Ibi byavugiwe mu biganiro byahuje abaturage , abatwara ibinyabiziga n’abashinzwe umutekano wo mu muhanda kuri uyu wa kane tariki ya 14 Kanama 2014, mu gutangiza ukwezi kwahariwe umutekano wo mu muhanda, mu murenge wa Bushekeri, aho bita ku Buhinga.

Chief Supertendent Johnson Sesonga akuriye ibikorwa bya Polisi mu karere ka Rusizi na Nyamasheke, yavuze ko hari amakosa menshi akorwa n’abatwara ibinyabiziga ashyira mu kaga ubuzima bwabo n’ubw’abantu baba batwaye bikaba ari ngombwa ko bakomeza kwigishwa ko badakwiye gukinisha ubuzima bwabo n’ubw’Abanyarwanda.

Yavuze ko ibiganiro bikwiye kuba hagati y’abatwara ibinyabiziga na polisi kugira ngo baganire uburyo bakwisanga muri polisi bakababwira ibibazo bahura nabyo n’uburyo byakemuka, bikazatuma bareka kwikanga ko polisi ibereyeho kubahana no kubarebuza ko ahubwo iba iharanira ubuzima bwabo n’ubwabo batwara.

Yagize ati “birakwiye ko abatwara ibinyabiziga batwisangaho bakatubwira ibibazo bafite tukabishakira umuti , kuko tubereyeho kubafasha kurinda ubuzima bwabo n’ubw’abo batwaye, turabasaba gutwara ibinyabiziga bifite ubuziranenge byahawe icyemezo cy’ubudakemwa (controle technique) kwirinda gutwara n’umuvuduko ukabije, bakirinda gutwara basinze kandi bakagira umwanya wo kuruhuka ngo badasinzira n’ibindi”.

Gutangiza icyumweru cyahariwe umutekano mu muhanda mu karere ka Nyamasheke byitabiriwe na Polisi ndetse n’abaturage.

Chief Supertendent Sesonga yasabye ababyeyi kwibuka gucunga abana babo kugira ngo badakinira mu muhanda ndetse yamagana abantu bagenda n’amaguru mu muhanda basinze ku buryo bashobora guteza impanuka.

Ibi byavuzwe nyuma y’uko bamwe mu batwara ibinyabiziga bavuze ko hari amakosa bagwamo batabigambiriye cyangwa se biturutse ku kuba hatabayeho ihanahanamakuru rihagije nko kuba hari abatwara ibinyabiziga batarabona ibyemezo bituruka muri RURA kubera hari ubwo bitinda, n’ibijyanye na controle technique.

Umuyobozi w’akarere wungirije ushinzwe imibereho myiza y’abaturage, Gatete Catherine, yasabye abaturage bose gufata ingamba kugira ngo impanuka zidakomeza guhitana abantu, asaba abatwara ibinyabiziga guhorana ubushishozi bagatwara ibinyabiziga basuzumye neza, kandi bakabitwara bameze neza.

Yasabye kandi abantu bose kugira ubutwari bwo guhagarika utwaye ikinyabiziga mu gihe babonye ko ashobora kubashyira mu kaga, yongera kuvuga ko kuganira no gufata ingamba bizafasha kurangiza ibyo bibazo.

Yagize ati “birababaje kubona umuntu ushobora kugira impanuka nyamara yabanje kubona ibimenyetso yashoboraga gukumira, nko kubona umushoferi atameze neza ntubivuge, cyangwa ukabona ko hari ibikorwa ari gukora nko kuvugira kuri telephone cyangwa umuvuduko ukabije ukicecekera”.

Kuri uyu munsi hatangijwe ukwezi kwahariwe umutekano mu muhanda mu gihe muri iyi minsi havugwaga impanuka zikomeye zahitanaga abantu benshi hirya no hino mu gihugu.

Umugwaneza Jean Claude