Imyiteguro yo gutangira gukoresha iyo nteganyanyigisho muri Mutarama 2016 mu mashuri y’inshuke, umwaka wa 1 n’uwa 4 mu mashuri abanza n’ayisumbuye irakomeje.

Abarimu 102 basoje amahugurwa y’iminsi 10 ku gutegura imfashanyigisho n’uko amasomo azagenda yigishwa icyumweru ku kindi (Scheme of work) kuri uyu wa 17 Kamena 2015 mu Karere ka Musanze.

Aganira n’itangazamakuru nyuma yo gusoza ayo mahugurwa, Dr. Musabe Joyce, umuyobozi ushinzwe integanyanyigisho n’imfashanyigisho muri REB, atangaza ko abo barimu ari bo bazifashishwa mu guhugura abandi mu turere.

Icyakora, Dr. Musabe avuga ko kugira ngo iyi nteganyanyigisho izafashe umunyeshuri kugera ku burezi bufite ireme, ngo umwarimu agomba guhindura imyumvire isanzwe, agakora cyane.

Agira ati “iyi nteganyanyigisho ni nziza pe ariko ishaka umwarimu witanga, igashaka umwarimu ufite ubushake; igashaka umwarimu utari umunebwe… ni yo mpamvu muri iyo teacher manual (igitabo cya mwarimu) irashaka ko mwarimu ahindura imyumvire afate ibintu uko bitari bisanzwe…tubone abana bafite ubushobozi kurenza uko bari bameze.”

Ababyeyi n’abarimu barasabwa kugira iyi nteganyanyigisho iyabo kugira ngo izatume abana barangiza icyiciro cy’amashuri runaka bafite icyo bazi cyabagirira akamaro ku giti cyabo n’igihugu muri rusange.

Iyi nteganyanyigisho y’ amashuri y’incuke, abanza n’ayisumbuye yashyizwe ahagaragara na Minisiteri y’Uburezi ku wa 23 Mata uyu mwaka, yitezweho kuzana impinduka mu burezi butanga ubushobozi, ubumenyi n’imyitwarire iboneye ku buryo umwana urangije azaba afite ubushobozi bwo kwishakira ibisubizo by’ibibazo bimukikije.

Uko iyi nteganyanyigisho ishyize imbere ubushobozi (competence-based curriculum) iteye, abarimu bagomba guha urubuga abana bakishakira ibisubizo, bo icyo bakora ni ukubayobora mu mikoro bakora babunganira igihe bibananiye.

Anastasie Nikuze, Umurezi mu Karere ka Nyarugenge ashimangira ko abana bazabona ubumenyi n’ubushobozi ndetse n’imyitwarire iboneye bikaba byari bikenewe cyane mu muryango nyarwanda hamwe no ku isoko mpuzamahanga ry’umurimo.

Ku masomo abanyeshuri bo mu mashuri abanza n’ayisumbuye baziga, hiyongereyeho igifaransa mu mashuri abanza, igiswahili n’isomo ryo kwiyemeza kuba rwiyemezamirimo rizwi nka “entrepreneurship” mu rurimi rw’icyongereza.

Amasomo yose baziga bazigishwa kuyabyaza umusaruro bahereye ku mahirwe abakikije bityo bakihangira imirimo ibyara inyungu; nk’uko bishimangirwa na Rutiyomba Flavien, umukozi wa REB ushinzwe iryo somo.

NSHIMIYIMANA Leonard