwa n’uko kiba cyitaweho, mu gihe ifumbire ikomeje kuzamuka, umuhinzi bizamugora usange icyayi cyari gikunzwe gisubiye inyuma.”

Mutabazi Havugimana Jean, umuyobozi w’uruganda rwa Rubaya Tea Factory rukorera mu Karere ka Ngororero, avuga ko ifumbire yazamutse ariko bizeye ko Leta izabona igisubizo.

Agira ati “Intambara y’u Burusiya na Ukraine yatumye ibiciro by’ifumbire byiyongera bigabanya n’inyungu umuturage agomba kubona kuko ni umushoramari, iyo inyungu ibaye nkeya nabo ntibinjiza cyane n’ubwo akazi gakomeje.”

Bamwe mu bahinzi baganiriye na Kigali Today bavuga ko mu mezi atatu ashize, batangiye kubona umusaruro w’icyayi ugabanuka ariko ntibaramenya impamvu.

Umwe ati “Ntabwo tuzi icyabiteye, ariko icyo twabonye ni uko umusaruro wagabanutse, nkanjye aho nakuraga ibiro 80 cyangwa 100 ndimo kuhakura 60, nibwo dutangiye kubibwira abashinzwe ubuhinzi ariko ntituramenya icyabiteye.”

Mutabazi avuga ko uretse kuzamuka ku biciro by’ifumbire, abahinzi b’icyayi bahuye n’ibibazo bitewe n’ihindagurika ry’ikirere.

Agira ati “Imihindagurikire y’ikirere itugiraho ingaruka aho izuba riva kare, naho imvura iguye hakaza urubura kandi rugira ingaruka ku musaruro. Ikindi kibazo kitugoye kirebana n’ibiza bifunga imihanda bigatuma icyayi kitagerera ku ruganda igihe, kandi uko icyayi gitinda kugera ku ruganda bigira ingaruka ku bwiza bwacyo.”

Mu myaka 16 ishize uruganda rwa Rubaya rweguriwe ikigo cya Rwanda Mount Tea, ubuso buhingwaho icyayi bwarazamutse buva kuri Hegitare 1050 muri 2006 bugera kuri hegitare 2050, mu gihe umusaruro wavuye kuri Toni 1500 ugera kuri toni 3000.

Mutabazi Havugimana Jean, Umuyobozi w’uruganda rw’icyayi rwa Rubaya

Igiciro cy’amababi mabisi y’icyayi cyavuye ku mafaranga 88 ku kilo mu 2006, muri uyu mwaka ikilo kikaba kigura 400Frw.

Ubuyobozi bw’Akarere ka Ngororero butangaza ko bugiye gukemura ikibazo cy’imihanda ituma icyayi gitinda mu nzira, bukemeza ko bwateguye amafaranga azakoreshwa mu kubaka imihanda ndetse imwe izashyirwamo kaburimbo, bikazafasha abahinzi kongera ubuso buhinzeho icyayi ndetse hakaba hatekerezwa no kubaka uruganda rwa kabiri rw’icyayi.

Ati “Abana bayigumanye uwo mugabo amaze kuyanga ihita iturika umwe ahita apfa undi imukomeretsa mu maso. Umurambo wahise ujyanwa ku bitaro bya Muhororo, uwakomeretse na we agezwa kwa muganga kugira ngo yitabweho”.

CIP Mucyo avuga ko bamenye amakuru ko iyo Gerenade ari iyatakaye mu bihe by’intambara atari gerenade yari ibitswe n’abantu ngo bayikoreshe mu bikorwa bibi.

CIP Mucyo asaba abantu bakuru ndetse n’abakiri bato kwirinda gukinisha ibyuma batoraguye batabizi ndetse aho babibonye bagatanga amakuru ku nzego z’umutekano kugira ngo bitegurwe.

Ati “Haba umwana cyangwa umuntu mukuru ntawe ukwiye gukinisha ikintu atazi, by’umwihariko ababyeyi bakwiye kubikangurira abana ndetse na bo aho babibonye bagatanga amakuru ku buyobozi bubifite mu nshingano kugira ngo babafashe kubituritsa bidahitanye ubuzima bw’abantu”.

Impamvu asaba abantu kwitondera gukinisha ikintu batazi ni uko hari aho usanga ibikoresho by’intambara byaragiye bitakara bikarengwaho n’itaka bikazagaragara hashize igihe kirekire.

Ikaramu yandika neza nk’izisanzwe

Uwo muti w’ikaramu bawukora bifashishije ibimera bikikije ikigo, aho babibyaza umuti usa nk’uwikaramu zisanzwe, bakongeramo umuti w’ubutabire utuma ibyanditswe bidasibama cyangwa ngo bihinguranye urupapuro, kandi bakawuha ibara bitewe n’ikaramu bashaka gukora.

Uwitonze Divine wiga mu mwaka wa gatanu w’ibinyabuzima n’ubutabire, avuga ko yari azi ko umuti w’ikaramu ukorerwa mu ruganda gusa, kuko atari azi ko yifashishije ibyatsi bikikije ikigo bashobora gukoramo ikaramu yandika neza.

Agira ati “Ikaramu yacu yandika neza, kandi hano mu kigo tworoheje igiciro buri wese akabona ikaramu yishyuye igiceri cya 100Frw, mu gihe ikaramu isanzwe yishyurwa 200Frw, turasaba ko ikaramu yacu yagezwa ku isoko”.

Kugira ngo umunyeshuri abashe kubona iyo karamu asabwa kuzana iyashizemo umuti, hanyuma bakamwongereramo undi ari wo bikoreye mu bimera, bakandikisha nk’amakaramu asanzwe yo mu nganda.

Umuti bakoresha bawukora mu bimera bibakikije

Ubwo batahaga inyubako izakorerwamo n’abakozi ba College ADEC Ruhanga, Depite Nyabyenda Damien wize kuri iryo shuri akaba yari yaje no kwifatanya n’abanyeshuri kwishimira icyo gikorwa, yavuze ko azakomeza gukora ubuvugizi kugira ngo ikigo gitere imbere dore ko inyubako zacyo zishaje.

Agira ati “Ikigo kizajya kigararaza ibyo gikeneye hanyuma hakurikijwe ubushobozi buhari ibisanwa bikorwe. Twishimiye ko n’ubwo inyubako zishaje abana bafite ibyo bazi gukoram bafatanyije n’abarimu n’abandi bafatanyabikorwa”.

Asaba ko abana bagira uruhare mu gufasha ibikorwa bitandukanye by’iterambere bahereye ku byo bazi gukora, birimo no kuvomerera ubutaka, hifashishijwe imashini za robo (Robot) batangiye gukora.

Naho ku kijyanye no gukora amakaramu, avuga ko abana bakwiye kugaragaza ko ibyo bazi gukora, bigira uruhare mu gukemura ibikenewe mu muryango Nyarwanda, kandi bishimishije kuko abana ibyo biga babasha gushyira mu bikorwa.

Agira ati “Turabashishikariza gukomeza bikava ku rwego rw’ikigo bikajya ku rwego rw’Igihugu, kuko niba umwana yabasha kwikorera ikaramu agaha bagenzi be, ni na ngombwa ko byarenga ikigo bikagera ku rwego rw’Igihugu”.

Ikaramu bazikora bongera umuti mu zamaze gushiramo

Umuyobozi wa College ADEC Ruhanga, Biziyaremye Bernard, avuga ko kuba biyujurije inyukako yo gukoreramo yatwaye agera kuri miliyoni 35Frw, bizatuma nibura ibyo Leta ishoboye kubafasha gusana bikorwa kuko ku bufatanye n’ababyeyi hari ibyo ikigo gishoboye.

Avuga ko kwiga siyansi bisaba ko nibura baba bakeneye isomero ryiza ryafasha abana, n’inyubako z’amashuri zijyanye n’igihe kugira ngo bagere ku musaruro w’ibikorwa.

Asaba inkunga mu kuzamura siyansi, kandi abana bakivumburira ibintu bashobora gukora, kuko nko ku ikaramu ari bo bayitekereje kandi ibikoresho bakoresha ari bo babyivumburira.

Barifuza ko iyi karamu yagezwa ku isoko ari umwimerere

College ADEC iherutse kwegukana igihembo cya mbere ku rwego rw’Igihugu, mu mashuri yigisha siyansi, kubera gukora isabune ifasha abanyeshuri, akaba yifuza ko hakoroshywa ibijyanye n’ubuziranenge mu bigo by’amashuri, ibyo abana bazi gukora bikaba byagezwa ku masoko.

Bakora n’imashini zishobora guterura ibintu no kuvomera ibihingwa

Abaturage bitabiraga ku bwinshi ubukangurambaga bwo kurwanya ruswa n’akarengane

Hagaragajwe ko mu bibazo byakiriwe harimo n’icyiciro kigizwe n’ibibazo 117 byari byarahawe umurongo ariko abaturage bakagaragaza ko batanyuzwe, icyiciro cya kabiri kigizwe n’ibibazo 171 byari bitarabonerwa ibisubizo, n’icyiciro cya gatatu cy’ibibazo 10 bizakurikiranwa n’Urwego rw’Umuvunyi.

Umuvunyi Mukuru wungirije, Odette Yankurije, yavuze ko Urwego rw’Umuvunyi rwasanze ibibazo byinshi bishingiye ku makimbirane n’ubuharike bigateza ibindi bibazo birimo nk’ imirire mibi n’igwingira, guta amashuri kw’abana, isuku nkeya n’ubukene.

Hanagaragajwe kandi ibibazo birimo gusaba ubufasha ku bijyanye n’imibereho myiza, no kurangirizwa imanza, amakimbiurane ashingiye ku mitungo n’ihohoterwa rishingiye ku gitsina aho byanagaragaye ko hari n’abagabo bahohoterwa bakabiceceka.

Umuvunyi Mukuru Wungirije, Yankurije Odette, yasabye ko ibibazo byagaragaye bikurikiranwa bikarangizwa

Mu ishusho rusange y’ibibazo byagaragajwe kandi, Yankurije yavuze ko harimo n’ibibazo binini, aho abaturage bafite ubutaka bubaruye kuri Leta n’ibijyanye n’ingurane, hakaba harafashwe umwanzuro ko ibibazo byose bigomba kubonerwa ibisubizo, by’umwihariko ibihuriweho n’inzego zitandukanye bityo umuturage akabaho mu mudendezo.

Umuvunyi Mukuru avuga ko kizira gusiragiza umuturage

Ubwo hatangizwaga ubukangurambaga bw’iminsi itanu bwo kurwanya ruswa n’akarengane mu Karere ka Ngororero, Umuvunyi Mukuru, Nirere Madeleine, yabwiye abayobozi b’inzego z’ibanze ko gusiragiza umuturage bikwiye gufatwa nka ‘kirazira’ kuko umuturage udakemuriwe ikibazo ku gihe bimuteza ibindi bibazo.

Yagaragaje ko ubuyobozi bw’inzego z’ibanze, hari aho butabakemuriye ibibazo ku gihe, bigatuma batsindwa mu nkiko, kandi bakabana nabi n’abaturanyi babo kuko bamaze kuba abanzi nyuma yo kubura ababunga ngo bumvikane aho kuregana.

Umuvunyi Mukuru yagaragaje ko ibibazo yakiriye bishingiye ku makimbirane mu miryango, ihohoterwa rishingiye ku gitsina, urugomo n’ibibazo byo kurangiza imanza, byose bikaba bishobora gukemuka igihe ubuyobozi bwashyiramo imbaraga bigakemuka ku gihe.

Abayobozi b’inzego z’ibanze basabwe gukemura ku gihe ibibazo by’abaturage

Yagize ati “Birasaba ko abayobozi bamanuka bakajya aho ibibazo biri aho kubwira umuturage ngo jya kuri RIB, jya ku Murenge, biragaragara ko inzego z’ibanze harimo imbaraga nkeya. Dukeneye ko inzego z’ibanze zigenda zigakemura ikibazo ku kibazo kuko byose nta gikomeye kirimo”.

Umuyobozi w’Akarere ka Ngororero, Nkusi Christophe, avuga ko ibibazo abaturage bagaragarije Umuvunyi birimo ibyakemukira mu miryango koko, kandi ko bagiye gushyiramo imbaraga abayobozi bakegera abaturage, kugira ngo ibibazo byabo bikemukire ku gihe.

Umuyobozi w’Akarere ka Ngororero yijeje Urwego rw’Umuvunyi ko abaturage bagiye kwegerwa

Abaturage basabaga n’ubufasha mu mibereho no kurangirizwa imanza

Basoje ubukangurambaga bafata ifoto y’urwibutso

Abasoromyi b’icyayi barifuza kugenerwa icyo banywa

Umwe mu basoromyi avuga ko atajya anywa icyayi gitunganyirizwa ku ruganda rwa Rubaya, kuko atabona amafaranga yo kukigura, kandi uruganda rukaba rutakibaha ngo bumve uko kimeze.

Agira ati “Ntabwo tunywa icyayi hano sindakibonaho, iyo nabonye udufaranga nanjye njya kugura kimwe gifunze mu dushashi twa 100frw cyangwa icya 50frw gutyo”.

Aba basoromyi bifuza ko bajya bahabwa icyayi cyo kunywa, kuko bagira uruhare mu gutunganya umusaruro wacyo, dore ko ubu abahinzi bo bagenerwa icyayi banywa.

Ubusanzwe abahinzi b’icyayi ngo bahabwa icyo kunywa, aho buri wese ahabwa ikilo kimwe buri kwezi, kandi akishyura make kuko atanga 300Frw gusa mu gihe ikilo kimwe cy’icyayi cyumye ubusanzwe kigura ibihumbi bitatu (3000Frw).

Icyakora Umunyamabanga Nshingwabikorwa w’Umurenge wa Kabaya, umwe muri itandatu ihinga icyayi, Ndayisenga Simon, avuga ko n’igihabwa abahinzi ari gikeya ugereranyije n’uko bangana, dore ko abahinzi basaga 1700 bahabwa gusa ibiro 70 by’icyayi cyo kunywa ku buryo kitakibakwiriye.

Agira ati “Abahinzi baragenda biyongera, icyakora batangiye no kumenyera kunywa icyayi kuko n’ibyo 70kg bahabwaga hari igihe ukwezi kwashiraga batarabimara, ariko ubu babaye benshi ntabwo cyabakwira”.

Abasoroma icyayi ngo baheruka bandikirwa umubyizi wabo ntibamenya uko kiryoha

Umuyobozi w’Akarere ka Ngororero ushinzwe iterambere ry’ubukungu, Uwihoreye Patrique, avuga ko abahinzi baramutse badahabwa icyayi kandi ari bo bagihinga byaba bibabaje, akaba agiye kubegera ngo basuzume ahari ikibazo.

Abasoromyi barasaba kuzamurirwa umushahara

Abasoroma icyayi kandi bavuga ko amafaranga bahembwa atakijyanye n’ibiciro ku isoko, kuko ku munsi bigoye kuba umuntu yakorera amafaranga aguze ikilo kimwe cy’ibishyimbo, dore ko umusoromyi ahembwa amafaranga 1.200frw ku munsi.

Bizimana umaze igihe muri ako kazi, asaba ko bakongezwa amafaranga kuko ayo bahembwa ntacyo akibamariye, ugereranyije n’abandi bakora akazi ka bubyizi, kandi ibiciro ku isoko ry’ibiribwa byarazamutse.

Agira ati “Amafaranga nkorera ntiyagura n’ikilo kimwe cy’ibishyimbo, none se wowe urumva atari ikibazo, iyo tubibwiye ubuyobozi bwa kampani dukorera, badusubiza ko twakwigendera kuko abakeneye akazi ari benshi”.

Ku mafaranga make ahembwa abasoromyi, Uwihoreye avuga ko hagiye kwigwa uko bahabwa ayisumbuyeho, kandi hari kwigwa uko amafaranga basoromera ku munsi yahinduka, ugereranyije n’ahandi hakorera ba nyakabyizi.

Agira ati “Umuyedi w’umufundi arahembwa 2500Frw ku munsi mu gihe umusoromyi we ahabwa 1200Frw ku munsi, turimo kwiga uko uwo mubyizi wazamuka ukegera amafaranga nk’ay’umuyedi w’umufundi”.

Uruganda rw’icyayi rwa Rubaya

Ubuyobozi bw’Akarere ka Ngororero bugaragaza ko umusaruro w’icyayi mu mirenge igihinga, wikubye hafi inshuro ebyiri mu myaka ibiri ishize, nyuma yo kongera ubuso buhingwaho icyayi, ubu umusaruro ukaba ugeze hafi toni ibihumbi 3000 ku mwaka, bitunganyirizwa mu ruganda rwa Rubaya.

Abahinzi bibumbiye muri Koperative ihinga icyayi kigemurwa ku ruganda rwa Rubaya, (KOTRAGAGI), bavuga ko nabo bagerageje kongera umusaruro ku buryo mu bahinzi basaga 1700, hari ababarirwa muri 20 binjiza amafaranga saga miliyoni imwe kugeza kuri eshatu buri kwezi.

Ayo marerero yita ku bana b’ababyeyi basoroma icyayi, aho bazana abana babo mu gitondo, bakirirwana n’abakozi batojwe uko bitabwaho kugeza nimugoroba, bagahabwa amafunguro atuma barwanya imirire mibi bakaniga amasomo ajyanye n’ikigero cyabo.

Nyirakaratwa Donatha ukorera mu irerero ry’icyayi rya Rubaya avuga ko kuva muriNzeri 2018 batangiza irerero, bari bafite abana baza bari mu ibara ry’umutuku kubera imirire mibi, kuko ababyeyi babo batabonaga umwanya wo kubitaho kubera imirimo yo kuzindukira mu cyayi.

Nyirakaratwa avuga ko abana bashyiriweho amafunguro ya mu gitondo agizwe n’igikoma n’amata, n’amafunguro ya saa sita ateguye neza ku buryo nta mwana n’umwe ukiri mu miririe mibi, kuko baba bitaweho bihagije.

Agira ati “Hari abana baje bari mu mutuku, abajyanama b’ubuzima baradufashije baza kubadupimira bakanatugira inama z’uko bitabwaho, biragoye ko buri mubyeyi yakwibonera amata yo guha umwana, ariko hano uruganda rutanga amata n’igikoma n’ibyo kurya abana bagasubira mu buzima bwiza”.

Aho abana baruhukira mu irerero rya Rubaya

Avuga ko usibye kuba umwana yitabwaho mu kuboneza imirire n’uburezi, bitunatuma ababyeyi bagiye gusoroma no gukorera icyayi, bacyura umubyizi ugaragara kuko abana baba batabatesheje umwanya.
Agira ati, “Umubyeyi wasize umwana hano aba asoroma icyayi cyinshi kurusha iyo yajyanye umwana, ibyo bituma yunguka kandi n’uruganda rukabona umusaruro uhagije”.

Umuyobozi w’uruganda rwa Rubaya avuga ko umubyeyi wasoromaga ibilo 30 by’icyayi kubera kubikorana n’umwana, ubu asigaye asoroma yikubye kabiri akaba yageza no kuri 70kg ku munsi akinjiza amafaranga menshi n’uruganda rukabona umusaruro uhagije wo gutunganya.

Avuga ko hari gahunda yo kubaka n’ishuri ry’incuke rizajya ryakira abo bana, bagejeje igihe cyo kwiga mu y’inshuke, kugira ngo bakomeze kubaho mu buzima bwiza badasubiye mu mirire mibi cyangwa ngo bave mu ihsuri.

Agira ati “Ubu dufite ubushobozi bwo kwakira abana 50, ariko twavuga ko turi hafi kongeraho abandi 25 kuko tugiye kubaka kandi twabonye n’amafaranga yo kubikora, turanitegura kubaka ishuri ribanza, ibyo byose ni inyungu y’umwana kuko tuzakomeza kumwitaho”.

Irerero ry’uruganda rwa Rubaya

Mu rwego rwo guteza imbere amarerero hagamijwe kuzamura uburezi no kurwanya igwingira n’imirire mibi ku bana, ubuyobozi bw’Akarere ka Ngororero butangaza ko hamaze kubakwa amarerero ajyanye n’icyerecyezo 10, amarerero 20 y’ibanze n’amarerero ashingiye ku ngo 1113.

Ayo marerero yose yakira abana basaga ibihumbi 23, bitabwaho n’ababihuguriwe, (Care Givers) basaga 1100, abana bakirwa bakaba ari abari hejuru y’amezi umunani kugeza ku myaka ine aho bava bajya gutangira mu mwaka wa mbere w’amashuri y’incuke.

uruganda rw’icyayi rwa Rubaya rukikijwe n’imirima y’icyayi

Ubwo Jenoside yakorerwaga Abatutsi yabaga yari afite imyaka 9 gusa, akaba yarakuranye ipfunwe ry’uko ababyeyi be bombi bayigizemo uruhare.

N’ubwo yari akiri muto, nyuma ya Jenoside yisanze ari we ukurikirana iby’iwabo bityo bituma yigunga kubera ko ababyeyi be bombi bari bafunze bakurikiranyweho gukora Jenoside yakorewe Abatutsi.

Mizero ni umwe mu barinzi b’igihango 10 bo muri 2022

Ubwo yashimirwaga na Madamu Jeanette Kagame nk’umwe mu barinzi b’igihango 10 ku wa gatandatu tariki 12 Ugushyingo 2022, Mizero yavuze ko yabaye muri ubwo buzima kugeza igihe yisanze mubo Leta yishyuriraga amashuri batishoboye.

Yagize ati “Natangiye guhumuka ari uko nisanze mu bo Leta yishyuriraga amashuri binyuze muri gahunda ya MINALOC yo gufasha abatishoboye, ni bwo natangiye gusobanukirwa ko Leta itarobanura, ko amahirwe ahari asaranganwa Abanywaranda bose nta kuvangura”.

Yakomeje agira ati “Ndi muri Kaminuza nabashije gutanga ubuhamya mu biganiro by’ubumwe n’ubwiyunge muri ONAP, nkomeza kwitabira gahunda za Ndi umunyarwanda kandi byagiye bimfasha biranyorohera.
Maze gukira nafashe igihe mfasha urubyiruko rushobora kuba rugiheranywe n’ingaruka z’aya mateka y’ubuzima bukomeye rwanyuzemo cyangwa rwabayemo haba muri Jenoside yakorewe Abatutsi na nyuma yayo”.

Ubwo bufasha yatanze bwanyuze mu muryango yashyinze mu 2013 witwa Mizero Care Organization, ukaba ufite intego yo gufasha urubyiruko gukira ibikomere byatewe n’ingaruka z’amateka mabi ya Jenoside yakorewe Abatutsi mu 1994 ndetse na nyuma yayo, bikabafasha gusohoka mu bwigunge, gukira ibikomere, kwiteza imbere no guteza imbere Igihugu.

Muri 2017 umushinga wa Mizero Care Organization w’ibikorwa byo gufasha urubyiruko guhangana n’ibibazo by’ubuzima bwo mu mutwe no gutanga umusanzu mu iterambere ry’igihugu, wahembwe na Madam Jeanette Kagame igihembyo cy’urubyiruko rw’indashikirwa.

Mizero ati “Muri 2021 umushinga wacu “Vuga ukire”, wahembwe nk’umushinga ukoresha ikoranabuhanga mu gutanga ibisubizo mu buzima bwo mu mutwe, byadushoboje kandi kuba mu mishinga ikiri mito 30 yo muri Afurika”.

Mizero asanga kuba yagizwe umurinzi w’igihango, ari umwanya mwiza wo gutekereza no gufatanya na buri munyarwanda wese.

Ati “Kuri uyu munsi twagizwe abarinzi b’igihango, ni umwanya mwiza wo gutekereza uruhare rwacu n’inshingano zacu, mu gufatanya na buri munyarwanda wese, kurushaho gusigasira ibyiza byagezweho, mu gushimangira ubunyarwanda sano muzi dusangiye, bikaba umwihariko kuri jye kuko uyu munsi nagizwe umurinzi w’igihango hamwe n’abandi bagize uruhare rukomeye mu kurengera abicwaga muri Jenoside mu gihe umuryango wanjye wo wayigizemo uruhare”.

Akomeza agira ati “Mfite ishyaka n’umuhate wo kuziba icyuho, mpamya ko imbuto nasaruye muri gahunda ya Ndi umunyarwanda nzazibiba mu rungano. Tubasezeranyije ko tutazatatira igihango cyo gukunda u Rwanda n’Abanyarwanda, kandi urumuri mutumurikira rw’ubumwe, ubudaheranwa, arirwo tuzakurikira duharanira kurusakaza mu muco kuri bose, dufasha abagifite ibikomere gukira, duhangana n’imvugo zibiba u rwango n’amacakubiri ndetse n’ingengabitekerezo ya Jenoside”.

Kugeza ubu, Mizero Care Organization imaze gufasha urubyiruko 455 bakomoka mu turere ikoreramo, aho ruhurizwa ahantu hatekanye ragakorerwa ubuvuzi bw’imitekereze n’ibyiyumviro bya muntu.

Bashyize indabo ahashyinguye Intwari z’Imena

Mu buhamya bwahatangiwe bagaragarijwe uko igitero cy’abacengezi cy’i Nyange cyahitanye abanyeshuri barwindwi, kubera ko bari banze kwivangura bashingiye ku bwoko nk’uko babisabwaga n’abicanyi.

Perezida w’Ishyirahamwe ry’abarokotse igitero cy’i Nyange, Sindayiheba Phanuel, yagaragarije abashyitsi banateye inkunga igikorwa cyo kubaka ikimenyetso cy’Intwari i Nyange, ko abarokotse bakomeje inzira yo kwigisha Ubunyarwanda, kandi urubyiruko rurimo kubigiraho, ku buryo ubutwari bagaragaje butazasubira inyuma.

Abashyitsi basuye Igicumbi cy’Ubunyarwanda kibumbatiye amateka y’Intwari z’Imena z’abanyeshuri b’i Nyange, basobanurirwa ko ari ho hashibutse imbuto ya Ndumunyarwanda, ubwo bangaga kwitandukanya bakurikije icyitwaga amoko y’icyo gihe, mu ijoro ryo ku wa 18 rishyira uwa 19 Werurwe 1997.

Umuyobozi wungirije wa CHENO ashyira indabo ku mva

Minisitiri Gatabazi yashimye umubano mwiza hagati y’u Rwanda n’Intara ya Rhenanie Palatinat urangwa n’ibikorwa birimo, kubaka Igicumbi cy’amateka y’Intwari z’Imena z’abanyeshuli b’i Nyange, kubaka amashuri n’ubwiherero hirya no hino mu mirenge.

Yagize ati “Turashimira umubano hagati y’Ibihugu byombi, kandi turashimira uko ibikorwa byanyu bigira uruhare mu iterambere ry’Igihugu, tuzakomeza kunoza ubutwererane no kunoza umubano”.

Mu bindi bikorwa harimo kubaka ibigo nderabuzima no gushyiramo ibikoresho, gutanga inyunganirangingo no kuvuza abafite ubumuga, guteza imbere siporo n’imyidagaduro, no kwigisha imyuga urubyiruko n’abakuze.

Basobanuriwe amateka y’igitero cya Nyange cyahitanye abanyeshuiri barindwi

Minisitiri Perezida Malu Dreyer na we yavuze ko uwo mubano uzakomeza kujya mbere, kandi ugakomeza kurangwa n’ubutwererane bw’impande zombie, ndetse ko bashimira byimazeyo uko Abanyarwanda bashishikajwe no kunga ubumwe.

Intara ya Rhenanie Palatinat ifitanye umubano n’u Rwanda kuva mu 1982, ikaba itera inkunga ibice bitandukanye by’Igihugu mu kurwanya ubukene no guteza imbere uburezi.

Igicumbi cy’Intwari z’Imena cyasuwe n’abashyitsi

Batemberejwe ibice bigize Igicumbi cy’Intwari z’Imena

Avuga ko ibice by’Igihugu byangizwa n’isuri ari ibyo mu misozi miremire y’Intara z’Uburengerazuba n’Amajyaruguru, aho usanga hari n’igihe isuri itwara ibihingwa by’abaturage ikangiza n’ibikirwa remezo.

Kubana avuga ko kubera isuri, Igihugu gihomba amafaranga menshi yo gusaba ibyo yangije, aho gutakaza amafaranga asaga miliyari 180Frw buri mwaka Leta ishora mu kongera kugura indumbutabutaka, ngo abaturage babone umusaruro.

Agira ati "Ubutaka iyo butwawe na Nyabarongo bujya gukiza ibindi bihugu, tugahindukira tukajya kugurayo ibyo kurya, tugahomba ubutaka n’amafaranga yakabaye yubaka amashuri, amavuriro n’ibindi bikorwa byadufasha kwiteza imbere, ni yo mpamvu kurwanya isuri bikwiye kuba umuco wa buri wese ni inyungu z’umuturage".

Agira inama ubuyobozi kwifashisha abakora mu bucukuzi bw’amabuye y’agaciro nabo bakagira uruhare mu gusubiranya aho bangiza, kuko ubucukuzi ari kimwe mu bitera isuri kandi biteganyijwe ko ahacukuwe hasubiranywa hagaterwa ibiti hagasanwa.

Umuyobozi w’Akarere ka Ngororero, Nkusi Christophe, avuga ko abaturage bakwiye kwishakamo ibisubizo byo kurwanya isuri, aho gutegereza kuzabikora ari uko hagaragaye ingaruka zirimo no gutakaza ubuzima igihe cy’ibiza.

Agira ati "Ni uruhare rwacu kugira ngo twishakemo ibisubizo, duharanira iterambere ry’Igihugu cyacu, niba ari imiganda tuyitange ariko turwanye isuri itwangiriza, kandi dufatanyije ubuyobozi n’abaturage byose tuzabigeraho".

Muri uku kwezi kwahariwe ibikorwa by’ubukorerabushake, urubyiruko rw’Akarere ka Ngororero rwakoze umuganda wo kurwanya isuri ku buso bwa hegitari enye, kandi rugaragaza ko ruzakomeza ibyo bikorwa mu kwezi kose.

Umuhuzabikorwa w’urubyiruko rw’abakorerabushake muri ako karere, avuga ko muri uyu mwaka bazarwanya isuri ku buso bungana na hegitari 300, kandi bizatwara gusa ibihembwe bibiri kuko batangiranye imbaraga nyinshi.

Agira ati "Twihaye intego y’umwaka ubu tumaze kurwanya isuri kuri hegitari 24, biraduha icyizere cy’uko izo zisigaye tuzazikora vuba tukazirangiza tukarinda ko ubutaka bukomeza gutwarwa n’isuri, kuko byagaragaye ko yateza inzara n’ubukene bukabije".

Akarere ka Ngororero kari mu dukunze kwibasirwa n’ibiza by’imvura nyinshi igwa igasenya amazu ikangiza n’ibikorwa remezo, kubera isuri y’amazi menshi amanuka ku misozi, kurwanya isuri bikaba bishobora kugabanya ibyo byago kandi hakirindwa ko ubutaka bwera bukomeza gutwarwa n’amazi.

Minisitiri Kayisire asaba ko ubuhinzi bw’icyayi bwagira uruhare mu kurwanya imirire mibi

Yabitangarije ku wa 29 Nzeri 2022 mu ruzinduko rw’akazi mu Karere ka Ngororero, ubwo yasuraga koperative y’abahinzi b’icyayi, COTRAGAGI, ikorera mu Mirenge ya Muhanda, Kavumu, Sovu, Kageyo yo mu Karere ka Ngororero n’imirenge ya Jomba na Muringa yo mu Karere ka Nyabihu.

Umwe mu bahinzi avuga ko ahinga kuri hegitari umunani, kandi akaba yarabashije kwishyurira abana umunani muri kaminuza, naho bane barangije amashuri yisumbuye, ubu akaba arimo kurihira abuzukuru.

Avuga ko n’ababyeyi b’abo buzukuru bamwigiraho bakabasha gutangirira ku biti nka 500 by’icyayi, kugira ngo bazibesheho neza kuko na we yari atuye mu Murenge wa Muhanda kure y’umujyi, ubu akaba yarimukiye ku mujyi wa Kabaya aho atuye neza.

Agira ati “Iyo mirima mfite ntabwo nyihabwa ku buntu, ahubwo ndayigura nsarura nka nka toni 25 iyo umusaruro wabaye neza. Ntabwo nzi kubara amafaranga kuko ntize ariko ntabwo nabura kubika miliyoni n’igice ku kwezi, ndasaba abafite amasambu kwihatira guhinga icyayi, bakareka utwo turayi tutabaha umusaruro”.

Minisitiri kayisire yasobanuriwe uko ubuhinzi bw’icyayi buhagaze

Iyi koperative ihinga icyayi ku buso bungana na hegitari 935.936, ifite abanyamuryango 1,765 ikaba irimo kwagura ubuso buhinzeho icyayi kuri hegitari 170, kandi abahinzi b’icyayi bagaragaza ko babona amafaranga ahagije bakura mu musaruro wacyo.

Minisitiri Kayisire asaba ubuyoboyobozi gufasha abaturage mu kwitabira ubuhinzi bw’icyayi bubaha amafaranga, ariko bakanibuka guhangana n’ikibazo cy’igwingira ryiganje muri aka karere kuko nta rwitwazo ku bafite amafaranga.

Agira ati "Niba abaturage babona amafaranga ahagije bigomba kujyana n’imibereho myiza izira imirire mibi, Akarere ka Ngororero gafite icyasha cy’igwingira kagomba kwivanaho, kuko nticyari gikwiye”.

Uruganda rw’icyayi rwa Rubaya Mountain Tea Factory iyi koperative igemuramo icyayi, rukora toni 45 ku munsi, nyuma yo kwagura ubuso buhinzeho icyayi barateganya gukora toni 100 ku munsi. Ikilo cy’icyayi kibisi kigura 400Frws.

Uruganda rw’icyayi rwa Rubaya rukikijwe n’imirima y’icyayi

Ku kibazo cy’imihanda mibi inyura mu Rubaya bigatuma umusarauro w’icyayi n’amata ya Gishwati bitwarwa nabi, Minisitiri Kayisire yasabye ko igomba kuba itunganye ku bufatanye bw’abaturage n’abayobozi.

Uru ruzinduko ruje rukurikura urwo aherutse kugirira mu Mirenge ya Nyange, Ndaro, Ngororero na Muhororo aho yagiye asaba abaturage kurwanya igwingira n’imirire mibi, ndetse n’amakimbirane mu miryango.

Ubuyobozi bw’Akarere ka Ngororero buvuga ko butazahwema kwita ku kurwanya imirire mibi y’abana, kuko nabwo butewe ubwoba no kuba nta gikozwe mu myaka 30 iri imbere, kazaba gatuwe hafi ya kose n’abantu bagwingiye gusa.

Abayobozi baganiriye n’abaturage ku musaruro w’icyayi no mu kurwanya igwingira

Amakuru abaturanyi ba Mugengarugo bahawe n’umwe mu bana be avuga ko, uyu Ndiyeranja mbere y’uko yica nyina yabanje gutuma mushiki we kuri butike kugura umuceri.

Bati:” Mushiki we yatubwiye ko musaza we Ndiyeranja yaje mu rugo atuma ako gashiki ke umuceri ku muhanda, agarutse asanga mu nzu nini babagamo na nyina harimo amaraso menshi, abajije musaza we Ndiyeranja amubwira ko ayo maraso ari ay’urukwavu. Yaje kongera kumutuma ku muhanda agarutse asanga amaraso yayahanaguye ahita akinga iyo nzu nini babagamo aragenda maze we na musaza we wundi bakurikirana bajya kuryama mu nzu yo mu rugo bategereza ko agaruka baramuheba”.

Umunyamabanga Nshingwabikorwa w’Umurenge wa Nyange, Niyibaha Thomas, yabwiye Kigali Today ko Ngirababyeyi yavukanaga n’abana batatu, ari na we mukuru ufite imyaka 26, agakurikirwa n’umuhungu ufite imyaka 17 ndetse n’umuhererezi w’umukobwa ufite imyaka 14 y’amavuko.

Gitifu Niyibaha avuga ku ifatwa rya Ngirababyeyi wari umaze igihe ashakishwa n’inzego zishinzwe umutekano, yagize ati:”mu gitondo cyo ku wa Gatandatu i saa mbili n’igice, nibwo Polisi, DASSO, Irondo n’inzego z’ibanze bafashe uwitwa Ngirababyeyi bakunda kwita Ndiyeranja w’imyaka 26 y’amavuko”.

Akomeza agira ati:”Ngirababyeyi yahise afungirwa kuri Sitasiyo ya RIB Nyange, aho batangiye iperereza akaba na we yiyemerera icyaha avuga ko hari amafaranga nyakwigendera yari amubikiye yamwimye”.

Gitifu avuga ko uwo muryango wabaga mu cyiciro cya mbere cy’ubudehe ukaba wafashwaga n’inzego z’ubuyobozi , dore ko nyakwigendera yashyinguwe n’inzego z’ubuyobozi ndetse n’abaturage, akongeraho ko abo bana bazakomeza kwitabwaho n’ubuyobozi mu nkunga y’ingoboka ndetse hakurikizwe amategeko mu kubafasha.

Izo ngo zizacanirwa hakurikijwe imiterere y’aho ziri, ni ukuvuga ko abatuye ku midugudu begeranye bazahabwa amashanyarazi yo ku muyoboro mugari (on glid), naho abataratura ku midugudu batatanye bakazahabwa amashanyarazi akomoka ku mirasire y’izuba (Off Glid).

Umuyobozi w’Akarere ka Ngororero, Nkusi Christophe, avuga ko umushinga wo guha abaturage amashanyarazi uzakorwa mu gihe cy’umwaka n’igice (amezi 18), ukazatuma ako karere kava ku ijanisha rya 55% by’ingo zifite amashanyarazi kakagera kuri 75%.

Uwo mushinga uzakorera mu mirenge yose 13 igize Akarere ka Ngororero, mu midugudu 307 kuri 419 igize akarere, hakazakorwa imiyoboro migari iringaniye ifite uburebure bwa km 286, n’imiyoboro mito ifite uburebure bwa km 1022.

Meya Nkusi avuga ko umushinga uzashyirwa mu bikorwa na Rwiyemezamirimo witwa (CEGELEC), uzafatanya n‘Ikigo cy’Igihugu gishinzwe gukwirakwiza amashanyarazi (EDCL), ku gaciro ka Miliyari 13,5Frw.

Ubuyobozi bw’Akarere ka Ngororero butangaza ko bugiye gutangira kwegera abaturage bukabategura kuri uwo mushinga

Uhagarariye CEGELEC asaba ubuyobozi bw’Akarere ka Ngororero ubufatanye kugira ngo umushinga uzagende neza, bityo intego yo kugeza amashanyarazi ku baturage zigerweho nta nkomyi.

Umuyobozi w’akarere ka Ngororero avuga ko ubu bagiye gutangira kwegera abaturage, bakabasaba kwitegura abazaba bari mu mirimo yo gukwirakwiza amashanyarazi, dore ko ari n’umushinga uzatanga akazi aho imiyoboro izanyura.

Agira ati “Ubu tugiye kwegera abaturage tubategure, ku bijyanye no kubaha indishyi ikwiye ahazanyura imiyobozo tubabarire, ariko nabo turabasaba kutikanyiza ngo bifuze ibirenze agaciro k’ibyabo bizaba byangijwe, niwo musanzu tubasaba kutagora abagenagaciro kugira ngo imirimo yihute”.

Ku kijyanye n’uburyo usanga Rwiyemezamirimo akunze kwambura abaturage ku byabo byangizwa ahanyuzwa imiyoboro, Nkusi avuga ko byose byateguwe neza kandi amafaranga yo kubyishura ari mu mushinga ku buryo hatazabaho guhekerwa kubishyura.

Naho ku bijyanye n’uburiganya mu kubara ibizangizwa ahazanyura imiyoboro n’ahazashingwa amapoto, bikunze kujya bigaragara hamwe na hamwe, aho abagenagaciro bakuramo indonke ishingiye ku kubarira imitungo idahari, cyangwa kwaka ruswa ngo babarure ibirenze, na byo ngo bizakurikiranirwa hafi.

Ibiganiro byahuje abahuriye ku mushinga wo guha abaturage amashanyarazi

Meya Nkusi avuga ko nta bundi bufasaha busanzwe abaturage bakusanyije basaba amashanyarazi, nk’uko hari ubwo byigeze gukorwa, naho ku kijyanye no kwishyura imirasire y’izuba ku batuye ahantu batataye, ngo hazabaho nkunganire ya Leta hakurikijwe ibyiciro by’ubudehe.

Naho abazahabwa amashanyarazi yo ku muyoboro mugari bo, ngo bazajya bakatwa amafaranga make kugeza bamaze kwishyura ikiguzi cyose cya mubazi, kingana n’ibihumbi 55frw.

Abagore bahigiye kurandura imirire mibi n’igwingira ku bana

Umuyobozi w’Inama y’Igihugu y’abagore mu Karere ka Ngororero, Mukeshimana Claire, avuga ko gahunda yo guhangana n’igwingira inagendana no kunoza isuku mu miryango, kuko nayo itera imirire mibi ku bana.

Agira ati “Tuzahera ku nkoko ebyiri kuri buri mwana, ariko nanone tukabagabana tukabitaho by’umwihariko, haba kubakurikirana mu mirire no kubafasha kubona ubushobozi bwo kubona ibyo kurya no kubitegura neza, kubaha uturima tw’igikoni no kunoza isuku yabo”.

Avuga ko hagiye gukorwa ibarura rigamije kumenya aho abo bana baherereye muri buri murenge, kugira ngo bashyikirizwe ababitaho, kandi ko nyuma yo gusinya imihigo ya ba mutima w’urugo, bahita batangira kubinoza.

Avuga kandi ko hari imirenge ibiri yari yahereweho ihabwa inkoko ahamaze gutangwa 32, bakaba bagiye gukomerezaho, mu yindi yose igize Akarere ka Ngororero.

Umuyobozi w’Akarere ka Ngororero, Nkusi Christophe avuga ko ibikorwa bishingiye ku mihigo ya ba mutima w’urugo, bizagira akamaro mu kurandura imirire mibi n’igwingira, nyuma y’uko ikibazo bakigize icyabo.

Agira ati “Dutegereje umusaruro ufatika nyuma yo kwiyemeza kwinjira mu kibazo, ni ipfunwe kuri twe kuba dufite abana bagwingiye, niyo mpamvu twizeye ko kuganira ku mihigo yo kurwanya ikibazo bizadufasha”.

Avuga ko ahanini ikibazo cy’abana bagwingiye kiganje mu miryango ibanye mu buryo bw’amakimbirane, irangwa no kudafatanyiriza hamwe ku mugabo n’umugore, mu kwita ku burere bw’umwana, hakaba hazakomeza ubukangurambaga bwo kubana neza.

Baganiriye uko banoza isuku

Ibindi abagore basinyiye mu mihigo yabo y’umwaka wa 2022-2023 harimo guhangana n’ikibazo cy’imyitwarire mibi ya bamwe bituma ku gasozi, kuko byanduza amasi y’amasoko abantu bakoresha.

Akarere ka Ngororero kaza ku mwanya wa mbere mu kugira abana bagwingiye mu Gihugu, ku ijanisha rya 50.5%, bikaba bihangayikishije ku mibereho y’imiryango izabakomokaho mu myaka iri imbere, haramutse nta muti urambye ufariwe icyo kibazo.

Depite Nyabyenda Damien wambaye ishati y’umuhondo na Mukandasira Caritas wabaye Guverineri w’Intara y’Iburengerazuba ni bamwe mu mfura za ADEC bakiyizirikana

Iri shuri ry’amateka mu Karere ka Ngororero dore ko ari ryo rya mbere ryigenga ryahatangijwe mu yahoze ari Komini Kibilira, ubu ni mu Murenge wa Gatumba, rimaze kunyuramo ibyiciro 32 by’abaharangije, rikaba ryigisha ubumenyi rusange mu mashami y’ibirebana n’ibinyabuzima, n’ubutabire, imibare n’ubugenge ndetse n’icyiciro rusange (Tronc Commun).

Uwimana avuga ko ihuriro ry’abize kuri ADEC rizabafasha kuzamurana no kuzamura ikigo bavomyeho ubumenyi

Umuyobozi w’Ihuriro ry’abize kuri ADEC Ruhanga, Uwimana Pacifique, ukora mu Muryango w’Abibumbye (UN), avuga ko nk’ikigo cyabahaye ubumenyi bakaba bafite amaboko, bagomba kuyahuza bagashaka icyabateza imbere kurushaho, no gufasha ishuri gukomeza kwaguka mu burere n’uburezi.

Agira ati “ADEC yaratureze kuko twatangiye hano turi ibibondo none turabyaye turakujije. Iyo umubyeyi yakureze ugomba kugaruka ugashima. Dufite intego ebyiri ari zo guhuza abize hano, bakagira umushyikirano n’ubuyobozi bw’ikigo, kugira ngo tugitere ingabo mu bitugu, aho kidukeneye tugifashe”.

Bishyiriyeho komite ishinzwe kubayobora ikanahuza ibikorwa by’abagize ihuriro

Asaba abize, abakoze n’abakozi ba ADEC Ruhanga kugira uruhare mu gutuma ikigo cyabo kiba indashyikirwa mu Gihugu, kuko gifite aho gihera kandi kikaba gifite abashobora kukibera abavugizi n’ubwo cyahindutse icya Leta.

Umuyobozi w’ishami ry’uburezi mu Karere ka Ngororero na we yemeza ko iryo huriro rije rikenewe, kuko usibye kuba ryagira icyo rifasha ikigo, Leta yifuza ko abafatanyabikorwa mu burezi barushaho gutera inkunga ibikorwa byagura ireme ry’uburezi.

Avuga ko College ADEC ari kimwe mu bigo bibiri Akarere katanze ngo kizakire ishami ry’abiga ubuforomo, igihe buri Karere kazaba kemerewe kugira iryo shami kuko iryo shuri ryujuje ibisabwa birimo kuba ryegereye ibitaro bya Muhororo, nka kimwe mu bisabwa ngo ikigo gihabwe iryo shami.

Abagize ihuriro bahamagariwe kurikangurira n’abandi bakazitabira inama izakurikiraho

Ibyo ngo bizagerwaho ikigo n’abafatanyabikorwa bacyo bafatanyije kugaragaza ko bashoboye, kandi biteguye kwakira abanyeshuri biga ibyo kuvura abantu no kubafasha kwa muganga.

Agira ati “Turifuza ko ADEC iza mu bigo bya mbere mu Gihugu ku buryo abanyeshuri bazajya bahatoranya imyanya ikaba mike, nk’uko bigenda mu bigo bizwiho gutanga uburezi bufite ireme ku rwego rwo hejuru mu Gihugu, kandi byashoboka iri huriro ribigizemo uruhare”.

Umuyobozi wa College ADEC Ruhanga, Biziyaremye Bernard, ashimira intego z’ihuriro ry’abize kuri icyo kigo, kuko ziri mu byatuma koko iryo shuri riba ubukombe mu gutanga ubumenyi rusange bufite ireme.

Agira ati “Turizera ko iri huriro rizateza imbere imyigire, kugira ngo tugere kuri bwa burezi bufite ireme, kandi abize hano tuzi ko bagomba kugira uruhare mu kuzamurana no kuzamura abandi, bakabikora bifasha kandi banadufasha ngo ikigo kibe koko igihangange”.

Biziyaremye avuga ko Ihuriro ry’abize kuri ADEC rizateza imbere uburere n’uburezi bufite ireme mu bahiga n’abazaza kuhiga

College ADEC Ruhanga iherutse gutwara igikombe ku rwego rw’Igihugu, ubwo yegukanaga umwanya wa mbere mu kugaragaza no guhanga udushya mu mashuri yigisha ubumenyi rusange mu mwaka wa 2022.

Icyo gihembo bagihawe nyuma yo kugaragaza uko abanyeshuri bakora amasabune mu binyabutabire akoreshwa mu kigo, akanagurishwa ku isoko. Byatumye batagira icyuho cyo kubura amasabune yo kwifashisha ubwo icyorezo cya Covid-19 cyari cyarahagaritse ubuzima bw’abantu.

Abize kuri ADEC bishimiye kongera guhura no kuganira ku iterambere ryabo n’iry’ishuri muri rusange

Umunyamakurukazi Louise Nganyira ni umwe mu mfura za ADEC Ruhanga

Bacinye akadiho

Hatariyakufa (ufite mikoro) avuga ko nibura yibye abasaga 200 ariko yabiretse akiteza imbere, ndetse akaba abasaba imbabazi

Uyu mugabo wubatse ufite umugore n’abana avuga ko kuva mu buto bwe yari umujura wo ku rwego rwo hejuru wayogoje abaturage, ariko yaje gufungwa ava muri gereza yiyemeje guhinduka aza no kubifashwamo n’Itorero ry’Abaperesibiteriyene Paruwasi ya Gaseke mu Murenge wa Nyange mu Karere ka Ngororero.

Hatariyakufa avuga ko abantu yibuka yaba yaribye batari munsi ya 200, kandi byari bigoranye ko afatwa kuko yibishaga amayeri ahambaye, akabaho mu buzima bwo gukimbirana n’umugore kubera iyo ngeso.

Agira ati, “Abantu nibuka nibye ni nka 200, ariko ubu narahindutse, ndahinga nkorora ngakora na za telefone ubu maze kwiteza imbere ntabwo nzongera kugira uwo niba, ahubwo n’abo twakoranaga ubujura ndabakangurira kuza nkabereka uko bibeshaho ntawe babangamiye”.

Avuga ko yigishijwe guhinga kijyambere, no korora ubu akaba ageze ku rwego yishimira kuko yiteje imbere, akaba asanga atagomba kuguma mu cyiciro cya mbere cy’ubudehe kuko ari icy’abadafite amikoro.

Bimwe mu bitoki byo kwa Hatari biri mu byo agurisha agakuramo amafaranga

Agira ati, “Ubu neza ibitoki, neza imyumbati myiza, niguriye inka, niyubakiye inzu nyishyiramo sima, naguze umurima, nanjye nkeneye kuva mu cyiciro cy’abaterwa inkunga ahubwo nkagira abo mfasha na bo bakiteza imbere. Ndasaba imbabazi abo nibye bose kuko narahindutse sinzabyongera”.

Mutabaruka Innocent ushinzwe ibikorwa mu Muryango mpuzamahanga wa Gikirisitu wita ku kurwanya ubukene (World Vision) mu Rwanda, avuga ko ahanini imiryango ikennye cyane ikunze kurangwamo amakimbirane ashingiye ku kuba umutungo w’urugo udahagije bigatuma abagize umuryango bahora bakeka ko umwe acura mugenzi we.

Mutabaruka ahamya ko ibyo abashaka kujya mu cyiciro cya gatatu cy’ubudehe basaba bishingiye ku bikorwa bamaze kugeraho

Agira ati “Abasangiye ubusa bitana ibisambo, nyamara ahari amakimbirane hahora ubukene kandi n’iyo mwaba muyahembwa ntabwo mushobora kuyasangira ngo mugire icyo mwigezaho kuko amakimbirane ni yo soko y’ubukene, ndabasba kurwanya amakimbirane hagati y’abashakanye kuko ari yo atuganisha ku bukene.”

Avuga ko gahunda ya ‘Kira Wigire’ bashinze muri Nyange igamije gutuma abagize umuryango bose bagera ku iterambere, kuko usanga hari imiryango ifite ubushobozi ariko ntibashe guteza imbere abo irera barimo abana kandi ari bo bazasimbura abazaba bashaje.

Umuyobozi w’itorero ry’Abaperesibiteriyene mu Rwanda avuga ko hakenewe ubufatanye mu iterambere rigamije kurwanya ubukene, ari na yo mpamvu politiki y’Igihugu isaba abantu kwihuriza mu makoperative, mu gihe EPR yo isaba abantu kwihuriza mu matsinda yo kwiteza imbere.

Avuga ko zimwe mu nzitizi zishobora gutuma abantu batiteza imbere ku isonga hari amakimbirane ashingiye ku mitungo, mu gihe nyamara ahatari ubwumvikane bigoranye kujya inama, hakaba n’inzitizi y’abantu batizigamira kandi bishobora guhindura amateka mu iterambere ry’umuryango.

Ashingiye kuri Hatariyakufa wibaga akaba yarahindutse kandi akaba amaze kwiteza imbere, avuga ko impinduka zishoboka kandi ko n’abandi bashobora kumwigiraho, na bo bakiteza imbere bakamwegera akabereka uko yabigenje no agere ku gitoki cyiza.

Agira ati “Ni uguhindura imyumvire no kumva inama, umuntu agakora, Imana igatanga umugisha kuko ibyo yagezeho nta handi yabyigiye ahubwo ari hafi aho”.

