Iyo modoka yayibahaye mu 2009, ubwo abatuye uyu murenge bamugaragarizaga ubwigunge barimo bwo gukora ingendo ndende n’amaguru kugira ngo bagere kuri kaburimbo, bava cyangwa bajye Kigali no muyindi mirenge mu rwego rw’imihahiranire.

Bamwe mu baturage baganiriye na Kigali today, bavuga ko iyo mpano yari ibafatiye runini, ariko ubu ngo bababajwe n’uko imaze imyaka ibiri n’igicye yarahagaze kubera imicungire mibi none bakaba barasubiye uko bahoze.

Pasitoro Kanyabashi Thomas, umwe mu baturage bo muri uyu murenge, avuga ko icyo iyo modoka yatangiwe haba mu guteza abaturage imbere no kubafasha mu ingendo ngo bitakozwe kubera imicungire mibi yagize.

Agira ati “Imodoka yaje ari shyashya itarimo n’umuwenda ya DAIHATSU kandi uzi neza ukuntu zikomera wansobanurira ukuntu bigera, aho ikabura n’impine mu gihe n’umuntu atanze amafaranga ye yayikoresha igatangira gukora kandi ikunguka.”

Akomeza avuga ko abaturage babuze icyo bakora baricecekera, aho ngo bategereje ubuyobozi ko hari icyo bubikoraho nabwo buricecekera.

Umunyamabanga nshingwabikorwa w’umurenge wa Bweyeye, Sindayiheba Aphrodis, avuga ko iyo modoka yagiye isiganirwa n’abayicungaga ubwo yatangwaga yari yahawe SACCO ya Bweyeye, nyuma iza gufatwa na rwiyemeza mirimo nawe ayisubiza umurenge yarashegeshwe.

Avuga ko mu ihererekanya bubasha bakoranye na mugenzi we basimburanye hari harimo n’iyo modoka, ariko ngo yaje kureba asanga harimo agace kavuga ko iyo modoka ifite komite runaka iyicunga kugeza nanubu itaraza ngo baganire bamenye ibyayo.

Ati “Maze amazi abiri. Mu byo nahawe mu ihererekanya bubasha iyo modoka irimo ariko naje kureba nsanga harimo agace kavuga ko iyo modoka ifitwe na komite runaka kugeza ubu ntiraza ngo tuganire.”