Ibikoresho birimo vuvuzela, urusaku rw’ibyishimo, indirimbo zinyuranye zahimbiwe ikipe ya Rayon Sports nibyo byaranze umunsi wo kwerekana igikombe cyayo yatwaye.

Byabaye ibindi bindi ubwo iyo kipe yasesekaraga rwagati mu mujyi wa Nyanza ahagana nka saa cyenda z’amanywa iturutse i Nyabugogo mu mujyi wa Kigali aho rwo rugendo rw’abafana bayo rwatangiriye.

Mu mujyi wa Nyanza abantu batandukanye barimo abana, abasore, inkumi, abagore, abagabo, abakecuru n’abakambwe bari bashungereye ku mihanda bamwe muri bo babukereye mu myambaro igizwe n’amabara y’umweru n’ubururu aranga ikipe ya Rayon Sports.

Icyakora umutekano wari wabungabuzwe ku buryo butari busanzwe yaba ku kibuga no mu mihanda kugira ngo hatagira umufana wa Rayon Sports uhatakariza ubuzima nk’uko byagenze ubwo yakirwaga mu Karere ka Nyanza ije kuhaba mu buryo buhoraho nkaho yavukiye.

Ku kibuga cy’akarere ka Nyanza ari naho Rayon Sports ikorera imyitozo abantu bari bakubise buzuye maze bahanika amajwi yabo bishimira igikombe imisozi iri mu nkengero zaho irahubangana aribyo bamwe mu bafana bise kwatsa umuriro w’ibyishimo.

Murenzi Abdallah perezida w’ikipe ya Rayon Sports akaba n’umuyobozi w’Akarere ka Nyanza mu byishimo byinshi yabwiye ibitangazamakuru binyuranye ko iyo kipe ibereyeho kunezeza Abanyarwanda ngo bikaba ari nako kamaro ka Siporo muri rusange.

Yasobanuye uko abona iyo kipe agira ati: “Rayon Sports yaba mu Rwanda ndetse no mu karere ni imwe mu makipe atinyitse niyo mpamvu muri uyu mwaka wa 2013 ifite urufunguzo rwo kwiharira ibikombe byose”.

Gahunda yo kwerekana igikombe Rayon Sport yatsindiye yahereye mu karere ka Nyanza ariko biteganyijwe ko izakomereza no mu tundi turere tudandukanye tw’igihugu nk’uko bitangazwa n’ubuyobozi bw’iyo kipe.

Jean Pierre Twizeyeyezu