Urubyiruko rw’Afurika ruteraniye mu Rwanda mu gihe cy’iminsi itatu kuva kuri uyu wa 21/07/2014, rurabaza rukanibaza icyo rwakora kugirango rugire uruhare mu miyoborere n’amatora abera mu bihugu byabo.

Perezida Kagame na Dr Nkosana Moyo washinze ikigo cyitwa Mandela Institute Development studies, gihuje urubyiruko rwo mu bihugu bitandukanye bya Afurika.

Perezida Kagame wabakiriye yababwiye ko igisubizo kizava mu mu kwiyemeza gukora bakareka gushyira umutwaro ku bandi no gutegereza ko hari undi ugomba kubibakorera.

Ati: “Usanga iyo hari ubukene, intambara n’ibindi; abantu batunga urutoki abandi ngo nibo bambutse imipaka bazanye ibibazo, ntibemere ko hari uruhare nabo ubwabo bafite mu byababayeho, ntibanatekereze ku bisubizo babishakira, ahubwo nabyo bakabitegereza ku bandi”.

“Jye mpora mbwira abantu hano ko turimo kwishyira mu byago byo gutegereza indi myaka 100 kugira ngo tugere ku iterambere, nidukomeza gutekereza gutungwa n’imisoro y’abaturage bo mu bindi bihugu nk’aho hari ibyo batugomba; twebwe mu Rwanda ibibazo twabigize ibyacu, nibyo byavuyemo ibyiza dufite ubu”, Perezida Kagame.

Urubyiruko ruturutse mu bihugu bitandukanye bya Afurika ruhuriye mu mushyikirano i Kigali.

Uburyo u Rwanda rwageze ku miyoborere n’iterambere muri iyi myaka 20 ishize nyuma ya Jenoside yakorewe Abatutsi, ngo habayeho kwiha icyerekezo, kugira imihigo, kuganira n’abaturage hakoreshejwe imvugo isanzwe yumvikana kuri bose, ndetse no kumva ibyo bakeneye, nk’uko Umukuru w’igihugu yabisobanuye.

Perezida Kagame yagiriye inama urubyiruko ko iyo abantu bazi ko baharanira impamvu ibafitiye inyungu rusange, bashaka uburyo bagera ku byo biyemeje; akaba yavuze ko niba bashaka kurwanya ruswa nabo bagomba kuyireka; ndetse ko bagomba kwicungira umutungo w’ibihugu byabo bakanga ko ujyanwa n’abanyamahanga.

Urubyiruko rwaturutse hirya no hino muri Afurika rufata ifoto y’urwibutso na Perezida Kagame.

Simon Kamuzinzi