Batawe muri yombi ku itariki 11 Kamena 2020, nyuma y’umunsi umwe gusa urukiko rwisumbuye rwa Musanze rubarekuye mu rubanza ku ifunga n’ifungurwa ry’agateganyo bari barajuririye urwo rukiko, rwasomwe ku itariki 10 Kamena 2020.

Abo ni uwahoze ari Gitifu w’Umurenge wa Cyuve, Sebashotsi Gasasira Jean Paul, Gitifu w’Akagari ka Kabeza, Tuyisabimana Jean Leonidas, aba Dasso babiri ari bo Nsabimana Anaclet na Abiyingoma Sylvain, bari baratawe muri yombi ku itariki 14 Gicurasi 2020 nyuma y’imvururu bagaragayemo ku itariki 13 Gicurasi 2020.

Umuvugizi w’Urwego rw’Igihugu rw’Ubugenzacyaha (RIB), Marie Michelle Umuhoza, yatangarije Kigali Today ko abo bagabo bose bafunze bakekwaho icyaha cya ruswa no gushaka gutoroka ubutabera.

Yagize ati “Ni byo abo bagabo bose barafunze, bakekwaho icyaha cyo gushaka gutoroka ubutabera n’icyaha cya ruswa”.

Abo bagabo bafungiye kuri RIB Sitasiyo ya Muhoza. Amakuru agera kuri Kigali Today aravuga ko biyongereyeho undi mu Dasso witwa Maniriho Martin, na we wagaragaye muri video ahabereye imvururu, akaba atarigeze aburana hamwe n’abandi kuko yari agishakishwa n’inzego zishinzwe umutekano.

Abo ni Gitifu wa Cyuve Sebashotsi Gasasira Jean Paul na Gitifu w’Akagari ka Kabeza Tuyisabimana Jean Leonidas n’aba Dasso babiri aribo Nsabimana Anaclet na Abiyingoma Sylvain batawe muri yombi ku itariki 14 Gicurasi 2020 nyuma yo gukekwaho icyaha cyo gukubita no gukomeretsa ku bushake cyabereye mu kagari ka Kabeza ku itariki ya 13 Gicurasi 2020.

Ni mu rubanza rw’ubujurire ku ifunga n’ifungurwa rusomwe ku itariki 10 Kamena 2020 aho urukiko rwisumbuye rwa Musanze rubarekuye hagendewe ku bwiregure bwabo aho bemera ko bakoze icyaha ariko batabigambiriye nk’uko byagaragaye muri video yafatiwe ahabereye imvururu.

Mu rubanza rw’ubujurire rwabaye kuwa 09 Kamena 2020, Sebashotsi yireguye yemera icyaha ariko avuga ko yari ahurujwe nk’umuyobozi aza ahosha amakimbirane ari naho yatse inkoni Gitifu Tuyisabimana akayikubita Nyirangaruye wari wanze kurekura Dasso Nsabimana Anaclet ubwo yari yamushinze amenyo.

Iyo raporo ya muganga iratesha agaciro amakuru y’ubushinjacyaha aho bwagaragaje ko kuba Nyirangaruye ari mu bitaro ari zimwe mu ngaruka z’inkoni yakubiswe bikamuviramo ihungabana.

Abo bose baregwa, biregura bavuga ko bemera icyaha bakoze bari mu kazi ko kurinda ikwirakwizwa rya Coronavirus mu baturage babasaba kwambara udupfukamunwa.

Muri urwo rubanza rw’ubujurire, Sebashotsi yayavuze ko kurekurwa kwe bidakwiye gutera urukiko impungenge kuko adashobora gutoroka ubutabera kuko afite umuryango n’aho atuye hazwi n’umutungo ashobora gutangamo ingwate mu rukiko ndetse n’umwunganizi we witwa Habiyakare avuga ko Sebashotsi atatoroka ubutabera mu gihe yaba arekuwe kuko asanzwe ari umugabo w’inyangamugayo.

Nyuma yo kumva ubwiregure bw’abaregwa n’ubushinjacyaha, mu bushishozi bw’Ubucamanza urukiko rusanze icyemezo cyafashwe n’uru rukiko ku itariki 28 Gicurasi 2020 kibafunga by’agateganyo gikurwaho, rutegeka ko barekurwa bakajya bitaba urukiko mu gihe bahamagawe.

Ni mu rubanza rwabaye mu gitondo cy’itariki 09 Kamena 2020, rwamaze hafi amasaha abiri mu Rukiko Rwisumbuye rwa Musanze.

Abaregwa baje bambaye imyambaro y’ibara ry’iroza, Sebashotsi Gasasira Jean Paul wari Gitifu w’Umurenge wa Cyuve, Tuyisabimana Jean Leonidas wahoze ari Gitifu w’Akagari ka Kabeza, n’aba Dasso babiri ari bo Nsabimana Anaclet na Abiyingoma Sylvain, abo bayobozi bose bakaba baramaze gusezererwa mu kazi.

Abo bayobozi bajuririye ifunga n’ifungurwa mu Rukiko Rwisumbuye rwa Musanze rwaburanishije urwo rubanza, nyuma y’uko ku itariki 28 Gicurasi 2020 bahanishijwe igihano cyo gufungwa iminsi 30 n’Urukiko rw’Ibanze rwa Muhoza.

Abo bagabo ntibemeranyije n’imyanzuro y’urwo rukiko, aho bahise bajuriririra icyo cyemezo, bakigera mu rukiko kuri uyu wa Kabiri tariki 09 Kamena basabwa kwisobanura ku byaha baregwa byo gukubita no gukomeretsa ku bushake uwitwa Manishimwe Jean Baptiste na mushiki we Nyirangaruye Uwineza Denise.

