Ni urubanza rwatangiye mu mizi aho aregwa icyaha cyo gukubita, gukomeretsa no guhoza ku nkeke uwo bashakanye, akaba yarafunzwe ku itariki 30 Kanama 2019.

Ni nyuma y’uko Ndabereye ajuririye icyemezo cyafatiwe mu rubanza ku ifunga n’ifungura ry’agateganyo, aho ku itariki 21 Mutarama 2020 inteko y’iburanisha yanzuye ko Ndabereye akomeza kuburana ari muri gereza nyuma y’uko abishingizi be byagaragaye ko badafite ibyangombwa byerekana ubunyangamugayo.

Mu rubanza rwatangiye mu mizi ku itariki 29 Mutarama 2020, Ndabereye yavuze ko atiteguye kuburana uyu munsi kubera ko atarabona icyemezo ku bujurire bwe ku ifunga n’ifungura mu Rukiko rukuru urugereko rwa Musanze, nyuma y’uko Urukiko rwisumbuye rwa Musanze rwanzuye ko akomeza kuburana afunze.

Indi ngingo Ndabereye ashingiraho yemeza ko atiteguye kuburana ni uko ngo atabonye umwanya wo gutegura urubanza rwo kuburana mu mizi, kuko yateguraga urubanza rwe rw’ubujurire ku ifunga n’ifungura.

Inteko iburanisha yahise ijya kwiherera isuzuma icyo kibazo igaruka itanga umwanzuro ko izo mpamvu Ndabereye atanga zitemewe, aho urukiko rwamusabye kuburana imyanzuro ku bujurire bwe ku ifunga n’ifungura ikazashyirwa mu bikorwa.

Urubanza rwahise rutangira kuburanishwa mu mizi. Nyuma yo kumenyeshwa ibyo aregwa, Ndabereye asaba ko urubanza rwe rwabera mu muhezo kubera amagambo yibanga ry’umuryango azavugirwa muri urwo rubanza, avuga ko kuburanishirizwa mu ruhame bishobora kuba byabangamira ubwisanzure bw’uburana n’abatangabuhamya.

Ubwo busabe bwa Ndabereye bwanenzwe n’ubushinjacyaha, bwemeza ko nta kintu kidasanzwe Ndabereye ashingiraho asaba ko urubanza ruburanishirizwa mu muhezo, kandi ko atigeze abigaragariza urukiko mbere.

Ubushinjacyaha busanga nta mpamvu n’imwe uburana agaragaza ishobora guhungabanya umuryango Nyarwanda mu gihe urubanza rwabera mu ruhame.

Ndabereye yongeye kubazwa ingingo zihariye ashingiraho asaba ko urubanza ruburanushirizwa mu muhezo, ati “Muri uru rubanza hazagaragaramo ukwisobanura ku wo twashakanye, hari amabanga y’urugo azavugirwa muri uru rubanza, hari n’ibindi bizagaragazwa byerekeye imico mbonezabupfura mu miryango, kandi itegeko nshinga mu ngingo ntibuka neza irabinyemerera igaragaza ubwubahane ubufatanye n’ubworoherane mu rukiko”.

Perezida w’inteko iburanisha urwo rubanza, nyuma yo gusuzuma icyifuzo cya Ndabereye hagendewe ku ngingo ya 131 y’Itegeko Nshinga, yemerera ubusabe bw’umwe mu baburana cyangwa bombi ko urubanza ruburanishirizwa mu muhezo, yavuze ko urukiko rwanzuye ko ibyo Ndabereye asabye byo kuburanira mu muhezo bifite ishingiro, rutegeka ko abitabiriye urubanza basohoka urubanza rukabera mu muhezo.

Ndabereye Augustin ashinjwa gukubita no gukomeretsa umugore we

Ndabereye Augustin yafunzwe ku itariki 30 Kanama 2019 aho akekwaho icyaha cyo gukubita, gukomeretsa no guhoza ku nkeke uwo bashakanye.

Ni urubanza rwasomwe ku gicamunsi cyo kuri uyu wa kabiri tariki 21 Mutarama 2020, nyuma y’uko rusubitswe ku itariki 11 Mutarama 2020 ku mpamvu z’uko Perezida w’iburanisha Munyawera Sophonie yari yitabiriye amahugurwa mu Karere ka Nyanza.

