Kuri uyu wa Kane tariki 13/3/2014, Komiseri mukuru wa RRA, Richard Tusabe, n’uhagarariye Ubuholandi basinye masezerano azamara imyaka ibiri, nyuma y’uko impande zombi zigenderaniye mu rwego rwo kureba imikorere ya buri gihugu.

Komiseri Tusabe yatangaje ko nyuma y’uko basuye Ubuholandi bakirebera uko igice cy’imisoro n’amahoro gikora biyemeje gukorana nabo kuko hari aho bageze kugira ngo u Rwanda narwo rutere imbere muri iki gice rugabanye n’amakosa yahagaragaraga.

Yagize ati "Mu kwezi kwa Kabiri twagiye mu Buholandi tureba imikorere yabo, tumaze kubasura biba ngombwa ko nabo baza bakareba uko dukora.

Ubu rero baradusuye bari bamaze iminsi inaha bareba uko dukora, kugira ngo babone aho batangirira baza kudufasha kunoza isoresha no kwakira imisoro n’amahoro. Icyo rero aya masezerano akubiyemo ni ingamba tuzafata n’ibice tuzibandaho mu bufatanye dufitanye nabo."

Peter Van Tienhoven, umujyanama mpuzamahanga ku misoro mu Buholandi, yatangaje ko kuba igihugu cye hari intambwe kimaze gutera mu gukusanya imisoro myinshi bifuza ko n’u Rwanda nk’igihugu bifitanye ubucuti cyatera imbere muri icyo gice.
Yavuze ko mu gihugu cye gutanga imisoro byoroshye kubera uburyo bashyizeho kandi n’abaturage bakabyibonamo.

Aya masezerano yasinywe kuri uyu wa 13/03/2014 ateganya ko u Rwanda ruzahabwa ubumenyi ku bijyanye no kugenzura abantu bagifite intege nke mu gutanga imisoro ariko banarebeye ku mitungo bafite mu rwego rwo kugaruza imitungo ishobora kunyerezwa.

U Rwanda ruzanungukira cyane mu buryo bwo gufasha abaturage gutanga imisoro mu buryo bworoshye, ku buryo abantu bibanogera. Isoresha ku bucuruzi mpuzamahanga nabyo biri mu byo u Rwanda ruzahugurwamo kugira ngo rugendane n’igihe.

Imibare y’agateganyo itangwa na RRA igaragaza ko byibyura buri mwaka imisoro igira icyuho ya 4% kubera imisoro idatangwa biturutse ku bibazo bitandukanye u Rwanda rwitegura guhangana nabyo.

Emmanuel N. Hitimana