Mu kwiregura kwabo bafatanyije n’ababunganira mu mategeko, bakomeje kugaragariza urukiko ko rudakwiye kugira impungenge mu gihe baba barekuwe bakitaba urukiko bari hanze, aho bemeza ko bafite abishingizi n’ingwate nk’uko bari babisabye urukiko rwababuranishije mbere.

Ni icyifuzo batumvikanyeho n’ubushinjacyaha aho bwabasabiye gukomeza kuburana bafunze, bugendeye ku bimenyetso binyuranye byabangamira ubutabera mu gihe baba bafunguwe.

Ubushinjacyaha bwifashishije amashusho (video) yafatiwe mu mvururu, yerekana abo bayobozi bakubita abo baturage aho inteko iburanisha yagiye asaba abo bayobozi, umwe ku wundi kureba neza uburyo bagiye bitwara muri izo mvururu hifashishijwe iyo video.

Ubwo bushinjacyaha bwari buhagarariwe na Museruka John na Hagenimana Edouard, bwakomeje kugaragaza uburemere bw’icyaha abo bayobozi baregwa bushingiye ku buhamya bwa bamwe mu babonye izo mvururu.

Bagarutse ku bubabare bwa Nyirangaruye Denise, aho bemeje ko uwo mukobwa yagaruwe mu bitaro bya Ruhengeri aho arwariye ubu, kubera uburwayi ngo yatewe n’ingaruka zo gukubitwa n’abo bayobozi nk’uko Umushinjacyaha Hagenimana Edouard yabigaragarije urukiko.

Yagize ati “Nyirangaruye ubwo yazaga gutabara musaza we Manishimwe, baramukubise bageza ubwo bamugaragura hasi kugeza n’ubwo bamukuramo ijipo, none bariregura ngo yarabarumye ngo baritabaraga, ibyo bishoboka bite”!

Arongera ati “Kwa muganga bagaragaje ko yagize ububabare bukabije buri kuri 80%, kandi ingaruka z’uko gukubitwa zikomeje kwiyongera aho yamaze kumva ko abamukubise bagiye gufungurwa, bimuviramo kurwara ihungabana, aho kugeza ubu ari mu bitaro bya Ruhengeri, aho yabwiwe ko na Nyababyeyi yangiritse. Ibyo byose ni ingaruka yatewe n’inkoni yakubiswe”.

Uwo Mushinjacyaha yagarutse no kuri Manishimwe, aba Dasso bavuga ko yamusabye kwambara agapfukamunwa arabarwanya, aho yemeza ko ibyo ari ibinyoma.

Hagenimana ati “Uwo Manishimwe koko yari ahagaze ku irembo ry’iwabo atambaye agapfukamunwa, kandi aho yari ahagaze ku irembo si mu bantu yari ahagazemo, umuntu uri mu rugo si ngombwa ko yambara agapfukamunwa.

Ibyo bavuga rero ko yabarwanyije si byo, ahubwo bamusanze iwabo aho yari abahungiye bamujyana ku muhanda bamukurura hasi, batangira kumukubitisha inkoni Gitifu Tuyisabimana yari yitwaje nk’aho yari aragiye amatungo ngo aritwaza inkoni, ngiyi twanayizanye. Murabona ko ari ikibando cyari gikwikiwe mu mukoropesho”.

Perezida w’iburanisha yongeye gusaba abaregwa kwiregura, bagaragaza icyashingirwaho ngo babe barekurwa baburane badafunze.

Sebashotsi ati “Raporo yo kwa muganga iragaragaza ko ububabare basanganye Nyirangaruye butaturutse ku ngaruka zuko yakubiswe, ni ho mpera mbagaragariza ko mwandekura nkaburana ndi hanze kuko n’ibisubizo bya muganga kandi byerekana ko uburwayi afite ari ubw’agateganyo atari ubwa burundu”.

Umwunganizi we yungamo ati “Icyo uwo mukobwa yazize gituma ari mu bitaro ntaho gihuriye n’ibi Sebashotsi aregwa, urukiko rukwiye kugendera ku bisubizo bya muganga, ntirukwiye kugendera ku binyamakuru byatangiye gukwirakwiza impuha, bikomeje kwandika ko uwo mukobwa yahungabanyijwe n’inkoni yakubiswe, mu gihe muganga avuga ko ububabare afite ari ubw’agateganyo atari ubuhoraho”.

Nyuma yo kumva abaregwa bose, Perezida w’inteko iburanisha urwo rubanza yanzuye ko urubanza ruzasomwa ku itariki 10 Kamena 2020 saa cyenda.

Aya ni amasaka yatemwe

Sebikari Emmanuel, umuturage watemewe amasaka, yavuze ko yari agiye kwahira ubwatsi bw’amatungo ahagana saa yine z’amanywa, ageze mu murima we asanga amasaka bayatemaguye agwa mu kantu.

Ati “Nageze mu murima ejo mu ma saa yine n’igice, nsanga umurima wose batemye bayararitse. Igitangaje ni uko murima wanjye ukikijwe n’indi mirima ihinzemo amasaka, batema ayanjye gusa. Ni umurima munini nari ntegerejemo umusaruro w’amafaranga asaga ibihumbi ijana”.

