Aba bacuruzi bavuga ko abashinzwe kwakira imisoro mu karere ka Kirehe baje bakabaca amafaranga menshi atajyanye n’ibyo bacuruza bagahitamo kureka gucuruza kuri uwo munsi w’isoko.

Manirakize Hasina, umwe muri abo bacuruzi avuga ko acuruza ubuconsho bagashaka kumusoresha nk’umuntu ucuruza ibintu byinshi.

Umunyamabanga nshingwabikorwa w’umurenge wa Nasho, Aderite Hakizamungu, avuga ko uburyo imisoro yakwa mu bacuruzi hamwe no mu isoko bizwi gusa ngo ikibazo cyabayemo ni abashinzwe imisoro babikoze mu buryo butari bwo muri iri soko kuko abacuruza ubuconsho bo batajya basoreshwa.

Umuyobozi w’akarere ka Kirehe wungirije ushinzwe ubukungu, Tihabyona Jean de Dieu, yemeza ko amakosa yakozwe n’abasoreshaga ariko ngo basobanuriye abacururiza muri iri soko ryo ku Murindi ikibazo kikaba cyakemutse.

Tihabyona akomeza avuga ko byatewe n’uburyo abakozi bashinzwe kwaka imisoro batasobanukiwe neza itegeko ry’imisoro bari basobanuriwe. Isoko ryo ku Murindi rirema buri wa kabiri w’icyumweru.

Grégoire Kagenzi