Nyuma y’ibiganiro yagiranye na Perezida Kagame kuri uyu wa kane tariki 13/11/2014, Ministiri Ploumen yatangarije abanyamakuru ko amasezerano hagati y’abacuruzi bo mu Rwanda hamwe n’abashoramari b’abaholandi ari mu nzira zo gushyirwaho umukono.

Perezida Kagame n’abandi bayobozi barimo Minisitiri mushikiwabo baganira na Minisitiri w’igihugu cy’u Buholandi ushinzwe iterambere n’ubucuruzi mpuzamahanga, Lilianne Ploumen.

“Turashaka uko twarushaho gukorana ku buryo burenze ubwari busanzweho bwo gutanga inkunga gusa; aho abashoramari ku ruhande rw’u Rwanda n’ab’u Buholandi twazanye barimo kuganira; icyo twaje gukora ubu ni ukugira ngo bamenyane, hanyuma bakazagirana ayo masezerano mu gihe kitari icya kera”, nk’uko byatangajwe na Ministiri w’u Buholandi, Madame Ploumen.

Yavuze ko abashoramari b’igihugu cye bakirimo gushaka ahantu hatandukanye bashora imari haba mu kubyaza ikiyaga cya Kivu gaz metane, mu buhinzi bw’imboga n’imbuto, mu nganda zitunganya umusaruro w’ubuhinzi, mu gukora no gukoresha ibintu bitandukanye bijyanye n’ingendo z’indege, mu ikoranabuhanga no guteza imbere imishinga mito n’iciriritse itandukanye.

Perezida Kagame na Minisitiri w’igihugu cy’u Buholandi ushinzwe iterambere n’ubucuruzi mpuzamahanga, Lilianne Ploumen.

Ministiri w’ububanyi n’amahanga akaba n’Umuvugizi wa Leta, Louise Mushikiwabo wari kumwe na Perezida Kagame na Ministiri w’u Buholandi, yashimangiye ko itsinda ry’abashoramari bahagarariye ibigo bikomeye bigera kuri 30 byo muri icyo gihugu, bari hafi kugirana amasezerano y’imikoranire n’abikorera bo mu Rwanda.

Uretse kuza kw’abashoramari, imibanire y’u Buholandi n’u Rwanda isanzweho; aho icyo gihugu cyemeye gutanga inkunga y’amayero miliyoni 239 € mu myaka itanu kuva 2013-2017, yo kunganira u Rwanda mu iterambere ry’abikorera n’ihangwa ry’imirimo ku rubyiruko, mu butabera, muri gahunda yo kwegereza ubuyobozi n’ubushobozi abaturage, mu bijyanye n’ingufu, gutanga amazi n’isukura ku baturage.

Perezida Kagame na Minisitiri Lilianne Ploumen.

Simon Kamuzinzi