Sebikari yatangarije Kigali Today ko hari abo akekaho kubigiramo uruhare, barimo abo bafitanye isano aho bamaze iminsi bamubwira amagambo mabi akamutera impungenge ku mutekano we.

Ati “Ndabazi tumaze iminsi dufitanye ibibazo, abaturage bambwiye ko hari uwahoze yigamba avuga ko yishimiye ko amasaka yanjye yatemwe, ngo ndi kuzira ibyaha byanjye, amaze iminsi ampiga ngo natumye umugore we agenda nyuma y’uko namukizaga ubwo bari mu makimbirane. Hari n’uwo mperutse gusanga afite umuhoro yiruka kuri murumuna we ashaka kumutema, ndamufata kuva icyo gihe agenda yigamba avuga ko ngo nzamubona”.

Nyirahabizanye Agnes uyobora umudugudu wa Mugarama wabereyemo ibyo, yavuze ko mu ma saa tanu yahamagawe na Sebikari amubwira ko amasaka ye bayatemaguye.

Avuga ko ubwo yahageraga atabaye, yasanze umurima wose w’amasaka bawutemye ati “Akigera mu murima we agasanga amasaka ye bayatemye yahise antabaza, ngezeyo nsanga koko amasaka ye bayatemye umurima wose bawararitse. Ni umurima uri hagati y’indi na yo ihinzemo amasaka, ariko barebye aye aba ari yo batema ibyo bikaba biteye urujijo”.

Uwo muyobozi w’Umudugudu yavuze ko akimara kubona ibyo bibazo yahise atanga raporo ku nzego zimukuriye, hakaba hagishakishwa ababa bihishe inyuma y’icyo cyaha ngo babihanirwe.

Cyuve ni Umurenge ukomeje kuvugwamo ibikorwa bibi binyuranye, kugeza ubu uwahoze ayobora uwo murenge akaba ari muri gereza akekwaho gukubita no gukomeretsa ku bushake aho afunganywe n’umuyobozi w’akagari na ba Dasso babiri.

Abo ni Umunyamabanga nshingwabikorwa w’Umurenge wa Cyuve Sebashotsi Gasasira Jean Paul, Umunyamabanga nshingwabikorwa w’Akagari ka Kabeza Tuyisabimana Jean Leonard, n’aba Dasso babiri ari bo Nsabimana Anaclet na Abiyingoma Sylvain, bakekwaho gukubita Nyirangaruye Uwineza Clarisse na Manishimwe Jean Baptiste bo mu Kagari ka Kabeza mu Murenge wa Cyuve.

Ni mu rubanza ku ifungwa n’ifungurwa ry’agateganyo rwasomwe mu gitondo cyo ku itariki 28 Gicurasi 2020, hashingiwe ku byo bagaragaje mu kwiregura kwabo, mu rubanza rwo ku itariki 27 Gicurasi 2020 aho basabaga kurekurwa bakaburana badafunze.

Bimwe mu byo bagaragarije urukiko, basabaga ko byashingirwaho barekurwa ni uko muri izo mvururu bagaragayemo ku itariki 13 Gicurasi 2020, bemeza ko batakubise abaturage ku bushake, ko ngo bwari uburyo bwo kwitabara nyuma y’uko abo baturage baje babarwanya.

Abo bayobozi basabye ko barekurwa ndetse bemera ko bibaye ngombwa batanga n’ingwate mu rwego rwo kwizeza urukiko kudatoroka.

Urukiko twagaragarije umwe ku wundi, ko ubwiregure bwabo nta shingiro bufite hagendewe ku mashusho (video) yafatiwe ahabereye imvururu, n’ubuhamya bwatanzwe n’abaturage bari ahabereye imvururu, dore ko umwe mu bakubiswe witwa Nyirangaruye, raporo ya muganga yerekana ko yagize ububabare bwa 80/100.

Ni ho urukiko rwahereye rwemeza ko hari impamvu zikomeye zituma batarekurwa ngo baburane bari hanze, rutegeka ko bafungwa iminsi 30.

Abo bayobozi bafunzwe n’Urwego rw’Igihugu rw’Ubugenzacyaha( RIB) ku itariki 14 Gicurasi 2020, nyuma y’imvururu bagaragayemo bakubita Nyirangaruye Uwineza Clarisse na musaza we witwa Manishimwe Jean Baptiste ku itariki 13 Gicurasi 2020.

Ni urubanza rwaburanishijwemo Uwahoze ayobora umurenge wa Cyuve Sebashotsi Gasasira Jean Paul, Uwahoze ayobora akagari ka Kabeza Tuyisabimana Jean Leonidas na DASSO Nsabinama Anaclet hamwe na Dasso Abiyingoma Sylvain.

Abo bayobozi ubwo bagezwaga mu rukiko saa tatu, bagaragarijwe icyaha baregwa cyo gukubita no gukomeretsa ku bushake, basabwa kwiregura kuri icyo cyaha nyuma y’uko batawe muri yombi n’Urwego rw’igihugu rw’Ubugenzacyaha(RIB) ku itariki 14 Gicurasi 2020 bashinjwa gukubita no gukomeretsa ku bushake abaturage babiri ari bo Nyirangaruye Uwineza Clarisse na musaza we Manishimwe Jean Baptiste nyuma y’uko ngo bari batari bambaye agapfukamunwa.

Ni urubanza rwamaze amasaha atatu, aho abaregwa bari bafite abunganizi mu by’amategeko babiri, urubanza rutangira ubushinjacyaha busobanura ibyaha abo bayobozi baregwa, bugaragaza n’icyo abatangabuhamya bane bavuga, muri urwo rubanza hakaba hifashishijwe na Video y’ahabereye icyaha.

