“Abakora inkuru zituma habaho ifatwa ry’ibyemezo biganisha ku kubaka igihugu, ni bo bahembwe kandi bazahora bahembwa”, nk’uko Ministiri James Musoni, w’ubutegetsi bw’igihugu yabitangaje, amaze gutanga ibihembo ku banyamakuru.

Ministiri Musoni yashimye ko umunyamakuru wa ORINFOR witwa Ufitinema Remy Maurice, wahawe igihembo cya mbere cya sheki zifite agaciro karenga miriyoni ebyiri, ari we n’ubundi wari ugikwiye, bitewe n’inkuru yakoze ku miryango ine ituye mu karere ka Nyagatare, yari yasigaye muri nyakatsi.

Musoni yagize ati: “Mu gihe kitarenze ibyumweru bitatu, abaturage bari bamaze kujya mu mazu meza cyane, abatanze raporo ko nta nyakatsi zari zisigaye nabo barahanwe, kubera ubucukumbuzi bwakozwe n’itangazamakuru.”

Ikigo gishinzwe imiyoborere(RGB) hamwe n’ishami ry’umuryango w’abibumbye rishinzwe iterambere(UNDP), nibyo byatanze igihembo cy’amafaranga miriyoni 1.24, kuri buri munyamakuru wanditse inkuru nziza mu cyiciro runaka, hamwe n’ibihembo bibiri ku barushije abandi muri abo bahembwe.

Ibihembo byatanzwe hakurikijwe icyiciro inkuru yakozwemo, muri bitandatu bigize ubuzima bw’igihugu muri rusange; ari byo imibereho y’abantu, ubukungu, uburinganire n’ubwuzuzanye bw’ibitsina byombi, ibidukikije, sporo, ndetse n’inkuru zicukumbuye.

Komite y’abantu batorewe guhitamo inkuru zabaye iza mbere ngo igomba kwizerwa, kuko igizwe n’impuguke mu by’itangazamakuru, amategeko, imiyoborere no kurwanya akarengane, nk’uko umuyobozi wa RGB, Prof. Anastase Shyaka yabivuze.

Iyo komite igizwe n’abantu barindwi, aribo Augustin Nzindukiyimana, Madeine Nirere, Diana Mpyisi, Rev. Jean Pierre Uwimana, Emmanuel Rushingabigwi, Marie Chantal Rwakazina hamwe na Angeline Rutazana.

Igikorwa cyo guhemba abanyamakuru kizajya kiba buri mwaka kandi ibyiciro by’iterambere ry’igihugu, inkuru zizakorwamo nabyo ngo biziyongera, nk’uko abayobozi muri RDB na UND babyijeje itangazamakuru.

Simon Kamuzinzi