Mu myenda y’umutuku y’amatiriningi, urunigi rurerure rw’umuhondo rutemba mu gituza, inkweto z’umukara no mu ngofero y’umukara niko uyu muhanzi yagaragaye imbere y’imbaga y’urubyiruko yari yaje gusoza amarushanwa yiswe Umurenge Kagame Cup, ku kigo cy’urubyiruko cya Nyamasheke.

Yagize ati “ndashaka kuba umuyobozi ndashaka kwerekana ko ntari mu masiganwa, ndashaka ko Abanyarwanda bemera ko mbayobora nkabajya imbere, nkabigisha uko baririmba, nkabaha abasomo azabafasha mu buzima”.

Umuhanzi Diplomate avuga ushaka gusimbuka asubira inyuma gato kugirango arenge icyo ashaka gusimbuka, niyo mpamvu yari yaragiye hanze y’igihugu kubera ibibazo byo mu muryango ariko no kuruhuka ngo atekereze neza ku bijyanye n’ahazaza h’umuziki we.

Umuhanzi Diplomate azwi mu ndirimbo umucakara w’ibihe, ikaramu, diplomatie n’izindi.

Diplomate avuga ko agiye guhanga indirimbo nyinshi ndetse izindi akagerageza kuzisubiramo zikajyana n’igihe akaba yizera ko uko yari azwi mu buhanzi azerekana ko umwami ahora ari umwami.

Abisobanura agira ati “abantu bagomba kwemera ko umwami ahora ari umwami, naragiye ariko nsanga abo nasize bagikora, itandukaniro igaragarira mu gihe nzaba nongeye kwigaragaza nkongera nkaba umutware w’uyu muziki”.

Umuhanzi Diplomate azwi mu ndirimbo umucakara w’ibihe, ikaramu, diplomatie n’izindi. Kuri uyu munsi yakiriwe n’urubyiruko rwinshi rwashakaga kumukoraho.

Umugwaneza Jean Claude