Byose hamwe n’ibikoresho bizatwara miliyoni 3,3 z’amadolari y’amanyamerika, ni ukuvuga hafi miliyari ebyili z’amafaranga y’u Rwanda ku bufatanye bwa Banki y’Isi na Leta y’u Rwanda.

Nyuma y’uruzindiko rw’intumwa za Banki y’Isi kuri IPRC West, ishami rya Karongi, umuyobozi w’icyo kigo Mugiraneza Jean Bosco yatangarije Kigali Today ko izo ntumwa zari zije kuhasura kugira ngo zirebe ahazubakwa ishuli ry’ubumenyingiro n’amazu yo kwimenyerezamo imyuga itandukanye.

Umuyobozi wa IPRC West yatangaje ko kubaka biteganyijwe gutangira mu kwezi kwa munani, ku buryo mu kwezi kwa mbere umwaka utaha wa 2014 abanyeshuli bazatangira kwiga.

Izo nyubako zose n’ibikoresho, umuyobozi wa IPRC West yasobanuye ko iryo shuli rizubakwa ku bufatanye bwa Banki y’Isi rizigisha imyuga itandukanye harimo ibijyanye n’ubukerarugendo n’amahoteli, iby’ubwubatsi, ububaji, amashanyarazi n’amazi.

Intumwa za Banki y’Isi zari ziyobowe na Sajitha Bashir ukuriye ishami rya Banki y’Isi rishinzwe uburezi muri Afurika y’i Burasirazuba n’iy’Amajyepfo. Bari baherekejwe na Gasana Jerome, Umuyobozi Mukuru w’ikigo cy’igihugu gishinzwe guteza imbere ubumenyingiro (WDA), ari nacyo gishinzwe ibigo bya IPRC mu Rwanda.

Sajitha Bashir yavuze ko uruzinduko rwe rwamuhaye ishusho nziza y’uko ibyo bateganya gufashamo Leta y’u Rwanda bizagenda neza ntakabuza.

Umuyobozi wa IPRC West, Mugiraneza Jean Bosco, yabwiye Kigali Today ko ababishinzwe bamumenyesheje ko amasoko y’izo nyubako n’ibikoresho yamaze kugera mu Mvaho Nshya, kandi ko kuri uyu wa gatatu tariki 26-06-2013 abazapiganirwa amasoko bazasura ikigo.

Gasana Marcellin