Imodoka za Polisi y’Igihugu mu ishami rishinzwe kuzimya umuriro, zahageze nyuma y’isaha iyi nkongi itangiye, ni zo zabashije kuwuzimya neza mu gihe kigera ku masaha abiri zihageze.

Aya maduka yakongotse mu buryo bugaragara.

Iyi nkongi, hataramenyekana icyayiteye, yatwitse amaduka 5 ari mu nzu y’ubucuruzi yegeranye n’isoko rya Rwamagana, ibumoso bw’umuhanda wa kaburimbo umanuka werekeza ahitwa Buswahilini. Muri aya maduka, atatu yatikiriyemo ibicuruzwa hafi ya burundu, naho andi abiri, abaturage bagerageje kuvanamo bimwe bitarafatwa.

By’umwihariko, iyi nkongi yibasiye cyane iduka rikomeye kandi ryarimo ibicuruzwa bitubutse (tutaramenya agaciro kabyo kugeza ubu) by’umucuruzi Murenzi Jean Baptiste, akaba ari umucuruzi ukomeye mu karere ka Rwamagana ndetse iri duka rye ryakongotse rikaba ari ryo ryaranguzaga ku bacuruzi benshi bo mu mujyi n’abo mu byaro by’akarere ka Rwamagana, nk’uko twabibwiwe na bamwe mu babizi neza.

Uku ni ko inkongi yari imeze uri aya maduka yo mu mujyi wa Rwamagana.

Uyu mucuruzi Murenzi, ubwo yari amaze kubona ibimubayeho, yahise agira ikibazo cy’ihungabana ku buryo atigeze agaragara mu bikorwa byo kuzimya iyi nkongi.

Abaturage bo, ngo bakimara kubona aya maduka afashwe, bihutiye gutabara bakiza ibicuruzwa byari bitarakongoka ariko umuriro ubarusha imbaraga kugeza ubwo Polisi yahageraga n’imodoka zayo zizimya inkongi, ikabasha kuwuzimya ahagana saa tanu z’ijoro.

Imodoka za Polisi zizimya umuriro ni zo zatabaye, zibasha kuwuhosha.

Umuyobozi w’akarere ka Rwamagana, Uwimana Nehemie, yatangaje ko iyi nkongi ari ingorane zikomeye ku bucuruzi bwo mu karere ka Rwamagana ariko agashimira Polisi y’Igihugu yabashije gutabara ikazimya uyu muriro ndetse agasaba abaturage muri rusange kudahungabana ahubwo bakakira ko iki kibazo ari impanuka, maze bagakomeza ibikorwa byabo.

Nta makuru aramenyekana niba abacuruzi bahuye n’ibi biza, by’umwihariko uyu Murenzi Jean Baptiste, bari bafite ubwishingizi bw’ibicuruzwa byabo.

Nubwo uyu muriro wari uteye ubwoba, byarangiye Polisi iwujimije ariko wamaze gutikiza ibicuruzwa byinshi.

Cyakora, Umuyobozi w’akarere ka Rwamagana, Uwimana Nehemie, yongera gushishikariza abacuruzi kujya bagira ubwishingizi bw’ibicuruzwa byabo aho kugira ngo babwibuke bamaze guhura n’ingorane nk’izi.

Abaturage bari benshi bareba aya maduka yashyaga.

Emmanuel Ntivuguruzwa