Nubwo Canada cyari yamubabariye akaguma ku butaka bwayo, Padiri Nsengiyumva ntagishoboye kwihanganirwa akaba ari na yo mpamvu tariki 21/02/2012 urukiko rukuru rwa Canada rwemeje ko agomba gusubizwa mu Rwanda.

Padiri Nsengiyumva avuga ko adashaka koherezwa mu Rwanda ngo kuko ibitekerezo bye batuma ashyirwa mu kaga. Umwunganira, umunyamategeko Noël Saint-Pierre, avuga ko bagiye gushaka icyo bakora ngo icyo cyemezo gihagarikwe cyangwa se abe yakoherezwa mu kindi gihugu kitari u Rwanda.

Padiri Nsengiyumva yahunze u Rwanda mu 1994 ajya muri Repubulika Iharanira Demokarasi ya Kongo aho we n’abandi bihaye Imana 28 bandikiye Papa Yohani Paul II ibaruwa bavuga ku byabaye mu Rwanda.

Muyi iyo baruwa Padiri Nsengiyumva yavuzemo amagambo asebya FPR-Inkotanyi, avuga ko urukiko mpuzamahanga mpanabyaha rwashyiriweho u Rwanda (ICTR) ruyobowe n’abanyabyaha kandi ko mu Rwanda ubuyobozi bwihariwe n’Abatutsi; nk’uko ikinyamakuru The National Post cyabyanditse.

Ibi byatumye Padiri Nsengiyumva adahabwa ubuhunzi muri Canada ubwo yahageraga mu 1999 kuko bifatwa nko guhakana no gupfobya Jenoside. Nubwo atahawe ubuhunzi ariko yemerewe kuhaguma ku mpamvu zo kumufasha (humanitarian grounds).

Padiri Nsengiyumva wahawe ubusaseredoti mu 1992 mu Rwanda muri Diyosezi ya Ruhengeri.

Anne Marie Niwemwiza