Kamucyera ngo yagiye kwa muganga hatandukanye ndetse yagerageje no kwivuza mu Kinyarwanda biranga, kugeza igihe bimuviriyemo ubumuga bukabije budashobora gutuma hari icyo yakwimarira.

Yagize ati “natangiye kurwara amaguru muri 94, nkajya numva birandya ariko bidakabije nkagira ngo bizakira. Nagiye njya kwa muganga bampa imiti itandukanye nkagira ngo bizakira, ariko kugeza ubu aho kugira ngo bikire bigenda byiyongera ku buryo ubu kugenda bitanyorohera”.

Avuga ko adashobora kugenda urugendo rurerure ngo kuko iyo akandagiye hasi ababara cyane bigatuma ahora yiyicariye mu rugo. Ubuyobozi bwagerageje kumufasha bumuha bimwe mu byo yari akeneye birimo mituweri n’inka ariko ntacyo byamumariye.

Arwaye iyi ndwara kuva mu mwaka w’i994.

Inka yahawe muri gahunda ya Girinka ariko yanze kubyara arayigurisha kugira ngo agure izabasha kubyara. Ati “Kugeza ubu ntegereje ko ibyara kuko nibyara numva ari bwo nzabasha kuva mu bukene ”.

Kamucyera yagize ati “ibibazo by’uburwayi nasaga nuwabyakiriye none se ko kwa muganga bambwiye ko ntashobora gukira. Ahubwo ikibazo kinkomereye ni icy’ubukene; kuba ntabasha kubona agafaranga biranzonga kuko urabona ubu bumuga ntacyo nabasha kubukorana”.

Abana be batatu nabo ngo baracyari bato ku buryo batabasha kumucira inshuro; ariko umukuru yavuye mu ishuri kugira ngo ajye ahinga abashe gutunga barumuna be.

Uyu mubyeyi avuga ko uwamufasha agakira ubu burwayi yaba amufashije kuko ngo uburwayi afite bw’amaguru bumubabaza cyane kandi bukaba bumubuza kugira umurimo yakwikorera.

Hortense Munyantore