Ubushinjacyaha bwatangiye bushinja abo bayobozi bane icyaha cyo gukubita no gukomeretsa ku bushake, bubasabira igifungo cy’agateganyo bagendeye ku ngingo ya 74, iya 75, iya76 na 77 zo mu gitabo cy’amategeko y’ibyaha nshinjabyaha.

Bagaragaje uburyo abo bayobozi bakubise Manishimwe Jean Baptiste na Mushiki we ku itariki 13 Gicurasi 2020, mu masaha ya saa yine z’amanywa babakuye mu rugo ku gahato nk’uko Museruka John, umwe mu bashinjacyaha babiri bari muri urwo rubanza yabivuze.

Yagize ati “Ubwo Manishimwe yari ku muhanda ategereje umuntu bahanye gahunda ko aza kumwishyura amafaranga yari amurimo, yabonye aba Dasso babiri baza bamusatira yirukira iwabo. Nibwo aba Dasso binjiye mu rugo, bakigerayo bafata Manishimwe bamukurura yanga, kugeza ubwo ibiti by’amarembo y’urugo byangiritse ubwo bamujyanaga ku muhanda bakoresheje ingufu”.

Umushinjacyaha yavuze ko bakimara kugeza Manishimwe ku muhanda batangiye kumukubita ari nako atabaza. Nibwo mushiki we yahise atabara, akigera ku muhanda na we baramufata batangira kumukubita, bigera ubwo Umuyobozi w’Akagari ka Kabeza yafashe inkoni nini y’igiti cy’umukoropesho atangira kugikubita uwo mukobwa.

Ngo mu kanya gato ubwo Gitifu w’akagari na Dasso barimo bakubita uwo mukobwa na musaza we, ari nako abaturage bavuza induru batabariza abakubitwa, ngo nibwo Gitifu Sebashotsi yahageze, afata inkoni Gitifu w’akagari yari afite atangira gukubita Nyirangaruye, aribwo imodoka ya Polisi yahageze ihosha izo mvururu.

Muri urwo rubanza kandi hifashishijwe Video yafashwe muri izo mvururu, ndetse hasomwa n’ibitekerezo by’abatangabuhamya bane, bari aho izo mvururu zabereye, aho bashinja ubwo buyobozi icyaha cyo gukubita abaturage no kubakomeretsa.

Ubuhamya bw’umwe muri abo batangabuhamya buremeza ko abo ba Dasso babiri ari bo babaye nyirabayazana w’izo mvururu nk’uko Umushinjacyaha yabigaragaje asomera mu ruhame ubwo buhamya.

Ati “Ubwo Nyirangaruye yabonaga Manishimwe bamukubita atabaza, yavuye mu rugo ajya gutabara musaza we akihagera na we baramufata, Gitifu Tuyisabimana aba ari we umukubita inkoni ya mbere. Nyuma Gitifu w’umurenge Sebashotsi wari wazindukiye mu bikorwa by’ubukangurambaga bwo kwirinda COVID-19 akihagera yatse Tuyisabimana ya nkoni atangira guhondagura uwo mukobwa kugeza ubwo bamwambika ubusa mu ruhame, abaturage baje gukiza na bo abirukaho abakangisha inkoni yari afite y’igiti cy’umukoropesho”.

Yongeye agira ati “Imodoka ya Polisi yahise ihagera, Sebashotsi abonye imodoka ya Polisi ahita ahereza Gitifu w’akagari ya nkoni, ahita ayijugunya mu murima w’ibishyimbo mu rwego rwo gusibanganya ibimenyetso biba ngombwa ko bajya kuyishaka, ngiyi twanayizanye.

Nyuma y’ibyo birego, Mukambaraga Jeanne Perezida w’inteko iburanisha yasabye abarengwa kwiregura, hanarebwa Video n’amashusho byafatiwe muri izo mvururu, ari na byo ubushinjacyaha bwagiye bushingiraho busabira abarengwa gufungwa by’agateganyo.

Sebashotsi wabimburiye abarengwa, mu kwiregura kwe yemera icyaha aregwa ariko avuga ko atagikoze ku bushake ahubwo ko ari bwo buryo yahisemo bwo gukemura amakimbirane no gukiza Dasso Nsabimana Anaclet wari mu bubabare aho yari yarumwe ku kuboko.

Yagize ati “Ndemera icyaha cyo gukubita Nyirangaruye, gusa nabikoze mu buryo bwo guhosha imvururu no gukiza Dasso waribwaga amenyo na Nyirangaruye. Ntabwo namukubise ku bushake kuko ntabwo ari umuntu nsanzwe nzi, naje hari imvururu nyinshi abantu basahinda bari mu gihiriri, hari uwari afite inkoni ndayimwaka ngira ngo mposhe imvururu by’umwihariko nkiza Dasso wari wafatishijwe amenyo na Nyirangaruye, kwari ukumukanga ngo amurekure, nayimukubise rimwe ku kibuno mu buryo ntagambiriye”.

Gitifu Sebashotsi abajijwe kuri Video agaragaramo yitwara nabi muri izo mvururu yagize ati uwafashe iyi video yari afite ikindi agambiriye, inkoni ndemera ko nayikoresheje ariko kwari uguhosha imvururu, ntabwo nari ngambiriye gukubita abaturage.

Umwunganizi we mu mategeko yavuze ko ibigaragara muri video bidakwiye gushingirwaho bishinja icyaha Sebashotsi, kuko ibyo yakoze ngo ari bwo buryo bwari busigaye mu guhosha imvururu.

