Mbere yo gufunga ikiyaga muri (Nyakanga 2012), umurobyi umwe ntiyarakirenza ibiro 20; nk’uko byemejwe n’umuhuzabikorwa w’umushinga w’uburobyi mu karere ka Karongi Sibomana Jean Bosco.

Sibomana yatangarije Kigali Today ko ibi ari ikimenyetso cy’uko ibyo bari bagamije bafunga i Kivu babashije kubigeraho kuko umusaruro ushobora no kuzikuba inshuro eshatu.

Abisobanura muri aya magambo: “Mbere tutarafunga twarobaga ibiro 500 ku munsi, ariko ubungubu turibuze kugeza kuri toni imwe n’ibiro 600. Mbere ikiro cyaguraga 1600RWariko ubu twagishyize kuri 1250FRW”.

Abacuruzi b’isambaza nabo bishimye cyane nyuma y’amezi abiri bamerewe nabi nk’uko uwo twaganiriye utashatse kwivuga izina yabivuze agira ati: “Twari tumerewe nabi kubera ko ni wo murimo dukora wonyine, ariko ubu turishimye cyane kandi n’ibiciro byagabanutse”.

I Kivu kitarafungwa barobaga ibiro 500 ku munsi, ariko ngo bizeye ko umusaruro uza kwikuba gatatu.

Guhagarika uburobyi mu Kivu ni gahunda izajya ikorwa buri mwaka mu mezi ya Kanama na Nzeri kugira ngo amafi ajye abona akanya ko kororoka igihe umusaruro wabaye muke.

Ku nshuro ya mbere byakozwe hanagamijwe guca akajagari kaboneka mu burobyi kubera ko abarobyi basaga 1000 nta byangombwa n’ibikoresho byabugenewe bari bafite.

Rubavu: Amafi ntiyakuze cyane kubera kubura ibyo kurya

Mu karere ka Rubavu ho nta byishimo bihari cyane kubera ko amafi atakuze kandi ngo umusaruro ntiwiyongereye cyane ugereranyije n’abashaka amafi n’isambaza.

Abaturage batangaza ko ubwinshi bw’abazishaka buruta umusaruro abarobyi barobye kandi ibiciro biri hejuru, ugereranyije n’uburyo ibiciro byahoze.

Mu joro rishyira tariki 03/10/2012, bashoboye kuroba ibiro 84 mu gihe mbere yo gufunga barobaga ibiro icumi; nk’uko bitangazwa na Habanabakize Salim ukuriye koperative Ingwizabahizi ikora uburobyi mu kiyaga cya Kivu mu karere ka Rubavu.

Abaturage bari baje kugura amafi n’isambaza ari benshi.

Umusaruro wabonetse ngo urashimishije ugereranyije n’uwabonekaga mbere uretse ko amafi atari manini bitewe no kutabona ibyo kurya.

Siborurema Bodouin ukuriye amakoperative akora uburobyi mu kiyaga cya Kivu mu karere ka Rubavu avuga ko mbere ifi zaryaga imbetezi uruganda rwa Bralirwa rwamenaga mu Kivu none rusigaye ruzigurisha.

Izi mbetezi abarobyi bavuga ko amafi yaziryaga akabyibuha kandi akiyongera, ariko kubera uru ruganda rwahagaritse gushyira izi mbetezi mu kivu ngo byatumye umusaruro utuba ndetse n’amafi ntakibyibuha.

Kubera kubura ibiryo amafi ntakura bishimishije.

Bralirwa ivuga ko yabihagaritse kubera REMA yababujije bitewe n’itegeko rigenga uburobyi rivuga ko amazi rusange adafumbirwa.

Abaturage bavuga ko iryo tegeko ridakwiye kubabangamira cyane ko izo mbetezi ziva mu nzoga inyobwa bityo ntacyo zangiza kuko na Bralirwa izigurisha aborozi ahubwo ubuyobozi bukwiye kubasabira Bralirwa kubafasha.

Gasana Marcellin na Sylidio Sebuharara