Iyo ugeze mu Rwanza cyane cyane ku munsi w’isoko, usanga abantu benshi bagura inyama z’ingurube. Abakunzi bazo bavuga ko kandi n’uruhu rw’ingurube rudapfa ubusa kuko na rwo barwotsa rukaribwa.

Ibishabiro babkundira ko biryoha kandi bihendutse.

Uruhu rw’ingurube rwokeje ni rwo rwitwa igishabiro. Abatuye Save bavuga ko ruryoha cyane kandi bakarukundira ko buri wese ashobora kugura bitewe n’uko yishyikira, uhereye ku mafaranga 50 y’u Rwanda.

Maniraho Jean Paul, umwe mu batuye mu Rwanza, ati “Uruhu rw’ingurube ruragurwa cyane ku buryo iyo babaze rudashobora gusigara cyangwa ngo rwangirike.”

Abaturage bagura ibishabiro bavuga ko babiteka mu mboga bakongeramo ibirungo maze bakabirisha ubugari, ariko hakaba n’ababirya byonyine.

Mukamazimpaka Jeanne, umwe mu bajya bagura uruhu rw’ingurube, avuga ko iyo yarutetse mu bishyimbo cyangwa imboga uwo munsi iwe baba bariye neza cyane kuko ngo bibaryohera.

Ati “Iyo wabitekanye n’imboga cyangwa ukabivanga n’ibishyimbo biraryoha cyane, iwanjye abana barabikunda mbega iyo nabitetse bavuga ko bariye neza cyane.”

Abakora akazi ko kotsa ibishabiro mu Rwanza na bo batangaza ko bibafasha, kuko babasha kwikemurira ibibazo babikesha ubu bucuruzi.

Nshimiyimana Vianney, ukora aka kazi, avuga ko uruhu rw’ingurube barushyira ku ikarayi rukabyara amavuta, aya mavuta na yo bakayakoresha bateka ifiriti y’ibijumba na byo bakabigura.

Ati “Ni umwuga untunze iwanjye kuko ntacyo mbura hamwe n’umugore wanjye n’abana, ndabahahira nkabambika byose bivuye mu bishabiro.”

Umurenge wa Save kuva kera uzwiho korora ingurube cyane, ndetse n’abahatuye usanga babyishimira kuko ubasha kugura itungo rigufi wese abanza kugura ingurube. Ibi binatuma inyama z’iri tungo ziribwa cyane muri aka gace.

Clarisse Umuhire