Ubwo isomwa ry’urwo rubanza ryasubukuwe ariko ntiryitabirwa na Ndabereye Augustin. Perezida w’urukiko yagarutse ku ngingo Ndabereye yatanze ku ifunga n’ifungura aho yari yagaragaje ko nta mpungenge urukiko rukwiye kumugiraho kuko ngo igihe amaze afunze cyamuhaye isomo akaba yaramaze kwisubiraho.

Izindi ngingo yatanze ni ingwate aho yemeye gutanga abishingizi barimo ababyeyi be n’abavandimwe be ndetse agatanga n’imitungo ye itimukanwa irimo ikibanza n’inzu ndetse n’imodoka ye igashyirwa mu maboko y’urukiko yemeza ko n’umugore we yamaze kwandikira urukiko amusabira imbabazi kandi ko ngo banabanye neza ndetse ngo akaba amusura muri gereza anamugemurira.

Muri urwo rubanza, Ubushinjacyaha bwagaragaje impungenge zinyuranye aho bwavuze ko Ndabereye yatanze ikirego mu buryo bunyuranyije n’amategeko kuko ngo ari igihe cyo kuburana mu mizi.

Ikindi ngo ni uko kuba yafungurwa bishobora kubangamira ubutabera kuko nta kigaragaza ko icyaha afungiwe atakongera kugisubiramo.

Mu isomwa ry’urubanza ku kirego cya Ndabereye ku ifunga n’ifungurwa, urukiko rwemeje ko ikirego cya Ndabereye gifite ishingiro, hagendewe ku ngingo ya 96 y’itegeko ry’imiburanishirize y’imanza mpanabyaha aho nyuma y’iminsi 30 y’ifungwa ry’agateganyo itegeko riha uburenganzira ufunze kuba yatanga ikirego asaba gufungurwa akaburanishwa mu mizi ari hanze.

Ku mpamvu zijyanye n’abishingizi ndetse n’ingwate, urukiko rwagaragaje ko zidafite ishingiro kuko abishingizi yatanze atagaragaje ibyemezo byerekana ko ari inyangamugayo, urukiko rutegeka ko Ndabereye akomeza gufungwa by’agateganyo kugeza ubwo azaburana mu mizi.

Augustin Ndabereye wahoze ari Visi Meya w’Akarere ka Musanze

Ni isomwa ry’urubanza ryari riteganyijwe kuri uyu wa kabiri tariki 14 Mutarama 2020 saa munani n’igice, nk’uko byanzuwe na Perezida w’iburanisha, ku itariki 09 Mutarama 2020.

Amakuru Kigali Today ikesha ubwanditsi bukuru bw’Urukiko rwisumbuye rwa Musanze, aremeza ko iryo somwa ry’urubanza ryasubitswe ku mpamvu z’uko Perezida w’iburanisha, Munyawera Sophanie, yitabiriye amahugurwa abera mu karere ka Nyanza.

Ubwanditsi bukuru bw’urwo rukiko buvuga ko isomwa ry’urwo rubanza ryimuriwe ku itariki 21 Mutarama 2020, aho ruzasomerwa mu rukiko rwisumbuye rwa Musanze saa munani n’igice.

Ni urubanza Ndabereye yari yatanzemo ikirego, aho yemezaga ko uburyo afunzwemo bunyuranyije n’amategeko, avuga ko iminsi 30 y’agateganyo urukiko rwari rwategetse ko afungwa yarangiye, akaba amaze amezi ane muri gereza adahabwa itariki yo kuburana mu mizi.

Ni ikirego yatanze agendeye ku ngingo ya 96 ijyanye n’imanza nshinjabyaha riha uburenganzira umuntu ufunzwe by’agateganyo iminsi irenze 30 y’igihano cyagenwe, aho mu gihe adahawe itariki yo kuburana mu mizi, uregwa yatanga ikirego ku ifungwa n’ifungurwa ry’agateganyo.

Ni byo Ndabereye yashingiyeho atanga ikirego ku irekurwa ry’agateganyo akaburana ari hanze, aho yamenyesheje urukiko ko igihe amaze muri gereza yamaze gukosoka, mu kumara urukiko impungenge yemeza ko aramutse afunguwe by’agateganyo atasubira mu rugo rwe, ko ahubwo yakwikodeshereza inzu yo kubamo cyangwa akayihabwa n’urukiko mu kubungabunga umutekano w’umugore.

Ndabereye kandi ashingiye ku ngingo ya 80 na 81 zigenga imiburanishirize y’imanza mpanabyaha, yijeje urukiko ingwate, mu rwego rwo kugaragariza urukiko ko atazatoroka ubutabera kandi ko nta kintu azigera yangiza mu gihe arekuwe by’agateganyo, asaba ko imodoka ye yajya mu maboko y’urukiko ndetse agatanga n’abishingizi banyuranye kandi bafite imitungo ihagije.

Uwo mugabo kandi ubwo yari mu rubanza, yemereye urukiko ko yamaze kwiyunga n’umugore we Kamariza Olive, yemeza ko ubu babanye neza, ndetse ko anamusura muri gereza akanamugemurira, avuga ko umugore we yamaze no kwandikira urukiko asabira umugabo we imbabazi.

Ku rundi ruhande ariko, Kamariza Olive, umugore wa Ndabereye Augustin we kuri uyu wa kabiri tariki ya 14 Mutarama 2020, yanditse kuri Twitter, amenyesha Perezida wa Repubulika Paul Kagame n’abandi bayobozi ndetse n’inzego zinyuranye z’ubuyobozi, ko umutekano we waba utizewe mu gihe umugabo we yarekurwa by’agateganyo.

Uwo mugore yagaragarije Umukuru w’Igihugu n’abandi bayobozi ibihe binyuranye umugabo yagiye amuhohotera, ari na ko ngo uwo mugabo agirwa inama n’abayobozi bamukuriye barimo umuyobozi w’Akarere na Guverineri ariko biba iby’ubusa, kugeza ubwo akubise umugore mu ijoro ryo ku itariki 29 Kanama 2019 ndetse ngo anamupfura imisatsi, icyaha Ndabereye ubwe yiyemereye mu rukiko agisabira imbabazi.

Nyuma y’inyandiko ya Kamariza yishinganisha, bamwe mu bayobozi n’inzego bamusubije bamuhumuriza, bamwizeza ko ikibazo cye kiri gukurikiranwa n’inzego zibishinzwe, kandi ko Polisi y’Igihugu ikomeza kubungabunga umutekano we.

Minisitiri w’Ubutabera Johnston Busingye, yamusubije agira ati “ Madamu Kamaliza, watanze amakuru, waraburanye. Ubutabera burahari, ubwizere. Ihohoterwa rishingiye ku gitsina, iryo ariryo ryose, twiyemeje kurirwanya tukarirandura. Uyu mwaka ingufu zizikuba kenshi. Dufatanyije nta kabuza tuzabigeraho”.

Guverineri w’Intara y’Amajyaruguru Jean Marie Vianney Gatabazi, na we yasubije Kamariza ati “Turakumenyesha ko polisi y’u Rwanda irimo gukurikirana ko ntawahungabanya ubuzima bwawe kandi nk’uko ubizi urubanza umugabo wawe aregwamo rwagombaga gusomwa uyu munsi, Parquet General rwimuriwe rwimuriwe tariki 29/01/2020 kuri Stade Ubworoherane”.

Ndabereye Augustin uregwa icyaha cyo gukubita, gukomeretsa no guhoza ku nkeke uwo bashakanye, yatawe muri yombi ku itariki 30 Kanama 2029, aburanishwa ku ifunga n’ifungurwa ku itariki 10 Nzeri 2019, urukiko rutegeka ko afungwa by’agateganyo iminsi 30.

Ndabereye Augustin yasabye gufungurwa by’agateganyo

Ndabereye Augustin yahoze ari Umuyobozi w’Akarere ka Musanze wungirije ushinzwe iterambere ry’ubukungu.

Uwo mugabo w’imyaka 45, asaba gufungurwa by’agateganyo agendeye ku ngingo ya 96 ijyanye n’imanza mpanabyaha, imuha uburenganzira bwo kurega asaba gufungurwa by’agateganyo mu gihe ategereje itariki yo kuburanishwa mu mizi.

