Byatangarijwe mu kiganiro Minisiteri y’imali n’igenamigambi yagiranye n’abanyamakuru kuri uwu wa 9 Ukuboza 2015, nyuma yo gushyira umukono ku masezerano y’iyi nkunga hagati y’impande zombi bireba.

Ku ruhande rw’u Rwanda, aya masezerano yashyizweho umukono na Minisitiri w’Imari n’Igenamigambi, Amb Gatete Claver na Hesham Al-Waqayan, Umuyobozi Wungirije wa KFAED ku ruhande rwa Koweti.

Minisitiri Gatete yavuze ko uwu muhanda wari umaze igihe kinini ushakirwa amafaranga yo kuwukora bitewe n’akamaro ufite.

Agira ati "Uyu muhanda wa kilometero 73 ni igice kimwe cy’umuhanda Nyagatare-Rukomo- Base wa kilometero 124.8, uzaba uhuza intara y’Iburasirazuba n’Amajyaruguru, aya mafaranga akaba ari yo yaburaga ngo utangire ukorwe".

Minisitiri Gatete akaba ashimira byimazeyo igihugu cya Koweti kubera iki gikorwa kije gisanga ibindi cyajyaga gikora mu Rwanda byiganjemo ibikorwaremezo.

Umunyamabanga wa Leta muri Minisiteri y’Ibikorwa Remezo ushinzwe Ubwikorezi, Nzahabwanimana Alexis, avuga ko uwo muhanda byari bikenewe ko ukorwa neza.

Agira ati "Uzadufasha mu mihahiranire cyane cyane kugeza umusaruro ku masoko kuko uzaba ari umuhanda wiyongereye mu yo dusanganywe mu muhora w’Amajyaruguru iduhuza na bimwe mu bihugu duturanye".

Akomeza avuga ko ibikorwa byo kubaka uwu muhanda bizatangira mu ntangiriro z’umwaka wa 2017 kuko hari ibindi bitararangira bijyanye n’iki gikorwa.

Igihugu cya Koweti gisanzwe gitera u Rwanda inkunga mu bijyanye n’ibikorwaremezo birimo kubaka Ibitaro bya Nyagatare, gukora umuhanda Ngororero-Mukamira n’uwa Rubengera-Gisiza ndetse no kuzubaka Ikibuga cy’Indege cya Bugesera.