Nkusi avuga ko guhindura imyumvire bishoboka kandi bigira akamaro

Umuyobozi w’Akarere ka Ngororero, Nkusi Christophe, avuga ko kuba abantu basaga 1000 bageze ku rwego rwo kwisabira kwimukira mu cyiciro cya gatatu bavuye mu cya mbere, ari ikigaragaza ko abaturage bigishijwe bahinduka kandi bigatanga umusaruro.

Agira ati “Niba Hatariyakufa ashobora gutanga buriya buhamya bivuze ko guhindura imyumvire, imikorere n’imyitwarire bishobora gutuma umuntu atera imbere, kandi ko bishoboka iyo abantu bashaka guhinduka n’abayobozi bakabegera”.

Abaturage basaga 2000 bari bakennye cyane mu Murenge wa Nyange bari bamaze igihe bafashwa na World Vision, ibinyujije muri EPR, Paruwasi ya Gaseke. Abagera ku 1170 ni bo bamaze kugaragaza ko biteje imbere bose, bakaba bisabira kwimurwa mu cyiciro cya mbere bakajya mu cya gatatu cy’ubudehe, ubuyobozi bukaba bugiye kubisuzuma ngo bubifatire imyanzuro.

Umuyobozi wa EPR avuga ko Hatariyakufa ari urugero rw’impinduka ku bashaka kwiteza imbere

Abayobozi bashyikiriza inka uwarokotse Jenoside utishoboye

Ni igikorwa abikorera bavuga ko bagombaga kuba barakoze mu minsi 100 yo kwibuka ku nshuro ya 28 Jenoside yakorewe Abatutsi, ariko bakomwa mu nkokora n’ikibazo cy’indwara y’ubuganga yatumye amatungo arimo n’inka ashyirwa mu kato mu Karere ka Ngororero.

Abahawe izo nka bavuga ko zigiye gukemura ikibazo cyo kubura amata yo guha abana, kubona ifumbire bakanahera kuri izo nka biteza imbere.

Mu gutangiza iki gikorwa cyo koroza bamwe mu barokotse Jenoside yakorewe Abatusti batishoboye bo mu Ntara y’Iburengerazuba, abagize PSF muri iyo Ntara babanje gusura urwibutso rwa Jenoside yakorewe Abatutsi rwa Kibirira, ruri mu Murenge wa Gatumba mu Karere ka Ngorero.

Basobanuriwe amateka agaragaza uko abarushyinguyemo bishwe baranabunamira, bashyira n’indabo kuri uru rwibutso rufite umwihariko wo kuba rushyinguyemo imibiri y’Abatutsi bishwe hagati ya 1990-1994.

Kibirira ni hamwe mu hageragerejwe Jenoside ubwo izari ingabo za RPA Inkotanyi zatangizaga urugamba rwo kubohora Igihugu mu Ukwakira 1990, Abatutsi benshi bakaba barishwe mu yahoze ari Komini Kibirira abandi barahunganga baranatwikirwa.

Inka 10 zahawe imiryango 10 itishoboye

Perezida wa PSF mu Ntara y’Iburengerazuba, Nkurunziza Ernest, avuga ko buri mwaka PSF izajya ihitamo akarere kamwe mu tugize intara y’i Burengerazuba, ikoroza bamwe mu barokotse Jenoside yakorewe Abatutsi bagatuye kugeza bahetuye Intara yose.

Agira ati “Gahunda tuba tuyifite, turicara tukabiganiraho kugira ngo dufashe abarokotse Jenoside batishoboye kuko baradukeneye. Turifuza ko buri mwaka twajya dufata abakeneye ubu bufasha kurusha abandi tukabaha inka bakarushaho kwiteza imbere”.

Avuga ko kuremera abarokotse Jenoside bijyana no gukomeza guhangana n’abahembera amacakubiri n’ingengabitekerezo ya Jenoside, agasaba abikorera gukomeza kugira umutima wo kubaka Igihugu ntawe usigaye inyuma.

Urwibutso rwa Kibirira rufite amateka yihariye kuko ari ho hageragerejwe Jenoside mu 1990

Umwe mu bahawe inka avuga ko muri rusange ubuzima bwe bwari bumeze nabi kubera kutagira amatungo yo kororora kandi barahoze ari abatunzi, akaba avuga ko inka yahawe igiye kumufasha guhangana n’imirire mibi kandi akiteza imbere.

Agira ati “Ubu ngiye kubona agafumbire umurima wanjye were, nkame mbone amata abana banywe kuko nari mfite abana bane bose nkamishiriza hanze. Ndashimira abaduhaye inka kuko igiye kunteza imbere”.

Uwitonze Theoneste avuga ko muri gahunda ya Girinka Munyarwanda nta mahirwe yagize yo kubonamo inka, akaba yari afite isambu ahingaho ubwatsi bw’amatungo akabugurisha, ariko nta bushobozi bwo kwigurira inka yari afite.

Agira ati, “Nahingaga ubwatsi nkabugurisha kuko ntari naratoranyijwe mu bahabwa inka muri gahunda ya ‘Girinka Munyarwanda’ ubu ndizera ko ubwatis nateye buzatunga iyi nka ikanteza imbere n’umuryango wanjye”.

Umuyobozi w’Akarere ka Ngororero, Nkusi Christophe, ashimira PSF yatekereje guha abarokotse inka kuko ari kimwe mu bishobora kubafasha kwikura mu bukene no kubarinda kwiheba.

Bashyize indabo ku rwibutso rwa Kibirira

Ubuyobozi bw’Akarere ka Ngororero buvuga ko buzakomeza gukora ubuvugizi, ibibazo by’abarokotse Jenoside yakorewe Abatutsi birimo no kubona amatungo bigakemuka, kugira ngo ubuzima bwabo burusheho kuba bwiza.

Guverineri Habitegeko yasabye abahawe amafaranga gutandukana burundu n’imibereho mibi

Icyiciro cya mbere kingana n’ibihumbi 329Frw mu gihe ubundi biteganyijwe ko buri muryango uzahabwa ibihumbi 821Frw, ku miryango isaga 6000 ituye mu Murenge wa Kageyo, nibura uwemerewe guhabwa amafaranga ukaba ugomba kuba uhamaze amezi atandatu uhatuye.

Umunyamabanga Nshigwabikorwa w’Umurenge wa Kageyo, Bizimana Jean D’amour, atangaza ko impamvu imiryango ibarirwa mu bihumbi 2000 itabona ayo mafaranga, byatewe n’uburyo atangwamo kuko bayatanga inshuro ebyiri mu kwezi, bivuze ko hari abataragerwaho ariko ntawe uzacikanwa, kuko yatangiye gutangwa mu mpera z’ukwezi kwa Gicurasi 2022.

Bizimana avuga ko imyitwarire y’abaturage ku mafaranga angana atyo imeze neza, kuko kuva yatangwa nta rugomo cyangwa ubujura byagaragaye, ahubwo abaturage bamaze kuyafata bahise batangira kuyabyaza umusaruro bagura amatungo magufi n’amaremare.

Abaturage bahawe amafaranga batangiye kwiteza imbere

Avuga ko hari n’abasannye inzu zari zimeze nabi bari batuyemo, bubaka ibikoni n’ubwiherero, banagura ibibanza byo guturamo, ku buryo mu minsi iri imbere hazaba hagaragara impinduka mu kwiteza imbere.

Agira ati “Abaturage bamaze kugura inka hafi 1000, baguze amatungo magufi asaga 600, hari abayashoye mu mishinga y’ubucuruzi, niba umuturage yaguzaga ibihumbi 100Frw muri SACCO akamuteza imbere, nta wabura kuvuga ko ibihumbi bisaga 800Frw bitazagira aho bimugeza”.

Ku kijyanye no kuba abaturage barahawe amafaranga ariko bakaba batarishyura umusanzu w’ubwisungane mu kwivuza 100%, Bizimana avuga ko ukwezi kwa Kanama kuzarangira bose bararangije kwishyura, kuko abahawe amafanga basabwe n’ubundi kuyanyuza mu matsinda y’abahetsi basanzwe bishyuriramo kugira ngo adasenyuka kandi ari bumwe mu buryo bwari bwagaragaje gufasha abaturage.

Agira ati “Twararebye dusanga uhawe amafaranga agiye kwiyishyurira twahita twuzuza 100%, ariko tukaba dusenye bwa buryo twashyizeho bwo kwishyura binyuze mu matsinda y’abahetsi, ukwezi gutaha kuzarangira bose bamaze kwishyura”.

Bizimana avuga ko abaturage bari kwitwara neza mu nkunga bahawe

Ubwo yasuraga Umurenge wa Kageyo mu nteko y’abaturage ngo hasuzumwe uko abahabwa amafaranga bari kuyakoresha, Guverineri w’Intara y’i Burengerazuba, Habitegeko François, yashimye uko abahawe amafaranga bakora ibikorwa bigamije guhindura ubuzima, abasaba kutayapfusha ubusa kuko bayahawe n’umukuru w’Igihugu.

Agira ati “Umwana uzi ubwenge bamusiga yinogereza, inkunga ni nziza kandi uyitera umuntu uri mu rugendo. Nk’aya mafaranga asaga ibihumbi 800frw kandi basanzwe bakora ibindi, turifuza ko yazabateza imbere, bakarinda ibyagezweho no kubicungira umutekano, naho ibindi Perezida wacu yarabibemereye”.

Avuga ko kumva umuntu yahawe ayo mafaranga bugacya yasubiye mu buzima bubi byaba ari ikibazo gikomeye, ari nayo mpamvu asaba abaturage kubyaza umusaruro ibyo bahabwa, hanyuma bakabaza ubuyobozi ibyo bwabemereye.

Umuyobozi w’Akarere ka Ngororero, Nkusi Christophe, avuga ko hari indi mirenge yo mu turere tumwe na tumwe yahawe ayo mafaranga, kandi yagize akamaro ku buryo hizewe ko no muri Ngororero bizatanga umusaruro.

Abayobozi barangajwe imbere na Guverineri Habitegeko bakiriye n’ibindi bibazo by’abaturage

Inkunga ya Give Directly ihabwa buri wese hadakurikijwe ibyiciro by’ubudehe, usibye bamwe mu bakozi ba Leta batayemerewe, biteganyijwe ko nyuma y’Umurenge wa Kageyo hazakurikiraho indi mirenge ikigaragaza ko iri inyuma mu Karere ka Ngororero, nayo izahabwa ayo mafaranga atishyurwa.

Guverineri Habitegeko atangiza ubukangurambaga bwo kurwanya imirire mibi mu Ngororero

Guverineri Habitegeko avuga ko abafatanyabikorwa mu kurwanya imirire mibi batatanya imbaraga, bigatuma ikigamijwe ngo umuturage atere imbere kitagerwaho kandi haba hashowemo imbaraga zitandukanye.

Guverineri Habitegeko avuga ko izingiro ry’ikibazo cy’imirire mibi cyagarageye mu Ntara ayobora hafi y’uturere twose, gikomoka ku myitwarire mibi y’abagize umuryango ahagaragara ihohoterana mu ngo, abayobozi bategera abaturage no kuba abafatanyabikorwa ba Leta mu turere bafite ibyo bakora, ariko ntibihuzwe n’ibikenewe cyangwa ibikenewe bigahurirwaho n’abantu batandukanye.

Agira ati “Nta muntu umwe wihagije, kuko umuturage wacu ni we uhurirwaho n’abafatanyabikorwa batandukanye ariko iyo abamuhuriyeho batatanyije imbaraga, ushaka wa muganda wa buri wese icyo wakoze ukakibura, nyamara bose buri wese afashe uruhare rwe akarukora neza nibyo byateza imbere umuturage”.

Guverineri Habitegeko avuga ko kugira ngo urugo rusanganywe ibibazo birimo n’imirire mibi rukemure icyo kibazo, hakenewe igenamigambi rikorewe hamwe kuri abo bafatanyabikorwa, buri wese agafata inshingano zitandukanye n’iza mugenzi we, zigahurizwa hamwe mu gukemura ibyo bibazo.

Agira ati “Kugira ngo umuryango ufite ibibazo bikemuke ni ngombwa ko abafatanyabikorwa umwe agira icyo akora umwe agakora ku makimbirane, undi agakora ku bana bata amashuri, undi akore ku isuku, undi azane iby’iterambere. Nibabihuza urwo rugo ruzazamuka rwihute mu mibereho myiza, kuko iyo umwe aje asanga hari ibindi bibazo rya teremabere ntabwo ryagerwaho mu rugo”.

Ati: Nta kibura kuko ntabwo ibyo kurya byabuze hano, ariko hari ahakenewe imbaraga nko mu myumvire kuko hari igihe ufasha umuntu ibyo adakeneye kuko imizi y’ingo zifite igwingira, zifite bya bibazo bibangamiye imibereho myiza y’abaturage, kurwana, ubusinzi n’urusobe rw’imizi y’ibibazo, kuko ikibazo cy’imirire si icy’ubukene, usanga gahunda zashyizweho na Leta zirenze n’izikenewe”.

Akomeza agira ati “Shisha kibondo irahagera, amata araza ku mashuri, ku mavuriro n’izindi nyongeramirire, dutanga miliyoni zisaga 100Frw ku mwaka zigera hano, ariko imirire igakomeza kuba mibi. Abana nibaza mu ngo mbonezamikurire tukababonera hamwe tuzamenya ikibazo bagiye bafite, tunafashe ababyeyi babo tubigishe”.

Guverineri Habitegeko avuga ko ikibazo cy’imirerie mibi cyateye igwingira mu Ntara y’Iburengerazuba kidakwiye gufata imyaka myinshi ngo kibe cyakemutse, kuko ibikenewe byose Bihari, habura gusa ubufatanye ngo kirangire vuba.

Miss Nshuti Divine Muheto yari muri ubwo bukangurambaga

Akarere ka Ngororero niko kaza imbere muri iyo ntara mu kugira umubare munini w’abana bagwingiye, hejuru ya 50%, kakaba kaza no ku mwanya wa mbere mu Gihugu.

Mu rwego rwo guhashya ibyo bibazo hakaba hari imishinga yatangijwe muri ako karere, harimo n’uwo guha buri muryango Amafaranga y’u Rwanda hafi miliyoni, hagamijwe gukemura ibibazo bibangamiye imibereho myiza y’abaturage, hari kandi imishinga yo koroza abaturage amatungo magufi, kwigisha imyuga, gutanga imirimo ibyara inyungu nk’iboneka muri VUP.

Ibyo byose bikaba bigamije kugira ngo byunganire gahunda yihariye yagenewe Akarere ka Ngororero, mu gusohoka mu bibazo by’igwingira n’imibereho mibi.

Abayobozi basobanuriwe uko imurikabikorwa ryatangiye n’ibizakorerwamo

Babitangarije mu bikorwa bari kumurikirwa n’abafatanyabikorwa b’ako karere (JADF Isangano), aho umufatanyabikorwa yabamurikiraga ifumbire y’amazi ishyirwa ku mababi y’ibihingwa, ikarumbura ubutaka kandi igahenduka ugereranyije n’imvaruganda basanzwe bakoresha.

Muhawenimana Joselyne wo mu Murenge wa Ngororero avuga ko kwegerezwa imurikabikorwa bituma babona ibintu bishya batamenyereye, birimo nk’amafumbire agezweho, nk’aho yabonye ifumbire iva mu mababa y’inkoko n’ibyatsi.

Agira ati “Ndashimira Umukuru w’Igihugu ukomeza kudutekerereza, turifuza ko bajya bakomeza kugira ibyo batwereka bakanabitugezaho, kuko kubibonera gusa ahantu nk’aha ntibihagije, bishobotse abaturage bagahugurwa uko iyo fumbire ikorwa nta kibazo.”

Muhawenimama Floride utuye mu Murenge wa Muhororo avuga ko hari udushya yaboneye mu imurikabikorwa by’umwihariko mu buhinzi, ari ifumbire y’imborera aho yabonye uburyo bwo gufumbira hakoreshejwe ifumbire igezweho ikoze mu buryo bw’amazi akomoka ku mababa y’inkoko.

Agira ati “Uyu munsi amafumbire mvaruganda arahenze batweretse uko litiro imwe yavangwa n’amazi bagafumbira basa n’abavomerera, aho gukoresha zimwe twaguraga ziduhenze, turifuza ko abayobozi baduhugura ku ikoranabuhanga ryatuma nk’umutu utunze inkoko akora iyo fumbire”.

Umukozi w’uruganda Rocosan rukora iyo fumbire yitwa Rokolan Uwiragiye André avuga ko ugereranyije inyungu mu mafaranga, umuhinzi wakoresheje Rokolan ashora amafaranga 127.500frw kuri hegitari, mu gihe uwakoresheje amafumbire ya Urea na DAP we ashora ibihumbi 156frw kuri hegitari.

Ifumbire ikoze mu mababa y’inkoko n’ibyatsi bibora itanga umusaruro mwiza kandi w’umwimerere

Avuga ko bashaka no kubaka uruganda mu Rwanda kuko ifumbire ihari itumizwa hanze, ibyo bikazatuma irushaho guhenduka kuko ubu icupa rya litiro imwe riri ku mafaranga 17.000frw, kandi aborozi b’inkoko bakabona isoko ry’inyama n’ayo mababa akagurishwa akavamo ya fumbire.

Avuga ko ubushakashatsi bugaragaza ko ifumbire y’inkoko yifashishwa cyane mu gukora amafumbire kuko ifite umwimerere kurusha andi mafumbire ava ku matungo, kandi ko byagaragaye ko n’amababa y’inkoko aseye akavangwa n’ibindi byatsi bibora atanga ifumbire nziza y’umwimerere.

Agira ati “Iyi fumbire igamije kongera gusubiranya umwimerere mu butaka kuko nta binyabutabire igira, twari dufite ikibazo cy’ibinyamafufu byari byarabaye amazi, nta kijumba cy’ifufu wabona nta kirayi cy’ifufu ariko ubu byose bigiye gukemuka”.

Uwiragiye avuga ko abaturage bazajya bakoresha ifumbire yabo bazajya bagurirwa imbuto kugira ngo zihabwe abahinzi zahindutse umwimerere, bityo zirusheho gusakara kandi Abanyarwanda bongere kurya ku mbuto gakondo zifite uburyohe, kandi ko hari amasezerano na Leta y’u Rwanda ngo iyo fumbire igere hose mu Gihugu.

Guverineri w’Intara y’Iburengerazuba Habitegeko François avuga ko kugira abafatanyabikorwa mu kurumbura ubutaka, no guhinga imbuto z’indobanure bihagije ngo abaturage babone amafunguro ahagije kandi yujuje intungamubiri.

Avuga ko hakwiye no gusobanurira abaturage imikorere n’imikoreshereze y’ayo mafumbire kugira ngo bagireho ubumenyi bwatuma bayitabira, hagamijwe kongera umusaruro, imurikabikorwa ikaba ari imwe mu nzira umuturage abonye ngo abone amakuru ahagije.

Agira ati “Abaturage bakeneye amakuru kuri iyo fumbire bakamenya igiciro cyayo n’icyo bazakuramo kuko hari igihe ifumbire iba ari nziza koko, ariko ikaba ihenze umuturage atayigondera, ni ngombwa rero ko baza nka hano bakabaza ibibazo bakamenya amakuru kugira ngo bakoreshe ibyo bazi neza n’umusaruro byatanze ahandi bizwi yakoreshejwe.”

Minisitiri Kayisire yasabye abaturage kwibuka guhinga ibihingwa bifata ubutaka

Minisitiri w’imicungire y’ibiza mu Rwanda, Marie Solange Kayisire, wari witabiriye imurikabikorwa ry’abafatanyabikorwa b’Akarere ka Ngororero, avuga ko ubuhinzi bwo mu turere dufite imisozi miremire bugoye kubera ubuhaname buteza isuri, ifumbire n’ubutaka buhingwa bigatwarwa n’imyuzure, akaba asaba abahinzi no gutekereza ku bihingwa bifata ubutaka nk’ikawa n’icyayi kuko bitanga umusaruro kandi ubutaka biteyeho bukaguma hamwe.

Imurikabikorwa ry’abafatanyabikorwa b’Akarere ka Ngororero (JADF Isangano) rizamara iminsi itatu uhereye tariki 19 kugeza tariki 21 Nyakanga 2022 rifite insanganyamatsiko igira iti, “JADF Terimbere Ngororero, Ubumwe bwacu imbaraga zacu”.

Ifumbire ikoze mu mababa y’inkoko izatuma imbuto gakondo zongera kuboneka kandi zitange umusaruro

Abaturage basabwe kubyaza umusaruro amatungo bahawe

Abo baturage ni abo mu Mirenge ya Nyange na Bwira, bakaba bashyikirijwe ingurube zatanzwe n’Umushinga ukorera muri Minisiteri y’Ubuhinzi n’Ubworozi, ugamije guteza imbere ubworozi bw’amatungo magufi (PRISM).

Abo baturage bavuga ko bifuza kuva muri ibyo byiciro by’abakene, nabo bagatera imbere bakajya mu byiciro by’abishoboye bahereye kuri ayo matungo magufi bahawe.

Nyiranzayino Beatrice utuye mu Mudugudu wa Ngobagoba, Akagari ka Gaseke akaba umubyeyi w’abana 3, avuga ko nyuma yo guhabwa ingurube, yiteguye kujya abasha kubishyurira mituweli kuko ubundi yayitangirwaga na Leta.

Yagize ati “Mu buzima busanzwe nari mbayeho nabi mu bukene. Nabagaho nta tungo mfite, ariko iyi ngurube igiye kumpindurira amateka singumye kwitwa umukene wo mu cyiciro cya mbere”.

Avuga ko arambiwe guhora afashwa kandi afite amaboko, kandi ko intego ye ari ukwigira akihaza mu biribwa ndetse agasagurira n’amasoko, kandi ko yiteguye gufata neza ingurube yahawe ayigaburira indyo yuzuye, ndetse ko azayiheraho yihangira indi mishinga iciriritse izamufasha kwihuta mu iterambere.

Uzabakiriho Thomas nawe utuye mu Mudugudu wa Ngobagoba, Akagari ka Gaseke, Umurenge wa Nyange usanzwe anafite ubumuga bwo kutabona, avuga ko itungo yahawe azarifata neza rikororoka ndetse akanoroza bagenzi be baturaye.

Yagize ati “Turashimira Nyakubahwa Perezida wa Repubulika Paul Kagame, udahwema kudushakira ubuzima bwiza. Aya matungo atwoherereje binyuze muri PRISM agiye kuduhindurira amateka, twahoraga twitwa abakene batishoboye ariko ndizera ko tugiye kubarirwa mu bakire”.

Ingurube bahawe zizaterwa intanga ku buntu kugira ngo zibashe kubaha umusaruro mwiza

Umuhuzabikorwa wa PRISM mu Karere ka Ngororero, Nsengimana Gedeon, yagaragaje ko barimo gutanga amatungo magufi yiganjemo ingurube, ihene n’inkoko, kandi ko bahereye ku baturage bari mu cyiciro cya mbere n’icya kabiri, kuko aribo bakiri hasi mu iterambere.

Yagize ati “Iyo turebye dusanga aya matungo atazabasaba imbaraga nyinshi mu kuyorora kandi tubona ari yo azabafasha guhita batera imbere vuba vuba, cyane ko izi ngurube tuzahita tuzitera intanga kandi murabizi ko imwe ishobora kubyara ibyana 12 mu gihe gito.”

Yatanze urugero rw’uko akagurube gato gashobora kugura amafaranga ari hagati y’ibihumbi 20,000 frw na 30,000 frw, bivuze ko umuturage aba ashobora kubona ibihumbi hafi 300, 000Frw, kandi ko ingurube ibwagura inshuro 2 mu mwaka, bivuze ko mu mwaka umwe aba ashobora kwinjiza agera ku 600,000Frw.

Dr. Safari Théogène, ukurikirana aya matungo yagaragaje ko abahawe ingurube bazanafashwa mu kuzigaburira kuko hateganyijwe ibiryo byazo ibiro 100 kuri buri muntu, bizamufasha kugaburira ingurube yahawe mu gihe cy’amezi 4, ndetse ko abazihawe babanje kubakirwa ibiraro bigezweho, bakanahabwa imiti yo kuzivura ndetse zinaterwe intanga ku buntu.

Umunyamabanga Nshingwabikorwa w’Umurenge wa Nyange, Nzabamwita JMV, nawe yagaragaje ko ingurube ari itungo ryororoka vuba, kandi ko abazihawe aribo bazihitiyemo, bivuze ko bagiye kuzamuka mu iterambere, bakava mu cyiciro barimo bajya mu kindi kisumbuyeho.

Ku kibazo cy’isoko ry’umusaruro uzakomoka kuri ayo matungo, Nzabamwita JMV, yavuze ko nta mpungenge abahawe amatungo bakwiye kugira kuko bafite isoko rigari haba mu Karere ka Ngororero ndetse no mu Karere ka Muhanga baturanye.

Abasaba gukora batikoresheje kugira ngo bongere uwo musaruro, nibiba ngombwa bazajye bawohereza no mu Mujyi wa Kigali.

Umuyobozi wungirije w’Akarere ka Ngororero ushinzwe iterambere ry’ubukungu, Uwihoreye Patrick, na we yagaragaje ko igikorwa cyo gutanga amatungo magufi mu Karere ka Ngororero harimo ihene, intama, inkoko n’ingurube, kiri mu mushinga mugari Leta y’Ubumwe yashyizeho wo koroza Abanyarwanda, kugira ngo bagire iterambere rirambye.

Abahawe amatungo bizeye kuva mu cyiciro cy’ubukene bukabije

Uwihoreye yagaragaje kandi ko aya matungo azanafasha abaturage kurwanya imirire mibi, kuko bazajya babona amagi n’inyama bitabagoye, kandi anabafashe kubona ifumbire bityo binazamure umusaruro wabo ukomoka ku buhinzi.

Umushinga PRISM uzamara imyaka itanu ukorera mu turere 15 tw’Intara y’Amajyaruguru, i Burengerazuba n’Amajyepfo, ukazarangira nibura utwaye Miliyari 41Frw, aho nibura uzaba umaze kugeza amatungo magufi ku miryango isaga 23.000.

Ibi babitangaje ku wa 23 Kamena 2022, mu muhango wo kubashyikiriza ibyo bikoresho bagenewe na Leta, wabereye mu Murenge wa Nyange, mu ishuri ryigisha ubumenyingiro ry’Ababikira b’Abasomusiyo.

Nyuma yo guhabwa impamyabumenyi, abo banyeshuri biganjemo abakuze bagaragaje ko kugeza ubu batangiye gushyira mu bikorwa ibyo bize, urugero ni nko ku bize ubwubatsi bose uko ari 14 bavuga ko bafite akazi.

Abize ububaji nabo bavuga ko batangiye gushyira ku isoko ibikoresho bitandukanye birimo intebe, inzugi n’amadirishya, n’abize ubudozi bakaba batarasigaye inyuma kuko nabo batangiye gukorera amafaranga.

Umwe muri bo, Mukashyaka Judith w’imyaka 30 utuye mu Kagari ka Nsibo, Umurenge wa Nyange, yagaragaje ko bashimiye cyane amahirwe bahawe yo kwiga imyuga kuko bigiye kubafasha kuzamura imibereho myiza y’ingo zabo, ndetse banagire uruhare mu iterambere rirambye ry’aho batuye.

Avuga ko nyuma yo kurangiza amasomo yatangiye kudoda imyenda itandukanye irimo amashati, amapantaro, ibitenge, ndetse we anahawe imashini idoda yari asanzwe afite indi yiguriye mu mafaranga yakuye mu budozi.

Abize ubwubatsi nabo bahawe ibikoresho bitandukanye

Yagize ati “Ndadoda nkabona amafaranga yo kwizigamira mu bimina, mbasha kwishyurira ubwisungane mu kwivuza umuryango wanjye, nkakemura n’utundi tubazo duhura natwo”.

Yanaboneyeho gukebura abatinya kwiga imyuga cyane cyane abagore, ababwira ko igihe kigeze ngo bahindure imyumvire, kuko ahamya ko uwize umwuga ari we urimo kubasha guhangana n’ibibazo by’ubukungu Isi irimo guhura nabyo muri iki gihe.

Ntitenguha Jean Paul w’imyaka 29, nawe agaragaza ko umwuga yize w’ubwubatsi uzamufasha kwihuta mu iterambere ry’umuryango we n’iry’Igihugu muri rusange.

Yagize ati “Nize ubwubatsi mu gihe cy’amezi 3, kubera umuhate n’ubushake nabishyizemo nungutse ubumenyi, ubu mbasha kubaka inyubako zitandukanye.”

Abayobozi batandukanye bashyikiriza ibikoresho abize ubudozi

Umuyobozi wa Assomption Nyange TVET, Sr. Agnes Nyirabukeye, avuga ko imyuga bigishije abo baturage ku bufatanye na Leta y’u Rwanda, izabafasha kuva mu byiciro by’abatishoboye bari barimo bakajya mu by’abishoboye.

Agira ati “Ntabwo twabigishije imyuga gusa, ahubwo twanabigishije kwihangira imirimo, imyuga barayimenye neza, kandi tubafitiye icyizere ko bazashobora kwikura mu bukene, bava mu cyiciro cya mbere bari barimo bakajya mu cya kabiri kandi bagakomeza”.

Umuyobozi w’Ababikira b’Abasomusiyo, Sr. Marie Leatitia, we yashimye Leta y’u Rwanda ikomeje gushakira imibereho myiza abaturage bayo, ahamya ko nta gushidikanya abize mu kigo cyabo bazagira uruhare mu iterambere ry’Umurenge wa Nyange, asaba abahawe ibikoresho kuzakora ibyo bize bivuye inyuma, bityo bakabasha gusezerera ubukene.

Umuyobozi w’Akarere ka Ngororero wungirije ushinzwe iterambere ry’ubukungu, Uwihoreye Patrick, yagaragaje ko igikorwa cyo gutanga ibikoresho kiba buri mwaka kandi ko kigamije gufasha urubyiruko ndetse n’abakuze bize imyuga, ariko bakabura ubushobozi bwo kubona ibikoresho by’ibanze bibafasha, gushyira mu bikorwa imyuga bize.

Umuyobozi wa Assomption Nyange TVET Sr Mukashyaka avuga ko abahize bahakuye ubumenyi buzabakura mu cyiciro cy’ubukene

Asaba abarangije imyuga kwishyira hamwe kandi bagakora kinyamwuga, bityo bakabasha gutera intambwe ibaganisha ku buzima bwiza, kandi asaba abagenewe ibikoresho kuzabifata neza no kubibyaza umusaruro aho kubigurisha, abizeza ko ubuyobozi buzakomeza kubaherekeza mu iterambere ry’ingo zabo n’iry’Igihugu cyabo muri rusange.

Abize umwuga w’ubwubatsi mu Murenge wa Nyange bagera kuri 14 bahawe ibikoresho bitandukanye birimo imyambaro y’akazi, inyundo, metero, imyiko, n’imbaho z’amazi, naho abize ubudozi 31 bahabwa ibitenge, imashini zifashishwa mu kudoda n’ibikoresho bijyana nazo; mu gihe abize ububaji 29 nabo bahawe amaranda, inkero n’ibindi bikoresho bitandukanye.

Abana b’abakobwa bavugwaho guhishira abahungu b’inshuti zabo cyangwa abarimu babasambanya

Umunyamabanga mukuru wungirije wa RIB, Karihangabo Isabelle, avuga ko hari n’abarimu basambanya abanyeshuri, ariko ayo makuru akagirwa ibanga hagati y’umwana n’umwarimu.

Avuga kandi ko hari abanyeshuri b’abakobwa basambana n’abahungu b’inshuti zabo ntibabe batinyuka kwemera ko bafite abahungu b’inshuti, ibyo bikaba ari bimwe mu bikomeza gutuma bigorana gukurikirana ibyaha byo gusambanya abana.

Ibyo bitangajwe mu gihe imibare igaragaza ko mu myaka itatu ishize abana basambanyijwe bageze hafi 13.000, Intara y’Iburasirazuba ikaba iza ku mwanya wa mbere, ahakiriwe amadosiye asaga 4.500.

Ni mu gihe kandi imibare ya RIB mu myaka itatu ishize igaragaza ko Akarere ka Gasabo mu Mujyi wa Kigali, ari ko kagaragayemo ibyaha byinshi byo gusambanya abana bisaga 1200, kagakurikirwa n’uturere twa Gatsibo na Nyagatare.

Mu biganiro byo kurwanya ibyaha bitangwa na RIB hirya no hino mu mashuri, ubwo bari mu karere ka Ngororero, Kalihangabo yasabye urubyiruko gutinyuka kugaragaza abarusambanya kabone n’ubwo baba ari inshuti zabo cyangwa abarezi babo”.

Agira ati “Mukwiye kwirinda ababashuka babashora mu byaha kuko inshingano zanyu ni ukwiga, ni wo mukoro ababyeyi banyu babahaye. Ntawe mukwiye guhishira n’iyo baba abarimu banyu, mujye mubivuga bafatwe babibazwe kuko baba bashaka kubahemukira”.

Kalihangabo asaba abana gutinyuka bakavuga ababasambanya kugira ngo bakurikiranwe

Yongeraho ati “Ikibazo namwe mwa bakobwa mwe ntawe utinyuka kuvuga ko afite umuhungu w’inshuti ye (boyfriend), mwitwaje ko hari icyo babamariye kugira ngo namwe mubakorere ibyo bifuza”.

Nishimwe Aimée, wiga mu kigo Nderabarezi cya Muramba (TTC Muramba), avuga ko nyuma y’ubwo bukangurambaga bwa RIB bamenye neza amayeri abashaka kubashuka bakoresha, kandi ko bagiye kubirinda ahubwo bakajya bamenyesha ababyeyi n’inzego z’umutekano igihe hari ushaka kubashuka.

Agira ati, “Icyo nkuye muri ibi biganiro ni amayeri abadushukaga bakoresha, ndahamya ko abakobwa basaga 500 biga aha benshi hari icyo bakuyemo kigiye kubarinda ubwo bushukanyi”.

Intara y’Iburengerazuba iza ku mwanya wa gatatu mu kugira abana benshi basambanyijwe mu myaka itatu ishize, aho ifite ibirego 1.983 byakiriwe muri RIB, ari naho ishuri rya TTC Muramba riherereye, bakibutswa gukomeza gutanga amakuru ku basambanya abana.

Umunyamabanga Nshingwabikorwa w’iyo Ntara, Uwambajemaliya Florence, avuga ko urubyiruko ruteguwe neza rwateza imbere Igihugu, narwo rukaboneraho iterambere rirambye, kandi ko ibyo bitashoboka igihe rugihishira ibyaha bitandukanye rushorwamo n’abafite inyungu zabo bwite.

Agira ati “Ntabwo twagira ibyiza tudafite abaturage beza kandi bazavamo ababyeyi b’intangarugero dukeneye, kandi ntitwababona tugifite urubyiruko rushorwa mu byaha ntirubivuge. Urubyiruko ruteguwe neza rubasha kwiteza imbere rugafasha, rukanateza imbere Igihugu”.

Abayobozi bakuru ba RIB n’Intara y’Iburengerazuba bagaragaza ko abana basambanywa bagira n’uruhare mu guhishira ibyaba bakorerwa

Akarere ka Ngororero kashyize imbaraga mu kurwanya ibyaha byo gusambanya abana, nk’uko bigaragazwa n’imibare itangazwa na RIB, n’iy’akarere aho umwaka wa 2020 kari hejuru mu byaha byo gusambanya abana, byasagaga gato 130, umwaka ushize wa 2021 bikamanuka kugera kuri 60.

Bashyize indabo ku rwibutso rwa kibilira

Abarokotse Jenoside bo mu yahoze ari Komini Ramba, bavuga ko kuva inkotanyi zatangiza urugamba rwo kubohora Igihugu batangiye kwicwa, bigaragaza ko Jenoside itatewe n’ihanurwa ry’indege ya Habyarimana nk’uko abagoreka amateka babivuga.

Mukaribagiza Floride agaragaza ingero z’imiryango n’amazina y’Abatutsi bishwe mu 1973, no mu myaka ya 1990-1994, iyi myaka ya nyuma yo ikaba ari nayo yanditse ku rwibutso rwa Kibilira bitandukanye no ku zindi nzibutso mu Gihugu.

Avuga ko iyo habaga inama zitandukanye z’abayobozi icyavagamo kwari ukuza kwica Abatutsi, kubasahura no kubatoteza, kugeza n’ubwo ubwicanyi bwakomeje muri Ramba bitandukanye n’ahandi, kuko kuva Inkotanyi zatangiza urugamba nta na rimwe Abatutsi batishwe.

Basuye ababo bashyinguye mu rwibutso rwa Kibilira

Avuga ko abishwe ku ya 25 Mutarama 1993, bashyinguwe ku Mukore wa Rwabugiri, bimurwa ku wa 20 Gicurasi 2012, bajyanwa mu Rwibutso rwa Kibirira.

Avuga ko kuva mu 1990 kugeza 1994, Abatutsi babayeho batariho kuko bwariraga bati ntibucya, baza no guhura n’akaga mu gihe cy’abacengezi mu 1997, aho nabwo bakomeje guhigwa.

Agira ati “Abitwaza ihanurwa y’indege ko ari ryo ryateye Jenoside bajye baza iwacu aho batwishe kuva na mbere, ibyo mu 1959 simbizi numva babivuga ariko kuva mu 1973 iwacu Abatusi barishwe, 1990 baricwa, 1993 baricwa nibo twibuka uyu munsi 1994 yo iza ari rurangiza”.

ICyakora n’ubwo biciwe ababo, bavuga ko umutima w’imbabazi bakiwufite kuri buri wese watanga amakuru y’ahakiri imibiri y’ababo ngo ishyingurwe mu cyubahiro, mu rwego rwo gukomeza kunga ubumwe kandi ko bifuza gukomeza kubana neza n’imiryango y’ababahemukiye n’abandi Banyarwanda.

Abahagarariye imiryango yimuriwe mu rwibutso rwa Kibilira

Umunyamabanga Nshingwabikorwa w’Umurenge wa Gatumba, Nkurunziza Eliphaz ashimira abarokotse Jenoside uko bakomeje kwiyubaka kubera umutekano usesuye.

Avuga ko ubundi inyamaswa nazo zigira impuhwe, nyamara abicanyi bahindutse inyamaswa kugeza n’ubwo bica abana babo n’abo bashakanye, banica abihaye Imana babahaga amasakaramentu banabigisha gukundana.

Avuga ko kuba uwahoze ari Padiri mukuru wa Paruwasi ya Nyange, Seromba, yategetse gusenyeraho Abatutsi kiliziya, byongera kugaragaza urwango rwari rwarabaye indenga kamere.

Yongeraho ko ntawahindura amateka, ahubwo ikiriho ari ukurenga ubugwari bwaranze abayobozi ba Leta mbi y’abicanyi, ahubwo abarokotse bagaharanira kwiyubaka.

Agira ati “Turi abahamya bo kugaragaza ko ubuzima buhari, duharanire icyagira u Rwanda rwiza kurushaho, uyu munsi twifitiye icyizere duharanire kuba umusemburo w’iterambere, amateka yacu adufashe guhindura ubuzima".

Basobanuriwe amateka y’urwibutso rwa Kibilira

Asaba abarokotse kwirinda icyabatanya ahubwo bakicara bagatekereza cyane, kandi bagahugurana ku cyatuma barushaho gutera imbere, bakarwanya abashakira inabi Igihugu, bagaharanira amahoro mu miryango kuko ari ho Igihugu gishinzwe imizi.

Agira ari "Icyo dusabwa ni uguhinduka kugira ngo tuzasoze urugamba ababyeyi bacu batangiye, tukabibuka tugakira ibikomere kuko nibyo bizadufasha gukomeza kwiyubaka".

Abarokotse Jenoside b’i Kageyo bavuga ko kurokokera mu Ngororero bitari byoroshye, bakifuza ko Abanyarwanda bakwiye kwirinda abashaka kongera kubaryanisha, ahubwo bakarushaho gutanga amakuru ku bakomeje gushaka guhungabanya umutekano.

Abarokotse b’i Kageyo bavuga ko bazakomeza kubana neza n’abaturanyi babo

Urwibutso rwa kibilira rwihariye amateka ya Jenoside uko ariho yageragerejwe

Ababyeyi basobanuriwe uko bakwiye kwita ku mirire myiza y’abana

Akarere ka Ngororero gafite ijanisha rya 50.5% by’abana bafite imirire mibi, bisobanuye ko umwana umwe mu bana babiri mu Karere ka Ngororero afite ikibazo cy’imirire mibi.

Akarere ka Ngororero niko kaza imbere mu Rwanda mu kugira umubare munini w’abana bafite ibibazo by’imirire mibi, naho Intara y’Iburengerazuba ikaba iya mbere mu kugira abana bafite imirire mibi, nyamara u Rwanda rufite intego ko muri 2024 igipimo cy’igwingira mu bana batarengeje imyaka itanu kigomba kuba kiri munsi ya 19%.

Umuyobozi wungirije ushinzwe imibereho myiza y’abaturage mu Karere ka Ngororero, Mukunduhirwe Benjamine, avuga ko igwingira riboneka mu Karere ryatewe n’imyumvire ikiri hasi, amakimbirane mu miryango, kutamenya guteka indyo yuzuye n’ubukene.

Mukunduhirwe avuga ko nubwo izi mbogamizi zihari, Akarere ka Ngororero gafite ingamba zikumira igwingira ry’abana harimo kuzamura imyumvire y’ababyeyi mu kwita ku buzima bw’umwana kuva agisamwa, aho umubyeyi asabwa kwipimisha inshuro enye, kugira ngo umwana n’umubyeyi bitabweho. Iyo umwana amaze kuvuka, umwana agomba kubona inkingo zose naho umubyeyi akabona indyo yuzuye, umwana abona mu mashereka, hamwe no gukomeza umuco w’isuku.

Gahunda ya Leta iteganya ko muri 2024, ibipimo by’igwingira mu bana bigomba kuba bitarenze 19%, ukaba ari umukoro ku Karere nka Ngororero ifite ibipimo bya 50.5%, nyamara kuva muri 2015 kugera muri 2020 karagabanyijeho igipimo cya 5.

Mukunduhirwe avuga ko bizeye ko uyu muhigo bazawugeraho bitewe n’ingamba bafashe.

Agira ati “Ikintu turimo gushyiramo imbaraga cyane ni ingo mbonezamikurire, aho umwana abona serivisi z’imirire, isuku no gukangura ubwenge, kandi tuba twizeye neza ko izo serivisi zimugeraho kubera abajyanama b’ubuzima. Dufite ingo mbonezamikurire ziri ku mudugudu zibarirwa mu 1113, abana bari mu ngo mbonezamikurire bagera 23,000 ku buryo twizera ko abana nibakomeza kwitabira ingo mbonezamikurire tuzagera ku ntego twihaye."

Mukunduhirwe akomeza avuga ko kugabanya igwingira bazagendera ku gikoni cy’umudugudu aho ababyeyi bahurira kabiri mu cyumweru bagatekera abana ndetse bagapimwa bikazafasha kurwanya imirire mibi.

Ati "Turimo gushyira imbaraga mu gupima abana ku buryo ugiye kugwa mu igwingira uhita umufasha byihariye akaba akize mu minsi 12. Dufite gahunda yitwa ‘Ni uwacu nakure neza’ ifasha ababyeyi badafite ubushobozi kandi turimo kwifashisha Urubyiruko rw’abakorerabushake barimo kubaka uturima tw’igikoni ndetse n’ababyeyi bubahiriza gahunda yo kugaburira umwana mu mudugudu. Dufite gahunda yo kubyarana muri batisimu, aho umwana ufite ikibazo cy’imirire mibi yitabwaho bigakemuka."

Mukunduhirwe avuga ko muri 2017 Akarere ka Ngororero kari gafite abana barenga ibihumbi 3 400 bafite imirire mibi, ariko ubu barapimye basanga bafite abana bari mu mirire mibi 107.

Ati “Dufite gahunda yitwa ‘Ni umusanzu wanjye’ aho ababyeyi bakuze barengeje imyaka 55 biha gahunda yo gukemura amakimbirane mu muryango kuko aho yagaragaye haboneka guhimana no kutita ku mwana bikaba nyirabayazana w’imirire mibi. Dufite gahunda y’igitondo iba nibura kabiri mu cyumweru ku wa Kabiri no ku wa Gatandatu abaturage bakora isuku haba aho batuye n’aho bakorera. Ibi tubyitaho kuko umwanda na wo ugira ingaruka mu mikurire y’abana. Twateguye ko buri mudugudu ugomba kugira uturima tw’igikoni tutari munsi y’ijana, kandi na gahunda yo koroza abaturage irakomeje, aho abaturaye bahabwa amatungo magufi n’amatungo manini mu gufasha ababyeyi kubona ibikomoka ku matungo bagaburira abana."

Mukunduhirwe avuga ko ikibazo giterwa n’ubukene kizakemuka kubera imirimo, akemeza ko hari akazi kenshi kagiye gutangwa mu kurwanya isuri, bikazafasha ababyeyi kubona imirimo no kugira icyo binjiza.

Abaturage baganiriye na Kigali Today bavuga ko bimwe mu bitera igwingira mu bana harimo ubushobozi buke aho bamwe badahabwa serivisi kubera ko bafatwa nk’abishoboye. Icyakora hari abemeza ko imyumvire n’amakimbirane ari byo nyirabayazana w’imirire mibi kuko hari abarwaza imirire mibi aho kujya kwa muganga bakajya mu bapfumu.

Icyuma kiri iburyo, nicyo cyifashishwa mu gupima ubusharire bw’ubutaka no gukora ibipimo by’imyungu ngugu

Bimwe mu byo abo banyeshuri bamaze kumenya gukora bikenewe mu muryango nyarwanda, harimo kongerera agaciro ibikomoka ku buhinzi, gukora amasabune, kuvumbura hifashishijwe ubugenge, aho bamaze gukora icyuma kireba kure cyifashishwa ku bwato bwibira mu mazi, n’ishyiga rikoresha imbaraga za rukuruzi mu guteka.

Umunyeshuri wiga mu mwaka wa kane ishami ry’imibare, ubugenge n’ubutabire (MPC), avuga ko mu kongerera agaciro ibikomoka ku buhinzi bazi gutegura inyama ya tofu ikorwa muri soya, bigamije kubyaza umusaruro ibihingwa bikungahaye ku ntungamubiri kandi bashobora gufasha mu mikurire y’abana n’abantu bakuru.

Avuga ko gutegura iyi nyama n’amata ya soya byafasha ababyeyi kuboneza imirire y’abana babo, kuko bitagora kuyitegura aho bisaba gutumbika soya mu mazi amasaha umunani, kuyisya cyangwa kuyisekura, gushyiramo amazi ukayungururamo amata, ibisigazwa bikaba ari byo bivamo inyama ya Tofu.

Agira ati “Ibi biroroshye turifuza kongerera agaciro ibyo dukora, duhinga ibiboneka iwacu, ku ruhande rw’ibyo aha harimo akazi kuko izi nyama ziragurishwa, tuzarangiza tutajya gutega amaboko ngo dushakishe akazi, ahubwo tuzishingira inganda zitunganya ibikomoka ku buhinzi’.

Ababyeyi basuye ibyo abana bakora bibaha icyizere cy’abiga siyansi

Bageze ku rwego rwo gupima ubusharire bw’ubutaka

Aba banyeshuri kandi bamaze kugera ku rwego rwo kuvanga ibinyabutabire ku buryo bashobora gupima ubusharire bw’ubutaka, bakaba batanga ubujyanama mu mikoreshereze yabwo mu buhinzi hongerwamo ishwagara cyangwa ifumbire y’imborera n’imvaruganda.

Umunyeshuri ugaragaza uko imyunyu ngugu ikoreshwa mu kuvanga ibinyabutabire, asobanura ko bifasha kumenya ingano y’ubusharire bw’ubutaka, ukaba wamenya inyongeramusaruro wongeramo, imbuto watera muri ubwo butaka n’uburyo wahinduranya ibihingwa, ibyo akaba ari byo abahinzi bakeneye.

Agira ati “Twumva ko hari abajyanama b’ubuhinzi bafasha abantu gukora ubuhinzi bw’umwuga, abo burya baba bakeneye kumenya ibipimo bikenewe ngo ubutaka burumbuke, no kumenya ubwoko bw’ibihingwa byakwera mu butaka, ubwo bujyanama dushobora kubutanga”.

Umunyeshuri usobanura uko bakora amasabune akomeye n’ay’amazi, agaragaza ko bikorwa mu mavuta asanzwe yo guteka na avoka, bakongeramo imyunyu ngugu n’ibinyabutabire bihumuza, n’ibifasha gukora isabune y’amazi.

Abanyeshuri baravangura amata ya soya n’ibikorwamo inyama ya tofu

Avuga ko kuri ubu amasabune ahenze ku isoko bo bikorera ayo kumesa ku giciro gito, aho nk’isabune ikomeye yamesera umunyeshuri igihembwe cyose, igura ibihumbi bibiri (2000frw).

Asobanura ko kwiga ibinyabuzima, ubutabire n’ubugenge bifite akamaro ku banyeshuri, kuko bizabarinda kumara igihe kinini bicaye bategereje guhabwa akazi n’abandi, akifuza ko ubuyobozi bw’ikigo bwarushaho kubongerera ibikoresho bibafasha mu iterambere rya siyansi.

Mu bindi abanyeshuri barimo kwitegura gushyira ahagaragara, harimo ishyiga ryo gutekaho rikoresheje ingufu za rukuruzi, hagamijwe kugabanya ibicanwa no kubungabunga ibidukikije.

Hari kandi icyuma kireba kure gikoreshwa n’inzego z’umutekano mu kureba kure aho bari kugerageza gukora icyuma cyitwa Perisikopi, ishyirwa ku bwato bwibira mu mazi kurebera kure umwanzi bakaba bifuza ko bamenyerezwa n’ibigo bibishinzwe iryo koranabuhanga.

Abanyeshuri berekanye icyuma kireba kure gishyirwa ku bwato bwibira mu mazi

Ibyo abanyeshuri bakora bizafasha umuryango nyarwanda

Umuyobozi wa College ADEC Ruhanga, Bernard Biziyaremye, avuga ko bigisha iby’amasiyansi hagamijwe kuba indashyikirwa mu kwigisha siyansi mu Rwanda, kandi ko kugira ng bigerweho uruhare rw’ababyeyi ari ingenzi.

Agaragaza ko ku byo bakora birimo ubugenge, ubutabire n’ibinyabuzima, hari ibyo babasha kwikorera nk’amasabune abafasha kunoza isuku, aho bakora isabune zishobora no kugurishwa ku masoko.

Biziyaremye nawe ahamya ko kuba abana hari ibyo biga gukorera ku ishuri bizafasha kwihangira imirimo, kuko iterambere rya siyansi rijyana n’iterambere ry’abaturage.

Agira ati “Abana biga ibintu bikenewe mu buzima bw’abaturage niyo mpamvu dukomeza gukora ibishoboka kugira ngo ejo navuga aho yize, bizagaragare ko ari icy’itegererezo mu ishuri kandi hagamijwe iterambere ry’Igihugu”.

Avuga ko kugeza ubu Leta ikomeza kubafasha ariko ubushobozi bukiri hasi, kubera ubukene bw’ikigo n’ababyeyi, by’umwihariko kubasha kwigurira ibikenerwa muri za Laboratwari, hakaba hakiri n’ikibazo cy’isomero kandi ikigo gifite ububiko bw’ibitabo, ikibazo cya Interineti nacyo kikaba kibahangayikishije.

Ababyeyi bafitiye abana babo icyizere

Ababyeyi barerera kuri College ADEC nabo bavuga ko batari bizeye ko abana babo bamaze kubona ubumenyi buhagije, ku buryo bizeye ko nibarangiza amasomo bazarushaho gufasha imiryango yabo.

Umwe muri bo agira ati, “Ibyo twabonye bazi gukora nk’amasabune, turumva ko ririya koranabuhanga atazaryicaza, ashobora kwishakishiriza atari ngombwa ko abona akazi muri Leta ahubwo akikorera”.

Ababyei basabwa kugira uruhare mu gutuma abana babo biga neza siyansi

Nzayisenga Jean Damascene avuga ko kuba abana barimo kwiga ibijyanye no kongerera agaciro ibikomoka ku bihingwa, nko gukora amata ya soya n’inyama ya Tofu, byatuma umwana urangije amashuri yabasha kwiteza imbere.

Agira ati “Nanjye nahakuye isomo kuko mu rugo nzashobora kubikora, twe twize cyera ikoranabuhanga ritaraza twigaga dushushanya ibikoresho bya Laboratwari, tukayijyamo nka rimwe mu kwezi ariko bano bana urabona ko bamaze gutera imbere”.

