Uyu mucuruzi ubusanzwe witwa Hatekimana Martin bakunda kwita Majyambere agezwa imbere y’urukiko yari mu myambaro y’ibara ry’icyatsi kandi arinzwe ku buryo bukomeye na Military Police aregwa n’abashinjacyaha babiri ndetse n’urukiko rwari rugizwe n’abacamanza batatu barimo na perezida w’urukiko rukuru, urugereko rwa Nyanza.

Urukiko rwabanje kumva ibyo ubushinjacyaha bamurega birimo kurema umutwe w’abagizi ba nabi, gushuka Abatutsi barimo bahigwa mu gihe cya Jenoside ngo bahungire hamwe maze nyuma akaza kubicisha.

Abasaga ibuhumbi 40 by’Abatutsi bari bahungiye i Murambi ya Gikongoro ngo bamwe muri bo yabafashije mu buryo bwo kuhagera arangije azana n’Interahamwe mu modoka ye ngo zibice zibamareho.

Usibye ibi byaha aregwa haniyongeraho no kuba yarifashishaga imitungo ye ategura ahakorerwa inama zitegura Jenoside ndetse nawe ubwe akaba yaragendaga imbunda yo kugira bamwe muri bo yica.

Ubushinjacyaha bushingiye ku buhamya bw’abantu banyuranye barimo abamwiboneye imbona nkubone bwamureze kuba yarahaga abicanyi bibumbiye mu mutwe w’interahamwe imodoka ya Toyota Stout itukura yo kubafasha mu ngendo zishakisha Umututsi wese aho yaba yihishe ngo yicwe.

Nyuma yo kumva ibirego by’ubushinjacyaha byatwaye igice cy’umunsi wose nyuma ya saa sita nyir’ukuregwa ibyo byaha byose yahawe umwanya wo kwisobanura maze ibyo aregwa byose arabihakana abyita ibirego bishingiye ku nzangano n’amashyari ngo bamugirira kubera ko ari umukire uzwi mu cyahoze ari Gikongoro ubu akaba ari mu karere ka Nyamagabe.

Yisobanuye agira ati: “Nta ruhare namba nagize muri Jenoside yakorewe Abatutsi bari i Murambi ya Gikongoro ndetse n’izo nama ndegwa nari umucuruzi ishyaka rya MRND rikankodesha inzu yo gukoreramo inama kandi nanjye nkazitabira nk’undi muturage wese wahamagawe mu nama. Rero ibyo ntibivuze ko nari mfite ijambo rinini muri iyo nama”.

Imodoka Majyambere yajemo yari iparitse imbere y’urukiko rukuru urugereko rwa Nyanza.

Me Kayitare Serge, umwunganizi we mu rwego rw’amategeko yunganira umukiriya we avuga ko ibirego aregwa n’ubushinjacyaha nta shingiro bifite agasaba ko arekurwa akagirwa umwere nk’uko byari byakozwe n’urukiko rwa mbere rw’iremezo rwa Butare ariko ubushinjacyaha bukajuririra icyo cyemezo cyamugize umwere.

Uyu mwunganizi we asaba ubushinjacyaha kugaragaza uruhare yagize muri iyo nama n’ibitekerezo biganisha kuri Jenoside yayivugiyemo ngo bitaba ibyo bukaba bugamije gufungisha umukiriya we ku buryo bw’amaherere.

Kuri iyi ngingo ubushinjacyaha buvuga ko umwunganizi we mu rwego rw’amategeko wa Majyembere yigiza nkana ngo kuko inama zose zategurwaga mu gihe cya Jenoside nta kindi cyabaga kiri ku murongo w’ibyigwa uretse umugambi mibisha wo kurimbura Abatutsi.

Ikindi ubushinjacyaha bushingiraho ni imyitwarire yarangaga ababaga bavuye muri izo nama kuko bahitiraga mu kwica Abatutsi ngo rero kubaza icyo runaka na runaka bavugiye mu nama nk’izo ni ukuyobya uburari.

Abatangabuhamya bashinja Majyambere uruhare yagize muri Jenoside barimo ingeri zitandukanye nk’abasiviri, abasirikari n’abahoze ari abajandarume muri icyo gihe ariko abo bose arabahakana akavuga ko ntaho abazi ahubwo ari abagabo b’indarikwa.

Iyo yisobanura kandi anyuzamo akagaragaza ko yari umuntu uzwi kandi wifite mu mufuko maze akagira ati: “ Nk’abo bantu muvuga ko numva batanakomeye nta hantu bagombaga guhurira nanjye rwose”.

Ubushinjacyaha buhagarariwe na Nkusi Faustin hamwe na Nshimiyimana Michel burimo gusabira Majyambere igifungo cya burundu y’umwihariko ndetse no gukomeza gukurikiranwa afunzwe ngo kuko hari ibimenyetso simusiga bufite bigaragaza ko yari agiye guca mu rihumye ubutabera bw’u Rwanda akabutoroka ariko ngo ntibyamuhiriye kuko yatawe muri yombi.

Urubanza rwe ruzasubukurwa tariki 22/10/2013 urukiko runagaragaze ibyo rwashoboye gucukumbura mu buhamya bw’abatangabuhamya bamushinja uruhare yagize muri Jenoside yakorewe Abatutsi muri Mata 1994 aho Majyambere yabaga ku Gikongoro ubu akaba ari mu karere ka Nyamagabe.

Jean Pierre Twizeyeyezu