Uretse guharaniara inyungu rusange z’abanyeshuri no kuzamura ireme ry’uburezi, iyi komite yiyemeje no korohereza abanyeshuri mu kubona amanota yabo, nk’uko Evase Niyitanga, umuyobozi mushya w’abanyeshuri yabitangaje kuri uyu wa Gatatu tariki 27/2/2015.

Niyitanga ari kurahira kuzuzuza inshingano ze neza.

Yagize ati “Icyo nshyize imbere ni icyo narahiriye mu mihigo, aho nasabye abanyeshuri ko ibijyanye n’ikoranabuhanga babigira ibyacu, bakajya babasha kubonera amanota ku gihe niyo yaba ari mu rugo akabona ubutumwa kuri telefoni bumubwira ibijyanye n’imyigire ye ku ishuri.”

Yavuze ko ubu buryo buzorohereza impande zose, haba abanyaeshuri, ababyeyi babo n’abayobozi, kandi akizera ko nta mbogamizi bazahura nazo kubera imikoranire hagati yabo n’ubuyobozi bubafasha.

Abahagarariye abanyeshuri mu bice bitandukanye muri RTUC barahirira imbere y’abanyeshuri.

Jerome Irankunda, asimbuye ku buyobozi yari yihaye inshingano zo guteza imbere imibanire y’ishuri n’abaturage, aho bari bariyemeje kujya bagira uruhare mu bikorwa by’umuganda no gufasha abatishoboye nyuma y’amasomo.

Abanyeshuri batandukanye nabo biteze byinshi kuri iyi komite ariko bakayisaba kurangwa n’ubunyangamugayo no kubaha abanyeshuri n’ubuyobozi, nk’uko byatangajwe n’umwe mu banyeshuri warangije muri byiciro bya mbere witwa Gaetan Mudenge.

Emmanuel N. Hitimana