Igihe ibyo aba bana bakora byahabwa agaciro na Minisiteri zihuriye ku burezi, byagarurira icyizere abari baratangiye kwanga kwiga siyansi, bavuga ko uyirangije mu Rwanda ntacyo aba shoboye kwikorera.

Ubutabazi bwarakozwe ariko umwe akurwamo yitabye Imana

Ubuyobozi bw’Umurenge wa Gatumba butangaza ko impanuka ishobora kuba yaratewe no kuba ubutaka bw’umusozi bworoshye cyane kubera imvura nyinshi imaze iminsi igwa, bukamanukira abakozi bamwe bakavamo undi umwe agasigaramo kuko yari yinjiye kure.

Umunyamabanga Nshingwabikorwa w’agateganyo w’Umurenge wa Gatumba, Nkurunziza Eliphaz, avuga ko impanuka yabaye ku gicamunsi cyo ku wa Gatandatu, aho ubutaka bwamanutse abantu bamwe bakabasha kuva mu kirombe, babiri muri bo bababaye ariko bajyanwa kwa muganga aho bongeye kugarura ubuzima.

Umwe mu bacukuraga we ngo byaragoranye ko ahita azamuka kuko yari kure ugereranyije n’abandi, ubutabazi bukaba bwarakomeje kugeza ku cyumweru mu gitondo aho yakuwemo yamaze kwitaba Imana, agahita ashyingurwa.

Agira ati “Ubutabazi bwarakomeje uwo mugoroba kugeza mu gitondio akurwamo saa moya yamaze kwitaba Imana, yari yinjiye mu kuzimu ku buryo bitoroheye abantu kumugeraho vuba, turakeka ko impanuka yatewe n’uko ubutaka bwanyoye amazi menshi”.

Uhagarariye Ruri Mining Trade yatangarije Kigali Today ko impanuka yatewe n’umusozi wacitse inkangu ukamanuka ugatwikira ahacukurwaga amabuye y’agaciro, nyamara ngo hari habanje kugenzurwa niba ahacukurwa nta kibazo hafite.

Nkurunziza avuga ko Kompanyi ya Ruli Mining Trade isanzwe ifite ubuzobere mu bucukuzi, kandi yemewe n’amategeko gukorera ubucukuzi muri ako kagari, kandi bafite ibikoresho bihagije kandi abakozi bayo bafite ubwishingizi bw’ubuzima.

Ibyo ngo bisobanuye ko hari icyizere cy’uko umuryango wa nyakwigendera ushobora guhabwa ibiteganywa n’amategeko, kubera ko yari mu bwishingizi kandi akaba yazize impanuka y’akazi.

Icyakora ngo birakwiye ko mu gihe cy’imvura habaho kwigengesera mu gucukura i kuzimu mu rwego rwo kwirinda impanuka zishobora guhitana abantu benshi, kubera ko ubutaka buba bworoshye cyane.

Agira ati “Inama twabagira ni uko mu gihe cy’imvura bagira amakenga ntibacukure ikuzimu ahubwo bakimukira ahandi cyangwa bagategura i musozi akaba ariho bakorera, kugira ngo ikirombe kibe kitanapfundikiriramo abantu benshi”.

Umusozi waramanutse utwikira ahacukurwaga

Nkurunziza avuga ko ku wa Kane tariki ya 12 Gicurasi 2022 hateganyijwe inama n’ubugenzuzi mu rwego rwo kureba niba aho hantu hakomeza gucukurwa, cyangwa ibikorwa byaba bihagaritswe mu gihe cy’imvura.

Agira ati “Twebwe ku rwego rw’umurenge nta burenganzira dufite bwo guhagarika kampani, ku wa kane tuzagirana inama y’ubuyobozi bwayo n’abatekinisiye b’akarere, tukareba niba batugira inama yo kuba bahagaritswe, ariko ubu barimo gukora”.

Ubuyobozi bwa Ruli Mining Trade butangaza ko babiri bari bajyanywe kwa muganga ubu bameze neza, bashobora no gusezererwa, hagati aho ahabereye impanuka bakaba baretse kuhacukura, kandi hakomeza kugenzurwa n’ahandi basanganywe kugira ngo hirindwe impanuka zishobora kuvuka.

Abajyanama b’ubuzima bari mu bukangurambaga n’abandi bayobozi, bugamije guca igwingira mu bana

Abo bajyana b’ubuzima bagaragaza ko ibyo kurya mu murenge wabo bitabuze, ahubwo usanga abagore n’abagabo babanye nabi batabona umwanya wo kwita ku bana, ibyo bikanagaragara ku miryango irimo abagore n’abagabo babaswe n’ubusinzi kuko nabo batabona umwanya wo gutegurira amafunguro abana.

Umujyanama w’ubuzima Ukizemwabo Patrice wo mu Kagari ka Ruganda, avuga ko nyuma yo gusesengura ibibazo n’ingamba bafata ku igwingira ry’abana, bagiye kurushaho kwegera imiryango ibanye nabi bakajya bayiganiriza.

Undi mujyanama wo mu mudugudu wa Rusebeya avuga ko igwingira ry’abana mu mudugudu wabo riterwa n’amakimbirane yo mu ngo, aho kungira ngo umugabo n’umugore bite ku bana ugasanga bashwana.

Avuga ko nk’abajyana b’ubuzima bafite mu nshingano kwigisha abaturage uko bategurira umwana amafunguro, by’umwihariko ku bana bari munsi y’imyaka ibiri, gupima imikurire y’umwana bikazatuma barushaho kwegera abana bafite ibibazo.

Agira ati “Ingamba twifuza gufatanyamo n’ubuyobozi ni uko badufasha kurwanya amakimbirane mu muryango agacika tukabona uko tuganiriza ababyeyi. Turanasaba kandi ko ibyiciro byavugururwa kuko usanga hari abantu bakeneye ubufasha bashyizwe mu cyicirio cya gatatu batabona imfashanyo, bigatuma imirire yabo itagenda neza”.

Igikoni cy’Umudugudu kigiye kuvugururwa kugira ngo ababyeyi barusheho kwitabira gutegura amafunguro y’abana

Umujyanama w’ubuzima Mbitondere Olive, ku kigo nderabuzima cya Sovu, avuga ko amakimbirane mu miryango atuma abagabo n’abagore badashyira hamwe ngo bashake ibyatunga abana, ubusinzi nabwo bugatuma batavuga rumwe.

Agira ati “Ndumva abagore bajya bagirwa inama yo kuba mu ngo, byaba ngombwa ubuyobozi bukadufasha gucyaha abagore bajya mu tubari bakajya bataha kare, kuko n’iyo baba bahashye, ibyo baguze ntabwo babona umwanya wo kubitunganyiriza abana, natwe tugiye kurushaho kunoza ubukangurambaga”.

Umunyamabanga Nshingwabikorwa w’Umurenge wa Sovu, Rutagisha Aimable, avuga ko nyuma yo gusesengura koko byigaragaza ko abana bagwingiye bagaragara cyane mu miryango yugarijwe n’ubusinzi, kuko usanga abayeyi bajya mu mirimo bataha bagahitira mu tubari kunywa inzoga ntibite ku bana babo.

Yemeza kandi ko abana bo mu miryango ibanye mu makimbirane bibasiwe n’igwingira ndetse abo bana banagaragara mu miryango irimo ba bakobwa babyaye bakiri bato, nabo badafite ubushobozi kuko unasanga benshi muri bo bavuka muri ya miryango itabanye neza.

Avuga ko bafashe ingamba zo kurandura ikibazo cy’abana bagwingiye binyuze mu ngamba zo gukorera hamwe nk’inzego zose kugeza ku midugudu, bagakaza igikoni cy’umudugudu kuko abantu bazanaga abana kurya gusa bagera mu ngo ababyeyi ntibabikore.

Agira ati “Igikoni cy’umudugudu kigiye gushyirwamo imbaraga buri wa kabiri na buri wa kane, aho ababyeyi bose bafite abana bari munsi y’imyaka itanu bazajya bitabira bakigishwa uko bategura indyo yuzuye”.

Rutagisha avuga ko igikoni cy’umudugudu kigiye kujya gikorwa kabiri mu cyumweru

Yongeraho ko abana bagiye kujya bapimwa kabiri mu kwezi kugira ngo bakurikiranirwe hafi, kuko nabyo byafasha kumenya niba umwana azamuka mu mikurire cyangwa asubira inyuma, no gukangurira ababyeyi kutagurisha ibyo bahabwa byongerera umwana imirire.

Agira ati “Tugiye kwita kuri bamwe bahabwa ibyunganira imirire y’abana tubaza ababihabwa uko babikoresheje, kuko wasangaga bititabwaho, bikazatuma ababihawe batabyirira cyangwa ngo babigurishe”.

Ababyeyi bose bari mu cyiciro cya mbere n’icya kabiri bahabwa ibyunganira imirire y’abana, mu Murenge wa Sovu hakaba hagaragara abana barindwi barimo gukurikiranwa kubera imirire mibi, mu gihe Akarere ka Ngororero kari ku mwanya wa mbere mu Gihugu mu kugira abana benshi bagwingiye ku kigero cya 50.5%.

Ikarita igaragaza aho Akarere ka Ngororero gaherereye

Amakuru agera kuri Kigali Today aravuga ko uwo mugabo yishe umugore we ku Cyumweru tariki ya 10 Mata 2022, amukubise umuhini ndetse akanifashisha ibuye, nyuma y’uko bashyamiranye bapfa amafaranga bari bagurishije itungo, ntibumvikane uko bayakoresha.

Ukekwaho kwica umugore we ni Nzamurambaho Jean Marie Vianney w’imyaka 33, aho yashyamiranye na nyakwigendera Gakuru Janvière w’imyaka 32, kubera itungo yagurishije bikaza kubaviramo gukimbirana byageze n’aho umugabo yica umugore we.

Ubuyobozi bw’Akarere ka Ngororero burasaba abaturage kudahishira ukekwaho icyaha ahubwo ko akwiye gushyikirizwa inzego zikamukurikiranaho icyo cyaha.

Nyakwigendera asize abana batatu, bahise bashyikirizwa imiryango y’ababyeyi babo, ariko ngo kuko bakiri bato ubuyobozi nabwo bukazajya bubaba hafi, kuko bagiye kugirwaho ingaruka zo kutarerwa n’ababyeyi babo.

Umuyobozi w’Akarere ka Ngororero, Nkusi Christophe, yagize ati “Muri iyi minsi hari umuryango ugiye kuba ubafashe kugira ngo batagira ibibazo kuko baracyari batoya, natwe nk’ubuyobozi turababa hafi kugira ngo ubuzima bwabo bukomeze kubungabungwa igihe ababyeyi babo badahari”.

Umuyobozi w’Akarere ka Ngororero, Nkusi Christophe, wageze aho icyaha cyabereye avuga ko basuye abaturage bakaganira babahumuriza kandi bakongera kubasobanurira ibijyanye n’uburenganzira ku mutungo, n’uruhere rw’abagize umuryango mu kujya inama uko umutungo w’urugo wakoreshwa.

Agira ati “Ni igihombo kinini ku muryango wa Nyakwigendera, n’imiryango abo bombi bakomokamo, n’Igihugu muri rusange. Birababaje kubona abantu bapfa amafaranga yagurishijwe itungo biyororeye, ni yo mpamvu twigishije abaturage kwirinda amakimbirane”.

Umuyobozi w’Akarere ka Ngororero asaba abashakanye kugaragaza ibibazo byabo mbere y’uko bakimbirana, kwegera ubuyobozi bikaba byagabanya ingaruka z’amakimbirane mu ngo kuko iyo bibaye ngombwa babatandukanya ariko ubuzima bwabo bugakomeza.

Abaturage bagaragaza ibyishimo byo guhabwa amafaranga abateza imbere

Abaturage bo mu Murenge wa Kageyo bategujwe guhabwa ayo mafaranga atishyurwa, hari abavuga ko ari indoto zo gusezerera ubukene.

Riziki Anita, yitabiriye inama yabaye tariki 28 Werurwe 2022 ibateguza kuzahabwa amafaranga, avuga ko nayabona azateza imbere ubuhinzi bwa Kawa, abihera ko yari asanzwe ahinga ntabone umusaruro kubera kubura ifumbire, ariko ngo amafaranga azamufasha kugura inka imuha ifumbire ubundi yagure ubuhinzi bw’ikawa.

Agira ati "Mfite ikawa, nzazongera nshake ubwatsi nzisasire, abana bige, ubundi nshake akantu k’ubucuruzi nkora ku buryo ejo hazaza ntazicuza."

Ntambabazi Jean, we guhabwa amafaranga abyita inzozi kuko angana atyo atarayatunga mu buzima bwe.

Agira ati "Ndumva ari inzozi kuri njye kuko ariya mafaranga ntayo nigeze ntunga kuva nabaho."

Ntambabazi usanzwe asuhuka akajya gukorera amafaranga mu Ntara y’Iburasirazuba, avuga ko yakoreraga igihumbi ku munsi akarya 400 akabika 600 kugira ngo azabone icyo ashyira umuryango, akemeza ko aya mafaranga naza azicara akumvikana n’umugore icyo bayakoresha gituma basezera ubukene.

Ati "Ntekereza kugura inka kuko ntigeze nyitunga kandi itanga ifumbire umuntu akeza. Najyaga mu Mutara kuragirira abantu bakambwira ko ndagiye umwaka bazampa inka ariko nkibaza uko nayikura i Nyagatare nkayigeza mu Ngororero bikanyobera, ubu rero nzagura inka."

Ni amafaranga ahabwa ingo zose mu murenge ukuyemo abakire bagaragajwe n’igenzura rikorwa na Give Directly, hamwe n’abimukira bashya bumva amafaranga agiye gutangwa bakajya kuhatura.

N’ubwo ubuyobozi bwa Givedirectly budatangaza amafaranga buzatanga mu Murenge wa Kageyo kuko batarakora ibarura ry’abagomba kuyahabwa, ariko bwemeza ko azahabwa abaturage kugera kuri 99% kandi akazabafasha kuva mu bukene.

Umukozi wa Givedirectly, Muhire Jean Claude, yabwiye Kigali Today ko bagiye gukora ibarura ry’abazahabwa amafaranga kandi bikajyana no kuganira n’abaturage, babafasha kwiga imishinga azashorwamo.

Agira ati "Amafaranga dutanga si ayo kwikenuza nk’uko bamwe babivuga, ahubwo ni ayo kwiteza imbere. Twasanze abaturage baba bafite ibitekerezo by’imishinga bifuza gukora, ariko bakabura igishoro, mbere yo kuyabaha turabaganiriza, kugira ngo bayashore mu mishinga bateguye ibateza imbere."

Muhire Jean Claude aganira n’abaturage ba Kageyo

Muhire avuga ko mu guhitamo abahabwa amafaranga bagendera ku ibarura bakora.

Ati "Iyo tugeze mu murenge tubanza kubarura abazahabwa amafaranga, dufite ibyo tugenderaho, dufite ibibazo tubaza, ntibitangaje usanze umwarimu ari mu bahabwa amafaranga, cyangwa gitifu w’Akagari kuko tugendeye ku bisabwa aba abikwiye."

Akomeza avuga ko bahereye aho batangiriye, abaturage biteza imbere kandi ubuzima babayemo bufite itandukaniro n’ubwo bari babayemo mbere yo guhabwa amafaranga.

Ati "Ubuzima burahinduka iyo abaturage bahawe amafaranga, bashyira mu bikorwa imwe mu mishinga yari yarabananiye."

Uretse abafite gahunda yo kugura inka kugira ngo bongere ifumbire mu mirima yabo, hari abafite imishinga yo gutubura imbuto, gukora ubucuruzi bigaragaza inyota yo kwiteza imbere.

Mukunduhirwe Benjamine, Umuyobozi w’Akarere ka Ngororero wungirije ushinzwe imibereho myiza y’abaturage, avuga ko bagiye kwegera abaturage kugira ngo amafaranga bazahabwa azabagirire akamaro.

Agira ati "Ubu tugiye gushyira ibiro aha, abaturage tubabe hafi, haba mu kwiga imishinga bazayakoresha no kubigisha kutayasesagura."

Mukunduhirwe avuga ko bahisemo Umurenge wa Kageyo kubera ufite abakene benshi, aho biteganyijwe ko mu ngo ibihumbi bitanu zihari, abarenga 90% bazahabwa ayo mafaranga.

Uyu muyobozi avuga ko indi mirenge yazafashwa kubona amafaranga bagendeye ku baturage bakennye, ari Ndaro na Bwira kuko ariyo ikurikiraho mu kugira abakene benshi.

Amafaranga atangwa ate?

Muhire Jean Claude yabwiye Kigali Today ko amafaranga adahabwa umuturage mu ntoki, ahubwo nyuma yo kubarurwa agashyirwa ku rutonde ngo umuturage ayahabwa mu byiciro bibiri, kandi bigakorwa hakoreshejwe ikoranabuhanga rya telephone.

Ati "Iyo tumaze kwemeza abayahabwa, ndetse bakaganirizwa, ikiciro cya mbere umuturage ayabona kuri Mobile Money, akaza ari ibihumbi 390, asigaye nayo aza nyuma y’igihe gito."

Akomeza avuga ko atari Givedirectly ihitamo aho ikorera, ahubwo babisabwa na Minisiteri y’Ubutegetsi bw’ibihugu bakorana bya hafi, "MINALOC niyo itubwira aho dukorera bitewe n’aho ibona hari ubukene."

Umukozi wa Givedirectly aganiriza abaturage

Zimwe mu mbogamizi bamaze guhura nazo kuva batangira igikorwa cyo gutanga amafaranga, ni abantu babiyitirira bagamije kwiba abaturage.

Ati "Aya mafaranga ntabwo yishyurwa, ariko hari abatwiyitirira bashaka kwambura abaturage. Twe icyo dusaba abaturage ni ukuyakoresha neza bakiteza imbere."

Muhire avuga ko mu Rwanda ingo ibihumbi 147 zamaze guhabwa ayo mafaranga mu turere twa Ngoma, Gisagara na Nyamagabe, ubu bakaba bagiye gukorera mu Karere ka Ngororero, kugeza ubu amafaranga arenga miliyari 60 akaba ariyo gutangwa.

Mu bujurire urukiko rwanzuye ko abo banyeshuri bahanishwa igifungo kiri hagati y’amezi ane n’atanu ku byaha baregagwa byo kwangiza ikintu cy’undi ku bushake, bahita barekurwa kuko bari bamaze amezi arenga atandatu bafunze.

Ababyeyi b’abo bana bari bahangayikishijwe n’imibereho yabo muri gereza na nyuma yo kumara imyaka itanu bafunze, batangaje ko bishimiye imyanzuro y’urukiko bajuririyemo, kuko bahamyaga ko urukiko rw’ibanze rwari rwabakatiye rwihanukiriye.

Umwe muri abo babyeyi avuga ko umwana we yari afite amanota yo kujya kwiga Kaminuza, ariko byari bimubabaje ukuntu azamara imyaka itanu muri gereza, aho kuyimara arangije kaminuza.

Uwo mubyeyi anavuga ko abo bana biburaniye nta bunganizi mu mategeko bafite, kuko bakekaga ko amakosa bakoze atavamo ibyaha biremereye, dore ko bari baranamaze kumvikana n’ubuyobozi bw’Ikigo cya ESECOM Rucano bigagaho, bakishyura ibyo abana babo bari bangije.

Agira ati “Ubuyobozi bw’ishuri bwadutumyeho tugirana ibiganiro twishyura ibyangijwe n’abo bana birimo gusana aho bari basenye amatafari, no gusubizamo ikirahure cyari cyamenetse aho bararaga. Ntabwo rero twumvaga ukuntu urukiko ruvuga ko ari ibyaha bakoze kandi ibyangijwe twarabisannye”.

Anavuga ko ubuyobozi bw’ishuri nta kirego bwigeze butanga mu rukiko, ariko bakaza gutungurwa no gusanga ikirego gishigiye ku ishuri, nyamara muri dosiye harimo inyandiko mvugo y’ishuri yavugaga ko ntacyo ribakurikiranyeho.

Abo banyeshuri baregwaga ibyaha byo kwangiza ikintu cy’undi ku bushake, ari nayo mpamvu bari bahawe igihano kiri hejuru cyo gufungwa imyaka itanu n’ihazabu ya miliyoni eshanu buri umwe, byose bikaba byakuweho bagahanishwa gufungwa amezi hagati y’ane n’atanu.

Mu mwaka ushize ubwo basozaga ibizamini by’amashuri yisumbuye, nibwo abo banyeshuri batwitse isaso y’igitanda bararaho, ndetse banasenya amatafari ku rukuta rw’urugo aho buririye batorotse ikigo bakajya kunywa inzoga, bagaruka bagatwika bavuga ko bishimira ko barangije ibizamini, nyuma y’imyaka ibiri bari bamaze badakora ibizamini bya Leta.

Bagiye kwegerezwa amazi meza

Ni amazi azatangwa n’Ikigo cy’igihigu gishinzwe gukwirakwiza amazi, isuku n’isukura (WASAC), ibikorwa bizatwara amafaranga y’u Rwanda asaga 7,500,000,000 azatangwa na Banki Nyafurika Itsura Amajyambere (AfBD).

Imiyiboro itatu izubakwa izaba ifite uburebure bwa kilometero 168,390 n’ibigega 41, ndetse n’amavomo 113 azafasha abaturage kubona amazi hafi, batagombye gukora ingendo ndende zirenze metero 500.

Umuyobozi w’Akarere ka Ngororero, Nkusi Christophe ,avuga ko yizeye ko umushinga uzagera ku ntego nta nkomyi, kandi bizatangira mu mezi abiri bikazamara amezi 18.

Umukozi w’Akarere ka Ngororero, Jean Pierre Céléstin Ntakiyimana, yabwiye Kigali Today ko aya mazi azatuma abaturage b’ako karere babona amazi 100%.

Agira ati "Ubusanzwe abaturage bashobora kubona amazi meza muri Ngororero babarirwa hagati ya 60-70%, ariko uyu muyoboro mushya uzatuma n’abandi basigaye bayabona hafi yabo, munsi ya metero 500 abandi bayageze mu ngo zabo."

Ubuyobozi bwa WASAC busobanur igikorwa cyo kwegereza amazi abatuye ba Ngororero

Ntakiyimana avuga ko abaturage 142,346 bazegerezwa amazi meza bangana na 34.8% bitume Akarere gashobora kugera ku ntumbero yo kwegereza amazi abaturage ku ijanisha ringana na 100% muri 2024.

WASAC izegereza amavomero 113 hafi y’abaturage kandi hazashyirwaho ibigega bifata amazi, bizajya bikomeza kuyatanga igihe isoko ihagaze.

N’ubwo henshi bizwi ko gukora isoko y’amazi bisaba ubushobozi bwinshi, ubuyobozi bwa Ngororero buvuga ko amazi WASAC izageza ku baturage azakurwa ku masoko mu Murenge wa Muhanda no mu mashyamba ya Gishwati.

Gutwara amata ku mutwe bituma agera ku ruganda cyangwa ku ikusanyirizo yatakaje ubuziranenge

Koperative y’aborozi bo muri Gishwati igaragaza ko mu bihe by’imvura aribwo amata ata agaciro cyane, kuko nta buryo bwo kuyageza ku ruganda buba buhari kuko imihanda yangiritse bikomeye ku buryo yaba imodoka na za moto zitabasha kugenda.

Aborozi bavuga ko batakambiye ubuyobozi igihe kirekire ngo bakorerwe imihanda ariko nta gisubizo barabona ku buryo umukamo wabo hafi ya wose upfa ubusa. Urugero ni nko ku bakoresha ikusanyirizo rya Bweru ryakira amata nibura litiro 3000 ku munsi aya yose akaba atakigezwayo kuko nta nzira zo kuyahageza hakoreshejwe imodoka zihari.

Aborozi bagaragaza ko ubusanzwe litiro y’amata bayishyurwa ku 150frw iyo igeze ku ruganda rwa Mukamira, ariko ubu bigoye no kubona uwaguha 50frw kuri litiro ibyo bikaba bibateza ibihombo bikabije ku buryo bahitamo kuyatangira ubuntu andi bakayabogora (bakayamena).

Umworozi Masharinga Rujali avuga ko igice cyangiritse ari ikiva ahazwi nko mu Gapfunsi kugeza ku makusanyirizo ya Bweru na Muhumyo, kandi igihe cyose nta muhanda ugeza amata ku ikusanyirizo ntacyo ubworozi buzabagezaho kuko kuyikorera ku mutwe agera ku ruganda rwa Mukamira nta buziranenge afite.

Agira ati “Iyo amata ageze ku ikusanyirizo arakonjeshwa, ni ho ava ajyanwa ku ruganda bigatuma agerayo agifite ubuziranenge, ubu dufite ikibazo cy’uko amata ari menshi, nta n’ubwo abaturage bayanywa ngo bayamare. Imvura yangije imihanda iratuma imodoka itaza kuyafata bigatuma yangirika, ubwo igisigaye ni ukuyabikira.”

Avuga ko ubu bitoroshye no kubona uguha na 50frw kuko n’ababasha kuyagura ku mutwe ntabwo bayatwara yose kandi banayaguze ku mafaranga makeya, mu gihe ahandi hantu bavuga ko amata yabuze, bo barayatangira ubuntu agahabwa ingurube.

Agira ati “Umworozi ntacyo akirwana na cyo ni ugucungira ku konkesha inyana ikazagurishwa, njyewe nkama nibura litiro 150 ku munsi ayo mata yose ntabwo abashumba bayikorera ku mutwe ngo bazabivemo”.

Amakusanyirizo ya Muhumyo na Bweru ubu nta mata yakira

Aborozi bavuga ko nk’ikusanyirizo cya Bweru ryakira litiro zisaga 3000 ku munsi nta mata ryakira, kuko nta muhanda uhagera naho ikusanyirizo rya Muhumyo ryakira asaga litiro 1500, ayo yose bikaba bitoroshye kuyageza ku ruganda rwa Mukamira ruyatunganya kuko agerayo yangiritse.

Agira ati “Ayo mata yose apfa ubusa tuyiyera aborozi ku buntu bakayaha ingurube kuko tuba twanga kumena amata hasi. Ni ikibazo gikomeye twagejeje ku bayobozi ariko batwizeza ko umuhanda uzakorwa turacyategereje”.

Ikusanyirizo rya Bweru ntiryakira amata kuko imihanda yangiritse

Umunyamabanga wa Koperative y’aborozi bo muri Gishwati, Nzitatira Joseph, avuga ko kubera ikibazo cy’imihanda bamenyereye kuyabyarira (kumena amata ku bushake) kuko nta kindi bayamaza igihe cyose yatakaje ubuziranenge kubera kuyikorera mu majerikani bayajyanye ku ruganda.

Avuga ko icyo bifuza ari uko bakorerwa imihanda yo mu nzuri igera ku makusanyirizo kugira ngo babashe kuyageza ku ruganda agifite ubuziranenge, naho ubundi iby’ubworozi bwo mu Gishwati ngo ni nk’umuhango gusa.

Agira ati “Amata tumenyereye kuyabyarira nta kundi byagenda, kuko n’iyo washaka uguha 50frw kuri litiro ntibyoroshye kumubona, ikibazo kizakemurwa n’uko imihanda ikozwe hakaboneka imodoka ziyatwara ku ikusanyirizo kuko amakusanyirizo twubakiwe ntabwo acyakira amata”.

Hari ibisubizo bishakwa ariko ntibikemure ikibazo neza

Umuyobozi w’Akarere ka Ngororero wungirije ushinzwe Iterambere ry’Ubukungu, Uwihoreye Patrick, avuga ko umukamo w’abororera muri Gishwati utagezwa ku ruganda uko bikwiye koko kubera ikibazo cy’imihanda ariko ngo hari gushakwa umuti urambye wo gukora iyo mihanda.

Cyakora ngo kuvuga ko amata ahabwa ingurube ngo ni ugukabya kuko ikusanyirizo rya Bweru riri mu mpinga ari ryo ritakira amata, hakaba hashize ibyumweru bibiri hatunganywa umuhanda ariko ko amata yikorerwa ku mutwe akajyanwa ku Mukamira.

Agira ati, “Amata ya Bweru kugera kuri Mukamira ni nka km 30 ku mutwe agerayo yataye ubuziranenge, tumaze ibyumweru bibiri turwana na byo ariko ntibirakunda turi gushaka za torotoro (imodoka zitunganya imihanda) hari iyo twari twabonye ifasha aborozi n’ubwo itagera hose”.

Yongeraho ati “Igisubizo kirambye ni ugukora iyo mihanda ndizeza abaturage ko inyigo yarangiye kandi umwaka utaha imihanda iraba yatangiye gukorwa. Ikibazo Leta igifite ku mutima, icyizere kirahari ko imihanda izakorwa mu mwaka utaha kuko byaganiriweho mu buryo bwimbitse”.

Avuga ko imihanda igomba gukorwa muri izo nzuri ireshya n’ibirometero bisaga 240 ku buryo Akarere konyine katabyishoboza ari na yo mpamvu Akarere kiyambaje Minisiteri y’Ibikorwa Remezo (MININFRA) kugira ngo igoboke aborozi bageze umukamo wabo ku isoko.

Avuga ko mu gihe imihanda itarakorwa hakomeje gushakwa uko isanzwe isanwa ku bufatanye n’abaturage n’aborozi n’ubuyobozi bw’Akarere hagashyirwamo amabuye. Icyakora biranga bikagorana ko imodoka zisanzwe zanyuramo.

Uyu muyobozi asaba aborozi gukomeza kwihangana bagashyiraho akabo umukamo w’inka zabo ukagera ku makusanyirizo kuko kuyikorera ku mutwe bidatanga amahirwe yo kuyageza ku ruganda agifite ubuziranenge.

Koperative y’aborozi bo muri Gishwati igizwe n’abanyamuryango 228 nibura buri umwe akaba afite hejuru y’inka 10. Muri zo, nibura inka zisaga 2000 zikamwa buri munsi, uwo mukamo wose ukaba udafite isoko ry’amata kubera kwangirika kw’imihanda iyageza ku makusanyirizo.

Wambutse ikiraro cya Nyabarongo ugeze mu Ngororero, amazi aba yuzuye mu muhanda ntawe utambuka

Bitangajwe mu gihe muri iyi minsi no mu bihe by’imvura nyinshi, uwo muhanda ukunze gufungwa kubera ko amazi ya Nyabarongo aba menshi akawurengera, ku buryo imodoka zitabasha kwambuka, abayobozi bakavuga ko uwo muhanda ugiye gukorwa ariko bigahera mu magambo gusa.

Muri Werurwe 2020 nibwo umuyobozi mukuru wungirije muri RTDA, Baganizi Emmile yabwiye Kigali Today.com, ko mu mpeshyi y’uwo mwaka igice cy’umuhanda kirengerwa n’amazi ya Nyabarongo, kizazamurwa nk’uko byakozwe ku muhanda Kigali- Kamonyi, n’ubundi nawo wajyaga urengerwa n’amazi ya Nyabarongo.

Imyaka ibiri irashize uwo mwanzuro utarashyirwa mu bikorwa, kuko ubu hongeye gutangizwa ubusesenguzi bw’uko uwo muhanda wakorwa mu buryo burambye, ibisubizo bikaba ngo bizaboneka mu gihe cy’ukwezi kumwe.

Baganizi avuga ko ibyari byakozwe mbere muri 2020 byagaragaye ko bidatanga igisubizo kirambye, ari nayo mpamvu hongeye gukorwa indi nyingo ku bufatanye n’Ikigo cy’Igihugu gishinzwe amazi n’inzuzi (RWB).

Baganizi avuga ko kugira ngo amazi yuzura mu kabande ko mu kibaya cya Nyabarongo aturuka mu misozi itandukanye, ku buryo bisaba kugenzura neza aho ayo mazi ava n’uburyo yanyuzwa ahandi kugira ngo atabyiganira muri icyo kibaya.

Avuga kandi ko hakwiye gusuzumwa uko harwanywa isuri mu misozi ikikije Nyabarongo aho ayo mazi aturuka, noneho hakarebwa n’uko umuhanda wazamurwa hakurikijwe ibyakozwe na RWB, aho izo nzego zombi ngo zirimo gukorana ngo harebwe igisubizo kirambye.

Agira ati “Turimo gukorana na RWB ngo turebe icyakorwa kirambye tudatangira kubaka umuhanda tutabanje kureba ikibazo cy’ayo mazi, mu kwezi kumwe tuzaba twabonye ibyo bisubizo”.

Ku kijyanye no kuba Baganizi ubwe yari yatangaje muri 2020 ko umuhanda ugiye kuzamurwa, ngo ibyo byari ibyihutirwa, ariko bitatangaga igisubizo kirambye, kuko amazi yinjira mu muhanda azamukira mu miyoboro isanzwe isohora amazi iyasuka muri Nyabarongo.

Nta gihe kizwi umuhanda waba wakozwe

Baganizi avuga ko imirimo izakorwa ihenze kuko agace gasabwa gutunganywa kagomba kwitonderwa, amazi akabanza gufatirwa mu misozi ikikije Nyabarongo, hanyuma umuhanda ukabona gukorwa.

Aha amazi yuzuye mu muhanda ku buryo utamenya aho utandukaniye na Nyabarongo

Icyakora ngo mu mpera z’uku kwezi kwa Gashyantare 2022 hazaba hatangajwe ibyagenderwaho, hanyuma hashakwe ingengo y’imari yihuse yafasha mu gutunganya uwo muhanda, igice kirengerwa n’umwuzure wa Nyabarongo.

Agira ati “Ntabwo navuga ngo ni ejo cyangwa umunsi runaka, kuko abatekinisiye bacu barateganya kujya kureba uko byanonosorwa, noneho hagashakwa ingengo y’imari kuko kariya gace gasaba ibintu bihenze, ariko abaturage nabasaba ko bagira icyizere kuko natwe ubuhahirane butagenda neza biraduhangayikishije”.

Hagati aho abakoresha uwo muhanda bakomeje gutaka ibihomba baterwa no kuba badahahirana cyangwa ngo bagenderane, cyane cyane ku bajya kurangura ibicuruzwa mu mujyi wa Kigali, n’abakora ingendo ziva Muhanga zigana Rubavu na Musanze, mu gihe icyizere bahabwa n’abayobozi gikomeje kugenda gihindagirika.

Abakoresha uwo muhanda bagiriwe inama yo gukoresha umuhanda Kigali-Musanze-Rubavu.

Umuvugizi wa Polisi y’u Rwanda ishami rishinzwe umutekano wo mu muhanda SSP René Irere yabwiye Kigali Today ko uyu muhanda wafunzwe bitewe n’imvura nyinshi yaraye iguye bigatuma amazi yuzura mu mugezi wa Nyabarongo akarenga inkombe agafunga umuhanda ku buryo imodoka zidashobora gutambuka.

Ati “Ikirimo gukorwa ni uko nk’abantu bagenda mu modoka nini zitwara abagenzi mu buryo bwa rusange, baturutse za Muhanga, baragera ahitwa ku Cyome hafi y’uwo mugezi bakavamo, hari aho bakikira ku buryo bafata izindi hakurya zibategereje, hariho uburyo bwo guhererekanya abagenzi ku mpande zombi, ikindi ni uko hari abapolisi bahari kugira ngo bakumire uwashaka kuhanyura ku ngufu kuko ashobora kuhahurira n’ikibazo”.

Polisi isaba abandi bari basanzwe bakoresha uwo muhanda baturutse i Rubavu ko bakoresha umuhanda Rubavu-Musanze Kigali.

Polisi yongeraho ko igihe ibibazo biri burangirire kitazwi, gusa ngo amakuru aturuka aho umuhanda wangirikiye aravuga ko amazi arimo kugenda agabanuka uko akazuba karimo kugenda kiyongera ku buryo bitanga icyizere cy’uko uwo umuhanda ushobora kuza kongera kuba nyabagendwa.

Hirya no hino mu gihugu imvura ikomeje kugwa ari nyinshi, Ikigo cy’Igihugu gishinzwe ubumenyi bw’ikirere (Meteo Rwanda) kikaba mu minsi ishize cyaraburiye Abaturarwanda kwitegura imvura nyinshi irenze urugero rw’isanzwe igwa mu kwezi kwa Gashyantare.

Mwaramutse,

Turabamenyesha ko kubera imvura nyinshi, amazi y'umugezi wa Nyabarongo yafunze umuhanda Muhanga-Ngororero-Mukamira ubu ukaba utari nyabagendwa.

Muragirwa inama yo gukoresha umuhanda Kigali-Musanze-Rubavu.

Murakoze

— Rwanda National Police (@Rwandapolice) February 14, 2022

Ubuyobozi bw’Akarere n’inzego z’umutekano basuye inzuri muri Gishwati

Bitangajwe nyuma y’uruzinduko rw’abayobozi b’akarere n’inzego z’umutekano rwabaye tariki 09 Gashyantare 2022 muri izo nzuri, uwo munsi hakaba haranapfuye indi nka imwe iriwe n’inyamaswa.

Mu ruhande rw’inzuri zo muri Ngororero harabarurwa inka zigera kuri 16 zimaze kuribwa n’inyamaswa muri Gishwati, mu gihe mu nzuri zose zirimo n’iza Rutsiro na Nyabihu habarurwa izisaga 100.

Ubuyobozi bw’Akarere ka Ngororero butangaza ko inka 16 zimaze kuribwa n’inyamaswa ziva muri Pariki y’Igihugu ya Gishwati-Mukura, icyenda muri zo zikaba zarapfuye, zirindwi zikavurwa n’abaganga bazo zigakira.

Umuyobozi w’Akarere ka Ngororero avuga ko ahanini inyana ari zo ziribwa n’izo nyamaswa, aho ngo abashumba bazo baba batari kumwe na zo cyangwa ibiraro byazo bikaba byubatse nabi cyangwa ntabihari.

Umuyobozi w’Akarere ka Ngororero, Christophe Nkusi, avuga ko kuri iki Cyumweru tariki ya 13 Gashyantare 2022, hateganyijwe igikorwa cyo gusura aborozi bo muri Gishwati bakigishwa uko bubakira ibiraro bikomeye inyana zabo kuko ngo ari zo inyamaswa ziza zishaka.

Yagize ati “Urebye inyana ziba mu ngombe (ibiraro by’inyana) zitubatse neza. Ni ho inyamaswa zizisanga zikazica. Tuzakora ubukangurambaga bwo kubakira inyana ingombe zatuma ziba zifite umutekano kuko abashumba bararangara inyamaswa zikaza kwica inyana”.

Nkusi avuga ko uko izo nka zicwa n’inyamaswa biteza aborozi igihombo mu gihe hakwiye kubaho uburyo bwo kurinda inzuri no kurinda ishyamba ngo inyamaswa zikumirwe.

Avuga ko mu buryo burambye hari gutegurwa uko Urwego rw’Igihugu rw’Iterambere (RDB) cyazitira Pariki kugira ngo inyamaswa zigumemo n’amatungo y’abaturage agire umutekano kuko byose bifite akamaro.

Agira ati “Ibisimba bifite akamaro kuko biri muri pariki isurwa na ba mukerarugendo, n’inka zifitiye akamaro aborozi, uburyo burambye ni ukuzitira pariki inyamaswa ntizongere kubona uko zirenga ngo zize kwangiriza aborozi”.

Inzego z’umutekano n’iz’ubuyobozi bw’ibanze zasuye inzuri ku ruhande rw’Akarere ka Ngororero zemeje ko hagiye kubaho ubukangurambaga bwo kubakira inyana mu gihe hagitegerejwe kuzitira pariki.

Umurenge wa Gatumba wabaye uwa mbere mu kwishyura mituweli wahawe ishimwe

Abo baturage babarirwa muri 700 bavuga ko bagenda bakusanya amafaranga make make ku buryo bamaze kwishyura ubwisungane mu kwivuza bw’umwaka wa 2022-2023, bakaba barasaguye asaga ibihumbi 700frw yabafasha kwishyura undi mwaka ukurikiyeho, gahunda ikaba ari uko babishishikariza n’abandi.

Abo baturage bagaragaza ko usibye kuba buri wese afite umusanzu yitangiye, banatangiye kuremera abaturanyi babo badafite amikoro babishyurira mituweli ku buryo nko mu Kimina cyitwa ‘Tuzamurane Gatumba’ bishyuriye hafi miliyoni ebyiri z’amafaranga y’u Rwanda abasaga 600 uyu mwaka.

Munyakayanza Cyprien utuye mu Kagari ka Gatsibo abarizwa mu cyiciro cya kabiri cy’ubudehe. Abana n’umuryango we w’abantu batanu, akaba yarishyuriwe igice cy’amafaranga yagombaga gutanga na we yiyishyurira asigaye.

Munyakayanza avuga ko kuba mu kimina cyishyura mituweli byatumye abasha kuvuza umugore we wari ufite ibibazo by’ubuhumekero kandi akeneye ubuvuzi bwihuse, kuko yanajyaga kumuvuriza mu mavuriro y’i Kigali.

Icyemezo cy’ishimwe

Agira ati, “Umugore wanjye yafashwe na Asima, bigasaba ko kugira ngo yoroherwe afashwa guhumekera kuri Ogusijeni (Oxygen) no ku mapombo. Urumva ko iyo ntagira mituweli bitari kunyorohera, nanjye mba mu kimina kandi ndashishikariza buri wese kuba yakwitabira iyo gahunda”.

Umuyobozi w’Ikimina ‘Tuzamurane Gatumba’ Pasiteri Kabanda, avuga ko bishyurira umuntu na we wagize icyo yizigamiye, kuko bisaba ko ufashwa na we yiyishyurira icya kabiri, mu rwego rwo gufasha abantu kwifasha.

Agira ati “Ntabwo dutanga amafaranga y’ubuntu uwo dufasha na we agira icyo ashyiramo, amafaranga ntajya mu ntoki ze ahubwo ajyanwa kuri banki kwishyura agahabwa inyemezabwishyu, Bituma buri wese yiyumvamo uruhare rwe mu bimukorerwa, turashaka gukomeza kuko twasanze ari gahunda yorohereza abatishoboye n abo bakabona ubuvuzi”.

Umuyobozi w’Ikimina ‘Njye nawe’ cyanabaye icya mbere mu Murenge wa Gatumba, Basebyande Adrien, avuga ko kwishyura ubwisungane mu kwivuza byari imbogamizi mu mudugudu wabo maze batangira ari abantu bake bizigamira amafaranga 250 ku kwezi.

Abamaze kwishyura mituweli y’umwaka wa 2023-2024 bagaragaza ko nta mbogamizi bazagira mu kwivuza

Avuga ko ubu bamaze kuba abanyamuryango 686 bafite ubwizigame bwabo bwabafasha kwivuza kugeza mu mwaka wa 2023-2024, kuko indi myaka ibiri bamaze kuyishyura.

Agira ati “Umwaka wa 2023-2024 twamaze kuwuzigamira, nta kibazo cyo kwivuza abanyamuryango bazagira, ikintu cya mbere dusaba abaturage ni ukwizigamira bike abonye kuko ntawizigamira ibyo asaguye. Ibyo byatuma tuzabasha kwivuza ntawe uhuye n’imbogamizi”.

Ubwo yatangizaga umwaka wa mituweli mu Karere ka Ngororero tariki 08 Gashyantare 2022, Umuyobozi w’Akarere, Christophe Nkusi, yavuze ko Umurenge wa Gatumba ari wo wahize indi mu kwesa umuhigo wo kwishyura Mituweli, kuko ugeze kuri 94% uyu mwaka kandi hagiye gukorwa ubukangurambaga kugeza abaturage bose bishyuye 100%.

Agira ati “Umwaka wa Mituweli utangirana n’ukwezi kwa Nyakanga, ni yo mpamvu dusaba abaturage kuba bamaze kwishyura bitarenze ukwezi kwa Kamena kugira ngo batazahura n’imbogamizi mu kwivuza”.

Abaturage bagirwa inama yo kwibumbira mu bimina bibafasha kwishyura mituweli

Ubuyobozi bugira inama abaturage gukomeza kwibumbira mu bimina kugira ngo bahuze imbaraga mu kwishyura ubwisungane mu kwivuza, kuko ubuzima bwiza ari bwo nkingi yo kwiteza imbere.

Ibimina byo mu Murenge wa Gatumba bifite intego zirimo kwishyura mituweli, kwizigamira, kugurizanya no kurwanya imirire mibi n’ubukene.

Abayisenga Théodette avuga ko n’ubwo yatewe ubumuga n’abacengezi, ashimira Igihugu cyamwitayeho ndetse agashyirwa mu Ntwari z’Igihugu

Muri abo bari abanyeshuri 47 bigaga i Nyange, umunani muri bo ntibakiriho, 39 bariho bakora akazi hirya no hino mu gihugu batanga serivise zinyuranye, hakaba n’abagiye gukorera mu mahanga.

Izo ntwari zashyizwe mu cyiciro cy’Imena, abatakiriho ni Bizimana Sylvestre wavukiye mu Karere ka Kicukiro mu 1974, Mujawamahoro Marie Chantal wavukiye mu Karere ka Nyamasheke mu 1975, Mukambaraga Béâtrice wavukiye mu Karere ka Karongi mu 1974 na Mukarutwaza Séraphine wavukiye mu Karere ka Gasabo mu 1975.

Abandi bitabye Imana ni Benimana Hélène wavukiye i Nyange mu Karere ka Ngororero mu 1979, Ndemeye Valens wavukiye i Nyange mu Karere ka Ngororero mu 1972, Niyongira Ferdinand wavukiye mu Karere ka Nyamagabe mu 1978 na Sibomana Annanie wavukiye mu Karere ka Bugesera mu 1978 uherutse kwitaba Imana muri 2018 azize uburwayi.

Muri abo banyeshuri bigaga mu ishuri ryisumbuye rya Nyange mu mwaka wa Gatanu n’uwa Gatandatu w’amashuri yisumbuye, mu bakiriho bamwe icyo gitero cyabateye ubumuga babura zimwe mu ngingo z’umubiri, gusa ntibacika intege bariga, ubu bakaba batunze imiryango yabo.

Muri abo babuze zimwe mu ngingo z’umubiri, Kigali Today yegereye uwitwa Abayisenga Théodette wacitse ukuguru, aho mu buhamya bwe yagaragaje uburyo yarokotse icyo gitero, uburyo cyamusigiye ubumuga bw’ingingo n’uburyo atacitse intege akomeza gukora cyane ndetse akomeza n’amashuri ye akaba yarageze ku rwego rw’icyiciro cya gatatu cya Kaminuza (Masters).

Abayisenga Théodette wavukiye mu Murenge wa Ndaro mu Karere ka Ngororero ni umubyeyi w’abana babiri washinze urugo mu mwaka wa 2016.

Mu buhamya bw’uwo mubyeyi unyuzamo agafatwa n’ikiniga kubera ibyamubayeho, avuga ko ubwo bari mu ishuri basubiramo amasomo ku mugoroba wo ku itariki 18 Werurwe 1997, abacengezi binjiye basaba abanyeshuri kwitandukanya, babyanze, bahita bica babiri muri bo.

Avuga ko bakibasaba kwitandukanya aho bababwiye bati “Abatutsi bajye ukwabo n’Abahutu ukwabo”, ngo abo banyeshuri bagaragaje ubutwari, basubiza abacengezi bagira bati “Nta Muhutu nta Mututsi turi Abanyarwanda”.

Abayisenga Théodette uvuga ko batigeze bitegura icyo gitero ngo babe banoza umugambi w’uburyo bitwara, mu gutungurwa babona abacengezi babahagaze hejuru n’iterabwoba ryinshi, intero iba imwe yo kwanga kwivangura.

Ngo abo bacengezi bakomeje kubatera ubwoba ari nako bahita bafata umwanzuro wo kubarasaho, ariko biba iby’ubusa ntibahinduka ku mugambi wabo wo gushyira hamwe, hahita hapfa uwitwa Mukarutwaza Séraphine hakekwa ko bari bamubonye muri iyo minsi aherekeje bamwe mu muryango we wari wamusuye ku ishuri, barasa na Benimana Hérène wari wamenye bamwe muri abo bacengezi, banakomeretsa bikomeye Uwamahoro Prisca.

Ati “Bakimara kutwinjirana badutera ubwoba twahise turyama munsi y’ameza ariko kwari nko gusamba, bakomeje kwisararanga bahita barasa Séraphine, tubona batera Hélène umugeri agwa iyo ngiyo bamukurikiza isasu, banakomeretsa cyane Uwamahoro Prisca, nibwo byageze aho tukiryamye munsi y’ameza tubona ko kubaho bidashoboka, inkota iri aho mu muryango, amashene y’amasasu bifurebye”.

Abanyeshuri bakimara kubona ko imbunda y’umwe mu bacengezi ipfuye, bahise basohoka ikivunge

Abayisenga avuga ko bajya gusohoka, umwe muri abo bicanyi yatunze imbunda uwitwa Clement biganaga, amurashe imbunda irakwama babona isasu ntirisohotse, bibaza ko imbunda ye igize ikibazo mu gihe akirwana na yo ashaka kuyikora basohokera icyarimwe ari nabwo babamishemo gerenade.

Ati “Muri uko gusohoka baduteramo amagrenade, uwo ifashe ikamuhitana uwo idafashe akarusimbuka. Njye naba nkubeshye nkubwiye uko byangendekeye, kuko mperuka ngera mu muryango ndwana no gusohoka mu kivunge nta bindi nzi, naje kwibona hanze ubanza ari gerenade yantumbagije nibona inyuma y’umuryango mvuye muri koma”.

Avuga ko nyuma y’amasaha abiri ari muri koma yagaruye ubwenge ashatse guhaguruka biranga. Ngo aho yari aryamye yarebye ku ruhande abona umurambo w’umwana biganaga witwa Valens, ari nako yumva abantu bavuga akeka ko ari ba bacengezi.

Ati “Naje kugarura ubwenge numva abantu bavuga, ndavuga nti baje noneho kumporahoza, nti nyine birarangiye baje kunyica nabi nananiwe kwicwa n’amasasu, ndongera ndambika umutwe hasi kuko nta yandi mahitamo nari mfite”.

Arongera ati “Numva baraje baturutse ku ruhande rwo mu wa gatandatu ubwo bari babonye ko hari abandi bahiciye, numva bari kwivugisha ngo dore bambaye uniforme ni abanyeshuri bishe, bangezeho baravuga bati dore n’uyu yapfuye, baravuze ngo aba bantu ni imbwa bananirwa kurwanya abo barwana na bo bakajya mu bana nk’aba, nahise numva ko ari abasirikare b’u Rwanda, mpita negura umutwe baravuga ngo eh! uyu aracyarimo akuka”.

Avuga ko bahise bamuterura bamujyana mu ishuri ari nabwo yahise asubira muri koma, yongera kugarura ubwenge mu rukerera aho yabonye ingabo z’u Rwanda, abaganga na bamwe mu barimu bigishaga kuri icyo kigo, aho yabonaga inkomere n’imirambo ya bagenzi be bapfuye.

Ngo kubageza mu bitaro byaragoranye kubera ko bitaboroheye kubona imodoka, ariko abasirikare bajya ku muhanda babuze imodoka yatwara abarwayi bafata iyari ipakiye imizigo barayipakurura aba ari yo ibatwara mu bitaro bya Kabgayi.

Abayisenga yamaze amezi atandatu mu bitaro aho yisanze yacitse ukuguru

Nyuma y’uko bagejejwe mu bitaro bya Kabgayi, Abayisenga yamazeyo amezi atandatu avurwa ibikomere, nyuma bamujyana muri CHUK bakomeza kumwitaho arakira aho ubu afite ukuguru kumwe na ko kuriho ibikomere.

Ati “Baramvuye ndakira, numvise ko twavuwe na Association yitwaga Kanyarwanda niba ikiriho Imana ibahe umugisha, akaguru kamwe twageze mu bitaro bakavanaho aho kari karakomeretse cyane, n’akandi bakomeza kuremekanya kuko kari kangiritse cyane. N’ubwo gahari ariko ntigakora, gusa uko biri hari ubwo ngerageza kugatambutsa”.

Abayisenga avuga ko yamaze imyaka ine adatekereza ishuri kubera ko ibice bimwe by’umubiri byari byarakomeretse cyane, afite ibisebe bitamwemerera kugira icyo akora.

Ati “Namaze imyaka ine nivuza kuko nyuma y’uko akaguru kavuyeho, n’ako kitwa ko gasigayeho kugira ngo kagarure forme (ishusho) y’akaguru no kugakandagiza byatwaye igihe kinini. Naragakandagizaga ibisebe byasigayeho byarabaye inkovu bigaturika. Byantwaye igihe kugira ngo kagarure ubuzima ndetse n’ako kacitse kugira ngo gakire nambare insimburangingo byatwaye iyo myaka yose”.