Ati “Ntabwo yari kubasha gukoresha ijwi muri kariya kavuyo mbonye muri video, ni yo mpamvu byabaye ngombwa ko akubita. Nta kundi yari kubigenza ngo abo bantu barekurane. Nabonye muri Video Sebashotsi abwira uyu mukobwa ati haguruka tugende, uyu Sebashotsi Jean Paul murabona ko ari umusore ufatika, iyo aba umunyarugomo yari kumwongeza izindi nkoni ntiyari kumwinginga”.

Abo bunganizi bavuze ko urukiko rudakwiye kureba ibintu mu ruhande rumwe, bakareba n’uruhare rwa Nyirangaruye muri izo mvururu, bavuga ko iyo Nyirangaruye aza gukiza musaza we atarwanya inzego z’umutekano, ko izo mvururu zitari kuba, basaba ko Sebashotsi arekurwa akaburana adafunze dore ko yari yatangiye na gahunda yo gusaba imbabazi nk’uko umwe mu bamwunganira yabivuze yifashishije ingingo ya 97 y’itegeko rigenga imiburanishirize nshinjabyaha.

Ati “Iki ni icyaha kitatuma atoroka dore ko yari yatangiye gahunda yo gusaba imbabazi Nyirangaruye yakubise. Ni umugabo ufite urugo usanzwe arangwa n’imyitwarire myiza, nta cyatuma asibanganya ibimenyetso, kurekurwa ni inzira nziza yamutera gukomeza umugambi yatangiye wo gusaba imbabazi n’umuryango uremera gutanga ingwate zisabwa”.

Ku bandi baregwa, umwe witwa Dasso Nsabimana Anaclet wagaragaye muri Video akubita Nyirangaruye inshyi, ni we wemera icyaha avuga ko yabitewe n’uburakari nyuma y’uko Nyirangaruye yari amaze kumuruma ku kuboko.

Gitifu w’Akagari ka Kabeza Tuyisabimana Jean Leonidas na Dasso Abiyingoma Sylvain bo barahakana icyaha baregwa, basaba kurekurwa, nyuma y’uko ngo muri video nta kimenyetso kibagaragaza bakubita abaturage.

Ubushinjacyaha bwagaragaje raporo ya muganga y’uko Nyirangaruye yakomerekejwe cyane ku bubabare bwo ku kigero cya 80%, aho bishobora kumuviramo ubumuga budakira.

Nyuma yo kumva ibisobanuro by’ubushinjacyaha n’ukwiregura kw’abaregwa, Perezida w’inteko iburanisha urwo rubanza, yavuze ko ruzasomwa kuri uyu wa kane tariki 28 Gicurasi 2020 saa mbili za mu gitondo.

Kamanzi Jean Bosco, Umuyobozi mushya w’Umurenge wa Cyuve

Kamanzi w’imyaka 41 y’amavuko yari asanzwe ashinzwe Ubuzima, isuku n’isukura mu Murenge wa Muhoza. Asimbuye kuri uwo mwanya Sebashotsi Jean Paul nyuma y’uko atawe muri yombi n’Urwego rw’Igihugu rushinzwe Ubugenzacyaha(RIB), ku itariki 14 Gicurasi 2020 akekwaho icyaha cyo gukubita no gukomeretsa bamwe mu baturage asanzwe abereye umuyobozi.

Nyuma y’uko gutabwa muri yombi ari hamwe n’umuyobozi w’Akagari ka Kabeza ko mu Murenge wa Cyuve, n’aba Dasso babiri, ubuyobozi bw’Akarere ka Musanze bwafashe umwanzuro wo kuba bubahagaritse mu kazi.

Aganira na Kigali Today ku murongo wa telefoni, Umunyamabanga Nshingwabikorwa mushya w’Umurenge wa Cyuve, Kamazi Jean Bosco, yavuze ko yamaze gutangira inshingano nshya yahawe aho yiteguye kuzisoza neza ku bufatanye n’abaturage.

Yagize ati “Imirimo mishya nayitangiye uyu munsi saa mbili. Ingamba za mbere mfite ni ukwegera abaturage kurushaho, kubatega amatwi, kugisha inama no gukorana na bo neza”.

Avuga ko imbogamizi azahura na zo, azakoresha uko ashoboye akazishyira ku ruhande, mu rwego rwo kurushaho gufasha abaturage ashinzwe.

Agira ati “Nta mpamvu yo kwiyaturiraho ikibi, nta mbogamizi nteganya. Nzakora uko nshoboye imbogamizi zince ku ruhande. Nzarushaho gukorana na bagenzi banjye, kuko umwe arya bihora. Imyaka nari maze mu nshingano mu wundi murenge, bizamfasha gukomeza kuba hafi y’abaturage no gukorana na bo neza mfatanyije n’izindi nzego tuzakorana”.

Uwo muyobozi wari umaze imyaka itatu ashinzwe ubuzima, isuku n’isukura mu Murenge wa Muhoza, yaje muri iyo mirimo avuye mu Murenge wa Gataraga, aho yari ashinzwe Ubuzima n’imibereho myiza y’Abaturage.

Kamanzi, uvuka mu Murenge wa Remera mu Karere ka Musanze, yize amashuri kugeza ku rwego rwa Kaminuza(A0), aho yarangije muri Kaminuza y’u Rwanda mu ishami rya Psychologie Clinique akaba afite umugore n’abana batatu.

