Biteganyijwe ko iki gikorwa kizamara iminsi itatu kizarangira havuwe abantu barenga gato igihumbi kuko ku munsi haravurwa abarwayi bari hagati ya 300 na 350. Izi nzobere ni abakorerabushake bakaba bakora ubu buvuzi bakoresheje gutera inshinge aharwaye.

Ubushakashatsi bwaragaraje ko nta kibazo uko guterwa inshinge butera kuwabukorewe; kandi ubwo buvuzi bwifashisha uruvangitiranye rw’imiti itandukanye; nk’uko byemezwa na Dr. Wong ukuriye izo nzobere muri icyo gikorwa.

Uyu yaramaranye imyaka irenga itanu uburwayi bw’umutwe udakira.

Mu miti ikoreshwa harimo za vitamine, imiti y’ibinya, serumu n’undi muti witwa ozone ukunze gufasha abarwayi bafite uburibwe ndetse n’indi myinshi.

Abaje kwivuza biganjemo abasaza n’abakecuru bakuze, niyo mpamvu abanyamakuru babajije umuyobozi w’ibitaro bya Nyamata niba atari icyorezo mu bakuze maze asubiza ko nta cyorezo gihari ahubwo ko iyo umuntu ageze mu zabukuru akunda guhura n’ibibazo byo kuribwa umutwe udakira ndetse n’iby’umutwe n’umugongo.

Karekezi Raphael wavuye mu mu murenge wa Mwogo mu karere ka Bugesera avuga ko yakiriye neza kino gikorwa kuko yari afite ikibazo cy’umugongo wari warabyimbye ndetse n’imitsi yo mu kaguru.

Ati “narivuje mu bushobozi bwanjye buke nari mfite ariko bikanga gukira kuko narimaranye iki kibazo igihe kingana n’imyaka 20. Nindamuka nkize nzashima Imana kandi n’aba bagiraneza Nyagasani azabahembe”.

Umurongo ni muremure w’abantu bategereje kwivuza imitsi n’umutwe udakira.

Ibi kandi na none bivugwa na Twahirwa Isroni wo mu murenge wa Mayange aho avuga ko yari afite ikibazo cy’umutwe udakira ariko nyuma y’iminota mike avuye imbere y’abaganga arumva yatangiye gukira.

Kubera ukuntu hari abarwayi benshi bishoboka ko bose bizarangira batavuwe, byatumwe izo nzobere zibanza kwigisha abaganga babiri ndetse n’abaforomo bane kugirango bazakomeze icyo gikorwa mu gihe bo bazaba basubiye iwabo.

Egide Kayiranga