Avuga ko yasubiye kwiga i Nyange muri 2001, biba ngombwa ko asubira inyuma mu mwaka wa kane, nyuma y’uko basanze amashami bigaga yarahindutse, aho mbere yigaga Inderaburezi rusange (Normale Primaire) ihinduka Commerce et Comptabilité.

Akigera mu ishuri, avuga ko yize ashyizeho umwete, asoza amashuri yisumbuye muri 2005 abona buruse mu cyahose ari Kaminuza Nkuru y’u Rwanda i Butare, aho yize icungamutungo anabifatanya no gukora muri Handicap International.

Akirangiza Kaminuza, ngo yatangiye akazi mu bitaro bya Muhororo muri Ngororero, ashinzwe kugenzura fagitire z’ibitaro.

Nyuma yabonye akazi mu Karere ka Ngororero ari na ho agikora kugeza ubu, akomereza amashuri muri ULK.

Ati “Nagiye mpindura akazi, urabizi nawe umuntu aba ashaka agashahara karenzeho kurushaho, kugeza ubu ndi kontabure ushinzwe imisoro mu Karere ka Ngororero, aho nagerageje nkomeza kwiga niyishyurira Masters muri ULK, nyisoza muri 2017”.

Ku bijyanye n’imibereho ye n’umuryango we, yagize ati “Kugeza ubu ndaho n’umuryango wanjye umugabo n’abana babiri, nta kintu dushinja Nyagasani uretse nyine ako kaguru ubona kasigaye kagera aho kakazana ibibazo. Buri myaka ibiri biba ari ngombwa ko nsimbuza insimburangingo, ariko kubera ko nkoresha RAMA, ntabwo bimpenda bintwara amafaranga ibihumbi 200, ariko ubundi nta bidasanzwe tubayeho neza”.

Kuba ari umwe mu ntwari z’u Rwanda, ngo agerageza kwirinda icyatuma atakaza icyizere Igihugu cyamugiriye. Ati “Byanze bikunze umuntu aba akwiye kwitwararika bijyanye n’icyo uri cyo. Uko biri kose ntabwo wagenda ngo ubeho uko wiboneye. Uretse no kwiyanduza ubwawe uba wanduza n’Igihugu”.

Yasabye Abanyarwanda gukomeza gusigasira amahoro n’umutekano Igihugu cyagezeho, banaharanira kwiteza imbere bateza imbere n’Igihugu.

Abayisenga avuga ko nk’intwari z’i Nyange bahura bakungurana ibitekerezo bakaganira no ku mateka yabo, dore ko bashinze umuryango witwa “Komezubutwari” uyobowe na Sindayiheba Phanuel ufite intego yo kwigisha no gukangurira Abanyarwanda indangagaciro z’umuco w’ubutwari.

Abaturage bavuga ko hari isomo bakuye mu gutsindwa kwa mugenzi wabo

Bivuzwe mu gihe imiryango ibiri iherutse gupfusha abantu banze kwemera amafaranga bagenerwa n’ubwishingizi bwa Kompanyi bakoreraga, ahubwo abagana inkiko bagamije kunguka menshi bakaza gutsindwa bakaba barategetswe ahubwo kwishyura abo bashoye mu nkiko.

Abaturage n’abayobozi bo mu Murenge wa Nyange bemeranywa ko mu gihe habayeho kuburana,, bakwiye kwemera imyanzuro y’inkiko bakarangiza imanza ku neza kuko zikenesha.

Urugero rw’umuryango ugiye kwishyura miliyoni nyuma yo kwanga impozamarira ya miliyoni n’ibihumbi 800frw ukagana inkiko ni uw’uwitwa Macumu François.

Macumu avuga ko barenganye kubera ko batsizwe mu rubanza bashoje rw’umwana wabo wahitanywe n’ikirombe cy’amabuye y’agaciro, nyamara yaranze amafaranga bateganyirizwa n’ubwishingizi na n’ubu bakaba bagitsimbaraye.

Macumu avuga ko ntawigeze amwegera ngo amubwire uko umuryango we uzabona impozamarira, kandi azakomeza kugana inzego zirenganura abaturage nyuma yo gutsindwa agategekwa kwishyura milinoni y’Amafaranga y’u Rwanda.

Agira ati “Umuhungu wanjye yarapfuye, nta mpozamarira baduhaye, tuzakomeza kugana inzego kuko twararenganye. Ntabwo twigeze tumenya ko umwe mu bapfushije abantu muri icyo kirombe yahawe amafaranga”.

Imyumvire ya Macumu inasa n’iy’umukecuru we kuko nawe yemeza ko bagombaga kwishyurwa amafaranga bifuza, mu gihe nyamara abandi baturage basanga kuburana no kwishora mu nkiko ari ukwigerekaho umusaraba uremereye.

Macumu avuga ko azakomeza kugana inzego

Mukangango Esperence avuga ko nyuma yo kubona ko imiryango yabuze ababo ikagana inkiko yirengagije ko ikirombe bakoragamo gifite ubwishingizi, bigaragaza gushaka inyungu nyinshi hirengagijwe ukuri.

Agira ati “Njyewe numva bariya babuze ababo bakwegera uwabunganiraga mu rukiko akabahuza n’uwabatsinze bakumvikana uko bagenerwa ibyo bari banze, bitaba ibyo dore bagiye kugerekaho no kwishyura kubera kwinangira no gukururana”.

Yongeraho ati “Kuburana birakenesha kuko iyo wagiye mu manza ntuba wagiye gukora, urasohora ntiwinjiza. Ni byiza ko abantu bumva ibyemezo by’inkiko bitaragera kure kuko ubu bagiye kwishyura kandi baranze ubwishyu bari bemerewe”.

Umuyobozi wa Kompanyi (Niyigena Mining Company), Patric Ntigashira, avuga ko n’ubwo yatsinze abo baturage hari inzira bari bakwiye kuba baranyuze mbere, ariko akaba yemera ko kuko batishoboye, binyuze mu biganiro yagira ibyo abasonera.

Agira ati “Ndumva bazanye uwo muntu ubashuka kundega tukumvikana byagira icyo bitanga kuko aba ni abaturage b’aho nkorera ntifuza kugirana na bo ikibazo, ariko nibakomeza kwinangira ubwo tuzakomeza kugeza igihe bazumvira, kuko nibanga ubwukvikane hazakurikizwa amategeko banyishyure”.

Umunyamabanga Nshingwabikorwa w’Umurenge wa Nyange, Gaudence Mukasano, avuga ko nk’ubuyobozi biteguye guhuza abaturage batsinzwe n’uwabatsinze kugira ngo harebwe uko urubanza rwarangizwa bidateje izindi ngaruka, kuko abatsinzwe badafite ubushobozi bwo kwishyura nyuma yo gupfusha abantu babo.

Agira ati “Icyo twifuza kuri rwiyemezamirimo ni uko yafasha abaturage bakishyurwa amafaranga bateganyirizwa n’ubwishingizi kuko bareze umuntuutari we, ndeste na avoka icyo tumusaba ni ukwegera abo baturage akabereka inzira bakanyuzemo”.

Niyigena avuga ko yiteguye kumvikana n’abo yatsinze

Muri rusange ikibazo cy’abanturage bapfushije abantu babo mu birombe cyari koroha iyo hakurikizwa amategeko bakagana ubwishingizi bukabaha impozamarira ijyanye n’ibyo bateganyirizwa, ariko si ko byagenze kuko bagannye inkiko biza kugaragara ko bareze umuntu utari we ari na ho batsindiwe.

Iyo miryango yategetswe kwishyura Miliyoni imwe imwe Kompanyi icukura amabuye y’agaciro (Niyigena Mining Company), nyuma y’uko itsindiye mu Rukiko Rukuru abo baturage isubirishijemo urubanza (ingingo nshya) kuko bareze umuntu utari we.

Mu mwaka wa 2016 nibwo abagabo batatu baguye mu kirombe cy’amabuye y’agaciro mu Murenge wa Nyange mu Kagari ka Vuganyana, bakorera uwitwa Niyigena Innocent nk’uko bigaragara mu ruhushya rumwemerera gukora ubucukuzi muri uwo murenge rwasohotse mu Igazeti ya Leta icyo gihe.

Niyigena Innocent yasabwe n’ikigo cy’igihugu gishinzwe ibya mine na Peterori, gufungura Kompanyi akareka gukomeza gukora mu izina rye, maze atangira ibisabwa ngo Kompanyi yandikwe mu kigo cy’Igihugu cy’iterambere (RDB).

Urujijo mu kurega Niyigena Mining Company

Nyuma y’uko abagabo batatu bagwiriwe n’ikirombe cya Niyigena Innocent, umwe mu bagore ba ba nyakwigendera yemeye guhabwa indishyi y’akababaro ingana na Miliyoni imwe n’ibihumbi 800Frw kubera ko bari bafite ubwishingizi muri (CORAR), y’icyo gihe, ubu ni SANLAM.

Abagore babiri basigaye n’imiryango yabo bo banze gufata iyo mpozamarira maze bayoboka inkiko barega Niyigena Mining Company, baranayitsinda kuva mu rwego rw’ibanze kugeza mu Rukiko Rukuru aho Niyigena Mining Company yagombaga kwishyura iyo miryango asaga miliyoni 35frw.

Nyuma yo gusuzuma imyanzuro y’urubanza bikagaragara ko Kompanyi yarezwe mu Rukiko muri 2016 itari iriho kuko yahawe ibyangombwa muri 2020, Niyigena Mining Company yasubirishijemo urubanza n’ubundi mu Rukiko Rukuru, ingingo nshya y’uko abayitsinze bareze umuntu utari we ari nabyo urukiko rwashingiyeho.

Nyuma y’ubushishozi bw’inteko y’abacamanza yasubirishijemo urubanza, urukiko rukuru rwanzuye ko Niyigena Mining Company itari iriho muri 2016, ahubwo icyo gihe hariho Niyigena Innocent.

Urukiko rwanzuye kandi ko Niyigena Mining Company yashowe mu manza bityo ko imiryango yayireze itsinzwe kandi igomba guha Niyigena Mining Company indishyi ya Miliyoni ebyiri aho buri muryango uzatanga miliyoni imwe imwe.

Rwanzuye ko urubanza rupfundikiwe kandi abatsinzwe ntahandi bajuririra nk’uko biteganywa n’imiterere y’imanza z’imbonezamubano, ibyo byatumye imiryango yari imaze gutsinda inshuro eshatu zose ibura ubwishyu yari yaratsindiye mbere, ahubwo itegekwa kuba ari yo yishyura.

Ese birashoboka ko abatsinzwe iyo batanyuzwe babona ubundi butabera nyuma y’urukiko rukuru?

Urwego rushinzwe gufasha abaturage mu by’amategeko (MAJ) muri Minisiteri y’Ubutabera rukorera ku karere, runafasha abaturage badafite ubushobozi mu manza, rugaragaza ko iyo urubanza rwasubirishijwemo mu Rukiko rukuru Ingingo Nshya, iyo rurangiye ruba rupfundikiwe nta handi ho kujuririra.

Icyakora nk’uko bisobanurwa n’umuyobozi wa MAJ mu Karere ka Muhanga, ngo hari ingingo eshatu zonyine zishobora gushingirwaho abatsinzwe bagahabwa ubutabera mu Rukiko rw’Ubujurire.

Izo ngingo zigomba kuba nibura zigaragaza ko urubanza rwabayemo ruswa hari n’ibimenyetso, igihe urubanza rwaciwe nabi rudashobora kurangizwa n’igihe hari ingingo bigaragara ko yaba yarirengagijwe.

Uyu muyobozi avuga ko kugira ngo akarengane kemerwe bisaba kukagaragaza mu buryo bw’ikoranabuhanga bukoreshwa mu Rukiko, ishingiro ryako maze bikazasuzumwa n’Irukiko rw’ Ikirenga.

Iyo urukiko rw’ikirenga rugaragaje ko harimo akarengane ngo nirwo rufata umwanzuro w’uko urubanza rwakwimurirwa mu Rukiko rw’Ubujurire, na ho byagaragara ko nta karengane kabayeho urubanza ntirube, icyakora ngo urega iyo atanyuzwe ashobora kugana urwego rw’Umuvunyi arugaragariza ko Urukiko rw’Ikirenga rwanze kwemera akarengane ke rukabisuzuma.

Muri rusange uyu muyobozi wa MAJ agira inama abatsinzwe kwegera umwuganizi wabo mu mategeko bakaganira n’uwabatsinze hanyuma ubwishingizi bukaba bwabagenera ibiteganywa n’amategeko kuko ari yo nzira yonyine yo gukemura ikibazo mu mahoro.

Ishuri rya EAV Kivumu ni iry’itorero AEBR mu Karere ka Ngororero, ryari ryongereye amafaranga y’ishuri ava ku bihumbi 90 ku gihembwe, aba ibihumbi 104 kugira ngo hagurwe imodoka y’ishuri ya miliyoni 15 z’Amafaranga y’u Rwanda.

Iryo shuri ni iry’itorero AEBR ku bufatanye na Leta, aho bagira n’abana baba mu kigo, n’ubwo ubuyobozi bw’ikigo buvuga ko kutagira imodoka bibangamira ibikorwa by’inshi, harimo no kujyana abanyeshuri kwa muganga iyo barwaye, uwo umwanzuro ntiwashimishije ababyeyi ari ko gusaba ko wakurwaho.

Umuyobozi w’Akarere ka Ngororero wungirije ushinzwe Imibereho myiza y’abaturage, Mukunduhirwe Germaine, avugana n’umunyamakuru wa Kigali Today, yatangaje ko uyu mwanzuro wo kwaka ababyeyi amafaranga bawuhagaritse kubera ko akarere katabimenyeshejwe, kandi ukaba ubangamiye ababyeyi bamwe ndetse bikaba byagira ingaruka ku burezi.

Yagize ati “Twasanze ari umwanzuro batagejeje ku karere kandi abayobozi b’ibigo barabizi, ikintu cyose gituma bongera amafaranga ku babyeyi babigeza ku karere tukabisuzuma. EAV Kivumu ntibabigejeje ku karere ngo turebe niba byihutirwa cyangwa bitabangamiye ababyeyi, ikindi twabonye ko hari ababyeyi bitashimishije n’ubwo bivugwa ko byemejwe mu nteko rusange.”

Uwo muyobozi avuga ko gutesha agaciro uyu mwanzuro w’ishuri bijyana no gukuraho imbogamizi zatuma abana bata ishuri kuko hari abayeyi batari babyiteguye.

Mukunduhirwe avuga ko n’ubwo iryo shuri rifatanya na Leta, ngo n’amashuri yigenga na yo asabwa kumenyesha ubuyobozi bw’akarere imyanzuro afata irebana no kongera amafaranga y’ishuri, kugira ngo hasuzumwe niba bidakoma mu nkokora uburezi bw’abana.

Ayo mafaranga bamwe mu babyeyi bari batangiye kuyatanga, ubuyobozi bw’Akarere bukaba bwasabye ko bayasubizwa kugira ngo bitagira umwana n’umwe byatuma atagaruka ku ishuri bitwaje ko amafaranga y’ishuri yongerewe.

Ndayambaje asobanura ko ibaruwa irimo amakosa ariko yakurikije amategeko kandi yamaze gukosorwa

Iyo baruwa yasinywe n’umuyobozi w’Akarere ka Ngororero igaragaraho amatariki atandukanye ari na yo abantu bakomeje kwibazaho kuko bigaragara ko ingingo yashingiweho yo kwirukana Hakizimana yaba yarashyizwe mu bikorwa igihe kitaragera.

Umuyobozi w’Akarere ka Ngororero, Ndayambaje Godefroid, avuga ko amakosa yabaye ari uko mu kwandika iriya baruwa habayemo kwibeshya kuko ibaruwa ihagarika Hakizimana by’agateganyo yanditswe ku itariki ya 15 Ukuboza 2020, mu gihe mu ibaruwa ho handitse Ukuboza 2021 iyi tariki ikaba itaragera.

Agira ati “Habayemo kwibeshya umwaka gusa ntabwo iriya baruwa yari yakanasohotse kuva twamwandikira tumuhagarika tunamusaba ibisobanuro ntabwo yigeze yandika agaragaza ko hari amakosa yakozwe kandi usibye kuba harabayeho kwibeshya ku mwaka, ntibikuraho ko umwarimu atakoze amakosa nta n’ubwo yabona uko ayasobanura kuko igihe yari ateganyirijwe cyararangiye nta n’ubwo yigeze ajya mu kazi cyangwa ngo asubize ibaruwa imusaba ibisobanuro”.

Ukundi kwibeshya kandi kugaragara mu gika cya nyuma cy’iyo baruwa aho uwayanditse yagaragaje ko imyanzuro y’inama njyanama yafatiwemo imyanzuro irimo uwo kwirukana Hakizamungu wafashwe ku wa 01/10/2020 nyamara bari kwandika umwaka wa 2021.

Agira ati “Ibaruwa twamwandikiye twayanditse ku itariki 15/12/2020, ariko uwayisohoye yibeshye umwaka yandika 2021 iyo tariki ni yo bibeshyeho.”
Uko kwitiranya amatariki benshi babinenze bagaragaza ko umwanzuro wafatiwe uriya mwarimu ahubwo nta shingiro ufite kandi ashatse yanarega Akarere kumwirukana kadakurikije amabwiriza, nyamara Ndayambaje avuga ko ikosa ryo guta akazi ryabaye kandi batari gukomeza kurebera.

Agira ati, “Ntabwo twamenya uko byagenze ngo iriya baruwa ijye ku mugaragaro, Uwayishyize ku rubuga yayishyizeho kandi biragaragara ko harimo amakosa gusa habayemo kwibeshya kandi ntibikuraho ko amakosa yabayeho”.

Yongeraho ko ibaruwa yahinduwe ku buryo uriya mukozi najya kuyifata azafata itarimo amakosa, naho kuba ashobora kuyifashisha arega Akarere ko kamwirukanye mu buryo butemewe n’amategeko, ngo ibyo ntibyabaho kuko usibye amakosa ari mu ibaruwa yashyizwe ahagaragara, Hategekimana nta kintu yari yabaza.

Agira ati “Ibaruwa yashyizwe hanze nyirayo ataraza kuyifata ntabwo tuzi uwayibye akayishyira hanze ariko, ubu naza azasanga hari itarimo amakosa kuko byakosowe, ariko nta n’icyo yabaza kuko ibyakozwe bikurikije amategeko”.

Umuyobozi w’Akarere agaragaza ko ntakidasanzwe cyabaye mu kwibeshya kuri iriya baruwa kuko byakosowe kandi ibindi byakozwe neza bikurikije amategeko.

Uyu mwarimu ni umwe mu barimu umunani byatangajwe ko bandikiwe birukanwa burundu mu kazi ku mpamvu zirimo guta akazi. Icyakora abo barimu bo bagaragaza ko barenganyijwe kuko banditse basubiza bagaragaza impamvu zitandukanye zirimo uburwayi, nyamara ngo ntizihabwe agaciro ahubwo bakirukanwa, bamwe bakaba bavuga ko bagiye kugana inzego zishobora kubarenganura.

Iyi ni yo baruwa itavuzweho rumwe kubera uburyo yanditse

Mutuyeyezu yagombaga gushyingurwa n’umuryango we ku wa 15 Ukwakira 2021 ariko abagize umuryango we batungurwa no kujya gufata umurambo mu bitaro bya Muhororo basanga ntawe uhari kuko yari yatwawe n’undi muryango kubera kumwitiranya n’undi wari witabye Imana.

Nyuma yo kumenya aho Mutuyeyezu ashyinguye, byabaye ngombwa ko abo mu muryango we basaba ko yatabururwa bakamwishyingurira kuko batari bishimiye kubona umuntu wabo yitiranywa n’undi muntu akajya gushyingurwa ahandi.

Ku wa 17 Ukwakira 2021 nibwo Mutuyeyezu yavanywe mu mva agarurwa mu buruhukiro bw’ibitaro bya Muhororo aho yakuwe ajya gushyingurwa mu irimbi ryo mu Murenge wa Gatumba aho akomoka.

Ubuyobozi bw’Akarere ka Ngororero butangaza ko ibyavuye mu iperereza ry’ibanze bigaragaza ko habayeho kwibeshya n’uburangare bw’umukozi wo kwa muganga mu gutanga imirambo, cyakora ngo Urwego rw’Igihugu rw’Ubugenzacyaha (RIB) rwinjiye muri dosiye ngo harebwe niba hari ibyaha byakozwe.

Umuyobozi mukuru w’ibitaro bya Muhororo na we avuga ko habayeho kwibeshya n’uburangare mu gutanga imirambo bigatuma Mutuyeyezu ajyanwa n’umuryango adakomokamo, kandi hari kurebwa niba hari icyibyihishe inyuma ngo uwabikoze abihanirwe.

Ibyuma by’ubwirinzi bw’impanuka y’amashanyarazi byari byashyizwe muri aka gasanduku byibwe

Ibyuma byibwe ni urusinga ruvana amashanyarazi ku ipoto ruyinjiza mu gasanduku (Cabine) kagenewe guha amashanyarazi Camera yo ku muhanda, ndetse n’utwuma dushinzwe ubwirinzi bw’impanuka y’amashanyarazi (Fusibles).

Umunyamabanga Nshingwabikorwa w’Umurenge wa Muhororo, Kavange Jean d’Amour, avuga ko hataramenyekana niba abatwaye ibyo byuma baba bagambiriye gukoma mu nkokora gahunda yo gushyiraho Camera zo gucunga umutekano mu muhanda cyangwa ari ubujura busanzwe.

Agira ati “Hari gukorwa iperereza ngo tumenye niba ari ubujura busanzwe kuko ibyibwe bishobora kugurishwa mu bundi buryo. Uwabikoze yirengagije ko kiriya ari igikorwa rusange abantu bakwiye kubaha. Ntawahamya ko ari ubujura busanzwe cyangwa ari ukubangamira gushyiraho ziriya Camera”.

Mubazi y’amashanyarazi iri mu byasigaye batatwaye

Kavange avuga ko muri Muhororo nta bujura bw’ibyuma by’amashanyarazi buhasanzwe ku buryo kwiba ibikoresho bifasha Camera byatunguranye, bikaba bikomeza gukurikiranwa mu gihe ibindi bikoresha birimo mubazi n’agasanduku byasubijwe ku buyobozi bwa sosiyete y’u Rwanda ishinzwe ingufu (REG) ishami rya Ngororero mu gihe hagishakishwa uko habungwabungwa umutekano wa biriya byuma.

Agira ati “Ziriya Camera zishinzwe gucunga umutekano w’ibinyabiziga hagamijwe kugabanya impfu za hato na hato ziterwa n’umuvuduko ukabije w’ibinyabiziga, ni igikorwa remezo gikwiye kubahwa kuko gifitiye abaturage akamaro”.

Kavange avuga ko hagiye gukazwa ingamba zo gucungira umutekano Camera zo ku muhanda kugira ngo hatabaho kongera kubyangiza, akanasaba abaturage kurushaho kubungabunga ibikorwa remezo birimo na Camera zo ku muhanda zishinzwe gucunga umutekano.

Kwizera yitabye Imana nyuma y’iminsi ibiri ari mu bitaro aho yakurikiranwaga n’abaganga kubera igikomere yiteye agerageza kwikata ijosi akagira igikomere ariko hakaba andi makuru avuga ko yaba yaranagerageje kunywa umuti wica udukoko, nyuma y’uko icyuma yiteye kitamwishe.

Kwizera yashatse kwica umugore witwa Tuyishime mu ijoro ryo ku wa 30 rishyira 31 Kanama 2021, amukase ijosi akoresheje icyuma ari nabwo nawe yahise yitera icyuma ariko bombi ntibahise bapfa kuko inzego z’umutekano zimaze gutabara boherejwe kwa muganga.

Kwizera ngo yakomeje kuremba kugeza ubwo ananirwa guhumeka neza ngo bamushyira ku cyuma gitanga umwuka ariko ubuzima bwe buza gukomeza kumera nabi kugeza apfuye.

Umunyambanga Nshingwabikorwa w’Umurenge wa Ngororero, Mugisha Daniel, yabwiye Kigali Today ko kugeza ubu hataramenyekana niba yishwe n’igikomere yiteye cyangwa imiti bivugwa ko yaba yaranyoye, kuko ayo makuru afitwe n’abaganga.

Mu gihe umugore wari wasuye Kwizera agashaka kumwica we akiri mu bitaro, ngo nta makuru yari yamenyekana y’icyo bapfuye kuko bivugwa ko bari basanzwe ari inshuti.

Hari andi makuru avuga ko Tuyishime yasuye Kwizera hakiri kare nko mu masaha ya saa tatu z’ijoro, ariko amakuru y’uko yashatse kumwica amenyekana mu ma saa sita z’ijoro kandi abaturanyi be bakavuga ko nta muntu bigeze bumva ataka ku buryo bitari koroha kubatabara ku gihe.

Amakuru yemejwe n’ubuyobozi bw’Akarere ka Ngororero avuga ko ibyo byabaye mu ijoro ryo ku wa 30 rishyira iya 31 Kanama 2021, ubwo uwo mugore witwa Tuyishime Hosiana ngo yaba yarasuye umugabo witwa Poncien, maze muri iryo joro afata icyuma akeba igikanu cy’umugore aramukomeretsa bikomeye.

Nyuma y’icyo gikorwa mu ma saa sita z’ijoro, ngo umugore ni we wabashije guhamagara inzego z’umutekano n’ubwo yari ameze nabi ziratabara zimujyana kwa muganga, ubu akaba arwariye mu bitaro bya CHUK i Kigali mu gihe umugabo we arwariye ku bitaro bya Muhororo.

Umuyobozi w’Akarere ka Ngororero, Ndayambaje Godefroid, avuga ko inzego z’ubugenzacyaha zatangiye iperereza ngo zishakishe icyaba cyateye uwo mugabo gushaka kwivugana umugore bivugwa ko bari basanganwe ubucuti.

Kuba uwo mugore atahise ashiramo umwuka ngo ni ukubera ko uwari ugiye kumwica yamuretse akeka ko yanogonotse, aho byabareye hakaba hasanzwe icyuma kiriho amaraso bikekwa ko ari cyo yamukatishije, n’icupa ry’umuti wa kiyoda bikekwa ko umugabo yaba yagerageje no kuwunywa nyuma y’uko icyuma kitamuhwanyije.

Hari hashize icyumweru mu Murenge wa Kavumu umugabo witwa Ndahayo Jean Claude yishe umugore we, Bavugamenshi Venancie babanaga mu buryo butemewe n’amategeko bakaba ngo bari basazwe bafitanye amakimbirane ashingiye ku mitungo, dore ko ngo yari afite n’undi mugore.

Uyu Pontien washatse kwica Tuyishime wo mu Murenge wa Ngororero na we akaba yari aherutse gutandukana n’umugore bari barashakanye mu buryo bwemewe n’amategeko.

Ubuyobozi bw’akarere buvuga ko abashakanye bakwiye kwirinda amakimbirane kuko usibye kubatwara ubuzima atuma abana mu muryango bakurana uburere bubi kuko baba badahabwa ubukwiye.

Umunyamabanga Nshingwabikorwa w’agateganyo w’Umurenge wa Kavumu, Kayitsinga Jean, wemeje ayo makuru avuga ko Ndahayo Jean Claude ashinjwa kwica umugore we ku itariki 22 Kanama 2021, agahita atoroka inzego zishinzwe umutekano zikaba zari ziri kumushakisha.

Uwo mugore wishwe ni Bavugamenshi Venancie wabanaga na Ndahayo Jean Claude mu buryo butemewe n’amategeko bakaba ngo bari basazwe bafitanye amakimbirane ashingiye ku mitungo dore ko ngo yari afite n’undi mugore.

Kayitsinga avuga ko ibimenyetso bigaragara ku mubiri wa Ndahayo bigaragaza ko ashobora kuba yariyahuye kuko ngo umurambo we watoraguwe mu mugezi basanze uziritse imigozi mu ijosi, nyuma yo kuvugwaho kwica umugore we amutemye agahita abura.

Agira ati “Urumva abantu babiri bose bapfuye nta makuru yabo bivugiye azwi ariko hari ibyo abantu bajyaga bavuga ko batari babanye neza n’ubwo bitari byarabaye ngombwa ko batandukanywa, ariko nk’umugabo wari ufite abagore babiri ntihabura ibyo bapfa ariko ntabwo bari babanye neza bari bafitanye amakimbirane ashingiye ku mitungo”.

Kayitsinga asaba imiryango ibanye nabi kugaragaza ibibazo mu nshuti n’abavandimwe kugira ngo bakiranurwe bitaragera ku kuba umwe yakwica undi kandi abagabo bakirinda ubuharike kuko buri mu bituma amakimbirane ashingiye ku mitungo yiyongero.

Uyu muryango usize abana batandatu barimo n’abavuka ku mugore wishwe, abaturanyi bakaba baratanze amakuru y’uko ngo ibibazo byabo byari bishingiye ku mitungo aho umugore atishimiraga kuba umugabo we yarara kwa mukeba.

Guverineri Habitegeko avuga ko abayobozi batita ku bibazo by’abaturage ari nk’abacanshuro mu kazi

Yabivugiye mu Karere ka Ngororero ubwo yagasuraga haganirwa ku bibazo byugarije abaturage, bigaragara ko hari imbaraga nke mu kubikemurira ku gihe kandi nyamara ngo byagira ingaruka ku bayobozi n’imiryango.

Asaba abayobozi guhindura imitekerereze kuko ari bwo abaturage bazabafatiraho urugero kandi bakabagirira icyizere, kugira ngo bigerweho akaba asanga abayoboziko bakwiye kwishyira mu mwanya w’umuturage ubangamiwe.

Ahereye kuri gahunda ya Leta yo guha ishwagara abaturage bose bo mu Karere ka Ngororero bakajya bishyura kimwe cya kabiri cy’ikiguzi cyayo kugira ngo barumbure ubutaka, Guverineri Habitegeko yagaye uburyo ibyo akarere kakoze.

Umukozi w’Akarere ushinzwe ubuhinzi avuga ko hafashwe umwanzuro wo guhera ku mirenge itandatu kuri 13 akaba ari yo imenyeshwa uburyo bwo gukoresha ishwagara mu kurumbura ubutaka, ibyo bikaba bitanyuze namba Guverineri Habitegeko.

Uwo mukozi yavuze ko ariko hagiye kwihutishwa gahunda yo gushishikariza abaturage bose kwiyandikisha muri ubwo buryo bwo guhabwa ishwagara gusa ngo bari bahereye ku mirenge itangira ihinga mbere y’iyindi.

Guverineri habitegeko yavuze ko gahunda ari iy’Abanyarwanda bose barebwa n’ikibazo cy’ubutaka busharira kandi Akarere kose ka Ngororero byagaragaye ko ubutaka bwako bwashaririye cyane, bityo buri muhinzi akwiye gushyira ishwagara mu buso bwe ahinga kugira ngo abone umusaruro mwiza.

Agira ati “Kuki mufata imirenge itandatu akaba ari yo muganiriza ku ikoreshwa ry’ishwagara indi irindwi mukayicira urwo gupfa abo bandi bazaza kurya iwanyu? Kuki Leta iha abaturage amahirwe mwebwe mugafata imirenge imwe mukaba ari yo mumenyesha indi mukayicira urwo gupfa kandi ngo ari mwe mubizobereyemo, njyewe nahoze mbabwira ko mwifitemo n’akantu k’ubupagani”.

Hari abayobozi bakora nk’abacanshuro nyamara imikorere yabo izabahagama

Guverineri Habitegeko avuga ko hari abayobozi birengagiza gukemura nkana ibibazo byugarije abaturage bibwira ko ahari ubwo bo babayeho neza bihagije, nyamara imibereho mibi y’abo baturage ishobora kuzabagiraho ingaruka mbi.

Agira ati “Turi kubona ibibazo abayobozi mudakwiye kuba mwicarana hariya iwanyu, ntabwo ibibazo twabonye bishingiye ku baturage gusa ahubwo bishingiye ku myumvire y’abayobozi bikagira ingaruka ku baturage”.

Abayobozi basabwe gusubizaho inteko z’abaturage kugira ngo birinde kuyobora abaturage bafite ibibazo

Ahereye ku baturage batagira aho bakinga umusaya Guverineri Habitegeko avuga ko bitumvikana ukuntu umwaka umwe ushira undi ukaza umuturage acikirwaho n’imvura y’umuhindo umwaka umwe, ibiri, itatu kugeza kuri itanu uwo muturage atagira aho yugamisha abana cyangwa aryama imvura iguye.

Agira ati “Umva impamvu mubana na byo, uwo muntu aramutse ari so cyangwa nyoko wabyuka ujya kugikemura ariko kuko agahwa kari ku wundi gahandurika ni yo mpamvu ubyihorera, ndumva nkwise umucanshuro ntaba mbeshye kuko ntabwo amabati yabuze ngo abantu bubakirwe ahubwo habuze ubushake no gushyira hamwe”.

Yongeraho ati “Wowe uraryama ugasinzira iyo mvura ntayo wumva ni yo mpamvu utabyitaho, boyobozi nimuhaguruke dukemure ibibazo by’abaturage niba bikunaniye wajya mu baturage nk’abandi bose cyangwa niba wumva ukomeza, bigire ibyawe kuko impamvu bidakemuka wowe muyobozi ni wowe ubereye umutwaro abaturage aho kubakemurira ibibazo”.

Umuturage watse ruswa ngo umuhe inka ntabwo yakumvira

Avuga ko igihe hakigaragara abayobozi baka ruswa abaturage ngo ababahe inka, cyangwa babahe serivisi baba bitesha agaciro kandi ibyo bikwiye kuba bibatera ipfunwe, kuko ngo bitumvikana ukuntu kuva muri 2010 aribwo inzu za Nyakatsi zaciwe, bikaba bitumvikana ukuntu muri Ngororero hakigaragara imiryango isaga 1,800 itagira amazu.

Agira ati “Mwirirwa muvuga ngo bafungure insengero ariko ndabona kwemera kwanyu kwarapfuye, ni yo mpamvu mvuga ko mwifitemo n’akantu k’ubupagani, nimuhaguruke rero dukemure ibibazo by’abaturage kuko bigaragara ko mudakorera hamwe, abantu bararana n’ingurube, umwana arumva ingurube ihuma hafi ye mu nzu, inkoko irabika ubwo uwo mwana azabyuka ajya gute ku ishuri?”

Yongeraho ko bamwe mu bayobozi batita ku bana bo mu miryango ibana n’amatungo mu nzu, ari ho hava abana bajya gukorera abayobozi mu ngo zabo abandi bakabahingira cyangwa bakabaragirira amatungo n’indi mirimo, kandi yenda batanujuje imyaka y’ubukure.

Agira ati “Bamwe muri mwe abana babayeho nabi ni bo birirwa mu masafuriya babatekeye babahekeye abana kandi bari bakwiye kujya mu ishuri, Leta irafata inguzanyo ngo yubake amashuri ariko tukabona abana bataye amashuri kandi inzego z’ubuyobozi zubatse. Umwana wataye ishuri aba azwi mu isibo iyo aguciyeho ntacyo bikubwira kuko uwawe ariga ariko nagira ngo nkubwire ko n’ubwo uwawe yiga uwo utiga azamuhagama cyangwa ahagame umwuzukuru wawe, icyo ni ikibazo urimo kwitera utakizi”.

Umuganda ni igisubizo kuri bimwe muri ibyo bibazo

Guverineri habitegeko avuga ko n’ubwo hariho ibibazo bishingiye kuri Covid-19, hari imirimo yakomeje gukorwa kandi hagakwiye gushyirwaho uburyo bwo kongera gukora umuganda, ugakorwa abantu birinze nk’uko bigenda ku bakora mu mirima y’icyayi, abahingira muri za koperative cyangwa indi mirimo.

Mayor Ndayambaje avuga ko bagiye gusubira mu ngamba zo gukemurira ku gihe ibibazo by’abaturage

Avuga kandi ko inteko z’abaturage zikwiye kongera guterana kugira ngo hakemurwe ibibazo bibangamiye abaturage kandi ibyo bigakorwa hubahirizwa amabwiriza yo kwirinda Covid-19, akaba asaba ko mu cyumweru gitaha inteko z’abaturage zongera guterana kuko ntawayobora abaturage batishimye.

Agira ati “Muzayobora abantu batishimye kugeza ryari, abantu badatuje ntabwo bakora ngo biteze imbere ndabasaba ko kuva iki cyumweru mugende musubizeho inteko z’abaturage kukira ngo mukemure ibibazo byabo, si ngombwa ko muhamagara abaturage bose ariko mushobora guhuza abafite ibibazo mukabikemura”.

Ubuyobozi bw’Akarere ka Ngororero bwijeje Guverineri habitegeko ko bugiye guhaguruka bugafatanyiriza hamwe kwikebura, kugira ngo ibibazo by’abaturge bikemukire igihe.

Ubuyobozi bwagaragaje ko gufata abacukura mu buryo butemewe atari byo bikemura ikibazo

Guverineri Habitegeko ahamya ko nyuma yo gusuzuma ibibazo biri mu bucukuzi butemewe mu Karere ka Ngorororero, bigaragara ko umuturage ucukura amabuye aba afite uwo ayashyira, kandi uwo ari we uteza ibibazo bityo ko hakwiye guhinduka uburyo bwo guhangana n’abagura amabuye mu buryo butemewe, kuko ari bo bihishe inyuma y’ubucukuzi butemewe.

Habitegeko avuga ko abayobozi b’inzego z’ibanze na bo bihishe inyuma y’ubwo bucukuzi butemewe kuko bakoreye hamwe n’izindi nzego amakuru agatangwa ibyo bibazo byakemuka kandi abakora ubucukuzi butemwe bagafatwa.

Agira ati “Imisozi barayangiza, imigezi murabona uko isa, urugomero rwa Nyabarongo rurangirika, mbese twemeranyijwe ko hari ikibazo. Abaturage n’abayobozi tugiye gushyira hamwe imbaraga tukaburwanya kuko igihe umuturage ucukura bimutunze we azabona akazi muri kompanyi zemewe”.

Guverineri Habitegeko avuga ko gufata abaturage bidahagije ngo ubucukuzi butemewe buhagarare

Yongeraho ati “Dutakaza abantu benshi abagwa mu birombe biba, abantu bagura amabuye barazwi twabonye amakuru ko abo bantu bazwi, ubucukuzi buremewe abashaka gucukura nibaze bacukure mu buryo bwemewe, naho bariya baza bashuka abaturage ndababwira ko tugiye kubarwanya”.

Guverineri Habitegeko avuga ko kwirirwa bafata abaturage nk’abakora ubucukuzi butemewe bidahagije kuko ataribo kibazo ahubwo ikibazo ari abaforoderi baza kugura ayo mabuye bityo ko ingamba zikwiye kuba zifatwa zigomba kuba zirimo no gufata abo baza kugura amabuye.

Harakekwa na ruswa mu gutuma abagura amabuye badafatwa

Inzego zitandukanye kandi zagaragaje ko kuba abantu baza kugura amabuye badafatwa baba bakingirwa ikibaba n’abayobozi bamwe na bamwe bigatuma amakuru adatangwa neza cyangwa hakabaho n’ibisa nko gutera ubwoba uwahirahira gutanga amakuru bigatuma abaforoderi bakomeza kwidegembya.

Aya ni amabuye y’agaciro Polisi iherutse gufatana abaforoderi mu Karere ka Ngororero

Umuyobozi mukuru wa Kompanyi ikora ubucukuzi bw’amabuye y’agaciro (NMC) mu Karere ka Ngororero, Justin Uwiringiyimana, avuga ko abagura ayo mabuye bayashyira cyangwa bakayagurisha n’abacuruzi b’amabuye y’agaciro mu mujyi wa Kigali ariko ugasanga ntibafatwa nyamara ngo batanakanganye cyane.

Agira ati “Amabuye bayagurisha kuri kontwari ziyagura mu mujyi wa Kigali zo ziba zemewe, usanga abo bayagura bo badatanga imisoro ku buryo hari abakozi bacu bajya mu bucukuzi butemewe kuko abaforoderi batanga menshi kuko batishyura imisoro. Gusa inzego z’ubuyobozi bw’ibane zidufashije kubarwanya birashoboka”.

Umwe mu bayobozi b’imidugudu avuga ko amabuye abayagura bazwi kandi abacukura na bo bazwi ahubwo usanga koko habagaho imbaraga nkeya mu kubarwanya rimwe na rimwe nk’iyo hari abahawe amabahasha y’amafaranga nka ruswa, ariko ngo bagiye kwisubiraho bakarwanya abagura amabuye mu buryo butemewe.

Inzego z’umutekano n’abayobozi batandukanye basuye ahacukurwa mu buryo butemewe n’amategeko

Umuyobozo w’akarere ka Ngororero Ndayambaje Godefroid avuga ko mu minsi mike haraba hagaragaye impinduka mu gufata abagura amabuye mu buryo butemewe, kugira ngo harwanywe ibibazo bibushamikiyeho birimo imfu z’abagwa mu birombe, no kwangiza ibidukikije.

Abo banyeshuri bafunzwe nyuma yo gufatirwa mu bikorwa byavugwaga ko ari ibyo kwishimira kurangiza amasomo bakaza kwangiza bimwe mu bikoresho by’ikigo, iperereza rikaba rikomeje ku byaha bashinjwa byo kwangiza ku bushake ikintu cy’undi.

Uwo mwanzuro w’urukiko ntabwo wakiriwe neza n’abagize imiryango y’abo bana kuko ibyo bangije bamaze kubyishyura kandi ibyo bakurikiranweho bikaba byaratewe n’uko bishimiraga kuba basoje ibizamini bisoza amashuri yisumbuye.

Urubanza rwasomwe mu masaha ya saa cyenda z’igicamunsi kuri uyu wa 20 Kanama 2020 abafunze batari mu rukiko, nyuma y’iminsi 30 abanyeshuri batandatu ba ESECOM Rucano bafungiye icyaha cyo kwangiza ibintu by’undi ku bushake birimo ibirahure by’amashuri byamenetse, n’urukuta rw’urugo basenye ndetse n’amasaso y’ibitanda batwitse.

Nyuma yo gutabwa muri yombi, ubuyobozi bw’Ikigo cya ESECOM Rucano bwagiranye ibiganiro n’imiryango y’abo bana maze bemeranya kwishyura amafaranga abarirwa mu bihumbi 40 y’ibyangijwe n’abo bana.

Ibyo ni na byo byatumye imiryango y’abo bana igaragaza ko itishimiye kuba abana babo bakomeza gufungwa kuko bumvaga abana barahanwe kandi ibyo bangije byaramaze no kwishyurwa.

Umwe mu bakobwa bari baje kumva isomwa ry’urubanza rwa musaza we avuga ko yari yizeye ko batahana ariko yatunguwe no kuba urukiko rwafashe umwanzuro wo kumufunga iminsi 30 y’agateganyo.

Avuga ko kubera ko bumvaga ko ibyo musaza we na bagenzi be bakurikiranyweho bidakomeye cyane byatumye batanashaka abunganira abo bana mu mategeko kuko biburaniye.

Agira ati “Ibintu byabaye ni amakosa akorwa n’abanyeshuri bose, koko basenye uruzitiro rw’ikigo ibyo ntawe utarabikoze, ikirahure cyamenetse mu kavuyo ntabwo bari bagambiriye kukimena, imyenda batwitse ni iyabo naho isaso y’igitanda batwitse ni iyari yaravunitse itagikoreshwa ni yo mpamvu twumvaga ko nta mpamvu yo gushaka ababunganira twumvaga byoroshye”.

Undi mukobwa wari waje kumva isomwa ry’urubanza yavuze ko ikigo nta kintu kikibakurikiranyeho bityo ko musaza we na bangenzi be bari bakwiriye gutaha, cyane ko n’ibyo bangije bamaze kubyishyura.

Agira ati “Ayo masaso bangije twarayishyuye, ibirahuri bamennye twabisubijemo, aho basenye twarahasannye, twe twumvaga barahanwe mu buryo bw’amategeko agenga ikigo bityo ko bari bakwiye kurekurwa, ntabwo twabashakiye abunganizi kuko twumvaga bazabarekura”.

Avuga ko kuba barangije ibikoresho by’ikigo ariko bakaba baramaze kwishyura nta mpamvu yo gukomeza kubafunga, kuko ngo abana bakoze ayo makosa batabigambiriye ahubwo babitewe n’uko bishimiraga gusa kuba barangije ibizamini bakaba ngo bari bakwiye kurekurwa bakaburana bari hanze.

Urukiko rwavuze ko abo banyeshuri bemerewe kujurira mu minsi itanu ku ifungwa n’ifungurwa ry’agateganyo, abagize imiryango y’abo bana bakaba bavuze ko bagiye kubashakira abunganizi mu mategeko.

Ubuyobozi bwa ESECOM Rucano na bwo butangaza ko nta cyo bukurikiranye kuri abo banyeshuri kuko ibyangijwe byishyuwe n’imiryango yabo ibyo bakurikiranyweho bikaba bizasuzumwa mu butabera.

Mu ntangiriro z’ukwezi kwa Kanama 2021, Umunyamabanga wa Leta muri Minisiteri y’Umuco n’Urubyiruko yari yumvikanye atangaza ko ibyakozwe n’abana mu kwishimira ko barangije ibizamini nta nka yaciwe amabere kuko bisanzwe ko umuntu ashobora kwishima akagira imyitwarire itashimwa na bose n’ubwo ibyakozwe byo gutwika imyenda no kuyica bitashyigikirwa.

Gusa Minisiteri y’Uburezi yari yavuze mbere yaho gato ko abanyeshuri bagaragaye mu myitwarire nk’iyo bazakurikiranwa bagahanwa.

Umuyobozi w’Akarere ka Ngororero, Ndayambaje Godfroid, avuga ko uwo Munyaneza agiye gukurikiranwa ku makuru y’iyo mibiri nk’umuntu wahahingaga mbere y’uko itahurwa n’umwana wahiraga ubwatsi bw’amatungo akamenyesha ubuyobozi.

Igikorwa cyo gushakisha imibiri kiri gukorerwa mu murima usanzwe uhingwa

Iyo mibiri yabonetse hafi y’urwibutso rw’abazize Jenoside rwa Ngororero, bikaba bishoboka ko ari iyahajugunywe igihe Abatutsi bari bahungiye ahitwa ku Ngoro ya Muvoma bicwaga.

Umuyobozi w’Umuryango uharanira inyungu z’abarokotse Jenoside yakorewe Abatutsi (Ibuka) mu Karere ka Ngororero, Niyonsenga Jean D’amour, avuga ko amakuru y’iyo mibiri yamenyekanye ku wa Gatatu tariki ya 11 Kamena 2021 ubwo umwana wahiraga ubwatsi mu murima urimo iyo mibiri yabonaga umubiri umwe akamenyesha inzego zahise zitangira igikorwa cyo gushakisha indi.

Niyonsenga avuga ko iyo mibiri yabonetse mu murima usanzwe uhingwa n’abo mu muryango w’uwitwa Gregoire kandi nta makuru bari barigeze batanga kandi bigaragara ko iyo mibiri iri hejuru.

Agira ati “Birashoboka ko uwo mubiri umwana yabonye waseruwe n’imvura yaguye ejobundi, nta makuru yandi twari twarigeze duhabwa, ubwo inzego zibishinzwe ziragerageza gushaka amakuru kuri iyo mibiri babaze abahahingaga”.

Abaturage bafatanyije n’izindi nzego gushakisha imibiri

Niyonsenga avuga ko imibiri ikomeje gushakishwa muri uwo murima ku buryo hafashwe ingamba zo gushakisha mu cya kabiri cyose cyawo kugira ngo harebwe niba nta yindi isigayemo, kuko aho hantu hiciwe Abatutsi benshi.

Agira ati “Abatutsi biciwe ku Ngoro ku itariki 10 bukeye mu gitondo ku itariki ya 11 hakozwe igikorwa cy’umuganda wo gushyingura imibiri bari batwitse ntagitangaje kirimo rero, turakeka ko ari yo yaba yarajugunywe muri uwo murima, turacyashakisha”.

Igikorwa cyo gushakisha iyo mibiri kiri gukorwa hifashishijwe amaboko y’abaturage bakoresha amasuka kuko ngo nta cyobo cyari gihari ku buryo hakenerwa imashini, hakaba hizewe ko imibiri yaba ihari yagenda iboneka.

Hagati aho Niyonsenga yongera kwibutsa abaturage ko gutanga amakuru y’ahajugunywe imibiri muri Jenoside ari inshingano za buri wese kandi kutabikora bifatwa nko gukomeza gukomeretsa Abarokotse Jenoside.

Ni ikibazo cyari kimaze igihe kinini, abaturage bahora basiragira mu nzego zitandukanye ngo barebe ko hari urwabarenganura, icyakora guhera ejo ku ya 9 Kanama 2021, aba mbere batangiye guhabwa amafaranga yabo kandi igikorwa ngo kirakomeje.

Umwe mu bamaze gufata amafaranga yabo, Ntawukuriryayo Noheli, yavuze ko yishimye kuba abonye amafaranga ye nyuma y’igihe kirekire ategereje ari na ko ahora yishyuza.

Yagize ati “Ndashimira cyane ubuyobozi n’itangazamakuru ryakomeje kutuvugira none amafaranga yanjye nkaba nyabonye, bari bamfitiye 87,000 none barayampaye yose. Ikibazo cyari kirimo ni uko rwiyemezamirimo atarangije imirimo neza birangira yigendeye atatwishyuye”.

Mugenzi we asobanura ibibazo bahuye na byo byatewe no kuba batarishyuwe ku gihe kandi baramaze umwaka wose bakora badahembwa.

Ati “Urabona kumara umwaka ukora udahembwa ntibyoroshye, byaduteye ubukene, amadeni yabaye menshi ku buryo nari narabuze icyo kwishyura, icyakora ubu ndasubijwe”.

Abo ni bamwe mu bishyuwe, icyakora hari n’abatisanze ku rutonde rw’abagomba kwishyurwa, bakavuga ko byabayobeye kuko batazi ikibura, cyane ko ibyangombwa basabwaga ngo babitanze.

Kuri icyo kibazo cy’abibuze ku rutonde rw’abishyurwa, Umunyamabanga Nshingwabikorwa w’Umurenge wa Muhanda, Jean Pierre Hibukimfura, yavuze ko ibibazo birimo bidakomeye ku buryo mu cyumweru gitaha bizaba byakemutse.

Ati “Iki kibazo koko cyari kimaze iminsi ubuyobozi bugikurikirana, ariko guhera ejo hashize abantu barimo kwishyurwa amafaranga yabo kandi gahunda irakomeje. Abafite ibibazo ntabwo ari benshi, hari nk’aho usanga harakoze umugore agatanga konti y’umugabo we, hakaba hari ahandi hagiye habaho kwibeshya, turakomeza gukosora imyirondoro yabo, icyiza ni uko amafaranga yose y’abo baturage yabonetse, ari ku rwego rw’akarere”.

Ati “Igikorwa cyo gukosora imyirondoro yabo kizaba cyarangiye ku wa gatanu w’iki cyumweru, hanyuma bitarenze ku wa Kabiri w’icyumweru gitaha bose bazaba babonye amafaranga yabo”.

Abo baturage bavuga ko ubuyobozi butigeze bubatererana mu kibazo cyabo n’ubwo cyari kimaze igihe kirekire, nk’uko babitangarije Radio Rwanda kuri uyu wa Kabiri tariki 10 Kanama 2021.

ESECOM Rucano

Mu ijoro ryo ku wa Kane tariki ya 29 Nyakanga 2021, ni bwo abana b’abahungu batandatu bivugwa ko bari batorotse ikigo bajya kunywa inzoga batahaga nijoro mu masaha ya saa mbiri (20:00’) maze batwika amasaso y’ibitanda ndetse banamena ibirahure by’inzu baryamamo.

Mu gikorwa ubuyobozi bw’ishuri buvuga ko cyamaze nk’iminota 30 kikaza guhagarikwa n’inzego z’umutekano, zatabaye nyuma yo kumva ko abanyeshuri barangije ibizamini barimo gutwika ibikoresho by’ishuri.

Icyo gikorwa cy’imyitwarire mibi ngo cyatewe no kuba abo bahungu bari basinze bagategura ibisa n’ibirori byo kwishimira ko barangaje amashuri yisumbuye ariko bakabikora nabi, kuko aho kwishimira gutsinda no kuba ibizamini birangiye badukiriye isaso z’ibitanda bitatu barazitwika.

