Ibi Minisitiri Kaboneka yabitangaje ku wa 16 Werurwe 2015 ubwo yahaga ikiganiro abacuruzi baturutse mu Mujyi wa Kigali, bashoje itorero ryaberaga i Nkumba mu Karere ka Burera.

Muri icyo kiganiro kivuga ku muco wo gukunda igihugu, Minisitiri Kaboneka yabwiye abacuruzi 477 bo mu Mujyi wa Kigali ko Abanyarwanda ari bo bagomba guteza imbere igihugu cyabo birinda uwo ari we wese wagisubiza inyuma ahungabanya umutekano wacyo.

Yaberetse ko hari Abanyarwanda bagaragaje umuco wo gukunda u Rwanda, bararwitangira, ndetse baranarupfira.

Minisitiri Kaboneka yakomeje abwira abacuruzi bo Mujyi wa Kigali ko mu bucuruzi bwabo bagomba guhora bibuka ko hari ababa babacungiye umutekano hirya no hino mu Rwanda kugira ngo ubucuruzi bwabo budahungabana, abasaba kubatera ingabo mu bitugu batanga imisoro uko bikwiye.

Agira ati “Uyu munsi ntabwo tuvuga ngo mujye ku rugamba. Abana barwana barahari. Ariko bakeneye inkunga yanyu. Kumutera ingabo mu bitugu ni uko ugomba gukora ubucuruzi busukuye, busa neza, buhesha agaciro igihugu cyawe, ugasora uko bikwiye, kugira ngo wa mwana abone ikoti ryo kwambara ari mu birunga agucungiye umutekano ngo ubone uko ucuruza.”

Akomeza asaba abo bacuruzi kuba inyangamugayo ndetse n’icyitegererezo kandi bakirinda ubusambo, kuko ari byo biranga ingufu z’u Rwanda kandi bikaranga Umunyarwanda.

Agira ati “Mwa bacuruzi mwe ntimuzabe ibisambo! Iyi nda tujye twirinda ko iduteranya! Ntuzasebe, ntuzanduranye, ntuzateshwe agaciro n’iyi nda!”

Akomeza abasaba kandi gukomeza gushyira hamwe bagakora ubucuruzi bwabo barangamiye ejo hazaza.

Abacuruzi basoje itorero ryateguwe na Minisiteri y’ubucuruzi n’inganda (MINICOM) ifatanyije n’urugaga rw’abikorera mu Rwanda (PSF) bamaze mo icyumweru, bavuga ko bagiye kwishyira hamwe bagakora imishinga minini mu Mujyi wa Kigali kandi bakongera ibicuruzwa bajya gucuruza mu mahanga.

Norbert NIYIZURUGERO