Mu ntangiriro z’uku kwezi kwa Kamena, Urwego rw’Ubugenzacyaha RIB rwatangarije Kigali Today ko rugishakisha kandi rutegereje uwaza kuruha amakuru ku bijyanye n’urupfu rwa Cyusa Sadiki Prince.

Umurambo wa Cyusa wabonetse ku itariki 03 Kamena 2022 mu gishanga kiri hepfo mu Mudugudu wa Kigabiro, Akagari ka Niboye, Umurenge wa Niboye mu Karere ka Kicukiro.

Icyo gihe RIB yabwiwe ko uwo mwana yabuze ku itariki 27 z’ukwezi gushize kwa Gicurasi, nyuma y’uko Nyirasenge wamureraga ategereje ko ava ku ishuri agaheba.

Uwitwa Emmanuel Habimana ushinzwe umutekano mu Kagari ka Niboye yaganiriye na Kigali Today avuga ko hamaze gufatwa abantu bane bakekwaho kwica cyangwa kurebera iby’iyicwa ry’uwo mwana wa Kayijuka Hassan, barimo mukase ngo ushobora kuba ari we wamugambaniye.

Habimana avuga ko impamvu abo bantu bafashwe biterwa n’ababatanzeho amakuru, barimo Bimenyimana Jean D’Amour (na we ufunzwe), ngo yavuze ko uwitwa Nizeyimana Barnabes (Murokore) yamuhaye uwo mwana akamushyira mu mufuka.

Bimenyimana ngo yabajijwe impamvu atatanze ayo makuru, avuga ko Nizeyimana yari yaramubwiye ko ari bumwice mu gihe hari icyo yatangaza.

Undi ufungiwe kudatanga amakuru ku iyicwa rya Sadiki ni uwitwa Kalisa ukekwaho kuba ari mu babonye umurambo ushyirwa mu gishanga cya Niboye ‘ntahite atanga amakuru’.

Iperereza ku rupfu rw’uyu mwana riracyakomeje, ariko igihe umurambo w’umwana wabonekaga, Umuvugizi wa RIB Dr Thierry B. Murangira yasabye abantu bose kwirinda ibihuha bagategereza ibizava mu iperereza.

Inkuru bijyanye:

Kicukiro: Iperereza ku murambo w’umwana wabonetse mu gishanga muri Niboye rirakomeje