Ni na we wahawe igihembo cy’umukozi w’umurenge witwaye neza mu mwaka ushize, aho yari umukozi w’Umurenge wa Muhoza.

Iyi foto yakuwe mu mashusho yakwirakwiriye ku mbuga nkoranyambaga agaragaza abo bayobozi bakubita abo baturage

Abo bayobozi bahagaritswe ku mirimo by’agateganyo, nyuma y’uko Urwego rw’igihugu rushinzwe Ubugenzacyaha (RIB) rutangaje ko rwabafashe bakaba bakurikiranyweho icyaha cyo gukubita no gukomeretsa bamwe mu baturage bayoboye.

Urwego rw’Ubugenzacyaha (RIB) rwatangaje ko ku wa kane tariki 14 Gicurasi 2020 rwafunze Umunyamabanga Nshingwabikorwa w’Umurenge wa Cyuve mu Karere ka Musanze witwa Sebashotsi Gasasira Jean Paul; Umunyamabanga Nshingwabikorwa w’Akagari ka Kabeza witwa Tuyisabimana Jean Leonidas, n’abacunga umutekano babiri bazwi ku izina rya ba DASSO ari bo Nsabimana Anaclet na Abiyingoma Sylvain.

Umuyobozi w’Akarere ka Musanze Nuwumuremyi Jeannine yavuganye na Kigali Today, yemeza ayo makuru y’ihagarikwa ry’abo bayobozi.

Yavuze ko bahagaritswe hakurikijwe amategeko, ati “Ni ugukurikiza amategeko, kuko iyo umuntu akekwaho icyaha gikomeye cyangwa ikosa rikomeye ahagarikwa by’agateganyo mu gihe iperereza rigikorwa”.

Yongeyeho ati “Uretse no gukubita umuturage uyobora, no gukubita no gukomeretsa ni icyaha gihanwa n’amategeko nk’uko tubizi, noneho iyo bigaragaye ko wahohoteye cyangwa wakubise uwo uyobora ni icyaha kiremereye. Hari inzego zibishinzwe ziri gukora iperereza, ubwo hagati aho itegeko rivuga ko bahagarikwa iperereza rigakomeza, batagaragaraho icyaha nyine ubwo bakaba abere. Abagaragaye mu cyaha bose bahagaritswe”.

Uwo muyobozi, avuga ko yababajwe n’uburyo yabonye abayobozi bakubita abaturage muri video yagiye icicikana ku mbuga nkoranyambaga, yemeza ko ari ibintu bidakwiye kuba mu Rwanda.

Ati “Nayibonye nk’uko abantu bose bayibonye ariko ni ikintu kibabaje cyane, nta wundi muntu wakwifuza kongera kubona video nk’iriya. Ni ibintu bibabaje, kandi ni ibikorwa bidakwiye kugaragara hano mu gihugu cyacu cy’u Rwanda”.

Meya Nuwumuremyi avuga ko kuba abo bayobozi bane bahagaritswe, ko nta cyuho bitera mu baturage, aho yabijeje ko ubuyobozi buhari kandi ko bukomeza kubaba hafi.

Agira ati “Burya ubuyobozi ntabwo ari umuyobozi, umuyobozi iyo ahagaritswe ku buryo ubwo ari bwo bwose, ubuyobozi buba buhari.

Wenda uwo bari bamenyereye ubu tuvugana abaye ahagaze mu gihe hagikorwa ibigomba gukorwa, ariko ubuyobozi bwo burahari, ubutumwa natanga ni uko abaturage bahohoterwa basabwa kubivuga hakiri kare kugira ngo batabarwe”.

Ati “Ariko n’abaturage turabasaba gukora ibyo bagomba gukora, bubahiriza amabwiriza n’amategeko ariko cyane cyane umuyobozi mwiza ntabwo ahohotera abaturage ayobora, araberekera, akabasobanurira, akabigisha kugira ngo babashe kwiteza imbere mu bintu bumva neza”.

Ingingo ya 121 y’itegeko Nº68/2018 ryo ku wa 30/08/2018 riteganya ibyaha n’ibihano muri rusange, iteganya ko umuntu wese ukomeretsa undi, amukubita cyangwa se amusagararira ku buryo bwa kiboko, bubabaje ko aba akoze icyaha.

Mu gihe abihamijwe n’urukiko, ahanishwa igifungo kitari munsi y’imyaka itatu ariko kitarenze imyaka itanu, n’ihazabu y’amafaranga y’u Rwanda atari munsi y’ibihumbi 500 ariko atarenze miliyoni imwe.

Mu gihe icyo cyaha gikorewe umwana, umubyeyi, uwo bashakanye cyangwa umuntu udashoboye kwitabara kubera imiterere ye y’umubiri cyangwa mu bwenge, ahanishwa igifungo kirenze imyaka itatu, ariko kitarenze imyaka umunani, n’ihazabu y’amafaranga y’u Rwanda atari munsi ya Miliyoni imwe.

RIB ibinyujije kuri Twitter, yatangaje ko aba bose bakurikiranyweho icyaha cyo gukubita no gukomeretsa Dushime Jean Baptiste na Nyirangaruye Uwineza Clarisse. RIB ivuga ko bafungiwe kuri sitasiyo ya RIB ya Muhoza mu gihe hakorwa dosiye kugira ngo ishyikirizwe Ubushinjacyaha.

Abaturanye n’abahohotewe bavuga ko byabaye ku wa gatatu tariki 13 Gicurasi 2020, amakimbirane akaba ashobobora kuba yaraturutse ku bayobozi basabye abo baturage kwambara udupfukamunwa nyamara ntibabyubahirize.

