Iyi nkunga y’ibikoresho, bakaba bayishyikirijwe n’umushinga wa Compassion International ukorera mu matorero atatu atandukanye akorera mu karere ka Ruhango.

Kuri ubu bamwe mu babyeyi bafite abana bishyurirwa n’uyu mushinga, bavuga ko watangiye kubafasha mu kububakira amacumbi ku batayafite, ndetse ukaba unaha indyo yuzuye bamwe muri bo bafite agakoko gatera SIDA.

Bimwe mu bikoresho biyungurura amazi byahawe imiryango 792 yo mu murenge wa Ruhango

Mukankusi Annee Marie, umwe mu bahawe ibi bikoresho, avuga ko nta mazi meza bagiraga. Ati “Ayo tuvoma yari ibirohwa ndetse rimwe na rimwe tukayasangamo iminyorogoto, ikadutera inzoka zo mu nda zikurura gucibwamo n’izindi ndwara ziterwa n’umwanda”.

Akavuga ko kuba bahawe ibikoresho biyungurura amazi kandi byujuje ubuziranenge, batazongera guhura n’ibi bibazo by’indwara za hato na hato baterwaga no kunywa amazi mabi.

Abaturage beretswe inzira amazi abanza kunyuzwamo kugira ngo anyobwe

Bahati Yusufu, Umuhuzabikorwa w’Umushinga Compassion International, mu karere ka Ruhango na Nyanza, avuga ko igikorwa cyo gufasha imiryango, kubona ibikoresho biyungurura amazi cyatangiriye mu ntara y’iburasirazuba, akavuga ko bifuza ko igikorwa cyo guha abaturage ibikoresho biyungurura amazi, bazakigeza ku bandi benshi, hirindwa indwara zikomoka ku mazi mabi.

Mbabazi Francois Xavier, Umuyobozi w’Akarere ka Ruhango, wari Umushyitsi mukuru muri uyu muhango, yavuze ko guha aba baturage ibikoresho biyungurura amazi, bigiye kuzamura umubare y’abaturage bakoresha amazi meza, akavuga ko mu mihigo y’akarere bifuza ko abaturage bakoresha amazi meza bagomba kuva ku gipimo cya 70 bakagera ku 100%.

Umushinga Compassion Internationale ku rwego rw’igihugu, ufasha abana ibihumbi 80 baturuka mu miryango ikennye, muri aka karere ka Ruhango itera inkunga abarenga ibihumbi bibiri. Imiryango irenga 2000 muri aka karere, niyo umushinga wa Compassion uteganya guha ibikoresho biyungurura amazi.

Eric Muvara