Kuba Renzaho amaze igihe kirenga imyaka ibiri arwaye ngo hakozwe ibishoboka byose ngo avurwe biranga kuko uretse kuba yarajyanwe ku bitaro bya Nemba mu gihe ingabo z’igihugu zahazaga kuvura abantu bafite ibikomere basigiwe na Jenoside, yaje no kwoherezwa mu bitaro bya Gisirikare i Kanombe ariko birangira hose byanze.

Amaranye imyaka irenga ibiri uburwayi bw’imitsi yo mu mutwe butuma ateguka aho ari.

Uretse kuba atagishobora kuvuga ngo ibyo avuga byumvikane neza, anavuga ubona arimo gutitira umutwe wizunguza hakiyongeraho kuba ntacyo ashobora kwikorera yaba akoresheje amaboko cyangwa amaguru kuko anagaburirwa akanafashwa kujyanwa mu bwiherero mu gihe abikeneye.

Umugore we ngo yaramutaye kubera ubwo burwayi bituma asigarana n’abana na nyina umubyara hamwe na mushyiki we na bo basiga bamufungiranye mu nzu bakajya mu kazi ku buryo n’iyo hari umusigayeho baba ari abana batagejeje no ku myaka 8.

Mu minsi ishize, ngo umugore yaraje amujugunyira umwana uri mu kigero cy’imyaka hagati ya 3-4 none ngo na we yararwaye abura uko amuvuza kubera kutagira mituweri.

Ikibazo cya Renzaho kizwi n’inzego zitandukanye kuko uretse kuba intumwa za rubanda zaramusuye ubwo ziheruka gusura uturere, ubuyobozi bw’akarere na bwo ndtse n’ishyirahamwe riharanira inyungu z’abacitse kw’icumu (Ibuka) abarizwamo ku rwego rw’akarere ngo barakizi ariko kugeza ubu ngo yugarijwe n’urusobe rw’ibibazo.

Umuyobozi wa Ibuka mu Karere ka Gakenke, Jean de Dieu Uwimana, avuga ko bakoze ibishoboka byose agasaba ko ikigega gishinzwe kwita kubacitse kw’icumu rya Jenoside yakorewe abatutsi (FARG) cyashaka uburyo Renzeho yavurizwa hanze y’igihugu.

Agira ati “Njyewe icyo numva twakora n’ugusaba nibura FARG ikaba yadusabira abaganga mu bishoboka byose bakaba bamubonera transfer ku bindi bitaro byisumbuyeho kugira ngo uburwayi bwe bube bwakurikiranwa.”

Umuyobozi w’Akarere ka Gakenke Wungirije ushinzwe Imibereho Myiza y’Abaturage Zephyrin Ntakirutimana, we avuga ko mu minsi ishize yasuye Renzaho akibonera uburyo arwayemo ngo abarangira aho ashobora kuvurirwa.

Ati “Twaramusuye aturangira aho hantu i Musanze, turavuga tuti ‘Musanze ahangaha ni ho yumva yavurirwa agakira,’ ariko kuhamujyana n’ukugira ngo na we yumve ko ntacyo batakoze atazapfana agahinda avuga ngo ‘banze kumvuza’.”

Uyu Renzeho imitsi yarwaye uretse gutuma amaboko n’amaguru ye ntacyo bigikora ngo agira n’ubukonje bukabije buzamukira mu mano bukagera mu mavi ku buryo aba yumva amagura yabaye nk’urubura.

Abdul Tarib