Icyakora ngo inzego z’umutekano zatabaye zasanze isaso imwe ari yo yamaze gukongoka izindi zitarafatwa, ni ko kubata muri yombi bajyanwa kuri Sitasiyo ya Polisi ya Ngororero aho bafungiye kubera ibyo bakoze.

Amakuru yacicikanye cyane yagaragazaga ko abo bana baba barakoze ibyo bikorwa kubera ko bangiwe gutaha ngo bategereze kuzataha hubahirijwe amabwiriza yo kwirinda Covid-19, muri ayo makuru kandi byagaragajwe ko harimo abari banyoye ibisindisha nk’uko ibipimo byafashwe na polisi bibigaragaza.

Ibyabaye ni igikorwa cy’imyitwarire mibi kubera ubusinzi

Umuyobozi wari ukuriye Santere y’ibizamini ya ESECOM Rucano, Bakundabate Jean Berchimas, atangaza ko ibyabaye kuri abo bana abifata nk’igikorwa cy’imyitwarire mibi kubera gusinda aho kuba imyigaragambyo.

Asobanura ko ubwo abo bana bajyaga kunywa inzoga batorotse ntawe ubizi, batashye bateza umwuka mubi mu kigo babikoreshejwe n’inzoga, icyakora ngo n’ubundi abo bana bigaragara ko bari basanzwe bitwara nabi kuko hari umwe muri bo wari warigeze guhanishwa igihano cyo gutanga amafaranga yo kugura umufuka wa sima wo gusana aho yigeze gusenya n’ubundi yatorotse ikigo nk’uko biri mu bihano biteganywa n’amabwiriza ngengamyitwarire y’imbere mu kigo.

Agira ati “Njyewe nk’umuntu wari ushinzwe ibizamini kuri iki kigo ntabwo nemeranya n’abavuga ko abo bana bigaragambije, ahubwo mpamya ko ibyo bakoze ari imyitwarire mibi yatewe n’ubusinzi kuko n’ubundi bari basanzwe batitwara neza”.

Ku kijyanye no kuba haravuzwe ko abana bigaragambije kubera kwangirwa gutaha, Bakundabate avuga ko ntaho bihuriye kuko abana batangiwe gutaha ahubwo imodoka yabatwaye yahamagawe na Polisi yari icunze umutekano kuri icyo kigo, kugira ngo harebwe niba umwe mu bana bayigiyemo ntaho ahuriye n’ubujura bwari bumaze kuvugwa nyuma y’uko imodoka ibatwaye.

Agira ati “Abana bamaze kuriba bisi hatangwa amakuru ko muribo hari uwaba wibye ibikoresho bya mugenzi we wari ugikora ibizamini, imodoka barayihamagaye iragaruka twasanze ibimenyetso bidafata uwo mwana ntabwo kwari ukubangira gutaha”.

Icyakora Bakundabate ngo nta makuru afite niba bamwe muri abo bana bafunzwe haba harimo abagaruwe batashye ngo umuntu abe yavuga ko ibyo bakoze baba barabitewe koko n’umujinya wo kwangirwa gutaha.

Yaba Bakundabate, yaba n’umuyobozi usanzwe wa ESECOM Rucano n’abandi baturage baturiye ishuri bavuga ko ibyabaye atari ukwigaragambya ahubwo ari imyitwarire mibi y’abanyeshuri, icyakora ngo inzego z’umutekano ni zo zizemeza ukuri nyako hakurikijwe iperereze abana bari gukorwaho.

Kugeza ubu abana bategereje gutaha kuri icyo kigo ngo bameze neza nta kibazo kuko n’abari bafashwe batararangiza ibizamini bagarutse kubikora bagasubira kuri Sitasiyo ya Pilisi ya Ngororero, twakomeje gushaka amakuru ku muvugizi wa Polisi mu Ntara y’Iburengerazuba ariko ntitwabasha kumubona kuri telefone.

Yafashwe ahagana saa sita z’amanywa, afatirwa mu Murenge wa Gatumba mu Kagari ka Cyome, Umudugudu wa Mpara ari muri icyo kirombe, akaba yafatanwe ikiro kimwe cy’amabuye yo mu bwoko bwa Beryl, inyundo 2, ipiki 1, igitiyo 1, nk’uko bigaragara ku rubuga rwa Internet rwa Polisi y’u Rwanda.

Umuvugizi wa Polisi mu Ntara y’Iburengerazuba, CIP Bonaventure Twizere Karekezi, yavuze ko ubuyobozi bw’isosiyete y’ubucukuzi bw’amabuye y’agaciro ikorera mu Karere ka Ngororero yitwa Ngororero Mining Company (NMC), yari imaze iminsi itanze amakuru ko hari abantu baza mu kirombe kubacukurira amabuye.

Polisi yahise itegura igikorwa cyo gufata abo bantu aribwo hafatwaga Munyandera abandi bagera kuri 6 baracika.

Yagize ati “Twagejweho amakuru ko hari abantu bajya kwiba amabuye y’agaciro ya sosiyete y’ubucukuzi bw’amabuye y’agaciro. Mu bikorwa bya Polisi byo kuri uyu wa mbere tariki ya 19 Nyakanga twabashije gufata umwe abandi baracika”.

CP Karekezi yongeye kwibutsa abaturage ko ubucukuzi bw’amabuye y’agaciro bunyuranijwe n’amategeko buhanirwa, byongeye bariya bo barimo no kuyiba kuko aho bayacukuraga hasanzwe hakorera sosiyete ibifitiye ibyangombwa.

Ati “Bariya bantu baba bikururira ibyago byo kuba bagwirwa n’ibirombe kuko bajyamo bihishe. Ikindi barahombya ba rwiyemezamirimo babifitiye ibyangombwa, kuko iyo bamaze kuyiba ikiro ngo bakigurisha Amafaranga y’u Rwanda 8,000 kandi bakajya kuyagurisha mu bantu na bo batemewe n’amategeko”.

Yongeyeho ko ibyo bikorwa by’ubucukuzi bw’amabuye y’agaciro binyuranije n’amategeko bikorwa ahantu hatandukanye mu Karere ka Ngororero, ariko Polisi y’u Rwanda ku bufatanye n’izindi nzego bahagurukiye kubirwanya.

Uwafashwe yahise ashyikirizwa Urwego rw’Igihugu rushinzwe ubugenzacyaha (RIB) kugira ngo akorerwe idosiye, ni mu gihe hakirimo gushakishwa abandi bari kumwe na we.

Mu ntangiriro z’uku kwezi na none mu Karere ka Ngororero mu Murenge wa Muhororo hari hafatiwe abandi bantu babiri bafite ayo mabuye yo mu bwoko bwa Beryl.

Itegeko rigena ubucukuzi bw’amabuye y’agaciro na kariyeri nimero 58/2018 ryo kuwa 13/08/2018, mu ngingo ya 54 ivuga ko umuntu wese ushakashaka, ucukura, utunganya, ucukuza amabuye y’agaciro cyangwa kariyeri nta ruhushya aba akoze icyaha.

Iyo abihamijwe n’urukiko ahanishwa igifungo kitari munsi y’amezi abiri (2) ariko kitarenze amezi atandatu (6) n’ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni eshanu (5.000.000 FRW) cyangwa kimwe gusa muri ibyo bihano.

Urukiko rutegeka kandi ubunyagwe bw’amabuye y’agaciro cyangwa kariyeri byafatiriwe biri mu bubiko, bicuruzwa cyangwa bitunganywa nta ruhushya.

Itegeko nº68/2018 ryo ku wa 30/08/2018 riteganya ibyaha n’ibihano muri rusange Ingingo ya 166 ivuga ko Umuntu wese uhamijwe n’urukiko icyaha cyo kwiba, ahanishwa igifungo kitari munsi y’umwaka umwe (1) ariko kitarenze imyaka ibiri (2) ,ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni ebyiri (2.000.000 FRW), imirimo y’inyungu rusange mu gihe cy’amezi atandatu (6) cyangwa kimwe gusa muri ibyo bihano.

Ahari hubatse Kiliziya ya Nyange ubu hubatse urwibutso rwa Nyange

Babishingira ku kuba Nyange yaranzwe n’amateka mabi muri Jneoside yakorewe Abatutsi, aho uwari Padiri mukuru wa Paruwasi Nyange yatanze amabwiriza yo gusenyera Kiliziya ku Batutsi bari bayihungiyemo, muri Mata 1994 itikiriramo abasaga ibihumbi bitatu harokoka abatagera kuri batanu.

Icyo gihe Padiri Seromba yavugaga ko ngo Abahutu bafite imbaraga bazongera kubaka iyo kiriziya mu minsi itatu gusa, maze aba atanze atyo urugero rubi rwazinuye benshi mu barokotse kongera kwemera ko kiliziya ari inzu y’Imana koko.

Nyuma y’imyaka itatu mu 1997, abacengezi bari muri ako gace ka Nyange bari bagifite umugambi wo gukomeza Jenoside, bateye ku kigo cy’amashuri yisumbuye cya Nyange basaba abanyeshuri kwitandukanye hakurikijwe amoko, ariko baratsembera bavuga ko ari Abanyarwanda.

Abacengezi ntibanyuzwe n’ibyo bisubizo maze batangira kurasa abanyeshuri babatera ubwoba babasaba kwitandukanya baryumaho bakomera ku gihango cy’Ubunyarwanda maze barindwi muri abo bana bahasiga ubuzima.

Umunyambanga Nshingwabikorwa w’Umurenge wa Nyange, Gaudence Mukasano, avuga ko amateka mabi ya Nyange yo gusenyera kiriziya ku Batutsi yagaragazaga urwango, ariko nyuma y’imyaka itatu imbuto y’ubwiyunge yari imaze kwera ku buryo abagerageje kongera gucamo ibice Abanyarwanda babonye ko bibeshye ubwo abo bana b’i Nyange baganga kwitandukanya bakurikije amoko.

Agira ati “Imbuto y’Ubumwe bw’Abanyarwanda yabibwe na Leta y’Ubumwe yahise itangira kurumbuka maze mu myaka itatu gusa abashakaga gukomeza inzira yo gutanya Abanyarwanda Babura aho bamenera bakorwa n’isoni bica inzirakarengene”.

Hashinzwe amatsinda y’Ubumwe n’Ubwiyunge ahuje Abanyarwanda bose

Mukasano avuga ko nyuma ya Jenoside yakorewe Abatutsi, Umurenge wa Nyange wari ufite imanza z’abagize uruhare muri Jenoside zisaga 7,000 kandi zarangijwe hafi ya zose kuko hasigaye izitagera kuri 40, ibyo bikagaragaza ubutabera bwunga bwageze ku ntego yabwo.

Nyuma yo kurangiza ibihano kandi abakoze Jenoside, abasezerewe mu ngabo, abari abacengezi n’abarokotse Jenoside bibumbiye hamwe bahabwa inyigisho z’ubumwe n’Ubwiyunge bashyiraho amatsinda agamije gufatanyiriza hamwe kwiteza imbere, ubu babanye neza nk’abavandimwe nta rwikekwe.

Agira ati “Abo bose ubu bahuriye mu itsinda ryitwa Imboni. Bafite umurima w’amahoro bahingamo bose muri iryo tsinda kandi ibivuyemo byose bigirira akamaro uwo ari we wese, hari n’ibindi bikorwa bakora kandi bigamije kubaka ubumwe ku buryo ari urugero rw’uko ubumwe bwagezweho”.
Amatsinda y’Ubuuwe n’ubwiyunge kandi akora ibikorwa by’urukundo byo kubakira abatishoboye baba abarokotse Jenoside cyangwa abakoze Jenoside cyangwa imiryango yabo.

Urubyiruko rwarahagurutse rwiyemeza kurwanya amacakubiri

Urubyiruko rwo mu Murenge wa Nyange ruvuka mu miryango y’akoze Jenoside n’iyarokotse Jenoside na rwo rugaragaza ko rufite inyota yo kurwanya uwo ari we wese washaka kongera gutoba imibanire myiza y’Abanyarwanda imaze kugerwaho.

Umusore w’imyaka 30 wari wo mu Murenge wa Nyange, avuga ko umuryuango we washize ariko akarokoka nyuma akisanga mu buzima bwo kutagira umuryango, ariko nyuma y’ibiganiro by’isanamitima yemeye kubana n’abamwiciye umuryango.

Ni ibintu ahamya ko bitari byoroshye ariko byashobotse kandi ubu nta kintu bimutwaye kuko icyo akeneye akibonera kuri abo bavandimwe bashya abana nabo.

Agira ati “Abagifite urwikekwe bakwiye guhindura ibitekerezo kuko ayo ni amateka kandi akwiye kutwigisha uko tubaho, kuko ni yo tumenyeraho aho amacakubiri yaturutse ahubwo tukaba Umunyarwanda umwe”.

Asaba urubyiruko rw’Abanyarwanda baba hanze kudaha amatwi ibyo bumva bitari ukuri ahubwo bagacukumbura ibyo u Rwanda rumaze kugeraho, nabo ubwabo bakaba baza kwirebera kugira ngo batange umusanzu wabo mu kubaka igihugu.

Undi musore wo mu muryango wakoze Jenoside avuga ko atashimishijwe no kumva ko se umubyara yakoze Jenoside ariko bitabujije ko agomba kubaho nk’abandi Banyarwanda, agasaba urubyiruko kwigira ku mateka kugira ngo bahindure imitekerereze n’uburyo bushya bw’imibereho izira amacakubiri.

Agira ati “Amateka yacu ntawe wundi tuyasangira, ni ayacu nyine twebwe urubyiruko dukwiye kuyigiraho kuko ni byo bizatuma ibyabaye bitazasubira ukundi ariko nitutayigiraho tuzaba twongera kwishyira ahabi”.

Abasebya u Rwanda baribeshya kuko hari ibifatika byagezweho bikwiye kubabera urugero

Mukasano avuga ko Amateka ya Nyange n’aho igeze yiyubaka bikwiye kubera urugero abasebya ubuyobozi bw’u Rwanda

Mukasano avuga ko ibikorwa u Rwanda rumaze kugeraho bishyigikira ubumwe bw’Abanyarwanda ari byinshi ku buryo abasebya u Rwanda bakwiye guhindukira bakareba aho ruvuye n’aho rugeze.

Agira ati “Niba uyu munsi umugore w’umugabo ufungiye icyaha cya Jenoside atarirukanwe ku kazi kubera ibyaha by’umugabo we, umwana we ntiyimwe ishuri kubera ibyaha bya se, uwarokotse Jenoside n’uwayikoze tukaba tububakira bose, tukabaha inka bose, ubwo abavuga ko mu Rwanda nta bumwe buhari wababwira ikindi giki”?

Umurenge wa Nyange waranzwe n’amateka mabi muri Jenoside na nyuma yayo kandi wongeye kwiyubakam kuko ubu Nyange yubatsemo Igicumbi cy’Intwari z’Imena zirimo n’abarokotse ibitero by’abacengezi, kiliziya ya Nyange na yo yarongeye irubakwa.

Ubu Nyange ikorerwamo ubukerarugendo bushingiye ku mateka, hagamijwe gukomeza gusobanurira Abanyarwanda n’abanyamahanga aho u Rwanda rugeze rwiyubaka.

Abafatiwe muri iyo modoka berekeza i Kigali batabifitiye uruhushya

Umuvugizi wa Polisi mu Ntara y’Iburengerazuba, CIP Bonaventure Twizere Karekezi, avuga ko umushoferi w’imodoka yari yahawe uruhushya "mouvement clearence", iva i Kigali ajya i Rusizi ku bitaro bya Gihundwe kureba umubyeyi we uharwariye. Asubira i Kigali, yapakiye abantu mu modoka ye batari babisabiye uburenganzira abaca amafaranga abavana Rusizi abajyana i Kigali Imodoka ayigira taxi, kuko yabaciye buri muntu amafaranga 25000Frw.

Polisi ivuga ko Hamis yafashwe ku mugoroba tariki 9 Nyakanga 2021 ku isaha ya saa kumi n’ebyiri n’igice z’umugoroba.

Imodoka bari barimo

Abafatiwe mu modoka barimo Asmani Jean de Dieu, Karemera James, Mwanankesa Mwanza na Rugabirwa Rugama.

Polisi ivuga ko abo bari mu modoka baciwe amande y’ibihumbi icumi na Ngali 10,000 buri muntu yo kutubahiriza amabwiriza ya Covid-19, na ho umushoferi we akaba yaciwe 25,000.

Akarere ka Ngororero gaherereye mu Ntara y’Iburengerazuba

Ibyo byabaye mu masaha ya saa yine z’ijoro mu Kagari ka Bijyojyo mu Murenge wa Ndaro ubwo umugore wa Baraturwango yatahaga agasanga umugabo we yageze mu rugo, bagakimbirana kugeza igihe ngo umugabo yeguye ifuni akayikubita umugore.

Umugore ngo yahise ata ubwenge asa nk’upfuye ajyanwa kwa muganga ariko mu masaha ya nimugoroba kuri uyu wa Gatatu tariki 07 Nyakanga 2021, umugore atangira gutora agatege aho ari kwa muganga.

Nyuma yo gushaka kwica umugore we Baraturwango ngo yahise ahunga aburirwa irengero inzego zibishinzwe zikaba rizimo kumushakisha kugira ngo ashyikirizwe ubutabera, icyakora ubwo twakoraga iyi nkuru uwo mugabo akaba yari ataraboneka.

Umunyamabanga Nshingwabikorwa w’Umurenge wa Ndaro, Nzabakurikiza Alphonse, avuga ko umugore wa Baraturwango yari asanzwe afitanye amakimbirane n’umugabo we ashingiye ku mitungo ari na yo bapfaga.

Agira ati “Amakuru abana baduha n’abaturanyi ni uko umugore afite utwo yishabikira ntaheho umugabo kandi umugabo we ntagire icyo azana mu rugo, uwo mugabo kandi ngo yaba akeka ko umugore we yaba afite abandi bagabo bamuha ibituma yimeza neza kuko ngo yiyitaho agasa neza”.
Icyakora ngo ibyo binakubitiraho kuba umugabo nta kintu yinjiza mu rugo bigatuma n’iyo hateguwe amafunguro uwo mugore ataraza umugabo akahagera mbere ahita abirya umugore yaza akabura icyo afata.

Nzabakurikiza avuga ko mu masaha ya saa yine z’ijoro zo ku wa 07 Nyakanga 2021, ari bwo inzego zamenyeshejwe ko icyo kibazo kibaye nijoro bakihutira gutabara uwo mugore akajyanwa kwa muganga aho yaje no kuzanzamuka.

Nzabakurikiza akaba agira inama abaturage bafite ingo kurushaho gutera intambwe bakamenyekanisha ikibazo bafite mu nshuti n’abavandimwe mu rwego rwo kurwanya ibyago biterwa n’amakimbirane.

Agira ati “Mu by’ukuri umugore yari atashye nyuma y’umugabo we nta makimbirane yandi yari yabayeho uretse ibyari bisanzwe, imiryango ikwiye kugaragaza ibibazo ifitanye mu nshuti n’abavandimwe aho binaniranye bigashyikirizwa izindi nzego kuko ingaruka zabyo ni uko habaho ibyago nk’ibyo kandi imitungo ikahahombera”.

Ubuyobozi buvuga ko ikibazo gikomeye ari uko iyo ibibazo nk’ibyo bibaye usanga biteza ibihombo birimo no kubura ubuzima bugasaba abashakanye kwihanganirana kandi abaturanyi bagatangira amakuru ku gihe ahagaragaye ibibazo bigasuzumwa.

Mu rugo kwa Munyentwari ahasanzwe ayo mabuye y’agaciro yacuruzwaga bitemewe n’amategeko

Umuvugizi wa Polisi mu Ntara y’Iburengerazuba, CIP Bonaventure Twizere Karekezi, yavuze ko Polisi yasanze mu rugo rwa Munyentwari hari ububiko (Stock) bw’amabuye y’agaciro, bafatwa barimo kuyapakira mu mifuka bategereje imodoka ngo bajye kuyagurisha ku mucuruzi uba mu Karere ka Muhanga usanzwe uyagura.

Ati “Bafashwe saa tanu z’ijoro barimo gupakira ariya mabuye kugira ngo imodoka ize bayajyane mu Karere ka Muhanga ahari umucuruzi basanzwe bayacuruzaho. Abapolisi basanze nta byangombwa bafite bibemera kugura no gucuruza ayo mabuye ndetse banabikora bitwikiriye ijoro”.

Ubwo bamaraga gufatwa, Munyentwari ari na we nyiri ayo mabuye yavuze ko ayavana ahacukurwa amabuye y’agaciro mu birombe biba mu Karere ka Ngororero, nk’uko byatangajwe ku rubuga rwa Internet rwa Polisi y’u Rwanda.

Yavuze ko ikiro kimwe akirangura ku mafaranga y’u Rwanda 200 akakigurisha kuri 250, ayo mabuye ngo akorwamo ibintu bitandukanye nk’ibirahure by’amazu, amakaro, ngo hari n’ibyo bayakoresha muri moteri y’ibinyabiziga. Yemeye ko yari amaze igihe kinini acuruza ayo mabuye mu buryo butemewe n’amategeko.

CIP Karekezi yashimiye abaturage batanze amakuru, akangurira abantu kujya bakora ubucuruzi bwemewe n’amategeko kugira ngo birinde ibihano bashobora guhura na byo.

Ati” Uriya muntu yakoraga ubucuruzi butemewe n’amategeko kuko nta byangombwa afite kandi yabikoraga nijoro yihishe. Arivugira ko yaguraga ariya mabuye ku bakozi bo mu masosiyete y’ubucukuzi bw’amabuye y’agaciro ubwo urumva ko na bo bayiba aho bakorera. Barabangamira abashoramari bafite ibirombe, ikindi kandi banyereza imisoro kuko ntibasora”.

Abafashwe Polisi yabashyikirije Urwego rw’Igihugu rushinzwe ubugenzacyaha (RIB) rukorera muri sitasiyo ya Polisi ya Ngororero kugira ngo hatangire iperereza hamenyekane aho bajyaga kuyacuruza.

Itegeko rigena ubucukuzi bw’amabuye y’agaciro na kariyeri nimero 58/2018 ryo ku wa 13/08/2018, mu ngingo ya 54 ivuga ko umuntu wese ushakashaka, ucukura, utunganya, ucukuza amabuye y’agaciro cyangwa kariyeri nta ruhushya aba akoze icyaha.

Iyo abihamijwe n’urukiko ahanishwa igifungo kitari munsi y’amezi abiri (2) ariko kitarenze amezi atandatu (6) n’ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni eshanu (5.000.000 FRW) cyangwa kimwe gusa muri ibyo bihano.

Urukiko rutegeka kandi ubunyagwe bw’amabuye y’agaciro cyangwa kariyeri byafatiriwe biri mu bubiko, bicuruzwa cyangwa bitunganywa nta ruhushya.

Umunyamabanga Nshingwabikorwa w’Umurenge wa Ndaro Alphonse Nzabakurikiza yemeje ayo makuru ko ku wa 01 Nyakanga 2021, mu masaha ya saa yine za mu gitondo, abantu barindwi bishoye mu kirombe cyari kimaze imyaka isaga ibiri n’igice kidakora.

Avuga ko babiri muri abo bagiye kwiba amabuye mu kirombe basigaye hejuru, batanu bakinjiramo imbere ari na bo bagwiriwe n’ikirombe bakaza kubakuramo bashizemo umwuka.

Agira ati “Abo babiri basigaye hejuru ni bo batabaje natwe duhita twiruka ngo dutabare mu ma saha ya saa kumi n’ebyiri n’Igice nibwo twari tumaze kubakuramo bose bapfuye, bari bagiye kwiba amabuye kuko ikirombe bapfiriyemo cyari kimaze igihe gifunze”.

Avuga ko byagoranye kubakuramo kuko bari bageze kure mu kuzimu, kandi ibyabaguyeho byari byiganjemo amabuye aremereye bisaba umwanya munini.

Kuba Kompanyi z’ubucukuzi ziza zikongera zikagenda ni kimwe mu bigoye guhagarika impfu ziterwa no kuriduka kw’ibirombe

Umunyambanga Nshingwabikorwa w’Umurenge wa Ndaro avuga ko impamvu nyamukuru itera abaturage kwishora mu bucukuzi butemewe n’amategeko ari uko usanga inzego zibishinzwe zitanga impushya kuri Kompanyi zicukura, hashira igihe zikongera kubirukana ko batujuje ibisabwa kandi nyamara amabuye agasigara mu birombe.

Avuga ko bikwiye kwiganwa ubushishozi abacukuzi babigize umwuga bagahabwa uburenganzira bwo gucukura bitaba ibyo bikaba bigoye guhagarika abaturage kongera gusubira mu bucukuzi butemewe.

Agira ati “Umuti urambye ni uko Kompanyi zicukura zabigize umwuga zakwemererwa kuza gucukura zigakoresha abo baturage kuko usanga bajyamo bihishe kandi nta buryo bwo kwirinda bafite, ntibaba banazi uko babigenza, abaturage bahorana amashyushyu yo kujya kwishakiramo amabuye”.

Icyakora avuga ko n’inzego z’ubuyobozi bw’umurenge zigerageza kurinda ibyo birombe ariko abaturage bahora biteguye guca mu rihumye abarinzi kandi bigoye kurindisha ibirombe abantu utazi igihe bizamara.

Nzabakurikiza asaba abaturage kwihangana bagategereza igihe abahanga mu by’ubucukuzi bw’amabuye y’agaciro bagarukira mu birombe bakabaha akazi kuko ubuzima ari bwo bwa mbere bwo kurengera.

Turakomeza gukurikirana iyi nkuru tumenye icyo ubuyobozi bw’Akarere buri gukora ngo abacukuzi bemewe bagaruke mu mirimo.

Andi makuru Kigali Today yamenye ni uko tariki 22/06/2021 Umuyobozi w’Akarere yagiranye inama na kompanyi 14 zemerewe gucukura amabuye y’agaciro. Yabasabye kurinda imbago z’ibirombe byabo kugira ngo abacukura rwihishwa babure aho bamenera. Yanabasabye kwirinda kugura amabuye ku buryo bwa forode kuko biri mu bitiza umurindi aba bacukura rwihishwa ari na ko bashyira ubuzima bwabo mu kaga.

Iki kigo cyashyizwemo amashanyarazi ku buryo batakibyaza bamurikisha itoroshi

Mu gihe bamwe bakeneye umuriro mu bikorwa by’iterambere, abaganga bo ku kigo nderabuzima cya Gashonyi mu Karere ka Ngororero, bavuga ko bamaze igihe bakoresha itoroshi nijoro bita ku babyeyi n’abarwanyi babagana badafite umuriro w’amashanyarazi bigahora bibahangayikishije.

Ikigo nderabuzima cya Gashonyi giherereye mu misozi miremire ya Ngororero, kugira ngo ugere ku bitaro biri hafi bya Shyira mu Karere ka Nyabihu, bisaba kwambuka umugezi wa Mukungwa yihuza na Nyabarongo bikaba ikibazo kuyambuka igihe imvura yaguye, mu gihe n’umuhanda uba utameze neza.

Abaturage bavuga ko bamenyereye gukoresha ingobyi mu gihe cy’imvura kuko imodoka hari aho zidashobora gukora.

Ikibazo cy’imihanda cyifatanyije no kutagira umuriro ku kigo nderabuzima cya Gashonyi byatumye abaturage bajya mu bwigunge mu kubona serivisi nziza z’ubuzima.

Kuva babona ikigo nderabuzima cyubatswe na World Vision, kigakurikirwa no kubegereza amazi n’amashanyarazi, ubu bashima Leta y’u Rwanda n’umufatanyabikorwa wayo World Vision bashoboye kubakura mu bwigunge bakaba bahabwa serivisi nziza uko bayishaka.

Ayinkamiye Clotilde ni umubyeyi w’imyaka 42, agaragaraza imikorere by’ ikigo nderabuzima cya Gashonyi cyamufashije kitarabona amashanyarazi na nyuma yo kuyabona.

Agira ati "Iki kigo cyadufashije tutarabona amashanyarazi, cyari gifite inyubako ntoya, kitagira amazi, iyo wazaga mu ijoro wabaga utizeye serivisi uhabwa kuko abaganga bakoreshaga itoroshi, haba mu kubyaza, haba mu gusuzuma ugasanga ababyeyi bamwe batahakunda, bagahitagamo gukora ibilometero bakajya ku bitaro bya Shyira na byo byari mu misozi ihanamye, abandi bakabyarira mu rugo kuko babonaga n’aho babyarira batahizeye."

Ayinkamiye avuga ko abaturage bo muri Matyazo bari barasigaye inyuma kubera kutagira amashanyarazi n’amazi.

Ati "World Vision yaradufashije, kuko nyuma yo kuvugurura inyubako y’ababyeyi baduhaye amazi meza, turuhuka ingendo zo gukora ikilometero dushaka amazi mu mibande, ibi byagabanyije indwara zikomoka ku isuku nke."

Ati"Ibi bikorwa byahinduye ubuzima bwacu kuko indwara z’umwanda zaragananutse ndetse dushobora gutunga telefoni kuko tubona aho turahura umuriro, mbere byari ikibazo kubona umuriro ndetse n’iterambere ryari rikeya."

Nayino Anoilita utuye mu kagari ka Rwamiko, avuga ko ikigo nderabuzima cya Gashonyi cyagabanyije ababyeyi babyarira mu rugo n’abana bagahura n’ibibazo bavuka.

Ati "Turishimira ko iki kigo nderabuzima cyavuguruwe, tubona amashanyarazi, ubu ibizami bikorwa byose, umubyeyi uje kubyara aba azi neza ko abaganga bamukurikirana bareba neza badakoresha itoroshi nka kera, tubona amazi meza hano, ubuzima bwabaye bwiza."

Nayino akomeza avuga ko abaturage babonye amazi batozwa isuku n’abana babona amazi isuku iriyongera haba mu ngo no ku imashuri.

Umuyobozi w’ikigo nderabuzima cya Gashonyi, Nzabahiranya Wilhelimine, avuga ko bahuye n’ingorane batarabona amashanyarazi.

Ati "Mbere ya 2018 ubuzima bwari bugoye kuko nta mashanyarazi twari dufite tugakoresha itoroshi mu kubyaza, ibaze iyo umubyeyi akeneye kongerwa, udafite umuriro ukoresha itoroshi bisaba kwigengesera, dushimira Imana ko nta mubyayi wabigiriyemo ikibazo."

Ababyeyi bishimira ko basigaye babyarira ahantu heza

Avuga ko iyo mikorere yatumye ababyeyi batahakunda bigatuma benshi bakora ingendo ndende, abandi bakabyarira mu ngo.

Imibare itangwa n’ikigo nderabuzima cya Gashonyi igaragaza ko abagore babyarira kwa muganga bari kuri 50% ikigo nderabuzima kitarabuvururwa ngo gihabwe amashanyarazi, none ubu bageze kuri 85%.

Nzabahiranya avuga ko imbogamizi bagiraga bagifite ari umuhanda kuko mu gihe cy’imvura imbangukiragutabara itabasha kugera ku barwayi. Ati "Tugira ibibazo mu gihe cy’imbura abarwayi bajyanwa mu ngombi."

Uwo muyobozi avuga kandi ko amazi yegerejwe abaturage yagabanyije indwara zikomoka ku isuku nke.

Ati "Indwara z’abana zari nyinshi mu gihe batagiraga amazi meza, ibipimo bigaragaza ko indwara z’impiswi ziterwa n’umwanda zari kuri 65%, ubu zigeze kuri 40% kandi ubukangurambaga burakomeje."

Umuyobozi w’Akarere ka Ngororero wungirije ushinzwe imibereho myiza y’abaturage avuga ko bashima World Vision yabafashije kubaka ibikorwa remezo bifasha abaturage kubona serivisi nziza.

Ati "Badufashije mu kubaka ikigo nderabuzima cya Gashonyi, ariko banadufashije mu bindi bikorwa bifasha abaturage kugira imibereho myiza nko kubaka ibyumba by’amashuri tugabanya ubucucike, badufashije kubona intebe mu mashuri, bafasha Akarere kwegereza abaturage amazi meza dusezerera indwara zikomoka ku isuku nke, badufashije mu kubaka amasoko mato abaturage bashobora kugeza umusaruro ku isoko bihindura ubuzima bwabo."

Jérôme Sezibera Ayingoma umukozi wa World Vision avuga ko ibikorwa bakora bagamije guteza imbere imibereho y’umwana, cyane cyane abakomoka mu miryango icyennye.

Asobanura ko World Vision yita ku bukungu n’iterambere, ubuhinzi, ibindi biri mu buzima, amazi, isuku n’isukura, hamwe n’uburezi, kugira ngo bifashe umwana kugira ubuzima bwiza.

Urubyiruko rwiga imyuga mu kigo cya Nyange ruhamya ko umurimo watuma rutirukira gushakisha ubuzima mu mijyi

Guverineri Habitegeko ubwo yasuraga ishuri ry’imyuba rya Nyange muri Ngororero, yavuze ko umurimo ugira uruhare mu gutuma urubyiruko rubona ibyo ruhugiraho runiteza imbere, aho kugwa mu bishuko bikuruwe no kuba rwabuze icyo rukora, cyangwa ugasanga rwishoye mu mijyi kujya gushakisha imibereho yagombye kuba iboneka aho rutuye.

Guverineri Habitegeko avuga ko kongera ibigo byigisha imyuka n’ubumenyi ngiro ari kimwe mu bisubizo byo gukemura ibibazo byugarije urubyiruko birimo n’ingeso mbi n’ubwomanzi.

Yongeraho ko Intara y’Iburengerazuba irimo gushyira imbaraga mu kongera bene ibyo bigo kugira ngo urubyiruko rubone icyo rukora rwiteze imbere runateza imbere igihugu.

Agira ati “Kwigisha imyuga urubyiruko ni kimwe mu bisubizo byo kurwanya bya biyobyabwenge mu rubyiruko, ingeso mbi z’ubusambanyi kuko burya ngo iyo umutwe ntacyo ufite cyo gukora uhinduka ikibuga cya Shitani, niba umwana ari gusudira urugi rw’umukiriya nihagira umuhamagara ngo amushuke ntabwo azamwitaba kuko azaba ashakisha amafaranga ngo yikemurire ibibazo”.

Guverineri Habitegeko kandi ashishikariza Abanyarwanda guhindura imyumvire bagaha agaciro ubumenyi ngiro n’imyuga kuko aho igihugu kigeze abantu babayeho neza atari abize amashuri meshi ahubwo byagaragaye ko abafite ibindi bakora ari bo batanga akazi ku bize.

Agira ati “Kumva ko umuntu uzabaho neza ari uwize akarangiza za kaminuza ni ukwibeshya cyane kuko usanga ahubwo abakora imyuga baha akazi abo barangije kaminuza, imyuga igira amafaranga menshi cyane abantu bahindure imyumvire hanyuma Leta nayo ibashe kubashyigikira”.

Hari ibiganiro by’uko amashuri yose yatangira kujya yigisha imyuga

Guverineri Habitegeko avuga ko Minisiteri y’Uburezi mu Rwanda irimo kwiga uko abanyeshuri mu byiciro bigamo yaba amashuri abanza, ayisumbuye na za Kaminuza batangira kujya bigishwa n’imyuga kugira ngo babashe gukura bayikunze kandi nibarangiza amashuri abadakoze akandi kazi babe bagira icyo bimanrira kurusha kwirirwa bicaye.

Avuga ko hari ikibazo gikomeye aho usanga abanyeshuri barangiza amashuri yisumbuye na za Kaminuza bakicara bakamara igihe ntacyo bafite bakora kandi abize imyuga bo bari kwinjiza amafaranga akaba asanga ibyiza ari uko n’abize amashuri asanzwe bakongeraho n’umwuga kuko ntacyo utwaye.

Guverineri habitegeko asura ikigo cy’imyuga cy’urubyiruko cya Nyange

Agira ati “Hari ibiganiro birimo gukorwa kugira ngo amashuri asanzwe nayo abe yakwigisha imyuga ariko turanasaba n’abarangije ayo mashuri kongeraho n’umwuga kuko birababaje kubona umuntu arangiza kwiga agakubita imyaka itanu nta kintu afite cyo gukora kandi abize imyuga barimo kwinjiza amafaranga”.

Amashuri y’imyuga aracyari make ariko hariho gahunda yo kuyongera

Abana biga imyuga bahamya ko ibafitiye akamaro kuko ibarinda kwiyandarika, kwishora mu biyobyabwenge no kwirukira gushakisha ubuzima mu mijyi, kuko usanga ari ho benshi bakomora ingeso mbi zinashora urubyiruko mu busambanyi no gukoresha ibiyobyabwenge.

Umutoniwase Jeanne Gentille wacikirije amashuri mu cyiciro rusange cy’amashuri yisumbuye avuga ko yagiye mu mujyi wa Kigali gushakishirizayo ubuzima ariko nta nyungu yakuyemo ahitamo kugaruka iwabo mu Karere ka Ngororero.

Umutoniwase urimo kwiga imyuga mu kigo cy’urubyiruko cya Nyange avuga ko ubu amaze kumenya gusudira inzugi n’amadirishya kandi yatangiye kubona ibiraka bimubyarira amafaranga akaba asaba urubyiruko kwikuramo ko ubuzi bwiza babushakira mu mijyi, ahubwo abaturiye ibigo byigisha imyuga bakabigana.

Agira ati “Mu mujyi nakoreraga ibihumbi 15frw nkora akazi ko mu rugo, ukwezi kwashira bakayampa ariko nareba icyo nayakoresheje nkakibura, ariko maze kugaruka mu rugo nkiga imyuga nta kintu cyananira kugikora mu busuderi kandi ndabona ejo hanjye hazaba heza ndanabishishikariza abantu tungana kuza mu myuga”.

Umutoniwase amaze kumenya gusudira amadirishya n’inzugi

Yongereraho ko zimwe mu ngaruka zigaragara ku bakobwa bajya gushakira ubuzima mu mijyi ahanini ari ugutwara inda batateganyije, naho abahungu bakishora mu biyobyabwenge akaba asaba Leta gushyira imbaraga mu kongera ibigo byigisha imyuga kugira ngo abakwiyemeza guhinduka babone aho biga.

Akarere ka Ngororero kazongera ibigo by’imyuga kabifashijwemo n’abafatanyabikorwa

Ubuyobozi bw’Akarere ka Ngororero bugaragaza ko hari abafatanyabikorwa barimo n’umuryango mpuzamahanga wita ku iterambere (World Vision) ukomeje kubafasha kubaka ibigo by’imyuga birimo n’ikigo cya Nyange cyamaze gushyirwamo ibikoresho bifasha urubyiruko kwiga imyuga.

Icyo kigo kigizwe n’ibice bibiri byo kwigisha imyuga n’icyo gukora ibikoresho bijya ku isoko ku buryo bizafasha kubona amafaranga no gukomeza kubungabunga ibikoresho bahawe birimo n’imashini idasanzwe ikora imisumari.

Umuyobozi ushinzwe ibikorwa bya World Vision mu Rwanda, Ananias Sentozi, avuga ko gutera inkunga ibikorwa bitandukanye birimo no kwigisha imyuga urubyiruko biba bishingiye kuri gahunda za Leta bazakoreramo kandi bakaba bakomeje ubufatanye mu rwego rwo kurwanya ubukene.

Agira ati “Iki kigo twatanze gifite ibikoresho byose byuzuye bizatuma abakigaramo bahakura ubumenyi n’amafaranga ku buryo twizeye ko kizaramba bitandukanye n’ibiga byigisha gusa abazarangiza hano bo baba bari no gukorera amafaranga”.

Umuyobozi wa World Vission mu Rwanda ashyikiriza ikigo cy’imyuga cya Nyange umuyobozi w’Akarere ka Ngororero

Ikigo cy’Urubyiruko (YESS Center) cya Nyange cyatwaye asaga Miliyoni 130frw muri Ngororero, ariko hakaba hari n’ibindi bikorwa byatewe inkunga mu Ntara yose y’Iburengerazuba

Gahunda ya Leta yo kwigisha imyuga iteganya ko nibura buri murenge ukwiye kugira ikigo kigisha imyuga ariko inzira iracyari ndende, ubuyobozi bukaba bwizeza ko hariho gahunda yo kubyongera no gushishikariza urubyiruko n’abarangije amasomo kwiga imyuga.

Umuyobozi w’Akagari ka Bijyojyo, Hakizimana Thomas, ahasanzwe imirambo avuga ko batabasha gusobanukirwa uko byagenze kuko biragoye ko amazi yatwara abantu akabaruka bagifatanye kandi bazirikanyije udushumi duto.

Yemezako nta mvura yaguye kuri uwo munsi ku buryo byakwemezwa ko ari impantuka yabaye ikaba intandaro y’urupfu rwabo.

Kuri we yemeza ko batiyahuye akavuga ko hashoboka ibintu bibiri byaba byarateye urupfu rwabo.

Agira ati “Kimwe ni uko yaba ari bo biyahuye kubera ko amazi aho ari ntiyegereye inzira, kandi kuva ku muhanda ujya aho amazi ari harimo metero magana inani, twasanze baziritse amaboko, n’agakapu ku mukobwa kari iruhande rwabo. Ikindi cya kabiri gishoboka ni uko haba hari uwabishe akabanaga mu mazi”.

Rukwaya Israel, Umunyamabanga Nshingwabikorwa w’Umurenge wa Bwira ahavuka umwe muri ba nyakwigendera, avuga ko amakuru afite ari uko abo bombi, Mukarukundo Sandrine na Mbitsemunda Jean Baptiste, bari abakunzi biteguraga kuzabana.

Avuga ko Mukarukundo yaje gusura umukunzi we Mbitsemunda wari uje vuba avuye gushaka ubuzima kuko akora ibiraka bitandukanye muri Gisenyi n’ahandi, bityo aza kumuherekeza.

Uvuye mu Murenge wa Bwira werekeza mu Murenge wa Ndaro, uyu muyobozi avugako ari hagati y’ibirometero 15 na 20.

Avuga ko ubwo bageraga muri Ndaro, abababonye bemeza ko Mukarukundo yaherekeje umukunzi we Mbitsemunda ku manywa y’ihangu, noneho bukeye bwaho abaturage babasanga iruhande rw’urugomero rw’amashanyarazi rwa Nyabarongo ku ruhande hari agakapu k’umukobwa.

Ati “Ubusanzwe umuhungu yazaga rimwe na rimwe avuye i Kigali cyangwa i Gisenyi gushakisha imibereho akaza agasura ababyeyi akongera akagenda. Urupfu rwabo ntirusobanutse kuko imiryango yombi nta numwe uvuga ko hari ukutumvikana cyangwa uwo bagiranye nawe ikibazo ngo bamuhereho bakora iperereza. Ni yo mpamvu aba bombi batashyinguwe ahubwo RIB yahise ibatwara kugirango ikore iperereza ry’imbitse ku cyaba cyarateye urupfu rwaba bombi bivugwa ko bari bakiri bato kandi bakundana”.

Umuvugizi w’Urwego rw’igihugu rw’Ubugenzacyaha (RIB), Dr Murangira Thierry aganira n’umunyamakuru wa Kigai today, yemeje ko imibiri y’abo bombi yajyanywe mu kigo cy’igihugu gishinzwe isuzuma (Rwanda Forensic laboratory).

Murangira yavuze ko ibimenyetso by’ibanze byerekana ko Mukarukundo yari atwite. Ikindi ngo abo mu miryango bombi baturukamo bari barananiwe kwakira ko Mukarukundo atwite, ngo bikaba byaba ari yo ntandaro yo kuba na bo ubwabo barananiwe kubyakira bityo bagahitamo kwiyahura.

Ati “Twasanze baziritse, umuhungu yafunguye umushumi w’urukweto rw’iburyo rwa supuresi z’umweru yari yambaye maze azirika ukuboko kw’iburyo kwe ndetse n’ukwibumoso k’umukobwa”.

Avuga ko Mukarukundo na Mbitsemunda bahuriye mu mirimo bakorera i Rubavu aba ariho urukundo rwabo rutangirira. Tariki 4 Gicurasi 2021, ubwo Mukarukundo yisuzumishaga ni bwo yamenye ko atwite.

Dr Murangira asaba abaturage kutumva no kudakwirakwiza ibihuha kuko ari byo bikabiriza inkuru zitarizo, bagategereza ibiva mu isuzuma ry’abahanga.

Mukarukundo Sandrine avuka mu Karere ka Ngororero, Umurenge wa Ndaro, yatabarutse ku myaka makumyabiri (20) naho umukunzi we Mbitsemunda Jean Baptiste avuka mu Murenge wa Bwira atabaruka ku myaka makumyabiri n’itanu (25).

Hashize iminsi humvikana inkuru z’abantu biyahuye, rimwe na rimwe ko bababajwe n’abakunzi babo cyangwa bacanye inyuma. Kuri iyi nshuro babiri bakundanye bahisemo gupfana, biyahurira muri Nyabarongo.

Niyibizi yafatanywe udupfunyika dusaga 5,000 tw’urumogi

Umuvugizi wa Polisi mu Ntara y’Iburengerazuba, CIP Bonavanture Twizere Karekezi, yavuze ko uwo musore yafatiwe mu modoka itwara abagenzi yari ivuye mu Karere ka Nyabihu mu Murenge wa Mukamira.

Yagize ati “Abapolisi bakorera mu Karere ka Ngororero basanzwe bafite amakuru ko hari abantu bakunda kunyura muri kariya Karere bafite ibiyobyabwenge. Tariki ya 30 Mata 2021 mu gitondo barazindutse bakajya bahagarika buri modoka itambutse bakayisaka, bageze ku modoka yarimo Niyibizi batangiye gusaka abagenzi, Niyibizi yagize ubwoba babona avuyemo ariruka asigamo igikapu yari afite”.

CIP Karekezi yakomeje avuga ko Niyibizi amaze kwiruka abari batwaye imodoka bashatse abasore hafi aho baramukurikira baramufata baramugarura. Amaze kugaruka Niyibizi yemereye abapolisi ko urumogi ari urwe, ko yari aruvanye mu Karere ka Rubavu ku muturage witwa Nyirahabimana, akaba asanzwe arumuranguza, nk’uko bigaragara ku rubuga rwa Polisi y’igihugu.

Umuvugizi wa Polisi mu Ntara y’Iburengerazuba yakanguriye abaturage kugira uruhare mu kurwanya ibiyobyabwenge ariko cyane cyane abatwara abagenzi bakajya babanza kumenya ibyo abagenzi bafite.

Ati “Nka Polisi turakomeza ubukangurambaga mu baturage bwo kurwanya ibiyobyabwenge, tubasaba kujya batanga amakuru kandi bakayatangira ku gihe. Ibiyobyabwenge bikunze kuva mu gihugu cya Repubulika iharanira Demokarasi ya Congo bikinjirira mu Karere ka Rubavu, turasaba abatwara abagenzi mu modoka cyangwa za moto n’amagare kujya bashishoza ku bagenzi batwara kuko hari igihe bazajya bafatwa nk’abafatanyacyaha”.

Niyibizi ndetse n’urumogi yafatanwe yahise ashyikirizwa Urwego rushinzwe ubugenzacyaha (RIB) rukorera muri sitasiyo ya Polisi ya Kabaya kugira ngo hatangire iperereza.

Iteka rya minisitiri nº 001/moh/2019 ryo ku wa 04/03/2019 rigena urutonde rw’ibiyobyabwenge n’ibyiciro byabyo rishyira ikiyobyabwenge cy’urumogi mu biyobyabwenge bihambaye.

Itegeko nº68/2018 ryo ku wa 30/08/2018 riteganya ibyaha n’ibihano muri rusange, ingingo ya 263 ivuga ko Umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha.

Iyo abihamijwe n’urukiko ahanishwa igifungo cya burundu n’ihazabu y’amafaranga y’u Rwanda arenze miliyoni makumyabiri (20.000.000 FRW) ariko atarenze miliyoni mirongo itatu (30.000.000 FRW) ku byerekeye ibiyobyabwenge bihambaye.

Bakekwaho kwiba lisansi bakayicuruza binyuranyije n’amategeko

Abafashwe ni Hakuziyaremye Issa ufite imyaka 31 na Hakizimana Hassan ufite 35 y’amavuko bose bafatiwe mu Murenge wa Kabaya, mu Kagali ka Kabaya.

Umuvugizi wa Polisi mu Ntara y’Iburengerazuba, CIP Bonaventure Twizere Karekezi, yavuze ko abo bantu bafashwe nyuma y’amakuru yatanzwe n’abaturage.

Yagize ati “Abaturage batuye mu gasanteri ka Kabaya baduhaye amakuru bavuga ko batewe impungenge n’abantu bahacururiza lisansi mu buryo bunyuranyije n’amategeko, ku buryo ubwo bucuruzi bushobora kubateza ibibazo birimo inkongi y’umuriro”.

CIP Karekezi avuga ko nyuma yo gufata abo basore babiri byaje kugaragara ko iyo lisansi bayikuraga mu Karere ka Nyabihu ahari kubakwa imihanda, aho bayivomaga mu modoka ziri mu bikorwa byo kubaka iyo mihanda.

Hakuziyaremye na Hakizimana basanzwe bakora akazi k’ubukanishi bakaba bari banafite inzu bakoreramo ubucuruzi mu isanteri ya Kabaya.

CIP Karekezi yakanguriye abantu kwirinda ubucuruzi bw’ibikomoka kuri Peteroli kuko bishobora guteza ibibazo aho batuye ndetse no mu baturanyi babo.

Yagize ati “Ubucuruzi bw’ibikomoka kuri Peteroli bukozwe mu buryo bunyuranyije n’amategeko bushobora gutera ibyago bikomeye birimo inkongi y’umuriro igahitana ubuzima bw’abantu cyangwa bikangiza ibintu bitandukanye. Buriya umuntu ashobora kurasa umwambi ashaka kunywa itabi cyangwa umwana akahakubaganira akarasa umwambi ako kanya umwuka ugakurura icyo kibatsi cy’umuriro kikagera ahateretse amajerikani inkongi y’umuriro igatwika iyo nzu n’izindi zihegereye”.

Uwo muyobozi yibukije abatunze ibinyabiziga kwirinda kugura ibikomoka kuri Peteroli bigurishwa mu buryo butemewe kuko bishobora kubangiriza ibinyabiziga.

Yagize ati “Ibikomoka kuri Peteroli bicururizwa kuri sitayo zizwi, ariko lisansi nk’iriya yafatanwe bariya bantu akenshi usanga itujuje ubuziranenge kuko bashyiramo amazi cyangwa ibindi bintu byica umwimerere wayo bikaba byakwangiza ikinyabiziga”.

Yashimiye abaturage batanze amakuru kugira ngo bariya basore bafatwe, asaba n’abandi kujya bihutira gutanaga amakuru ku gihe y’abakora ubucuruzi nka buriya butemewe.

Hakuziyaremye na Hakizimana bashyikirijwe Urwego rw’Igihugu rw’Ubugenzacyaha (RIB) rukorera muri Sitasiyo ya Kabaya kugira ngo hakorwe iperereza.

Itegeko nº68/2018 ryo ku wa 30/08/2018 riteganya ibyaha n’ibihano muri rusange, Ingingo ya 166 ivuga ko umuntu wese uhamijwe n’urukiko icyaha cyo kwiba, ahanishwa igifungo kitari munsi y’umwaka umwe (1) ariko kitarenze imyaka ibiri (2), ihazabu y’Amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni ebyiri (2.000.000 FRW), imirimo y’inyungu rusange mu gihe cy’amezi atandatu (6) cyangwa kimwe gusa muri ibyo bihano.

Ibihano ku cyaha cyo kwiba byikuba kabiri (2) iyo uwibye yakoresheje guca icyuho, kurira cyangwa yakoresheje igikoresho icyo ari cyo cyose gifungura aho utemerewe kwinjira; Iyo kwiba byakozwe mu nzu ituwemo cyangwa isanzwe ibamo abantu cyangwa mu nyubako ziyikikije; Iyo kwiba byakozwe n’umukozi wa Leta yishingikirije imirimo ye cyangwa umuntu ushinzwe imirimo iyo ari yo yose ifitiye abaturage akamaro.
Hari kandi iyo uwakoze icyaha yiyitiriye izina cyangwa yitwaje ibimenyetso biranga umukozi wa Leta cyangwa by’umuntu ushinzwe umurimo rusange ufitiye abaturage akamaro abeshya ko yabitumwe n’urwego rwa Leta; Iyo kwiba byakozwe nijoro; Iyo kwiba byakozwe n’abantu barenze umwe.

