Kuri uyu wa gatatu mu muhango wo gusinya amasezerano y’imikoranire hagati y’ibi bigo byombi, Komiseri mukuru wa RRA Tusabe Richard, yavuze ko ubwo bufatanye buzabafasha kunoza akazi.

Yagize ati “TransUnion izaduha ubundi buryo bwo gukusanya imisoro bwiyongera ku bwo dusanganywe bityo umusaruro wiyongere.”

Tusabe avuga ko ayo masezerano azatuma RRA imenya neza abagomba gusora n’imyitwarire yabo, kuko hafi 90% y’abafite ibirarane by’imisoro usanga n’amabanki bakorana nayo batayishyura neza.

Ati “Ibi rero bizatuma tumenya uko dufata abasoreshwa batandukanye.”

RRA itangaza ko ifitiwe ibirarane by’imisoro bibarirwa muri miliyari 100. Muri aya mafaranga, miliyari 75 zifitwe n’abantu barimo bagerageza kwishyura, naho 25 zo ngo ziri mu ngorane ariko RRA ikaba iteganya no kwitabaza ubutabera mu kubyishyuza.

Umuyobozi wa TransUnion mu Rwanda Nkuranga Aimable, avuga ko iki kigo kimaze imyaka itanu gikorana n’ibigo by’imali bitandukanye, cyane cyane amabanki mu gutanga amakuru yose ajyanye n’inguzanyo na ba nyirazo.

Avuga ko amakuru batanga yatumye umubare w’inguzanyo zitishyurwa neza ugabanuka, kuko wavuye kuri 7% ugera kuri 6%, nk’uko Banki Nkuru y’Igihugu ibitangaza.
Nkuranga avuga ko ikigo akuriye gifite amakuru agera kuri miliyoni ajyanye n’inguzanyo, akizera ko nashyirwa hamwe n’aya RRA bizatanga umurongo mwiza wo gusoresha, cyane ko ayo makuru azaba agaragaza uko buri umwe muri bariya bantu yitwara.

Ati "Amakuru yose duhabwa n’ibigo by’imali aba arinzwe bikomeye ku buryo adashobora kujya ku wo atagenewe.”

Ibi kandi ngo bihabwa ingufu n’uko TransUnion igenzurwa na Banki Nkuru y’Igihugu kimwe n’ibindi bigo by’imali bikorera mu Rwanda.

Munyantore Jean Claude