Ndabereye wari kumwe n’umwunganira mu mategeko yasabye kandi kurekurwa agendeye ku ngingo ya 80 n’iya 81 zigenga imiburanishirize y’imanza mpanabyaha, aho yavuze ko yiteguye gutanga ingwate ku mitungo ye ndetse agaragaza amazina n’imyirondoro y’abishingizi be, mu kugaragaza ko atazigera atoroka ubutabera.

Ubwo busabe ku ifungurwa ry’agateganyo bwanenzwe n’umushinjacyaha, aho yavuze ko ikirego cyo gusaba gufungurwa kidakwiye kwakirwa n’urukiko, kuko cyasabwe mu buryo bunyuranyije n’amategeko aho icyo kirego cyamaze gufatirwa umwanzuro mu rubanza ku ifunga n’ifungurwa.

Umushinjacyaha, avuga ko mu byo Ndabereye avuga ko mu gihe afunguwe by’agateganyo atabangamira ubutabera ko nta gihamya n’imwe igaragaza ko Ndabereye yakosotse nk’uko abyemeza, ko adashobora kubangamira ubutabera cyangwa ngo asubire mu byaha aregwa byo gukubita no gukomeretsa umugore we.

Urukiko rwisumbuye rwa Musanze

Kuri icyo kibazo, Umwunganizi wa Ndabereye mu mategeko, yavuze ko hadakwiye kubaho impungenge zo kuba Ndabereye yafungurwa by’agateganyo akaburana ari hanze.

Avuga ko ubusanzwe ari umugabo w’inyangamugayo, uzwi na benshi kuko yahoze ari umuyobozi kandi ko gukubita umugore we byabaye nk’impanuka atari abigambiriye.

Avuga kandi ko n’abishingizi yatanze ari abantu bafite imitungo ifatika ndetse basaba ko n’imodoka ye yajya mu maboko y’urukiko ikaba ingwate.

Ndabereye ubwe, yemeje ko amezi ane amaze muri gereza yamukosoyeho byinshi, avuga ko yiteguye gusaba imbabazi umuryango Nyarwanda, kandi ko yamaze gusaba umugore we imbabazi kandi ko umugore we yamaze kuzimuha abikorera n’inyandiko ku itariki 9 Nzeri 2019, ndetse yemeza ko umugore we adasiba kumusura muri gereza aho afungiye.

Nyuma yo kumva impande zombi, Perezida w’iburanisha yashoje urubanza avuga ko urwo rubanza ruzasomwa ku itariki 14 Mutarama 2020.

Ndabereye Augustin araregera ifungurwa ry’agateganyo nyuma y’igihe cy’amezi ane asabiwe n’urukiko rw’ibanze rwa Muhoza gufungwa by’agateganyo mu gihe cy’iminsi 30, aho yahise ajyanwa muri Gereza nkuru ya Musanze.

Mu byaha Ndabereye akekwaho harimo gukubita, gukomeretsa no guhoza ku nkeke uwo bashakanye, aho Urwego rw’Igihugu rw’Ubugenzacyaha( RIB) rwamutaye muri yombi ku itariki 30 Kanama 2019.

Perezida w’iburanisha yagarutse ku byaha Ndabereye aregwa, birimo icyaha cyo gukubira, gukomeretsa no guhoza ku nkeke umugore we, maze urukiko rugendeye ku ngingo ya 121 n’iya 147 yo mu gitabo cy’amategeko mpanabyaha, rutegeka ko afungwa by’agateganyo iminsi 30.

Perezida wasomye urwo rubanza yavuze ko nyuma yo kumva ukwiregura kwa Ndabereye Augustin n’umwunganira mu mategeko mu iburanisha ryabaye kuwa kabiri tariki 10/9/2019, urukiko rwasanze Ndabereye agomba gufungwa iminsi 30, mu rwego rwo kwirinda ko hasibanganywa ibimenyetso no gukurikirana neza ibyaha aregwa.

Ndabereye utagaragaye mu isomwa ry’urubanza, mu iburanisha ryo kuwa kabiri, umwunganira yari yagaragaje inyandiko y’umugore we (Ndabereye), imusabira imbabazi.

Ndabereye Augustin yatawe muri yombi mu gitondo cyo kuwa 30 Kanama 2019, akekwaho icyaha cyo gukubita no gukomeretsa umugore we, anashinjwa icyaha cyo kumuhoza ku nkeke.

