Uyu mucuruzi ukomeye w’i Nyamagabe yagejejwe imbere y’abacamanza batatu yambaye imyenda y’ibara ry’icyatsi kandi arinzwe n’ingabo z’u Rwanda zibarizwa mu mutwe wa Military Police kuko ibyaha bya Jenoside akurikiranweho yabikoranye n’ingabo zatsinzwe muri Guverinema y’uwahoze ari perezida w’u Rwanda, Juvenal Habyarimana mbere ya 1994.

Perezida w’Urukiko Rukuru urugereko rwa Nyanza yabanje kwisegura ku baburanyi bombi ni ukuvuga abari bahagarariye ubushinjacyaha ndetse na Hategekimana Martin ukurikiranweho uruhare yagize muri Jenoside yakorewe Abatutsi muri Mata 1994 bari bahungiye i Murambi maze abasaga ibihumbi 40 bakahicirwa.

Umucuruzi Hategekimana Martin ubwo yari imbere y’ubutabera yisobanura.

Nk’uko Perezida w’imiburanishirize y’uru rubanza yabivuze rwasubitswe kubera ko urukiko rukirimo gukora iperereza rushakisha amakuru komisiyo y’igihugu ishinzwe kurwanya Jenoside ibitse arebana n’uko Jenoside yakorewe Abatutsi mu cyahoze ari Gikongoro ubu akaba ari Nyamagabe yagenze ndetse n’abayigizemo uruhare bose.

Yabisobanuye agira ati: “Twandikiye Komisiyo y’igihugu ishinzwe kurwanya Jenoside tuyisaba kuduha amakuru y’uko mu cyahoze ari Gikongoro Abatutsi baho bishwe ndetse n’ababigizemo uruhare ariko ububiko bwabo baracyabutunganya ntibyatworoheye kubona ibyo twabasabye niyo mpamvu uyu munsi ntacyo turi bubatangarize”.

Abahagarariye ubushinjacyaha babanje kugira icyo bavuga kuri iryo subikwa ry’urubanza nabo bemeranya n’urukiko ko iryo perereza ryakomeza gukorwa ahubwo hakongerwaho no kuzabaza abatangabuhamya bashinja Majyambere uruhare rwe muri Jenoside.

Me Kayitare Serge wunganira mu mategeko Majyambere yamaganiye kure ibyo ubushinjacyaha bwasabye ko byongerwa kuri iryo perereza. Yavuze ko abo batangabuhamya nta gishya bazaba bazanye muri urwo rubanza ngo kuko n’ubundi ubuhamya bwabo aribwo bufungishije umukiriya we.

Aha yari amaze kumenyeshwa ko urubanza rwe rusubitswe asubiye muri gereza.

Ubushinjacyaha bwakomeje gushikama ku byo bwasabye urukiko buvuga ko ibyo byatewe n’impaka zavutse ubwo tariki 23/09/2013 urubanza rwatangiraga kuburanishwa maze uregwa agahakana ibyo abatangabuhanya bagiye bamushinja.

Ngo gutumiza abo batangabuhamya bizatuma izo mpaka zitongera kuba kuko umutangabuhamya ubwe azagaragara abyisobanurira bityo bikureho urujijo rwabaye urubanza rugitangira kuko uregwa n’ubushinjacyaha batabyumvaga kimwe.

Mu gihe urukiko rugikomeje iperereza ndetse n’ubushinjacyaha bukaba bwasabye kuzongera gutumiza abatangabuhamya bashinja Majyambere uregwa nawe yatumije abatangabuhamya bazamushinjura kugira ngo impande zombi zizanyomozanye tariki 26/11/2013 ari naho urubanza rwimuriwe.

Umugore we bashakanye yari yaje kumva urubanza umugabo we aregwamo ibyaha bya Jenoside yakorewe Abatutsi mu Rwanda.

Majyambere bita ko ari umucuruzi ukomeye w’i Nyamagabe aregwa ibyaha bya Jenoside yakorewe Abatutsi muri Mata 1994 birimo kurema umutwe w’abagizi ba nabi, gushuka Abatutsi barimo bahigwa mu gihe cya Jenoside ngo bahungire hamwe maze nyuma akaza kubicisha.

Ibindi byaha aregwa n’ubushinjacyaha ni ukuba yarajyaga mu nama zitegura Jenoside ndetse akaba ari nawe uzifatamo ijambo rinini hamwe no kuba yaragiye atera inkunga Interahamwe mu bihe bitandukanye azifasha mu ngendo zo kujya gushakisha abatutsi aho bari hose ngo bicwe akoresheje imodoka ze ariko iyamamaye cyane ngo ni stout y’ibara ry’umutuku.

Mu kwisobanura kwa Majyambere ibi byaha aregwa arabihakana akavuga ko arengana ahubwo byose ari ishyari n’inzangano zishingiye ku mitungo myinshi atunze yakomeye mu bucuruzi.

Jean Pierre Twizeyeyezu