Uburyo bwa mbere ni ukwirinda ikintu cyose cyatokoza ijisho. Dr Nzabamwita atanga urugero rwo kwirinda kujya ahantu hari imikungugu ishobora kujya mu maso, umuntu akirinda kujya ahantu hari imyotsi ihumanya ikirere ndetse n’imyotsi isanzwe.

Igihe umuntu ari ahantu hari ibintu bishobora kumutokoza hashobora no kumutera ibyago byo kurwara amaso, ni byiza ko yambara indorerwamo zimurinda iyi myanda ko yinjira mu maso ndetse n’ikintu cyakoramo ijisho rigakomereka.

Dr Nzabamwita avuga ko umwotsi w’inkwi, umwotsi w’imodoka, umuyaga urimo imikungugu ndetse n’imicanga byakwirindwa hakoreshejwe indorerwamo zitari iz’amaso.

Uyu muganga avuga ko hari izindi ndwara zitandura zirimo umuvuduko w’amaraso na diyabete zitera uburwayi bw’amaso ndetse n’ubuhumyi iyo umurwayi ativuje neza, hakaba hashobora kuzamo ishaza.

Ati “Birashoboka ko wakwirinda indwara y’umuvuduko ndetse n’indwara ya Diyabete, ukora imyitozo ngororamubiri no kwirinda ibintu byaguhangayikisha byose ndetse n’indi mpamvu yatuma ugira izi ndwara kuko ziri mu biteza ibyago byo kurwara amaso ndetse rimwe na rimwe akagira uburwayi bw’ishaza”.

Abantu bari munsi y’imyaka 40 bagirwa inama yo kugana ikigo nderabuzima byibura rimwe mu myaka ibiri kugira ngo bisuzumishe uburwayi bw’amaso. Abafite indwara zidakira bo basabwa kwisuzumisha kenshi gashoboka uko bageze kwa muganga kugira ngo harebwe uko ubuzima bwabo bw’amaso buhagaze.

Ubushakashatsi bwakozwe na Minisiteri y’Ubuzima bugaragaza ko mu Rwanda umuntu umwe ku ijana (1%) mu bafite hejuru y’imyaka 50 bahumye bitewe n’ impamvu zashoboraga kwirindwa.

Imibare ya Ministeri y’Ubuzima igaragaza ko umubare w’abivuza indwara z’amaso wazamutse ku kigero cya 45% hagati y’umwaka wa 2017 na 2020, wavuye ku bantu 512,321 ugera ku 743,399.

Dr Nzabamwita agira inama abafite ibibazo by’amaso kugana abaganga kuko ku bigo nderabuzima hari serivise zivura amaso.

MENYA UMWANDITSI

Ernestine Musanabera

Umunyamakuru

@ musanatines

Reba inkuru zose nanditse ( 1478 )