Mu kwiregura kuri ibyo byaha, Ndabereye yari yemeye icyaha cyo gukubita no gukomeretsa umugore we, ariko ahakana icyo kumuhoza ku nkeke.

Yavugaga ko adashobora kwemera icyo cyaha kuko ari ubwa mbere yari akubise umugore we, nubwo ubushinjacyaha bumushinja gukubita no gukomeretsa umugore we mu bihe binyuranye ndetse ngo ubuyobozi bumukuriye bukaba bwaramugiriye inama kenshi, ndetse n’umugore we akamusabira imbabazi ariko akabirengaho.

Inkuru bijyanye:

Uwahoze ari Visi Meya yemeye icyaha cyo gukubita no gukomeretsa uwo bashakanye

Ndabereye yemeye icyaha cyo gukubita no gukomeretsa umugore we ariko ahakana icyaha cyo kumuhoza ku nkeke

Yabivugiye mu rubanza ruri kuburanishwa ku ifunga n’ifungurwa ry’agateganyo, urubanza rwabereye mu rukiko rw’ibanze rwa Muhoza rwimuriye ibiro byarwo mu rukiko rwisumbuye rwa Musanze kuri uyu wa kabiri tariki 10 Nzeri 2019.

Nyuma yo gusomerwa ibyaha aregwa birimo gukubita, gukomeretsa no guhoza ku nkeke uwo bashakanye, Ndabereye Augustin yemeye ko yemera icyaha cyo gukubita no gukomeretsa ariko ko atemera icyaha cyo guhoza ku nkeke uwo bashakanye.

Yagize ati" Nemera icyaha cyo gukubita no gukomeretsa, ariko sinemera icyaha cyo guhoza ku nkeke umugore kuko guhoza ku nkeke ni icyaha cyisubiramo kandi njye namukubise rimwe."

Akimara kwisobanura, umushinjacyaha muri urwo rubanza witwa Buseruka John yagaragaje ibimenyetso binyuranye aho yanyomoje ukwiregura kwa Ndabereye, agaragaza ibihe bitandukanye Ndabereye yagiye ahohoteramo umugore we.

Umushinjacyaha yagaragaje ko Ndabereye ahohotera umugore bwa mbere byamenyekanye ku itariki 17/6/2014 amukubitira i Kigali.

Ngo hari aho yongeye kumukubita amuziza kumena ubuki.

Nk’uko umushinjacyaha yakomeje abivuga, ngo nyuma yo kugirwa inama kenshi, ku itariki 30/8/2019 nibwo Ndabereye yakubise umugore ngo agamije kumwica.

Ati “Yamukubise inshyi n’imigeri umugore azana amashyundu niba yaramukubise inyundo niba ari iki! Ikibabaje ni uburyo yamupfuye imisatsi nk’upfura inkoko, niba yarashakaga kumubaga ntitubizi. Yamukandagiye umubiri wose ku buryo no kwicara hasi byamunaniye.

Perezida w’urukiko yabajije Ndabereye icyamuteye gukubita umugore uwo munsi, Ndabereye asubiza avuga ko byari bimaze iminsi umugore atuzuza inshingano zo mu rugo agahora amusuzugura ku buryo byari bigeze aho Ndabereye arya rimwe ku munsi nabwo muri resitora.

Ati “Nari maze ibyumweru bibiri ndya rimwe nabwo muri resitora, nkaza nkaryama. Ejobundi icyo twapfuye nageze mu rugo mu ma saa moya z’umugoroba nsanga umugore aratetse mba ndyamye, ngiye kubona mbona na we araje araryamye aho kungaburira, mubajije impamvu arambwira ngo ntabwo ndi umwana wo gutamikwa ninjye kurya nintajyayo ndorere amakimbirane aratangira.

Yavuze ko ikindi bapfa ari isuku nke yahoraga abona mu rugo yabibwira umugore akabyima amatwi umugore akamusubiza ko na we yayikora.

Muri ayo makimbirane, Ndabereye yabajijwe niba yarapfuye umugore imisatsi, Ndabereye asubiza avuga ko byaba byarabaye atabigambiriye.

Ati “Ishobora kuba yarapfutse turi kurwana ariko si njye wabikoze niba naranabikoze byaba ari impanuka sinari mbigambiriye.

