Iki cyaha cyo kwica umugore we akoresheje ifuni, Ndayisenga Emmanuel akekwaho, yagikoze mu saa cyenda z’urukerera kuri uyu wa 12 Gashyantare. Ngo intandaro y’uru rupfu ni amakimbirane ashingiye ku gufuha yari amaze igihe muri uyu muryango.

Umugore wa Ndayisenga Emmanuel, Uwimana Florence w’imyaka 37, ngo yahoraga ashinja umugabo we ubusambanyi. Ibi ngo byatumaga bahora batongana ariko bakabihisha rubanda kugira ngo rutabimenya kuko bari basanzwe ari abantu basenga cyane.

Ubuyobozi bw’Akagari ka Nyamirama buvuga ko iki kibazo cy’amakimbirane y’uyu muryango butari bukizi. Karemera Theoneste, Umunyamabanga Nshingwabikorwa w’Akagari ka Nyamirama, akaba asaba abaturage kujya bagana ubuyobozi mu gihe bafite ibyo batumvikanaho bukabahuza aho kwihanira.

IP Emmanuel Kayigi, Umuvugizi wa Polisi Wungirije mu Ntara y’Iburasirazuba akaba n’umugenzacyaha wa polisi y’igihugu ikorera muri iyo ntara na we asaba abaturage kwizera ubuyobozi bakabugezaho ibibazo bafite bigakemurwa aho kumva ko byakemurwa n’imirwano.

Abaturage na bo barasabwa kuba ijisho ry’umuturanyi hagamijwe gukumira ibyaha bitaraba.

Ndayisenga Emmanuel agikora iki cyaha ngo akaba yasize umubiri w’umugore we yari amaze kwica mu nzira aho yamwiciye ubwo umugore yageragezaga kwiruka amuhunga. Ndayisenga yahise aburirwa irengero kugeza ahagana mu ma saa saba ubwo yizanaga kuri Sitasiyo ya Polisi ya Karangazi.

Umubiri w’umugore we, nyuma yo gukorerwa ibizamini na muganga, ngo ukaba ushobora guhita ushyingurwa kuko ngo wari utangiye kwangirika.

Uwimana Florence apfuye asize abana bane. Umukuru akaba ngo afite imyaka 12 y’amavuko.

SEBASAZA Gasana Emmanuel