Nashamaje Antoine n’umugore we bose babana n’ubumuga, inzu babagamo yari ishaje cyane ku buryo yari hafi kubagwaho, baza kugobokwa n’ishuri ryigisha imyuga itandukanye rya Mpanda VTC baturanye.

Bishimiye iki gikorwa ngo kuko bagiye kujya bataha ahantu heza kandi bakanarushaho gusa neza. Cyane cyane ariko ngo barashimira Leta y’ubumwe yashyizeho umuco wo kuremerana.

Ndangamira Gilbert, umuyobozi wa Mpanda VTC, yavuze ko nk’ikigo cyigisha kubaka, ko bihaye ingamba z’uko abaturage bagituriye bagomba kugira kuri ayo mahirwe, ibyo bigisha abana babo nabo bakabikorerwa.

Yagize ati “si ubwa mbere kuko mu myaka ya shaze twubakiye abashigajwe inyuma n’amateka batanu. Ubu twageze hano, dusanga uyu muryango inzu igiye kubagwaho, nibwo abarimu bishyize hamwe bateranya amafaranga, hanyuma banafatanya n’abanyeshuri bigisha kubaka bubakira uyu muryango”.

Ubwo Nashamaje yashyikirizwaga iyo nzu ku mugaragaro, Umunyamabanga wa Leta ushinzwe amashuri abanza n’ayisumbuye, Rwamukwaya Oliver yavuze ko iki ari igikorwa cyiza, ariko anizeza ko kitazagarukira aha kuko ibigo by’amashuri bizafata iya mbere mu gufasha abatishoboye. Uyu muhango kandi wanitabiriwe n’umuyobozi w’ikigo cy’igihugu gishinzwe guteza imbere ubumemyi ngiro (WDA) Gasana Jerome.

Iyi nzu banyirayo bayitashye yari amaze no gushyirwamo ibyangombwa byose, birimo intebe, ibitanda na matera, ikaba ikikijwe n’uturima tw’igikoni n’ingarani.

Eric Muvara