Ndabereye yavuze ko ubusanzwe umugore we babanye neza nubwo ngo nta zitabana zidakomanya amahembe, avuga ko icyaha cyo guhoza ku nkeke umugore atacyemera.

Uhagarariye Ndabereye mu rukiko yavuze ko umukiriya we yafungurwa akaburana ari hanze nk’umuntu w’umuyobozi ufite umwirondoro uzwi agakurikirana adafunzwe akajya yitaba urukiko rukaba rwanamutegeka aho yaba acumbitse.

Uhagarariye Ndabereye mu rukiko kandi yavuze ko umugore wa Ndabereye yandikiye urukiko ibaruwa isabira umugabo we imbabazi.

Nyuma yo kumva impande zombi, Perezida w’urukiko yategetse ko urubanza rusomwa kuri uyu wa gatatu tariki 11/9/2019.

Inkuru bijyanye:

Musanze: Visi Meya atawe muri yombi ashinjwa gukubita umugore akamukomeretsa

Umugore wakubiswe na Visi Meya amerewe ate?

Uyu mugore arimo gukurikiranwa n’abaganga mu Bitaro bya Ruhengeri

Ubwo uwo mugore yagezwaga mu bitaro bya Ruhengeri saa sita z’ijoro rishyira ku wa gatanu tariki ya 30 Kanama 2019, Umuyobozi w’ibitaro bya Ruhengeri, Dr Muhire Philbert yatangarije Kigali Today ko uwo mubyeyi yagejejwe mu bitaro arembye cyane aho basanze afite n’ikibazo cy’ihungabana.

Muganga Muhire yagize ati “Ni byo koko, uwo Mudamu twamwakiriye mu bitaro bya Ruhengeri mu ma saa sita y’ijoro ryakeye, twamwakiriye afite ibikomere mu gice cy’umutwe, twamwakiriye yahungabanye, arembye. Ariko abaganga bashoboye kumwitaho, ubu ari mu gice tuvuriramo abarwayi bagize ikibazo cy’ihohoterwa, kandi nkurikije uko tumusanze muri aya masaha, turabona atangiye koroherwa”.

Akomeza agira ati “Icyateye ibikomere kiragoye guhita usuzuma ugahita ukimenya. Icyo umuganga aba agomba kumenya, ni icy’ibikomere, naho ikijyanye n’icyabiteye bizamo inzego nyinshi, mu buganga buriya tugira urwego rukurikirana impamvu z’ibikomere.

Ariko uko ibikomere biteye, ni ibikomere byo ku ruhu ariko bidatoboye. Mu Kinyarwanda babyita ‛Mfunira’, aho ubona uruhu rw’umuntu ukabona ko rwahindutse, ko hari igikomere cyangwa se hari ububyimba, ariko ukaba utabona amaraso yavuye. Ubwo rero ibyo bikomere ni byo umurwayi afite kandi birababaza”.

Dr Muhire Philbert avuga ko mu rwego rwo gukomeza kwita kuri uwo mubyeyi, yashyizwe ahantu hihariye akurikiranirwa bagamije kumurinda guhura n’abantu benshi kugira ngo ihungabana yagize rigabanuke.

Umuyobozi w’ibitaro bya Ruhengeri, Dr Muhire Philbert, yabwiye Kigali Today ko umugore wakubiswe na Visi Meya yagize ikibazo cy’ihungabana

Ati “Kumuvurira aho hantu ni byo bitwereka ko uwo muntu yorohewe cyangwa arembye, ku buryo noneho dushobora no kumushyira muri sosiyete yavuyemo, mu bandi barwayi byaba na ngombwa akaba yanataha mu muryango we. Ntabwo twahita tumwohereza ngo ave mu bitaro, ari ibikomere by’umubiri bigaragara ntabwo yari kuba akiri mu bitaro, ariko ikiba gikomeye cyane ni ikibazo cy’imitekerereze. Ni byo tugikoraho. Uko tubona bigenda bijya ku murongo, nibwo dufata icyemezo cyo kumukura mu bitaro ariko ubu ntabwo aragera ku rwego rwo kuva mu bitaro”.

Abaturanyi ngo babuze uko batabara uwo mugore kuko ngo yakubiswe bamufungiranye

Umwe mu baturanyi b’uwo muryango, avuga ko yaje atabaye nyuma yo kumva urusaku kwa Visi Meya n’abana barira, ariko abura uburyo yinjira kuko igipangu cyari gifunze.