Bizimungu yakoze urugomero rw’amashanyarazi acana iwe akanacanira abaturanyi

Uwo mugabo w’imyaka 47 akaba se w’abana babiri, ntabwo yagize amahirwe yo kugera mu ishuli, ntazi gusoma no kwandika, avuga ko kuba yarubatse urugomero yabyigiye ku rugendo yakoreye mu Karere ka Ngororero, akitegereza uburyo impuguke zakoze urugomero rutanga amashanyarazi, nk’uko yabitangarije ikinyamakuru The New Times.

Bizimungu avuga ko mu gace atuyemo mu kibaya cy’Umurenge wa Rongi bagiye basezeranywa guhabwa amashanyarazi kenshi ariko ntibayabone. Nyuma yo kuva mu Karere ka Ngorero yagarutse ashaka kugerageza ibyo yari yabonye bikorwa n’impuguke, ahera ku rugo rwe, bigenze neza aha amashanyarazi abaturanyi be.

Nyuma yo kubona ibikoresho byaturutse i Kigali, yakoze isumo rito ku mugezi uri mu gace avukamo, akora icyo bita ‘hydraulic turbine’ ihindura ingufu z’amazi mu mashanyarazi hifashijijwe moteri bigatanga amashanyarazi.

Uretse agace atuyemo yahaye amashanyarazi, imidugudu baturanye ya Gifurwe na Nyagasozi yo mu Kagari ka Karambo. Uwo mushinga utanga Kilowatt 12 ku isaha, wahinduye ubuzima bw’abagezweho n’ayo mashanyarazi.

Ibikoresho Bizimungu yifashisha mu gukora amashanyarazi

Buri rugo rwishyura amafaranga 1,000 ku kwezi, Bizimana avuga ko yashyizeho igiciro gito mu rwego rwo gufasha abaturanyi be, amafaranga bamwishyura yamufashije kubaka inzu, kugura isambu kandi yateje imbere ibikorwa bye by’ubuhinzi.

Mbere ya Covid19 yari amaze kugeza amashanyarazi ku miryango 60, akavuga ko yongerewe ubushobozi yifuza kugeza amashanyarazi ku miryango 300 mu gihe gito. Bizimungu avuga ko ahura n’imbogamizi nko kuba afite ubumenyi budahagije ku byo akora, ibikoresho bitujuje ubuziranenge n’ikibazo cy’imvura n’inkuba byangiza insinga aba yakoresheje.

Mvuyekure avuga ko yakubiswe n’abo bakorana nubwo bo babihakana

Nk’uko bivugwa na nyirabukwe wa Mvuyekure, Xavera Mukantwali, umukwe we ubusanzwe ngo akora akazi k’ubuzamu ku birombe kompanyi Seseco icukuramo amabuye y’agaciro, biherereye mu Kagari ka Bitabage mu Murenge wa Ndaro.

Mu ma saa tatu y’ijoro ryo ku wa 4 rishyira uwa 5 Gashyantare 2021, ngo ni bwo bamuhamagaye bamusaba kuzana amafaranga ibihumbi 477 yo kwishyura gasegereti umukwe we yari yibishije.

Ngo yababwiye ko ayo mafaranga atayabona, ni uko aza kumva umukobwa we wari wagiye kureba umugabo we ataka cyane avuga ko bamwiciye umugabo.

Icyo gihe ngo yari yakubiswe yagizwe intere, atanabasha kuvuga, baza kumenya ko kontabule w’iyo kompanyi hamwe n’uhagarariye inkeragutabara muri kariya gace ngo bari bamukubise.

Ngo bamusanze aho yari ari ku burinzi mu ma saa kumi n’ebyiri bamubaza niba azi gasegereti ababwira ko atayizi, hanyuma barayimwereka, ariko nyuma yaho bamujyana mu kirombe imbere bamukubitiramo, bavuga ngo agaragaze abibye gasegereti yabuze.

Ati "Bamuzirinze no mu kiziba bakajya bamukandagira, bakamubwira ngo nagikamye yifashishije ibizuru bye!"

Ngo baje no kumukura mu kirombe, bamugejeje hanze yacyo bamushyira ku ngoyi. Icyakora ngo bakiri mu kirombe yaje kugera aho yemera ko yibishije gasegereti yari yabuze, nk’uburyo bwo kugira ngo yoye gukomeza gukubitwa.

Umugore we ahageze muri iryo joro yasabye kompanyi kumufasha bakajya kumuvuza baramwihorera. Mu masaa tanu zo ku wa 5 Gashyantare 2020 ni bwo yagejejwe kwa muganga bikozwe n’umuryango we ngo kuko kompanyi yari yanze gutanga amafaranga y’abahetsi.

Ibyo Mukantwali avuga bishimangirwa n’umuturanyi, umwe mu bamuzanye kwa muganga, uvuga ko bamuzanye ari intere.

Ati "Ntiyabashaga guhagarara ku buryo byabaye ngombwa ko tumuterura, haba tujya kumushyira mu ngobyi, hanaba tumugejeje kwa muganga."

Uyu mugabo anavuga ko imyenda ye ngo n’ubwo yari itangiye kuma, hari aho yari ikijojoba amazi, kandi yariho n’umusenyi, ari na ho ahera yemeza ko yazirinzwe mu biziba byo mu kirombe.

Umuryango wa Mvuyekure urifuza ko kompanyi yabavuriza umuntu, hanyuma ibyo kureba ikibazo cy’ikubitwa rye n’ibindi bikazarebwa nyuma. Urifuza kandi ko hagaragazwa aho bamushyiriye radiyo yari afite, terefone n’inkweto yari yambaye, ngo hari n’imyenda yari afite babuze.

Icyakora, Bigishiro, ari nawe nyiri kompanyi Seseco, avuga ko nta wakubise uwo mugabo, ahubwo ko yigwanditse abonye ko atabona amafaranga yari ari kwishyuzwa, ati “Nta wamukubise, ari gushaka icyatuma atishyura ibyibwe".

Gusa, abaturanyi babiri twavuganye kuri terefone kimwe na Mukantwali, bavuga ko kontabule uyu asanzwe agira urugomo, akaba asanzwe akubita abantu by’amaherere.

Mukantwali ati “N’ejobundi hari mwisengeneza wacu yakubise, abonye agiye kumurega amwishyura 15,000”.

Umunyamabanga nshingwabokorwa w’Umurenge wa Ndaro, avuga ko muganga yitegereje Mvuyekure akabura ikigaragaza ko yakubiswe, ariko we akavuga ko ahanini bamunyukanyutse.

Ati "Muganga yavuze ko byashoboka ko yaba yanyukanyutswe, ariko ko ubundi nta kimenyetso cy’uko yakubiswe kiri ku mubiri we”.

Yaba Mvuyekure urega gukubitwa, yaba kompanyi Seseco irega kwibwa, bose bakiriwe na RIB, ikaba izikurikiranira iby’ibyo birego byombi.

Umuyobozi w’Akarere ka Ngororero Ndayambaje Godefroid avuga ko ubwo abo banyamabanga nshingwabikorwa bafatwaga hari hagamijwe gukurikiranwaho ibyaha bakekwagaho, naho gusimbuzwa abandi bikaba biteganywa n’amategeko.

Umuyobozi w’Akarere ka Ngororero yabwiye Kigali Today ku mugoroba wo ku wa Kane tariki 10 Ukuboza 2020 ko na we ataramenya amakuru neza y’irekurwa ry’abo banyamabanga nshingwabikorwa, ariko ko byose byakozwe mu butabera kandi abaturage bakwiye kumva ko ibyakozwe byaciye mu kuri k’ubutabera.

Agira ati “Nibwira ko byose byakozwe mu butabera bwuzuye, ntabwo ndamenya amakuru neza ariko ubutabera ni bwo buba bwakoze akazi kabwo, kuba barasimbujwe mu mirimo ntabwo umuntu ari kamara iyo adahari undi aba akora kandi byose amategeko arabiteganya”.

Yongeraho ati “Ubutabera burigenga nta wundi ukwiye kujya iruhande rw’ubutabera. Yaba kuba hari ababasimbuye amategeko arabiteganya kuko iyo umuntu adahari imirimo y’Abanyarwanda ntiyahagarara, naho kuba bazasubira mu kazi na byo hari icyo amategeko ateganya”.

Ubwo abo bayobozi bafungwagwa umuyobozi w’Akarere ka Ngororero yavuze ko umunyamabanga nshingwabikowa w’Umurenge wa Sovu akurikiranyweho kuba amafaranga yagombaga kubakira abaturage batishoboye basenyewe n’ibiza atarakoreshejwe icyo gikorwa.

Naho umunyamabanga nshingwbaikorwa w’Umurenge wa Kavumu akaba yari akurikiranyweho ibyaha birimo gutanga amasoko mu buryo bunyuranyije n’amategeko muri gahunda yo kubaka inyubako zitandukanye z’amashuri, aho abaturage batwaye amabuye n’umucanga ariko hakishyurwa rwiyemezamirimo.

Mu Murenge wa Bwira na ho hari hakurikiranwe umukozi ushinzwe imibereho myiza y’abaturage ukekwaho gukoresha nabi amafaranga yari agenewe gutera inkunga abakobwa babyariye iwabo, uwo we akaba yakomeje gukurikiranwa afunzwe mu gihe umunyamabanga nshingwabikorwa w’Umurenge yahagaritswe amezi atatu ku mirimo.

Ubuyobozi bw’akarere bwavuze ko nta kindi cyari kihishe inyuma y’ifungwa ry’abo bakozi barimo n’abanyamabanga nshingwabikorwa b’utugari twose two mu Murenge wa Sovu, ahubwo ko byakozwe mu rwego rwo kubazwa inshingano.

Umurwayi urembye bishobora kumugiraho ingaruka igihe yatinze kugezwa kwa muganga kubera ko imbangukiragutabara zitabasha kugera aho abarwayi bari

Abaturage bavuga ko kwifashisha izi ngobyi gakondo bibagiraho ingaruka nyinshi z’imvune ku baturuka kure, guheka nijoro bigoranye cyane igihe cy’imvura no kuba umurwayi urembye cyangwa umugore utwite ashobora no kugwa mu nzira kubera kubura ubutabazi bw’ibanze.

Mu masaha y’umugoroba ashyira saa moya, abaturage bavuye mu Murenge wa Sovu bakambuka mu Murenge wa Bwira binjira mu wa Gatumba ari wo urimo n’ibitaro bya Muhororo, abagabo n’abasore mu nkweto za bote bigaragara ko biteguye guhangana n’ubunyereri bahetse.

Inkweto ya bote ni itegeko ku muntu wese uri mu ishyirahamwe ry’abahetsi muri iyo mirenge, kugira ngo zibafashe kunyeranyereza birinda kuba batura hasi umurwayi uri mu ngobyi. Gusiba kujya guheka bicirwa amande.

Ubwo bwose bukaba ari uburyo bwashyizweho ngo abatuye muri iyo mirenge bahangane n’ikibazo cy’ubwigunge buterwa no kutagira imihanda myiza ibafasha kugeza abantu babo kwa muganga.

Ukuriye ishyirahamwe ry’abahetsi mu Kagari ka Musenyi mu Murenge wa Sovu, avuga ko nubwo hafashwe izo ngamba badahwema gusaba ko imihanda n’ibiraro byangijwe n’ibiza byasanwa kugira ngo imodoka zitwara abarwayi zibashe kubageraho.

Agira ati “Nk’ubu turagera ku bitaro bya muhororo hafi saa mbiri z’ijoro turaba dukoze nka kilometero 40, ni zo twongera gukora dusubira mu ngo ubwo turagerayo nka saa saba z’igicuku. Turifuza ko mwadukorera ubuvugizi ikiraro cya Satinsyi kigakorwa imbangukiragutabara zikaba zaza kuhafata abarwayi”.

Guheka nijoro ni ukwitwaza amatara kuko haba hatabona

Yongeraho ati “Ntabwo imbangukiragutaraba zishobora kutugeraho, yemwe ku Kigo Nderabuzima cya Gitega ntabwo yahagera kuko imihanda yarangiritse, iyo dusabye ko iza kutwakira umurwayi batubwira ko bitashoboka, bidusaba kuvunika cyane ngo tugeze umurwayi ku bitaro bya Muhororo. Imihahiranire n’imigenderanire na yo ntikibaho ku buryo bworoshye kuko nta modoka zikigera iwacu”.

Umuyobozi w’Akarere ka Ngororero Ndayambaje Godefroid, na we yemeza ko abatuye imirenge yo mu cyahoze ari Komini Ramba bari mu kaga ko kuba imihanda bifashishaga yarangijwe n’imvura nyinshi yibasira ibyo bice.

Ndayambaje avuga ko gusana amateme n’imihanda yangijwe n’imvura y’ibiza birenze ubushobozi bw’akarere kuko bisaba amafaranga menshi, ubu hakaba harakozwe ubuvugizi ngo Leta ishake uko yagoboka abaturage bari mu bwigunge.

Avuga ko nta modoka yagera muri iyo mirenge ku buryo bworoshye, yemwe n’iz’abayobozi biragoye n’izitwara ibicuruzwa, ibyo bikagira ingaruka ku musaruro w’abaturage kugera ku isoko no kugeza abarwayi kwa muganga.

Umuhanda uhuza Imirenge ya Bwira-Gashubi-Nyange n’umuhanda uhuza Kabaya-Muhanda na Kavumu uhinguka ahitwa Kazabe, n’umuhanda ugana mu Murenge wa Kageyo-Kavumu ukambuka mu Karere ka Rutsiro ni yo ifite ibibazo bikomeye kuko amafaranga yabuze ngo isanwe.

Hari ibiraro byatangiye gusanwa ngo abaturage bongere guhahirana ariko hari n’ibitarakorwa

Agira ati “Bariya baturage bigaragara ko bafite ibibazo natwe iyo tugiyeyo duhurirayo n’ibibazo bikomeye cyane, nta mafaranga turabona ngo tuyikore twasabye MINECOFIN ko yadufasha ngo ikorwe”.

Ndayambaje avuga ko imihanda isanwa ariko imiterere y’Akarere ka Ngororero y’imisozi ihanamye, umuhanda w’igitaka utamara imyaka ibiri utarangirika kandi bikaba bigoranye gukora kaburimbo kuko ari yo ikomeye yakemura ikibazo mu buryo burambye.

Avuga ko inyigo yamaze gukorwa akaba asaba abaturage kuba bihanganye ubwo buvugizi bugakorwa bakongera kuva mu bwigunge, mu gihe ibiraro byo ngo byashyizwe mu ngengo y’imari y’akarere byatangiye gukorwa.

Ndayambaje avuga ko gufungwa kwa bamwe mu bakozi b’imirenge ntaho bihuriye no kwiyamamaza

Ibyo biravugwa mu gihe hari bamwe mu bakozi b’imirenge n’abaturage bavuga ko gufungwa kw’abanyamabanga nshingwabikorwa b’Imirenge ya Sovu na Kavumu no guhagarikwa by’agateganyo ku munyambanga nshingwabikorwa w’Umurenge wa Bwira, bigamije kwikiza bamwe mu bashobora kubangamira ibikorwa bya Mayor Ndayambaje byo kuziyamamariza manda itaha.

Hashize icyumweru kirenga abanyamabanga Nshingwabikorwa babiri b’Imirenge ya Sovu na Kavumu batawe muri yombi n’Urwego rw’Ubugenzacyaha (RIB), bakurikiranyweho ibyaha bitandukanye, undi munyambanga nshingwabikorwa umwe arahagarikwa by’agateganyo.

Umuyobozi w’Akarere ka Ngororero Ndayambaje Godefroid, avuga ko mu Murenge wa Bwira hahagaritswe by’agateganyo umunyamabanga nshingwabikorwa w’umurenge, hagafungwa umukozi ushinzwe imibereho myiza y’abaturage.

Intandaro y’ikibazo ngo ni amafaranga asaga miliyoni 1,5frw yakoreshejwe nabi mu kugura ingurube zagombaga guhabwa abakobwa bari munsi y’imyaka 20 babyariye iwabo nk’umushinga wo kwiteza imbere.

Umunyambanga nshingwabikorwa akaba yarahanishijwe guhagarikwa amezi atatu ku kazi, naho umukozi w’umurenge ushinzwe imibereho myiza y’abaturage we akurikiranwa n’ubugenzacyaha ku cyaha cyo gukoresha nabi ayo mafaranga.

Mu Murenge wa Sovu ho ngo hari ikibazo cy’amafaranga yagombaga kubakira abaturage batishoboye abarirwa mu bihumbi 500frw atarakoreshejwe icyo gikorwa, bituma umunyamabanga nshingwabikorwa w’umurenge afatwa na RIB, ndetse n’umucungamutungo w’umurenge, n’abanyamabanga nshingwabikorwa b’utugari dutandatu barafungwa abandi bakajya batumizwa kubazwa.

Mu Murenge wa Kavumu ho ngo habaye ikibazo cy’uko hari amasoko yatanzwe mu buryo bunyuranyije n’amategeko muri gahunda yo kubaka inyubako zitandukanye z’amashuri, aho abaturage batwaye amabuye n’umucanga ariko hakishyurwa rwiyemezamirimo, ibyo byose ngo bikaba biri gukurikiranwa ngo harebwe ukuri kwabyo.

Agira ati “Turizera ko RIB mu bushishozi bwayo izagaragaza abagomba kubiryozwa n’abagomba kuba abere, byakozwe mu rwego rwo kubaza abayobozi ibyo bakora kandi buri wese agomba kujya abazwa ibyo akora, haba harimo amakosa akayahanirwa”.

Umuyobozi w’akarere Ndayambaje Godefroid avuga ko ntaho ahuriye no gufungwa kw’abo bakozi

Hari amakuru yagiye acicikana avuga ko gufungwa kw’abo bakozi bo mu mirenge ihana imbibi bose bakekwaho gukoresha nabi amafaranga kandi atari menshi, byaba ari amakosa yashakishijwe ngo abo bayobozi bafungwe, bityo amatora y’umuyobozi w’akarere azaba mu mwaka utaha azabe abashobora kuyabangamira baramaze kwigizwayo.

Kuri icyo kibazo, umuyobozi w’akarere avuga ko ntaho bihuriye n’ukuri kuko ibyabaye ari ibijyanye no kubazwa inshingano kandi ko umuyobozi wese azabazwa ibyo yakoze, cyane cyane igihe ibyo umuturage agenewe atabibonye umuyobozi abigizemo uruhare.

Agira ati “Nta gikuba gicitse kuko kubazwa inshingano ni ngombwa, ibyo bariya bantu bakurikiranyweho ntabwo ari ikibazo cya Mayor, igihe cyo kwiyamamaza ntikiragera kandi abo bantu ni RIB iri kubakurikirana. Ibyabaye ni ukubaza inshingano ntaho bihuriye na Mayor uwabivuga ni ibitekerezo bye”.

Agira ati “Igihe cyo kwiyamamaza ntikiragera, nta n’uzi icyo umuntu atekereza. Nibaba abere ntabwo bizaba bivuze ko mayor abifitemo uruhare kuko si bo ba mbere babajijwe, ntaho bihuriye n’ibyo abantu bavuga kuko nibabazwa bagasanga ibyabavuzweho atari byo ,bizaba ari amahirwe yo kuguha imbaraga zo kurushaho gukora neza”.

Kuba abayobozi bari gufatwa bagafungwa mu gihe byari bimenyerewe ko abakozi bagize intege nke bandika begura, Ndayambaje avuga ko nta kindi bisobanuye, kuko ntabwo byatinze kugaragazwa amakosa yabo kandi aho ikosa rigaragariye ari ho rikurikiranirwa.

Umuyobozi w’akarere avuga ko abakozi bafashwe n’abakurikiranyweho ibyaha byo gukoresha nabi ibigenewe abaturage nta yandi makosa bari basanzwe bazwiho yashimangira ibyo byaha, kandi ko n’ayaba yarabagaragayeho yaba yarakurikiranywe n’inzego bireba.

Mu butumwa bwanyujijwe kuri twitter, RIB yatangaje ko uwo Nikombabona ari mwene Bahindebya na Niyonzima Daphrose, wavutse tariki 10 Gicurasi 1984.

RIB ivuga ko uyu mugabo icyaha akekwaho yagikoreye mu Mudugudu wa Mitabo, Akagari ka Gaseke, mu Murenge wa Kabaya, ho mu Karere Ngororero, ku itariki ya 13 Mata 2020.

Uru rwego rwasabye abaturage ko uwamubona yatanga amakuru y’aho aherereye kuri Sitasiyo ya RIB cyangwa iya Polisi imwegereye, cyangwa se agahamagara ku murongo wa RIB utishyurwa 166, cyangwa Polisi 112.

Mu butumwa yanyujije kuri Twitter, RIB yavuze ko aba bose bakurikiranyweho icyaha cyo kunyereza umutungo, guhimba no gukoresha inyandiko mpimbano.

Abakekwa ubu bafungiye kuri RIB Ngororero, mu gihe iperereza rikomeje kugira ngo hakorwe dosiye ishyikirizwe Ubushinjacyaha.

Komiseri Kaliningondo ashyikiriza amabati umuturage wasenyewe n’ibiza

Umuyobozi mukuru wungirije wa RRA, Kaliningondo Jean-Louis, avuga ko ari mu rwego rwo gutabara abagezweho n’akaga mu bihe bitandukanye no gushishikariza Abanyarwanda kwitabira gusora neza kuko imisoro ari yo ivamo ibyo Leta yifashisha mu kubaka Igihugu.

Imiryango 2,247 mu Karere ka Ngororero yangirijwe n’ibiza mu mvura y’itumba iherutse kugwa, amazu amwe arasenyuka andi arasambuka ku buryo hari abacumbikiwe mu baturanyi no mu bigo by’amashuri.

Imiryango yihutiye kubakirwa ni iyo mu cyiciro cya mbere n’icya kabiri ku buryo imiryango 560 imaze gusakara, indi 696 na yo imaze guhabwa isakaro n’abafatanyabikorwa b’Akarere mu gihe imiryango igera ku 173 yo igishakirwa ibibanza.

Komiseri Kaliningondo ashyikiriza umuyobozi w’Akarere ka Ngororero inkunga ya miliyoni 25Frw

Umwe mu baturage bo mu cyiciro cya mbere cy’ubudehe ufite abantu icyenda wari ucumbikiwe mu baturanyi avuga ko uwari umucumbikiye yari amaze gusa nk’umurambirwa kuko na we inzu ye itabakwiraga ku buryo kubabana mu mvura bitari byoroshye.

Avuga ko yagerageje kongera kubaka akaba yari ageze igihe cyo gusakara ariko atabona aho yakura amabati agiye kumva yumva ngo bamutumyeho bamumenyesha ko azaza guhabwa amabati ibyishimo biramurenga.

Agira ati “Njyewe najyaga numva Rwanda Revenue Authority nkumva ko ari abantu bashinzwe gusoresha gusa ko akamaro kabo ari ukuza kudukuramo amafaranga ariko nsanze bagira urukundo burya ya misoro baka ifite akamaro kuko iyo idatangwa ntibaba babonye uko bamfashisha amabati”.

Mugenzi we wari ucumbikiwe mu kigo cy’amashuri avuga ko na we yafashijwe kubaka no kurokora inzu ariko atari azi aho ashobora gukura amabati, akaba ashimira ubuyobozi bukuru bw’Igihugu uko bureberera abaturage barimo n’abagwiriwe n’ibiza.

Agira ati “Inzu yanjye yaraguye banjyana mu ishuri kubamo n’abana batatu, nibaza uko nzasubira mu buzima busanzwe byaranyobeye kuko nyuma yo kunyubakira ntabwo nashoboye gusakara ubu ndashimira abayobozi baje kuntera inkunga y’amabati”.

Bahawe amabati akomeye basabwa kurushaho kwirinda ibiza

Umuyobozi w’Akarere ka Ngororero, Ndayambaje Godefroid, avuga ko hashyizweho amasite mu mirenge itandukanye azatuzwaho abasenyewe n’ibiza mu rwego rwo kwirinda ko amazu yubatswe yakongera gusenyuka.

Avuga ko abaturage bari kwibutswa kuzirika ibisenge muri iki gihe imvura yongeye kugwa naho abatarabona aho kuba bakaba bakomeje kubakirwa.

Komiseri mukuru wungirije muri RRA, Kaliningondo Jean-Louis, avuga ko ibikorwa byo gufasha bikorwa n’ikigo abereye umuyobozi byibanda cyane cyane mu kwegera abaturage bafite ibibazo byihariye kugira ngo babashe kumva ku byiza bya RRA.

Avuga ko RRA itagamije gusa gukusanya imisoro ahubwo ko n’abakozi bayo bashyizeho ikigega kibafasha ubwabo kandi kikanagera mu bandi baturage ari na ho inkunga batanze yavuye.

Agira ati “Dufite ikigega cyacu nk’abakozi kidufasha, izi miliyoni 25Frw twatanze zigizwe na 80% by’amafaranga y’ikigega cy’abakozi hanyuma n’Ikigo kikongeraho 20%, byose bigamije guteza imbere umuturage no kumwereka ko gusora ari byiza bifitiye abaturage akamaro”.

Kaliningondo avuga ko RRA idashinzwe gusa gukusanya imisoro ahubwo inita ku mibereho myiza y’abaturage

Minisiteri ishinzwe Ibikorwa by’Ubutabazi (MINEMA) itangaza ko abaturage basaga ibihumbi 17 ari bo basenyewe amazu mu biza biherutse kwibasira uturere dutandukanye. Muri bo abasaga ibihumbi birindwi bamaze kubakirwa, hakaba hari n’undi mushinga wo kubaka amacumbi asaga ibihumbi 11 muri uyu mwaka w’ingengo y’imari kugira ngo abasenyewe bose babone amacumbi.

MINEMA isaba abaturage gukomeza kwirinda no gukumira ibiza kuko gusana ibyangijwe bitera igihombo cyikubye inshuro zirindwi kwirinda, hakaba hari n’aho birenga cyane nko ku miryango iba yaratakarije abayo mu biza.

Ibigo 24 bikora ubucukuzi bw’amabuye y’agaciro muri Ngororero byabaye bihagaritswe by’agateganyo

Guhagarika by’agateganyo ibikorwa by’ubucukuzi bibaye nyuma y’uruzinduko rwa Minisitiri w’Ubutegetsi bw’Igihugu Prof Shyaka Anastase yagiriye mu Karere ka Ngororero mu byumweru bibiri bishize, agasiga agiriye inama ubuyobozi guca burundu ubucukuzi bw’amabuye y’agaciro bunyuranyije n’amategeko.

Ku itariki ya 30 Nzeri 2020 ni bwo Minisitiri w’Ubutegetsi bw’Igihugu Prof Anastase Shyaka, yasuye Akarere ka Ngororero agasaba gukora ibishoboka ngo ubucukuzi butemewe n’amategeko bucike burundu.

Umuyobozi w’Akarere ka Ngororero Ndayambaje Godefroid, avuga ko kuba mbere hose ubucukuzi butari bwarahagarikiye icyarimwe ibikorwa, bikaba byafatwa nko gukorera ku jisho, Ubuyobozi bw’akarere bugaragaza ko guhagarika by’agateganyo ubucukuzi ngo hakosorwe ibitanoze, bifitanye isano n’urwo ruzinduko rwa Minisitiri.

Icyakora ngo byuzuza inama yabagiriye kuko hari ibyo akarere kari karatangiye gukora, bityo ngo ntibivuze ko ari igitutu cy’inzego zo hejuru cyangwa gukorera ku jisho.

Agira ati “Ntabwo ari ugukorera ku jisho, kuko Minisitiri yadusuye umunsi umwe asanga hari ibyo twatangiye gukora atugira inama kuko ntabwo yazengurutse akarere kose areba ubucukuzi ngo tuvuge ko guhagarika byaba bitewe na we, icyakora inama yatugiriye na zo turi kuzikurikiza”.

Ku wa 13 Ukwakira 2020, na bwo Umunyamabanga Nshingwabikorwa w’Intara y’Iburengerazuba yayoboye inama yahuje abacukuzi bakorera mu Karere kose ka Ngororero, maze mu biganiro nyunguranabitekerezo hamwe na bo n’abayobozi b’akarere, bigaragara ko hari ibigo byinshi by’ubucukuzi bidakurikiza amategeko y’ubucukuzi, ari naho havuye umwanzuro wo kuba bahagaritse imirimo kugira ngo ibidakoze neza bikosoke.

Umuyobozi w’Akarere ka Ngororero (ibumoso), hamwe n’Umunyamabanga Nshingwabikorwa w’Intara y’Uburengerazuba

Bimwe mu byo abo bacukuzi bashinjwa muri rusange ni ukwangiza ibidukikije nk’imigezi 6 irimo n’uwa Sebeya, kutubahiriza uburenganzira bw’abakozi uko bikwiye, aho bigaragara ko hari abakozi batagira umwambaro w’akazi, ubwiyuhagiriro, urwambariro n’ubwiherero.

Uretse kwangiza ibidukikije, ubucukuzi batubahirije amabwiriza bukorerwa muri Ngororero byagaragaye ko bukurura imfu z’abantu, n’umutekano muke nk’urugomo.

Nyuma yo kurebera hamwe izo mbogamizi zibangamiye ubucukuzi, Umunyamabanga Nshingwabikorwa w’Intara y’Iburengerazuba n’abari bitabiriye inama, banzuye ko abacukuzi baba bahagaritse by’agateganyo ibikorwa byabo, hagashyirwaho itsinda rishinzwe kureba iyubahirizwa ry’amabwiriza agenga ubucukuzi, ritangira ubugenzuzi kuri uyu wa 15 Ukwakira 2020.

Hari abatishimiye umwanzuro wo guhagarika gucukura nta nteguza

Umwe mu bayobozi b’ibigo bicukura amabuye y’agaciro mu Karere ka Ngororero, avuga ko bitari bikwiye guhagarika ubucukuzi nta kubanza guteguza, kuko hari ibyo baba bashoye bigomba kugaruka vuba byatuma ishoramari ryabo rikomwa mu nkokora.

Hari abacukuzi bavuga ko batunguwe n’icyemezo cyo guhagarikwa by’agateganyo

Avuga ko bitabiriye inama batazi ibiri buvugirwemo bagatungurwa no gusabwa guhagarika ibikorwa kandi ibigo byose bidafite amakosa angana, agasaba ko nk’ufite amakosa make aramutse akosoye vuba ibyo asabwa yahita akomeza imirimo kugira ngo hatagira ibyangirika.

Avuga ko na we yemera ko mu bucukuzi hashobora kugaragara amakosa manini n’amatoya kandi akosorwa mu buryo butandukanye, ku buryo umwanzuro ukwiye kureba ikosa ku rindi kuko atangana, icyakora akanemera ko hari abacukuraga nabi bakwiye koko kwikosora.

Agira ati “Urabona nk’ubu tuba twarakodesheje imashini zibarwa ku munsi, n’ibindi bijyanye n’ubucukuzi birimo no kureshya abashoramari, ibaze nk’umushoramari aje agasanga urafunze uba ibihombeyemo, nkanjye barandega umukozi umwe ntanazi basanze utambaye umwenda w’akazi n’utundi dukosa duto nshobora kuba nakosora mu minsi ibiri gusa bampagaritse ibyumweru bibiri nasara”.

Abacukuzi bemeranya n’ubuyobozi ko niba kubahagarika by’agateganyo bigamije kumvisha abacukuzi ibyo basabwa nta kibazo kirimo, kuko hari abanyuranya n’amabwiriza, icyakora bagasaba ko bakomorerwa vuba kugira ngo hirindwe izindi ngaruka zirimo no kwigabiza ibirombe byaba bifunze bikaba byakurura imfu za hato na hato no kurushaho kongera ikibazo cy’abacukura mu kajagari.

Abuzuza ibisabwa barahita bakomorerwa

Umuyobozi w’Akarere ka Ngororero Ndayambaje Godefroid, avuga ko imyanzuro yafashwe irimo no kuba bahagaritse by’igihe gito ibikorwa by’ubucukuzi byafashweho umwanzuro abitabiriye inama bose babigizemo uruhare, ku buryo nta karengane kuri bamwe kabayeho.

Ndayambaje avuga ko abacukuzi ubwabo bisabiye kuba bahagaritse ibikorwa byabo ngo bakosore ibitanoze, kandi ko ababyihutisha bakomorerwa vuba mu gihe abo bigaragara ko bafite amakosa akomeye bo bishobora kubafata igihe.

Agira ati “Twashyizeho itsinda rishinzwe kugenzura amakosa kuri buri kigo cy’ubucukuzi, n’ejo mu gitondo uwaba yujuje ibisabwa yakosoye amakosa ye, iryo tsinda riramusura akomeze imirimo ye, kereka abo bigaragara ko bafite amakosa asaba gukosora igihe”.

Ku kijyanye no kwirinda amakosa agaragara mu bucukuzi butemewe kubera ibirombe bifunze, Ndayambaje avuga ko ikigo gishinzwe ubucukuzi (RMB) kiri gusuzuma uko ibirombe byafunzwe kubera kubura ibyangombwa ku bari babihawe, byahabwa abandi abaturage bagakomeza kubona akazi.

Akarere ka Ngororero kagaragaramo ibigo 24 bicukura amabuye y’agaciro mu mirenge 13 yose ikagize, ubuyobozi bw’Intara y’Iburengerazuba bukaba bwasabye abacukuzi kurushaho gukora bubahiriza amabwiriza arimo no gushishikariza abakozi kwishyura ubwiteganyirize muri Ejo Heza, no kubungabunga uburenganzira bw’umukozi.

Minisitiri Shyaka yasabye abayobozi kutijandika mu bucukuzi butemewe

Ibyo yabitangaje kuri uyu wa Gatatu tariki 30 Nzeri 2020, ubwo yatangiraga uruzinduko rw’akazi rw’iminsi ibiri mu Ntara y’Uburengerazuba.

Ku ikubitiro yahereye mu Karere ka Ngororero, aho yaganiriye n’abayobozi mu nzego z’ibanze bahagarariye abandi kuva ku rwego rw’Amasibo kuzamura, bo mu Mirenge ya Gatumba, Muhororo na Ndaro, abayobozi b’imirenge 13 igize Akarere, abakozi b’akarere, abikorera, imiryango itari iya Leta n’abandi bavuga rikumvikana.

Kimwe mu bibazo bivugwa muri aka Karere ni icy’abayobozi bijandika mu bucukuzi bw’amabuye y’agaciro butemewe, icuruzwa ry’inzoga z’inkorano n’ibindi.

Aganira n’aba bayobozi, Minisitiri Shyaka yihanganishije abaturage b’aka karere bashegeshwe n’ibiza, ndetse asaba abayobozi gushyira imbaraga mu gukemura ibibazo bikibangamiye imibereho y’abaturage birimo n’ibyasizwe n’ibiza.

Yagize ati “Umuyobozi agomba kuba umusemburo w’ibyiza no kuzamura imyumvire, agasigasira ubumwe n’umutekano w’igihugu n’abagituye. Ibyo umuyobozi ubishyira imbere kandi akabyigisha abaturage bakabyumva aba ari muzima”.

Minisitiri Shyaka yabasabye aba bayobozi kandi guharanira guha serivisi nziza abaturage mu nzego zose bayobora, bibanda cyane ku gukemura ibibazo by’abaturage hakiri kare, gukemura amakimbirane yo mu ngo, kwibutsa abaturage guhingira igihe, n’ibindi biza byiyongera kuri serivisi zo guha ibyangombwa abaturage.

Ku kibazo cy’abayobozi bijandika mu bucukuzi bw’akajagari ndetse n’ibindi byaha byo kunyereza umutungo ugenewe abaturage, Minisitiri Shyaka yagize ati “Mwirinde kurya akatagabuye no gukora mu bya rubanda.

Iyo umuyobozi agize akaboko karekare gakora mu bigenewe rubanda agatwara iyo sima, ibyo bikoresho byo kubaka amashuri, akijandika mu bucukuzi bw’akajagari, mu mafaranga agenewe abatishoboye,… uwo muyobozi ntaba agifite urumuri (rumurikira abo ayobora), mubireke n’uwumvaga yashyugumbwaga afashe hasi”.

Minisitiri Shyaka yasabye aba aba bayobozi gukomeza gusigasira ubumwe, umutekano, ibidukikije, no gushyira imbaraga muri gahunda zo kurwanya ibiza, ndetse no gukomeza gushyira imbaraga mu iyubahirizwa ry’amabwiriza yo kwirinda COVID-19.

Akarere ka Ngororero ni kamwe mu turere mu Rwanda turimo ibirombe byinshi by’amabuye y’agaciro, binatuma abaturage bijandika mu bucukuzi bw’akajagari ari benshi, ndetse bikanabagiraho ingaruka kuko ari kenshi humvikana inkuru z’abo ibyo birombe byagwiriye.

Abaturage bagerageje kuzimya ariko biba iby’ubusa

Hategekimana afite imyaka 52. Atuye mu Mudugudu wa Murambi, Akagari ka Nsibo, Umurenge wa Nyange. Avuga ko yazindukiye mu murima, yahindukira azaniye inka ubwatsi agasanga inzu iri gucumba umwotsi, yakwinjira agasanga icyumba cyabagamo ibintu by’agaciro byo mu rugo kiri gutokombera.

Yatabaje abaturanyi baramutabara baranazimya, ariko urebye ngo nta cyari mu nzu na kimwe babashije kuramira, yaba imyenda ndetse n’ibikoresho bindi byo mu nzu harimo imifariso n’ibindi biryamirwa.

Agira ati “Uretse inka na yo yari mu rugo, ubu nta kintu dusigaranye. Nta mwenda nsigaranye keretse uteye ibiremo nari najyanye guhinga. Imyenda y’umugore n’iy’umwana wigaga mu mashuri yisumbuye n’iy’uwari urangije kwiga, yose yahiye”.

Akomeza avuga ko muri iyi nzu hahiriyemo n’amafaranga arenga ibihumbi 600, harimo ibihumbi 330 umukwe wabo yari yabazaniye ngo bazamufashe kugura isambu, ibihumbi 200 Hategekimana yakuye mu nka yagurishije akaba yateganyaga kuzakoraho akongerera umukwe we akamugurira umurima ugaragara, ndetse n’ibihumbi 70 abana bari bakoreye.

Ati “Amafaranga y’umukwe ni yo ambabaje kurusha. Umugore wanjye yashatse kwiroha mu muriro ngo ajye kuyashaka, iyo hataba abantu ngo bamufate sinzi uko ibintu biba bimeze”.

Hategekimana ngo yanatinye guhamagara umukwe kuri telefone ngo amubwire ibyabaye, kuko atekereza ko no kwiyahura yakwiyahura. Ngo arateganya kumutumaho akabimubwira imbona nkubone. Impamvu ni ukubera ko urebye yari yagurishije ibyo afite harimo n’amategura y’inzu yari asanzwe atuyemo kugira ngo abashe kugura isambu hariya mu Ngororero.

Ubundi ayo mafaranga ngo ntiyari yayajyanye kuri Sacco kuko yateganyaga kugura umurima w’umukwe muri iki cyumweru.

Ku bijyanye n’imvano y’inkongi, Hategekimana avuga ko ishobora kuba ari amashanyarazi kuko nta muntu yasize mu rugo, kandi ngo ako bakandaho bacana itara kari gafite umugaga nijoro, banakagoragoje ngo bacane karabananira, bageze aho gucana barabyihorera.

Umuyobozi wa REG mu Karere ka Ngororero, Christophe Niyotwizera, avuga ko iyi nkongi ishobora kuba yaturutse ku guhura kw’insinga nabi ndetse no kwangirika kw’agakoresho bakandaho bacana cyangwa bazimya umuriro.

Bityo, Hategekimana ngo akibona iki kibazo yagombye kuba yitabaje abazi iby’amashanyarazi bakamurebera ibitagenda neza, yababura agahamagara REG ku murongo 2727 utishyurwa bakamugira inama ku cyakorwa.

Asaba kandi abakoresha amashanyarazi kwitwararika mu kuyashyira mu nzu, bagashaka ababibakorera babizi neza ndetse bakifashisha ibikoresho bikomeye kandi bifite ubuziranenge.

Ikarita y’u Rwanda igaragaza aho Akarere ka Ngororero (mu ibara ry’umutuku) gaherereye

Umunyamabanga Nshingwabikorwa w’Umurenge wa Matyazo Tuyishime Dieudonné avuga ko Batumika yashyikirijwe (RIB) ngo akurikiranweho amakosa yakoze yarenze ku mabwiriza yo kwirinda COVID-19 agasinda, ndetse agasagarira abaturage, kandi akaba azisobanura mu rwego rw’akazi nk’uko bikorwa mu mabwiriza agenga abakozi.

Umuyobozi w’Umurenge wa Matyazo avuga ko ku itariki ya 02 Nzeri 2020, Batumika Théogène atigeze agera mu nama itangiza akazi ku murenge kuko yari yanyuze ahubakwa ibyumba by’amashuri mu Kagari ka Rwamiko ari na ho yakoreye ibyo akurikiranyweho.

Ibyo binagaragazwa n’itangazo ry’Akarere ka Ngororero ryashyizwe ku rubuga rwa Twitter rw’Akarere rigaragaza ko Batumika Théogène yasinze ku manywa y’ihangu agasagarira abubakaga kuri ayo mashuri kandi akabikora yarenze ku mabwiriza yo kwirinda COVID-19.

Umuyobozi w’Umurenge wa Matyazo avuga ko uwo mukozi iyo anyura kuri ibyo byumba byubakwa akitwara neza nta kibazo yari kugira cyakora ngo kuko atari ko byagenze inzego zibishinzwe zizabimubaza hamwe n’inzego z’ubuyobozi.

Avuga ko Batumika yanabwiye umukobwa wubakishaga kuri ayo mashuri amagambo mabi yo kumusesereza akagira ihungabana akarira, ibyo na byo bikaba bidakwiye umurezi uyobora abandi, naho ku kigiye gukurikira ngo inzego zirimo kumukoraho iperereza ni zo zizabigaragaza.

Agira ati, “Birababaje kuba ushinzwe uburezi ari we ugaragara mu bikorwa nk’ibyo byo gutesha agaciro abaturage bari mu kazi kabo kugera n’aho asesereza umwe mu bubakishaga akarira, kandi yari akwiye kubabera urugero”.

Ku bijyanye n’imyitwarire isanzwe kuri uwo mukozi, Tuyishime avuga ko Batumika yari asanzwe ari umukozi mwiza ku kazi ariko unakora amakosa ku buryo yanaganirijwe kandi akagirwa inama bikanga ari na yo mpamvu hafashwe ingamba zo kumushyikiriza izindi nzego.

Agira ati, “Si ubwa mbere byari bibaye ahubwo asanzwe yaranagiriwe inama kuko hari andi makosa agenda akora mu kazi, afitanye isano n’ibyo yakoze tuzabimubaza mu rwego rw’abakozi, ariko n’inzego zibishinzwe zizamukurikiranaho amakosa yakoze”.

Umunyamabanga Nshingwabikorwa w’Umurenge wa Matyazo avuga ko abayobozi bakwiye gufata iya mbere bakaba intangarugero mu kwirinda Coronavirus kugira ngo abaturage babone abo bareberaho bityo na bo babashe kwitwararika.

Ni ubwicanyi bwabereye mu Mudugudu wa Mbandari, Akagari ka Gaseke, Umurenge wa Kabaya mu Karere ka Ngororero.

Polisi mu Karere ka Ngororero itangaza ko ubwicanyi bwabaye mu ijoro ryo kuwa 29 Nyakanga 2020 mu masaha y’ijoro, mu rugo rwa Burasanzwe Jean Pierre ufite imyaka 41.

Amakuru yamenyekanye nyuma y’uko Burasanzwe Jean Pierre mu masaha y’ijoro ubwo yari yagiye gushaka ibiryo by’amatungo, yagarutse agasanga umugore we Mukamunana Donatha ufite imyaka 37 n’abana be babiri be; Byoseniyo Joseline ufite imyaka ibiri n’igice na Uwayezu Nyirimuhwe Valence ufite umwaka umwe bishwe, ndetse umubyeyi wakubiswe ishoka mu mumusaya ikimurimo nifuni yakubiswe abana ikibari iruhande.

Abaturanyi ba Burasanzwe bavuga ko hakekwa Bikorimana Ignas ufite imyaka 17, akaba ari umwana wo muri uru rugo, bivugwa ko asanganywe uburwayi bwo mu mutwe, uwo mubyeyi wishwe akaba yari amubereye mukase.

Bikorimana ukekwaho icyaha abaturanyi n’ubuyobozi bamusanze muri parafo aho yari yihishe.

Akimana Nzayirwanda Olive, umuyobozi w’Akagari ka Gaseke avuga ko baketse uyu mwana kubera ko bamushatse bakamubura nyuma bamusanga yihishe bamujya kuri RIB.

Ati “Uriya muhungu twamuketse kuko twahageze twamushaka tukamubura nyuma tukamubona mu gisenge tumujyana kuri RIB.

Ubusanzwe afite uburwayi bwo mu mutwe ndetse ntavuga, gusa dutekereza ko RIB ifite ubushobozi bwo kugenzura icyabaye. Ubu imirambo y’abishwe yajyanywe ku bitaro”.

Akimana avuga ko ubwicanyi bwari buherutse kuba mu wundi Mudugudu witwa Nyamweru muri aka Kagari aho umugabo yishe umugore arangije na we ariyahura.

Bari batuye mu Karere ka Ngororero (kari mu ibara ry’umutuku)

Inzego z’ubuyobozi muri uwo murenge zivuga ko icyo kibazo cyamenyekanye ku mugoroba wo ku wa gatatu tariki 17 Kamena 2020, nyuma y’aho ababyeyi b’umuhungu batangiye amakuru bamaze gufungura inzu y’abo bapfuye.

Abapfuye ni Dusengumuremyi Amos wari ufite imyaka 26 na Mukamuyumbu Vestine wari ufite imyaka 28, bakaba nta mwana bari bafite.

Umunyamabanga Nshingwabikorwa w’Umurenge wa Kabaya, Ndayisenga Simon, yemeje ayo makuru ndetse anasobanura iby’icyo kibazo.

Agira ati “Bari barashakanye byemewe n’amategeko muri Gashyantare uyu mwaka, babaga mu nzu bonyine. Ejo inzu yabo yiriwe ikinze, se w’umuhungu agira amatsiko kuko yabonaga inzu ikingiye imbere nta muntu ukoma, baca idirishya hajyamo umwana arakingura barinjira, bagezemo basanga mu cyumba bararagamo harimo umugore yapfuye n’ishoka iruhande rwe, n’umugabo mu kindi cyumba amanitse mu mugozi yapfuye”.

Uwo muyobozi avuga kandi ko urwo rupfu bikekwa ko rwaba rushamikiye ku makimbirane abo bapfuye bari baherutse kugirana.

Ati “Ababyeyi babo batubwiye ko mu byumweru bitatu bishize bari bagiye kubahuza kuko hari ikibazo bari bagiranye. Ngo hari umusore wahamagaye uwo mugore wapfuye amubaza niba yararongowe undi amusubiza ko atararongorwa, amusaba ko bahura. Umugabo ngo byaramurakaje biteza amakimbirane mu rugo, tugakeka ko byaba bifitanye isano n’urwo rupfu”.

Ati “Ikigaragara ni uko umugabo yishe umugore kuko n’aho yari amanitse, ku maboko ye hari hariho amaraso. Umugore bigaragara ko yakubiswe ishoka mu musaya”.

Ndayisenga avuga ko imirambo yahise ijyanwa ku bitaro bya Kabaya kugira ngo ikorerwe isuzuma bityo hagaragare ukuri ku cyishe abo bantu bambi.

Akomeza asaba abaturage kugira umuco wo gutanga amakuru ku gihe niba bazi ingo zirimo amakimbirane ashobora kuba yavamo urupfu, bityo ku bufatanye n’ubuyobozi ibyo bibazo bibe byakumirwa, akanihanganisha imiryango y’abo bitabye Imana.

Umuvugizi w’Urwego rw’Ubugenzacyaha (RIB), Marie Michelle Umuhoza, avuga ko amakuru y’urwo rupfu bayamenye kandi ko hari ibirimo gukorwa.

Ati “Ayo makuru RIB yayamenye ku buryo ubu harimo gukorwa iperereza. Imirambo yoherejwe ku bitaro kugira ngo hakorwe ‘autopsie’ bityo hamenyekane icyishe abo bantu”.

Umuhoza yagize akandi ubutumwa agenera abaturage.
Ati “Ubutumwa duha abaturage ni uko bamenya ibyaha, bakabisobanukirwa, bakabyirinda bakabirinda n’abandi, n’aho bibonetse bagatanga amakuru kare kugira ngo ababigizemo uruhare bagezwe imbere y’ubutabera”.

1) I KAVUMU JENOSIDE YAKORANYWE UBUKANA BUKOMEYE

Kavumu yari imwe muri Segiteri zari zigize Komini Ramba, muri Perefegitura ya Gisenyi, hakaba ri hamwe mu hantu hari hatuwe n’Abatutsi benshi muri Gisenyi. Amateka ya Kavumu atwereka ko ari agace karanzwemo ibikorwa byo guhohotera no kwica Abatutsi guhera muri za 1959 bamwe barahunga abatishwe babaho mu buzima bubi. Jenoside yakorewe Abatutsi muri 1994 yarimbuye Abatutsi hafi bose bo muri ako gace; hari abiciwe mu nsengero no mu mazu ya za Komini Ramba na Gaseke.

Iyicwa ry’Abatutsi n’ubukana Jenoside yakozwemo bigaragazwa no kuba mu rwibutso rwa Kavumu haruhukiye imibiri ibihumbi makumyabiri na bine n’ijana na mirongo inani n’umunani yashoboye kuboneka (24,188). Hari n’imibiri itaraboneka itabye ahantu hatandukanye hatazwi kandi byarabaye ku manywa. Urugero ni ukuba imibiri y’abitwa Kamanzi na Biraro yarabonetse nyuma y’imyaka 24.

Muri 1994, Komini Ramba yayoborwaga na Burugumesitiri KARASIRA Leonard wari uwo mu ishyaka rya MRND. KARASIRA yafatanyaga na superefe wa superefegitura ya Ngororero, BAZIMAZIKI Bernardin yari ihuje Komini Satinskyi, Ramba na Kibirira. Interahamwe ni zo zagaragaraga cyane mu bwicanyi, ni nazo zari nyinshi muri Ngororero, ariko zafatanyaga n’Impuzamugambi za CDR kandi bakambara imyambaro imwe bajya kwica Abatutsi.

Mu Batutsi bishwe harimo umuryango wa Kabirigi bishwe n’abaturanyi babo, umuryango wa Binama, uwa Munyakayanza isidore wari umwarimu, Ntiyamira Leonard n’umuryango we, umuryango wa Kagaragu, Mudahangarwa, Gatsimbanyi, Rutayisire, Sebagaramba, Uwiringiyimana, Nshimiyimana, Nsengiyumva, Nyamugira, Ndamage, Kayitsinga, Zaninkwano, Gatari, Nyiraromba, Bukamba, Uwonkunda Annonciata, Kamirindi, Furere n’abana be babiri, Kayibanda Mathieu, Murengerantwari n’abandi.

Hari n’abandi bo mu muryango umwe wa Dativa Uwamwiza bagera kuri makumyabiri babanje gushyingurwa mu mva iri hafi yo ku mukore wa Rwabugiri ariko muri 2018 imibiri yimuriwe mu rwibutso rwa Kibirira.

Urwibutso rwa Kavumu rurimo imibiri y’abatutsi 374, ariko sibo bahiciwe gusa, ahubwo abandi bagiye bashyingurwa mu zindi nzibutso haba Ngororero, Kabaya cyangwa Kibirira.

Interahamwe n’Impuzamugambi zarafatanyije mu bwicanyi bwose zakoreye muri Ramba cyane cyane muri segiteri Sovu na Bayi, zikuriwe n’uwitwa BARAKOMERA ariko zunganirwa n’izaturutse muri za Komini Gaseke na Satinskyi.

Interahamwe nyinshi ni izaturukaga mu Ngororero zikuriwe na KABALIRA Telesphore wari umugenzuzi w’amashuri akaba yari anakuriye interahamwe zo muri Komini Satinskyi, naho umugore we witwaga MUKARUZIGA Eugenie akaba visi perezidante wa CDR muri Satinskyi. ari naho hari icyicaro cya superefegitura Ngororero.

Uwitwa MBARUSHIMANA Bonaventure wari umucuruzi akaba na Perezida wa MRND mu rwego rwa segiteri Mucano, yagize uruhare runini mu kwicisha Abatutsi ahantu hatandukanye kubera ko yatangaga imodoka ye igatwara Interahamwe n’Impuzamugambi zabaga zigiye kwica.

Indi nterahamwe yakoze Jenoside ku buryo bukomeye mu Ngororero ni uwitwaga NYANDWI Jean Claude wari umwarimu ku mashuri abanza ya Kavumu muri Komini Ramba.