RIB irongera kwibutsa ko gukubita no gukomeretsa ari icyaha gihanwa n’ingingo ya 121 y’itegeko Nº68/2018 ryo ku wa 30/08/2018 riteganya ibyaha n’ibihano muri rusange.

Uyu munsi RIB yafunze Umunyamabanga Nshingwabikorwa w'Umurenge wa Cyuve mu Karere ka #Musanze, Sebashotsi Gasasira Jean Paul; Umunyamabanga Nshingwabikorwa w'Akagari ka Kabeza Tuyisabimana Jean Leonidas, ba DASSO Nsabimana Anaclet na Abiyingoma Sylvain.

— Rwanda Investigation Bureau (@RIB_Rw) May 14, 2020

Abicaye imbere (bubitse imitwe) uko ari batandatu ni bo bakurikiranywe n’ubutabera

Abo ni Munyakazi Evariste, Nsengiyumva Theoneste, Munyamahoro Innocent, Hitimana Jean de Dieu bakunze kwita Bondo akaba ari n’umukuru w’umudugudu, Mugiraneza Ildephonse na Uwamariya Vincensiya.

Aba bose uko ari batandatu bakekwaho ibyaha bine bahuriyeho birimo ivangura, ubwicanyi, gutwikira undi no gukomeretsa ku bushake; hakabamo n’ibyo bakekwaho gukora mu bihe bitandukanye.

Bose bagejejwe imbere y’Urukiko rw’Ibanze rwa Muhoza, baburanishwa ku ifungwa n’ifungurwa ry’agateganyo, nyuma y’uko urubanza rwari rusubitswe inshuro eshatu.

Nyuma yo kumenyeshwa imyirondoro yabo bikozwe n’uwari uyoboye iburanisha, umushinjacyaha yatangiye amenyesha buri umwe ibyaha acyekwaho birimo amakimbirane ndetse n’itoteza bakoreraga umuryango wa Manifashe Jerome na Sifa Celestine.

Umushinjacyaha yavuze ko ibi byaje no kugera ubwo ku itariki ya 22 Gashyantare 2020, abana babiri b’abakobwa b’uyu muryango batwikiwe mu nzu, ababikoze bamennye ikirahuri cy’idirishya, maze umwe muri abo bana agahita ahasiga ubuzima undi akaba arwaye bikomeye mu bitaro bya Gisirikare bya Kanombe.

Impamvu zikomeye umushinjacyaha yahereyeho mu iburanisha zigaragaza ko aba uko ari batandatu bakekwaho ibi byaha, zirimo kuba aba bose bahuriye ku migambi bakekwaho gucura yagiye inashyirwa mu bikorwa harimo kuba Munyakazi Evariste (ufunganywe n’abana be babiri), yarafunze umuhanda ugana kwa Manifashe na Sifa akoresheje urukuta rw’amabuye, kugeza ubwo imodoka yabo imaze umwaka yaraheze mu gipangu kubera kubura inzira yagombaga gusohokeramo.

Mu zindi mpamvu ngo ni ukuba abakekwa baragiye barangwa n’imvugo zihembera urwango aho babwiraga Manifashe ko yarongoye ‘Umututsikazi’ kandi bidashobora kwihanganirwa, ibintu byagiye binakurikirwa no kumubwira amagambo y’uko ari inzoka iryana, kujugunya muri uru rugo imyanda iva mu musarani ndetse ngo hari n’igihe bigeze gukubita bakomeretsa uyu Manifashe mu mutwe.

Umushinjacyaha yanavuze ko mu bakekwaho ibi byaha harimo n’abari mu nzego z’ubuyobozi bw’ibanze, barimo Nsengiyumva Theoneste, ushinzwe ubukungu muri kamwe mu tugari two mu Murenge wa Kabatwa, na Hitimana Jean de Dieu, umukuru w’Umudugudu wa Marantima mu Murenge wa Cyuve ibi byaha byabereyemo, bigakorwa kuva mu mwaka wa 2015 areberera ntiyiyambaze inzego zimukuriye.

Mu Rukiko rw’Ibanze rwa Muhoza

Mu bindi umushinjacyaha yavuze, birimo kuba mu ibazwa ry’abaregwa ryabereye mu bugenzacyaha harimo kuba Munyakazi yaremereye ubugenzacyaha ko mu bo akekaho ubugizi bwa nabi bwo gutwikira abana mu nzu, harimo abana be babiri Munyamahoro na Uwamariya banafunganywe.

Umushinjacyaha anagaragaza ko uyu Munyamahoro wabwiye ubugenacyaha ko Nsengiyumva yamwibwiriye ko azatuza ari uko yivuganye Sifa; yahereye aha avuga ko izi mvugo z’aba bose bageze mu bushinjacyaha ubwo bisobanuraga bakabihakana kandi bari babyemereye mu bugenzacyaha.

Abakekwaho icyaha buri umwe yahawe umwanya wo kwisobanura bose bahakana ibi byaha bakurikiranyweho, ndetse basaba umucamanza wari uyoboye iburanisha gushingira ku bisobanuro batangiye mu bushinjacyaha kuko mu bugenzaha babazwa batari bameze neza.

Ikindi bahurizaho ni uko icyaha cyo gutwikira abana mu nzu kiba nta n’umwe wari uhari muri bo, kuko buri wese yari mu kazi ke, aho batahiye bakaba barasanze icyaha cyamaze gukorwa.

