Ibikorwa remezo birimo inzu zo gukoreramo amazi, amashanyarazi, insinga za internet yihuta n’imihanda biri mu bikorwa by’ibanze byamaze gusozwa muri iki gice kibaye icya mbere mu bice by’ubucuruzi bigezweho mu Rwanda.

Mu kiganiro n’abanyamakuru, kuri uyu wa kabiri tariki 16/10/2012, Umuyobozi w’Ikigo cy’Igihugu cy’Iterambere (RDB), Claire Akamanzi, yatangaje ko abantu bose cyane cyane Abanyarwanda bahawe ikaze mu kuhashora imari yabo.

Yagize ati: “Ni ahantu hihariye hateza imbere Abanyarwanda ndetse n’abanyamahanga muri rusange, niyo mpamvu hashizweho imbaraga mu gushyiraho ibikorwa remezo byihuse”.

Ibi yabitangaje nyuma y’inama ubuyobozi bwa RDB bwagiranye n’abikorera n’ibindi bigo bitandukanye, mu rwego rwo kurebera hamwe koroshya akazi kazahakorerwa, gutanga akazi no korohereza abazahakorera gutanga imisoro yabo.

Nyuma yo kurangiza icyiciro cya mbere cy’ibikorwaremezo, hazakurikiraho ibindi bibiri birimo igice cy’inganda n’igice cy’indabo. Ibyo bizatangira gukorwa ari uko iyubakwa ry’ibikorwa remezo ryamaze kugera kuri 70%.

Kugira ngo ufate ikibanza ugomba kubanza kwishyura amadolari y’Amerika ibihumbi 10, andi ukazagenda uyishyura gahoro gahoro, ndetse bamwe mu bashoramari bagera ku munani bamaze kuhagera bamaze kuyishyura yose, nk’uko byatangarijwe muri iyi nama.

Usibye abazaturuka ahandi, abenshi mu bazakorera muri iki kibanza ni abahoze bakorera ibikorwa byabo i Gikondo hazwi ku izina rya Park Industriel.

Emmanuel N. Hitimana