Uwimana Jeaninne uri iburyo yamaze gusezererwa mu bitaro

Uyu mubyeyi wari umaranye iki kibyimba imyaka igera kuri itandatu bikamuviramo guhabwa akato n’umuryango we, ubu ameze neza nyuma yo kwitabwaho n’ibitaro, ndetse yanafashijwe gusubira imuhira mu Karere ka Musanze.

Ibitaro bya gisirikare bya Kanombe bibicishije ku rubuga rwa Twitter byagize biti “Muri iki gitondo Uwimana Jeaninne yasezerewe mu bitaro, anafashwa kugera iwabo mu Karere ka Musanze. Twanejejwe no kumufasha kugera ku buvuzi yari akeneye”.

Uburwayi bwa Uwimana bwamenyekanye nyuma y’inkuru yanditswe na Kigali Today imutabariza, ibitaro bya Kanombe biyisomye bimwemerera ubufasha.

We n’umurwaza we wambaye agakoti gatukura bamaze gusezererwa n’ibitaro

Dr Cpt Shumbusho Jean Paul wamubaze yatangarije Kigali Today ko ibikorwa byo kumuvura kugera uyu munsi asezerewe bifite agaciro ka Miliyoni zisaga eshatu, Ibitaro bikaba byarabimukoreye ku buntu.

Uyu mubyeyi wari warahawe akato n’umuryango we, Umuryango w’abanyarwandakazi baba mu mahanga watangiye kumukusanyiriza ubufasha buzamufasha gusubira mu buzima busanzwe.

Yahawe imodoka imuherekeza i Musanze

Alice Kabagire Cyusa Umunyarwandakazi uba muri Leta zunze ubumwe za Amerika, akaba n’umwe mu bagize umuryango w’Abanyarwandakazi baba mu mahanga bari gushakira ubufasha uyu mubyeyi, avuga ko bamuboneye Miliyoni y’amafaranga y’u Rwanda yo kumufasha gusubira mu buzima busanzwe.

Ati” Ubu twatangiye no kumukusanyiriza inkunga yo kumubonera aho atura, tukaba dusaba ko buri munyarwanda wese ufite ubushobozi yabigiramo uruhare.”

Uwimana yamaze kuvurwa ubu ameze neza mu minsi mike arasubira mu rugo

Uwimana yajyanywe mu bitaro ku wa kane tariki ya 23 Gashyantare 2018, nyuma y’uko ibitaro bya Kanombe byumvise inkuru ya Kigalitoday yamutabarizaga kuko nta kirengera yari afite.

Nyuma yo kubagwa, Jeannine ubu ameze neza, ndetse arashima Imana n’abaganga b’i Kanombe kuba yasubiranye isura ye.

Uyu mubyeyi ariko ngo anafite ikibazo cy’uburyo azongera kubana n’umuryango we, wamubaniye nabi mu myaka 6 yari amaze arwaye.

Cpt Shumbusho Jean Paul wabaze Uwimana avuga ko bikwiye kwivuza hakiri kare kugira ngo abashe gukira

Irebere uko Uwimana yakiriye ubuvuzi yakorewe n’Inama Dr Capt Shumbusho atanga ku barwayi

Ikibyimba cyamaze kubagwa kandi byagenze neza

Amakuru aturuka mu bitaro bya Gisirikare bya Kanombe, aravuga ko Uwimana yakiriwe mu bitaro Kuri uyu wa Kane, nyuma yo gusuzumwa ahita abagwa ikibyimba yari amaranye imyaka itandatu.

Ayo makuru avuga ko kubagwa kwa Uwimana kwagenze neza kandi nawe amerewe neza, ku buryo mu minsi mike ashobora gusezererwa mu bitaro agasubira i Musanze aho atuye.

Uko yari ameze mbere y’uko abagwa

Ibitaro bya Gisirikare bya Kanombe byamenye amakuru y’uyu murwayi, kubera inkuru yaciye muri www.kigalitoday.com yamutabarizaga.

Nyuma y’iyi nkuru ni bwo Ibitaro bya Gisirikare bya Kanombe byemeye gufasha uyu mubyeyi, uyu munsi ahabwa ubuvuzi.

Ibitaro bya Gisirikare bigiye kumutura umutwaro amaranye imyaka itandatu

Ibitaro bya Kanombe bimenyereweho ubunararibonye mu guhangana n’indwara nk’izi, byabitangaje nyuma y’inkuru Kigalitoday.com yanditse kuri uyu wa mbere, ivuga ko Uwimana yafashwe n’Uburwayi budasanzwe bigatuma umuryango we umuha akato.

Nyuma y’iyi nkuru ubuyobozi bw’ibitaro bya Gisirikare bya Kanombe bubicishije ku rubuga rwa twitter, bwatangaje ko uyu mubyeyi yazagana ibi bitaro mu ishami rishinzwe kwita ku bafite ibibazo by’uburwayi bufata mu isura, ubundi akitabwaho akavurwa.

