Abasaga miliyoni 2 n’ibihumbi 700 banduye COVID-19: Dore uko icyo cyorezo gihagaze ku rwego rw’Isi

Icyorezo cya Coronavirus cyahawe izina rya COVID-19 kikaba kimaze amezi atatu cyemejwe n’Ishami ry’Umuryango w’Abibumbye ryita ku Buzima (OMS) ko ari icyorezo.

Iyi shusho yo ku wa 23 Mata 2020 igaragaza ahibasiwe kurusha ahandi ku isi (Ifoto: ECDC - European Union)
Iyi shusho yo ku wa 23 Mata 2020 igaragaza ahibasiwe kurusha ahandi ku isi (Ifoto: ECDC - European Union)

Imibare y’agateganyo yo kuri uyu wa Gatanu tariki 24 Mata 2020 yerekana ko abamenyekanye banduye icyo cyorezo bose hamwe ari 2,752,692 muri bo hapfuye 192,262 abakize ni 761,463 naho abakirwaye ni 1,798,967.

Icyo cyorezo cya Covid-19 cyahereye mu Bushinwa mu mujyi wa Wuhan. Kuri ubu mu gihugu cy’u Bushinwa habarurwa abantu abanduye bangana na 82,804 abakize ni 77,257 abapfuye ni 4,632 naho abakirimo kuvurwa barwaye ni 915.

Ku mugabane wa Aziya habarirwa abanduye bangana na 441,847 abakize 208,031 abapfuye 16,389 abakirwaye ni 217,427. Kuri uyu mugabane ibihugu bifite abarwayi benshi ni Turukiya ifite abarwayi 80,808 u Buhinde bufite abarwayi 17,768 Iran ifite abarwayi 16,021 Saudi Arabia ifite abarwayi 12,926 ndetse na Singapore ifite abarwayi 11,139.

Ku mugabane w’u Burayi niho habarirwa abarwayi benshi kurusha ahandi, kuko habarirwa imibare y’abanduye bangana na 1,212,436 abakize 385,278 abapfuye 115,231 abakirwaye ni 711,927.

Kuri uyu mugabane ibihugu bifite abarwayi benshi ni u Bwongereza bufite abarwayi 118,996 u Butaliyani bufite abarwayi 106,848 Espagne ifite abarwayi 104,885 u Bufaransa bufite abarwayi 94,239 ndetse n’u Burusiya bufite abarwayi 62,439.

Ku mugabane wa Amerika habarirwa imibare y’abanduye bangana na 956,684 abakize ni 108,722 abapfuye ni 54,120 abakirwaye ni 793,842.

Kuri uyu mugabane ibihugu bifite abarwayi benshi ni Leta zunze ubumwe za Amerika ifite abarwayi 748,198 Canada ifite abarwayi 25,202 Mexico ifite abarwayi 7,937 Panama ifite abarwayi 4,749 ndetse na Repubulika y’abadominikani ifite abarwayi 4,604.

Ku mugabane wa Amerika y’Amajyepfo habarirwa abarwayi bangana na 104,125 abakize ni 43,737 abapfuye ni 5,108 abakirwaye bangana na 55,280.

Kuri uyu mugabane ibihugu bifite abarwayi benshi ni Brazil ifite abarwayi 20,314 Peru ifite abarwayi 12,920 Ecuador ifite abarwayi 9,295 Chile ifite abarwayi 5,840 ndetse na Colombia ifite abarwayi 3,419.

Ku mugabane wa Afurika harabarirwa abarwayi bangana na 28,647 abakize ni 8,756 abapfuye ni 1,303 abakirwaye bangana na 18,588.

Kuri uyu mugabane ibihugu bifite abarwayi benshi ni Maroc ifite abarwayi 3,059 Misiri ifite abarwayi 2,600 Afurika y’Epfo ifite abarwayi 2,405 Algeria ifite abarwayi 1,245 ndetse na Ghana ifite abarwayi 1,135.

Umugabane wa Oceania ufite abanduye bake ugereranyije n’indi migabane. Abanduye muri Oceania barabarirwa muri 8,232 abakize ni 6,294 abapfuye ni 96 naho abakirwaye ni 1,842.

Kuri uyu mugabane ibihugu bifite abarwayi benshi ni Australia ifite abarwayi 1,460 na New Zealand ifite 344.

Mu Rwanda, imibare yatanzwe na Minisiteri y’Ubuzima ku mugoroba wo ku wa Kane tariki 23 Mata 2020 yagaragazaga ko abantu 87 bamaze gukira COVID-19 (harimo batatu bashya bakize mu masaha 24) naho abandi 67 bakaba bari bakirimo kuvurwa icyo cyorezo.

Umuntu umwe mushya ni we wagaragayeho icyo cyorezo ku wa Kane tariki 23 Mata 2020 mu bipimo 1,343 byafashwe kuri uwo munsi, bituma abagaragayeho icyo cyorezo bose hamwe mu Rwanda baba 154 (harimo 87 bari bamaze gukira).

Kugeza ku wa Kane mu Rwanda nta wari wapfa azize icyo cyorezo, abarwayi bose bakaba barimo kuvurirwa ahantu habugenewe kandi barimo koroherwa, nk’uko itangazo ryashyizwe ahagaragara na Minisiteri y’Ubuzima ryabivugaga.

Kuri uyu wa Gatanu, abantu batandukanye mu Rwanda babinyujije ku mbuga nkoranyambaga, bashimira inzego zikora ijoro n’amanywa ngo zihashye iki cyorezo zirimo cyane cyane iz’ubuzima n’iz’umutekano.

Urukingo rwa COVID-19 rugeze he?

Amatsinda abarirwa mu 100 y’ubushakashatsi ku isi arimo gukora uko ashoboye, ashakisha urukingo rwa COVID-19, ahantu hatandukanye ndetse igeragezwa ry’urwo rukingo rikaba ryaratangiye nko muri Leta zunze Ubumwe za Amerika, mu Budage, mu Bwongereza, n’ahandi.

Ubusanzwe bifata igihe kirekire kibarirwa mu myaka kugira ngo urukingo rw’indwara zitandukanye ruboneke, ariko abashakashatsi barizera kubona urukingo rwa COVID-19 mu mezi make. Amakuru dukesha BBC yo aravuga ko abahanga benshi batekereza ko urukingo rushobora kuzaboneka mu mwaka utaha wa 2021.

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka