Mu birori byo kwizihiza iyi Yubile byabaye kuri uyu wa 22 Ugushyingo 2015, bagarutse kuri bimwe mu bikorwa by’iterambere iri torero ryakoze mu rwego rwo kunganira Leta muri gahunda zayo zo gufasha abaturage kwikura mu bukene.

Umuvugizi wa ADEPR, Pasitori Sibomana Jean, yavuze ko biyemeje kurandura ubujiji mu banyarwanda.

Agira ati" Kuva mu 1999 twahaye impamyabumenyi abantu basaga ibihumbi 600 bize kwandika, gusoma no kubara kuko twasanze kujijuka ari yo soko y’iterambere ryuzuye kandi tuzakomeza iki gikorwa".

Sibomana akomeza avuga ko muri iyi myaka 75 ADEPR imaze mu Rwanda, ku mbaraga z’Imana bubatse amashuri 303 ari mu byiciro byose kuko ngo bifuriza Abanyarwanda kugira ubumenyi bubafasha gukomeza kwiyubakira igihugu.

Mu bindi bikorwa bakoze ngo bubakiye inzu 600 abarokotse Jenoside yakorewe Abatutsi mu 1994 batishoboye, bubatse amavuriro ndetse banujuje ihoteri mu mujyi wa Kigali izinjiza amafaranga azabafasha kurangiza inshingano z’itorero.

Minisitiri w’Ubutegetsi bw’igihugu, Francis Kaboneka, yashimiye ADEPR kuri ibi bikorwa by’iterambere yagezeho ariko kandi asaba abayoboke b’iri torero kutongera kuga mu bibazo byigeze kurihesha isura mbi.

Yagize ati" Mwagiye mugira ibibazo by’amakimbirane ndetse n’ibibazo by’amacakubiri mu itorero, ubuyobozi bw’igihugu bwifuza ko ibyo bitazongera na rimwe kuko byabasubiza inyuma mu iterambere".

Akomeza avuga ko abayobozi mu itorero batashobora gukomeza kuvuga ubutumwa bwiza mu gihe hagati yabo nta bwumvikane buhari, yanabasabye kandi gukomeza kwita ku bakene.

Ati"Umukirisitu cyangwa itorero, mugomba gufasha abababaye, impfubyi n’abapfakazi kuko utabwiriza ubutumwa umuntu ushonje ngo yumve, banza ukemure ikibazo cy’inzara urebe ko atumva".

Ibi birori bikaba byitabiriwe na zimwe mu nzego za Leta, ibihugu bitandukanye ndetse n’amatorero anyuranye.

Itorero ADEPR ryageze mu Rwanda mu 1940, rizanywe n’abavugabutumwa bo mu gihugu cya Suwede cyo ku mugabane w’Uburayi.

Munyantore Jean Claude.