Uyu mugore witwa Uwayisaba Beatrice usanzwe ushinzwe amafishi muri iyi Sacco, yaketswe ubwo yari agiye kubikuza amafaranga ku ifishi y’undi muntu ariko yamaze kwiyongeraho nk’umwishingizi yananditseho amafaranga uwo muntu adasanzwe afite kuri iyo konti.

Ubuyobozi bw’Akarere buvuga iko imikorere irangwa muri ibi bigo by’imari ituruka ku kuba ari umuco yafashe mu bihe bishize.

Umunyamabanga Nshingwabikorwa w’Umurenge wa Murundi, Kuzabaganwa Vedaste yatangarije Kigali Today ko umucungamari wa Sacco ari we wari wikoreye kuri guichet aza kugera ku ifishi imwe, arebye uko imeze agira amakenga kuko yabuze iziyikurikiye, azibajije ntiyabasha kuzibona, azibuze ahita akeka uwo wakoraga mu mafishi.

Yagize ati “Mu kumukeka baza no kumusaka basanga hari izindi fishi yambariyeho yari agiye gucyura wenda yashakaga kugira ibindi bikorwa akoreraho. Muri uko kumukeka baba bamuhagaritse iminsi mikeya y’agateganyo.”

Umucungamutungo w’iyi Sacco yatinze kubimenyesha inzego zishinzwe umutekano, bituma ahita acika ajya kwihisha mu bantu bo mu muryango we iminsi mike, ariko nyuma y’igihe gito aragaruka, aribwo kuwa gatatu yahitaga atabwa muri yombi.

Umuyobozi w’Akarere ka Karongi, Ndayisaba Francois, asanga ibibazo by’inyereza biri kugaragara mu bigo bitandukanye byiganjemo ama Sacco yo muri aka Karere biterwa n’imicungire mibi yagiye ibiranga.

Ati “Biba byaratewe n’imikorere mibi y’ayo ma Sacco, kandi ibigenda bigaragaye si ukuvuga byabaye ubu, ahubwo ni uko aribwo biri kigaragara, kandi turi gusaba ko za Sacco zose zakorerwa igenzura ngo turebe uko umutungo wa rubanda ucunzwe.”

Kugeza ubu Uwayisaba ufungiye kuri sitasiyo ya polisi ya Murundi, yiyemrera ko yafashwe amaze kwiba agera kuri 1,136,400 yagiye acisha ku mafishi y’abandi bantu, akayabikuza batayafite ku makonti yabo ahubwo ari ayo yiyandikiyeho gusa.

NDAYISABA Ernest