Niyitangimpano Ezechiel, umuvuzi gakondo utuye umurenge wa Rukoma, avuga ko Abanyarwanda bafite imyumvire y’uko kwivuriza muri gakondo ari ukujya mu bapfumu ku buryo bamwe mu babagana baza bihisha.

Gafaranga Daniel, Perezida w’Ihuriro ry’Abavuzi Gakondo mu Rwanda.

Arashima Leta kuko yashyizeho ishami rikurikirana ubuvuzi gakondo muri Minisiteri y’Ubuzima, ariko ngo abanyamadini bo baracyafite imyumvire ibangamiye ubwo buvuzi kuko babuza abayoboke babo kubwiyambaza mu gihe barwaye.

Ngo ubuvuzi gakondo butandukanye n’ubupfumu, kandi abavuzi bemewe n’Ihuriro ryabo ni abagaragaza imiti bakoresha n’indwara bavura kandi ngo nta mupfumu ushobora gutinyuka kuza mwihuriro ngo agaragaze ko atanga inzaratsi, cyangwa indi miti ikoreshwa n’imyuka.

Ukuriye abavuzi gakondo mu Karere ka Kamonyi, Rutegana Enias, avuga ko bishyize hamwe bagamije gushyira imbaraga mu guhindura isura mbi y’ubupfumu, uburozi ndetse n’ububeshyi.

Ngo n’ubwo bitoroshye guhindura imyumvire y’abaturage, bazabiharanira mpaka babigezeho.

Gafaranga Daniel, Umuyobozi w’Abavui Gakondo mu Rwanda, avuga ko imyumvire idahesha agaciro ubuvuzi gakondo ngo ni yo ituma ihuriro ryabo riharanira kumenyekanisha imikorere yabo kandi bagaharanire ko umwuga wabo utera imbere.

Ahamagarira Abanyarwanda kumenya gutandukanya abavuzi n’abapfumu, aho agira ati “ Uretse ko hari n’imivurire mibi y’abakoresha ibinyabubasha ikigaragara, ariko icyo Abanyarwanda bakwiye kumenya ni ugutandukanya icyatsi n’ururo bakajya bivuriza ku muvuzi uzwi n’Ihuriro”.

Mu gihe hakigwa umushinga w’Itegeko rizagenga ubuvuzi gakondo mu Rwanda, ubuvuzi bwemewe ni ubukoresha ibimera, ibikomoka ku nyamaswa ndetse n’ibiva mu butaka.

Abo mu Karere ka Kamonyi bon go bahisemo gushinga koperative bahuriramo bagatera ibimera bivura kugira ngo birinde ko bizacika.

Marie Josee Uwiringira