Kamali yabivuze ku mugoroba wo kuri uyu wa 25 Gashyantare 2015 ubwo yari amaze kuba Umuyobozi mushya w’Akarere asimbuye Habyarimana Jean Baptiste weguye kuri uyu mwanya mu ntangiriro za Mutarama 2015.

Umuyobozi mushya w’Akarere ka Nyamasheke, Kamali Aime Fabien, ngo ntazatatira indahiro yo kuzuza inshingano ze.

Yagize ati “Njye njyenyine ntacyo nakwishoboza, dufatanyije ntakizatunanira. Ikizaza gisaba imbaraga, ubwenge n’ubuhanga tuzagishobora kuko byose turabifite, mbasabye ubufatanye busesuye kandi sinzatatira igihango tugiranye ndetse n’icyizere mwangiriye”.

Uretse umuyobozi mushya w’akarere, banatoye Umuyobozi w’Inama Njyanama y’Akarere ka Nyamasheke uwo mwanye wegukanwa na Dr Ndabamenye Telesphore wasimbuye Musabyimana Innocent na we weguye kuri uyu mwanya.

Perezida mushya wa Njyanama y’Akarere ka Nyamasheke arahirira kuzuza inshingano ze.

Umunyamabanga Nshingwabikorwa w’Intara y’Iburengerazuba, Jabo Paul, mu nama nyinshi yabagiriye yabasabye gukorera mu mucyo, barangwa no gukora cyane kandi baha ijambo abo bayobora bakirinda kwimika igitugu kandi bacunga neza umutungo wa rubanda.

Yagize ati “Ubu mwahinduye imirimo mugomba gukora birenze uko mwakoraga, imiryango yanyu izabakenera kandi n’abaturage babakenere. Muzaharanireko indahiro mwarahiye kandi mugishe inama.”

Kamali Aimé Fabien watorewe kuyobora akarere ka Nyamasheke yari Umunyamabanga Nshingwabikorwa w’Umurenge wa Kanjongo mu Karere ka Nyamasheke arubatse afite abana babiri, akaba afite impamyabumeyi mu mategeko mpuzamahanga (Maitrise en Droits International Humanitaire).

Naho Perezida wa Njyanama, Dr Ndabamenye Telesphore na we arubatse afite abana bane, akaba yari asanzwe akora mu Kigo cy’Igihugu cyo Guteza Imbere Ubuhinzi n’Ubworozi (RAB), nk’Umuyobozi Wungirije ushinzwe ibyo Kuhira n’Ihingishwa ry’Amamashini, akanayobora ishami ryo kongera umusaruro.

Umugwaneza Jean Claude