Colonel Assimi Goita ubwo yarahiriraga kuba Perezida w’inzibacyuho muri Mali tariki 25 Nzeri 2020 (Ifoto: Xinhua)

Icyakora umugambi we ntiyabashije kuwugeraho kuko yahise afatwa n’abashinzwe umutekano. Ku Cyumweru tariki 25 Nyakanga 2021 nibwo Guverinoma ya Mali yatangaje ko uwo muntu yapfuye, akaba ngo yari mu bitaro kuva akimara gufatwa.

Uwo muntu utaratangajwe umwirondoro n’amazina, yagerageje kwica PerezidaAssimi Goïta ubwo yari mu musigiti i Bamako mu murwa mukuru mu masengesho y’umunsi mukuru wa Eid al-Adha abo mu idini ya Islamu baherutse kwizihiza.

Icyakora abashinzwe umutekano we bahise bahagoboka babasha kumutabara no guta muri yombi uwo muntu, Perezida bahita bamusohora muri uwo musigiti ntacyo yigeze aba.

Uwagerageje kumwivugana ngo yagaragaraga nk’umusore ukiri muto wari wambaye ipantalo y’ikoboyi (jeans) n’ishati y’umweru. Akimara gufatwa hahise hatangira iperereza kuri icyo gikorwa cyo kugerageza kwica Perezida no guhungabanya umutekano w’Igihugu. Icyakora byatangajwe ko yapfuye mu gihe yari ataragezwa imbere y’ubutabera.

Kuva yafungwa ubuzima bwe ngo bwakomeje kumera nabi ajyanwa mu bitaro ariko ntiyabasha kubaho. Iperereza ku mpamvu nyakuri z’urupfu rwe na ryo ryahise ritangira, ndetse n’iryari ririmo gukorwa ku gikorwa yageragej cyo kwica Perezida na ryo rikaba ngo rigomba gukomeza.

MENYA UMWANDITSI

Malachie Hakizimana

Umunyamakuru

@ h_malachie

Reba inkuru zose nanditse ( 1526 )