Iki gikorwa cyatangiye tariki 06/11/2014, bikaba biteganyijwe ko kizasozwa nyuma y’umwaka, ubuyobozi bwa Rwanda Promoters Company buvuga ko bwagitangije mu rwego rwo kumenya neza umubare w’abafana b’ikipe ya Rayon Sports.

Umuyobozi wa Rwanda Promoters Company, Nshuti Olivier, avuga ko biteye urujijo cyane kuko usanga abantu benshi bavuga umubare w’abafana ba Rayon Sport, bamwe ugasanga bavuga ngo n’abafana miliyoni enye abandi eshanu.

Nshuti Olivier uhagarariye Rwanda Promoters Company mu Ruhango.

Iki kibazo rero ngo iyi kampani nicyo ije gukemura, kuko yifuza kugera muri buri mudugudu ibarura buri mu fana wa Rayon, ariko bakazifashisha abajyanama b’ubuzima.

Ati “ubundi muri buri mudugudu habamo abajyanama b’ubuzima batatu, ariko twe tuzakorana n’umwe kugirango abandi nabo bakomeze akazi kabo, kuburyo ntacyo bizabangamira”.

Gusa ngo nyuma yo kubarura aba bafana mu karere ka Ruhango ndetse no mu gihugu hose, hazashyirwaho uburyo bwo kuzajya bishyuza umusanzu abazaba bemeye ko ari abafana ba Rayon Sports koko.

Buri kwezi nibura umunyamuryango akazajya atanga amafaranga 100 gusa, kandi nabwo akabikora ku bushake bwe akazajya ayakatwa ku ma inite azajya akoresha muri terefone ye, bityo agashyirwa kuri konti ya Rayon Sports.

Olivier akavuga ko ubu buryo buzatuma iyi kipe koko itungwa n’abafana bayo, kuko nibura bizera ko bazajya binjiza amafaranga asaga miliyoni 400 zivuye mu bafana. Kandi ngo buri munyamuryango azajya ahabwa uburenganzira bwo kumenya uko amafaranga yatanze yakoreshejwe.

Uretse ubu buryo bwo kubarura abafana ba Rayon Sports hifashishijwe abajyanama b’ubuzima, ngo banamaze gushyiraho uburyo umuntu ashobora kwibaruza nk’umufana akoresheje telephone igendanwa.

Kugeza ubu iki gikorwa kirimo gukorerwa mu ntara y’Amajyepfo mu karere ka Ruhango, Kamonyi, Nyanza na Muhanga, kikazakomereza mu turere twa Nyaruguru, Nyamagabe, Huye na Gisagara.

Eric Muvara