Uru rubuga rushyizwe ahagaragara nyuma y’aho u Rwanda rugaragarije ubudahangarwa mu rwego rw’isi, mu korohereza abashoramari ariko ugasanga hari ibindi bitaranozwa cyane cyane mu itangwa ry’amakuru ku byangombwa bisabwa.

www.businesslicences.gov.rw ni rwo rubuga ruje guha amakuru abantu bahuraga n’imbogamizi mu gushaka amakuru hakaba n’ubwo bibeshya; nk’uko byatangajwe na Kaliza Karuretwa, umuyobozi w’igice cy’inganda n’ishoramari muri MINICOM.

mu muhango wo kumurika uru rubuga kuri uyu wa gatatu tariki 07/11/2012, Karuretwa yagize ati: “Abantu benshi bazi ko iyo barangije kwiyandikisha muri RDB biba birangiye ariko hari ibindi umuntu ategetswe kubahiriza bitewe n’ibyo agiye gukora. Urugero nka resitora atandukanye n’ushaka gukora igaraji”.

Gusa uru rubuga ntiruriho amakuru yo mu bice byose umuntu yakenera, kuko hariho ibigera ku munani gusa. Karuretwa akavuga ko bahereye ku bikomeye bagejejweho n’abikorera ubwabo basaba ko ari zo zabanza koroherezwa.

Ibyo byangombwa ni ibijyanye n’ubutaka, kunyuza ibicuruzwa kuri gasutamo, ibyangombwa byo gutwara ibyangombwa, uruhushya rwo kubaka, uruhushya rwo gutumiza imiti, gukora ibikorwa byabangamira ibidukikije n’icyangombwa kigaragaza ko nta misoro umuntu afite.

Karuretwa yakomeje avuga ko umunsi byatangiye kubahirizwa bizanagabanya igiciro abantu batangaga kugeza kuri 32%.

Uru rubuga ntirureba abaturage basanzwe, keretse uwifuza gutanga ibitekerezo no kubaza cyangwa ushaka kwinjira mu bucuruzi, kuko kugeza ubu rukiri mu cyongereza.

Emmanuel N. Hitimana