Ubutumwa buha ikaze Uwimana mu bitaro bya Kanombe

Uwimana yarwaye indwara y’ikibyimba mu gahanga none umuryango we waramuciye

Avuga ko iyi ndwara yamufashe mu 2011, aho ijoro rimwe yaryamye ari muzima bugacya mu gahanga haje agaheri gato kamurya.

Agira ati “Naraye ndi muzima mbyutse mu gitondo numva ku gahanga harandya mbifata nk’ibyoroshye ngira ngo ni akantu kandumye. Nasizeho pomade uburibwe bukomeza kwiyongera.”

Avuga ko uko iminsi yashiraga ariko ako gaheri kakomeje gukura agana ivuriro agera ubwo ibitaro bya Ruhengeri bimwohereza mu bitaro bikuru bya Kigali (CHUK).

Ngo kwivuriza i Kigali ntibyamworoheye kuko atahawe serivisi nziza, rimwe bikamuca intege ntiyitabire itariki yahawe kuko yari amaze kunanirwa kubera ingendo yakoraga ntanavurwe kandi nta n’amikoro yari afite.

Ati “Nagiyeyo inshuro nyinshi batampa imiti ngo bambwire n’uburwayi mfite bakanyandikira kuri taransiferi ngataha ubusa bigeze aho ndaparika sinasubirayo.”

Avuga ko hari n’ubwo yatekereje kujya kwivuriza i Kanombe abisabwe n’umusirikare bari bahuriye mu nzira, abura amikoro arabireka.

Ati “Kugeza iyi saha nta bisubizo nigeze mbona kuri ubu burwayi, hari ubwo nigeze guhura n’umusirikare angirira impuhwe ansaba kujya mu bitaro by’i Kanombe muri ya minsi igihe i Kanombe hari abasirikare babaga imitwe n’ubwonko, mbuze amikoro no kutagira mituweri, ndabireka.”

Akato yahawe mu muryango we ni ko kamushengura umutima

Mu burwayi bwe ngo ababazwa no guhabwa akato n’umuryango we dore ko yanatandukane n’umugabo we bafitanye abana bane, nyuma yo guhora amuzaniraho abandi bagore.

Yongeraho ko na nyina nk’umubyeyi yari asigaranye nyuma y’uko ise apfa yamwirukanye mu rugo no mu mitungo y’umuryango.

Ahandi yari yizeye icumbi ni kwa musaza we ariko naho ngo ntiyahamaze kabiri kuko bahise bamwirukana none ubu arara aho bwije.

Avuga ko abagiraneza ari bo bamubeshejeho, nyuma y’uko umuryango we umutereranye kubera ubwo burwayi.

Ati “Uko mbayeho ni Imana yo mu ijuru inyitungiye. Ndya ari uko mpuye n’umuntu akangirira impuwe akampa amafaranga.

“Ntaho kuba mfite uretse nk’abaturanyi bamfasha rimwe umwe akancumbikira ejo ngacumbikirwa n’undi.”

Uwimana avuga ko inzego z’ubuyobozi bw’ibanze zitamubaniye kuko banze kumushyira mu cyiciro cy’ubudehe ubu akaba nta na mituweri agira.

Ati“Umuyobozi w’umudugudu yanze kumpa icyiciro anyohereza mu Mutara ku mugabo twatandukanye ngo abe ariho bampa icyiciro. Nanze kujyayo kuko ntiwaba waratandukanye n’umuntu ngo usubireyo ngo urashaka ibyiciro.

Kuba ntagira icyiciro byatumye ntabona mituweri, ubu ndaho gusa nta mituweri mureba ubu burwayi mfite.”

Arasaba Leta ubufasha kugira ngo yivuze kuko uburwayi bwe butangiye gufata indi ntera dore ko uko bwije n’uko bukeye akomeza kuremba.

Ageze ku rwego rwo kutakibasha kubona no guhora aribwa umutwe

Ati “Leta nimpe inkunga nivuze kuko niyo mubyeyi nsigaranye, nibinanirana mvuge ngo biranze ariko Leta nimfashe kuko ndababaye. Ndi nyagupfa uretse Imana yo mu ijuru niyo izi ibyanjye.”

Mu kwiyibagiza ububabare, Uwimana atunzwe no kugana ahabera amasengesho ubundi iyo abonye amafaranga agura ibinini muri za farumasi bimworohereza uburibwe bw’umutwe.

Aravuga ko akomeza kuremba aho yabashaga gusoma, ariko Bibiriya ubu akaba ageze aho atabasha kubona inyuguti n’imwe.

Manzi Jean Pierre Umunyamabanga nshingwabikorwa w’umurenge wa Muhoza, avuga ko atigeze amenya ikibazo cya Uwimana asaba ko yamusanga ku murenge bakiga kuri iki kibazo.