Umunyeshuri wari uhagarariye abarangije, Bertrand, yavuze ko muri kaminuza zigenga habamo intiti nko muri za kaminuza za Leta kandi ngo hari ababa banagize amanota menshi bikaba bikwiye ko bajya bagenerwa amaburuse nk’uko abo mu za Leta bazigenerwa.

Umuyobozi w’ikigo gishinzwe amashuri makuru mu Rwanda, Geofrey Rugege, yavuze ko buruse zitazajya zipfa guhabwa abanyeshuri babonetse bose kuko muri gahunda za Leta izi buruse zizajya zihabwa abize amasiyansi n’imyuga.

Rugege yavuze ko n’abashoramari bajya batanga amaburuse yo kujya kwiga hanze ku bantu bashaka ariko ahanini bakunze gufata abo mu masiyansi n’imyuga.

Leta ikeneye abize amashami y’imyuga na siyanse ngo bajye babasha gushyira mu bikorwa gahunda z’iterambere za Leta yihaye; nk’uko umuyobozi w’ikigo gishinzwe amashuri makuru mu Rwanda yabisobanuye.

Abanyeshuri ngo bazatangira kujya bigishwa ibijyanye n’imyuga muri gahunda z’amashuri yisumbuye kugira ngo bajye basohoka mu mashuri bashobora kwihangira umurimo.

Ni ku nshuro ya kabiri ICK itanga impamyabumenyi. Abanyeshuri bazihawe ni abize itangazamakuru n’itumanaho (journalisme et Communications), ubumenyi mu iterambere (Sciences de Développement) ndetse n’imbonezamubano n’icungamutungo (Sciences Sociales, Economiques et gestion).

ICK yatangiye tariki 21/10/2002, ryemerwa n’iteka rya minisitiri ryo ku wa 27 Werurwe 2003, abahawe impamyabumenyi bwa mbere muri iri shuri, bazihawe mu mwaka wa 2010.

Gerard GITOLI Mbabazi