Mu ikigo cy’amashuri cya Mwendo kiri mu murenge wa Muko niho icyo gikorwa cyatangiriye kandi abanyeshuri bishimiye icyo gikorwa.

Nibagwire Leoncia wishimiye inyigisho babahaye ku ndwara y’igituntu yagize ati “tugiye gukangurira n’abo tubana mu rugo kugira ngo nabo babashe kwipimisha ku bushake kuko twasanze ari byiza kumenya uko umuntu ahagaze”.

Yakomeje avuga ko aramutse asanze arwaye igituntu yakwihutira gufata imiti kugira ngo atanduza abandi.

Umuyobozi w’ikigo cy’amashuri cya Mwendo, Nyandwi Thomas, yavuze ko bishimiye icyo gikorwa kuko muri icyo kigo hari hasanzwemo umunyeshuri umwe uzwiho ubwo burwayi ngo bishoboke ko hari abo ashobora kuba yaranduje batabizi.

Ati “ni byiza ko abanyeshuri bahawe n’inyigisho zijyanye no kwirinda ndetse n’ibimenyetso biranga uwanduye iyo ndwara, bikaba bituma iyo bageze iwabo babibwira abo basize bityo ubutumwa bukagera kuri bose”.

Abaganga bari baje gupima bo bavuga ko abanyeshuri bitabiriye kwipimisha ari benshi ugereranije n’ahandi.

Hariho ubwoko butandukanye bw’igituntu, nk’icyo mu maraso, mu magufa, mu gikororwa n’ahandi, ubu hakaba hari gupimwa icyandurira mu mwuka kikaba ari nacyo kibi cyane bitewe n’uko cyandurira mu mwuka, bakaba bagipima hifashishijwe igikororwa.

Igituntu ni indwara yica uyirwaye igihe atayivuje hakiri kare cyangwa ngo afate imiti neza.

Ernestine Musanabera