Abakurikiranyweho ibi byaha barimo Hitimana na Munyakazi n’abagize umuryango we bafunganywe bafite abunganizi.

Aba bunganizi basobanuye ko abo bunganira nta ruhare bigeze bagira muri ibi byaha bakurikiranyweho, kuko yaba ba nyir’ubwite babikorewe n’abatangabuhamya babajijwe nta n’umwe ugaragaza ko yigeze abona umwe muri bo ahabereye icyaha.

Babasabiye gufungurwa by’agateganyo bagakurikiranwa bari hanze, kuko nta n’impamvu cyangwa ibimenyetso bifatika byashingirwaho babihamywa, kandi ngo ntibanatoroka ubutabera.

Umushinjacyaha yasabye umucamanza ko ibyo abaregwa biyemereye bakiri mu bugenzacyaha n’ibindi bashinjwa bihabwa agaciro kuko banisobanura bari bameze neza, bityo ngo nta mpamvu ifatika nk’uburwayi cyangwa ikindi kintu ababihakana bagaragaza bashingiraho bavuga ko batari bameze neza.

Ubushinjacyaha bwasabiye abakekwa gufungwa iminsi 30by’agateganyo kugira ngo hakorwe iperereza rihagije, hanakusanywe ibindi bimenyetso kandi bunasaba urukiko gusuzuma mu bushishozi ibyo baregwa.

Biteganyijwe ko imyanzuro y’uru rubanza ku ifungwa n’ifungurwa ry’agateganyo izasomwa kuwa gatanu w’iki cyumweru tariki 13 Werurwe 2020 saa cyenda z’amanya.

Aba bana b’uwitwa Manifashe Jerome na Sifa Celestine, batwitswe n’abantu bataramenyekana binjiye mu rugo ahagana mu ma saa kumi n’imwe z’umugoroba bamena ikirahuri babatwikira mu cyumba barimo bombi.

Umubyeyi w’aba bana yagize ati “Ejo nka saa kumi n’imwe nasohotse mu rugo ngiye kuri botiki guhaha nsiga abana bari mu cyumba, ngarutse ntungurwa no kumva batabaza, nkinguye nsanganirwa n’inkongi y’umuriro”.

Uyu muryango umaze imyaka irenga ine uhohoterwa n’abaturanyi.

Uyu mugore akomeza avuga ko bamaze imyaka bahohoterwa n’abaturanyi aho babatera amabuye, kubatuka aho bagera n’aho bamubwira ko atari akwiye kuza kuhatura kuko badahuje ubwoko.

Iki kibazo bagiye bakigeza mu nzego z’ubuyobozi zirimo, umudugudu, polisi na RIB kugeza ubwo bamwe mu bakekwaga bigeze gufungwa ariko bamwe bagafungurwa.

Umukuru w’umudugudu wa Marantima witwa Hitimana Jean de Dieu, ari mu bakekwa kwihisha inyuma y’uyu mugambi, dore ko ari inshuro nyinshi yagiye agirana amakimbirane n’uyu muryango, bikagezwa mu nzego z’umutekano ku rwego rw’umurenge ariko ngo ntibigire icyo bitanga.

Sifa Celestine yagize ati “Ikibazo kimaze imyaka irenga ine, twageze henshi dutaka ngo dutabarwe, ari abaduteraga amabuye, abatubwiraga amagambo asesereza byose ntaho tutageze ngo dutabaze, ariko bigasa nk’aho tudafite uwo dutakira, none bigeze n’aho turi gutwikirwa mu nzu habona, dukeneye umutekano usesuye, tukabaho nk’uko abandi bidegembya”.

Mu bindi bibazo bavuga binazwi n’ubuyobozi kugeza ku rwego rw’umurenge birimo imodoka yabo yaheze mu gipangu bitewe n’uko abo baturanyi bashyize uruzitiro rw’amabuye aho yasohokeraga.

Iki kibazo bakigejeje mu nzego z’ubuyobozi ku murenge butegeka ko urwo ruzitiro rukurwaho ariko ntibyigeze bikorwa nyamara aho yanyuraga ari ba nyirubwite bari baraguze inzira.

Ikibazo cyatangiye gukara nyuma y’aho uyu Manifashe Jerome ashakanye na Sifa Celestine, bavuga ko mu baturanyi babahozaga ku nkeke bababwira ko badashaka uyu mugore kuko badahuje ubwoko.

Abazi ibibazo by’uyu muryango barimo n’umukecuru witwa Agnes bavuga ko batangazwa no kubona abantu bahohoterwa mu buryo bugaragarira benshi, ntibarenganurwe mu buryo burambye.

Yagize ati “Ikibazo cyabo kizwi kuva cyera, abakagombye kugikemura ubona bagenda biguru ntege, none bigeze n’aho abantu batangiye kwicwa, ubu natwe ubwoba bwadutashye, twatangiye kugira impungenge z’uko ari twe turi bukurikireho nk’uku babikoreye abangaba”.

Umuvugizi w’Urwego rw’Igihugu rw’Ubugenzacyaha (RIB), Marie Michelle Umuhoza, yemeje aya makuru, avuga ko bahise batangira iperereza.

Yagize ati "Ari abana batwikiwe mu nzu, ari ibirebana n’ingengabitekerezo ivugwa muri abo baturage byose twabimenye. Turi kubikoraho iperereza kugira ngo hamenyekane ukuri kwabyo, no kugira ngo ababifitemo uruhare bamenyekane bashyikirizwe ubutabera".