2) ABANA BABYAWE N’ABAGORE B’ABAHUTUKAZI BASHATSE ABAGABO B’ABATUTSI BISHWE NABI NYUMA Y’ABANDI BATUTSI

Mu muco wa Kinyarwanda wakurikizwaga muri 1994, umwana yafataga ubwoko bwa Se umubyara bukaba aribwo bwandikwa mu ndangamuntu y’umwana ugejeje ku bukure. Bivuze ko iyo umugabo w’Umututsi yashakaga umugore w’Umuhutukazi, abana babyaraga bafataga ubwoko bw’Abatutsi. Iyo umugabo w’Umuhutu yashakaga umugore w’Umututsikazi, abana babyaraga bafataga indangamuntu y’ubwoko bw’Abahutu. Niyo mpamvu, muri Jenoside abana babyawe n’abagabo b’Abatutsi bababyaranye n’abagore b’Abahutukazi bafatwaga kimwe n’Abatutsi, ndetse bakicwa kimwe, bajijijwe amaraso ya ba Se.

Ku wa 8 Kamena 1994, Interahamwe za MRND zifatanyije n’Impuzamugambi za CDR zari zaramaze kwica Abatutsi harimo benshi b’abagabo bashakanye n’Abahutukazi, zaranasenye amazu bari batuyemo. Interahamwe zishe Abatutsi mu ntangiriro ya Mata 1994, hanyuma zifata abana b’abagabo b’Abatutsi bishwe barabyaranye n’Abahutukazi zibashyira mu nzu imwe, zibarindisha abo bagore. Ariko kugira ngo Interahamwe zizere ko abo bagore badacika, zahasize izindi Nterahamwe zizajya zibacunga. Bari abana 13 barimo abato n’impinja.

Ku itariki ya 8 Kamena 1994, Interahamwe zaraje zica abana hashobora kurokoka akana kamwe gusa. Interahamwe zabishe nabi cyane kuko bamwe zabajugunye mu cyobo zari zacukuye zikabarenzaho igitaka ari bazima, noneho ba nyina b’Abahutukazi, Interahamwe zibategeka gusubira iwabo.

UMWANZURO

Ngororero yayoborwaga cyane n’ishyaka rya MRND kandi hari n’ingoro y’iryo shyaka ku nyubako y’iyari superefegitura Ngororero. Niyo mpamvu Interahamwe n’abayobozi bazikuriye kuva kuri Superefe kugera kuri ba Konseye bari biganje cyane mu bayoboye ubwicanyi bwa Jenoside yakorewe Abatutsi.

Kigali, 08 Kamena 2020

Dr BIZIMANA Jean Damascène
Umunyamabanga Nshingwabikorwa
Komisiyo y’Igihugu yo Kurwanya Jenoside, CNLG

Ku kiraro cya Satinsyi

Muri aba bantu bishwe n’ibiza, harimo abantu icyenda bo mu Karere ka Ngororero mu Ntara y’Uburengerazuba.

Muri ako karere kandi, imiryango isaga 700 yimuwe mu manegeka ahashobora gushyira ubuzima bwayo mu kaga.

Ubuyobozi bw’Akarere ka Ngororero butangaza ko kugeza ku mugoroba wo ku wa 07 Gicurasi 2020, hafi Akarere kose katari nyabagendwa, kuko imihanda ihuza imirenge irindwi na yo yangiritse bikomeye, mu gihe Sitade ya Ngororero na yo yatwawe n’inkangu ikomeye.

Mu masaha ya saa sita zo ku wa Kane tariki 07 Gicurasi 2020, Minisiteri ishinzwe ibikorwa by’ubutabazi MINEMA yatangazaga ko abantu batanu ari bo babarurwaga ko bahitanwe n’imvura nyinshi ikangiza amazu n’ibikorwa remezo muri Ngororero, mu gihe mu gihugu hose bari 65.

Umuyobozi wungirije ushinzwe iterambere ry’ubukungu mu Karere ka Ngororero, Patrique Uwihoreye, yabibwiye Kigali Today ko imibare yaje kwiyongera ku gicamunsi kubera abandi bane baje guhitanwa n’ibiza mu Murenge wa Kavumu.

Imihanda yatengutse

Agira ati “Ubu turaye tubuze abantu icyenda mu Murenge wa Matyazo aho umubyeyi yahungishije abana babiri ku muturanyi, yagaruka agasanga abandi batatu inkangu irabahitanye. Mu Murenge wa Kavumu na ho ni uko byagenze inkangu yavuye nko muri kilometero ebyiri ihitana inzu zigwamo bane”.

Uwihoreye avuga kandi ko imiryango myinshi y’abaturage yaraye icumbikiwe mu baturanyi no mu bigo by’amashuri, kuko hari ubwoba bw’uko inzu zyabo zabagwaho, by’umwihariko abo mu mirenge yo mu gice cy’amajyaruguru y’akarere.

Inkangu zaguye mu mihanda

Agira ati “Ibiraro bihuza imirenge umunani byatwawe n’imigezi n’inkangu, imihanda yangiritse ku buryo ubu nta mbangukiragutabara yabasha no gutabara abaturage ku bigo nderabuzima byo muri iyo mirenge, nta n’umuganga wabasha kujya kubafasha kuko nta nzira yabona, mbese akarere gasa nk’akacitsemo kabiri”.

Uwihoreya avuga kandi ko Sitade ya Ngororero yarengewe n’inkangu yaturutse ruguru yayo, inzu umunani zari ku muhanda wa kaburimbo zikaba na zo zasenyutse, umuhanda wa kaburimbo Ngororero-Mukamira ukaba utari nyabagendwa kuko harimo inkangu nyinshi cyane.

Agira ati “Iyo Sitade ya Ngororero yuzuye vuba yagiye yose, kugeza ubu umuhanda wa kaburimbo nturi nyabagendwa kuko kuva Ngororero ugera ku Kabaya harimo nk’inkangu zirenga 20 harimo imashini ya Horizon ariko ntabwo iri kubasha gukemura ikibazo vuba”.

Inkangu muri Kaburimbo

Umuyobozi wungirije w’Akarere ka Ngororero ushinzwe iterambere ry’ubukungu avuga ko hakenewe ubutabazi bwihuse ngo abaturage badahura n’ibibazo bikomeye by’ubuzima, kuko ubu nta modoka yabagezaho n’ubwo butabazi hakaba hakenewe kubakwa byihutirwa amateme yacitse no gusana imihanda.

Avuga ko ubuyobozi bw’akarere bukomeje gufasha abaturage kuva mu manegeka kugira ngo hatagira abagwirwa n’inzu ariko ko n’ubundi bigoye kubona aho kubashyira kuko akarere kose gasa nk’akari mu manegeka.

Ubuyobozi bw’Akarere ka Ngororero butabaza Minisiteri zitandukanye ngo zifashe mu gusana ibikorwa remezo by’imihanda akarere kakongera kugenderanira kugira ngo n’abatabarwa babone uko bagerwaho.

Amakuru atangazwa n’Akarere ka Ngororero, agaragaza ko inzu zisaga 300 ari zo zaraye zisenyutse, mu gihe imiryango hafi ibihumbi 10 ituye mu manegeka. Imiryango 2,100 ni yo ituye mu manegeka akabije, naho imiryango 1,001 ni yo imaze kwimurwa mu gihe imiryango isaga 700 yamaze kwimurirwa mu bigo by’amashuri no mu baturanyi.

Ikigo cy’Igihugu gishinzwe Ubumenyi bw’Ikirere (Meteo Rwanda), gitangaza ko muri uku kwezi kwa Gicurasi, hagati ya tariki ya 01 n’iya 10 hateganyijwemo imvura nyinshi, ibarirwa hagati ya milimetero 90-120 muri Kigali, Intara y’Amajyaruguru n’Uturere twa Rubavu, Nyabihu, Rutsiro, Ngororero, Muhanga na Ruhango.

Inkuru bijyanye

https://www.kigalitoday.com/amakuru/amakuru-mu-rwanda/article/amafoto-video-ibiza-byahitanye-abantu-26-mu-turere-twa-gakenke-musanze-na-nyabihu

https://www.kigalitoday.com/amakuru/amakuru-mu-rwanda/article/muhanga-ibiza-byahitanye-abantu-icyenda-abandi-umunani-barakomereka

https://www.kigalitoday.com/amakuru/amakuru-mu-rwanda/Inkangu-n-imyuzure-byahitanye-abantu-65

https://www.kigalitoday.com/amakuru/amakuru-mu-rwanda/article/rubavu-imvura-nyinshi-yaguye-yatumye-umugezi-wa-sebeya-wangiza-byinshi

Iyo nkangu yabereye i Nyange muri Ngororero, bituma umuhanda Muhanga - Ngororero - Karongi udakomeza kuba nyabagendwa.

Polisi yagiriye inama abifuza kujya muri ibyo bice ko bakoresha umuhanda Muhanga- Huye- Nyamagabe-Nyamasheke-Rusizi na Rutsiro-Rubavu-Kigali.

Polisi kandi yasabye abakoresha uwo muhanda waguyemo inkangu kwihanganira izo mbogamizi mu gihe imirimo yo gutunganya uwo muhanda irimo gukorwa.

Mwaramutse,

Turabamenyesha ko kubera imvura nyinshi yaguye mu ijoro ryakeye inkangu yaguye ahitwa Nyange, umuhanda Muhanga - Ngororero - Karongi ntabwo ari nyabagendwa. pic.twitter.com/uleLiUTve3

— Rwanda National Police (@Rwandapolice) April 29, 2020

Umuhanda Muhanga-Ngororero-Karongi uhuye n’ikibazo nyuma y’uko undi na wo uva i Muhanga ugaca mu Ngororero werekeza i Mukamira mu gitondo cy’ejo ku wa Kabiri tariki 28 Mata 2020 Polisi yari yatangaje ko uwo muhanda utari nyabagendwa kubera imvura yari yaguye nijoro, amazi y’umugezi wa Nyabarongo agafunga umuhanda Muhanga-Ngororero-Mukamira.

Imvura nyinshi ituma umugezi wa Nyabarongo wuzura, amazi akagera mu muhanda akabangamira ingendo

Mu masaha akuze yo ku munsi w’ejo ku wa kabiri, Polisi yatangaje ko uwo muhanda Muhanga-Ngororero-Mukamira wongeye kuba nyabagendwa.

Icyakora imvura yazindutse igwa kuri uyu wa gatatu hafi mu gihugu hose, yongeye kubangamira ingendo muri uwo muhanda, na wo Polisi ikaba yatangaje ko wongeye gufungwa, igira abantu inama yo gukoresha umuhanda Kigali-Musanze-Rubavu.

Mwiriwe,

Turabamenyesha ko kubera imvura nyinshi yaguye mu ijoro ryakeye, amazi y'umugezi wa Nyabarongo yafunze umuhanda Muhanga-Ngororero-Mukamira ubu ukaba utari nyabagendwa.
1/2 pic.twitter.com/iplwcStziV

— Rwanda National Police (@Rwandapolice) April 29, 2020

Inkangu yagwiriye inzu umugore n’umugabo bahasiga ubuzima mu gihe nyamara ngo bari barimuwe aha hantu ariko bakahagaruka

Kigali Today ivugana n’Umunyamabanga Nshingwabikorwa w’Umurenge wa Gatumba Nzabamwita Jean Marie Vianney, yavuze ko Ntahontuye Thacien w’imyaka 62 n’umugore we Uzanyiminani Pelagia w’imyaka 60 bari batuye mu mudugudu wa Mpara bahitanwa n’inkangu yatewe n’imvura yaguye.

Yagize ati “Imvura yaguye baryamye, inkangu iraza ihitana inzu bahita bahasiga ubuzima.”

Ubuyobozi bw’Umurenge wa Gatumba buvuga ko Ntahontuye Thacien mu kwezi k’Ukuboza muri 2019 yari yakuwe aho yari atuye kuko hari mu manegeka, acumbikishirizwa ku mudugudu, ibyo bikaba ari nako byagenze no ku muhungu we.

Icyakora Ntahontuye Thacien ngo yajyaga asubira kuba aho yimuwe akavuga ko atasiga urutoki rwe ndetse agarura n’inka kuko ari ho hari ubwatsi kugeza yongeye kuhatura.

Umunyamabanga Nshingwabikorwa w’Umurenge wa Gatumba, Nzabamwita Jean Marie Vianney, avuga ko ubu bagiye gushyira imbaraga mu gusaba abatarimuka mu manegeka kuhava, birinda ko bahura n’ibiza.

Abo baturage bo mu Kagari ka Gaseke mu Murenge wa Kabaya bafashwe n’ubuyobozi bw’akagari mu masaha ya saa yine z’ijoro banywera inzoga mu kabari tariki ya 6 Mata 2020, ibyo bakoraga bikaba bitandukanye n’amabwiriza yashyizweho na Leta y’u Rwanda mu rwego rwo gukumira icyorezo cya COVID-19.

Umunyamabanga Nshingwabikorwa w’Akagari ka Gaseke Akimana Nzayirwanda Olive yatangarije Kigali Today ko abayobozi babatahuye ubwo bari mu igenzura.

Yagize ati “Twabimenye ubwo twari mu igenzura, ubwo twageraga kwa Sibomana, dusanga abantu mu gikoni banywa inzoga kuko yari asanzwe ari umucuruzi w’akabari mbere y’iki cyorezo. Icyo twabonye ni uko banyweraga mu kabari, batwikanga bakajya kwihisha mu gikoni. Twahise tubajyana ku murenge ni ho bazacirirwa amande.”

Umunyamabanga Nshingwabikorwa w’Umurenge wa Kabaya, Ndayisenga Simon, yatangarije Kigali Today ko abafashwe ubu bashyizwe mu kigo ngororamuco mu Murenge wa Kabaya.

Ati “Kubera ko bafashwe nijoro bugacya dutangiza Icyunamo, bajyanywe mu kigo ngororamuco ariko bazacibwa amande ubundi baganirizwe batahe.”

Aba baturage bafatiwe mu Mudugudu wa Mitabo ni Havugamenshi Theogene ufite imyaka 53 na Uwera Marie Grace w’imyaka 27 bazira kunywera inzoga mu kabari ka Sibomana Dominique w’imyaka 30, binyuranye n’amabwiriza yo kurwanya COVID-19.

Mu Karere ka Ngororero haherutse gufatirwa undi muntu wakoze ubukwe yakira abantu mu gihe cyo gukumira icyorezo cya Coronavirus.

Abaturage bagabana amatungo nyuma yo kwizigamira

Ni ibikorwa bashoboye kugeraho mu myaka irindwi bafashijwe n’itorero Presbyteriénne mu Rwanda n’umushinga Hope International, bifasha abaturage 3011. Abo baturage bashoboye kwibumbira mu matsinda 205 bakusanya miliyoni 26 bazikoresha mu kugurizanya mu bikorwa byo kwiteza imbere.

Kigali Today yasuye aba baturage bavuga ko bahereye ku busa kuko bari mu cyiciro cya mbere cy’ubudehe kandi n’imyumvire yabo iri hasi. Icyakora bumviye abafashamyumvire babagiriye inama bashobora kubona impinduka.

Umugore wari utuye mu nzu kwa nyirabukwe witwa Nambajimana Alphonsine avuga ko atari afite ubushobozi bwo kwishyira hamwe n’abandi kuko ntacyo yari afite cyo guheraho.

Agira ati; “Niberaga mu nzu kwa mabukwe, ntafite imibereho, ariko umufashamyumvire yaratwegereye atubwira ko dushobora kujya dushyira hamwe ibiceri, ubikeneye akabiguza akabikoresha ikintu akatwungukira. Uko iminsi yagiye yiyongera inyungu n’ubwizigame byariyongereye bituma tugira ubuzima.”

Nambajimana avuga ko mu myaka irindwi ari mu matsinda yashoboye kwiyubakira inzu yo guturamo, agira itungo n’isambu, akavuga ko atari kubigeraho iyo atagana amatsinda.

Undi mubyeyi witwa Ntamunoza Valeria ufite imyaka 60, avuga ko yari umupfakazi utuye mu manegeka kandi utishoboye ariko amatsinda yashoboye kumuhindurira ubuzima.

Agira ati; “Kwizigamira ni byiza, nitabiriye amatsinda ntacyo mfite, ariko uko twizigamira umwaka warangiye baduha itungo ry’inka, iyi nka yankoreye ibitangaza kuko naje kuyigurisha nshobora kwimuka njya gutura ku mudugudu, amafaranga asigaye nguramo akanyana na ko karankundira karoroka.”

Ntamunoza avuga ko itsinda ryatumye ashobora kwishyurira abana Kaminuza ndetse umwe agiye kurangiza Ikiganga.

Ati “Umwana wanjye nta kibazo yigeze agira, ubu ageze mu mwaka wa gatanu ikiganga, uko yagiraga ikibazo naganaga amatsinda akanguriza nkakemura ikibazo nkishyura ubuzima bukomeza kugenda neza.”

Umunyamabanga Nshingwabikorwa w’Umurenge wa Sovu, Harerimana Adrien, avuga ko ibikorwa by’amatsinda bifasha abaturage kwiteza imbere ndetse gahunda za Leta zikagerwaho byihuse.

Yagize ati “Iyi gahunda iradufasha kuko abibumbiye mu matsinda ntibatinda gutanga ubwisungane mu kwivuza, abana babo bitabira kujya ku ishuri, kandi bibarinda kwaya bakiteza imbere n’umurenge ugatera imbere.”

Harerimana avuga ko hari ayandi matsinda akorera mu murenge ayobora ariko ngo ntayashoboye gukora neza nk’afashwa n’itorero Presbyteriénne.

Kwizigamira byatumye abaturage bashobora kubona amatungo

Bagirumuremyi Jean Claude, umwe mu bafashamyumvire wafashije abaturage kugera ku byo bagezeho, avuga ko amatsinda yatumye abaturage bihangira umuhanda w’ibirometero 3 kandi bafite gahunda yo kwigurira imodoka.

Ati “Amatsinda yaradufashije kuko abari mu cyiciro cya mbere bashoboye kwivana mu bukene, bagura amatungo, abandi bagura matora zo kuryamaho, abaguze amashanyarazi y’imirasire y’izuba ndetse kubera ikibazo cy’umuhanda abadusuraga baburaga inzira twahanze umuhanda.”

Bagirumuremyi avuga ko uyu muhanda wahanzwe bagiye kuwubyaza umusaruro mu kwihutisha ubuhahirane n’indi mirenge.

Ati “Turifuza gukoresha ubwizigame dufite tukigurira imodoka itwoherereza ibicuruzwa bivuye kure kuko bitugeraho bihenze ibindi ntitubibone. Mbere tutarakora umuhanda abaturage bambukaga umugezi wa Satinsyi wakuzura bakagwamo cyangwa bakarara inzira, ubu turifuza ko imodoka itwegereza ibicuruzwa natwe tukageza ku isoko ibyera iwacu.”

Musore Félix, umuhuzabikorwa w’amatsinda yo kubitsa no kugurizanya mu rurembo rwa Ramba mu itorero Presbyteriénne mu Rwanda, avuga ko mu myaka irindwi abaturage bibumbiye mu matsinda bashoboye kwiyubaka mu bukungu, bakusanya amafaranga 26,440,000 bayakoresha mu kugurizanya.

Musore avuga ko kwihuriza mu matsinda byatumye abitabiriye amatsinda batozwa gusenga no kugira imico myiza ari byo bigira uruhare ko ugurijwe atambura itsinda, ndetse bigatuma imiryango ishobora kubana neza nta makimbirane, ndetse kwihuriza mu matsinda byatumye abari bafite amakimbirane biyunga.

Banki Nkuru y’Igihugu (BNR) igaragaza ko mu mwaka wa 2019 ubwizigame bwazamutse aho muri Sacco bwavuye kuri 21% muri 2012 bugera kuri 27% kugera muri 2016. Kubitsa kuri telefoni bizwi nka Mobile Money byari 17%, naho mu bimina biva kuri 40% muri 2012 bigera kuri 54% muri 2016, mu gihe ubwizigame mu miryango bwavuye kuri 20% bugera kuri 25% muri 2016.

Banki y’igihugu igaragaza ko muri 2016 ubwizigame muri banki bwari kuri 13% buvuye kuri 14% muri 2012, naho ubwizigame butari ubwa banki bwari 45% buvuye kuri 25% mu gihe kuzigama mu rugo byari 35% muri 2016 bivuye kuri 24% muri 2012.

BNR ikomeza igaragaza ko Abanyarwanda bagenda bitabira kuzigama kuko umubare w’abantu bakuru batazigama muri 2012 bari 29% naho muri 2016 bari bageze kuri 14%.

Umuvunyi mukuru asaba ko abaturage bishyurwa ibyabo byangijwe

Ibyo bikorwa birimo ibyo gukora imihanda no kubaka imiyoboboro y’amashanyarazi, ari na byo Umuvunyi mukuru Anastase Murekezi aheraho asaba Ikigo cy’igihugu gishinzwe ingufu REG n’ikigo cy’igihugu gishinzwe ubwikorezi RTDA kwihutira kwishyura abaturage ibyabo byangijwe.

Abaturage bangirijwe imitungo bavuga ko hashize imyaka 10 ibyabo byangijwe ariko bagahora bishyuza amaso akaba yaraheze mu kirere.

Musare Pierre Celestin utuye mu Kagari ka Matare avuga ko umuhanda Gisayo-Satinsyi ari wo wamwangirije imitungo bamwe bakishyurwa we ntayabone aho yishyuza asaga ibihumbi 400frw.

Avuga ko hashize imyaka 10 afunguje konti muri Banki ya Kigali (BK), ategereza ko amafaranga azajyaho araheba yiyambaza inzego zitandukanye ariko birananirana ku buryo ubu yizeye gusa Urwego rw’Umuvunyi ngo rube ari rwo rumurenganura.

Agira ati, “Iyo mirima yacu yanyuzemo umuhanda ni yo twahingaga ikadutunga, ubu dufite ikibazo gikomeye cy’inzara”.

Abangirijwe ibyabo bizeye Umuvunyi mukuru ngo abarenganure

Ntamategero Bernard na we avuga ko yishyuza asaga ibihumbi 200Frw kubera imitungo ye yangijwe n’ikorwa ry’umuhanda, akaba amaze imyaka 10 na we asiragira ariko amafaranga ye akaba yarabuze.

Agira ati, “Ibaze gutegereza imyaka 10 amafaranga wagombye kuba ari yo agutunga ugaheba, ubu twaje ngo tubaze umuvunyi mukuru niba tuzayabona cyangwa ntayo duteze tubimenye tudakomeje no gukomeza gusiragira ntacyo duteze”.

Umuyobozi w’Akarere ka Ngororero Ndayambaje Godefroid avuga ko ibyatumye abaturage batishyurwa ari amakosa y’ubuyobozi butabakurikiraniye ikibazo uko bikwiye, cyakora ngo akarere katangiye inzira yo kwishyura abo baturage.

Agira ati, “Ubuyobozi bwakoze amakosa kuko butakurikiranye ikibazo cy’abaturage ku gihe, byatumye aho tubimenyeye twegera abangirijwe ibyabo dusanga bigera muri miliyoni 200, ubu twatangiye kubishyura make make tumaze kubaha miliyoni 120, abasigaye na bo tuzakomeza tubishyure”.

Ndayambaje avuga ko kutishyura abaturage byatewe n’amakosa y’abayobozi

Ati “Ubundi umuturage yakangirijwe imitungo yabanje guhabwa indishyi ikwiye ariko abayobozi ntabwo ariko babigenje mbere, gusa uyu munsi birakorwa neza usibye bariya bahuye n’ikibazo mbere”.

Umuvunyi mukuru Anastase Murekezi avuga ko abaturage badakwiye kwangirizwa imitungo batarahabwa inyishyu ikwiye kuko bigira ingaruka ku mibereho yabo kabone n’ubwo ibikorwa byegerejwe abaturage byari bizanye iterambere rusange.

Agira ati, “Ibikorwa by’iterambere byangije iby’abaturage ariko twafashe umwanzuro ko REG na RTDA bashaka uko babona amafaranga bakishyura abaturage bitarenze ukwezi kwa Nyakanga hamaze kuvugururwa ingengo y’imari”.

“Aboneka azishyura abaturage ariko turanakomeza kuganira n’Akarere ka Ngororero uko gakomeza gushaka amafaranga ku buryo umwaka w’ingengo y’imari wa 2020/2021 uzarangira abaturage bose bishyuwe”.

Umuvunyi mukuru arasoza urugendo rw’icyumweru mu Karere ka Ngororero amaze kuzenguruka imirenge yose muri gahunda y’icyumweru cyo gukemura ibibazo by’akarengane na ruswa akaba asaba abaturage kwirinda kwigomeka ku myanzuro y’inkiko igihe bazi neza ko nta karengane karimo kugira ngo birinde ibindi bihombo bakurizamo.

Ivuriro riciriritse rya Gatumba, ni rimwe mu mavuriro afite abahakoze batishyuwe

Abahoze bakorera ayo mavuriro ashamikiye ku bigo nderabuzima, bavuga ko hari amezi agera muri atanu batigeze bahemberwa kandi babaza akarere kagasubiza ko amafaranga ahari ariko bakibaza impamvu batayabona.

Mu kwezi k’Ukuboza 2019 nibwo abahoze bakorera amavuriro aciriritse yitwa (Poste de Santé) mu Karere ka Ngororero batangiye gushyira hanze ikibazo cyabo bashinjaga akarere kubarangarana ku mafaranga bakoreye batishyurwa kandi ahari.

Icyo gihe Kigali Today yavuganye ku murongo wa telefone n’umukozi w’Akarere ushinzwe ubuzima maze avuga ko mbere y’uko Inama y’Igihugu y’Umushyikirano iba, ba nyiri amafaranga bazaba bayabonye kuko na we yavugaga ko ahari.

Yagize ati “Rwose amafaranga arahari si ugushakisha n’ubu mvuye mu nama kandi ikibazo cyageze muri Komite nyobozi, rwose iki cyumweru yenda kirangire babonye amafaranga yabo mbere y’uko umushyikirano uba”.

Nyuma y’uko kubasezeranya amafaranga, kubishyura byarakomeje biranga maze abakoreye ayo mavuriro mato bongera kugaragaza ibibazo bafite bibangamiye imiryango yabo kandi barakoze n’amafaranga yo kubahemba akaba ahari bakibaza ikibitera.

Umwe mu batashatse ko amazina ye atangazwa yavuze ko bahuye n’ibibazo birimo kuba abana batiga, kandi barakomeje kwizezwa kwishyurwa ariko ntibikorwe, kuko ngo habuze Umunyamabanga Nshingwabikorwa w’Akarere unafite dosiye yabo ari na we bakekaho kuyitinza”.

Mu gushaka kumenya icyo ubuyobozi bw’Akarere ka Ngororero butekereza kuri iki kibazo, Kigali Today yavuganye ku murongo wa telefoni n’Umuyobozi w’Akarere ka Ngororero Ndayambaje Godefroid na we ntiyahakana ko amafaranga adahari ahubwo ko ikibazo cyabaye uburyo bagomba kwishyuramo abo bakozi bidateje ikindi kibazo.

Agira ati, “Amafaranga arahari nibihangane uku kwezi kwa Mutarama ntikuzashira batishyuwe kuko nyuma yo kwegurira amavuriro abikorera byasabye ko tubanza kumenya buri mushahara umukozi azahembwa none byamaze kugera aho bigomba kugezwa, bazabona amafaranga vuba”.

Nta mubare Akarere kagaragaza kazahemba aba bahoze bakorera amavuriro mato mbere y’uko yegurirwa abikorera, cyakora ngo arabarirwa muri miliyoni zisaga eshanu ku bagomba kwishyurwa bose.

Abakoreye amavuriro aciriritse ubusanzwe bahemberwaga abarwayi bakiriye maze amafaranga yabo akazava mu kigo cy’igihugu cy’ubwishingizi RSSB agasohokera ku turere akoreramo, ari nako byagenze, ariko nyuma y’uko ayo mavuriro yeguriwe abikorera ntibongera guhembwa.

Abakora muri ibi bitaro ngo bari mu bukene butewe no kuba hashize amezi icyenda badahabwa agahimbazamusyi kazwi nka PBF

Abakozi b’ibi bitaro baganiriye na Kigali Today ntibifuje ko amazina yabo atangazwa. Bavuga ko kumara icyo gihe cyose batabona agahimbazamusyi bikomeje kubadindiza, kubaca intege, bigatuma n’imitangire ya serivisi batayinoza.

Umwe muri bo yagize ati “Biradukenesheje cyane, kuba duheruka agahimbazamusyi mu kwezi kwa kabiri (muri Gashyantare), ubu turi kubara amezi icyenda tutarayishyurwa. Ingaruka ni nyinshi, kuko umushahara tuba duhembwa uba udahagije, icyakabaye kitugoboka ni ako gahimbazamusyi bataduha, tubifata nk’akarengane kuko tuba twashoye amaboko n’ubumenyi mu kuzuza inshingano ariko ibyakabaye biturengera ntitubibone”.

Yongeraho ko ibi bituma bakora akazi batanyuzwe kuko baba bahangayikishijwe n’imibereho yaho.

Ati “Benshi muri twe twafashe inguzanyo mu ma banki, abandi bibasaba gukora urugendo bava cyangwa bajya ku kazi, wanahagera kwakira umurwayi nawe ubwawe hari ibibazo usize mu rugo bikaba ikibazo; kutabona aya mafaranga urumva ko bitubereye imbogamizi zituma ibyo byose tutabihuza uko bikwiye mu gihe nyacyo”.

Miliyoni zisaga 145 z’amafaranga y’u Rwanda ni wo mwenda ibi bitaro bya Kabaya bibereyemo abakozi n’abaganga babyo.

Umuyobozi wabyo Dr. Ntirenganya Emmanuel, ahamya ko kutabonera igihe aya mafaranga y’agahimbazamusyi azwi nka PBF (Performance Basic Financing), biterwa no kuba hari amafaranga ikigo RSSB kigenera ibi bitaro ataraboneka kugeza ubu.

Yagize ati “Ni byo koko amafaranga y’agahimbazamusyi bamaze amezi icyenda batayabona, ni amafaranga aboneka ari uko twishyuwe n’ikigo RSSB. Haba hari ibintu byinshi kandi byihutirwa ibitaro bikeneye gutangaho amafaranga kugira ngo bikomeze gutanga serivisi birimo farumasi, esansi, isuku n’ibindi.

Iyo ibitaro bigiye kureba ayo byinjiza duhitamo kubanza gukemura ibyo by’ibanze twirinze kongeraho n’ayabakozi kuko ataboneka. Dutegereje ko umwenda RSSB ibereyemo ibitaro wishyurwa tukabona gukemura ikibazo cy’abakozi”.

Abajijwe niba hari uburyo bwakorwa kugira ngo hishyurwe amafaranga yose y’umwenda ibi bitaro bibereyemo abakozi babyo, uyu muyobozi yavuze ko ari ibintu bigoranye kuba byakorwa, icyakora avuga ko bemeranyijwe n’abakozi ko mu gihe ibitaro byajya bibona amafaranga make make, byazajya bigerageza kubishyura nibura ukwezi kumwe cyangwa abiri kugeza ubwo uwo mwenda uzarangira.

Yagize ati “Dukomeje gukora ubuvugizi muri Minisiteri y’Ubuzima n’ikigo RSSB kugira ngo harebwe uko nibura amafaranga y’agahimbazamusyi gahabwa buri mukozi yajya abonekera igihe. Twizeye neza ko iki kibazo kitazatinda gukemuka”.

Ibitaro bya Kabaya bifite abakozi barenga 120. Abo mu cyiciro cy’abadogiteri baba bashobora guhabwa amafaranga ashobobora kurenga ibihumbi 200 buri umwe ku kwezi, bitewe n’uko yitwaye mu kazi, mu gihe abari ku rwego rwa A1 na A0 baba bari hagati y’amafaranga ibihumbi 60 n’110 buri kwezi, akaba ari ayiyongera ku mushahara wa buri mukozi cyangwa umuganga.

Muri ibi biganiro, Minisitiri Prof. Shyaka yaganiriye n’abayobozi ku nzego zitandukanye zigize ubuzima bw’akarere bagera kuri 419. yabasabye gukora bidasanzwe kuko ari byo bitanga umusaruro mu buryo budasanzwe.

Minisitiri Prof. Shyaka yagize “Uburyo budasanzwe nibwo gisubizo, nibwo butanga ibisubizo byihuse by’ibibazo dufite kandi ibibazo byose ntitukabirebere ku karere, ahubwo tujye tubimanura nk’iby’abana bata amashuri, isuku nke n’ibindi ni ibibazo abayobozi b’Imidugudu n’Utugari bakemura.”

Ngororero nk’Akarere kegereye Rubavu n’utundi turere duhana imbibe n’igihugu cya Repubulika iharanira Demokarasi ya Congo cyagaragayemo Ebola, Minisitiri Shyaka yakanguriye abaturage bako kurushaho kubahiriza ingamba zo kwirinda no gukumira Ebola, zirimo kongera isuku.

Minisitiri Shyaka ati “Ebola ni umushyitsi uri mu baturanyi bacu ariko twe tudashaka kuko aho yageze yica benshi, abakerarugendo ntibagaruke, byinshi birangirika. Kandi byaragaragaye ko twongereye isuku byakongera amahirwe menshi yo kuyirinda.”

Mu bibazo by’ingutu aka Karere ka Ngororero ubu gafite byiganjemo ingaruka z’ibiza aho imvura yo mu 2017 na 2018 yasenyeye abaturage benshi; Ikangiza imihanda, ibiraro n’amateme; Ndetse n’ibindi binyuranye birimo iby’abana bata ishuri ari benshi n’ubucukuzi bw’amabuye y’agaciro bukorwa mu kajagari.

Basabwe kugarura mu ishuri abana barenga 1,800 bitarenze uku kwezi

Mu rwego rw’uburezi, Minisitiri w’ubutegetsi bw’Igihugu yasabye ko abashinzwe uburezi mu Karere n’Imirenge bakorana n’abayobozi b’utugari n’imidugudu bakagarura mu ishuri abana 1,851 bataye ishuri, kandi bigakorwa bitarenze uku kwezi kwa Kanama 2019.

Minisitiri Shyaka ati “Biteye isoni kwitwa Imparirwakurusha ufite abana barenga 1851 bataye ishuri. Ikerekezo cy’u Rwanda ni uko abana b’Abanyarwanda bose biga.”

Akarere mu kubakira imiryango 652 idafite aho kuba

Akarere kagaragaza ko gafite imiryango 288 iri mu basenyewe n’ibiza mu 2017 yo itarubakirwa, n’imiryango itishoboye 364 idafite aho kuba, kakaba gateganya kuba kamaze kububakira bose bitarenze tariki 30 Kamena 2020 kuko ngo ibyangombwa by’ibanze babifite, ndetse kakaba gafite n’ingengo y’imari y’amafaranga miliyoni 93 Frw azakoreshwa mu kugura amabati, n’ibindi bikoresho nkenerwa.

Minisitiri Shyaka Anastase akaba yarashyizeho igihembo ku murenge muyifite ingo nyinshi uzatanga indi gusoza kubakira aba baturage badafite aho kuba bitarenze Ukuboza 2019.

Ubucukuzi bw’amabuye y’agaciro bukorwa mu kajagari

Nyuma yo gusanga mu birombe 43 bicukurwamo Amabuye y’agaciro muri aka Karere ibyinshi bikora mu kajagari, ndetse no muri Kampani 23 izigera kuri 18 arizo zikora neza; Minisitiri Shyaka yasabye Akarere kwihutira gukemura ikibazo cy’akajagari mu bucukuzi bw’amabuye y’agaciro, kuko uretse kuba ari imbogamizi ku mutekano w’ababicukuramo, bitanungura Akarere.

Akaba yanasabye ko Akarere gakora inyigo y’uko umutungo kamere gafite ungana kugira ngo bijye bigafasha mu kureshya abashoramari.

Asoza iki kiganiro, Minisitiri Shyaka yagarutse ku Bukangurambaga bw’Isuku n’Umutekano bwatangijwe ku ku rwego rw’igihugu kuri uyu wa 06 Kanama.

Ati “Turifuza kubona abaturage bafite isuku ku mubiri no mungo zabo, isuku mu Dusanteri tw’ubucuruzi cyane cyane Resitora n’utubari, mu masoko aho duhahira; Ndetse no Gukemura amakimbirane yo mu miryango, guhashya ibiyobyabwenge n’ibindi bikibangamiye umutekano n’umudendezo by’Abanyarwanda.”

By’umwihariko yasabye abayobozi b’inzego z’ibanze mu Karere ka Ngororero ko bitarenze mu Ukuboza 2019 isuku muri aka Karere yaba imaze kugera ku rwego rushimishije.

Umuyobozi w’Akarere ka Ngororero NDAYAMBAJE Godefroid yadutangarije ko bagiye gushyira imbaraga mu gukemura ibibazo byagaragajwe ku gihe cyatanzwe, kandi bigakorwa ku bufatanye bw’inzego n’abaturage.

Ngororero Igikapu kiboshye mu bishishwa by’ibigoli cyatangaje abitabiriye imurikabikorwa ry’Abafatanyabikorwa b’Akarere JADF Isangano

Abafatanya bikorwa mu buhinzi bagaragaza ko nk’imurika bikorwa riherutse kubera mu Murenge wa Gatumba, ryagenewe iminsi ibiri gusa bigatuma batabasha kwakira abaturage uko bikwiye.

Ibikorwa by’ubuhinzi n’ubukorikori ni byo bigaragara cyane abantu bazanye kumurika mu imurika bikorwa ry’Akarere ka Ngororero kandi ugasanga abaturage bashaka kumenya amakuru no kugura.

Kandama Beathe avuga ko nyuma yo gusobanuza, abahinzi bagaragaza ko baba bakeneye kumenya aya makuru kandi ntahandi bayakura usibye mu imurika bikorwa nk’iri.

Agira ati, “Nk’ubu hari ibigori batubwiye ko iyo byabaye umuhondo ku mababi tuba tugomba kugirandura, twarabibonye umwaka ushize ariko tugatinya kubirandura ngo bizera ariko bu tumenye ko kutabirandura byakwanduza ibindi”.

Abamurika ibikorwa byabo ariko bagaragaza ko hakomeza kugira ibinozwa by’umwihariko igihe imurikabikorwa ryagakwiye kumara kugira ngo batange amakuru arambuye kandi bagurishe.

Ndagijimana Narcisse umukozi wa Hinga weze avuga ko imurika bikorwa ry’iminsi ibiri rishirira mu mihango yo kurifungura no kurisoza mu gihe ubundi hakabonetse n’umwanya wo kugurisha no gusobanurira abaturage.

Agira ati, “Nk’ubu ejo twiriwe mu mirimo yo kwitegura no kuzana ibyo tumurika,haba n’umuhango wo gufungura,none ubu turi kwitegura kuzinga ibyo twazanye dusubirayo, baba twebwe baba abatugana ntabwo twabonye umwanya uhagije wo guhana amakuru”.

Ubuyobozi bw’Aka karere bwo buvuga ko ubusanzwe imurikabikorwa ry’abafatanyabikorwa ryabaga rimwe mu mwaka rikaza kugirwa inshuro ebyiri kubera ibyifuzo b’abafatanyabikorwa, ubu nab wo ngo hakaba hagiye kwigwa uko ryakongererwa iminsi.

Hakizimana Rwisebura Jacques Perezida w’ihuriro ry’abatanyabikorwa b’Akarere ka Ngororero JADF Isangano avuga ko hagiye gukorwa ubuvugizi iminsi ikaba yakwiyonera.

Agira ati, “twakiriye ibitekerezo by’uko iminsi yaba ine aho kuba ibiri, tugiye kwicarana n’ubuyobozi maze nka Komite ya JADF dufate umwanzuro kugira ngo abamurika babashe kubyungukira mo”.

Ubuyobozi kandi burateganya ko kugira ngo imurikabikorwa ry’abafatanya bikorwa ribashe kugera ku baturage benshi, hazarebwa uko ryabera mu Mirenge irenze ibiri nk’uko byari bimeze.

Ibi ibitangaje nyuma y’aho yari yasabye ko Guverinoma y’u Rwanda yakorohereza ibihano abagize uruhare muri Jenoside yakorewe Abatutsi bageze mu zabukuru, abafite uburwayi n’abandi bafite ibibazo by’ubuzima.

Abarokotse Jenoside yakorewe Abatutsi bakaba barakomerekejwe n’ubwo busabe cyane ko bwakozwe mu cyumweru cyo kwibuka ku nshuro ya 25 ababo bishwe urw’agashinyaguro, ibintu babona ko nta butabera bwaba burimo.

Mu kiganiro Musenyeri Rukamba yagiranye na Kigali Today ku ruhare rwa Kiliziya mu guha ubutabera abarokotse kubera bamwe mu bapadiri n’abihaye Imana muri rusange bishe abantu, yasubije muri aya magambo.

Ati “Icyaha cya Jenoside kireba isi yose ni ukuvuga ko abo bantu baba bararezwe bakaburanishwa ndavuga abari hanze yenda, wenda ubucamanza bwo hanze butandukanye n’ubw’ino.”

“Ariko nta muntu n’umwe twigeze dukingira ikibaba kuko twemera ko abarezwe bagomba kugera imbere y’ubucamanza, bukemeza ubutabera.”

Igiti Ndakubana wazinutswe gusubira mu kiliziya yihishagaho ibitero bya za gerenade bateraga mu kigo

Musenyeri Rukamba yakomeje avuga ko bisegura ku gikorwa cyo gusabira Abajenosideri imbabazi ku barokotse kandi babihanganisha, gusa ko byakozwe nk’inshingano ya Kiliziya ihora itoza abayoboke bayo yo kubabarira.

Yagize ati “Abantu benshi bavuze ko twabivuze mu gihe kitari cyo ariko ni inshingano za Kiliziya gusabira imbabazi buri muntu wese ubabaye kuko aba ari ishusho ya Yezu Kristu ubabaye, kubera gushaka ineza y’abantu”.

“Twanditse n’indi baruwa twerekana ko dufata mu mugongo abarokotse kandi ko tubasaba imbabazi ko twabivuze mu gihe kitari cyo.”

Ibi kandi bibaye mu gihe kuri uyu wa kabiri tariki ya 16 Mata mu Karere ka Ngororero, bazibuka Abatutsi babarirwa mu bihumbi bibiri baguye muri Kiliziya ya Nyange bishwe ku itegeko rya Padiri Athanase Seromba nk’uko bigarukwaho n’umuyobozi wa Ibuka muri aka Karere Niyonsenga Jean d’Amour.

Urwibutso rwa Nyange rwubatse ahahoze ari paruwasi ya Nyange yasenyeweho Abatutsi basaga 2000

Yagize ati “Ku itariki 16 ku manywa y’ihangu nibwo Seromba yazanye kateripirali ayisenyesha Kiliziya yari yahungiyemo abatutsi basaga ibihumbi bibiri, afatanyije n’interahamwe, burugumesitiri wariho icyo gihe na ipeji bavuga ko kiliziya ari iy’abahutu bazayubaka mu minsi itatu.”

Uko hatanzwe amabwiriza yo gusenyara Kiliziya ku Batutsi

Umusaza Ndakubana w’imyaka 60 avuga ko we n’abagize umuryango we n’abaturanyi bahungiye kuri Paruwasi ya Nyange tariki ya 12 Mata 1994, ateze amakiriro ahantu hafatwaga nk’ahatagatifu.

Ndakubana avuga ko tariki 13 Mata 1994, Abatutsi bari ku kiliziya bakomeje kugabwaho ibitero n’Interahamwe, bagatakambira Padiri Mukuru wa Paruwasi ari we Seromba ngo abafashe abasengere, yenda nibapfa bapfe neza.

Padiri Seromba ngo yabwiye Abatutsi bari bahungiye kuri Paruwasi ayobora, ko bisengera kuko na bo bafite ururimi nk’urwo akoresha asenga.

Agira ati, “Abakobwa bitwaga Abakirisitu cyane twari kumwe baravuze ngo ese Padiri ko Interahamwe zikomeza kuza kudutera ku Kiliziya, waje ukadusengera yenda tugapfa neza, maze abasubiza ko gusenga na we abikoresha mu mvugo kandi na bo bashobora kwisengera bitabaye ngombwa ko Padiri abafasha”.

“Ngereranyije uko abari barahungiye aha banganaga, nta n’abagera ku icumi baharokokeye kuko bose bapfiriye mu kiliziya, usibye umwe nibuka wagwiriwe n’umunara ariko ntumwice ako kanya agakomereka ubu amaze igihe yitabye Imana”.

Uko hateguwe inama yo gusenya Kiliziya

Ndakubana amaze kumva aya magambo ya Seromba ngo yatangiye kugira ubwoba ko nta butabazi bategereje afatanya na bagenzi be gukomeza kwirwanaho bahangana n’ibitero by’interahamwe ariko uko iminsi yashiraga kubera inzara, imbaraga zigakomeza kubashirana.

Ndakubana avuga ko Seromba yakomeje kubatoteza ku buryo n’abagerageje kujya gushakira ibyo kurya mu rutoki rw’Abapadiri yategetse Abajandarume ko babarasa.

Ndakubana avuga ko tariki ya 15 ari bwo yavuye ku Kiliziya ya Nyange ahungira i Kabgayi nyuma y’ibitero bikomeye by’Interahamwe zabateragamo za Gerenade, hagapfamo benshi mu barwanaga.

Kuri Paruwasi ya Nyange hubatswe urwibutso mu rwego rwo guha icyubahiro abasenyeweho Kiliziya

Avuga ko iryo joro uwaraye kuri Paruwasi ya Nyange wese yishwe bukeye bwaho kuko tariki ya 16 Mata ari bwo Interahamwe zagotaga Kiliziya ariko Abatutsi barimo imbere bafunze cyane bakoresheje intebe zo mu Kiliziya.

Icyo gihe ngo Padiri Seromba yari yaraye akoranye inama na Burugumesitiri Ndahimana Gregoire na IPG Kayishema Fulgence, umucuruzi Kanyarukiga n’abandi bayobozi maze babwira abari bahungiye i Nyange ko Abatutsi ari bo bateye igihugu nta bundi bufasha babaha.

Ndakubana ngo yongera kwibuka amagambo ya Seromba atanga amabwiriza yo gusenya Kiliziya kuko ngo umwe mu barokotse icyo gihe yiyumviye Padiri ubwe abwira umushoferi w’imashini ngo nayisenye Abahutu bazubaka indi mu minsi itatu.

Agira ati, “Babanje kuboherezamo imyuka ya za lisansi zitwara imodoka bacishije mu Munara wa Kiliziya, binaniranye abatutsi barimo imbere banga gusohoka niko kuzana imashini irayisenya”.

Ndakubana avuga ko atakandagiza ikirenge muri Kiliziya

Kugeza ubu yizera ko umuntu ku giti cye yasenga Imana ikamwumva kandi ko Padiri cyangwa undi muntu nta bubasha agira burokora umuntu cg ngo bumugumishe mu cyizere cy’ubuzima.

Agira ati, “Njyewe Imana yandokoye mu ishusho yayo nk’umuntu, kandi Padiri yatubwiye ko natwe dufite ubushobozi bwo kwisengera, none se ubwo naba nongera kumujya imbere ngo amafashe iki”?

Avuga ko akiri umukirisitu gaturika ariko adakozwa kujya gusengera mu kiliziya gusa ngo yoherezayo abana be kuko batazi ibyabaye mbere, gusa ngo akemera ko iyo bagiyeyo basenga bitandukanye n’ibya kera mu gihe cya Jenoside.

Agira ati, “Padiri yatweretse ko gusengerwa atari ngombwa ko n’undi wese yasenga, Ntabwo natekereza ko umupadiri yakwitwara nka Seromba, gusa byari ibitekerezo bya Seromba wenyine, njyewe mfata Bibiliya yanjye ngasenga kandi ndacyari umukirisitu.

Uretse uyu mupadiri utanzweho, hari n’abandi bivugwa ko bagize uruhare muri Jenoside bakidegembya mu mahanga ariko hakaba hari n’abakatiwe n’inkiko zaba izo mu Rwanda cyangwa hanze.

Urwibutso rwa Nyange rwahoze ari Paruwasi ruruhukiyemo imibiri y’Abatutsi basaga ibihumbi birindwi na Magana inani (7800), naho Paruwasi byavugwaga ko izubakwa mu minsi itatu imaze umwaka umwe itashywe ku mugaragaro, ikaba na yo ngo ifatwa nk’amateka y’abakirisitu ba Nyange.

Munganyimana waroshywe muri Nyabarongo mu 1990 avuga ko abayobozi batangiye kwicisha Abatutsi urugamba rwo kubohora igihugu rugitangizwa

Bagaragaza ko nyuma y’itariki ya 01 Ukwakira 1990 Inkotanyi zitangije urugamba rwo kubohora igihugu, muri Kibilira Abatutsi batangiye kwicwa, kandi abafungiwe ibyo byaha bakarekurwa nta bihano bahawe.

Bavuga ko kuba muri Kibilira ari ho kandi havukaga abateguye bakanashyira mu bikorwa Jenoside yakorewe Abatutsi, ari kimwe mu byatumye ihageragerezwa mbere y’uko ahandi ihagera.

Bagaragaza ko nka Leon Mugesera ukurikiranyweho ibyaha bya Jenoside avuka aha i Kibilira hamwe na Victoire Ingabire wahamwe n’ibyaha byo gupfobya Jenoside, n’abandi benshi.

Mukecuru Munganyimana Ancile warokotse Jenoside, avuga ko mu 1990 aribwo umuryango we wishwe, benshi baroshywe muri Nyabarongo na we akarohwa ku bw’amahirwe ntiyamuhitana.

Abagize Inteko ishinga Amategeko bari baje kwifatanya n’Abarokotse kwibuka

Avuga ko nyuma yaje guhungira kuri Kiliziya ya Muhororo, ariko nyuma y’amagambo yo gushishikariza Abahutu kwica Abatutsi yavuzwe na Mugesera, Abatutsi bongeye guhigwa mu 1992 ndetse baranicwa.

Agira ati, “Mu 1990 naroshywe muri Nyabarongo yanga kunyica, ndetse mbonye abanjye bamaze gushira nanjye nyirohamo yanga kunyica, aha ni ho Jenoside yageragerejwe kuko batwishe n’iyo ndege ya Habyarimana bavuga itarahanurwa”.

Ubwo abakozi b’Ibitaro bya Muhororo bifatanyaga n’Akarere ka Ngororero Kwibuka Jenoside yakorewe Abatutsi mu 1990-1994, Abarokotse Jenoside basabye ko Amateka ya Kibilira yandikwa nk’uko bikwiye kandi afite umwihariko.

Umuyobozi w’Umuryango uharanira inyungu z’abarokotse Jenoside yakorewe Abatutsi, IBUKA mu Karere ka Ngororero, Niyonsenga Jean d’Amour, yavuze ko usibye imibiri y’Abatutsi basaga ibihumbi 25 iharuhukiye, nta kindi kimenyetso cy’ayo mateka y’umwihariko.

Agira ati, “Duhora dusaba ko Amateka ya hano yakwandikwa. Hashize imyaka 25 ariko nta gikorwa, aha ni ho hageragerejwe Jenoside hafite amateka y’umwihariko kubera Abanyapolitiki bahavukaga”.

Niyonsenga (ibumoso) ku ruhande avuga ko amateka ya Jenoside i Kibilira akwiye kwandikwa kuko afite umwihariko

Hon. Depite Nyabyenda Damien wari waje kwifatanya n’abakozi b’ibitaro bya Muhororo n’abaturage b’Umurenge wa Gatumba kwibuka inzirakarengane zazize Jenoside yakorewe Abatutsi avuga ko kwandika amateka biri guhabwa umurongo n’inzego zibishinzwe.

Avuga ko hamwe no kurangiza imanza za Jenoside zitararangizwa, kubakira Abarokotse badafite amacumbi no kwandika amateka byatangiye kwigwaho n’Ubuyobozi bw’Intara y’Uburengerazuba.

Agira ati, “Aha hantu hafite amateka akomeye agomba kwandikwa nk’uko mubyifuza, Intara y’Uburengerazuba iri kubyigaho ngo ibihe umurongo bizanyuramo, bigakorwa kandi bakanozwa.

Ku wa 13 hasozwa Icyunamo, kandi hanashyinguwe imibiri 11 y’abazize Jenoside yabonetse, Abarokotse bakaba bakomeje gusaba abaturage kugira uruhare mu gutanga amakuru y’ahaba hari indi mibiri kugira ngo na yo ishyingurwe mu cyubahiro.