Agira ati “Twatabaye ariko duhera inyuma y’igipangu, kugifungura biratunanira kuko bari bifungiranye, ariko tukumva urusaku rw’umugore n’abana.”

Ati “Twakoraga ku nzogera iri ku marembo igasona, ariko tubura uwafungura. Icyatumye bihagarara ni uko Visi Meya yakubise ikiganza mu kirahuri cy’urugi akomeretse aza gufungura atwara imodoka ajya kwa muganga. Yasohotse yihuta afite n’ubwoba bw’abantu benshi bari ku marembo baje gutabara”.

Umukozi Kigali Today yasanze muri urwo rugo, usanzwe akora ataha, na we ngo akimara gutaha saa moya ubwo nyirabuja yari aje, ngo yamaze gutaha baramuhuruza bamubwira ko Nyirabuja ari gukubitwa.

Ikirahuri cyo ku rugi rw’inzu ya Visi Meya Ndabereye cyamenekeye muri ayo makimbirane

Agira ati “Ubwo Mabuja yari ageze mu rugo mu ma saa moya, namuhaye umwana ndataha. Nabaye nkigera mu rugo abantu barantabaza ngo njye gutabara ngo Mabuja baramwishe. Naje mvuza inzogera yo ku marembo ariko tubura abadukingurira. Twabonye ‘Boss’ aje yiruka adusanga, bamwe muri twe tugira ubwoba turiruka afata imodoka agenda yiruka cyane ajya kwipfukisha tumenya ko yakomerekejwe n’ikirahuri.”

Akomeza agira ati “ Nahise niruka njya kureba ko Mabuja atapfuye, dusanga yakomeretse cyane kandi yababaye. None se umuntu bapfuye imisatsi kandi yari aherutse gusuka murumva atababaye? Si ubwambere barwana, bahora barwana nkabakiza ariko sinzi icyo bapfa”.

Abaturanyi b’uwo muryango baremeza ko bababazwa no kuba abo bakarebeyeho ari bo bari kugaragaza imyitwarire mibi, icyo bagasanga ari ikibazo kibakomereye.

Umwe muri bo ati “Aba bantu bahora barwana ntituzi icyo bapfa, hari ubwo tugira ubwoba ko umugore buzacya yapfuye. Twese byadukoze ku mutima, ndetse byabaye n’ikibazo muri karitsiye, kumva umuntu nka Meya uyoboye abaturage yakubise umugore. Ni ikibazo dufite gikomeye”.

Visi Meya Ndabereye Augustin yatawe muri yombi ashinjwa gukubita umugore we

Kugeza ubu uwo mubyeyi aho akurikiranwa n’abaganga bo mu bitaro bya Ruhengeri, arwajwe n’umukozi we na bamwe mu bagize umuryango we.

Umuyobozi w’Akarere ka Musanze, Habyarimana Jean Damascène, ubwo yari mu bitaro bya Ruhengeri aho yari yagiye kureba uko ubuzima bw’uwo mugore buhagaze, yirinze kugira icyo atangaza ataramenya neza amakuru ya Visi Meya uri mu maboko y’ubugenzacyaha.

Inkuru bijyanye:

Musanze: Visi Meya atawe muri yombi ashinjwa gukubita umugore akamukomeretsa

Vice Mayor Ndabereye Augustin ubu ari mu bugenzacyaha abazwa ku byaha ashinjwa byo gukubita no gukomeretsa umugore we

Amakuru Kigali Today yatangarijwe n’umwe mu baturanyi be utashatse ko amazina ye atangazwa muri iki gitondo ku itariki ya 30 Kanama 2019 ni uko ngo Visi Meya Ndabereye yakubise umugore we aramukomeretsa bikomeye aho yamukuruye imisatsi arakomereka mu buryo bukomeye.

Uwo mugore yahise yihutishwa mu bitaro bya Ruhengeri ari na ho kugeza ubu arwariye, mu gihe umugabo we yahise atabwa muri yombi na RIB.

Mbabazi Modeste umuvugizi wa RIB atangarije Kigali Today ko uwo muyobozi ubu ari gukurikiranwa na RIB, avuga ko agikusanya amakuru afatika ku byo Visi Meya Ndabereye akekwaho.