Bumaze kubona ukuntu abantu batangariye ukukwe bwa Ndikumwenayo Edison na Nikuze Christine bita ba “nyamweru” kubera ubumuga bw’uruhu, Ubuyobozi bw’Umurenge wa Kinihira bwasabye abari bahari aho gufata abantu bose kimwe bakirinda kuba bagira uwo bavangura kubera ubumuga afite.

Aba bageni bafite ubumuga bw’uruhu ibyishimo byari byinshi basezerana imbere y’amategeko.

Umunyamabanga Nshingwabikorwa w’Umurenge wa Kinihira, Ernest Uwimana, yagize ati “Uyu muhango witabiriwe n’abantu benshi, wabonaga byabatangaje, ariko ntibikwiye, kuko aba bombi bihamirije ko bagiye kubaka umuryango ukomeye ndetse bakanafatanya kuzamura igihugu”.

Uwimana yaboneyeho no gushima icyemezo cy’aba bageni biyemeje imbere y’amategeko kuzabana akaramata.

Nubwo hari hari n’abandi bageni benshi, aba babiri bafite ubumuga bw’uruhu ni bo bari bakuruye imbaga y’abaje kwifatanya n’abageni.

Ndikumwenayo, wasezeranye na Nikuze , avuka mu Mudugudu wa Gashororo mu Kagari ka Murama mu Murenge wa Bweramana ho mu Karere ka Ruhango, akaba yaravutse mu mwaka wa 1988. Naho Nikuze we, akomoka mu Mudugudu wa Gashora mu Kagari ka Bweramvira ho mu Murenge wa Kinihira mu Karere ka Ruhango akaba yaravutse mu 1981.

Eric Muvara