Depite Nyabyenda avuga ko Intara y’Uburengerazuba irimo guha umurongo uburyo bwo kwandika amateka ya Kibilira

Amazu hafi 800 ni yo azubakirwa abahuye n’ibiza mu Karere ka Ngororero

Umuyobozi wa ko Godefroid Ndayambaje abivuga ko n’ubwo Leta yatanze inkunga yo kubakira abaturage bangirijwe n’ibiza, hari na bamwe batangiye kwitanga ngo aya mazu aboneke.

Anonngeraho kohagikenewe imbaraga za buri wese ubishoboye kugira ngo nibura iyi mpeshyi izarangire abasenyewe bamaze kubona aho kuba.

Agira ati, « Hakenewe amafaranga asaga Miliyali ebyiri, turi gufatanya n’inzego zitandukanye ngo turebe ko aya mazu azaba yuzuye mbere y’uko imvura yongera kugwa, kandi hari icyizere dufatanyije »

Abafatanya bikorwa b’Akarere ka Ngororero ku ikubitiro abagore bibumbiye mu rugaga rushamikiye ku muryango FPR Inkotanyi batangije igikorwa cyo kubakira bamwe mu basenyewe n’ibiza, kugira ngo batange umusanzu wabo ahateganyijwe kubaka inzu 12 ni ukuvuga imwe muri buri murenge, ariko bakazajya bafatanya n’abaturage n’Akarere.

Perezidante w’urugaga rw’abagore rushamikiye kuri FPR Inkotanyi mu Karere ka Ngororero Nyiransenimana Donatile avuga ko hazubakwa amazu 12.

Agira ati “Twebwe uruhare rwacu ruzagera nko muri Miliyoni 10 frw, tuzafatanya n’imiganda y’abaturage kubaka inzu imwe muri buri Murenge twahereye kuri Mutima w’urugo mugenzi wacu udafite ubushobozi bwo kwiyubakira”.

Abagore b’urugaga rushamikiye kuri FPR Inkotanyi mu Karere ka Ngororero batangiye ibikorwa byo kubaka amazu 13

Mukamana Alphonsine ubu ucumbitse ku baturanyi nyuma yo gusenyerwa n’ibiza avuga ko ashimira abagore bibumbiye mu rugaga rw’abagore rushamikiye kuri FPR Inkotanyi kubera urukundo bamugaragarije bamwubakira inzu.

Agira ati, “Ndashimira FPR N’urugaga rw’abagore ruyishamikiye ho nari nshumbitse none ngiye kubona inzu rwose Imana ibampere umugisha”.

Umuyobozi w’Akarere ka Ngororero wungirije ushinzwe imibereho myiza y’abaturage mu Karere ka Ngororero Kuradusenge Janvier, avuga ko kugeza ubu abantu 298 batangiye kubakirwa mu bibanza byabo.

Abandi 159 bazagurirwa ibibanza kuko nta bushobozi na mba bafite, hanabeho no gusaranganya ubutaka ku bantu 328 kugira ngo na bo bubakirwe.

Imirimo y’amaboko mu gusiza ibibanza irarimbanyije

Inama Njyanama ikaba izaba yamaze kugaragaza no kwemeza agaciro k’ibibanza bizagurwa bitarenze iki cyumweru, bigatangira kugurwa no kubakwa hakoreshejwe amafaranga ya Leta.

Hagati aho abaturage bakomeje gucumbikirwa mu miryango y’ababaturanyi, aho bafashishwa inkunga z’ibiribwa birimo ibishyimbo n’ibigori.

Amazu hafi 800 ni yo azubakirwa abahuye n’ibiza mu Karere ka Ngororero

umuyobozi wako Godefroid Ndayambaje abivuga ko n’ubwo Leta yatanze inkunga yo kubakira abaturage bangirijwe n’ibiza, hari na bamwe batangiye kwitanga ngo aya mazu aboneke, ariko hagikenewe imbaraga za buri wese ubishoboye kugira ngo nibura iyi mpeshyi izarangire abasenyewe bamaze kubona aho kuba.

Agira ati “Hakenewe amafaranga saga Miliyali ebyiri, turi gufatanya n’inzego zitandukanye no turebe ko aya mazu azaba yuzuye mbere y’uko imvura yongera kugwa, kandi hari icyizere dufatanyije. ”

Abafatanya bikorwa b’Akarere ka Ngororero ku ikubitiro abagore bibumbiye mu rugaga rushamikiye kumuryango FPR Inkotanyi batangije igikorwa cyo kubakira bamwe mu basenyewe n’ibiza, kugira ngo batange umusanzu wabo ahateganyijwe kubaka inzu 13 ni ukuvuga imwe muri buri murenge, ariko bakazajya bafatanya n’abaturage n’Akarere.

Perezidante w’urugaga rw’abagore rushamikiye kuri FPR Inkotanyi mu Karere ka Ngororero Nyiransenimana Donatile avuga ko hazubakwa amazu 12.

Ati “Twebwe uruhare rwacu ruzagera nko muri Miliyoni 10 frw, turateranya hame n’imiganda y’abaturage kubaka inzu imwe muri buri Murenge twahereye kuri Mutima w’urugo mugenzi wacuudafite ubushobozi bwo kwiyubakira.”

Abagore b’urugaga rushamikiye kuri FPR Inkotanyi mu Karere ka Ngororero batangiye ibikorwa byo kubaka amazu 13

Mukamana Alphonsine ubu ucumbitse ku baturanyinyuma yo gusenyerwa n’ibiza avuga ko ashimira abagore bibumbiye mu rugaga rw’abagore rushamikiye kuri FPR Inkotanyi kubera urukundo bamugaragarije bamwubakira inzu.

Ati “Ndashimira FPR N’urugaga rw’abagore ruyishamikiye ho nari nshumbitse none ngiye kubona inzu rwose Imana ibampere umugisha.”

Umuyobozi w’Akarere ka Ngororero wungirije ushinzwe imiberehomyiza y’abaturage mu Karere ka Ngororero Kuradusenge Janvier, avuga kokugeza ubu abantu 298 batangiye kubakirwa mu bibanza byabo, mu gihe abantu 159 bazagurirwa ibibanza kuko nta bushobozi na mba bafite, hazabaho kandi no guhererekanya ubutaka ku bantu 328 kugira ngo na bo bubakirwe.

Imirimo y’amaboko mu gusiza ibibanza irarimbanyije

Inama Njyanama ikaba izaba yamaze kugaragaza no kwemeza agaciro k’ibibanza bizagurwa bitarenze iki cyumweru, bigatangira kugurwa no kubakwa hakoreshejwe amafaranga ya Leta.

Hagati aho abaturage bakomeje gucumbikirwa mu miryango y’ababaturanyi, aho bafashishwa inkunga z’ibiribwa birimo ibishyimbo n’ibigori.

Gatumba TVET School ifatanye n’uruganda rw’amabuye y’agaciro rudafitiye abanyeshuri akamaro

Aba babyeyi bavuga ko gushyira iri shami muri iri shuri, bizatuma abakora ubucukuzi bw’amabuye y’agaciro bunguka ubumenyi, bakabikorana ubunyamwuga birinda akajagari na magendu muri aka kazi.

Ubwo hizihizwaga isabukuru y’imyaka 30 iri shuri ryahoze ari Eto Gatumba rivutse, ababyeyi bagaragaje ko ubumenyi buke mu bucukuzi bw’amabuye y’agaciro bugira ingaruka ku iterambere ry’ubukungu bw’Akarere ka ngororero.

Bavuga ko abana babo bashyiriweho ishami ribyigisha, byazatugma ubunyamwuga muri aka kazi buzamuka, bigateza imbere akarere.

Nikobasanzwe avuga ko TVET Gatumba ihawe ishami ry’ubucukuzi bw’amabuye y’agaciro byazamura ubukungu bw’Akarere ka Ngororero

Nikobasanzwe Ntwari Gerard uyobora Komite y’ababyeyi muri Gatumba TVET School, avuga ko igihe kigeze ngo Minisiteri y’uburezi itekereze uko amashuri y’imyuga n’ubumenyi ngiro bajya biga hakurikijwe amahirwe aboneka aho ishuri riri.

Atanga urugero ko ishuri rifatanye neza n’uruganda rw’amabuye y’agaciro ariko ntacyo rurimariye kandi abacukuzi bakaba bakomeje kubikora mu kajagari kubera kutabimenya bya kinyamwuga.

Agira ati “ Ni icyifuzo, hano Gatumba byarabaye, kubera kutamenya amabuye y’agaciro wasangaga amabuye ya Koruta bayajugunya mu myobo batazi ko ari amabuye y’agairo.

Birakwiye ko duhabwa ishami ribyigisha kandi ntibisaba abakozi barenze babiri cyangwa batatu”.

Ugirinshuti avuga ko ikigo gikeneye kwagurwa no gusanwa

Umuyobozi w’Ishuri rya Gatumba TVET School Ugirinshuti Jean D’Amour, avuga ko nubwo ikigo cyageze kuri byinshi mu myaka ishize gifite imbogamizi z’inyubako n’ibikoresho bidahagije.

Ngo hari zimwe mu nyumabko zacyo zishaje. kandi hakenewe ko cyaguka kugira go n’ayo mashami aramutse yongerewemo, abanyeshuri bige bisanzuye.

Umunyamabanga nshingwabikorwa w’Umurenge wa Gatumba, Uwihoreye Patric mu izina ry’ubuyobozi bw’Akarere ka Ngororero, yavuze ko hari gukorwa ubuvugizi kugira ngo ishuri rihabwe ibikenewe kandi ryaguke.

Ati “Turi gukora ubuvugizi, kugira ngo ishami ryo gucukura amabuye y’agaciro rigezwe muri iki kigo, na WDA nayo yatwemereye kubidufashamo ikigo kikavugururwa”.

Gatumba TVET SCHOOL irimo abanyeshuri 467, biga mu mashami y’ubwubatsi, n’amashanyarazi, naho mu myaka 30 ishize abaharangije bakabona impamyabumenyi bagera hafi ku bihumbi 25.

Abarangije muri ETO Gatumba yahindutse Gatumba TVET School bavuga ko nta bushomeri bagize ariko ibyigishwa bikwiye kujyana n’amahirwe aboneka ahubatse ishuri

Umva ikiganiro abo baturage bagiranye na Kigali Today bavuga ko babuze amafaranga yo gutanga mu bwisungane mu kwivuza, abana babo bakaba batabona uko biga neza kuko amafaranga bari bizeye kubona batayabonye.

Ibiraro byasenyutse

Imirenge yibasiwe n’ ibi biza ni Kabaya, Muhanda, Hindiro, Kavumu na Kageyo. Muri iyi mirenge hangiritsemo ibikorwa remezo birimo imihanda, ibitaro amazu y’abaturage, ubu hakaba hakibarurwa ibindi byangiritse.

Umuyobozi w’Akarere ka Ngororero Ndayambaje Godefroid yatangarije Kigali Today ko mu bo ibi biza byahitanye higanjemo abana, ngo kuko muri abo icyenda umunani bose bari abana batoya.

Uyu muyobozi wa Ngororero yanasabye abaturage bo muri aka Karere kwigengesera, no kwimuka kuburyo bwihuse mu manegeka bakajya gushaka amacumbi ahandi ngo kuko imvura ikigwa ishobora kubateza ibyago batimutse.

Amazu yaguye ku bantu

Amazu yakorerwagamo na yo yasenyutse

Kugeza ubu ntiharamenyakana ababa basize ubuzima muri iyo mpanuka, uretse umwana umwe muto wahise ugwa aho, nk’uko bitangazwa n’umwe mu baturage witwa Mukankangura Felicité wari uhari ubwo impanuka yabaga.

Mukankangura yabwiye Kigali Today ko bari bahagaze imbere ya misa ari abakirisitu benshi bakabona imodoka ya padiri ije ibasanga yiruka.

Ngo ababishoboye bagerageje guhunga ariko kuko bari benshi igongamo barindwi barimo n’umwana muto wahise yitaba Imana.

Yagize ati "Bamwe bari mu kiriziya abandi bari hanze bategereje ko misa itangira tubona imodoka ya padiri iza yiruka idusatira, bamwe turahunga ariko igonga barindwi. Yari no kwinjira mu kiriziya n’uko habaye Imana."

Avuga ko polisi yahise itabara, itwara abakomeretse kwa muganga. Padiri we ngo wasaga n’ufite ihahamuka yashatse gusubira mu modoka ngo ahunge ariko abaturage bavuza induru bamubuza kuyinjiramo.

Igitambo cya misa cyakomeje kiraba kuko hahise haza undi mupadiri, ngo n’ubwo byagaragaraga ko abakirisitu bari bagihungabanye.

Kigali Today irakomeza kubakurikiranira aya makuru ku nzego zibishinzwe, mu rwego rwo kumyenya uko abagonzwe bifashe.

Uko niko ibiro bagiye kubaka bizaba bimeze

Biteganyijwe ko ibiro by’uwo murenge bizaba byuzuye mu gihe cy’umwaka umwe n’igice, bitwaye miliyoni 74RWf.

Ayo mafaranga yose azatangwa n’abaturage batuye muri uwo murenge n’abandi bawuvukamo ariko bakorera ahandi kimwe n’ibigo bitandukanye bikorera muri uwo murenge.

Umurenge wa Ndaro utuwe n’abaturage 24284 batuye mu ngo 5900. Buri rugo rwiyemeje gutanga nibura amafaranga 1000RWf.

Abo bandi basigaye nabo biyemeje gutanga inkunga uko bishoboye. Ku ikubitiro ayo bamaze kwiyemeza abarirwa muri miliyoni 30RWf.

Umurenge wa Ndaro ni umwe mu mirenge y’icyaro yo mu Karere ka Ngororero, ukaba ari na wo ufite inyubako ntoya itajyanye n’igihe.

Abaturage bo muri uwo murenge bavuga ko ku mbaraga bafite biyemeje kwiyubakira ibiro by’umurenge bifite inyubako ijyanye n’igihe; nk’uko uwitwa Sebazungu Modeste abisobanura.

Agira ati "Twarebye dusanga hari bimwe mu bikorwa twafasha mu murenge wacu, dusanga icya mbere ari ugufasha abakozi bize kandi bashoboye twahawe, kubona ibiro byiza bikwiriye gutangirwamo serivisi."

Kuri ubu,abaturage batangiye gusiza ikibanza no kukigezamo ibikoresho byo kubaka birimo nk’amabuye n’umucanga.

Ibiro by’umurenge wa Ndaro ni uko bimeze ubu

Mugisha Dan, umunyamabanga nshingwabikorwa w’Umurenge wa Ndaro avuga ko bamaze kujya inama n’abaturage ko baziyubakira ibyo biro badategereje inkunga.

Agira ati "Twabonye gukomeza gutegereza inkunga bizadutinza, kandi dufite imbaraga z’abaturage. Twagiye inama y’uko tuzafatanya ngo twubake inyubako y’ibiro byacu."

Umuyobozi wungirije w’Akarere ka Ngororero ushinzwe iterambere ry’ubukungu, Kanyange Christine avuga ko abaturage ba Ndaro batanze urugero rwiza rwo gushyira hamwe no gufata icyemezo cy’iterambere ryabo.

Abagenerwa bikorwa ba Gira inka muri Ngororero bahamya ko nta ruswa ikirangwa muri iyo gahunda

Mu myaka ishize abagenerwabikorwa ba Gira inka bakunze kugaragaza ko bakwa ruswa ku buryo butandukanye.

Yaba amafaranga yo kugura inzoga cyangwa kugushwa muri ruswa ishingiye ku gitsina, nk’uko hari umugore wo mu Murenge wa Kavumu wabishinje umunyamabanga nshingwabikorwa w’akagari muri Mata 2016.

Kuri ubu ariko bavuga ko ayo makosa atakigaragara; nk’uko Mukandori Marie Solange wo mu Murenge wa Hindiro abisobanura.

Agira ati “Njye bari barampaye inka mbere kuko ndi umukene. Nyuma naje kubyara abana batatu maze banyongera indi nka n’iyayo muri gahunda ya Gira inka. Nta ruswa nigeze ntanga rwose ibyo byari kera.”

Mugenzi we witwa Uwamurera Doroteya wo mu Murenge wa Gatumba, nawe ahamya ko nta ruswa ikirangwa muri Gira inka.

Agira ati “Njye najyaga numva ko ugomba gutanga ibihumbi 50RWf ngo uhabwe inka. Kuko nari nzi ko ndi ku rutonde narayahingiye ntegereza ko bazayanyaka ndababura kugeza inka itashye iwanjye.”

Akomeza avuga ko ayo mafaranga yagombaga gutanga ubu ngo ayakoresha mu gucuruza inyanya mu isoko rya Gatumba.

Mukamwerekande Beatrice, Gitifu w’Akagari ka Rugendabari mu Murenge wa Hindiro yemeza ko ubu gutanga inka za Gira inka hakurikizwa urutonde rukorerwa mu nteko z’abaturage no mu miganda.

Kuradusenge Janvier, umuyobozi wungirije w’Akarere ka Ngororero,ushinzwe imibereho myiza y’abaturage yemeza ko hari amakosa yakozwe mbere ariko ubu akaba yaraciwe burundu.

Agira ati “Ababigiragamo uruhare abenshi bari abayobozi. Twakoranye n’abaturage ubu barakangutse, abayobozi bamwe barabizize abandi bacika intege. Ubu muri gahunda zo gufasha abatishoboye ruswa yaraciwe burundu.”

Mu Karere ka Ngororero ba gitifu b’utugari umunani, ba veterineri bane n’abayobozi b’imidugudu bakurikiranweho ruswa muri “Gira inka” ndetse bamwe banavanywe mu kazi.

Akarere ka Ngororero kamaze gutanga inka 7200 muri gahunda ya Gira inka. Bateganya ko mu mwaka wa 2018 bazaba bamaze gutanga izigera ku bihumbi 12.

Mabuye wari mukuru muri abo bana niwe wenyine warokotse

Ubwo buhamya bwatangiwe ku rwibutso rwa Kavumu ruri mu Karere ka Ngororero ubwo hibukwaga abana 12 b’Abatutsi bahambwe ari bazima, tariki ya 08 Kamena 2017.

Cyirima Felicien waharokokeye avuga ko abo bana bishwe ku buryo bwateguwe n’Interahamwe ariko ababyeyi babo barabareka.

Agira ati “Bafashe ababyeyi babo barabegeranya babashyira mu nzu imwe bari basigaje batayisenye maze babasezeranya ko bo n’abana babo ntacyo bazaba.

Nyamara nyuma byaje kumenyekana ko ngo bari babibikiye ngo bazabikuze bavuye guhamba umubyeyi wabo Habyarimana.”

Akomeza avuga ko abo bana na ba nyina bahamaze iminsi ariko Interahamwe zibacunga buri munsi.

Ku itariki ya 08 Kamena 2017, nibwo ngo abo bicanyi bagarutse maze bavuga ko baje gusoza akazi kabo. Basabye ba nyina gucukura imva y’abana babo maze babikora bakubitwa kugeza bacukuye icyobo Interahamwe zifuzaga.

Interahamwe ngo zafashe abo bana zibashyira mu cyobo zibarenzaho itaka ari bazima maze zirigendera, abana babura ubatabara naho ba nyina basabwa gusubira iwabo kuko bari Abahutukazi bashakanye n’Abatutsi.

Abo bana ubundi ngo bari 13 ariko umwe wari mukuru muri bo witwa Mabuye Janvier yacitse abicanyi ararokoka n’ubu akaba ari we ubara iyo nkuru.

Agira ati “Njyewe nari mukuru mbaruta kuko batampekaga. Mbonye Interahamwe zidutera buri mugoroba ndacika mpishwa n’umuturanyi.”

Imibiri y’abo bana 12 hamwe n’iy’abandi bazize Jenoside bashyinguye mu rwibutso rwa Kavumu

Depite Manirarora Annoncée yasabye abatuye Ngororero kugira urukundo no kuvugisha ukuri, kuko kuri uwo munsi hanashyinguwe imibiri itandatu yabonetse kandi abayihashyize bakiriho bakaba barimanye amakuru.

Nyuma y’inyigisho n’ubuhamya bahawe na Padiri Ubald Rugirangoga usanzwe azwiho gutanga inyigisho z’ubumwe n’ubwiyunge , abaturage bemeye ko bagiye kwiminjiramo agafu bagashyigikira ibikorwa by’ubwiyunge ari byo gusaba imbabazi, kubababarira no gukundana.

Imihanda mibi ituma bashyikira serivisi bibagoye

Abafite iki kibazo kurusha abandi ni abo mu mirenge ya Bwira, Muhanda na Ndaro.

Sibomana Augustin, ati « kuva aha kugera i gatumba aho nshobora gufotoza urupapuro cyangwa kubona banki, nkoresha amasaha atatu n’amaguru cyangwa bikantwara amafaranga ibihumbi bitandatu ngatega moto nshaka icyangombwa ubundi cyishyurwa amafaranga magana atanu ».

Habarugira Francois ukora akazi ko gutwara abagenzi kuri moto atuye mu Murenge wa Ndaro nawe yemeza ko bibagora kubona izo serivisi.

Ati « mperutse kujya guhinduza uruhushya rwo gutwara ibinyabiziga ariko byantwaye amafaranga ibihumbi icumi na bitatu mu gihe abegereye ibikorwa remezo batarenza ibihumbi bitanu».

Mu kugerageza kunoza imitangirwe ya serivisi z’irembo, muri Werurwe 2017, akarere ka Ngororero katanze terefoni zigezweho 159 ku banyamabanga nshingwabikorwa b’imirenge n’utugari ndetse n’abashinzwe iterambere mu tugari kugira ngo bafashe abaturage.

Bamwe muri aba bazihawe nabo bakaba bavuga ko zishobora kutazatanga umusaruro kubera ibura ry’ibikorwa remezo.

Umunyamabanga nshingwabikorwa w’akagari ka Runyinya Nyiranshimyemungu Francoise agira ati « ntabwo nakwizeza ko ikibazo kigiye gukemuka kuko haracyabura ibikoresho kuko ahenshi nta mashanyarazi ahari, ndetse n’umuyoboro wa interineti uboneka hakeya».

Umuyobozi wungirije ushinzwe imari n’iterambere ry’ubukungu mu karere ka Ngororero, Kanyange Christine, avuga ko akarere karimo gukoresha imbaraga mu kongera ibikorwa remezo bikiri bikeya.

bahawe telefone ariko ntibizeye kuzifashisha kubera kutagira amashanyarazi

Ati «turimo kuvugana n’ubuyobozi bw’ikigo gitanga serivisi z’amashanyarazi ndetse n’abacuruza itumanaho ngo twihutishe gukwirakwiza amashanyarazi na interineti, gusa igihe bizaba byarageze hose bitewe n’ubushobozi ndetse n’imiterere y’akarere kacu ».

Anavuga ko buri mwaka akarere gakora imihanda ijya mu cyaro byibura kuri kilometero ijana ku buryo ingendo zizoroshywa.

Mu ngo zirenga gato ibihumbi 80 zo mu karere ka Ngororero, ingo 14.400 nizo zifite umuriro w’amashanyarazi, mu gihe ari igikorwa remezo cy’ibanze mu kubona serivisi z’irembo.

Urugendo rugana ku rwibutso

Kesho ni umusozi ukikijwe n’indi misozi ibiri minini, ku rundi ruhande hakaba umugezi wa Giciye.

Abatutsi baharokoke bavuga ko bakunze guhungira kuri uwo musozi kuva mu mwaka w’1990.

Makuza Gerard ati "Aha twagize intambara zikomeye kuva mu 1990, ariko iyo twatotezwaga twazaga aha kuri aka gasozi tukirwanaho ku buryo ibitero byinshi byagendaga nta muntu byishe. Imiterere y’uyu musozi yaradufashaga cyane".

Ibi ngo byatumye interahamwe zihuruza abasirikare kuko zabonaga bazongera bakazinesha.

Havugimana Sammuel Songa avuga ko ngo abasirikare babeshywe ko kuri uwo musozi hariho inkotanyi zifite imbunda.

Ati "Uwitwa Ryaribu wari diregiteri w’uruganda rw ‘icyayi rwa Rubaya niwe wazanye abasirikare afatanyije n’izindi Nterahamwe hamwe na Bazubahande Ignace wari burugumesitiri wa komini Gaseke.

Baragiye babwira abasirikare ko kuri kano gasozi hariho inyenzi zihishe mu myobo zifite imbunda arizo zituma abaturage baneshwa ».

Abantu bagana ku rwibutso ahabereye umuhango wo gushyingura imibiri y’Abazize Jenoside yakorewe Abatutsi

Icyo gihe kandi, ngo kuba umurambo wa habyarimana wari wahungishirijwe muri urwo ruganda hamwe na guverinoma yari yariyise iyabatabazi, ngo byatumye abasirikare baba benshi ndetse n’urwango rw’abahutu ruriyongera.

Ikindi ngo cyatumye bamwe mu bahutu bahishaga abatutsi babireka, ngo ni urwango bigishijwe mu ijambo ryavuzwe na Leon Mugesera, abwira abahutu ko umwanzi wabo ari umututsi.

Kuri uyu wagatatu tariki 12 Mata 2017 naho hibutswe ku nshuro ya 23 Abatutsi 1417 biciwe ku gasozi ka Kesho.

Urwibutso rwa Jenoside ruri ku gasozi ka Kesho

Guverineri w’Intara y’Iburengerazuba alphonse Munyantwari yasabye abarokotse Jenoside yakorewe Abatutsi hamwe n’abaturanyi babo kubaka ubumwe no kwisubiza agaciro bari barambuwe.

Ati « ubu twaje guha agaciro abacu bakambuwe bakicwa muri Jenoside yakorewe abatutsi. Duhaguruke twihe agaciro natwe twanga icyadusubiza inyuma nk’uko perezida wa Repubulika ahora abidusaba ».

Guverineri Munyantwari kandi yasabye abazi ahaba hari imibiri itarashyingurwa mu cyubahiro gutanga amakuru nayo igashyingurwa.

Muri Ngororero, ikigage gihumanye cyahitanye babiri. Aba bari kuvurirwa kwa muganga

Tariki ya 27 Werurwe 2017, nibwo bamwe mu baturage bo mu Murenge wa Bwira bagiye mu bukwe maze banywa ikigage.

Nyuma yo kuva muri ubwo bukwe abagisomyeho bose batangiye kujya kwa muganga bafashwe n’impiswi. Kuri ubu babiri muri bo bamaze kwitaba Imana.

Ababarirwa muri 34 barimo kuvurirwa ku kigo nderabuzima cya Gashubi mu Murenge wa Bwira naho batandatu bajyanywe ku bitaro bya Muhororo.

Abaturanyi b’abo barwayi bavuga ko ikigage banyoye gishobora kuba cyarahumanijwe n’umuntu utazwi, nk’uko uwitwa Nyiramariba Mariya Goreti abisobanura.

Umuyobozi w’ikigo nderabuzima cya Gashubi cyakiriye abo barwayi, Beninka Leoncie avuga ko barimo kubitaho kandi ko abarembye bajyanywe ku bitaro ku buryo bafite icyizere ko bazakira vuba.

Avuga kandi ko barimo gushakisha icyaba cyarateye ubwo burwayi.

Agira ati “Twohereje ibizamini by’icyo kigage n’umusarane ku bitaro no kuri raboratwari nkuru y’Igihugu kugira ngo tumenye impamvu nyakuri yatumye aba bantu barwariye icyarimwe kandi mu gihe gito.”

Akomeza ahamagarira abaturage kwita ku isuku y’ibiribwa n’ibinyobwa byabo kuko n’umwanda ushobora kuba intandaro y’ubwo burwayi. Abapfuye bazize icyo kigage bamaze gushyingurwa.

Ishuri ry’Intwari ry’Inyange ryatangiye gusanwa

Iri shuri ryari risanzwe rifite ibyumba byo kwigiramo bidahagije kandi bishaje, ritanazitiye,ubu ryatangiye kuvugururwa no kwagurwa.

Ni nyuma y’ubusabe bw’umuyobozi waryo hamwe n’Akarere ka Ngororero, ku bufatanye n’urwego rw’Igihugu rushinzwe intwari z’Ihiguhu, impeta n’imidari by’ishimwe, hamwe na za minisiteri ebyiri, iy’umuco na siporo ndetse n’iy’uburezi.

Mu 2015, nibwo Minisitiri w’umuco na Siporo Uwacu Julienne yemeye ubuvugizi mu gusana iri shuri, umuyobozi w’aka karere avuga ko bifuza ko riba ikitegererezo.

Yagize ati « Iri shuri ribumbatiye amateka y’akarere kacu ndetse n’ayigihugu kuko hari n’abanyamahanga baza kureba no gusobanuza ibyahabereye mu 1997.
Twasabye ko ryakubakwa kuko inyubako zaryo zari nkeya kandi zigayitse none bigiye mu bikorwa ».

Amashuri ya kera y’Inyange

Akomeza avuga ko bifuza ko ryaba ikigo gifasha urubyiruko muri rusange gukurana umuco w’Ubutwari no gukunda igihugu, ariyo mpamvu bifuza ko inyubako zaryo ziba nziza kandi nyinshi.

Guverineri w’intara y’iburengerazuba Alphonse Munyantwari nawe ashima iki gikorwa, akavuga ko ari ngombwa kubera amateka habitse.

Ati « Aha hari igicumbi cy’intwari cyubatswe mu minsi ishize, byari bikwiye ko iri shuri naryo ritunganywa rikajya ku rwego rubereye amateka meza y’igihugu cyacu ».

Gusana iri shuri byatangiye muri Nzeli 2016, ubu imirimo ikaba igikomeje aho umuyobozi waryo Gapasi Uwamungu Leonard asaba ko yakwihutishwa kuko irimo gukorwa ibangikanye n’amasomo y’abanyeshuri.

Iri shuli niryo rya mbere ryashinzwe mu cyahoze ari komini Kivumu (perefegitura Kibuye), rishinzwe n’ababyeyi mu 1988, aho ryari rifite ibyumba 8.

Ubu hifuzwa ko ishuri ryagurwa, rikagira ibyumba bigera kuri 20 harimo n’icyumba kizabikwamo amateka y’intwari z’i Nyange.

Igice cya mbere kigizwe n’imirimo yo kurisana kizatwara Miliyoni 250 z’amafaranga y’u Rwanda, bikaba biteganijwe ko icyiciro cya mbere cyo gusana kizarangira muri Werurwe 2017, nyuma hakurikireho igice cyo kwagura inyubako.

Ahashyinguwe intwari z’Imena

Inzu zahawe abatishoboye babaga mu manegeka muri Ngororero, buri nzu ifite agaciro ka Miliyoni 5RWf

Izo nzu 11 zubatswe ku bufatanye bwa Minisiteri yo kurwanya ibiza no gucyura impunzi (MIDIMAR), Ishami ry’umuryango w’abibumbye ryita ku miturire (UN Habitat) n’Akarere ka Ngororero, zatashywe mu mpera z’icyumweru gishize.

Buri nzu ifite agaciro ka Miliyoni 5RWf. Ifite ibyumba bine, igikoni, ubwiherero hakiyongeraho televiziyo na radiyo.

Sekabanza Francois, umwe mubahawe inzu n’ibyishimo bigaragara ku maso, amwenyura agira ati “Nabaho nibwo nakandagira mu nzu nziza noneho ikaba ari n’iyanjye. Nzayifata neza ku buryo nzanayisigira abanjye imeze neza.”

Izo nzu uko ari 11 zubatse mu Mudugudu wa Kimiramba, Akagari ka Nyenyeri, Umurenge wa Kabaya.

Izo nzu zahawe ababaga mu manegeka muri Ngororero zirimo Tereviziyo na Radiyo

Umuyobozi w’Akarere ka Ngororero, Ndayambaje Godefroid avuga ko imiryango 11 yahawe izo nzu ari iyatoranyijwe yari ibabaye kurusha iyindi.

Agira ati “Ntabwo abayakeneye bose bayabonye ariko hari abari babaje kurusha abandi nibo twahereyeho.”

Uhagaririye Umuryango w’abibimbye mu Rwanda, Lamin Mane avuga ko batazahwema gukora ibikorwa biteza imbere Abanyarwanda.

Agira ati “UN ishimishijwe no gukorana n’umuntu nka Perezida wanyu ushyira imibereho myiza y’abaturage imbere y’ibindi, kandi ntituzahwema gushyigikira ibikorwa bituma Abanyarwanda barushaho kubaho neza.”

Avuga ko uretse izo nzu 11 zubakiwe abaturage bavuye mu manegeka mu Murenge wa Kabaya, hari n’izindi 10 zizubakwa mu Murenge wa Sovu nazo ziri kuri urwo rwego.

Buri nzu ifite ibyumba bine

Mukantabana Seraphine, Minisitiri wa MIDIMAR avuga ko ibyo bikorwa byose bituma Abanyarwanda batura heza babikesha imiyoborere myiza.

Agira ati “Ibi byose bituma mutura neza kandi heza tubikesha imiyoborere myiza. Leta izakomeza gufasha abatishoboye kunoza imiturire kuko ari inshingano zacu kandi zishyigikiwe n’Umuyobozi mukuru w’igihugu.”

Uretse kubaka ngo hari n’amabati azahabwa imiryango 250 mu Karere ka Ngororero mu kuyifasha kuva mu manegeka.

Izo nzu zubatse zegeranye mu buryo by’umudugudu

Ingabo z’igihugu zisanzwe zikora ibikorwa byo kuvura abaturage batishoboye. (Photo internet)

Muri iki gikorwa kimara icyumweru cyose, ingabo zizaba zivura abarokotse Jenoside yakorewe Abatutsi mu 1994 bafite uburwayi bunyuranye.

Kuri ibi bitaro bya Kabaya, hazavurirwa abarwayi bagera kuri 909.

Abaturage bategereje ari kwivuza ari benshi.

Iyi nkuru turacyayibakurikiranira.

Kuba barahezwaga mu mashuri ni kimwe mubyabadindije

Mu matora y’abakuru b’imidugudu 419 igize aka karere yabaye mu muri Gashyantare 2016, abagore 29 gusa bangana na 7% nibo baje mu bayobozi b’imidugudu.

Mu tugari 73 tugize aka karere, abagore ni 20 bahwanye na 27% nibo banyamabanga nshingwabikorwa, naho muri ba perezida b’inama njyanama z’imirenge 13, harimo 4 bangana na 30%.

Ibi nibyo bituma hari abavuga ko abagore bakitinya n’ubwo bo bagaragaza izindi mpamvu.

Yamfashije fortunée yagize ati « njyewe mbona kuba tutarize neza kubera umuco wahezaga abagore nibyo byatumye dutinda kugira imyumvire yo kuba abayobozi ».

Mbabajende Josianne we avuga ko no kwitinya bikiriho kuko abagore bamwe cyane cyane abo mu cyaro bumva ko ubuyobozi ari ubw’abagabo.

Ati « abagore twakunze kwibera mu icuraburindi ryo gutinya abagabo tukumva tutahangana nabo, ariko bigenda bihinduka abagore bagatinyuka ».

Abatinyutse kujya mu nzego z’ubuyobozi barasaba bagenzi babo kutitinya

Akomeza avuga ko ubu icyo abagore bashyize imbere ari ukwita ku burere n’uburezi bw’abakobwa ku buryo bazaba abayobozi beza.

Mukanyandwi Bellancile, umunyapolitiki wo mu Ishyaka ry’Ubwisungane n’Iterambere (PSP) avuga ko abagore bakwiye gutinyuka kuko bahawe uburenganzira bwabo.

Ati « umugore yahawe ijambo, umugore afite ubushobozi ubu noneho atanga ibitekerezo bikumvikana, nibatinyuke kandi bahere mu nzego zo hasi bahe abana b’abakobwa urugero ».

Umuyobozi w’Akarere ka Ngororero Ndayambaje Godfrois, we avuga ko imyanya myinshi y’akazi inyuzwa mu ipiganwa, bityo ko kuhasanga abagore bacyeya atakwemeza niba bifitanye isano no kwitinya.

Gusa asaba abagore muri rusange kugira umuhate wo gupiganwa, ndetse no guhangana mu matora kugira ngo bakomeze kuzamura umubare wabo mu buyobozi no kubyaza amahirwe agaciro leta yabahaye.

Imibare rusange igaragaza ko mu buyobozi bw’ibanze abagore ari 10% mu Karere ka Ngororero.

Abadamu ntibemera ko bakorera abagabo ihohotera

Muri aka karere hakunze kuvugwa abagore bahangayikisha abagabo, babakubita bakanabangisha abana babyaranye, ndetse ngo abagabo bamwe bakanahunga ingo zabo.

Bamwe ntibemera ko ibyo bihari ariko n’ababyemera bitana bamwana kuri nyirabayazana w’amakimbirane hagati y’abagore n’abagabo babanye batyo.

Rubari Vincent, umusaza ufite imyaka 76 avuga ko ari abagore bitwaza uburinganire maze bagahangayikisha abagabo.

Yagize ati « ivanjiri yo kumenesha abagabo yadukanywe n’abagore bavuga ngo ni uburinganire, maze batuma abana banga ba se, abandi bakabatesha imitungo kugeza naho bamwe barogwa».

Yamfashije Forotonata we avuga ko ahanini abagabo aribo nyirabayazana b’amakimbirane kuko nta mugore wakwanduranya ku mugabo we.

Ati « Nta mugore utubaha umugabo we, ariko umugabo araza akagukubita wakwitabara ukamurusha imbaraga bakavuga ngo ni umugore wahohoteye umugabo».

N’ubwo hari abagore bemera ko hari bagenzi babo bafata abagabo nabi kugeza n’aho babakubita abenshi bavuga ko ibyo bakora byose baba birwanaho.

Mukandengeye Kirisitina wo mu Murenge wa Matyazo avuga ko yarambiwe guhora agira inama abagore n’abagabo barwana kuko batamwumva.
Agira ati « nararambiwe ndababwira ntibumva. Ndabareba nkabihorera baba bica abagabo babo uwanjye musigaranye ni akazi kabo ».

Kampire Christine, perezidante w ‘inama y’Igihugu y’abagore mu karere ka Ngororero, na Kuradusenge janvier umuyobozi w’akarere wungirije ushinzwe imibereho myiza, bemeza ko hari koko abagore bitwaza uburinganire bagahohotera abagabo.

Ariko kandi bakanavuga ko ahanini aya makimbirane mu miryango, aterwa n’ubusinzi, na bamwe mu bagabo baba bashaka kwikubira imitungo y’urugo.

Ubuyobozi buvuga ko bugiye gushyira imbaraga mu mugoroba w’ababyeyi, imiryango ibanye neza ikajya ifasha ibanye nabi, mu mugoroba w’ababyeyi ikabagira inama.

Abatewe inda (bamwe muri aba bana) barasabwa kudahishira abazibateye.

Ubuyobozi bw’Akarere ka Ngororero buhangayikishijwe n’ababyarira mu rugo bakiri bato bityo bikaba umuzigo ku miryango no ku gihugu. Buvuga ko akenshi biba ku bakobwa bakomoka mu miryango ikennye.

Ibi ngo bibaviramo guhabwa ko akato mu gihe abazibateye nta bibazo bafite, kuko akenshi abakobwa batabashyira ahagaragara ngo babafashe kubarera cyangwa nibatabikora babihanirwe.

Bamwe mu bafatiwe mu bikorwa by’uburaya mu ngororero harimo n’abana bato.

SSP Gasangwa Marc, uhagarariye polisi mu Karere ka Ngororero avuga ko abo bakobwa babaye ababyeyi imburagihe, kuko badashobora kwiyishyurira ubwisungane mu kwivuza cyangwa kurihira abana babo amashuli.

Avuga ko ibyo bitera bamwe gukomeza kwishora mu ngeso mbi bakoresha ibiyobyabwenge bakanishora mu buraya mu buryo buhoraho.

Kuri ibyo hiyongeraho kwandura virusi itera SIDA, nk’uko Uwiringiyimana Rose wicuruza ufite imyaka 17 gusa ahamya ko kubona mugenzi wabo udafite virusi itera SIDA muri aka karere ari tombora.

SSP Gasangwa asaba abaturage guca ubusambanyi no gutanga amakuru ku batera inda abana bato.

Mu myaka ya 2015 na 2016, mu Mujyi wa Ngororero havuzwe ubwiyongere bukabije kw’abana b’abakobwa baza kwicuruza cyangwa bagacuruzwa n’abantu bakuru, abenshi bagahita batwara n’inda.

Inama y’igihugu y’abagore, sosiyete civile, inzego z’ubuyobozi kimwe n’abafatanyabikorwa bashyizeho ubukangurambaga budasanzwe ku bangavu, babakangurira kwirinda ingeso mbi zibakururira imiruho mu buzima kandi bagashyira ahagaragara ababatera inda.

Ku rundi ruhande ariko, ababyeyi bavuga ko abana b’abakobwa aribo bikururira ibyo bibazo. Emmanuel Rwakarengwa, agira ati “ntibakitwaze ubukene ahubwo ni ubujiji hamwe n’irari ry’ibintu birukira ugasanga baratunaniye tukabura uko tugira.”

Nta mubare nyawo w’abangavu babyariye mu rugo turabona, ariko hari imirenge nka Gatumba habaruwemo abagera kuri 300.

Abenshi muri bo bemeza ko bashukwa n’abasore bakuru n’abagabo bubatse. Ikindi ngo baba bashaka imibereho kuko bavuka mu miryango ikennye cyangwa se ifite amakimbirane.

Barasaba kwishyurwa ngo babone uko bohereza abana ku ishuri

Abo baturage bahamya ko bafitiwe umwenda w’amezi abiri abandi atatu bitewe n’igihe bamaze bakora. Nyamara ngo mu masezerano bafitanye n’umukoresha wabo yo yerekana ko bagombaga kujya bahembwa buri byumweru bibiri.

Bose uko ari 420, bakora umuhanda no mu materasi y’indinganire. Amafaranga batarishyurwa abarirwa muri miliyoni 8RWf.

Iyakaremye Adela avuga ko bamurimo ibihumbi 40RWf. Ahamya ko kuba atarahembwa byamuteye ubukene, bituma atohereza abana be ku ishuri.

Agira ati "Nta handi nkura amafaranga kandi mfite abana ngomba kugurira ibikoresho by’ishuri ubu bicaye mu rugo".

Si we gusa ufite icyo kibazo kuko na bagenzi be batandukanye bavuga ko abana babo bakiri mu rugo kuko batajya ku ishuri batujuje ibisabwa.

Aba bakozi biganjemo abagore bavuga ko uku kutishyurwa binabateza inzara mu miryango yabo kuko bakora muri VUP buri munsi ; nkuko Mukeshimana Beatrice abisobanura.

Agira ati "Uretse n’abana tutohereje kwiga, n’aho bari mu rugo barashonje kuko aho twagakuye icyo kurya batatwishyura".

Umunyamabanga nshingwabikorwa w’umurenge wa Matyazo, Habiyakare Etienne yemera ko habaye gukererwa kwishyura abo bakozi.

Agira ati "Koko abaje mbere twabishyuye igice kimwe ariko abaje nyuma ntibarishyurwa na rimwe.

Twakoze urutonde turwohereza muri SACCO ariko bitinzwa nuko ubu iyo koperative iri mu igenzura (control) riisoza umwaka (2016) tukaba tugitegereje ko babikora abaturage bagahembwa".

Aba baturage bavuga ko bamaze amezi abiri badahembwa none bikaba byarateye ubukene mu miryango yabo

Umuyobozi w’Akarere ka Ngororero, Ndayambaje Godfrois we avuga ko niba hari abakozi batarahembwa ari amakosa y’ababishinzwe kuko amafaranga ya VUP ahari.

Agira ati « Amafaranga arahari ndetse twanayagejeje mu makoperative (SACCOs) bahemberwamo, ubwo amakosa ni ay’ababishinzwe ».

Uretse uku gukererwa kwishyurwa, abo bakozi banavuga ko amafaranga 1000RWf bahabwa kuva saa moya za mu gitondo kugera saa cyenda z’umugoroba ari make cyane. Bifuza ko yongerwa.

Ariko ubuyobozi bwo bubabwira ko badafite ubushobozi bwo kongera ayo mafaranga kuko agenwa ku rwego rw’igihugu.

Iyi mbangukiragutabara imaze imyaka irindwi iparitse ku kigo nderabuzima cya Rususa kuko yananiwe gukora mu mihanda yaho

Ubuyobozi bw’icyo kigo nderabuzima buvuga ko iyo mbangukiragutabara bayihawe na Diyosezi Gatolika ya Nyundo mu mwaka wa 2010.

Icyo kigo nderabuzima giherereye mu cyaro, ahantu hari imihanda y’ibitaka kandi hari imisozi.

Sœur Mukansanga Solina, uyobora ikigo nderabuzima cya Rususa avuga ko yatangiye kukiyobora muri 2012.

Yasanze uwo yasimbuye yarandikiye Minisiteri y’Ubuzima (MINISANTE),ayisaba ko yabahindurira ikabaha indi mbangukiragutabara kuko iyo bahawe ari ngufi cyane kuburyo idashoboye kugenda mu mihanda y’ibitaka yaho.

Agira ati "Nageze aha nsanga umuyobozi wambanjirije yarandikiye Minisiteri y’ubuzima ababwira iki kibazo, nanjye nanditse inshuro ebyiri nsaba ko baduhindurira iyi modoka ariko amaso yaheze mu kirere."

Akomeza avuga ko kubera uburyo iyo mbangukira gutabara bahawe ari ngufi bituma idashobora gutwara abarwayi bayikene. Kuva bayihabwa iraparitse nta kindi ikoreshwa kuburyo yatangiye no kwangirika.

Sœur Mukansanga avuga ko iyo abarwayi bakeneye imbangukiragutabara bagomba gutegereza ituruka ku bitaro bya Muhororo.

Bandikiye MINISANTE bayisaba kubahindurira Imbangukiragutabara kuko iyi bahawe ikora hasi bigatuma idashobora kugenda mu mihanda y’ibitaka

Uwamurera Josiane, wivuriza ku kigo nderabuzima cya Rususa avuga ko abafite amikoro bagomba gukodesha imodoka zisanzwe iyo bashaka kugera kwa muganga badatinze.

Agira ati "Yewe nanjye byambayeho batinda kuza kumfata mu rugo ndi kunda. Byatumye umugabo wanjye yiyambaza inshuti bakodesha indi modoka."

Ubu buryo bwo kwishakira imodoka ngo ntibwizewe kuko umurwayi agenda nta muganga umuherekeje.

Ubwo abadepite basuraga iki kigo nderabuzima mu mwaka wa 2014, bari bemeye gukora ubuvugizi kuri iki kibazo ariko ntikirakemuka.

Umuyobozi wungirije w’Akarere ka Ngororero ushinzwe imibereho myiza y’abaturage, Kuradusenge Janvier avuga ko bavuganye na MINISANTE ikemera kubaha indi modoka ubu bakaba bategereje.

Agira ati "Umunyamabanga uhoraho muri MINISANTE yatwemereye ko bazaduhindurira iyi modoka, ubu dutegereje ko izaza."

Iyo mbangukiragutabara yatangiye kwangirika

Umunyamabanga uhoraho muri MINISANTE, Nyemazi Jean Pierre avuga ko iki kibazo bakizi ndetse ko hari imbangukiragutabara iyi minisiteri yatumije ku buryo nizibageraho bazahita bagikemura.

Ubwo yatangarizaga Kigali Today ayo makuru ariko nta gihe ntarengwa yavuze izo mbangukiragutabara zizaziraho.

Abayobozi b’ibigo by’amashuri baburiwe ko umwanda ushobora kubirukanisha

Abo bayobozi babibwiwe mu nama itegura itangira ry’umwaka w’amashuri yabaye tariki ya 17 Mutarama 2017.

Umuyobozi wungirije w’Akarere ka Karongi, ufite uburezi mu nshingano ze, Kuradusenge Janvier yihanangirije abo bayobozi b’ibigo ababwira ko nta kibazo cy’umwanda na kimwe bashaka kumva mu bigo by’amashuri cyane cyane muri izi ntangiro z’umwaka.

Agira ati "Ndabamenyesha ko ahazagaragara umwanda ubwo abanyeshuri bazaba baje bizakora ku bayobozi b’ayo mashuli, ku buryo bashobora no kwirukanwa bagasimbuzwa abashoboye gukora".

Akomeza avuga ko ibi ari ukwibutsa abayobozi b’amashuli kuko bari barabibwiwe mu itorero baherutsemo.

Ati "Kwari ukubibutsa ariko no kubabwira ko nta mikino irimo kugira ngo babihe agaciro kabyo".

Mubyo amashuli asabwa gukora byihuse harimo gusenya ubwiherero bushaje no kubaka ubundi, gusukura ibikoni, gusiga amarangi ku nkuta no gutera imiti yica udukoko mu mazu abanyeshuri bararamo.

Kuba iyi mirimo ije hasigaye iminsi mike ngo abanyeshuri bagere ku bigo byabo, bamwe mu bayobozi b’ibigo by’amashuli basanga ntacyo bibahungabanyaho.

Tegereza Justin, umuyobozi wa College ADEC Ruhanga avuga ko n’ubundi gusana inyubako z’amashuli bisanzwe mu nshingano zabo.

Ati "Haramutse hari ufite inyubako ikeneye gusanwa byihutirwa akaba atarabikoze yaba yararangaye kuko duhabwa ingengo y’imari yo gukora bene iyo mirimo yoroheje. Twiteguye rero gukora ibyo dusabwa kuko turi intore".

Mugenzi we Butera J Claude uyobora TTC Muramba avuga ko hari imbogamizi zigihari, nko kutagira amazi ku bigo bimwe na bimwe ndetse ahandi ibigo bikaba bigorwa no kubona ibibanza byakubakamo ubwiherero.

Mu karere ka Ngororero hari amashuli abanza 99, ayisumbuye 34, naho acumbikira abanyeshuri ni 14.

Kuri ubu abaturage ba Ngororero bamwe bari guhabwa inzitiramibu nazo ariko ngo ntizihagije

Abaturage batangaza ibi mu gihe muri ako karere kose abaturage barara mu nzitiramibu, babarirwa muri 46% gusa.

Nyiringondo Augustin, umwe mu baturage ba Ngororero avuga ko amaze ibyumweru bitatu arwaje umugore we Malaria.

Agira ati "Ubu maze ibyumweru bitatu umugore wanjye arwaye Malaria kuko nta nzitiramibu turyamamo."

Akomeza ahamya ko mbere inzitiramibu yari afite zitarasaza umuryango we utajyaga wibasirwa na Malaria.

Ubuyobozi bw’Akarere ka Ngororero nabwo bwerekana ko kubura inzitiramibu ari ikibazo gikomereye benshi mu batuye ako karere ; nkuko Birorimana Jean Paul ushinzwe igenamigambi muri ako karere abihamya.

Agira ati « Murabona ko abatageze kuri ½ mu karere kacu aribo bonyine baryama mu nzitiramibu, kandi nibwo buryo dufite bwo kwirinda Malaria mu karere kacu ».

Akomeza ahamagarira abafatanyabikorwa b’Akarere ka Ngororero mu by’ubuzima ko ababishaka banafasha abaturage mu birebana no kurwanya.

Mu myaka ishize ibipimo by’abafite inzitiramibu muri aka karere byaramanutse kuko mu mwakwa wa 2012, abari bazifite babarirwaga muri 80%.

Ibi ngo byatumye imibare y’abarwara Malaria ikomeza kwiyongera, aho mu mwaka wa 2016 yari imaze kwikuba gatatu ugereranyije no muri 2012.

Gusa ariko mu rwego rwo guhanga n’icyo kibazo kuri ubu mu karere ka Ngororero abaturage bari guhabwa inzitiramibu.

Nubwo bari kuzitanga ariko ngo nta cyizere ko zizagera kuri bose ; nkuko umwe mu bajyanama w’ubuzima uri mu gikorwa cyo gutanga inzitiramibu abitangaza.

Agira ati "Zatubanye nkeya ku buryo izo urugo rukeneye tuzigabanya kabiri kugira ngo byibura ingo zose zisaranganye."

Ibi bisobanuye ko n’ingo zahawe inzitiramibu muri iki cyiciro atari ko abazigize bose baziraramo kuko bahabwa nkeya.

Umuyobozi w’Akarere ka Ngororero wungirije ushinzwe imibereho myiza y’abaturage, Kuradusenge Janvier avuga ko icyo cyiciro cyo gutanga inzitiramibu kizasiga abagera kuri 60% aribo baryama mu nzitiramibu.

Avuga ariko ko basabye Minisiteri y’Ubuzima (MINISANTE) ko yabaha izindi nzitiramibu, kuko bafite imibare igaragaza ko Malaria yiyongereye muri Ngororero bakaba bategereje igisubizo.